CNI News

၂၀၂၄ ခုနှစ်၊ စက်တင်ဘာ ၁၃

ဒေါ်လာအပါဝင် နိုင်ငံခြားငွေဈေးများသည် ယခုရက်သတ္တပတ်အတွင်း ပြန်လည်ကျဆင်းနေသော်လည်း စက်သုံးဆီဈေးနှုန်းများမှာမူ ပြန်မကျသေးသဖြင့် စီးပွားရေးလုပ်ငန်းရှင်များနှင့် ဘဏ်ရေးရာကျွမ်းကျင်သူများ အကြား သုံးသပ်ဆွေးနွေးမှုများရှိနေသည်။

စက်သုံးဆီဈေးနှုန်းများ ပြန်မကျခြင်းသည် လက်ရှိတွင် ကမ္ဘာ့ရေနံပေါက်ဈေးမှာ အတက်ဘက်တွင်ရှိနေသည့် အတွက်ကြောင့်လည်း ဖြစ်နိုင်ကြောင်း၊ စက်သုံးဆီကို စာချုပ်ဖြင့်ဝယ်ယူသည့်အခါတွင် ဆီသင်္ဘောများအား လနှင့်ချီ၍ စောင့်ဆိုင်းရခြင်းဖြစ်သဖြင့် ယခုရောင်းချပေးသည့်ဆီများသည် ဒေါ်လာတက်ဈေးဖြင့် ဝယ်ထား သည်များ ဖြစ်နိုင်ကြောင်း သုံးသပ်ကြသည်။

သို့သော် ယခုတွင် ဒေါ်လာဈေးနှုန်းမှာ ယခင်ထက် အတိုင်းအတာတစ်ခုအထိသို့ ကျဆင်းနေပြီဖြစ်သောကြောင့် စက်သုံးဆီတင်သွင်းဖြန့်ဖြူးရောင်းချရေးကော်မတီ အသင်းအဖွဲ့များအနေဖြင့် လုပ်ငန်းရှင်များအား ကြပ်မတ်ရန် လိုကြောင်း စီးပွားရေးလုပ်ငန်းရှင်တစ်ဦးဖြစ်သည့် ဦးအောင်ပြည့်စုံက CNI သတင်းဌာနသို့ ပြောသည်။

“ဒီနေ့တော့ ဒေါ်လာဈေးကျသွားပြီဟေ့ ၅၂၀၀ နဲ့။ ငါ့ကို ၅၂၀၀ နဲ့ ရောင်းပေးပါလို့ပြောလို့၊ ဒီနေ့ ရောင်းပေးမယ့် ၅၂၀၀ နဲ့ရောင်းပေးတဲ့စက်သုံးဆီသင်္ဘောက ချက်ချင်းကြီး ဝုန်းဒိုင်းနဲ့ သီလဝါကို ရောက်မလာဘူးပေါ့။ ဆိုတော့ လနဲ့ချီပြီးစောင့်ရတာဖြစ်ပါတယ်။ ဒါအရင်တုန်းက ဝယ်ထားတဲ့ဈေးတွေနဲ့ ရောက်နေတဲ့ သင်္ဘောတွေ ဖြစ်ပါတယ်။ ဆိုတော့ ဒီဈေးနှုန်းတွေနဲ့ သူတို့က ရောင်းချနေရတဲ့အပိုင်းတွေ ရှိပါတယ်။ စက်သုံးဆီတင်သွင်း ဖြန့်ဖြူးရောင်းချရေးအသင်းက တာဝန်ရှိသူတွေအနေနဲ့လည်း ဒီအပိုင်းကို သိပြီးသားဖြစ်မှာဖြစ်တဲ့အတွက် ကိုယ့်မှာရှိတဲ့လုပ်ငန်းရှင်တွေကို ဒီကိစ္စကို ကြပ်မတ်ဖို့လိုပါတယ်။ ဈေးတက်ရင် တက်သလို ယူထားပြီးပြီ ဖြစ်တဲ့ အတွက် ဈေးကျတဲ့အခါမှာလည်း ရိုးရှင်းစွာနဲ့ဈေးပြန်ချပြီး ပြည်သူတွေမျက်နှာကို ပြန်ကြည့်ကြဖို့ ဒီနေရာကနေ တောင်းဆိုချင်ပါတယ်” ဟု ၎င်းက ပြောသည်။

ဆီတင်သင်္ဘောတစ်စင်းကို တွေ့ရစဉ်

လက်ရှိတွင် ကုန်သွယ်မှုများသည် မည်သည့်ပုံစံဖြင့်သွားနေသည်ကို ခန့်မှန်းရခက်သဖြင့် ဒေါ်လာဈေး ကျသော်လည်း အခြားဆက်စပ်ကုန်ပစ္စည်းများမှာ ဈေးမကျကြောင်း၊ ထိုသို့ ဈေးမကျခြင်းသည် တက်ဈေးဖြင့် ဝယ်ယူထားခြင်းကြောင့် ဖြစ်နိုင်ကြောင်း ပြန်မကျသေးသဖြင့် စီးပွားရေးလုပ်ငန်းရှင်များနှင့် ဘဏ်ရေးရာ ကျွမ်းကျင်သူများက ထောက်ပြကြသည်။

သို့သော် ဈေးမကျသည့် အကြောင်းအရင်းအမှန်မှာ တက်ဈေးဖြင့်ဝယ်ယူထားခြင်းကြောင့် မဟုတ်ဘဲ အခြား အကြောင်းတရားများလည်း ရှိနိုင်ကြောင်း ဘဏ်ရေးရာကျွမ်းကျင်သူ ဦးဋ္ဌေးအောင်ကြည်က CNI သတင်းဌာနသို့ ပြောသည်။

“ဆီဆိုရင် Just in time ဆိုတာ အခု ဒေါ်လာဈေးကျပြီတဲ့ ဆီဈေးမကျသေးဘူး။ ၃၂၀၀ လောက်နဲ့ ဝယ်နေရတာ။ supply များရင် ဈေးကျတာပေါ့။ supply ကို အများကြီးဆောင်ထားလို့ရှိရင် ဈေးကလျော့သွားမှာဆိုတော့ ယေဘုယျအားဖြင့်တွေးကြတာ၊ အခုက ဒေါ်လာဈေးကျပြီး ဆီဈေးက မကျဘူး။ ပြောချင်တဲ့အဓိပ္ပါယ်က ဘာလဲဆိုတော့ ဈေးမြင့်နဲ့ဝယ်ထားရတာတွေကို သူတို့ဈေးအနိမ့်နဲ့ ထုတ်မရောင်းနိုင်တဲ့  သဘောများလား။ ပြောချင်တာက အကြောင်းအရာတွေက တစ်ခုနဲ့တစ်ခု အနုစိပ်ဆက်နွယ် ပတ်သက်နေတယ်။ အဲဒီ သဘော တရားကိုမြင်မှပဲ ကိုင်တွယ်ရအဆင်ပြေလိမ့်မှာပေါ့။ JIT မဖြစ်ဘူးပေါ့ သဘောက ရှိတဲ့ stock က။ အမြင့်ဈေးနဲ့ ဝယ်ထားမိတာရှိမယ် အခု ဒေါ်လာဈေးကျလာပြီ ဆီဈေးကမကျသေးဘူး။ တခြားပစ္စည်းလည်း ထိုနည်း လည်းကောင်း ဖြစ်မှာပေါ့” ဟု ၎င်းက ပြောသည်။

လက်ရှိတွင် ဒေါ်လာဈေးအပါအဝင် နိုင်ငံခြားငွေဈေးများသည် အနေအထားတစ်ခုတွင် တည်ငြိမ်နေခြင်းက မြန်မာကျပ်ငွေပြန်မာလာခြင်းကြောင့်မဟုတ်ဘဲ ဗဟိုဘဏ်မှ ဒေါ်လာများအား အလုံးအရင်းဖြင့် ထုတ်ရောင်းပေး နေခြင်းကြောင့် ဖြစ်ကြောင်း သုံးသပ်မှုများရှိသည်။

CNI News

၂၀၂၄ ခုနှစ်၊ စက်တင်ဘာ ၁၂

ထိုင်းနိုင်ငံသားများအနေဖြင့် ယခုရက်ပိုင်းအတွင်း မြန်မာရွှေ့ပြောင်းများအပေါ် ယခင်ကထက် ပိုမိုအမြင်မကြည် ဖြစ်လာကြကြောင်း ရွှေ့ပြောင်းအလုပ်သမားအရေးဆောင်ရွက်နေသူများက CNI သတင်းဌာနသို့ ပြောသည်။

ထိုင်းနိုင်ငံတွင် မြန်မာနိုင်ငံသားရွှေ့ပြောင်းဦးရေမှာ ပိုမိုဖောင်းပွလာနေကာ Live လွှင့်ဈေးရောင်းခြင်း၊ အထောက်အထား ပြုလုပ်ပေးခြင်း၊ ပွဲစားများပြုလုပ်ခြင်း စသည်တို့ကို ပေါ်ပေါ်ထင်ထင် ပြုလုပ်လာကြသည့် အတွက် ထိုင်းနိုင်ငံသားများအတွက် အမြင်မကြည်ဖြစ်စေကြောင်း ရွှေ့ပြောင်းအလုပ်သမားအရေး ဆောင်ရွက် နေသူများက CNI သတင်းဌာနသို့ ပြောသည်။

အလုပ်သမားအခွင့်အရေးဖောင်ဒေးရှင်း LRF မှ ဦးအောင်ကျော်က “ကျနော်တို့ နိုင်ငံသားတွေက ဝင်ပြီးမှ လုယူ သလို ဖြစ်သွားတာပေါ့။ ဥပမာ အွန်လိုင်းဈေးရောင်းတဲ့ လုပ်ငန်းတွေမှာ မြန်မာလုပ်သားတွေက တော်တော်များ များ လုပ်နေကြတယ်။ ဒါပေမယ့် အဲဒါတွေက တားမြစ်ထားတဲ့ လုပ်ငန်း အမျိုးအစားတွေထဲမှာ ပါနေတဲ့အတွက် ကြောင့် မြန်မာနိုင်ငံသား အများစု တော်တော်များများ online shopping တွေ တအားလုပ်နေကြတဲ့အခါမှာ သူတို့ ကိုယ်တိုင် ဈေးဆိုင်ဖွင့်လှစ်ပြီး ရောင်းချတာတို့၊ သူတို့လုပ်နေတဲ့ ရောင်းအားကျသွားတဲ့အခါမှာ ဒါတွေကို နိုင်ငံတော်အစိုးရကို တင်ပြပြီးမှ ဒါတွေကို တားမြစ်ပေးပါဆိုပြီး တောင်းဆိုတာတွေရှိတယ်။ ဒါကြောင့်မို့လို့ အဲဒီ ဟာတွေက အခုနောက်ပိုင်းမှာ အဖမ်းအဆီး လုပ်မယ်၊ အရေးယူမယ်ဆိုတာတွေ ပေါ်ပေါက်လာတာဖြစ်ပါတယ်” ဟု ပြောသည်။

ထိုင်းအာဏာပိုင်များက ရွှေ့ပြောင်းလုပ်သားများကို ဖမ်းဆီးထားစဉ်

တိုင်းတစ်ပါးနိုင်ငံ၏ ဥပဒေများအား သေချာစွာ မလေ့လာထားဘဲ မြန်မာနိုင်ငံကဲ့သို့ ပြုမူနေထိုင် လုပ်ကိုင်နေကြ သည့်အတွက် ပိုမိုအမြင်မကြည် လာကြခြင်းဖြစ်ကြောင်း ရွှေ့ပြောင်းလုပ်သားများအရေး ကူညီပေးနေသူများက ထောက်ပြကြသည်။

ထိုင်းနိုင်ငံတွင် တားမြစ်ထားသည့် လုပ်ငန်းများအား လုပ်ကိုင်ကြရာတွင်လည်း အထောက်အထား ရှိသူများ သာမက အထောက်အထား မရှိသူများပါ လုပ်ကိုင်နေကြခြင်းဖြစ်ကြောင်း၊ ပြီးခဲ့သည့် ရက်ပိုင်းက အထောက် အထား မရှိဘဲ Live လွှင့် ဈေးရောင်းနေသည့် မြန်မာနိုင်ငံသားအချို့ ဖမ်းဆီးခံလိုက်ရသည်။

ထို့အပြင် အထောက်အထား ပြုလုပ်သည့် ကိစ္စနှင့်ပတ်သက်၍ ဗွီဒီယိုရိုက်ကူးပြီး ဖော်ပြထားသည့် မြန်မာ အမျိုးသမီးနှင့် ပတ်သက်၍လည်း အရေးယူ ဆောင်ရွက်သွားမည်ဖြစ်ကြောင်း ထိုင်းအလုပ်သမားဝန်ကြီးဌာနမှ ထုတ်ပြန်ထားသည်။

ထိုင်းတွင် အာဏာပိုင်များမှ AI နည်းပညာ အသုံးပြု၍ ရှာဖွေဖမ်းဆီးခြင်းများ ပြုလုပ်နိုင်သည့်အတွက် မြန်မာနိုင်ငံ သားများ အနေဖြင့် သတိပြုနေထိုင်ကြရန် ပညာရေးနှင့်ဖွံ့ဖြိုးတိုးတက်ရေးဖောင်ဒေးရှင်း FED မှအလုပ်သမား တာဝန်ခံ ဦးမင်းဦးက CNI သတင်းဌာနသို့ ပြောသည်။

ထိုင်းအာဏာပိုင်များက ရွှေ့ပြောင်းလုပ်သား တစ်ဦးကို စစ်ဆေးနေစဉ်

၎င်းက “နောက်ဆို ဒီထက်ပိုဖြစ်မှာပါ။ ဘာလို့ဆို မြန်မာတွေ ထင်တာက ကိုယ်ပြောချင်တာပြောလိုက်ရင် ပြီးသွား တယ် လို့ထင်တာ။ မဟုတ်ဘူး ဒီခေတ်က AI သုံးပြီးတော့ ရှာဖွေတာ ပိုပြီးတိကျလာတယ်။ တစ်ခုခုဆိုတာနဲ့ ထိုင်း တွေက AI နဲ့ ပြန်လိုက်ရင် အကုန်လုံး သိနေပြီလေ။ ဆိုတော့ ပြဿနာတွေက ပိုတက်မှာပေါ့နော်။ ပြောရရင်တော့ သတိလေးနဲ့ နေမှရမယ့် သဘောပေါ့။ အလုပ်သမားတွေကလည်း အများကြီးဆိုတော့။ အခုကာလမှာကတော့ တော်တော်လေး ဆိုးနေတယ်လို့ ပြောလို့ရတယ်။ ကျနော်တို့ တွေ့နေရတာတော့ ဆိုရှယ် မီဒီယာတွေကတဆင့် ကျနော်တို့ မြန်မာတွေက မသိဘဲ လုပ်လိုက်မိတဲ့ ဟာတွေက အကျိုးသက်ရောက်မှု တွေဖြစ်တာပေါ့။ အချိန်တော့ နည်းနည်း ပြန်ပေးရမယ်ထင်တယ် ” ဟု ပြောသည်။

ထို့အပြင် လက်ရှိ ထိုင်းအစိုးရအသစ်၏ မူဝါဒများကိုလည်း စောင့်ကြည့်ရမည်ဖြစ်ပြီး မြန်မာနိုင်ငံသားများ အနေ ဖြင့် ၎င်းနိုင်ငံ၏ ဥပဒေများကို သေချာလေ့လာပြီးမှ အလုပ်များအား လုပ်ကိုင်ကြရန် ရွှေ့ပြောင်းလုပ်သားများ အရေး ကူညီပေးနေသူများက အကြံပြုကြသည်။

CNI News

၂၀၂၄ ခုနှစ်၊ စက်တင်ဘာ ၁၂

ပြည်တွင်းတွင် နိုင်ငံရေးမတည်ငြိမ်မှုနှင့် လုံခြုံရေးအခြေအနေများ စိုးရိမ်ရသဖြင့် လာမည့် ပွင့်လင်းရာသီ၌ ပြည်တွင်းခရီးသွားလာမှုများ လျော့ကျနိုင်ကြောင်း ခရီးသွားလုပ်ငန်းရှင်တွေထံမှ သိရသည်။

နယ်မြေမတည်ငြိမ်မှုများကြောင့် ကန့်သတ်နယ်မြေသတ်မှတ်ထားမှုမှာလည်း ပိုမိုများပြားလာသဖြင့် ခရီးသွား လာရန် ဒေသခရီးစဉ်များ ယခင်ထက်လျော့နည်းလာကြောင်း ခရီးသွားလုပ်ငန်းရှင်တစ်ဦးဖြစ်သည့် ဦးသက်တိုးလွင်က CNI သတင်းဌာန သို့ ပြောသည်။

၎င်းက “အခုကတော့ ကန့်သတ်နယ်မြေတွေ များလာတာပေါ့နော်။ မန္တလေးတောင် ကျနော်တို့ ဧည့်သည်တွေ လာရင် မန္တလေးတောင် မတက်ရတော့ဘူး။ နောက် မင်းကွန်းဘက်တွေလည်း သွားလို့မရတော့ဘူး။ အဲ့လို ဖြစ်လာတာပေါ့နော်။ ခရီးစဥ်တွေထဲမှာ ကျနော်တို့ ထည့်ထားတာကို အင်းဝတို့ မင်းကွန်းတို့ ပါတယ်ဆိုပေမယ့် အခုသွားလို့မရဘူးပေါ့နော်။ မန္တလေးတောင် တက်တာတောင်မှ ကျနော်တို့ မနည်းပြောဆိုတက်ရတာပေါ့နော်။ အဲ့လိုမျိုးတွေတော့ရှိတယ်။ အင်းလေးဆိုလည်း အလားတူပဲ ဖယ်ခုံတို့ ဟိုဘက်တွေ သွားလို့မရဘူးပေါ့နော်။ ချင်းတို့ ကယားတို့ ရခိုင်တို့ ငပလီတို့နော်၊ နောက် ရှမ်းမြောက်တို့ ရှမ်းတောင်တို့ အခြေအနေက ပြောလို့မရဘူး ပေါ့နော်။ အင်းလေးတော့ သွားနေတုန်းပေါ့ ကျနော်တို့ ဧည့်သည်တွေ၊ နောက်ပြီး ဒီ တနင်္သာရီလည်းမရဘူး။ ကျိုက်ထီးရိုးတော့သွားတယ် ကျနော်ဧည့်သည်တွေက ကျိုက်ထီးရိုးတော့သွားကြပါတယ်” ဟု ပြောသည်။

ပြီးခဲ့သည့်နှစ်များက ပြည်တွင်းခရီးသွား ၇ သန်းခန့် ရှိခဲ့သော်လည်း ယခုအခါ ကုန်စျေးနှုန်းကြီးမြင့်ခြင်း၊ စက်သုံးဆီများပြတ်လပ်ခြင်းတို့ကြောင့် ကုန်းလမ်းကြောင်းဖြင့် ခရီးသွားလာမှုတွင် အခက်အခဲများ ရှိနိုင်သည့် အတွက် နည်းပါးသွားနိုင်ကြောင်း သုံးသပ်ကြသည်။

ထို့အပြင် လမ်းခရီးတွင် လူငယ်များ၊ လူလတ်ပိုင်းများအနေဖြင့် စစ်ဆေးမေးမြန်းမှုများလည်း ကြုံတွေ့ရကြောင်း သိရသည်။

လက်ရှိတွင် ပုဂံ၊ အင်းလေး၊ ကလော၊ ရန်ကုန်၊ ပဲခူး၊ ကျိုက်ထီးရိုး၊ ငွေဆောင်၊ ချောင်းသာ စသည့် ဒေသများကိုသာ ခရီးသွားလာရန် အဆင်ပြေကြောင်း သိရသည်။

ထို့အပြင် နိုင်ငံရေးမတည်ငြိမ်မှုများကြောင့် လုံခြုံမှုမရှိသဖြင့် ယခင်နှစ်များထက် ပြည်ပမှဝင်ရောက်သည့် ခရီးသွားဦးရေမှာ လျော့ကျသွားနိုင်ကြောင်း ခရီးသွားလုပ်ငန်းရှင် ဦးသက်တိုးလွင်က CNI သတင်းဌာနသို့ ပြောသည်။

ကမ်းခြေတွင် ခရီးသွားများကို တွေ့ရစဥ်

၎င်းက “မနှစ်ကတော့ အဝင်ကို 1.2 Million လို့ ပြောခဲ့တယ်။ ဟိုးတစ်နှစ်တုန်းကတော့ ၄၊ ၅ သိန်း လောက် ရှိတယ်။ ဒါပေမယ့် 1.2 Million ဆိုတာ နိုင်ငံတကာဧည့်သည်ပေါ့၊ International Visitor တွေက ဝင်ပေါက်က ကြည့်မယ်ဆိုရင်တော့ ၂ သိန်းခွဲပဲရှိတာ ရန်ကုန်က။ ကျန်တာတွေက border တွေက ကြည့်တာပေါ့နော်။ မူဆယ်တို့ တာချီလိတ်တို့ ကော့သောင်း ဝင်ပေါက်တို့ကကြည့်တာ။ အခုကြတော့ မူဆယ်ဝင်ပေါက်ကလည်း မသေချာတော့ဘူး၊ ပိတ်သွားပြီ။ တာချီလိတ်ဝင်ပေါက်နဲ့ ကော့သောင်းဝင်ပေါက်ဆိုတာလည်း Visitors Active လို့ပဲပြောရမှာပေါ့နော်။ ဒီနှစ်ကတော့ ကျနော်ထင်တယ် အီလည်လည်ပဲ ဖြစ်ဦးမှာ” ဟု ပြောသည်။

ပြည်တွင်းခရီးသွားလာမှုများသည့် ပုဂံဒေသတွင် လက်ရှိ ခရီးသွားလာမှုအခြေအနေ နည်းပါနေသော်လည်း လာမည့် ပွင့်လင်းရာသီတွင် ခရီးသွားများ ပိုမိုဝင်ရောက်နိုင်ရန် မျှော်လင့်ထားကြောင်း ပုဂံ၊ ညောင်ဦး ဟိုတယ်နှင့် ခရီးသွားဝန်ဆောင်မှု လုပ်ငန်းရှင် ကိုကျော်စွာလင်းက CNI သတင်းဌာန သိုပြောသည်။

၎င်းက “ ကျနော်တို့ လက်ရှိအခြေအနေအရကတော့ ပြည်ပကလည်း လာကြတဲ့ အဖွဲတွေလည်း ရှိတယ်ပေါ့နော်။ အဓိကတော့ ကျနော်တို့ကတော့ local ပေါ့၊ လက်ရှိအခြေအနေအရတော့ ကျနော်တို့ local ပေါ့။ ပြည်တွင်းက ဘုရားဖူးလာမယ့် အဖွဲတွေကို ကျနော်တို့က ပိုပြီးတော့ အလေးထား မျှော်လင့်ပါတယ်”ဟု ပြောသည်။

ယခုအခြေအနေအရ  ပြည်တွင်း၊ ပြည်ပ ခရီးသွားများ နည်းပါးနေသကဲ့သို့ ပြည်တွင်း၌ နေထိုင်သည့် နိုင်ငံခြားသား အနည်းငယ်ကိုသာ တွေ့ရကြောင်း သိရသည်။

ထို့အပြင် ခရီးသွားလုပ်ငန်းကို အမှီပြု အသက်မွေးဝမ်းကျောင်းပြုသူများအတွက်လည်း အကျပ်အတည်းများဖြင့် ရင်ဆိုင်နေကြရသည်။

CNI News

၂၀၂၄ ခုနှစ်၊ စက်တင်ဘာ ၁၁

ဒေါ်လာ အပါအဝင် နိုင်ငံခြားငွေ ဈေးနှုန်းများ ယခုရက်ပိုင်းအတွင်း ထပ်မံကျဆင်းလာသဖြင့် မြန်မာကျပ်ငွေ တန်ဖိုး ပြန်မာလာပြီလားဟု ပြည်သူများအကြား မေးခွန်းထုတ်လျက်ရှိသည်။

နိုင်ငံခြားငွေဈေး ကျဆင်းခြင်းသည် ကျပ်ငွေတန်ဖိုး ပြန်မာလာခြင်းကြောင့်ဟု ပြောရန်မှာ စောလွန်းသေးကြောင်း၊ လက်ရှိ နိုင်ငံခြားငွေ ကျဆင်းခြင်းမှာ ဒေါ်လာငွေ ဝယ်လိုအားများသည့် ကိစ္စတစ်ခု ခေတ္တရပ်သွားခြင်းကြောင့် ဖြစ်နိုင်ကြောင်း ဘဏ်ရေးရာကျွမ်းကျင်သူ ဦးဋ္ဌေးအောင်ကြည်က CNI သတင်းဌာနသို့ ပြောသည်။

၎င်းက “ပြန်မာတယ်လို့ပြောဖို့က စောသေးတာပေါ့။ ဒါပေမယ့် တစ်ခုရှိတာက ဒါပေမယ့် ဒေါ်လာငွေ demand ပေါ့ ဒေါ်လာငွေ လိုတဲ့ဟာ ရုတ်တရက် အကြောင်းကိစ္စတွေ ခဏခဏပေါ်ပုံရတယ်။ ကျနော်တို့လည်း တိကျ သေချာ မသိဘူးပေါ့။ တိုင်းပြည်မှာလေ ဒေါ်လာငွေအနုတ်ပေါ့ လိုအပ်တာပေါ့။ အဲဒီကိစ္စတွေ အားလုံးပြီးသွားတဲ့ အချိန်မှာ ပြန်ကျသွားရော။ ဒေါ်လာငွေက လောလောဆယ် ကုန်သွယ်မှုတို့၊ ရင်းနှီးမြှုပ်နှံမှုတို့၊ စီးပွားရေးတို့က မကောင်း ကြဘူးလေ။ အဲဒီအချိန်မှာ ဒေါ်လာကို အကြီးအကျယ် ကုန်သွယ်ရေးကြောင့် လိုစရာအကြောင်းတော့ တအားကြီးမရှိဘူး။ သို့သော်လည်း ဆောင့်ဆောင့်တက်တဲ့ သဘောတရားကြီးကတော့ ဒေါ်လာငွေ အနုတ်က တစ်နေရာရာမှာ တစ်ပွိုင့်ပွိုင့်မှာတော့ တအားများနေတဲ့အချိန်မှာ အဲဒီလိုဖြစ်တာ။ အဲဒီဒေါ်လာငွေ ဝယ်လိုအား တအားများတဲ့ကိစ္စ ခဏရပ်သွားတဲ့သဘောပေါ့။ ဘယ်လိုအကြောင်းတွေကြောင့် ဒေါ်လာငွေလိုလဲက အားလုံးက စဉ်းစားကြည့်ကြရမှာပေါ့လေ” ဟု ပြောသည်။

 ဗိုလ်ချုပ်မှူးကြီးမင်းအောင်လှိုင်နဲ့ Wan Yi တွေ့ဆုံစဉ်

ထို့အပြင် တရုတ်နိုင်ငံခြားရေးဝန်ကြီး မစ္စတာဝမ်ယိ မြန်မာနိုင်ငံသို့ လာပြီးနောက်ပိုင်း နစကနှင့် လုပ်ငန်းသဘော အရ ညှိနှိုင်းသဘောတူညီမှုများ ရရှိခဲ့သည့်အပြင် အကူအညီများလည်း ရရှိခဲ့ကြောင်း စီးပွားရေး လုပ်ငန်းရှင်များ ထံက သိရသည်။

ထို(တရုတ်)အကူအညီများ ရရှိခဲ့သည့်အတွက် နိုင်ငံခြားငွေ ဈေးကွက်သို့ သက်ရောက်မှုများရှိနိုင်ကြောင်း၊ ထို့အပြင် ဗဟိုဘဏ်မှလည်း ဒေါ်လာများအား ဈေးကွက်အတွင်းသို့ အလုံးအရင်းဖြင့် ထည့်နေခြင်းကြောင့် လက်ရှိ နိုင်ငံခြားငွေဈေးများ ကျဆင်းနေခြင်းဖြစ်ကြောင်း စီးပွားရေးလုပ်ငန်းရှင်များက သုံးသပ်သည်။

ဒေါ်လာငွေကြေး စီးဆင်းမှုကို ထိန်းချုပ်နိုင်ရန်အတွက် မည်သည့် အတိုင်းအတာအထိ လိုအပ်သည်ကို ပြောရန် ခက်သော်လည်း ဗဟိုဘဏ်အနေဖြင့် ဈေးကွက်ထဲသို့ ဒေါ်လာများ မည်သည့် အတိုင်းအတာအထိ ထည့်ပေး မလဲဆိုသည့် ပေါ်လစီအပေါ်သာ မူတည်ကြောင်း စီးပွားရေးလုပ်ငန်းရှင် တစ်ဦးဖြစ်သူ ဦးအောင်ပြည့်စုံက CNI သတင်းဌာနသို့ ပြောသည်။

ဒေါ်လာကို တွေ့ရစဉ် 

၎င်းက “ဘယ်အတိုင်းအတာ လောက်မှာပဲ ဈေးနှုန်းရှိသင့်တယ်လို့ သူတို့သတ်မှတ်ထားလဲ။ အဲဒီအတိုင်းအတာ ထဲကို မရောက်ရောက်အောင် အစိုးရအနေနဲ့ ဖန်တီးပြီးတော့ ဆောင်ရွက်ပေးမှာ ဖြစ်ပါတယ်။ ဒီအစိုးရရဲ့ ပေါ်လစီ ကို ဗဟိုဘဏ်က အကောင်အထည်ဖော်တဲ့ အခါမှာလည်း ဒီအပိုင်းကနေ အကောင်အထည်ဖော်မှာဖြစ်တဲ့အတွက် ဘယ်လောက်အထိ ဈေးကွက်ထဲ ထည့်မယ်ဆိုတာ ပြောရခက်ပေမယ့် သူတို့လိုချင်တဲ့ ပမာဏပေါ့နော်။ ကျနော် ခန့်မှန်းချက်အရတော့ အစိုးရအနေနဲ့ ဒေါ်လာဈေးကို ၅၀၀၀ အောက်အထိကို လျှော့ချဖို့အတွက် ပြင်ဆင်နေ တယ်လို့ကြားတယ်။ ၅၀၀၀ ထက် ပိုမများသွားဖို့အတွက် သူတို့ပြင်ဆင်တာတွေ လုပ်နေတယ် ဆိုတဲ့အခါ တစ်ဒေါ်လာ ငွေဈေးနှုန်းက ၅၀၀၀ အောက်ကျတယ်ဆိုရင် အရင်အခြေအနေ ထက်စာရင်တော့ ကောင်းတယ် ပေါ့နော်။ ကျနော်တို့ ဖြစ်စေချင်တာကတော့ ၄၀၀၀ ပတ်ချာလည်၊ ၃၉၀၀ ပတ်ချာလည်၊ ၃၈၀၀ ပတ်ချာလည် ဖြစ်သွားရင်တော့ အလွန်ကောင်းတဲ့ ကိစ္စပဲပေါ့နော်” ဟု ပြောသည်။

သို့သော် ထိုဈေးနှုန်း အနေအထားထိသို့ ပြန်လည်ရောက်ရှိရန်မှာ ခက်ခဲလှမည့် အနေအထားဖြစ်ကြောင်းလည်း ဦးအောင်ပြည့်စုံက ပြောသည်။

မြန်မာနိုင်ငံတွင် ဒေါ်လာ အပါအဝင် နိုင်ငံခြားငွေဈေးများ ကျဆင်းလာသည့် အခါတိုင်း ဈေးပြန်တက်ရန် ရည်ရွယ် ချက်ဖြင့် မသမာမှုများ လုပ်ဆောင်တတ်လေ့ရှိသဖြင့် ထိုအပေါ် အစိုးရဌာနဆိုင်ရာမှ အဂတိကင်းကင်းဖြင့် ဖမ်းဆီး ထိန်းချုပ်ရန် လိုအပ်ကြောင်းလည်း ထောက်ပြကြသည်။

CNI News

၂၀၂၄ ခုနှစ်၊ စက်တင်ဘာ ၁၀

ထိုင်းတွင် အနည်းဆုံး အခြေခံလုပ်ခလစာကို ဘတ် ၄၀၀ သို့ တိုးပေးမည်ဖြစ်သော်လည်း လုပ်သားအားလုံး ပါဝင် မည် မဟုတ်ကြောင်း ရွှေ့ပြောင်းအလုပ်သမားအရေး ဆောင်ရွက်သူများက CNI သတင်းဌာနသို့ ပြောသည်။

ယခင်ဝန်ကြီးချုပ် ဆရီသာ လက်ထက်၌ ရွှေ့ပြောင်းလုပ်သားများ၏ အခြေခံလုပ်ခလစာအား ဘတ် ၄၀၀ သို့ တိုးမြှင့်ပေးရန် လုပ်ဆောင်ခဲ့ပြီး လုပ်သားအားလုံးကို တိုးမြှင့်ပေးရန် ရည်ရွယ်ခဲ့သည်။

သို့သော် လက်ရှိ ဝန်ကြီးချုပ်အသစ်နှင့် အစိုးရအပြောင်းအလဲများ ဖြစ်ပေါ်ပြီးနောက် ဘတ် ၄၀၀ တိုးပေးမည့် မူဝါဒမှာ မပြောင်းလဲသော်လည်း ကန့်သတ်ချက်ဖြင့်သာ တိုးပေးသွားမည်ဖြစ်ကြောင်း ဘန်ကောက်ပို့စ် သတင်းတွင် ဖော်ပြခဲ့သည်။

ပညာရေးနှင့်ဖွံ့ဖြိုးတိုးတက်ရေးဖောင်ဒေးရှင်း FED မှ အလုပ်သမားတာဝန်ခံ ဦးမင်းဦးက “ဒါပေမယ့် အသေးစိတ် တော့ မသိရသေးဘူး။ သူတို့ ဝန်ကြီးအဖွဲ့ဖွဲ့တာပဲ တစ်ရက် နှစ်ရက်ပဲ ရှိသေးတယ်လေ။ အဲဒီတော့ မူဝါဒပိုင်း ဆိုင်ရာ အတိအကျတွေက ကျနော်တို့လည်း မသိရသေးဘူး။ သူတို့ရေးထားတဲ့ အထဲမှာတော့ အဲဒီ မပြောထား ဘူး။ သူတို့သတ်မှတ်ထားတဲ့ နေရာနဲ့ အလုပ်အပေါ် မူတည်ပြီးတော့ပဲ တိုးမယ့်သဘောရှိတယ်။ အကုန်လုံးကို ပေးတာ မဟုတ်လောက်ဘူး” ဟု ပြောသည်။

ထိုင်းက ဆောက်လုပ်ရေး လုပ်ငန်းခွင်တစ်ခုကိုတွေ့ရစဉ်

ယခုကဲ့သို့ ဘတ် ၄၀၀ တိုးမြှင့်ပေးခြင်းနှင့် ပတ်သက်၍လည်း စီးပွားရေးလုပ်ငန်းများအပေါ် ထိခိုက်စေနိုင်သည်ဟု လုပ်ငန်းရှင်များဘက်မှ စိုးရိမ်မှုများ ရှိနေကြသည်။

ရွှေ့ပြောင်းလုပ်သားများအား၏ အနိမ့်ဆုံး အခြေခံလုပ်ခလစာ မြှင့်တင်ခြင်းသည် ဖြူးထိုင်းပါတီ၏ ရွေးကောက်ပွဲ မဲဆွယ်စည်းရုံးစဉ် ကာလက ကတိတစ်ခုဖြစ်သည်။

အစိုးရသက်တမ်း ပထမနှစ်တွင် အနိမ့်ဆုံး အခြေခံလုပ်ခလစာအား ဘတ် ၄၀၀ သို့ တိုးမြှင့်ပေးမည်ဖြစ်ပြီး အစိုးရ သက်တမ်း ၂၀၂၇ ခုနှစ်အထိတွင် ဘတ် ၆၀၀ အထိသို့ တိုးမြှင့်ပေးမည်ဟု ကတိပြုခဲ့ခြင်း ဖြစ်သည်။

လက်ရှိတွင် ဝန်ကြီးချုပ်ဆရီသာ ရာထူးမှ ဖယ်ရှားခံရပြီး ပေတုန်တန်သည် ဝန်ကြီးချုပ်အဖြစ် ရွေးချယ်ခံရပြီး ရက်ပိုင်းအတွင်း အခြေခံလုပ်ခလစာ တိုးမြှင့်ရေးကို စတင်ခဲ့ခြင်းဖြစ်သည်။

သို့သော် အနည်းဆုံး အလုပ်သမား ၂၀၀ ရှိသော ကုမ္ပဏီများနှင့် စက်ရုံများတွင်သာ ကျင့်သုံးသင့်သည်ဟု ထိုင်းအလုပ်သမားဝန်ကြီးက ထုတ်ဖော်ပြောကြားလာသဖြင့် လုပ်သားအားလုံး တန်းတူညီမျှ တိုးပေးသင့်ကြောင်း အလုပ်သမားအခွင့်အရေးဖောင်ဒေးရှင်း LRF မှ ဦးအောင်ကျော်က CNI သတင်းဌာနသို့ ပြောသည်။

 ထိုင်းက ဆောက်လုပ်ရေး လုပ်ငန်းခွင်တစ်ခုကိုတွေ့ရစဉ်

၎င်းက “သူတို့က ကန့်သတ်ချက် limit တွေ ထားထားတာပေါ့။ လုပ်သားဦးရေ ဘယ်လောက်အထက်မှာ အဲဒီ စက်ရုံ၊ အလုပ်ရုံတွေက လုပ်အားခတိုးမြှင့်ခြင်းကို ခံစားရမယ်ဆိုပြီး ပြောဆိုလာတဲ့အခါမှာ ဒါ ကျနော်တို့ပထမဆုံး အတွေ့အကြုံပေါ့။ အမှန်တော့ တကယ်ဖြစ်စေချင်တာက လုပ်သား တစ်ဦးပဲဖြစ်စေ၊ နှစ်ဦးပဲဖြစ်စေ အားလုံးက အလုပ်ရှင်ကနေ တစ်ရက် ၈ နာရီ လူတိုင်းက အလုပ်လုပ်ရတဲ့ အတွက်ကြောင့် တန်းတူညီမျှ ရစေချင်တဲ့ သဘော မှာရှိပါတယ်။ သို့သော် သူတို့ပြောလိုက်တဲ့ အနေအထားမျိုးကတော့ ဘယ်လိုကြောင့် သူတို့အခုလို သုံးသပ် လိုက် တယ်ဆိုတာတော့ စဉ်းစားရခက်ပါတယ်” ဟု ပြောသည်။

လက်ရှိတွင် ထိုင်းနိုင်ငံ၏ အခြေခံ အနိမ့်ဆုံး လုပ်ခလစာသည် ပြည်နယ်ပေါ် မူတည်၍ တစ်ရက်လျှင် ဘတ် ၃၃၀ မှ ၃၇၀ ကြား ရရှိနေကြခြင်းဖြစ်သည်။

သို့သော် အချို့လုပ်ငန်းခွင်များရှိ ရွှေ့ပြောင်းလုပ်သားများအနေဖြင့် လုပ်ခလစာ အပြည့်အဝ မရရှိကြခြင်းကို လက်ရှိအချိန်ထိ ကြုံတွေ့နေကြရဆဲဖြစ်ကြောင်း၊ ထိုအခြေအနေများအား ထိုင်းအာဏာပိုင်များမှ စိစစ် ကြီးကြပ်သင့်ကြောင်း ရွှေ့ပြောင်းအလုပ်သမားအရေး ဆောင်ရွက်သူများက ထောက်ပြကြသည်။

CNI News

၂၀၂၄ ခုနှစ်၊ စက်တင်ဘာ ၉

မလေးရှားတွင် RTK 2.0 ပြန်လည်ဖွင့်လှစ်ပေးရန် မလေးလုပ်ငန်းရှင်များနှင့် အေဂျင်စီများက မလေးရှား လ.ဝ.က ထံ ထပ်မံတောင်းဆိုထားကြကြောင်း မလေးရှားရှိ မြန်မာများက CNI သတင်းဌာနသို့ ပြောသည်။

ထိုသို့ တောင်းဆိုခြင်းသည် ဒုတိယအကြိမ်မြောက်ဖြစ်ပြီး ပထမတစ်ကြိမ် တောင်းဆိုချိန်တွင် မလေးရှား လ.ဝ.က ဘက်မှ တစ်စုံတစ်ရာ ပြန်လည်တုန့်ပြန်ခြင်းမရှိသဖြင့် ယခုကဲ့သို့ ထပ်မံတောင်းဆိုကြခြင်းဖြစ်ကြောင်း၊ သို့သော် မလေးရှား လ.ဝ.က ဘက်မှ တစ်စုံတစ်ရာ တုန့်ပြန်ခြင်း မရှိသေးကြောင်း မလေးရှားတွင် မြန်မာနိုင်ငံသားများ အရေး ကူညီဆောင်ရွက်ပေးနေသူ ဦးဘာဘူကြီးက CNI သတင်းဌာနသို့ ပြောသည်။

“သူတို့ ဒီ RTK 2.0 မှာ လူဦးရေ အကန့်အသတ်ရှိတာပေါ့။ အဲဒီ အလုပ်သမားဦးရေက ထုတ်ပေးထားတဲ့ စာရင်းမှာ လုံလောက်သွားပြီလို့ ထင်လို့ အခုလိုမျိုး ပိတ်လိုက်ရခြင်း ဖြစ်တယ်လို့ ထင်မိပါတယ်။ အဓိကက မြန်မာအေးဂျင့် တွေက သူတို့ ဒီပါမစ် လုပ်ဆောင်ကတည်းကိုက RTK 2.0 ဖွင့်ကတည်းကိုက ဘယ်နှဦး ဘယ်နှယောက်ဆိုပြီး ကန့်သတ်ချက်တွေ ရှိပြီးသားပါ။ သို့ပေမယ့်လည်း ဒီ RTK 2.0 မှာ မှတ်ပုံတင်တာကတော့ လူတိုင်းမှတ်ပုံတင်လို့ ရတယ်။ အဲဒီမှာမှ တဖြေးဖြေးချင်း စိစစ်ပြီးတော့ ပစ်မှုကျူးလွန်တဲ့ လူတွေကို ဖယ်ထုတ်လိုက်တာတွေရှိသလို လျှောက်လို့ရတဲ့ လူတွေလည်း ရှိတာပေါ့။ အဲဒီအနေအထားမျိုးမှာ လူတိုင်းက ဥပမာ ကုမ္ပဏီတစ်ခုမှာ RTK  2.0 ဖွင့်ပြီးကတည်းက အလုပ်ရုံ၊ စက်ရုံ၊ ကုမ္ပဏီတစ်ခုမှာ နိုင်ငံခြားသား ဘယ်နှဦး ဘယ်နှယောက် လျှောက်ပိုင်ခွင့်ရှိလဲ သူတို့ ထုတ်ပြန်ပြီးသား။ သို့ပေမယ့်လည်း မြန်မာအေးဂျင့်တွေက ဘယ်နှယောက်လာလာ သူတို့လက်ခံပြီး လုပ်ဆောင်နေတာကို တွေ့ရပါတယ်။ ၅၀ မက အယောက် ၅၀၀၊ ၅၀၀၀ အဲဒီလိုမျိုးခေါ်ဆိုပြီး လုပ်ဆောင်နေတော့ reject ဖြစ်သွားတာတွေလည်း အများကြီး ရှိပါတယ်” ဟု ၎င်းက ပြောသည်။

မလေးရှား လ.ဝ.ကရုံးကို တွေ့ရစဉ်

မလေးရှားအာဏာပိုင်များမှ ထိုတောင်းဆိုချက်နှင့်ပတ်သက်၍ တုန့်ပြန်ခြင်း မရှိသေးသော်လည်း ပွဲစားနှင့် အေးဂျင့်များမှ လုပ်ကွက်ရှာနေပြီဖြစ်သဖြင့် စုံစမ်းလေ့လာပြီးမှ ဆောင်ရွက်ကြရန် မလေးရှားရှိ မြန်မာများက အကြံပြုကြသည်။

ထို့အပြင် မလေးရှားနိုင်ငံသားများ၏ တိုင်ကြားမှုများကြောင့် နိုင်ငံခြားသား ရွှေ့ပြောင်းလုပ်သားများကို ဖမ်းဆီး ခြင်းများ ပြုလုပ်ခဲ့ပြီး လုပ်ငန်းခွင်များတွင်လည်း ၎င်းနိုင်ငံသားများနှင့် အထောက်အထား ရှိသူများကိုသာ ခန့်အပ် ခြင်းကြောင့် အလုပ်အကိုင် ရှားပါးမှုနှင့် ကြုံတွေ့ခဲ့ရသည်။

သို့သော် ၎င်းနိုင်ငံသားများသည် အလုပ်သေချာ မလုပ်နိုင်ကြသဖြင့် လုပ်ငန်း၌ လစ်ဟင်းမှုများကြောင့် နိုင်ငံခြား သား ရွှေ့ပြောင်းများကိုသာ ပြန်လည် ခန့်အပ်နေရသည့်အတွက် အလုပ်အကိုင် အနည်းငယ် အဆင်ပြေလာ ကြောင်း ရတနာစက္ကနာရေးကူညီမှုအသင်းမှ ဥက္ကဋ္ဌ ဦးအောင်က CNI သတင်းဌာနသို့ ပြောသည်။

ရွှေ့ပြောင်းလုပ်သားများကို လက်ဗွေရယူနေစဉ်

“ဒီဘက်မှာက သူတို့ကတော့ discussing လုပ်နေတယ် ကြားတယ်။ အဖြူအမည်းတော့ မထုတ်သေးဘူး။ အလုပ်အကိုင်ပိုင်းတွေက အရင်က ၂ လပိုင်း၊ ၃ လပိုင်း၊ ၄ လပိုင်းကနေ အခု ၆ လပိုင်းလောက်အထိက တော်တော်လေး ခက်ခဲတယ်။ အခု ၇ လပိုင်းကျော်၊ ၈ လပိုင်းက အလုပ်လေးတွေက နည်းနည်းလေး ပြန် ပေါလာပါပြီ။ ဘာလို့ဆို ပြန်တဲ့လူတွေလည်း များလာတယ်။ နောက်ပြီး မလေးလူမျိုးတွေက လုပ်နိုင်ရင်လည်း တစ်လ၊ နှစ်လလောက်ပဲ လုပ်နိုင်တာလေ။ အဲဒီနေရာတွေမှာ လစ်ဟင်းမှုတွေ ရှိလာတာပေါ့။ သူတို့မလုပ်ချင်တဲ့ အလုပ်တွေကိုတော့ ပြန်လုပ်ရတာပေါ့။ နီးနီးစပ်စပ် ကြားရတာကတော့ အခု မလေးရှားအစိုးရက မလေးပြည်သူ တွေရဲ့ တောင်းဆိုချက်အတိုင်း လုပ်လိုက်တယ်။ လုပ်လိုက်ပေမယ့် မလေးလူမျိုးတွေက အလုပ်ကို ထိထိရောက် ရောက် မလုပ်ကြဘူးလေ။ အန်ဝါက သူ့ရဲ့ အစီအစဉ်ကတော့ မင်းတို့မလုပ်လို့ နိုင်ငံခြားပဲပြန်ခန့်ရတယ်ဆိုတဲ့ ပုံစံမျိုး လမ်းပေါက်အောင် ဖောက်နေတာ။ အခု မလေးလူမျိုးတွေက နောက်ပိုင်း complain တက်တာတွေ နည်း လာတယ်”ဟု ၎င်းက ပြောသည်။

လက်ရှိတွင် မလေးရှားနိုင်ငံ၌ နိုင်ငံကူးလက်မှတ် ပြုလုပ်သည့်အခါတွင် စာအုပ်ကြေးမှာ ယခင်ကထက် နှုန်းထား တိုးမြင့်သွားကြောင်း သိရသည်။

ထို့အပြင် ပြည်ပ ထွက်ခွာခွင့်များကို ကန့်သတ်မှုများကြောင့် ထိုင်းနိုင်ငံမှတဆင့် မလေးရှားနိုင်ငံထဲသို့ တရားမဝင် ဝင်ရောက်လာသူမှာ ပိုမိုများပြားလာကြောင်းလည်း သိရသည်။

CNI News

၂၀၂၄ ခုနှစ်၊ စက်တင်ဘာ ၆

ပြည်ပရောက် မြန်မာရွှေ့ပြောင်း အလုပ်သမားများအနေဖြင့် လစဉ် လစာ၏ ၂၅ ရာခိုင်နှုန်းအား တရားဝင် လွှဲပို့ထားခြင်းမရှိပါက နိုင်ငံကူးလက်မှတ် သက်တမ်းမတိုးပေးသည့်အပြင် လိုအပ်သလို အရေးယူဆောင်ရွက်ခြင်း ခံရမည်ဟု အလုပ်သမားဝန်ကြီးဌာနမှ ထုတ်ပြန်ထားသည်။

ယခင်က ပြည်ပထွက်ခွင့်ပိတ်ခြင်းနှင့် OWIC ကဒ် မထုတ်ပေးခြင်းကိုသာ ဥပဒေအရ လုပ်ဆောင်မည်ဟု ပြောဆို ထားခြင်းဖြစ်သော်လည်း ယခုအခါတွင် နိုင်ငံကူးလက်မှတ် သက်တမ်းတိုးမပေးခြင်းအပြင် လိုအပ်သလို အရေးယူ ဆောင်ရွက်မည်ဟု ထပ်တိုးသတ်မှတ်လိုက်ခြင်းဖြစ်သည်။

နိုင်ငံကူးလက်မှတ် သက်တမ်းတိုးမပေးတော့ဟု သတ်မှတ်လိုက်သည့်အတွက် ရွှေ့ပြောင်းအလုပ်သမားများ အနေ ဖြင့် ၎င်း ၂၅ ရာခိုင်နှုန်းအား မဖြစ်မနေ လွှဲပို့ရမည့် အနေအထားဖြစ်ကြောင်း မလေးရှားရှိ ရတနာစက္ကနာရေး ကူညီမှုအသင်းမှဥက္ကဋ္ဌ ဦးအောင်က CNI သတင်းဌာနသို့ ပြောသည်။

ပြည်ပထွက်ကြမည့်သူများကို တွေ့ရစဉ်

“တော်တော်လေးတော့ အခက်အခဲတော့ ရောက်သွားတာပေါ့။ ဒါပေမယ့် သူတို့ကတော့ ထုတ်ပြန်ထားတာ ၂ ချက်ရှိတာပေါ့။ ဒီမှာက ပါမစ်သက်တမ်းကုန်လို့ ဒီမှာ ထပ်တိုးလို့ မရတော့ဘူးဆိုရင်တော့ ဘာမှဆောင်စရာ မလိုဘူး။ အကယ်၍သူတို့ သွားပြီးပြန်လာမယ်ဆိုရင်တော့ တစ်လကို ၃၀ မလေးရှားရင်းဂစ်ပေါ့ ၆ လစာ သံရုံးကို ကိုယ်ကိုယ်တိုင် လာဆောင်ရမယ်ပေါ့။ အဲဒီအပြင် မြန်မာပြည်ကိုလည်း ၆ လစာလွှဲရတယ် မိမိအိမ်ကိုပေါ့လေ။ ဒီမှာ ဝင်ငွေနဲ့ ဒီလောက်ကတော့ လူတိုင်းလိုလို ဆောင်နိုင်ပါတယ်။ ဒါပေမယ့် လုံးဝမဆောင် ရဘူးဆိုရင်တော့ သူတို့အတွက်တော့ ပိုအဆင်ပြေတာပေါ့။ ဒါပမေယ့် ဆောင်ရမယ်ဆိုလည်း အရမ်းကြီးတော့ နစ်နာဆုံးရှုံးမှုများ တော့ မများဘူးပေါ့လေ” ဟု ၎င်းက ပြောသည်။

ပြည်ပတွင် အလုပ်လုပ်ကိုင်နေသည့် ရွှေ့ပြောင်း အလုပ်သမားများအနေဖြင့် လစာ၏ အနည်းဆုံး ၂၅ ရာခိုင်နှုန်း အား တရားဝင်လမ်းကြောင်းမှ တစ်လတစ်ကြိမ် သို့မဟုတ် သုံးလတစ်ကြိမ် လွှဲပြောင်းပေးပို့ရမည်ဟု အလုပ် သမားဝန်ကြီးဌာနမှ သတ်မှတ်ထားခြင်းဖြစ်သည်။

ဝင်ငွေခွန် အပါအဝင် မိသားစုလွှဲပို့ငွေများအား ပေးပို့ကြသည့် ရွှေ့ပြောင်း အလုပ်သမားများရှိကြသော်လည်း နည်းပါးသဖြင့် ယခုကဲ့သို့ ပိုမိုတင်းကြပ်လာခြင်း ဖြစ်နိုင်ကြောင်း သုံးသပ်ကြသည်။

ထို့ကြောင့် တရားဝင်နည်းလမ်းဖြင့် သွား၍မရပါက တရားမဝင် နည်းလမ်းဖြင့် မရရသည့် လမ်းကြောင်းမှ ထွက်ခွာကြမည်ဖြစ်ကြောင်း Arakan Workers Organization မှ ဒါရိုက်တာ ကိုနိုင်အောင်အောင်က CNI သတင်းဌာနသို့ ပြောသည်။

ပြင်ပထွက် အလုပ်လုပ်မည့် သူများကိုတွေ့ရစဉ်

“ဒီဟာက ပွင့်ပွင့်လင်းလင်းပြောရရင် သူ့အကျိုးစီးပွားကိုပဲ ကြည့်နေတဲ့ပုံစံမျိုးပေါ့။ သွားလို့ရတဲ့နိုင်ငံတွေ ကိုတော့ နည်းလမ်းပေါင်းစုံနဲ့ တရားဝင် နည်းလမ်းနဲ့သွားလို့မရရင် တရားမဝင် နည်းလမ်းနဲ့ သွားကြရမှာပဲ။ ကိုယ့်နိုင်ငံမှာ နေလို့မရအောင် သူပဲလုပ်တာလေ။ လေယာဉ်သွားလို့မရတဲ့ နိုင်ငံတွေဆို မသွားတော့ဘူးပေါ့။ ကားနဲ့သွားလို့ရတဲ့ နိုင်ငံတွေဆို ကားနဲ့သွားကြမှာပေါ့။ အခက်အခဲက သူအာဏာသိမ်းကတည်းက နိုင်ငံတကာ ‌ရောက်နေတဲ့ အစုအဖွဲ့တွေမှာ ပတ်စပို့စာအုပ်နဲ့ပတ်သက်ပြီး သက်တမ်းကုန်တာတို့၊ သက်တမ်းသေတာတို့၊ အကြောင်း အမျိုးမျိုးကြောင့် မြန်မာပြည်ပြန်လို့မရတဲ့ ပုံစံမျိုးတွေက နိုင်ငံတိုင်းနိုင်ငံတိုင်းမှာ ဖြစ်တယ်။ ဖြစ်တဲ့ အခါကြတော့ ဒါတွေကို ရောက်တဲ့နိုင်ငံတွေကလည်း မြန်မာနိုင်ငံ အခြေအနေပေါ် မူတည်ပြီးမှ ပြန်လည် ကုစားဆောင်ရွက် ပေးတာတွေရှိပါတယ်။ ဥပမာ ကိုရီးယားတို့၊ ဂျပန်တို့ တခြားနိုင်ငံတွေမှာလည်း အလိုအလျောက် သက်တမ်းတိုး ပေးတာမျိုးတို့” ဟု ၎င်းက ပြောသည်။

မိသားစုလွှဲပို့ငွေ ၂၅ ရာခိုင်နှုန်းအား ပြန်လည်ပေးပို့မည်ဟု ၂၀၂၃ ခုနှစ်၊ စက်တင်ဘာလမှ စတင်ကာ ပြည်ပ အလုပ်အကိုင် အေဂျင်စီများနှင့် အလုပ်သမားများအကြား စံစာချုပ်ကို ချုပ်ဆိုခဲ့ကြခြင်းဖြစ်သည်။

မိသားစုလွှဲပို့ငွေနှင့်ပတ်သက်၍လည်း လအလိုက်စာရင်း တင်ပြနိုင်ခြင်းမရှိသည့် အေဂျင်စီများကို စေလွှတ်ရေး လုပ်ငန်းစဥ်များ ယာယီဆိုင်းငံ့သွားမည်ဖြစ်ကြောင်း အလုပ်သမားဝန်ကြီးဌာနက အေဂျင်စီများထံ စာပေးပို့ အကြောင်းကြားထားသေးသည်။

CNI News 

၂၀၂၄ ခုနှစ်၊ စက်တင်ဘာ ၆

လျှပ်စစ်ဓာတ်အားခစျေးနှုန်း အပြောင်းအလဲများကြောင့် EV Charging Station များတွင် အားသွင်းခ ၁ ယူနစ် လျှင် ယခင် ၄၀၀ ကျပ်မှ ယခု ၁၀၀၀ ကျပ်အထိဖြစ်လာကြောင်း ရန်ကုန်မြို့တွင်း ပြေးဆွဲလျက်ရှိသည့် EV တက္ကစီ ယာဥ်မောင်းများထံမှ သိရသည်။

အားသွင်းခများ နှစ်ဆကျော် မြင့်တက်လာမှုကြောင့် Owner ကြေးများ မြင့်တက်လာမည်ကိုလည်း စိုးရိမ်နေကြ သည်။

ထိုသို့ တိုးလာလျှင် ကားအား ဆက်လက်ပြေးဆွဲရန် အဆင်မပြေတော့ကြောင်း ရန်ကုန်မြို့တွင်း ပြေးဆွဲလျက် ရှိသည့် EV တက္ကစီယာဥ်မောင်း ကိုအောင်ကိုနိုင်က CNI သတင်းဌာနသို့ ပြောသည်။

၎င်းက "အခုလောလောဆယ်တောင် Daily က တစ်ရက် ၆၅၀၀၀ ပေးရတယ်ဗျာ။ ကျနော်တို့ ယာဥ်မောင်းတွေ ကလည်း စားတာ၊ သောက်တာ အနည်းဆုံး ၅၀၀၀၊ ၁၀၀၀၀ လောက်ကုန်တယ်။ အဲမှာတင် ၇၅၀၀၀ လောက်ဖြစ် နေပြီ။ အိမ်စရိတ် ၂၀၀၀၀ ပေးဖို့ဆိုရင်တောင် ကျနော်တို့ ၉၅၀၀၀ လောက်ရမှ အဆင်ပြေမှာ။ ခုလောလောဆယ် လက်ရှိအခြေအနေတောင် ၉၀၀၀၀၊ ၁၀၀,၀၀၀ ရှာနေရတာဗျာ။ ဒီထက် ထပ်တိုးရင်တော့ အဆင်မပြေလောက် ဘူး။ ဒီခေတ်ကာလကြီးမှာ တစ်ရက် ၉၀၀၀၀၊ ၁၀၀,၀၀၀ ရအောင်ရှာဖို့ဟာကတော့ နည်းနည်း မလွယ်ဘူးဗျ။ ပြီးတော့ order တွေဘာတွေ ချပေးတာ မရှိဘူးပေါ့နော်။ ကိုယ်အဆင်ပြေသလိုပဲ ဆွဲနေရတာပါ" ဟု ပြောသည်။

EV တက္ကစီသမားများအနေဖြင့် ကုမ္ပဏီမှ တစ်ရက်လျှင် ၆၅၀၀၀ ခန့်ဖြင့် ထုတ်ယူပြေးဆွဲနေတာဖြစ်ပြီး မနက် ၆ နာရီ ကားထုတ်လာလျှင် ညနေ ၆ နာရီအ‌ရောက် ပြန်အပ်ရသောကြောင့် တစ်နေ့လျှင် ပြေးဆွဲချိန် ၁၂ နာရီရှိ ကြောင်း အဆိုပါယာဥ်မောင်းထံမှ သိရသည်။

 EV တက္ကစီများကို တွေ့ရစဥ်

ယခင် အားသွင်းခ တစ်ယူနစ် ၄၀၀ ကျပ် အချိန်၌ ကုမ္ပဏီနှင့် စာချုပ်ချုပ်ထားသော EV တက္ကစီ ယာဥ်မောင်းများ အနေဖြင့် ယခု အားသွင်းခ တစ်ယူနစ် ၁၀၀၀ ကျပ် ဖြစ်သွားချိန်တွင် Owner ကြေးများ တိုးလာမည်ကို စိုးရိမ်နေ ကြသည်။

လက်ရှိ ရန်ကုန်မြို့အတွင်း ပြေးဆွဲနေသော EV တက္ကစီသမားများသည် အောင်မင်္ဂလာ အဝေးပြေးကားဂိတ်နှင့် ဒဂုံဧရာအဝေး‌ပြေး ကားဂိတ်များ၌ရှိသည့် အားသွင်းနေရာများတွင် ညဘက်အားသွင်းထားခဲ့ကာ မနက်ခင်းမှ ထုတ်ယူပြေးဆွဲနေခြင်းဖြစ်သည်။

EV တက္ကစီများ သီးသန့်ထိုင်သော ဂိတ်များ လက်ရှိတွင် မရှိသေးသော်လည်း ကားအငှားချပေးသော ကုမ္ပဏီများ အနေဖြင့် EV တက္ကစီ သီးသန့်ခေါ်ရန် အက်ပလီကေးရှင်းများ လုပ်ဆောင်နေကြောင်း သိရသည်။

ထို့အတူ သီးသန့်ခေါ်ချင်ပါက ၁ ရက် ကြိုတင်၍ ချိတ်ဆတ်ရပြီး EV တက္ကစီ စီးနင်းခများ အနေဖြင့်လည်း ခရီးအကွာအဝေးနှင့် အချိန်ကိုကြည့်ကာ ဆုံးဖြတ်ခြင်းဖြစ်ကြောင်းလည်း သိရသည်။

လက်ရှိအချိန်တွင် EV တက္ကစီကားများသည် ပုံမှန်တက္ကစီများကဲ့သို့ ပြေးဆွဲနေပြီး grab နှင့်ချိတ်ဆက်ကာ ပြေးဆွဲမှုများလည်း ရှိသည်။

 EV ကားများ အားသွင်းတဲ့နေရာကို တွေ့ရစဥ်

ထို့ပြင် လျှပ်စစ်ဓာတ်အားခစျေးနှုန်း အပြောင်းအလဲများကြောင့် EV ကားရောင်းဝယ်ရေး လုပ်ငန်းများ ထိခိုက်သွား ခြင်း မရှိပေမယ့် EV တက္ကစီများတွင် ထိခိုက်သွားနိုင်ကြောင်း ရန်ကုန်တိုင်းဒေသကြီး၊ လှိုင်မြို့နယ်မှ EV ကားရောင်းဝယ်ရေး လုပ်ငန်းလုပ်ကိုင်သူတစ်ဦးမှ CNI သတင်းဌာနသို့ ပြောသည်။

၎င်းက "EV တက္ကစီတွေကျတော့ သူကအစတည်းက သူက Owner ကြေးများတယ်ဗျ။ တစ်ရက်ကို အနည်းဆုံး ၅၀၀၀၀ လောက်ရှိတယ်ပေါ့နော်။ အစတုန်းကတော့ သူက အားသာချက်က CNG လို အကြာကြီး တန်းမစီရဘူး။ ဓာတ်အားခ ၁၀၀၀၀ ဖိုးလောက် ထည့်လိုက်ရင် တစ်နေကုန်လောက် သုံးလို့ရမယ်။ လက်ရှိ အနေထားမှာကျတော့ ဒီ EV တက္ကစီတွေက မီတာခတက်သွားတယ်၊ ပြီးတော့ တက္ကစီသမား အများစုက သူက အိမ်မှာဒီကားကို ကိုယ်တိုင်အားသွင်းနိုင်ဖို့က အခက်အခဲရှိတယ်။ အဲတော့ Station မှာပဲသွင်းရမယ်။ Station သွင်းခက တစ်ယူနစ် ၁၀၀၀ ဖြစ်သွားတယ်ပေါ့နော်။ အဲလိုဆိုတော့ ယူနစ် ၃၀ သွင်းမယ်ဆိုရင် သူက ၃၀၀၀၀ ကျသွားမယ်။ Owner ခ က ၅၀၀၀၀ ရယ်ဆိုတော့ ၈၀၀၀၀ ဆိုတော့ သူဆွဲဖို့ ကိုက်လားမကိုက်လားဆိုတာ မသေချာဘူးပေါ့နော်" ဟု ပြော သည်။

EV လျှပ်စစ်သုံး မော်တော်ယာဥ်များအား ၂၀၂၃ ခုနှစ်၊ ဇန်နဝါရီလမှ စတင်ကာ အခွန်ကင်းလွတ်ခွင့်ဖြင့် တင်သွင်း ခွင့်ပြုခဲ့ပြီး ၂၀၂၄ ခုနှစ်၊ သြဂုတ်လကုန်အထိ ပြည်တွင်း၌ EV ကားအစီး‌ရေ ၆၀၀၀ ခန့် တင်သွင်းထားပြီဖြစ်ကြောင်း သိရသည်။

CNI News

၂၀၂၄ ခုနှစ်၊ စက်တင်ဘာ ၅

နယ်စပ်ဂိတ်များတွင် လူအဝင်/အထွက်များအပေါ် ထိန်းချုပ်ခြင်းက တရားမဝင် ဈေးကွက်အတွက် ပိုမို အကျိုး ဖြစ်ထွန်းစေပြီး ၎င်းတို့၏ ဈေးနှုန်းများမှာ ပိုမိုမြင့်တက်လာနိုင်ကြောင်း ရွှေ့ပြောင်းအလုပ်သမားအရေး ဆောင်ရွက်သူများနှင့် ပရဟိတအသင်းများက CNI သတင်းဌာနသို့ ပြောသည်။

လေကြောင်းဖြင့် ပြည်ပထွက်ခွာမှုအပေါ် ထိန်းချုပ်သည့်အပြင် နယ်စပ်ဂိတ်များမှတဆင့် ထွက်ခွာခွင့်များကိုပါ ထပ်မံ ထိန်းချုပ်မည်ဆိုပါက တရားမဝင် လမ်းကြောင်းဆီသို့ ပိုမိုရောက်ရှိသွားကြမည်ဖြစ်ကြောင်း၊ ယခုကဲ့သို့ ထိန်းချုပ်နေခြင်းက အဖြေမဟုတ်ကြောင်း ပညာရေးနှင့်ဖွံ့ဖြိုးတိုးတက်ရေးဖောင်ဒေးရှင်း FED မှ အလုပ်သမား တာဝန်ခံ ဦးမင်းဦးက CNI သတင်းဌာနသို့ ပြောသည်။

၎င်းက “အဲဒါကတော့ ဘယ်လိုလုပ် အဖြေဖြစ်နိုင်မလဲ။ ဖြစ်တဲ့အခြေခံက သူတို့ရဲ့ စီမံခန့်ခွဲမှု၊ အုပ်ချုပ်မှုပိုင်းဆိုင်ရာ လိုအပ် နေလို့ အခုလိုတွေ ဖြစ်တာပေါ့။ အဲဒါတွေကို နည်းမှန်လမ်းမှန်နဲ့ မဖြေရှင်းဘဲနဲ့ ကိုယ့်ဘာသာကိုယ် စိတ်တိုင်းကျ စိတ်ထဲကရှိတဲ့ဟာမျိုး လက်ရှိနိုင်ငံတကာမှာ ဖြစ်ပျက်နေတဲ့ အခြေအနေတွေ ဆက်နွယ်နေတဲ့ဟာတွေကို မစဉ်း စားဘဲ ရပ်ခိုင်း၊ ပြုခိုင်း နှုတ်အမိန့်တွေ အဲဒီလိုမျိုးတွေ လုပ်နေတဲ့အခါကြတော့ အကျိုးဆက်က ပြည်သူပြည်သား တွေ ခံစားရတာပေါ့ တရားမဝင်တဲ့ လမ်းကြောင်းကို တွန်းပို့သလို ဖြစ်တာပေါ့။ PJ တို့ PV တို့ ဒီလိုဟာမျိုးတွေနဲ့ ထွက်ဖို့ပြုဖို့အတွက်ကို OWIC တို့ စမတ်ကဒ်တို့ အဲဒါတွေနဲ့တဖြေးဖြေးချင်း ကြပ်လိုက်တယ်။ ကြပ်လိုက်တော့ ဒီ border pass လေးတစ်ခုပဲ ကျန်တယ်။ ဒါကိုပဲ ထပ်ပြီး ပိတ်မယ်ဆိုရင် ကျန်တဲ့ တရားဝင်တဲ့ နည်းလမ်းနဲ့ ထွက်ပေါက်တွေ အကုန်လုံးကို ပိတ်လိုက်တဲ့အခါကြတော့ လူတွေက တရားမဝင်တဲ့ နည်းလမ်းနဲ့ပဲ ထွက်တော့မှာ ပေါ့။ အနည်းဆုံး အခြေခံအားဖြင့်ဆို ပွဲစားခတွေက ၂ ဆ၊ ၃ ဆ တက်သွားမယ်” ဟု ပြောသည်။

ထိုင်း-မြန်မာနယ်စပ်ဂိတ် တစ်ခုဖြစ်သည့် မြဝတီ-မဲဆောက်တွင် မြန်မာဘက်အခြမ်းမှ နယ်စပ်ဖြတ်သန်းခွင့် စာအုပ် ကိုင်ဆောင်ထားသူများ၊ MOU လုပ်သားများကိုသာ ဖြတ်သန်းခွင့်ပြုနေပြီး နိုင်ငံကူးလက်မှတ် PV ကိုင်ဆောင်ထားသူများအား ဖြတ်သန်းခွင့်ပိတ်ထားကြောင်း ဒေသခံပရဟိတအသင်းထံမှ သိရသည်။

မြန်မာ-ထိုင်း နယ်စပ်ပေါက်ကိုတွေ့ရစဉ်

ထို့အပြင် နယ်စပ်ဖြတ်သန်းခွင့် လက်မှတ်ဖြင့် သွားရောက်သည့် သူများအားလည်း အာမခံချက်တောင်းကြောင်း မြဝတီမြို့ရှိ အလင်းသစ်ပရဟိတအဖွဲ့မှ တာဝန်ရှိသူတစ်ဦးက CNI သတင်းဌာနသို့ ပြောသည်။

၎င်းက “နယ်စပ်က ယာယီနယ်စပ်ဖြတ်သန်းခွင့် ၇ ရက် ပေးတဲ့ဟာတွေမှာတော့ ပုံမှန်ပဲ အဝင်/အထွက် လုပ်လို့ရ တယ်။ ပတ်စပို့ရှိတဲ့လူ အလည်ဗီဇာကို ပိတ်ထားတာ။ အခုက သူတို့က ကန့်သတ်လိုက်တာကို။ အကြောင်းတော့ ရှိမှာပေါ့လေ။ အာမခံချက်တော့ တောင်းတယ်။ ဥပမာ ကားနဲ့သွားမယ်ဆိုရင် ကားသမားက အာမခံပေးရတယ်။ ဗမာပြည်ထဲကို ပြန်ဝင်လာမယ်ဆိုတဲ့ အကြောင်းပေါ့။ ဗမာပြည်ထဲ ပြန်လာမယ်ဆိုတဲ့ အာမခံရှိမှ ပေးထွက်တယ် နယ်စပ်ကနေ။ သူတို့ဘက်ကလည်း လန့်တော့ တဆင့်အာမခံပေးတဲ့လူရှိမှ ဟိုဘက်ကမ်းကို တာဝန်ယူပြီး ပို့ပေး တာပေါ့” ဟု ပြောသည်။
ပြီးခဲ့သည့် ရက်ပိုင်းကလည်း ထိုင်း-မြန်မာနယ်စပ် ကော့သောင်း-ရနောင်း နယ်စပ်ဂိတ်တွင် မြန်မာဘက်အခြမ်းမှာ နယ်စပ်ဖြတ်သန်းခွင့် လက်မှတ်ကိုင်ဆောင်ထားသည့် အသက် ၁၈ မှ ၃၅ နှစ်အရွယ်အထိ အမျိုးသားများအား ထွက်ခွာခွင့် ပိတ်ပင်သည်ဟု သတင်းများ ထွက်ပေါ်ခဲ့သည်။

ထို့နောက် ယခုအခါတွင် ပုံမှန်အတိုင်း ပြန်လည်သွားနိုင်ပြီဖြစ်ကြောင်းလည်း သတင်းများအား တွေ့ရသည်။

ထိုကိစ္စနှင့်ပတ်သက်၍ လူဝင်မှုကြီးကြပ်ရေးရုံးသို့ ဖုန်းဖြင့် ဆက်သွယ် မေးမြန်းကြည့်သော်လည်း ဆက်သွယ်၍ မရပေ။

ယခုကဲ့သို့ နယ်စပ်ဂိတ်များကိုပါ တင်းကြပ်နေခြင်းသည် စီးပွားရေး လုပ်ကိုင်သူများ၊ ကျန်းမာရေးအရ သွားရောက် ရမည့် လူနာများနှင့် အလုပ်သွားရောက် လုပ်ကိုင်မည့် သူများအတွက်လည်း ပိုမိုကြပ်တည်းစေကြောင်း ထောက်ပြကြသည်။

CNI News

၂၀၂၄ ခုနှစ်၊ စက်တင်ဘာ ၄

နိုင်ငံခြားငွေလိုအပ်ချက်များကြောင့် ကုန်ဈေးနှုန်းမြင့်တက်လာသည့်အခါမျိုးတွင် ဗဟိုဘဏ်မှ နိုင်ငံခြားငွေများကို  ထုတ်ရောင်းပေးလေ့ရှိသော်လည်း ရေတိုအတွက်သာ ကုစားနိုင်ကြောင်း၊ ထိုသို့ ထုတ်ရောင်းပေးခြင်းကလည်း ဘယ်ကာလအထိ ထုတ်ရောင်းပေးနိုင်မှာလဲဟု စီးပွားရေးလုပ်ငန်းရှင်များက မေးခွန်းထုတ်နေကြသည်။

လက်ရှိ မြန်မာနိုင်ငံ၏ စီးပွားရေးမှာ ဦးမော့လာရန်ထက် ပြန်လည်ကုစားရေးကိုသာ အဓိက ဦးစားပေး လုပ်ဆောင်ရမှာဖြစ်ကြောင်း၊ ရွေးကောက်ပွဲကို မဖြစ်မနေပြုလုပ်မည်ဟု ပြောဆိုထားသည့်အတွက် စီးပွားရေး ပြန်လည်ကုစားရေးနှင့်ပတ်သက်၍ နိုင်ငံရေးပါတီများမှ ပြည်သူများအား ချပြသင့်ကြောင်း စီးပွားရေး လုပ်ငန်းရှင် တစ်ဦးဖြစ်သူ ဦးအောင်ပြည့်စုံက CNI သတင်းဌာနသို့ ပြောသည်။

“နိုင်ငံခြားငွေနဲ့ပတ်သက်လို့ အစိုးရက ရေတိုကုစားတဲ့ဟာတွေကို လျှော့ချသင့်ပြီ။ လက်ရှိ အခြေအနေက စီးပွားရေး ကောင်းမွန်တဲ့နိုင်ငံ မဟုတ်ပါဘဲနဲ့ အားလုံးက ရုန်းကန်လှုပ်ရှားပြီး လုပ်နေရတဲ့ အခြေအနေဖြစ်တာ ကြောင့် နိုင်ငံ့စီးပွားရေးက ပြန်လည်ကုစားနိုင်ဖို့အတွက်ကို ကျနော်တို့မှာ အခက်အခဲတွေ အများကြီး ရှိနေသေး တယ်။ ပြန်လည်ကုစားနိုင်ရေးအတွက် ဘယ်လိုမူဝါဒတွေနဲ့ ဒီအစိုးရက လျှောက်လှမ်းမှာလဲ။ ဒါမှမဟုတ် ရွေးကောက်ပွဲအလွန်မှာ တက်လာမယ့် အစိုးရတစ်ရပ်ကရော ဘယ်လိုမူဝါဒတွေနဲ့ နိုင်ငံ့စီးပွားရေးကို ကုစားမလဲ ပေါ့။ အဲဒါတွေကိုလည်း ပါတီကြီးတွေက ပြည်သူတွေကို ချပြဖို့လိုနေပြီ။ ဘာကြောင့်လဲဆိုတော့ ရွေးကောက်ပွဲ လည်း မဖြစ်မနေလုပ်မယ်လို့ ပြောထားတာဆိုတော့ ဘယ်လိုစီးပွားရေး ကုစားမယ်ဆိုတဲ့ အကြောင်းအရာတွေကို ပြည်သူတွေက ကြိုသိမှသာ သူတို့လည်း ပြင်ဆင်စရာရှိတာ ပြင်ဆင်လို့ရမယ်ပေါ့” ဟု ၎င်းက ပြောသည်။

ဒေါ်လာကို တွေ့ရစဉ်

နိုင်ငံတော်တွင် နိုင်ငံခြားအရန်ငွေ ရှိသည်ဆိုသော်လည်း ဗဟိုဘဏ်မှ သတ်မှတ် ပမာဏတစ်ခုအထိသာ ထုတ်ရောင်း ပေးနိုင်မည်ဖြစ်ကြောင်း၊ နိုင်ငံခြားရင်းနှီးမြှုပ်နှံမှုများနှင့် ချေးငွေများမှသာ နိုင်ငံခြားငွေကို ရရှိမည် ဖြစ်ကြောင်း၊ အစိုးရအနေဖြင့် နိုင်ငံခြားရင်းနှီးမြှုပ်နှံမှုများ ဖိတ်ခေါ်သင့်ကြောင်းလည်း စီးပွားရေးလုပ်ငန်းရှင် များက ထောက်ပြကြသည်။

သို့သော် လက်ရှိ မြန်မာနိုင်ငံ၏ မတည်ငြိမ်သည့် အနေအထားများကြောင့် နိုင်ငံခြားရင်းနှီးမြှုပ်နှံမှုများနှင့် ချေးငွေ များရရှိရန်မှာ ခဲယဉ်းလှသော်လည်း အစိုးရအနေဖြင့် ထိုအပိုင်းအား ကိုင်တွယ်ဖြေရှင်းရန် မူဝါဒများ ရှိသင့်ပြီဟု လည်း ၎င်းတို့က အကြံပြုသည်။

ပြဿနာများအား တစ်ခုချင်း လိုက်လံစဉ်းစားပြီး ဆောင်ရွက်ချင်းသည် ရေတိုသာ ဖြေရှင်းနိုင်ပြီး အဓိက အကြောင်းအရာကို သေချာစဉ်းစား၍ ဆောင်ရွက်ရန် လိုကြောင်း၊ ယခုအတိုင်း ရေရှည်သာ ဆက်သွားနေမည် ဆိုပါက လုံးပါးပါးသွားမည်ဖြစ်ကြောင်း ဘဏ်ရေးရာကျွမ်းကျင်သူ ဦးဋ္ဌေးအောင်ကြည်က CNI သတင်းဌာနသို့ ပြောသည်။

 ကုန်စိမ်းသည်တစ်ဦးကိုတွေ့ရစဉ်

၎င်းက “အဓိကကတော့ စီးပွားရေး ပတ်ဝန်းကျင်ကောင်းအောင် လုပ်စေချင်တာပေါ့။ အဓိက ဒါပဲ။ တချို့ကိစ္စတွေ က စီးပွားရေး ပတ်ဝန်းကျင်ကောင်းတယ်၊ နိုင်ငံရေး ပတ်ဝန်းကျင်ကောင်းတယ်ဆိုရင် ရှင်းစရာမလိုဘူး သူ့ ဘာသာသူ automatic လိုက်ဖြေရှင်းပြီးသလို ဖြစ်သွားတာ။ အဓိကကတော့ main course ကို သေချာစဉ်းစားဖို့ လိုတာပေါ့။ အဲဒီလိုမှမဟုတ်ဘဲ တစ်ကွက်တစ်ကွက်နဲ့ စဉ်းစားနေတော့။ macroeconomy ဆိုတာ 1 area to another, 1 place to another ဆက်စပ်နေတာကို။ ဒီတစ်ခုထိရင် ကျန်တဲ့တစ်ခု ပတ်ထိတာပဲ။ main economic system ကြီးကို မစဉ်းစားနိုင်ဘဲ ကျန်တာတွေကတော့ ပြဿနာတွေက တစ်မျိုးမဟုတ် တစ်မျိုးလာနေမှာပဲလေ။ အဲဒီလိုနဲ့ပဲ ကျနော်တို့က နှစ်ပေါင်းတော်တော် ကြာခဲ့ကြပြီလေ။ ဒါက ခေါင်းအေးအေး နဲ့စဉ်းစားပြီးတော့ သေချာ ပြေလည်အောင် လုပ်ကြစေချင်တာပေါ့။ otherwise ကတော့ တဖြေးဖြေးနဲ့ လုံးပါးပါးသွားမှာပေါ့။ အဲဒါကြီးက စိုးရိမ်စရာကြီး။ ဒါကြီးတော့ မဖြစ်စေချင်ဘူး” ဟု ပြောသည်။

လက်ရှိတွင် ကုန်ဈေးနှုန်းများ မြင့်တက်နေသကဲ့သို့ နိုင်ငံခြားငွေ လိုအပ်ချက်များလည်း ရှိနေသည့်အတွက် နိုင်ငံခြားငွေ သုံးစွဲမှုကို ထိန်းသိမ်းရန် မူဝါဒချပြီး လုပ်ဆောင်နေရကြောင်း၊ စီပွားရေးကောင်းမှ နိုင်ငံရေး တည်ငြိမ် မှာဖြစ်သဖြင့် နိုင်ငံစီးပွားရေးကောင်းရန် နိုင်ငံသားများအားလုံးတွင် တာဝန်ရှိကြောင်း နစကဥက္ကဋ္ဌက စက်တင်ဘာ ၁ ရက်‌တွင် ရန်ကုန်၌ ပြုလုပ်ခဲ့သည့် အစည်းအ‌ဝေးမှာ ပြောကြားခဲ့သည်။

CNI News

၂၀၂၄ ခုနှစ်၊ စက်တင်ဘာ ၃

ထိုင်းနိုင်ငံရှိ လုပ်ငန်းအများစုသည် မြန်မာလုပ်သားများအပေါ် မှီခိုနေရသည့်အတွက် မြန်မာလုပ်သားများသည် မည်သည့် လုပ်ငန်းများကနေ ထိုင်းနိုင်ငံကို ဝင်ငွေရအောင် လုပ်ပေးနေလဲဆိုသည့်အပေါ် အားလုံးက လေ့လာ စောင့်ကြည့်လာကြသည်။

ထိုင်း၏ လုပ်ငန်းခွင်အများစုတွင် အခြားနိုင်ငံခြားသား လုပ်သားများထက် မြန်မာလုပ်သားဦးရေမှာ ပိုမိုများပြား ကြောင်း၊ အဓိက ဝင်‌ငွေရနေသော လုပ်ငန်းများဖြစ်သည့် ပြည်ပထုတ်ကုန်၊ ရေလုပ်ငန်းနှင့် ဆောက်လုပ်ရေး လုပ်ငန်းတို့တွင် မြန်မာလုပ်သားများမှ အဓိက လုပ်ပေးနေခြင်းဖြစ်ကြောင်း ၎င်းတို့က ပြောသည်။

ထို့အပြင် ထိုင်းအာဏာပိုင်များမှလည်း မြန်မာရွှေ့ပြောင်းများအပေါ် ဖမ်းဆီးစစ်ဆေးခြင်းဖြင့် ငွေညှစ်ခြင်း၊ အထောက်အထား ပြုလုပ်ရာတွင် ပွဲစားများဖြင့် ပေါင်းကြံခြင်းတို့ဖြင့်လည်း အကျိုးအမြတ် ရရှိနေကြကြောင်း ပညာရေးနှင့်ဖွံ့ဖြိုးတိုးတက်ရေးဖောင်ဒေးရှင်း FED မှ အလုပ်သမားတာဝန်ခံ ဦးမင်းဦးက CNI သတင်းဌာနသို့ ပြောသည်။

ထိုင်းက ကွန်ဒိုအရောင်းပြခန်းကိုတွေ့ရစဉ်

၎င်းက “ထိုင်းအာဏာပိုင်တွေကတော့ ဒီတိုင်းရိုးရိုးလည်း ရနေတာပဲ။ အထောက်အထားတွေ လုပ်တယ်ဆိုရင် အလုပ်သမားတွေ အကုန်လုံးက ပွဲစားကို အားကိုးရတာလေ။ အနည်းဆုံးသော ၈၀ ကျော်လောက် အလုပ်သမား တွေက ပွဲစားပဲအားကိုးကြတာ။ ဘာလို့လဲဆိုတော့ အထောက်အထား စာရွက်စာတမ်းတွေ ကိစ္စအားလုံးကို သူတို့ ဘယ်လိုမှ လုပ်လို့မရဘူးလေ။ ပွဲစားတွေနဲ့ အပ်လိုက်တယ်ဆိုရင်တော့ ဒီကိစ္စကို သူတို့နားလည်စရာ မလိုဘူးပေါ့ လေ။ အဲဒီဟာတွေကြောင့် ပွဲစားတွေရယ်၊ အစိုးရဌာနရယ်ပေါင်းပြီးတော့ လုပ်စားနေတဲ့ သဘောပေါ့။ အဲဒီလို လုပ်စားတယ်ဆိုတော့ one stop service တွေဘာတွေ ဘယ်လိုပဲ လုပ်တယ်ပြောပြော အစိုးရဌာနဆိုင်ရာတွေက မပါလို့မရဘူး။ အဲဒီတော့ သူတို့ကို ပွဲစားတွေကနေ လမ်းကြောင်းကြေးက လုပ်ထားပေးပြီးသား။ အဲဒီတော့ အကျိုး အမြတ်က အာဏာပိုင်တွေမှာ အနည်းနဲ့အများ ရနေတာပဲ” ဟု ပြောသည်။

ထို့အပြင် ယခုနောက်ပိုင်းတွင် ငွေကြေးချမ်းသာသည့် မြန်မာနိုင်ငံသားများ၏ ကွန်ဒိုဝယ်ယူမှုများ၊ ဗီဇာဝယ်ယူမှု များအပြင် အခြားသော services များကြောင့်လည်း ထိုင်းအာဏာပိုင်များမှာ ဝင်ငွေများ ရရှိနေကြသည်။

ရွှေ့ပြောင်းအလုပ်သမားများအတွက် ထိုင်းအာဏာပိုင်များမှ လူမှုဖူလုံရေး အကျိုးခံစားခွင့်များ၊ သေဆုံး/ဒဏ်ရာ ရရှိသည့် ကိစ္စများ၊ ပင်စင်များအတွက် ပြန်လည်ပေးအပ်မှုများရှိသော်လည်း နည်းပါးလှကြောင်း၊ အမှန်တကယ် လုပ်ငန်းခွင်များတွင် လုပ်သားတစ်ဦး၏ အကျိုးခံစားခွင့်အား အပြည့်အဝ မရရှိကြကြောင်းလည်း ရွှေ့ပြောင်း အလုပ်သမားအရေး ‌ဆောင်ရွက်ပေးနေသူများက ပြောသည်။

ထိုင်းရောက် ရွှေ့ပြောင်းလုပ်သားများကိုတွေ့ရစဉ်

နိုင်ငံ၏စီးပွားရေးအတွက် ကုန်ထုတ်လုပ်မှုများ တိုးတက်စေရန် လုပ်ကိုင်ပေးနေကြသည့် လုပ်သားများအပေါ် တစ်စုံတစ်ရာ ပြန်လည်လုပ်ဆောင်ပေးခြင်းမျိုးမရှိဘဲ ခေါင်းပုံဖြတ် အမြတ်ထုတ်ရန်သာ လုပ်ဆောင်နေကြ ကြောင်း အလုပ်သမားအခွင့်အရေးဖောင်ဒေးရှင်း LRF မှ ဦးအောင်ကျော်က CNI သတင်းဌာနသို့ ပြောသည်။

၎င်းက “အဲဒီအပိုင်းမှာကတော့ အားနည်းပါတယ်။ ဘာလို့ဆို ထိုင်းနိုင်ငံမှာ ရွှေ့ပြောင်း အလုပ်သမားတွေရဲ့လုပ် အား အရင်းအမြစ်ကို အားပြုပြီးမှ သူတို့ရဲ့ ကုန်ထုတ်လုပ်မှုတွေ ဖွံ့ဖြိုးတိုးတက်ဖို့ နိုင်ငံတကာကို ရောင်းချဖို့၊ အမြတ်အစွန်းတွေ အများကြီးရရှိဖို့ ဒါကို အဓိကကြည့်တာဖြစ်ပြီးမှ ကျန်တဲ့အစိတ်အပိုင်းကတော့ ဒီနိုင်ငံသား အလုပ်သမားတွေအတွက် အကောင်းဆုံးဖြစ်အောင် ဘယ်လိုဝန်ဆောင်မှု ပေးလိုက်မယ်ဆိုတာ ထည့်သွင်း စဉ်းစားလာတာမျိုး မတွေ့ရပါဘူး။ ပြီးရင် နေထိုင်ခွင့်၊ အလုပ်လုပ်ခွင့် လက်မှတ်တွေ ပြုလုပ်ပေးတာ၊ အခါအား လျော်စွာ အလုပ်သမားတွေကို အသစ်တွေ ထပ်ရောက်လာတယ်ဆိုရင် နေထိုင်ခွင့်တွေ ပြုလုပ်ပေးတာကလည်း အခကြေးငွေယူပြီး ဝန်ဆောင်မှုပေးတာ ဖြစ်တဲ့အတွက်ကြောင့် သီးသန့်ကြီး လုပ်သားတွေကို အကျိုးပြုအောင် လုပ်ပေးတာမျိုး မတွေ့ရပါဘူး” ဟု ပြောသည်။

ထိုင်းနိုင်ငံအတွင်းရှိ အထောက်အထားမဲ့ ရွှေ့ပြောင်းများအတွက် လူသစ်ဘတ်ရိုက် ပေးမည်ဟု ထိုင်းအာဏာပိုင် များမှ ထုတ်ပြန် ပြောဆိုထားသော်လည်း လက်ရှိအချိန်အထိ တစ်စုံတစ်ရာ တိတိကျကျ ထွက်ပေါ်လာခြင်း မရှိကြောင်း သိရသည်။

ထို့အပြင် လက်ရှိ၌ ရက်ပေါင်း ၁၂၀ စီမံချက်ဖြင့် တရားမဝင် အထောက်အထားမဲ့များကို ဖမ်းဆီးနေပြီး မြန်မာ ရွှေ့ပြောင်း တစ်သိန်းကျော် ဖမ်းဆီးခံထားရကြောင်းလည်း သိရသည်။

CNI News

၂၀၂၄ ခုနှစ်၊ ဩဂုတ် ၃

နယ်မြေမတည်ငြိမ်မှုများကြောင့်  ရပ်နားထားရသော နယ်စပ်ကုန်သွယ်မှုများအား အခြားမည်သည့် နည်းလမ်း ဖြင့် အစားထိုးနိုင်မလဲဆိုသည့်အပေါ် စီးပွားရေးလုပ်ငန်းရှင်များနှင့် စီးပွားရေးလေ့လာသုံးသပ်သူများအကြား ဆွေးနွေးမှုများရှိသည်။

နိုင်ငံအတွက် နယ်စပ်ကုန်သွယ်မှုများမှ အခွန်အပြင် နိုင်ငံခြားဝင်ငွေ ရရှိသည့်အတွက် ယခုကဲ့သို့ ရပ်တန့် နေခြင်းက နိုင်ငံခြားဝင်ငွေရရှိမှုအပေါ် နစ်နာဆုံးရှုံးမှုများ ဖြစ်ပေါ်စေကြောင်း၊ သို့သော် ကုန်သည်များမှာမူ တရားမဝင်လမ်းကြောင်းဖြင့် ကုန်သွယ်နေကြကြောင်း သိရသည်။

အခြားနယ်စပ်ဂိတ်များတွင် ကုန်သွယ်ရေးစခန်းများ တည်ဆောက်ပြီး ကုန်သွယ်မှု လုပ်ဆောင်မည်ဆိုပါက ခဲယဉ်းလှကြောင်း၊ ထို့ကြောင့် နယ်မြေတည်ငြိမ်အောင် လုပ်ပြီးမှသာ တရားဝင် ကုန်သွယ်ရေး လုပ်ငန်းများအား ပြန်စနိုင်မည်ဖြစ်ကြောင်း စီးပွားရေးလုပ်ငန်းရှင်တစ်ဦးဖြစ်သူ ဦးအောင်ပြည့်စုံက CNI သတင်းဌာနသို့ ပြောသည်။

၎င်းက “ဒါက illegal သွားနေတဲ့ ကုန်သည်ကတော့ ဒီဘက်ဖမ်းရင် ဟိုဘက်ပို့တာမှန်ပေမယ့် တရားဝင် လမ်းကြောင်းမှာဆိုရင် ဒါမျိုးလုပ်ဖို့က အနည်းဆုံးတော့ နယ်စပ်ကုန်သွယ်ရေးစခန်းတစ်ခုက စခန်းသေးသေးလေး ‌ဆောက်မယ်ဆိုရင်တောင် စီးပွားကူးသန်းတို့၊ အကောက်ခွန်တို့၊ custom တို့ အစရှိတဲ့ ရဲတို့၊ ထွေအုပ်တို့ အားလုံး ရဲ့ ဖွဲ့စည်းပုံတစ်ခုက အဲဒီမှာရှိဖို့လိုတယ်။ ဒီနယ်စပ်တွေမှာ အဲဒီလိုဖွဲ့စည်းပုံအပြည့်နဲ့ သွားချပြီးတော့ ကုန်သွယ် ရေးစခန်း ဆောက်ဖို့အတွက်က နယ်မြေတည်ငြိမ်ဖို့ လိုအပ်တယ်ဆိုတာက ဘယ်ဂိတ်မှာပဲ သွားချချ ဖြတ်သန်းရ တဲ့ လမ်းကြောင်းတွေက ဒါတွေပဲရှိတာကို။ နယ်မြေတည်ငြိမ်အေးချမ်းမှု မရှိဘူးဆိုရင်တော့ ဒီကုန်သွယ်မှုကတော့ ပြန်စဖို့မလွယ်ဘူးပေါ့။ မရနိုင်ဘူး။ နိုင်ငံတော်အတွက် အခွန်ဆုံးရှုံးမှုတွေကတော့ ဒီလိုနယ်မြေတည်ငြိမ်မှု မရှိရင် ဖြစ်နေမှာပဲ။ နယ်မြေတည်ငြိမ်အောင် လုပ်ပြီးမှပဲ ကုန်သွယ်ရေးလုပ်ငန်းကို ပြန်စနိုင်မှ တရားဝင် ကုန်သွယ်ရေး မှပဲ အခွန်ရနိုင်တယ်။ illegal trade မှာတော့ နိုင်ငံအတွက် ဘာမှအကျိုး တစ်စုံတစ်ရာ ခံစားရနိုင်စရာမရှိဘူး” ဟု ပြောသည်။
မြန်မာနိုင်ငံသည် ပြည်ပ ပို့ကုန်/သွင်းကုန် ကုန်သွယ်မှုများမှ နိုင်ငံခြားဝင်ငွေ ရရှိနေခြင်းဖြစ်သော်လည်း ၎င်းတို့ အပေါ် တင်းကြပ်ထားမှုများကြောင့် ပို့ကုန်/ သွင်းကုန် သမားများအတွက် အဆင်မပြေဖြစ်နေကြောင်း သိရသည်။

မူဆယ် ၁၀၅ မိုင်ကုန်သွယ်ရေးဇုန်ကိုတွေ့ရစဉ်

ထို့ကြောင့် ပို့ကုန်/သွင်းကုန် ကုန်သွယ်မှု လုပ်ငန်းများကို မြန်ဆန်သွက်လက်စေချင်ပါက အစိုးရအနေဖြင့် လျှော့ချ ပေးရမည့် အပိုင်းများရှိကြောင်း၊ ထိုအချက်များအား လျှော့ချပေးနိုင်ပါက ပို့ကုန်တင်ပို့မှုမှာ ပိုမို မြန်ဆန်သွားမည် ဖြစ်ကြောင်း စီးပွားရေးလေ့လာသုံးသပ်သူတစ်ဦးက CNI သတင်းဌာနသို့ ပြောသည်။

၎င်းက “အခုကတော့ normal trade ပဲ လုပ်နေရတာပေါ့။ အခုဟာက ဒီဟာကိုပိုပြီးတော့ မြန်မြန်ဆန်ဆန် သွက်သွက်လက်လက် လုပ်နိုင်ဖို့ဆိုရင် တော်တော်များများတော့ ဖြေလျှော့ပေးဖို့ကောင်းတယ်။ အထူးသဖြင့် export ကို ဖြေလျှော့ပေးရမှာပေ့ါ။ ဘာလို့ဆို ကိုယ်က export များများပို့နိုင်မှ နိုင်ငံခြားငွေရမှာကို။ အခုက export သမားကိုလည်း လည်ပင်းညှစ်ထားတယ်။ လည်ပင်းညှစ်ထားတာက အခုအချိန်အထိ ၂၅ ရာခိုင်နှုန်းကို သူ့သတ်မှတ်ထားတဲ့ ပေါက်ဈေးနဲ့ လဲနေရတုန်း။ နောက်တစ်ခုက export ပို့တိုင်းမှာ လိုင်စင်သဘောမျိုး ခွင့်ပြု ချက် ယူနေရတယ်။ အစိုးရဘက်က ကြည့်တော့လည်း export ပို့ပြီးတော့ export earning မဝင်မှာ ကြောက်တဲ့ အတွက် export တိုင်းကို သူက လိုင်စင်သဘောမျိုး ယူနေရတယ်။ အခုက export ရော import ရော လိုင်စင်ယူ နေရတာပဲလေ။ ဒါပေမယ့် export ကို ပိုပြီးတော့ သွက်လက်စေချင်ရင်တော့ အဲဒီဟာတွေ လျှော့ချလို့ရတဲ့ဟာ တွေကို လျှော့ချပေးဖို့ကောင်းတယ်” ဟု ပြောသည်။

ဆန်တင်ပို့ရန် လုပ်နေစဉ်

နိုင်ငံခြားငွေ လိုအပ်ချက်ကို လျှော့ချနိုင်ရန်အတွက် ကုန်သွယ်ဖက် နှစ်နိုင်ငံအကြား ကုန်ပစ္စည်းချင်း အပြန်အလှန် ဖလှယ်သည့် ကုန်သွယ်မှုစနစ်ကို စတင်ကျင့်သုံးရန်အတွက် နစက-က ညွှန်ကြားထားကြောင်း ကုန်သည်များထံမှ သိရသည်။

ထိုသို့ ကုန်ပစ္စည်းချင်း ဖလှယ်သောစနစ်သည် ရှေးယခင်က အသုံးပြုခဲ့သည့် စနစ်တစ်ခုဖြစ်ပြီး ခေတ်မမှီသဖြင့် မည်သည့်နိုင်ငံမှ အသုံးမပြုကြခြင်းဖြစ်ကြောင်း သုံးသပ်မှုများရှိသည်။

ဘဏ်ရေးရာကျွမ်းကျင်သူ ဦးဋ္ဌေးအောင်ကြည်က “အဲဒါလောလောဆယ်တော့ မလွယ်ဘူး ကျနော့်အမြင်အရက။ Barter ဆိုတာက Unit မရှိခင်ကလေ။ ၁ ယူနစ်ကို ဘယ်လိုသတ်မှတ်မလဲဆိုတာ ပြဿနာရှိတယ်။ Barter ဆိုတာက ကုန်ချင်းဖလှယ်တဲ့စနစ်ပေါ့။ လွန်ခဲ့တဲ့ long long ago ကပါ။ ယူနစ်ကို ဘယ်လိုသတ်မှတ်မှာလဲက ခက်တာပေါ့။ အဲဒီလိုခက်လို့ပဲ ငွေကြေးစနစ်ဆိုတာ ပေါ်လာတာလေ။ ငွေကြေးစနစ်က နည်းစနစ်ကိုပဲ ဗဟိုပြုရ မှာပဲ။ အဲဒီတော့ ဘယ်လိုဗဟိုပြုလို့ရမလဲ ဒါပဲ စဉ်းစားရမှာပေါ့။ ကျန်တဲ့ ways and means တွေကတော့ ခေတ်ကာလအရ အဆင်မပြေနိုင်ဘူး” ဟု ပြောသည်။

ထိုစနစ်ဖြင့် ကုန်သွယ်မှု လုပ်ဆောင်ရမည်ဆိုပါက ကုန်သွယ်မှုများ ကျဆင်းလာမည် ဖြစ်ကြောင်း၊ ထို့နောက် ကုန်သွယ်ဖက် နိုင်ငံများထံမှ တင်သွင်းလိုသည့် ပစ္စည်းနှင့် တင်ပို့နေသည့် ကုန်စည်ပမာဏသည် မျှတမှု မရှိသည့် အတွက်လည်း ကုန်သည်များတွင် အခက်အခဲ ဖြစ်ပေါ်သွားနိုင်ကြောင်း၊ နောက်ဆုံးတွင် စားသုံးသူ ပြည်သူများ အပေါ်တွင် သက်ရောက်မှု ဖြစ်သွားမည်ဟုလည်း သုံးသပ်ကြသည်။