CNI International News

ဘန်ကောက်၊ ဖေဖော်ဝါရီ ၆

Ong Bak မင်းသားဟု အောင်မြင်ကျော်ကြားခဲ့သော ထိုင်းအက်ရှင်မင်းသား တိုနီဂျား (Tony Jaa)သည် သည်းခြေ အိတ် ကင်ဆာအတွက် ဆေးကုသမှု ခံယူနေရကြောင်း ဘန်ကောက်ပို့စ်မှ ဖော်ပြခဲ့သည်။

တိုနီဂျားသည် ၂၀၂၄ ခုနှစ်၊ ဇွန်လတွင် ထိုရောဂါ ဖြစ်ပွားနေကြောင်း စတင် သိရှိခဲ့သည်ဟု FM91 ရေဒီယိုက ဖော်ပြခဲ့သည်။

တိုနီဂျား၏ ကင်ဆာရောဂါ အခြေအနေမှာ အဆင့် ၃ ဖြစ်ပြီး အဆင့် ၄ သို့ ကူးပြောင်းလုနီးပါး အခြေအနေ ဖြစ်ကြောင်း ၎င်းနှင့် နီးစပ်သူတစ်ဦးက Nine Entertain သို့ ပြောကြားခဲ့သည်။

သို့သော် Channel 3 သတင်းဌာန၏ ဖော်ပြချက်အရ တိုနီဂျား၏ အခြေအနေမှာ ကီမို ဆေးသွင်း ကုသမှုကြောင့် သက်သာလာသော်လည်း ဆရာဝန်များ၏ အနီးကပ်စောင့်ကြည့်မှု လိုအပ်နေသေးကြောင်း သိရသည်။

လတ်တလော ထွက်ပေါ်လာသည့် လူမှုမီဒီယာပေါ်မှ ဓာတ်ပုံများတွင် တိုနီဂျားသည် သိသိသာသာ ပိန်သွားသည် ကို တွေ့ရှိရသဖြင့် ပရိသတ်များက စိုးရိမ်ပူပန်နေကြသည်။

တိုနီဂျား၏ Facebook စာမျက်နှာတွင်မူ ရောဂါနှင့်ပတ်သက်၍ တစ်စုံတစ်ရာ ဖော်ပြထားခြင်း မရှိပေ။

Ong Bak မင်းသား တိုနီဂျားကို တွေ့ရစဉ်

ဇန်နဝါရီ ၃၁ ရက်နေ့က တင်ခဲ့သော နောက်ဆုံးပို့စ်တွင်မူ ၎င်း၏ တေးသီချင်း ဗွီဒီယိုအသစ်အတွက် လေကြောင်း ခရီးစဉ်တစ်ခု သွားရောက်နေကြောင်း ပရိသတ်များကို အသိပေးထားသည်။

တိုနီဂျားသည်  မကြာသေးမီက ထွက်ရှိထားသည့် One More Round တေးသီချင်း ဗွီဒီယိုကို ရည်ညွှန်းပြီး “ခရီးစဉ်က စတင်တော့မှာပါ။ နောက် တစ်ချီပေါ့ (One More Round)” ဟု ရေးသားထားသည်။

တိုနီဂျားသည် ထိုင်းနိုင်ငံ အရှေ့မြောက်ပိုင်း ဆူရင်ပြည်နယ် (Surin) တွင် မွေးဖွားပြီး အမည်ရင်းမှာ တတ်ချာကွန်း ယီယမ် (Tatchakorn Yeerum) ဖြစ်ကာ ပြည်တွင်း၌ ဂျာဖနွမ် (Ja Phanom) ဟု လူသိများသည်။

တိုနီဂျားသည် အသက် ၁၀ နှစ်သား အရွယ်မှစပြီး မွေထိုင်း (Muay Thai) လက်ဝှေ့ကို လေ့ကျင့်ခဲ့ပြီး စတန့်သမား အဖြစ် နှစ်ပေါင်းများစွာ လုပ်ကိုင်ခဲ့ပြီးနောက် ၂၀၀၃ ခုနှစ်တွင် Ong Bak ရုပ်ရှင်ဖြင့် အောင်မြင်ကျော်ကြား လာခဲ့ သည်။

Source: ဘန်ကောက်ပို့စ်

CNI International News

ဘန်ကောက်၊ ဇန်နဝါရီ ၂၆

အိန္ဒိယနိုင်ငံ အနောက်ဘန်ဂေါပြည်နယ် (West Bengal) တွင် အသက်အန္တရာယ် စိုးရိမ်ရသည့် နီပါးဗိုင်းရပ်စ် (Nipah virus) ကူးစက်ပြန့်ပွားမှုများ ဖြစ်ပွားနေကြောင်း အိန္ဒိယနိုင်ငံက အတည်ပြုခဲ့သဖြင့် ထိုင်းနိုင်ငံရှိ သုဝဏ္ဏ ဘူမိ (Suvarnabhumi)၊ ဒွန်မောင်း (Don Mueang)နှင့် ဖူးခက် (Phuket) လေဆိပ်များတွင် ရောဂါထိန်းချုပ်ရေး လုပ်ငန်းများကို အရှိန်မြှင့်တင် ဆောင်ရွက်နေကြောင်း ဘန်ကောက်ပို့စ်မှ ဖော်ပြခဲ့သည်။

အိန္ဒိယသို့ သွားရောက်ရန် စီစဉ်နေသည့် ထိုင်းနိုင်ငံသားများကိုလည်း အထူးသတိပြုကြရန် ထိုင်းအာဏာပိုင်များ က ခရီးသွားလာမှုဆိုင်ရာ အကြံပြုချက် ထုတ်ပြန်ထားသည်။

ထိုလေဆိပ်များသို့ ဝင်ရောက်လာသည့် ခရီးသည်များ၊ အထူးသဖြင့် အနောက်ဘန်ဂေါပြည်နယ်မှ ဝင်ရောက်လာ သူများကို အဓိကထားပြီး ကျန်းမာရေး စစ်ဆေးမှုများ တိုးမြှင့်လုပ်ဆောင်ရန် ထိုလေဆိပ်သုံးခုရှိ နိုင်ငံတကာ ကူးစက်ရောဂါဆိုင်ရာ အရာရှိများအား ညွှန်ကြားထားကြောင်း ထိုင်းနိုင်ငံ၏ ရောဂါထိန်းချုပ်ရေးဌာန (DDC) က ဇန်နဝါရီ ၂၅ ရက်တွင် ထုတ်ပြန်ခဲ့သည်။

လေဆိပ်များတွင် လုပ်ဆောင်မည့် လုပ်ငန်းစဉ်များ၌ ခရီးသည်များအား ကိုယ်အပူချိန် တိုင်းတာခြင်းနှင့် ဖျားနာ သည့် လက္ခဏာ ပြသသူများကို လေဆိပ်မှာပင် ကျန်းမာရေး စစ်ဆေးမှုများ ပြုလုပ်ခြင်းတို့ ပါဝင်သည်။

ကိုယ်အပူချိန် အလွန်မြင့်မားနေသူ သို့မဟုတ် နီပါးဗိုင်းရပ်စ် ကူးစက်ခံရနိုင်သည့် လက္ခဏာရှိသူများကို တွေ့ရှိ ပါက သတ်မှတ်ထားသော လုပ်ငန်းစဉ်များအတိုင်း နောက်ထပ် စစ်ဆေးမှုများ ပြုလုပ်ရန်အတွက် ကွာရန်တင်း ဝင်ရမည့် စခန်းများသို့ လွှဲပြောင်းပို့ဆောင်သွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

ထိုင်းက လေဆိပ်မှာ ကျန်းမာရေးစစ်ဆေးနေစဉ်

အနောက်ဘန်ဂေါပြည်နယ်မှ ရောက်ရှိလာသူများကို သတိပြုရမည့် ရောဂါလက္ခဏာများနှင့် နာမကျန်းဖြစ်ပါက လုပ်ဆောင်ရမည့် လမ်းညွှန်ချက်များ ပါဝင်သော ကျန်းမာရေး သတိပေး ကတ်များကိုလည်း ဖြန့်ဝေပေးလျက် ရှိသည်။

နီပါးဗိုင်းရပ်စ် ကူးစက်ခံရပါက ခံစားရသည့် ရောဂါလက္ခဏာများမှာ ဖျားခြင်း၊ ပြင်းထန်စွာ ခေါင်းကိုက်ခြင်း၊ ကြွက်သားများ နာကျင်ခြင်း၊ လည်ချောင်းနာခြင်း၊ ချောင်းဆိုးခြင်း၊ အသက်ရှူရ ခက်ခဲခြင်း၊ အိပ်ငိုက်ခြင်း၊ စိတ်ရှုပ်ထွေးခြင်းနှင့် တက်ခြင်း အစရှိသည့် ရောဂါလက္ခဏာများဖြစ်သည်။

လေဆိပ်သို့ ရောက်ရှိပြီး ၂၁ ရက်အတွင်း ရောဂါလက္ခဏာများ ပေါ်ပေါက်လာပါက ဆေးရုံ၊ ဆေးခန်းများသို့ ချက်ချင်း သွားရောက် ပြသရန်၊ ဆရာဝန်များအား မိမိတို့၏ ခရီးသွားရာဇဝင်နှင့် လက္ခဏာများ စတင်ဖြစ်ပေါ် သည့် ရက်စွဲတို့ကို အသေးစိတ် ပြောပြရန် ထိုင်းအာဏာပိုင်များက တိုက်တွန်းထားသည်။

ထို့ပြင် ဖျားနာမှုများ ဖြစ်ပွားလာပါက ရောဂါထိန်းချုပ်ရေးဌာန၏ အရေးပေါ် ဆက်သွယ်နိုင်သည့် ဖုန်းနံပါတ်နှင့် ကျန်းမာရေးကတ်တွင် ပါဝင်သည့် QR code ကို စကန်ဖတ်ပြီး သတင်းပေးပို့နိုင်ကာ အရေးပေါ် ဖုန်းလိုင်းအား နေ့စဉ် နံနက် ၈ နာရီမှ ည ၈ နာရီအတွင်း ဆက်သွယ်နိုင်သည်ဟု ထိုင်းအာဏာပိုင်များက ထုတ်ပြန်ထားသည်။

Source: ဘန်ကောက်ပို့စ်

CNI International News

ဝါရှင်တန်၊ ဇန်နဝါရီ ၂၄

အမေရိကန်သည် ဇန်နဝါရီ  ၂၂ ရက်က ကမ္ဘာ့ကျန်းမာရေးအဖွဲ့ (WHO) မှ တရားဝင် နုတ်ထွက်ခဲ့ကြောင်း ရိုက်တာ မှ ဖော်ပြခဲ့သည်။

အမေရိကန်အနေဖြင့် WHO မှ နုတ်ထွက်မည်ဆိုပါက ကမ္ဘာတစ်ဝန်းရှိ ပြည်သူ့ကျန်းမာရေးကို ထိခိုက်စေနိုင် ကြောင်း သတိပေးမှုများ ရှိခဲ့သည့်ကြားမှ တရားဝင် နုတ်ထွက်ခဲ့ခြင်းဖြစ်သည်။

WHO မှ နုတ်ထွက်ရန် ဆုံးဖြတ်ခဲ့ခြင်းသည် (COVID-19) ကပ်ရောဂါကာလက WHO ၏ စီမံခန့်ခွဲမှု အားနည်းခဲ့ ခြင်းကို ထင်ဟပ်စေခဲ့ကြောင်း ကျွမ်းကျင်သူများက ပြောကြားခဲ့သည်။

အမေရိကန်သမ္မတ ဒေါ်နယ်ထရမ့် (Donald Trump) သည် ၂၀၂၅ ခုနှစ်တွင် ၎င်း၏ သမ္မတသက်တမ်း စတင်သည့် ပထမဆုံးနေ့ကတည်းက သမ္မတအုပ်ချုပ်ရေးအမိန့်မှတဆင့် အမေရိကန်အနေဖြင့် WHO အဖွဲ့ကြီးမှ နုတ်ထွက် မည်ဖြစ်ကြောင်း ကြိုတင်အကြောင်းကြားစာ ပေးပို့ခဲ့ခြင်း ဖြစ်သည်။

အမေရိကန် ကျန်းမာရေးဝန်ကြီးဌာနနှင့် နိုင်ငံခြားရေးဝန်ကြီးဌာနတို့၏ သတင်းထုတ်ပြန်ချက်တွင် အမေရိကန် သည် နုတ်ထွက်ခြင်း လုပ်ငန်းစဉ်ကို အပြီးသတ်နိုင်ရန် အတွက်သာ WHO နှင့် ဆက်ဆံရေး အကန့်အသတ်ဖြင့် ဆက်လက် လုပ်ဆောင်သွားမည်ဟု ဖော်ပြထားသည်။

“ကျနော်တို့အနေနဲ့ WHO မှာ လေ့လာစောင့်ကြည့်သူအဖြစ် ပါဝင်ဖို့ အစီအစဉ်မရှိသလို ပြန်လည်ပူးပေါင်းဖို့ အစီအစဉ်လည်း မရှိပါဘူး”ဟု အမေရိကန်အစိုးရ ကျန်းမာရေးအရာရှိတစ်ဦးက ပြောကြားခဲ့သည်။

မိမိတို့အနေဖြင့် ရောဂါစောင့်ကြည့် စစ်ဆေးခြင်းနှင့် အခြား ပြည်သူ့ကျန်းမာရေး ဦးစားပေး လုပ်ငန်းများကို နိုင်ငံတကာ အဖွဲ့အစည်းတစ်ခုမှတဆင့် ဆောင်ရွက်မည့်အစား အခြားနိုင်ငံများနှင့် တိုက်ရိုက် ပူးပေါင်း ဆောင် ရွက်သွားရန် စီစဉ်ထားကြောင်း ထိုအမေရိကန်အရာရှိက ပြောကြားခဲ့သည်။

အမေရိကန် ဥပဒေအရ WHO မှ နုတ်ထွက်ရာတွင် တစ်နှစ်ကြိုတင် အသိပေးရန်နှင့် ပေးဆောင်ရန် ကျန်ရှိနေ သော အဖွဲ့ဝင်ကြေး ဒေါ်လာ ၂၆၀ သန်း ခန့်အားလုံးကို ပေးချေရန် လိုအပ်သည်။

သို့သော် အမေရိကန် နိုင်ငံခြားရေးဝန်ကြီးဌာန အရာရှိတစ်ဦးကမူ အဆိုပါ ဥပဒေပြဋ္ဌာန်းချက်တွင် နုတ်ထွက်ခြင်း မပြုမီ မည်သည့် ငွေပေးချေမှုကိုမဆို ပြုလုပ်ရမည်ဆိုသော ကန့်သတ်ချက်မျိုး ပါဝင်ခြင်းမရှိကြောင်း ငြင်းဆိုခဲ့ သည်။

“အမေရိကန်ပြည်သူတွေဟာ လိုအပ်တာထက်တောင် ပိုပြီး ပေးခဲ့ပြီးပါပြီ” ဟု နိုင်ငံခြားရေးဝန်ကြီးဌာန ပြောရေးဆိုခွင့်ရှိသူတစ်ဦးက ပြောကြားခဲ့သည်။

အမေရိကန် ကျန်းမာရေးနှင့် လူသားချင်းစာနာမှုဆိုင်ရာ ဝန်ကြီးဌာန (HHS) ၏ ဇန်နဝါရီ ၂၂ ရက်က ထုတ်ပြန် ချက်တွင်လည်း အစိုးရအနေဖြင့် WHO သို့ ရန်ပုံငွေ ထောက်ပံ့မှုများကို ရပ်ဆိုင်းလိုက်ပြီဖြစ်ကြောင်း ဖော်ပြထား သည်။

Source: ရိုက်တာ

CNI International News

ဘန်ကောက်၊ နိုဝင်ဘာ ၂၇

ထိုင်းနိုင်ငံတွင် ဆေးလိပ်သောက်သူ ၇၀၀,၀၀၀ ကျော်သည် ဆီးချိုရောဂါရှိနေကြောင်း ဘန်ကောက်ပို့စ်မှ ဖော်ပြခဲ့သည်။

၎င်းတို့အနက် ထက်ဝက်နီးပါးသည် ၎င်းတို့တွင် ဆီးချိုရောဂါ ရှိနေသည်ကို မသိကြကြောင်း ဆရာဝန်များက သတိပေးခဲ့သည်။

ပြီးခဲ့သည့်နှစ်က Faculty of Medicine Ramathibodi ဆေးရုံသည် ပြည်သူ့ကျန်းမာရေးဝန်ကြီးဌာန၊ ကျန်းမာရေး စနစ်များ သုတေသန အင်စတီကျုနှင့် ထိုင်းကျန်းမာရေး မြှင့်တင်ရေးဖောင်ဒေးရှင်းတို့နှင့် ပူးပေါင်းပြုလုပ်ခဲ့သည့် လေ့လာချက် စစ်တမ်းအရ ထိုရလဒ်များကို တွေ့ရှိခဲ့ခြင်းဖြစ်သည်။

မဟီဒေါ တက္ကသိုလ် (Mahidol University) ရှိ Faculty of Medicine Ramathibodi ဆေးရုံမှ ဆရာဝန် ဒေါက်တာ ရွန်ရူဒီ ပါ့စ်ဒါနာဗာနီချယ်(Roengrudee Patanavanich)က ထိုင်းလူမျိုး ၆ ဒသမ ၁ သန်းတွင် ဆီးချိုရောဂါ ရှိနေ ကြောင်း လေ့လာတွေ့ရှိခဲ့သည်ဟု နိုဝင်ဘာ ၂၅ ရက်က ပြောကြားခဲ့သည်။

ထိုဆီးချို ရောဂါသည်များအနက် ၇၇၉,၀၆၀ ဦးသည် ဆေးလိပ် သောက်သူများဖြစ်ပြီး ၎င်းတို့အနက် ၃၃၇,၅၄၂ ဦးသည် ၎င်းတို့တွင် ဆီးချိုရောဂါရှိနေသည်ကို မသိကြကြောင်း ဒေါက်တာရွန်ရူဒီက ပြောသည်။

ထိုင်းကျန်းမာရေးစင်တာ တစ်ခုကိုတွေ့ရစဉ်

ထို့ပြင် ဆီးချိုရောဂါ ရှိနေသည်ကို သိထားသည့် လူပေါင်း ၄၂,၀၉၉ ဦးသည် ဆေးဝါးကုသမှု မခံယူကြကြောင်း လည်း ၎င်းက ဆိုသည်။

ဆေးဝါးကုသမှု ခံယူသူများအနက် ၂၂၆,၃၉၂ ဦးသည် ဆီးချိုရောဂါကို မထိန်းနိုင်ဘဲ ၁၃၃,၀၂၇ ဦးသာ ၎င်းတို့၏ ရောဂါ အခြေအနေအား ထိန်းနိုင်ကြောင်း လေ့လာချက်တွင် ဖော်ပြထားသည်။

ဆေးလိပ် သောက်သုံးခြင်းသည် ဆီးချိုရောဂါ ဖြစ်နိုင်ခြေကို ၃၀ ရာခိုင်နှုန်းမှ ၄၀ ရာခိုင်နှုန်းအထိ မြင့်တက်စေ ကြောင်း အမေရိကန်ရောဂါ ထိန်းချုပ်ရေးနှင့် ကာကွယ်တားဆီးရေးစင်တာ၏ မှတ်တမ်းများတွင် ဖော်ပြထား သည်ဟု ဆေးလိပ်သောက်သုံးခြင်းနှင့် ကျန်းမာရေးဖောင်ဒေးရှင်းဥက္ကဋ္ဌ ဒေါက်တာ ပရာကစ်(Prakit Vathesatogkit) က ပြောကြားခဲ့သည်။

ဆီးချိုရောဂါ ရှိနေသူများ အနေဖြင့် ဆေးလိပ်သောက်ပါက သွေးတွင်း သကြားဓာတ်ကို ထိန်းချုပ်ရာတွင် ပိုမို ခက်ခဲပြီး နှလုံးနှင့် ကျောက်ကပ်ရောဂါများ၊ ခြေထောက်သို့ သွေးစီးဆင်းမှု နည်းပါးခြင်း၊ မျက်စိ အမြင်လွှာ ပျက်စီးခြင်း၊ လက်နှင့် ခြေထောက်များတွင် အာရုံကြောထိခိုက်ခြင်း၊ ထုံနေခြင်း၊ နာကျင်ခြင်း၊ အားနည်းခြင်းနှင့် တုန်တုန်ယင်ယင်ဖြစ်ခြင်းကဲ့သို့ နောက်ဆက်တွဲ ဆိုးရွားသည့် ရောဂါများ ဖြစ်လာနိုင်သည်ဟု ၎င်းက ပြောကြားခဲ့ သည်။

Source: ဘန်ကောက်ပို့စ်

CNI International News

နယူးဒေလီ၊ အောက်တိုဘာ ၁၀

အိန္ဒိယရဲတပ်ဖွဲ့က နိုင်ငံတစ်ဝန်း ကလေး ၁၇ ဦးထက်မနည်း သေဆုံးမှုနှင့်ဆက်နွှယ်နေသည့် ချောင်းဆိုးပျောက် ဆေးရည်ကို ထုတ်လုပ်သော ဆေးကုမ္ပဏီတစ်ခု၏ ပိုင်ရှင်အား ဖမ်းဆီးခဲ့ကြောင်း DW သတင်းမှ ဖော်ပြခဲ့သည်။

တမီးလ်နာဒူးလ်အခြေစိုက် Sresan Pharmaceuticals ကုမ္ပဏီပိုင်ရှင် ရန်ဂါနာသန် ဂိုဗင်ဒန်(Ranganathan Govindan)ကို အောက်တိုဘာ ၈ ရက် ညအချိန်က ချန်နိုင်းမြို့၌ မက်ဟိုင်ရာ ပရာဒက်ရှ်ပြည်နယ် ရဲတပ်ဖွဲ့က လာရောက် ဖမ်းဆီးခဲ့ခြင်းဖြစ်သည်။

လွန်ခဲ့သည့်လက ၎င်း၏ကုမ္ပဏီမှ ထုတ်လုပ်သော Coldrif အမည်ရှိ ချောင်းဆိုးပျောက်ဆေးရည်ကို သောက်ပြီး နောက် အသက် ၅ နှစ်အောက်ကလေး ၁၇ ဦးထက်မနည်း သေဆုံးခဲ့ပြီးနောက်ပိုင်း မက်ဟိုင်ရာပရာဒက်ရှ် ပြည်နယ် ရဲတပ်ဖွဲ့က ရန်ဂါနာသန်ကို လိုက်လံရှာဖွေနေခဲ့ခြင်းဖြစ်သည်။

အိန္ဒိယကျန်းမာရေးဝန်ကြီးဌာန၏ ထုတ်ပြန်ချက်အရ Coldrif ချောင်းဆိုးပျောက်ဆေးရည် စမ်းသပ် နမူနာများ တွင် diethylene glycol (DEG)သည် ခွင့်ပြုထားသည့် ပမာဏထက် ပိုမိုများပြားစွာ ပါဝင်နေကြောင်း တွေ့ရှိခဲ့ သည်ဟု ဆိုသည်။

ချောင်းဆိုပျောက်ဆေးရည်ကို တွေ့ရစဉ်

အောက်တိုဘာ ၂ ရက်က ထိုဓာတုပစ္စည်း ပါဝင်နေကြောင်း အတည်ပြုခဲ့ပြီးနောက် အဆိုပါ ချောင်းဆိုးပျောက် ဆေးရည်ကို အသုံးပြုခွင့် တားမြစ်ပိတ်ပင်ခဲ့သည်။

တမီးလ်နာဒူး ဆေးဝါးထိန်းချုပ်ရေးဌာန၏ အစီအရင်ခံစာ တစ်ခုတွင် ထိုချောင်းဆိုးပျောက်ဆေးရည်ကို သန့်ရှင်းမှု မရှိသော စက်ရုံ အခြေအနေ၌ ထုတ်လုပ်ခြင်း ဖြစ်သည်ဟု ဆိုသည်။

အစောပိုင်း စုံစမ်းစစ်ဆေးမှုအရ ထိုချောင်းဆိုးပျောက်ဆေးရည်ကို မက်ဟိုင်ရာ ပရာဒက်ရှ်ပြည်နယ်အပြင် အိုဒီရှာ နှင့် ပူဒူချယ်ရီ ပြည်နယ်များသို့ ဖြန့်ချိထားကြောင်း အိန္ဒိယမီဒီယာတွင် ဖော်ပြထားသည်။

တမီးလ်နာဒူး ကျန်းမာရေးဝန်ကြီး မာဆူဘရာမာနီယန်(Ma Subramanian)က ၎င်း၏ ပြည်နယ်အစိုးရသည် Sresan Pharmaceuticals ဆေးကုမ္ပဏီကို ရာဇဝတ်မှုစွဲချက်ဖြင့် တရားစွဲဆိုသွားမည်ဟု အောက်တိုဘာ ၈ ရက်က ပြောကြားခဲ့သည်။

အိန္ဒိယကျန်းမာရေးအာဏာပိုင်များက ဂူဂျာရတ်ပြည်နယ် အခြေစိုက် ကုမ္ပဏီများက ထုတ်လုပ်သော Respifresh နှင့် RELIFE ချောင်းဆိုးပျောက်ဆေးရည်တို့တွင်လည်း အလားတူ အဆိပ်ရှိ ဓာတုပစ္စည်းများ ပါဝင်နေသောကြောင့် အသုံးမပြုကြရန် တိုက်တွန်းထားသည်။

Source: DW

CNI International News

ဂျာကာတာ၊ စက်တင်ဘာ ၂၆

အင်ဒိုနီးရှားနိုင်ငံတွင် ယခုသီတင်းပတ်အတွင်း စာသင်ကျောင်းများ၌ ကျွေးမွေးသည့် အခမဲ့ နေ့လယ်စာများကို စားသုံးခဲ့သည့် ကလေး ၁၀၀၀ ကျော်သည် အစာအဆိပ်သင့်မှု ဖြစ်ပွားခဲ့သည်ဟု The Jakarta Post မှ ဖော်ပြခဲ့ သည်။

ထိုဖြစ်စဉ်သည် အင်ဒိုနီးရှားသမ္မတ ပရာဘိုဝို (Prabowo Subianto) ၏ ကလေးသူငယ်များ အစာအဟာရ ပြည့်ဝစေရေး စီမံကိန်းအတွက် နေ့လယ်စာ အခမဲ့ကျွေးမွေးသည့် အစီအစဉ်ကြောင့် အစာအဆိပ်သင့်မှု ဖြစ်စဉ် များ၏ နောက်ဆုံးဖြစ်စဉ်တစ်ခု ဖြစ်လာခဲ့သည်။

စက်တင်ဘာ ၂၂ ရက်နှင့် စက်တင်ဘာ ၂၄ ရက်ကြား စာသင်ကျောင်းများတွင် ကျွေးမွေးသည့် အခမဲ့ နေ့လယ် စာများကို စားသုံးခဲ့ပြီး အစာအဆိပ်သင့်ခဲ့သော ကလေးပေါင်း ၁၁၇၁ ဦးအထိ ရှိခဲ့ကြောင်း အနောက်ဂျာဗား (West Java) ပြည်နယ်၏ Cipongkor Community ကျန်းမာရေးစင်တာ၏ အကြီးအကဲ ယူယန် ဆာရီဟိုတီမာ (Yuyun Sarihotima) က ပြောကြားခဲ့သည်။

ပြီးခဲ့သည့် သီတင်းပတ်ကလည်း အနောက်ဂျာဗားပြည်နယ်နှင့် ဗဟို ဆူလာဝေစီ (Central Sulawesi ) ပြည်နယ် များတွင် ကျောင်းသားပေါင်း ၈၀၀ ခန့် အစာအဆိပ်သင့်မှု ဖြစ်ပွားခဲ့သည်။

အင်ဒိုကလေးတွေ အစာအဆိပ်သင့်မှု ကုသနေစဉ်

ပရာဘိုဝိုသည် ၎င်း၏ သမ္မတသက်တမ်းအတွင်း ကျောင်းသား ကလေးငယ်ပေါင်း သန်း ၈၀ ကို အခမဲ့ နေ့လယ် စာများ ကျွေးမွေးရန် ရည်ရွယ်ပြီး အစာအာဟာရပြည့်ဝရေး စီမံကိန်းကို စတင်လုပ်ဆောင်ခဲ့ခြင်း ဖြစ်သည်။

ကလေးငယ်များ ခန္ဓာကိုယ် ကြီးထွားဖွံ့ဖြိုးမှု ရပ်တန့်နေခြင်းကို လျှော့ချရန် ရည်ရွယ်ထားသည့် ထိုစီမံကိန်း အတွက်  ရူပီး ၁၇၁ ထရီလျံ (ဒေါ် လာ ၁ဝ ဒသမ ၂ ဘီလျံ) ရှိသော ဘတ်ဂျက်ကို လာမည့်နှစ်တွင် ၂ ဆတိုးသွားရန် စီစဉ်ထားသည်။

သို့သော် အစာအဆိပ်သင့်မှု ဖြစ်စဉ်များ မကြာခဏ ဖြစ်ပွားခဲ့သဖြင့် NGO အဖွဲ့များက ကျန်းမာရေး စိုးရိမ်မှုများ ကြောင့် ထိုစီမံကိန်းကို ဆိုင်းငံ့ရန် အာဏာပိုင်များကို တိုက်တွန်းခဲ့သည်။

အစာအဆိပ်သင့်မှုကို ခံစားခဲ့ရသည့် ကျောင်းသား ကလေးငယ်များသည် ဗိုက်အောင့်၊ ဗိုက်နာခြင်း၊ ခေါင်းမူးခြင်း၊ မအီမသာဖြစ်ခြင်း၊ အသက်ရှူမဝခြင်း အစရှိသည့် ဝေဒနားများကို ခံစားခဲ့ရသည်ဟုဆိုသည်။

ယခုသီတင်းပတ်အတွင်း အစာအဆိပ်သင့်မှုကို ခံစားခဲ့ရသည့် ကျောင်းသားများသည် ကြက်သား ပဲငံပြာရည်ချက်၊ တို့ဟူးကြော်၊ အသီးအရွက်နှင့် သစ်သီးများ အပါအဝင် အခြားဟင်းလျာများကို စားသောက်ခဲ့ကြကြောင်း တာဝန်ရှိ သူများက ပြောကြားခဲ့သည်။

Source: The Jakarta Post

CNI International News

ဘေဂျင်း၊ ဩဂုတ် ၉

တရုတ်နိုင်ငံတောင်ပိုင်းရှိ မြို့များတွင် ဆင်တုပ်ကွေးများ ကူးစက်ဖြစ်ပွားနေချိန်၌ အာဏာပိုင်များ အနေဖြင့် ခြင်များကိုနှိမ်နင်းသည့် စီမံချက်များကို အလွန်အကျူး လုပ်ဆောင်ခြင်းမပြုရန် ကျွမ်းကျင်သူများက သတိပေး ခဲ့သည်ဟု South China Morning Post မှ ဖော်ပြခဲ့သည်။

ခြင်များကို နှိမ်နင်းခြင်းဖြင့် ဆင်တုပ်ကွေးကို ဖြစ်စေသည့် Chikungunya ဗိုင်းရပ်စ် ကူးစက်မှုကို တိုက်ဖျက်ရန် လုံလောက်မည် မဟုတ်ကြောင်း ကျွမ်းကျင်သူများက ဆိုသည်။

တရုတ်နိုင်ငံတောင်ပိုင်း ကွမ်တုံ (Guangdong) ပြည်နယ်တွင် ဆင်တုပ်ကွေးရောဂါ ဖြစ်ပွားသူများ ၇၀၀၀ ကျော် ရှိလာခဲ့သည်။

Chikungunya ဗိုင်းရပ်စ်သည် အေးဒိစ် (Aedes) ခြင်မှတဆင့် ကူးစက်ပျံ့နှံ့သည့် တုပ်ကွေးရောဂါဖြစ်ပြီး ရောဂါ လက္ခဏာများမှာ အဖျားတက်ခြင်း၊ အဖုအပိန့်များ ပေါက်ခြင်းနှင့် အရိုးအဆစ်များ နာကျင်ကိုက်ခဲခြင်းတို့ ဖြစ် သည်။

တရုတ်နိုင်ငံမှာ ခြင်နှိမ်းနင်နေစဉ်

အပူချိန်၊ စိုထိုင်းမှုနှင့် မိုးရွာသွန်းမှုများက ခြင်များပေါက်ပွားမှုကို အားပေးပြီး ရောဂါကူးစက်မှုများကို လျှင်မြန်စွာ ပျံ့နှံ့စေနိုင်သည်ဟု ကျွမ်းကျင်သူများက ပြောသည်။

ရောဂါကူးစက်မှု ဗဟိုချက်ဖြစ်သည့် ဖိုရှန် (Foshan) မြို့တွင် ကျန်းမာရေး အာဏာပိုင်များက စီးပွားရေး လုပ်ငန်းများ၊ ဟိုတယ်များနှင့် စားသောက်ဆိုင်များကို ခြင်ပေါက်ပွားသည့် နေရာများအား မနှိမ်နင်းနိုင်ခဲ့သဖြင့် ပြစ်ဒဏ်များ ချမှတ်ခဲ့သည်။

တရုတ်နိုင်ငံပိုင် ရုပ်သံ၏ ထုတ်လွှင့်မှုများတွင် ကျန်းမာရေး လုပ်သားများသည် မြို့များ၏ လမ်းများ၊ လူနေ ရပ်ကွက်များ၊ ဆောက်လုပ်ရေး လုပ်ငန်းခွင်များနှင့် ခြင်များ ပေါက်ပွားနိုင်သည့် ရေသေအိုင်များအနီးတွင် ခြင်ဆေးငွေ့များ ဖျန်းနေပုံကို ဖော်ပြခဲ့သည်။

မည်သို့ပင်ဆိုစေ ဟောင်ကောင်တက္ကသိုလ်မှ ဇီဝဆေးသိပ္ပံပါမောက္ခဖြစ်သည့် ကျင်းတုံးရန် (Jin Dongyan) ကမူ ထိုမြို့များတွင် ရှိသည့် ခြင်မျိုးစိတ်အားလုံးသည် Chikungunya ဗိုင်းရပ်စ်ကို မသယ်ဆောင်နိုင်သဖြင့် ထိုခြင်များ အားလုံးကို နှိမ်နင်းခြင်းသည် မှန်းချက်နှင့် နှမ်းထွက် မကိုက်ဖြစ်နိုင်ကြောင်း ပြောကြားခဲ့သည်။

ဆင်တုပ်ကွေး ရောဂါအတွက် အချို့နိုင်ငံများတွင် ကာကွယ်ဆေး ၂ မျိုးကို အတည်ပြုထားသော်လည်း တွင်ကျယ် စွာ အသုံးပြုခြင်း မရှိသေးဘဲ ဆရာဝန်များက ရောဂါကူးစက်ခံရသူများကို နာကျင်ကိုက်ခဲမှုများ သက်သာစေရန် ပါရာစီတမောကဲ့သို့ အကိုက်အခဲ ပျောက်ဆေးများကို ပေးလေ့ရှိသည်။

Source: South China Morning Post

CNI International News

ဘန်ကောက်၊ မေလ ၂၃

ထိုင်းနိုင်ငံတွင် ဆေးခြောက်ကို ဆေးဘက်ဆိုင်ရာ ရည်ရွယ်ချက်ဖြင့်သာ အသုံးပြုမှုကို စိတ်ချသေချာ စေရန် အတွက်  ဆေးခြောက် အသုံးပြုသူများသည် ဆေးဘက်ဆိုင်ရာ ထောက်ခံချက်များ လိုအပ်လိမ့်မည်ဟု ပြည်သူ့ကျန်းမာရေးဝန်ကြီး ဆွမ်ဆက် သက်ဆူတင် (Somsak Thepsutin) က ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

၎င်း၏ ကြေညာချက်သည် လွန်ခဲ့သည့် ၃ နှစ်နီးပါးအတွင်း ဆေးခြောက်သုံးစွဲမှုကို ရာဇဝတ်မှုအဖြစ်မှ ဖယ်ရှား ခဲ့ပြီးနောက် ဆေးခြောက်နှင့်ပတ်သက်သည့် ရှုပ်ထွေးသော စည်းကမ်းများ၊ ကြေညာချက်များအနက် နောက်ဆုံး စည်းကမ်းချက်ဖြစ်သည်။

“ထိုင်းမှာ ဆေးခြောက် သုံးတာနဲ့ပတ်သက်ပြီး စည်းကမ်းတွေကို တိုးမြှင့်သွားမှာပါ။ ဥပမာအနေနဲ့ ဆေးခြောက် သုံးတဲ့သူတွေဟာ ဆေးဘက်ဆိုင်ရာ ထောက်ခံချက်တွေ ပြသဖို့ လိုပါတယ်။ ပြည်တွင်း/ပြည်ပ ဆေးခြောက် သုံးစွဲ သူတွေဟာ ဆေးဘက်ဆိုင်ရာ ထောက်ခံချက်တွေ ရှိကိုရှိရပါမယ်”ဟု မစ္စတာ ဆွမ်ဆက်က ဘန်ကောက်မြို့တွင် ပြုလုပ်သည့် သတင်းစာရှင်းလင်းပွဲ၌ ပြောကြားခဲ့သည်။

ပြည်သူ့ကျန်းမာရေးဝန်ကြီး ဆွမ်ဆက် သက်ဆူတင်ကို တွေ့ရစဉ်

“ဒီစည်းကမ်းကို ဆက်လက် ပြဋ္ဌာန်းဖို့နဲ့ ဘာပြဿနာမှ မဖြစ်စေဖို့ အစိုးရ အဖွဲ့အစည်းတွေကို ကျနော်တို့ ညွှန်ကြားသွားမှာပါ” ဟု အာဏာရဖြူးထိုင်းပါတီမှ ဝန်ကြီးဖြစ်သည့် ဆွမ်ဆက်က ပြောသည်။

ထိုအပြောင်းအလဲကြောင့် ဆေးခြောက် အသုံးပြုသူများသည် ထိုင်း၏ တိုင်းရင်းဆေး ပညာရှင်များနှင့် အထွေထွေ ရောဂါကု ဆရာဝန်များ အပါအဝင် လိုင်စင်ရ ဆေးပညာရှင်များက ထုတ်ပေးသည့် ဆေးဘက်ဆိုင်ရာ ထောက်ခံ ချက်များရယူရန် လိုအပ်လိမ့်မည်ဖြစ်သည်။

ထိုထောက်ခံချက်များကို ကျန်းမာရေးဝန်ကြီးဌာနက ရက်ပေါင်း ၄၀ အတွင်း ထုတ်ပေးစေလိုကြောင်းလည်း မစ္စတာ ဆွမ်ဆက်က ပြောကြားခဲ့သည်။

စည်းမျဉ်းစည်းကမ်းများအရ ဆေးခြောက်ကို ဆေးဝါးကုသမှုအတွက်သာ အသုံးပြုသင့်သည်ဟု ပြဋ္ဌာန်းသင့် ကြောင်း  ထိုင်းတိုင်းရင်းဆေးနှင့် အနောက်တိုင်းဆေးပညာဌာန၏ ညွှန်ကြားရေးမှူးချုပ် ဒေါက်တာ ဆွမ်လာ့ခ် ဂျီအန်စ်မန် (Somlerk Jeungsmarn) က ပြောကြားခဲ့သည်။

ဆေးခြောက်သုံးလို့ရတဲ့ ကလပ်ကိုတွေ့ရစဉ်

“ဆေးခြောက် အသုံးပြုသူတွေဟာ လေဖြတ်တာ၊ ခေါင်းကိုက်တာ၊ နာကျင်တာနဲ့ အိပ်မပျော်တဲ့ ရောဂါတွေ ခံစားနေရတဲ့သူတွေ ဖြစ်တယ်ဆိုတာကို အတည်ပြုထားတဲ့ ဆေးဘက်ဆိုင်ရာ ထောက်ခံချက်တွေလည်း အနာဂတ်မှာ လိုအပ်လာပါလိမ့်မယ်” ဟု ၎င်းက ဆိုသည်။

အနာဂတ်တွင် ပြဋ္ဌာန်းမည့် စည်းကမ်းများတွင် တစ်လအတွင်း အသုံးပြုသည့် ဆေးခြောက်ပမာဏကို ကန့်သတ် ခြင်း၊ သတ်မှတ်ထားသော ပမာဏထက် ကျော်လွန်အသုံးပြုခြင်းကို ဆေးဘက်ဆိုင်ရာ ရည်ရွယ်ချက်ဖြင့် အသုံးပြု သည်ဟု ယူဆနိုင်မည် မဟုတ်ဘဲ တရားစီရင်ခံရမည့် စည်းကမ်းချက်များလည်း ပါဝင်လာဖွယ်ရှိသည်ဟု ဆွမ်လာ့ခ်က ပြောကြားခဲ့သည်။

Source: ဘန်ကောက်ပို့စ်

CNI International News

ဘန်ကောက်၊ မေလ ၁၀

ထိုင်းနိုင်ငံတွင် လာမည့်မိုးရာသီ ကာလနှင့် ကျောင်းများပြန်ဖွင့်ချိန်တွင် Covid-19  ရောဂါကူးစက်မှုများ မြင့်တက် ဖွယ်ရှိကြောင်း ရောဂါထိန်းချုပ်ရေးဌာန(DDC)က ခန့်မှန်းထားကြောင်း The Nation မှ ဖော်ပြခဲ့သည်။

Covid-19 ရောဂါကို ဖြစ်ပွားစေသည့် ကိုရိုနာဗိုင်းရပ်စ်ကို နေအိမ်အတွင်း နေထိုင်နေသည့် ခံနိုင်ရည် အားနည်း သော လူအုပ်စုထံ မပျံ့နှံ့စေရန် တားဆီးရေးသည် အရေးကြီးကြောင်း ကျန်းမာရေးအာဏာပိုင်များက ပြောကြား ခဲ့သည်။

မေလ ၄ ရက်မှ ၈ ရက်အထိ Covid-19 ရောဂါဖြစ်ပွားသူ ၇၀၁၃ ဦးရှိခဲ့ပြီး တစ်ဦးသေဆုံးခဲ့ကြောင်း DDC ညွှန်ကြားရေးမှူးချုပ် ဒေါက်တာ ပါနူမာ ယန်ဝတ်ဆာကူလ် ( Panumas Yanwetsakul) က မေလ ၉ ရက်တွင် ပြောကြားခဲ့သည်။

ရောဂါကူးစက်မှုနှုန်း အများဆုံး အရွယ်သည် အသက် ၄ နှစ်အောက် ကလေးငယ်များဖြစ်ပြီး အသက် ၃၀ မှ ၃၉ နှစ်ကြား အရွယ်များသည်  ရောဂါကူးစက်မှု ဒုတိယအများဆုံးဖြစ်ပြီး အသက် ၂၀ မှ ၂၉ နှစ်အရွယ်များသည် ရောဂါကူးစက်မှု တတိယအများဆုံး ဖြစ်သည်။

DDC ညွှန်ကြားရေးမှူးချုပ် ဒေါက်တာ ပါနူမာ ယန်ဝတ်ဆာကူလ်ကို တွေ့ရစဉ်

Covid-19 ကြောင့် သေဆုံးသူသည် အသက် ၆၀ ကျော် အရွယ်ဖြစ်ကြောင်း သိရသည်။

ထိုင်းတွင် ယခုနှစ် ဇန်နဝါရီ ၁ ရက်မှ မေလ ၈ ရက်အထိ Covid-19 ရောဂါ ကူးစက်ခံရသူ ၄၁,၁၉၇ ဦးရှိခဲ့ပြီး သေဆုံးသူ ၁၅ ဦး ရှိခဲ့သည်။

Covid-19 ရောဂါသည် လူအများအပြား စုဝေးခြင်း၊ ရာသီအပြောင်းအလဲ ကာလများတွင် ဆက်လက် ပျံ့နှံ့နေပြီး မိုးရာသီတွင် ရောဂါကူးစက်မှု ပိုမိုမြင့်တက်လာနိုင်ကြောင်း ဒေါက်တာ ပါနျူမာက ပြောကြားခဲ့သည်။

ထိုင်းတွင် ဇန်နဝါရီ ၁ ရက်မှ မေ ၈ ရက်အထိ တုပ်ကွေးရောဂါ ဖြစ်ပွားသူ ၃၂၂,၉၉၁ ဦးရှိပြီး ၄၃ ဦးသေဆုံးခဲ့သည်။

သေဆုံးနှုန်းသည် လူ ၁၀၀,၀၀၀ လျှင် ၄၉၇ ဒသမ ၅၈ ဦးရှိကြောင်း တာဝန်ရှိသူများက ပြောကြားခဲ့သည်။

ထိုင်းတွင် ဧပြီ ၁၃ ရက်မှ ၂၆ ရက်အထိ ဆွန်ခရမ် ရေကစားပွဲတော် ကာလအတွင်း တုပ်ကွေးရောဂါ ဖြစ်ပွားမှု မြင့်တက်ခဲ့သော်လည်း ထိုကာလအပြီးတွင် ရောဂါဖြစ်ပွားမှု လျော့ကျခဲ့သည်။

Source: The Nation