CNI International News

ဘန်ကောက်၊ ဩဂုတ် ၂၂

ထိုင်းနိုင်ငံတွင် မျောက်ကျောက်(monkeypox-mpox) ဗိုင်းရပ်စ်၏ clade 1b မျိုးကွဲ ကူးစက်သည့် ပထမဆုံးလူနာ ကို တွေ့ရှိခဲ့ကြောင်း ထိုင်းရောဂါ ထိန်းချုပ်ရေးဌာန(DCD)က ဩဂုတ်၂၁ ရက်တွင် ကြေညာခဲ့သည်ဟု The Nation မှ ဖော်ပြခဲ့သည်။

ရောဂါကူးစက်ခံရသည့် လူနာသည် အာဖရိကမှ ထိုင်းသို့ရောက်ရှိလာပြီး clade 1b ဗိုင်းရပ်စ်မျိုးကွဲ ကူးစက်ခံရ ကြောင်း စစ်ဆေးတွေ့ရှိခဲ့သည်ဟု DCD က ထုတ်ပြန်ခဲ့သည်။

ထိုရောဂါကူးစက်မှု ဖြစ်စဉ်အသေးစိတ်ကို DCD ညွှန်ကြားရေးမှူးချုပ် သွန်ချိုင်း ကီရာတီဟတ္တယာကွန်း (Thongchai Kiratihattayakorn) က ဩဂုတ် ၂၁ ရက်တွင် ကြေညာခဲ့သည်။

ကမ္ဘာ့ကျန်းမာရေးအဖွဲ့ (WHO)သည် mpox ဗိုင်းရပ်စ်၏ clade 1b မျိုးကွဲကူးစက်မှုကို နိုင်ငံတကာ အများပြည်သူ့ ကျန်းမာရေးအခြေအနေ (PHEIC) အဖြစ် ကြေညာခဲ့သည်။

PHEIC ကြေညာချက်သည် ၂ နှစ်အတွင်း mpox ရောဂါနှင့်ဆက်နွှယ်ပြီး ဒုတိယအကြိမ်မြောက် ကြေညာချက် ဖြစ်သည်။

mpox ရောဂါသည် Orthopoxvirus အမည်ရှိ ဗိုင်းရပ်စ် တစ်မျိုးကြောင့် ဖြစ်ပွားပြီး ၁၉၇၀ ပြည့်နှစ်က ကွန်ဂိုနိုင်ငံ တွင် လူသားများ၌ ကူးစက်မှုကို ပထမဆုံးအကြိမ် ထောက်လှမ်းတွေ့ရှိခဲ့သည်။

ထိုင်းရောဂါ ထိန်းချုပ်ရေးဌာန(DCD)မှ တာ၀န်ရှိသူများကို တွေ့ရစဉ်

ထိုရောဂါသည် ဗဟိုအာဖရိကနှင့် အနောက်အာဖရိကနိုင်ငံများတွင် ကူးစက်ပျံ့နှံ့သည့် အသေးစား ကပ်ရောဂါ တစ်ခုအဖြစ် ယူဆခံခဲ့သည်။

၂၀၂၂ ခုနှစ်၊ ဇူလိုင်လကလည်း ကမ္ဘာ့နိုင်ငံ အများအပြားတွင် mpox ရောဂါကူးစက်မှုများ ဖြစ်ပွားခဲ့သဖြင့် PHEIC ကြေညာချက် ထုတ်ပြန်ခဲ့ရပြီး ရောဂါကူးစက်မှုများ လျော့ကျလာသည့် ၂၀၂၃ ခုနှစ်၊ မေလတွင်မူ ထိုကြေညာချက် ကို ပြန်လည်ရုပ်သိမ်းခဲ့သည်။

ထိုင်းနိုင်ငံတွင် ယခုနှစ် ၂၀၂၂ ခုနှစ်၊ ဇန်နဝါရီလမှ ယခုနှစ် ဩဂုတ် ၁၁ ရက်အကြား mpox ရောဂါကူးစက်ခံရသူ ၈၂၇ ဦးရှိခဲ့ပြီး ကူးစက်ခံရသူ အားလုံးသည် ရောဂါပြင်းထန်ခြင်းမရှိသည့် clade 2 မျိုးကွဲ ကူးစက်ခံရခြင်းဖြစ် သည်။

ယခင်က မျောက်ကျောက် (monkeypox) ဟု လူသိများခဲ့သည့် mpox ရောဂါသည် လိင်ဆက်ဆံမှု သို့မဟုတ် အရေပြားချင်း နီးကပ်စွာ တိုက်ရိုက်ထိတွေ့မှုမှတစ်ဆင့် ကူးဆက်ခြင်းဖြစ်သည်။

ရောဂါကူးစက် ခံရသူများသည် တုပ်ကွေးကဲ့သို့ ရောဂါလက္ခဏာများကို ခံစားရပြီး အရေပြားတွင် အနာများ ပေါ်ပေါက်လေ့ရှိသည်။ 

ထိုရောဂါသည် အသက်သေဆုံး စေနိုင်သော်လည်း ကူးစက်ခံရသူ ၁၀၀ တွင် ပျမ်းမျှ သေဆုံးသူမှာ ၄ ဦးခန့်သာ ရှိသည်။

Source: The Nation