CNI International News

ဘန်ကောက်၊ ဇန်နဝါရီ ၂၄

ထိုင်းဝန်ကြီးချုပ် ပေတုန်တန် (Paetongtarn Shinawatra) က တရုတ်ခရီးသွားများအနေဖြင့် တရုတ်နှစ်သစ်ကူး ကာလအတွင်း ထိုင်းနိုင်ငံသို့ လာရောက် လည်ပတ်ကြရန် မန်ဒရင်းဘာသာစကားဖြင့် ပြောကြားနေသည့် AI ဖြင့် ဖန်တီးထားသော ဗွီဒီယိုတစ်ပုဒ်ကို တင်ခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

ထိုင်း-မြန်မာနယ်စပ်တွင် ကျားဖြန့်ဂိုဏ်းများနှင့် လူမှောင်ခိုကူးမှု သတင်းများကြောင့် တရုတ်ခရီးသွားများအကြား စိုးရိမ်မှု မြင့်တက်နေချိန်၌ ပေတုန်တန်က ထိုဗွီဒီယိုကို ဇန်နဝါရီ ၂၂ ရက်က လူမှုမီဒီယာမှာ တင်ခဲ့ခြင်းဖြစ်သည်။

 ၁ မိနစ်နှင့် ၃၂ စက္ကန့် ကြာမြင့်သည့် AI ဖြင့် ပြုလုပ်သည့် ထိုဗွီဒီယို၌ ဝန်ကြီးချုပ် ပေတုန်တန်သည် တရုတ်၏ အဓိက ဘာသာစကားဖြစ်သော မန်ဒရင်းဘာသာစကားကို ကျွမ်းကျွမ်းကျင်ကျင် ပြောဆိုနေသည်ကို တွေ့ရသည်။

သို့သော် လက်တွေ့ အပြင်ဘဝတွင်မူ ပေတုန်တန်သည် မန်ဒရင်း ဘာသာစကားကို ပြောဆိုတတ်ခြင်း မရှိပေ။

“ထိုင်းနယ်စပ်တစ်ဝန်းမှာ လိမ်လည်မှု ကျူးလွန်တဲ့ နေရာတွေက တရုတ်နိုင်ငံသားတွေကို ဖြားယောင်း ခေါ်ဆောင်နေတယ်ဆိုတဲ့ သတင်းတွေက တရုတ်ခရီးသွားတွေကြားမှာ စိုးရိမ်မှုတွေ ဖြစ်ပေါ်စေတာကို ကျမတို့ နားလည်ပါတယ်။ ထိုင်းအစိုးရအနေနဲ့ ခရီးသွားတွေ အားလုံးရဲ့ ဘေးကင်းလုံခြုံမှုကို  အကောင်းဆုံး ဦးစားပေး ဆောင်ရွက်နေပါတယ်”ဟု ပေတုန်တန်က တရုတ်လို ပြောကြားခဲ့သည်။

ထိုင်း- မြန်မာနယ်စပ်တွင် ပြန်ပေးဆွဲမှု သတင်းများအပေါ် စိုးရိမ်မှုများ မြင့်တက်နေချိန်၌ တရုတ်နှစ်သစ်ကူး ခရီးသွားရာသီ မတိုင်မီ ထိုင်းနိုင်ငံသည် အလားအလာရှိသော တရုတ်ခရီးသွားများအကြာ ဘေးကင်း လုံခြုံမှု ဆိုင်ရာ စိုးရိမ်ပူပန်မှုများကို ဖြေဖျောက်ပေးရန် ကြိုးပမ်းလျက်ရှိသည်။

ထိုင်းဝန်ကြီးချုပ် ပေတုန်တန်ကို တွေ့ရစဉ်

တရုတ်နိုင်ငံရှိ တက်သစ်စ အနုပညာရှင်များသည် ထိုင်း-မြန်မာနယ်စပ်၌ လှည့်ဖြားခံရပြီ ကျားဖြန့်ဂိုဏ်းများထံ ရောက်ရှိသွားရာမှ ကယ်တင်ခဲ့သည့် သတင်းများ ထွက်ပေါ်လာခဲ့ပြီးနောက် ထိုင်းနိုင်ငံသည် အန္တရာယ်ရှိသော နေရာတစ်ခုအဖြစ် တရုတ်နိုင်ငံသားများအကြား ရေပန်းစားလာခဲ့သည်။

ပေတုန်တန်ကမူ တရားမဝင် နယ်စပ်ဖြတ်ကျော် ဝင်ရောက်မှုများကို တိုက်ဖျက်ရန်နှင့် ခရီးသွားများကို ကူညီပေးသည့် စီမံကိန်းများအတွက် ဥပဒေများ ထုတ်ပြန်သွားမည်ဖြစ်ကြောင်း ကတိပြုခဲ့သည်။

အစိုးရအဖွဲ့သည် ခရီးသွားများ၏ ဘေးကင်းလုံခြုံရေးကို ဦးစားပေး ဆောင်ရွက်နေပြီး ခရီးသွားများအကြား ယုံကြည်မှုများ မြင့်တက်စေရန် လုပ်ဆောင်နေကြောင်း ၎င်းက ပြောသည်။

တရုတ်သည် ဇန်နဝါရီလ၏ ပထမဆုံး သီတင်းနှစ်ပတ်တွင် ထိုင်းနိုင်ငံ၏ ခရီးသွားစာရင်း၌ ထိပ်ဆုံးနေရာ၌ ရှိနေကြောင်း၊ ထိုင်းနိုင်ငံသို့ လာရောက်သည့် ခရီးသွား ၁ ဒသမ ၃ သန်းတွင် ခြောက်ပုံတစ်ပုံသည် တရုတ်နိုင်ငံ သားများ ဖြစ်သည်။

Source: ဘန်ကောက်ပို့စ်

CNI International News

ဘန်ကောက်၊ ဇန်နဝါရီ ၂၃

ထိုင်းနိုင်ငံသို့ လာရောက်မည့် တရုတ်ခရီးသွားများ၏ လုံခြုံရေးကို စိတ်ချသေချာစေရန်အတွက် ထိုင်းဝန်ကြီးချုပ် ပေတုန်တန် ရှင်နာဝပ် (Paetongtarn Shinawatra) က တရုတ်သမ္မတ ရှီကျင့်ဖျင် (Xi Jinping) ကို ကိုယ်တိုင် ပြောကြားလိမ့်မည်ဟု ဘန်ကောက်ပို့စ်မှ ဖော်ပြခဲ့သည်။

ပေတုန်တန်သည် လာမည့်လတွင် တရုတ်သို့ သွားရောက်ချိန်အတွင်း ရှီနှင့် တွေ့ဆုံမည်ဖြစ်ကြောင်း ခရီးသွား လုပ်ငန်းနှင့် အားကစားဝန်ကြီး ဆိုရာဝေါင် သီယန်သွန်း (Sorawong Thienthong) က ပြောကြားခဲ့သည်။

ထိုင်းနိုင်ငံသည် ယခုနှစ်အတွင်း တရုတ်ခရီးသွား ၉ သန်းခန့် လာရောက်လိမ့်မည်ဟု ခန့်မှန်းထားပြီး ထိုပမာဏ သည် တရုတ်ခရီးသွား ၆ ဒသမ ၇ သန်းရှိခဲ့သည့် ပြီးခဲ့သည့်နှစ်ကထက် ၃၅ ရာခိုင်နှုန်း မြင့်တက်ခြင်းဖြစ်သည်။

ထိုင်းခရီးသွားလုပ်ငန်းအာဏာပိုင်အဖွဲ့ (TAT) သည် ခရီးသွားများအကြား ဘေးကင်းလုံခြုံရေးအတွက် ယုံကြည်မှု ရှိစေရန် အားထုတ်ကြိုးပမ်းမှုများကို အရှိန်မြှင့် လုပ်ဆောင်နေကြောင်း မစ္စတာဆိုရာဝေါင်က ပြောကြားခဲ့သည်။

ခရီးသွားလုပ်ငန်း လုံခြုံမှုနှင့် အပြုသဘောဆောင်သည့် သတင်းများသည် လူမှုမီဒီယာ ပလက်ဖောင်းများ များပြားသည့် တရုတ်၏ ခရီးသွားများအားလုံးထံ မရောက်သေးကြောင်း ၎င်း ပြောသည်။

ပေတုန်တန်နဲ့ ရှီကျင့်ဖျင်ကို တွေ့ရစဉ်

မစ္စတာဆိုရာဝေါင်က သူကိုယ်တိုင်လည်း တရုတ်နိုင်ငံသားများနှင့် အဆက်အသွယ် ရစေရန်အတွက် တရုတ်သံအမတ်နှင့် ဆွေးနွေးခဲ့ပြီး တရုတ်သံအမတ်က ကူညီပေးမည်ဟု ကတိပြုခဲ့ကြောင်း ပြောကြားခဲ့သည်။

ယခုလ အစောပိုင်းက ထိုင်း-မြန်မာ နယ်စပ်အနီးတွင် ပျောက်ဆုံးခဲ့ပြီးနောက် ပြန်လည်ကယ်တင်နိုင်ခဲ့သည့် တရုတ်သရုပ်ဆောင် ဝမ်ရှင်း (Wang Xing) ၏ ဖြစ်စဉ်သည် နှစ်နိုင်ငံပြည်သူများ၏ အာရုံကို ဖမ်းစားခဲ့ကြောင်း ဆိုရာဝေါင်က ပြောသည်။

ပေတုန်တန်သည်လည်း လာမည့်လတွင် တရုတ်သို့ နိုင်ငံတော်ခရီးစဉ် သွားရောက်ရန် စီစဉ်ထားပြီး ထိုခရီးစဉ်တွင် တရုတ်ခရီးသွားများ၏ ဘေးကင်းလုံခြုံရေးနှင့်ပတ်သက်ပြီး တရုတ်သမ္မတရှီနှင့် ဆွေးနွေးသွားမည်ဟု ၎င်းက ဆိုသည်။

ယခုနှစ် ဇန်နဝါရီ ၂၀ ရက်အထိ ရရှိခဲ့သည့် သတင်းများအရ ထိုင်းသို့ လာရောက်သည့် တရုတ်ခရီးသွား အရေအတွက်သည် တစ်ရက်လျှင် ၂၂,၀၀၀ ပျမ်းမျှရှိခဲ့ပြီး ထိုပမာဏသည် နေ့စဉ် ပုံမှန်ဝင်ရောက်သည့် ပျမ်းမျှ တရုတ်ခရီးသွား အရေအတွက် ၁၇,၀၀၀ ထက် ပိုမိုများပြားခဲ့သည်ဟု ဆိုရာဝေါင်က ပြောကြားခဲ့သည်။

Source: ဘန်ကောက်ပို့စ်

CNI International News

ဘန်ကောက်၊ ဇန်နဝါရီ ၁၇

တရုတ်နှစ်သစ်ကူး ကာလအတွင်း ထိုင်းနိုင်ငံသို့ ပြည်ပခရီးသွား ၄ သန်းကျော် လာရောက်ဖွယ်ရှိသည်ဟု The Nation မှ ဖော်ပြခဲ့သည်။

ထိုပမာဏသည် ပြီးခဲ့သည့် တရုတ်နှစ်သစ်ကူး ကာလက ခရီးသွား အရေအတွက်ထက် ၁၀ ဒသမ ၄ ရာခိုင်နှုန်း မြင့်တက်လာလိမ့်မည်ဖြစ်ကြောင်း ထိုင်းသယ်ယူပို့ဆောင်ရေးဝန်ကြီးဌာနက ခန့်မှန်းထုတ်ပြန်ခဲ့သည်။

ဇန်ဝါရီ ၂၄ ရက်မှ ဖေဖော်ဝါရီ ၂ ရက်အတွင်း တရုတ်ခရီးသွား ၇၇၀,၀၀၀ အပါအဝင် ပြည်ပခရီးသွား ၄ သန်းခန့် ရောက်ရှိလာဖွယ်ရှိကြောင်း သယ်ယူပို့ဆောင်ရေးဝန်ကြီး သူရိယ ဂျန်ရွန်ရန်ကစ် (Suriya Jungrungreangkit) က ပြောကြားခဲ့သည်။

ထိုတရုတ်ခရီးသွား အရေအတွက်သည် ပြီးခဲ့သည့်နှစ်က တရုတ်ခရီးသွား အရေအတွက်ထက် ၂၂ ဒသမ ၆ ရာခိုင်နှုန်း မြင့်တက်မှုဖြစ်သည်။

ဒုတိယဝန်ကြီးချုပ်အဖြစ်လည်း တာဝန်ထမ်းဆောင်နေသည့် သူရိယက ခရီးသွားများ လုံခြုံရေးနှင့် ဝန်ဆောင်မှု အရည်အသွေးကို မြင့်တက်စေရန် အရေးကြီးကြောင်း၊ လေဆိပ်ဝန်ထမ်း အရေအတွက်ကို တရုတ်နှစ်သစ်ကူး ကာလအတွင်း ပိုမိုတိုးမြှင့် ထားမည်ဖြစ်ကြောင်း ပြောကြားခဲ့သည်။

ထိုင်းလေဆိပ်မှာ ခရီးသွားများကိုတွေ့ရစဉ်

ထိုင်းလေဆိပ်များ ကုမ္ပဏီ (Airports of Thailand - AOT) စီအီးအို ကီရာတီ ကစ်မာနာဝတ် (Keerati Kitmanawat) ကမူ တရုတ်နှစ်ကူး အားလပ်ရက် ကာလအတွင်း ခရီးသည်များ စောင့်ဆိုင်းရသည့် အချိန်ကို လျှော့ချရန် နိုင်ငံတကာလေဆိပ် ၆ ခုစလုံးကို ဖွင့်ပေးထားမည်ဟု ဆိုသည်။

တရုတ်နှစ်သစ်ကူး ကာလအတွင်း ထိုနိုင်ငံတကာလေဆိပ် ၆ ခုတွင် လေကြောင်းလိုင်း ပြေးဆွဲမှုသည် ၁၀ ဒသမ ၄ ရာခိုင်နှုန်း မြင့်တက်မည်ဖြစ်ပြီး ခရီးသည်ပေါင်း ၄ ဒသမ ၀၃ သန်းဦး ဝင်ရောက်လာလိမ့်မည်ဟု AOT က ခန့်မှန်း ထားသည်။

ထို့ပြင် တရုတ်နှစ်ကူး ကာလအတွင်း နေ့စဉ် ခရီးသည် ၄၀၃,၁၈၂ ဦး၊ လေကြောင်းခရီးစဉ် ၁၂၄၀ ဝင်ရောက် လာမည်ဖြစ်ပြီး ထိုပမာဏသည် ပြီးခဲ့သည့် နှစ်ကထက် ၁၆ ဒသမ ၇ ရာခိုင်နှုန်း မြင့်တက်မှုဖြစ်ကြောင်း AOT က ခန့်မှန်းခဲ့သည်။

Source: The Nation

CNI International News

ဘန်ကောက်၊ ဇန်နဝါရီ ၁၅

ထိုင်းနိုင်ငံတွင် တရုတ်နိုင်ငံသားများ လူကုန်ကူးခံရမှုများ ဖြစ်ပွားနေပြီး လုံခြုံရေးစိုးရိမ်ရသည့် အခြေအနေများ ကြောင့် တရုတ်ခရီးသွားအဖွဲ့များသည် ထိုင်းခရီးစဉ်များကို ဖျက်သိမ်းနေကြောင်း ဘန်ကောက်ပို့စ်မှ ဖော်ပြခဲ့ သည်။

ပုံမှန်အားဖြင့် တရုတ်နှစ်သစ်ကူး အားလပ်ရက် ကာလတွင် တရုတ်ခရီးသွားအဖွဲ့များသည် ထိုင်းကို လာရောက် လေ့ရှိသော်လည်း ယခုနှစ်တွင် ဟိုတယ်ဘွတ်ကင်(ဘိုကင်) တင်မှုများနှင့် လေယာဉ်လက်မှတ် ဝယ်ယူမှု အများအပြားကို ပြန်လည်ဖျက်သိမ်းနေကြသည်။

ပြီးခဲ့သည့် သီတင်းပတ်ကလည်း ဟောင်ကောင် အဆိုတော်နှင့် သရုပ်ဆောင် တစ်ဦးဖြစ်သည့် အာဆန်ချန်း (Eason Chan) သည် ထိုင်းနိုင်ငံတွင် ဖျော်ဖြေရန် စီစဉ်ထားသည့် ရှိုးပွဲကို ဖျက်သိမ်းခဲ့သည်။

အာဆန်ချန်းက ၎င်း၏ရှိုးပွဲကိုကြည့်ရန် ထိုင်းသို့ တရုတ်နိုင်ငံသားများ လာရောက်မည်ဆိုပါက ၎င်းတို့၏ လုံခြုံရေးအတွက် စိုးရိမ်ရကြောင်း ပြောကြားခဲ့ကာ ရှိုးပွဲကို ဖျက်သိမ်းခဲ့ခြင်းဖြစ်သည်။

မကြာသေးမီကလည်း တရုတ်နိုင်ငံသားများသည် လူကုန်ကူးခံခဲ့ရသည့် သတင်းများ ထွက်ပေါ်လာခဲ့ပြီးနောက် ဟောင်ကောင်အာဏာပိုင်များက ယခုသီတင်းပတ် အစောပိုင်းအတွင်း ထိုင်းသို့ အထူးတာဝန်အဖွဲ့အဖြစ် လုံခြုံရေး ဗျူရို(SB) ကို စေလွှတ်ထားသည်။

ထိုင်း-မြန်မာနယ်စပ်မှာ လူကုန်ကူးခံရတဲ့ တရုတ်အနုပညာရှင်ကို တွေ့ရစဉ်

ထိုင်းတွင် တရုတ်နိုင်ငံသားများ ပြန်ပေးဆွဲ ခံရခြင်း မရှိသော်လည်း လူမှောင်ခို ကူးသူများသည် တရုတ်နိုင်ငံသား များကို ထိုင်းနယ်စပ်မှဖြတ်ပြီး မြန်မာနိုင်ငံအတွင်းသို့ ခေါ်ဆောင်ခဲ့ကြကြောင်း ထိုင်းခရီးသွားလာရေးနှင့် အားကစားရေးရာဌာနမှ အမြဲတမ်းအတွင်းဝန် နတ်သရီယာ သာဝီဗွန် (Natthriya Thaweevong) က ပြောကြား ခဲ့သည်။

ဟောင်ကောင် ဒေသခံများအနေဖြင့် အလွန်များပြားသည့် လစာငွေဖြင့် ကမ်းလှမ်းပြီး အလုပ်ခေါ်မည်ဆိုပါက သတိထားကြရန်နှင့် ထိုအလုပ် ခေါ်ယူမှုများသည် အလိမ်အညာများ ဖြစ်နိုင်ကြောင်း ဟောင်ကောင် အာဏာပိုင် များက သတိပေးထားသည်။

ထိုင်းနိုင်ငံ၏ ခရီးသွားလုပ်ငန်းရဲတပ်ဖွဲ့သည် ခရီးသွားများအတွက် ဘေးကင်းလုံခြုံရေး အစီအမံများကို မြှင့်တင် ထားပြီး ၂၄ နာရီ အကူအညီပေးနေကြောင်း ထိုင်းခရီးသွားလုပ်ငန်းဝန်ကြီးဌာနက ဟောင်ကောင် အာဏာပိုင် များကို စိတ်ချစေရန် ပြောကြားထားသည်ဟု နတ်သရီယာက ပြောကြားခဲ့သည်။

လက်ရှိတွင် ထိုင်းဟိုတယ်များအသင်း (THA) ၏ မားကက်တင်းဥက္ကဋ္ဌ ပရာချွမ် တန်တီပရာဆတ်ဆွတ် (Prachoom Tantiprasertsuk) ကမူ ယခင်က တရုတ်ခရီးသွားအဖွဲ့များအကြား တည်းခိုလေ့ရှိသည့် ဟိုတယ်များတွင် အခန်းဘွတ်ကင် တင်ထားမှုများကို ခရီးသွားများဘက်မှ ဖျက်သိမ်းမှုများ ရှိနေကြောင်း ပြောကြားခဲ့သည်။

Source: ဘန်ကောက်ပို့စ်

CNI News

၂၀၂၅ ခုနှစ်၊ ဇန်နဝါရီ ၆

စစ်ကိုင်းတိုင်းဒေသကြီး၊ ဗန်းမောက်မြို့နယ်အတွင်းရှိ ရှမ်းနီတိုင်းရင်းသားများ၏ အမွေအနှစ်များထဲက တစ်ခုဖြစ် သည့် လွိုင်စန့်လုံ(ခေါ်) ဇလုံတောင် တောင်တက်ခရီးစဉ်ကားများ ပြန်လည် ပြေးဆွဲခွင့်ပြုလိုက်ကြောင်း ဒေသခံ များက ပြောသည်။

ဗန်းမောက်မြို့ကနေ ဇလုံတောင်သို့ ပြေးဆွဲသည့် တောင်တက်ခရီးစဉ်ကားလိုင်းကို ၂၀၂၂ ခုနှစ်ကတည်းက တိုက်ပွဲများကြောင့် ပိတ်ထားခဲ့ရာမှ ၂၀၂၅ ခုနှစ်၊ ဇန်နဝါရီ ၆ ရက်မှ ပြန်လည် ပြေးဆွဲခွင့် ပြုခဲ့ခြင်းဖြစ်သည်။

၂၀၂၅ ခုနှစ်၊ ဇန်နဝါရီ ၆ ရက်က ဇလုံတောင် တောင်တက်ကားလိုင်းပြေးဆွဲခွင့် ဖွင့်ပွဲလုပ်နေစဉ်

ဗန်းမောက်ဒေသခံက “ဗန်းမောက်မြို့နယ်က ရှမ်းနီတို့ရဲ့ အထင်ကရ သမိုင်းဝင် လွိုင်စန့်လုံတောင် (ဇလုံတောင်) တောင်ပေါ် ဘုရားကြီး ဖူးမျှော်နိုင်ဖို့အတွက် တောင်တက်ကားလိုင်း ပြေးဆွဲခွင့်ကို ဒီနေ့ မနက်ပိုင်းက ဖွင့်လှစ် လိုက်တယ်”ဟု ပြောသည်။

အဆိုပါ တောင်တက်ခရီးစဉ် ပြေးဆွဲမည့် ကားဂိတ်ဖွင့်ပွဲကို ဇန်နဝါရီ ၆ ရက်နေ့ နံနက်ပိုင်းက ဇလုံတောင် ဘုရားကြီး ဩဝါဒါစရိယအဖွဲ့၊ နာယကအဖွဲ့နှင့် ဂေါပကအဖွဲ့၊ ဒေသဆိုင်ရာ အာဏာပိုင်များက ပြုလုပ်ခဲ့သည်။

CNI News
၂၀၂၄ ခုနှစ်၊ ဒီဇင်ဘာ ၂၁

ခရီးသွားလာမှု အဆင်ပြေချောမွေ့နိုင်ရေးအတွက် အစိုးရရုံးပိတ်ရက်များကို ပြောင်းလဲသတ်မှတ်လိုက်ကြောင်း နစက-က ၂၀၂၄ ခုနှစ်၊ ဒီဇင်ဘာ ၂၁ ရက်တွင် ထုတ်ပြန်ခဲ့သည်။

ဒီဇင်ဘာ ၂၈ ရက်မှ ဇန်နဝါရီ ၁ ရက်အထိ  ၅ ရက်တိတိ ရုံးပိတ်ရက်အဖြစ် သတ်မှတ်ကြောင်း ထုတ်ပြန်ကြေညာခဲ့သည်။

#နစက #ပြည်သူလူထု #အစိုးရရုံးပိတ်ရက် #ခရီးသွားလာရေး #Travel #CNImyanmar 

CNI News

၂၀၂၄ ခုနှစ်၊ အောက်တိုဘာ ၁၀

ကမ္ဘာ့ခရီးသွားဈေးကွက်တွင် မြန်မာနိုင်ငံ မပျောက်သွားစေရန်အတွက် မြန်မာနိုင်ငံသည် ခရီးသွားလာ၍ ရကြောင်းကို အများအပြား သိရှိစေရေး လုပ်ဆောင်ရန်လိုအပ်ကြောင်း မြန်မာနိုင်ငံခရီးသွားလုပ်ငန်းရှင်များ အသင်းမှဥက္ကဋ္ဌ ဦးနောင်းနောင်းဟန်က CNI သတင်းဌာနသို့ ပြောသည်။

မြန်မာနိုင်ငံ၌ လေကြောင်းလိုင်း ဆက်သွယ်မှုသည် ကိုဗစ်မတိုင်ခင်ကထက် နည်းပါးနေသဖြင့် နိုင်ငံတကာ ခရီးသွားများ လာရောက်ရန်မှာ လေကြောင်းလိုင်းမရှိခြင်း၊ နည်းပါးခြင်း၊ ဈေးကြီးခြင်းတို့ကြောင့် အခက်အခဲ ရှိကြောင်း၊ ထို့ကြောင့် လေကြောင်းလိုင်းဆက်သွယ်မှု များလာစေရေး လုပ်ဆောင်ရန်လိုကြောင်း ၎င်းက ပြော သည်။

ဦးနောင်းနောင်းဟန်က “အချို့နိုင်ငံတွေကို နိုင်ငံတော်အနေနဲ့ ဗီဇာဖြေလျှော့မှုပေါ့နော်။ ဖြေလျှော့ခွင့်တွေ ပေးဖို့ လည်း လိုနေပါတယ်။ အခုဆိုရင် Visa on arrival ဆိုက်ရောက်ဗီဇာပေးမှုက အကန့်အသတ်နဲ့ နိုင်ငံတချို့ကိုပဲ ပေးထားတာ ဖြစ်ပါတယ်။ နိုင်ငံတွေ တော်တော်များများကို ပေးလိုက်တယ်ဆိုရင် နိုင်ငံခြားသား ဝင်ရောက်မှုက ဒီထက်ပိုပြီး များလာနိုင်ပါတယ်။ ကိုယ့်နိုင်ငံရဲ့ ပထမဆုံးတံခါးလိုဖြစ်တဲ့ ဗီဇာပေးမှုမှာ ပထမဆုံးတံခါးကို ဖွင့်လိုက် မှ နိုင်ငံထဲကို ဝင်ရောက်လာမှာဖြစ်ပါတယ်။ ဒါကြောင့်မို့လို့ ဗီဇာနဲ့ပတ်သက်ပြီး ဖြေလျှော့မှုတွေ၊ နောက်တစ်ခါ နိုင်ငံတကာမှာလည်း မြန်မာနိုင်ငံကို လာလို့ရတယ်ဆိုတဲ့ ဟာပေါ့နော်။ လုံခြုံစိတ်ချစွာသွားလာနိုင်တဲ့ ခရီးစဉ်တွေ ကို များများကြေညာဖို့ လိုပါတယ် ဒီနှစ်ချက်ပေါ့နော်။ တတိယတစ်ချက်ကတော့ လေကြောင်း ဆက်သွယ်မှုတွေ ကို များများလုပ်ဖို့အတွက် နိုင်ငံတကာလေကြောင်းလိုင်းတွေကို ဖိတ်ခေါ်ပြီးတော့ ပြည်တွင်းမှာလည်း လေကြောင်း ဆက်သွယ်မှုတွေ များများလုပ်ပေးဖို့ လိုတာပေါ့နော်” ဟု CNI သတင်းဌာနသို့ ပြောသည်။

ပုဂံဒေသခရီးသွားများကို တွေ့ရစဉ်

ပြည်ပခရီးသွားများသည် ဗီဇာရယူခြင်းမှာ အခက်အခဲများ ရှိနေသည့်အတွက် နိုင်ငံအများအပြားအား ဗီဇာနှင့် ပတ်သက်၍ ဖြေလျှော့ပေးလိုက်မည်ဆိုပါက ကောင်းမွန်သွားမည်ဖြစ်ကြောင်း ထောက်ပြကြသည်။

လက်ရှိတွင် မြန်မာနိုင်ငံအနေဖြင့် အာဆီယံ ၁၀ နိုင်ငံ၌ မလေးရှားမှလွဲ၍ ကျန် ၉ နိုင်ငံနှင့် ရုရှားနိုင်ငံတို့အား ဗီဇာကင်းလွတ်ခွင့် ပေးထားပြီး အချို့နိုင်ငံများအား ဆိုက်ရောက်ဗီဇာများ ပေးထားခြင်းဖြစ်သည်။

သို့သော်လည်း မိမိနိုင်ငံသို့ အမှန်တကယ် လာရောက်လည်ပတ်သည့် နိုင်ငံများအား‌ လေ့လာ၍ ဗီဇာဖြေလျှော့ မှုများကို လုပ်ဆောင်ပေးသင့်ကြောင့် ခရီးသွားလုပ်ငန်းရှင် ဦးသက်လွင်တိုးက CNI သတင်းဌာနသို့ ပြောသည်။

ပုဂံဒေသခရီးသွားများကို တွေ့ရစဉ်

၎င်းက “အခုဆို ဂရိတို့၊ စပိန်တို့၊ တောင်အမေရိကတို့လည်း လာတယ် ကွက်ပျောက်လေးတွေပေါ့။ ဒီလိုနိုင်ငံတွေ ကကြတော့ Potential ရှိတယ်။ အိမ်နီးချင်း အာရှတွေထက်စာရင် သူတို့က အဝေးကြီးက လာရတယ်။ သူတို့မှာ လည်း ဗီဇာယူဖို့အတွက် သံရုံးတွေမှာ မရှိဘူးပေါ့။ ဗီဇာယူဖို့ အခက်အခဲရှိတယ်ပေါ့။ မြန်မာသံရုံးလည်းမရှိဘူး။ ဘရာဇီးလ်တို့ မက္ကဆီကန်တို့ အာဂျင်တီးနားတို့၊ နောက် ဒီဘက်က ဂရိလာတယ်၊ ပေါ်တူဂီလာတယ်၊ စပိန်လာ  တယ်။ အဲဒီနိုင်ငံတွေက ဖြစ်နိုင်ရင် visa on arrival ပေးသင့်တယ်။ အဲဒါမျိုးကို အွန်လိုင်းကနေ လျှောက်မယ်ဆို ရင်လည်း လွယ်လွယ်ကူကူနဲ့ လုပ်နိုင်အောင် လုပ်မယ်ဆိုရင် ဒီနိုင်ငံတွေက ဘာပဲပြောပြော ခုလိုအချိန်မှာ ကွက်ပျောက်ဆိုပေမယ့် လာနေတာကို တွေ့ရတယ်။ ဒါကြောင့် အဲဒီနိုင်ငံတွေကို ဆိုက်ရောက်ဗီဇာ ပေးသင့်တယ် လို့ အကြံပြုပါတယ်။ ထိုင်းဆို visa free ကို နိုင်ငံပေါင်း ရာကဏန်း နီးပါးလောက်ကို ပေးလိုက်တော့ သူ့ရဲ့ Tourism က အရမ်းတက်သွားတယ်” ဟု ပြောသည်။

မြန်မာနိုင်ငံသို့ ပြည်ပခရီးသွားများ လာရောက်မှုသည် ၂၀၁၉ ခုနှစ်တွင် ၃ သန်းကျော်အထိရှိခဲ့ပြီး ကိုဗစ်နှင့် နိုင်ငံရေး အပြောင်းအလဲများကြောင့် ၂၀၂၃ ခုနှစ်တွင် နိုင်ငံတကာလေဆိပ် အပါအဝင် နယ်စပ် ဝင်/ထွက် ဂိတ်များမှ ဝင်ရောက်လာကြမှုသည် ၁ သန်းကျော်ရှိခဲ့ကြောင်း သိရသည်။

သို့သော် ယခုနှစ်တွင် စက်တင်ဘာလအထိ ၅ သိန်းကျော်သာ ဝင်ရောက်ထားသေးကြောင်းလည်း ခရီးသွား ဝင်ရောက်လာမှု စာရင်းများအရ သိရသည်။

CNI News

၂၀၂၄ ခုနှစ်၊ အောက်တိုဘာ ၈

နယ်မြေမတည်ငြိမ်မှု၊ ရေကြီးရေလျှံ ဖြစ်ပွားမှုများ‌ကြောင့် ပြီးခဲ့သည့်နှစ်နှင့် နှိုင်းယှဉ်ပါက ယခုနှစ် ပွင့်လင်း ရာသီတွင် ခရီးသွားလာမှု မည်သို့ ရှိလာနိုင်သလဲဆိုသည့်အပေါ် ခရီးသွားလုပ်ငန်းရှင်များအကြား သုံးသပ်မှုများ ရှိနေကြသည်။

ယခုနှစ်တွင် ခရီးသွားလာနိုင်သည့် နေရာဒေသမှာ နည်းပါးသွားပြီး ပုဂံ၊ မန္တလေး၊ ချောင်းသာ၊ ငွေဆောင်နှင့် မြိတ်ကျွန်းစု ဒေသများသို့သာ အဓိကခရီးသွားလာ၍ ရမည်ဖြစ်ကြောင်း သိရသည်။

ထို့ကြောင့် ပြီးခဲ့သည့်နှစ်နှင့် နှိုင်းယှဉ်ပါက သီတင်းကျွတ်ရာသီ ခရီးသွားလာမှုမှာ နည်းပါးသွား‌ကြောင်း၊ သို့သော် လာမည့် တန်ဆောင်တိုင်နှင့် ခရစ္စမတ် ရာသီများတွင် ခရီးသွားလာမှု ပြန်တက်လာမည်ဖြစ်ကြောင်း မြန်မာနိုင်ငံ ခရီးသွားလုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်က CNI သတင်းဌာနသို့ ပြောသည်။

၎င်းက “တစ်နိုင်ငံလုံး အတိုင်းအတာနဲ့ မနှစ်ကနဲ့ ယှဉ်ရင်တော့ များတယ်လို့ ပြောလို့မရပါဘူး။ ဒါပေမယ့် သွားလို့ ရတဲ့ နေရာတွေက အကန့်အသတ် ပိုများလာတဲ့အတွက် ပုဂံတို့ ချောင်းသာ၊ ငွေဆောင်တို့ အဲဒီဒေသတွေကိုပဲ ပိုပြီး တော့ သွားရောက်ကြတာများပါတယ်။ ပြည်တွင်းခရီးသွားကို ပြောရမယ်ဆိုရင် မနှစ်က သီတင်းကျွတ်ထက် စာရင် နည်းလာနိုင်တယ်လို့ ပြောလို့ရပါတယ်။ ဟိုတယ် ဘိုကင်တွေကြတော့ တစ်နိုင်ငံလုံး အတိုင်းအတာနဲ့ဆိုရင် ပုဂံတို့ မန္တလေးတို့မှာ‌တော့ ဟိုတယ်တွေ တော်တော်များများ ပြည့်ကြတာ များပါတယ်။ ကမ်းခြေက ချောင်းသာ၊ ငွေဆောင်မှာလည်း ပြည့်ကြတာ များတယ်။ တန်ဆောင်တိုင် လောက်ကြရင် ရေဘေးကိစ္စတွေလည်း  ထိုက်သင့် သလောက် အဆင်ပြေသွားပြီဆိုရင် ခရီးသွား ပြန်ပြီးတက်လာနိုင်တယ်။ နောက်တစ်ခါ ဒီဇင်ဘာမှာလည်း ခရစ္စမတ် နဲ့ နယူးရီးယားမှာ ပြန်ပြီးတက်လာနိုင်တယ်လို့ ကျနော်တို့ ခန့်မှန်းထားပါတယ်” ဟု ပြောသည်။

ကမ်းခြေတစ်ခုကိုတွေ့ရစဉ်

ပြည်တွင်း ခရီးသွားလာသည့် အခါတွင် ခရီးသွားကုမ္ပဏီများဖြင့် သွားရောက်ခြင်းထက် မိမိအစီအစဉ်ဖြင့်သာ သွားရောက်ကြသော်လည်း လက်ရှိ စက်သုံးဆီဈေးကြီးမြင့်မှု၊ ငွေရှာရ ခက်ခဲလာမှုများကြောင့် ခရီးသွားလာမှု နည်းပါးလာခြင်းဖြစ်ကြောင်း ခရီးသွားလုပ်ငန်းရှင်များက သုံးသပ်ကြသည်။

ထို့အပြင် ယခုနောက်ပိုင်းတွင် တည်ငြိမ်မှုမရှိသည့် နယ်မြေဒေသများ ပိုမိုပေါများလာသည့်အတွက် ခရီးသွား လာရေးနှင့်ပတ်သက်၍ ပိုမို စဉ်းစားလာကြကြောင်း ၎င်းတို့က ပြောသည်။

အလားတူ ပြည်ပနိုင်ငံများသို့ ခရီးသွားရောက်ရာတွင်လည်း လေဆိပ်၌ စစ်ဆေးမှုများကြောင့် လွတ်လပ်မှု မရှိသဖြင့် အဆင်မပြေဖြစ်စေကြောင်း၊ ထို့ကြောင့် မြန်မာနိုင်ငံ၏ ခရီးသွားကဏ္ဍမှာ အားရဖွယ်မရှိကြောင်း ခရီးသွား လုပ်ငန်းရှင် တစ်ဦးဖြစ်သူ ဦးသက်လွင်တိုးက CNI သတင်းဌာနသို့ ပြောသည်။

ပုဂံဒေသကို တွေ့ရစဉ်

၎င်းက “လေ့လာချက်ကြည့်ပြီးအရတော့ သိပ်ပြီးတော့ အားရဖွယ်ရာတော့မရှိဘူး။ ဘာလို့လဲဆိုတော့ ငွေကြေး ကိစ္စ ရှားလာတာလည်း ပါတယ်။ သွားတဲ့လူကလည်း ကိုယ့်အစီအစဉ်နဲ့ကိုယ်သွားကြတယ်။ အေးဂျင့်တွေကို ဘိုကင်တင်တာ သိပ်မတွေ့ရဘူး။ ပြည်ပထွက်တဲ့လူတွေက များတယ်။ ပြည်ပ ထွက်ပြန်တော့လည်း အခု အခြေအနေက ရှော့ရှိနိုင်တယ်ပေါ့ အထူးသဖြင့် လူငယ်တွေပေါ့။ အဲဒါလေးတွေလည်း စိန်ခေါ်မှုပေါ့နော်။ ငွေကြေး အဆင်မပြေတာရယ်၊ ပတ်စပို့ အဆင်ပြေတော့လည်း ဗီဇာက ပြောလို့မရဘူး။ ကျန်တဲ့တာဝန်ခံမှု၊ တာဝန်ယူမှုတွေ လည်းရှိလာတာပေါ့။ Tourist နဲ့ သွားရင် ပြန်ရောက်ကြောင်း သတင်းပို့ရတာတို့ကရှိတယ်။ ရှိတယ်ဆိုတော့ နည်းနည်းတော့ လွတ်လွတ်လပ်လပ် မရှိတော့ဘူးပေါ့။ အပန်းဖြေသွားတယ်ဆိုတာက နောက်ကြောင်းအေးမှ ကောင်းတာလေ” ဟု ပြောသည်။

ပြည်ပခရီးသွားများ အနေဖြင့်လည်း ၂၀၂၃ ခုနှစ်တွင် ၁ သန်းကျော် ဝင်ရောက်ခဲ့ပြီး ယခုနှစ် စက်တင်ဘာလအထိ စာရင်းများအရ ၅ သိန်းကျော်သာရှိသေးကာ ပြီးခဲ့သည့်နှစ် ပမာဏကို မရောက်နိုင်လောက်ကြောင်းလည်း ခန့်မှန်း ကြသည်။

ထို့အပြင် ပြီးခဲ့သည့်နှစ်တွင် ပြည်တွင်း ခရီးသွားလာမှုများမှာလည်း အောက်တိုဘာလအထိ အထိုက်အလျောက် ရှိခဲ့ကြောင်း၊ ထိုနောက်ပိုင်းမှ စတင်ကာ ခရီးသွားလာမှုများ လျော့နည်းသွားခြင်းဖြစ်ကြောင်း သိရသည်။