CNI International News

ဘန်ကောက်၊ ဖေဖော်ဝါရီ ၂၁ 

ထိုင်းနိုင်ငံတွင် လာမည့် ဧပြီလအတွင်း ကျရောက်မည့် မဟာဆွန်ကရန်(သင်္ကြန်ပွဲတော်) ကမ္ဘာ့ရေကစားပွဲတော် ကို မြှင့်တင်ရန်အတွက် ဖေဖော်ဝါရီ ၂၀ ရက်၌ ထိုင်းအစိုးရအဖွဲ့က ဗဟိုရန်ပုံငွေထဲမှ ဘတ် ၁၀၄ သန်းကို ဘတ်ဂျက်အဖြစ် အသုံးပြုခွင့်ပေးခဲ့သည်ဟု Thai PBS World မှ ဖော်ပြခဲ့သည်။

ခရီးသွားလာရေးနှင့် အားကစားရေးရာဝန်ကြီးဌာနက ဦးစီးကျင်းပမည့် ရေကစားပွဲတော်ကို ဧပြီ ၁၁ ရက်မှ ၁၅ ရက်အထိ ဘန်ကောက်မြို့တော်၏ Sanam Luang ဥယျာဉ်မှ Tatchadamnoen လမ်းအထိနှင့် အခြားပြည်နယ် ၁၆ ခုတွင် ပြုလုပ်မည်ဖြစ်သည်။

ထို့နောက် ထိုင်းနိုင်ငံ၏ အစားအစာ၊ အားကစား ၊ခရီးသွားကဏ္ဍ၊ ဂီတ၊ စာပေ၊ ကစားပွဲများ၊ အနုပညာ၊ ဖက်ရှင်နှင့် ဒီဇိုင်းများကို ပြသသွားမည်ဖြစ်သည်။

ထိုင်း၏ မဟာဆွန်ကရန်(သင်္ကြန်ပွဲတော်)ပွဲတော်ကို တွေ့ရစဉ်

အစိုးရအဖွဲ့၏ ဒုတိယပြောရေးဆိုခွင့်ရှိသူ ကေနက်ကာ အွန်ချစ် (Kaenaka Oonchit) က ထိုရေကစားပွဲတော် အတွင်း ထိုင်းနိုင်ငံသို့ ခရီးသွား ၂၀၀,၀၀၀ ကျော် လာရောက်လိမ့်မည်ဟု မျှော်လင့်ထားပြီး ဝင်ငွေအနေဖြင့် ဘတ် ၃ ဒသမ ၁ ဘီလျံအထိ ရရှိနိုင်မည်ဖြစ်ကြောင်းနှင့် ကမ္ဘာ့အကောင်းဆုံး ပွဲတော်များရှိသည့် နိုင်ငံများစာရင်းတွင် ထိုင်းနိုင်ငံကို ထည့်သွင်းသတ်မှတ်လာစေရန် မျှော်မှန်းထားကြောင်း ပြောကြားခဲ့သည်။

ပြီးခဲ့သည့်နှစ် ဒီဇင်ဘာ ၆ ရက်က UNESCO သည် ထိုင်းနိုင်ငံ၏ ဆွန်ကရန် ရေကစားပွဲတော်ကို လူသားမျိုးနွယ်၏ ဒြပ်မဲ့ ယဉ်ကျေးမှုနှင့် အမွေအနှစ်စာရင်းတွင် ထည့်သွင်းကြောင်း ကြေညာခဲ့သည်။

Source: Thai PBS World

CNI International News
ဘန်ကောက်၊ ဖေဖော်ဝါရီ ၁၇

တရုတ်နှစ်သစ်ကူးကာလတွင် တရုတ်နိုင်ငံအတွင်းသို့ ခရီးသွားများ ဝင်ရောက်မှု ပြန်လည်မြင့်တက်လာခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

ထိုအခြေအနေသည် ပြည်တွင်း ယုံကြည်မှု လျော့နည်းနေပြီး အသုံးစရိတ်များ လျှော့ချနေရမှုနှင့် ရုန်းကန်နေရ သည့် တရုတ်နိုင်ငံအတွက် အပြုသဘောဆောင်သော လက္ခဏာများ ဖြစ်လာစေခဲ့သည်။

နှစ်သစ်ကူး အစိုးရရုံးပိတ်ရက်ကာလ၏ ပထမ ၆ ရက်တာကာလတွင် မီးရထားခရီးစဉ်ပေါင်း ၆၁ သန်းကျော်ရှိခဲ့ ကြောင်း တရားဝင် ထုတ်ပြန်ချက်များတွင် ဖော်ပြထားသည်။ 

ထိုပမာဏသည် ပြီးခဲ့သည့် ၅ နှစ်အတွင်း  Bloomberg News က ကောက်ခံခဲ့သည့် စစ်တမ်းများထဲတွင် အမြင့်ဆုံးနှုန်းဖြစ်ပြီး ၂၀၂၃ ခုနှစ်နှင့် နှိုင်းယှဉ်ပါက ၆၁ ရာခိုင်နှုန်း ခန့်မြင့်တက်လာခဲ့သည်။

“တရုတ်ရဲ့ စားသုံးသူကဏ္ဍဟာ စတင် နိုးကြွလာခဲ့ပါပြီ”ဟု HSBC မှ အာရှရေးရာ စီးပွားရေးအကြီးအကဲ ဖရက်ဒရစ် နျူမန်း (Frederic Neumann) က ပြောကြားခဲ့သည်။

လက်ရှိ အခြေအနေသည် မျှော်မှန်းထားသည်ထက် ပိုမိုမြင့်မားနေသည်ဟုလည်း ၎င်းက ပြောသည်။

သို့သော် COVID-19 ကပ်ရောဂါကြောင့် ထိခိုက်ခဲ့ရသည့် စီးပွားရေးအခြေအနေအရ ၂၀၂၃ ခုနှစ်ထက် ပိုမို ဖွံ့ဖြိုး တိုးတက်လာသည့် နှုန်းထားသည် သာမန် မျှော်မှန်းနှုန်းထားထက် လျော့နည်းနေဆဲဖြစ်သည်ဟု ဖရက်ဒရစ် နျူမန်းက ဝန်ခံ ပြောကြားခဲ့သည်။

ပြီးခဲ့သည့်လက စားသုံးသူ စျေးနှုန်းများသည် ကမ္ဘာလုံးဆိုင်ရာ စီးပွားပျက်ကပ် ဖြစ်ပွားပြီးနောက်ပိုင်း အလျင်မြန် ဆုံးနှုန်းဖြင့် ကျဆင်းခဲ့သဖြင့် ကူညီထောက်ပံ့မှုများ ပြုလုပ်ပေးရန် အစိုးရအပေါ် ဖိအားများ ကျရောက်စေခဲ့ ကြောင်း ကျွမ်းကျင်သူများက ပြောကြားခဲ့သည်။

ထို့ပြင် စတော့ရှယ်ယာ စျေးကွက်တွင်လည်း ဒေါ်လာ ထရီလျံချီ တန်ဖိုးရှိသည့် ရှယ်ယာများကို ရောင်းချမှုများသည် တရုတ်၏ စီးပွားရေး မတည်ငြိမ်မှုကို မီးမောင်းထိုး ဖော်ပြရာ ရောက်ခဲ့သည်။

သို့သော် ယခုနှစ် အားလပ်ရက်ရာသီတွင် ကုန်းကြောင်းနှင့် လေကြောင်းခရီးစဉ်များသည် ပြီးခဲ့သည့်နှစ်ကဖြင့် နှိုင်းယှဉ်ပါက တိုးတက်လာသည်ဟု တရုတ်နိုင်ငံပိုင် မီဒီယာက ဖော်ပြခဲ့သည်။

Source: ဘန်ကောက်ပို့စ်

CNI News

၂၀၂၃ ခုနှစ်၊ နိုဝင်ဘာ ၃

သီတင်းကျွတ် ပိတ်ရက် ကာလများတွင် ပုဂံ၊ ငွေဆောင်၊ ငပလီဘက်သို့ ခရီးသွား အများအပြား ဝင်ရောက်ခဲ့ ကြောင်း သက်ဆိုင်ရာဒေသရှိ ဟိုတယ်နှင့် ခရီးသွားလာရေးဝန်ကြီးဌာနမှ တာဝန်ရှိသူများက CNI သတင်းဌာနသို့ ပြောသည်။

သီတင်းကျွတ် ပိတ်ရက်ကာလဖြစ်သည့် အောက်တိုဘာ ၂၈ မှ ၃၀ ရက်နေ့အတွင်း ခရီးသွားဝင်ရောက်မှုသည် ပုဂံ၌ ၁ သိန်းကျော်၊ ငွေဆောင်၌ ၇ ထောင်ကျော် ရှိသည့်အနက် ပြည်ပခရီးသွား ၅၀၀ ဦးကျော် ပါဝင်ကြောင်း သိရသည်။

ထို့နောက် ငပလီ၌ ၄ ထောင်ကျော်ရှိပြီး ပြည်ပခရီးသွား ၇၀ ဦးခန့် ပါဝင်ကြောင်း သိရသည်။

ပြီးခဲ့သည့် ၂၀၂၂ ခုနှစ် သီတင်းကျွတ်ကာလ၌ ငပလီသို့ ခရီးသွားဝင်ရောက်မှု ၂ ထောင်ကျော်သာ ရှိခဲ့သော်လည်း ပြည်ပခရီးသွားဝင်ရောက်မှု တစ်ရာကျော်ခန့်ရှိခဲ့သဖြင့် ယခုနှစ်နှင့်နှိုင်းယှဉ်ပါက ပြည်တွင်းခရီးသွား ဝင်ရောက်မှု တိုးလာပြီး ပြည်ပခရီးသွားဝင်ရောက်မှု လျော့နည်းသွားသည်ကို တွေ့ရသည်။

ရခိုင်ပြည်နယ် ဟိုတယ်နှင့်ခရီးသွားလာရေးညွှန်ကြားမှုဦးစီးဌာန ညွှန်ကြားရေးမှူး ဦးတင်ထွန်းအောင် “မနှစ်က Foreigner ၁၅၃ ယောက်ရှိတယ်။ အများကြီး မျှော်မှန်းထားတာပေါ့။ အခုမှ ရာသီက စတာလေ။ မိုးကုန်ခါနီးပဲ ရှိသေးတာကို။ အောက်တိုဘာဆိုတာက မိုးမကျွတ်သေးဘူးပေါ့။ အဲဒီတော့ အခုချိန်က စောသေးတာပေါ့။ လာမယ့် ရာသီက ပွင့်လင်းရာသီ ဖြစ်တဲ့အတွက် သွားလို့လာလို့လည်း ကောင်းပြီလေ။ ရုရှား Fan Trip ပြီးခဲ့တဲ့ ၂၈၊ ၂၉၊ ၃၀ လာသွားတာ ရုရှား Fan Trip တစ်ဖွဲ့လေ။ ၁၁ ယောက်တစ်ဖွဲ့လာသွားတယ်။ ခရီးသွား အေးဂျင့်တွေ ပါတယ်။ ကုမ္ပဏီပိုင်ရှင်တွေပါတယ်။ ဗမာပြည်ရဲ့ ခရီးစဉ် အခြေအနေအကြောင်းကို ရုရှားမှာ ပြန်ပြီးတော့ သတင်းပေးမှာ ပေါ့နော်။ သူတို့ကတော့ ဒီရေ သဘာဝကို တော်တော်ကြိုက်တယ်။ လာလို့ရှိရင် သဲသန့်တယ်၊ ရေသန့်တယ်၊ နောက်တစ်ခုက ရေက အပူအအေး မျှတတာပေါ့နော်။ အေးတဲ့အချိန် ရေထဲဆင်းသွားရင် နွေးနေတယ်။ သူ အံ့တောင် အံ့သြတယ် ရေထဲ ရောက်တော့လေ။ ရေ အပူ temperature ကိုလည်း သူတို့ကြိုက်တယ်” ဟု CNI သတင်းဌာနသို့ ပြောသည်။

ကမ်းခြေမှာ အပန်းဖြေခရီးသွားများကိုတွေ့ရစဉ်

ထို့အပြင် ငွေဆောင် ကမ်းခြေဒေသ၌ ပြီးခဲ့သည့် ၂၀၂၂ ခုနှစ်၊ ဇန်နဝါရီလမှ အောက်တိုဘာလအထိ ခရီးသွား ၂ သိန်းကျော် ဝင်ရောက်ခဲ့ပြီး ယခုနှစ် ကာလတူတွင် ခရီးသွား ၃ သိန်းကျော် ဝင်ရောက်ခဲ့ကြောင်း ဧရာဝတီတိုင်း ဒေသကြီး ဟိုတယ်နှင့်ခရီးသွားလာရေးဝန်ကြီးဌာနမှ (ပုသိမ်၊ ငွေဆောင်ရုံးခွဲ) လက်ထောက် ညွှန်ကြားရေးမှူး ဦးစိုးဝင်းက CNI သတင်းဌာနသို့ ပြောသည်။ 

ငွေဆောင်သို့ ပြည်ပခရီးသွား ဝင်ရောက်မှု အများဆုံးမှာ တရုတ်နိုင်ငံသားဖြစ်ပြီး ဒုတိယအများဆုံးမှာ အိန္ဒိယ နိုင်ငံသား၊ တတိယအများဆုံးမှာ ရုရှားနိုင်ငံသား၊ စတုတ္ထအများဆုံးမှာ ဂျပန်နိုင်ငံသားနှင့် ပဥ္စမအများဆုံး ဝင်ရောက်သည့် နိုင်ငံမှာ ထိုင်းနိုင်ငံမှ ဖြစ်ပြီး စုစုပေါင်း ၅ ထောင်ဦးကျော် ဝင်ရောက်ခဲ့ကြကြောင်း ၎င်းက ဆက်ပြောသည်။

ပုဂံဒေသက ရွှေစည်းခုံဘုရား သီတင်းကျွတ် လပြည့်ညကို တွေ့ရစဉ်

ဦးစိုးဝင်းက “မနှစ်ကတော့ သီတင်းကျွတ် ရုံးပိတ်ရက်ကာလက ၅ ရက်ဖြစ်တယ်လေ။ ဒီနှစ်ကတော့ ၃ ရက်တည်း ဖြစ်တာပေါ့။ ၃ ရက်တည်းဖြစ်တော့ ဒီနှစ်ကတော့ ခရီးသွားဧည့်သည် ဝင်ရောက်မှု တည်းခိုမှုကတော့ မနှစ်က ထက်စာရင် ပိုမိုလာတာ တွေ့ရပါတယ်။ မနှစ်ကနဲ့ ဒီနှစ် အလားတူကာလ ၁၀ လကို နှိုင်းယှဉ်ကြည့်မယ်ဆိုရင် ခရီးသွားဧည့်သည် ဝင်ရောက်မှုက ၁၂၁,၇၀၄ ဦး ပိုမိုဝင်ရောက်လာတာကို တွေ့ရပါတယ်။ တိုးတက်မှု ရာခိုင်နှုန်း အနေနဲ့ဆိုရင်တော့ ၅၉ ရာခိုင်နှုန်း တိုးလာတာကို တွေ့ရှိရပါတယ်” ဟု CNI သတင်းဌာနသို့ ပြောသည်။

ထို့အပြင် ဟိုတယ် ဘိုကင်ယူထားမှု ပုံမှန် အနေအထားသာရှိခဲ့သည့် ရှမ်းပြည်နယ်ဘက်တွင်လည်း သီတင်းကျွတ် ပိတ်ရက်နေ့၌ လာရောက်လည်ပတ်သည့် ပြည်တွင်းခရီးသွား အများအပြားရှိခဲ့ကြောင်း မြန်မာနိုင်ငံခရီးသွား လုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်က CNI သတင်းဌာနသို့ ပြောသည်။

၎င်းက “အင်းလေးတို့၊ ကလောတို့ ဘက်မှာဆိုရင် ရန်ကုန်ကနေ သွားရောက်လည်ပတ်ကြတဲ့ ခရီးစဉ်တွေ များပါ တယ်။ အဲဒီဘက်ကို ခရီးသည်တွေ ဒီသီတင်းကျွတ် ပိတ်ရက်မှာ တော်တော်လေး များသွားပါတယ်။ အနောက် တိုင်း နိုင်ငံသားတွေဆို ခရီးစဉ်တွေကို ၆ လ တစ်နှစ်လောက် ကြိုပြီးတော့ ဆွဲကြတယ်။ မြန်မာလူမျိုးတွေကြ တော့ နှစ်ပတ် တစ်လပေါ့နော် အဲဒီလောက်ပဲ ကြိုပြီးတော့ ဆွဲကြတယ်။ အခုဆို တန်ဆောင်တိုင် ပိတ်ရက် အတွက်ကို ခရီးစဉ်တွေ ကြိုဆွဲပြီးတော့ တစ်ပတ် နှစ်ပတ်လောက်ကြာတော့မှ ခရီးစဉ်တွေအပေါ်မှာ ဘိုကင်တွေ တင်ပြီးတော့ အခန်းတွေ ပြည့်သွားတာမျိုး များပါတယ်။ ပြည်တွင်း ခရီးသွားက အားကောင်းတယ်။ ပြည်ပခရီး သွားကလည်း တိုးတက်မှုတော့ရှိတယ်။ အပေါင်း လက္ခဏာတော့ ‌ဆောင်တယ်။ positive ဆောင်တယ်။ ဒါပေမယ့် ဧည့်သည်တွေ အများအပြား ဝင်ရောက်တာမျိုး မရှိသေးဘူးပေါ့။ မနှစ်ကထက် စာရင်တော့ အများကြီး တိုးတက်လာပါတယ်၊ ပြည်တွင်းခရီးသွားကလေ။ ဒီနှစ် ဒီ ၁၀ လပိုင်းမှာလည်း ခရီးသွားတယ်။ လာမယ့် ၁၁ လ ပိုင်းနဲ့ ၁၂ လပိုင်း ပိတ်ရက်ပေါ့၊ ခရစ္စမတ်ရက်တွေမှာလည်း အများကြီး သွားလာကြဖို့ရှိပါတယ်” ဟု ပြောသည်။

လက်ရှိတွင် တန်ဆောင်တိုင် ပိတ်ရက်အတွက် အချို့ဒေသများ၌ ဟိုတယ်ဘိုကင် ယူထားမှုများ ရှိနေပြီဖြစ် ကြောင်း သိရသည်။

CNI News

၂၀၂၃ ခုနှစ်၊ အောက်တိုဘာ ၂၃

ကိုဗစ် - ၁၉ ရောဂါ ကူးစက်ပျံ့နှံ့မှုကြောင့် ၂၀၂၀ ခုနှစ်မှ စတင်၍ ရပ်နားထားရသည့် တနင်္သာရီတိုင်းဒေသကြီး အတွင်းရှိ  မြိတ်ကျွန်းစု ခရီးသွားလုပ်ငန်းများသည် ပြန်လည်စတင်နေပြီဖြစ်ကြောင်း ဟိုတယ်နှင့် ခရီးသွား လုပ်ငန်း ဝန်ကြီးဌာနထံမှ သိရသည်။

လက်ရှိ ခရီးသွားများလည်း ဝင်ရောက်နေပြီဖြစ်ကြောင်း သိရသည်။

အဓိကအားဖြင့် ကော့သောင်း - ရနောင်းနယ်စပ် ပြန်လည်ဖွင့်လှစ်လိုက်ပြီ ဖြစ်ခြင်းကြောင့် ယခုခရီးသွားရာသီ တွင် မြိတ်ကျွန်းစု ခရီးစဉ်များလည်း ပြန်လည်စတင်ခြင်းဖြစ်ကြောင်း ထားဝယ်ခရိုင် ဟိုတယ်နှင့် ခရီးသွား ညွှန်ကြားမှုဦးစီးဌာနထံမှ တာဝန်ရှိသူတစ်ဦးက CNI သတင်းဌာနသို့ ပြောသည်။

၎င်းက “သူက အဓိကကတော့ ကော့သောင်းဘက်က လာတဲ့ နယ်စပ်ကဝင်တဲ့ ဧည့်သည်တွေပေါ့လေ။ ကိုဗစ် တုန်းကတော့ ကော့သောင်း - ရနောင်းနယ်စပ်က ပိတ်ထားခဲ့တာကိုး။ အခုကျတော့ ပြီးခဲ့တဲ့ ၂၀၂၃၊ ၃ လပိုင်း ကစ ပြီး ပုံမှန် ပြန်ဖွင့်လိုက်ပြီလေ။ ပြန်ဖွင့်တော့ ဟိုဘက်ကလာတဲ့ နေ့ချင်းပြန် ခရီးသွား ဧည့်သည်တွေ ရှိတယ်။ နောက်တစ်ခါ စက်လှေနဲ့ လာမယ့် ဧည့်သည်တွေ ရှိတယ်။ နောက်တစ်ခါ ရွက်လှေနဲ့ လာမယ့် ဧည့်သည်တွေ ရှိ တယ်။ ဒီဧည့်သည်တွေ မြိတ်ကွန်းစုကို အဓိက လည်ပတ်ကြတာပေါ့။ ဆိုတော့ သူတို့ ဝင်လို့ထွက်လို့ ရပြီဆိုတော့ ဒါကြောင့်မို့လို့ ခရီးသွားရာသီမှာ ပြန်ဖွင့်ပြီဆိုပြီးတော့ တချို့ဒေသခံ ခရီးသွားကုမ္ပဏီတွေက ကြော်ငြာနေတာ ရှိ တာပေါ့။ ကိုဗစ်ကြောင့် ရပ်သွားတဲ့ ကာလကလည်း ၂ နှစ်ခွဲလောက် ဖြစ်သွားတာလေ။ ဆိုတော့ အခုချိန်မှာ ပြန် ပြီးတော့ အစပြုတာပေါ့။ တဖြည်းဖြည်းတော့ ကျနော်တို့ ကိုဗစ်မတိုင်ခင်ကာလ အခြေအနေ ရောက်ဖို့ကတော့ နည်းနည်းခက်တယ်။ ဒါပေမယ့် အခုကတော့ အရှိန်ယူတဲ့ကာလ ဖြစ်သွားမှာပေါ့လေ။ တဖြည်းဖြည်းတော့ နောက် ပိုင်း ရာသီကျရင် ပုံမှန် ကိုဗစ်မတိုင်ခင်က အချိန် ပြန်ရောက်သွားမယ်လို့ မှန်းထားပါတယ်” ဟု ပြောသည်။

မြိတ်ကျွန်းစုကို တွေ့ရစဉ်

မြိတ်ကျွန်းစု ခရီးစဥ်များသည် သမီးလှ၊ လေးကျွန်း၊ ဒုံးရေတံခွန်၊ ဒုံးညောင်မှိုင်း၊ စမတ်ကျွန်း၊ ပဒန်းကျွန်း၊ ကြယ်လိပ် စသည့် ခရီးစဥ်များ ပါဝင်သည်ဟု သိရသည်။

လက်ရှိတွင် မြိတ်ကွန်းစု ခရီးစဉ်နှင့် ပတ်သက်၍ စီစဉ်နေပြီဖြစ်သော်လည်း ယခင်ကထက် တည်းခိုစရိတ်၊ သွား လာစရိတ်နှင့် စားသောက်စရိတ်များသည် အဆမတန် ကြီးမြင့်နေခြင်းကြောင့် မြိတ်ကျွန်းစုသို့ လာရောက်မည့် ခရီးသွား အလားအလာသည် နည်းပါးနိုင်သည်ဟု မြိတ်မြို့မှ ခရီးသွားလုပ်ငန်းရှင် ဦးအာကာက CNI သတင်းဌာန သို့ ပြောသည်။

မြိတ်ကျွန်းစုကို တွေ့ရစဉ်

၎င်းက “ဝင်ရောက်မှု များလာနိုင်လားဆိုတာက လမ်းပန်းဆက်သွယ်ရေး၊ ကုန်ဈေးနှုန်း၊ ကျနော်တို့ဆီမှာက မီးခ ဆိုရင်လည်း ဈေးကြီးတယ်၊ ၂၀၀၀ ကျော် ရှိတယ်။ ၂၀၀၀ ကျော် ရှိတဲ့အတွက် ဟိုတယ်တွေကလည်း rate ကို မချ နိုင်ဘူး။ နောက်တစ်ခုက စင်းလုံးနဲ့ သွားမယ်ဆိုတော့လည်း ဆီဈေးက နည်းနည်းပဲ ကျသေးတယ်။ ကိုဗစ် မတိုင် ခင်ကလောက် မဖြစ်သေးဘူး။ ကိုဗစ်မတိုင်ခင်က ကျနော်တို့ ၆ သိန်း၊ ၇ သိန်းလောက် သွားလို့ရတယ်။ အခုက မဟုတ်ဘူး။ ၁၃ သိန်းလောက် ကုန်ကျနေတယ် ဆီဖိုးက။ တခြားဝန်ဆောင်မှုနဲ့ သွားပေါင်းလိုက်ရင် သိန်း ၂၀ လောက် ဖြစ်သွားတယ်။ ဒီ rate ကို သုံးနိုင်တဲ့ ခရီးသွားလာမှပဲဆိုတော့ အလားအလာကတော့ မများသေးဘူး။ ဘာဖြစ်လို့လဲဆိုတော့ လေယာဉ်ခပဲ ကြည့်လေ အသွား ၂ သိန်း အပြန် ၂ သိန်း၊ တခြားစရိတ်နဲ့ဆိုရင် ၅ သိန်းရှိမှ ဒီကိုလာလို့ရမယ်။ စရိတ်မြင့်သွားတာကိုး။ ရွေးချယ်မှု အပိုင်းကို ကြည့်မယ်ဆိုရင် မြေပြန့်ဒေသပဲ သွားမှာပဲ။ ရှမ်းပြည်နယ်တို့၊ ပုဂံတို့၊ အင်းလေးတို့၊ ချောင်းသာတို့ သွားနေကြတယ်လေ။ ကျနော်တို့က ၂ သိန်းဆိုတော့ သူက ကား ၂ သိန်း စင်းလုံးငှားဆိုတော့ ၃ ညအိပ်တောင် သွားလို့ရတယ်လေ။ တချို့ဆို rate တက်တာပေါ့။ ထူးထူးခြား ခြား ကျွန်းတွေကို မြင်ချင်တယ် လာချင်တယ် တတ်နိုင်တဲ့သူတွေကျတော့ ၊ ကားနဲ့ကျတော့လည်း တိုက်ပွဲတွေက ရှိနေတော့ သွားလို့ကလည်း အဆင်မပြေတော့ အလားအလာ နည်းနည်း နည်းသွားမယ်” ဟု ပြောသည်။

မြိတ်ကျွန်းစု ခရီးစဉ်များအနေဖြင့် လေးကျွန်းမှ သမီးလှကျွန်းကို တစ်ဦးလျှင် ၂ သိန်းကျပ်၊ ဒုံးရေတံခွန်မှ စမတ် ကျွန်းကို ၂ သိန်းခွဲကျပ်၊ စမတ်ကျွန်းနှင့် ပဒန်းကျွန်းကို ၃ သိန်းကျပ်နှင့် ကြယ်လိပ်မှ စမတ်ကျွန်းကို ၃ သိန်းခွဲကျပ် စသဖြင့် အသီးသီးရှိကြောင်း ခရီးသွားဝန်ဆောင်မှု လုပ်ငန်းများက ဖော်ပြထားကြသည်။

မြိတ်ဒေသတွင် ကျွန်းပေါင်း ၈၀၀ ကျော်ရှိပြီး ရေပေါ်ရေအောက် ရှုခင်းများကို ကြည့်ရှုခြင်းနှင့် ဆလုံမျိုးနွယ်စု အကြောင်းများကို လေ့လာနိုင်သည်။

CNI News

၂၀၂၃ ခုနှစ်၊ အောက်တိုဘာ ၁၉

ခရီးသွားများအနေဖြင့် ပုဂံနှင့် ချောင်းသာတို့တွင် သီတင်းကျွတ်ပိတ်ရက်အတွက် လာရောက်လည်ပတ်ရန် ဟိုတယ်ဘိုကင်ယူထားမှုမှာ အပြည့်နီးပါးဖြစ်နေကြောင်း သက်ဆိုင်ရာဒေသများရှိ ဟိုတယ်နှင့် ခရီးသွားလာရေး ညွှန်ကြားမှုဦးစီးဌာနမှ တာဝန်ရှိသူတို့က CNI သတင်းဌာနသို့ ပြောသည်။

ပုဂံဒေသတွင် အောက်တိုဘာ ၂၇ ရက်မှ စတင်ကာ ၃၀ ရက်နေ့အထိ ၄ ရက်တာအတွက် ဟိုတယ်ဘိုကင် ယူထားကြခြင်းဖြစ်ပြီး ယခုနှစ်တွင် နိုင်ငံခြားသားခရီးသွား ဝင်ရောက်မှုပါ များလာကြောင်း မြန်မာနိုင်ငံ ဟိုတယ်ဆိုင်ရာလုပ်ငန်းရှင်များအသင်း (ပုဂံဟိုတယ်ဇုန်) ဥက္ကဋ္ဌ ဦးဇော်ဝိတ် က CNI သတင်းဌာနသို့ ပြောသည်။

“သီတင်းကျွတ်ကတော့ ပြည့်သလောက်နီးပါးပဲ။ အဲဒီ ၄ ရက်လောက်တော့များတယ်။ အဲဒီအရှေ့တော့ နည်းနည်း ခပ်ကျဲကျဲပဲ သိပ်မရှိဘူး ပါးတယ်။ ပုဂံဘက်ကတော့ မိုးပြတ်သွားတယ်။ တစ်ပတ် ၁၀ ရက်လောက် ရှိသွားပြီ။ အဲဒါတွေလည်း ပါမလားမပြောတတ်ပါဘူး။ မိုးကတော့ ရှင်းသွားတယ်။ ဧည့်သည်လေးတွေတော့ မဆိုးပါဘူး ရှိပါတယ်။ နိုင်ငံခြားသားလေးတွေလည်း ရှိတယ်။ Group Tour တွေဝင်တာရှိတယ်။ ကိုရီးယားတွေတို့ ဂရိတွေတို့ အဲဒါမျိုးတွေ ဝင်လာတာရှိတယ်။ ယိုးဒယားတွေတို့ အုပ်စုလိုက် Tour လေးတွေ ဝင်လာပါတယ်။ အများကြီးတော့ မဟုတ်ဘူးပေါ့ ခပ်ကျဲကျဲပေါ့။ အရင်ထက်စာရင်တော့ နည်းနည်းဝင်လာတာပေါ့။ မနှစ်ကတော့ လုံးဝမရှိဘူး။ ဒီနှစ်ကတော့ မနှစ်ကထက်စာရင် ပိုဝင်လာတယ်” ဟု ၎င်းက ပြောသည်။

လက်ရှိတွင် ပုဂံဒေသတစ်ခုလုံး၌ ဟိုတယ်အခန်း အနည်းငယ်လောက်သာ ကျန်ရှိတော့မည်ဖြစ်ပြီး ပြီးခဲ့သည့် နှစ်နှင့်ယှဉ်ပါက ယခုနှစ် သီတင်းကျွတ်ပိတ်ရက်တွင် ပုဂံဒေသ၌ ဟိုတယ်ဘိုကင်ယူထားမှုမှာ ပိုများကြောင်း ဟိုတယ်နှင့် ခရီးသွားဝန်ကြီးဌာန(ပုဂံဌာနခွဲ)ဒုတိယညွှန်ကြားရေးမှူး ဦးဝင်းအောင်က CNI သတင်းဌာနသို့ ပြောသည်။

ယခုကဲ့သို့ များရခြင်းသည် ပုဂံဒေသသည် အခြားဒေသများနှင့်ယှဉ်ပါက လေယာဉ်၊ ကား၊ ရထား ကြိုက်နှစ်သက်ရာဖြင့် လာရောက်နိုင်ပြီး လမ်းပန်းဆက်သွယ်ရေးလွယ်ကူသောကြောင့် ဖြစ်နိုင်ကြောင်းလည်း ၎င်းက ပြောသည်။

ချောင်းသာကမ်းခြေသို့ ရောက်ရှိလာသည့် ခရီးသွားများ

“ပေါင်းစုံ အခုဟာက ကျောင်းပိတ်တဲ့ကာလလည်း ဖြစ်သွားပြီပေါ့။ အဲဒီတော့ မိသားစုအလိုက်လာကြတယ်။ သူငယ်ချင်းတွေ စုပြီးတော့ လာကြတယ်။ ဒီပိတ်ရက်ကလည်း ဖြစ်နေတဲ့အခါကြတော့ ရုံးလုပ်ငန်းပဲဖြစ်ဖြစ် ခရီးသွားတို့လို ကုမ္ပဏီတွေကပဲဖြစ်ဖြစ်ပေါ့။ ဒီအားလပ်ရက်လေးမှာ သီတင်းကျွတ်ကို လာကြတာပေါ့။ အထူးသဖြင့်က ဒီရက်ကလည်း ဗုဒ္ဓဘာသာဝင်တွေရဲ့ တကယ့် နေ့ထူးနေ့မြတ်ဖြစ်တယ်။ အဲဒါကြောင့်မို့လို့ ဒီမှာ အလှူအတန်းတွေလုပ်မယ်၊ ဆီမီးထွန်းမယ် စသည်ဖြင့်ပေါ့။ ဒီမှာက ဧရိယာလည်းအကျယ်ကြီးဖြစ်တယ်၊ ဘုရားစေတီပုထိုးပေါင်းကလည်း အများကြီးရှိတာကို။ တစ်နေရာတည်းလည်း ပြည့်ကျပ်မနေဘူးလေ။ နောက် သွားရတာလည်း အရသာက မတူဘူးပေါ့ ဒီခံစားမှုတွေလည်း ပါပါတယ်။ ဟိုတယ်အလိုက်ကတော့ သူ့ရဲ့ ဟိုတယ် ပရိုမိုးရှင်းအနေနဲ့တော့ လုပ်တာရှိပါတယ်။ အစားအသောက်တွေနဲ့ တွဲရောင်းတာပေါ့။ အခြား entertainment လေးတွေပေါ့။ တချို့ဟိုတယ်တွေကလည်း အခု balloon က ပျံနေပြီလေ မီးပုံးပျံတွေက။ မီးပုံးပျံက ပျံနေပြီဖြစ်နေတဲ့အခါကြတော့ ဒါနဲ့လည်း တွဲပြီးရောင်းတာလည်း ရှိပါတယ်။ ပရိုမိုးရှင်းကတော့ ကိုယ့်ရဲ့ ဟိုတယ်အခြေအနေ လိုက်ပြီးတော့မှ အမျိုးမျိုး လုပ်ကြပါတယ်” ဟု ပြောသည်။

ထို့အပြင် ပုဂံဒေသသို့ ခရီးသွားဝင်ရောက်လာမှုသည် ပြီးခဲ့သည့်နှစ်နှင့် နှိုင်းယှဉ်ပါက ၅၀ ရာခိုင်နှုန်းခန့် ပို၍ များပြားလာကြောင်းလည်း ဟိုတယ်နှင့် ခရီးသွားဝန်ကြီးဌာန(ပုဂံဌာနခွဲ)ဒုတိယညွှန်ကြားရေးမှူး ဦးဝင်းအောင်က ဆက်ပြောသည်။

ကမ်းခြေဒေသတစ်ခုဖြစ်သည့်  ချောင်းသာတွင်လည်း ဟိုတယ်ဘိုကင်ယူထားမှုများ ၉၀ ရာခိုင်နှုန်းခန့် ပြည့်နေပြီ ဖြစ်ကြောင်း ဟိုတယ်နှင့် ခရီးသွားဝန်ကြီးဌာန (ချောင်းသာရုံးခွဲ)မှ ဒုတိယညွှန်ကြားရေးမှူး ဦးကျော်ဇေယျက CNI သတင်းဌာနသို့ ပြောသည်။

ထို့အပြင် ချောင်းသာဒေသရှိ အသေးစား၊ အလတ်စား လုပ်ငန်းများအတွက် အထောက်အကူပြုစေရန် ဈေးပွဲတော် ကိုလည်း ယခုနှစ် သီတင်းကျွတ်ကာလတွင် ပြုလုပ်သွားရန်ရှိကြောင်းနှင့် မီးထွန်းပွဲတော်များလည်း ပြုလုပ်ရန် ရှိကြောင်း ၎င်းက ပြောသည်။

“ပြီးခဲ့တဲ့ သီတင်းကျွတ်ကလည်း သူ့ဟာသူတော့ ပြည့်တယ်။ များတယ်။ အခု ဒီနှစ်ကတော့ ပိုပြီးများတာပေါ့ မနှစ်ကထက်စာရင်။ ကြားရက် ပျမ်းမျှခြင်း တစ်ရက်ကို ၅၀၀ ကနေ ၆၀၀ အထိ ဝင်တယ် နေ့စဉ်ပေါ့။ စနေ၊ တနင်္ဂနွေပိတ်ရက်ဆိုရင်တော့ ၁၃၀၀၊ ၁၄၀၀ လောက်ဝင်ပါတယ်။ အခု သီတင်းကျွတ်ကို ခရီးသွားလုပ်ငန်း ဖွံ့ဖြိုးတိုးတက်ရေးအတွက် ၂၁ ရက်နေ့ လာမယ့် စနေနေ့မှာ MSME ဈေးပွဲတော်ပေါ့။ အဲဒါကျင်းပဖို့အတွက်ကို အခု ဆိုင်ခန်းတွေ ဆောက်နေပါပြီ။ စနေ၊ တနင်္ဂနွေ ၂ ရက်လုပ်ပါမယ်။ ခရိုင် ၈ ခရိုင်ကနေမှ သူတို့ရဲ့ဒေသ ထွက်ကုန်တွေကိုပေါ့ ခရိုင်မှူးတွေကိုယ်တိုင် လာကြီးကြပ်ပြီးတော့ အဲဒါတွေကို လာပြသပေးမှာ ဖြစ်ပါတယ်။ ကျနော်တို့ ချောင်းသာကတော့ ပြည်တွင်းပဲ လာရောက်လည်ပတ်တာများတယ်။ ပြည်ပကတော့ ငွေဆောင်ကိုပဲ ဝင်တာပေါ့နော်။ ကျနော်တို့က နဂိုကတည်းက ပြည်ပခရီးသွားဧည့်သည် နည်းတယ်။ နည်းတယ်ဆိုတာက ကမ်းခြေက တိုတယ်လေ ၁.၅ မိုင်ပဲရှိတယ်။ ငွေဆောင်ကြတော့ ၈မိုင်၊ ၉ မိုင်လောက်ရှည်တာကို။ ကမ်းခြေတိုတဲ့ အခါကြတော့ နိုင်ငံခြားသားတွေက ပြည်ပခရီးစဉ်ပေါ့ သိပ်မကြိုက်ဘူး” ဟု ၎င်းက ပြောသည်။

သို့သော် သီတင်းကျွတ်၊ တန်ဆောင်တိုင်ကာလ ခရီးသွားအများအပြား ဝင်ရောက်လေ့ရှိသည့် ရှမ်းပြည်နယ်တွင် မူ ယခုနှစ် သီတင်းကျွတ်ပိတ်ရက်အတွက် ဟိုတယ်ဘိုကင်ယူထားမှုများမှာ ပုံမှန်အနေအထားသာရှိပြီး ပြီးခဲ့သည့် ၂၀၂၂ ခုနှစ် သီတင်းကျွတ်ပိတ်ရက်နှင့်ယှဉ်ပါက နည်းပါးလှကြောင်း ရှမ်းပြည်နယ် ဟိုတယ်နှင့် ခရီးသွားလာရေး ညွှန်ကြားမှုဦးစီးဌာနမှ သိရသည်။

CNI News

၂၀၂၃ ခုနှစ်၊ စက်တင်ဘာ ၂၈

ပုဂံရှေးဟောင်း ယဉ်ကျေးမှုဇုန် နယ်မြေသို့ လာရောက်လည်ပတ်သည့် နိုင်ငံခြားသား ခရီးသွားများအား ဇုန်ဝင် ကြေး တိုးမြှင့်လိုက်သလို နေထိုင်ခွင့်ရက်ကိုလည်း ပြောင်းလဲသတ်မှတ်လိုက်ကြောင်း ရှေးဟောင်းသုတေသနနှင့် အမျိုးသားပြတိုက် ဦးစီးဌာန (ပုဂံဌာနခွဲ) ထံမှ သိရသည်။

နိုင်ငံခြား ခရီးသွားများ ပိုမိုဝင်ရောက် လာစေရန်အတွက် ဝင်ကြေးကို ဒေါ်လာထက် မြန်မာကျပ်ငွေဖြင့် ကောက်ခံ ခြင်းနှင့် ပုဂံဒေသအတွင်း လည်ပတ် နေထိုင်ခွင့်ရက်ကိုလည်း အနည်းဆုံး ၅ ရက် သတ်မှတ်ပေးရန် လိုအပ် ကြောင်း Myanmar Voyages International Tourism ရဲ့ မန်းနေးဂျင်း ဒါရိုက်တာ ဦးသက်လွင်တိုးက ပြောသည်။

၎င်းက “ပုဂံဇုန် ဝင်ကြေးကတော့ တိုးတယ်ဆိုတာ ငွေကြေးဖောင်းပွမှုကြောင့် ဖြစ်တာပါ။ ပြောရရင်တော့ ခါတိုင်း တုန်းက ဒေါ်လာနဲ့ ယူတဲ့ခေတ်တုန်းက လွန်ခဲ့တဲ့ ၁၀ နှစ်တုန်းက ၁၀ ဒေါ်လာ ယူတာလေ။ အဲဒီတုန်း က ၅ ရက် လားမသိဘူး ပေးတယ်။ အခုက ၃ ရက်ပဲ ရှိပြီးတော့ ၃ သောင်းဆိုတာတော့ ဒီနေ့ ငွေဈေးနဲ့ဆို ၈ ဒေါ်လာလောက် ရှိသွားတာပေါ့နော်။ ဒေါ်လာနဲ့ တွက်ခဲ့တယ် ၁၀ ဒေါ်လာနဲ့ တွက်ခဲ့တယ်ဆိုရင်တော့ မများပါဘူး။ ဒါ ကျပ်နဲ့ ပြန် ပေးရင်တော့ ပိုတောင် safe ဖြစ်တာပေါ့။ ဒါပေမယ့် လာမယ့်ရက်ကိုတော့ ၅ ရက်လောက်ဆိုတာတော့ ထားသင့် တယ်။ ဘာဖြစ်လဲဆိုတော့ လာတဲ့ဧည့်သည်တွေက အမျိုးမျိုး ရှိတာပေါ့။ တချို့ဧည့်သည်တွေ ကျတော့ ပုဂံဟာ ၃ ရက်လည်ရင်တော့ လုံလောက်တယ်ပေါ့နော်။ ရောက်တဲ့ ၁ ရက်၊ လေယာဉ်နဲ့ စောစောရောက် တယ်ဆိုရင်တော့ အပြည့်လည်ပေါ့၊ နောက်နေ့ ပုပ္ပါးတွေ သွားပေါ့။ တတိယနေ့ကျရင်လည်း အရင်တုန်းက ဟိုသွားဒီသွား သွားလို့ရ တယ်။ ပုဂံကို အဓိက လာမယ့် ဧည့်သည်တွေကတော့ ရက်ပေါင်း ၅ ရက်လောက်အထိ ပေးသင့်တယ်လို့ ထင် တယ်ပေါ့။ သူကတော့ အန်ကောဝပ်တို့ ဘာတို့ရဲ့ ထုံးကို ကြည့်ပြီးတော့ လိုက်လုပ်တာပေါ့ နော်။ ဒါပေမယ့် value တော့ မဖြစ်ဘူးပေါ့။ ပုဂံရဲ့ value နဲ့ အန်ကောဝပ်ရဲ့ value မတူဘူးပေါ့။ အခြေအနေလည်း မတူဘူးပေါ့။ အန်ကောဝပ်တို့ ဘာတို့က လက်ရှိအခြေအနေအရ အကုန်လုံးက ဗီယက်နမ်က တကယ့် စူပါ ဖြစ်နေ တဲ့အချိန်မှာ မြန်မာပြည်က အရမ်းကို နှမျောဖို့ ကောင်းတယ်။ ဝမ်းနည်းဖို့လည်း ကောင်းတယ်။ အဲဒီအခြေအနေ မျိုးတွေမှာ ဧည့်သည်ကို တကယ်လာစေချင်တယ်ဆိုရင်တော့ ဒီအပိုင်းတွေမှာ ဖြေလျှော့၊ ရက်တွေ ဘာတွေ ဖြေလျှော့ပေါ့ နော်။ နောက် ဒေါ်လာနဲ့တော့ မကောက်နဲ့ပေါ့၊ ကျပ်နဲ့တော့ ကောက်ပေါ့၊ အဲဒါဆိုရင်တော့လည်း လာမှာပါပဲ” ဟု CNI သတင်းဌာနသို့ ပြောသည်။

ပုဂံဒေသကိုတွေ့ရစဉ်

ယခင်က နိုင်ငံခြားသား တစ်ဦးလျှင် ငွေကျပ် ၂၅၀၀၀ ကောက်ခံရာမှ လက်ရှိတွင် ငွေကျပ် ၃၀၀၀၀ သတ်မှတ် ကောက်ခံခြင်း ဖြစ်ကြောင်း၊ နိုင်ငံခြားသားများ လည်ပတ်နေထိုင်ခွင့်ကိုလည်း ယခင်က ၅ ရက် သတ်မှတ်ခဲ့သော် လည်း လက်ရှိတွင် ၃ ရက်သာ ခွင့်ပြုတော့မည် ဖြစ်ကြောင်း သိရသည်။

ခွင့်ပြုထားသည့် ၃ ရက်ထက် ကျော်လွန်ပါက ဇုန်ဝင်ကြေးအသစ် ထပ်မံပေးဆောင်ရမည်ဖြစ်ပြီး လာမည့် အောက်တိုဘာ ၁ ရက်နေ့မှ စတင်၍ ပြောင်းလဲကောက်ခံသွားမည်ဖြစ်ကြောင်း သိရသည်။

ယခုကဲ့သို့ ဇုန်ဝင်ကြေးနှင့် နေထိုင်ခွင့်ရက်ကို ပြောင်းလဲလိုက်ခြင်းကြောင့် အကျိုးသက်ရောက်မှု မရှိကြောင်း မြန်မာနိုင်ငံ ဟိုတယ်ဆိုင်ရာ လုပ်ငန်းရှင်များအသင်း (ပုဂံဇုန်) ဥက္ကဋ္ဌ ဦးဇော်ဝိတ်က CNI သတင်းဌာနသို့ ပြောသည်။

ပုဂံဒေသကိုတွေ့ရစဉ်

၎င်းက “အဲဒါ လုပ်နေတာ ကြာပြီ။ အခုမှ ထွက်လာတာ။ အန်ကယ်တို့ အမြင်ကတော့ ၃ သောင်းဆိုတာတော့ နည်းတယ်။ ဒါ ကျပ်နဲ့ ကောက်နေတာ။ အနည်းဆုံး ၅ ဒေါ်လာ အောက်ထစ် ကောက်ရမှာ။ Siem Reap မှာဆိုရင် ၃၇ ဒေါ်လာတောင် ကောက်တာ။ ဘာမှ အကျိုးသက်ရောက်မှု မရှိဘူး ဘာမှ မရှိဘူး” ဟု ပြောသည်။

ယခင်က ဇုန်ဝင်ကြေးကောက်ခံခြင်းကို တင်ဒါခေါ်ကာ ကုမ္ပဏီများကို လုပ်ကိုင်ခွင့် ပေးခဲ့သော်လည်း ကိုဗစ် ကြောင့် နိုင်ငံခြားခရီးသွား ဝင်ရောက်မှု လျော့နည်းသွားခြင်းကြောင့် ရှေးဟောင်းသုတေသနဌာနက ပြောင်းလဲ ကောက်ခံလျက်ရှိသည်။ 

ဇုန်ဝင်ကြေး ကောက်ခံသည့် နေရာများသည် ပုဂံလေဆိပ်ရှိ ရှေးဟောင်းသုတေသန ကောင်တာ၊ အာနန္ဒဘုရား၊ မြစေတီ၊ မြင်းကပါ ဂူပြောက်ကြီးတို့တွင် ဖြစ်သည်။

တခြားသော နိုင်ငံများတွင် အထင်ကရ နေရာများ၌ ဝင်ကြေးများ ကောက်ခံမှုများသည် မြန်မာနိုင်ငံထက် ပမာဏ များသော်လည်း ပေးရသည့် ဝင်ကြေးနှင့် ရရှိသည့် ဝန်ဆောင်မှု အမျိုးအစားများသည် မျှတခြင်းကြောင့် ထိုက်သင့် ကြောင်း၊ မြန်မာနိုင်ငံသည် ဝင်ကြေးတိုးမြှင့်သော်လည်း ဝန်ဆောင်မှုအပိုင်းတွင် အဆင့်မြှင့်တင်ထားခြင်းများ မရှိ ခြင်းကြောင့် ခရီးသွားလုပ်ငန်းနှင့် သက်ဆိုင်သည့် အရာများကို စနစ်တကျ စီမံခန့်ခွဲရန် လိုအပ်နေသေးသည်ဟု ခရီးသွား ဝန်ဆောင်မှု လုပ်ငန်းရှင်များက ထောက်ပြကြသည်။

CNI News

၂၀၂၃ ခုနှစ်၊ စက်တင်ဘာ ၂

ပုဂံရှေးဟောင်းယဉ်ကျေးမှုနယ်မြေသို့ လာရောက်ကြသည့် ဘုရားဖူးများကို ထီးလိုမင်းလိုဘုရားကြီး အပါအဝင် ယခင်က တက်ရောက်ခွင့် ပြုခဲ့သည့် ဘုရားများ၏ အထက်ပစ္စယံပေါ်သို့ ပြန်လည် တက်ရောက်ခွင့်ပြုရန် ဆွေး နွေးမှုများ ပြုလုပ်နေသည်ဟု ရှေးဟောင်းသုတေသနနှင့် အမျိုးသားပြတိုက်ဦးစီးဌာန (ပုဂံဌာနခွဲ) ထံမှ သိရသည်။

ယခင်က ဘုရားဖူးများသည် ထီးလိုမင်းလိုဘုရားကြီး၊ ကန်တော့ပလ္လင်နှင့် စူဠာမဏိဂူဘုရားကြီး စသည့် ဘုရားများ ၏ အထက်ပစ္စယံပေါ်သို့ တက်ရောက်၍ ဘုရား၊ စေတီ၊ ပုထိုးများကို ကြည်ညိုဖူးမြော်ကြသလို ပုဂံဒေသ၏ အလှအပများအား ကြည့်ရှုခံစားကြသည်။ 

သို့သော် ၂၀၁၆ ခုနှစ်၊ ဩဂုတ်လက ပုဂံဒေသတွင် ငလျင်လှုပ်ခတ်ခဲ့ခြင်းကြောင့် အာနန္ဒာဘုရား၊ သဗ္ဗေညု၊ ကန်တော့ပလ္လင်၊ ထီးလိုမင်းလိုဘုရားနှင့် စူဠာမဏိဂူဘုရားကြီး အပါအဝင် စေတီ-ပုထိုးပေါင်း ၃၈၉ ဆူ ပျက်စီးခဲ့ ကြောင်း၊ ထို့ကြောင့် ဘုရားများ၏ အထက်ပစ္စယံသို့ တက်ရောက်ခြင်းကို ပိတ်ပင်ခဲ့သည်။

လက်ရှိတွင် သဗ္ဗေညုဘုရားမှအပ ကျန်ဘုရားစေတီများသည် ပြုပြင်ပြီးစီးသွားပြီဖြစ်၍ ဘုရားများ၏ ကြံ့ခိုင်မှု အပေါ် မူတည်၍ ပြန်လည်တက်ရောက်ခွင့် ပြုခြင်း မပြုခြင်းအား ဆွေးနွေးနေကြောင်း ရှေးဟောင်းသုတေသနနှင့် အမျိုးသားပြတိုက်ဦးစီးဌာန (ပုဂံဌာနခွဲ) မှ ညွှန်ကြားရေးမှူး ဦးကျော်မျိုးဝင်းက CNI သတင်းဌာနသို့ ပြောသည်။

ပုဂံရှေးဟောင်းယဉ်ကျေးမှု အလှကို တွေ့ရစဉ်

၎င်းက “လောလောဆယ်တော့ By Name နဲ့ တပ်ပြီးတော့ မဖြစ်သေးပါဘူး။ လောလောဆယ်တော့ ထီးလိုမင်းလို ဆိုပြီးတော့ အဲဒီလို By Name တပ်ပြီးတော့ မပြောသေးပါဘူး။ ဘယ်ဘုရားတွေတော့ ကြံ့ခိုင်မှုရှိတယ်ပေါ့၊ အဓိက က အထင်ကရ ဘုရားတွေပေါ့နော်၊ သဗ္ဗေညုကတော့ ထားလိုက်တော့ သဗ္ဗေညုကတော့ ကျနော်တို့ ပြင်ဆင်နေ တဲ့ ကာလပေါ့နော်။ တရုတ်နိုင်ငံ ပြင်ဆင်နေတဲ့ ကာလဆိုတော့ သဗ္ဗေညုကတော့ မပါဘူး။ ထီးလိုမင်းလိုပါမယ်၊ စူဠာမဏိပါမယ်။ 

ကန်တော့ပုလ္လင်ပါမယ် စသဖြင့်ပေါ့နော် ဂူဘုရားတွေကို ပေါ့နော်။ ဘယ်ဘုရားရယ်လို့တော့ မဟုတ်ဘူး၊ နာမည်ရှိတဲ့ ဘုရားတွေပေါ့နော်၊ အရင်တုန်းကလည်း တက်ခွင့်ပြုခဲ့တဲ့ ဘုရားတွေပေါ့နော် အဲဒီလို ဘုရားတွေကို တက်ခွင့် ပြုနိုင်ရေး၊ မပြုနိုင်ရေးပေါ့နော် သုံးသပ်ဖို့ ဆွေးနွေးနေတဲ့ ကာလပဲ ဖြစ်ပါတယ်” ဟု ပြော သည်။

ပြန်လည်တက်ရောက်ခွင့် ပြုရာတွင် အချိန်အကန့်သတ်ဖြင့်လည်းကောင်း၊ လူဦးရေ အကန့်အသတ်ဖြင့်လည်း ကောင်း ခွင့်ပြုသွားမည်ဟု သိရသည်။

ယခင်က တက်ရောက်ခွင့် ပြုခဲ့သည့် ဘုရားစေတီများထဲမှ ဂေါပကအင်အားနှင့် လုံခြုံရေးအင်အား များပြားသည့် ဘုရားများကို အဓိကထားပြီး တက်ရောက်ခွင့် ပြုသွားနိုင်ကြောင်း၊ လုံခြုံရေးနှင့် ရှေးဟောင်းယဉ်ကျေးမှု အမွေ အနှစ် ထိန်းသိမ်းမှုအပိုင်းတွင် သက်ဆိုင်ရာ ဘုရားဂေါပကများ၏ စီမံခန့်ခွဲမှုအပေါ်၌ မူတည်သည်ဟု ညွှန်ကြား ရေးမှူး ဦးကျော်မျိုးဝင်းက ဆက်ပြောသည်။

၎င်းက “အဓိကကတော့ ဖြစ်နိုင်ခြေ အများဆုံးကတော့ ဂေါပကရှိတဲ့ ဘုရားတွေပေါ့၊ ဂေါပကရှိတဲ့ ဘုရားတွေမှာမှ လုံခြုံရေးအင်အား တောင့်တင်းတဲ့ ဘုရားတွေဆိုရင်တော့ ပိုသေချာတာပေါ့နော်။ ဒီဘုရားတွေအပေါ်မှာ ဂေါပက တွေကနေ Control လုပ်တဲ့ ဘုရားတွေသည် ဒီအပေါ်မှာ ဧည့်သည်တွေကို ကန့်သတ်ချက်နဲ့ တက်ရောက်ခွင့် ပြုတဲ့အခါမှာ အန္တရာယ် ကင်းရှင်းရေးပေါ့နော် ဒါတွေကတော့ သက်ဆိုင်ရာ ဂေါပက ကနေပြီးတော့မှ စီမံခန့်ခွဲရမှာ ဖြစ်ပါတယ်။ ဒါကြောင့်မို့လို့ သူတို့ကရော တက်ရောက်ခွင့် ရတဲ့အခါမှာ သူတို့ကရော ဘယ်လောက် စီမံခန့်ခွဲနိုင် မလဲ ဒီအပေါ်မှာ မူတည်ပါတယ်။ အဲဒါကြောင့်မို့လို့လည်း ကျနော်တို့က သက်ဆိုင်ရာ ဘုရားဂေါပကတွေနဲ့ ကျနော်တို့တွေလည်း ညှိနှိုင်းဆွေးနွေးနေဆဲ ဖြစ်ပါတယ်။ အပေါ်ကို တက်ရောက်တဲ့အခါမှာ စနစ်တကျနဲ့ ရှေးဟောင်းယဉ်ကျေးမှု အမွေအနှစ်တွေဘာတွေ၊ အဆောက်အအုံတွေ၊ ပစ္စည်းတွေကို မထိခိုက်အောင်ပေါ့နော်၊ နောက်ပြီးတော့ အမှိုက်တွေမချဖို့ စသဖြင့်ပေါ့နော်၊ နောက်ပြီး မိမိကိုယ်မိမိ အန္တရာယ်မဖြစ်အောင်ပေါ့နော်၊ သက်ဆိုင်ရာ ဘုရားတွေရဲ့ ဂေါပကတွေရဲ့ Control အောက်မှာရှိတဲ့ လုံခြုံရေးအဖွဲ့တွေရဲ့ ညွှန်ကြားချက်တွေ ကိုလည်း တိတိကျကျ လိုက်နာဆောင်ရွက်ဖို့ လိုပါတယ် တကယ်လို့သာ တက်ရောက်ခွင့် ရခဲ့မယ်ဆိုရင်ပေါ့နော်” ဟု ပြောသည်။

ပုဂံသို့ လာရောက်သည့် ခရီးသွားဧည့်သည် အများစုသည် ပုဂံ၏ ရှုခင်းများကို ကြည့်ရှုလိုကြခြင်းကြောင့် လာရောက်ခြင်းဖြစ်ကြောင်း၊ ထို့ကြောင့် ဘုရားစေတီတချို့၏ အထက်ပစ္စယံသို့ ပြန်လည်တက်ရောက်ခွင့် ပြုမည်ဆိုပါက ခရီးသွားလုပ်ငန်းအတွက်လည်း သက်ရောက်မှု ရှိသည်ဟု မြန်မာနိုင်ငံ ဟိုတယ်ဆိုင်ရာ လုပ်ငန်း ရှင်များအသင်း (ပုဂံဇုန်) ဥက္ကဋ္ဌ ဦးဇော်ဝိတ်က CNI သတင်းဌာနသို့ ပြောသည်။

 ပုဂံရှေးဟောင်းယဉ်ကျေးမှု အလှကို တွေ့ရစဉ်

၎င်းက “ပုဂံကို လာတဲ့သူတွေက ဒီရှုခင်းကို ကြည့်ချင်တာ။ ဒီဘုရားတွေ ပိတ်လိုက်တော့ တချို့ဓာတ်ပုံ Tours တွေက ပျက်သွားတာတွေ ရှိတယ်၊ မလာတော့ဘူး။ အဲဒီ Views ကို ကြည့်မှ ပုဂံကို လာတဲ့ ရည်ရွယ်ချက်တို့၊ လူတွေရဲ့ ဆန္ဒတို့ အဲဒါမှ ပြည့်ဝတာ။ ဒါ ပြန်ဖွင့်ပေးလိုက်ရင် Impact ကောင်းတာပေါ့။ နောက်တစ်ခါ လူမတက် ဘူးဆိုလို့ရှိရင် အပေါ်ထပ် ပိတ်ထားရင် အဲဒီအပေါ်မှာ ခိုချေးတို့၊ လင်းနို့ချေးတို့၊ နောက်တစ်ခါ အမှိုက်တွေ၊ သူတို့ လုပ်ထားတဲ့ အသိုက်တွေတို့ အဲဒါတွေက အကုန်လုံး ပြည့်သွားမှာပေါ့။ အဲဒီတော့ ရေသွားရေလာတွေ မကောင်း တော့ဘူး။ ရေလမ်းကြောင်းတွေ ပိတ်ကုန်တယ်။ ရေလမ်းကြောင်းပိတ်ရင် ရေကန်ကြီး ဖြစ်သွားမယ်၊ ဒါ တကယ့် အဖြစ်ပဲ။ ရေကန်ဖြစ်သွားတော့ အဲဒီရေတွေက အုတ်ကြားတွေထဲကနေ အောက်ကို စိမ့်ဝင်သွားတယ်။ အောက်မှာ ရှိတဲ့ နံရံတွေ၊ ဂူတွေ မပျက်စီးဘူးလား” ဟု ပြောသည်။

လက်ရှိတွင် သဘာဝဘေးအန္တရာယ် ဖြစ်ပေါ်ခဲ့မှုကြောင့် ပုဂံရှေးဟောင်း ယဉ်ကျေးမှုနယ်မြေအတွင်း ရေဝင်၊ ရေဝပ်မှုနှင့် ထိခိုက်ပျက်စီးမှုများ ဖြစ်ပေါ်ခဲ့သည့် ဘုရားစေတီပုထိုးများကို ပြုပြင်ထိန်းသိမ်းလျက် ရှိနေကြောင်း  သိရသည်။

CNI News

၂၀၂၃ ခုနှစ်၊ ဩဂုတ် ၁၈

မြန်မာနိုင်ငံ၏ ဧရာဝတီတိုင်းဒေသကြီးရှိ ပုသိမ်လေယာဉ်ကွင်းအား နိုင်ငံတကာမှ လေယာဉ်များ ဆင်းသက်နိုင် သည်အထိ အဆင့်မြှင့်တင်ရန်မှာ လက်တွေ့တွင် မလွယ်ကူလှကြောင်း ခရီးသွားလုပ်ငန်းရှင်များက CNI သတင်း ဌာနသို့ ပြောသည်။

နစကဥက္ကဋ္ဌသည် ပုသိမ်မြို့ဒေသခံမြို့မိမြို့ဖများနှင့် တွေ့ဆုံစဉ် ဩဂုတ် ၁၁ ရက်က ပုသိမ်လေယာဉ်ကွင်းအား နိုင်ငံတကာမှလေယာဉ်များ ဆင်းသက်နိုင်သည်အထိ အဆင့်မြှင့်တင်မည်ဟု ပြောကြားခဲ့သည်။

ထို့အပြင် နိုင်ငံတကာစံနှုန်းသတ်မှတ်ချက်များတွင် နေ့စဉ် ယာဉ်အစီးရေ သွားလာမှုအပေါ်မူတည်ပြီး လမ်းများ အား အဆင့်မြှင့်တင်ရသဖြင့် ပုသိမ်-ရန်ကုန် ဖြတ်သန်းသွားလာမှုသည် နေ့စဉ် ယာဉ်အစီးပေါင်းများစွာ ဖြတ်သန်း သွားလာလျက်ရှိသည့်အတွက် လမ်းမျာအား အဆင့်မြှင့်တင်ပေးနိုင်ရေး ဆောင်ရွက်လျက်ရှိကြောင်းလည်း ပြော ကြားခဲ့သည်။

ခရီးသွားလုပ်ငန်းရှင်တစ်ဦးဖြစ်သူ ဦးသက်လွင်တိုးက "နိုင်ငံတကာလေကြောင်းလိုင်းဆိုတာ International Airport နဲ့ CIQ (CUSTOMS IMMIGRATION AND QUARANTINE) Airport မတူဘူး။ International Airport ဆိုတာ မြန်မာပြည်မှာ ICAO (International Civil Aviation Organization) က အသိအမှတ်ပြုတာ ၃ ရှိတယ်။ ရန်ကုန်ရယ်၊ မန္တလေးရယ်၊ နေပြည်တော်ရယ်။ နောက်  CIQ Airport ဆိုတာတော့ ပုဂံလည်း CIQ၊ ဟဲဟိုးလည်း CIQ၊ သံတွဲလည်း CIQ၊ မော်လမြိုင်လည်းရှိတယ်။ ပုသိမ်လည်း သူတို့လုပ်မယ်ဆိုတာကတော့ တကယ် Runway တွေ၊ ခံနိုင်ဝန်အားတွေ ရှိဖို့လိုတယ်။ ဘာလို့ဆို ICAO ရဲ့ standard မညီရင်တော့ safety standard ပေါ့ အထူး သဖြင့် အဲဒါမညီရင်တော့ ကျနော်ထင်တယ် CIQ Airport ဆိုတာက CUSTOMS IMMIGRATION AND QUARANTINE လောက် လုပ်နိုင်တဲ့အဆင့်ကိုပဲ ပြောတာပေါ့နော်။ Regular schedule သွားဖို့ကတော့ ဒါ တကယ် International Airport အဆင့်အထိကို အများကြီးလုပ်ရမှာပေါ့။ ဒါပေမယ့် အဆင့်တွေအများကြီး ကျန်ပါသေး တယ်။ ပြောရတာတော့ လွယ်ပါတယ်။ ဒါပေမယ့် နောက်ကလုပ်ရမယ့်အဆင့်တွေ ကျန်ပါသေးတယ်" ဟု ပြောသည်။

ပုသိမ်လေယာဉ်ကွင်းအား တိုးချဲ့ရာတွင် နိုင်ငံတကာလေယာဉ်ကြီးများ ပြေးဆွဲနိုင်မည်ဆိုပါက ကောင်းမွန်ပြီး ထိုသို့ ‌ဆင်းသက်နိုင်ပါက ဈေးနှုန်းထားများကို တိုးမြှင့်သတ်မှတ်ထားသင့်ကြောင်း ၎င်းက ပြောသည်။

ထိုသို့ ဈေးနှုန်းကြီးမြင့်မှသာလျှင် အမှန်တကယ် သုံးဖြုန်းနိုင်မည့် ခရီးသွားများ လာရောက်လည်ပတ်ကြမည် ဖြစ်ကြောင်းနှင့် ဈေးပေါပေါဖြင့်ဆိုပါက လူအများအပြား လာရောက်ကြမည်ဖြစ်သဖြင့် မိမိတို့၏ သဘာဝပတ်ဝန်း ကျင်လည်း ပျက်စီးနိုင်ကြောင်း ခရီးသွားလုပ်ငန်းရှင်တစ်ဦးဖြစ်သူ ဦးသက်လွင်တိုးက ထောက်ပြသည်။

ချောင်းသာကမ်းခြေတွင် ခရီးသွားများကို တွေ့ရစဉ်

ဧရာဝတီတိုင်းရှိ ကမ်းခြေဒေသများသည် ခရီးသွားရာသီများ၌ ပြည်တွင်း၊ ပြည်ပ ခရီးသွားဝင်ရောက်မှု အများ အပြားရှိပြီး သင်္ကြန်ကာလများတွင် ပုံမှန်ထက် ပို၍ ခရီးသွားဝင်ရောက်မှု များပြားတတ်ကြောင်း သိရသည်။

ထိုအခြေအနေတွင် ယခုကဲ့သို့ ပုသိမ်လေယာဉ်ကွင်းအား အဆင့်မြှင့်တင်မည်ဆိုပါက နိုင်ငံခြားသားခရီးသွား ဝင်ရောက်မှု ပိုမိုများပြားလာနိုင်ကာ ခရီးသွားကဏ္ဍအတွက်လည်း ပို၍ကောင်းမွန်သွားမည်ဖြစ်ကြောင်း ဟိုတယ်နှင့် ခရီးသွားလာရေးဝန်ကြီးဌာနမှ ဒုတိယ ညွှန်ကြားရေးမှူးချုပ် ဦးအောင်အေးဟန်က CNI သတင်း ဌာနသို့ ပြောသည်။

"တကယ်က ရန်ကုန်နဲ့ပုသိမ်က မိုင် ၁၀၀ ‌ကျော်ဆိုပေမယ့်လည်း သွားရတဲ့အချိန်က လေးနာရီကျော် ငါးနာရီ လောက် မောင်းရတဲ့အခြေအနေရှိတယ်လေ။ အဲဒီဥစ္စာမှာ ပုသိမ်လေဆိပ်အဆင့်မြှင့်တင်ပြီးတော့မှ ပုံမှန် လေယာဉ်တွေ ပြေးဆွဲတာပဲဖြစ်ဖြစ်၊ နိုင်ငံတကာလေဆိပ် အဆင့်မြှင့်တင်ပြီးတော့ တိုက်ရိုက်လေယာဉ် ဆင်းသက်တာပဲဖြစ်ဖြစ် အဲဒီလိုမျိုးလုပ်ခဲ့မယ်ဆိုရင်တော့ ချောင်းသာ၊ ငွေဆောင် အပန်းဖြေခရီးလာတဲ့ လူတွေ လည်း ပိုပြီးတော့ ခရီးအဆင်ပြေသွားပါလိမ့်မယ်။ ပင်လယ်ကမ်းခြေကိုလာပြီးအပန်းဖြေမယ့် ခရီးသွားဧည့်သည် တွေ တိုက်ရိုက် flight နဲ့ လာမယ်ဆိုရင် ပိုပြီးတိုးတက်လာမယ်။ ပြီးလို့ရှိရင် အဲဒီကနေတဆင့် ပြည်တွင်း လေ ကြောင်းတွေကိုလည်း ကူးပြောင်းပြီး ပြောင်းလဲစီးနင်းနိုင်မယ်ဆိုရင် သွားရလာရတာ သူတို့အတွက် အချိန်ကုန် သက်သာပြီးတော့မှ နေရတဲ့ရက်နဲ့တွက်ကြည့်ရင် ပိုပြီးတော့ ပိုသွားနိုင်တာပေါ့နော်" ဟု ၎င်းကပြောသည်။

ချောင်းသာသို့ ပြီးခဲ့သည့် ၂၀၂၂ ခုနှစ် ဇန်နဝါရီလမှ အောက်တိုဘာလအထိ ပြည်တွင်းပြည်ပ ခရီးသွားဧည့်သည် ဝင်ရောက်မှုမှာ နှစ်သိန်းငါးသောင်း ရှစ်ထောင်ကျော်ရှိခဲ့ပြီး ၂၀၂၁ခုနှစ်ကာလတူတွင်မူ ခြောက်သောင်း ခြောက် ထောင်ကျော်သာ ဝင်ရောက်ခဲ့ကြောင်း သိရသည်။

ထို့အပြင် ငွေဆောင်ဒေသသို့လည်း ၂၀၂၂ ခုနှစ် ဇန်နဝါရီလမှ အောက်တိုဘာလအထိ ပြည်တွင်းပြည်ပခရီးသွား ဧည့်သည်နှစ်သိန်းတစ်သောင်းခန့် ဝင်ရောက်ခဲ့ပြီး ၂၀၂၁ ခုနှစ်ကာလတူတွင် လေးသောင်းတစ်ထောင့် ငါးရာခန့် သာ ဝင်ရောက်ခဲ့ခြင်းဖြစ်ကြောင်း သိရသည်။