CNI Sport Article
၂၀၂၅ ခုနှစ်၊ အောက်တိုဘာ ၁၇
နိုင်ငံတကာဘောလုံးလောကရဲ့ အဆင့်သတ်မှတ်ချက် အနိမ့်ဆုံး အသင်းဖြစ်တဲ့ ဆန်မာရီနိုအသင်းဟာ ခြေစစ်ပွဲ စည်းမျဉ်းအောက်မှာ ကမ္ဘာ့ဖလား ဝင်ခွင့်ရနိုင်ဖို့အတွက် ဖြစ်နိုင်ဖွယ်ရှိတဲ့ လမ်းကြောင်းကို ပိုင်ဆိုင်ထားဆဲ ဖြစ်ပါ တယ်။
ဆန်မာရီနိုအသင်းဟာ လာမယ့်လမှာ ကစားမယ့် ခြေစစ်ပွဲမှာ ကြီးကြီးမားမား ရှုံးနိမ့်မှသာ ဒီလိုအခွင့်အရေးမျိုးကို ပိုင်ဆိုင်နိုင်မယ်လို့ သိရပါတယ်။
ဖီဖာကမ္ဘာ့အဆင့် သတ်မှတ်ချက် အောက်ဆုံးအဆင့် ၂၁၀ မှာရှိနေတဲ့ ဆန်မာရီနိုအသင်းဟာ သူတို့ရဲ့ ၂၀၂၆ ကမ္ဘာ့ဖလားခြေစစ်ပွဲ အုပ်စုမှာလည်း နောက်ဆုံးနေရာ ရပ်တည်နေတာပါ။
ဆန်မာရီနိုအသင်းဟာ ခြေစစ်ပွဲ ၇ ပွဲစလုံးကို အရေးနိမ့်ထားပြီး ၁ ဂိုးသာ သွင်းယူနိုင်ကာ ၃၂ ဂိုး ခွင့်ပြုထားရတာ ဖြစ်ပါတယ်။
၁၉၈၈ ခုနှစ်မှာ ဖီဖာအဖွဲ့ဝင် ဖြစ်လာပြီးကတည်းက ဆန်မာရီနိုအသင်းဟာ ကမ္ဘာ့ဖလားနဲ့ ဥရောပဖလား ခြေစစ်ပွဲ တွေမှာ နိုင်ပွဲရယူနိုင်ခြင်း မရှိသေးပါဘူး။
ဒါပေမယ့် ဆန်မာရီနိုအသင်းဟာ သူတို့ရဲ့ နေးရှင်းလိဂ် အုပ်စုအဆင့်ဖြစ်တဲ့ D မှာ ဂျီဘရောလ်တာနဲ့ လက်ချင် စတိန်း အသင်းကို ကျော်ဖြတ်ပြီး အုပ်စုထိပ်ဆုံး နေရာ ရပ်တည်နိုင်ခဲ့ပါတယ်။
ဆန်မာရီနိုအသင်းကို တွေ့ရစဉ်
အဲဒါကြောင့်လည်း ဆန်မာရီနိုအသင်းဟာ ကမ္ဘာ့ဖလား ပြိုင်ပွဲထံသွားမယ့် လမ်းကြောင်းမှာ ရှိနေသေးတာ ဖြစ်ပါတယ်။ နေးရှင်းလိဂ်မှာ ထိပ်ဆုံးနေရာ ရပ်တည်တဲ့ အသင်းတွေဟာ ၂၀၂၆ ကမ္ဘာ့ဖလား ခြေစစ်ပွဲအတွက် ပလေးအော့ဖ် ကစားခွင့်ရဖို့ အခွင့်အရေးတွေရှိနေတာပါ။
ကမ္ဘာ့ဖလားပြိုင်ပွဲအတွက် ဥရောပဇုန်ဟာ ပလေးအော့ဖ်ကနေ ဝင်ခွင့် ၄ နေရာ ရရှိမှာဖြစ်ပြီး နေးရှင်းလိဂ်အုပ်စု ထိပ်ဆုံး အသင်းတွေလည်း ဒီဝင်ခွင့်နေရာကို ရရှိနိုင်တာဖြစ်ပါတယ်။
ကမ္ဘာ့ဖလားပြိုင်ပွဲကို ခြေစစ်ပွဲအုပ်စုကနေ တိုက်ရိုက်ဝင်ခွင့်မရ ဒါမှမဟုတ် ပလေးအော့ဖ် နေရာမရတဲ့ အကောင်းဆုံး နေးရှင်းလိဂ် အုပ်စုထိပ်ဆုံး အသင်းတွေဟာ ပလေးအော့ဖ် လမ်းကြောင်းကို ယှဉ်ပြိုင်ခွင့်ရရှိမှာပါ။
ပြီးခဲ့တဲ့ နေးရှင်းလိဂ်ပြိုင်ပွဲမှာ အုပ်စုထိပ်ဆုံးနေရာ ရခဲ့တဲ့ စပိန်၊ ဂျာမနီ၊ ပေါ်တူဂီ၊ ပြင်သစ်၊ အင်္ဂလန်၊ နော်ဝေ၊ ချက်နဲ့ မြောက်မက်ဆီဒိုးနီးယားအသင်းတို့ဟာ ကမ္ဘာ့ဖလားခြေစစ်ပွဲ အုပ်စုတွေမှာ ထိပ်ဆုံး ၂ သင်းနေရာ ရပ်တည် နေကြပြီး ကမ္ဘာ့ဖလား တိုက်ရိုက်ဝင်ခွင့် ဒါမှမဟုတ် ဒုတိယနဲ့ ပလေးအော့ဖ် ဝင်ခွင့်နေရာကို ရဖို့ရှိနေကြပါတယ်။
ဝေးလ်စ်၊ ရိုမေးနီးယား၊ ဆွီဒင်နဲ့ မြောက်အိုင်ယာလန်တို့ကလည်း နေးရှင်းလိဂ်ကနေ ပလေးအော့ဖ် ဝင်ခွင့် ၄ နေရာ ကို ရရှိဖို့ တန်းစီနေကြပါတယ်။
ဒီအသင်းတွေဟာ သူတို့အုပ်စုရဲ့ ထိပ်ဆုံး ၂ သင်းထဲကို ဝင်ရောက်ခဲ့ရင် နေးရှင်းလိဂ်အုပ်စု D မှာ ထိပ်ဆုံးနေရာ ရပ်တည်ခဲ့တဲ့ မော်လ်ဒိုဗာနဲ့ ဆန်မာရီနိုတို့အတွက် နေးရှင်းလိဂ် ပလေးအော့ဖ် နေရာကို ရယူနိုင်ဖို့ မျှော်လင့်ချက် ရှိလာမှာ ဖြစ်ပါတယ်။
မော်လ်ဒိုဗာအသင်းက ဆန်မာရီနိုထက် ကမ္ဘာ့အဆင့် ပိုပြီးမြင့်နေတာကြောင့် ပလေးအော့ဖ် နေရာကို ရယူနိုင်ဖို့ တန်းစီနေတာပါ။
ဆန်မာရီနိုအသင်း ယှဉ်ပြိုင်နေစဉ်
ဆန်မာရီနိုအသင်းရဲ့ ခြေစစ်ပွဲအုပ်စုကို ကြည့်ရမယ်ဆိုရင် ရိုမေးနီးယားအသင်းဟာ အုပ်စုတတိယနေရာ ရပ်တည် နေပြီး ဒုတိယနေရာနဲ့ အဆုံးသတ်နိုင်ခဲ့ရင် သူတို့ရဲ့ ကမ္ဘာ့ဖလား ပလေးအော့ဖ် နေရာက ပိုပြီးအားကောင်းမှာ ဖြစ်ပါတယ်။
ရိုးမေးနီးယားအသင်းဟာ အုပ်စုဒုတိယနေရာက ဘော့စနီးယားအသင်းနဲ့ ၃ မှတ် ကွာဟနေပြီး သူတို့ ၂ သင်းဟာ လာမယ့်လမှာ ထိပ်တိုက်တွေ့ဆုံရမှာပါ။
ဘော့စနီးယားအသင်းဟာ ဒီပွဲပြီးရင် အုပ်စုထိပ်ဆုံးနေရာက သြစတြီးယားအသင်းနဲ့ ယှဉ်ပြိုင်ရမှာဖြစ်ပြီး ရိုမေးနီးယားအသင်းကတော့ ဆန်မာရီနိုအသင်းနဲ့ ယှဉ်ပြိုင်ရမှာဖြစ်ပါတယ်။
ရိုမေးနီးယားအသင်းဟာ ဘော့စနီးယားအသင်းကို အနိုင်ယူပြီး ဆန်မာရီနိုအသင်းကို ဂိုးပြတ် အနိုင်ရခဲ့ရင် ဂိုးကွာခြားချက်နဲ့ အုပ်စုဒုတိယ နေရာယူကာ ပလေးအော့ဖ် ဝင်ခွင့်ရဖို့ရှိနေတာပါ။
ရိုမေးနီးယားသာ ဒုတိယနေရာ ရပ်တည်ခဲ့ရင် ဆန်မာရီနိုအတွက်လည်း ပလေးအော့ဖ် မျှော်လင့်ချက်ကို အထောက်အကူ ဖြစ်စေမယ်လို့ သိရပါတယ်။
အဲဒါကြောင့် ရိုမေးနီးယားအသင်းကို ဂိုးပြတ်အရှုံးဟာ ဆန်မာရီနိုအတွက် အများကြီး အကျိုးသက်ရောက်မှု ရှိစေမှာပါ။
ဆန်မာရီနိုအသင်းအနေနဲ့ ၂၀၂၆ ကမ္ဘာ့ဖလားခြေစစ်ပွဲ နောက်ဆုံးပွဲစဉ်မှာ ဂိုးပြတ် အရေးနိမ့်ပြီး ပလေးအော့ဖ် ဝင်ခွင့်လမ်းကြောင်း တစ်နေရာကို ရရှိသွားနိုင်မလဲဆိုတာ စောင့်ကြည့်ရမှာဖြစ်ပါတယ်။
Source: Dailymail
