CNI Sport News
၂၀၂၆ ခုနှစ်၊ မေလ ၁

လီဗာပူးလ်အသင်းဟာ ပြီးခဲ့တဲ့ ခရစ္စတယ်ပဲလေ့စ် အသင်းနဲ့ပွဲမှာ ဒဏ်ရာကြောင့် လူစားလဲခဲ့ရတဲ့ အီဂျစ်တောင်ပံ ကစားသမား ဆာလက်ကို ဒီရာသီမကုန်မီ အသင်းအတွက် ပြန်ကစားပေးနိုင်ဖို့ မျှော်လင့်နေပါတယ်။ 

ခရစ္စတယ်ပဲလေ့စ်အသင်းနဲ့ပွဲဟာ ဆာလက်အတွက် လီဗာပူးလ်အသင်း ကစားသမားဘဝ နောက်ဆုံးပွဲ ဖြစ်နိုင်မယ့်အပေါ် စိုးရိမ်မှုတွေ ရှိနေကြတာပါ။

ဆာလက်ဟာ ၉ ရာသီကြာ ကစားခဲ့တဲ့ လီဗာပူးလ်အသင်းကနေ ဒီရာသီကုန်ရင် ထွက်ခွာမယ်လို့ ကြေညာ ထားတာ ဖြစ်ပါတယ်။ 

လီဗာပူးလ်အသင်းက ဆာလက်ရဲ့ ဒဏ်ရာဟာ အသေးစား ကြွက်သားဒဏ်ရာဖြစ်ပြီး ရာသီမကုန်မီမှာ အသင်း အတွက် ပါဝင်ကစားနိုင်ဖို့ မျှော်လင့်ထားတယ်လို့ ပြောခဲ့တာပါ။ 

လီဗာပူးလ်အသင်းရဲ့ ဒီရာသီ နောက်ဆုံးပွဲဟာ မေလ ၂၄ ရက်မှာ ဘရန်ဖို့ဒ်အသင်းကို အန်ဖီးလ်မှာ ယှဉ်ပြိုင်ရမှာ ဖြစ်ပါတယ်။ 

ဆာလက်ဟာ နွေရာသီမှာ ကျင်းပမယ့် ကမ္ဘာ့ဖလားပြိုင်ပွဲမှာတော့ အီဂျစ်အသင်းအတွက် ကြံ့ခိုင်မှုအပြည့်နဲ့ ပါဝင်နိုင်မှာပါ။ 

၂၀၁၇ ခုနှစ်မှာ လီဗာပူးလ်အသင်းထံ ပြောင်းရွှေ့လာခဲ့တဲ့ ဆာလက်ဟာ ပရီးမီးယားလိဂ်ဖလား ၂ ကြိမ်၊ ချန်ပီယံ လိဂ်ဖလား ၁ ကြိမ် အပါအဝင် ဆုဖလားအားလုံး ရရှိထားပါတယ်။ 

ဆာလက်ဟာ လီဗာပူးလ်အသင်းအတွက် ၂၅၇ ဂိုး သွင်းယူထားတာကြောင့် အသင်းသမိုင်းမှာ သူ့ထက် ဂိုး အများဆုံး သွင်းယူတဲ့သူအဖြစ် အီယန်ရပ်ရှ် ၃၄၆ ဂိုးနဲ့ ရော်ဂျာဟန့် ၂၈၅ ဂိုးသာရှိတာပါ။ 

လီဗာပူးလ်အသင်းဟာ ဒီရာသီ ပရီးမီးယားလိဂ် လက်ကျန်ပွဲတွေအဖြစ် ယူနိုက်တက်၊ ချယ်လ်ဆီး၊ အက်စတွန် ဗီလာ၊ ဘရန်ဖို့ဒ်အသင်းတို့နဲ့ ယှဉ်ပြိုင်ရမှာ ဖြစ်ပါတယ်။ 

Source: BBC

CNI Sport News
၂၀၂၆ ခုနှစ်၊ မေလ ၁

မာဆေးလ်အသင်းဟာ တိုက်စစ်မှူး ဂရင်းဝုဒ်အတွက် ပြောင်းရွှေ့ကြေး သတ်မှတ်ခဲ့ပြီး သူ့ကို ရောင်းချရမယ်ဆိုရင် အနည်းဆုံး ပေါင် ၄၃ သန်းရရှိဖို့ မျှော်လင့်နေပါတယ်။ 

ဂရင်းဝုဒ်ဟာ ၂၀၂၄ ခုနှစ်မှာ ယူနိုက်တက်အသင်းကနေ ရောက်ရှိလာပြီးကတည်းက မာဆေးလ်အသင်းအတွက် ခြေစွမ်းပြသနေပြီး ပထမရာသီမှာ ပြိုင်ပွဲစုံ ၂၂ ဂိုး သွင်းယူနိုင်ခဲ့ကာ ဒီရာသီမှာတော့ ၂၅ ဂိုးသွင်းယူထားတာပါ။

ဒါပေမယ့် ဂရင်းဝုဒ်ဟာ မာဆေးလ်အသင်းမှာ အနာဂတ် မရေမရာဖြစ်နေပြီး သူ့ကို ခေါ်ယူဖို့ ဂျူဗင်တပ်စ်အသင်း က စိတ်ဝင်စားနေပါတယ်။ 

ဂျူဗင်တပ်စ်အသင်းဟာ ဂရင်းဝုဒ်ကို ခေါ်ယူဖို့ ကာလရှည်ကြာ ပစ်မှတ်ထားနေတာဖြစ်ပြီး လာမယ့်နွေရာသီ အပြောင်းအရွှေ့မှာ ကြိုးပမ်းသွားမယ်လို့ အီတလီကလာတဲ့ သတင်းတွေမှာ ဖော်ပြထားတာပါ။ 

La Gazzetta dello Sport က မာဆေးလ်အသင်းဟာ လာမယ့်ရာသီမှာ ချန်ပီယံလိဂ် ဝင်ခွင့်မရခဲ့ရင် ဘဏ္ဍာရေး ဆိုင်ရာ အကြောင်းပြချက်ကြောင့် ဂရင်းဝုဒ်ကို ရောင်းချရနိုင်တယ်လို့ ဖော်ပြထားပါတယ်။ 

မာဆေးလ်အသင်းဟာ ဒီရာသီ လိဂ်ပွဲတွေ ကစားဖို့ ၃ ပွဲသာ ကျန်ရှိတော့တဲ့အချိန်မှာ အဆင့် ၆ နေရာ ရပ်တည် နေပြီး အဆင့် ၃ နေရာက လိုင်လီ၊ အဆင့် ၄ နေရာက လိုင်ယွန်အသင်းတို့နဲ့ ၄ မှတ်ကွာဟနေတာပါ။ 

ပြင်သစ်လီဂူး-၁ မှာ ထိပ်ဆုံး ၃ သင်းသာ ချန်ပီယံလိဂ်ပြိုင်ပွဲ တိုက်ရိုက် ယှဉ်ပြိုင်ခွင့်ရပြီး အဆင့် ၄ နေရာက အသင်းက ပလေးအော့ဖ် ယှဉ်ပြိုင်ရမှာ ဖြစ်ပါတယ်။ 

ဂရင်းဝုဒ်ကို မာဆေးလ်အသင်း ရောင်းချခဲ့ရင် ယူနိုက်တက်အသင်းဟာ ဒီပြောင်းရွှေ့ကြေးရဲ့ တစ်စိတ်တစ်ပိုင်းကို ရရှိမှာပါ။ 

ယူနိုက်တက်အသင်းဟာ ဂရင်းဝုဒ်ကို မာဆေးလ်အသင်းထံ ပေါင်သန်း ၃၀ နဲ့ ရောင်းချခဲ့မှုမှာ ပြန်ရောင်းချရင် ပြောင်းရွှေ့ကြေး အစိတ်အပိုင်းပေးဖို့ အချက်ပါဝင်ခဲ့တာ ဖြစ်ပါတယ်။ 

Source: Dailymail

CNI Sport News

၂၀၂၆ ခုနှစ်၊ ဧပြီ ၃၀

အက်သလက်တီကိုနဲ့ အာဆင်နယ်အသင်း ၁ ဂိုးစီ သရေကျခဲ့တဲ့ ချန်ပီယံလိဂ် ဆီမီးဖိုင်နယ် ပထမအကျော့ပွဲမှာ အာဆင်နယ်အသင်းရမယ့် ပယ်နယ်တီကို အငြင်းပွားဖွယ် ပယ်ဖျက်ခဲ့မှုအပေါ် နည်းပြအာတီတာက ဒေါသထွက် နေပြီး စည်းမျဉ်းတွေနဲ့ ဆန့်ကျင်နေတယ်လို့ ပြောခဲ့ပါတယ်။

အာတီတာက “အီဇီရဲ့ ပယ်နယ်တီကို ပယ်ဖျက်ခဲ့တဲ့အပေါ် ကျနော် ဒေါသထွက်နေပါတယ်။ ဒီအဆင့်မှာ ဒီလိုမျိုး အရာတွေက ဖြစ်လို့မရပါဘူး။ စည်းမျဉ်းတွေနဲ့ ဆန့်ကျင်နေပြီး ကျနော် နားမလည်နိုင်အောင်ပါပဲ။ ရှင်းရှင်းလင်း လင်း ထိတွေ့မှုရှိခဲ့သလို ပယ်နယ်တီပေးဖို့ ဆုံးဖြတ်ပြီးမှာ VAR ကို ၁၃ ကြိမ်ကြည့်ပြီးရင် ဒါကိုပယ်ဖျက်လို့ မရပါ ဘူး”လို့ ပြောခဲ့တာပါ။

ဒီပွဲမှာ အာဆင်နယ်အသင်းဟာ ယိုကီရက်စ်ရဲ့ ပယ်နယ်တီ သွင်းဂိုးနဲ့ ဦးဆောင်နိုင်ခဲ့ပေမယ့် အက်သလက်တီကို အသင်းအတွက် ချေပဂိုးကို ပယ်နယ်တီကနေ အယ်လ်ဗာရက်ဇ်က ပြန်ပြီးသွင်းယူခဲ့တာ ဖြစ်ပါတယ်။

ဒါပေမယ့် အာဆင်နယ်အသင်းဟာ အီဇီကို အက်သလက်တီကိုအသင်း နောက်ခံလူ ဟန်ကို ဂိုးဧရိယာအတွင်း ပြစ်ဒဏ် ကျူးလွန်ခဲ့တဲ့ဖြစ်ရပ်မှာ ဒုတိယမြောက် ပယ်နယ်တီရဖို့ ငြင်းဆန်ခံခဲ့ရတာပါ။

ဒီပွဲကို ကိုင်တွယ်တဲ့ ဒတ်ချ် ကွင်းလယ်ဒိုင်လူကြီးဟာ အစောပိုင်းက ပယ်နယ်တီအဖြစ် သတ်မှတ်ခဲ့ပေမယ့် VAR ဒိုင်လူကြီးက သူ့ရဲ့ဆုံးဖြတ်ချက်ကို ပြန်သုံးသပ်ဖို့ မော်နီတာကို သွားရောက် ကြည့်ခိုင်းခဲ့ပါတယ်။

အက်သလက်တီကို ပရိသတ်တွေနဲ့ နည်းပြ ဆီမြွန်နီဆီတို့က အကြိမ်ကြိမ် ကန့်ကွက်ခဲ့ကြသလို သူကလည်း ဒီဖြစ်ရပ်ကို အကြိမ်ပေါင်းများစွာ ကြည့်ပြီးနောက် ပယ်နယ်တီပေးခဲ့တဲ့ ကနဦး ဆုံးဖြတ်ချက်ကို ပယ်ဖျက်ခဲ့တာပါ။

အာတီတာကတော့ သူတို့အနိုင်ရမယ့် အခွင့်အရေးကို မပေးခဲ့တဲ့ ဒိုင်လူကြီးတွေရဲ့ ဆုံးဖြတ်ချက်ကို ဒေါသ ထွက်နေတာ ဖြစ်ပါတယ်။

အာဆင်နယ်အသင်းဟာ ဒီပွဲသရေကျခဲ့ပေမယ့် ဒုတိယအကျော့ကို အိမ်ကွင်း ကစားရမှာဖြစ်လို့ ချန်ပီယံလိဂ် ဗိုလ်လုပွဲ တက်နိုင်ဖို့ ရေပန်းစားနေပါတယ်။

Source: ESPN

CNI Sport News

၂၀၂၆ ခုနှစ်၊ ဧပြီ ၃၀

အယ်လ်နာဆာအသင်းဟာ ဆော်ဒီပရိုလိဂ်ပွဲမှာ အယ်လ်အာလီအသင်းကို ၂ ဂိုး-ဂိုးမရှိနဲ့ အနိုင်ရခဲ့ပြီး အသင်း ခေါင်းဆောင် ရော်နယ်လ်ဒိုက ၁ ဂိုးသွင်းယူခဲ့သလို အသင်းဟာ ပြိုင်ပွဲစုံ ၂၀ ပွဲဆက်တိုက် နိုင်ပွဲရရှိခဲ့ပါတယ်။

အယ်လ်နာဆာအသင်းဟာ ဒီနိုင်ပွဲကြောင့် အဆင့် ၂ နေရာက အယ်လ်ဟီလယ်အသင်းထက် ၁ ပွဲ ပိုကစားပြီး ရမှတ် ၈ မှတ်ဖြတ်ကာ ထိပ်ဆုံးနေရာမှာ ရပ်တည်နေတာပါ။

ရော်နယ်လ်ဒိုဟာ ဒီရာသီ ဆော်ဒီပရိုပြိုင်ပွဲမှာ ၂၅ ဂိုးအထိ သွင်းယူထားပြီး အကောင်းဆုံး စွမ်းဆောင်ရည်တွေကို ပြသနေတာ ဖြစ်ပါတယ်။

ဆော်ဒီပရိုလိဂ် ပြိုင်ပွဲမှာ ၁၆ ပွဲ ဆက်တိုက် နိုင်ပွဲရရှိထားတဲ့ အယ်လ်နာဆာအသင်းဟာ ဒီရာသီ လိဂ်လက်ကျန် ၄ ပွဲမှာ ရလဒ်ကောင်း ရယူနိုင်ရင် အမှတ်ပေး ချန်ပီယံဆုကို ရယူနိုင်မှာပါ။

နောက်ဆုံး ကစားခဲ့တဲ့ ၉ ပွဲမှာ ၉ ဂိုး သွင်းယူနိုင်ခဲ့တဲ့ ရော်နယ်လ်ဒိုဟာ ပရော်ဖက်ရှင်နယ် ကစားသမားဘဝ သွင်းဂိုး ၉၇၀ ဂိုးအထိရှိလာခဲ့ပြီး အယ်လ်နာဆာအသင်း အတွက်တော့ သူဟာ ၁၂၆ ဂိုး သွင်းယူထားပါတယ်။

ရော်နယ်လ်ဒိုဟာ အယ်လ်နာဆာအသင်း ကစားသမားဘဝမှာ အဓိက ဆုဖလားတွေ ရယူနိုင်ခြင်း မရှိသေးတာ ကြောင့် ဝေဖန်မှုတွေ ခံနေရပေမယ့် ဒီရာသီမှာတော့ ဆုဖလား ၂ လုံး ရယူနိုင်ဖို့ အခွင့်အရေး ရှိနေတာပါ။

အယ်လ်နာဆာအသင်းဟာ ဆော်ဒီပရိုလိဂ်ပြိုင်ပွဲမှာ ထိပ်ဆုံးနေရာ ရပ်တည်နေသလို အာရှချန်ပီယံလိဂ် ၂ မှာ ဗိုလ်လုပွဲ ယှဉ်ပြိုင်ရမှာ ဖြစ်ပါတယ်။

အယ်လ်နာဆာအသင်းဟာ အာရှချန်ပီယံလိဂ် ၂ ဗိုလ်လုပွဲအဖြစ် ဂျပန်ကလပ် ဂမ်ဘာအိုဆာကာအသင်းနဲ့ ယှဉ်ပြိုင်ရမှာဖြစ်ပြီး လာမယ့် လိဂ်ပွဲအဖြစ် အယ်လ်ကတ်ဆီယာအသင်းနဲ့ အဝေးကွင်းယှဉ်ပြိုင်ရမှာ ဖြစ်ပါတယ်။

Source: ESPN

CNI Sport News

၂၀၂၆ ခုနှစ်၊ မတ် ၁၃

ရန်ကုန်ယူနိုက်တက်အသင်းက ရတနာပုံအသင်းကို ၃ ဂိုး-၂ ဂိုးနဲ့အနိုင်ရခဲ့တဲ့ မြန်မာနေရှင်နယ်လိဂ်ပွဲမှာ ဖြစ်ခဲ့တဲ့ဖြစ်ရပ်ကြောင့် ရန်ကုန်ယူနိုက်တက်အသင်း တောင်ပံကစားသမား မောင်မောင်လွင်ကို မြန်မာနိုင်ငံဘောလုံးအဖွဲ့ချုပ်၊ စည်းကမ်းထိန်းသိမ်းရေးနဲ့ ကျင့်ဝတ်ကော်မတီက ၆ လ ပွဲပယ်နဲ့ ဒဏ်ကြေးငွေသိန်း ၃၀ ပြစ်ဒဏ်ချမှတ်ခဲ့ပါတယ်။ 

ဒီပွဲကို လာရောက်ကြည့်ရှုတဲ့ အမျိုးသမီးပရိသတ်တစ်ဦးဟာ ရန်ကုန်ယူနိုက်တက်အသင်းက ကစားသမားတွေကို နာမည်တပ်ပြီး ဝေဖန်အော်ဟစ် ဆဲဆိုမှုတွေပြုလုပ်နေခဲ့တာပါ။ 

အဲ့ဒါကြောင့် ပထမပိုင်းအပြီးမှာ မောင်မောင်လွင်ဟာ ပွဲကြည့်စင်ပေါ်ကိုတက်ကာ အဆိုပါအမျိုးသမီးပရိသတ်ကို ကိုယ်ထိလက်ရောက် တွန်းထိုးမှုပြုလုပ်တဲ့ ဖြစ်ရပ် ဖြစ်ခဲ့ပါတယ်။ 

မောင်မောင်လွင် ဘောလုံးကစားနေသည်ကိုတွေ့ရစဉ်

မောင်မောင်လွင်အနေနဲ့ ကစားသမားတစ်ဦးက လိုက်နာရမယ့်စည်းကမ်းကျင့်ဝတ်တွေကို ကျော်လွန်ပြီး ပြုလုပ်ခဲ့တာကြောင့် မတ်လ ၁၁ ရက်ကနေစတင်ကာ မြန်မာနိုင်ငံဘောလုံးအဖွဲ့ချုပ်၊ မြန်မာနေရှင်နယ်လိဂ် ပြိုင်ပွဲကျင်းပရေးက ကြီးမှူးကျင်းပတဲ့ပြိုင်ပွဲတွေ၊ ဘောလုံးနဲ့ပတ်သက်တဲ့ လှုပ်ရှားမှုတွေမှာ ၆ လအထိ ကစားခွင့်/ပါဝင်လုပ်ဆောင်ခွင့် မပြုဖို့နဲ့ ဒဏ်ကြေးငွေကျပ်သိန်း ၃၀ ပေးဆောင်ဖို့ ပြစ်ဒဏ်ချမှတ်ခြင်းခံခဲ့ရတာပါ။ 

ဒါ့အပြင်တာဝန်ကျ ဒိုင်လူကြီးဦးကျော်ဇေယျာအောင်ဟာ မောင်မောင်လွင်ကို အနီကတ်ပြသခြင်းမရှိဘဲ ဘောလုံးဥပဒေစည်းမျဉ်းကို မျက်ကွယ်ပြုခဲ့တဲ့အတွက် အနီးစပ်ဆုံး ၃ ပွဲပယ်နဲ့ ပြိုင်ပွဲကြီးကြပ်၊ ဒိုင်ကြီးကြပ်တို့ကိုလည်း ဥပဒေနဲ့အညီ ကွင်းလယ်ဒိုင်လူကြီးကိုဆောင်ရွက်ဖို့ သတိမပေးခဲ့လို့ အနီးစပ် ၃ ပွဲကို တာဝန်ချမပေးဖို့ MFF က ပြစ်ဒဏ်ချခဲ့ပါတယ်။ 

အော်ဟစ်ဆဲဆိုမှုတွေပြုလုပ်ခဲ့တဲ့ အမျိုးသမီးပရိသတ်ကိုလည်း မြန်မာနိုင်ငံဘောလုံးအဖွဲ့ချုပ်၊ စည်းကမ်းထိန်းသိမ်းရေးနဲ့ ကျင့်ဝတ်ကော်မတီက အရေးယူသွားမယ်လို့ သိရပါတယ်။ 

CNI Sport News
၂၀၂၆ ခုနှစ်၊ ဖေဖော်ဝါရီ ၁၁

နိုင်ငံတကာ အားကစားပြိုင်ပွဲများတွင် ဝင်ရောက်ယှဉ်ပြိုင်၍ ဆုတံဆိပ်များ ရယူဆွတ်ခူးပေးခဲ့ကြသော တပ်မတော်သား အားကစားသမားများနှင့် နည်းပြများကို နိုင်ငံတော်လုံခြုံရေးနှင့်အေးချမ်းသာယာရေးကော်မရှင် ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ၂၀၂၆ ခုနှစ်၊ ဖေဖော်ဝါရီ ၁၁ ရက်၌ ဂုဏ်ပြုဆုများ ပေးအပ်ခဲ့သည်။

အဆိုပါ အားကစားသမားများနှင့် နည်းပြများသည် (၁၉) ကြိမ်မြောက် အာရှအားကစားပြိုင်ပွဲ၊ (၃၃) ကြိမ်မြောက် အရှေ့တောင်အာရှ အားကစားပြိုင်ပွဲနှင့် (၁၃) ကြိမ်မြောက် အာဆီယံမသန်စွမ်းအားကစားပြိုင်ပွဲတို့တွင် ဆုတံဆိပ်များ ရယူဆွတ်ခူးပေးခဲ့ကြသူများဖြစ်ကြသည်။

CNI Sport News

၂၀၂၅ ခုနှစ်၊ ဒီဇင်ဘာ ၁၀

ထိုင်းနိုင်ငံမှာ ကျင်းပနေတဲ့ ၂၀၂၅ ဆီးဂိမ်းစ်ပြိုင်ပွဲမှာ မြန်မာနိုင်ငံအတွက် ခြင်းလုံး အားကစားနည်းကနေ ရွှေတံဆိပ် ၂ ခု စတင် ရရှိခဲ့ပါတယ်။

အမျိုးသားနဲ့ အမျိုးသမီး ခြင်းလုံးပြိုင်ပွဲတွေမှာ မြန်မာအသင်းဟာ အိမ်ရှင် ထိုင်းအသင်းကို အနိုင်ရပြီး ရွှေတံဆိပ် တွေ ရရှိခဲ့တာ ဖြစ်ပါတယ်။ 

အမျိုးသမီး ဗိုလ်လုပွဲမှာ မြန်မာအသင်းက ၅၀၂ မှတ်နဲ့ ရွှေတံဆိပ်၊ ထိုင်းအသင်းက ၄၄၆ မှတ်နဲ့ ငွေတံဆိပ် ရရှိခဲ့တာပါ။

အမျိုးသားဗိုလ်လုပွဲမှာတော့ မြန်မာအသင်းက ၅၇၄ မှတ်နဲ့ ရွှေတံဆိပ်၊ ထိုင်းအသင်းက ၅၀၁ မှတ်နဲ့ ငွေတံဆိပ် ရရှိခဲ့တာ ဖြစ်ပါတယ်။

CNI Sport News
၂၀၂၅ ခုနှစ်၊ ဒီဇင်ဘာ ၈

မြန်မာအသင်းဟာ ၂၀၂၅ ဆီးဂိမ်းစ် အမျိုးသမီး ဘောလုံးပြိုင်ပွဲအုပ်စု B ဒုတိယမြောက်ပွဲစဉ်မှာ မလေးရှားအသင်း ကို ၃ ဂိုး-ဂိုးမရှိနဲ့အနိုင်ရပြီး ၂ ပွဲဆက် နိုင်ပွဲရရှိခဲ့ပါတယ်။ 

ဒီပွဲမှာ မြန်မာအသင်းအတွက် သွင်းဂိုးတွေကို ပထမပိုင်းမှာ စန်းသော်သော်နဲ့ မေထက်လူ၊ ဒုတိယပိုင်းမှာ ဝင်းသိင်္ဂီထွန်းတို့က သွင်းယူခဲ့တာပါ။ 

မေထက်လူနဲ့ ဝင်းသိင်္ဂီထွန်းတို့ဟာ ပြီးခဲ့တဲ့ ဖိလစ်ပိုင်အသင်းနဲ့ ပွဲစဉ်မှာလည်း ဂိုးသွင်း နိုင်ခဲ့တာကြောင့် ဆီးဂိမ်းစ် ပြိုင်ပွဲမှာ ၂ ပွဲဆက် ဂိုးသွင်းနိုင်ခဲ့တာ ဖြစ်ပါတယ်။ 

မြန်မာအသင်းဟာ ဒီပွဲရဲ့ ပထမပိုင်းမှာ ပွဲထွက် လူစာရင်း အပြောင်းအလဲကြောင့် အနည်းငယ် ရုန်းကန်ရမှုတွေ ရှိခဲ့သလို ဒုတိယပိုင်းမှာ တစ်ဦးအသာနဲ့ ကစားခဲ့ရပေမယ့် ဂိုးရနိုင်မယ့် အခွင့်အရေးတွေကို ဖြုန်းတီးမှုကြောင့် ဒီထက်ပြတ်သားတဲ့ ရလဒ်မရရှိခဲ့တာပါ။ 

မြန်မာအသင်းဟာ ၂ ပွဲဆက် အနိုင်ကြောင့် ဆီမီးဖိုင်နယ်တက်ဖို့ အခြေအနေ ကောင်းခဲ့ပါတယ်။ 

မြန်မာအသင်းဟာ ဒီဇင်ဘာ ၁၁ ရက်မှာ အုပ်စု နောက်ဆုံးပွဲစဉ်အဖြစ် ဗီယက်နမ်အသင်းနဲ့ ယှဉ်ပြိုင်ရမှာ ဖြစ်ပါတယ်။

CNI Sport News
၂၀၂၅ ခုနှစ်၊ ဒီဇင်ဘာ ၅

၂၀၂၅ ဆီးဂိမ်းစ် အမျိုးသမီးဘောလုံးပြိုင်ပွဲ အုပ်စု(B) အဖွင့်ပွဲစဉ်ဖြစ်တဲ့ မြန်မာအသင်းနဲ့ ဖိလစ်ပိုင်အသင်းတို့ ပွဲစဉ်မှာ မြန်မာအသင်းက ၂ ဂိုး-၁ ဂိုးနဲ့ အနိုင်ရခဲ့ပြီး သွင်းဂိုးတွေကို တိုက်စစ်မှူးတွေဖြစ်တဲ့ ဝင်းသိင်္ဂီထွန်းနဲ့ မေထက်လူတို့က သွင်းယူခဲ့ပါတယ်။

ဒီပွဲရဲ့ ပွဲအစ ပိုင်းမှာတင် မြန်မာအသင်းဟာ ဝင်းသိင်္ဂီထွန်းရဲ့ သွင်းဂိုးနဲ့ ဦးဆောင်နိုင်ခဲ့တာ ဖြစ်ပါတယ်။ 

ဖိလစ်ပိုင်အသင်းဟာ မြန်မာအသင်းကို ဦးဆောင်ဂိုး ပေးခဲ့ရပြီးကတည်းက ချေပဂိုးရယူနိုင်ဖို့ တိုက်စစ်ဆင် ခဲ့ပေမယ့် မြန်မာအသင်း ခံစစ်က အကောင်းဆုံး ကာကွယ်ခဲ့တာကြောင့် ပထမပိုင်းအပြီးမှာ မြန်မာအသင်းက ၁ ဂိုး-ဂိုးမရှိနဲ့ ဦးဆောင်နိုင်ခဲ့ပါတယ်။

ဒုတိယပိုင်းမှာတော့ ဖိလစ်ပိုင်အသင်းဟာ သွင်းဂိုးရယူဖို့ တိုက်စစ်ဆင်မှုတွေ ပိုပြုလုပ်လာခဲ့ပြီး မြန်မာအသင်း ခံစစ်ကို အလုပ်ရှုပ်စေခဲ့တာပါ။

မြန်မာအသင်းဟာ ဖိလစ်ပိုင်အသင်းရဲ့ တိုက်စစ်ကို အကောင်းဆုံး ဟန့်တားနိုင်ခဲ့ပေမယ့် မြန်မာအသင်း ဂိုးသမား ရဲ့ ဂိုးဖမ်းပုံ မသေသပ်မှုကြောင့် ချေပဂိုးခွင့် ပြုခဲ့ရပါတယ်။ 

မြန်မာအသင်းဟာ ချေပဂိုး ပေးရပြီးနောက်မှာ တိုက်စစ်ဆင်မှုတွေ ပြန်လည် ပြုလုပ်လာခဲ့တာကြောင့် ပွဲပြီးခါနီး မှာ ယွန်းဝတီလှိုင်ရဲ့ ဖန်တီးပေးမှုကနေ မေထက်လူက ခေါင်းတိုက်ပြီး အဖိုးတန် အနိုင်ဂိုး သွင်းယူနိုင်ခဲ့ပါတယ်။ 

အဲ့ဒါကြောင့် မြန်မာအသင်းဟာ အုပ်စုအဖွင့်ပွဲစဉ်မှာ အဖိုးတန် ၃ မှတ် ရယူနိုင်ခဲ့ပါတယ်။ 

မြန်မာအသင်းဟာ အုပ်စုဒုတိယပွဲစဉ်အဖြစ်  ဒီဇင်ဘာ ၈ ရက်မှာ မလေးရှားအသင်းနဲ့ ယှဉ်ပြိုင်ရမှာဖြစ်ပါတယ်။

CNI Sport News
၂၀၂၅ ခုနှစ်၊ ဒီဇင်ဘာ ၅

၂၀၂၅ ဆီးဂိမ်းစ် အမျိုးသားဘောလုံးပြိုင်ပွဲ အုပ်စု(C) အဖွင့်ပွဲစဉ်မှာ မြန်မာအသင်းဟာ ဖိလစ်ပိုင်အသင်းကို ၂ ဂိုး-ဂိုး မရှိနဲ့ အရေးနိမ့်ခဲ့ပါတယ်။ 

မြန်မာအသင်းဟာ ဒီပွဲအစမှာကတည်းက ဖိလစ်ပိုင်အသင်းရဲ့ တိုက်စစ်ဆင်မှုတွေကို ဖျက်ထုတ်နေရပြီး အဖွင့်ဂိုး ကို ပွဲချိန် ၁၉ မိနစ်မှာ ကတည်းက ပေးခဲ့ရပါတယ်။ 

မြန်မာအသင်းဟာ ဦးဆောင်ဂိုး ပေးရအပြီးမှာ ချေပဂိုးရဖို့ ကြိုးစားခဲ့ပေမယ့် ဂိုးပေါက် ခြိမ်းခြောက်မှု အားနည်းခဲ့ တာကြောင့် ပထမပိုင်းမှာ ၁ ဂိုး-ဂိုးမရှိနဲ့ အရေးနိမ့်နေခဲ့ပါတယ်။

ဒုတိယပိုင်းမှာ မြန်မာအသင်းဟာ ချေပဂိုးရဖို့ တိုက်စစ်ဆင် ကစားခဲ့ပေမယ့် နောက်ခံလူ လာဘ်ဝေဘုန်းရဲ့ ကိုယ့်ဂိုးကိုယ် သွင်းယူမှုကြောင့် ဖိလစ်ပိုင်အသင်းကို နောက်ထပ် ဦးဆောင်ဂိုး ထပ်ပေးခဲ့ရပါတယ်။ 

ဒီနောက်ပိုင်းမှာ မြန်မာအသင်းဟာ ဖိလစ်ပိုင်အသင်းဘက်ကို ဖိအားပေး ကစားလာခဲ့ပေမယ့် အဝေးကန်ချက် တွေနဲ့သာ ခြိမ်းခြောက်နိုင်ခဲ့ပြီး အဖွင့်ပွဲစဉ်မှာ အရေးနိမ့်ခဲ့ပါတယ်။

မြန်မာအသင်းဟာ ဒီဇင်ဘာ ၁၂ ရက်မှာ အုပ်စုနောက်ဆုံးပွဲအဖြစ် အင်ဒိုနီးရှားအသင်းနဲ့ ယှဉ်ပြိုင်ရမှာဖြစ်ပါတယ်။

CNI Sport News
၂၀၂၅ ခုနှစ်၊ နိုဝင်ဘာ ၃၀

မြန်မာအသင်းဟာ ၂၀၂၆ AFC ယူ-၁၇ အာရှဖလား ခြေစစ်ပွဲ အုပ်စုနောက်ဆုံးပွဲစဉ်မှာ ဆီးရီးယားအသင်းနဲ့ ၂ ဂိုးစီ သရေကျပြီး ခြေစစ်ပွဲ အောင်မြင်သွားခဲ့ပါတယ်။ 

မြန်မာအသင်းဟာ ဒီပွဲမတိုင်မီ ကစားခဲ့တဲ့ ခြေစစ်ပွဲအုပ်စုပွဲစဉ် ၃ ပွဲစလုံး ရာနှုန်းပြည့် နိုင်ပွဲရရှိထားတာကြောင့် ဒီပွဲမှာ အနိမ့်ဆုံး သရေတစ်မှတ် ရရှိတာနဲ့ ခြေစစ်ပွဲ အောင်မြင်မှာပါ။

အဲ့ဒါကြောင့် မြန်မာအသင်းဟာ ဆီးရီးယားအသင်းနဲ့ ပွဲစဉ်မှာ ရလဒ်ကောင်းရရှိဖို့ ကြိုးစားခဲ့ပြီး လိုအပ်နေတဲ့ သရေတစ်မှတ် ရရှိခဲ့တဲ့အတွက် ယူ-၁၇ အာရှဖလား ခြေစစ်ပွဲ အောင်မြင်ခဲ့ပါတယ်။ 

မြန်မာအသင်းဟာ ၂၀၀၆ ပြိုင်ပွဲနောက်ပိုင်း ယူ-၁၇ အာရှဖလားပြိုင်ပွဲကို ပထမဆုံးအကြိမ် ပြန်လည်ယှဉ်ပြိုင်ခွင့် ရခဲ့တာဖြစ်ပြီး အခုတစ်ကြိမ် အပါအဝင် ယူ-၁၇ အာရှဖလားပြိုင်ပွဲကို ၅ ကြိမ်မြောက်အဖြစ် ဝင်ရောက်ယှဉ်ပြိုင်မှာပါ။ 

၂၀၂၆ ယူ-၁၇ အာရှဖလားပြိုင်ပွဲကို မေလ ၇ ရက်ကနေ ၂၄ ရက်အထိ ဆော်ဒီနိုင်ငံမှာ ကျင်းပသွားမှာဖြစ်ပါတယ်။

CNI Sport News
၂၀၂၅ ခုနှစ်၊ နိုဝင်ဘာ ၂

စပိန်ကစားသမားဟောင်း ပက်ဒရိုက သူဟာ ဒီရာသီကုန်ရင် လာဇီယို အသင်းကနေ ထွက်ခွာမှာ ဖြစ်ပေမယ့် ပရော်ဖက်ရှင်နယ် ဘောလုံးသမား ဘဝကနေ အနားယူဖို့ အဆင်သင့် မဖြစ်သေးဘူးလို့ ပြောခဲ့ပါတယ်။ 

ပက်ဒရိုက “ဒီရာသီက လာဇီယိုမှာ ကျနော့်ရဲ့ နောက်ဆုံးရာသီ ဖြစ်လာပါလိမ့်မယ်။ အသင်းကို ဥရောပဝင်ခွင့်နဲ့ အဆုံးသတ်နိုင်အောင် ကျနော် အရာအားလုံးပေးပြီး အစွမ်းကုန် ကူညီသွားမှာပါ။ နှစ်တွေ တစ်လျှောက် ကျနော် ရခဲ့တဲ့ အားပေးမှုနဲ့ လေးစားမှုတွေ အားလုံးအတွက် ကျေးဇူးတင်ပါတယ်။ နောက်ဆုံးအချိန်အထိ အကောင်းဆုံး ကြိုးစားသွားမှာဖြစ်ပြီး ကိုပါအီတာလီယာကလည်း ဥရောပကိုသွားဖို့ နောက်ထပ် လမ်းကြောင်းတစ်ခုကို ပေးပါတယ်”လို့ Sky Sports Italia ကို ပြောခဲ့တာပါ။ 

စပိန်အသင်းနဲ့ ၂၀၁၀ ကမ္ဘာ့ဖလား၊ ယူရို ၂၀၁၂ ချန်ပီယံဆုတို့ကို ရယူနိုင်ခဲ့တဲ့ ပက်ဒရိုဟာ ပီဆာအသင်းနဲ့ ဂိုးမရှိ သရေကျခဲ့တဲ့ စီးရီးအေပွဲစဉ်အပြီးမှာ သူ့ရဲ့ဆုံးဖြတ်ချက်ကို ထုတ်ဖော်ခဲ့တာဖြစ်ပြီး လာဇီယိုအသင်းကို ဥရောပ ဝင်ခွင့်ရရှိအောင် ကူညီပေးပြီး နှုတ်ဆက်ချင်တယ်လို့ ပြောခဲ့ပါတယ်။

အသက် ၃၈ နှစ်အရွယ်ရှိ ပက်ဒရိုနဲ့ လာဇီယိုအသင်းတို့ရဲ့ စာချုပ်ဟာ ၂၀၂၆ ခုနှစ်၊ ဇွန်လဆိုရင် ကုန်ဆုံးမှာပါ။ 

ပက်ဒရိုဟာ လာဇီယိုအသင်းကို ၂၀၂၁ ခုနှစ်မှာ မြို့ခံပြိုင်ဘက် ရိုးမားအသင်းကနေ ပြောင်းရွှေ့လာခဲ့တာ ဖြစ်ပါတယ်။ 

ပက်ဒရိုဟာ လာဇီယိုအသင်းအတွက် ၁၈၂ ပွဲ ကစားထားပြီး ၃၄ ဂိုး သွင်းယူထားကာ ဒီရာသီမှာတော့ ဂိုးသွင်းယူနိုင်ခြင်း မရှိသေးပါဘူး။

ဘာစီလိုနာနဲ့ ချယ်လ်ဆီးအသင်းတွေမှာ ကစားခဲ့တဲ့ ပက်ဒရိုဟာ ချန်ပီယံလိဂ်၊ ပရီးမီးယားလိဂ်၊ လာလီဂါ၊ ယူရိုပါလိဂ်၊ ကမ္ဘာ့ဖလားနဲ့ ယူရိုဖလား အားလုံးတို့ကို ရယူနိုင်ခဲ့တဲ့ ကစားသမား အနည်းငယ်ထဲက တစ်ဦးလည်း ဖြစ်တာပါ။ 

ပက်ဒရိုက သူနောက်ထပ် ဘယ်လောက်ကြာကြာ ထပ်ပြီး ကစားဦးမလဲဆိုတာ ပြောဖို့ ခက်ခဲပြီး အမြဲတမ်း လေ့ကျင့်မှုတွေ ပြုလုပ်နေပေမယ့် အနားယူရမယ့် အချိန်နဲ့ နီးကပ်လာပြီလို့ ပြောခဲ့ပါတယ်။ 

Source: besoccer