CNI Sport News

၂၀၂၂ ခုနှစ်၊ မေ ၁၈

မြန်မာဘိလိယက် ကစားသမား ပေါက်စဟာ စင်ကာပူနိုင်ငံသား ပီတာဂေးခရစ်ရဲ့ ဆီးဂိမ်းပြိုင်ပွဲ ရှုံးပွဲမရှိ စံချိန်ကို ရပ်တန့်နိုင်ခဲ့တယ်လို့ CNA သတင်းဌာနက ဖော်ပြထားပါတယ်။

အမျိုးသား English Billiard တစ်ဦးချင်းပြိုင်ပွဲ ဗိုလ်လုပွဲမှာ ပေါက်စဟာ ပီတာဂေးခရစ်ကို ၃ ပွဲ-၁ ပွဲအနိုင်ရပြီး မြန်မာနိုင်ငံအတွက် ရွှေတံဆိပ်ဆုကို ရယူပေးနိုင်ခဲ့တာပါ။ပီတာဂေးခရစ်ဟာ ကမ္ဘာ့ဘိလိယက်ချန်ပီယံရှစ်ပြိုင်ပွဲ မှာ ရွှေတံဆိပ် ၆ ဆုနဲ့ ဆီးဂိမ်းပြိုင်ပွဲမှာ ရွှေတံဆိပ် ၆ ဆု ရယူထားနိုင်ခဲ့တာဖြစ်ပါတယ်။ပီတာဂေးခရစ်ဟာ ၂၀၀၉ ပြိုင်ပွဲကတည်းက ရှုံးပွဲမရှိ ချန်ပီယံဆုကို ရယူနိုင်ခဲ့ပေမယ့် မြန်မာနိုင်ငံသား ပေါက်စနဲ့အတွေ့မှာ အလွန် ကောင်းမွန်တဲ့ စံချိန်မှတ်တမ်းကောင်းကြီး ရပ်တန့်သွားခဲ့ရတာပါ။

ပီတာဂေးခရစ်က “ ရှုံးပွဲကတော့ စိတ်ပျက်စရာကောင်းပါတယ်။ဒါပေမယ့် ကျနော် ကောင်းမွန်တဲ့ နိုင်ပွဲတွေ အများကြီး ရထားပြီးပါပြီ။ဒါကြောင့် အရမ်းစိတ်ပျက်လို့မရပါဘူး။လောဘကြီးလို့လည်း မရပါဘူး” လို့ သတင်းထောက်တွေကို ပြောခဲ့တာဖြစ်ပါတယ်။

ပေါက်စဟာ မြန်မာနိုင်ငံအတွက် ဗီယက်နမ် ဆိးဂိမ်းပြိုင်ပွဲမှာ ၅ ခုမြောက် ရွှေတံဆိပ်ကို ရယူပေးနိုင်ခဲ့တာပါ။ နိုင်ငံတော်ကလည်း ဆီးဂိမ်းပြိုင်ပွဲမှာ နိုင်ငံအတွက် ရွှေတံဆိပ်ရယူပေးခဲ့တဲ့ ပေါက်စကို အမေရိကန် ဒေါ်လာ ၃၀၀၀ ပေးအပ်ချီးမြှင့်ခဲ့တာဖြစ်ပါတယ်။

ဘီလိယက် ကစားသမား ပေါက်စ အပါအဝင် မြန်မာနိုငံအတွက် ရွှေတံဆိပ်ဆု ရယူပေးနိုင်တဲ့ သူတွေကတော့ Kurash အားကစားနည်းက မအေးအေးအောင်၊ပီတန်း အားကစားနည်းက ခင်ချယ်ရီသက်၊ဝူရှူး အားကစားနည်း က သိန်းသန်းဦး၊ကာယဗလ အားကစားနည်းက ရဲထွန်းနောင်တို့ ဖြစ်တာပါ။မြန်မာအားကစားအဖွဲ့ဟာ မေလ ၁၈ ရက် နေ့လည်အချိန်အထိ ရွှေ ၅ ခု၊ ငွေ ၆ ခု၊ ကြေး ၁၁ ခု စုစုပေါင်း ၂၂ ခု နဲ့ နိုင်ငံအလိုက် အဆင့် ၇ နေရာမှာ ရပ်တည်နေတာဖြစ်ပါတယ်။

Source:Channelnewsasia

CNI Sport News

၂၀၂၂ ခုနှစ်၊ မေလ ၁၆

ဆီးဂိမ်းစ်ပြိုင်ပွဲ ဆီမီးဖိုင်နယ် တက်ရောက်နိုင်ခဲ့တဲ့ မြန်မာအမျိုးသမီးဘောလုံး အသင်းကို နိုင်ငံတော်က အမေရိကန်ဒေါ်လာ ၁ သိန်း ထပ်ဆောင်းချီးမြှင့်ခဲ့တယ်လို့ သိရပါတယ်။

မြန်မာနိုင်ငံ အိုလံပစ်ကော်မတီ ဥက္ကဋ္ဌ အားကစား နှင့် လူငယ်ရေးရာ ဝန်ကြီးဌာန ပြည်ထောင်စုဝန်ကြီး ဦးမင်းသိန်းဇံ က မြန်မာအမျိုးသမီး အသင်း တည်းခိုရာ ဟိုတယ်ကို လာရောက်ပြီး နိုင်ငံတော်က ထပ်ဆောင်းချီးမြှင့်တဲ့ အမေရိကန်ဒေါ်လာ ၁ သိန်းကို ပေးအပ်ချီးမြှင့်ခဲ့တာပါ။မြန်မာအသင်းဟာ ဆီးဂိမ်းစ်အမျိုးသမီး ဘောလုံးပြိုင်ပွဲ ဆီမီးဖိုင်နယ် ပွဲစဉ်အဖြစ် အိမ်ရှင် ဗီယက်နမ် အသင်းနဲ့ ယှဉ်ပြိုင်ရမှာ ဖြစ်ပါတယ်။

မြန်မာအမျိုးသမီးဘောလုံး အသင်းဟာ အုပ်စုနောက်ဆုံး ပွဲစဉ်အဖြစ် မေလ ၁၅ ရက်က စင်ကာပူ အသင်းနဲ့ ကစားခဲ့တာမှာ ၁ ဂိုး- ဂိုး မရှိနဲ့ အနိုင်ရရှိခဲ့တာပါ။ မြန်မာ အသင်းဟာ ဒီပွဲချိန် တစ်လျှောက်လုံး စင်ကာပူ အသင်းဘက်ကို ဖိအားပေး တိုက်စစ်ဆင် ခဲ့ပေ မယ့် အဆုံးသတ်ပိုင်း အားနည်းခဲ့တဲ့အတွက် မိနစ် ၉၀ ပြည့်ပြီး နာကျင်အချိန်ပို ရောက်မှသာ အဖိုးတန် အနိုင်ဂိုး ရရှိခဲ့တာ ဖြစ်ပါတယ်။ မြန်မာ အသင်းအတွက် အနိုင်ဂိုးကို ဝင်းသိင်္ဂီထွန်းက သွင်းယူခဲ့တာပါ။

မြန်မာ အသင်းဟာ ဒီပွဲ အနိုင်ရခဲ့တဲ့အတွက် အုပ်စုထိပ်ဆုံးနေရာက ထိုင်းအသင်းနဲ့ ရမှတ်တူ ဂိုးကွာခြား ချက်ကြောင့် ဒုတိယ နဲ့ ဆီမီးဖိုင်နယ် တက်နိုင်ခဲ့တာ ဖြစ်ပါတယ်။ မြန်မာ အသင်းဟာ အုပ်စု ဒုတိယရခဲ့တဲ့အတွက် တစ်ဖက်အုပ်စုက ထိပ်ဆုံး နေရာမှာ ရပ်တည်ခဲ့တဲ့ အိမ်ရှင် ဗီယက်နမ်နဲ့ ဆီမီးဖိုင်နယ်မှာ တွေ့ဆုံရမှာပါ။

မြန်မာအမျိုးသမီးအသင်းကိုတွေ့ရစဉ်(MFF)

နောက်ထပ် ဆီမီးဖိုင်နယ် ပွဲစဉ်တစ်ပွဲအဖြစ် ထိုင်းအသင်းနဲ့ ဖိလစ်ပိုင် အသင်းတို့ ယှဉ်ပြိုင်ရမှာ ဖြစ်ပါတယ်။

မြန်မာအမျိုးသမီးဘောလုံး အသင်းနည်းပြချုပ် ဦးတင်မြင့်အောင်က “ စင်ကာပူ အသင်းက ခံစစ် ဦးစားပေး ကစားခဲ့သလို ကျနော်တို့ အသင်း တိုက်စစ်သွားတဲ့ နေရာမှာလည်း အားနည်းချက်တွေရှိခဲ့လို့ ဂိုးရဖို့အတွက် ခက်ခဲခဲ့ပါတယ်။ ဘာပဲဖြစ်ဖြစ် အနိုင် ရလဒ်ရတဲ့အထိ ကြိုးစားခဲ့လို့ ကစားသမားတွေကို ချီးကျူးချင်ပါတယ်။ ဆီမီးဖိုင်နယ် ပွဲအဆင့်မှာ အကောင်းဆုံး ယှဉ်ပြိုင် သွားမှာပါ” လို့ ပြောခဲ့တာပါ။

ဆီမီးဖိုင်နယ် ပွဲစဉ်တွေကို မေလ ၁၈ ရက်မှာ ကျင်းပသွားမှာ ဖြစ်ပါတယ်။ ဗီယက်နမ် အသင်းနဲ့ မြန်မာ အသင်းတို့ဟာ ပြီးခဲ့တဲ့ ဇန်နဝါရီလက အမျိုးသမီး အာရှဖလားပြိုင်ပွဲရဲ့ အုပ်စုအဆင့်မှာ တွေ့ခဲ့ကြပြီး အဲ့ဒီတုန်းက ၂ ဂိုးစီ သရေကျခဲ့တာပါ။

မြန်မာ အမျိုးသမီး အသင်းဟာ နောက်ဆုံး ယှဉ်ပြိုင်ခဲ့တဲ့ ဆီးဂိမ်းစ် ပြိုင်ပွဲ (၅)ကြိမ်လုံး ကြေးတံဆိပ် ဆုတွေနဲ့သာ ကျေနပ်ခဲ့ ရတာ ဖြစ်ပါတယ်။

CNI Sport News

 ၂၀၂၂ ခုနှစ်၊ မေလ ၁၅

ဗီယက်နမ်နိုင်ငံမှာ ကျင်းပနေတဲ့ (၃၁)ကြိမ်မြောက် ဆီးဂိမ်းစ်ပြိုင်ပွဲမှာ မြန်မာ အားကစားအဖွဲ့ဟာ ရွှေတံဆိပ် ၄ ခုအထိ ရယူ ထားနိုင်ခဲ့ပြီ ဖြစ်ပါတယ်။

မြန်မာအားကစားအဖွဲ့ဟာ မေလ ၁၄ ရက်ထိ ရွှေတံဆိပ် ၃ ခု ရယူထား နိုင်ခဲ့တာဖြစ်ပြီး ယနေ့(မေလ ၁၅ ရက်) မနက်ပိုင်းမှာ နောက်ထပ် ရွှေတံဆိပ်တစ်ခု ထပ်မံရယူနိုင်ခဲ့တာပါ။ မေလ ၁၅ ရက် မနက်ပိုင်းက ယှဉ်ပြိုင်ခဲ့တဲ့  ဝူရှူး ထောက်လု(နန်းချွန်) ပြိုင်ပွဲမှာ သိန်းသန်းဦးက ရွှေတံဆိပ် ရယူနိုင်ခဲ့တာ ဖြစ်ပါတယ်။

ကာယအလှအားကစားပြိုင်ပွဲကနေ ရွှေတံဆိပ်ဆုရခဲ့တဲ့ ရဲထွန်းနောင်

မြန်မာနိုင်ငံအတွက် ရွှေတံဆိပ် ရယူပေးထားတဲ့ သူတွေကတော့ ကာယဗလ ကာယအလှအားကစားပြိုင်ပွဲက ရဲထွန်းနောင်၊ ပီတန်း အားကစားမယ် ခင်ချယ်ရီသက်နဲ့ Kurash အားကစားမယ် အေးအေးအောင်တို့ ဖြစ်ပါတယ်။

ပီတန်း အားကစားပြိုင်ပွဲကနေ ရွှေတံဆိပ်ဆုရခဲ့သူ ခင်ချယ်ရီသက်

မြန်မာအားကစားအဖွဲ့ဟာ လက်ရှိအချိန်ထိ ရွှေတံဆိပ် ၄ ခု၊ ငွေတံဆိပ် ၄ ခု၊ ကြေးတံဆိပ် ၉ ခု စုစုပေါင်း ၁၇ ခု ရရှိထားတာ ဖြစ်ပါတယ်။

 Kurash အားကစားပြိုင်ပွဲကနေ ရွှေတံဆိပ်ဆုရခဲ့သူ အေးအေးအောင်

CNI Sport News

၂၀၂၂ ခုနှစ်၊ မေလ ၁၄

မြန်မာယူ-၂၃ အသင်းနည်းပြချုပ် ပိုပေါ့ဗ် က ဆီးဂိမ်းစ်ပြိုင်ပွဲမှာ ဆီမီးဖိုင်နယ် တက်ဖို့အတွက် အင်ဒိုနီးရှားနဲ့ပွဲမှာ အကောင်းဆုံး ထပ်ကြိုးစားသွားဖို့ပဲ ရှိတယ်လို့ ပြောလိုက်ပါတယ်။

မြန်မာ အသင်းဟာ ဆီးဂိမ်းစ်ပြိုင်ပွဲ အုပ်စု တတိယပွဲစဉ်အဖြစ် အိမ်ရှင် ဗီယက်နမ် အသင်းနဲ့ ကစားခဲ့တာမှာ ၁ ဂိုး- ဂိုး မရှိနဲ့ အရေးနိမ့် သွားခဲ့တာပါ။ မြန်မာ အသင်းဟာ ဒီပွဲမှာ ကစားကွက် အနည်းငယ် အပြောင်းအလဲလုပ်ပြီး နောက်တန်း ၅ ယောက် ပုံစံနဲ့ ဗီယက်နမ် အသင်းကို ထိန်းချုပ်ဖို့ ကြိုးစားခဲ့တာ ဖြစ်ပါတယ်။

ပထမပိုင်းမှာ ဂိုးမရှိ သရေကျခဲ့တဲ့အတွက် ဒုတိယပိုင်းမှာ ဗီယက်နမ် အသင်းဟာ ဂိုးရဖို့ ပိုပြီးတိုက်စစ် ဆင်လာခဲ့တာပါ။ အဲ့ဒါ ကြောင့် ပွဲချိန် ၇၆ မိနစ်မှာ ဗီယက်နမ်အသင်း အနိုင်ဂိုးရခဲ့ပြီး ဒိုဟွန်ဒေါင်က သွင်းယူသွားခဲ့တာ ဖြစ်ပါတယ်။

မြန်မာ အသင်းဟာ ချေပဂိုးရဖို့ ကြိုးစားခဲ့ပေမယ့် ဂိုးမသွင်း နိုင်ခဲ့တဲ့အတွက် ပွဲအပြီးမှာ ၁ ဂိုး- ဂိုး မရှိနဲ့ အရေးနိမ့် သွားခဲ့တာ ပါ။

မြန်မာအသင်းနည်းပြ ပိုပေါ့ဗ်(MFF)

မြန်မာ အသင်းနည်းပြချုပ် ပိုပေါ့ဗ် က “ ပြိုင်ပွဲရဲ့ အတောင့်တင်းဆုံး အသင်းဖြစ်တဲ့ အိမ်ရှင် ဗီယက်နမ်နဲ့ တွေ့ဆုံတဲ့ပွဲမှာ ပွဲချိန်ပြည့် အကောင်းဆုံး ယှဉ်ပြိုင်ကစားနိုင်ခဲ့တဲ့အတွက် ကစားသမားတွေ အားလုံးကို ချီးကျူးချင်ပါတယ်။ ပွဲမတိုင်ခင် ချမှတ် ထားတဲ့ နည်းဗျူဟာနဲ့အတိုင်း ကစားနိုင်ခဲ့လို့ ကျေနပ်ပါတယ်။ တစ်ပွဲလုံးမှာ အမှား နှစ်ကြိမ်ပဲ လုပ်ခဲ့ပြီး တစ်ဂိုးပေး လိုက်ရပါ တယ်။ အုပ်စုနောက်ဆုံး ပွဲစဉ်ဖြစ်တဲ့ အင်ဒိုနီးရှားနဲ့ပွဲမှာ အကောင်းဆုံး ထပ်ကြိုးစားသွားဖို့ပဲ ရှိပါတယ်။ ဆီမီးဖိုင်နယ်ကို ထိုက်ထိုက်တန်တန် တက်ရောက်နိုင်အောင် အကောင်းဆုံး ပြင်ဆင်ပြီး ရလဒ်ကောင်း ရရှိအောင် ကြိုးစားသွားမှာပါ”လို့ ပွဲအပြီးမှာ ပြောခဲ့တာ ဖြစ်ပါတယ်။

မြန်မာ အသင်းဟာ ဒီပွဲ အရှုံးကြောင့် အုပ်စုပွဲစဉ် ၃ ပွဲ ကစားပြီးချိန်မှာ ရမှတ် ၆ မှတ်နဲ့ တတိယနေရာမှာ ရပ်တည်နေတာပါ။ အိမ်ရှင် ဗီယက်နမ် အသင်းက ရမှတ် ၇ မှတ်နဲ့ ထိပ်ဆုံး ၊ အင်ဒိုနီးရှား အသင်းက ရမှတ် ၆ မှတ် ဂိုး ကွာခြားချက် အသာနဲ့ ဒုတိယနေရာမှာ ရပ်တည်နေတာ ဖြစ်ပါတယ်။

မြန်မာ အသင်းဟာ အုပ်စု နောက်ဆုံး ပွဲစဉ်အဖြစ် မေလ ၁၅ ရက်မှာ အင်ဒိုနီးရှား အသင်းနဲ့ ယှဉ်ပြိုင်ရမှာပါ။ ဒီပွဲဟာ နှစ်သင်း လုံးအတွက် ဆီမီးဖိုင်နယ်တက်ဖို့ အဆုံးအဖြတ် ပွဲစဉ်လည်း ဖြစ်ပါတယ်။ မြန်မာ အသင်းအနေနဲ့ နောက်တစ်ဆင့် တက်ဖို့ဆို ရင် ဒီပွဲကို မဖြစ်မနေ အနိုင်ရဖို့ လိုအပ်နေတာပါ။ အိမ်ရှင် ဗီယက်နမ် အသင်းကတော့ တီမော အသင်းနဲ့ ကစားရမှာ ဖြစ်လို့ နောက်တစ်ဆင့်တက်ဖို့ သေချာနေတာလည်း ဖြစ်ပါတယ်။

CNI Sport News

၂၀၂၂ ခုနှစ်၊ မေလ ၁၃

ဆီးဂိမ်းစ် ဘောလုံးပြိုင်ပွဲ အုပ်စုပွဲစဉ်တွေအဖြစ် မြန်မာ အမျိုးသားအသင်းနဲ့ အမျိုးသမီး အသင်းတို့ဟာ တစ်ချိန်တည်း ယှဉ်ပြိုင် ကစားသွားခဲ့ ကြပါတယ်။

မြန်မာ အမျိုးသား အသင်းဟာ အိမ်ရှင် ဗီယက်နမ်အသင်းနဲ့ ကစားခဲ့တာမှာ ၁ ဂိုး- ဂိုး မရှိနဲ့ အရေးနိမ့် သွားခဲ့တာပါ။ ပထမပိုင်း တစ်ပိုင်းလုံး ဂိုးမရှိ သရေကစားခဲ့ပေမယ့် ဒုတိယပိုင်း မိနစ် ၇၀ ကျော်မှာ ပေးခဲ့ရတဲ့ ဂိုးကြောင့် အရေးနိမ့် သွားခဲ့တာ ဖြစ်ပါ တယ်။

မြန်မာ အသင်းဟာ ဒီပွဲအရှုံးကြောင့် အုပ်စုတွင်း တတိယနေရာကို ရောက်ရှိသွားခဲ့ပြီး နောက်တစ်ဆင့် တက်ဖို့အတွက် အုပ်စု နောက်ဆုံး ပွဲစဉ်ဖြစ်တဲ့ အင်ဒိုနီးရှားနဲ့ပွဲမှာ မဖြစ်မနေ အနိုင်ရဖို့ လိုအပ်နေပြီ ဖြစ်ပါတယ်။

ထိုင်းအမျိုးသမီးအသင်းနဲ့ မြန်မာအမျိုးသမီးအသင်း ယှဉ်ပြိုင်စဉ်

တခြားတစ်ဖက်မှာလည်း မြန်မာ အမျိုးသမီး အသင်းကတော့ ထိုင်း အသင်းနဲ့ ၁ ဂိုးစီ သရေကျ သွားခဲ့ပါတယ်။ မြန်မာ အမျိုးသမီးအသင်းဟာ ပထမပိုင်းမှာ ၁ ဂိုး- ဂိုး မရှိနဲ့ အရေးနိမ့်နေခဲ့ပေမယ့် ဒုတိယပိုင်းမှာ ချေပဂိုး ပြန်သွင်းနိုင်ခဲ့တဲ့အတွက် ပွဲအပြီးမှာ သရေကျသွားခဲ့တာ ဖြစ်ပါတယ်။

မြန်မာအမျိုးသမီး အသင်းဟာ အုပ်စုတွင်း ၂ ပွဲကစားပြီးချိန်မှာ ထိုင်းအသင်းနဲ့အတူ ရမှတ် ၄ မှတ် ရရှိထားတာ ဖြစ်ပါတယ်။

CNI Sport News

၂၀၂၂ ခုနှစ်၊ မေလ ၁၁

လက်ရှိ ကျင်းပနေတဲ့ ဆီးဂိမ်းစ်ပြိုင်ပွဲမှာ မြန်မာနိုင်ငံအတွက် ပထမဆုံး ရွှေတံဆိပ်ဆုကို Kurash အားကစားနည်းကနေ ရရှိသွားခဲ့ပြီ ဖြစ်ပါတယ်။

မအေးအေးအောင် Kurash အားကစားနည်း ယှဉ်ပြိုင်နေစဉ်

အမျိုးသမီး 87Kg မှာ မအေးအေးအောင်က မြန်မာနိုင်ငံအတွက် ရွှေတံဆိပ် ရယူပေးနိုင်ခဲ့တာပါ။ ဆီးဂိမ်းစ်ပြိုင်ပွဲမှာ မြန်မာ အားကစားအဖွဲ့ဟာ လက်ရှိအချိန်မှာ ရွှေ(၁)ခု၊ ကြေးတံဆိပ်(၁) ခုရယူနိုင်ခဲ့ပြီ ဖြစ်ပါတယ်။ ဒီဆုတံဆိပ် (၂) ခုလုံးကို Kurash အားကစားနည်းကနေ ရရှိခဲ့တာ ဖြစ်ပါတယ်။
ကြေးတံဆိပ်ဆုကိုတော့ မခင်ခင်စုက ရယူနိုင်ခဲ့တာပဲ ဖြစ်ပါတယ်။

CNI Sport News

၂၀၂၂ ခုနှစ်၊ မေလ ၁၁

ဗီယက်နမ်မှာ ကျင်းပနေပြီဖြစ်တဲ့ ၂၀၂၁ ဆီးဂိမ်းစ်ပြိုင်ပွဲမှာ မြန်မာနိုင်ငံအတွက် ပထမဆုံး ဆုတံဆိပ်ကို Kurash အားကစား နည်းကနေ စတင်ရရှိခဲ့ပြီ ဖြစ်ပါတယ်။

မေလ ၁၀ ရက်က ကျင်းပခဲ့တဲ့ Kurash အားကစားနည်းရဲ့ 48kg ပြိုင်ပွဲမှာ ခင်ခင်စုက ကြေးတံဆိပ် ရယူပေးနိုင်ခဲ့တာပါ။ ဒီပြိုင်ပွဲမှာ အိမ်ရှင် ဗီယက်နမ်က ရွှေတံဆိပ်၊ ဖိလစ်ပိုင်က ငွေတံဆိပ် ရယူနိုင်ခဲ့တာ ဖြစ်ပါတယ်။

52kg ပြိုင်ပွဲမှာ အိအိဝင်းက မြန်မာနိုင်ငံ ကိုယ်စားပြုအဖြစ် ဝင်ရောက် ယှဉ်ပြိုင်ခဲ့ပေမယ့် ဆုတံဆိပ် မရရှိခဲ့ပါဘူး။ မေလ ၁၀ ရက်က ယှဉ်ပြိုင်ခဲ့တဲ့ Kurash အားကစားနည်းမှာ အိမ်ရှင် ဗီယက်နမ်က ရွှေတံဆိပ် ၄ ခု၊ ငွေတံဆိပ် ၃ ခု ရယူနိုင်ခဲ့တာ ဖြစ်ပါတယ်။

ဗီယက်နမ် ဆီးဂိမ်းစ်ပြိုင်ပွဲမှာ Kurash အားကစားနည်းကနေ မြန်မာနိုင်ငံအတွက် အမျိုးသား ၄ ဦးနဲ့ အမျိုးသမီး ၄ ဦး ဝင်ရောက် ယှဉ်ပြိုင်နေတာပါ။ ကျင်းပနေတဲ့ ဆီးဂိမ်းစ်ပြိုင်ပွဲဟာ မေလ ၂၃ ရက်မှာ ပြီးဆုံးမှာ ဖြစ်ပါတယ်။ ဒီပြိုင်ပွဲကို မြန်မာနိုင်ငံ ကိုယ်စားပြုအဖြစ် အားကစားသမား ၂၉၃ ဦးက အားကစားနည်း ၂၀ မှာ ဝင်ရောက် ယှဉ်ပြိုင်ကြမှာ ဖြစ်ပါတယ်။

နိုင်ငံတကာက ကစားသမားများနဲ့အတူ ဆုတံဆိပ်ရယူနေတဲ့ ခင်ခင်စု

မေလ ၁၀ ရက်နေ့ထိ ယှဉ်ပြိုင်ခဲ့တဲ့ ဆီးဂိမ်းစ် အားကစားပွဲတွေ အပြီးမှာ မလေးရှားက ရွှေ ၇ ခု၊ ငွေ ၂ ခု၊ ကြေး ၅ ခု စုစုပေါင်း ၁၄ ခုနဲ့ နိုင်ငံအလိုက် အဆင့် ၁ နေရာမှာ ရပ်တည်နေတာပါ။

အိမ်ရှင် ဗီယက်နမ်က ရွှေ ၆ ခု၊ ငွေ ၅ ခု၊ ကြေး ၃ ခု စုစုပေါင်း ၁၄ ခုနဲ့ ဒုတိယ၊ စင်ကာပူ၊ ဖိလစ်ပိုင်၊ အင်ဒိုနီးရှားတို့က ရွှေ တံဆိပ် ၁ ခုစီနဲ့ နိုင်ငံအလိုက် အဆင့် ၃ ၊ ၄ နဲ့ ၅ နေရာမှာ ရပ်တည်နေတာ ဖြစ်ပါတယ်။ ထိုင်းက အဆင့် ၆ ၊ မြန်မာက အဆင့် ၇ နေရာမှာ ရပ်တည်နေတာ ဖြစ်ပါတယ်။

CNI Sport News

၂၀၂၂ ခုနှစ်၊ မေလ ၉

မြန်မာနေရှင်နယ်လိဂ် ကလပ်အသင်းဖြစ်တဲ့ ရန်ကုန်ယူနိုက်တက် အသင်းဟာ လေ့ကျင့်ရေး အစီအစဉ်တွေကို မေလ ၉ ရက် မနက်ပိုင်းက ပြန်လည် စတင်ခဲ့တယ်လို့ အသင်းရဲ့ ဖေ့စ်ဘွတ်ခ် စာမျက်နှာကနေ ထုတ်ပြန်လိုက်ပါတယ်။

လာမယ့် ပြိုင်ပွဲတွေ ယှဉ်ပြိုင်ဖို့အတွက် ကြိုတင်လေ့ကျင့်မှုတွေကို ရန်ကုန်ယူနိုက်တက်အသင်း အိမ်ကွင်းမှာ စတင် ပြုလုပ်ခဲ့ တာပါ။ ကာလ အတန်ကြာ ရပ်နားထားတဲ့ လေ့ကျင့်ရေး အစီအစဉ်တွေကို စုစုပေါင်း ကစားသမား ၂၆ ဦးနဲ့ စတင် လေ့ကျင့် သွားမှာ ဖြစ်ပါတယ်။

မြန်မာ့လက်ရွေးစင် အသင်းကြီးနဲ့ ယူ-၂၃ အတွက် ပေးထားတဲ့ ကစားသမား ၇ ဦးကလွဲပြီး ကစားသမားသမား ၁၉ ဦးနဲ့ လေ့ကျင့်မှုတွေကို စတင်ခဲ့တာပါ။

ရန်ကုန်ယူနိုက်တက် အသင်းကို နည်းပြချုပ်အဖြစ် ဦးမင်းထွန်းလင်းက တာဝန်ယူသွားမှာ ဖြစ်ပါတယ်။ မြန်မာနေရှင်နယ် လိဂ် ပြိုင်ပွဲကို ၂၀၂၀ ခုနှစ်က နောက်ဆုံး ကျင်းပခဲ့တာဖြစ်ပြီး အဲ့ဒီနောက်ပိုင်း အခုအချိန်ထိ ပြန်လည် ကျင်းပနိုင်ခြင်း မရှိ သေးတာလည်း ဖြစ်ပါတယ်။

နောက်ဆုံး ကျင်းပခဲ့တဲ့ ပြိုင်ပွဲမှာ ရှမ်းယူနိုက်တက် အသင်းက ချန်ပီယံဆုကို ရယူနိုင်ခဲ့တာပါ။

လေ့ကျင့်ခန်း ဆင်းနေတဲ့ ရန်ကုန်ယူနိုက်တက်အသင်း (YUFC)

၂၀၀၉ က စတင်ကျင်းပခဲ့တဲ့ မြန်မာ နေရှင်နယ်လိဂ် ပြိုင်ပွဲမှာ ရန်ကုန်ယူနိုက်တက် အသင်းက ချန်ပီယံဆု ၅ ကြိမ် ရယူ ထားပြီး အအောင်မြင်ဆုံး အသင်းအဖြစ် ရပ်တည်နေတာလည်း ဖြစ်ပါတယ်။

မြန်မာနေရှင်နယ်လိဂ် ချန်ပီယံဆုတွေကို ရတနာပုံအသင်းက ၄ ကြိမ်၊ ရှမ်းယူနိုက်တက် အသင်းက ၃ ကြိမ် ရယူ ထားခဲ့တာပါ။ ရန်ကုန်ယူနိုက်တက် အသင်းဟာ ဗိုလ်ချုပ်အောင်ဆန်း ဒိုင်းပြိုင်ပွဲမှာလည်း ချန်ပီယံဆုကို ရယူထား နိုင်ခဲ့ပါတယ်။

လက်ရှိအချိန်မှာ မြန်မာနေရှင်နယ်လိဂ် ပြိုင်ပွဲကျင်းပဖို့ မသေချာသေးတဲ့ အခြေအနေကြောင့် ကစားသမားတွေဟာ ပြည်ပ ထွက်ပြီး ကစားနိုင်ဖို့ ကြိုးစားနေကြတာပါ။ အခုနှစ်ရာသီ ထိုင်းလိဂ်ပြိုင်ပွဲမှာ အောင်သူ၊ မောင်မောင်လွင်၊ ဇော်မင်းထွန်း၊ အောင်ကောင်းမာန်၊ ဆမ်လန်မန်၊ အောင်ကျော်နိုင်နဲ့ ကျော်ကိုကိုတို့ ကစားနေပြီး မလေးရှားလိဂ်မှာ ဟိန်းထက်အောင် ကစားနေတာပါ။

ကမ္ဘောဒီးယားလိဂ်မှာတော့ ဧရာဝတီယူနိုက်တက် ကစားသမားဟောင်း သီဟဇော် သွားရောက် ကစားနေတာ ဖြစ်ပါတယ်။

CNI Sport News

၂၀၂၂ ခုနှစ်၊ မေ ၉

ဗီရူဂျီရဝမ် နာမည်နဲ့ Thai Fight မှာ ဝင်ရောက်ယှဉ်ပြိုင်နေတဲ့ ဘရော်နီကာဟာ မေလ(၈) ရက်က ထိုးသတ်ခဲ့တဲ့ ပွဲစဉ်မှာ ပြိုင်ဘက်ဖြစ်သူ အီရန်နိုင်ငံသူကို ပထမအချီမှာတင် အလဲထိုးနဲ့ အနိုင်ရရှိသွားခဲ့ တာဖြစ်ပါတယ်။

မြန်မာ့လက်ဝှေ့မယ် ကယန်းတိုင်းရင်းသူ ဘရော်နီကာရဲ့ထိုးချက်တွေကြောင့် ပြိုင်ဘက်ဖြစ်သူဟာ လဲကျသွားပြီး ဆက်မထိုးနိုင်တော့ဘဲ အလဲထိုးနဲ့ နိုင်ပွဲရရှိခဲ့တာပါ။တိုက်ဂါးမွေထိုင်းကလပ်ရဲ့ ဒါရိုက်တာဖြစ်သူ ဗီဝတ်က အလွန် ကောင်းမွန်တဲ့ စွမ်းဆောင်ရည်နဲ့ အလဲထိုးနိုင်ခဲ့တဲ့ ဘရော်နီကာကို ချီးကျုးကြောင်း သူ့ရဲ့ဖေ့စ်ဘွတ်စာမျက်နှာမှာ ရေးသားထားတာဖြစ်ပါတယ်။

ဗီဝက်က ဘရော်နီကာကို အနာဂတ် UFC မှာ ချန်ပီယံဖြစ်မယ့် မိန်းကလေးဆိုပြီး မကြာသေးခင်က ချီးကျူး ထားတာပါ။ ဘရော်နီကာကလည်း ဒါဟာ သူမရဲ့ရည်ရွယ်ချက်ဖြစ်တယ်လို့ ပြန်ပြောထားပါတယ်။ ဘရော်နီကာ ဟာ Thai Fight နဲ့ (၃) နှစ်စာချုပ်ချုပ်ဆိုထားတာဖြစ်ပြီး ဒီပြိုင်ပွဲမှာ ထိုးသတ်ထားတဲ့ ပွဲတွေအားလုံးမှာ (၁)ပွဲသာ ရှုံးနိမ့်ထားပြီး ကျန်တဲ့ ပွဲတိုင်းအနိုင်ရရှိအောင် ထိုးသတ်ထားတာဖြစ်ပါတယ်။

ဘရော်နီကာဟာ ကမ္ဘာ့မွေထိုင်းအဖွဲ့ချုပ်က ထုတ်ပြန်ထားတဲ့ အမျိုးသမီး မွေထိုင်းအဆင့်သတ်မှတ်ချက်မှာလည်း အဆင့်(၁)နေရာမှာ ရပ်တည်နေတာပါ။ဘရော်နီကာ ကိုယ်တိုင်ကလည်း သူ့ရဲ့ဝိတ်တန်းမှာ နံပတ် (၁) ဖြစ်အောင် လုပ်ချင်ပြီး ပြိုင်ဘက်ကင်း ကစားသမားတစ်ဦးဖြစ်ချင်တယ်လို့ ပြောထားတာဖြစ်ပါတယ်။ ဘရော်နီကာဟာ မြန်မာနိုင်ငံရဲ့ပထမဆုံး အမျိုးသမီး ရွှေခါးပတ်ချန်ပီယံဆုရှင်လည်း ဖြစ်တာပါ။

ကယန်းတိုင်းရင်းသူ ဘရော်နီကာဟာ (၂၀၁၅)ခုနှစ်က စင်ကာပူနိုင်ငံမှာ ကျင်းပခဲ့တဲ့ ဆီးဂိမ်းစ်ပြိုင်ပွဲမှာ မြန်မာနိုင်ငံအတွက် ဝင်ရောက်ယှဉ်ပြိုင်ခဲ့ပြီး ကြေးတံဆိပ်ဆုကို ရယူပေးနိုင်ခဲ့သူလည်းဖြစ်ပါတယ်။