CNI Sport News

၂၀၂၂ ခုနှစ်၊ စက်တင်ဘာ ၁၆

၁၉၉၈ NBA ဗိုလ်လုပွဲ အဖွင့်ပွဲစဉ်တုန်းက ဝတ်ဆင်ခဲ့တဲ့ မိုက်ကယ်ဂျော်ဒန်ရဲ့ ဂျာစီကို ကြာသပတေးနေ့က လေလံပွဲတစ်ခုမှာ ဒေါ်လာ ၁၀ သန်းကျော်နဲ့ ရောင်းချခဲ့ပါတယ်။

အဲ့ဒါကြောင့် မိုက်ကယ်ဂျော်ဒန်ရဲ့ ဂျာစီရောင်းချရမှုဟာ သမိုင်းတစ်လျှောက် ဈေးအကြီးဆုံး ဂိမ်းပွဲရဲ့ အားကစား အမှတ်တရပစ္စည်း ဖြစ်လာခဲ့ပါတယ်။

အရင်စံချိန်ကတော့ အခုနှစ် အစောပိုင်းက လေလံတင် ရောင်းချခဲ့တဲ့ မာရာဒိုနာရဲ့ Hand of God ဂျာစီဖြစ်ပြီး ဒေါ်လာ ၉.၃ သန်း တန်ကြေးရှိခဲ့တာ ဖြစ်ပါတယ်။

“ကျနော်တို့ လေလံပွဲ ကြေညာအပြီး သီတင်းပတ်အတွင်းမှာ အားကစားကို စိတ်ဝင်စားတဲ့ ပရိသတ်တွေသာမက ပဲ ရှားပါးတဲ့ သမိုင်းကြောင်းကို ပိုင်ဆိုင်ချင်ပြီး စုဆောင်းချင်တဲ့သူတွေပါ သိသိသာသာ စိတ်လှုပ်ရှားမှုတွေ ရှိလာခဲ့ ပါတယ်။ ဒီနေ့မှာဆိုရင်တော့ စံချိန်ချိုးပြီး စံချိန်သစ် တင်လိုက်ပါပြီ။ မိုက်ကယ်ဂျော်ဒန်ဟာ အငြင်းပွားဖွယ် မရှိတဲ့ အကောင်းဆုံး သူဖြစ်တယ်ဆိုတာကို ခိုင်မာစေပါတယ်။ သူ့နာမည်နဲ့ တုနှိုင်းလို့မရတဲ့ အမွေအနှစ်ကို သက်သေပြ တာက လွန်ခဲ့တဲ့ ၂၅ နှစ် နီးပါးလိုပါပဲ”လို့ Sotheby လေလံအကြီးအကဲ ဘရာဟမ်က ပြောပါတယ်။

မိုက်ကယ်ဂျော်ဒန်ကိုတွေ့ရစဉ် (NBC Sports)

မိုက်ကယ်ဂျော်ဒန်ဟာ ၁၉၉၈ က သူ့အတွက် ၆ ကြိမ်မြောက်နဲ့ နောက်ဆုံး NBA ချန်ပီယံဆုဖြစ်ပြီး Netflix မှတ်တမ်းရုပ်ရှင် The Last Dance မှာ မှတ်တမ်း တင်ထားတာ ဖြစ်ပါတယ်။

မိုက်ကယ်ဂျော်ဒန်ရဲ့ ချီကာဂိုဘူးလ်ဂျာစီကို လေလံဆွဲမှု အကြိမ် ၂၀ အထိ ရှိခဲ့တယ်လို့ သိရပါတယ်။ မိုက်ကယ် ဂျော်ဒန်ဟာ ၁၉၉၃ ကနေ ၁၉၉၄ မှာ ပထမအကြိမ်၊ ၁၉၉၉ ကနေ ၂၀၀၁ မှာ ဒုတိယအကြိမ် အနားယူခဲ့ပြီး ၂၀၀၃ မှာ နောက်ဆုံး အနားယူခဲ့တာ ဖြစ်ပါတယ်။

အသက် ၅၉ နှစ် အရွယ်ရှိ မိုက်ကယ်ဂျော်ဒန်ဟာ ချီကာဂိုဘူးလ် အသင်းမှာ ၁၉၈၄ ကနေ ၁၉၉၈ အထိ ကစားခဲ့ပြီး ဝါရှင်တန်ဝီဇာတ့်အသင်းမှာ ၂၀၀၁ ကနေ ၂၀၀၃ အထိ ကစားခဲ့တာပါ။

မိုက်ကယ်ဂျော်ဒန်ဟာ အမေရိကန် လက်ရွေးစင်နဲ့ အိုလံပစ်ပြိုင်ပွဲမှာ ရွှေတံဆိပ် ၂ ခု ရယူနိုင်ခဲ့ပြီး အခုအချိန်မှာ တော့ NBA ကလပ် ချာလော့တီဟော နတ်စ် အသင်းပိုင်ရှင်အဖြစ် ရပ်တည်နေပါတယ်။

Source: Reuters

CNI Sport News

၂၀၂၂ ခုနှစ်၊ စက်တင်ဘာ ၁

မြန်မာ့လက်ရွေးစင် အသင်းနည်းပြ အန်တွမ်နီဟေးက ၂၀၂၂ အာဆီယံချန်ပီယံရှစ် Mitsubishi Electric Cup အုပ်စုမဲခွဲမှုနဲ့ ပတ်သက်ပြီး အကောင်းမြင်ကြောင်း ပြောလိုက်ပါတယ်။

အန်တွမ်နီဟေးက “ ကျနော်တို့ဟာ စိတ်ဝင်စားစရာကောင်းတဲ့ အုပ်စုထဲမှာ ရှိနေပါတယ်။ အခုဆို လိဂ်ပြိုင်ပွဲ လည်း ပြန်လည် စတင်နေသလို နိုင်ငံရပ်ခြားမှာလည်း ကစားသမားတွေ အများကြီး ရှိတာကြောင့် အရင်ကထက် ပိုပြီး အားကောင်းလာမှာပါ။ ကျနော်တို့မှာ အကောင်းမြင်တဲ့ အကြောင်းပြချက်တွေ အမျိုးမျိုးတွေ ရှိပါတယ်”လို့ AFF ကို ပြောပါတယ်။

မြန်မာအသင်းဟာ ဒီပြိုင်ပွဲရဲ့ အုပ်စု B မှာ ဗီယက်နမ်၊ မလေးရှား၊ စင်ကာပူ၊ လာအိုတို့နဲ့ တစ်အုပ်စုတည်း ကျရောက်နေတာ ဖြစ်ပါတယ်။

အုပ်စု A မှာတော့ လက်ရှိချန်ပီယံ ထိုင်း၊ ဖိလစ်ပိုင်၊ အင်ဒိုနီးရှား၊ ကမ္ဘောဒီးယားနဲ့ ခြေစစ်ပွဲအောင် အသင်းတို့ တစ်အုပ်စုတည်း ကျရောက်နေခဲ့တာပါ။ ခြေစစ်ပွဲအဖြစ် တီမောနဲ့ ဘရူနိုင်းတို့ ကစားကြမှာဖြစ်ပြီး ဒီပွဲစဉ်က အနိုင်ရတဲ့အသင်းက အုပ်စု A ထဲ ဝင်ရောက်ခွင့်ရရှိမှာ ဖြစ်ပါတယ်။

မြန်မာအသင်းကိုတွေ့ရစဉ် (AFF)

အန်တွမ်နီဟေးက “အိမ်ကွင်းကစပြီး ပြိုင်ပွဲကို စတင်ရမှာဖြစ်လို့ ကျနော်ပျော်ရွှင်ပါတယ်။ စင်ကာပူနဲ့ ပြန်ကစား ရမှာဖြစ်လို့ အကောင်းဆုံး လုပ်ဆောင်နိုင်ဖို့ မျှော်လင့်ပါတယ်။ ဗီယက်နမ်နဲ့ အဝေးကွင်းပွဲက ပွဲကောင်းတစ်ပွဲပါ၊ နောက်ဆုံးအကြိမ် ရန်ကုန်မှာ ကစားခဲ့တုန်းက သရေကျခဲ့တာပါ။ အခု အတောအတွင်းမှာပဲ လာအိုအသင်းက လည်း နည်းပြလက်အောက်မှာ အကြီးအကျယ် တိုးတက်နေပါတယ်”လို့ ပြောပါတယ်။

ဒီပြိုင်ပွဲကို ၂၀၂၂ ခုနှစ်၊ ဒီဇင်ဘာ ၂၀ ရက်ကနေ ၂၀၂၃ ခုနှစ်၊ ဇန်နဝါရီ ၁၆ ရက်အထိ ကျင်းပသွားမှာ ဖြစ်ပါတယ်။ မြန်မာအသင်းဟာ အဖွင့်ပွဲစဉ်အဖြစ် ဒီဇင်ဘာ ၂၄ ရက် အိမ်ကွင်းမှာ မလေးရှား၊ ဒီဇင်ဘာ ၂၇ ရက် အဝေးကွင်းမှာ စင်ကာပူ၊ ဇန်နဝါရီ ၂ ရက် အိမ်ကွင်းမှာ လာအို၊ ဇန်နဝါရီ ၅ ရက် အဝေးကွင်းမှာ ဗီယက်နမ်အသင်းတို့နဲ့ ယှဉ်ပြိုင်ရမှာပါ။

အုပ်စု ထိပ်ဆုံး ၂ သင်းစီက ဆီမီးဖိုင်နယ် တက်ခွင့်ရမှာဖြစ်ပြီး ဆီမီးဖိုင်နယ်နဲ့ ဗိုလ်လုပွဲကို အိမ်ကွင်း၊ အဝေးကွင်း နှစ်ကျော့ ယှဉ်ပြိုင်ကြမှာ ဖြစ်ပါတယ်။

ပြီးခဲ့တဲ့နှစ်က နောက်ဆုံးကျင်းပခဲ့တဲ့ ပြိုင်ပွဲမှာ မြန်မာအသင်းဟာ အုပ်စုအဆင့်ကနေပဲ လှည့်ပြန်ခဲ့ရတာ ဖြစ်ပါတယ်။

Source: AFF

CNI Sport News

၂၀၂၂ ခုနှစ်၊ သြဂုတ် ၉

မြန်မာအသင်းဟာ ကျင်းပနေဆဲ အာဆီယံယူ-၁၆ ပြိုင်ပွဲမှာ အုပ်စု ပထမနေရာ ရယူပြီး အကြိုဗိုလ်လုပွဲကို တက်သွားပြီ ဖြစ်ပါတယ်။

အကြိုဗိုလ်လုပွဲ တက်နိုင်ဖို့ အဆုံးအဖြတ် ပွဲစဉ်အဖြစ် ကစားခဲ့ရတဲ့ ကမ္ဘောဒီးယားနဲ့ အုပ်စု နောက်ဆုံးပွဲစဉ်မှာ မြန်မာအသင်း က ၁ ဂိုး- ဂိုးမရှိနဲ့ အနိုင်ရရှိခဲ့တာပါ။

မြန်မာအသင်းအတွက် တစ်လုံးတည်းသော အနိုင်ဂိုးကို ပွဲချိန် ၄၈ မိနစ်မှာ ရရှိခဲ့တဲ့ ပင်နယ်တီကို အသင်းခေါင်းဆောင် လင်းထက်ဦးက သွင်းယူသွားခဲ့တာ ဖြစ်ပါတယ်။ မြန်မာအသင်းဟာ အဖိုးတန် အနိုင်ဂိုးရအပြီး လက်ကျန်ပွဲ ကစားချိန်တွေ အတွင်းမှာ အနိုင်ရလဒ်ကို ထိန်းခဲ့ကာ အကြိုဗိုလ်လုပွဲ အဆင့်ကို တက်လှမ်းနိုင်ခဲ့တာ ဖြစ်ပါတယ်။

မြန်မာအသင်းဟာ ကမ္ဘောဒီးယားကို အနိုင်ရရှိခဲ့တဲ့ ပွဲစဉ် အပါအဝင် အုပ်စုတွင်းမှာ သြစတြေးလျကို ၃ ဂိုး- ၂ ဂိုးနဲ့ အနိုင်ရပြီး မလေးရှားအသင်းနဲ့ ၁ ဂိုးစီ သရေကျခဲ့တာ ဖြစ်ပါတယ်။

ပင်နယ်တီကန်ဖို့ လုပ်နေတဲ့ လင်းထက်ဦး (MFF)

အဲ့ဒါကြောင့် အုပ်စုပွဲစဉ် ၃ ပွဲ ကစားအပြီး ရမှတ် ၇ မှတ်နဲ့ ထိပ်ဆုံးနေရာ ရပ်တည်နိုင်ခဲ့တာ ဖြစ်ပါတယ်။ တခြား အုပ်စုတွေမှာ အိမ်ရှင် အင်ဒိုနီးရှားနဲ့ ထိုင်း အသင်းတို့လည်း အုပ်စုထိပ်ဆုံးနဲ့ အကြိုဗိုလ်လုပွဲ တက်နိုင်ခဲ့တာ ဖြစ်ပါတယ်။ ဗီယက်နမ်အသင်း ကတော့ အကောင်းဆုံးအုပ်စု ဒုတိယနဲ့ နောက်တစ်ဆင့် တက်ခဲ့ပါတယ်။

မြန်မာအသင်းဟာ အကြိုဗိုလ်လုပွဲအဖြစ် အိမ်ရှင် အင်ဒိုနီးရှားအသင်းနဲ့ ယှဉ်ပြိုင်ရမှာဖြစ်ပြီး ထိုင်းအသင်းက ဗီယက်နမ် အသင်းနဲ့ ယှဉ်ပြိုင်ရမှာ ဖြစ်ပါတယ်။ ဒီပွဲတွေကို သြဂုတ်လ ၁၀ ရက်မှာ ကျင်းပသွားမှာ ဖြစ်ပြီး မြန်မာအသင်းရဲ့ ပွဲစဉ်ကိုတော့ မြန်မာစံတော်ချိန် ည ၇ နာရီ မိနစ် ၃၀ အချိန်မှာ ယှဉ်ပြိုင်သွားမယ်လို့ သိရပါတယ်။

အာဆီယံယူ-၁၆ ပြိုင်ပွဲကို ကိုဗစ်ကူးစက်မှုတွေကြောင့် ပြီးခဲ့တဲ့ ၂ နှစ်ဆက်တိုက် မကျင်းပခဲ့ရတာဖြစ်ပြီး အခုနှစ်မှ ပြန်လည် ကျင်းပ နိုင်ခဲ့တာလည်း ဖြစ်ပါတယ်။

မြန်မာအသင်းကတော့ အာဆီယံယူ-၁၆ ပြိုင်ပွဲရဲ့ ၂၀၀၂ နဲ့ ၂၀၀၅ ခုနှစ်တွေမှာ ချန်ပီယံဆု ၂ ကြိမ် ရယူထားပြီး အဲ့ဒီနောက်ပိုင်း အောင်မြင်မှုတွေနဲ့ ဝေးကွာနေတာ ဖြစ်ပါတယ်။

CNI Sport News

၂၀၂၂ ခုနှစ်၊ သြဂုတ် ၄

မြန်မာကစားသမား ၂ ဦးဖြစ်တဲ့ ကောင်းထက်စိုးနဲ့ ရန်လင်းအောင်တို့ကို ထိုင်းလိဂ် ၃ ကလပ် ကမ်ဖမ်ဖတ်အသင်းက တစ်ရာသီစာချုပ်နဲ့ ခေါ်ယူလိုက်ပြီ ဖြစ်ပါတယ်။

ဒီကစားသမား ၂ ဦးစလုံးဟာ ထိုင်းလိဂ်မှာ ကစားချင်တာကြောင့် မြန်မာကလပ်တွေရဲ့ ကမ်းလှမ်းမှုကို ပယ်ချခဲ့တယ်လို့ အေးဂျင့်ဖြစ်သူက ပြောခဲ့ပါတယ်။

ကောင်းထက်စိုးဟာ မြန်မာ့လက်ရွေးစင် ကစားသမားတစ်ဦးဖြစ်ပြီး ရန်ကုန်ယူနိုက်တက် အသင်းနဲ့အတူ အာရှချန်ပီယံလိဂ်၊ အေအက်ဖ်စီဖလား ပြိုင်ပွဲတွေမှာ ဝင်ရောက် ကစားထားပါတယ်။ ရန်လင်းအောင် ကတော့ ယူ-၂၀ ကမ္ဘာ့ဖလားပြိုင်ပွဲဝင် ကစားသမားတစ်ဦးလည်း ဖြစ်ပါတယ်။

ရန်လင်းအောင်နဲ့ ကမ်ဖမ်ဖတ်အသင်း စာချုပ်ချုပ် (Kamphaengphet FC)

ကမ်ဖမ်ဖတ် အသင်းကတော့ ဒီကစားသမား ၂ ဦး အသင်းမှာ ခြေစွမ်းပြနိုင်လို့ အသင်းကြီးတွေက ကမ်းလှမ်းလာတဲ့ အခါမှာ ထွက်ခွာခွင့် ပေးမယ်လို့ ကတိပေးထားကြောင်း အေးဂျင့်ဖြစ်သူက ပြောပါတယ်။ ကမ်ဖမ်ဖတ်အသင်းဟာ ထိုင်းလိဂ် ၃ မြောက်ပိုင်းဒေသမှာ ကစားနေတာဖြစ်ပြီး မနှစ်က ရာသီက အသင်း ၁၂ သင်းရှိတဲ့လိဂ်ရဲ့ အမှတ်ပေးဇယား အဆင့် ၉ နေရာ မှာ ရပ်တည်ခဲ့တာပါ။

ဒီလိဂ်မှာ ထိပ်ဆုံးရတဲ့ ၂ သင်းဟာ လိဂ် ၂ ပြိုင်ပွဲကို တန်းတက်နိုင်ဖို့အတွက် ခြေစစ်ပွဲ ထပ်မံယှဉ်ပြိုင်ရတာ ဖြစ်ပါတယ်။

ကမ်ဖမ်ဖတ်အသင်းကို ၂၀၀၉ က စတင် ဖွဲ့စည်းခဲ့တာဖြစ်ပြီး အသင်းဟာ အခုအချိန်ထိ ထိုင်းလိဂ် ၂ ကို တန်းမတက်နိုင် သေးပဲ ထိုင်းလိဂ် ၃ မှာ ကျင်လည်နေတာပါ။ မြန်မာကစားသမား အများအပြားကတော့ အခုရာသီမှာ ထိုင်းလိဂ်ပြိုင်ပွဲကို ပြောင်းရွှေ့ပြီး ကစားနေကြတာ ဖြစ်ပါတယ်။

CNI Sport News

၂၀၂၂ ခုနှစ်၊ ဇူလိုင် ၂၅

မောင်မောင်လွင်ဟာ လမ်ပန်ဝါရီယာအသင်းနဲ့ ချင်းမိုင်အသင်းတို့ ကစားခဲ့တဲ့ ရာသီကြိုခြေစမ်းပွဲစဉ်မှာ ပခုံးညှပ်ရိုးကျိုးဒဏ်ရာရရှိသွားခဲ့တယ်လို့ သိရပါတယ်။

လမ်ပန်ဝါရီယာအသင်းရဲ့ အဓိကကစားသမားဖြစ်တဲ့ မောင်မောင်လွင်ဟာ အစောပိုင်းက ဒီဒဏ်ရာနဲ့ပတ်သက်ပြီး ခွဲစိတ်မှုပြုလုပ်ဖို့ ငြင်းဆန်ခဲ့သေးတာပါ။ဒါပေမယ့် ပြန်လည်ထူထောင်ရမယ့်အချိန်က အလွန်မြန်ဆန်နိုင်တဲ့ အခြေ အနေမှာရှိတာကြောင့် ကစားသမားက သဘောတူညီခဲ့တယ်လို့ အေးဂျင့်ဖြစ်သူက ပြောထားခဲ့ပါတယ်။ မောင်မောင်လွင်အနေနဲ့ ခွဲစိတ်ကုသမှုခံယူပြီးရင် တစ်လကျော်အတွင်းမှာ ပြန်ကစားခွင့်ရဖို့ မျှော်လင့်နိုင်တယ် လို့လည်း သိရတာပါ။

လမ်ပန်ဝါရီယာအသင်းဟာ အခုရာသီသစ် ထိုင်းလိဂ် ၁ ပြိုင်ပွဲယှဉ်ပြိုင်ရမှာဖြစ်တာကြောင့် အသင်းကို ပိုမို ကောင်းမွန်အောင်ပြင်ဆင်မှုတွေ ပြုလုပ်နေတာဖြစ်ပါတယ်။သြဂုတ်လ ၁၂ ရက်မှာ ထိုင်းလိဂ် ၁ ရာသီသစ် ပြန်လည်စတင်တော့မှာ ဖြစ်တာကြောင့် မောင်မောင်လွင်ရဲ့ဒဏ်ရာဟာ အသင်းအတွက်ရော ကစားသမား အတွက်ပါ ထိခိုက်နစ်နာမှု တွေရှိခဲ့တာပါ။မြန်မာ့လက်ရွေးစင်ကစားသမားအနေနဲ့ လက်ရှိဒဏ်ရာအခြေအနေ ကြောင့် ထိုင်းလိဂ် ၁ ရာသီအစ ပွဲစဉ်တွေကို လွဲချော်ဖို့ ရှိနေပါတယ်။

မောင်မောင်လွင်ဟာ လမ်ပန်ဝါရီယာအသင်းကို ရောက်ရှိလာခဲ့တဲ့ ပြီးခဲ့တဲ့ရာသီကတည်းက ခြေစွမ်းပြသနိုင်ခဲ့ တာကြောင့် ပွဲထွက်ခွင့်တစ်နေရာကို ရရှိထားတာဖြစ်ပါတယ်။မောင်မောင်လွင်ကို ခေါ်ယူဖို့ အသင်းတချို့က စိတ်ဝင်စားမှုရှိခဲ့ပေမယ့် ကစားသမားက လမ်ပန်ဝါရီယာမှာပဲ ဆက်နေခဲ့တာပါ။ရန်ကုန်ယူနိုက်တက်ကစား သမားဟောင်းကို ထိုင်းကလပ်က ကျောနံပတ် ၁၁ ဂျာစီပေးခဲ့ပြီး ပွဲထွက်ခွင့်နေရာအတွက်ပါ ဆက်လက် အာမခံချက်ပေးခဲ့တာပါ။မောင်မောင်လွင်ဟာ ချင်းမိုင်နဲ့ခြေစမ်းပွဲမှာ ပွဲထွက်ခွင့်ရခဲ့ပြီး ဒဏ်ရာရရှိသွားခဲ့တာ ဖြစ်ပါတယ်။

မောင်မောင်လွင်ဟာ ပြီးခဲ့တဲ့ရာသီက လမ်ပန်ဝါရီယာအသင်းအတွက် ၁၈ ပွဲပါဝင်ကစားခဲ့ပြီး ၄ ဂိုးသွင်းယူကာ ၈ ဂိုးဖန်တီးနိုင်ခဲ့တာပါ။သူဟာ ထိုင်းလိဂ် ၂ ပြိုင်ပွဲရဲ့ တစ်လတာအကောင်းဆုံး ကစားသမားဆုကိုလည်း ရယူနိုင်ခဲ့ တာ ဖြစ်ပါတယ်။

CNI Sport News

၂၀၂၂ ခုနှစ်၊ ဇူလိုင် ၂၃

မြန်မာနေရှင်နယ်လိဂ် ပွဲစဉ် ၅ ပွဲစဉ်တွေထဲက အစောဆုံးပွဲအဖြစ် ယနေ့ (ဇူလိုင် ၂၃ ရက်)မှာ ဟံသာဝတီယူနိုက်တက်နဲ့ ဂျီအက်ဖ်အေတို့ ကစားခဲ့ကြတာမှာ ဟံသာဝတီယူနိုက်တက်က ၁၀ ဂိုး- ဂိုးမရှိနဲ့ ဂိုးပြတ် အနိုင်ရရှိသွားခဲ့ပါတယ်။

ဟံသာဝတီ ယူနိုက်တက် အသင်းဟာ ဒီပွဲမှာ ဂျီအက်ဖ်အေ အသင်းကို ပထမပိုင်း ၅ ဂိုး၊ ဒုတိယပိုင်း ၅ ဂိုး သွင်းယူခဲ့တာပါ။ ဟံသာဝတီ ယူနိုက်တက်အတွက် ဂိုးတွေကို စိုးကျော်ကျော်နဲ့ အောင်မြတ်သူက ၃ ဂိုးစီ၊ ကျော်ကျော်ဇင်ဟိန်းက ၂ ဂိုး၊ ရဲလင်းထက်နဲ့ ညီညီအောင်တို့က ၁ ဂိုးစီ သွင်းယူခဲ့တာ ဖြစ်ပါတယ်။

ဟံသာဝတီယူနိုက်တက် အသင်းသားများ အောင်ပွဲခံနေစဉ်

ဒီပွဲဟာ မြန်မာနေရှင်နယ်လိဂ် သမိုင်းတစ်လျှောက် ဂိုးအပြတ်ဆုံး ပွဲအဖြစ်လည်း မှတ်တမ်းဝင်သွားခဲ့တာပါ။

ဟံသာဝတီ ယူနိုက်တက် အသင်းဟာ ဒီပွဲ အပါအဝင် အခုနှစ်ရာသီ မြန်မာနေရှင်နယ်လိဂ် ပွဲစဉ် ၅ ပွဲကစား အပြီးမှာ ၂ ပွဲနိုင်၊ ၁ ပွဲသရေ၊ ၂ ပွဲရှုံး ရလဒ် ရရှိထားတာပါ။ ဂျီအက်ဖ်အေ အသင်းကတော့ ၅ ပွဲ ကစားအပြီးမှာ ၁ ပွဲနိုင် ၄ ပွဲ ရှုံးနိမ့်ထားတာ ဖြစ်ပါ တယ်။

CNI Sport News

၂၀၂၂ ခုနှစ်၊ ဇူလိုင် ၂၃

မြန်မာ့လက်ရွေးစင် နောက်ခံလူဖြစ်တဲ့ ငြိမ်းချမ်းကို ထိုင်းလိဂ်၂ ကလပ် ရနောင်းယူနိုက်တက်က တစ်ရာသီစာချုပ်နဲ့ ခေါ်ယူ လိုက်ပါတယ်။

ငြိမ်းချမ်းဟာ ရနောင်းယူနိုက်တက် အသင်းနဲ့ ပူးပေါင်းတာ ၃ ပတ် ဝန်းကျင်ရှိပြီဖြစ်ပေမယ့် အခုမှ အပြောင်းအရွှေ့ကို တရားဝင် ကြေညာခဲ့တာပါ။ မြန်မာ့လက်ရွေးစင် နောက်ခံလူကို ခေါ်ယူဖို့ ကာဆာ့ဆတ် အသင်းကလည်း ဆက်သွယ်မှုတွေ ရှိခဲ့တယ်လို့ အေးဂျင့်ဖြစ်သူက ပြောထားပါတယ်။

ရနောင်းမြို့မှာ မြန်မာနိုင်ငံသားတွေ အများအပြားရှိလို့ မြန်မာပရိသတ်တွေ အနေနဲ့ ဒီခေါ်ယူမှုအပေါ် ပျော်ရွှင်နိုင်မယ်လို့ အသင်းဘက်က မျှော်လင့်နေတာပါ။

ငြိမ်းချမ်းအတွက်တော့ ရနောင်းယူနိုက်တက်ဟာ သူ့ရဲ့ ပထမဆုံး ပြည်ပကလပ်လည်း ဖြစ်ပါတယ်။ ငြိမ်းချမ်း ကတော့ ပရော်ဖက်ရှင်နယ် ကစားသမား တစ်ယောက်အနေနဲ့ နိုင်ငံရပ်ခြားမှာ ကစားဖို့ အိမ်မက်တွေက အမှန်တကယ် ဖြစ်လာပြီလို့ သူ့ရဲ့ ဆိုရှယ်မီဒီယာမှာ ရေးသားထားခဲ့တာပါ။

 ငြိမ်းချမ်းရဲ့ ကစားဟန်

ငြိမ်းချမ်းဟာ ရနောင်းယူနိုက်တက်အသင်းမှာ ကျောနံပတ် ၄ ဂျာစီ ဝတ်ဆင်သွားမှာလည်း ဖြစ်ပါတယ်။ လက်ရွေးစင် နောက်ခံလူဟာ မြန်မာနေရှင်နယ်လိဂ် ကလပ်တွေဖြစ်တဲ့ နေပြည်တော်၊ ရခိုင်ယူနိုက်တက်နဲ့ ရှမ်းယူ

နိုက်တက်အသင်းတွေမှာ ကစားခဲ့ပါတယ်။

နောက်ဆုံး ကစားခဲ့တဲ့ ရှမ်းယူနိုက်တက် အသင်းနဲ့အတူ ၂၀၁၉ က မြန်မာနေရှင်နယ်လိဂ် ချန်ပီယံဆုကိုလည်း ရယူနိုင်ခဲ့တာပါ။ ငြိမ်းချမ်းဟာ မြန်မာ့လက်ရွေးစင် အသင်းအတွက် ၈ ပွဲ ပါဝင်ကစားထားပြီး ၁ ဂိုး သွင်းယူထားပါတယ်။ ငြိမ်းချမ်း ဟာ ရနောင်းယူနိုက်တက် အသင်းမှာ လက်ရွေးစင် ကစားသမားဟောင်း အောင်ကျော်နိုင်နဲ့ တွဲဖက်ကစားရမှာပါ။ အောင်ကျော်နိုင် ဟာ ပြီးခဲ့တဲ့ ရာသီကတည်းက ရနောင်းယူနိုက်တက်မှာ ကစားခဲ့တာ ဖြစ်ပါတယ်။

ရနောင်းယူနိုက်တက်အသင်းဟာ ပြီးခဲ့တဲ့ရာသီ ထိုင်းလိဂ် ၂ ပြိုင်ပွဲရဲ့ အမှတ်ပေးဇယား အဆင့် ၁၂ နေရာမှာ ရပ်တည်နိုင်ခဲ့တာ ဖြစ်ပါတယ်။

CNI Sport News

၂၀၂၂ ခုနှစ်၊ ဇူလိုင် ၁၄

မြန်မာအသင်းဟာ အာဆီယံအမျိုးသမီးချန်ပီယံရှစ်ပြိုင်ပွဲ အုပ်စုနောက်ဆုံးပွဲစဉ်မှာ ဗီယက်နမ်အသင်းကို အရေးနိမ့်ခဲ့တာကြောင့် ထိုင်းအသင်းနဲ့ ဆီမီးဖိုင်နယ်ပွဲစဉ်ယှဉ်ပြိုင်ရမှာဖြစ်ပါတယ်။

မြန်မာအသင်းဟာ ဗီယက်နမ်အသင်းနဲ့ ကစားခဲ့တဲ့ ပွဲမှာ ၄ ဂိုး- ဂိုးမရှိနဲ့ ဂိုးပြတ်အရေးနိမ့်ခဲ့တာပါ။ဒီပွဲ အရေးနိမ့် ခဲ့တဲ့အတွက် မြန်မာအသင်းဟာ အုပ်စုတွင်း ဒုတိယနေရာသာ ရရှိခဲ့ပြီး တစ်ဖက်အုပ်စုမှာ ထိပ်ဆုံးရရှိခဲ့တဲ့ ထိုင်းအသင်းနဲ့ ဆီမီးဖိုင်နယ်ယှဉ်ပြိုင်ရမှာဖြစ်ပါတယ်။ဗီယက်နမ်အသင်းကတော့ တစ်ဖက်အုပ်စုက ဒုတိယရရှိတဲ့ အိမ်ရှင်ဖိလစ်ပိုင်အသင်းနဲ့ ဆီမီးဖိုင်နယ်ယှဉ်ပြိုင်ရမှာပါ။မြန်မာအသင်းနည်းပြကတော့ ဗီယက်နမ်နဲ့ပွဲမှာ လူငယ် ကစားသမားတွေအများစု အသုံးပြုခဲ့လို့ အခုလို ရလဒ်ထွက်ပေါ်ခဲ့တာလို့ ပွဲအပြီးမှာ ပြောခဲ့ပါတယ်။

မြန်မာအသင်းနည်းပြ ဒေါ်သက်သက်ဝင်းက “ဒီပွဲအတွက် ပွဲထွက်လူစာရင်းမှာ အသက် ၁၉ နှစ်အောက်အသင်းက လူငယ်တွေကိုအများစု အသုံးပြုခဲ့ပါတယ်။ကလေးတွေ အကောင်းဆုံးကြိုးစားခဲ့ပေမယ့် အတွေ့အကြုံပိုင်းမှာသာ တဲ့ ဗီယက်နမ်ကစားသမားတွေက ပွဲကိုအပြောင်းအလဲလုပ်ပြီး အသာရသွားတယ်လို့ မြင်မိပါတယ်။ ခွင့်ပြုခဲ့ရတဲ့ ၄ ဂိုးမှာ လူကျွံအနေအထား၊ ပင်နယ်တီတွေပါဝင်လာလို့ ဒီလိုရလဒ်မျိုးဖြစ်သွားတယ်လို့ ထင်ကြောင်း” ပြောခဲ့တာပါ။

ဆီမီးဖိုင်နယ်ပွဲစဉ်အဖြစ် ယှဉ်ပြိုင်ရမယ့် ထိုင်းအသင်းနဲ့ ပွဲအတွက် အကောင်းဆုံးပြင်ဆင်သွားမှာပါလို့ မြန်မာ နည်းပြက ထပ်ပြီး ပြောခဲ့ပါတယ်။မြန်မာအသင်းဟာ အုပ်စုတွင်း ၄ ပွဲမှာ တီမောကို ၇ ဂိုး- ဂိုးမရှိ၊ ကမ္ဘောဒီးယားကို ၃ ဂိုး- ဂိုးမရှိ၊ လာအိုကို ၃ ဂိုး- ၁ ဂိုးနဲ့ အနိုင်ရခဲ့ပြီး ဗီယက်နမ်အသင်းကို အရေးနိမ့်ခဲ့တာပါ။ ဆီမီးဖိုင်နယ်မှာ တွေ့ဆုံရမယ့် မြန်မာအသင်းနဲ့ ထိုင်းအသင်းဟာ ပြီးခဲ့တဲ့ ဆီးဂိမ်းစ်ပြိုင်ပွဲမှာ တွေ့ဆုံခဲ့တုန်းက ၁ ဂိုးစီ သရေကျ ခဲ့တာဖြစ်ပါတယ်။

အာဆီယံအမျိုးသမီးချန်ပီယံရှစ်ပြိုင်ပွဲမှာ ချန်ပီယံဆု ၂ ကြိမ်ရရှိထားတဲ့ မြန်မာအသင်းဟာ ၂၀၁၉ က နောက်ဆုံး ယှဉ်ပြိုင်ခဲ့တဲ့ ပြိုင်ပွဲမှာတော့ တတိယနေရာရရှိခဲ့တာပါ။အခုနှစ်ပြိုင်ပွဲအတွက် ဆီမီးဖိုင်နယ်ပွဲစဉ်တွေကို ဇူလိုင်လ ၁၅ ရက်မှာ ကျင်းပသွားမှာ ဖြစ်ပါတယ်။

CNI Sport News

၂၀၂၂ ခုနှစ်၊ ဇူလိုင် ၇

၂၀၂၂ မြန်မာနေရှင်နယ်လိဂ်ပြိုင်ပွဲ ပွဲစဉ် ၂ ရဲ့ နောက်ဆုံးပွဲစဉ်အဖြစ် ဇူလိုင်လ ၇ ရက်(ယနေ့)မှာ ရန်ကုန် ယူနိုက်တက်နဲ့ ရတနာပုံအသင်းတို့ ကစားခဲ့ရာ ရန်ကုန်ယူနိုက်တက်အသင်းက အနိုင်ရရှိသွားခဲ့ပါတယ်။

ရန်ကုန်ယူနိုက်တက်အသင်းဟာ ဒီပွဲမှာ ရတနာပုံအသင်းကို ၂ ဂိုး- ဂိုးမရှိနဲ့ အနိုင်ရရှိခဲ့တာပါ။ ရန်ကုန်ယူနိုက်တက် အတွက်ဂိုးတွေကို ထက်ဖြိုးဝေက ပထမပိုင်းနဲ့ ဒေးဗစ်ထန်းက ဒုတိယပိုင်းမှာ သွင်းယူခဲ့တာဖြစ်ပါတယ်။

ရတနာပုံ အသင်းက ချေပဂိုးရဖို့ကြိုးစားခဲ့ပေမယ့် ရန်ကုန်ယူနိုက်တက်ဂိုးသမား ဘုန်းသစ္စာမင်းက လက်စွမ်းပြ ကာကွယ် နိုင်ခဲ့တာကြောင့် ရန်ကုန်ယူနိုက်တက်အသင်းကို အရေးနိမ့်ခဲ့တာပါ။

ရန်ကုန်ယူနိုက်တက်အသင်းဟာ ဒီနိုင်ပွဲကြောင့် အဖွင့်ပွဲစဉ် ၂ ပွဲစလုံးနိုင်ပွဲရခဲ့တာဖြစ်ပြီး ရတနာပုံအသင်း ကတော့ ၁ ပွဲနိုင် ၁ ပွဲရှုံး ရလဒ်ရရှိခဲ့ပါတယ်။

ပွဲစဉ် ၂ ရဲ့ အခြားပွဲစဉ်တွေမှာတော့ ရှမ်းယူနိုက်တက်က ဂျီအက်ဖ်အေကို ၂ ဂိုး- ၁ ဂိုး၊ မြဝတီက ISPE ကို ၂ ဂိုး- ဂိုးမရှိ၊ ဧရာဝတီယူနိုက်တက်က ရခိုင်ယူနိုက်တက်ကို ၃ ဂိုး- ဂိုးမရှိ၊ မဟာ ယူနိုက်တက်က ဟံသာဝတီယူနိုက်တက်ကို ၁ ဂိုး- ဂိုးမရှိနဲ့ အနိုင်ရရှိခဲ့တာပါ။

ပွဲစဉ် ၂ အပြီးမှာ ရန်ကုန်ယူနိုက်တက်နဲ့ ရှမ်းယူနိုက်တက်တို့က ၂ ပွဲစလုံးအနိုင်ရခဲ့ပြီး ဂျီအက်ဖ်အေနဲ့ ရခိုင် ယူနိုက်တက်တို့ကတော့ ၂ ပွဲစလုံးအရေးနိမ့်ထားတာဖြစ်ပါတယ်။မြန်မာနေရှင်နယ်လိဂ်ရဲ့ ပွဲစဉ် ၃ အဖြစ် ဇူလိုင်လ ၉ ရက်မှာ ISPE နဲ့ ဟံသာဝတီယူနိုက်တက်တို့ ယှဉ်ပြိုင်မှာ ဖြစ်ပါတယ်။

CNI Sport News

၂၀၂၂ ခုနှစ်၊ ဇူလိုင် ၅

မြန်မာ့လက်ရွေးစင် နောက်ခံလူဟောင်း ဇော်မင်းထွန်းကို ထိုင်းလိဂ် ၁ ကလပ် ချောင်ဘူရီအသင်းက တစ်ရာသီ စာချုပ်နဲ့ ပြန်လည် ခေါ်ယူလိုက်ပြီ ဖြစ်ပါတယ်။

ဇော်မင်းထွန်းရဲ့ အပြောင်းအရွှေ့အတွက် အသင်း ၃ သင်းလောက်နဲ့ စကားပြောဆိုမှုတွေ ရှိခဲ့ပေမယ့် ကစားသမား ကိုယ်တိုင် က ချောင်ဘူရီနဲ့ ပြန်လည် လက်တွဲချင်တာကြောင့် စာချုပ် ချုပ်ဖြစ်ခဲ့တာလို့ အေးဂျင့်ဖြစ်သူ ကိုရဲနိုင်ဝင်းက သူ့ရဲ့ ဖေ့စ်ဘွတ်ခ် စာမျက်နှာမှာ ရေးသား ခဲ့ပါတယ်။

ဇော်မင်းထွန်းဟာ ထိုင်းလိဂ် အတွေ့အကြုံရှိပြီးသား ကစားသမားဖြစ်တဲ့အတွက် ချောင်ဘူရီအသင်းမှာ အဆင်ပြေနိုင်မယ်လို့ မျှော်လင့်ကြောင်း ထိုင်းကလပ်ရဲ့ နည်းပြဖြစ်သူက ပြောပါတယ်။

ချောင်ဘူရီအသင်းဟာ ဇော်မင်းထွန်းရဲ့ ပထမဆုံး ပြည်ပကလပ်ဖြစ်ပြီး ရန်ကုန်ယူနိုက်တက်က ထွက်ပြီးနောက် ၂၀၁၉ မှာ ပြောင်းရွှေ့လာခဲ့တာပါ။ ဇော်မင်းထွန်းကတော့ အသင်းဟောင်းနဲ့ ပြန်လည် လက်တွဲခွင့်ရလို့ ပျော်ရွှင်နေပါတယ်။

ချောင်ဘူရီအသင်းနဲ့ တစ်နှစ်စာချုပ်ချုပ်လိုက်တဲ့ ဇော်မင်းထွန်း (Chonburi Football Club)

“စိတ်ဝင်စားစရာကောင်းတဲ့ ကမ်းလှမ်းမှုတွေ အများကြီးရှိခဲ့ပေမယ့် အိမ်ပြန်ဖို့ကိုပဲ ရွေးချယ်ခဲ့ပါတယ်။ ဘာကြောင့်လဲဆိုရင် အိမ်ကို အရမ်းလွမ်းနေလို့ပါ။ အိမ်ပြန်ရောက်တာ အလွန်ဝမ်းသာတယ်”လို့ ဇော်မင်းထွန်းက ပြောပါတယ်။

ဇော်မင်းထွန်းဟာဆိုရင် ၂၀၁၉ ရာသီတုန်းက ချောင်ဘူရီအသင်းအတွက် ပွဲပေါင်း ၂၀ ပါဝင်ကစားခဲ့ပြီး ၁ ဂိုး သွင်းယူခဲ့ပါတယ်။

၂၀၂၀-၂၁ ရာသီမှာတော့ ဆူခိုထိုင်းအသင်းထံ ပြောင်းရွှေ့ခဲ့ပြီး မနှစ်က ရာသီမှာတော့ ထရက်အသင်းထံ ပြောင်းခဲ့တာ ဖြစ်ပါ တယ်။

ပြီးခဲ့တဲ့ရာသီက ထိုင်းလိဂ် ၂ ကလပ် ထရက်အသင်းမှာ ဇော်မင်းထွန်း ကစားခဲ့တာဖြစ်ပြီး အသင်းဟာ အမှတ်ပေးဇယား အဆင့် ၃ နေရာမှာ ရပ်တည်နိုင်ခဲ့ပါတယ်။ အဲ့ဒါကြောင့် တန်းတက်ခွင့် ပလေးအော့ဖ် ပွဲစဉ်ကစားခဲ့ရပေမယ့်လည်း အရေးနိမ့်ခဲ့လို့ လာမယ့်ရာသီ ထိုင်းလိဂ်မှာ ဆက်ပြီး ကစားရမှာ ဖြစ်ပါတယ်။

ချောင်ဘူရီအသင်းဟာ ပြီးခဲ့တဲ့ရာသီ ထိုင်းလိဂ် ၁ ပြိုင်ပွဲမှာ အဆင့် ၇ နေရာမှာသာ ရပ်တည်နိုင်ခဲ့တာကြောင့် လာမယ့်ရာသီ ဒီထက်ပိုမြင့်မားတဲ့ အဆင့်မှာ ရပ်တည်ပြီး အောင်မြင်မှုတွေ ရယူနိုင်ဖို့အတွက် အခုကတည်းက ပြင်ဆင်မှုတွေ ပြုလုပ်နေတာ ဖြစ်ပါတယ်။

CNI Sport News

၂၀၂၂ ခုနှစ်၊ ဇူလိုင် ၄

အာဆင်နယ်အသင်းဟာ မန်စီးတီးအသင်း တိုက်စစ်မှူး ဂျီးဆပ်စ်ကို ပေါင် ၄၅ သန်းနဲ့ ၅ နှစ် စာချုပ်ချုပ်ကာ ခေါ်ယူလိုက်ပြီလို့ တရားဝင် ကြေညာလိုက်ပါတယ်။

မြောက်လန်ဒန်ကလပ်ဟာ ဘရာဇီးလ် ကစားသမားကို ကြိုဆိုနေတဲ့ ဗွီဒီယိုနဲ့အတူ ဇူလိုင် ၄ ရက်မှာ ဒီအပြောင်းအရွှေ့ကို ကြေညာခဲ့တာပါ။ ဂျီးဆပ်စ်ဟာ အခုနွေရာသီ အပြောင်းအရွှေ့မှာ အာဆင်နယ်အသင်းထံ ရောက်ရှိလာတဲ့ စတုတ္တမြောက် ကစားသမားလည်း ဖြစ်ခဲ့ပါတယ်။

အာဆင်နယ်အသင်းဟာ ဂျီးဆပ်စ် မတိုင်ခင် ဖာဘီယိုဗီအဲရာ၊ မာကွင်ဟိုစ်နဲ့ မတ်တာနာတို့ကို ခေါ်ယူခဲ့ပါတယ်။ ဂျီးဆပ်စ်ကို ခေါ်ယူဖို့ ချယ်လ်ဆီးနဲ့ အာဆင်နယ်တို့ ကြိုးပမ်းခဲ့တာမှာ ကစားသမားက အာဆင်နယ်ကို လာရောက်ဖို့ ရွေးချယ်ခဲ့တာ ဖြစ်ပါ တယ်။

ဂျီးဆပ်စ်ဟာဆိုရင် အာဆင်နယ်အသင်းမှာ ကျောနံပတ် ၉ ဂျာစီကို ဝတ်ဆင်သွားမှာပါ။

အာဆင်နယ်အသင်းနဲ့ လက်မှတ်ထိုးနေတဲ့ ဂျီးဆပ်စ် (Arsenal)

ဂျီးဆပ်စ်က “ အွန်နရီကြောင့် ငယ်ငယ်လေး ကတည်းက အာဆင်နယ်ကို သဘောကျခဲ့ပါတယ်။ ကျနော် အာဆင်နယ်အသင်း နဲ့ ပြိုင်ဘက်တွေအဖြစ် ကစားတဲ့ အချိန်မှာ အီးမရိတ်စ်ကို ကြည့်ရင်း အလွန်ကောင်းတဲ့ ကွင်းဖြစ်တာကြောင့် ဒီမှာ ကစားရ တာ အလွန် စိတ်လှုပ်ရှား မိပါတယ်။ ဒီလိုကြီးမားတဲ့ ကလပ်နဲ့ လတ်မှတ်ထိုးရလို့ ပျော်ရွှင်မိပါတယ်။ အာဆင်နယ်အတွက် ကစားပေးရတော့မယ်ဆိုတာ သိတဲ့နေ့ကတည်းက ကျနော်ပျော်ရွှင်ခဲ့တာပါ။ ဒီမှာ ရှိတဲ့ ဝန်ထမ်းတွေရော ကစားသမား တချို့ ကိုရော ကျနော်သိပါတယ်”လို့ ပြောခဲ့ပါတယ်။

ဒါ့အပြင် ဂျီးဆပ်စ်က “ဒီမှာ ထိပ်တန်းအဆင့်ရှိတဲ့ ကစားသမားတွေ အများကြီး ရှိပါတယ်။ သူတို့က ငယ်ရွယ်သလို ကျနော် လည်း ငယ်ရွယ်ပါတယ်။ ဒါကြောင့် ကူညီပေးနိုင်ဖို့အတွက် ဒီကိုလာရလို့ ကျနော် အလွန်ပျော်ပါတယ်။ ကူညီဖို့၊ သင်ယူဖို့နဲ့ အစွမ်းကုန် ကြိုးစားဖို့ ဒီကိုလာခဲ့တာပါ”လို့ အသင်းရဲ့ တရားဝင် ဝက်ဘ်ဆိုက်ကို ပြောပါတယ်။

ဂျီးဆပ်စ်ဟာ အာဆင်နယ်အသင်းမှာ မကြာသေးခင်ကမှ သက်တမ်းတိုး စာချုပ်ချုပ်ထားတဲ့ အန်ကိတ်တီယာ၊ ဘရာဇီးလ် အသင်းဖော် မာတင်နယ်လ်တို့နဲ့ တိုက်စစ်မှာ တွဲဖက်ကစားရမှာ ဖြစ်ပါတယ်။

ဘရာဇီးလ်တိုက်စစ်မှူး အနေနဲ့ မန်စီးတီးမှာ လက်တွဲခဲ့တဲ့ အာတီတာနဲ့ အာဆင်နယ်အသင်းမှာ ပြန်လည်လက်တွဲ အလုပ် လုပ်ကိုင်ရတော့မှာ ဖြစ်ပါတယ်။
ဂျီးဆပ်စ်ဟာဆိုရင် မန်စီးတီးအသင်းမှာ ကစားခဲ့တဲ့ ၆ နှစ်တာအတွင်းမှာ ပွဲပေါင်း ၂၃၆ ပွဲ ကစားခဲ့ပြီး ၉၅ ဂိုး သွင်းယူနိုင်ခဲ့ သလို ဆုဖလားအောင်မြင်မှု အများအပြား ရယူနိုင်ခဲ့ပါတယ်။

အာဆင်နယ်အသင်းဟာ မကြာသေးခင်က ရာသီကြို ခြေစမ်းပွဲအဖြစ် အစ်စဝှစ်ချ်အသင်းနဲ့ ကစားခဲ့ရာ ၅ ဂိုး- ၁ ဂိုးနဲ့ ဂိုးပြတ် အနိုင်ရထားပါတယ်။

Source: Daily Mail

CNI Sport News

၂၀၂၂ ခုနှစ်၊ ဇူလိုင် ၄

အန်သိုနီဂျိုရွှာက အူဆက်ခ်နဲ့ မကျေပွဲအတွက် လေ့ကျင့်မှုတွေ ပြုလုပ်ပေးဖို့ တိုင်ဆန်ဗျူရီရဲ့ ကမ်းလှမ်းချက်ကို ပယ်ချလိုက် ပါတယ်။

အန်သိုနီဂျိုရွှာက “ကျနော် သူ့ဆီကနေ သင်ယူစရာ တစ်ခုခု ရှိသေးလားဆိုရင်တော့ ရိုးရိုးသားသား ပြောရရင် မရှိပါဘူး။ လုံးဝ ကို မရှိတာပါ။ အနားယူပြီးသားသူ အနေနဲ့ ဘီယာသောက်၊ အပန်းဖြေပြီး လိုအပ်နေတဲ့ သူတချို့ကို ကူညီလိုက်ပါ။ သူက အလွန် စိတ်ဝင်စားဖို့ကောင်းတဲ့ စရိုက်လက္ခဏာ ရှိပါတယ်။ ဒါပေမယ့် သူ့ အကူအညီကိုတော့ ကျနော်ယူမှာ မဟုတ်ပါဘူး။ ကျနော့် အလုပ်ကို ကျနော် အကောင်းဆုံး လုပ်ခဲ့သလို သူလည်း သူ့အလုပ်ကို အကောင်းဆုံး လုပ်ခဲ့ပါတယ်။ သူဘာပဲလုပ်လုပ် ကံကောင်းပါစေ”လို့ The Mirror ကို ပြောခဲ့ပါတယ်။

အန်သိုနီဂျိုရွှာဟာ ပြီးခဲ့တဲ့နှစ် လန်ဒန်မှာ အူဆက်ခ်ကို အရေးနိမ့်ခဲ့တဲ့အတွက် IBF, WBO နဲ့ WBA ဟဲဗီးဝိတ်ချန်ပီယံ ခါးပတ် တွေကို ဆုံးရှုံးခဲ့ရတာပါ။ အဲ့ဒါကြောင့် ချန်ပီယံခါးပတ်တွေ ပြန်ရယူနိုင်ဖို့ သြဂုတ် ၂၀ ရက်မှာ မကျေပွဲအဖြစ် ပြန်လည် ထိုးသတ်မှာ ဖြစ်ပါတယ်။

အန်သိုနီဂျိုရွှာနဲ့ အူဆက်ခ် (Sky Sports)

အန်သိုနီဂျိုရွှာဟာ ဒီရှုံးပွဲအပြီးမှာ ကာလကြာရှည် လေ့ကျင့်ပေးသူ မက်ကရာကန်နဲ့ လမ်းခွဲခဲ့ပြီး ရော်ဘတ်ဂါစီယာကို အခုနှစ် သူ့အသင်းမှာ ထည့်သွင်းခဲ့တာပါ။

တိုင်ဆန်ဗျူရီက သူဟာ အန်သိုနီဂျိုရွှာကို နိုင်ပွဲရအောင် လမ်းညွှန်ပေးနိုင်ပါတယ်လို့ ပြောခဲ့ ပါတယ်။ ဒါပေမယ့် အန်သိုနီ ဂျိုရွှာက ဟဲဗီးဝိတ်ပြိုင်ဘက်ရဲ့ အကူအညီပေးမယ့် ကမ်းလှမ်းချကို ပယ်ချခဲ့ပါတယ်။

တိုင်ဆန်ဗျူရီဟာ ပြီးခဲ့တဲ့ ဧပြီလက ဝင်ဘာလေ အားကစားကွင်းကြီးမှာ ဒီလီယန်ဝှိုက်ကို အနိုင်ထိုး သတ်ခဲ့ပြီးနောက် လက်ဝှေ့ သမားဘဝက အနားယူပြီလို့ ပြောခဲ့ပါတယ်။ ဒါပေမယ့် တိုင်ဆန်ဗျူရီဟာ လက်ရှိအချိန်ထိ WBC ချန်ပီယံအဖြစ် ရှိနေဆဲပါ။ လက်ဝှေ့လောကမှာ ရှိသူတွေကတော့ အန်သိုနီဂျိုရွှာနဲ့ အူဆက်ခ်တို့ မကျေပွဲက အနိုင်ရတဲ့သူနဲ့ တိုင်ဆန်ဗျူရီ ထိုးသတ်မယ်လို့ ပြောထားတာ ဖြစ်ပါတယ်။

တိုင်ဆန်ဗျူရီ အနေနဲ့ ဒီပွဲကို အနိုင်ရခဲ့မယ်ဆိုရင် ချန်ပီယံခါးပတ်တွေ အားလုံးကို ရယူနိုင်မှာ ဖြစ်ပြီး ကမ္ဘာ့အငြင်းပွားဖွယ်ရာ မရှိတဲ့ ချန်ပီယံအဖြစ် သတ်မှတ်ခံရမှာပါ။ ဗြိတိန် ဟဲဗီးဝိတ် ချန်ပီယံကတော့ ဒါနဲ့ ပတ်သက်ပြီး ငြင်းဆိုထားခြင်း မရှိသေးပါဘူး။

Source: Metro