CNI Sport News

၂၀၂၂ ခုနှစ်၊ ဇူလိုင် ၄

အန်သိုနီဂျိုရွှာက အူဆက်ခ်နဲ့ မကျေပွဲအတွက် လေ့ကျင့်မှုတွေ ပြုလုပ်ပေးဖို့ တိုင်ဆန်ဗျူရီရဲ့ ကမ်းလှမ်းချက်ကို ပယ်ချလိုက် ပါတယ်။

အန်သိုနီဂျိုရွှာက “ကျနော် သူ့ဆီကနေ သင်ယူစရာ တစ်ခုခု ရှိသေးလားဆိုရင်တော့ ရိုးရိုးသားသား ပြောရရင် မရှိပါဘူး။ လုံးဝ ကို မရှိတာပါ။ အနားယူပြီးသားသူ အနေနဲ့ ဘီယာသောက်၊ အပန်းဖြေပြီး လိုအပ်နေတဲ့ သူတချို့ကို ကူညီလိုက်ပါ။ သူက အလွန် စိတ်ဝင်စားဖို့ကောင်းတဲ့ စရိုက်လက္ခဏာ ရှိပါတယ်။ ဒါပေမယ့် သူ့ အကူအညီကိုတော့ ကျနော်ယူမှာ မဟုတ်ပါဘူး။ ကျနော့် အလုပ်ကို ကျနော် အကောင်းဆုံး လုပ်ခဲ့သလို သူလည်း သူ့အလုပ်ကို အကောင်းဆုံး လုပ်ခဲ့ပါတယ်။ သူဘာပဲလုပ်လုပ် ကံကောင်းပါစေ”လို့ The Mirror ကို ပြောခဲ့ပါတယ်။

အန်သိုနီဂျိုရွှာဟာ ပြီးခဲ့တဲ့နှစ် လန်ဒန်မှာ အူဆက်ခ်ကို အရေးနိမ့်ခဲ့တဲ့အတွက် IBF, WBO နဲ့ WBA ဟဲဗီးဝိတ်ချန်ပီယံ ခါးပတ် တွေကို ဆုံးရှုံးခဲ့ရတာပါ။ အဲ့ဒါကြောင့် ချန်ပီယံခါးပတ်တွေ ပြန်ရယူနိုင်ဖို့ သြဂုတ် ၂၀ ရက်မှာ မကျေပွဲအဖြစ် ပြန်လည် ထိုးသတ်မှာ ဖြစ်ပါတယ်။

အန်သိုနီဂျိုရွှာနဲ့ အူဆက်ခ် (Sky Sports)

အန်သိုနီဂျိုရွှာဟာ ဒီရှုံးပွဲအပြီးမှာ ကာလကြာရှည် လေ့ကျင့်ပေးသူ မက်ကရာကန်နဲ့ လမ်းခွဲခဲ့ပြီး ရော်ဘတ်ဂါစီယာကို အခုနှစ် သူ့အသင်းမှာ ထည့်သွင်းခဲ့တာပါ။

တိုင်ဆန်ဗျူရီက သူဟာ အန်သိုနီဂျိုရွှာကို နိုင်ပွဲရအောင် လမ်းညွှန်ပေးနိုင်ပါတယ်လို့ ပြောခဲ့ ပါတယ်။ ဒါပေမယ့် အန်သိုနီ ဂျိုရွှာက ဟဲဗီးဝိတ်ပြိုင်ဘက်ရဲ့ အကူအညီပေးမယ့် ကမ်းလှမ်းချကို ပယ်ချခဲ့ပါတယ်။

တိုင်ဆန်ဗျူရီဟာ ပြီးခဲ့တဲ့ ဧပြီလက ဝင်ဘာလေ အားကစားကွင်းကြီးမှာ ဒီလီယန်ဝှိုက်ကို အနိုင်ထိုး သတ်ခဲ့ပြီးနောက် လက်ဝှေ့ သမားဘဝက အနားယူပြီလို့ ပြောခဲ့ပါတယ်။ ဒါပေမယ့် တိုင်ဆန်ဗျူရီဟာ လက်ရှိအချိန်ထိ WBC ချန်ပီယံအဖြစ် ရှိနေဆဲပါ။ လက်ဝှေ့လောကမှာ ရှိသူတွေကတော့ အန်သိုနီဂျိုရွှာနဲ့ အူဆက်ခ်တို့ မကျေပွဲက အနိုင်ရတဲ့သူနဲ့ တိုင်ဆန်ဗျူရီ ထိုးသတ်မယ်လို့ ပြောထားတာ ဖြစ်ပါတယ်။

တိုင်ဆန်ဗျူရီ အနေနဲ့ ဒီပွဲကို အနိုင်ရခဲ့မယ်ဆိုရင် ချန်ပီယံခါးပတ်တွေ အားလုံးကို ရယူနိုင်မှာ ဖြစ်ပြီး ကမ္ဘာ့အငြင်းပွားဖွယ်ရာ မရှိတဲ့ ချန်ပီယံအဖြစ် သတ်မှတ်ခံရမှာပါ။ ဗြိတိန် ဟဲဗီးဝိတ် ချန်ပီယံကတော့ ဒါနဲ့ ပတ်သက်ပြီး ငြင်းဆိုထားခြင်း မရှိသေးပါဘူး။

Source: Metro

CNI Sport News

၂၀၂၂ ခုနှစ်၊ ဇွန်လ ၃၀

မြန်မာနေရှင်နယ်လိဂ် ပွဲစဉ် ၁ ရဲ့ နောက်ဆုံးပွဲစဉ်အဖြစ် ဇွန်လ ၃၀ ရက်က ဂျီအက်ဖ်အေနဲ့ ရတနာပုံအသင်းတို့ ကစားခဲ့တာ မှာ ရတနာပုံအသင်းက ဂိုးပြတ် အနိုင်ရသွားခဲ့ပါတယ်။

ဒီပွဲမှာ ရတနာပုံအသင်းဟာ ဂျီအက်ဖ်အေအသင်းကို ၇ ဂိုး- ဂိုး မရှိနဲ့ ဂိုးပြတ် အနိုင်ရရှိခဲ့ပါတယ်။

ရတနာပုံ အသင်းအတွက် ဂိုးတွေကို ရဲရင့်အောင်က ၂ ဂိုး၊ မျိုးကိုထွန်း၊ သက်နိုင်၊ Thyne Phwet Aung ၊ ဘီဘီနဲ့ ဟိန်းနေဆန်း တို့က ၁ ဂိုးစီ သွင်းယူခဲ့တာ ဖြစ်ပါတယ်။ ရတနာပုံအသင်းဟာ ပထမပိုင်းမှာ ၃ ဂိုး ၊ ဒုတိယပိုင်းမှာ ၄ ဂိုး သွင်းယူခဲ့တာကြောင့် အခုလို ဂိုးပြတ် နိုင်ပွဲရရှိခဲ့တာ ဖြစ်ပါတယ်။

ရတနာပုံအသင်းနဲ့ ဂျီအက်ဖ်အေ အသင်းတို့ ယှဉ်ပြိုင်နေကြစဉ် (MNL)

မြန်မာနေရှင်နယ်လိဂ် ပွဲစဉ် ၁ ယှဉ်ပြိုင်အပြီးမှာ ရတနာပုံအသင်း အပါအဝင် ရန်ကုန်ယူနိုက်တက်၊ ဟံသာဝတီယူနိုက်တက်၊ ရှမ်းယူနိုက်တက်၊ ISPE FC တို့ နိုင်ပွဲရယူနိုင်ခဲ့ကြပါတယ်။

ရတနာပုံအသင်း ကတော့ နိုင်ပွဲရ အသင်းတွေနဲ့ ရမှတ်တူ ဂိုးကွာခြားချက်ကြောင့် မြန်မာနေရှင်နယ်လိဂ် အမှတ်ပေးဇယားကို ဦးဆောင်နိုင်ခဲ့ပြီ ဖြစ်ပါတယ်။ ဒုတိယနေရာမှာ ရှမ်းယူနိုက်တက်အသင်းက ရပ်တည်နေပါတယ်။

မြန်မာနေရှင်နယ်လိဂ် ပွဲစဉ် ၂ ရဲ့ ပွဲစဉ်တွေကို ဇူလိုင်လ ၂ ရက်နေ့မှာ ပြန်လည် စတင် ယှဉ်ပြိုင်မှာဖြစ်ပြီး အဖွင့်ပွဲစဉ်အဖြစ် ဟံသာဝတီ ယူနိုက်တက်နဲ့ မဟာယူနိုက်တက်အသင်းတို့ ယှဉ်ပြိုင်ကြမှာ ဖြစ်ပါတယ်။

CNI Sport News

၂၀၂၂ ခုနှစ်၊ ဇူလိုင် ၄

မြန်မာ့လက်ရွေးစင်တိုက်စစ်မှူး အောင်ကောင်းမာန်ဟာ ထိုင်းလိဂ် ၂ ကလပ် အူဒုံဌာနီအသင်းနဲ့ လာမယ့် ရာသီသစ်အတွက် တစ်ရာသီသက်တမ်းတိုး စာချုပ်ချုပ်ဆိုလိုက်ပြီလို့ အသင်းက တရားဝင် ထုတ်ပြန်လိုက်ပါ တယ်။

အောင်ကောင်းမာန်ဟာ ပြီးခဲ့တဲ့ ထိုင်းလိဂ်ရာသီရဲ့ ဒုတိယရာသီဝက်ကမှ အူဒုံဌာနီအသင်းကို ရောက်ရှိလာခဲ့တာ ဖြစ်ပြီး ခြေစွမ်းပြသနိုင်ခဲ့တာပါ။မြန်မာ့လက်ရွေးစင်ကစားသမားဟာ အူဒုံဌာနီအတွက် ၁၆ ပွဲ ပါဝင်ကစားခဲ့ပြီး ၃ ဂိုးသွင်းယူကာ ၂ ဂိုးဖန်တီးနိုင်ခဲ့တာဖြစ်ပါတယ်။အဲဒါကြောင့် ထိုင်းလိဂ် ၂ ကလပ်က စာချုပ်သက်တမ်း ကုန်ဆုံး ချိန်မှာ ကစားသမားကို သက်တမ်းတိုးဖို့ ဆုံးဖြတ်ခဲ့တာပါ။အောင်ကောင်းမာန်ဟာ စာချုပ်သစ်ကြောင့် ပြီးခဲ့တဲ့ ရာသီကထက် ပိုမိုကောင်းမွန်တဲ့ လစာခံစားခွင့် ရရှိခဲ့တာလည်းဖြစ်ပါတယ်။

အောင်ကောင်းမာန်ကို ခေါ်ယူဖို့ ထိုင်းလိဂ် ၁ ကလပ်တွေကလည်း စိတ်ဝင်စားခဲ့ပေမယ့် ကစားသမား ကိုယ်တိုင် က အသားကျပြီးသားဖြစ်တဲ့ အူဒုံဌာနီမှာပဲ ဆက်နေဖို့ ဆုံးဖြတ်ခဲ့တာလို့ အေးဂျင့်ဖြစ်သူရဲ့ ပြောဆိုမှုအရ သိရပါ တယ်။ “အူဒုံဌာနီနဲ့ နောက်ထပ်တစ်ရာသီ ထပ်ကစားခွင့်ရမယ့် အခွင့်အရေးအတွက် အလွန်စိတ်လှုပ်ရှားမိပါတယ်။ ကျနော်တို့ အတူတကွလက်တွဲပြီး အသင်းကို ကူညီမယ်”လို့ အောင်ကောင်းမာန်က သူရဲ့ ဆိုရှယ်မီဒီယာမှာ ရေးသားထားခဲ့တာပါ။

အူဒုံဌာနီအသင်းဟာ ပြီးခဲ့တဲ့ရာသီက ထိုင်းလိဂ် ၂ အမှတ်ပေးဇယား အဆင့် ၈ နေရာမှာသာ ရပ်တည်နိုင်ခဲ့တဲ့ အတွက် လာမယ့်ရာသီ လိဂ် ၁ ကိုတန်းတက်နိုင်ဖို့ ပြင်ဆင်နေတာဖြစ်ပါတယ်။

အဲဒါကြောင့် ကစားသမားသစ်တွေ ဖြည့်တင်းနေသလို အဓိက ကစားသမားအချို့ကိုလည်း စာချုပ်သက်တမ်းတိုးတာတွေ လုပ်ဆောင်နေတာပါ။

အောင်ကောင်းမာန်ဟာ မြန်မာနေရှင်လိဂ်ကလပ် ဧရာဝတီယူနိုက်တက်အသင်းမှာ ၂၀၂၀ အထိကစားခဲ့ပြီး အဲဒီ နောက်ပိုင်းမှာ ထိုင်းကလပ်တွေဖြစ်တဲ့ ထရက်၊ လမ်ပန်၊ ခွန်ကန်ယူနိုက်တက်နဲ့ မလေးရှားကလပ် ဆရီပါဟန် အသင်းတွေမှာ ကစားခဲ့တာဖြစ်ပါတယ်။အောင်ကောင်းမာန်ဟာ ပြီးခဲ့တဲ့ အာရှဖလားခြေစစ်ပွဲမှာ မြန်မာ့ လက်ရွေးစင်အသင်းအတွက် ပါဝင်ကစားခဲ့ပြီး စင်ကာပူကို အရေးနိမ့်ခဲ့တဲ့ပွဲမှာ တစ်ဂိုးသွင်းယူနိုင်ခဲ့တာ ဖြစ်ပါတယ်။

CNI Sport News

၂၀၂၂ ခုနှစ်၊ ဇွန်လ ၂၉

မြန်မာနေရှင်နယ်ပွဲစဉ် ၁ တွေထဲက ပွဲစဉ်တစ်ပွဲအဖြစ် ISPE FC နဲ့ ရခိုင်ယူနိုက်တက်တို့ ဇန်နဝါရီ ၂၉ ရက်(ယနေ့)တွင် ယှဉ်ပြိုင်ကစားခဲ့ရာ ISPE FC က အနိုင်ရခဲ့တာဖြစ်ပါတယ်။

ဒီပွဲမှာ ISPE FC က ရခိုင်ယူနိုက်တက်အသင်းကို ၃ ဂိုး- ၁ ဂိုးနဲ့ အနိုင်ရရှိခဲ့တာပါ။ISPE FC အတွက်ဂိုးတွေကို ခင်ကျော်ဝင်းက ၂ ဂိုးနဲ့ ပြည့်ဖြိုးခိုင်က ၁ ဂိုးသွင်းယူခဲ့ပြီး ရခိုင်ယူနိုက်အတွက် ဂိုးကို ဇော်ဇော်နိုင်က သွင်းယူခဲ့တာ ဖြစ်ပါတယ်။ဒီပွဲရဲ့ ပွဲအစ ၅ မိနစ်မှာကတည်းက ရခိုင်ယူနိုက်တက်အသင်း ဦးဆောင်ဂိုး စတင်ရရှိခဲ့တာဖြစ်ပြီး ဇော်ဇော်နိုင်က ပင်နယ်တီကနေ သွင်းယူခဲ့တာပါ။ဒါပေမယ့် ISPE FC အသင်းရဲ့ ထိုးဖောက်မှုတွေကို မထိန်းနိုင် ခဲ့တာကြောင့် ပထမပိုင်းမှာ ချေပဂိုးပြန်ပေးခဲ့ရပါတယ်။

ဒီဂိုးကို ခင်ကျော်ဝင်းက သွင်းယူခဲ့တာဖြစ်ပါတယ်။အဲဒါကြောင့် ပထမပိုင်းမှာ တစ်ဖက်တစ်ဂိုးစီသရေနဲ့ ပြီးဆုံး ခဲ့ပါတယ်။ဒုတိယပိုင်းမှာ နှစ်သင်းလုံးနိုင်ပွဲရဖို့ အားစိုက်ခဲ့ပေမယ့် ISPE FC အသင်းက ပိုပြီးကောင်းမွန်ခဲ့တာ ကြောင့် ဦးဆောင်ဂိုး နှစ်ဂိုးထပ်မံသွင်းယူသွားနိုင်ခဲ့တာပါ။ဒီဂိုးတွေကို ပွဲချိန် ၈၁ မိနစ်မှာ ပြည့်ဖြိုးခိုင်နဲ့ ပွဲချိန် ၈၉ မိနစ်မှာ ခင်ကျော်ဝင်းတို့က သွင်းယူခဲ့တာဖြစ်ပါတယ်။

ဒီပွဲစဉ်ရဲ့ပွဲပြီးဆုံးခါနီးမှာ ကစားပုံကြမ်းတမ်းရင်းနဲ့ အချင်းများခဲ့လို့ ဒိုင်လူကြီးက နှစ်ဖက်ကစားသမားတွေဖြစ်တဲ့ ရခိုင်ယူနိုက်တက်က ဇော်ဇော်နိုင်နဲ့ ISPE FC က ဇင်ရဲနောင်တို့က တိုက်ရိုက်အနီကတ်နဲ့ ထုတ်ပယ်ခံခဲ့ရတာပါ။

အဲဒါကြောင့် ပွဲအပြီးမှာ ISPE FC က ရခိုင်ယူနိုက်တက်ကို ၃ ဂိုး- ၁ ဂိုးနဲ့ အနိုင်ရရှိသွားခဲ့တာဖြစ်ပါတယ်။ဇွန်လ ၃၀ ရက်မှာတော့ ပွဲစဉ် ၁ ရဲ့နောက်ဆုံးပွဲစဉ်အဖြစ် GFA အသင်းနဲ့ ရတနာပုံအသင်းတို့ ယှဉ်ပြိုင်ကြမှာ ဖြစ်ပါတယ်။

CNI Sport News

၂၀၂၂ ခုနှစ်၊ ဇွန်လ ၂၅

၂၀၂၂ မြန်မာနေရှင်နယ်လိဂ် အဖွင့်ပွဲစဉ်အဖြစ် ရန်ကုန်ယူနိုက်တက်နဲ့ မြဝတီအသင်းတို့ ယှဉ်ပြိုင် ကစားခဲ့တာမှာ ရန်ကုန် ယူနိုက်တက်အသင်းက အနိုင်ရရှိ သွားခဲ့ပါတယ်။
ဇွန်လ ၂၅ ရက်က ကစားခဲ့တဲ့ ဒီပွဲမှာ ရန်ကုန်ယူနိုက်တက် အသင်းက ၂ ဂိုး- ဂိုး မရှိနဲ့ အနိုင်ရရှိခဲ့တာ ဖြစ်ပါတယ်။ နှစ်သင်း ကြား ကစားသမား ကွာဟချက် ကြီးမားခဲ့ပြီး ရန်ကုန်ယူနိုက်တက် အသင်းက သိသိသာသာ အသာစီး ရယူနိုင်ခဲ့တာပါ။

ပွဲချိန် ၁၃ မိနစ်မှာ လမင်းထွေးက ရန်ကုန်ယူနိုက်တက် အသင်းအတွက် ဦးဆောင်ဂိုး စတင် သွင်းယူခဲ့တာ ဖြစ်ပါတယ်။ ဒီသွင်းဂိုးဟာ အခုနှစ် မြန်မာနေရှင်နယ်လိဂ် ပြိုင်ပွဲရဲ့ ပထမဆုံး ဂိုးလည်း ဖြစ်ခဲ့ပါတယ်။

ရန်ကုန်ယူနိုက်တက် အသင်းအတွက် ဒုတိယဂိုးကိုတော့ ပွဲချိန် ၃၇ မိနစ်မှာ ထက်ဖြိုးဝေက သွင်းယူခဲ့တာပါ။ အဲ့ဒါကြောင့် ပထမပိုင်း အပြီးမှာ ရန်ကုန်ယူနိုက်တက်အသင်းက ၂ ဂိုးပြတ်နဲ့ ဦးဆောင်နေခဲ့တာ ဖြစ်ပါတယ်။

ရန်ကုန်ယူနိုက်တက်အသင်း ကစားသမား (YUFC)

ဒုတိယပိုင်းမှာတော့ ရန်ကုန်ယူနိုက်တက်က နောက်ထပ် ဦးဆောင်ဂိုးရဖို့ ကြိုးစားခဲ့သလို မြဝတီအသင်းက ချေပဂိုးရဖို့ အားထုတ်ခဲ့တာပါ။ ဒါပေမယ့် နှစ်သင်းစလုံး ဂိုးသမားတွေ လက်စွမ်း ပြသနိုင်ခဲ့တာကြောင့် ပထမပိုင်း ရလဒ်အတိုင်းပဲ ပွဲပြီးဆုံး သွားခဲ့တာ ဖြစ်ပါတယ်။

အဓိက ကစားသမား အများအပြားကို အားဖြည့်ထားပြီး ချန်ပီယံဆုရဖို့ ပစ်မှတ်ထားနေတဲ့ ရန်ကုန်ယူနိုက်တက် အတွက် တော့ အဖွင့်ပွဲစဉ်မှာ ၃ မှတ်ရပြီး အဖွင့်လှသွားခဲ့တာပါ။

ဇွန်လ ၂၆ ရက်မှာတော့ မြန်မာနေရှင်နယ်လိဂ် နောက်ထပ် ပွဲစဉ်တစ်ပွဲအဖြစ် ဟံသာဝတီ ယူနိုက်တက် အသင်းနဲ့ ဧရာဝတီ ယူနိုက်တက် အသင်းတို့ ယှဉ်ပြိုင်မှာ ဖြစ်ပါတယ်။

CNI Sport News

၂၀၂၂ ခုနှစ်၊ ဇူလိုင် ၂

မြန်မာအသင်းဟာ အာဆီယံ ယူ-၁၉ ချန်ပီယံရှစ်ပြိုင်ပွဲ အုပ်စုအဖွင့်ပွဲစဉ်အဖြစ် ဘရူနိုင်းအသင်းနဲ့ ဇူလိုင်လ ၂ ရက်(ယနေ့)တွင် ကစားခဲ့ရာ ၇ ဂိုး- ဂိုးမရှိနဲ့ ဂိုးပြတ်အနိုင်ရရှိခဲ့ပါတယ်။

မြန်မာအသင်းဟာ ဘရူနိုင်းအသင်းကို ပထမပိုင်းမှာ ၃ ဂိုး၊ ဒုတိယပိုင်းမှာ ၄ ဂိုးသွင်းယူခဲ့တာပါ။ မြန်မာအသင်း အတွက် ဂိုးတွေကို မိုးဆွေ၊ ဇော်ဝင်းသိန်း၊ လမင်းထွေး၊ ချစ်အေး၊ သာယာဝင်းထက်၊ အာကာကျော်နဲ့ သိန်းဇော် သီဟတို့က ၁ ဂိုးစီသွင်းယူခဲ့ကြတာဖြစ်ပါတယ်။

မြန်မာအသင်းဟာ ဒီပြိုင်ပွဲရဲ့ အုပ်စု A မှာ အိမ်ရှင်အင်ဒိုနီးရှား၊ ဗီယက်နမ်၊ ထိုင်း၊ ဖိလစ်ပိုင်၊ ဘရူနိုင်းတို့နဲ့ တစ်အုပ်စုတည်းကျရောက်နေတာဖြစ်ပြီး အုပ်စုဒုတိယပွဲစဉ်အဖြစ် ဇူလိုင်လ ၄ ရက်မှာ ထိုင်းအသင်းနဲ့ ယှဉ်ပြိုင် ရမှာပါ။အုပ်စုတွင်းက ထိပ်ဆုံး နှစ်သင်းစီသာ ဆီမီးဖိုင်နယ်အဆင့်ကို တက်ရောက်မှာဖြစ်ပါတယ်။

မြန်မာအသင်းဟာ အာဆီယံ ယူ-၁၉ ချန်ပီယံရှစ်ပွဲစဉ်အဖြစ် ၂၀၁၉ က နောက်ဆုံးယှဉ်ပြိုင်ခဲ့တဲ့ပွဲမှာ စတုတ္ထ နေရာသာ ရရှိခဲ့တာပါ။မြန်မာအသင်းဟာ ဒီပြိုင်ပွဲမှာ ၂ ကြိမ်ဗိုလ်စွဲထားပြီး ၎င်းမှာ ၂၀၀၃ နဲ့ ၂၀၀၅ ခုနှစ်က ဖြစ်တယ်လို့ သိရပါတယ်။

CNI Sport News

၂၀၂၂ ခုနှစ်၊ဇွန်လ ၂၈

မြန်မာ့လက်ရွေးစင်အမျိုးသမီးအသင်းဟာ ပြီးခဲ့တဲ့ ဆီးဂိမ်းစ်ပြိုင်ပွဲမှာ ကိုင်တွယ်ခဲ့တဲ့ ဦးတင်မြင့်အောင်ရဲ့ နေရာ မှာ လက်ရွေးစင်ဟောင်း ဒေါ်သက်သက်ဝင်းကို နည်းပြချုပ်အဖြစ်ခန့်အပ်လိုက်တယ်လို့ သိရပါတယ်။

ဒေါ်သက်သက်ဝင်းဟာ ဖိလစ်ပိုင်နိုင်ငံက အိမ်ရှင်အဖြစ်ကျင်းပမယ့် အာဆီယံအမျိုးသမီးချန်ပီယံရှစ်ပြိုင်ပွဲမှာ လက်ရွေးစင်အသင်းရဲ့နည်းပြချုပ်အဖြစ် တာဝန်ယူဆောင်ရွက်ရတော့မှာပါ။ဒေါ်သက်သက်ဝင်းဟာ ဇွန်လ ၉ ရက် က စတင်ပြီး မြန်မာ့လက်ရွေးစင်အသင်းကို ကိုင်တွယ်နေတာဖြစ်ပြီး ပဏာမကစားသမား ၃၅ ဦးနဲ့လေ့ကျင့်မှုတွေ ပြုလုပ်နေတာဖြစ်ပါတယ်။မြန်မာ့လက်ရွေးစင်အမျိုးသမီးအသင်းဟာ ဒီပြိုင်ပွဲရဲ့အုပ်စု B မှာ ဗီယက်နမ်၊လာအို၊ ကမ္ဘောဒီးယား၊ အရှေ့တီမောတို့နဲ့ တစ်အုပ်စုတည်းကျရောက်နေတာပါ။

ဒီပြိုင်ပွဲကို ဇူလိုင်လ ၂ ရက်ကနေ ၁၇ ရက်အထိ ကျင်းပသွားမှာဖြစ်ပါတယ်။မြန်မာ့လက်ရွေးစင်အမျိုးသမီး အသင်းဟာ ၂၀၁၉ က နောက်ဆုံးကျင်းပခဲ့တဲ့ ဒီပြိုင်ပွဲမှာ ဖိလစ်ပိုင်အသင်းကို အနိုင်ရပြီး တတိယရရှိခဲ့တာပါ။ အာဆီယံအမျိုးသမီးချန်ပီယံရှစ်ပြိုင်ပွဲမှာ မြန်မာ့လက်ရွေးစင်အမျိုးသမီးအသင်းဟာ ၂၀၀၄ နဲ့ ၂၀၀၇ ခုနှစ်တွေ တုန်းက ချန်ပီယံဆု ၂ ကြိမ် ရယူနိုင်ခဲ့တာဖြစ်ပါတယ်။

မြန်မာ့လက်ရွေးစင်အမျိုးသမီးအသင်းဟာ နောက်ဆုံးယှဉ်ပြိုင်ခဲ့တဲ့ အမျိုးသမီးအာရှဖလားနဲ့ ဆီးဂိမ်းစ်ပြိုင်ပွဲ တွေမှာ ရလဒ်တွေမကောင်းတာကြောင့် နည်းပြအပြောင်းအလဲပြုလုပ်ခဲ့ရတာပါ။အမျိုးသမီးအာရှဖလားပြိုင်ပွဲမှာ အုပ်စုအဆင့်နဲ့သာ ကျေနပ်ခဲ့ရပြီး ဆီးဂိမ်းစ်ပြိုင်ပွဲမှာတော့ ကြေးတံဆိပ်တောင်မရခဲ့ဘဲ ပြန်လာခဲ့ရတာ ဖြစ်ပါ တယ်။ဒေါ်သက်သက်ဝင်းဟာ အရင်ကလည်း လက်ရွေးစင်အမျိုးသမီးအသင်းကို နည်းပြချုပ်အဖြစ် တာဝန်ယူ ခဲ့ပါသေးတယ်။

ဒေါ်သက်သက်ဝင်းဟာ ၂၀၁၆ က အိုလံပစ်အမျိုးသမီးဘောလုံးပြိုင်ပွဲမှာ လက်ရွေးစင်အမျိုးသမီးအသင်းကို ယာယီနည်းပြချုပ်အဖြစ် ကိုင်တွယ်ခဲ့ပါတယ်။၂၀၁၈-၁၉ မှာ အသက် ၁၉ နှစ်အောက် အမျိုးသမီးအသင်းကို ကိုင်တွယ်ခဲ့ပြီး အသက် ၁၉ နှစ်အောက် အာရှအမျိုးသမီးပြိုင်ပွဲ ဝင်ခွင့်ရရှိအောင် စွမ်းဆောင်နိုင်ခဲ့တာပါ။ဒါ့အပြင် ဒေါ်သက်သက်ဝင်းဟာ လက်ရွေးစင်အမျိုးသမီးနည်းပြဟောင်းတွေဖြစ်တဲ့ ဂျပန်နည်းပြ ကုမာဒါနဲ့ နယ်သာလန် နည်းပြ ရော်ဂျာတို့လက်ထက်မှာလည်း လက်ထောက်နည်းပြအဖြစ် ဆောင်ရွက်ခဲ့တာဖြစ်ပါတယ်။

CNI Sport News

၂၀၂၂ ခုနှစ်၊ ဇွန်လ ၂၀

အခုနှစ်ရာသီ မြန်မာနေရှင်နယ်လိဂ်ပြိုင်ပွဲကို ပြိုင်ပွဲဝင်ကလပ်အသင်း ၁၀ သင်းနဲ့ ကျင်းပသွားမယ်လို့ ထုတ်ပြန် လိုက်ပါတယ်။

ပါဝင်ယှဉ်ပြိုင်မယ့် အသင်း ၁၀ သင်းကတော့ ရှမ်းယူနိုက်တက်၊ ဟံသာဝတီယူနိုက်တက်၊ ဧရာဝတီယူနိုက်တက်၊ ရန်ကုန်ယူနိုက်တက်၊ရတနာပုံအက်ဖ်စီ၊ရခိုင်ယူနိုက်တက်၊မဟာယူနိုက်တက်၊မြဝတီအက်ဖ်စီ၊ISPE FC နဲ့ GFA FC တို့ ပါဝင်ယှဉ်ပြိုင်သွားကြမှာပါ။

ဒီပြိုင်ပွဲရဲ့ ပထမအကျော့ပွဲစဉ်တွေကို ဇွန်လ ၂၅ ရက်ကနေ သြဂုတ်လ ၂၅ ရက် အထိ ကျင်းပသွားမှာဖြစ်ပြီး ဒုတိယအကျော့ပွဲစဉ်တွေကိုတော့ စက်တင်ဘာလ ၃ ရက်ကနေ နိုဝင်ဘာလ ၆ ရက် အထိ ကျင်းပသွားမှာဖြစ်ပြီး ပွဲစဉ်တွေအားလုံးကို သုဝဏ္ဏကွင်းမှာပဲ ကျင်းပသွားမှာဖြစ်ပါတယ်။

ပွဲစဉ် (၁) အဖြစ် မြဝတီအက်ဖ်စီနဲ့ ရန်ကုန်ယူနိုက်တက်၊ ဟံသာဝတီယူနိုက်တက်နဲ့ ဧရာဝတီယူနိုက်တက်၊ မဟာ ယူနိုက်တက်နဲ့ ရှမ်းယူနိုက်တက်၊ ISPE FC နဲ့ ရခိုင်ယူနိုက်တက်၊ GFA FC နဲ့ ရတနာပုံအသင်းတို့ ယှဉ်ပြိုင်ကြမှာပါ။

ပွဲစဉ် (၂) မှာတော့ ဟံသာဝတီယူနိုက်တက်နဲ့ မဟာယူနိုက်တက်၊ ဧရာဝတီယူနိုက်တက်နဲ့ ရခိုင်ယူနိုက်တက်၊ မြဝတီအက်ဖ်စီနဲ့ ISPE FC ၊ ရှမ်းယူနိုက်တက်နဲ့ GFA FC ၊ ရန်ကုန်ယူနိုက်တက်နဲ့ ရတနာပုံအသင်းတို့ ယှဉ်ပြိုင် ကြမှာဖြစ်ပါတယ်။

မြန်မာနေရှင်နယ်လိဂ်ပြိုင်ပွဲကို ၂၀၂၀ အောက်တိုဘာလက နောက်ဆုံးကျင်းပခဲ့တာဖြစ်ပြီး ၂ နှစ်နီးပါးအကြာမှ ပြန်လည်ကျင်းပနိုင်တော့မှာဖြစ်ပါတယ်။ နောက်ဆုံးကျင်းပခဲ့တဲ့ ပြိုင်ပွဲမှာတော့ ရှမ်းယူနိုက်တက်အသင်းက ချန်ပီယံဆုကို ရယူနိုင်ခဲ့တာဖြစ်ပါတယ်။

၂၀၀၉ ခုနှစ်ကတည်းက စတင်ကျင်းပခဲ့တဲ့ မြန်မာနေရှင်နယ်လိဂ်ပြိုင်ပွဲမှာ ရန်ကုန်ယူနိုက်တက်အသင်းက ချန်ပီယံဆု ၅ ကြိမ် ရရှိထားပြီး အအောင်မြင်ဆုံးအသင်းအဖြစ် ရပ်တည်နေတာပါ။

ရတနာပုံအသင်းက ၄ ကြိမ်နဲ့ ဒုတိယ၊ ရှမ်းယူနိုက်တက်အသင်းက ၃ ကြိမ်နဲ့ တတိယနေရာမှာ ရပ်တည်နိုင်ခဲ့တာဖြစ်ပါတယ်။

CNI Sport News

၂၀၂၂ ခုနှစ်၊ ဇူလိုင် ၁

မြန်မာပြည်ဖွား MMA တိုက်ခိုက်ရေး ကစားသမား အောင်လအန်ဆန်းက သူ့ရဲ့ ပိုကောင်းတဲ့ ပုံစံအသစ်တွေ မြင်တွေ့ရဖို့ ရှိတယ်လို့ ပြောလိုက်ပါတယ်။

အောင်လအန်ဆန်းက လေ့ကျင့်မှုတွေ ပြုလုပ်နေတဲ့ ဗွီဒီယိုဖိုင်နဲ့အတူ “ခင်ဗျားတို့ကို ကတိပေးပါတယ်။ ကျနော့်ရဲ့ ပိုကောင်း တဲ့ ပုံစံအသစ်တွေကို မြင်တွေ့ရဖို့ ရှိတယ်”လို့ သူ့ရဲ့ လှုမှုကွန်ရက်မှာ ရေးသားခဲ့ပါတယ်။

အောင်လအန်ဆန်းဟာ ပြီးခဲ့တဲ့ ဖေဖော်ဝါရီလက ရုရှားဖိုက်တာ ဘဏ်ဒက်ရှ်နဲ့ နောက်ဆုံးပွဲ ထိုးသတ်ထားခဲ့တာမှာ အရေး နိမ့်ခဲ့လို့ ချန်ပီယံခါးပတ် စိန်ခေါ်ခွင့် ဆုံးရှုံးခဲ့ပါတယ်။

အောင်လအန်ဆန်းဟာ နောက်ဆုံး ထိုးသတ်ထားခဲ့တဲ့ ၄ ပွဲမှာ ၃ ပွဲအထိ ရှုံးနိမ့်ထားတာကြောင့် နိုင်ပွဲပြန်ရနိုင်ဖို့ လေ့ကျင့်မှု တွေ ပြင်းပြင်းထန်ထန် လုပ်နေပါတယ်။

ဒါကြောင့် အောင်လအန်ဆန်းဟာ သူ ကြိုက်နှစ်သက်ခြင်း မရှိတဲ့ နပန်းပညာရပ်ကို မကြာသေးခင်က လေ့ကျင့်သင်ကြားခဲ့ပါသေးတယ်။

 အောင်လအန်ဆန်း ထိုးသတ်နေခြင်း (Aung La Nsang-FB)

မြန်မာပြည်ဖွား တိုက်ခိုက်ရေးသမားဟာ သူလက်လွှတ်ခဲ့ရတဲ့ မစ်ဒယ်ဝိတ် ချန်ပီယံခါးပတ်ကို ရယူနိုင်ဖို့ အာရုံစိုက် ကြိုးစား နေပါတယ်။

အောင်လအန်ဆန်းဟာဆိုရင် မစ်ဒယ်ဝိတ်နဲ့ လိုက်ဟဲဗီးဝိတ် ချန်ပီယံခါးပတ်တွေကို ၂၀၁၇ ကနေ ၂၀၁၉ အထိ ထိန်းထား နိုင်ခဲ့ပေမယ့် ၂၀၂၀ နဲ့ ၂၀၂၁ ပြိုင်ပွဲတွေမှာ အရေုးနိမ့်ပြီး ရိုင်နီယာထံ ချန်ပီယံခါးပတ် နှစ်ခုစလုံး လွှဲပေးခဲ့ရပါတယ်။

ဒီနောက် ရိုင်နီယာကို ပြန်စိန်ခေါ်နိုင်ဖို့ ပြီးခဲ့တဲ့ ဖေဖော်ဝါရီလက ထိုးသတ်ခဲ့တဲ့ပွဲမှာ ဘစ်ဒက်ရှ်ကို အရေးနိမ့်ပြီး မျှော်လင့်ချက် ပျက်ပြယ်ခဲ့ပါတယ်။

ဘစ်ဒက်ရှ်ကတော့ ချန်ပီယံခါးပတ်ကို ပြန်လည်ရယူနိုင်ဖို့ ရိုင်နီယာနဲ့ ထိုးသတ်ရတော့မှာ ဖြစ်ပါတယ်။ အသက် ၃၇ နှစ် အရွယ်ရှိ အောင်လအန်ဆန်းဟာ MMA ပွဲစဉ်ပေါင်း ၄၁ ပွဲအထိ ထိုးသတ်ထားခဲ့တာမှာ ၂၇ ပွဲ အနိုင်ရပြီး ၁၃ ပွဲ အရေး နိမ့် ခဲ့တာပါ။

အောင်လအန်ဆန်းဟာ ဒီအနိုင်ရတဲ့ ၂၇ ပွဲမှာ ၁၃ ပွဲကို အလဲထိုးခဲ့တာ ဖြစ်ပါတယ်။

CNI Sport News

၂၀၂၂ ခုနှစ်၊ ဇွန်လ ၂၇

၂၀၂၂ မြန်မာနေရှင်နယ်လိဂ်ပြိုင်ပွဲ ပွဲစဉ် ၁ ရဲ့ တတိယမြောက်ပွဲစဉ်အဖြစ် ဒီကနေ့ ဇွန်လ ၂၇ ရက်နေ့မှာ မဟာ ယူနိုက်တက်နဲ့ လက်ရှိချန်ပီယံ ရှမ်းယူနိုက်တက်တို့ ယှဉ်ပြိုင်ကစားခဲ့ကြပါတယ်။

ဒီပွဲမှာတော့ ရှမ်းယူနိုက်တက်အသင်းက မဟာယူနိုက်တက်အသင်းကို ၅ ဂိုး - ၁ ဂိုး နဲ့ အနိုင်ရရှိခဲ့တာပါ။ ပထမပိုင်းမှာ နှစ်သင်းစလုံး အပြန်အလှန်ထိုးဖောက်မှုတွေနဲ့ပွဲက အကြိတ်အနယ်ရှိခဲ့တာဖြစ်ပါတယ်။ အပြန် အလှန် သွင်းဂိုးတွေလည်း မြင်တွေ့ခဲ့ရပြီး ပထမပိုင်းမှာ ရှမ်းယူနိုက်တက်အသင်းက ၂ ဂိုး- ၁ ဂိုးနဲ့ အနိုင် ရရှိခဲ့တာပါ။ ရှမ်းယူနိုက်တက်အတွက် ဂိုးတွေကို မာခ့်ဆာကီးနဲ့ စအောင်ပြည့်ကို တို့က သွင်းယူခဲ့ပြီး မဟာ ယူနိုက်တက်အတွက် ဂိုးကို သူရမင်းနိုင်က သွင်းယူခဲ့တာဖြစ်ပါတယ်။

ဒုတိယပိုင်းမှာ ရှမ်းယူနိုက်တက်အသင်းက မဟာယူနိုက်တက်ထက် ပိုပြီးဖိအားပေးခြိမ်းခြောက်နိုင်ခဲ့တာကို တွေ့ခဲ့ရပါတယ်။ကစားအားလည်းတော်တော်လေး ကွာသွားခဲ့တာကို တွေ့မြင်ခဲ့ရတာပါ။ ရှမ်းယူနိုက်တက်အသင်း ဟာ ဂိုးသွင်းနိုင်ခွင့် အခွင့်အရေးအများအပြားလည်း ရရှိခဲ့ပေမယ့် အဆုံးသတ်ပိုင်း အားနည်းခဲ့တာကြောင့် ဂိုးသွင်း ခွင့်အများအပြားဆုံးရှုံးခဲ့ရပါတယ်။ဒါပေမယ့် ရှမ်းယူနိုက်တက်အသင်း နောက်ထပ် ၃ ဂိုး ထပ်သွင်းနိုင်ခဲ့တာပါ။

ဒီဂိုးတွေကို ရဲမင်းသူ၊ တည်ငြိမ်မင်းနဲ့ မာခ့်ဆာကီးတို့က သွင်းယူခဲ့တာပါ။အဲဒါကြောင့် ပွဲအပြီးမှာ ရှမ်းယူနိုက်တက် အသင်းက မဟာယူနိုက်တက်အသင်းကို ၅ ဂိုး- ၁ ဂိုးနဲ့ ဂိုးပြတ်အနိုင်ရရှိခဲ့တာဖြစ်ပါတယ်။

ဇွန်လ ၂၉ ရက်မှာတော့ နောက်ထပ် ပွဲစဉ်တစ်ပွဲအဖြစ် ISPE FC နဲ့ ရခိုင်ယူနိုက်တက်တို့ ယှဉ်ပြိုင်ကြမှာ ဖြစ်ပါ တယ်။

CNI Sport News

၂၀၂၂ ခုနှစ်၊ ဇွန်လ ၁၈

မြန်မာ့လက်ရွေးစင်တိုက်စစ်မှူး သန်းပိုင်ဟာ ထိုင်းလိဂ် ၃ ကလပ်အသင်းဖြစ်တဲ့ ကန်ချနာဘူရီအသင်းနဲ့ တစ်ရာသီစာချုပ် ချုပ်ဆိုလိုက်ပြီဖြစ်ပါတယ်။
ယူ-၂၀ ကမ္ဘာ့ဖလားပြိုင်ပွဲယှဉ်ပြိုင်ခွင့်ရ မြန်မာ ယူ-၂၀ အသင်းကနေ ထွက်ပေါ်လာခဲ့တဲ့ သန်းပိုင်ဟာ ၂၀၂၀ မှာ ရန်ကုန်ယူနိုက်တက်နဲ့ စာချုပ်ကုန်ဆုံးပြီးနောက် ရှမ်းယူနိုက်တက်ကို ပြောင်းရွှေ့ခဲ့တာပါ။ဒါပေမယ့် ရှမ်း ယူနိုက်တက်အသင်းအတွက် ပွဲမကစားခဲ့ရဘဲ ထိုင်းလိဂ် ၃ ကလပ်ကို ပြောင်းရွှေ့ခဲ့တာဖြစ်ပါတယ်။သန်းပိုင် ပြောင်းရွှေ့ခဲ့တဲ့ ကန်ချနာဘူရီအသင်းဟာ မြောင်ကန်အသင်း ကလပ်လိုင်စင် မရခဲ့တာကြောင့် ကန်ချနာဘူရီမြို့ အတွက် အစားထိုးဝင်ရောက်လာတဲ့အသင်း ဖြစ်တယ်လို့ သိရပါတယ်။

သန်းပိုင်နဲ့ ကန်ချနာဘူရီတို့ ချုပ်ဆိုထားတဲ့ စာချုပ်ထဲမှာ ဂိုးသွင်း၊ဂိုးဖန်တီးမှုပြုလုပ်နိုင်ပြီး အသင်းနိုင်ပွဲရရင် အပိုဆုကြေးတွေပါ ပေးမယ်လို့ အသင်းဥက္ကဋ္ဌက ကတိပေးထားကြောင်း ကစားသမားရဲ့ အေးဂျင့်ဖြစ်သူက ပြောထားတာဖြစ်ပြီး ရာသီဝက်မှာ သန်းပိုင်က ခြေစွမ်းပြဂိုးတွေသွင်းနိုင်ခဲ့လို့ လိဂ် ၁ နဲ့ လိဂ် ၂ အသင်းတွေက ကမ်းလှမ်းလာခဲ့ရင် အသင်းက ခွင့်ပြုပေးသွားမယ်လို့လည်း သိရပါတယ်။သန်းပိုင်ကိုခေါ်ယူဖို့ လမ်ဖွန်နဲ့ ချင်းမိုင် ယူနိုက်တက်တို့က စိတ်ဝင်စားခဲ့ပေမယ့် ကစားသမားကို တကယ်လိုချင်တဲ့ ကလပ်နဲ့ပဲ စာချုပ်ချုပ်ခဲ့တာလို့ အေးဂျင့်ဖြစ်သူ ကိုရဲနိုင်ဝင်းက သူ့ရဲ့ ဖေ့စ်ဘွတ်စာမျက်နှာမှာ ရေးသားထားတာပါ။

ဒါ့အပြင် သန်းပိုင်က ပြည်ပမှာ မကစားရရင် ပြည်တွင်းလိဂ်မှာ မကစားတော့ဘဲ ကစားသမားဘဝက အနားယူ တော့မယ်လို့လည်း သူက ဆက်ရေးသားထားပါသေးတယ်။

ကန်ချနာဘူရီစီးတီးအသင်းဟာ စုဖွဲ့မှုအသစ်နဲ့ မြို့တော်ဝန်ရဲ့ပံ့ပိုးမှုရှိနေတဲ့အသင်းဖြစ်ကြောင်းလည်း သိရပါတယ်။ မကြာသေးခင်ကမှ သန်းပိုင်ရဲ့ လက်ရွေးစင်အသင်းဖော် ငြိမ်းချမ်းအောင်ဟာ ထိုင်းလိဂ် ၂ ကလပ် နာခွန်ဆီအသင်းနဲ့ တစ်ရာသီစာချုပ်ချုပ်ခဲ့တာပါ။

သန်းပိုင်ဟာ မကြာသေးခင်က အာရှဖလားခြေစစ်ပွဲဝင်ခဲ့တဲ့ မြန်မာလက်ရွေးစင်အသင်းလူစာရင်းမှာ ပါဝင်ခဲ့တာ ဖြစ်ပြီး မြန်မာလက်ရွေးစင်အတွက် ပွဲပေါင်း ၃၀ ပါဝင်ကစားထားကာ ၂ ဂိုးသွင်းယူထားတယ်လို့ အချက်အလက် တွေအရ သိရပါတယ်။