CNI News
၂၀၂၃ ခုနှစ်၊ မေလ ၁၈

ဆိုင်ကလုန်းမုန်တိုင်း(မိုခါ) တိုက်ခတ်မှုကြောင့် ထိခိုက်ပျက်စီးခဲ့သော ဒေသများ ပြန်လည်ထူထောင်ရေးအတွက် တပ်မတော်အရာရှိကြီး ၁၄ ဦးကို ချင်းပြည်နယ်နှင့် ရခိုင်ပြည်နယ်တို့မှာ အသီးသီး တာဝန်ခွဲဝေ ပေးအပ်ခဲ့ကြောင်း နစက-က မေလ ၁၈ ရက်တွင် သတင်းထုတ်ပြန်သွားသည်။

CNI News

၂၀၂၃ ခုနှစ်၊ မေလ ၁၈

ရခိုင်ပြည်နယ်၊ စစ်တွေမြို့ကို ဖြတ်သန်း၍ ရခိုင်တစ်ပြည်နယ်လုံး အပါအဝင် မြန်မာနိုင်ငံအတွင်း မေလ ၁၄ ရက်နေ့က ဆိုင်ကလုန်းမုန်တိုင်း(မိုခါ) တိုက်ခတ်သွားခဲ့ခြင်းကြောင့် ထိခိုက်ပျက်စီးမှုများ ရှိခဲ့သည်။

ထို့ကြောင့် မိုခါမုန်တိုင်းဒဏ်ခံစားခဲ့ရသည့် မြန်မာပြည်သူများအတွက် လူသားချင်းစာနာထောက်ထားမှု အကူအ ညီနှင့် သဘာဝဘေးအန္တရာယ် ကယ်ဆယ်ရေးဆိုင်ရာပစ္စည်းများကို ကရုဏာမစ်ရှင် အစီအစဉ်ဖြင့် အိန္ဒိယအစိုး ရသည် မြန်မာနိုင်ငံဆိုင်ရာ အိန္ဒိယသံအမတ်ကြီး Shri Vinay Kumar မှတဆင့် ရန်ကုန်တိုင်းဒေသကြီး ဝန်ကြီး ချုပ် ဦးစိုးသိန်းထံ မေလ ၁၈ ရက်တွင် လွှဲပြောင်းပေးအပ်ခဲ့သည်။

အဆိုပါ ကယ်ဆယ်ရေးဆိုင်ရာပစ္စည်းများဖြစ်သော အရေးပေါ် အစားအစာ၊ မိုးကာတဲများ၊ ရွှေ့ပြောင်းရလယ် သော မီးစက်များ၊ အဝတ်အထည်များ၊ ရေစုပ်စက်များ၊ ဆေးဝါးများ၊ တာပေါ်လင်စများ၊ တစ်ကိုယ်ရည်သုံး ကျန်းမာရေးပစ္စည်းများ၊ ဘီးတပ် ထိုင်ခုံများနှင့် နှာခေါင်းစီး အပါအဝင် စုစုပေါင်း တန်ချိန် ၄၀ ကို အိန္ဒိယရေတပ် သင်္ဘောများဖြစ်သည့် INS Shivalik၊ INS Kamorta နှင့် INS Savitri တို့ တင်ဆောင်လာခဲ့ပြီး မေလ ၁၈ ရက် တွင် ရန်ကုန်မြို့မှာ ဆိုက်ကပ်ခဲ့သည်။

ထို့နောက် အရေးပေါ် ဆေးဝါးများနှင့် ဆေးသေတ္တာများကို အိန္ဒိယရေတပ်သင်္ဘောဖြစ်သည့် INS Gharial က မေလ ၁၉ ရက်နေ့တွင် တင်ဆောင်လာမည်ဖြစ်သည်။

ထိုပစ္စည်းများအားလုံးကို ရခိုင်ပြည်နယ်သို့ ချက်ခြင်းပေးပို့မည်ဖြစ်ပြီး မုန်တိုင်းဒဏ် ထိခိုက်ခံစားရသည့် လူမှု အသိုင်းအဝန်းများကို ဖြန့်ဖြူးပေးမည်ဟု မြန်မာနိုင်ငံဆိုင်ရာ အိန္ဒိယသံရုံးက သတင်းထုတ်ပြန်ခဲ့သည်။

ဆိုင်ကလုန်းမုန်တိုင်း(မိုခါ) တိုက်ခတ်မှုကြောင့် ရခိုင်ပြည်နယ်အတွင်းရှိ မြို့နယ်ပေါင်း ၁၇ မြို့နယ် အပါအဝင် ချင်းပြည်နယ်အတွင်းက ပလက်ဝမြို့နယ်၊ ဟားခါးမြို့နယ်။ မတူပီမြို့နယ်၊ တီးတိန်မြို့နယ်တို့ကို သဘာဝ ဘေးအန္တရာယ် ကျရောက်သော ဒေသများအဖြစ် နစက-က သတ်မှတ်ကြောင်း ကြေညာခဲ့သည်။

ထို့နောက် မုန်တိုင်းဒဏ်သင့် ဒေသများမှ ပြည်သူများအတွက် ကူညီကယ်ဆယ်ရေးနှင့် ပြန်လည် ထူထောင် ရေး လုပ်ငန်းများ လုပ်ဆောင်နိုင်ရန်အတွက် ပြည်တွင်း အလှူရှင်များက ကျပ်သိန်းပေါင်း ၁ သိန်းကျော် လှူဒါန်းခဲ့ရာ ရခိုင်ပြည်နယ်သို့ ကျပ်သိန်းပေါင်း ၇ သောင်း ထောက်ပံ့ပေးခဲ့သည်။

CNI International News

ဆန်တီယာဂို၊ ဖေဖော်ဝါရီ ၆

တောမီးလောင်ကျွမ်းမှု အခြေအနေများကြောင့် ချီလီအစိုးရက နောက်ထပ် ဒေသတစ်ခုကို အရေးပေါ် အခြေ အနေ ထပ်မံကြေညာခဲ့သည်ဟု အယ်ဂျာဇီးယား သတင်းတွင် ဖော်ပြထားသည်။

တောမီးကြောင့် အနည်းဆုံး လူ ၂၃ ဦး သေဆုံးခဲ့ပြီဖြစ်ကာ မီးသတ်သမားများလည်း တောမီးများကို ထိန်းချုပ်ရန် ရုန်းကန်နေရသည်။

စနေနေ့က အရေးပေါ် အခြေအနေ ကြေညာခဲ့သည့် ဒေသမှာ အာရူကာနီယာ (Araucania) ဖြစ်သည်။

ယင်းသည် ယခင်က အရေးပေါ်အဖြစ် သတ်မှတ်ထားသည့် ဘီယိုဘီယို (Biobio) နှင့်နျူဘယ် (Nuble)ဒေသ တို့နှင့် ကပ်လျက်ရှိပြီး နိုင်ငံ၏ရှည်လျားသော ပစိဖိတ်ကမ်းရိုးတန်း အလယ်အနီးတွင် တည်ရှိသည်။

 ချီလီတောမီးလောင်ကျွမ်းနေစဉ်

စနေနေ့ ကြေညာချက်ကြောင့် အစိုးရအနေဖြင့် တောမီး ငြိမ်းသတ်ရေးတွင် စစ်တပ်ကို အသုံးပြုခွင့်လည်း ရရှိမည်ဖြစ်သည်။ ရာသီဥတု အခြေအနေက ပျံ့နေသော မီးကိုငြိမ်းရန် ခက်ခဲစေကြောင်းနှင့် အခြေအနေများမှာ ပို၍ ဆိုးရွားလာပြီဖြစ်ကြောင်း ချီလီပြည်ထဲရေးဝန်ကြီး ကာရိုလီန တိုဟာ (Carolina Toha) က ပြောသည်။

တောမီးနှင့် ဆက်စပ်နေသော ဖြစ်ရပ်များကြောင့် အနည်းဆုံး လူ ၂၃ ဦး သေဆုံးကာ ၉၇၉ ဦး ဒဏ်ရာရရှိခဲ့သည်။

လူပေါင်း ၁၁၀၀ ကျော်ကိုလည်း ဘေးလွတ်ရာကို ရွှေ့ပြောင်းပေးထားရသည်။

သေဆုံးသူများမှ ၁၁ ဦး သို့မဟုတ် တစ်ဝက်ခန့်သည် ဘီယိုဘီယိုရှိ ဆန်တာဂျူအာနာ (Santa Juana) တွင် သေဆုံးခဲ့ခြင်း ဖြစ်သည်။

သေဆုံးသူများမှ တစ်ဦးမှာ ဘိုလီဗီးယား လေယာဉ်မှူး ဖြစ်သည်။ ၎င်းသည် လေယာဉ်ဖြင့် မီးငြိမ်းသတ်ရေးကို ကူညီပေးနေစဉ် လေယာဉ်ပျက်ကျ၍ သေဆုံးခဲ့ရခြင်း ဖြစ်သည်။

 ချီလီတောမီးလောင်ကျွမ်းနေစဉ်

စနေနေ့တွင် တောမီးငြိမ်းသတ်ရေး၌ မီးသတ်သမားပေါင်း ၂၃၂ ဦး ပါဝင်လှုပ်ရှားနေကြောင်း ချီလီတောင်ပိုင်းမှ အပူချိန်များမှာ ၁၀၄ ဖာရင်ဟိုက်ထက် ကျော်လွန်နေကြောင်း ဒေသဆိုင်ရာ အာဏာပိုင်များက ပြောသည်။

တောမီးလောင်မှု ၁၅၁ ခုကို ထိန်းချုပ်နိုင်ခဲ့ပြီဟု ချီလီ သဘာဝဘေးအန္တရာယ် လျော့ပါးရေးအေဂျင်စီက ပြော သည်။ သောကြာနေ့က ထုတ်ပြန်သော အချက်အလက်များတွင် တောမီးသည် ဟက်တာ ၄၀၀၀၀ နီးပါး လောင် ကျွမ်းခဲ့သည်ဟု ဖော်ပြထားသည်။

တောမီးလောင်ကျွမ်းနေသော ဒေသသုံးခုသည် လူနေ ကျဲကာ စပျစ်၊ ပန်းသီးနှင့် ဘယ်ရီသီးများကို နိုင်ငံခြားသို့ တင်ပို့ရန် စိုက်ပျိုးသည့် စိုက်ပျိုးရေးခြံများနှင့် သစ်တောဧရိယာများစွာ ရှိသည်။

Source: Aljazeera

CNI International News

မနီလာ၊ ဒီဇင်ဘာ ၂၉

ခရစ္စမတ်သီတင်းပတ် ကုန်ပိုင်းကာလ ဖိလစ်ပိုင်နိုင်ငံတွင် ဖြစ်ပွားခဲ့သော မိုးသည်းထန်စွာ ရွာသွန်းမှုနှင့် ရေကြီးမှုများကြောင့် အနည်းဆုံး ၂၉ ဦး သေဆုံးပြီး ၂၅ ဦး ပျောက်ဆုံးနေသည်ဟု ဖိလစ်ပိုင်နိုင်ငံ၏ အမျိုးသားသဘာဝ ဘေးအန္တရာယ် တုန့်ပြန်ရေးအေဂျင်စီက ဗုဒ္ဓဟူးနေ့တွင် ပြောကြားခဲ့ကြောင်း အေပီ သတင်းတွင် ဖော်ပြထားသည်။

ဖိလစ်ပိုင်နိုင်ငံအရှေ့ပိုင်း၊ အလယ်ပိုင်းနှင့်တောင်ပိုင်းတို့တွင် ခရစ္စမတ် အခမ်းအနားများကို ဖျက်ဆီးခဲ့သော ရာသီဥတု ဆိုးရွားမှုကြောင့် လူပေါင်း ၈၆,၀၀၀ ကျော်သည် အရေးပေါ် ကယ်ဆယ်ရေး စခန်းများတွင် နေထိုင် နေရဆဲ ဖြစ်သည်။

ထွက်ပေါ်လာသည့် ဓာတ်ပုံများတွင်လည်း နိုင်ငံတောင်ပိုင်း ပြည်နယ်တစ်ခုတွင် အရေးပေါ် ကယ်ဆယ်ရေး သမား များက ရေကြီးနေသော လမ်းမတစ်ခု၌ သက်ကြီးရွယ်အို တစ်ဦးကို ပလတ်စတစ်ခုံ တစ်လုံးဖြင့် ဘေးလွတ်ရာသို့ ရွှေ့ပြောင်း ပေးနေသည်ကို တွေ့ရသည်။

ဖိလစ်ပိုင်တွင် ရေကြီးမှုကြောင့် ပြည်သူများကို ကယ်ဆယ်ရေးလုပ်နေစဉ် (Reuters)

ဒေသခံတချို့ကိုလည်း ဘောကွင်းများဖြင့် မြင်တွေ့ခဲ့ရပြီး ၎င်းတို့ကို ကယ်ဆယ်ရေး ဝန်ထမ်းများမှ ရင်စို့လောက် နစ်သောရေတွင် ကြိုးတစ်ချောင်းကို အသုံးပြု၍ ဆွဲယူကာ ကယ်ဆယ်ပေးနေသည်ကို တွေ့ရသည်။

သေဆုံးသူ ၂၉ ဦးအနက် ၁၈ ဦးမှာ မြောက်ပိုင်း မင်ဒါနာအို (Mindanao) ဒေသမှဖြစ်ပြီး ပျောက်ဆုံးနေသူ ၂၅ ဦးမှ ၁၂ ဦးမှာ ဖိလစ်ပိုင်နိုင်ငံ အလယ်ပိုင်းရှိ အရှေ့ ဗီဆာယတ် ( Eastern Visayas) ပြည်နယ်က ဖြစ်သည်ဟု ဖိလစ်ပိုင် အမျိုးသားသဘာဝ ဘေးအန္တရာယ် လျော့ချရေးနှင့် စီမံခန့်ခွဲရေးကောင်စီက ပြောသည်။

သေဆုံးသူများထဲက အများစုမှာ ရေနစ်ခြင်းကြောင့်ဖြစ်ပြီး ပျောက်ဆုံးနေသူများတွင် လှေမှောက်ခဲ့သော ငါးဖမ်း သမားများပါ ပါဝင်နေသည်ဟု အေဂျင်စီက ပြောသည်။

ရေကြီးမှုများကြောင့် လူနေအိမ် ၃၂၀၀ ကျော်အပြင် လမ်းများ၊ တံတားများ ပျက်စီးခဲ့ရပြီး တချို့ ဧရိယာများတွင် လျှပ်စစ်မီး ပျက်တောက်ခြင်း သို့မဟုတ် ရေပြတ်တောက်ခြင်းများလည်း ဖြစ်ပွားခဲ့သည်ဟု အေဂျင်စီက ပြောသည်။

လေပူနှင့်လေအေး တွေ့ဆုံရာ ဆုံမှတ်ရာသီဥတု စနစ်ကြောင့် ဖိလစ်ပိုင် တစ်နိုင်ငံလုံးတွင် မိုးရွာသွန်းခဲ့ခြင်း ဖြစ် သည်ဟု နိုင်ငံ၏ မိုးလေဝသဗျူရိုက ပြောသည်။

လေဖိအားနည်း ရပ်ဝန်းသစ် တစ်ခုကြောင့် ရေကြီးမှုဖြစ်ပွားခဲ့ရာ ဧရိယာများတွင် လာမည့် ၂၄ နာရီအတွင်း မိုးသည်း ထန်စွာ ရွာသွန်းနိုင်ခြေ သို့မဟုတ် မိုးရွာနိုင်ခြေ ရှိသည်ဟုလည်း ဗျူရို၏ ထုတ်ပြန်မှု၌ ပါဝင်သည်။

Source: AP

CNI News

၂၀၂၂ ခုနှစ်၊ ဒီဇင်ဘာ ၂၈

အချိန်အခါမဟုတ် မိုးရွာသွန်းမှုကြောင့် မွန်ပြည်နယ်အတွင်းရှိ နေလှန်းဆားလုပ်ငန်းများသည် ဆားရာသီပြန်စပြီး ၂ လနီးပါးကြာသည်အထိ ဆားမထုတ်လုပ်နိုင်သေးဘဲ အခက်အခဲမျိုးဆုံနှင့် ရင်ဆိုင်နေရသည်ဟု ဆားတောင်သူ များက CNI သတင်းဌာနသို့ ပြောသည်။

နေလှန်းဆားလုပ်ငန်းများတွင် လက်ရှိကြုံတွေ့နေရသည့် အခက်အခဲများနှင့် ပတ်သက်ပြီး မွန်ပြည်နယ်၊ သံဖြူဇရပ်မြို့နယ်အတွင်းရှိ ဝဲကလောင်းကျေးရွာမှ ဆားတောင်သူ ဦးလှတင်က “အလုပ်ကတော့ အောက်တို ဘာလ ထွက်ထားတယ်။ ကွင်းပြင်တယ်။ ကွင်းပြင်တဲ့အခါကျ မိုးကလည်း မိုးရွာလိုက်၊ ခါတိုင်း နေ့ဆိုရင် နေပူတယ်ပေါ့ဗျာ။ ညဆိုရင် မိုးအေးတာနဲ့ဆိုရင် မိုးရွာတယ်။ မိုးရွာတော့ နေ့မှာ အလုပ်လုပ်တယ်။ ညကျတော့ မိုးရွာချလိုက်ပြန်။ နောက်နေ့ကျလို့ရှိရင် ကျနော်တို့လုပ်ငန်းက ဆားက နေနဲ့ပဲ လှန်းရတာဆိုတော့ တခြားလုပ်ငန်းနဲ့လည်း မတူဘူး။ အုတ်လုပ်ငန်းနဲ့လည်း မတူဘူး။ ရော်ဘာခြစ်တဲ့လုပ်ငန်းနဲ့လည်း မတူဘူး။ ရော်ဘာခြစ်တာက အပင်ခြောက်သွားရင် ထပ်ခြစ်လို့ရတယ် တစ်ရက်လောက်ပဲ ကြာတယ်။ ကျနော်တို့က တစ်ရက်လောက်နဲ့ မရဘူး။ အဲလိုမျိုး မိုးကလည်း ဆက်တိုက် ဆက်တိုက်ဖြစ်နေတော့ နေ့ဆိုပူတယ်ပေါ့။ ညဆိုရင် မိုးပြန်ရွာချတယ်။ အဲလိုမျိုး ရာသီဥတုက ဖောက်ပြန်နေတော့ ကျနော်တို့က လုပ်ရကိုင်ရတာ နည်းနည်း ကြန့်ကြာတယ်ပေါ့။ ကျနော်တို့ ဆားထွက်နောက်ကျတာကတော့ အဲဒီရာသီဥတုကြောင့် ကျနော်တို့ ဆားထွက်နောက်ကျတယ်ဆိုလို့ရှိရင် ကျနော်တို့ ကုန်ကျစရိတ် များတာပေါ့။ ကုန်ကျစရိတ် များပြီးတော့ ကျနော်တို့က ဒီထွက်တဲ့ ဆားဈေးနှုန်းနဲ့ မူတည်ပြီးတော့ ဆားဈေးနှုန်းက နည်းနည်းလိုက်လာပေးလို့ရှိရင် ကျနော်တို့ နည်းနည်းခံသာတာပေါ့။ ဆားအသစ်ထွက်လို့ရှိရင် ဈေးထိုးကျသွားရော” ဟု CNI သတင်းဌာနသို့ ပြောသည်။

မွန်ပြည်နယ်တွင် နေလှန်းဆားလုပ်ငန်းကို နှစ်စဉ် အောက်တိုဘာလမှ မေလအထိ လုပ်ကိုင်ကြခြင်းဖြစ်ပြီး ယခုနှစ် ဆားရာသီအချိန်တွင် အချိန်အခါမဟုတ် မိုးရွာသွန်းမှုများ ဆက်တိုက်ရှိနေခြင်းကြောင့် လက်ရှိ ဒီဇင်ဘာလအထိပင် ဆားမထုတ်လုပ်နိုင်သေးကြောင်း သိရသည်။

 နေလှန်းဆားများ ထုတ်လုပ်နေစဉ်

ဆားအသစ်ထုတ်လုပ်နိုင်မှု နောက်ကျခြင်းကြောင့် ဆားလက်ကျန်ဈေးနှုန်းများ မြင့်တက်လာနိုင်ကြောင်း၊ ဆားထွက်ရှိမှု နောက်ကျခြင်းကြောင့် ဆားတောင်သူများအနေဖြင့် ကုန်ကျစရိတ် ပိုမိုမြင့်တက်လာမည်ဖြစ်သော ကြောင့် ဆားအသစ် ထွက်ပေါ်ချိန်တွင် ဆားတစ်ပိဿာ ၃၀၀ ကျပ်အထက် ရရှိမှသာ ဆားတောင်သူများအတွက် အဆင်ပြေမည်ဖြစ်ကြောင်း ဆားတောင်သူ ဦးမြင့်မင်းက CNI သို့ ပြောသည်။

“ဈေးကွက်ပေါ်မှာက ဆားထွက်နောက်ကျလို့ရှိရင် တချို့ကုန်သည်တွေက၊ ကြိတ်စက်သမားတွေကတော့ ဝယ်ဖို့ ဆားမရှိတော့ ဈေးနည်းနည်း ပိုတက်သွားမှာပေါ့။ ၂၀၀ လောက်၊ ၂၅၀ လောက် ရှိတဲ့ဆားက ၃၀၀ လောက် ဖြစ်သွားမှာပေါ့။ ကျနော်တို့ဆားက တောင်သူတွေအနေနဲ့ဆိုရင် ကျနော်တို့ ရင်းနှီးမြှုပ်နှံထားတာနဲ့ ပြန်တွက်မယ် ဆိုလို့ရှိရင် ဆားဈေးက ကျနော်တို့ ၃၀၀ အထက်မှာ ရှိလို့ရှိရင် ကျနော်တို့ နည်းနည်းကာမိတယ်ပေါ့လေ အဆင်ပြေတာပေါ့။ ၃၀၀ အောက် ကျသွားလို့ရှိရင် ကျနော်တို့ အရှုံးပေါ်တာပေါ့” ဟု CNI သတင်းဌာနသို့ ပြောသည်။

လက်ရှိတွင် ဆားရာသီပြန်စနေပြီဖြစ်သော်လည်း ဆားမထုတ်လုပ်နိုင်သေးသည့်အတွက် ဆားဈေးနှုန်းများသည် တစ်ပိဿာ ၂၀၀ ကျပ်မှ ၂၇၀ ကျပ်သို့ မြင့်တက်လာနေကြောင်း သိရသည်။

သို့သော် ဆားအသစ်ထွက်ပေါ်ချိန်တွင် ဈေးနှုန်းများ ကျဆင်းလေ့ရှိသည့်အတွက် ဆားဈေးနှုန်းများ ထပ်ကျမည်ကို လည်း တောင်သူများက စိုးရိမ်နေကြသည်။

မွန်ပြည်နယ်တွင် နေလှန်းဆားလုပ်ငန်းကို သံဖြူဇရပ်မြို့နယ်၊ ပေါင်မြို့နယ်နှင့် ရေးမြို့နယ်တို့တွင် အဓိက လုပ်ကိုင်လျက်ရှိပြီး ကရင်ပြည်နယ်၊ တနင်္သာရီတိုင်းဒေသကြီးနှင့် မန္တလေးတိုင်းဒေသကြီးတို့ကို ဖြန့်ဖြူးရောင်းချလျက်ရှိကာ နှစ်စဉ် ဆားတန်ချိန် ၄၂၅၀၀၀ ထုတ်လုပ်လျက်ရှိကြောင်း သိရသည်။

CNI International News

ကင်ရှာဆာ၊ ဒီဇင်ဘာ ၁၅

ကွန်ဂိုနိုင်ငံ၏မြို့တော် ကင်ရှာဆာတွင် နှစ်ပေါင်းများစွာအတွင်း အဆိုးရွားဆုံးသော ရေကြီးမှုများကြောင့် လူ ၁၂၀ ကျော် သေဆုံးခဲ့သည်ဟု အာဏာပိုင်များက ပြောကြောင်း ဘီဘီစီ အင်္ဂလိပ်ပိုင်း သတင်းတွင် ဖော်ပြထားသည်။

နာရီပေါင်းများစွာ မိုးအဆက်မပြတ် ရွာသွန်းမှုကြောင့် မြို့လယ်ရှိ လမ်းများ ရေနစ်မြုပ်ခဲ့ပြီး အိမ်တချို့လည်း ပြိုကျပျက်စီးခဲ့သည်။

သေဆုံးခဲ့သူများမှ အများစုမှာ အင်္ဂါနေ့(ဒီဇင်ဘာ ၁၃ ရက်)တွင် ဖြစ်ပွားခဲ့သော မြေပြိုမှုများ၌ ပါဝင်နေသည့် တောင်ကုန်း ဒေသများမှ ဖြစ်သည်။

အဆိုပါ ဖြစ်ရပ်များကြောင့် ကွန်ဂိုအစိုးရက သုံးရက်ကြာ နိုင်ငံတော်အဆင့် ဝမ်းနည်းပူဆွေးမှုအဖြစ် သတ်မှတ် ကြောင်း ကြေညာသည်။ ရေကြီးမှုများကြောင့် မြို့တော်ရှိ ရပ်ကွက်များတွင် ရွံ့ရေများဖြင့် ဖုံးလွှမ်းနေပြီး အိမ်နှင့် လမ်းများသည် ချိုင့်ကြီးများကြောင့် ပျက်စီးခဲ့သည်။

ကွန်ဂိုနိုင်ငံမြို့တော် ကင်ရှာဆာမှာ ရေကြီးမှုကြောင့် ပျက်စီးနေသည်ကိုတွေ့ရစဉ် (Reuters)

ပျက်စီးခဲ့သည့် လမ်းများတွင် မြို့တော် ကင်ရှာဆာ (Kinshasa) နှင့် နိုင်ငံအတွက် အရေးပါသော မာတာဒီ (Matadi) ဆိပ်ကမ်းကို ဆက်သွယ်ထားသည့် N1 အဝေးပြေးလမ်းမလည်း ပါဝင်သည်။ ရေကြီးမှုကြောင့် အိမ်ပြို ကျခဲ့ကာ မိသားစုဝင်များ အိမ်အတွင်း ပိတ်မှုနေခဲ့ကြောင်း ကိုယ်တိုင် ကြုံတွေ့ခဲ့ရသည့် ဒေသခံတစ်ဦးက BBC သို့ ပြောသည်။

“အိမ်အတွင်းကို မည်သို့မှ မဝင်နိုင်ခဲ့ကြောင်း၊ ကလေးတစ်ဦးကိုသာ ကယ်တင်ခဲ့နိုင်ပြီး ဇနီးသည်နှင့်ကျန်ကလေး သုံးဦး အပျက်အစီးများကြား ပေါလောမျောကာ သေဆုံးနေသည်ကို မြင်တွေ့ခဲ့ရသည်” ဟု ကန်ဂါဝမ်ဘာ (Kenga Mwamba)က ပြောသည်။

ရေကြီးမှုများကြောင့် အိမ်ပြိုမှုများအတွင်း လူ ၉ ဦးပါ မိသားစုတစ်ခုလုံး သေဆုံးနေသည်ကိုလည်း မျက်မြင်တွေ့ခဲ့ ရသည်ဟု အေအက်စ်ပီ(AFP)သတင်းသမားတစ်ဦးက ပြောသည်။

အဆိုပါ ဖြစ်ရပ်ဆိုးမျိုးကို မကြုံတွေ့ခဲ့ ဖူးကြောင်းနှင့် အိမ်အတွင်းရှိ ပိုင်ဆိုင်မှုအားလုံးကို ရေကြီးမှုများအတွင်း ဆုံးရှုံးခဲ့ရသည်ဟု အခြားဒေသခံ တစ်ဦးက ပြောသည်။

ကွန်ဂိုဝန်ကြီးချုပ် ဂျင်-မစ်ချယ် ဆာမာ လူကွန်ဒီကိုတွေ့ရစဉ် (GETTY IMAGES)

ကွန်ဂိုဝန်ကြီးချုပ် ဂျင်-မစ်ချယ် ဆာမာ လူကွန်ဒီ (Jean-Michel Sama Lukonde)က အစိုးရကိုယ်စားလှယ်အဖွဲ့ တစ်ခုကို ဦးဆောင်ကာ ကင်ရှာဆာ မြို့တွင်းမှ အပျက်အစီးများကို သွားရောက်ကြည့်ရှုခဲ့သည်။

သေဆုံးသူ ဦးရေမှာ ထပ်မံ မြင့်တက်လာနိုင်သည်ဟု အစိုးရဘက်က ပြောသည်။ ယခုကဲ့သို့ ဆိုးဆိုးရွားရွား ရေကြီးမှုများမှ ရာသီဥတုပြောင်းလဲမှုကြောင့်ဟု ကွန်ဂိုသမ္မတနှင့် အမေရိကန်တို့က ပြစ်တင်သည်။

ကင်ရှာဆာမြို့မှာ ကွန်ဂိုမြစ်ပေါ်တွင် တည်ရှိပြီး မကြာသေးခင် နှစ်များအတွင်း လူနေမှု ထူထပ်လာကာ လက်ရှိ အချိန်၌ လူဦးရေ ၁၅ သန်း နေထိုင်လျက် ရှိသည်။ လူနေအိမ် အများစုကို ရေကြီးမှုများဖြစ်ရာ လျှောစောက်များ တွင် ဖြစ်သလို တည်ဆောက်ထားကြပြီး မြို့၏ ရေဆိုးစနစ်နှင့် မိလ္လာစနစ်တို့မှာလည်း လုံလောက်မှု မရှိကြောင်း သိရသည်။

Source: BBC

CNI International News

တိုကျို၊ စက်တင်ဘာ ၁၉

ပြင်းထန်သော အပူပိုင်းမုန်တိုင်း Nanmadol သည် ဂျပန်နိုင်ငံ၏ အနောက်ပိုင်းသို့ ရွေ့လျားနေပြီး ချူဂိုကူးနှင့် ရှီကိုကူး ဒေသများအပြင် ကျူးရှူးကျွန်း၏ တစိတ်တပိုင်းအထိပါ လေပြင်းများ တိုက်ခတ်လျက်ရှိကြောင်း စက်တင်ဘာ ၁၉ ရက် (ယနေ့) ညနေပိုင်းတွင် ဂျပန်သတင်းဌာန NHK က ရေးသားဖော်ပြသည်။

ဂျပန်နိုင်ငံ အနောက်တောင်ပိုင်း၊ မီယာဇာကီစီရင်စုနှင့် အခြားနေရာများတွင် မိုးသည်းထန်စွာ ရွာသွန်းမှုကြောင့် ရေကြီးမှုနှင့် ကမ်းပါးပြိုကျမှုများ ဖြစ်ပွားခဲ့သည်။ သို့သော် မီယာဇာကီစီရင်စုအတွက် အရေးပေါ် မိုးသည်းထန်မှု သတိပေးချက်ကို စက်တင်ဘာ ၁၉ ရက် (ယနေ့) နံနက်နှောင်းပိုင်းတွင် အဆင့်လျှော့ချခဲ့သည်။ သို့သော် မိုးရွာ သွန်းမှုကြောင့် နေရာအနှံ့အပြားတွင် ရေကြီးမှုများရှိကြောင်း သိရသည်။

ချူဂိုကူးနှင့် ရှီကိုကူးတို့တွင် မိုးနှင့်လေ ပိုမိုပြင်းထန်လာခဲ့ပြီး နန်မဒေါမုန်တိုင်း နီးလာသည်နှင့်အမျှ အဆိုပါ ဒေသ အချို့မှာ မြေပြိုမှု အန္တရာယ်နှင့် ရင်ဆိုင်နေရသည်။

 ဂျပန်သတင်းဌာနက မုန်တိုင်းအခြေအနေကို ကြေညာနေစဉ်

ယနေ့ ဒေသစံတော်ချိန် ညနေ ၃ နာရီအချိန် ဂျပန်မိုးလေဝသဌာန၏ ထုတ်ပြန်ချက်အရ စက်တင်ဘာ ၁၉ ရက် တွင် နန်မဒေါမုန်တိုင်းသည် နိုင်ငံ၏ အနောက်ပိုင်း ရှိမန်းစီရင်စု၊ အိုဒါမြို့အနီးကို ဗဟိုပြုနေပြီး အရှေ့မြောက်ဘက် သို့ တစ်နာရီလျှင် ကီလိုမီတာ ၃၀ အရှိန်ဖြင့် ရွေ့လျားခဲ့ကြောင်း သိရသည်။

ပြင်းထန်သော အပူပိုင်းမုန်တိုင်း၏ ဗဟိုလေထုဖိအားမှာ ၉၇၅ ဟက်တိုပါစကယ် အဆင့်ရှိပြီး အမြင့်ဆုံး လေတိုက် နှုန်းမှာ တစ်နာရီလျှင် ၁၀၈ ကီလိုမီတာ ဖြစ်သည်။

နန်မဒေါမုန်တိုင်းသည် စက်တင်ဘာ ၂၀ ရက် (မနက်ဖြန်) ဟွန်ရှူးကျွန်းအနီး ဖြတ်သန်း၍ အရှေ့မြောက်ဘက်သို့ ဆက်လက် ရွေ့လျားမည်ဟု ခန့်မှန်းရသည်။

မြစ်ကမ်းအနီးနှင့် မြေနိမ့်ပိုင်းဒေသများတွင် နေထိုင်သူများ အထူးဂရုစိုက်ကြရန် ဂျပန်အစိုးရတာဝန်ရှိသူများက တိုက်တွန်းထားကြောင်း NHK သတင်းအရ သိရသည်။

Source: NHK

CNI News

၂၀၂၂ ခုနှစ်၊ ဩဂုတ် ၁၇

မြန်မာနိုင်ငံတွင် ယခုရက်ပိုင်းအတွင်း မိုးအဆက်မပြတ် ရွာသွန်းမှုနှင့် သည်းထန်စွာ ရွာသွန်းမှုများကြောင့် တိုင်းဒေသကြီးနှင့်ပြည်နယ် အချို့တို့တွင် ရေကြီးရေလျှံမှု၊ မြေပြိုမှုများ ဖြစ်ပွားလျက်ရှိသော်လည်း စက်သုံးဆီ ဈေးနှုန်းကြောင့် ကူညီကယ်ဆယ်ရေးလုပ်ငန်းများ ဆောင်ရွက်ရာတွင် ပရဟိတ အသင်းများမှာ အခက်အခဲ ရှိနေ ကြသည်။

ထိုသို့ ဒေသခံ ပြည်သူများအား ကူညီကယ်ဆယ်ရေး လုပ်ရာတွင် တစ်ရက်လျှင် ကားတစ်စီးအတွက် စက်သုံးဆီဖိုး ငါးသောင်း(၅၀၀၀၀)နီးပါးခန့် ကုန်ကျကြောင်း မော်လမြိုင်မြို့ရှိ ဘိုဘိုဝင်း အရေးပေါ် ကယ်ဆယ်ရေးအဖွဲ့မှ ဥက္ကဋ္ဌ ဦးဘိုဘိုဝင်းက CNI သတင်းဌာနသို့ ပြောသည်။

၎င်းက “လက်ရှိ အနေအထားကတော့ ကျနော်တို့ဆီမှာ မိုးရွာတော့ ဆီကတော့ လိုသလောက် ဝယ်လို့ ရနေတယ်။ အဲဒီပြဿနာတော့ မရှိနေဘူး။ စက်သုံးဆီ ဈေးတက်တဲ့ အခါမှာတော့ ကျနော်တို့ ကူညီမှုလုပ်ငန်းတွေမှာ တချို့ ကိစ္စတွေမှာ စိတ်ရော ကိုယ်ပါ ကူညီမှု လုပ်လိုက်ချင်ပေမယ့် တချို့ဟာတွေကျတော့ ချင့်ချိန်ပြီးတော့ပေါ့။ ဆိုကြ ပါစို့ တခြားနေရာကို သွားမယ်။ အဲဒီနယ်မြေမှာ တခြားအဖွဲ့ ရောက်နေပြီလား။ ရောက်နေပြီဆိုရင် ကျနော်တို့က မသွားတော့ဘူး။ အဓိကကတော့ စက်သုံးဆီ ဈေးကြီးလာတဲ့အတွက် ကူညီမှု လုပ်ငန်းတွေက ကျယ်ကျယ်ပြန့်ပြန့် လုပ်ချင်ပေမယ့်လည်း စက်သုံးဆီကြောင့် ဟန့်တားမှုတွေ ဖြစ်လာတယ်ပေါ့။ အနည်းနဲ့အများတော့ ရပ်ကွက် တစ်ခုကို ကျယ်ကျယ်ပြန့်ပြန့် လူ အင်နဲ့အားနဲ့ဝင်တဲ့ အခါကျတော့ အချိန်တိုအတွင်းမှာ ကူညီကယ်ဆယ်ရေး လုပ်ငန်းကို ပိုလုပ်လို့ အဆင်ပြေတာပေါ့။ အင်အားနည်းတဲ့ အခါကျတော့ လုပ်ရတာတော့ အနည်း ကြန့်ကြာ သွားတာပေါ့။ အဲဒါမျိုးတွေ ရှိတယ်”ဟု ပြောသည်။

တာချီလိတ်မြို့ ရေကြီးရေလျှံနေမှု 

လက်ရှိ မြန်မာနိုင်ငံ၌ စက်သုံးဆီဈေး မြင့်တက်ခြင်း၊ အချို့ဒေသများတွင် လိုသလောက်ဝယ်ယူ၍ မရရှိခြင်းနှင့် ရောင်းချသည့်ဆိုင်များ ပိတ်ထားခြင်းတို့ဖြင့် ရင်ဆိုင်နေရကြောင်း၊ ထိုအခက်အခဲများကြောင့် လက်ရှိ သဘာဝ ဘေးအန္တရာယ် ကူညီကယ်ဆယ်ရေး လုပ်ငန်းများ ဆောင်ရွက်သည့် အခါတွင် ယခင်ကကဲ့သို့ ကျယ်ကျယ်ပြန့်ပြန့် မဆောင်ရွက်နိုင်တော့ကြောင်း ပရဟိတ အသင်းများက CNI သတင်းဌာနသို့ ပြောသည်။

ပူတာအိုမြို့ရှိ ပန်းဥယျာဉ် ပရဟိတအသင်းမှ ကိုဒီတန်က“အခက်အခဲ အများကြီး ရှိပါတယ်။ ပူတာအို အခြေအနေ မှာတော့။ မြန်မာပြည်ရဲ့ ထိပ်ဆုံးဆိုတော့ ဒီမြို့လေးက အင်မတန်မှ ခက်ခဲတဲ့ မြို့လေးပါ။ အခုက ကျနော်တို့ ပရဟိတလုပ်ဖို့ လူမှုရေးလုပ်ဖို့ပါ အခက်အခဲ ရှိနေပြီ။ ဘာဖြစ်လို့လဲဆိုတော့ ဆီဆိုင်က ဆီမရတော့ဘူး။ ဆီမရတဲ့ အခါကျတော့ ကူညီချင်လည်း ကားတွေ ဆွဲလို့မရတဲ့ အခြေအနေ ဖြစ်နေတယ်။ အခု ပူတာအို ဈေးနှုန်းနဲ့ဆို လူမှု ရေး ကားတွေက ဆီဖိုးက ငါးသောင်းအထက် ထည့်မှ အဆင်ပြေတယ်။ ကျနော်တို့ ပူတာအိုက ခရီးဝေးတွေပဲ ပြေး နေရတဲ့ အခါကျတော့။ အနီးအနားက အက်စီးဒန့်တို့ ဆေးရုံတက်ချင်တဲ့ ကိုယ်ဝန်သည် မိခင်တို့တော့ ကူညီပေးလို့ ရတယ်။ ခရီးဝေး သွားရမယ့် နေရာတွေကျတော့ အဆင်မပြေတော့ဘူး ဖြစ်နေတယ်။ မရတော့တာ ဆိုင်တွေက။ စက်သုံးဆီဆိုင်တွေက ပိတ်လိုက်တဲ့ အခါကျတော့ လက်ရှိမှာ ဖွင့်ထားတဲ့ အခြေအနေ မရှိ မဖွင့်နိုင်သေးဘူးပေါ့။ ဝယ်လို့ရမယ့် နေရာကို မရှိတော့တာ ပူတာအိုက။ မနေ့က တစ်ဆိုင်တော့ဖွင့်တယ် တစ်နာရီလောက်ပဲ ဖွင့်တာ။ အဲဒီအချိန်မှာ ကျနော်တို့ မဝယ်မိရင်တော့ ဆီမရနိုင်ဘူးဖြစ်နေတာ”ဟု ပြောသည်။

ပရဟိတအသင်းများသို့ လှူဒါန်းသည့် အလှူရှင်များမှာလည်း နည်းပါးသွားသည့်အတွက် လက်ရှိ သဘာဝဘေး အန္တရာယ်ကြောင့် ကူညီကယ်ဆယ်ရေးများ ဆောင်ရွက်ရာတွင် အသင်းရန်ပုံငွေများ အသုံးပြု၍ ဆောင်ရွက် နေ ရကြောင်း သိရသည်။

သို့သော် သဘာဝဘေး အန္တရာယ်နှင့်ပတ်သက်၍ ဆိုးဆိုးရွားရွား ကြီးကြီးမားမား ကြုံတွေ့လာရသည့်အခါ လက်ရှိ စက်သုံးဆီ ဈေးနှုန်းအတိုင်းဆိုပါက သက်ဆိုင်ရာ အစိုးရထံ တင်ပြ အကူအညီ တောင်းခံခြင်းများ လုပ်ဆောင် လာရမည် ဖြစ်ကြောင်းလည်း ပရဟိတအသင်းများထံက သိရသည်။

လက်ရှိတွင် မြန်မာနိုင်ငံရှိ အချို့ပြည်နယ်နှင့် တိုင်းဒေသကြီးတို့တွင် မိုးသည်းထန်စွာရွာသွန်းမှု၊ မိုးအဆက်မပြတ် ရွာသွန်းမှုတို့ကြောင့် ရေကြီးရေလျှံခြင်းများ ကြုံတွေ့ရသည့် ဒေသခံပြည်သူများအား ဘုန်းကြီးကျောင်းများသို့ ယာယီကယ်ဆယ်ရေးအဖြစ် ရွှေ့ပြောင်းထားရသည်။

စက်သုံးဆီထည့်ရန် လားရှိုးမြို့မှာ ဩဂုတ် ၁၃ ရက်က တန်းစီစောင့်နေစဉ်

တာချီလိတ်မြို့တွင် ယခုရက်ပိုင်း ဖြစ်ပွားသည့် ရေကြီးရေလျှံမှုသည် ၂၀၂၀ ခုနှစ်နှင့် ၂၀၂၁ ခုနှစ်တို့ဖြင့် နှိုင်းယှဉ် ပါက ဆိုးရွားကြောင်း ရွှေမယ်ယန်းပရဟိတအသင်းမှ တာဝန်ရှိသူတစ်ဦးက CNI သတင်းဌာနသို့ ပြောသည်။
၎င်းက “အခုဒီမှာက ဘယ်လိုတွေ ဖြစ်သွားလဲဆိုတော့ မဲခေါင်မြစ်ဝှမ်းက ရေကြီးပြီးတော့မှ ဖြစ်သွားတဲ့ကိစ္စပေါ့။ ရေတက်သွားပြီးတော့မှ ဒီမှာ အပေါ် ရေဆင်းလာပြီး တန့်သွားတဲ့ ကိစ္စဆိုတော့ နည်းနည်းလေးတော့ အားစိုက် ပြီးတော့မှ အလုပ်လုပ်ရတာပေါ့လေ၊ ခါတိုင်းထက် ပိုပြီးတော့မှ။ အခုဟာက အပူပိုင်း မုန်တိုင်းဝင်သွားတဲ့ ဖြစ်သွား တဲ့ ကိစ္စဆိုတော့ ဒီတစ်ကြိမ်ကတော့ နည်းနည်းလေး ဆိုးတယ်ပေါ့။ ခါတိုင်းထက် တစ်ပေလောက် ပိုမြင့်တယ်။ ခါတိုင်းက အိမ်ထဲမှာ ၃ ပေလောက်ဝင်ရင် ဒီတစ်ကြိမ်တော့ ၄ ပေလောက်ဝင်တယ်”ဟု ပြောသည်။

တာချီလိတ်မြို့ ရေကြီးနေမှု ပရဟိတလုပ်ငန်းများဆောင်ရွက်နေမှု

ဩဂုတ် ၁၆ ရက်နေ့ ညပိုင်း၌ မိုးဆက်တိုက် ရွာသွန်းမှုကြောင့် ရန်ကုန် အပါအဝင် အခြားမြို့နယ်များတွင် ရေကြီး ရေလျှံခြင်းများ တွေ့ရသည်။

ကပ္ပလီ ပင်လယ်ပြင်တွင် မုတ်သုံလေ အားကောင်းရာမှ အားအလွန် ကောင်းနေသည့်အတွက် ယနေ့ (ဩဂုတ် ၁၇ ရက်) ညနေအထိ ခန့်မှန်းချက်အရ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ရခိုင်ပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် ဒေသအလိုက်နှင့် ပဲခူးတိုင်းဒေသကြီးတွင် နေရာကွက်၍ မိုးကြီးနိုင်ကြောင်း မိုးဇလက ထုတ်ပြန်ထားသည်။

CNI International News

လန်ဒန်၊ ဇူလိုင် ၁၉

အနောက်ဥရောပတွင် ပြင်းထန်စွာ ကျရောက်နေသော အပူလှိုင်းသည် မြောက်ဘက်သို့ ဦးတည်လာသဖြင့် ဇူလိုင် ၁၉ ရက် (ယနေ့) တွင် ပိုမိုပူပြင်းလာခြင်းဖြင့် ရင်ဆိုင်နေရကြောင်း ဘီဘီစီ အင်္ဂလိပ်ပိုင်း သတင်းတစ်ပုဒ်တွင် တွေ့ရသည်။

ဇူလိုင် ၁၈ ရက်တွင် စပိန်နိုင်ငံ၊ မြောက်ပိုင်း၌ အပူချိန် ၄၃ ဒီဂရီစင်တီဂရိတ် (၁၀၉ ဖာရင်ဟိုက်) အထိ စံချိန်တင်အောင် မြင့်တက်ခဲ့သလို ပြင်သစ်နှင့်ဗြိတိန်တွင်လည်း အပူလှိုင်းသတိပေးချက် ထုတ်ပြန်ခဲ့ရသည်။

ပြင်သစ်၊ ပေါ်တူဂီ၊ စပိန်နှင့် ဂရိနိုင်ငံများတွင် တောမီးလောင်၍ လူပေါင်းထောင်နှင့်ချီ၍ အိုးအိမ်စွန့်ခွာ ထွက်ပြေးခဲ့ရသည်။

ဗြိတိန်နိုင်ငံတွင် အပူပြင်းဆုံးနေ့ တစ်နေ့ကို ရင်ဆိုင်ရဖွယ် မျှော်လင့်ရပြီး ပြင်သစ်နိုင်ငံ၏ အစိတ်အပိုင်းများတွင် အပူချိန် မြင့်မားလွန်း၍ ထိခိုက်မှုများ ရှိနိုင်ကြောင်း ကျွမ်းကျင်သူများက ခန့်မှန်းထားသည်။

ပြင်သစ်နိုင်ငံရှိ ဒေသအများအပြားနှင့် နိုင်ငံ၏ အနောက်ပိုင်း နန်တက်စ် (Nantes) မြို့တို့တွင် အပူချိန် ၄၂ ဒီဂရီစင်တီဂရီတ် အထိ အပူပြင်းဆုံး နေ့ရက်များကို ကြုံခဲ့ရသည်ဟု ပြင်သစ် အမျိုးသား မိုးလေဝသရုံးက ထုတ်ပြန်ခဲ့သည်။

ဗြိတိန်အပူချိန်နဲ့အတူ ပြည်သူများ (AP)

မကြာသေးမီ ရက်ပိုင်းအတွင်း တောမီးလောင်၍ လူပေါင်း ၃ သောင်းကျော် ထွက်ပြေးတိမ်းရှောင်ခဲ့ရပြီး အရေးပေါ် ခိုလှုံစရာ အမိုးအကာများကို သက်ဆိုင်ရာက ပံ့ပိုးပေးခဲ့သည်။

ဥရောပ အနောက်တောင်ပိုင်းရှိ နာမည်ကျော် ခရီးသွားဆွဲဆောင်ရာ ဒေသဖြစ်သည့် ဂျီရွန်ဒီ (Gironde) တွင် ယခင်သီတင်း ပတ် ဇူလိုင် ၁၂ ရက် ကတည်းက မြေဧရိယာ ၄၂,၀၀၀ ဧက မီးလောင်ကျွမ်းခဲ့ရာ မီးသတ်သမားများက ကြိုးစား ငြှိမ်းသတ်ခဲ့ သော်လည်း ဆိုးရွားစွာ ထိခိုက်ပျက်စီးခဲ့သည်။

“ကျနော့်ခေါင်းထဲကို ဝင်တဲ့အတွေးကတော့ မကောင်းဆိုးဝါး ဘီလူးတစ်ကောင် ဝင်လာသလို ခံစားမိပါတယ်”ဟု အဆိုပါ မီးလောင်မှုနှင့်ပတ်သက်၍ ဂျီရွန်ဒီဒေသ အုပ်ချုပ်ရေးမှူး ဂျင်လက်ဂလေဇီ (Jean-Luc Gleyze) က ပြောကြားခဲ့သည်။

“အဲဒီဘီလူးက ရေဘဝဲလို လက်တံတွေဖြန့်ပြီး ဥရောပ အရှေ့၊ အနောက် နှစ်ဘက်စလုံးကို ပိုပြီး ကြီးထွားလာနေပါတယ်။ အပူလှိုင်းကြောင့် လေထုထဲ ရေငွေ့မရှိတော့ ဒီလို ဘီလူးတစ်ကောင်ကို တုံ့ပြန်တိုက်ခိုက်ဖို့ အင်မတန်ခက်ပါတယ်” ဟု ၎င်းက ဆက်လက် ပြောကြားခဲ့သည်။

ဇူလိုင် ၁၈ ရက်တွင် အပူချိန်မှာ ၄၀ ဒီဂရီစင်တီဂရိတ်သို့ ကျဆင်းမည်ဟု ခန့်မှန်းထားသော်လည်း ခြောက်သွေ့သော အခြေ အနေနှင့် ပြောင်းလဲနိုင်သော လေစီးကြောင်းများ ဆက်လက် ရှိနေသရွေ့ ယခုအပူလှိုင်းဒဏ်မှ ချက်ချင်းသက်သာရာ ရမည် မဟုတ်ကြောင်း ဂျီရွန်ဒီဒေသသို့ ရောက်ရှိနေသည့် ဘီဘီစီသတင်းထောက် လူစီဝီလျံဆင်က သတင်းပေးပို့ထားသည်။

Source: BBC

CNI International News

ကဘူးလ်၊ ဇွန်လ ၂၃

အာဖဂန်နစ္စတန်နိုင်ငံ၏ အရှေ့ပိုင်း ခက်ခဲကြမ်းတမ်းသည့် တောင်တန်းဒေသတွင် ဇွန်လ ၂၂ ရက် အစောပိုင်းက အင်အား ပြင်းထန်သည့် ငလျင်တစ်ခု လှုပ်ခတ်ခဲ့ရာ ကျောက်ခဲများ၊ ရွှံ့အုတ်များဖြင့် ဆောက်လုပ်ထားသည့် လူနေအိမ် အများအပြား ပြိုကျပျက်စီးခဲ့ပြီး လူပေါင်း ၁၀၀၀ ထက်မနည်း သေဆုံးခဲ့ကြောင်း အေပီသတင်းအရ သိရသည်။

အဆိုပါ သဘာဝဘေးအန္တရာယ်သည် အာဖဂန်၏ လူသားချင်း စာနာမှု အကျပ်အတည်းကို ရုန်းကန် ရင်ဆိုင်နေရသော တာလီဘန် ခေါင်းဆောင်များနှင့် ကယ်ဆယ်ရေး အေဂျင်စီများအတွက် ကိုင်တွယ် ဖြေရှင်းနိုင်စွမ်း စမ်းသပ်ချက်တစ်ခု ဖြစ်လာခဲ့သည်။

ထိုငလျင်ကြောင့် အာဖဂန်နစ္စတန်တွင် ဆယ်စုနှစ် ၂ ခုအတွင်း လူအသေအပျောက် အများဆုံးဖြစ်ခဲ့ရပြီး သေဆုံးသူဦးရေ တိုးလာနိုင်ကြောင်း အစိုးရတာဝန်ရှိသူများ ပြောကြားခဲ့သည်။
ခန့်မှန်းခြေ ဒဏ်ရာရသူ ၁၅၀၀ ခန့်ရှိကြောင်း တာလီဘန်တို့၏ သတင်းဌာနက ထုတ်လွှင့်ခဲ့သည်။

ပြင်းအား ရစ်ချက်တာစကေး (၆ ဒသမ ၁) ရှိ ငလျင်လှုပ်ခတ်မှုကြောင့် လူသန်းပေါင်းများစွာ ငတ်မွတ်ခေါင်းပါးမှုနှင့် ဆင်းရဲ မွဲတေနေသည့်ကြားမှ အိုးမဲ့အိမ်မဲ့ဖြစ်၍ သေကြေပျက်စီးခဲ့ရသည်။ ပြီးခဲ့သည့် ၁၀ လခန့်နီးပါးက တာလီဘန်တို့ တနိုင်ငံလုံး အာဏာပြန်ယူပြီးနောက် ကျန်းမာရေးစနစ်ပြိုလဲခဲ့သည့် အာဖဂန်နိုင်ငံတွင် ယခုအခါ ဆင်းရဲဒုက္ခများ ပိုမိုဆိုးရွားလာခဲ့သည်။

ငလျင် ဒဏ်ကြောင့် ပျက်စီးနေသော အဆောက်အအုံရှေ့က အာဖဂန်အမျိုးသားတစ်ဦး (AP)

တာလီဘန်တို့ အာဏာပြန်ရပြီးနောက် အာဖဂန်ပိုင် နိုင်ငံတကာဘဏ္ဍာငွေများ ဆိုင်းငံ့ခံခဲ့ရပြီး ကမ္ဘာ့နိုင်ငံအများစုက တာလီဘန်အစိုးရ ရှောင်ဖယ်ခဲ့ကြသည်။

ရှားရှားပါးပါး ဖြစ်စဉ်တစ်ခုအနေဖြင့် တာလီဘန်တို့၏ ထိပ်ဆုံးခေါင်းဆောင် ဟိုင်ဗ္ဗဒူလာအခွန်ဇာဒါ (Haibatullah Akhundzadah) က “ယခုကြေကွဲဖွယ် ဖြစ်ရပ်ဆိုးကြောင့် ထိခိုက်ခံစားရသော အာဖဂန်ပြည်သူများကို မဆိုင်းမတွ ကူညီကြပါရန်” နိုင်ငံတကာအသိုင်းအဝိုင်းနှင့် လူသားချင်းစာနာမှုဆိုင်ရာ အဖွဲ့အစည်းများထံ မေတ္တာရပ်ခံ ပန်ကြားခဲ့သည်။

ပါကစ္စတန်နယ်စပ်အနီး အာဖဂန်ပိုင်နက်အတွင်းရှိ ဝေးလံခေါင်သီသော ဒေသ၌ နေထိုင်သူများ လက်ဗလာဖြင့် မြေပြိုသေဆုံး နေပုံများ (သို့မဟုတ်) အသက်ရှင် ကျန်ရစ်များကို ရှာဖွေနေပုံများကို ဘက်ခါတာ (Bakhtar) သတင်းဌာနမှ ထုတ်လွှင့်သော ဗွီဒီယိုဖိုင်တွင် မြင်တွေ့ရသည်။

ကယ်ဆယ်ရေးပစ္စည်းများ အများအပြား ပေးပို့နိုင်ခြင်း ရှိ/မရှိ (သို့မဟုတ်) ငလျင်ဒဏ်ခံစားရသော နယ်မြေသို့ ပို့နိုင်/မပို့နိုင် ဆိုသည်ကို လတ်တလော မသိရသေးကြောင်း အေပီသတင်းဌာနက ရေးသားဖော်ပြထားသည်။

Source: AP