CNI New 

၂၀၂၅ ခုနှစ်၊ ဇူလိုင် ၃၀ 

မြန်မာနိုင်ငံအတွင်းရှိ ရန်ကုန်-မန္တလေး အပါအဝင် မြို့ကြီးများတွင် မီးပွိုင့်စနစ် ၂ မျိုးဖြစ်နေခြင်းကြောင့် မော်တော် ယာဉ်မောင်းသူများအတွက် အခက်အခဲများဖြစ်နေသလို အောက်ခြေ၌ စည်းကမ်းချိုးဖောက်သူဟုဆိုကာ ငွေကြေး တောင်းခံရမှုများ ကြုံတွေ့နေကြရသည်။

မြန်မာနိုင်ငံတွင် မီးပွိုင့်စနစ်ကို ကျင့်သုံးရာမှာ စနစ်တစ်မျိုးတည်းသာ ဖြစ်သင့်ကြောင်း အမျိုးသားဒီမိုကရေစီ အင်အားစုပါတီ(NDF)မှ ဒုဥက္ကဋ္ဌ ဦးထက်အောင်ကျော်က CNI သတင်းဌာနသို့ ပြောသည်။

၎င်းက “အဓိက,ကတော့ မီးပွိုင့်စနစ်က ဘယ်ဟာပဲလုပ်လုပ်ပါ၊ တစ်မျိုးတည်း တိတိကျကျ သေသေချာချာ အစဥ်တစိုက်ပေါ့နော် ဘယ်မီးပွိုင့်မှာမဆို ဤသို့ဤနယ် လုပ်ဆိုတဲ့ဟာမျိုး ဖြစ်ဖို့လိုအပ်တာပေါ့။ ဒီမီးပွိုင့်မှာက ဂဏန်းတွေနဲ့ပြပြီး ဟိုမီးပွိုင့်က ဂဏန်းနဲ့ မပြလို့ဆိုတဲ့ ဟာမျိုးကျရင် လိုက်နာရတဲ့လူက မီးပွိုင့်စနစ်မှာ တချို့ဟာ တွေဆိုရင် အကွေ့အတွက်ကို အဝါပေးတယ် နောက်တစ်နေရာရောက်ရင် အဝါသည် ကွေ့လို့မရဘူးဆိုတဲ့ဟာ ဖြစ်ပြန်ရော၊ အဲလိုမျိုးပေါ့နော်။ (အ)ကွေ့ကြောကို မီးစိမ်းပြမှသာသွားရတဲ့ မီးပွိုင့်ရှိသလို (အ)ကွေ့ကြောကို အဲလို အကွေ့အတွက် မီးပွိုင့် သီးသန့်မရှိပဲနဲ့ အဲလိုကြည့်ထွက်ရတဲ့ဟာမျိုးလည်း ရှိတတ်တယ်။ လူတွေက လိုက်နာတဲ့ အခါမှာ ဘယ်ဟာသည် ဘာဆိုတာ တိတိကျကျ ဖြစ်မှာပေါ့နော်။ ဘယ်ဟာပဲဖြစ်ဖြစ်ပါ လူထုက အဲဟာတစ်ခုကို သတ်သတ်မှတ်မှတ် နားလည်ပြီးတော့မှ သေသေချာချာ တစ်ပြေးညီ လိုက်နာကျင့်သုံးသွားရင် အဆင်ပြေတာပေါ့ နော်။ မီးပွိုင့်နဲ့ မှတ်တိုင်နဲ့ဆိုတဲ့ဟာ မျိုးတွေပေါ့”ဟု ပြောသည်။

ယာဉ်ထိန်းရဲများကို တွေ့ရစဉ်

လက်ရှိ ရန်ကုန်နှင့် မန္တလေး အပါအဝင် မြို့ကြီးများတွင် ဝါ-စိမ်း-နီ အရောင်လိုက် အချိန်းအပြောင်းစနစ်ဖြင့် မီးပွိုင့် ကို ကျင့်သုံးနေသလို ဝါ-စိမ်း-နီ အရောင်လိုက် ဂဏန်း(နံပါတ်)ဖြင့် အချိန်းအပြောင်းစနစ်ဖြင့် မီးပွိုင့်အား ကျင့်သုံးမှု များလည်း ရှိနေသည်။

ထိုသို့ မီးပွိုင့်စနစ်ကို စနစ် ၂ မျိုးဖြင့် ကျင့်သုံးခြင်းက မော်တော်ယာဉ် မောင်းနှင်သူများနှင့် လမ်းဖြတ်ကူးသူများ အတွက် အခက်အခဲကြုံတွေ့နေရသလို ယာဉ်ထိန်းရဲများက မီးပွိုင့်ကို လိုသလို သုံး၍ မော်တော်ယာဉ်များ မီးဝါ- မီးနီ ဖြတ်မောင်းသည်ဟုဆို ငွေကြေးတောင်းခံမှုများ ပြုလုပ်လာနေသည်။

ဦးထက်အောင်ကျော်က “အခုဆိုရင် တအား ရုပ်ပျက်နေတဲ့ ဟာလည်းရှိတယ်။ တက္ကသိုလ် ရိပ်သာလမ်းပေါ်မှာ ရှိတယ်။ တက္ကသိုလ်ရိပ်သာလမ်းကနေ အင်းယားလမ်းကိုကူးမဲ့ မီးပွိုင့်၊ အဲမှာသူက မီးပွိုင့် ပြီးတာနဲ့ လူတွေဟာ ကားမှတ်တိုင် ဖြတ်တယ်။ ထိပ်နားလေးမှာ မော်တော်ပီကယ်က အဲမှာ စောင့်ပြီးတော့ စောင့်ဖမ်းတာပေါ့နော်။ ဝန်ထမ်းတွေဘက်က ပိုက်ဆံမလောက်လို့ပဲ ငွေရှာနေကြသလားလို့ပဲ ထင်မိတော့တယ်။ ပြီးရင် မော်တော်ပီကယ် တွေကလည်း ပေါ်ပေါ်ထင်ထင် စောင့်ဆိုင်းပြီးတော့မှ ဥပဒေအ‌ရေးကို တည့်မတ်အောင် ကြပ်မှတ် နေတယ်ဆိုတာမျိုး မဟုတ်ဘဲနဲ့ လူထုက အမှားဖြစ်အောင် စောင့်ပြီး အဲအမှားပေါ်မှာ သက်သက်လာပြီး ငွေရှာတဲ့ သဘောဖြစ်နေတာ စည်းမျည်းစည်းကမ်းကို လူထုအားလုံး လိုက်နာရန် တာဝန်ရှိပြီး။ အဲဒီဟာကို Law & informant ဖြစ်အောင် ဘယ်လိုလုပ်ရမလဲဆိုတဲ့ ဟာမျိုးတွေ သေသေချာချာ လုပ်မှရမယ်ပေါ့”ဟု ပြောသည်။

မြန်မာနိုင်ငံတွင် မီးပွိုင့်စနစ်ကို ဝါ-စိမ်း-နီ အရောင်လိုက် ဂဏန်း(နံပါတ်)ဖြင့် အချိန်းအပြောင်း လုပ်သည့်စနစ်ကို ကျင့်သုံးသင့်ကြောင်း၊ ထိုစနစ်ကို ကျင့်သုံးပါက မီးပွိုင့်အလွတ် ဖြတ်ကျော်မောင်းနှင်မှုကနေ ပေါ်ပေါက်လာမည့် ယာဉ်မတော်တဆမှုများကို လျှော့ချနိုင်သလို စည်းကမ်းဖောက်ဖျက်မှုများကိုလည်း အရေးယူနိုင်မည်ဖြစ်ကြောင်း မော်တော်ယာဉ်မောင်းနှင်သူများက ထောက်ပြကြသည်။

 ဝါ-စိမ်း-နီ အရောင်လိုက် ဂဏန်း(နံပါတ်)ဖြင့် အချိန်းအပြောင်းလုပ်သော မီးပွိုင့်စနစ်ကို တွေ့ရစဉ်

အလားတူ ဝါ-စိမ်း-နီ အရောင်လိုက် အချိန်းအပြောင်း လုပ်သည့်စနစ်ကို ကျင့်သုံးပါက ယာဉ်မတော်တဆမှုများ ဖြစ်နိုင်သလို ယာဉ်ထိန်းရဲများက မီးပွိုင့်စနစ်ကို လိုသလို အသုံးပြု၍ မော်တော်ယာဉ်မောင်းနှင်သူများထံမှ ငွေ ညစ်မှုများ လုပ်ဆောင်နေခြင်းကိုလည်း တားဆီးနိုင်မည်ဖြစ်ကြောင်း မော်တော်ယာဉ်မောင်းနှင်သူများက ထောက်ပြကြသည်။

မြန်မာနိုင်ငံ၏ မီးပွိုင့်စနစ်တွင် နံပါတ်ဖြင့် ဝါ-စိမ်း-နီ မီးပွိုင့်ဆိုလျှင် နံပါတ်စနစ်ဖြင့်သာ သွားသင့်ကြောင်း စီးပွားရေးလေ့လာသုံးသပ်သူ ဦးဋ္ဌေးအောင်ကြည်က CNI သတင်းဌာနသို့ ပြောသည်။

၎င်းက “နံပါတ်နဲ့က ချိန်လို့ရတယ်လေ၊ သဘောက ဘယ်လောက် ကျန်သေးလည်း အချိန်နီတော့မယ်ဆိုရင် ဝါတော့မယ်ဆိုရင် အရှိန်လျှော့လို့ရတာပေါ့။ နံပါတ်မရှိတဲ့ အခါကြတော့ ဒါဘယ်လို ပြောမလဲ၊ ဘယ်လိုခေါ်မလဲ ဥပမာ ဆက်စိမ်းမယ်ထင်ပြီး ဖြတ်လိုက်ပြီးတော့မှ အလယ်ခေါင် ရောက်တော့မှ ဝါတာတို့၊ နီတာတို့ ဖြစ်လာရင် ဒါပြဿနာတွေ ရှိတာပေါ့။ ဥပဒေအရလည်း အဝါဖြတ်ရင်ဖမ်းလို့ စီးလို့ရတာပေါ့။ ကောင်းတာကတော့ နံပါတ် စနစ်နဲ့ သွားသင့်တာပေါ့လေ။တချို့ မီးပွိုင့်တွေရှိတယ်လေ၊ control လုပ်လို့ရတဲ့ မီးပွိုင့်တွေရှိတာပေါ့။ ရဲက မီးပွိုင့်ကို သူတို့က switch on, switch off လုပ်လို့ရတာပဲလေ မြေနီကုန်းတို့ ဘာတို့ဆိုတာ အဲလိုလုပ်လို့ရတာပဲ လေ။ သဘောက ဥပဒေရဲ့ သဘောတရားက ဘာလဲ။ အခါကြတော့ မလိုက်နာရင် အရေးယူရတာပေါ့။ လိုက်နာ နိုင်အောင်လည်း ဥပဒေက အရင်လုပ်ပေးထားရတာကို လိုက်နာနိုင်အောင် မလုပ်ပေးထားပဲနဲ့ ဖမ်းတာကြတော့။ ဒါပြဿနာ အနည်းနဲ့အများ ညှိနှိုင်းမှုလိုတာပေါ့။ အခုက ပြဿနာက ဘာလဲဆိုတော့ ဒါမော်တော်ပီကယ်တင် မဟုတ်ပါဘူး။ အားလုံးဖြစ်နေတဲ့ကိစ္စက အခြေအမြစ် ပြဿနာပြောရမယ်ဆိုရင် မက်လုံးစနစ်က တစ်မျိုးကြီး ဖြစ်နေတာပေါ့။ လောက်ငဖူလုံတဲ့ လစာရှိရင်တော့ တချို့ဟာတွေက အများကြီး လျော့သွားမှာပေါ့။ ပြဿနာက ဘာလဲဆိုတော့ ဘယ်လိုခေါ်မလဲ အားလုံးသိနေတဲ့ တချို့ ဇာတ်လမ်းတွေ ရှိတာပဲလေ။ ဆိုတော့ ဖြစ်လာတယ်ဆို တာကလည်း အဓိက,က မလောက်င မဖူလုံတာကနေ စတာပေါ့။ အဲတော့ ဒီဥစ္စာက လူမှုစီးပွားရေးစနစ်နဲ့ဆိုင်တာ လူမှုစီးပွားရေး ပြဿနာတွေ ဖြေရှင်းပေးနိုင်မှပဲ ကျန်တဲ့ဆင့်ပွား ပြဿနာတွေက ပြီးသွားမှာပေါ့”ဟု ပြောသည်။

လက်ရှိ မြန်မာနိုင်ငံအတွင်းရှိ မြို့ကြီးများတွင် ဖြစ်ပေါ်နေသော မီးပွိုင့်စနစ် ၂ မျိုး ဖြစ်နေခြင်းနှင့် အောက်ခြေတွင် ယာဉ်ထိန်းရဲများက မီးပွိုင့်စနစ်၏ အားနည်းချက်ကနေ ငွေကြေးတောင်းခံနေခြင်းများကို မည်သို့ ကိုင်တွယ် ဖြေရှင်းသွားရန် ရှိပါသလဲဆိုသည်ကို နစကထံ CNI သတင်းဌာနက မေးမြန်းထားသော်လည်း ပြန်လည်ဖြေကြား ခြင်းမရှိသေးပေ။

၂၀၂၄ ခုနှစ်၊ ဇန်နဝါရီလအတွင်း ယာဉ်တိုက်မှုပေါင်း (၄၃၃)ကြိမ်ဖြစ်ပွားခဲ့ရာ ယခင်နှစ်နှင့် နှိုင်းယှဉ်ပါက အကြိမ် ရေအနည်းငယ် မြင့်တက်လာကြောင်း ပို့ဆောင်ရေးနှင့်ဆက်သွယ်ရေးဝန်ကြီးဌာန၏ အချက်အလက်များအရ သိရသည်။

ယာဉ်တိုက်မှုများကြောင့် သေဆုံးသူဦးရေမှာ ၂၃၆ ဦးရှိခဲ့ပြီး ဒဏ်ရာရရှိသူဦးရေမှာ ၅၆၄ ဦး ရှိခဲ့ကြောင်း အဆိုပါ ဝန်ကြီးဌာနက ဆိုသည်။ 

CNI News

၂၀၂၅ ခုနှစ်၊ ဇူလိုင် ၂၂

မြန်မာနိုင်ငံဆိုင်ရာ အိန္ဒိယသံအမတ်ကြီး မစ္စတာ အဘ်ဟေး တာကူးရ် (Abhay Thakur)သည် လျှပ်စစ်စွမ်းအား ဝန်ကြီးဌာန ပြည်ထောင်စုဝန်ကြီး ဦးဥာဏ်ထွန်းနှင့် တွေ့ဆုံ၍ နှစ်နိုင်ငံအကြား နယ်စပ်ဖြတ်ကျော် ဓာတ်အားလိုင်း စီမံကိန်းဆိုင်ရာနှင့်လျှပ်စစ်ကဏ္ဍပူးပေါင်းဆောင်ရွက်ရေးဆိုင်ရာကိစ္စများကို ဆွေးနွေးခဲ့သည်။

သံအမတ်ကြီး မစ္စတာ အဘ်ဟေး တာကူးရ်သည် ၂၀၂၅ ခုနှစ်၊ ဇူလိုင် ၂၁ ရက်က နေပြည်တော်မှာ တွေ့ဆုံ ဆွေးနွေးခဲ့ခြင်း ဖြစ်သည်။ 

နယူးဒေလီမြို့တွင် ယခုလ အစောပိုင်းက လျှပ်စစ်ကဏ္ဍ ပူးပေါင်းဆောင်ရွက်မှုဆိုင်ရာ ပူးပေါင်းညှိနှိုင်းရေး ကော်မတီ အစည်းအဝေးကို ကျင်းပခဲ့သေးသည်။

ထို့နောက် အိန္ဒိယသံအမတ်ကြီးနှင့် လျှပ်စစ်စွမ်းအားဝန်ကြီးတို့ တွေ့ဆုံ ဆွေးနွေးမှု ဖြစ်လာခဲ့သည်။ 

လက်ရှိ မြန်မာနိုင်ငံတွင် နိုင်ငံတစ်ဝန်း လက်နက်ကိုင်ပဋိပက္ခများကြောင့် လျှပ်စစ်ဓာတ်အား ဖြတ်တောက်မှုများ ရှိနေပြီး အလှည့်ကျစနစ်ဖြင့် လျှပ်စစ်ဓာတ်အားကို ဖြန့်ဝေနေရသည်။

CNI New

၂၀၂၅ ခုနှစ်၊ ဇွန်လ ၂၄

မြန်မာနိုင်ငံတွင် လျှပ်စစ်မီတာခများ မြင့်တက်လာနေသော်လည်း မည်သည့် အနေအထားမျိုးကို မည်သည့်နှုန်း ထား တိုးမြင့်ကောက်ခံနေသလဲဆိုသည်ကို လျှပ်စစ်ဝန်ကြီးဌာနက ပွင့်လင်းမြင်သာမှုရှိရှိဖြင့် ပြည်သူလူထုကို အသိပေး ချပြရန်လိုအပ်သည်ဟု စီးပွားရေးလုပ်ငန်းရှင်များနှင့်အများပြည်သူက ထောက်ပြကြသည်။

လျှပ်စစ်မီတာခနှုန်းထားများ တိုးမြင့်လာခြင်းကြောင့် အခြေခံ လူတန်းစားများ အပါအဝင် လုပ်ငန်းရှင်များသည် လူနေမှုကုန်ကျစရိတ်နှင့် လုပ်ငန်းလည်ပတ်မှု ကုန်ကျစရိတ်များ မြင့်တက်လာမှုဒဏ်ကို ကြုံတွေ့လာကြရသည် ဟု စီးပွားရေးလုပ်ငန်းရှင် ဦးအောင်ပြည့်စုံက CNI သတင်းဌာနသို့ ပြောသည်။

၎င်းက “ပထမဆုံး လျှပ်စစ်မီတာနဲ့ပတ်သက်လို့ ပြောမယ်ဆိုရင် အစ်ကိုတို့နိုင်ငံမှာ ပေးနေတဲ့ လျှပ်စစ်ကကျတော့ နည်းလမ်း ၃ ခုနဲ့ အစိုးရကဖြန့်ချီတယ် ပထမဆုံး ရေအားလျှပ်စစ်ရယ်၊ သဘာဝဓာတ်ငွေ့ကနေ မောင်းတဲ့ စနစ်ရယ်၊ ဒီကျောက်မီးသွေးပေါ့နော် ဒီ ၃ မျိုးကနေရတယ်။ အများဆုံး ရနေတာကတော့ ရေအားလျှပ်စစ်ကနေရတယ် အဲဒီရတဲ့ လျှပ်စစ်က မြန်မာနိုင်ငံရဲ့ ဒီသုံးစွဲမှုနဲ့ယှဥ်မယ်ဆိုလို့ရှိရင် သူက လက်ရှိ ကာလမှာဆိုရင် တစ်ဝက် လောက်ပဲ ပေးနိုင်သေးတဲ့အခါကြတော့ ရန်ကုန်၊ မန္တလေး၊ နေပြည်တော် မြို့သုံးမြို့ကို သူက ရာခိုင်နှုန်းအလိုက် သူက ခွဲပြီး ပေးတယ်။ သူ ကသုံးစွဲမှု မီးအားပမာဏအရ လျှပ်စစ်ဖြန့်ဝေပေးတဲ့ အဖြေ အခုလောလောဆယ် လျှပ်စစ်မီတာခ တွေ တိုးရတဲ့အပိုင်းက ဘယ်လိုတိုးတာလဲ ဆိုတာကို လောလောဆယ်မှာ အစ်ကိုတို့ တိတိကျကျ မသိရသေးဘူး။ ပုံမှန်အားတော့ အိမ်တွေမှာ လျှပ်စစ်မီတာဘေ တက်လာတယ်၊ အစ်ကိုတို့လည်း ကြားရတယ်။ သို့သော် ဘာကြောင့် တိုးသွားတယ် ဘယ်လောက် တိုးကောက်တယ်ဆိုပြီးတော့ ထုတ်ပြန်လာတာမျိုး မရှိသေးဘူးပေါ့ နော်။ သတ်မှတ်ချက်တွေ မတွေ့ရသေးဘူးဆိုတဲ့ အခါကျတော့ ကောက်ခံမှုစနစ်တစ်ခု ဘယ်လိုပြောင်းလဲသွားလဲ ပေါ့နော်။ ဆိုတော့ မီတာဘေတွေ တိုးနေတယ်ဆိုတာကိုတော့ကြားတယ်။ ဒါပေမဲ့ ဘယ်လိုအပိုင်းကြောင့် တိုးသွား လည်း အရင်တုန်းကလိုမျိုးပေါ့နော် ယူနစ် ၁၀၀ ကျော်သွားလို့ရှိရင် တိုးကောက်တာမျိုးကနေ ယူနစ် ၅၀ ကျော်ရုံနဲ့ ပမာဏ တိုးကောက်နေသလားပေါ့။ လျှပ်စစ်ဝန်ကြီးဌာန အနေနဲ့လည်း ဒီကိစ္စကို သတင်းထုတ်ပြန်ပေးဖို့ လိုအပ် တယ်။ ပြည်သူကို ပွင့်ပွင့်လင်းလင်းနဲ့ ဒီလိုမျိုးကြောင့် တိုးထားတာဖြစ်တယ်။ မတိုးရင်လည်း မတိုးပါဘူးဆိုတဲ့ အကြောင်းပေါ့နော်။ ဒါမီးသုံးစွဲမှုများလို့သာ မီတာဘေ တိုးဆောင်ရတာ ဖြစ်တယ်ဆိုတာမျိုး တိတိကျကျကို ပြည်သူစိတ်ထဲမှာ ရှင်းဖို့လိုအပ်တယ်၊ လက်ရှိလိုကာလမှာ ဒါက အခြေခံလူတန်းစားတွေ အနေနဲ့ ခက်ခဲတဲ့ အခြေ အနေမျိုးမှာ တိုးပြီး ပေးရတယ်ဆိုရင် ပြည်သူတွေအတွက်တော့ အခက်ခဲတွေ ဖြစ်လာနိုင်တယ်”ဟု ပြောသည်။

လျှပ်စစ်မီတာခ တိုးမြင့်ကောက်ခံခြင်း ထုတ်ပြန်ထားစဉ်

လျှပ်စစ်ဝန်ကြီးဌာနက လျှပ်စစ်မီတာခများကို အိမ်သုံးအမျိုးအစားအတွက်  ဓာတ်အားခ ၁ ယူနစ်မှ ၅၀ ယူနစ်အထိ ၅၀ ကျပ်၊ ၅၁ ယူနစ်မှ ၁၀၀ ယူနစ်အထိ  ၁၀၀ ကျပ်၊ ၁၀၁ ယူနစ်မှ ၂၀၀ ယူနစ်အထိ ၁၅၀ ကျပ်၊ ၂၀၁ ယူနစ်နှင့်အထက်ကို  ၃၀၀ ကျပ် တိုးမြှင့်သတ်မှတ်လိုက်ကြောင်း ၂၀၂၄ ခုနှစ်၊ ဩဂုတ် ၃၀ ရက် ထုတ်ပြန်ခဲ့သည်။ 

ထို့နောက် လုပ်ငန်းသုံးအမျိုးအစားအတွက်ကို   ၁ ယူနစ်မှ ၅၀၀၀ ယူနစ်အထိ ၂၅၀ ကျပ်၊ ၅၀၀၁ ယူနစ်မှ ၂၀၀၀၀ ယူနစ်အထိ ၄၀၀ ကျပ်၊ ၂၀၀၀၁ ယူနစ်နှင့်အထက် ၅၀၀ ကျပ် တိုးမြှင့်ကောက်ခံမည်ဖြစ်ကြောင်း ထုတ်ပြန်ထားသည်။

မြန်မာနိုင်ငံတွင် စီးပွားရေး အခြေအနေ ဆိုးနေချိန်ဖြစ်၍ လျှပ်စစ်မီတာခနှုန်းများ တိုးမြင့်ကောက်ခံလာမှုများက မဖြစ်သင့်ကြောင်း စီးပွားရေးလေ့လာသုံးသပ်သူ ဦးဋ္ဌေးအောင်ကြည်က CNI သတင်းဌာနသို့ ပြောသည်။

လျှပ်စစ်မီတာဘေ စာရွက်ကိုတွေ့ရစဉ်

၎င်း က“ဒီလျှပ်စစ်ပစ္စည်းဆိုတာ private course ပဲ၊ public ကို ဖြန့်ပြီးတော့ ကုန်ပစ္စည်းခွဲခြား နားလည်မှရမှာ ဥပမာ BL ကို YBS plaster ဒုတိယကို ဒါပါဆိုတာကို public က သုံးတာမှန်တယ်။ course ကို အမျိုးအစားခွဲတော့ သူက private course ပဲ။ ပြောချင်တာက ဘာလဲဆိုတော့ အမြတ်မရပဲ ရည်ရှည်ရပ်တည်လို့ မရတဲ့အလုပ်တွေ ပေါ့။ အဲတာ အမျိုးအစားကွဲဖို့ လိုတာပေါ့။ လက်ရှိ အခြေအနေမှာ စီးပွားရေး ပတ်ဝန်းကျင် မကောင်းတဲ့ အခါကြ တော့ လူတန်းစား အားလုံးပါပဲ နောက်တစ်ခါ လူလတ်တန်းစားတွေကလည်း အများကြီးပဲပေါ့ ဒီအခြေအနေ မျိုးမှာကြတော့ တော်တော်လေးခက်တာပေါ့၊ စားရိတ်စားခ ရုန်းကန်ဖို့ကလေ၊ ဒီ introduction လုပ်ငန်းတွေကြ တော့ ပိုသိသာတာပေါ့။ အိမ်ကတော့ထားပေါ့။ ဒါက မိုးတွင်းဆိုတော့လည်း ဒါကလျှပ်စစ်က သဘာဝတရားကြီး ဖြစ်နေတော့ ကျနော်တို့ နိုင်ငံမှာပြန်ရတာပေါ့။ ပြောချင်တဲ့သဘောက စီးပွားရေး အခြေအနေ သိပ်မကောင်းတဲ့ အချိန်မှာ တိုးတာတော့ ဒါက သိပ်အဆင်မပြေဘူးပေါ့။ ဒါပေမယ့် တိုးတယ်ဆိုတဲ့ သဘောတရားတစ်ခုက ဘာကြောင့်လဲဆိုတော့ သူသည် private course, private course ဆိုတဲ့ သဘောတရားတစ်ခုက အဓိက,က ဘာလဲဆိုတော့ ဒီလူသုံးရင် နောက်လူသုံးဖို့အတွက် လျော့သွားစေတာပေါ့။”ဟု ပြောသည်။

မြန်မာနိုင်ငံတွင် လျှပ်စစ်မီးကို တစ်နိုင်ငံလုံးအတိုင်းအတာဖြင့် မပေးနိုင်သေးကြောင်း၊ ရန်ကုန်၊ မန္တလေးမြို့ကြီး များ၌ တစ်ရက်လျှင် ၄ နာရီလာ ၄ နာရီပျက် စနစ်ဖြင့် အလှည့်ကျပေးနေကြောင်း သိရသည်။

လက်ရှိတွင် လျှပ်စစ်မီတာခနှုန်းများသည် ထက်ဝက်လောက် မြင့်တက်လာနေကြောင်း၊ ယခင်က မီတာခ ၄၀၀၀၀ ကျပ်သာ ကျသော်လည်း လက်ရှိမှာတော့ ၈၀၀၀၀ ကျပ်အထိ ဘေလ်ဆောင်ရမှုများဖြစ်လာနေသည်ဟု အိမ်ရှင်မ တစ်ဦးက ပြောသည်။

CNI News
၂၀၂၅ ခုနှစ်၊ ဇွန်လ ၂၁ 

ပြည်တွင်းမှ အရည်အသွေးပြ့ ဆိုလာပြားထုတ်၍ နေရောင်ခြည်စွမ်းအင်သုံး လျှပ်စစ်ဓာတ်အား ထုတ်လုပ် ခြင်းလုပ်ငန်းများမှတဆင့် မိမိတို့နိုင်ငံမှာ လိုအပ်နေသည့် လျှပ်စစ်ဓာတ်အားများ အမြန်ဆုံးရရှိနိုင်မည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၅ ခုနှစ်၊ ဇွန်လ ၂၁ ရက်က ရန်ကုန်တိုင်းဒေသကြီးအတွင်း ရွှေကသာကုမ္ပဏီလီမိတက်၊ ဆိုလာပြားစက်ရုံသို့ သွားရောက် စစ်ဆေးခဲ့စဉ် ၎င်းက ပြောကြားခဲ့သည်။

နစကဥက္ကဋ္ဌက “ မိမိတို့နိုင်ငံအတွက် လိုအပ်သည့် လျှပ်စစ်ဓာတ်အားများအား နေရောင်ခြည်စွမ်းအင်သုံး လျှပ်စစ် ဓာတ်အားထုတ်လုပ်ခြင်း လုပ်ငန်းများမှတဆင့် အမြန်ဆုံးရရှိနိုင်မည်ဖြစ်ကြောင်း၊ ဆိုလာပြားထုတ်လုပ်ခြင်း အတွက် လိုအပ်သည့် ကုန်ကြမ်းများအား ပြည်တွင်း၌ ထုတ်လုပ်သွားနိုင်ရေး ဆောင်ရွက်ရန်လိုကြောင်း၊ ဥပမာ အားဖြင့် ဆီလီကွန်ကဲ့သို့သော ကုန်ကြမ်းများလိုအပ်သဖြင့် ပြည်တွင်း၌ ထုတ်လုပ်နိုင်ရေး နည်းလမ်းရှာဖွေ ဆောင်ရွက်သွာကြရန်လိုကြောင်း၊ ပြည်တွင်း၌ ဆိုလာပြားများကို လုံလောက်စွာ ထုတ်လုပ်နိုင်ခြင်းဖြင့် ပြည်တွင်း လျှပ်စစ်ဓာတ်အား လိုအပ်ချက်များကို များစွာဖြည့်ဆည်းပေးနိုင်မည်”ဟု ပြောသည်။

ပြည့်ဖြိုးမြဲစွမ်းအင်ဖြစ်သဖြင့် သဘာဝပတ်ဝန်းကျင်ကိုလည်း မထိခိုက်နိုင်သောကြောင့် အားပေးဆောင်ရွက်ရမည် ဖြစ်ကြောင်း၊ ပြည်တွင်းမှ ထုတ်လုပ်ထားသည့် ဆိုလာပြားများအား ပြည်ပမှတင်သွင်းသည့် ဆိုလာပြားများနှင့် တန်းတူအရည်အသွေး ရရှိအောင် ဆောင်ရွက်ရန်လိုကြောင်း၊ ခေတ်နှင့်အညီ ပြောင်းလဲတိုးတက်လာသည့် ဆိုလာ ထုတ်လုပ်ခြင်း နည်းပညာများကိုလည်း မျက်ခြည်မပြတ် လေ့လာ၍ အဆင့်မြှင့်တင် ဆောင်ရွက်သွားရန်လို ကြောင်း ၎င်းက ပြောသည်။

မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီ ၁ ရက်နေ့နောက်ပိုင်း ပြောင်းလဲလာသော နိုင်ငံရေး အခင်းအကျင်း ကြောင့် လက်နက်ကိုင်ပဋိပက္ခများ ပေါ်ပေါက်လာခဲ့သည်။

ထို့နောက် လျှပ်စစ်တာဝါတိုင်များ ပျက်စီးခြင်း၊ ရေအားလျှပ်စစ်စီမံကိန်းများရပ်တန့်သွားခြင်း၊ နိုင်ငံခြားငွေ လိုအပ် ချက်များပြားလာခြင်း တို့ကြောင့် မြန်မာနိုင်ငံအတွင်းမှာ လျှပ်စစ်ဖြန့်ဖြူးနိုင်မှု အလွန်ကျဆင်းသွားခဲ့သည်။

ထို့ကြောင့် မြန်မာနိုင်ငံတွင် တစ်နေ့ကို ၄ နာရီလာ ၄ နာရီပျက် စနစ်ကိုလည်းကောင်း၊ တစ်နေ့လျှင် ၄ နာရီလာ ၈ နာရီပျက် စနစ်ကိုလည်းကောင်း စသဖြင့် အချိန်ဇယားဖြင့် လျှပ်စစ်ဓာတ်အား ထုတ်လွှင့်ပေးခဲ့ရသည်။

အဆိုပါ အခြေအနေများကြောင့် မြန်မာနိုင်ငံတွင် အင်ဗာတာသုံးစွဲခြင်းနှင့် ဆိုလာပြားများ တပ်ဆင်များကို တွင်တွင်ကျယ်ကျယ် အသုံးပြုလာခဲ့ကြရသည်။

CNI International News

နယူးဒေလီ၊ ဇွန်လ ၁၄

ဇွန်လ ၁၂ ရက်က အိန္ဒိယနိုင်ငံမှ ဗြိတိန်နိုင်ငံသို့ ပျံသန်းသည့်  Air India လေကြောင်းလိုင်းမှ လေကြောင်းပျံသန်းမှု အမှတ်စဉ် AI171 လေယာဉ်တစ်စင်း ပျက်ကျခဲ့ရာတွင် ရာမက်ရှ် ဗစ်ရှ်ဝက်စ်ကူမာ (Ramesh Vishwaskumar) အမည်ရှိ အမျိုးသားတစ်ဦးသည် အသက်ရှင်လျက် လွတ်မြောက်ခဲ့ကြောင်း South China Morning Post မှ ဖော်ပြခဲ့သည်။

အဆိုပါ Boeing 787 Dreamliner ခရီးသည်တင် လေယာဉ်သည် အိန္ဒိယနိုင်ငံ အာမက်ဒါဘက် (Ahmedabad) မြို့ရှိ လူနေရပ်ကွက်ပေါ်သို့ ပျက်ကျခဲ့ပြီးနောက် ရာမက်ရှ်သည် လေယာဉ်ထဲမှ ထွက်နိုင်ခဲ့ပြီး လေယာဉ်ပေါ်ရှိ အခြားလူ ၂၄၁ ဦးစလုံး သေဆုံးခဲ့သည်။

လူမှုမီဒီယာများပေါ်တွင် ထွက်ပေါ်နေသည့် ဗွီဒီယိုတစ်ခုအရ လေယာဉ်ပျက်ကျသည့် နေရာအနီး၌  သွေးစွန်းသော အဝတ်အစားများဖြင့် ဖြေးညှင်းစွာ လမ်းလျှောက်နေသည့် အမျိုးသားတစ်ဦးကို မြင်တွေ့ရသည်။

“လေယာဉ်ကပျံတက်ပြီး စက္ကန့် ၃၀ လောက်အကြာမှာပဲ ကျယ်လောင်တဲ့အသံကြီးကို ကြားလိုက်ရပါတယ်။ ကျနော် သတိရလာတော့ ကျနော့် အနားမှာ အလောင်းတွေ အများကြီးပဲ။ ကျနော် အရမ်းကြောက်လန့်သွားတယ်။ ကျနော် မတ်တပ်ထရပ်ပြီး ပြေးခဲ့တယ်။ ကျနော့် နားမှာလည်း လေယာဉ် အပိုင်းအစတွေ အများကြီးပဲ။ အဲဒီအချိန် တစ်ယောက်ယောက်က ကျနော့်ကို လှမ်းဆွဲပြီး လူနာတင်ကားထဲကို ထည့်ခဲ့တယ်။ ပြီးတော့ ဆေးရုံကို ခေါ်လာခဲ့ တယ်”ဟု ဗစ်ရှ်ဝက်စ်ကူမာက Hindustan Times သတင်းစာကို ပြောကြားခဲ့သည်။

လေယာဉ်ပျက်ကျသွားလို့ စိတ်မကောင်းဖြစ်နေကြသူတွေကို တွေ့ရစဉ်

သူသည် အသက် ၄၀ အရွယ်ရှိပြီဖြစ်ပြီး ဗြိတိန်နိုင်ငံ၊ လက်စတာ (Leicester) မြို့တွင် နေထိုင်သူဖြစ်သည်။

အိန္ဒိယပြည်ထဲရေးဝန်ကြီး အမစ်ရှားက သူသည် ဗစ်ရှ်ဝက်စ်ကူမာနှင့် တွေ့ဆုံခဲ့ကြောင်း၊ အိန္ဒိယလေကြောင်းလိုင်း ကလည်း ဗစ်ရှ်ဝက်စ်ကူမာသည် အိန္ဒိယနိုင်ငံဖွား ဗြိတိန်နိုင်ငံသားဖြစ်ကြောင်း ပြောကြားခဲ့သည်။

ဗစ်ရှ်ဝက်စ်ကူမာသည် ဆေးရုံခုတင်ပေါ်တွင် မီဒီယာများကို စကားပြောရာ၌ သူသည် ဗြိတိန်နိုင်ငံသား တစ်ဦး ဖြစ်ကြောင်း သူနှင့် သူ့အစ်ကိုသည် အိန္ဒိယရှိ မိသားစုထံ လာရောက် လည်ပတ်ပြီးနောက် ဗြိတိန်သို့ ပြန်ခဲ့ခြင်းဖြစ် ကြောင်း ပြောကြားခဲ့သည်။

ဗစ်ရှ်ဝက်စ်ကူမာသည် လေယာဉ်ပေါက်ကွဲမှု မဖြစ်မီ အရေးပေါ် ထွက်ပေါက်မှ မည်သို့ ခုန်ထွက်ခဲ့သည် ဆိုခြင်းကို မူ ရှင်းရှင်းလင်းလင်း မသိရပေ။

လေယာဉ်ပျက်ကျပြီးနောက် ပေါက်ကွဲမှု မဖြစ်ပွားမီ လေယာဉ်ကိုယ်ထည် နှစ်ပိုင်းကွဲသွားချိန်တွင် သူသည် လေယာဉ်အပြင်သို့ လွှင့်စင်သွားခဲ့သည်ဟု ဗစ်ရှ်ဝက်စ်ကူမာက ပြောကြားခဲ့ကြောင်း အခြားကျန်းမာရေးဝန်ထမ်း တစ်ဦးက ပြန်လည်ပြောပြခဲ့သည်။ 

“သူ (ဗစ်ရှ်ဝက်စ်ကူမာ) က အရေးပေါ် ထွက်ပေါက်နားကခုံမှာ ထိုင်ခဲ့တာပါ။ အဲဒါကြောင့် အရေးပေါ်ထွက်ပေါ် ကနေ အပြင်ကို ခုန်ထွက်နိုင်ခဲ့ပါတယ်” ဟု အာမက်ဒါဘက်မြို့၏ ရဲတပ်ဖွဲ့ထိပ်သီးအရာရှိ ဗစ်ဒီ ချောင်ဒရီ (Vidhi Chaudhary) က ပြောကြားခဲ့သည်။

Source: South China Morning Post

CNI news

၂၀၂၅ ခုနှစ်၊ ဇွန်လ ၂

မြန်မာနိုင်ငံတွင် ၂၀၂၅ ခုနှစ်၊ မတ်လ ၂၈ ရက်က လှုပ်ခတ်ခဲ့သော ငလျင်ကြောင့် ထိခိုက်ပျက်စီးဆုံးရှုံးမှုများ ပြန်လည် ကုစားရေးအတွက် ပြည်တွင်း/ပြည်ပမှ အလှူငွေများ ပေးအပ်လှူဒါန်းလာသည့်အတွက် မည်သည့် နေရာကို ဦးစားပေးသုံးနိုင်လဲဆိုကာ မေးခွန်းထုတ်နေကြသည်။

၂၀၂၅ ခုနှစ်၊ မေလ ၂၉ ရက်က ငလျင်ဘေး အလှူငွေ ပေးအပ်ပွဲတွင် ငွေကျပ် ၁၃၁ ဒသမ ၅၃ ဘီလီယံ၊ အမေရိ ကန်ဒေါ်လာ ၂ ဒသမ ၃ သန်းကျော် (၂,၃၁၄,၉၀၀)ရရှိခဲ့သလို အိမ်ခန်း ၁၆ ခန်းပါ ၄ ခန်းတွဲ ၄ ထပ်တိုက် အဆောက်အဦ တစ်လုံးလျင် ငွေကျပ်သိန်း ၂၀၀၀၀ နှုန်းဖြင့် အလုံးပေါင်း ၅၁ လုံးတို့ ရရှိခဲ့ကြောင်း နစက,က သတင်းထုတ်ပြန်ခဲ့သည်။

ပြီးခဲ့သည် ဧပြီ ၁ ရက် (၂၀၂၅ ခုနှစ်)က ပထမအကြိမ် အလှူငွေ ပေးအပ်လှူဒါန်းပွဲတွင် ပြည်တွင်း/ပြည်မမှ အလှူရှင်များထံမှ ကျပ်ငွေ ၁၁၂ ဒသမ ၈၇ ဘီလီယံ၊ အလှူပစ္စည်းတန်ဖိုး ၁၂ ဒသမ ၄ ဘီလီယံ၊ စုစုပေါင်း ငွေကျပ် ၁၂၅ ဒသမ ၂၇ ဘီလီယံ ရရှိခဲ့ကြောင်း သိရသည်။

အစိုးရဌာနများက ယခုအများပြည်သူသုံးနှင့်ပက်သတ်သည့်ဟာများ ဥပမာ စာသင်ကျောင်းလိုဟာမျိုးများ၊ လမ်း ပျက်သွားတယ်ဆိုလျှင် ပြည်သူက လောလောဆယ်မပြင်နိုင်ခြင်းကြောင့် အစိုးရပဲပြင်နိုင်တာဖြစ်သည်။ ငလျင်ဘေးသင့်ပြည်သူများအတွက်လှူထားတာက ဒေါ်လာမီလီယံ သန်း ၃၀၀ ကျော်လောက်ရှိပြီး ဘယ်လိုလျှုရ မည်ကို  Facebook ကနေအကြံပြုကြတာမျိုး၊ ဘယ်ဟာတွေလှူဒါန်းသင့်တယ်ဆိုတာမျိုးများလည်းရှိတယ်ဟု ပြောသည်။

၂၀၂၅ ခုနှစ်၊ မတ်လ ၂၈ ရက်က ငလျင်ကြောင့် တိုက်ပြိုကျနေစဉ်

အစိုးရသည် ငလျင်ဘေးသင့် ပြည်သူများ ပြန်လည်ထူထောင်ရေး လုပ်ငန်းများ ဆောင်ရွက်ရာတွင် ပြည်သူလူထု ထက် အစိုးရဌာနများ ပြန်လည်လည်ပတ်နိုင်ရေးကို ဦးစားပေး လုပ်ဆောင်လာနိုင်သည်ဟု စီးပွားရေးလေ့လာသုံး သပ်သူ တစ်ဦးက CNI သတင်းဌာနသို့ ပြောသည်။

၎င်းက “ကျန်နော်တို့က အစိုးရမှာ ပျက်ဆီးသွားတဲ့ ဟာတွေရှိတာပေါ့ ရုံးဌာနတွေ၊ လမ်းတံတားတွေ၊ စာသင် ကျောင်းတွေ၊ မီးသတ်ရုံးတွေ အများကြီးဘဲ ကျနော်တို့ ဒီစစ်ကိုင်းတို့ ဘာတို့က သာသနိက အဆောက်အအုံတွေ ကလည်း အစိုးရအောက်ထဲမှာပဲရှိတာပေါ့။ ဒီသာသနာရေးဝန်ကြီးဌာန အောက်မှာဆိုတော့ သူတို့ရတဲ့ budget ကို သူတို့က အဲဒါတွေပဲပြင်မှာ ပြည်သူကိုတော့ မပေးဘူး။ ပြည်သူကတော့ ပြည်သူအချင်းချင်း ကူရမှာပေါ့လေ။ ဒါပေမယ့် တချို့ တကယ်ဒုက္ခရောက်သွားတဲ့ ပြည်သူတွေဆိုရင်လည်း သူတို့က ကူမှာပေါ့။ ပြောချင်တာကတော့ သံဃာက သံဃာအချင်းချင်း၊ ပြည်သူက ပြည်သူအချင်းချင်း၊ အစိုးရက အစိုးရအချင်းချင်းကို အရင်ကူရတာက ထုံးစံပဲပေါ့။ အရင် ဟေတီငလျင်တို့ ဘာတို့တုန်းကဆိုရင် သူက ဘီလီယံနဲ့ချီပြီး နိုင်ငံက အလှူငွေရတော့ သူတို့က ဘာလုပ် လဲဆိုတော့ ဒီလောက် ရတဲ့ပေါ်မှာ မူတည်ပြီးတော့ ပြည်သူအိုးအိမ်တွေကို ပြန်ဆောက်ပေးတာတွေ ရှိတယ်။ အဲလိုတော့ ရှိတယ်ဆိုတော့ သူတို့အနေနဲ့လည်း ပထမဦးစားပေးနေနဲ့တော့ အစိုးရဌာနတွေနဲ့ ဒီပျက်စီး သွားတဲ့ အစိုးရယန္တရား လည်ပတ်ဖို့အတွက် လိုအပ်တဲ့ အခြေခံ အဆောက်အအုံတွေ ပြန်ဆောက်မယ်လို့ ကျနော် ယုံကြည် တယ်” ဟု ပြောသည်။

မြန်မာနိုင်ငံ၊ မန္တလေးမြို့အနီး စစ်ကိုင်းမြို့ကို ဗဟိုပြု၍ ၂၀၂၅ ခုနှစ်၊ မတ်လ ၂၈ ရက်က အင်အားပြင်း ၇ ဒသမ ၇ အဆင့်ရှိ ငလျင်လှုပ်ခတ်ခဲ့သည့်အတွက် တိုင်းဒေသကြီးနှင့် ပြည်နယ် ၁၀ ခုမှာ ထိခိုက်ခဲ့ပြီး ၆ ခုတွင် ငလျင်ဒဏ် ပြင်းထန်စွာ ခံစားခဲ့ရသည်။

ပြည်သူများဆီကို တိုက်ရိုက်သွားချင်လျှင် ပြည်သူများကြားထဲတွင် သွားနေသည့် လူမှုအဖွဲ့အစည်းများကနေ သွားလျှင်ရသည်ဟု ပြည်သူ့ရှေ့ဆောင်ပါတီ(PPP)မှ အတွင်းရေးမှူး ဦးမျိုးဆက်သွေးက CNI သတင်းဌာနသို ပြောသည်။

၂၀၂၅ ခုနှစ်၊ မတ်လ ၂၈ ရက်က ငလျင်ကြောင့် ကယ်ဆယ်ရေးလုပ်နေကြစဉ်

၎င်းက “အစိုးရကနေ တဆင့် သွားလည်းပဲရပါတယ်။ ထွေ/အုပ်တို့၊ ရပ်ကွက်အုပ်ချုပ်ရေးမှူးတို့ ဒါကတွေကနေ သွားရင် လည်းပဲ သွားလို့ရတာပေါ့နော်။ သိတဲ့အတိုင်းပဲ ပြည်သူနဲ့ ရပ်ကွပ်အုပ်ချုပ်ရေးမှူးတွေရဲ့ ကြားထဲမှာ ယုံကြည်မှုနဲ့ ဆက်ဆံရေးအရ ‌နေရာတိုင်းမှာ အမြဲကောင်းနေတာ မဟုတ်ဘူးလေ။ ဆိုလိုတာက ရပ်ကွက်အုပ်ချုပ် ရေးမှူးတွေက တဆင့်ဆိုလို့ရှိရင် သူတို့နဲ့ရင်းနှီးရာ ရင်းနှီးရာ ဆွေမျိုးတွေတို့ နီးတဲ့ဆီ ရောက်တာတို့ ပိုပေးတာတို့ ဖြစ် တက်ရှိတက်ကြတယ်ပေါ့နော်။ ပြည်သူတွေကြားထဲမှာ တကယ် လှုပ်ရှားပြီးကူညီတဲ့ လူမှုအဖွဲ့အစည်းတွေ ရှိတယ်လေ။ အဲဒါတွေကနေတဆင့် သွားရင်တော့ ပိုပြီးတော့ နည်းမှန်လမ်းမှန် ရောက်နိုင်တယ်ပေါ့နော် ဘယ်လို ပြည်သူတွေကို ဦးစားပေးမလဲဆိုတော့ မြေပြင်မှာ သိနေတာပဲပေါ့။ ဘေးသင့်တာခြင်း အတူတူ ဘယ်သူကပိုပြီး တော့ ထိခိုက်တယ် ဘယ်သူကတော့ ပိုပြီး ပြန်လည်ထူထောင်ရေးမှာ အရာရှိကြီး မဟုတ်တဲ့ အစိုးရဝန်ထမ်းငယ် တွေဆိုရင် သူတို့ပြန်လည် ထူထောင်ရေးကို သူတို့ဘာသူတို့ မလုပ်နိုင်ဘူးပေါ့။ ဒါမျိုးတွေ အရင်ဦးစားပေးပြီး လုပ် သင့်တယ်ပေါ့ စသဖြင့် အဲလိုမျိုး သေသေချာချာ မြေပြင်မှာ စာရင်းကောက်ပြီးတော့မှ လုပ်ပေးသင့်ပါတယ်”ဟု ပြောသည်။

ပြန်လည်ထူထောင်ရေး လုပ်ငန်းများ ဆောင်ရွက်သည့် အခါတွင် လက်ရှိ ကြုံတွေ့နေရသော ဘေးအန္တရာယ်များ အပြင် နောင်ဖြစ်လာနိုင်ခြေရှိသည့် ဘေးအန္တရာယ်များအတွက် ကြိုတင်ထည့်သွင်းစဉ်းစားပြီး သတ်မှတ်စံညွှန်း များဖြင့်အညီ အနာဂတ်အတွက် တည်တံ့ခိုင်မြဲအောင် ဆောင်ရွက်ရန်လိုအပ်သည်ဟု နစကဥက္ကဋ္ဌ ဗိုလ်ချုပ်မှူး ကြီးမင်းအောင်လှိုင်က ပြောသည်။

၂၀၂၅ ခုနှစ်၊ မတ်လ ၂၈ ရက်က လှုပ်ခတ်ခဲ့သော ငလျင်ကြောင့် နေပြည်တော်ကောင်စီ အပါအဝင် တိုင်းဒေသကြီး၊ ပြည်နယ် ၁၀ ခုတွင်ရှိသည့် ရပ်ကွက် ၃၇၄ ခု၊ ကျေးရွာအုပ်စု ၉၄၄ စု၊ ကျေးရွာ ၂,၀၈၁ ရွာ၊ အိမ်ထောင်စု ၁၆၂,၁၆၇၊ လူဦးရေ စုစုပေါင်း ၅၀၆,၀၆၉ ဦး ဘေးသင့်ခဲ့သည်။

ထို့နောက် သေဆုံးသူ ၃,၇၃၉ ဦး၊ ပျောက်ဆုံးသူ ၆၈ ဦး၊ ဒဏ်ရာရသူ ၅,၁၀၄ ဦးရှိကြောင်း နစက,က သတင်းထုတ် ပြန်ခဲ့သည်။

ထို့ပြင် လူနေအိမ် ၅၁,၂၁၀ လုံး၊ လမ်းလုပ်ငန်း ၄၃၁ ခု၊ တံတား ၁၀၃ စင်း၊ ရထားလမ်း ပျက်စီးနေရာ ၈၃ နေရာနှင့် ရထားလမ်းတံတား ၁၁ စင်း၊ မိုဘိုင်းဆက်သွယ်ရေးစခန်း ၆,၇၃၀ ခု၊ မဟာဓာတ်အားလိုင်း ၁၀ လိုင်း၊ ဓာတ်အား လိုင်းတိုင် ၃,၄၃၅ တိုင်၊ ဆည်မြောင်း ၅၉၄ ခု၊ တာတမံ ၆ ခု၊ ဌာနအဆောက်အဦ ၁၁,၃၃၈ လုံး၊ ဆေးရုံ ၃၈၄ ရုံ၊ ဆေးခန်း ၃၆၄ ခန်း၊ ရှေးဟောင်း အဆောက်အဦနှင့် ပြတိုက် ၁၆၆ ခု၊ အခြေခံပညာကျောင်း ၂,၄၀၉ ကျောင်း၊ အဆင့်မြင့် ပညာကျောင်း ၇၂ ကျောင်း၊ ပုဂ္ဂလိက စာသင်ကျောင်း ၉၀၊ ဘုရားစေတီ ၆,၄၆၉ ဆူ၊ ဘုန်းကြီးကျောင်း- သီလရှင်ကျောင်းနှင့် အခြား ဘာသာရေး အဆောက်အဦ ၅,၅၈၈ ခု၊ ပုဂ္ဂလိက စက်ရုံအလုပ်ရုံ ၃၄၄ ခု၊ သီးနှံ ၇ ဒသမ ၅ ဧက၊ တိရိစ္ဆာန် ၁၃၃,၇၀၀ ကောင် ထိခိုက်ပျက်စီးခဲ့ရပြီး မူလပျက်စီးဆုံးရှုံးမှုတန်ဖိုး စုစုပေါင်း ငွေကျပ် ၃,၈၀၄ ဒသမ ၅၄၉ ဘီလီယံ ဖြစ်ကြောင်း နစက,က သတင်းထုတ်ပြန်ခဲ့သည်။

ငလျင်ကြောင့် ပျံလွန်-ကွယ်လွန်သူများကို ရည်စူး၍ တစ်လပြည့် နေ့ဆွမ်းကပ်

CNI News
၂၀၂၅ ခုနှစ်၊ ဧပြီ ၂၈

မြန်မာနိုင်ငံ၊ မန္တလေးမြို့အနီး စစ်ကိုင်းမြို့ကို ဗဟိုပြု၍ ပြင်းအား ၇ ဒသမ ၇ အဆင့်ရှိ ငလျင်ကြီးတစ်ခု ၂၀၂၅ ခုနှစ်၊ မတ်လ ၂၈ ရက်က လှုပ်ခတ်ခဲ့သည်။

အဆိုပါ ငလျင်ကြောင့် မန္တလေးတိုင်း၊ စစ်ကိုင်းတိုင်း၊ ပဲခူးတိုင်း၊ မကွေးတိုင်း၊ ရှမ်းပြည်နယ်နှင့် နေပြည်တော် ကောင်စီနယ်မြေအတွင်းမှာ လူပေါင်း ၄၀၀၀ ဝန်းကျင် သေဆုံးပြီး ၅၀၀၀ ကျော် ထိခိုက်ဒဏ်ရာရရှိခဲ့သည်။

ထို့ကြောင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် ဇနီးဦးဆောင်၍ ငလျင်လှုပ်ခတ်မှုကြောင့် ပျံလွန်၊ ကွယ်လွန်ခဲ့ကြရသည့် ရဟန်း၊ ရှင်၊ လူ ပြည်သူများအား ရည်စူးပြီး ၂၀၂၅ ခုနှစ်၊ ဧပြီ ၂၈ ရက်နေ့ တစ်လပြည့်  နေ့ဆွမ်း ဆက်ကပ်လှူဒါန်းပွဲကို နေပြည်တော်မှာ ပြုလုပ်ခဲ့သည်။

မတ်လ ၂၈ ရက်နေ့က လှုပ်ခတ်ခဲ့သော ငလျင်ကြောင့် လူပေါင်း ၆ သိန်းကျော် ငလျင်ဘေးဒုက္ခသည်များဖြစ်ခဲ့သည်။

နေပြည်တော်ကောင်စီ အပါအဝင် တိုင်းဒေသကြီးနှင့် ပြည်နယ် ၁၀ ခုတွင် ဧပြီ ၂၄ ရက် ကနဦးစာရင်း များအရ လူနေအိမ် ၆၃၈၅၄ လုံး၊ စာသင်ကျောင်း ၆၇၅၂ ကျောင်း၊ ဘုန်းကြီးကျောင်းနှင့် သီလရှင်ကျောင်း ၅၄၇၄ ကျောင်း၊ စေတီပုထိုး ၅၃၄၂ ဆူ၊ အခြား ဘာသာရေး အဆောက်အဦ ၆၁၃ လုံး၊ ဆေးရုံ/ဆေးခန်း ၅၇၆ လုံး၊ ရထား လမ်း ၅၆ ခု၊ လမ်း ၂၇၁ ခု၊ အမြန်လမ်းပိုင်း ၁၉၈ ခု၊ ဆည်/တမံ ၅၈၆ ခု၊ တံတား ၁၇၂ စင်း၊ ထရန်စဖော်မာ ၃၅၃ လုံး ပျက်စီးဆုံးရှုံးခဲ့ကြောင်း သိရသည်။

CNI News
၂၀၂၅ ခုနှစ်၊ ဧပြီ ၁၉

ငလျင်ဘေးသင့်၍ ပြိုကျပျက်စီးသွားသည့် လူနေအိမ်များနှင့် အဆောက်အအုံများ ပြန်လည် ဆောက်လုပ်ဖို့ အတွက် ဘိလပ်မြေ၊ သံနှင့်သွပ်များကို နိုင်ငံတော်မှ သင့်လျော်သည့်ဈေးနှုန်းများဖြင့် ရောင်းချပေးသွားမည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

နစကဥက္ကဋ္ဌသည် စစ်ကိုင်းမြို့နှင့် မန္တလေးမြို့ရှိ ခရိုင်အဆင့်ဌာနဆိုင်ရာ တာဝန်ရှိသူများနှင့် ရပ်မိရပ်ဖများအား သီးခြားစီ တွေ့ဆုံစဉ် ပြောကြားခဲ့ခြင်း ဖြစ်သည်။

နစကဥက္ကဋ္ဌက “မန္တလေးမြို့နှင့် စစ်ကိုင်းမြို့အတွင်းရှိ ပျက်စီးသွားသည့် အဆောက်အဦများ ရှင်းလင်းရေးနှင့် ပြန်လည် ဆယ်တင်ရေးလုပ်ငန်းများ ဆောင်ရွက်ရမည်ဖြစ်ပြီး နိုင်ငံတော်မှလည်း ကူညီဆောင်ရွက်သွားမည် ဖြစ်ကြောင်း၊ ဆောက်လုပ်ရေး လုပ်ငန်းများအတွက် လိုအပ်သည့် ဘိလပ်မြေ၊ သံနှင့်သွပ်များကိုလည်း နိုင်ငံတော် မှ သင့်လျော်သည့်ဈေးနှုန်းများဖြင့် ရောင်းချပေးသွားမည်”ဟု ပြောသည်။

ပျက်စီးမှုများဖြစ်ပေါ်ခဲ့သည့် လူနေအိမ်များအတွက်လည်း အမျိုးအစားများအလိုက် သင့်လျော်သည့် နှုန်းထားများ ဖြင့် ငွေကြေးများ ထောက်ပံ့ပေးသွားမည်ဖြစ်ကြောင်း၊ မြို့ ပြန်လည် ထူထောင်ရေး လုပ်ငန်းများ ဆောင်ရွက်ရာ တွင် မြို့နေရာချထားမှု Town Plan များစနစ်တကျ ပြန်လည်ရေးဆွဲပြီး မြို့၏ကောင်းရာကောင်းကျိုးအတွက် ဆောင်ရွက်သွားကြရန်လိုကြောင်း ၎င်းက ပြောသည်။ 

နစကဥက္ကဋ္ဌက “ မြို့တည်ဆောက်ရေး လုပ်ငန်းများ ပြန်လည်ဆောင်ရွက်ရာတွင် ခေတ်နှင့်လျော်ညီသည့် လမ်းများ၊ မြို့ကွက်များဖြစ်ရန်လိုကြောင်း၊ ပြန်လည်တည်ဆောက်ရေး လုပ်ငန်းများ ဆောင်ရွက်ရာတွင် ယခင် မိမိတို့နိုင်ငံ၌ အမြင့်ဆုံးလှုပ်ခတ်ခဲ့သည့် ရက်ချ်စတာစကေး ၈ အဆင့်ထိ ခံနိုင်သည့် အဆောက်အဦ၊ လမ်းတံတား များဖြစ်အောင် တည်ဆောက်သွားကြရန်လိုသည်”ဟု ပြောသည်။

ထို့နောက် စစ်ကိုင်းတိုင်းဒေသကြီး ပြန်လည်ထူထောင်ရေးလုပ်ငန်းများအတွက် ငွေကျပ် ၅၀ ဘီလီယံနှင့် မန္တလေး တိုင်းဒေသကြီး ပြန်လည်ထူထောင်ရေး လုပ်ငန်းများအတွက် ငွေကျပ် ၆၀ ဘီလီယံ အသီးသီး ထောက်ပံ့ငွေများ ပေးအပ်ခဲ့သည်။

မြန်မာနိုင်ငံတွင် မတ်လ ၂၈ ရက်က မန္တလေးမြို့အနီး စစ်ကိုင်းမြို့ကို ဗဟိုပြု၍ ပြင်းအား ၇ ဒသမ ၇ အဆင့်ရှိ ငလျင်လှုပ်ခတ်ခဲ့၍ လူ ၄၀၀၀ ဝန်းကျင် သေဆုံးခဲ့ပြီး ၅၀၀၀ ကျော် ထိခိုက်ဒဏ်ရာရရှိခဲ့ကာ ၁၀၀ ကျော် ပျောက်ဆုံးလျက်ရှိသည်။

ထို့ပြင် လမ်းတံတားများ၊ လူနေအိမ်များ၊ ဟိုတယ်များ၊ ဘာသာရေး အဆောက်အအုံများ၊ အစိုးရရုံးများ၊ ဝန်ထမ်း အိမ်ယာများ၊ ဆေးရုံများ၊ စာသင်ကျောင်းများ ပြိုကျ ပျက်စီးခဲ့သည်။