CNI News
၂၀၂၃ ခုနှစ်၊ ဧပြီ ၁၇

မွန်ပြည်နယ်၊ သံဖြူဇရပ်မြို့နယ်၊ ပငကျေးရွာတွင် ဧပြီ ၁၇ ရက်နေ့ နှစ်ဆန်းတစ်ရက်နေ့တွင် သင်္ကြန်ရေပက်ခံနေကြ ခြင်းကိုတွေ့ရသည်။

CNI News

၂၀၂၃ ခုနှစ်၊ ဧပြီ ၁

သင်္ကြန်ကာလအတွင်း နေရပ်ပြန်မည့်သူများ များပြားသည့်အတွက် လက်ရှိတွင် မန္တလေး၊ ပခုက္ကူ၊ မုံရွာ စသည့် မြေပြန့်ဒေသများအတွက် ကားလက်မှတ်များ ပြည့်နေပြီဖြစ် ကြောင်း အဝေးပြေးယာဉ်လိုင်းများထံမှ သိရသည်။

ဧပြီလ ၁၃ ရက်နေ့တွင် ကျရောက်မည့် သင်္ကြန်ကာလအတွင်း ရန်ကုန်မှတဆင့် တခြားသော တိုင်းဒေသကြီးနှင့် ပြည်နယ်များသို့ နေရပ်ပြန်ကြမည့် သူများအတွက် အဝေးပြေး ကားလက်မှတ်များကို မတ်လ ဒုတိယပတ်မှ စတင်၍ ကြိုတင်ရောင်းချပေးနေပြီး ဖြစ်သည်။

သင်္ကြန်ကာလအတွက် ယာဉ်အစီးရေ တိုးချဲ့သည့် ယာဉ်လိုင်းများလည်း ရှိကြောင်း၊ ထိုယာဉ်လိုင်းများသည်လည်း မြေပြန့်ပိုင်းသို့ ပြန်ကြမည့် ခရီးသည်များဖြင့် ပြည့်လုနီးပါးဖြစ်နေသည်ဟု ယာဉ်လိုင်းတစ်ခုမှ ဂိတ်မှူးတစ်ဦးက CNI သတင်းဌာနသို့ ပြောသည်။

၎င်းက “မြေပြန့်ပိုင်း ခရီးစဉ်ဆို အားလုံးနီးပါး ပြည့်နေပြီ။ ရှိသလောက်ပေါ့နော် ကားတွေက တချို့တွေကတော့ ကားရှိတဲ့ အုံနာတွေကတော့ ထပ်ထုတ်တာ ဘာညာဆိုတော့ တစ်မျိုးပေါ့။ မထုတ်ဘူး ပုံမှန် ၁ နေ့ကို ၂ စီး ထွက် တဲ့ကားက အဲဒီရက်ဆို ၃ စီးလောက် ထွက်တာပေါ့။ သင်္ကြန်ရက်က ၃ စီးလောက်ကို အဲလောက်နဲ့ ပြည့်နေပြီ မြေပြန့်ပိုင်းပေါ့။ မြေပြန့်ပိုင်းဆိုတာက မန္တလေး၊ မုံရွာ၊ ပခုက္ကူ၊ ပုဂံ၊ ညောင်ဦး၊ ကျောက်ပန်းတောင်း၊ ဒီဘက် မော်လမြိုင်ဘက်ပေါ့။ အဲလိုဘက် မြေပြန့်ပိုင်း ခရီးစဉ်တွေကတော့ ပြည့်နေပြီ” ဟု ပြောသည်။

မန္တလေးမြို့အ၀င်ကိုတွေ့ရစဉ်

ယခုနှစ် သင်္ကြန်ရုံးပိတ်ရက် ကာလတွင် ပြီးခဲ့သည့် ၂၀၂၂ ခုနှစ်နှင့် နှိုင်းယှဉ်ပါက နေရပ်သို့ ပြန်ကြသည့် ခရီးသည် များလာကြောင်း၊ သို့သော်လည်း ဧပြီလ ၉ ရက်နေ့အထိသာ ကြိုတင် လက်မှတ်များ ပြည့်နေကြောင်း၊ ၉ ရက်နေ့ နောက်ပိုင်းတွင် ခရီးသွားဦးရေ နည်းကြောင်း မွန်ပြည်နယ်ဘက်သို့ ပြေးဆွဲနေသည့် သီရိရတနာ ကားဂိတ်မှ တာဝန်ရှိသူတစ်ဦးက CNI သတင်းဌာနသို့ ပြောသည်။

၎င်းက “၈ ရက်၊ ၉ ရက်လောက်ပဲ ကျတယ်နော် ခရီးသည်က။ လူကတော့ အရမ်း အကျကြီး မဟုတ်ဘူးနော် အဲဒီ ၈ ရက်၊ ၉ ရက်မှာပဲ။ ကားတိုးတာတော့ မရှိဘူး။ ပြည့်ကားတွေကို ပုံမှန်လွှတ်တာပဲ ရှိတယ်။ ကားပိုရောင်းထားတဲ့ ဟာကတော့ တစ်စီးပဲ ရှိတယ်နော်။ မနှစ်ကထက် စာရင်တော့ နည်းနည်း ပြန်တာရှိတယ်” ဟု ပြောသည်။

သင်္ကြန်ရုံးပိတ်ရက် ကာလအတွင်း အဝေးပြေး လက်မှတ်ခများကို တိုးမြှင့် ကောက်ခံခြင်း မပြုကြရန် ရန်ကုန်တိုင်း ဒေသကြီး ပုဂ္ဂလိက သယ်ယူပို့ဆောင်ရေး ကြီးကြပ်မှုကော်မတီ(YRTC)မှ ထုတ်ပြန်ထားသော်လည်း ယာဉ်လိုင်း များအနေဖြင့် တိုးမြှင့် ကောက်ခံနေကြသည်ကို တွေ့ရသည်။

မြေပြန့်ဒေသသို့ ပြန်ကြမည့် ခရီးသည် များပြားသည့်အတွက် မြေပြန့်ဒေသ၏ လက်မှတ်ခကို တခြားသော ဒေသများထက် ပို၍ တိုးမြှင့်ကောက်ခံထားကြောင်း၊ ၅ ထောင်ကျပ်မှ ၁ သောင်းကျပ် တိုးမြှင့်ထားသည်ဟု ယာဉ်လိုင်းများထံမှ သိရသည်။

ယခင်နှစ်ကထက် ယခုနှစ်တွင် နေရပ်ပြန်ကြမည့် သူများသည်ဟုလည်း အောင်မင်္ဂလာ အဝေးပြေးကွင်း၌ ဆိုင်ကယ်ကယ်ရီ ပြေးဆွဲနေသည့် ကိုရဲရင့်က CNI သတင်းဌာနသို့ ပြောသည်။

စစ်ကိုင်း မင်းကွန်းဒေသကိုတွေ့ရစဉ်

၎င်းက “ပြီးခဲ့တဲ့ နှစ်နဲ့ဆိုရင် ဒီလိုအချိန် အခုကတော့ မပြောတတ်သေးဘူး။ အခုမှ ၁ ရက်နေ့ပဲ ရှိသေးတယ်လေ။ ဒီကောင်တွေက ကျမယ်ဆိုရင် အနည်းဆုံး ၈ ရက်၊ ၉ ရက်၊ ၁၀ ရက် အဲဒီ ၃ ရက်က target ပဲလေ။ အခုကတော့ နည်းနည်းလေး မဆိုးသလောက် ဖြစ်တာပေါ့။ ဘာလို့လဲဆို မနှစ်ကထက် ဒီနှစ်ကတော့ များတော့ များတာပေါ့။ ဒီလိုပါပဲ ကယ်ရီသမားတွေကတော့ အဲလိုအချိန်ကိုပဲ စောင့်ရတာပေါ့” ဟု ပြောသည်။

အဝေးပြေး ယာဉ်လိုင်းအများစုသည် သင်္ကြန်ရုံးပိတ်ရက် ကာလအတွင်း သင်္ကြန်အကြိုနေ့ အထိသာ နောက်ဆုံး ထား ပြေးဆွဲမည်ဖြစ်ပြီး ကျန်ရှိသည့် ရက်များတွင် ယာဉ်လိုင်း အနည်းငယ်သာ ပြေးဆွဲမည်ဖြစ်ကြောင်း၊ ထို့ နောက် နှစ်ဆန်းတစ်ရက်နေ့မှ စတင်၍ ယာဉ်လိုင်းအားလုံး ပြန်လည် ပြေးဆွဲကြမည်ဟု သိရသည်။

ပြီးခဲ့သည့် ၂၀၂၂ ခုနှစ်နှင့် နှိုင်းယှဉ်ပါက ခရီးသွားဦးရေ တိုးလာသော်လည်း ကိုဗစ် မတိုင်ခင် ကာလနှင့် နှိုင်းယှဉ်ပါ က ထက်ဝက်ခန့်ပင် မရှိသေးကြောင်း၊ ပြေးဆွဲသည့် ကားအစီးရေလည်း လျော့နည်းနေသေးကြောင်း အဝေးပြေး ယာဉ်လိုင်းများထံမှ သိရသည်။

CNI News

၂၀၂၃ ခုနှစ်၊ မတ်လ ၃၁

ထိုင်းတွင် အခမဲ့ဗီဇာ (Visa Free) ပေးထားသည့် မြန်မာအပါအဝင် အခြားနိုင်ငံသားများအား နေထိုင်ခွင့် ၄၅ ရက် ခွင့်ပြုထားခြင်းကို ၁၄ ရက်သို့ လျှော့ချလိုက်ခြင်းသည် ၎င်းတို့နိုင်ငံ ဝင်ငွေဘတ်ဂျက် ရရှိစေရန်အတွက် ဖြစ်နိုင်ကြောင်း မြန်မာရွှေ့ပြောင်းအလုပ်သမားအရေး ဆောင်ရွက်သူများက CNI သတင်းဌာနသို့ ပြောသည်။

အခမဲ့ဗီဇာ (Visa Free) ဖြင့် နေထိုင်ခွင့်ရရှိသည့် ၁၄ ရက်သည် ယခင်ကတည်းက ချမှတ်ထားသော ဥပဒေဖြစ် သော်လည်း ၂၀၂၂ ခုနှစ် အောက်တိုဘာ ၁ ရက်မှစတင်ကာ ၎င်းတို့နိုင်ငံသို့ ခရီးသွားများ ပြန်လည်ဝင်ရောက် စေရန်အတွက် ရည်ရွယ်ကာ သဘောတူညီမှုရရှိထားသော မြန်မာအပါအဝင် အခြားနိုင်ငံသားများအား အခမဲ့ဗီဇာ (Visa Free)ဖြင့် နေထိုင်ခွင့်အား ၄၅ ရက်အထိ တိုးမြှင့်ပေးလိုက်ခြင်းဖြစ်ကြောင်း ၎င်းတို့က ပြောသည်။

သို့သော် ယခုအခါတွင် ဧပြီ ၁ ရက်နေ့မှ စတင်ကာ နေထိုင်ခွင့်အား ၁၄ ရက်သို့ ပြန်လည်လျှော့ချလိုက်ခြင်းသည် ထိုင်းနိုင်ငံအနေဖြင့် ခရီးသွားအများအပြား ပြန်လည်ဝင်ရောက်လာပြီဖြစ်သောကြောင့် ယခုကဲ့သို့ လုပ်ဆောင် ခြင်း ဖြစ်နိုင်ကြောင်း MWRN မှ အကြံပေး ဦးအောင်ကျော်က CNI သတင်းဌာနသို့ ပြောသည်။

ထိုင်းလေဆိပ်တွင် အာဏာပိုင်များက စစ်ဆေးရန် ပြင်ဆင်နေစဉ်

၎င်းက “၂၀၁၉ ဒီဇင်ဘာ Covid 19 စဖြစ်တာပေါ့။ အဲဒီကနေ ၂၀၂၀ ကစပြီးမှ တစ်ကမ္ဘာလုံးမှာ အကြီးအကျယ် ဆိုးဝါးတဲ့ အနေအထားကို ရောက်ရှိတဲ့အချိန်မှာ ခရီးသွား Tourist တွေနဲ့ ပတ်သက်လို့ သူက ဘဏ္ဍာငွေရရှိမှု မရှိတော့တဲ့ အချိန် ဖြစ်သွားတာပေါ့။ အဲဒီတော့ သူက အဲဒီလမ်းကြောင်းကို မြူဆွယ်တဲ့အနေနဲ့ Covid 19 ထိန်း ချုပ်နိုင်တဲ့ အနေအထားမျိုး ရောက်ရှိလာတဲ့အချိန်မှာ သူက ဆွဲဆောင်လိုက်တဲ့သဘောပေါ့။ ၄၅ ရက်အထိ နေထိုင်ခွင့် ရှိတယ်ဆိုတော့ ခရီးသွားတွေကို အလုံးအရင်းနဲ့ ပြန်လည်ဝင်ရောက်စေချင်တဲ့အတွက်ကြောင့် လုပ်တဲ့ သဘောပါ။ အဓိကကတော့ ကျနော်ထင်တယ် ထိုင်းနိုင်ငံကလည်း သူ့ရဲ့ နိုင်ငံတော်ဘတ်ဂျက် ရရှိရေးပေါ့နော်။ အကယ်၍များ ၁၄ ရက်နဲ့ မလောက်လို့ထပ်ပြီးမှ လျှောက်ထားမယ်ဆိုရင် သူ့အတွက် နိုင်ငံတော်ဘဏ္ဍာငွေထပ်ပြီး တိုးမြှင့်ရရှိမှာ ကိုး။ အဲဒီတော့ အကယ်၍များ တစ်ကြိမ်တည်းနဲ့ ၄၅၊ ၄၅ ပေးလိုက်မယ်ဆိုရင် လူတွေက လုံလုံ လောက်လောက် ရတဲ့အတွက်ကြောင့် မူလတစ်ကြိမ် ငွေကြေးကုန်ကျမှုကလွဲလို့ နောက်ထပ် ထိုင်းနိုင်ငံအတွက် အသစ်ပြန်ပြီး ဝန်ဆောင်ခတွေ ဘာတွေ ပေးစရာမလိုတဲ့အနေအထားမျိုးဖြစ်နေတယ်။ အခုတော့ ၁၄ ရက်နဲ့ မလုံလောက်ဘူး ဒီထက်ပိုမိုပြီး ရချင်သေးတယ်ဆိုရင် ထပ်မံပြီးမှ နိုင်ငံတော်အနေနဲ့ လျှောက်ထားတဲ့အခါမှာ ငွေကြေးတွေ ပြန်လည်ရရှိဖို့ သူတို့မျှော်မှန်းတဲ့သဘော” ဟု ပြောသည်။

ယခုကဲ့သို့ အခမဲ့ဗီဇာ (Visa Free)ဖြင့် နေထိုင်ခွင့် ရက်အား ယခင်အတိုင်း ပြန်လည်လျှော့ချလိုက်ခြင်းသည် လက်ရှိတွင် ၎င်းတို့နိုင်ငံ၏ နိုင်ငံရေး အခြေအနေနှင့် မေလတွင် ကျင်းပပြုလုပ်မည့် အထွေထွေရွေးကောက်ပွဲ တို့ဖြင့်ပါ ဆက်စပ်မှု ရှိနိုင်ကြောင်းလည်း မြန်မာရွှေ့ပြောင်း အလုပ်သမားအရေး ဆောင်ရွက်သူများက သုံးသပ်သည်။

ဘန်ကောက်ရှိ မြန်မာသံရုံးအနေဖြင့် ၂၀၂၂ ခုနှစ်၊ အောက်တိုဘာလ ၁ ရက်မှ ၂၀၂၃ ခုနှစ်၊ မတ်လ ၃၁ ရက်နေ့ အတွင်း အခမဲ့ဗီဇာ (Visa Free) ဖြင့် ၄၅ ရက်အထိ နေထိုင်နိုင်ပြီး ဆိုက်ရောက်ဗီဇာ (Visa on Arrival) ရရှိ ထားသော နိုင်ငံသားများသည် ၃၀ ရက်အထိ နေထိုင်ခွင့်ရရှိခဲ့ကြောင်း အသိပေး ထုတ်ပြန်ထားသည်။

သို့သော် ယခု ဧပြီလ ၁ ရက်မှစ၍ ယခင်အတိုင်း အခမဲ့ဗီဇာ (Visa Free) ဖြင့် ၁၄ ရက်သာ ခွင့်ပြုမည် ဖြစ်သော ကြောင့် ရက်ရှည် နေထိုင်လိုသူများအနေဖြင့် ထိုင်းသံရုံး(ရန်ကုန်)၌ ဗီဇာလျှောက်ထား၍ လာနိုင်ပါကြောင်း ၎င်း အသိပေး ထုတ်ပြန်ချက်တွင် ပါရှိသည်။

ထိုင်းလေဆိပ်အတွင်းကိုတွေ့ရစဉ်

FED မှ အလုပ်သမားတာဝန်ခံ ဦးမင်းဦးက “Visa ရပြီးပြီ ဆိုရင်တောင်မှ လ.ဝ.က(ထိုင်း)မှာက လုပ်ပိုင်ခွင့်ဆိုတာ ရှိတယ်လေ။ သူ့ကို လုပ်ပိုင်ခွင့်အာဏာ ပေးထားတာဆိုတော့ သူက reject လုပ်ချင်ရင် သူ့အကြောင်းပြချက်နဲ့သူ reject လုပ်လို့ရတယ်။ အထူးသဖြင့်တော့ လ.ဝ.က ကနေ မေးတဲ့အခါမှာ ဖြေနိုင်ဖို့ပေါ့လေ။ ဖြေနိုင်ဖို့ဆိုတာ လည်း တခြားဟာ မဟုတ်ပါဘူး။ ကိုယ့်ရဲ့ ပုံသဏ္ဍာန်အပေါ်ကိုလည်း နည်းနည်းတော့ မူတည်တာပေါ့နော်။ ပုံစံကို ကြည့်ပြီးတော့ သူတို့က အထင်အမြင် သေးတယ်ဆိုရင် သေးလိုပေါ့။ ဒါမျိုးတွေကတော့ ကျနော်တို့ ဗမာပြည် လေယာဉ် ဆိုက်ပြီဆိုတာနဲ့ အဲဒါကိုချောင်းပြီးတော့ ဖမ်းတဲ့ ငွေညစ်တယ် ဆိုတဲ့ဟာတွေက ရှိတာကို။ အဲဒီတော့ ကိုယ့်ရဲ့ ပုံစံက ပြောမယ်ဆိုရင် သင့်တော်တဲ့ပုံစံ ဖြစ်သင့်တယ်။ ပြီးတဲ့အခါ ကိုယ့်မှာ အချက်အလက် အပြည့်အစုံ သူတို့မေးတဲ့ အခါမှာ ကိုယ်ကဖြေနိုင်တယ်ဆိုရင် ပြဿနာမရှိပါဘူး။ ဥပမာ သူတို့က ရောက်လာတဲ့အချိန် မေးမှာ ပေါ့နော် ဘယ်သွားမှာလဲ၊ ဘာအတွက် လာတာလဲ၊ အဲဒီတော့ ကိုယ်က ဘယ်သွားမယ် ဘယ်လည်မယ် အစရှိ သဖြင့် ဒါမျိုးတွေ ကိုယ်ကပြောနိုင်မယ်ဆိုရင်၊ လက်မှတ်ဘာညာ အကုန်လုံးလည်း ကိုယ်ကပြနိုင်မယ် ဆိုရင်၊ Show Money မေးတဲ့အခါ Show Money အကြောင်းလည်း ပြနိုင်တယ်ဆိုရင် ဒါပြီးပြီလေ။ အဲဒီလို မေးတဲ့အချိန် မှာ ဘာမှ မပြောနိုင်ရင်တော့ အခက်အခဲရှိတာပေါ့နော်” ဟု CNI သတင်းဌာနသို့ ပြောသည်။

ထို့အပြင် ယခုကဲ့သို့ ပြောင်းလဲ သတ်မှတ်ခံရသည့် နိုင်ငံများထဲတွင် မြန်မာနိုင်ငံ တစ်ခုတည်း မဟုတ်ဘဲ ကမ္ဘောဒီးယား၊ လာအို၊ မကာအို၊ မွန်ဂိုလီးယား၊ ရုရှားနှင့် အခြား နိုင်ငံအချို့လည်း ပါဝင်ကြောင်း သိရသည်။

CNI News

၂၀၂၃ ခုနှစ်၊ မတ်လ ၃၁

နှစ်စဉ် မြန်မာ့ရိုးရာ မဟာသင်္ကြန်ပွဲတော် ကာလအတွင်း ရန်ကုန်မြို့နေ ပြည်သူများသည် သင်္ကြန်ရေပက်ခံ ကား များဖြင့် ရေပက်ခံ ထွက်လေ့ရှိသော်လည်း ယခုနှစ်တွင် ရေပက်ခံထွက်ရန်အတွက် မော်တော်ကား ငှားရမ်းမှုများ မရှိသလောက် ဖြစ်နေသည်ဟု ကားစင်းလုံးငှား ဝန်ဆောင်မှု လုပ်ငန်း လုပ်ကိုင်သူများထံမှ သိရသည်။

လက်ရှိတွင် သင်္ကြန်ပွဲတော်ကာလ ရောက်ရှိရန်အတွက် ၂ ပတ်ခန့်သာ လိုတော့သော်လည်း ရေပက်ခံရန်အတွက် ငှားရမ်းမှုတချို့ ရှိသော်လည်း ရရှိသည့် ဈေးနှုန်းနည်းပါးခြင်းကြောင့် အဆင်မပြေကြောင်း Light truck ကား အငှားဝန်ဆောင် လုပ်ငန်းလုပ်ကိုင်သူ ဦးအညာသားက CNI သတင်းဌာနသို့ ပြောသည်။

ဦးအညာသားက “ရေပက်ခံကတော့ သပ်သပ်တော့ ငှားထားတာ မရှိဘူးဗျ။ ပြည်သူ့ရင်ပြင်ထဲမှာ မဏ္ဍပ်တွေ ဆောက်ထားတာရှိတော့ အဲဒီမဏ္ဍပ်တွေထဲမှာ ကျနော်တို့ကို ပတ်ပေးဖို့နော် မနက် ၉ နာရီကနေ ညနေ ၅ နာရီ လောက် အဲဒီလိုမျိုး ပတ်ချာလည် လှည့်ပေးဖို့ပေါ့ ဘယ်မှမသွားရဘူး၊ အဲဒီလိုမျိုးတော့ ငှားထားတာ ရှိတယ်။ ပြည်သူ့ရင်ပြင်မှာ ငှားထားတယ်ဆိုတာလည်း ကျနော်တို့က မထည့်ပါဘူး။ အဆင်မပြေပါဘူးခင်ဗျ။ အဆင်မပြေ ဘူးဆိုတာက သူတို့ကပေါ့နော် ကျနော်တို့ ကားလောကအတိုင်း ပြောမယ်ဆိုရင်တော့ ခွက်ပြေးပေါ့နော် တကယ့် မဖြစ်နိုင်တဲ့ဈေး သောင်းဂဏန်းလောက်ပဲ ပြောတာ မဖြစ်နိုင်ဘူး အဲလိုမျိုးပေါ့။ အဆင်မပြေပါဘူး မတည့်ပါဘူး။ ငှားတာလည်း ကျနော်တို့ဆီမှာ သင်္ကြန်ပက်ခံနဲ့ ပတ်သက်ပြီး အဲဒီ ၁ ဦးပဲ ငှားတာရှိသေးတယ်” ဟု ပြောသည်။

ရန်ကုန်တိုင်းဒေသကြီးအတွင်းတွင် လမ်းလျှောက်သင်္ကြန် ၂ ခုနှင့် မြို့နယ် ၄၅ မြို့နယ်တွင် ရေကစားမဏ္ဍပ်များ ဆောက်ရွက်သွားမည်ဟု ရန်ကုန်တိုင်းဒေသကြီး မဟာသင်္ကြန် ကျင်းပရေးကော်မတီမှ ပြောထားသည်။

သင်္ကြန်ဖျော်ဖြေနေကြစဉ်

လက်ရှိတွင် မြို့တော်ခန်းမရှေ့ မဏ္ဍပ်တစ်ခုနှင့် ပြည်သူ့ရင်ပြင်တွင် ဆောက်လုပ်နေသည့် မဏ္ဍပ်တို့သာ ရှိသေး ကြောင်း၊ တခြားသော မြို့နယ်များတွင် မဏ္ဍပ်ဆောက်လုပ်နေမှုများကို မတွေ့ရသေးကြောင်း သိရသည်။

ယခုနှစ် သင်္ကြန်အတွက် ကားဖြင့် ရေပက်ခံရန် ကားငှားရမ်းမှုသည် အနည်းငယ်သာရှိပြီး ကမ်းခြေဒေသနှင့် တခြားသော ဒေသများသို့ ခရီးထွက်ကြရန် ငှားရမ်းမှုသာလျှင် ပို၍များသည်ဟု ကားအငှားလုပ်ငန်းလုပ်သည့် ကိုဘီလားက CNI သတင်းဌာနသို့ ပြောသည်။

ကိုဘီလားက “သင်္ကြန်လည်တဲ့ သူတွေကလည်း မရှိသလောက်ကို ဖြစ်နေတာ။ တချို့တွေကြတော့ လာငှားတယ် မလိုက်တာ။ လက်ရှိ ပေါက်ဈေးကို မပေးတော့ မလိုက်ကြတာလည်း ရှိတယ်။ တချို့ကျတော့ ကားကိုမလိုက်တာ၊ သင်္ကြန်တွင်း ကားကို မထွက်တဲ့ ပုံစံမျိုးတွေလည်း ရှိတယ်။ ခရီးသွားဖို့ အတွက်ကတော့ ငှားတယ် ချောင်းသာ ဘက်ပေါ့။ နယ်ဝေး အဲလိုပဲ သွားတာများတယ် နယ်ဘက်ကို” ဟု ပြောသည်။

ပြီးခဲ့သည့် ကိုဗစ်ကာလ မတိုင်ခင် သင်္ကြန်ကာလက ကားဖြင့် ရေပက်ခံရန်အတွက် ကားငှားရမ်းခ ဈေးနှုန်းများ သည် ၁ ရက်လျှင် ၁ သိန်းခွဲမှ ၂ သိန်းကျပ်အထိရှိကြောင်း၊ လက်ရှိတွင် စက်သုံးဆီဈေးနှုန်း မြင့်တက်နေမှုကြောင့် ယခင်ကထက် ဈေးနှုန်းပို၍များမည် ဖြစ်ကြောင်း သိရသည်။

ကိုဗစ်မတိုင်ခင် ကာလတွင် သင်္ကြန်ကာလ ကားဖြင့် ရေပက်ခံရန်အတွက် ၁ လကြိုတင်၍ ကားငှားရမ်းကြသော် လည်း လက်ရှိတွင် ငှားရမ်းသူ မရှိသေးကြောင်း ကားအငှားလုပ်ငန်း လုပ်ကိုင်သူတစ်ဦးက CNI သတင်းဌာနသို့ ပြောသည်။

သင်္ကြန်ရေပက်ခံနေကြစဉ်

၎င်းက “အရင်နှစ်တွေကဆို တစ်လလောက်ကတည်းက ကြိုငှားကြတာ။ သင်္ကြန်နားနီးလို့ ရက်၂၀ လောက်၊ ၁၅ ရက်လောက်ဆို မရကြတော့ဘူး၊ မရှိကြတော့ဘူး။ တော်တော်ရှားသွားပြီ အဲဒီလိုမျိုးဆိုရင်။ နည်းနည်းပါးပါး ကံကောင်းမှရတယ် အဲဒီသင်္ကြန်ရက် အကြိုနေ့ကစပြီးတော့။ တချို့ကျတော့ ကျနော်တို့ အဲဒီရက်တွေကျတော့ ချောင်းသာတို့ နယ်ဘက်တွေ ပို့ရတာရှိတယ် သင်္ကြန်မတိုင်ခင်။ အဲဒီအခါကျမှ တစ်ခါတည်း သင်္ကြန်ကို ဆက်ဆွဲ။ အခုနှစ်ကတော့ ရှိတော့ရှိတယ်ဗျ ဘယ်လိုရှိတုန်းဆိုတော့ လူတွေက ချောင်းသာ၊ ငွေဆောင် အဲဒီလောက်ပဲ တော် တော်များများ ငှားတယ်။ ဒါပေမယ့် အရင်လို ကားပြည့်တော့ အကုန်မပြည့်ကြဘူး” ဟု ပြောသည်။

ကိုဗစ်ကာလ မတိုင်ခင်က ရန်ကုန်မြို့အတွင်း ရေကစားမဏ္ဍပ်များကို ပြည်လမ်းပေါ်ရှိ အင်းလျားကန်နှင့် ပြည် လမ်း တစ်လျောက်၊ ဝေဇယန္တာလမ်း၊ မြို့တွင်းတွင် မဟာဗန္ဓုလလမ်းနှင့် ကုန်သည်လမ်း တစ်လျောက်တွင် တည် ဆောက်ထားသည့်အတွက် ကားဖြင့် ရေပက်ခံထွက်သူများကို စည်ကားစွာ တွေ့ရသည်။

ထို့နောက် ကိုဗစ်ဖြစ်ပွားမှုကြောင့် လူစုလူဝေးဖြင့် ကျင်းပရသည့် ပွဲတော်များကို နိုင်ငံတစ်ဝှမ်း တားမြစ်ခဲ့ခြင်း ကြောင့် သင်္ကြန်ပွဲတော်လည်း ကျင်းပနိုင်ခြင်း မရှိခဲ့ကြောင်း၊ နိုင်ငံရေး အခင်းအကျင်းကြောင့်လည်း သင်္ကြန် ပွဲတော်သည် စည်ကားမှု မရှိခဲ့ပေ။

CNI International News

စီယူဒတ် ဂျူအာရတ်ဇ်၊ မတ်လ ၂၉

မက္ကဆီကိုနှင့် အမေရိကန်နယ်စပ်ရှိ စီယူဒတ်ဂျူအာရတ်ဇ် (Ciudad Juarez) မြို့မှ ရွှေ့ပြောင်း နေထိုင်သူများ ဆိုင်ရာစင်တာ တစ်ခုတွင် မီးလောင်မှုကြောင့် အနည်းဆုံးလူ ၃၉ ဦး သေဆုံးခဲ့ရသည်ဟု အာဏာပိုင်များက အင်္ဂါနေ့တွင် ပြောကြားခဲ့ကြောင်း CNN သတင်းမှာ ဖော်ပြသည်။

မြို့၏ လမ်းမများပေါ်မှ ရွှေ့ပြောင်းနေထိုင်သူ အုပ်စုတစ်စုကို ဖမ်းဆီးထိန်းသိမ်းခဲ့ပြီးနောက် ရွှေ့ပြောင်း နေထိုင်သူများဆိုင်ရာ အမျိုးသားအဖွဲ့ (INM) ရုံးတွင် မီးလောင်မှု ဖြစ်ပွားခဲ့သည်ဟု အာဏာပိုင်များက ပြောသည်။

မီးလောင်မှု ဖြစ်ပွားရခြင်း အကြောင်းအရင်း သို့မဟုတ် သေဆုံးသူများသည် မည်သည့်နိုင်ငံမှ ဖြစ်သည်ဟု INM ဘက်မှ ထုတ်ပြန်ခဲ့ခြင်း မရှိသော်လည်း မီးလောင်မှုကြောင့် နောက်ထပ် ၂၉ ဦးခန့် ဒဏ်ရာရရှိခဲ့သည်။

ထိုဖြစ်ရပ်ကို INM ဘက်မှ စုံစမ်းစစ်ဆေးလျက် ရှိသည်။ သေဆုံးသူများ၏ အနည်းဆုံး ၂၈ ဦးသည် ဂွာတီမာလာ နိုင်ငံသားများ ဖြစ်သည်ဟု ဂွာတီမာလာ ရွှေ့ပြောင်းနေထိုင်သူများအဖွဲ့က နောက်ပိုင်းတွင် အတည်ပြုပေးသည်။

သိရှိရသလောက် မီးလောင်မှုဖြစ်ချိန်တွင် အဆောက်အဦးအတွင်း၌ အမေရိကန်အလယ်ပိုင်းနှင့် ဗင်နီဇွဲလားတို့မှ ရွှေ့ပြောင်းနေထိုင်သူများ ရှိနေသည်ဟု သိရကြောင်း၊ သေဆုံးသူများ၏ အမည်နှင့် မည်သည့် နိုင်ငံသားဖြစ်သည် ကို တိတိကျကျ မသိရသေးကြောင်းလည်း မက္ကဆီကိုသမ္မတ အန်ဒရေ မန်နျူရယ် လိုပတ်ဇ် အိုဘရီဒေါ် (Andres Manuel Lopez Obrador) က ပြောသည်။

မီးလောင်မှုကြောင့် သေဆုံးသွားသည့် ရုပ်အလောင်းများကိုတွေ့ရစဉ်

မီးလောင်မှုသည် ဆန္ဒပြမှုနှင့် သက်ဆိုင်မှု ရှိမည်ဟု ယူဆကြောင်း၊ ရွှေ့ပြောင်း နေထိုင်သူများသည် ၎င်းတို့အား နေရပ်သို့ ပြန်လည် လွှဲပြောင်းပေးမည်ကို သိရှိပြီးနောက် အဆောင်တွင်းမှ မွေ့ယာများကို စုပုံ မီးရှို့ဆန္ဒပြခဲ့ ကြောင်း၊ ၎င်းတို့အနေဖြင့် ဆန္ဒပြမှုမှ ယခုကဲ့သို့ ဖြစ်ရပ်ဆိုးကြီး ပေါ်ပေါက်လာမည်ဟု မျှော်လင့်ခဲ့ပုံ မရကြောင်း လည်း သမ္မတက ဆက်လက် ပြောဆိုခဲ့သည်။

ယခု ဖြစ်ရပ်နှင့် ပတ်သက်၍ စိတ်မကောင်း ဖြစ်မိသည်ဟုလည်း သမ္မတ၏ လက်ထောက်ဖြစ်သူ အန်ဒရီ ယာ ချာဗတ်ဇ် (Andrea Chavez) က ပြောသည်။

မီးငြိမ်းသွားချိန်တွင် သေဆုံးသူများ၏ အလောင်းအိတ်များကို စီတန်းထားကြောင်း မျက်မြင်တွေ့ရှိသူ တစ်ဦး၏ ပြောကြားမှုကို ကိုးကား၍ ရိုက်တာသတင်းတွင် ဖော်ပြသည်။

စင်တာတွင် ရှိသူအများစုမှ ဗင်နီဇွဲလားမှ ဖြစ်သည်ဟုလည်း ၎င်းက ပြောသည်။

 မီးလောင်သွားသည့် စင်တာကိုတွေ့ရစဉ်

ည ၁၀ နာရီဝန်းကျင် ခင်ပွန်း သည်ကို စောင့်နေစဉ် မီးခိုးများ ထွက်လာသည်ကို မြင်တွေ့ရကြောင်း၊ ခင်ပွန်းသည် လည်း တာဝန်ရှိသူများ၏ ထိန်းသိမ်းခြင်းခံခဲ့ရကြောင်း၊ ကိုယ့်ကိုယ်ကိုလည်း ရေလောင်းခြင်းဖြင့် အသက်ဘေးမှ လွတ်မြောက်လာခဲ့ကြောင်း စင်တာတွင် နေထိုင်သည့် အသက် ၃၁ နှစ်အရွယ် ရွှေ့ပြောင်း နေထိုင်သူ တစ်ဦးက ပြောသည်။

ယခု မီးလောင်မှုသည် ပြီးခဲ့သည့် နှစ်များအတွင်း မက္ကဆီကို ဖြစ်ခဲ့ဖူးသမျှ အဆိုးရွားဆုံး ဖြစ်ရပ်တစ်ခု ဖြစ်သည်။

မက္ကဆီကိုနှင့် အမေရိကန် နယ်စပ်တွင် နယ်စပ်ဖြတ်ကျော်မှု စံချိန်တင် မြင့်တက်လျက်ရှိပြီး ယခုနှစ် အစောပိုင်းတွင် ဘိုင်ဒန်အစိုးရသည် ရွှေ့ပြောင်း နေထိုင်သူများ နယ်စပ် ဖြတ်ကျော် ဝင်ရောက်မှုကို တားဆီးရေး အရှိန်မြှင့်တင် ဆောင်ရွက်ခဲ့သည်။

Source: CNN

CNI News

၂၀၂၃ ခုနှစ်၊ မတ်လ ၂၃

မန္တလေးမြို့တွင် ကျင်းပမည့် ယခုနှစ် သင်္ကြန်ပွဲတော်၌ ယခင်နှစ်များကထက် ပိုမိုစည်ကားစေရန်အတွက် ပုဂ္ဂလိ က သင်္ကြန်မဏ္ဍပ်များကို ဦးရာလူစနစ်ဖြင့် အခွန်ပေးဆောင်စရာမလိုဘဲ တည်ဆောက်ခွင့် ပြုသွားမည်ဟု မန္တလေးမြို့တော်ဝန် စည်ပင်သာယာရေးကော်မတီထံမှ သိရသည်။

လက်ရှိတွင် မဏ္ဍပ်တည်ဆောက်ရန်အတွက် လျှောက်ထားမှုများ ရှိနေပြီဖြစ်ကြောင်း၊ ယခုနှစ် သင်္ကြန်ပွဲတော်သည် စည်ကားမည်ဖြစ်ကြောင်း မန္တလေးတိုင်းဒေသကြီး အစိုးရအဖွဲ့၏ ပြောရေးဆိုခွင့်ရှိသူ ဦးသိန်းဌေးက CNI သတင်းဌာနသို့ ပြောသည်။

ဦးသိန်းဌေးက “အခွန်ဆောင်စရာ မလိုဘူး။ ဦးရာလူစနစ်နဲ့ ပေးမယ်။ ကျနော်တို့လုပ်မှာက ၂၆ လမ်းကို ကျနော်တို့ က ၁၆ လမ်းကနေ ၁၈ လမ်း၊ နောက်တစ်ခါ ၆၆ လမ်းကို ၁၉ လမ်းကနေပြီးတော့ ၂၆ လမ်း၊ ဒီကြားထဲမှာ ကျနော် တို့ မဏ္ဍပ်တွေ ကျနော်တို့ပေးမယ်။ အခွန်ဆောင်စရာ မလိုဘူး။ ဦးရာလူစနစ်နဲ့ ပေးမယ်။ လျှောက်ထားမှုတွေ ရှိနေပြီပေါ့။ တချို့ နေရာတောင် ယူကုန်ကြပြီ။ စည်ကားမှာပေါ့ဗျာ စည်ကားအောင် ကျနော်တို့တွေလည်း စိတ်ဝင်စားနေကြတယ်လေ အခုသင်္ကြန်နဲ့ ပတ်သက်ပြီးတော့။ တက်တက်ကြွကြွနဲ့ စိတ်ဝင်စားနေကြတယ် ဒီနှစ်က စည်ကားမှာပေါ့။ မလုပ်တာတော့ ကြာပြီလေ။ ကိုဗစ်နဲ့ဆိုတော့ မလုပ်ဖြစ်ဘူး။ အခုမှ ကျနော်တို့က စပြီးတော့ လုပ်တဲ့အတွက်ကြောင့် ဘာမှအခွန်ပေးစရာ မလိုဘူး” ဟု ပြောသည်။

သင်္ကြန်ရေကစားနေကြစဉ်

လက်ရှိတွင် မန္တလေးမြို့တော်ဝန်မဏ္ဍပ်ကို မြို့တော်စည်ပင်သာယာရေးကော်မတီ၏ ရုံးရှေ့တွင် တည်ဆောက်နေပြီး ကျုံးပတ်လည်၊ မန္တလေးဈေးချိုနှင့် တခြားသော လူစည်ကားရာ နေရာများတွင်လည်း ရေကစားမဏ္ဍပ်များ တည်ဆောက်ရန်အတွက် ကုမ္ပဏီများ၊ လုပ်ငန်းရှင်များနှင့် ဆွေးနွေးနေကြောင်း သိရသည်။

ရပ်ကွက်နေ ပြည်သူများအနေဖြင့် ကျုံးအနောက်ဘက်နှင့် မန္တလေးမြို့ရှိ လမ်းတချို့တွင် ရေကစားမဏ္ဍပ်များ ဆောက်လုပ်၍ ရေကစားမည်ဆိုလျှင့် လျှောက်လွှာတင်ရမည်ဟု မန္တလေးမြို့တော် စည်ပင်သာယာရေး ကော်မတီမှ တာဝန်ရှိသူတစ်ဦးက CNI သတင်းဌာနသို့ ပြောသည်။

၎င်းက “ဒီနှစ်မှာ အခွန်အခ မရှိဘူး မကောက်ရပါဘူးဗျ၊ မဏ္ဍပ်တွေ အတွက်ကိုလေ။ မဏ္ဍပ်တွေ၊ စတုဒီတာမဏ္ဍပ် တွေ အတွက်ကို အခွန်အခ မရှိပါဘူးဗျ။ မန်းမြို့ပတ်လည်မှာ တကယ်လို့ ဥပမာ မဏ္ဍပ်တွေ ဆောက်ချင်တယ် ဆိုရင် ကျနော်တို့ဆီမှာ လျှောက်လွှာတင်ရတယ်လို့ ကြေညာထားပေးပါတယ်။ အဲဒါကတော့ ဘာလုပ်လုပ် ရေစုပ် စက်နဲ့ပဲ ဆော့ဆော့ ဘာလုပ်ချင်ချင်၊ ဘယ်လိုပက်ပက် ပတ်ချင်သလိုပတ် အဲဒါကို ဘာပက်ချင်ပါတယ်။ ဘယ်လို ပက်ချင်ပါတယ်ဆိုတာကို ကျနော်တို့ဆီမှာ လျှောက်လွှာတွေ လာတင်ပေးရတာ။ အဲဒီလျှောက်လွှာကို ကျနော်တို့ က ပြုစုပြီးတော့ တိုင်းအစိုးရဆီ တင်ပြပြီးတော့ တိုင်းအစိုးရမှ အတည်ပြုမှာပါဗျ” ဟု ပြောသည်။

သင်္ကြန်ရေကစားနေကြစဉ်

ကိုဗစ်မဖြစ်ခင် သင်္ကြန်ကာလများတုန်းက ကျုံးဘေးပတ်လည်နေရာတွင် ပေ ၁၀၀× ၂၅ ပေရှိ မဏ္ဍပ်တစ်ခု ဆောက်မည်ဆိုလျှင် အနည်းဆုံး ကျပ်သိန်း ၁၀၀ မှစတင်ပြီး လေလံစနစ်ဖြင့် ဆောင်ရွက်ခဲ့ကြသော်လည်း ယခုနှစ်မှာတော့ အခွန်ပေးဆောင်စရာမလိုပဲ ဆောက်လုပ်ခွင့် ပြုခြင်းဖြစ်သည်။

ထို့အပြင် မန္တလေးကျုံးတောင်ဘက်ခြမ်း ၂၆ လမ်း၊ ၆၆ လမ်းမှ ၇၈ လမ်းအထိကို လမ်းလျှောက်သင်္ကြန် ပြုလုပ်ရန် စီစဉ်နေကြောင်း သိရသည်။

လမ်းလျှောက်သင်္ကြန်ကို ပြီးခဲ့သည့် NLD အစိုးရလက်ထက်တွင် စတင် အကောင်အထည်ဖော်ခဲ့ပြီး မဏ္ဍပ်နေရာ ၁၀ ပေ ပတ်လည်ကို ကျပ် ၅ သိန်း၊ ပေ ၂၀ ကို ကျပ် ၁၀ သိန်း၊ ပေ ၃၀ ကို ကျပ် ၁၅ သိန်း အခွန်ကောက်ပြီး ဆောက်လုပ်ခွင့် ပေးခဲ့သည်ကို တွေ့ရသည်။

CNI News

၂၀၂၃ ခုနှစ်၊ မတ်လ ၂၂

ရခိုင်ပြည်နယ်တွင် ပြီးခဲ့သည့် မတ်လ ၂၀ ရက်နေ့က မိုးသက်လေပြင်း တိုက်ခတ်မှုကြောင့် ပြည်နယ်အတွင်းရှိ တိုက်ပွဲရှောင်စခန်းများမှ နေအိမ်များပျက်စီးသွားခဲ့သည့်အတွက် အကူအညီများ လိုအပ်နေကြောင်း ရခိုင်တိုက်ပွဲ ရှောင်များထံမှ သိရသည်။

မိုးသက်လေပြင်းကြောင့် ပုဏ္ဏားကျွန်း၊ ကျောက်တော်၊ ရသေ့တောင်၊ မြောက်ဦး စသည့် မြို့နယ်များရှိ တိုက်ပွဲ ရှောင်များ၏ နေအိမ် အလုံး ၈၀ ကျော် ပြိုလဲပျက်စီးသွားခဲ့ကြောင်း သိရသည်။

တိုက်ပွဲရှောင်များအတွက် နိုင်ငံတကာ အဖွဲ့အစည်းများမှ ထောက်ပံ့ပေးမှုများရှိသော်လည်း နေအိမ်ပြုပြင်ရန် ရရှိမည့် အထောက်အပံ့သည် ကြာမြင့်ဦးမည်ဖြစ်ကြောင်း၊ နောက်တစ်ကြိမ် မိုးရွာသွန်းနိုင် သေးသည့်အတွက် နေအိမ်များ ထပ်မံပျက်စီးမည်ကို စိုးရိမ်ကြောင်း ရခိုင်ပြည်နယ်၊ ကျောက်တော်မြို့နယ်၊ တောင်မင်းကုလား တိုက်ပွဲ ရှောင်စခန်းမှ အမျိုးသမီးခေါင်းဆောင် မအေးခိုင်က CNI သတင်းဌာနသို့ ပြောသည်။

မအေးခိုင်က “ထိတဲ့အိမ်က ထိတယ်ပေါ့နော်။ အမိုးတွေ ပျက်တာလည်း ရှိတယ်။ အကာတွေ ပျက်တာလည်း ရှိတယ် အဲလိုမျိုး ရှိတယ်။ ဒါပေမယ့် ဒီနှစ်ကတော့ နည်းနည်းတော့ နည်းတာပေါ့။ ၁၀၊ ၂၀ လောက်ရှိမယ်။ အဲလို မျိုးပေါ့လေ စခန်းတိုင်း၊ စခန်းတိုင်း မအေးခိုင်တို့ စခန်းတစ်ခုတည်း မဟုတ်ဘဲနဲ့လေ ကျမတို့ စခန်းမှာဆိုလို့ရှိရင် လိုအပ်နေပြီပေါ့လေ အခု သင်္ကြန်လဆန်း ၁ ရက်၊ ၂ ရက်နေ့ရှိနေပြီဆိုရင် အဆောင်တွေ လုပ်ဖို့က အဓိက လိုအပ် နေပြီ။ သူတို့ပေးတာက ကြာဦးမယ်နဲ့တူတယ်။ အခု မိုးကလည်း ရွာနေပြီ။ နောက် ၁ ကြိမ်၊ ၂ ကြိမ်ရွာလို့ရှိရင် အကုန်လုံး ပြိုပြီ။ အရင်တုန်းကလိုမျိုးနဲ့ ၁ ရက်၊ ၂ ရက်နဲ့ တိုက်မယ်ဆိုရင် အကုန်လုံးပြိုပြီ သေချာပေါက်။ စိုးရိမ် ရတာပေါ့နော် ဒီမှာက လင်မရှိတဲ့သူတွေလည်းရှိတယ်။ ကလေး သေးသေးလေးတွေလည်း ရှိတယ်။ ကိုယ်ဝန် ဆောင်တွေလည်း ရှိတယ်။ မသန်စွမ်းတွေလည်း ရှိတယ်။ သူတို့အတွက်တော့ စိတ်ပူရတယ်” ဟု ပြောသည်။

ရခိုင်တိုက်ပွဲရှောင်စခန်းတစ်ခုကိုတွေ့ရစဉ်

တချို့သော တိုက်ပွဲရှောင်စခန်းများတွင် ကိုယ်ထူကိုယ်ထဖြင့် ပျက်စီး ဆုံးရှုံးသွားသည့် နေအိမ် အဆောင်များအား ပြန်လည် ဆောက်လုပ်နေကြောင်း၊ ပျက်စီးသွားသည့် နေအိမ်များသည် ဓနိမိုး၊ ဝါးခင်းကာ သစ်လုံးတိုင်ငယ်များ ဖြင့် တည်ဆောက်ထားခြင်းဖြစ်ကြောင်း သိရသည်။

တိမ်ပြင်တိုက်ပွဲရှောင်စခန်းမှာ တိုက်ပဲရှောင် ကိုထွန်းညိုက “ဘုန်းကြီးကျောင်းမှာ နေရတဲ့စခန်းက ကျနော်တို့ စခန်းပေါ့ တိမ်ပြင်စခန်းပေါ့။ ကျနော်တို့ နေထိုင်တဲ့စခန်းက ခေါင်မိုးတွေက အကုန်လုံး ဘယ်လိုပြောမလဲ ပျက် ကုန်ပြီလေ။ ပိုပြီးတော့ ခက်ခဲလာမှာပေါ့။ အခုချိန်က အချိန်အခါမဟုတ် မိုးရွာတယ်ဆိုတော့ ကျနော်တို့ စိုးရိမ် တာက အကုန်လုံး ခေါင်မိုးတွေက ပြဲကွဲကုန်ပြီဆိုတော့ နေထိုင်တဲ့ သူတွေအတွက်က တကယ့်မိုးကျလာပြီဆိုရင် တကယ့် အခက်အခဲပေါ့။ အခုလောလောဆယ်ကတော့ ကျနော်တို့ စခန်းမှာတော့ ၂၀ လောက် ပျက်နေတယ်” ဟု CNI သတင်းဌာနသို့ ပြောသည်။

တိုက်ပွဲရှောင်များသည် မကြာခင် မိုးရာသီ ရောက်ရှိတော့မည် ဖြစ်သောကြောင့် မိုးမကြီးခင် နေအိမ် အဆောင်များ အပြီးဆောက်လုပ်၍ အတည်တကျ နေချင်ကြကြောင်း ပြောသည်။

လေပြင်းတိုက်ခတ်မှုကြောင့် နေအိမ်များ ပျက်စီးသွားသည့် တိုက်ပွဲရှောင်စခန်းများမှာ ရသေ့တောင်မြို့နယ် အတွင်းရှိ စေတီတောင် တိုက်ပွဲရှောင်စခန်း၊ ပြားချောင်းကြီး တိုက်ပွဲရှောင်စခန်း၊ ကျောက်တော်မြို့နယ်မှ ကဝိရတနာ တိုက်ပွဲရှောင်စခန်းနှင့် ပုဏ္ဏားကျွန်းမြို့နယ်ရှိ ကဏန်းထောင် တိုက်ပွဲရှောင်စခန်းနှင့် ဘူတာရုံ တိုက်ပွဲရှောင်စခန်းတို့လည်း ပါကြောင်း သိရသည်။

CNI News

၂၀၂၃ ခုနှစ်၊ မတ်လ ၁၈

တိုင်းလိုင် (ခေါ်) ရှမ်းနီလူမျိုးများ ဆောင်းထားသည် ခမောက်သည် ရှမ်းနီလူမျိုးများ၏ များပြားလှသည့် လက်မှု အသုံးအဆောင်များထဲက ရိုးရာခမောက် ဖြစ်ပါသည်။

ယခင် ဘိုးဘေးများ လက်ထက်ကတည်းက အသုံးပြုခဲ့ကြပြီး ယခုတိုင် အသုံးပြုနေကြဆဲ ဖြစ်ကြသည်။

ရှမ်းနီလူမျိုးများမှာ လယ်ယာလုပ်ငန်းကို အဓိက လုပ်ဆောင်ကြသည့် အလျှောက် အဆိုပါ ရှမ်းနီရိုးရာခမောက်ကို လုပ်ငန်းခွင် သွားရောက်ချိန်၊ တောတောင်သို့ သွားရောက်ချိန်များမှာ အသုံးပြုကြလျှက်ရှိသည်။

ထို ရိုးရာခမောက်သည် နွေ၊ မိုး၊ ဆောင်း ရာသီသုံးမျိုးစလုံးတွင် အသုံးပြုနိုင်သည်ဟု ပြောကြသည်။

ရှမ်းနီလူမျိုးများသည် ကချင်ပြည်နယ်အတွင်းက ဗန်းမော်ခရိုင်၊ မြစ်ကြီးနားခရိုင်၊ မိုးညှင်းခရိုင်၊ မိုးကောင်း ဒေသနှင့် စစ်ကိုင်းတိုင်းဒေသကြီးတွင် ပါဝင်နေသည့် မော်လိုက်ခရိုင်၊ ကလေးခရိုင်၊ ခန္တီးခရိုင်၊ ကသာခရိုင်၊ တမူးခရိုင်တို့မှာ ပျံ့နှံနေထိုင်ကြပြီး လူဦးရေ ၁ သန်းခန့်ရှိကြောင်း သိရသည်။