CNI News

၂၀၂၃ ခုနှစ်၊ မေလ ၂၄

မိုခါမုန်တိုင်းဒဏ်ကို အဓိကခံစားခဲ့ရသည့် ရခိုင်ပြည်နယ်တွင် နောက်ဆက်တွဲ ဆိုးကျိုးအနေဖြင့် သောက်သုံးရေ ပြဿနာအား တစ်ပြည်နယ်လုံး အတိုင်းအတာဖြင့် ကြုံတွေ့နေကြကြောင်း အကူအညီ ပေးနေသူများက CNI သတင်းဌာနသို့ ပြောသည်။

ရခိုင်ပြည်နယ်က ဒေသခံများသည် သဘာဝရေကန်များမှ ရေကိုသာ သောက်သုံးရေအဖြစ် အသုံးပြုနေကြခြင်း ဖြစ်ပြီး မုန်တိုင်းတိုက်ခတ်ခဲ့မှုကြောင့် ထိုရေကန်များသို့ ဆားငန်ရေများ ဝင်ရောက်သွားသဖြင့် သောက်သုံး၍ မရသည့် အခြေအနေဖြင့် ကြုံတွေ့နေကြကြောင်း အကူအညီပေးနေသူများ က CNI သတင်းဌာနသို့ ပြောသည်။

ရသေ့တောင်မြို့နယ်၊ စေတီပြင်ရွာ ပရဟိတအဖွဲ့မှ ကိုအောင်မင်းစိုးက “နဂိုကတည်းက ကျနော်တို့ဆီမှာ ရေက ခမ်းခြောက်နေတာ မလုံမလောက်တဲ့ အနေအထားမှာ ဖြစ်နေတာ။ မိုးက မုန်တိုင်းပြီးတော့ ဆက်မရွာတော့ဘူး ဆိုတော့ အခုက ရေရှားပါးမှု ပြဿနာတွေ ဖြစ်လာတယ်။ နောက် မြေနိမ့်ပိုင်းတွေမှာ ဒီရေတွေ ကန်ထဲကို ရောက် သွားတော့ ရေတွေကို စုပ်ထုတ်နေရတဲ့ အနေအထားဖြစ်နေတယ်။ အကုန်လုံးရွာက အဲဒီအခက်အခဲတွေ ရှိနေ တယ် အခုက။ မိုးမရွာခင် စုပ်ထုတ်မှရမှာ။ အခုက စုပ်ထုတ်တဲ့ ရွာတွေလည်း စုပ်ထုတ်နေကြပြီ ဒီကန်ထဲက ရေတွေကို။ ရေက ဆားဝင်သွားတော့ လုံးဝဆားဝင်ပြီး သုံးလို့မရတဲ့ ကန်တွေဆိုရင်တော့ စုပ်ထုတ်ပစ်တယ်။ ရေများများရှိတဲ့ ကန်တွေမှာ ဆားဝင်သွားရင်တော့ သုံးရေအဖြစ် ထားတဲ့ ရွာတွေလည်း ရှိကြတယ်။ လက်ရှိ ကျနော်တို့ အမိုးအကာအောက်ကို ရောက်ဖို့က နံပါတ်တစ် ဦးစားပေးလိုနေတယ်။ မိုးရာသီကလည်း နီးလာပြီ ဆိုတော့ အမိုးအကာအောက်ကို ကျနော်တို့ အချိန်နဲ့အမီ ရောက်နိုင်ဖို့ အစိုးရ ရော INGO, NGO တွေရော CSO တွေအနေနဲ့ ကြိုးစားပေးစေချင်တယ်။ နောက်ပြီး စားနပ်ရိက္ခာပိုင်းပေါ့။ ဆန်ဈေးတွေက တစ်ဟုန်ထိုး တိုးတက် လာတယ် အခုက။ ဆန်တစ်အိတ်ဆိုရင် တစ်သိန်းခွဲ နီးပါးလောက်ရှိတယ် ကျနော်တို့ဆီမှာ။ နဂို ကတည်းကပင် အခက်အခဲရှိတဲ့ မိသားစုတွေဆိုရင် အခုစားဝတ်နေရေးတောင် တော်တော်လေး အခက်အခဲ ဖြစ်နေတာတွေ ရှိတယ်” ဟု ပြောသည်။

နစက-က ရခိုင်ပြည်နယ်အတွင်း ရေသန့်စက်ဖြင့် သောက်သုံးရေ ဖြန့်ဖြူးပေးနေစဉ်

လက်ရှိတွင် အချို့ ဒေသခံများသည် ဆားငန်ရေ မဝင်ရောက်သည့် ကျေးရွာများသို့ လှေများဖြင့် သွားရောက်၍ သောက်သုံးရေရှိရန်အတွက် ရေများ သွားရောက် သယ်ယူကြရကြောင်း သိရသည်။

ဆားငန်ရေ ဝင်ရောက်သွားသည့် ရေကန်များအား ယခုမိုးမကျခင် ကာလတွင် အလျင်အမြန် စုပ်ထုတ်နိုင်မှသာ မိုးကျပြီးနောက်တွင် ရခိုင်ပြည်သူများအတွက် သောက်သုံးရေ ရရှိမည်ဖြစ်သဖြင့် ရေစုပ်စက် လှူဒါန်းမှုများ လိုအပ် ကြောင်း၊ ထိုရေများအား စုပ်ထုတ်ရာတွင် စက်သုံးဆီအား အသုံးပြုရသည့်အတွက် လိုသလောက် ဝယ်ယူ၍ မရသည့် အနေအထားများရှိကြောင်း အကူအညီပေးနေသူများထံက သိရသည်။

ရေကန်များထဲသို့ ဆားငန်ရေ ဝင်ရောက်သွားမှုမှာ ကျေးရွာတစ်ရွာ၌ သောက်သုံးရေကန် သုံးကန်ခန့်ရှိပါက နှစ်ကန်မှာ ဆားငန်ရေ ဝင်ရောက်သွားသည့် အနေအထားမျိုးဖြစ်ကြောင်း၊ လက်တလောတွင် ရေများအား ချွေတာ အသုံးပြုနေရပြီး ကျန်းမာရေးအရ ကြိုချက်၍ သောက်နေကြရသည်။

မုန်တိုင်းသင့် ရခိုင်ပြည်နယ်အတွင်း ကူညီကယ်ဆယ်ရေးနှင့် ပြန်လည်ထူထောင်ရေး လုပ်ငန်းများ လုပ်ဆောင်ပေး နေသလို သောက်သုံးရေအတွက် ရေသန့်စက်များ အသုံးပြုကာ သောက်သုံးရေများ ဖြန့်ဖြူးပေး နေကြောင်း နစက-က သတင်းထုတ်ပြန်ထားသည်။

လက်ရှိတွင် မုန်တိုင်း တိုက်ခတ်ခဲ့မှုကြောင့် ရခိုင်ပြည်နယ်တွင် သစ်ပင် အများအပြားလည်း ပြိုလဲကုန်သည့် အတွက် လာမည့် နေ့ရက်များ၌ ရာသီဥတုဒဏ်အား ရခိုင်ပြည်နယ်အနေဖြင့် ထပ်မံ ခံစားရနိုင်ဖွယ်ရှိကြောင်း ကူညီကယ်ဆယ်ရေးများ ဆောင်ရွက်နေသည့် Roma Time Organization မှ Founder ကိုကျော်လင်းက CNI သတင်းဌာနသို့ ပြောသည်။

မြစ်ကြောင်းများအတွင်း ကျွဲ-နွားများ သေဆုံးနေသည်ကိုတွေ့ရစဉ်

၎င်းက “ဒီမုန်တိုင်းက အပင်တွေကို အတော်လေး ကျိုးပဲ့အောင် ပြိုလဲအောင် လုပ်သွားတဲ့အခါကျတော့ ရွာတိုင်း ရွာတိုင်းက လွင်တီးခေါင်လို ဖြစ်ကျန်ခဲ့ပြီးတော့ မီးလောင်တဲ့ ဒေသလိုဖြစ်နေတယ်။ အပင်တွေဆိုရင်လည်း အဲဒီ လောက်ထိ ပြိုလဲသွားတဲ့ဟာကို ဘယ်သူမှ မထင်ခဲ့ဘူးလေ။ အရင်တုန်းကဆိုရင် ရခိုင်ရွာ တော်တော် များများက သစ်ပင်တွေ ဘာတွေရှိပါတယ်။ အခု သစ်ပင်တွေ အကုန်လုံးက ပြိုလဲတဲ့အခါကျတော့ အဲဒီ သစ်ပင်ကို တစ်ခါ အမှိုက်တွေဘာတွေ မီးရှို့၊ အိမ်ရှေ့မှာလည်း မီးရှို့ဆိုတော့ အောက်ဆီဂျင်တွေ နည်းလာတဲ့ အပြင် ကာဗွန်ဒိုင် အောက်ဆိုဒ်တွေပါ ရှူနေရတော့ ကျန်းမာရေးပါ ထိခိုက်နိုင်တဲ့ ဥစ္စာတွေ အများကြီး ရှိလာတယ်။ နောက် အပူဒဏ် တွေက မတရား ပူလာတယ်လေ။ အပင်တွေနဲ့ ပတ်သက်ပြီးတော့ activides အဖွဲ့တွေ အများကြီး လိုလာလိမ့် မယ်။ ဥပမာ ရွာတွေကိုယ်စီမှာ လူငယ် Team တွေဖွဲ့ပြီးတော့ နိုင်ငံတကာက ဖြစ်စေ၊ ပြည်တွင်းကဖြစ်စေ ကမကထ ပြုနေတဲ့ သူတွေက အကူအညီပေးပြီးတော့ ဒီသစ်ပင်စိုက်တဲ့ အဖွဲ့တွေ သီးသန့် Team Work System နဲ့ ရွာတိုင်း ရွာတိုင်းမှာ လုပ်လာဖို့လိုတယ်။ အဲဒီကျမှပဲ ဒါကို နလန်ထူနိုင်အောင် လုပ်လာနိုင်မှာလေ” ဟု ပြောသည်။

မုန်တိုင်းဒဏ် ခံစားခဲ့ရသည့် ရခိုင်ပြည်နယ်အတွင်း ပျက်စီးသွားသော အခြေအနေများ ပြန်လည် ထူထောင် နိုင်ရေးအတွက် နစကမှ ကျပ်သိန်းပေါင်း ၇ သောင်း ထောက်ပံ့ ပေးအပ်ထားသည်။

သို့သော် အစိုးရဌာနဆိုင်ရာများသည် မြို့ပေါ်နေ ရပ်ကွက်များတွင်သာ သောက်သုံးရေ ပြဿနာကို ကူညီဆောင် ရွက် ပေးနေခြင်းဖြစ်ပြီး ကျေးလက်ဒေသများတွင်မူ ပရဟိတအသင်းအဖွဲ့များ၊ အလှူရှင်များ၏ ကူညီဆောင်ရွက် မှုဖြင့်သာ ဖြေရှင်းနေကြရကြောင်း သိရသည်။

လက်ရှိတွင် ရခိုင်တစ်ပြည်လုံး အတိုင်းအတာအရ နေအိမ်ပျက်စီးခြင်းများ ဖြစ်ပွားခဲ့သော်လည်း ငွေကြေး တတ်နိုင်သူများအနေဖြင့် ပျက်စီးသွားသည့် မိမိနေအိမ်များအား သွပ်ကာခြင်း ပြုလုပ်ကြသကဲ့သို့ ငွေကြေး မတတ်နိုင်သူများအနေဖြင့် တာလပတ်များ ကာထားကြကြောင်း သိရသည်။

CNI News
၂၀၂၃ ခုနှစ်၊ မေလ ၂၃

ထိုင်းနိုင်ငံ ဘုရင်မင်းမြတ် His Majesty King Maha Vajiralongkorn Phra Vajiraklaochaoyuhua နှင့် မိဖုရား Her Majesty Queen Suthida Bajrasudhabimalalakshana တို့အပါအဝင် ထိုင်းအစိုးရနှင့် အရပ်ဖက်အဖွဲ့အစည်းများက မြန်မာနိုင်ငံမှ မုန်တိုင်းသင့် ပြည်သူများအတွက် ကယ်ဆယ်ရေးပစ္စည်းများ ပေးပို့ လှူဒါန်းလာကြောင်း သိရသည်။

အဆိုပါ ကယ်ဆယ်ရေးပစ္စည်းများကို နစက၏ နိုင်ငံခြားရေးဝန်ကြီး ဦးသန်းဆွေက လက်ခံရယူခဲ့သည်။

ကယ်ဆယ်ရေးပစ္စည်းများမှာ ယာယီတဲများနှင့်အမိုးအကာများ၊ ဆိုလာမီးအိမ်များ၊ ကယ်ဆယ်ရေးအိတ်များ၊ ဆေးစိမ်ခြင်ထောင်များ၊ ငါးသေတ္တာများနှင့် အသင့်စားခေါက်ဆွဲခြောက်များ ဖြစ်ကြောင်း၊ ထိုပစ္စည်းများကို ထိုင်းတော်ဝင်လေတပ်မှ C-130 လေယာဉ်နှစ်စင်းက သယ်ဆောင်လာခဲ့ပြီး မေလ ၂၃ ရက်တွင် ရန်ကုန် လေဆိပ်သို့ ဆိုက်ရောက်ခဲ့သည်။

ထိုင်းဘုရင်မင်းမြတ်နှင့် မိဖုရား အပါအဝင် ထိုင်းပြည်သူများမှ လှူဒါန်းသည့် တန်ချိန် ၂၀ ခန့်ရှိသည့် လူသား ချင်း စာနာထောက်ထားမှုဆိုင်ရာ အကူအညီများအား မိုခါ မုန်တိုင်းဒဏ်သင့် ဒေသများရှိ ပြည်သူများထံသို့ ပေးပို့ ဖြန့်ဖြူးသွားမည်ဟု နစက-က ထုတ်ပြန်ကြေညာသွားသည်။

ဆိုင်ကလုန်းမုန်တိုင်း(မိုခါ)သည် မေလ ၁၄ ရက်နေ့က ရခိုင်ပြည်နယ်၊ စစ်တွေမြို့ကို ဖြတ်သန်း၍ မြန်မာနိုင်ငံ အတွင်းသို့ ဝင်ရောက်တိုက်ခတ်ခဲ့ရာ ရခိုင်တစ်ပြည်နယ်လုံး ပျက်စီးသွားသလို ချင်းပြည်နယ်အတွင်းမှာလည်း မတူပီ၊ ဟားခါး၊ တီးတိန်၊ ပလက်ဝမြို့နယ်များလည်း ပျက်စီးထိခိုက်မှုများရှိခဲ့သည်။

ထို့ကြောင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ရခိုင်ပြည်နယ်အတွင်းရှိ မြို့နယ်ပေါင်း ၁၇ မြို့နယ် နှင့် ချင်းပြည်နယ်အတွင်းက မတူပီ၊ ဟားခါး၊ တီးတိန်၊ ပလက်ဝမြို့နယ်တို့ကို သဘာဝဘေးအန္တရာယ်ကျရောက် သော ဒေသများအဖြစ် သတ်မှတ်ကြေညာခဲ့သည်။

ထို့နောက် ရခိုင်ပြည်နယ်အတွင်း ကူညီကယ်ဆယ်ရေးနှင့် ပြန်လည် ထူထောင်ရေးလုပ်ငန်းများ လုပ်ရန် ကျပ် သိန်းပေါင်း ၇ သောင်း လှူဒါန်းခဲ့သလို ချင်းပြည်နယ်အတွင်း မုန်တိုင်းသင့် ပြည်သူများအတွက်လည်း ကျပ် သိန်းပေါင်း ၁ သောင်းကျော် လှူဒါန်းခဲ့သည်။

အလားတူ တပ်မတော်(ကြည်း၊ရေ၊လေ) အပါအဝင် ပြည်တွင်း အလှူရှင်များကလည်း ဆန်နှင့် စားနပ်ရိက္ခာ အပါအဝင် အိမ်ဆောက်ပစ္စည်းများကို ထောက်ပံ့ပေးခဲ့ကြသည်။

CNI News
၂၀၂၃ ခုနှစ်၊ မေလ ၂၁

သဘာဝဘေးဒဏ်သင့် ဒေသများ၌ ကုန်ဈေးနှုန်း ကြီးမြင့်မှုများ မဖြစ်ပေါ်စေရေးအတွက် တာဝန်ရှိသူများက ကြည့်ရှုဆောင်ရွက်ပေးသွားရန်လိုကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၃ ခုနှစ်၊ မေလ ၂၀ ရက်က သဘာဝဘေးဒဏ်သင့်ဒေသများ၌ ကူညီကယ်ဆယ်ရေးနှင့် ပြန်လည်ထူ ထောင်ရေး လုပ်ငန်းများ ဆောင်ရွက်နိုင်ရေး ညှိနှိုင်းအစည်းအဝေးတွင် ၎င်းက အထက်ပါအတိုင်း ပြောခဲ့ခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်က “ သဘာဝဘေးဒဏ်သင့် ဒေသများ၌ ကုန်ဈေးနှုန်း ကြီးမြင့်မှုများ မဖြစ်ပေါ် စေရေးအတွက်လည်း အသားဘူး၊ ငါးဘူးများကို ပို့ဆောင်ပေးခြင်းနှင့် အသား၊ ငါးများ ဈေးနှုန်းသက်သာစွာ ဝယ်ယူစားသုံးနိုင်အောင် စီမံဆောင်ရွက်ပေးသွားရန် လိုကြောင်း၊ ဘုန်းတော်ကြီးကျောင်းများ၊ သာသနာနွယ်ဝင် သီလရှင်ကျောင်းများ၊ ဘာသာရေးကျောင်းများ၏ စားရေးသောက်ရေး အဆင်ပြေစေရေးအတွက်လည်း တာဝန ရှိသူများက ကြည့်ရှုဆောင်ရွက်ပေးသွားရန်လိုတယ်” ဟု ပြောသည်။

မေလ ၁၄ ရက်နေ့က အလွန်အားကောင်းသော ဆိုင်ကလုန်းမုန်တိုင်း(မိုခါ)သည် ရခိုင်ပြည်နယ်၊ စစ်တွေမြို့ကို ဖြတ်၍ မြန်မာနိုင်ငံအတွင်းသို့ ဝင်ရောက် တိုက်ခတ်ခဲ့ရာ ရခိုင်ပြည်နယ်တစ်ဝန်း နေအိမ်များ၊ သာသနိက အဆောက်အအုံများ၊ ဆက်သွယ်ရေးတာဝါတိုင်များ ပျက်စီးခဲ့သလို သစ်ပင်များနှင့် လမ်းမီးတိုင်များ ပြိုလှဲသွားခဲ့သည်။

ထို့နောက် အိမ်ဆောက်ပစ္စည်းနှင့် စားသောက်ကုန်များ ဈေးနှုန်း အဆမတန် မြင့်တက်ခဲ့ခြင်းကြောင့် မုန်တိုင်း သင့် ပြည်သူများ အခက်အခဲများဖြင့် ကြုံတွေ့ကြရသည်။

ထို့ကြောင့် ရခိုင်ပြည်နယ်ရှိ မြို့နယ်ပေါင်း ၁၇ မြို့နယ် အပါအဝင် ချင်းပြည်နယ်အတွင်းက မတူပီမြို့နယ်၊ တီးတိန်မြို့နယ်၊ ဟားခါးမြို့နယ်၊ ပလက်ဝမြို့နယ်တို့ကို သဘာဝဘေးအန္တရာယ် ကျရောက်သော ဒေသများ အဖြစ် သတ်မှတ်ကြောင်း ဗိုလ်ချုပ်မှူးကြီးမင်းအောင်လှိုင်က ကြေညာခဲ့သည်။

ထိုသို့ ကြေညာပြီးနောက် ရခိုင်ပြည်နယ်က မုန်တိုင်းသင့် ပြည်သူများ ကူညီကယ်ဆယ်ရေးနှင့် ပြန်လည် ထူထောင်ရေး လုပ်ငန်းအတွက် ကျပ်သိန်းပေါင်း ၇ သောင်း ထောက်ပံ့ပေးခဲ့သလို ချင်းပြည်နယ်အတွင်းရှိ မုန်တိုင်းသင့် ပြည်သူများ ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများ လုပ်ရန် အလှူငွေများ ပေးအပ်ခဲ့သည်။

ကူညီကယ်ဆယ်ရေးနှင့် ပြည်လည် တည်ဆောက်ရေး လုပ်ငန်းများကို မိုးမကျမီအတွင်း လူအင်အား၊ စက် ယန္တရား အင်အားသုံး၍ လုပ်ငန်းတွင်ကျယ်မှုရှိအောင် ဆောင်ရွက်သွားရန်၊ ဆောက်လုပ်ရေးသုံး သစ်ခွဲ သားများကို ပို့ဆောင်ပေးလျက်ရှိသကဲ့သို့ ဒေသတွင်း၌ လိုအပ်သည့် သစ်ခွဲသားများ ထုတ်လုပ်နိုင်ရန်လို ကြောင်း၊ သဘာဝဘေးအန္တရာယ် ခိုလှုံရာ Shelter များ ထပ်မံဆောက်လုပ်ပေးရန်လိုကြောင်း ဗိုလ်ချုပ်မှူးကြီး မင်းအောင်လှိုင်က ပြောသည်။

CNI News
၂၀၂၃ ခုနှစ်၊ မေလ ၁၈

ဆိုင်ကလုန်းမုန်တိုင်း(မိုခါ) တိုက်ခတ်မှုကြောင့် ထိခိုက်ပျက်စီးခဲ့သော ဒေသများ ပြန်လည်ထူထောင်ရေးအတွက် တပ်မတော်အရာရှိကြီး ၁၄ ဦးကို ချင်းပြည်နယ်နှင့် ရခိုင်ပြည်နယ်တို့မှာ အသီးသီး တာဝန်ခွဲဝေ ပေးအပ်ခဲ့ကြောင်း နစက-က မေလ ၁၈ ရက်တွင် သတင်းထုတ်ပြန်သွားသည်။

CNI International News

ဘန်ကောက်၊ မေလ ၉

ထိုင်းရဲတပ်ဖွဲ့သည် နာခွန် ရတ်ချာစီမာ (Nakhon Ratchasima) ပြည်နယ်ရှိ ဘုန်းတော်ကြီးဟောင်း ဖရာ အာဂျန် ခွမ်း (Phra Ajarn Khom) ၏ ကျောင်းအနောက်ဘက်တွင် မြုပ်နှံထားသည့် ဘတ်သန်း ၁၀၀ နီးပါး တန်ဖိုးရှိ ငွေသားနှင့် ရွှေချောင်းများကို ရှာဖွေတွေ့ရှိခဲ့သည်ဟု Bangkok Post သတင်းတွင် ဖော်ပြသည်။

ထို့ကြောင့် ၎င်းအပေါ် စွပ်စွဲထားသော ငွေကြေး အလွဲသုံးစားမှု ပမာဏသည် ဘတ်သန်း ၃၀၀ ထိ မြင့်တက်လာ ခဲ့ပြီလည်း ဖြစ်သည်။
\
ထိုင်းဗဟို စုံစမ်းစစ်ဆေးရေးဗျူရို၏ ကော်မရှင်နာဖြစ်သူ ရဲအရာရှိ ဂျီရာဟုတ် ဘူရီဒတ် (Jirabhop Bhuridej) က စုံစမ်းစစ်ဆေးသူများနှင့် ဝပ်ပါ ဓမ္မခီရိ (Wat Pa Dhammakiri) ကျောင်းမှ အမှုဆောင်သစ် အဖွဲ့ဝင်များသည် တနင်္ဂနွေနေ့တွင် ပတ်ချုံ (Pak Chong) ခရိုင်တွင်းရှိ ဘုရားကျောင်း တစ်ခုနောက်တွင် မြုပ်နှံထားသော ငွေသား ဘတ်သန်း ၈၀ နှင့် ဘတ် ၁၉ သန်း နီးပါး တန်ကြေးရှိ ရွှေချောင်းများကို တွေ့ရှိခဲ့ရသည်ဟု တနင်္လာနေ့တွင် ပြော သည်။

လက်ရှိအချိန်အထိ အာဏာပိုင်များအနေဖြင့် ဘုန်းတော်ကြီးဟောင်း ဖာရာအာဂျန်းခွမ်း လက်ရှိနာမည် ခွမ်း ခေါင်ကီယို (Khom Khongkaeo) နှင့် အပေါင်းအပါများ အလွဲသုံးစားလုပ်ခဲ့သည့် ငွေသား ဘတ်ငွေ သန်း ၃၀၀ ခန့်ကို ရှာဖွေတွေ့ရှိခဲ့ပြီး ဖြစ်သည်ဟုလည်း ကော်မရှင်နာက ပြောသည်။

ထိုင်းရဲက ဘုန်းကြီးကျောင်းကို စစ်ဆေးနေစဉ်

အမှုသည် ၂၀၂၀ ခုနှစ်က ဖြစ်ပွားခဲ့ကြောင်း၊ ယုံကြည်သူများက လှူဒါန်းသော ငွေကြေး ပမာဏများစွာကြောင့် ဖြစ်ခဲ့ရကြောင်း၊ သံသယရှိသူများအနေဖြင့် ထိုငွေကြေးသည် ၎င်းတို့အား ပြည်သူများ၏ ယုံကြည်မှုကြောင့် ရရှိခဲ့ သည်ဟု မှားယွင်း ယူဆခဲ့ကြကာ လက်တွေ့တွင် ထိုသို့ မဟုတ်ကြောင်းလည်း ဂျီရာဟုတ်က ပြောသည်။

မှားယွင်း အရေးယူမှု မဖြစ်စေရန် သက်ဆိုင်ရာ အာဏာပိုင်များအားလုံးက စုံစမ်းစစ်ဆေးမှုတွင် ပူးပေါင်း ဆောင်ရွက်လျက်ရှိသည်။

စုံစမ်းစစ်ဆေးမှုများ ဆက်လက် လုပ်ဆောင်နိုင်ရန် သံသယရှိသူများကို နောက်ထပ် ၁၂ ရက်ကြာ ထပ်မံ ထိန်းသိမ်းခွင့် ရရှိရေးအတွက် ရဲတပ်ဖွဲ့သည် တနင်္လာနေ့တွင် အကျင့်ပျက်ခြစားနှင့် အလွဲသုံစား လုပ်ခြင်းဆိုင်ရာ ဗဟိုရာဇဝတ်မှု တရားရုံးကို တနင်္လာနေ့၌ တောင်းဆိုခဲ့သည်။

 ဖမ်းဆီးရမိခဲ့သည့် ထိုင်းဘတ်ငွေများကို တွေ့ရစဉ်

ထိန်းသိမ်း ခံထားရသူများတွင် အသက် ၃၉ နှစ်အရွယ် မစ္စတာ ခွမ်း၊ ညီမဖြစ်သူနှင့် ဘုရားကျောင်း၏ ကျောင်း တိုက် ဆရာတော်ဟောင်း တစ်ဦးတို့ပါသည်။

၎င်းတို့သည် ဘုရားကျောင်းမှ ဘတ်ငွေ သန်း ၁၈၀ ကို အလွဲသုံးစား လုပ်မှုစွဲချက်ဖြင့် ဖမ်းဆီးခံထားရသည်။

မစ္စတာခွမ်းသည် သူ၏ တရားထိုင်သော နည်းစနစ်များကြောင့် ထင်ရှားကာ နာမည်ကျော် နောက်လိုက် အများအ ပြားလည်း ရှိသည်။ ၎င်းအနေဖြင့် မည်သည့် ပြစ်မှုကိုမှ မကျူးလွန်ခဲ့ဟုလည်း မစ္စတာခွမ်းက ငြင်းဆိုသည်။

Source: ဘန်ကောက်ပို့စ်

CNI News

၂၀၂၃ ခုနှစ်၊ မေလ ၅

230kV သာကေတဓာတ်အားခွဲရုံ၏ အသစ်တပ်ဆင်သည့် (230/33/11)kV, (100)MVA Bank-2 Transforme r အား ဓာတ်အားပေးနိုင်ရန် Bus D/S တပ်ဆင်ခြင်းနှင့် Connection ပြုလုပ်ခြင်း လုပ်ငန်းဆောင်ရွက်နိုင်ရန် အတွက် 230 kV Bus Shutdown ကို မေလ ၆ ရက်နေ့ နံနက် ၉ နာရီမှ ၁၂ နာရီအချိန်ထိ လုပ်ငန်းဆောင်ရွက်မည် ဖြစ်သည်။

ထိုလုပ်ငန်း ဆောင်ရွက်နေစဉ်အတွင်း သာကေတမြို့နယ်၊ ဒေါပုံမြို့နယ်၊ ဒဂုံမြို့သစ်(မြောက်ပိုင်း)မြို့နယ်၊ ဒဂုံ မြို့သစ်(တောင်ပိုင်း)မြို့နယ်၊ ဒဂုံမြို့သစ်(ဆိပ်ကမ်း)မြို့နယ်၊ သင်္ဃန်းကျွန်းမြို့နယ်၊ ရန်ကင်းမြို့နယ်၊ တာမွေမြို့ နယ်၊ ဗဟန်းမြို့နယ်များ၏ နေရာအချို့တွင် ယာယီ ဓာတ်အားပြတ်တောက်မှု ရှိမည်ဖြစ်ကြောင်း ရန်ကုန်လျှပ် စစ် ဓာတ်အားပေးရေးကော်ပိုရေးရှင်းက ထုတ်ပြန်ခဲ့သည်။

ထို့နောက် ဓာတ်အားပြတ်တောက်ချိန် ကြာမြင့်မှုမရှိစေရေး၊ ဓာတ်အား ပြတ်ဧရိယာလျော့နည်းစေရေးကို အလေးထား ဆောင်ရွက်သွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။

CNI News

၂၀၂၃ ခုနှစ်၊ ဧပြီ ၂၈

ရန်ကုန်မြို့အတွင်းရှိ မြို့နယ်တော်တော်များများတွင် ရပ်ကွက်အတွင်း သွယ်တန်းထားသည့် လျှပ်စစ်ဓာတ်ကြိုး အခိုးခံရမှုများ ဖြစ်ပွားနေကြောင်း ပြည်သူတချို့၏ ပြောကြားချက်များအရ သိရသည်။

ဧပြီလ ၂၇ ရက်နေ့ မနက်တွင် ဒဂုံမြို့သစ် အရှေ့ပိုင်းရှိ ရပ်ကွက်အတွင်း လမ်း ၄ လမ်းမှ လျှပ်စစ်ဓာတ်အား ဖြန့်ဖြူးသည့် ဓာတ်ကြိုးများ အခိုးခံရကြောင်း၊ ထို့အပြင် မြောက်ဒဂုံမြို့နယ်တွင် လည်း ဖြစ်ပွားခဲ့ကြောင်း သိရသည်။

ထိုသို့ ပျောက်ဆုံးသွားသည့် ဓာတ်ကြိုးများကို သက်ဆိုင်ရာ ရပ်ကွက်နေ ပြည်သူများမှ ပြန်လည် ဝယ်ယူပေးရ မည်ဖြစ်ပြီး လက်ရှိတွင် လျှပ်စစ်မီး မရရှိသည့်အတွက် ရေအခက်အခဲများ ဖြစ်ပေါ်နေသည်ဟု ဒဂုံမြို့သစ် (အရှေ့ပိုင်း) မြို့နယ်တွင် လူမှုကူညီရေး ဆောင်ရွက်နေသူတစ်ဦးက CNI သတင်းဌာနသို့ ပြောသည်။

၎င်းက “အခုက ဘယ်လိုဖြစ်နေလဲဆိုတော့ ဒဂုံမြောက်ပိုင်းမှာလည်း ဟိုရက်ပိုင်းက အဲဒီလိုဖြစ်တယ် မီးကြိုးခိုးခံ ရတယ်။ ခိုးခံရတော့ မီးလည်း မလာတော့ဘူးပေါ့နော်။ အဲဒီလမ်းထဲမှာ နေတဲ့သူတွေက သူတို့ပိုက်ဆံနဲ့ စုပြီး ပြန် ဝယ်ရမယ် ၅ သိန်းဆို ၅ သိန်း၊ ၆ သိန်းဆို ၆ သိန်းပေါ့။ အမှန်ဆို ဓာတ်တိုင်က မီးကြိုးက EPC နဲ့ပဲ ဆိုင်တာလေ။ အခု ဒဂုံအရှေ့မှာ ၈ ရပ်ကွက်မှာပေါ့ ခတ္တာလမ်း အပါအဝင် လမ်း ၄ လမ်းလောက်က မီးကြိုးလည်း ဖြတ်ထား တယ်လို့ မနက်က ဖုန်းဆက်တယ်။ ဖုန်းဆက်တော့ မီးကြိုးဖြတ်လို့ ဖုန်းဆက်တာတော့ မဟုတ်ဘူးပေါ့နော်။ သူတို့ က ရေလိုချင်လို့ပေါ့။ အခုက မီးလည်းမလာတော့ ရေကလည်း မလာတော့ဘူးပေါ့” ဟု ပြောသည်။

လျှပ်စစ်ဓာတ်ကြိုးသွယ်တန်းနေစဉ်

ရန်ကုန်မြို့တွင် ရပ်ကွက်အတွင်း သွယ်တန်းထားသည့် လျှပ်စစ်ဓာတ်ကြိုးများ အခိုးခံရသည့် ဖြစ်ရပ်များသည် မင်္ဂလာဒုံမြို့နယ်၊ လှိုင်မြို့နယ်၊ ဒဂုံမြို့သစ် (အရှေ့ပိုင်း) နှင့် ဒဂုံမြို့သစ် (မြောက်ပိုင်း) မြို့နယ်တို့တွင် ဖြစ်ပေါ်နေ ကြောင်း ရပ်ကွက်နေပြည်သူများထံမှ သိရသည်။

မင်္ဂလာဒုံမြို့နယ်၊ ပုလဲလမ်းဆုံအနီး နေထိုင်သူ တစ်ဦးက “ ဒီမှာဆို လျှပ်စစ်ဓာတ်ကြိုး လေးကြိုး သွယ်ထားတာ။ အခု ၂ ကြိုး ခိုးခံလိုက်ရတယ်။ ၂ ကြိုးပဲ ကျန်တော့တယ်။ အဲတော့ မီးလာရင်လည်း မီးအားက မမီဘူး၊ ရေလည်း တင်မရဘူး၊ ဒါက မီးလာတယ်ဆိုရင်တောင် ကြုံရတဲ့ အခြေအနေနော်၊ ဒါပေမယ့် မီးပျက်ရက်က ပိုများလာပါ တယ်” ဟု ပြောသည်။

တချို့ မြို့နယ်များတွင် လျှပ်စစ်ဓာတ်ကြိုး အခိုးခံရပါက ရပ်ကွက်နေ ပြည်သူများက ပြန်လည် လျော်ပေးရမည် ဆိုသော အာဏာပိုင် တချို့၏ သတ်မှတ်ချက်များ ရှိနေကြောင်း သိရသည်။

လျှပ်စစ်ဓာတ်ကြိုး အခိုးခံရမှု ဖြစ်ပွားခဲ့ပါက သက်ဆိုင်ရာ ရပ်ကွက်နေပြည်သူများမှ ပြန်လည် လျော်ပေးရခြင်း သည် အဓိပ္ပါယ် မရှိကြောင်း၊ လျှပ်စစ်နှင့် စွမ်းအင်ဝန်ကြီးဌာနတွင်သာ တာဝန်ရှိသည်ဟု လုံခြုံရေးအရ အမည် မဖော်လိုသည့် ဒဂုံမြို့သစ် (မြောက်ပိုင်း) မြို့နယ်တွင် နေထိုင်သူတစ်ဦးက CNI သတင်းဌာနသို့ ပြောသည်။

၎င်းက “ဘယ်လိုမြင်မိလဲဆိုတော့ဗျာ မီးကြိုးတက်ဖြတ်တာက ဘယ်သူဘယ်ဝါ တက်ဖြတ်တယ်လို့တော့ ကိုယ် လည်း နားမလည်ဘူးပေါ့နော်။ ဖြစ်နိုင်ခြေရှိတာတော့ မီးကြိုးကို ဓာတ်တိုင်တွေက တတ်ကျွမ်းတဲ့ သူတွေလောက် ပဲ မီးကြိုးလုပ်တယ်လို့ပဲ ထင်တယ်။

ရန်ကုန်မြို့တွင်းက လျှပ်စစ်ဓာတ်ကြိုးများကိုတွေ့ရစဉ်

နောက်တစ်ခုကကျတော့ ပြတ်သွားတယ်ပေါ့နော် ဘယ်သူပဲခိုးသွား ခိုးသွား ဒီမီးကြိုးတွေ ပြန်တပ်ပေးဖို့ ကိစ္စကတော့ EPC နဲ့ ဆိုင်တယ်လို့ ထင်တယ်။ ပြည်သူတွေက မီတာ ထိန်းသိမ်း စောင့် ရှောက်ခလည်း ပေးရတယ်။ မီတာခလည်း ပေးရတယ်လေ။ အဲဒီမီးကြိုးခပါ စိုက်ပေးရမယ်ဆိုတော့ အဓိပ္ပါယ် မရှိ ဘူးလေ” ဟု ပြောသည်။

ဓာတ်ကြိုးများ ဖြုတ်ခိုးခံရသည့် နေအိမ်များမှာ ဓာတ်တိုင်နှင့် အလှမ်းဝေးကြပြီး အချို့မှာ ဓာတ်ကြိုးပြန် လည် တပ်ဆင်ရန် အခက်အခဲများ ရှိနေကြောင်း သိရသည်။

ယခုရက်ပိုင်းအတွင်း လျှပ်စစ်ဓာတ်အား ဖြန့်ဖြူးသည့် လိုင်းကြိုးများ အခိုးခံရ၍ဆိုကာ ရပ်ကွက်အလိုက် မီးဖြတ် ခံရမှုများကို နာရီပေါင်းများစွာ ခံနေကြရကြောင်း ဒေသခံများက ပြောသည်။

ထို့အပြင် လျှပ်စစ်မီး ဖြတ်တောက်သည့် အချိန်သည် ၎င်းတို့ ထုတ်ပြန်ထားသော အချိန်ဇယားအတိုင်း ဖြတ်တောက်ခြင်းမျိုး မဟုတ်ဘဲ အချိန်အခါမရှိ ဖြတ်တောက်နေခြင်းတို့ကြောင့် ပြည်သူများ အခက်တွေ့ နေရကြောင်း သိရသည်။

CNI International News

နိုင်ရိုဘီ၊ ဧပြီ ၂၅

အစာငတ်ခံ သေဆုံးခြင်းဖြင့် ကောင်ကင်ဘုံသို့ ရောက်ရှိမည်ဟု ယုံကြည်ထားသော ခရစ်ယာန်အဖွဲ့အစည်း တစ်ခု၏ နောက်လိုက်များဟု ယူဆရသော အလောင်း ၇၃ လောင်းကို တူးဖော်ရရှိခဲ့သည်ဟု ကင်ညာရဲတပ်ဖွဲ့ အကြီးအကဲက တနင်္လာနေ့တွင် ပြောကြောင်း Al Jazeera သတင်းမှာ ဖော်ပြထားသည်။

အလောင်းအများစုကို နိုင်ငံအရှေ့ပိုင်း တောတစ်ခုအတွင်းမှ အစုလိုက် အပြုံလိုက် မြှုပ်နှံထားရာ တွင်းကြီးများ တွင် တွေ့ခဲ့ရခြင်း ဖြစ်သည်။

သေဆုံးသူများကို ဆက်လက် ရှာဖွေနေဆဲဖြစ်ပြီး အရေအတွက်မှာ မြင့်တက်လာမည်ဟု ယူဆရသည်။

လူ ၁၁၂ ဦးခန့် ပျောက်ဆုံးနေသည်ဟု သတင်းရရှိထားကြောင်း ကင်ညာကြက်ခြေနီ အဖွဲ့က ပြောသည်။

Good News International Church ဟု ၎င်းတို့ကိုယ် ၎င်းတို့ ကြေညာထားသော ခရစ်ယာန်အသင်းတော် တစ်ခုမှ နောက်လိုက်များသည် ရှာကာဟိုလာ(Shakahola)အမည်ရှိ တောထဲက ဧက ၈၀၀ အတွင်း နေထိုင်ကြသည်။

ထိုနေရာကို ရောက်ရှိနေသည့် ကင်ညာရဲချုပ် ဂျာဖက် ကိုးမီ (Japhet Koome)က သေဆုံးသူ ၅၈ ဦးမှ ၅၀ ကို တွင်းများမှ တူးဖော်တွေ့ရှိခဲ့ကာ ကျန်ရှစ်ဦးကို အသက်ရှင်လျက် တွေ့ရှိခဲ့ရသော်လည်း နောက်ပိုင်းတွင် ပိန်လှီ၍ သေဆုံးသွားခဲ့သည်ဟု ပြောသည်။

အစာငတ်ခံသည့် ဘာသာရေးအဖွဲ့မှ သေဆုံးသွားသူများ၏ ရုပ်အလောင်းများ သယ်ယူနေစဉ်

အသက်ရှင်သူ ၂၉ ဦးကို တွေ့ရှိကယ်ဆယ် ခဲ့ကြောင်းနှင့် နောက်ထပ် အသက်ရှင် ကျန်ရစ်သူများကို ဆက်လက် ရှာဖွေနေဆဲ ဖြစ်ကြောင်းလည်း ၎င်းက ပြောသည်။

အလောင်း အနည်းဆုံး ၃၁ လောင်းခန့် မြှုပ်နှံထားသည့် တွင်းများကို တွေ့ရသည်ဆိုသော သတင်းကြောင့် ထိုအဖွဲ့၏ ခေါင်းဆောင်ဖြစ်သူ ပေါလ်မက်ကန်ဇီ (Paul Mackenzie)ကို ဧပြီ ၁၄ ရက်တွင် ဖမ်းဆီးခဲ့သည်။

ထိုအဖွဲ့ဝင် ၁၄ ဦးကိုလည်း ဖမ်းဆီးထိန်းသိမ်းထားသည်ဟု ကိုးမီက ပြောသည်။

မက်ကန်ဇီကို ဧပြီ ၁၅ ရက်တွင် ရုံးထုတ်ကာ စုံစမ်းစစ် ဆေးမှုများ လုပ်ဆောင်ရေး ၎င်းကို နှစ်ပတ်ကြာ ထိန်းသိမ်း ထားရန် တရားရုံးက အမိန့်ပေးခဲ့သည်။

မက်ကန်ဇီသည် ၎င်း၏ နောက်လိုက်များကို အစားအစာနှင့် ရေ မစားသုံးရန် ပိတ်ပင်ခဲ့သူဟုလည်း ကင်ညာ သတင်းများတွင် ဖော်ပြထားသည်။

လက်ရှိ အချိန်အထိ ၎င်း၏ ကိုယ်စားလှယ်အဖွဲ့က တစ်စုံတစ်ရာ ပြောဆိုခြင်း မရှိသေးပေ။

မက်ကန်ဇီ၏ အယူဝါဒသည် စစ်မှန်သော ဘာသာရေးနှင့် သွေဖယ်နေသည်ဟု ကင်ညာသမ္မတ ဝီလီယမ်ရူတို (William Ruto) က ပြောသည်။

အစာငတ်ခံသည့် ဘာသာရေးအဖွဲ့မှ သေဆုံးသွားသူများ၏ ရုပ်အလောင်းများ သယ်ယူနေစဉ်

မက်ကန်ဇီသည် တရားဟောဆရာ ယောင်ဆောင်ထားသည့် ဆိုးရွားသည့် ရာဇဝတ်ကောင် ဖြစ်သည်ဟုလည်း ၎င်းက ပြောသည်။

တောတစ်ခုလုံးကို ရာဇဝတ်မှု ဖြစ်ပွားရာ နေရာအဖြစ် သတ်မှတ်၍ ပိတ်ဆို့ထားကြောင်း ကင်ညာပြည်ထဲရေး ဝန်ကြီးက ပြောသည်။

ယခုဖြစ်ရပ်သည် လွတ်လပ်စွာ ယုံကြည်ကိုးကွယ်မှုကို သိသိသာသာ ချိုးဖောက်မှု ဖြစ်သည်ဟုလည်း ၎င်းက ပြောသည်။

မက်ကန်ဇီသည် ကလေးငယ်များ သေဆုံးမှုများနှင့် ပတ်သက်၍လည်း ၂၀၁၉ ခုနှစ်နှင့် ယခုနှစ် မတ်လတို့တွင် ဖမ်းဆီး ခံခဲ့ရဖူးသည်။

ဖမ်းခံရမှု နှစ်ခုစလုံးတွင် ၎င်းသည် အာမခံဖြင့် ပြန်လည် လွတ်မြောက်လာခဲ့ကာ လက်ရှိအထိ ထိုအမှုနှစ်ခု စလုံး ကို စစ်ဆေးမှုများ လုပ်ဆောင်နေဆဲ ဖြစ်သည်။

Source: Aljazeera