CNI News

၂၀၂၅ ခုနှစ်၊ ဇန်နဝါရီ ၃

မိုဘိုင်းဖုန်းဒစ်ဂျစ်တယ် ငွေကြေးလိမ်လည်ခံရမှုများတွင် လုံခြုံရေးစနစ်သည် ဘဏ်၌ တာဝန်ရှိသဖြင့် ဖြစ်လာ သော ပြဿနာများအား ဘဏ်မှရှင်းပေးရမည်ဖြစ်ကြောင်း ဘဏ်ရေးရာကျွမ်းကျင်သူများနှင့် စီးပွားရေး လုပ်ငန်းရှင်များက CNI သတင်းဌာနသို့ ပြောသည်။

ထိုလိမ်လည်ခံရမှုများတွင် သုံးစွဲသူများ၏ မှားယွင်းလုပ်ဆောင်ချက်ကြောင့် မဟုတ်ဘဲ သုံးစွဲသူ၏ အချက် အလက်ကို ရရှိနိုင်ရန် ဘဏ်မှတဆင့်သာ ဖောက်ဝင်နိုင်မည်ဖြစ်ကြောင်း ဘဏ်ရေးရာကျွမ်းကျင်သူ ဦးဋ္ဌေးအောင်ကြည်က CNI သတင်းဌာနသို့ ပြောသည်။

၎င်းက “၃ ချက်ရှိတာပေါ့။ data transition မှာသွားတဲ့ password လမ်းကြောင်းရှိတာပေါ့။ ၂ ခုက customer နဲ့ ဆိုင်တာပေါ့။ တစ်ခုက ဘဏ်နဲ့ဆိုင်တာပေါ့။ customer နဲ့ဆိုင်တာကို IT သဘောအရ ဖောက်ဝင်ရင် ဘဏ်နဲ့ ဆိုင်တာကို မရောက်နိုင်ဘူး။ ဘဏ်နဲ့ဆိုင်ရာကို ဖောက်နိုင်ရင် customer ရဲ့ password နဲ့ information ဆိုင်ရာ ရနိုင်တာကို။ ဘယ်လိုပဲဖြစ်ဖြစ်လေ ဘယ်ဘဏ်ပဲမဆိုပေါ့ မိုဘိုင်း banking လုပ်တယ်ဆိုရင် အဲဒါရဲ့ security က ဘဏ်က တာဝန်ရှိတာကို။ security ဖြစ်အောင် ဘယ်လိုလုပ်မလဲဆိုတာကို IT ပညာနဲ့ MIS နဲ့ သေချာချရမှာပေါ့။ ဖြစ်လာရင် နံပါတ်တစ်အချက်က တာဝန်ခံမှုလည်း မတွေ့ဘူးပေါ့။ ဘယ်လိုစီမံရမလဲဆိုတာ စဉ်းစားရင် ပေါ်သွား ပြီပေါ့။ သူဋ္ဌေးတွေနဲ့မဆိုင်ပါဘူး။ ကိုယ့်ဝန်ထမ်းထဲမှာလည်း ရှိနိုင်တာပဲလေ ကျနော့်အမြင်က။ ကိုယ့်ဝန်ထမ်း  တွေကို သေချာစိစစ်မယ် password အဆင့်ဆင့်၊ security system အဆင့်ဆင့်နဲ့ သေချာ လုပ်မှရမှာပေါ့။ အဓိက ကတော့ security system သည်  ဘဏ်ကပဲ တာဝန်ရှိတာလေ။ တာဝန်ရှိတော့ ဖြစ်လာတဲ့ ပြဿနာကို သူက ရှင်းပေးရမှာပေါ့။ ဘယ်လိုလုပ်မလဲ ပါသွားတဲ့သူအတွက်က” ဟု ပြောသည်။

ဒစ်ဂျစ်တယ်ငွေကြေး ဝန်ဆောင်မှုပေးသည့်ဆိုင်ကိုတွေ့ရစဉ်

ကမ္ဘောဇဘဏ်၏ ဒစ်ဂျစ်တယ် မိုဘိုင်းငွေကြေးဖြစ်သည့် KBZ Pay အသုံးပြုသူများကို ယခင်က ဖုန်းဖြင့် ဆက်သွယ်ကာ အဆင့်မြှင့်တင်ရန်ဆိုပြီး လိမ်လည်ခြင်း လုပ်ခဲ့သော်လည်း ယခုအခါတွင် နည်းပညာအသုံးပြုကာ ငွေကြေးလိမ်လည်မှုများ ကျယ်ကျယ်ပြန့်ပြန့် လုပ်ဆောင်လာနေသည်။

မိုဘိုင်းဖုန်းမှတဆင့် ဒစ်ဂျစ်တယ် ငွေကြေးလိမ်လည်မှုများအား ပြုလုပ်သည့် လူပုဂ္ဂိုလ်နှင့် အဖွဲ့အစည်းများ ကိုလည်း ဖော်ထုတ်နေပြီး ထိထိရောက်ရောက် အရေးယူမည်ဟု ဗဟိုဘဏ်က ဒီဇင်ဘာ ၃၁ ရက်တွင် ထုတ်ပြန် ထားသည်။

သုံးစွဲသူများ၏ မှားယွင်း လုပ်ဆောင်ချက်ကြောင့် မဟုတ်ဘဲ တစ်ခါသုံး လုံခြုံရေးကုဒ် (OTP) နံပါတ်များ၊ password  များနှင့် လုံခြုံရေး အချက်အလက်များကို  အခြားနည်းလမ်းဖြင့် ရယူပြီး လိမ်လည်မှုဖြစ်စဉ်များကို စိစစ်ဖော်ထုတ်နေကြောင်းလည်း ပါရှိသည်။

ပြည်သူလူထုသည် ဘဏ်အပေါ် ယုံကြည်မှုမရှိသဖြင့် ဒစ်ဂျစ်တယ် မိုဘိုင်းငွေကြေးများကို သုံးစွဲနေကြခြင်း ဖြစ်ကာ ယခုကဲ့သို့ ဖြစ်စဉ်များအပေါ်တွင် ဘဏ်ဘက်မှ တာဝန်ယူမှု၊ တာဝန်ခံမှု မရှိသည့်အတွက် ယုံကြည်မှု ပိုမိုကျဆင်းကြောင်း စီးပွားရေးလုပ်ငန်းရှင်တစ်ဦးဖြစ်သည့် ဦးအောင်ပြည့်စုံက CNI သတင်းဌာနသို့ ပြောသည်။

KBZ Pay ထုတ်ပြန်ချက်ကိုတွေ့ရစဉ်

၎င်းက “အဓိကကတော့ တာဝန်ယူမှု၊ တာဝန်ခံမှုက အော်ပရေတာတစ်ခုခုပေါ့။ Banking ပဲဖြစ်ဖြစ် Mobile အော်ပရေတာ တစ်ခုခုပဲဖြစ်ဖြစ် ဘာကြောင့် ဖြစ်တယ်ဆိုတဲ့ အဖြေတစ်ခုကို ရအောင်ထုတ်ဖို့လိုပြီးတော့ ဒီဖြစ်ပေါ်လာတဲ့ အဖြေပေါ်မှာ ကျိန်းသေ တာဝန်ယူမှု၊ တာဝန်ခံမှု ရှိပေးရပါမယ်။ မရှိလို့တော့ မရပါဘူး။ မရှိဘူးဆိုရင်တော့ ပြည်သူတွေအနေနဲ့ မသုံးကြဖို့ပဲရှိတယ်။ ဘာကြောင့်လဲဆိုတော့ လုပ်ငန်းတစ်ခုလုပ်တာ ဖြစ်ဖြစ်၊ စီးပွားရေး လုပ်တာဖြစ်ဖြစ် မိမိပိုင်ငွေကြေး ပိုတောင်ဆိုးသေးတယ်။ လုံခြုံစိတ်ချရမယ်ထင်လို့၊ အသုံးပြု ရ လွယ်သူမယ်ထင်လို့ထည့်ထားတဲ့ ငွေကြေးက ပျက်စီးသွားတယ်၊ ပျောက်ဆုံးသွားတယ်ဆိုရင် ဘယ်ကနေပြီး တော့ တာဝန်ယူပြီး ဆောင်ရွက်ပေးမလဲဆိုတဲ့ မေးခွန်းတွေရှိတယ်။ ဒီမေးခွန်းတွေအတွက်ကို သက်ဆိုင်ရာ သက်ဆိုင်ရာ တာဝန်ရှိသူတွေက ဖြေရှင်းပေးရမှာဖြစ်တယ်” ဟု ပြောသည်။

ထိုဖြစ်စဉ်များကို KBZ Pay မှ စုံစမ်းစစ်ဆေးရာတွင် ဖုန်းဟန်းဆက် ပြောင်းလဲသည့် (Device Change) လုပ်ငန်း စဉ်ကိုသာ သက်ရောက်မှုရှိပြီး အဆိုပါဖြစ်စဉ် ၃၁ ခုကို တွေ့ရှိခဲ့ကြောင်း KBZ Pay မှ ၂၀၂၅ ခုနှစ်၊ ဇန်နဝါရီ ၃ ရက် တွင် ထုတ်ပြန်ထားသည်။

ယခုအခါတွင် အချို့ Operator များ၏ ဖုန်းဟန်းဆက် ပြောင်းလဲမှုများ (Device Change) ကို ခေတ္တရပ်တန့်၍ system maintenance ပြုလုပ်နေပြီး ၂၀၂၅ ခုနှစ်၊ ဇန်နဝါရီလ ၇ ရက်တွင် ဖုန်းဟန်းဆက် ပြောင်းလဲမှုလုပ်ငန်းစဉ် (Device Change) ကို ပြန်လည်စတင် အသုံးပြုနိုင်မည် ဖြစ်သည်။

စုံစမ်းစစ်ဆေးနေစဉ် ကာလအတွင်း အသုံးပြုသူ ၃၁ ဦး၏ ငွေကြေးဆုံးရှုံးမှု မရှိစေရန် KBZ Pay မှ ကြိုတင် အစားထိုး စိုက်ထုတ်ပေးမှုများကို ၂၀၂၄ ခုနှစ်၊ ဒီဇင်ဘာလ ၃၁ ရက်နေ့မှ စတင်ဆောင်ရွက်လျက်ရှိကြောင်း အသိပေးထားသည်။

CNI International News

ဘန်ကောက်၊ ဇန်နဝါရီ ၃

၂၀၂၅ ခုနှစ်သည် ထိုင်းနိုင်ငံသားများ အားလုံးအတွက် အခွင့်အလမ်းနှစ်ဖြစ်ကြောင်း ထိုင်းဝန်ကြီးချုပ် ပေတုန်တန် (Paetongtarn Shinawatra)က ပြောကြားခဲ့သည်ဟု ဘန်ကောက်ပို့စ်မှဖော်ပြခဲ့သည်။

ပေတုန်တန်က ထိုင်းနိုင်ငံသားများ သာယာဝပြော စည်ပင်ရေးအတွက် မျှော်လင့်သည့် အနေဖြင့် ဆုတောင်းပေးခဲ့ ကြောင်း ပြောကြားခဲ့သည်။

၂၀၂၅ ခုနှစ်သည် အခွင့်အလမ်းများ ၊ မျှော်လင့်ချက်များနှင့် အိပ်မက်များ ပြည့်နှက်နေသည့် ကာလအဖြစ် နိုင်ငံသားအားလုံး၏ ဘဝအရည်အသွေး မြှင့်တင်ရန် အစိုးရ၏ ကတိကဝတ်ကို အလေးပေး ပြောကြားခဲ့သည်။

ထိုင်းနိုင်ငံအတွင်း တစ်နေရာကို တွေ့ရစဉ်

ထို့ပြင် ပေတုန်တန်သည် ယခုနှစ်အတွက် အစိုးရ၏ စီမံကိန်းများကို အလေးပေး ဖော်ပြထားသော ဗွီဒီယိုဖိုင် တစ်ခုကိုလည်း မျှဝေခဲ့သည်။

ထိုင်းပြည်သူများ အနေဖြင့် စီးပွားရေး အခွင့်အလမ်းများရရှိမှု သေချာစေရန် အစိုးရ၏ ကတိကဝတ်များကို အလေးပေး ဖော်ပြထားကာ ပြည်သူများ၏ အိပ်မက်များနှင့် ရည်မှန်းချက်များ အောင်မြင်ရန် ထောက်ပံ့ကူညီ ပေးသွားမည်ဟု ပေတုန်တန်က ပြောကြားခဲ့သည်။

“အားလပ်ရက် ကာလတွေမှာ ပြည်သူတွေအနေနဲ့ မိသားစုဝင်တွေ၊ ချစ်ခင်ရသူတွေ၊ မိတ်ဆွေတွေနဲ့အတူ ပျော်ရွှင်တဲ့ အချိန်ကောင်းတွေ ပိုင်ဆိုင်ဖို့ ဆုမွန်ကောင်း တောင်းအပ်ပါတယ်။ အားပြန်ပြည့်ဖို့ အချိန်ယူပြီး ရှေ့လာမယ့် အခွင့်အရေးတွေအတွက် ပြင်ဆင်ထားကြပါ”ဟု ပေတုန်တန်က ပြောကြားခဲ့သည်။

ပေတုန်တန်က “လုပ်ပိုင်ခွင့်ရရှိသော ထိုင်းလူမျိုးများ” ဟူသည့် သတင်းစကားနှင့်အတူ ၎င်း၏ Facebook profile ဓာတ်ပုံနှင့် cover photo ကို အသစ်တင်ခဲ့သည်။

Source: ဘန်ကောက်ပို့စ်

CNI News
၂၀၂၄ ခုနှစ်၊ ဒီဇင်ဘာ ၁၀

မြန်မာ့ရိုးရာ အတာသင်္ကြန်ကို ဒြပ်မဲ့ယဉ်ကျေးမှု အမွေအနှစ်စာရင်း ဝင်အောင် ကြိုးပမ်းခဲ့ကြသည့် မြန်မာကိုယ်စားလှယ်အဖွဲ့ကို ၂၀၂၄ ခုနှစ်၊ ဒီဇင်ဘာ ၁၀ ရက်က ရန်ကုန်အပြည်ပြည်ဆိုင်ရာလေဆိပ်မှာ အာဏာပိုင်အဖွဲ့အစည်းများနှင့်အနုပညာရှင်များက ကြိုဆိုခဲ့ကြသည်။

၂၀၂၄ ခုနှစ်၊ ဒီဇင်ဘာလ ၅ ရက်က ပါရာဂွေးနိုင်ငံ၊ အာဆွန်စီယွန်မြိုမှာ (၁၉) ကြိမ်မြောက် ဒြပ်မဲ့ယဉ်ကျေးမှုအမွေအနှစ်ညီလာခံ ကျင်းပခဲ့သည်။

အဆိုပါ ညီလာခံတွင် မြန်မာကိုယ်စားလှယ်အဖွဲ့က မြန်မာ့ရိုးရာအတာသင်္ကြန်အား ကမ္ဘာ့ယဉ်ကျေးမှုအမွေအနှစ်စာရင်းမှာ ပါဝင်ခွင့်ရအောင် ဆောင်ရွက်ခဲ့ကြသည်။

ထို့နောက် မြန်မာ့အတာသင်္ကြန်ကို ဒြပ်မဲ့ယဉ်ကျေးမှုစာရင်းမှာ ထည့်သွင်းခဲ့သည်။

CNI International News

ဘန်ကောက်၊ ဒီဇင်ဘာ ၄

ထိုင်းနိုင်ငံတောင်ပိုင်းတွင် ဆိုးရွားသည့် ရေလွှမ်းမိုးမှုများ ဖြစ်ပွားနေချိန်တွင် ဝန်ကြီးချုပ် ပေတုန်တန် ရှင်နာဝပ် (Paetongtarn Shinawatra) သည် ရေဘေးကယ်ဆယ်ရေးနှင့်ပတ်သက်ပြီး နှောင့်နှေးကြန့်ကြာနေကြောင်း ဝေဖန်မှုများနှင့်ရင်ဆိုင်နေရသည်ဟု The Nation မှ ဖော်ပြခဲ့သည်။

ထိုရေဘေး အကျပ်အတည်းသည် ပေတုန်တန်၏ အစိုးရအဖွဲ့အတွက် ကြီးမားသော ဖိအားတစ်ခုဖြစ်လာပြီး ထိရောက်သည့် ဘေးအန္တရာယ် စီမံခန့်ခွဲရေး ဖြေရှင်းချက်များ လုပ်ဆောင်ရန် တောင်းဆိုမှုများ မြင့်တက်နေသည်။

အစိုးရအဖွဲ့၏ တုန့်ပြန်ဆောင်ရွက်မှုကို ကျွမ်းကျင်သူများက ဂရုတစိုက် လေ့လာစောင့်ကြည့်နေပြီး ဝေဖန်ရေး သမားများကမူ ယခုနှစ် အစောပိုင်းက နိုင်ငံမြောက်ပိုင်းတွင် ရေလွှမ်းမိုးမှုများ ဖြစ်ပွားနေချိန်၌ ရေလွှမ်းမိုးမှု၊ မုန်တိုင်းနှင့် မြေပြိုမှု ဘေးအန္တရာယ် ကယ်ဆယ်ရေး လုပ်ငန်းစင်တာ ထူထောင်မှုသည် နှောင့်နှေးကြန့်ကြာ ခဲ့ကြောင်း ထောက်ပြပြောဆိုခဲ့ကြသည်။

ထိုင်းဝန်ကြီးချုပ် ပေတုန်တန်ကို တွေ့ရစဉ်

သဘာဝဘေး ကယ်ဆယ်ရေး လုပ်ငန်းစဉ်များအတွက် ထိုကဲ့သို့ စင်တာမျိုး ထူထောင်သင့်ကြောင်း ပညာရှင်များ နှင့် အရပ်ဘက် လူမှုအဖွဲ့အစည်းများက ဝိုင်းဝန်းတိုက်တွန်းသည့် အချိန်မှသာ အစိုးရက ထိုစင်တာကို ထူထောင် ခဲ့ခြင်းဖြစ်သည်။

လက်ရှိ နိုင်ငံတောင်ပိုင်းတွင် ဖြစ်ပွားနေသည့် အခြေအနေနှင့်ပတ်သက်ပြီး ဝန်ကြီးချုပ် ပေတုန်တန် ထုတ်ပြန်ခဲ့ သည့် ကြေညာချက်သည်လည်း အွန်လိုင်းတွင် ဝေဖန်ခံနေရသည်။

"တောင်ပိုင်းကို လျစ်လျူရှုထားတယ်ဆိုတဲ့ ပြောကြားချက်တွေနဲ့ပတ်သက်ပြီး ပြောရမယ်ဆိုရင် ကျမအမျိုးသား က တောင်ပိုင်းကပါ။ သူ့မိသားစုကလည်း တောင်ပိုင်းကပါ။ တကယ်လို့သာ ကျမက တောင်ပိုင်းကို လျစ်လျူရှု ထားရင် ဒါမှမဟုတ် တောင်ပိုင်းကို မချစ်ဘူးဆိုရင် ကျမက တောင်ပိုင်းသားကို လက်ထပ်မှာ မဟုတ်ပါဘူး" ဟု ပေတုန်တန်က ကြေညာချက်အတွင်း ရေးသားခဲ့သည်။

အတိုက်အခံ အမျိုးသမီးကို တွေ့ရစဉ်

ပေတုန်တန်၏ ရေးသားဖော်ပြချက်အပေါ် လူအများစုက ပြင်းထန်စွာ ဝေဖန်ခဲ့ကြပြီး ပေတုန်တန်သည် ရေဘေးသင့်ဒေသအတွက် အသင့်ရှိမနေဘဲ စာနာမှုကင်းမဲ့ကြောင်း ဝေဖန်ခဲ့ကြသည်။

အတိုက်အခံ ခေါင်းဆောင်များကလည်း ပေတုန်တန်ကို ဝေဖန်သူများထဲတွင် ပါဝင်လာခဲ့ပြီး အကျပ်အတည်းများ ဖြစ်ပွားနေချိန်အတွင်း ပရောဖယ်ရှင်နယ်ကျသည့် ခေါင်းဆောင်မှုကဏ္ဍ လိုအပ်ကြောင်း ပြောကြားခဲ့သည်။

"ထိုင်းလူမျိုးတွေက ဝန်ကြီးချုပ်ရဲ့ မိသားစုကို ချစ်ကြပါတယ်။ ဒါပေမယ့် အခုလို ကိုယ်ရေးကိုယ်တာ ကိစ္စတွေကို တော့ သီးသန့်ထားသင့်ပါတယ်" ဟု ပြည်သူ့ပါတီ၏ ပြောရေးဆိုခွင့်ရှိသူ ပက်ကာမွန် နျူနာနန် (Pukkamon Nunarnan) က ပြောကြားခဲ့သည်။

Source: The Nation

CNI International News

ဘန်ကောက်၊ နိုဝင်ဘာ ၂၆

ထိုင်းနိုင်ငံ ဖီချစ်(Phichit)ပြည်နယ်ရှိ Pa Nakhon Chaibovorn ဘုန်းကြီးကျောင်းတွင် ကမ္မဋ္ဌာန်းကျင့်စဉ်အတွက် အသုံးပြုနေသည်ဟုဆိုသည့် လူသေအလောင်း ၄၀ ကျော်ကို တွေ့ရှိမှုအပေါ် ရဲတပ်ဖွဲ့က စုံစမ်းစစ်ဆေးနေကြောင်း ဘန်ကောက်ပို့စ်မှ ဖော်ပြခဲ့သည်။

အာဏာပိုင်များက ထိုဘုန်းကြီးကျောင်းရှိ အလောင်းများနှင့်ပတ်သက်သည့် သတင်းအချက်အလက်များ စုဆောင်း နေကာ အထောက်အထားများကို စိစစ်သုံးသပ်နေသည်ဟု ရဲတပ်ဖွဲ့က နိုဝင်ဘာ ၂၄ ရက်တွင် ပြောကြားခဲ့သည်။

ဘုန်းကြီးကျောင်းကမူ ထိုအလောင်းများကို ယုံကြည်သော ဒကာ ဒါယိကာမများက လာရောက် လှူဒါန်းထားခြင်း ဖြစ်ကြောင်း အခိုင်အမာ ပြောကြားခဲ့သည်။

သို့သော် ရဲတပ်ဖွဲ့ကမူ ထိုအလောင်းများသည် ပုံမှန်အကြောင်းအရင်းများဖြင့် သေဆုံးခဲ့ခြင်း ဟုတ်၊မဟုတ် အတည်ပြုနိုင်ရန် ကြိုးပမ်းဆောင်ရွက်လျက်ရှိသည်။

နိုင်ငံတော်ဗုဒ္ဓဘာသာအဖွဲ့အစည်းကိုလည်း  ဗုဒ္ဓဘာသာ၏ အခြေခံ သဘောထားနှင့် ကွဲလွဲမှုရှိစေနိုင်သည့် ဘုန်းကြီးကျောင်း၏ ကျင့်စဉ်များနှင့်ပတ်သက်ပြီး အကဲဖြတ်ရန် တောင်းဆိုထားသည်။

ထိုင်းရဲတပ်ဖွဲ့နဲ့သတင်း‌ထောက်များကို တွေ့ရစဉ်

ဖီချစ်ဗုဒ္ဓဘာသာအဖွဲ့အစည်းမှ Kom Pattarakulprasert က ကမ္မဋ္ဌာန်းကျင့်စဉ်ကို လေ့လာရန် ကျောင်းထိုင် ဆရာတော် Phra Ajarn Saifon Phandito ၏ Pa Nakhon Chaibovorn ဘုန်းကြီးကျောင်းသို့ ရောက်ရှိလာ ခဲ့သည်။

အလောင်းများ ထည့်ထားသည့် အခေါင်းများကို ထားရှိသော အဆောက်အအုံတွင် တရားထိုင်ရသည့် ကျင့်စဉ် သည် အသစ်အဆန်းဖြစ်ပြီး ပုံမှန်မဟုတ်သော ချဉ်းကပ်လုပ်ဆောင်မှုဖြစ်ကြောင်း ၎င်းက ပြောကြားခဲ့သည်။

"ဆရာတော် Phra Ajarn Saifon Phandito ကို အခေါင်းတွေထဲမှာ အလောင်းတွေ ရှိ၊မရှိ မေးမြန်းတုန်းကတော့ ဆရာတော်က မရှိဘူးလို့ ဖြေခဲ့ပါတယ်။ ဒါပေမဲ့ သတင်းထောက်တွေက အလောင်း ၄၁ လောင်းကို တွေ့တယ်ပြော တော့ အတော်လေး အံ့အားသင့်သွားခဲ့ပါတယ်"ဟု ၎င်းက ပြောပြခဲ့သည်။

Source: Bangkok Post

CNI News

၂၀၂၄ ခုနှစ်၊ နိုဝင်ဘာ ၁၈

အမေရိကန်သမ္မတရွေးကောက်ပွဲတွင် ဒေါ်နယ်ထရမ့် အနိုင်ရပြီး အမေရိကန်အစိုးရ အပြောင်းအလဲ ဖြစ်ပေါ်လာ မည်ဖြစ်၍ တတိယနိုင်ငံသို့ ထွက်ခွာရန်ပြင်ဆင်နေသည့် မြန်မာများအတွက် အခက်အခဲများ တွေ့လာနိုင်ကြောင်း နိုင်ငံရေးလေ့လာသုံးသပ်သူများနှင့် အလုပ်သမားအရေး ဆောင်ရွက်နေသူများက ထောက်ပြကြသည်။

ထရမ့်သည် အမေရိကန်သမ္မတရွေးကောက်ပွဲ အနိုင်မရခင် မဲဆွယ်စည်းရုံးရေး ကာလကတည်းက အမေရိကန် အစိုးရ၏ နိုင်ငံရပ်ခြား အကူအညီများ၊ ရွှေ့ပြောင်း အခြေချမှုနှင့် ဒုက္ခသည်ဆိုင်ရာ ကိစ္စရပ်များတွင် ပြင်းထန်စွာ ဝေဖန်ထောက်ပြထားသလို တင်းကြပ်စွာ ကိုင်တွယ်မည်ဟုလည်း ပြောကြားထားသည်။

ထို့ပြင် အမေရိကန်မှာ အထောက်အထားမဲ့ နေထိုင်နေသည့် သန်းနှင့်ချီ ရွှေ့ပြောင်း ဝင်ရောက်သူများအား ပြန်ပို့ မည်ဟု ကတိပေးထားသည့်အတွက် တတိယနိုင်ငံသို့ ပြောင်းရွှေ့မည့် မြန်မာများ အခက်အခဲ ပိုရှိလာနိုင်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

၎င်းက “အဲဒါတွေက ထရမ့်ရဲ့ ပြည်ဝင်ခွင့်တွေပိတ်ဆို့မှု မူဝါဒကြောင့် ပိုတောင်ဆိုးသွားလိမ့်မယ်လို့ ထင်ပါတယ်။ ကျနော်တို့ အမျိုးသမီး သမ္မတဘက်က ဒီမိုကရက်တွေမှာ ပြည်ဝင်ခွင့်နဲ့ ပတ်သက်တဲ့ ကိစ္စတွေကို သူတို့က တော် တော်လေး လှိုက်လှိုက်လှဲလှဲနဲ့ ကြိုဆိုခဲ့တယ်။ ထရမ့်ကတော့ ပြည်ဝင်ခွင့်တွေကို တားဆီးပိတ်ပင်ဖို့ ကြိုးပမ်းတဲ့ ဥပဒေပြဋ္ဌာန်းတယ်ဆိုတော့ သမ္မတဖြစ်လာတဲ့အတွက် အဲဒါက ကျ‌နော်တို့အတွက် ပိုတောင်မှ အခက်အခဲ ရှိလာ နိုင်တယ်လို့ ထင်ပါတယ်” ဟု ပြောသည်။

မြန်မာဒုက္ခသည်များကို UNHCR က ထောက်ပံ့ပေးနေစဉ်

သို့သော် လက်ရှိ ရွေးကောက်ပွဲ အနိုင်ရသွားသည့် ထရမ့် အနေဖြင့် အစိုးရသစ်တစ်ရပ် မဖွဲ့စည်းရသေးသော ကြောင့် ရွှေ့ပြောင်းနေထိုင်သူများနှင့်ပတ်သက်၍ မည်သည့် မူဝါဒချမှတ်မည်ကို စောင့်ကြည့်ရမည့် အနေအထား ဖြစ်ကြောင်း သေနင်္ဂမဟာဗျူဟာလေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြော သည်။

မဲဆွယ်ကာလ ကတိပေးထားသည့်အတိုင်း လုပ်ဆောင်မည်ဆိုပါက ရွှေ့ပြောင်း မြန်မာများအတွက် စိုးရိမ်စရာ အနေအထားရှိနိုင်ကြောင်း ၎င်းက ပြောသည်။

ဦးသိန်းထွန်းဦးက “ထရမ့်တို့ဘက်က ပြောတဲ့အချက်အလက်တွေပေါ့။ အဲဒီအပေါ်မှာ မူတည်ပြီး သုံးသပ်ရရင် တော့ သူ့အိမ်ကို ထပ်ဝင်မယ့်သူတွေ၊ ရောက်နေပြီးသားသူတွေ အဲဒီသူတွေကတော့ သိပ်သူတို့အတွက် ဆက်နေဖို့ ရော အမေရိကန်ကို ကူးဖို့အတွက်ရော အဲဒါတွေက တော်တော်လေး ခက်လိမ့်မယ်လို့ ထင်ပါတယ်။ အခု လော လောဆယ် ထရမ့်သည် သူကိုယ်တိုင်ရဲ့ နိုင်ငံတိုးတက်ရေးနဲ့ လုံခြုံရေးကို ပြန်ပြီး focus လုပ်တဲ့အတွက်ကြောင့် သူအခု ခန့်မယ်ဆိုတဲ့ လူတွေမှာလည်း ပြင်ပကနေ ကူးပြောင်း ရောက်ရှိလာတဲ့ လူတွေအတွက် တင်းတင်းကြပ် ကြပ် သဘောထား တင်းမာတဲ့သူတွေပဲ အဓိက ရွေးချယ်ထားတာဖြစ်တော့ အဲဒီလူတွေအတွက်ကတော့ နည်းနည်းလေး စိုးရိမ်စရာအနေထား ရှိလိမ့်မယ်ထင်ပါတယ်” ဟု ပြောသည်။

တတိယနိုင်ငံသို့ ခိုလှုံရန် ပြင်ဆင်နေကြသည့် မြန်မာများသည် ထိုင်းနှင့် မလေးရှားနိုင်ငံတို့တွင် အဓိက အများဆုံး ရှိပြီး မလေးရှားတွင် မွတ်ဆလင်ဒုက္ခသည်များ၊ ထိုင်းနိုင်ငံတွင် မြန်မာဘက်မှ တိုက်ပွဲရှောင်လာသည့် တိုင်းရင်းသားများ ဖြစ်ကြသည်။

၎င်းတို့အနေဖြင့် တတိယနိုင်ငံသို့ ခိုလှုံကြရာတွင် အမေရိကန် အပါအဝင် အခြားအနောက်နိုင်ငံများ၌ နေထိုင်ခွင့် ရရှိရေးကို ကြိုးပမ်းနေကြခြင်းဖြစ်သည်။

မြန်မာဒုက္ခသည်များကို တွေ့ရစဉ်

ထရမ့် အစိုးရတက်လာပါက တတိယနိုင်ငံသို့ ခိုလှုံခွင့် ရရှိရေးများသည် ရပ်တန့်မသွားနိုင်သော်လည်း ပုံမှန်ထက် ကြန့်ကြာမှုများ ရှိနိုင်သည်ဟု Arakan Workers Organization မှ ဒါရိုက်တာ ကိုနိုင်အောင်အောင်က CNI သတင်း ဌာနသို့ ပြောသည်။

၎င်းက “ပထမတစ်ခေါက် သူအာဏာရတုန်းကလည်း ဒီအတိုင်းပဲ ပြောခဲ့တာပဲ။ ဒါပေမယ့် ကျနော် နားလည်တာ ကတော့ သူ့ process နဲ့ သူကတော့ ရှိနေမှာပါပဲ။ ဒါပေမယ့် ကြာတာ၊ မြန်တာ ဒီလောက်ပဲ ရှိမှာပါ။ ဒီ process က သူ့ဟာနဲ့သူ ရှိနေတာပါပဲ။ ဒါပေမယ့် ကျနော့် အနေနဲ့ကတော့ သိပ်တော့ တတိယနိုင်ငံတစ်ခုခုကို သွားဖို့အတွက် သူတို့ရဲ့ ကြိုးစားအားထုတ်မှုအပေါ်မှာလည်း မူတည်သလို သူတို့ရဲ့ လုပ်ဆောင်ချက်ပေါ်မှာလည်း မူတည်တာကို။ ဒါပေမယ့် အမေရိကန်နိုင်ငံမှာ သမ္မတအပြောင်းအလဲ တစ်ခုခုဖြစ်လို့ဆိုတဲ့ ပုံစံမျိုးကတော့ ဝေဖန်ကြတာပါပဲ။ တကယ်တမ်း လက်တွေ့ကျကျ ပြန်စဉ်းစားကြည့်ရင် သူ ဒီအပေါ်မှာ ဘယ်လောက်အထိ အာရုံစိုက်မလဲဆိုတဲ့ဟာ ပဲ အရေးကြီးတယ်။ တတိယနိုင်ငံသွားဖို့အတွက် ရောက်နေတဲ့ အုပ်စုက ၂ အုပ်စု ဖြစ်သွားတာကို။ ထိုင်းမှာ ဒုက္ခ သည် စခန်းတွေမှာ နေထိုင်ပြီးမှ ရောက်နေတဲ့အုပ်စု၊ အာဏာသိမ်းပြီးနောက်ပိုင်းမှာ ပြေးလာတဲ့ အုပ်စု။ သူတို့ အတွက် လုံခြုံရေးတွေ၊ ထောက်ပံ့ပေးလာတဲ့ ဟာတွေကတော့ လျော့သွားနိုင်တာပေါ့” ဟု ပြောသည်။

လာမည့် ၂၀၂၅ ခုနှစ်မှာ တတိယနိုင်ငံများသို့ ရွှေ့ပြောင်းနေထိုင်ခွင့်ရလိုသည့် အာရှနိုင်ငံများမှ ဒုက္ခသည်နှင့် ခိုလှုံ ခွင့် တောင်းခံသူ ၇၇၆,၅၀၀ ဦးရှိမှာဖြစ်ကြောင်း၊ ထိုဒုက္ခသည် အားလုံး၏ ၉၄ ရာခိုင်နှုန်းသည် မြန်မာနှင့် အာဖဂန် နစ္စတန် နှစ်နိုင်ငံက ဖြစ်မည်ဟု ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး UNHCR ၏ အစီရင်ခံစာ တစ်စောင်တွင် ‌ဖော်ပြထားသည်။

CNI News

၂၀၂၄ ခုနှစ်၊ နိုဝင်ဘာ ၁၂

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် တရုတ်ခရီးစဉ်ကနေ ပြန်လည်ရောက်ရှိလာပြီနောက်နေ့ နိုဝင်ဘာ ၁၁ ရက်နေ့က နေပြည်တော်မှာ ကထိန်သင်္ကန်းကပ်လှူဒါန်းပွဲ လုပ်ခဲ့ကြောင်း သိရသည်။

အဆိုပါ အခမ်းအနားသို့ နိုင်ငံတော်သံဃမဟာနာယကအဖွဲ့ဥက္ကဋ္ဌ ပဓာနနာယက အဂ္ဂမဟာပဏ္ဍိတ၊ အဂ္ဂမဟာ သဒ္ဓမ္မဇောတိကဓဇ ဒေါက်တာ ဘဒ္ဒန္တစန္ဒိမာဘိဝံသ၊ နိုင်ငံတော်သံဃမဟာနာယကအဖွဲ့ အကျိုးတော်ဆောင် မန္တလေးမြို့ မစိုးရိမ်တိုက်သစ် မဟာနာယက၊ ဓမ္မသမိဒ္ဓိကျောင်းဆရာတော် အဂ္ဂမဟာပဏ္ဍိတ၊ အဂ္ဂမဟာသဒ္ဓမ္မ ဇောတိကဓဇ၊ မဟာဓမ္မကထိက ဗဟုဇနဟိတဓရ ဘဒ္ဒန္တ ဝါသေဋ္ဌာဘိဝံသ၊ ရွှေကျင်နိကာယ ဥပဥက္ကဋ္ဌ တွဲဖက် ရွှေကျင်သာသနာပိုင် မဟာသုဗောဓာရုံ ကျောင်းတိုက်များ၏ မဟာနာယက၊ အဘိဓဇမဟာရဋ္ဌဂုရု၊ ပါမောက္ခချုပ် ဆရာတော်ကြီး ဒေါက်တာဘဒ္ဒန္တ နန္ဒမာလာဘိဝံသနှင့် ဥပ္ပါတသန္တိစေတီတော် ဂေါပကအဖွဲ့ ဩဝါဒါစရိယ ဆရာတော်ကြီးများ ကြွရောက် ချီးမြှင့်ခဲ့ကြသည်။

ထို့နောက် ကထိန်လျာ သင်္ကန်းနှင့် လှူဖွယ်ပစ္စည်းများနှင့် ပဒေသာပင်များကို နေပြည်တော်၊ ဥတ္တရသီရိမြို့နယ်၊ ဝဇိရာနန္ဒ သုဗောဓာရုံကျောင်းတိုက်သို့ လှူဒါန်းခဲ့ကြောင်း သိရသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် တရုတ်နိုင်ငံသို့ ၂၀၂၄ ခုနှစ်၊ နိုဝင်ဘာ ၅ ရက်မှ ၁၀ ရက်နေ့အထိ သွားရောက်ခဲ့ပြီး စီးပွားရေးဆိုင်ရာ ထိပ်သီး အစည်းအဝေးများကို တက်ရောက် ဆွေးနွေးခဲ့သည်။

ထို့နောက် တရုတ်ဝန်ကြီးချုပ် လီချန်၊ ထိုင်းဝန်ကြီးချုပ် ပေတုန်တန်၊ လာအိုဝန်ကြီးချုပ် ဆီဖန်ဒုံ၊ ကမ္ဘောဒီးယား ဝန်ကြီးချုပ် ဟွန်မာနက်စ်တို့နှင့် သီးခြားစီ တွေ့ဆုံ၍ မြန်မာ့အရေး၊ စီးပွားရေး၊ ငြိမ်းချမ်းရေး၊ ကုန်သွယ်ရေး ကိစ္စ များကို ဆွေးနွေးခဲ့သည်။

တရုတ်ခရီးစဉ်ကနေ နိုဝင်ဘာ ၁၀ ရက်နေ့က ပြန်လည်ရောက်ရှိလာပြီးနောက် နိုဝင်ဘာ ၁၁ ရက်နေ့တွင် ကထိန် သင်္ကန်းကပ်လှူဒါန်းပွဲကို ပြုလုပ်ခဲ့ခြင်းဖြစ်သည်။

CNI News

၂၀၂၄ ခုနှစ်၊ နိုဝင်ဘာ ၂

ဟိန္ဒူဘာသာဝင်များ၏ ဒီပါဝလီသည် မိမိတို့ နိုင်ငံအတွင်း၌ရှိသည့် မတူကွဲပြားသည့် ဘာသာဝင်များအကြား သင့်မြတ်ညီညွတ်မှုကို ပြသနေခြင်းဖြစ်သည်ဟု ယုံကြည်ကြောင်း နစကဥက္ကဌ ဗိုလ်ချုပ်မှူးကြီးမင်းအောင်လှိုင်က ပြောသည်။

၂၀၂၄ ခုနှစ်၊ နိုဝင်ဘာ ၂ ရက်နေ့က ရန်ကုန်မြို့၊ ဒဂုံမြို့နယ်၊ မြို့မကျောင်းလမ်းရှိ အမျိုးသားဇာတ်ရုံ၌ ကျင်းပသည့် ဟိန္ဒူဘာသာဝင်များ၏ ဒီပါဝလီ အထိမ်းအမှတ် အခမ်းအနားသို့ တက်ရောက်စဉ် ၎င်းက ပြောကြားလိုက်ခြင်း ဖြစ်သည်။

နစကဥက္ကဌက “ ယခုနှစ်ကျင်းပသည့် ဒီပါဝလီနေ့ အထိမ်းအမှတ် အခမ်းအနားသည် ယခင်နှစ်များနှင့်မတူဘဲ မြန်မာနိုင်ငံအတွင်း၌ရှိသည့် ဟိန္ဒူဘာသာရေး အဖွဲ့အစည်းများ အပါအဝင် လူမှုရေးအဖွဲ့အစည်းများ အားလုံးနှင့် ဘာသာဝင်များ၊ အခြားသော ဘာသာဝင်များ စုပေါင်းပြီး စည်ကားသိုက်မြိုက်စွာ ကျင်းပဆောင်ရွက်သွားခြင်း ဖြစ် ကြောင်း၊ ယင်းသည် မိမိတို့နိုင်ငံအတွင်း၌ရှိသည့် မတူကွဲပြားသည့် ဘာသာဝင်များအကြား သင့်မြတ်ညီညွတ်မှုကို ပြသနေခြင်းဖြစ်သည်ဟု ယုံကြည်ပါကြောင်း” ပြောသည်။

ထို့နောက် ဟိန္ဒူဘာသာဝင်များအားလုံး စုစုစည်းစည်း ပါဝင်ဆင်နွှဲခြင်းသည် မှတ်တိုင်တစ်ခုဖြစ်သည့်အတွက် မိမိ အနေဖြင့် အထူးပင် ဝမ်းမြောက်ဂုဏ်ယူပါကြောင်း ၎င်းက ပြောသည်။

မိမိတို့ မြန်မာနိုင်ငံသားများသည် လူမျိုးအရဖြစ်စေ၊ ဘာသာတရားအရဖြစ်စေ ကွဲပြားမှုများရှိကြောင်း၊ သို့သော် လည်း အမိမြေပေါ်တွင် အတူတကွ ကြီးပြင်းလာကြသူများ ဖြစ်ကြသည်မှာ တူညီသည့်အတွက် တစ်ဦး၏ယုံ ကြည်ရာ ဘာသာတရားကို အခြားတစ်ဦးက လေးစားကြရမည်ဖြစ်ကြောင်း၊ ပြည်ထောင်စု စိတ်ဓာတ်ကို အခြေခံ ပြီး အပြန်အလှန် ချစ်ကြည်ရင်းနှီးမှုများကတဆင့် မြန်မာနိုင်ငံ၏အကျိုးကို ဝိုင်းဝန်းသယ်ပိုးသွားကြစေလိုကြောင်း နစကဥက္ကဌ ဗိုလ်ချုပ်မှူးကြီးမင်းအောင်လှိုင်က ပြောသည်။