CNI Sport Article 

၂၀၂၅ ခုနှစ်၊ ဇွန်လ ၆

အစ်စဝှစ်ချ်အသင်းကနေ ပြောင်းရွှေ့ကြေး ပေါင်သန်း ၃၀ နဲ့ ပြောင်းရွှေ့လာခဲ့တဲ့ တိုက်စစ်မှူးသစ် ဒီလပ်ဟာ ချယ်လ်ဆီးအသင်းမှာ ကျောနံပါတ် ၉ ကို ဝတ်ဆင်သွားမှာ ဖြစ်ပါတယ်။

ချယ်လ်ဆီးအသင်းမှာ ကျောနံပါတ် ၉ ကို ဝတ်ဆင်ကစားတဲ့ သူတွေဟာ ခြေစွမ်းပြသနိုင်ဖို့ ရုန်းကန်ခဲ့ရပြီး ကံမကောင်းခဲ့တာကြောင့် ဒီနံပါတ်ကို ကျိန်စာအဖြစ်တောင် ဖော်ပြထားကြတာပါ။

အဲဒါကြောင့် ချယ်လ်ဆီးအသင်းရဲ့ လက်ရှိ တိုက်စစ်မှူးတွေဟာ ကျောနံပါတ် ၉ ကို ဝတ်ဆင်ကစားခြင်း မရှိတာ ဖြစ်ပါတယ်။

ချယ်လ်ဆီးအသင်းမှာ ကျောနံပါတ် ၉ ကို နောက်ဆုံးဝတ်ဆင်ခဲ့သူက အူဘာမီယန်း ဖြစ်ပါတယ်။ 

ဒေါ့မွန်၊ အာဆင်နယ်နဲ့ ဘာစီလိုနာအသင်းတွေမှာ ခြေစွမ်းပြသနိုင်ခဲ့တဲ့ အူဘာမီယန်းဟာ ချယ်လ်ဆီးအသင်းမှာ တစ်ရာသီကြာသာ ကစားခဲ့ပြီး ပွဲပေါင်း ၂၁ ပွဲမှာ ၃ ဂိုးသာ သွင်းယူနိုင်ခဲ့တာပါ။ 

အူဘာမီယန်းမတိုင်မီ ကျောနံပါတ် ၉ ကို ဝတ်ဆင်ခဲ့တဲ့သူက နာပိုလီအသင်းနဲ့ စီးရီးအေဖလားကို ရယူနိုင်ခဲ့တဲ့ လူကာကူ ဖြစ်ပါတယ်။

ဒီလပ်ကို တွေ့ရစဉ် 

လူကာကူဟာ အင်တာမီလန်အသင်းမှာ ပြသခဲ့တဲ့ ခြေစွမ်းကြောင့် ချယ်လ်ဆီးအသင်းက သူ့ကို စံချိန်တင် ပြောင်းရွှေ့ကြေးပေးပြီး အသင်းထံ ပြန်လည်ခေါ်ယူခဲ့တာပါ။

လူကာကူဟာ ချယ်လ်ဆီးအသင်းအတွက် အစပိုင်းမှာ ခြေစွမ်းပြသွင်းဂိုးတွေ သွင်းယူနေခဲ့ပေမယ့် နောက်ပိုင်းမှာ အငြင်းပွားဖွယ် အင်တာဗျူး အပါအဝင် အသင်းနဲ့ အဆင်မပြေမှုတွေကြောင့် အသင်းမှာ တစ်ရာသီကြာသာ ရှိခဲ့ပါတယ်။ 

လူကာကူဟာ ချယ်လ်ဆီးအသင်းကနေ နာပိုလီအသင်းထံ အပြီးသတ် မပြောင်းရွှေ့မီ အင်တာမီလန်နဲ့ ရိုးမားအသင်းတွေမှာ အငှားကစားခဲ့တာပါ။

ကလပ်အသင်းတွေမှာ ကျောနံပါတ် ၉ ဝတ်ဆင်ရတာဟာ ကြီးမားတဲ့ ဂုဏ်ယူမှု ဖြစ်ပေမယ့် ချယ်လ်ဆီးအသင်း မှာတော့ ဒီနံပါတ် ဝတ်ဆင်ရတာဟာ ကြီးမားတဲ့ ဖိအားတွေရှိပြီး ဝန်ထုပ်ဝန်ပိုး ထမ်းဆောင်နေပုံရပါတယ်။ 

ရီးရယ်လ်၊ ဂျူဗင်တပ်စ်အသင်းတွေမှာ ကစားခဲ့တဲ့ ဟီဂူအင်နဲ့ မိုရာတာတို့လည်း ချယ်လ်ဆီးအသင်းမှာ ကျောနံပါတ် ၉ ဝတ်ဆင်ခဲ့ပေမယ့် ရုန်းကန်ခဲ့ရတာပါ။ 

လီဗာပူးလ်အသင်းမှာ ခြေစွမ်းပြသနိုင်ခဲ့ပြီး ချယ်လ်ဆီးအသင်းကို ရောက်ရှိလာကာ ချန်ပီယံလိဂ်ဖလား ရယူနိုင် ခဲ့တဲ့ ဖာနန်ဒိုတောရက်စ်လည်း နံပါတ် ၉ ကျိန်စာကနေ လွတ်မြောက်ခဲ့ခြင်း မရှိပါဘူး။ 

တောရက်စ်ကို တွေ့ရစဉ်

ဖာနန်ဒိုတောရက်စ်ဟာ ချယ်လ်ဆီးအသင်းကို ဇန်နဝါရီ အပြောင်းအရွှေ့မှာ ရောက်ရှိလာပြီးနောက် သူ့ရဲ့ ပထမဆုံး သွင်းဂိုးကို ဧပြီလရောက်မှသာ သွင်းယူကာ ၉၀၃ မိနစ်ကြာ ဂိုးပေါက်ပျောက်ဆုံးမှုကို အဆုံးသတ် နိုင်ခဲ့တာပါ။ 

ဖာနန်ဒိုတောရက်စ်ဟာ ချယ်လ်ဆီးအသင်းမှာ ၄ ရာသီကြာ ကစားခဲ့ပေမယ့် ပရီးမီးယားလိဂ်ပြိုင်ပွဲမှာ သွင်းဂိုး ၂၀ သာ သွင်းယူနိုင်ခဲ့ပြီး အေစီမီလန်၊ အသလက်တီကိုအသင်းတွေထံ ပြောင်းရွှေ့သွားခဲ့ပါတယ်။ 

ဖာနန်ဒိုတောရက်စ်နဲ့ မိုရာတာတို့အကြားမှာ ကိုလံဘီယာ နာမည်ကြီး တိုက်စစ်မှူး ဖယ်လ်ကာအိုလည်း ချယ်လ်ဆီးအသင်းရဲ့ ကျောနံပါတ် ၉ ဝတ်ဆင်ခဲ့ပြီး သူဟာ အသင်းအတွက် ပြိုင်ပွဲစုံ ၁၂ ပွဲကစားခဲ့တာမှာ ၁ ဂိုးသာ သွင်းယူနိုင်ခဲ့တာပါ။

ဒီလပ်ကို တွေ့ရစဉ် 

ဖယ်လ်ကာအိုဟာ ချယ်လ်ဆီးအသင်းမတိုင်မီ ယူနိုက်တက်အသင်းမှာလည်း အငှားကစားခဲ့ပေမယ့် သူ့ရဲ့ ပရီးမီးယားလိဂ် ကစားသမားဘဝဟာ ဆိုးရွားခဲ့တာဖြစ်ပါတယ်။ 

ပြီးခဲ့တဲ့နှစ်တွေအတွင်း ချယ်လ်ဆီးအသင်းရဲ့ ကံမကောင်းခဲ့တဲ့ ကျောနံပါတ် ၉ ကို ဆက်ခံမယ့် ဒီလပ်အနေနဲ့ ဒီကျိန်စာဆိုးကို အဆုံးသတ်မလား ဒါမှမဟုတ် ဒီကျိန်စာဆိုးကို ထပ်ပြီးကြုံတွေ့ရမလားဆိုတာ စိတ်ဝင်စားနေ ကြပါတယ်။

ဒီလပ်အနေနဲ့ ချယ်လ်ဆီးအသင်း ကစားသမားဘဝ ပထမဆုံးကစားရမယ့် ဖီဖာကလပ် ကမ္ဘာ့ဖလားပြိုင်ပွဲမှာ အထင်ကြီးဖွယ်ကောင်းတဲ့ စွမ်းဆောင်ရည်ကို ပြသနိုင်ဖို့ အခွင့်အရေးရှိနေတာပါ။ 

မန်စီးတီးအကယ်ဒမီထွက် ဒီလပ်ကတော့ ချယ်လ်ဆီးအသင်းကို အောင်မြင်မှုတွေ ထပ်ရယူပေးဖို့နဲ့ ထိပ်ဆုံးနေရာ ကို ပြန်ပို့ပေးချင်တဲ့ ရည်မှန်းချက်တွေကြောင့် လာခဲ့တယ်လို့ ဖွင့်ဟထားပါတယ်။ 

အဲဒါကြောင့် ဒီလပ်အနေနဲ့ ချယ်လ်ဆီးအသင်းမှာ ကျောနံပါတ် ၉ ဖိအားဒဏ်ကို ကျော်ဖြတ်ပြီး အကောင်းဆုံး စွမ်းဆောင်ရည်တွေ ပြသနိုင်မလားဆိုတာတော့ စောင့်ကြည့်ရမှာပဲ ဖြစ်ပါတယ်။

Source: Dailymail

CNI Sport Article

၂၀၂၅ ခုနှစ်၊ ဇွန်လ ၁

ချယ်လ်ဆီးအသင်းဟာ ပြီးခဲ့တဲ့ရက်ပိုင်းက ကွန်းဖရန့်လိဂ်ပြိုင်ပွဲ ဗိုလ်လုပွဲမှာ ဘက်တစ်အသင်းကို ၄ ဂိုး-၁ ဂိုးနဲ့ ဂိုးပြတ်အနိုင်ရပြီး ချန်ပီယံဆုကို ရယူနိုင်ခဲ့ပါတယ်။ 

ဒီဆုဖလားဟာ ချယ်လ်ဆီးအသင်းအတွက် ၂၀၂၂ ခုနှစ်၊ ဖေဖော်ဝါရီက ဖီဖာကလပ်ကမ္ဘာ့ဖလားပြိုင်ပွဲမှာ ချန်ပီယံဆုကို ရရှိပြီးနောက်ပိုင်း ပထမဆုံးဆုဖလား ဖြစ်ခဲ့ပါတယ်။ 

ချယ်လ်ဆီး အမျိုးသားအသင်းဟာ တောဒ့်ဘိုလေ ဦးဆောင်တဲ့ ပိုင်ရှင်အစုအဖွဲ့ လက်ထက်မှာ ပြောင်းရွှေ့ကြေး ပေါင် ၁ ဘီလီယံကျော် သုံးစွဲပြီး ရရှိလာတဲ့ ပထမဆုံးဆုဖလားဆိုရင်လည်း မမှားပါဘူး။ 

ပြီးခဲ့တဲ့နွေရာသီကမှ ချယ်လ်ဆီးအသင်းကို နည်းပြသစ်အဖြစ် စတင်တာဝန်ယူ ကိုင်တွယ်ခဲ့တဲ့ အီတလီလူမျိုး နည်းပြ မာရက်စ်ကာက ဒီဆုဖလားဟာ အသင်းရဲ့အောင်မြင်မှု စမှတ်ဖြစ်လာဖို့ မျှော်လင့်တယ်လို့ ပြောထား ပါတယ်။

ကွန်းဖရန့်လိဂ်ဆုဖလားနဲ့ တော့ဒ်ဘိုလေကို တွေ့ရစဉ်

ချယ်လ်ဆီးအသင်းဟာ ပြီးခဲ့တဲ့နှစ်တွေအတွင်းမှာ အသင်းအောင်မြင်မှု ရယူနိုင်ဖို့ ငွေကြေး အများအပြား သုံးစွဲခဲ့ပေမယ့် နည်းပြ အပြောင်းအလဲတွေသာ လုပ်ခဲ့ရပြီး မနှစ်ကရာသီမှာ ကာရာဘောင်းဖလား ဗိုလ်လုပွဲ တက်နိုင်ခဲ့တာပဲရှိခဲ့တာပါ။ 

ချယ်လ်ဆီးအသင်းဟာ နောက်ဆုံး ၂ ရာသီမှာ ချန်ပီယံလိဂ်ပြိုင်ပွဲ ယှဉ်ပြိုင်ခွင့်နဲ့လည်း လွဲခဲ့ရပြီး လူစာရင်း များပြားမှုကြောင့်လည်း လှောင်ပြောင်မှုတွေ အကြိမ်ကြိမ် ခံခဲ့ရတာဖြစ်ပါတယ်။

ဒီရာသီအစပိုင်းမှာ ချယ်လ်ဆီးအသင်းဟာ ရလဒ်ကောင်းတွေ ရရှိခဲ့ပြီး ပရီးမီးယားလိဂ်ပြိုင်ပွဲမှာ ချန်ပီယံဆုကို ရယူနိုင်မယ့် ပြိုင်ပွဲထဲမှာတောင် ပါဝင်ခဲ့တာပါ။

ဒါပေမယ့် ချယ်လ်ဆီးအသင်းဟာ နောက်ပိုင်းမှာ နိုင်ပွဲတွေပျောက်၊ ရလဒ်တွေဆိုးခဲ့ပြီး ချန်ပီယံလုပွဲကနေ ထွက်ခွာခဲ့ရသလို ချန်ပီယံလိဂ် ဝင်ခွင့်ကိုပါ စိုးရိမ်ခဲ့ရတာဖြစ်ပါတယ်။ 

နည်းပြမာရက်စ်ကာဟာ ချယ်လ်ဆီးအသင်းရဲ့ ရလဒ်တွေကြောင့် အသင်းပရိသတ်တွေရဲ့ လှောင်ပြောင်မှုကို ခံခဲ့ရတာပါ။ 

ရုပ်သံဘောလုံး ဝေဖန်သူတွေနဲ့ ပရိသတ်တွေက ချယ်လ်ဆီးအသင်းဟာ လာမယ့်ရာသီ ချန်ပီယံလိဂ်ပြိုင်ပွဲကို ယှဉ်ပြိုင်ခွင့်ရမှာ မဟုတ်ဘူးလို့ သုံးသပ်ခဲ့ကြပါတယ်။ 

ဒါပေမယ့် ချယ်လ်ဆီး အသင်းဟာ နောက်ဆုံးကစားခဲ့တဲ့ ပရီးမီးယားလိဂ် ၆ ပွဲမှာ ၅ ပွဲအထိ အနိုင်ရလဒ်ရယူကာ ချန်ပီယံလိဂ် ဝင်ခွင့်ကို ရယူသွားနိုင်ခဲ့ပါတယ်။ 

ချယ်လ်ဆီးအသင်း ယှဉ်ပြိုင်နေစဉ်

ချန်ပီယံလိဂ်ဝင်ခွင့်ဟာ ဒီရာသီ ချယ်လ်ဆီးအသင်းရဲ့ အဓိကရည်မှန်းချက်တွေထဲက တစ်ခုဖြစ်တာကြောင့် နည်းပြမာရက်စ်ကာဟာ အသင်းကို အောင်မြင်မှုရရှိအောင် ဦးဆောင်နိုင်ခဲ့တာပါ။ 

ချယ်လ်ဆီးအသင်းဟာ ပရီးမီးယားလိဂ်ပြိုင်ပွဲမှာ ချန်ပီယံလိဂ် ဝင်ခွင့်ပြန်ရခဲ့ပြီးနောက် ရက်ပိုင်းအကြာမှာ ဥရောပရဲ့ တတိယတန်းစား ဖလားဖြစ်တဲ့ ကွန်းဖရန့်လိဂ်ပြိုင်ပွဲမှာ ချန်ပီယံဆုကို ရယူနိုင်ခဲ့ပါတယ်။ 

ဒီဆုဖလားကို ရယူနိုင်ခဲ့တဲ့ ချယ်လ်ဆီးအသင်းဟာ ဥရောပဖလား အားလုံးကို ရယူနိုင်တဲ့ ပထမဆုံးအသင်း အဖြစ်လည်း စံချိန်သစ် တင်နိုင်ခဲ့တာပါ။

ချယ်လ်ဆီးအသင်းဟာ ဒီရာသီကို ချန်ပီယံလိဂ် ဝင်ခွင့်နဲ့ ဥရောပဆုဖလား တစ်လုံးရယူပြီး အဆုံးသတ်ခဲ့ တာကြောင့် အောင်မြင်ခဲ့တဲ့ ရာသီလို့ ပြောရမှာဖြစ်ပါတယ်။ 

ချယ်လ်ဆီးအသင်း ပရိသတ်တွေဟာ သူတို့အသင်းကို အရင်လို ဆုဖလားအောင်မြင်မှုမျိုး ပြန်လည်ရရှိတာကို မြင်တွေ့ချင်နေတာကြောင့် ဒီအောင်မြင်မှုကို ကျေနပ်ခြင်းတော့ မရှိပါဘူး။ 

ဒါပေမယ့် ပြီးခဲ့တဲ့ရာသီတွေမှာ ဆိုးရွားခဲ့တဲ့ ချယ်လ်ဆီးအသင်းရဲ့ အခြေအနေနဲ့ နှိုင်းယှဉ်ရင် ဒီရာသီက အောင်မြင်ခဲ့တယ်လို့ သတ်မှတ်ရမှာပါ။ 

ချယ်လ်ဆီးအသင်း ယှဉ်ပြိုင်နေစဉ်

ချယ်လ်ဆီးအသင်းဟာ လာမယ့်ရာသီမှာ ပရီးမီးယားလိဂ်နဲ့ ချန်ပီယံလိဂ်ဖလားကို ရယူနိုင်ဖို့ ယှဉ်ပြိုင်ရမှာဖြစ်လို့ အသင်းရဲ့လူစာရင်း အင်အားကို ပိုပြီးကောင်းမွန်အောင် ဖြည့်တင်းနိုင်ဖို့ လိုအပ်နေပါတယ်။

သူတို့ရဲ့ လက်ထက်မှာ ပြောင်းရွှေ့ကြေး အသုံးစရိတ်ပေါင် ၁ ဘီလီယံကျော်အထိ သုံးစွဲထားတဲ့ ချယ်လ်ဆီးအသင်း ပိုင်ရှင်တွေဟာ အသင်းအောင်မြင်မှု ရယူဖို့အတွက် နောက်ထပ် ပြောင်းရွှေ့ကြေးသုံးစွဲဖို့ ဝန်လေးနေမှာ မဟုတ် တာပါ။ 

ချယ်လ်ဆီးအသင်းဟာ နွေရာသီမှာ ဖီဖာကလပ် ကမ္ဘာ့ဖလားပြိုင်ပွဲ ယှဉ်ပြိုင်ရမှာဖြစ်ပြီး ဒီပြိုင်ပွဲဟာ အသင်း အတွက် ရာသီသစ် ပြင်ဆင်ဖို့ အထောက်အကူ ပေးနိုင်ပါတယ်။ 

နည်းပြ မာရက်စ်ကာ အနေနဲ့ ဖီဖာကလပ် ကမ္ဘာ့ဖလားပြိုင်ပွဲကနေ စတင်ပြီး ချယ်လ်ဆီးအသင်းကို အောင်မြင်မှုတွေ ထပ်ရယူပေးနိုင်ဖို့ ဦးဆောင်နိုင်မလားဆိုတာ မြင်တွေ့ရမှာဖြစ်ပါတယ်။ 

CNI Sport Article

၂၀၂၅ ခုနှစ်၊ မေလ ၉

၂၀၂၄-၂၅ ရာသီ ဥရောပချန်ပီယံလိဂ် ပြိုင်ပွဲကြီးကတော့ နောက်ဆုံးပွဲစဉ်ဖြစ်တဲ့ ဗိုလ်လုပွဲကို ရောက်ရှိလာခဲ့ပြီ ဖြစ်ပါတယ်။

ဒီရာသီ ချန်ပီယံလိဂ် ဗိုလ်လုပွဲအဖြစ် ပြင်သစ် လီဂူး-၁ ကလပ် PSG အသင်းနဲ့ အီတလီစီးရီးအေကလပ် အင်တာမီလန်အသင်းတို့ ယှဉ်ပြိုင်ကြမှာပါ။ 

ဗိုလ်လုပွဲမှာ ပရီးမီးယားလိဂ်၊ ဘွန်ဒက်လီဂါနဲ့ လာလီဂါကလပ်တွေ မပါဝင်တာကြောင့် သူတို့တွေ မပါဝင်တဲ့ ၂၁ နှစ်အတွင်း ပထမဆုံး ချန်ပီယံလိဂ် ဗိုလ်လုပွဲအဖြစ် မှတ်တမ်းဝင်သွားခဲ့ပါတယ်။

ပေါ်တူဂီလူမျိုးနည်းပြ မော်ရင်ဟိုရဲ့ ပေါ်တိုအသင်းက မိုနာကိုအသင်းကို အနိုင်ရခဲ့တဲ့ ၂၀၀၄ ချန်ပီယံလိဂ်ဗိုလ်လုပွဲ နောက်ပိုင်း ယှဉ်ပြိုင်ခဲ့တဲ့ ချန်ပီယံလိဂ် ဗိုလ်လုပွဲတိုင်းမှာ အင်္ဂလန်၊ ဂျာမနီနဲ့ စပိန်ကလပ် အသင်းတွေဟာ အနည်းဆုံး တစ်သင်းစီ ပါဝင်ခဲ့ကြတာပါ။

ဘာစီလိုနာနဲ့ အင်တာမီလန် ယှဉ်ပြိုင်စဉ်

ချန်ပီယံလိဂ်ပြိုင်ပွဲရဲ့ နောက်ဆုံး ၁၄ ကြိမ်မှာ ချန်ပီယံဆုကို ရယူနိုင်ခဲ့တဲ့ အသင်းတွေကလည်း ဒီ ၃ နိုင်ငံထဲက အသင်းတွေ ဖြစ်ပါတယ်။

ဒီရာသီမှာတော့ အင်္ဂလန်၊ စပိန်နဲ့ ဂျာမနီကလပ်တွေဟာ ဆီမီးဖိုင်နယ်နဲ့ ကွာတားဖိုင်နယ်ကနေ ထွက်ခွာခဲ့ရ တာပါ။

PSG အသင်းဟာ ချန်ပီယံလိဂ် ဗိုလ်လုပွဲကို ဒုတိယအကြိမ် တက်နိုင်ခဲ့တာဖြစ်ပြီး အင်တာမီလန် အသင်းကတော့ ၃ နှစ်အတွင်း ဒုတိယအကြိမ်နဲ့ စုစုပေါင်း ၇ ကြိမ်မြောက် ဗိုလ်လုပွဲကို တက်နိုင်ခဲ့တာ ဖြစ်ပါတယ်။

PSG အသင်းဟာ ကမ္ဘာကျော် ကစားသမားတွေဖြစ်တဲ့ မက်ဆီ၊ နေမာနဲ့ ဘတ်ပီတို့ ၃ ဦးစလုံးရှိခဲ့တုန်းက ချန်ပီယံလိဂ် ဗိုလ်လုပွဲကို တက်ဖို့ဆိုတာ အိပ်မက်သာရှိခဲ့တာပါ။ 

အခုတော့ PSG အသင်းဟာ နည်းပြလူးဝစ်အင်းနရစ်ရဲ့ အသင်းလိုက် တည်ဆောက်တဲ့ ပုံစံတွေနဲ့ ချန်ပီယံလိဂ် ပြိုင်ပွဲမှာ ပထမဆုံးအကြိမ် ချန်ပီယံဆုကို ရယူနိုင်ဖို့ မျှော်လင့်ခွင့်ရှိလာခဲ့ပါတယ်။

အာဆင်နယ်နဲ့ ပီအက်လ်ဂျီ ယှဉ်ပြိုင်စဉ်

PSG အသင်းဟာ ချန်ပီယံလိဂ် ဗိုလ်လုပွဲကို တက်နိုင်ခဲ့ပေမယ့် အုပ်စုအဆင့်ကနေ ထွက်ခွာရဖို့ နီးစပ်ခဲ့သေးတာပါ။ 

ဒါပေမယ့် PSG အသင်းဟာ ချန်ပီယံလိဂ် အုပ်စုနောက်ဆုံးပွဲတွေမှာ နိုင်ပွဲတွေ ရယူနိုင်ခဲ့တာကြောင့် ပလေးအော့ဖ် ယှဉ်ပြိုင်ခွင့် ရရှိခဲ့ပါတယ်။

PSG အသင်းဟာ ချန်ပီယံလိဂ် အုပ်စုအဆင့်မှာ မန်စီးတီးအသင်းကို အနိုင်ရခဲ့သလို ရှံးထွက်အဆင့်တွေမှာ လီဗာပူးလ်၊ အက်စတွန်ဗီလာနဲ့ အာဆင်နယ်အသင်းတွေကို အနိုင်ရရှိပြီး အင်္ဂလန်ကလပ် ၄ သင်းကို အနိုင်ရရှိကာ ဗိုလ်လုပွဲကို တက်နိုင်ခဲ့တာပါ။

အင်တာမီလန်အသင်းဟာ ချန်ပီယံလိဂ်ပြိုင်ပွဲမှာ သမိုင်းကြောင်းရှိပြီး ချန်ပီယံဆုကို ၃ ကြိမ်အထိ ရရှိထားတာ ဖြစ်ပါတယ်။ 

အင်တာမီလန်အသင်းဟာ ပြီးခဲ့တဲ့ ဆီမီးဖိုင်နယ်မှာ ဘာစီလိုနာအသင်းကို အပြန်အလှန် သွင်းဂိုးတွေနဲ့ အနိုင်ရပြီး နှစ်ကျော့ကစားရတဲ့ အဆင့်မှာ အကောင်းဆုံးပွဲတစ်ပွဲကို ဖန်တီးနိုင်ခဲ့တာပါ။ 

ပီအက်လ်ဂျီအသင်း အောင်ပွဲခံနေစဉ်

အင်တာမီလန်အသင်းဟာ ဘာစီလိုနာအသင်းနဲ့ ပွဲစဉ်ရဲ့ ပွဲထွက်လူစာရင်းမှာ အသက် ၂၅ နှစ်အထက် ကစားသမား ၁၀ ဦးကို အသုံးပြုပြီး အတွေ့အကြုံရင့် ကစားသမားတွေနဲ့ ပွဲကို အကောင်းဆုံး တုံ့ပြန်နိုင်ခဲ့တာဖြစ်ပါတယ်။ 

အသက် ၃၇ နှစ်အရွယ်ရှိ နောက်ခံလူ အဆာဘီက အင်တာမီလန်အသင်းအတွက် အဖိုးတန် ချေပဂိုးကို သွင်းယူ ခဲ့သလို အသက် ၃၆ နှစ်အရွယ်ရှိ ဂိုးသမား ဆွန်းမားက ဂိုးပေးရနိုင်မယ့် အခွင့်အရေး အများအပြားကို ကာကွယ်မှု ပြုလုပ်နိုင်ခဲ့တာပါ။ 

ကွင်းလယ်လူတွေဖြစ်တဲ့ မစ်ခီတာရန်နဲ့ ချာဟာနိုဂလူးတို့၂ ဦးပေါင်း အသက်ဟာ ၆၇ နှစ်ရှိတာဖြစ်ပါတယ်။ 

ကွာတားဖိုင်နယ်မှာ ဘိုင်ယန်မြူးနစ်အသင်းကို ဖြုတ်ချခဲ့တဲ့ အင်တာမီလန်အသင်းဟာ ချန်ပီယံလိဂ် အုပ်စု အဆင့်ကနေ ဆီမီးဖိုင်နယ်အထိ ကစားခဲ့တဲ့ ၁၄ ပွဲမှာ လေဗာကူဆင်အသင်း တစ်သင်းတည်းကိုသာ အရေး နိမ့်ခဲ့တာပါ။

အင်တာမီလန်အသင်းဟာ ချန်ပီယံလိဂ် ပြိုင်ပွဲမှာ နောက်ဆုံးအကြိမ် ချန်ပီယံဆု ရယူနိုင်ခဲ့တာက ၂၀၁၀ ခုနှစ်က နည်းပြမော်ရင်ဟိုရဲ့ လက်ထက်မှာ ဖြစ်ပါတယ်။ 

အဲဒါကြောင့် ၁၅ နှစ်ကြာ ဝေးကွာနေတဲ့ ချန်ပီယံလိဂ်ဖလားကို ဒီရာသီမှာရယူနိုင်ဖို့ လက်တစ်ကမ်းအကွာမှာသာ ရှိတော့တာပါ။ 

တစ်ဖက်မှာလည်း PSG အသင်းဟာ ချန်ပီယံလိဂ်ဖလားကို ပထမဆုံးအကြိမ် ရယူနိုင်ဖို့ ဆန္ဒပြင်းထန်နေပါတယ်။ 

အဲဒါကြောင့် ချန်ပီယံလိဂ်ဖလားဟာ ပြင်သစ်မြေကို သွားမလား၊ အီတလီမြေကို သွားမလားဆိုတာ စောင့်ကြည့်ရ မှာ ဖြစ်ပါတယ်။ 

Source: BBC

CNI Article 

၂၀၂၅ ခုနှစ်၊ ဧပြီ ၁၁

ချန်ပီယံလိဂ်ပြိုင်ပွဲမှာ ချန်ပီယံဆုကို ၁၅ ကြိမ်အထိ ရရှိထားပြီး ဘုရင်အဖြစ် တင်စားခြင်း ခံထားရတဲ့ ရီးရယ်လ် အသင်းဟာ ပြီးခဲ့တဲ့ ကွာတားဖိုင်နယ် ပထမအကျော့ပွဲစဉ်မှာ အာဆင်နယ်အသင်းကို ၃ ဂိုး- ဂိုးမရှိနဲ့ ဂိုးပြတ် အရေးနိမ့်ခဲ့ပါတယ်။ 

ဒီရလဒ်ဟာ အံ့အားသင့်စရာ ရလဒ်ဖြစ်ခဲ့သလို ဂိုးသမား ကော့တွိုက်စ်သာ ဂိုးကာကွယ်မှုတွေ မပြုလုပ်နိုင်ရင် ရီးရယ်လ်အသင်းအတွက် အရှက်ကွဲစရာ ရလဒ်မျိုး ကြုံတွေ့ရနိုင်တာပါ။

ရီးရယ်လ်အသင်း ကွင်းလယ်လူ ဘယ်လင်ဂမ်က အာဆင်နယ်အသင်းကို ၃ ဂိုးပဲပေးပြီး အရေးနိမ့်ခဲ့တာ ကံကောင်းခဲ့တယ်လို့တောင် ပွဲအပြီးအင်တာဗျူးမှာ ပြောခဲ့ပါတယ်။ 

ဗီနီစီးယက်စ်၊ ဘတ်ပီ၊ ဘယ်လင်ဂမ်နဲ့ ရိုဒရီဂိုတို့လို ကြယ်ပွင့် ကစားသမားတွေရှိနေတဲ့ ရီးရဲလ်အသင်းရဲ့ တိုက်စစ်ပိုင်းက အာဆင်နယ်အသင်းရဲ့ခံစစ်ကို ကြီးမားတဲ့ ခြိမ်းခြောက်မှုတွေ မပြုလုပ်နိုင်ခဲ့တာက ရီးရယ်လ် အသင်းအတွက် စိုးရိမ်ဖို့ကောင်းတာပါ။ 

ရီးရယ်လ်အသင်း ကစားသမားတွေနဲ့ နည်းပြ အန်ဆယ်လော့တီက ဒုတိယအကျော့မှာ ဘာမဆိုဖြစ်သွားနိုင် တယ်လို့ ပြောပြီး သူတို့ရဲ့ယုံကြည်မှုကို ပြသခဲ့ကြပါတယ်။ 

 ရီးရယ်လ်အသင်းနဲ့ အာဆင်နယ်အသင်း ယှဉ်ပြိုင်နေစဉ်

တကယ်တမ်း လက်တွေ့မှာရော ရီးရယ်လ်အသင်းဟာ အိမ်ကွင်းမှာ အာဆင်နယ်အသင်းကို ၃ ဂိုးပြတ် ပြန်သွင်း နိုင်မလားဆိုတာ စိတ်ဝင်စားဖို့ ကောင်းနေတာပါ။

ရီးရယ်လ်အသင်းရဲ့ တိုက်စစ်ကစားသမားတွေသာ ဂိုးရနိုင်မယ့် အခွင့်အရေးတွေကို အကောင်းဆုံး အသုံးချနိုင် မယ်ဆိုရင် ၃ ဂိုးဟာ သူတို့အတွက် ခက်ခဲနိုင်မှာ မဟုတ်ပါဘူး။ 

ဒါပေမယ့် အာဆင်နယ်အသင်းရဲ့ခံစစ်ကို ကျော်ဖြတ်နိုင်ဖို့က သူတို့အတွက် အခက်အခဲရှိနိုင်ပါတယ်။ 

အာဆင်နယ်အသင်းဟာ အဓိကနောက်ခံလူ ဂါဘရီရယ်လ် ဒဏ်ရာကြောင့် အနားယူနေရလို့ စိုးရိမ်စရာရှိခဲ့ပေမယ့် ပထမအကျော့မှာ ရီးရယ်လ်အသင်းရဲ့ တိုက်စစ်ကို အကောင်းဆုံး ထိန်းချုပ်ပြခဲ့တာကို မြင်တွေ့ခဲ့ရတာပါ။ 

ဒီရာသီ အာဆင်နယ်အသင်း ကစားထားတဲ့ ပွဲတွေကို ကြည့်မယ်ဆိုရင် သူတို့ကို ဘယ်အသင်းကမှ ၂ ဂိုးထက် ပိုပြီး သွင်းယူထားနိုင်တဲ့ အသင်းမရှိတာ ဖြစ်ပါတယ်။ 

ဒါက အာဆင်နယ်အသင်းရဲ့ ခံစစ်ကြောင်း ဘယ်လောက်အထိ ကောင်းမွန်နေလဲဆိုတာ ပြသနေတာပါ။ 

အာဆင်နယ်အသင်းဟာ တိုက်စစ်မှူးတွေ ဒဏ်ရာကြောင့် မပါဝင်နိုင်ပေမယ့် သူတို့မှာ နေရာစုံကနေ ဂိုးသွင်းယူနိုင်တဲ့ ကစားသမားတွေရှိပြီး သူတို့ရဲ့ တည်ကန်ဘောတွေဟာ ပြိုင်ဘက်တိုင်းကို ဒုက္ခပေးနိုင်တာ ဖြစ်ပါတယ်။ 

ရီးရယ်လ်အသင်းကို တွေ့ရစဉ်

ပြီးတော့ အာဆင်နယ်အသင်းဟာ ချန်ပီယံလိဂ်မှာ ရီးရယ်လ်အသင်းကို မရှုံးနိမ့်သေးဘူးဆိုတဲ့ ကောင်းမွန်တဲ့ အချက်ကို ပိုင်ဆိုင်ထားတာပါ။

ရီးရယ်လ်အသင်းဟာ ချန်ပီယံလိဂ်ပြိုင်ပွဲမှာ မတူညီတဲ့အသင်းပေါင်း ၁၁၁ သင်းကို အနိုင်ယူထားပေမယ့် ဒီအထဲ မှာ အာဆင်နယ်အသင်း ပါဝင်ခဲ့ခြင်းမရှိတာ ဖြစ်ပါတယ်။

အာဆင်နယ်အသင်းကို ကွာတားဖိုင်နယ် ပထမအကျော့မှာ အရေးနိမ့်ခဲ့တဲ့ ရလဒ်ကြောင့် ရီးရယ်လ်အသင်းနည်းပြ အန်ဆယ်လော့တီဟာ နည်းပြရာထူးအတွက် ဖိအားတွေကို ခံစားနေရတာပါ။ 

ရီးရယ်လ်အသင်းသာ ချန်ပီယံလိဂ် ပြိုင်ပွဲကနေ ထွက်ခဲ့ရရင် အန်ဆယ်လော့တီဟာ နည်းပြအဖြစ်ကနေ ထုတ်ပယ်ခံရဖွယ်ရှိတယ်လို့ စပိန်မီဒီယာတွေက ဖော်ပြခဲ့ပါတယ်။

အဲဒါကြောင့် အန်ဆယ်လော့တီ အနေနဲ့ သူ့ရဲ့နည်းဗျူဟာတွေကို ဘယ်လိုတွေ ပြောင်းလဲပြီး ဒုတိယအကျော့ ပွဲစဉ်အတွက် ပြင်ဆင်လာမလဲဆိုတာ စောင့်ကြည့်ချင်စရာ ကောင်းနေပါတယ်။

ရီးရယ်လ်အသင်းနဲ့ အာဆင်နယ်အသင်း ယှဉ်ပြိုင်နေစဉ်

ဒုတိယအကျော့ပွဲစဉ်မှာ ရီးရယ်လ်အသင်းအနေနဲ့ ဂိုးရဖို့ကို ဦးတည်ပြီး တိုက်စစ်ဖွင့်ကစားရင် အာဆင်နယ် အသင်းကို ဂိုးတွေ ပြန်ပေးရနိုင်လို့ ဒီပွဲဟာ ရီးရယ်လ်အသင်းအတွက် ခက်ခဲမယ့် ပွဲစဉ်ဖြစ်လာမယ် ဆိုတာ သေချာနေတာပါ။ 

ရီးရယ်လ်အသင်းဟာ ပြီးခဲ့တဲ့ ချန်ပီယံလိဂ် ပြိုင်ပွဲတွေမှာလည်း မဖြစ်နိုင်တဲ့ အခြေအနေတွေကနေ ပြန်လာနိုင်တဲ့ အခိုက်အတန့်တွေ ပိုင်ဆိုင်ခဲ့ဖူးပါတယ်။

အဲဒါကြောင့် အာဆင်နယ်အသင်းနဲ့ ယှဉ်ပြိုင်ရမယ့် ဒုတိယအကျော့ ပွဲစဉ်မှာ ရီးရယ်လ်အသင်း ပြန်လာနိုင်ဖို့ မျှော်လင့်နေကြတဲ့ သူတွေလည်းရှိသလို မပြန်လာနိုင်တော့ဘူးလို့ သုံးသပ်နေကြတဲ့ သူတွေလည်းရှိနေတာပါ။ 

ရီးရယ်လ်အသင်းအနေနဲ့ လက်ရှိ ချန်ပီယံဆုကို ဆက်ထိန်းသိမ်းချင်တယ်ဆိုရင် အာဆင်နယ်အသင်းနဲ့ပွဲစဉ်မှာ မဖြစ်နိုင်တဲ့အရာတွေကို လုပ်ပြရမှာဖြစ်ပြီး တကယ်ရော လုပ်ပြနိုင်မလားဆိုတာ ချန်ပီယံလိဂ်ကွာတားဖိုင်နယ် ဒုတိယအကျော့ပွဲစဉ်မှာ စောင့်ကြည့်ရမှာဖြစ်ပါတယ်။ 

CNI Sport Article 

၂၀၂၅ ခုနှစ်၊ မတ်လ ၂၈

ကမ္ဘာပေါ်မှာ လူစိတ်ဝင်စားမှု အမြင့်ဆုံးပြိုင်ပွဲတွေထဲက တစ်ခုဖြစ်တဲ့ ကမ္ဘာ့ဖလားပြိုင်ပွဲဟာ ၂၀၂၆ ခုနှစ်မှ ကျင်းပမှာ ဖြစ်ပေမယ့် လက်ရှိအချိန်မှာ ခြေစစ်ပွဲအောင် အသင်းတချို့ ထွက်ပေါ်လာခဲ့ပြီ ဖြစ်ပါတယ်။

ပြီးခဲ့တဲ့ နိုင်ငံတကာ ရက်သတ္တပတ်အတွင်းမှာ ၂၀၂၆ ကမ္ဘာ့ဖလားပြိုင်ပွဲအတွက် ခြေစစ်ပွဲအောင်မြင်တဲ့ အသင်း ၄ သင်း ထွက်ပေါ်လာခဲ့တာပါ။

ဒီအသင်းတွေကတော့ ဂျပန်၊ နယူးဇီလန်၊ အီရန်နဲ့ လက်ရှိချန်ပီယံ အာဂျင်တီးနားအသင်းတို့ ဖြစ်ပါတယ်။ 

၂၀၂၆ ကမ္ဘာ့ဖလားပြိုင်ပွဲကို ပူးတွဲအိမ်ရှင်အဖြစ် ကျင်းပမယ့် အမေရိကန်၊ မက္ကဆီကိုနဲ့ ကနေဒါအသင်းတို့ဟာ အလိုအလျောက် ခြေစစ်ပွဲ အောင်မြင်ထားတာကြောင့် အခုဆိုရင် ဒီပြိုင်ပွဲကို ယှဉ်ပြိုင်ခွင့်ရရှိတဲ့ အသင်း အရေအတွက်ဟာ ၇ သင်းအထိ ရှိလာခဲ့တာပါ။

အသင်းပေါင်း ၄၈ သင်းနဲ့ ကျင်းပမယ့် ဒီပြိုင်ပွဲအတွက် ဝင်ခွင့်လက်မှတ် နောက်ထပ် ၄၁ နေရာကို ရရှိဖို့ အသင်း အများအပြားဟာ အခွင့်အရေးတွေ ရှိနေကြတာဖြစ်ပါတယ်။ 

လက်ရှိအချိန်မှာ ၂၀၂၆ ကမ္ဘာ့ဖလားပြိုင်ပွဲ ခြေစစ်ပွဲအတွက် သမုဒ္ဒရာပိုင်းဇုန်က ပြီးဆုံးသွားခဲ့ပြီဖြစ်ပြီး အာရှဇုန်နဲ့ တောင်အမေရိကဇုန်တွေကလည်း ပြီးဆုံးဖို့ နီးစပ်လာခဲ့ပြီဖြစ်တာပါ။

ဂျပန်အသင်းကို တွေ့ရစဉ်

ကွန်ကာကပ်ဖ်နဲ့ အာဖရိကတို့က ယှဉ်ပြိုင်နေဆဲဖြစ်သလို ဥရောပဇုန်က အခုမှခြေစစ်ပွဲတွေစတင် ယှဉ်ပြိုင်နေ တာဖြစ်ပါတယ်။ 

သမုဒ္ဒရာပိုင်းဇုန်မှာ နယူးဇီလန်အသင်းက တိုက်ရိုက် ခြေစစ်ပွဲ အောင်မြင်ခဲ့ပြီး နယူးကာလီဒိုးနီးယားအသင်းက ၂၀၂၆ ကမ္ဘာ့ဖလားပြိုင်ပွဲ ယှဉ်ပြိုင်ခွင့်ရဖို့အတွက် ပလေးအော့ဖ် ယှဉ်ပြိုင်ရဦးမှာပါ။

အာရှဇုန်ကတော့ ၂၀၂၆ ကမ္ဘာ့ဖလားပြိုင်ပွဲအတွက် တိုက်ရိုက်ဝင်ခွင့် ၈ နေရာနဲ့ ပလေးအော့ဖ် ၁ နေရာရှိထား ပါတယ်။ 

လက်ရှိအချိန်မှာ ဂျပန်နဲ့ အီရန်တို့က တိုက်ရိုက်ဝင်ခွင့် ရရှိထားပြီး ဥဇဘတ်ကစ္စတန်၊ ယူအေအီး၊ တောင်ကိုရီး ယား၊ ဂျော်ဒန်နဲ့ သြစတြေးလျတို့ ကလည်း တိုက်ရိုက် ဝင်ခွင့်နေရာကို ရယူနိုင်ဖို့ အပြိုင်ကြိုးစားနေကြတာပါ။ 

အာဖရိကဇုန်ကတော့ တိုက်ရိုက်ဝင်ခွင့် ၉ နေရာနဲ့ ပလေးအောဖ့် ၁ နေရာ ရရှိထားပါတယ်။ 

အာဂျင်တီးနားအသင်းကို တွေ့ရစဉ်

ခြေစစ်ပွဲအောင်မြင်တဲ့ အသင်းတွေ မထွက်ပေါ်သေးပေမယ့် အသင်းကြီးတွေဖြစ်တဲ့ အီဂျစ်၊ အိုင်ဗရီကို့စ်၊ မော်ရိုကို၊ အယ်လ်ဂျီးရီးယား၊တူနီးရှားနဲ့ ဂါနာအသင်းတို့ ဟာ ခြေစစ်ပွဲအောင်မြင်ဖို့ နီးစပ်နေပြီလို့ ပြောရမှာပါ။

၂၀၂၆ ကမ္ဘာ့ဖလားပြိုင်ပွဲအတွက် တောင်အမေရိကဇုန်ကအသင်း ၆ သင်း တိုက်ရိုက် ဝင်ခွင့်ရမှာဖြစ်ပြီး ပလေးအော့ဖ်က ၁ နေရာ ရရှိထားပါတယ်။ 

လက်ရှိအချိန်မှာ အာဂျင်တီးနားအသင်းက ခြေစစ်ပွဲအောင်မြင်ထားပြီး အီကွေဒေါ၊ ကိုလံဘီယာ၊ ဘရာဇီးလ်နဲ့ ဥရုဂွေးအသင်းတို့ဟာ လာမယ့်ပွဲတွေမှာ ရလဒ်ကောင်း ရယူနိုင်ခဲ့ရင် ကျန်တဲ့ တိုက်ရိုက်ဝင်ခွင့် ၅ နေရာကို ဒီအသင်းတွေပဲ ရယူသွားနိုင်တာပါ။ 

ကွန်ကာကပ်ဖ်ဇုန်ကတော့ ပူးတွဲအိမ်ရှင် ၃ နေရာအတွက် ပေးထားရလို့ နောက်ထပ် တိုက်ရိုက်ဝင်ခွင့် ၃ နေရာနဲ့ ပလေးအော့ဖ် ၂ နေရာ ရရှိထားပါတယ်။

အီရန်အသင်းကို တွေ့ရစဉ်

ဥရောပဇုန်က ၂၀၂၆ ကမ္ဘာ့ဖလားပြိုင်ပွဲအတွက် ဝင်ခွင့်အများဆုံးအဖြစ် ၁၆ နေရာရရှိမှာပါ။ ဥရောပဇုန်ဟာ ပြီးခဲ့တဲ့ နိုင်ငံတကာ ရက်သတ္တပတ်ကမှ ခြေစစ်ပွဲတွေ စတင်ယှဉ်ပြိုင်ခဲ့ရလို့ ခြေစစ်ပွဲအောင်မြင်တဲ့ အသင်းတွေ ထွက်ပေါ်ဖို့ ၂၀၂၆ ခုနှစ်အထိ စောင့်ဆိုင်းရဖို့ ရှိနေပါတယ်။

၂၀၂၆ ကမ္ဘာ့ဖလားပြိုင်ပွဲအတွက် ခြေစစ်ပွဲတွေကို ၂၀၂၃ ခုနှစ်၊ စက်တင်ဘာကတည်းက စတင်ယှဉ်ပြိုင် နေတာဖြစ်ပြီး ၂၀၂၆ ခုနှစ်၊ မတ်လမှသာ ခြေစစ်ပွဲတွေ အားလုံးပြီးဆုံးသွားမှာပါ။ 

နောက်ထပ် နိုင်ငံတကာပွဲတွေကို ဇွန်လရောက်မှသာ ပြန်လည်ယှဉ်ပြိုင်မှာဖြစ်လို့ ဇွန်လထဲမှာ ၂၀၂၆ ကမ္ဘာ့ဖလား ခြေစစ်ပွဲ အောင်မြင်တဲ့ အသင်းအရေအတွက်တွေကို ထပ်ပြီးပေါင်းထည့်လို့ရမှာဖြစ်ပါတယ်။ 

အဲဒါကြောင့် ဘယ်အသင်းတွေက နောက်ထပ် ခြေစစ်ပွဲ အောင်မြင်တဲ့ အသင်းတွေအဖြစ် ထပ်မံထွက်ပေါ် လာမလဲဆိုတာ စောင့်ကြည့်ရမှာပဲ ဖြစ်ပါတယ်။ 

CNI Sport Article

၂၀၂၅ ခုနှစ်၊ မတ်လ ၂၁

ဒီရာသီ ပရီးမီးယားလိဂ်ပြိုင်ပွဲ ယှဉ်ပြိုင်တာ ပွဲစဉ် ၂၉ ပြီးဆုံးသွားခဲ့ပြီဖြစ်လို့ ရာသီအဆုံးသတ်ဖို့ နောက်ထပ်ပွဲစဉ် ၉ ပွဲသာ ယှဉ်ပြိုင်ဖို့ ကျန်ရှိတော့တာ ဖြစ်ပါတယ်။

ဒီအချိန်မှာ ထိပ်ဆုံးနေရာက လီဗာပူးလ်အသင်းဟာ အဆင့် ၂ နေရာက အာဆင်နယ်အသင်းကို ၁၂ မှတ်အထိ ဖြတ်ထားနိုင်တာကြောင့် လက်ကျန်ပွဲတွေမှာ ခြေမချော်ရင် ချန်ပီယံဆုက သူတို့အတွက်ဖြစ်ဖို့ သေချာနေတာပါ။ 

တန်းဆင်းမယ့်နေရာ ၃ နေရာ အတွက်ကလည်း မနှစ်က ပရီးမီးယားလိဂ်ပြိုင်ပွဲကို တန်းတက်လာတဲ့ အသင်း ၃ သင်းစလုံးဟာ တန်းပြန်ဆင်းဖို့ ရာခိုင်နှုန်းများသွားပြီလို့ ပြောရမှာဖြစ်ပါတယ်။

အဆင့် ၁၈ နေရာက အစ်စဝှစ်ချ်နဲ့ အဆင့် ၁၉ နေရာက လက်စတာအသင်းတို့ဟာ အဆင့် ၁၇ နေရာက ဝုလ်ဗ်စ် အသင်းနဲ့ ၉ မှတ်ကွာဟနေပြီး အဆင့် ၂၀ နေရာက ဆောက်သမ်တန်အသင်းဆိုရင် ရမှတ် ၉ မှတ်သာရရှိကာ အခြေအနေ ဆိုးရွားနေတာပါ။ 

သင်္ချာနည်းအရကလွဲပြီး ဒီအသင်း ၃ သင်းစလုံးဟာ ပရီးမီးယားလိဂ်မှာ ဆက်ရှိဖို့ ခက်ခဲနေတာဖြစ်ပါတယ်။ 

အဲဒါကြောင့် လက်ကျန် ပရီးမီးယားလိဂ် ပွဲစဉ်တွေမှာ စိတ်ဝင်စားစရာ အကောင်းဆုံးက ဥရောပဝင်ခွင့် နေရာ အတွက် ပြိုင်ဆိုင်မှုပါ။

ပရီးမီးယားလိဂ်အသင်းတွေကို တွေ့ရစဉ်

အဆင့် ၃ နေရာမှာ ရပ်တည်နေတဲ့ နော်တင်ဟမ်ဖောရက်စ်အသင်းဟာ ချန်ပီယံလိဂ်ဝင်ခွင့် မရရင်တောင် ဥရောပ ဝင်ခွင့်တစ်နေရာကို ရယူနိုင်ဖို့ အခြေအနေ ကောင်းနေတာ ဖြစ်ပါတယ်။ 

လက်ရှိအချိန်မှာ စိတ်ဝင်စားဖို့ ကောင်းနေတာက အဆင့် ၄ နေရာမှာ ရပ်တည်နေတဲ့ ချယ်လ်ဆီးအသင်းနဲ့ အဆင့် ၁၀ နေရာမှာ ရပ်တည်နေတဲ့ ဘုန်းမောက်အသင်းတို့အကြားမှာ ရမှတ်ကွာဟမှုက ၅ မှတ်သာရှိတာပါ။ 

ရမှတ်ကွာဟမှုက ကျဉ်းမြောင်းတာကြောင့် လက်ကျန်ပွဲစဉ်တွေမှာ သူတို့တွေရဲ့ ရလဒ်အပေါ် မူတည်ပြီး အဆင့် ရပ်တည်မှုတွေကလည်း အများကြီး အပြောင်းအလဲ ဖြစ်သွားနိုင်ပါတယ်။ 

ဒီရာသီ ဥရောပပြိုင်ပွဲကို ဝင်ရောက်ယှဉ်ပြိုင်နေတဲ့ အင်္ဂလန်ကလပ် အသင်းတွေဟာ ပြိုင်ပွဲ ၃ ခုစလုံးရဲ့ ကွာတား ဖိုင်နယ်ကို တက်ရောက်ထားတာကြောင့် အင်္ဂလန်ဟာ UEFA ရဲ့လက်ရှိ အဆင့်သတ်မှတ်ချက်မှာ ထိပ်ဆုံးနေရာ ရပ်တည်နေတာပါ။ 

အင်္ဂလန်အနေနဲ့ ရာသီအကုန်ထိ ဒီအဆင့်နေရာမှာ ရပ်တည်နေမယ်ဆိုရင် လာမယ့်ရာသီကို ချန်ပီယံလိဂ်ဝင်ခွင့် ၅ နေရာ ရရှိမှာဖြစ်ပါတယ်။ 

ပုံမှန်ဆိုရင် ပရီးမီးယားလိဂ်ဟာ ထိပ်ဆုံး ၄ သင်း ချန်ပီယံလိဂ် ဝင်ခွင့်ရမှာဖြစ်ပေမယ့် UEFA ရဲ့အဆင့် သတ်မှတ် ချက်အရ အပိုဝင်ခွင့် တစ်နေရာ ရမှာဖြစ်လို့ အဆင့် ၅ နေရာမှာ ရပ်တည်တဲ့အသင်းလည်း ချန်ပီယံလိဂ် ဝင်ခွင့် ရရှိမှာပါ။

 လီဗာပူးလ်နဲ့နယူးကာဆယ်အသင်းကို တွေ့ရစဉ်

အဲဒါကြောင့် ချန်ပီယံလိဂ် ဝင်ခွင့် အပိုတစ်နေရာအတွက် အသင်းတွေရဲ့ ပြိုင်ဆိုင်မှုဟာ ပိုပြီးစိတ်ဝင်စားဖို့ ကောင်းမှာ ဖြစ်ပါတယ်။ 

ပရီးမီးယားလိဂ်ဟာ ချန်ပီယံလိဂ်ဝင်ခွင့် နေရာကို ထပ်ပြီးရယူနိုင်မယ့် နည်းလမ်းတွေကလည်း ရှိသေးတာပါ။ 

ဒါကတော့ လက်ရှိ ချန်ပီယံလိဂ်ပြိုင်ပွဲမှာ ဝင်ရောက် ယှဉ်ပြိုင်နေတဲ့ အက်စတွန်ဗီလာအသင်းဟာ ချန်ပီယံဆု ရယူနိုင်ခဲ့ရင် ဝင်ခွင့်ထပ်ရမှာ ဖြစ်ပါတယ်။ 

ပြီးတော့ ယူရိုပါလိဂ်မှာ ယှဉ်ပြိုင်နေတဲ့ ယူနိုက်တက်နဲ့ စပါးအသင်းတို့ထဲက တစ်သင်းသာ ချန်ပီယံဆု ရယူနိုင်ခဲ့ ရင် ချန်ပီယံလိဂ် ဝင်ခွင့်နေရာကို ထပ်ပြီးရရှိသွားမှာပါ။

ဒီလိုတွေသာဖြစ်ခဲ့ရင် ပရီးမီးယားလိဂ်ဟာ ချန်ပီယံလိဂ် ဝင်ခွင့်နေရာကို ၇ နေရာအထိ ရရှိသွားမှာဖြစ်ပါတယ်။ 

ယူရိုပါလိဂ် ဝင်ခွင့်နေရာမှာလည်း ပရီးမီးယားလိဂ်ဟာ ၃ နေရာအထိ ရယူသွားနိုင်တဲ့ အခွင့်အရေး ရှိနေပါတယ်။ 

ပရီးမီးယားလိဂ် အမှတ်ပေးဇယားအဆင့် ၆ နေရာမှာ ရပ်တည်တဲ့ အသင်းက ယူရိုပါလိဂ်ဝင်ခွင့်တစ်နေရာ၊ FA ဖလားပြိုင်ပွဲမှာ ချန်ပီယံဖြစ်တဲ့အသင်းဟာ ချန်ပီယံလိဂ်ဝင်ခွင့် မရတဲ့အသင်းဖြစ်ရင် ယူရိုပါလိဂ်ဝင်ခွင့် တစ်နေရာ ကို ရရှိမှာပါ။

မန်စီးတီးအသင်းနဲ့ ချယ်လ်ဆီးအသင်း ယှဉ်ပြိုင်နေစဉ်

ပြီးတော့ ချယ်လ်ဆီးအသင်းအနေနဲ့ ပရီးမီးယားလိဂ် ပြိုင်ပွဲကနေ ဥရောပဝင်ခွင့်မရခဲ့ဘဲ ကွန်းဖရန့်လိဂ်ပြိုင်ပွဲမှာ ချန်ပီယံဖြစ်ခဲ့ရင် ယူရိုပါလိဂ်ဝင်ခွင့် တစ်နေရာကို ရရှိသွားမှာဖြစ်ပါတယ်။

ပြီးခဲ့တဲ့ ကာရာဘောင်းဖလား ဗိုလ်လုပွဲမှာ ချန်ပီယံဖြစ်ခဲ့တဲ့ နယူးကာဆယ်အသင်းဟာ ကွန်းဖရန့်လိဂ် ပလေးအော့ဖ်အဆင့် ယှဉ်ပြိုင်ခွင့် ရရှိထားတာပါ။

ဒါပေမယ့် နယူးကာဆယ်အသင်းအနေနဲ့ ချန်ပီယံလိဂ် ဒါမှမဟုတ် ယူရိုပါလိဂ် ဝင်ခွင့်ရခဲ့မယ်ဆိုရင် နောက်ထပ် အသင်းတစ်သင်းကို ကွန်းဖရန့်လိဂ် ဝင်ခွင့်ပေးရမှာ ဖြစ်ပါတယ်။

ဒီလိုတွေသာဖြစ်ခဲ့ရင် ပရီးမီးယားလိဂ်ဟာ လာမယ့်ရာသီမှာ ဥရောပဝင်ခွင့်ကို ၁၁ နေရာအထိ စံချိန်တင် ရရှိသွား မှာပါ။ 

ဒီလိုစံချိန်တင် ဝင်ခွင့်ရဖို့က လွယ်ကူမှာ မဟုတ်ပေမယ့် ပရီးမီးယားလိဂ် ကလပ်အသင်းတွေ အနေနဲ့ ဒီရာသီ ဥရောပပြိုင်ပွဲ၊ FA ဖလားပြိုင်ပွဲနဲ့ ပရီးမီးယားလိဂ် ပြိုင်ပွဲတွေရဲ့ လက်ကျန် ပွဲစဉ်တွေမှာ ဘယ်လောက်အထိ စွမ်းဆောင်နိုင်မလဲဆိုတာတော့ စောင့်ကြည့်ချင်စရာ ကောင်းနေတာဖြစ်ပါတယ်။ 

CNI Sport Article

၂၀၂၅ ခုနှစ်၊ မတ်လ ၇

ပြီးခဲ့တဲ့ ရက်သတ္တပတ်တွေအတွင်းမှာ ဖီနာဘာချီအသင်းနည်းပြ မော်ရင်ဟိုက သူတို့ကို လူမျိုးရေး ခွဲခြားတယ် ဆိုပြီး ဂါလာတာစာရေးအသင်းက စွပ်စွဲမှုပြုလုပ်ခဲ့တဲ့ သတင်းဟာ မီဒီယာတွေရဲ့ အထက်မှာ ခေါင်းကြီးပိုင်းအဖြစ် နေရာယူထားခဲ့တာ ဖြစ်ပါတယ်။ 

ဖီနာဘာချီအသင်းနဲ့ ဂါလာတာစာရေးအသင်းတို့ ကစားခဲ့တဲ့ အစ္စတန်ဘူလ် ဒါဘီပွဲစဉ်အပြီးမှာ ဂါလာတာစာရေး အသင်းရဲ့ အရန်ခုံတန်းဟာ "မျောက်တွေလို ခုန်ပေါက်နေတယ်"လို့ မော်ရင်ဟိုက မှတ်ချက်ပေးခဲ့တာပါ။ 

မော်ရင်ဟိုရဲ့ မှတ်ချက်စကားအပေါ် ဂါလာတာစာရေးအသင်းက ရာဇဝတ်မှုဆိုင်ရာ အရေးယူမှုတွေ ပြုလုပ်မယ် ဆိုပြီး ထုတ်ပြန်ခဲ့သလို မော်ရင်ဟိုနဲ့ ဖီနာဘာချီအသင်းတို့ကလည်း ဂါလာတာစာရေးအသင်းကို တရားစွဲဆိုမှုတွေ ပြန်လည်ပြုလုပ်နေတာ ဖြစ်ပါတယ်။ 

တူရကီလိဂ်မှာ ပြိုင်ဆိုင်မှုပြင်းထန်တဲ့ ဂါလာတာစာရေးအသင်းနဲ့ ဖီနာဘာချီအသင်းတို့ဟာ မော်ရင်ဟိုရဲ့ ဖြစ်ရပ် အတွက်လည်း အပြိုင်အဆိုင် ဖြစ်ခဲ့ကြတာပါ။ 

မော်ရင်ဟိုကို တွေ့ရစဉ်

လူမျိုးရေး ခွဲခြားတယ်လို့ စွပ်စွဲခြင်းခံထားရတဲ့ မော်ရင်ဟိုဟာ ပြီးခဲ့တဲ့ရက်ပိုင်းက Sky Sports နဲ့ ပြုလုပ်ခဲ့တဲ့ အင်တာဗျူးမှာ သူဟာ လူမျိုးရေးခွဲခြားမှုနဲ့ ဆန့်ကျင်ဘက်ဖြစ်တယ်လို့ ပြောခဲ့ပါတယ်။

မော်ရင်ဟိုက "ဂါလာတာစာရေးအသင်းက ကျနော့်ကို တိုက်ခိုက်တဲ့ နည်းလမ်းမှာ လိမ္မာပါးနပ်မှု မရှိပါဘူး။ သူတို့ဟာ ကျနော့်ရဲ့အတိတ်ကို မသိခဲ့ပါဘူး။ အာဖရိကလူမျိုးတွေ၊ အာဖရိက ကစားသမားတွေ၊ အာဖရိက ပရဟိတ အဖွဲ့အစည်းတွေနဲ့အတူ အာဖရိကနဲ့ ကျနော့်ရဲ့ ဆက်နွယ်မှုကို သူတို့မသိခဲ့ကြပါဘူး"လို့ ပြောခဲ့တာပါ။ 

တကယ်လည်း မော်ရင်ဟိုဟာ သူကိုင်တွယ်ခဲ့တဲ့ အသင်းတိုင်းမှာ အာဖရိက ကစားသမားတွေနဲ့ အလွန် ရင်းနှီး ကျွမ်းဝင်ခဲ့တာ ဖြစ်ပါတယ်။ 

ချယ်လ်ဆီးအသင်းကို ကိုင်တွယ်ခဲ့ချိန်က ဒရော့ဘာ၊ အက်ဆီယန်၊ ကာလူး၊ မီခေးလ်တို့နဲ့ မော်ရင်ဟိုရဲ့ ဆက်ဆံရေးကို မြင်တွေ့ခဲ့ရမယ်ဆိုရင် မော်ရင်ဟိုက လူမျိုးရေးခွဲခြားတဲ့ သူမဟုတ်ဘူးဆိုတာ မြင်တွေ့ရမှာပါ။ 

မော်ရင်ဟိုနဲ့ ဒရော့ဘာကို တွေ့ရစဉ်

မော်ရင်ဟိုကို ဂါလာတာစာရေးအသင်းက စွပ်စွဲခဲ့ချိန်မှာ ဒရော့ဘာနဲ့ အက်ဆီယန်တို့ဟာ သူတို့ရဲ့နည်းပြ ဘက်ကနေ ရပ်တည်ခဲ့တာဖြစ်ပါတယ်။ 

မော်ရင်ဟိုက သူ့ကစားသမားဟောင်းတွေရဲ့ အသံဟာ အလွန်အရေးကြီးတဲ့ အသံဖြစ်တယ်လို့ ပြောခဲ့တာပါ။ 

ဒါအပြင် မော်ရင်ဟိုက သူ့ဆီမှာ မကောင်းတဲ့ အရည်အချင်းတွေရှိပေမယ့် လူမျိုးရေးခွဲခြားမှုတော့ မပါဝင်ဘူးလို့ အင်တာဗျူးမှာ ထည့်သွင်းပြောခဲ့ပါတယ်။ 

မော်ရင်ဟိုက "လူတစ်ဦးအနေနဲ့ ကျနော်က ဘယ်သူလဲဆိုတာကို လူတိုင်းသိပါတယ်။ ကျနော့်ရဲ့ မကောင်းတဲ့ အရည်အချင်းကိုလည်း လူတိုင်းသိပါတယ်။ ဒါပေမယ့် လူမျိုးရေးခွဲခြားတာက ကျနော့်ရဲ့ မကောင်းတဲ့ အရည်အချင်းတွေထဲက တစ်ခုမဟုတ်ပါဘူး။ လုံးဝကို ဆန့်ကျင်ဘက်ပါ။ အရေးကြီးဆုံးက ကျနော်က ဘယ်သူလဲဆိုတာ ကျနော်သိပါတယ်။ လူမျိုးရေးခွဲခြားတယ်လို့ စွပ်စွဲတဲ့ တိုက်ခိုက်မှုဟာ ဆိုးရွားတဲ့ ရွေးချယ်မှုတစ်ခုပါ"လို့ ပြောခဲ့တာပါ။ 

မော်ရင်ဟိုကို တွေ့ရစဉ်

မော်ရင်ဟိုဟာ ဖီနာဘာချီအသင်းကို ရောက်ရှိလာပြီးကတည်းက အဖြစ်အပျက် အများအပြားဖြစ်ခဲ့ပြီး လူမျိုးရေး ခွဲခြားတယ်လို့ စွပ်စွဲမှုဟာ နောက်ဆုံးဖြစ်ခဲ့တဲ့ အရာဖြစ်ပါတယ်။ 

မော်ရင်ဟိုဟာ ဒီမတိုင်ခင်က တူရကီဒိုင်တွေနဲ့ ဘောလုံးတာဝန်ရှိသူတွေရဲ့ စံနှုန်းတွေကို ပြင်းပြင်းထန်ထန် ဝေဖန်ခဲ့တာကြောင့် ပွဲပယ်နဲ့ ဒဏ်ကြေးငွေတွေ ချမှတ်ခြင်းခံခဲ့ရတာ ဖြစ်ပါတယ်။ 

မော်ရင်ဟို အနေနဲ့ လက်ရှိဖြစ်နေတဲ့ လူမျိုးရေး ခွဲခြားမှုပြဿနာကို ထပ်ပြီး ဖြေရှင်းရဖို့ ရှိနေတာပါ။ 

မော်ရင်ဟိုဟာ ဖီနာဘာချီအသင်းကို အောင်မြင်မှုတွေ ရယူပေးဖို့ တူရကီကို ရောက်လာခဲ့ပေမယ့် အဖြစ်အပျက် အများကြီးကို ရင်ဆိုင်နေရပြီး ဒါတွေကို ကြံ့ကြံ့ခံ ရင်ဆိုင်နိုင်မလား ဒါမှမဟုတ် ရာသီအကုန်မှာ ထွက်ခွာသွား မလား ဆိုတာတော့ စောင့်ကြည့်ရမှာဖြစ်ပါတယ်။ 

CNI Sport News

၂၀၂၅ ခုနှစ်၊ ဖေဖော်ဝါရီ ၂၈

အင်္ဂလန်တောင်ပံကစားသမား ရက်ရှ်ဖို့ဒ်ဟာ လာမယ့် နွေရာသီ အပြောင်းအရွှေ့ ဈေးကွက်ဖွင့်ချိန်မှာ ယူနိုက်တက်အသင်းကနေ အက်စတွန်ဗီလာအသင်းထံ အပြီးသတ် ပြောင်းရွှေ့ဖို့ ဆုံးဖြတ်ခဲ့ပါတယ်။ 

ရက်ရှ်ဖို့ဒ်ဟာ ယူနိုက်တက်အသင်းမှာ နည်းပြအာမိုရင်နဲ့ အဆင်မပြေမှုတွေ ရှိခဲ့တာကြောင့် ပွဲကစားခွင့် ဆုံးရှုံးခဲ့ ရပြီးနောက် ဇန်နဝါရီအပြောင်းအရွှေ့က အက်စတွန်ဗီလာအသင်းထံ ရာသီအကုန်ထိ အငှားစာချုပ်နဲ့ ပြောင်းရွှေ့ခဲ့ တာပါ။ 

The Sun က ရက်ရှ်ဖို့ဒ်ဟာ အက်စတွန်ဗီလာအသင်းမှာ ကောင်းမွန်စွာ စတင်နိုင်ခဲ့ပြီးနောက် သူ့ရဲ့အနာဂတ်ကို ဆုံးဖြတ်ခဲ့တယ်လို့ ဖော်ပြထားပါတယ်။ 

ရက်ရှ်ဖို့ဒ်ဟာ နည်းပြ အူနှိုင်းအမ်မရီရဲ့ လက်အောက်မှာ တိုးတက်မှုတွေနဲ့အတူ အက်စတွန်ဗီလာအသင်းထံ အပြီးသတ် ပြောင်းရွှေ့ချင်နေတာပါ။

ရက်ရှ်ဖို့ဒ်ကို တွေ့ရစဉ်

ရက်ရှ်ဖို့ဒ်က သူဟာ နည်းပြ အူနှိုင်းအမ်မရီရဲ့ လက်အောက်မှာ သူ့ရဲ့ကစားသမားဘဝ ပြန်လည် အသက်ဝင် လာတယ်လို့ ခံစားနေရပြီး နည်းပြဟာ သူ့ကို လက်ရွေးစင်အသင်း လူစာရင်းထဲ ပြန်လည် ပါဝင်နိုင်အောင် လုပ်ပေးနိုင်မယ်လို့ ယုံကြည်ကြောင်း သူငယ်ချင်းတွေကို ပြောခဲ့တယ်လို့ သိရပါတယ်။ 

အင်္ဂလန်အသင်း လူစာရင်းနဲ့ ဝေးကွာနေတဲ့ ရက်ရှ်ဖို့ဒ်ဟာ နည်းပြသစ် တူချယ်လ်ရဲ့ လက်ထက်မှာ လူစာရင်းထဲ ပြန်ပါဝင်ပြီး ၂၀၂၆ ကမ္ဘာ့ဖလားပြိုင်ပွဲမှာ ပါဝင်ကစားချင်နေတာပါ။

ရက်ရှ်ဖို့ဒ်ရဲ့ အငှားစာချုပ်ထဲမှာ အက်စတွန်ဗီလာအသင်းဟာ ရာသီကုန်ချိန်မှာ သူ့ကို ယူနိုက်တက်အသင်းကနေ ပေါင်သန်း ၄၀ နဲ့ အပြီးသတ် ဝယ်ယူနိုင်ဖို့ ရွေးချယ်ခွင့်ပါဝင်တာ ဖြစ်ပါတယ်။ 

ရက်ရှ်ဖို့ဒ်နဲ့ ယူနိုက်တက်အသင်းတို့ရဲ့ စာချုပ်ဟာ ၂၀၂၈ ခုနှစ်အထိ သက်တမ်းရှိနေပေမယ့် နည်းပြအာမိုရင် တာဝန်ယူနေချိန်အတွင်း သူ့အတွက် ငယ်ဘဝကလပ်မှာ ပြန်ကစားခွင့်ရဖို့ ခက်ခဲနိုင်တာပါ။ 

ရက်ရှ်ဖို့ဒ်ဟာ ကာဒစ်ဖ်အသင်းနဲ့ FA ဖလား ပဉ္စမအဆင့် ပွဲမတိုင်ခင်အထိ အက်စတွန်ဗီလာ အသင်းအတွက် ၅ ပွဲ ပါဝင်ကစားထားပြီး ဂိုးဖန်တီးမှု ၂ ကြိမ် ပြုလုပ်ထားတာ ဖြစ်ပါတယ်။ 

Source: Goal

CNI Sport Article

၂၀၂၅ ခုနှစ်၊ ဖေဖော်ဝါရီ ၁၄

ဖီဖာဒိုင်လူကြီးများကော်မတီမှာ ဥက္ကဋ္ဌအဖြစ် ဆောင်ရွက်နေတဲ့ ကမ္ဘာကျော် ဒိုင်လူကြီးဟောင်း  ကော်လီနာက ပင်နယ်တီကန်သွင်းတဲ့ စည်းမျဉ်းဥပဒေတွေကို ပြောင်းလဲဖို့ အဆိုပြုခဲ့တယ်လို့ ပြီးခဲ့တဲ့ရက်ပိုင်းက သတင်းတွေမှာ ဖော်ပြထားပါတယ်။ 

ပင်နယ်တီ ကန်သွင်းမှုကို ပြောင်းလဲချင်တဲ့ ကော်လီနာရဲ့ အဓိကအကြောင်းရင်းက ဂိုးသမားတွေကို ကာကွယ်မှု ပိုပြီးပြုလုပ်နိုင်စေဖို့ အခွင့်အရေး ပိုပေးချင်နေတာပါ။ 

ကော်လီနာဟာ အချိန်ပိုအပြီး ပင်နယ်တီ အဆုံးအဖြတ်တွေမှာ ကန်သွင်းတဲ့ ပင်နယ်တီ ပုံစံမျိုးကို ပွဲကစားချိန် မိနစ် ၉၀ အတွင်း ကန်သွင်းတဲ့အချိန် အသုံးပြုစေချင်နေတာ ဖြစ်ပါတယ်။ 

လက်ရှိ ပွဲကစားချိန်မိနစ် ၉၀ အတွင်းရရှိတဲ့ ပင်နယ်တီတွေမှာ ကန်သွင်းတဲ့သူဟာ ဂိုးသမားကာကွယ်လို့ ပြန်ထွက်လာတဲ့ ဘောလုံးကို ထပ်ပြီးကန်သွင်းကာ ဂိုးရယူနိုင်မယ့် အခွင့်အရေး ရှိနေတာပါ။ 

အဲဒါကြောင့်လည်း ကော်လီနာဟာ ဂိုးသမားတွေအတွက် မျှတစေမယ့် ပင်နယ်တီကန်သွင်းတဲ့ စည်းမျဉ်းကို ပြောင်းလဲဖို့ အဆိုပြုခဲ့တာဖြစ်ပါတယ်။

ကော်လီနာကို တွေ့ရစဉ် 

ကော်လီနာက "လက်ရှိပုံစံက ကန်သွင်းသူနဲ့ ဂိုးသမားအကြားမှာ ကွာခြားချက်က အလွန်ကြီးမားတယ်လို့ ကျနော် ထင်ပါတယ်။ ပျှမ်းမျှကြည့်မယ်ဆိုရင် ပင်နယ်တီ ၇၅ ရာခိုင်နှုန်းက ဂိုးဝင်ကြပါတယ်။ ဒါအပြင် ဂိုးသမားက ပုတ်ထုတ်လို့ ပြန်ထွက်လာတဲ့ ဘောလုံးကို ကန်သွင်းဖို့ အခွင့်အရေးလည်း ရပါတယ်။ ကျနော့် အမြင်အရဆိုရင် ဂိုးသမားတွေအနေနဲ့ ဒါကို မကျေမနပ်ဖြစ်သင့်တယ်"လို့ La Repubblica ကိုပြောခဲ့တာပါ။ 

ကော်လီနာက ပင်နယ်တီ ကန်သွင်းမှု စည်းမျဉ်းပြောင်းလဲဖို့နဲ့ ပတ်သက်ပြီး နိုင်ငံတကာဘောလုံးဘုတ်အဖွဲ့ (IFAB)နဲ့ ဆွေးနွေးမှုမှာ ပြောထားတယ်လို့ သိရပါတယ်။ 

ကော်လီနာဟာ သူပြောင်းချင်တဲ့ ပင်နယ်တီ ကန်သွင်းမှုစည်းမျဉ်းကြောင့် ပင်နယ်တီ မကန်သွင်းခင် ဂိုးဧရိယာ အနားမှာ မြင်တွေ့နေရတဲ့ မြင်ကွင်းတွေကိုလည်း ဖယ်ရှားပစ်နိုင်မယ်လို့ ယုံကြည်နေပါတယ်။

ကော်လီနာက "ဒါကို ဖြေရှင်းနိုင်တဲ့ တစ်ခုတည်းသော စည်းမျဉ်းက တစ်ကြိမ်တည်း ကန်သွင်းတာပါ။ အချိန်ပို အပြီး ပင်နယ်တီ အဆုံးအဖြတ် ကန်သွင်းချိန်မှာ ကန်တဲ့ပုံစံပါ။ ပြန်ထွက်လာတဲ့ ဘောလုံးကို ထပ်ပြီးကန်သွင်းခွင့် မရှိပါဘူး။ ဂိုးဝင်တာပဲဖြစ်ဖြစ်၊ မဝင်တာပဲဖြစ်ဖြစ် ဂိုးတည်ကန်ဘောနဲ့ ပွဲကိုပြန်စတင်ရပါမယ်။ ဒါက ပင်နယ်တီ မကန်သွင်းခင် ဂိုးဧရိယာအနားမှာ လူအများအပြား ရှိနေတာကို ဖယ်ရှားပစ်နိုင်မှာပါ"လို့ ပြောခဲ့ပါတယ်။

ပင်နယ်တီ ကန်နေစဉ်

ဒီစည်းမျဉ်းသာ အတည်ပြုနိုင်ခဲ့ရင် ဂိုးသမားတွေအတွက် ကောင်းမွန်တဲ့ အချက်ဖြစ်လာမှာဖြစ်သလို ကန်သွင်း မယ့် သူတွေအတွက်လည်း ဂိုးဝင်အောင် ကန်သွင်းနိုင်ဖို့အတွက်သာ အာရုံစိုက်နိုင်တော့မှာပါ။

ဒါပေမယ့် ကော်လီနာရဲ့ ဒီစည်းမျဉ်း အဆိုပြုချက်အပေါ် ထောက်ခံတဲ့ သူတွေရှိသလို ဝေဖန်တဲ့သူတွေလည်း ရှိပါတယ်။ 

ဒီစည်းမျဉ်းအပေါ် အငြင်းပွားမှုတွေကလည်း ပိုတိုးလာနိုင်ပြီး ပင်နယ်တီ ကန်သွင်းတဲ့ စည်းမျဉ်းကို ပြောင်းလဲ သင့်ပြီလားဆိုတဲ့ မေးခွန်းတွေကလည်း ရှိနေတာပါ။ 

တကယ်လို့ ကော်လီနာ အဆိုပြုထားတဲ့အတိုင်းသာ ပင်နယ်တီကန်သွင်းတဲ့ စည်းမျဉ်းပြောင်းလဲခဲ့ရင်တောင် အရင်ဆုံးစမ်းသပ်ပြီးမှ ထိပ်တန်းလိဂ်တွေမှာ အသုံးပြုသွားမှာဖြစ်လို့ အချိန်အနည်းငယ် စောင့်ရဦးမှာဖြစ်ပါတယ်။ 

ကော်လီနာကို တွေ့ရစဉ်

၁၉၈၈ ခုနှစ်က အီတလီစီးရီး C1 မှာ ဒိုင်လူကြီးဘဝကို စတင်ခဲ့တဲ့ ကမ္ဘာကျော်ဒိုင်လူကြီးဟောင်း ကော်လီနာဟာ ဘရာဇီးလ်နဲ့ ဂျာမနီအသင်းတို့ ယှဉ်ပြိုင်ခဲ့တဲ့ ၂၀၀၂ ကမ္ဘာ့ဖလားပြိုင်ပွဲ ဗိုလ်လုပွဲကို တာဝန်ယူခဲ့တာပါ။

ကော်လီနာဟာ ၁၉၉၉ ခုနှစ်က ဘိုင်ယန်မြူးနစ်အသင်းကို ယူနိုက်တက်အသင်း အံ့အားသင့်ဖွယ် အနိုင်ယူနိုင်ခဲ့တဲ့ ချန်ပီယံလိဂ် ဗိုလ်လုပွဲကိုလည်း ကွင်းလယ်ဒိုင်လူကြီးအဖြစ် တာဝန်ယူခဲ့ပါတယ်။ 

၂၀၀၅ ခုနှစ်မှာ အနားယူခဲ့တဲ့ ကော်လီနာဟာ အီတလီဘောလုံးဒိုင်လူကြီးများ အဖွဲ့အစည်း၊ ယူကရိန်း ဘောလုံး အဖွဲ့ချုပ်နဲ့ UEFA ဒိုင်လူကြီးများကော်မတီမှာ ထိပ်တန်းရာထူးကို ရယူနိုင်ခဲ့တာဖြစ်ပါတယ်။ 

Source: Dailymail

CNI Sport Article

၂၀၂၅ ခုနှစ်၊ ဇန်နဝါရီ ၃၁

ဘရာဇီးလ်ကြယ်ပွင့် နေမာဟာ ပြီးခဲ့တဲ့ ရက်သတ္တပတ်အတွင်းမှာ ဆော်ဒီပရိုလိဂ်ကလပ် အယ်လ်ဟီလယ် အသင်းနဲ့ ချုပ်ဆိုထားတဲ့ စာချုပ်ကို နှစ်ဦးသဘောတူ ဖျက်သိမ်းပြီး ဆန်းတို့စ်အသင်းနဲ့ စာချုပ်ချုပ်ခဲ့ပါတယ်။ 

နေမာဟာ အယ်လ်ဟီလယ်အသင်းနဲ့ စာချုပ် မဖျက်သိမ်းခင်မှာကတည်းက မေဂျာလိဂ်ကလပ် အသင်းအချို့ အပါအဝင် ကလပ်အသင်းအချို့ရဲ့ ချိတ်ဆက်မှုတွေကို ခံခဲ့ရတာပါ။ 

ဒါပေမယ့် နေမာဟာ သူ့ရဲ့ပရော်ဖက်ရှင်နယ် ကစားသမားဘဝကို စတင်ခဲ့တဲ့ ဘရာဇီးလ်ကလပ် ဆန်းတို့စ် အသင်းထံ ၁၂ နှစ်နီးပါးအကြာမှ ပြန်လာဖို့ ဆုံးဖြတ်ခဲ့တာဖြစ်ပါတယ်။ 

နေမာဟာ ဆန်းတို့စ်အသင်းထံ ပြန်လာမယ်ဆိုရင် အယ်လ်ဟီလယ်အသင်းမှာ ရရှိနေတဲ့ လုပ်ခလစာထက် အများကြီး လျှော့ယူရမယ်ဆိုတာ သိပေမယ့် သူကတော့ ငယ်ဘဝကလပ်ထံ ပြန်လာဖို့ကိုသာ ရွေးချယ်ခဲ့တာပါ။ 

ပြီးခဲ့တဲ့ရာသီက ဘရာဇီးလ်စီးရီးဘီကို တန်းဆင်းခဲ့ရပြီး ဒီရာသီမှာ စီးရီးအေပြိုင်ပွဲထံ တန်းပြန်တက်နိုင်ခဲ့တဲ့ ဆန်းတို့စ်အသင်းဟာ နေမာအသင်းထံ ပြန်လာမှာဖြစ်လို့ အလွန်ပျော်ရွှင်နေကြတာ ဖြစ်ပါတယ်။

နေမာကို တွေ့ရစဉ်

နေမာဟာ လက်ရှိအချိန်မှာ ကြံ့ခိုင်မှုပိုင်း အကောင်းဆုံးပုံစံရရှိဖို့ ရုန်းကန်နေရပေမယ့် ဆန်းတို့စ်အသင်းဟာ သူ့ကို အများကြီး မျှော်လင့်နေကြတာပါ။

နေမာဟာ ကမ္ဘာ့အကောင်းဆုံး ဘောလုံးသမားတွေထဲက တစ်ဦးဖြစ်ခဲ့ပေမယ့် ပြီးခဲ့တဲ့နှစ်တွေအတွင်း သူ့ရဲ့ ဆိုးရွားတဲ့ ဒဏ်ရာမှတ်တမ်းတွေကြောင့် ကစားသမားဘဝကို ထိခိုက်မှုရှိခဲ့တာ ဖြစ်ပါတယ်။

နေမာဟာ အယ်လ်ဟီလယ်အသင်းမှာ ကစားခဲ့တဲ့ ၁ နှစ်ခွဲအတွင်း ပြိုင်ပွဲစုံ ၇ ပွဲသာ ပါဝင်ကစားနိုင်ခဲ့တာကို ကြည့်ရင် သူ့ရဲ့ဒဏ်ရာ အခြေအနေကို သိနိုင်တာပါ။ 

အဲဒါကြောင့်လည်း အယ်လ်ဟီလယ်အသင်းက နေမာဟာ ထိပ်တန်းအဆင့်မှာ ကစားမနိုင်တော့ဘူးလို့ ယူဆပြီး စာချုပ်ဖျက်သိမ်းခဲ့တာ ဖြစ်ပါတယ်။ 

နေမာဟာ ဒဏ်ရာကင်းပြီး ကြံ့ခိုင်မှုပြည့်ဝနေမယ်ဆိုရင် ပြိုင်ဘက် ကစားသမားတွေအတွက် ကြောက်စရာ အကောင်းဆုံး ကစားသမားအဖြစ်ရှိနေပြီး ဆန်းတို့စ်အသင်းဟာ ဒီလိုအနေအထားဖြစ်အောင် နေမာကို အကောင်းဆုံး ကိုင်တွယ်နိုင်ဖို့ လိုအပ်နေတာပါ။ 

နေမာအတွက် ဆန်းတို့စ်အသင်းထံ ပြန်လာတာဟာ သူ့ရဲ့ကစားသမားဘဝကို ပြန်လည်တည်ဆောက်ဖို့နဲ့ ၂၀၂၆ ကမ္ဘာ့ဖလားပြိုင်ပွဲမှာ ဘရာဇီးလ်အသင်း လူစာရင်းထဲ နေရာတစ်နေရာရဖို့ ရည်မှန်းချက်တွေရှိနေတာ ဖြစ်ပါ တယ်။ 

နေမာဟာ အသက် ၃၂ နှစ်အရွယ်သာ ရှိသေးတာကြောင့် သူဟာ ထိပ်တန်းအဆင့်မှာ ကစားနိုင်စွမ်း ရှိသေးတယ် ဆိုတာကို ဆန်းတို့စ်အသင်းမှာ သက်သေပြသနိုင်ဖို့ ကြိုးစားသွားဖို့ရှိနေတာပါ။ 

နေမာနဲ့ပီလီကို တွေ့ရစဉ်

ဆန်းတို့စ်အသင်းမှာ နေမာအနေနဲ့ ပထမအကြိမ် ကစားခဲ့တုန်းက ကိုပါလီဘာတေးဒိုးစ်ဆုဖလား အပါအဝင် ဆုဖလား အောင်မြင်မှုအချို့ ရယူပေးနိုင်ခဲ့ပြီး ဥရောပထိပ်သီး အများအပြားရဲ့ စောင့်ကြည့်ခြင်းကို ခံခဲ့ရကာ ဘောလွန်းဒီအော ဆန်ခါတင် စာရင်းထဲကိုလည်း ဝင်ရောက်ခဲ့တာ ဖြစ်ပါတယ်။ 

နေမာ ပြန်လာတာဟာ သူ့အတွက်ရော၊ ဆန်းတို့စ်အသင်းအတွက်ရော၊ ဘရာဇီးလ်လိဂ်အတွက်ရော အများကြီး သက်ရောက်မှုတွေ ရှိမယ်ဆိုတာ သေချာနေတာပါ။ 

ကွယ်လွန်သွားပြီဖြစ်တဲ့ ဘရာဇီးလ်ဂန္ထဝင်ကြီး ပီလီနဲ့ နေမာတို့လို ကစားသမားတွေကို ကမ္ဘာ့စင်မြင့်ပေါ် တင်ပေးခဲ့ တဲ့ ဆန်းတို့စ်အသင်းဟာ ပြီးခဲ့တဲ့နှစ်တွေအတွင်းမှာ ရုန်းကန်ခဲ့ရပြီး မနှစ်က ရာသီကဆိုရင် တန်းပါဆင်းခဲ့တဲ့အထိ ဖြစ်ခဲ့ရပါတယ်။ 

ဘရာဇီးလ်စီးရီးအေပြိုင်ပွဲမှာ ချန်ပီယံဆုကို ၈ ကြိမ်အထိရရှိခဲ့တဲ့ ဆန်းတို့စ်အသင်းဟာ ၂၀၀၄ ခုနှစ်နောက်ပိုင်း ဒီဆုဖလားနဲ့ ဝေးကွာခဲ့သလို အဓိကပြိုင်ပွဲကြီးတွေမှာလည်း အောင်မြင်မှုတွေနဲ့ ဝေးကွာနေခဲ့တာပါ။ 

အဲဒါကြောင့် ဆန်းတို့စ်အသင်းဟာ နေမာ အသင်းထံ ပြန်လာမှုနဲ့အတူ အဓိကဆုဖလားတွေကို ပြန်ရယူနိုင်ဖို့ မျှော်လင့်နေတာဖြစ်ပါတယ်။

နေမာအနေနဲ့ ဆန်းတို့စ်အသင်းရဲ့ ဒုတိယအကြိမ် ကစားသမားဘဝမှာ ဘယ်လောက်ကြာကြာ ကစားမလဲဆိုတာ မသိပေမယ့် ပထမအကြိမ် ကစားခဲ့သလို အောင်မြင်မှုတွေ ရယူပေးနိုင်ဖို့ မျှော်လင့်နေတာပါ။ 

အဲဒါကြောင့် ၁၂ နှစ်နီးပါးအကြာမှ ဆန်းတို့စ်အသင်းထံ ပြန်လာခဲ့တဲ့ နေမာအနေနဲ့ ငယ်ဘဝကလပ်ကို အောင်မြင်မှုတွေ ရယူပေးနိုင်မလားဆိုတာ စောင့်ကြည့်ရတော့မှာဖြစ်ပါတယ်။ 

CNI Sport Article 

၂၀၂၅ ခုနှစ်၊ ဇန်နဝါရီ ၁၀

နော်တင်ဟမ်ဖောရက်စ်အသင်းဟာ ဒီရာသီ ပရီးမီးယားလိဂ်ပြိုင်ပွဲမှာ မထင်မှတ်ထားလောက်အောင် ရလဒ် ကောင်းတွေ ရရှိထားပြီး ထိပ်ဆုံးနေရာက ဦးဆောင်နေတဲ့ လီဗာပူးလ်အသင်းထက် ၁ ပွဲပို ကစားကာ ရမှတ် ၆ မှတ်လျော့နဲ့ အမှတ်ပေးဇယားအဆင့် ၃ နေရာမှာ ရပ်တည်နေတာ ဖြစ်ပါတယ်။ 

နော်တင်ဟမ်ဖောရက်စ်အသင်းဟာ အဆင့် ၂ နေရာက အာဆင်နယ်အသင်းနဲ့ ရမှတ်တူညီနေပြီး ဂိုးကွာခြားချက် ကြောင့် အဆင့် ၃ နေရာမှာ ရပ်တည်နေတာပါ။ 

နော်တင်ဟမ်ဖောရက်စ်အသင်းဟာ ပြီးခဲ့တဲ့ရာသီက ပရီးမီးယားလိဂ် ပြိုင်ပွဲမှာ အဆင့် ၁၇ နေရာ ရပ်တည်ကာ တန်းဆင်းမယ့် အခြေအနေကနေ လွတ်မြောက်ခဲ့ပေမယ့် ဒီရာသီမှာတော့ ထိပ်ဆုံး ၃ သင်းထဲကို ဝင်ရောက်လာ ခဲ့တာ ဖြစ်ပါတယ်။ 

နော်တင်ဟမ်ဖောရက်စ်နဲ့ လီဗာပူးလ်အသင်း ယှဉ်ပြိုင်နေစဉ်

နော်တင်ဟမ်ဖောရက်စ်အသင်းဟာ နောက်ဆုံးကစားခဲ့တဲ့ ပရီးမီးယားလိဂ်ပွဲစဉ်မှာ ဝုလ်ဗ်စ်အသင်းကို အဝေးကွင်း မှာ ၃ ဂိုး-ဂိုးမရှိနဲ့ အနိုင်ရခဲ့ပြီးနောက် အမှတ်ပေးပြိုင်ပွဲမှာ ၆ ပွဲဆက်တိုက် နိုင်ပွဲရရှိခဲ့တာပါ။ 

နော်တင်ဟမ်ဖောရက်စ်အသင်းရဲ့ ဒီနိုင်ပွဲတွေမှာ ယူနိုက်တက်၊ ဗီလာ၊ စပါး၊ အိမ်ကွင်း မာကျောတဲ့ ဘရန်ဖို့ဒ်၊ အဲဗာတန်နဲ့ ဝုလ်ဗ်စ်အသင်းတို့ ပါဝင်ခဲ့တာဖြစ်ပါတယ်။

နော်တင်ဟမ်ဖောရက်စ်အသင်းရဲ့လက်ရှိပုံစံတွေကြောင့် သူတို့ဟာ ၂၀၁၅-၁၆ ရာသီက ဘယ်သူမှ မထင်မှတ်ထား ဘဲ ပရီးမီးယားလိဂ်ဖလားကို ရယူနိုင်ခဲ့တဲ့ လက်စတာအသင်းလို ဖြစ်နိုင်မလားဆိုပြီး ထင်ကြေးပေးမှုတွေလည်း ထွက်ပေါ်လာခဲ့တာပါ။ 

နော်တင်ဟမ်ဖောရက်စ်အသင်းဟာ ဒီရာသီ ပရီးမီးယားလိဂ် ပြိုင်ပွဲမှာ လီဗာပူးလ်အသင်းကို အနိုင်ယူထားတဲ့ တစ်သင်းတည်းသော အသင်းဖြစ်ပြီး လာမယ့်တွေ့ဆုံမှုမှာ ထပ်ပြီး အနိုင်ရခဲ့မယ်ဆိုရင် ချန်ပီယံဆုအတွက် ပြိုင်ဆိုင်မှုမှာ ပါဝင်လာမယ်လို့ လီဗာပူးလ်အသင်းဂန္ထဝင် ကာရေဂါက ပြောခဲ့ပါတယ်။ 

လက်စတာအသင်းနဲ့ နော်တင်ဟမ်ဖောရက်စ်ကို နှိုင်းယှဉ်ပြထားစဉ်

နော်တင်ဟမ်ဖောရက်စ်အသင်းဟာ ပရီးမီးယားလိဂ်ပွဲစဉ် ၂၀ ကစားအပြီးမှာ ရမှတ် ၄၀ ရရှိထားမှုက ၂၀၁၅-၁၆ ရာသီက ပရီးမီးယားလိဂ်ပွဲစဉ် ၂၀ ကစားအပြီး ရမှတ် ၄၀ ရရှိခဲ့တဲ့ လက်စတာအသင်းနဲ့ တူညီနေခဲ့တာဖြစ်ပါတယ်။ 

လက်စတာအသင်းဟာ ပွဲစဉ် ၂၀ ကစားအပြီးမှာ အဆင့် ၂ နေရာ ရပ်တည်ခဲ့ပေမယ့် ရာသီကုန်ချိန်မှာ အာဆင်နယ် အသင်းကို ၁၀ မှတ် အသာရကာ ချန်ပီယံဆုကို ကိုင်မြှောက်နိုင်ခဲ့တာပါ။ 

နော်တင်ဟမ်ဖောရက်စ်အသင်းဟာ လက်ရှိအချိန်မှာ အဆင့် ၃ နေရာ ရပ်တည်နေပေမယ့် အဆင့် ၂ နေရာက အာဆင်နယ်အသင်းနဲ့ ရမှတ်တူနေတဲ့အတွက် လက်စတာအသင်းလို ရာသီကုန်ချိန်မှာ ဆုဖလားရယူနိုင်မလား ဆိုတာ စောင့်ကြည့်ရမှာဖြစ်ပါတယ်။ 

နော်တင်ဟမ်ဖောရက်စ်အသင်းသားတွေကို တွေ့ရစဉ်

ဒါပေမယ့် ပရီးမီးယားလိဂ်ဖလားကို နော်တင်ဟမ်ဖောရက်စ်အသင်း ရယူနိုင်ဖို့က ဖြစ်နိုင်ခြေနည်းတယ်လို့ သုံးသပ် နေကြပေမယ့် ဘောလုံးမှာ ဘယ်အရာမှ ကြိုပြီးတော့ ပြောလို့မရပါဘူး။ 

အဲဒါကြောင့် နော်တင်ဟမ်ဖောရက်စ် အသင်းအနေနဲ့ သူတို့ရဲ့ခြေစွမ်းနဲ့ ရလဒ်တွေကို ပုံမှန်အတိုင်း ထိန်းနိုင်မယ် ဆိုရင် မျှော်လင့်ချက် အများအပြားကို ဆက်ထိန်းသိမ်းနိုင်မှာ ဖြစ်ပါတယ်။ 

နော်တင်ဟမ်ဖောရက်စ်အသင်းဟာ ပရီးမီးယားလိဂ် ဆုဖလားကို စိန်မခေါ်နိုင်ရင်တောင် လက်ရှိပုံစံအတိုင်းဆိုရင် ၁၉၉၅-၉၆ နောက်ပိုင်း ပထမဆုံးအကြိမ် ဥရောပဘောလုံးပြိုင်ပွဲကို ဝင်ရောက်ယှဉ်ပြိုင်နိုင်ဖို့ ရှိနေပါတယ်။

နော်တင်ဟမ်ဖောရက်စ်အသင်းဟာ လာမယ့် ပရီးမီးယားလိဂ်ပွဲစဉ် ၅ ပွဲအဖြစ် လီဗာပူးလ်၊ ဆောက်သမ်တန်၊ ဘုန်းမောက်၊ ဘရိုက်တန်၊ ဖူလ်ဟမ်အသင်းတို့နဲ့ ယှဉ်ပြိုင်ရမှာပါ။ 

လီဗာပူးလ်အသင်းနဲ့ ယှဉ်ပြိုင်ရမယ့်ပွဲစဉ်က နော်တင်ဟမ်ဖောရက်စ် အသင်းအတွက် ကြီးမားတဲ့ စမ်းသပ်မှုဖြစ်ပြီး ဒါကို ကျော်ဖြတ်နိုင်ရင် သူတို့ဟာ လက်စတာအသင်းလိုမျိုး လုပ်ပြနိုင်မယ့် ယုံကြည်မှုတွေ ပိုပြီးတိုးလာမှာလည်း ဖြစ်ပါတယ်။ 

CNI Sport News

၂၀၂၅ ခုနှစ်၊ ဇန်နဝါရီ ၇

အေစီမီလန်အသင်းဟာ ၂၀၂၄ ခုနှစ် အီတလီစူပါဖလား ဗိုလ်လုပွဲမှာ အင်တာမီလန်အသင်းကို ၃ ဂိုး-၂ ဂိုးနဲ့ အနိုင်ရပြီး ချန်ပီယံဆုကို ၈ ကြိမ်မြောက် ရရှိသွားခဲ့ပါတယ်။ 

အေစီမီလန်အသင်းဟာ ဒီပွဲမှာ အင်တာမီလန်အသင်းရဲ့ ၂ ဂိုးသွင်း ဦးဆောင်ခြင်းကို ခံခဲ့ရပေမယ့် အနောက်ကနေ လိုက်ကာ ချေပဂိုးတွေနဲ့ အနိုင်ဂိုးတွေ သွင်းယူနိုင်ခဲ့တာပါ။ 

အင်တာမီလန်အသင်းအတွက် ဂိုးတွေကို လောတရို မာတီနက်ဇ်နဲ့ တာရီမီတို့က သွင်းယူခဲ့ပြီး အေစီမီလန်အသင်း အတွက် ဂိုးတွေကို သီယိုဟာနန်ဒက်ဇ်၊ ပူလီဆစ်နဲ့ အေဘရာဟမ်တို့က သွင်းယူခဲ့တာဖြစ်ပါတယ်။ 

အဲဒါကြောင့် အေစီမီလန်အသင်းဟာ အီတလီစူပါဖလား ချန်ပီယံဆုကို ကိုင်မြှောက်နိုင်ခဲ့တာပါ။ 

ပြီးခဲ့တဲ့ရက်ပိုင်းကမှ အေစီမီလန်အသင်း နည်းပြသစ်အဖြစ် ခန့်အပ်ခြင်းခံခဲ့ရတဲ့ ကွန်ဆီကာအိုဟာ အသင်းကို ၂ ပွဲ ကိုင်တွယ်အပြီးမှာ ဆုဖလားတစ်လုံး ရယူပေးနိုင်ခဲ့တာ ဖြစ်ပါတယ်။ 

အင်တာမီလန်နဲ့အေစီမီလန်ယှဉ်ပြိုင်နေစဉ်

ကွန်ဆီကာအိုက အေစီမီလန်အသင်းဟာ ကြီးမားတဲ့ စရိုက်လက္ခဏာတွေကို ပြသခဲ့ပြီး အသင်းကြီး ၂ သင်းကို အနိုင်ရရှိခဲ့တယ်လို့ ပြောခဲ့တာပါ။

ကွန်ဆီကာအိုက “ဒါက မလွယ်ကူတာကြောင့် ကစားသမားတွေအတွက် ကျနော်ပျော်ရွှင်ပါတယ်။ ကျနော့် အတွက်လည်း အရေးကြီးတဲ့ အသေးစိတ် အချက်အလက်တွေကို လုပ်ဆောင်ဖို့ အချိန်အနည်းပဲ ရှိခဲ့ပါတယ်။ ကျနော်တို့ဟာ လုပ်စရာအလုပ်တွေ အများကြီးရှိသေးပေမယ့် နှိမ့်ချမှုနဲ့အတူ ချန်ပီယံလိဂ်နဲ့ လိဂ်မှာ အကောင်းဆုံး လုပ်ဆောင်နိုင်မှာပါ”လို့ ပြောခဲ့ပါတယ်။

အီတလီစူပါဖလားကို အေစီမီလန်အသင်း ရယူခဲ့ပြီးနောက် အဝတ်လဲခန်းထဲမှာ နည်းပြ ကွန်ဆီကာအိုဟာ ဆေးပြင်းလိပ်သောက်ပြီး ကခုန်အောင်ပွဲခံခဲ့တာပါ။ 

အေစီမီလန်အသင်းဟာ ဒီရာသီ စီးရီးအေပြိုင်ပွဲမှာ ၁၇ ပွဲ ကစားအပြီး ရမှတ် ၂၇ မှတ်နဲ့ အမှတ်ပေးဇယား အဆင့် ၈ နေရာမှာ ရပ်တည်နေပါတယ်။ 

ကွန်ဆီကာအိုဟာ အေစီမီလန်အသင်း နည်းပြဘဝ ပထမဆုံး စီးရီးအေပွဲစဉ်အဖြစ် ကာဂလီယာရီအသင်းနဲ့ ယှဉ်ပြိုင်မယ့်ပွဲစဉ်ကို စတင်ကိုင်တွယ်ရမှာ ဖြစ်ပါတယ်။ 

Source: ESPN

CNI Sport Article

၂၀၂၅ ခုနှစ်၊ ဇန်နဝါရီ ၃

ဒီရက်ပိုင်း ယူနိုက်တက်အသင်းနဲ့ ပတ်သက်တဲ့ သတင်းတိုင်းမှာ တန်းဆင်းဇုန်ဆိုတဲ့ အကြောင်းအရာဟာ မပါမဖြစ် ပါဝင်နေတာကို မြင်တွေ့နေရတာ ဖြစ်ပါတယ်။ 

လွန်ခဲ့တဲ့ ဆယ်စုနှစ် တစ်ခုတုန်းက ပရီးမီးယားလိဂ်မှာ ချန်ပီယံဆုအတွက် ယှဉ်ပြိုင်နေရတဲ့ ယူနိုက်တက် အသင်းရဲ့ လက်ရှိအနေအထားဟာ တန်းဆင်းဇုန်ထဲ မကျရောက်အောင် ရုန်းကန်နေရတဲ့ အနေအထားမျိုးကို ရောက်ရှိလာတယ်ဆိုတာ လက်သင့်ခံရမယ့် အခြေအနေပါ။ 

ယူနိုက်တက်အသင်းဟာ နောက်ဆုံးကစားခဲ့တဲ့ ပရီးမီးယားလိဂ်ပွဲစဉ်မှာ နယူးကာဆယ်အသင်းကို အရေးနိမ့် ပြီးနောက် တန်းဆင်းဇုန်ထဲမှာရှိနေတဲ့ အသင်းတွေနဲ့ အမှတ်ကွာဟမှုက အများကြီးမရှိတော့တာ ဖြစ်ပါတယ်။ 

ဒါကြောင့် နည်းပြအာမိုရင်က ယူနိုက်တက်အသင်းဟာ တန်းဆင်းဇုန်ထဲ ကျရောက်နိုင်မယ့် အန္တရာယ်မှာ ရှိနေတယ်လို့ ဝန်ခံခဲ့တာပါ။ ယူနိုက်တက်အသင်း ထိပ်တန်းလိဂ်ပြိုင်ပွဲကနေ နောက်ဆုံး တန်းဆင်းခဲ့တာက လွန်ခဲ့တဲ့အနှစ် ၅၀ က ဖြစ်တဲ့ ၁၉၇၃-၇၄ ရာသီအကုန်မှာဖြစ်ပါတယ်။

ယူနိုက်တက်အသင်းဟာ ပရီးမီးယားလိဂ် အမည်နဲ့ စတင်ကျင်းပခဲ့တဲ့ ၁၉၉၂ ခုနှစ်ကတည်းကနေ အခုအချိန်ထိ တန်းမဆင်းရသေးတဲ့ ၆ သင်းထဲက ၁ သင်းဖြစ်ပေမယ့် အခုအချိန်မှာတော့ ချန်ပီယံရှစ်ပြိုင်ပွဲထံ တန်းဆင်းရမယ့် အလားအလာတွေ ရှိလာနေတာပါ။

ယူနိုက်တက်အသင်းကို တွေ့ရစဉ်

ယူနိုက်တက်အသင်းဟာ နောက်ဆုံးကစားခဲ့တဲ့ ပရီးမီးယားလိဂ် ၆ ပွဲမှာ ၅ ပွဲအထိ အရေးနိမ့်ကာ အဆိုးရွားဆုံး ပုံစံပြသနေပြီး နည်းပြအာမိုရင်လည်း အသင်းရဲ့ အခြေအနေကိုကြည့်ပြီး စိတ်ပျက်လက်ပျက် ဖြစ်နေခဲ့တာ ဖြစ်ပါတယ်။ 

ယူနိုက်တက်အသင်းဟာ နည်းပြအာမိုရင် လက်ထက် ပရီးမီးယားလိဂ် ၈ ပွဲမှာ ၅ ပွဲအထိ အရေးနိမ့်ခဲ့ပြီး ၂ ပွဲနိုင်၊ ၁ ပွဲ သရေကျကာ ရရှိနိုင်မယ့်ရမှတ် ၂၄ မှတ်ထဲက ၇ မှတ်သာ ရယူနိုင်ခဲ့တာပါ။ 

ယူနိုက်တက်အသင်းရဲ့ ဒီနောက်ပိုင်းကိန်း ဂဏန်းတွေဟာ အသင်းပရိသတ်တွေအတွက် ကျေနပ်စရာတစ်ခုမှ မရှိခဲ့ပါဘူး။ 

ယူနိုက်တက်အသင်းကို တွေ့ရစဉ်

ယူနိုက်တက်အသင်းဟာ လွန်ခဲ့တဲ့ နှစ်ပေါင်းများစွာက စံချိန်မှတ်တမ်းဆိုးတွေကို ပြန်ပြီးရယူနေခဲ့တာဖြစ်ပါတယ်။ 

ယူနိုက်တက်အသင်းကို အင်္ကျီစပွန်ဆာပေးတဲ့ Adidas ဆိုရင် အသင်းတန်းဆင်းခဲ့ရင် သူတို့နဲ့ ချုပ်ဆိုထားတဲ့ စာချုပ်ကို ရပ်တန့်ဖို့အထိ စဉ်းစားနေတယ်လို့တောင် သတင်းတွေ ထွက်နေခဲ့တာပါ။ 

ဒီရာသီ ပရီးမီးယားလိဂ်ပွဲစဉ် ၁၉ ပွဲပဲ ကစားထားရသေးပြီး နောက်ထပ်ပွဲစဉ် ၁၉ ပွဲ ကျန်ရှိနေသေးတာကြောင့် အချက်အလက်တွေ တွက်ချက်တဲ့ Opta ကတော့ ယူနိုက်တက်အသင်း တန်းဆင်းဖို့ ရာခိုင်နှုန်း အလွန်နည်း တယ်လို့ ဖော်ပြထားတာဖြစ်ပါတယ်။

ယူနိုက်တက်အသင်းအနေနဲ့ ပုံမှန်ခြေစွမ်းပြန်ပြပြီး နိုင်ပွဲတွေ ရယူနိုင်မယ်ဆိုရင် တန်းဆင်းဇုန်နဲ့ ပတ်သက်တဲ့ သတင်းတွေဟာ ရပ်တန့်သွားနိုင်တာပါ။ 

ယူနိုက်တက်အသင်းကို တွေ့ရစဉ်

ယူနိုက်တက်အသင်းဟာ လက်ရှိအချိန်မှာ နိုင်ပွဲတွေ ပြန်လည်ရယူနိုင်ဖို့ဆိုရင် သူတို့ရဲ့ယုံကြည်မှုကို အမြင့်ဆုံး ပြန်လည်ရောက်ရှိအောင် လုပ်ဆောင်ဖို့ လိုအပ်နေတာဖြစ်ပါတယ်။ 

ဒီလိုမှမလုပ်နိုင်ရင် နည်းပြအာမိုရင် အတွက်လည်း ယူနိုက်တက်အသင်းရဲ့ ရလဒ်တွေကို ပြန်လည်ကောင်း မွန်အောင် လုပ်ဆောင်ပေးနိုင်ဖို့ ခက်ခဲနေဦးမှာပါ။ 

နည်းပြအာမိုရင်ဟာ လက်ရှိအချိန်မှာ အသင်းကို ပြန်လည် တည်ဆောက်နေတဲ့အတွက် ယူနိုက်တက်အသင်းရော ပရိသတ်တွေကပါ သူ့ကို စိတ်ရှည်ပြီး စောင့်ကြည့်ရဦးမှာဖြစ်ပါတယ်။

ဒါပေမယ့် ယူနိုက်တက်အသင်းဟာ တန်းဆင်းဇုန်နဲ့ ဝေးကွာအောင် လုပ်ရဦးမှာဖြစ်တဲ့အတွက် ရမှတ်တွေကို ရသလောက်စု ဆောင်းရဦးမှာပါ။ 

နှစ်အဟောင်းကို စိတ်ပျက်စရာတွေနဲ့ အဆုံးသတ်ခဲ့ရတဲ့ ယူနိုက်တက်အသင်းအတွက် နှစ်အသစ်မှာ ဆီးကြိုနေ တဲ့ပွဲက လီဗာပူးလ်အသင်းနဲ့ ဖြစ်နေလို့ နောက်ထပ် ခက်ခဲတဲ့ပွဲစဉ်တစ်ပွဲကို ထပ်ပြီး ဖြတ်သန်းရဦးမှာပဲ ဖြစ်ပါတယ်။

CNI Sport Article

၂၀၂၄ ခုနှစ်၊ ဒီဇင်ဘာ ၂၇

မကြာခင် ရက်ပိုင်းအတွင်းမှာ အဆုံးသတ်တော့မယ့် ၂၀၂၄ ခုနှစ်အတွင်းမှာ မြန်မာအသင်းရဲ့ မျှော်မှန်းချက်တွေ ဟာ ထင်သလိုမဖြစ်ခဲ့ဘဲ ဝေးကွာခဲ့တာဖြစ်ပါတယ်။

မြန်မာအသင်းဟာ ၂၀၂၄ ခုနှစ်ထဲမှာ ပွဲပေါင်း ၁၂ ပွဲ ကစားခဲ့ပြီး နိုင်ပွဲ ၂ ပွဲသာရရှိကာ သရေ ၃ ပွဲနဲ့ ရှုံးပွဲ ၇ ပွဲအထိ ကြုံတွေ့ခဲ့ရတာပါ။ 

မြန်မာအသင်း အနိုင်ရရှိခဲ့တဲ့ ၂ ပွဲကတော့ သီရိလင်္ကာနဲ့ လာအိုအသင်းတို့ ပွဲစဉ်တွေဖြစ်ပြီး ဒီအသင်းတွေဟာ သူတို့ထက် ကမ္ဘာ့အဆင့် သတ်မှတ်ချက် နိမ့်တဲ့အသင်းတွေ ဖြစ်ပါတယ်။

မြန်မာအသင်းဟာ ဒီ ၂ ပွဲစလုံးကို အိမ်ကွင်းဖြစ်တဲ့ သုဝဏ္ဏကွင်းထဲမှာ အနိုင်ရလဒ် ရယူနိုင်ခဲ့တာဖြစ်ပြီး အဝေးကွင်းမှာဆိုရင် နိုင်ပွဲရယူနိုင်ပါ့မလားတောင် ထင်ချင်စရာဖြစ်ခဲ့တာပါ။ 

မြန်မာအသင်းဟာ ၂၀၂၄ ခုနှစ်ထဲမှာ ဆီးရီးယား၊ ဂျပန်နဲ့ ဗီယက်နမ်အသင်းတို့ကို ဂိုးပြတ်၊ ခြေပြတ် အရေးနိမ့်ခဲ့ တာ ဖြစ်ပါတယ်။ 

မြန်မာအသင်းကို တွေ့ရစဉ်

မြန်မာအသင်းဟာ ဒီနှစ်ထဲမှာ နည်းပြ အပြောင်းအလဲ ပြုလုပ်ခဲ့ပြီး ဂျာမန်လူမျိုးနည်းပြ မိုက်ကယ်ရဲ့ နေရာမှာ တိုက်စစ်မှူးဟောင်းဖြစ်တဲ့ ဦးမျိုးလှိုင်ဝင်းကို နည်းပြသစ်အဖြစ် ခန့်အပ်ခဲ့တာပါ။

ဦးမျိုးလှိုင်ဝင်းဟာ မြန်မာအသင်းကို အာဆီယံချန်ပီယံရှစ်ပြိုင်ပွဲ အုပ်စုပွဲစဉ် ၄ ပွဲနဲ့ ခြေစမ်းပွဲ ၄ ပွဲ ကိုင်တွယ်ခဲ့ပြီး ၂ ပွဲနိုင်၊ ၂ ပွဲသရေ၊ ၄ ပွဲ ရှုံးရလဒ် ထွက်ပေါ်ခဲ့ပါတယ်။ ၂၀၂၄ ခုနှစ်ထဲမှာ မြန်မာအသင်း ရရှိခဲ့တဲ့ နိုင်ပွဲ ၂ ပွဲဟာ နည်းပြ ဦးမျိုးလှိုင်ဝင်းရဲ့ လက်ထက်မှာ ရရှိခဲ့တာပါ။ 

ဒါပေမယ့် ဦးမျိုးလှိုင်ဝင်းဟာ မြန်မာအသင်းရဲ့အဓိက ပစ်မှတ်ဖြစ်တဲ့ အာဆီယံချန်ပီယံရှစ်ပြိုင်ပွဲမှာ နောက်တဆင့် တက်နိုင်အောင် ကိုင်တွယ်ပေးနိုင်ခဲ့ခြင်း မရှိသလို အသင်းဟာ ပွဲတိုင်းရုန်းကန်ခဲ့ရပါတယ်။ 

မြန်မာအသင်းဟာ အမြဲတမ်းနီးပါး နိုင်နေကျဖြစ်တဲ့ လာအိုအသင်းနဲ့ပွဲစဉ်မှာ နိုင်ပွဲရယူနိုင်ဖို့ အသည်းအသန် ကစားခဲ့ရပြီး မိနစ် ၉၀ ပြည့်ပြီး နာကျင်အချိန်ပိုမှာ သွင်းယူတဲ့ ဂိုးတွေကြောင့်သာ အာဆီယံချန်ပီယံရှစ်ပြိုင်ပွဲမှာ နိုင်ပွဲရယူနိုင်ခဲ့တာပါ။ 

 မြန်မာအသင်းနည်းပြ ဦးမျိုးလှိုင်ဝင်းကို တွေ့ရစဉ်

ဗီယက်နမ်အသင်းကို ဂိုးပြတ် အရေးနိမ့်တဲ့ပွဲမှာတော့ မြန်မာအသင်းရဲ့ ဘောလုံးအဆင့်အတန်းဟာ အာဆီယံ ထိပ်သီးအသင်းတွေရဲ့ အနောက်မှာ အများကြီး ပြတ်ကျန်ခဲ့ပြီလို့ ပြောရမှာဖြစ်ပါတယ်။ 

လာအို၊ တီမောတို့ရဲ့ ဘောလုံး အဆင့်အတန်းတွေဟာ တိုးတက်လာချိန်မှာ မြန်မာအသင်း အနေနဲ့ အခုထက်ပိုပြီး တိုးတက်အောင် မလုပ်နိုင်ရင် အာဆီယံဒေသတွင်းထဲမှာ အဆင့်ရပ်တည်မှုတွေ ထပ်ပြီး ကျဆင်းသွားနိုင်တာပါ။ 

၂၀၂၄ ခုနှစ်ကို ရလဒ်ဆိုးတွေနဲ့ အဆုံးသတ်ခဲ့တဲ့ မြန်မာအသင်းကို ၂၀၂၅ ခုနှစ်ထဲမှာ အာရှဖလားခြေစစ်ပွဲက ဆီးကြိုနေတာ ဖြစ်ပါတယ်။ 

မြန်မာအသင်းကို တွေ့ရစဉ်

၂၀၂၇ အာရှဖလား ခြေစစ်ပွဲအဖြစ် မြန်မာအသင်းဟာ ဆီးရီးယား၊ အာဖဂန်နစ္စတန်၊ ပါကစ္စတန်တို့နဲ့ တစ်အုပ်စု တည်း ကျရောက်နေတာပါ။ အိမ်ကွင်း၊ အဝေးကွင်း ကစားရမယ့် ဒီခြေစစ်ပွဲမှာ ထိပ်ဆုံးတစ်သင်းတည်းသာ အာရှဖလားပြိုင်ပွဲကို ဝင်ရောက်ယှဉ်ပြိုင်ခွင့် ရရှိမှာဖြစ်ပါတယ်။ 

မြန်မာအသင်းအနေနဲ့ နှစ်ပေါင်း ၆၀ နီးပါး ဝေးကွာနေတဲ့ အာရှဖလားပြိုင်ပွဲကို ဝင်ရောက်ယှဉ်ပြိုင်ခွင့် ရရှိချင်တယ်ဆိုရင် အသင်းကို ပြောင်းလဲမှုတွေ အများကြီးလုပ်ဖို့ လိုအပ်နေပါတယ်။

ဒီလိုမှ မဟုတ်ရင်တော့ ပရိသတ်တွေဟာ မြန်မာအသင်းရဲ့ ရလဒ်တွေကို အမြဲတမ်း စိတ်ပျက်နေရဦးမှာပဲ ဖြစ်ပါတယ်။

CNI Sport Article 

၂၀၂၄ ခုနှစ်၊ ဒီဇင်ဘာ ၁၃

ချယ်လ်ဆီးအသင်းဟာ နောက်ဆုံးကစားခဲ့တဲ့ ပရီးမီးယားလိဂ် ပွဲစဉ်မှာ စပါးအသင်းကို ၂ ဂိုးပြတ် အရှုံးကနေ အနိုင်ရအောင် ကစားနိုင်ခဲ့ပြီးနောက် ချန်ပီယံဆုအတွက် ပြေးလမ်းကြောင်းထဲ ဝင်ရောက်လာပြီလို့ ပြောလို့ရတဲ့ အနေအထားကို ရောက်ရှိလာခဲ့ပါတယ်။ 

ချယ်လ်ဆီးအသင်းဟာ ထိပ်ဆုံးနေရာက လီဗာပူးလ်အသင်းနဲ့ အမှတ်ကွာဟချက်ရှိပေမယ့် နောက်ဆုံးကစားခဲ့တဲ့ ပရီးမီးယားလိဂ် ၄ ပွဲစလုံး အနိုင်ရပြီး အနီးကပ် ဖိအားပေးနေတာပါ။ 

ချယ်လ်ဆီးအသင်းနည်းပြ မာရက်စ်ကာကတော့ အသင်းဟာ ချန်ပီယံဆုအတွက် ပြိုင်ဆိုင်ဖို့ အဆင်သင့် မဖြစ် သေးဘူးလို့ အကြိမ်ကြိမ် ပြောနေတာ ဖြစ်ပါတယ်။ 

ဒါပေမယ့် ချယ်လ်ဆီးအသင်းရဲ့ လက်ရှိအနေအထားနဲ့ သူတို့ရဲ့ လူစာရင်းစုဖွဲ့မှုက ချန်ပီယံဆုအတွက် ပြိုင်ဆိုင်ဖို့ အဆင်သင့် ဖြစ်နေပြီလို့တောင် ပြောရမှာပါ။ 

နည်းပြ မာရက်စ်ကာက အသင်းကို ဖိအားမပေးဘဲ တစ်ပွဲချင်းစီ ရလဒ်ကောင်းတွေ ရယူဖို့သာ အာရုံစိုက်နေတာ ဖြစ်ပါတယ်။

ချယ်လ်ဆီးအသင်း ရလဒ်တွေ ကောင်းမွန်နေမှုက လူစာရင်းထဲမှာ ကစားသမား အများအပြား ရှိနေတာက အားသာချက်တစ်ခုလို ဖြစ်သွားတာပါ။

နည်းပြ မာရက်စ်ကာကို တွေ့ရစဉ်

ချယ်လ်ဆီးအသင်းရဲ့ ကစားသမား များပြားမှုကြောင့် လေ့ကျင့်ရေးကွင်းနဲ့ အဝတ်လဲခန်းတွေမှာ နေရာလွတ် မရှိအောင် လူပြည့်နေတယ်ဆိုပြီး အစပိုင်းတုန်းက နောက်ပြောင်မှုတွေ အများကြီးရှိခဲ့ကြတာ ဖြစ်ပါတယ်။ 

နည်းပြ မာရက်စ်ကာဟာ လူစာရင်းထဲက အချို့ကို လျှော့ချခဲ့ပြီး ကျန်ရှိနေတဲ့ ကစားသမား အများအပြားနဲ့ ရှေ့ဆက်ခဲ့တာပါ။ 

ချယ်လ်ဆီးအသင်း နည်းပြ မာရက်စ်ကာဟာ ကစားသမား အများအပြားရှိတဲ့ လူစာရင်းကို ပြိုင်ပွဲတွေမှာ ခွဲပြီး အသုံးပြုသွားတာကို မြင်တွေ့ခဲ့ရပါတယ်။

ပရီးမီးယားလိဂ်ပြိုင်ပွဲ၊ ကွန်းဖရန့်လိဂ်နဲ့ ပြည်တွင်းဖလား ပြိုင်ပွဲတွေမှာ မတူညီတဲ့ လူစာရင်းတွေကို အသုံးပြုခဲ့ တာကြောင့် ကစားသမားတွေဟာ အနားယူချိန်တွေရခဲ့ပြီး လန်းလန်းဆန်းဆန်းနဲ့ သူတို့ယှဉ်ပြိုင်ရမယ့် ပြိုင်ပွဲ တွေကို အဓိက အာရုံစိုက်လို့ရတာပါ။ 

အခြားထိပ်သီး အသင်းတွေဆိုရင် ပြိုင်ပွဲတွေ ဆက်တိုက် ယှဉ်ပြိုင်နေ ချိန်မှာ သူတို့ရဲ့လူစာရင်းကို ကြီးကြီးမားမား အပြောင်းအလဲ ပြုလုပ်နိုင်ခြင်း မရှိခဲ့တာဖြစ်ပါတယ်။ 

အဲဒါကြောင့် ချယ်လ်ဆီးအသင်းဟာ ကစားသမားများပြားတဲ့ အားသာချက်ကို အသုံးပြုပြီး ပရီးမီးယားလိဂ် ပြိုင်ပွဲမှာ ချန်ပီယံဆု ပြေးလမ်းကြောင်းထဲ ဝင်ရောက်လာနေတာပါ။

ချယ်လ်ဆီးအသင်းသားတွေကိုတွေ့ရစဉ်

ချယ်လ်ဆီးအသင်း ဒီလိုမျိုး ရလဒ်ကောင်းတွေ ရရှိစေဖို့အတွက် ပွဲအဖြေကို ပြောင်းလဲနိုင်တဲ့ ကစားသမားတွေ ရှိတာကလည်း ကောင်းမွန်တဲ့ အချက်တစ်ချက် အနေနဲ့ ရှိနေပါတယ်။

မန်စီးတီးအသင်းကနေ ရောက်ရှိလာခဲ့တဲ့ ကိုးလ်ပါလ်မာဟာ သူ့အတွက် ချယ်လ်ဆီးအသင်း ပေးချေခဲ့ရတဲ့ ပြောင်းရွှေ့ကြေးထက် အများကြီး ထိုက်တန်တဲ့ ကစားသမားအဖြစ် အားလုံးရဲ့ အသိအမှတ်ပြုခြင်း ခံနေရတာပါ။ 

ကိုးလ်ပါလ်မာဟာ ချယ်လ်ဆီးအသင်းအတွက် အဖိုးတန်သွင်းဂိုးတွေ သွင်းယူထားသလို ဂိုးဖန်တီးမှုတွေ အများ ကြီးလည်း ပြုလုပ်ထားပါတယ်။ ပြီးတော့ ကိုးလ်ပါလ်မာဟာ ပရီးမီးယားလိဂ်မှာ ပင်နယ်တီကန်သွင်းတာ ရာနှုန်းပြည့် ဂိုးဝင်ထားတာ ဖြစ်ပါတယ်။

ချယ်လ်ဆီးအသင်းဟာ ဒီရာသီမှာ နေရာစုံကနေ ဂိုးသွင်းယူနိုင်တဲ့ ကစားသမားတွေ အများအပြားကို ပိုင်ဆိုင်ထား တာကလည်း အသင်းအတွက် တကယ်ကို အကျိုးရှိခဲ့တာပါ။ 

အဲဒါကြောင့်လည်း ချယ်လ်ဆီးအသင်းဟာ ဒီရာသီ ပရီးမီးယားလိဂ် ပြိုင်ပွဲမှာ ဂိုးသွင်း အများဆုံး အသင်းအဖြစ် ၃၅ ဂိုးနဲ့ ထိပ်ဆုံးနေရာမှာ ရပ်တည်နေပါတယ်။

ချယ်လ်ဆီးအသင်းဟာ ပေးဂိုး ၁၈ ဂိုး ပေးထားရပြီး ခံစစ်သာပိုပြီး ကောင်းမွန်မယ်ဆိုရင် အလွန်ပြီးပြည့်စုံနေမယ့် အခြေအနေကို ရောက်ရှိမှာပါ။ 

ချယ်လ်ဆီးနဲ့စပါးအသင်း ယှဉ်ပြိုင်နေစဉ်

ချယ်လ်ဆီးအသင်းဟာ လက်ရှိအချိန်မှာ အကောင်းဆုံး ရလဒ်တွေကို ပိုင်ဆိုင်ထားပေမယ့် ချန်ပီယံဆု ပြေးလမ်း ကြောင်းထဲ ဝင်ရောက်တာ ပိုသေချာဖို့အတွက် အသင်းကြီးတွေနဲ့ တွေ့ဆုံတဲ့ပွဲတွေမှာ အနိုင်ရလဒ်တွေ ရယူနိုင်ဖို့ လိုအပ်ပါတယ်။

ချယ်လ်ဆီးအသင်းဟာ ဒီရာသီမှာ ထိပ်သီး အသင်းတွေဖြစ်တဲ့ မန်စီးတီးနဲ့ လီဗာပူးလ်အသင်းတို့ကို အရေးနိမ့်ထား ပြီး အာဆင်နယ်နဲ့ ယူနိုက်တက် အသင်းတို့ကို သရေကစားထားကာ စပါးအသင်းကိုသာ အနိုင်ရရှိထားပါတယ်။ 

အဲဒါကြောင့် ချယ်လ်ဆီးအသင်း အနေနဲ့ ထိပ်သီးအသင်းတွေနဲ့ တွေ့တဲ့ပွဲတွေမှာ အနိုင်ရလဒ်တွေ ယူပြရမှာ ဖြစ်ပါတယ်။

ချယ်လ်ဆီးအသင်းဟာ ဒီရာသီ ပရီးမီးယားလိဂ် ပြိုင်ပွဲမှာ ၁၅ ပွဲပဲ ကစားထားရသေးပြီး နောက်ထပ် ပွဲစဉ်တွေ အများအပြား ကစားရဦးမှာဖြစ်လို့ သူတို့ရဲ့ စွမ်းဆောင်ရည်နဲ့ ရလဒ်တွေကို တသမတ်တည်းဖြစ်အောင် လုပ်ဆောင်ရမှာပါ။ 

အဲဒါကြောင့် ချယ်လ်ဆီးအသင်း အနေနဲ့ ချန်ပီယံ ပြေးလမ်းကြောင်းကနေ တဆင့် ချန်ပီယံဆုကို စိန်ခေါ်နိုင် အောင် စွမ်းဆောင်ပြနိုင်မလားဆိုတာ စောင့်ကြည့်ရမှာဖြစ်ပါတယ်။ 

CNI Sport Article

၂၀၂၄ ခုနှစ်၊ ဒီဇင်ဘာ ၆

အာဆီယံဒေသတွင်းမှာ အကြီးမားဆုံး ဘောလုံးပြိုင်ပွဲဖြစ်တဲ့ အာဆီယံ ချန်ပီယံရှစ် AFF Mitsubishi Electric Cup ၂၀၂၄ ပြိုင်ပွဲကို ဒီဇင်ဘာ ၈ ရက်ကနေ စတင်ကျင်းပတော့မှာ ဖြစ်ပါတယ်။

မြန်မာအသင်းဟာ အုပ်စု B မှာ ဗီယက်နမ်၊ ဖိလစ်ပိုင်၊ အင်ဒိုနီးရှား၊ လာအိုအသင်းတို့နဲ့ တစ်အုပ်စုတည်း ကျရောက်နေတာပါ။ 

အုပ်စုတွင်းမှာ ထိပ်ဆုံး ၂ သင်းသာ ဆီမီးဖိုင်နယ်အဆင့်ကို တက်နိုင်မှာဖြစ်လို့ ပွဲတိုင်းက ဗိုလ်လုပွဲလို အရေး ပါနေတာဖြစ်ပါတယ်။ 

အုပ်စုတွင်းပွဲစဉ် ၄ ပွဲမှာ ၂ ပွဲကို အိမ်ကွင်း၊ ၂ ပွဲကို အဝေးကွင်း ကစားရမှာဖြစ်လို့ မြန်မာအသင်းဟာ နောက်တဆင့် တက်ဖို့အတွက် အိမ်ကွင်းပွဲစဉ်တွေမှာ အနိုင်ရလဒ် ရယူနိုင်ဖို့ လိုအပ်နေတာပါ။ 

မြန်မာအသင်းဟာ အိမ်ကွင်း ၂ ပွဲအဖြစ် အင်ဒိုနီးရှား၊ လာအိုအသင်းတို့နဲ့ ယှဉ်ပြိုင်ရမှာဖြစ်ပြီး အဝေးကွင်း ၂ ပွဲ အဖြစ် ဖိလစ်ပိုင်၊ ဗီယက်နမ်အသင်းတို့နဲ့ ယှဉ်ပြိုင်ရမှာဖြစ်ပါတယ်။ 

မြန်မာအသင်းအတွက် ပွဲတိုင်းက မလွယ်ကူတာကြောင့် သေသေချာချာ ပြင်ဆင်ပြီး အကောင်းဆုံး လုပ်ဆောင်နိုင် မှသာ နောက်တဆင့် တက်နိုင်ဖို့ မျှော်လင့်လို့ရမှာပါ။ 

မြန်မာအသင်းကို တွေ့ရစဉ်

မြန်မာအသင်းဟာ အာဆီယံ ချန်ပီယံရှစ်ပြိုင်ပွဲ မတိုင်ခင် နိုဝင်ဘာထဲမှာ ခြေစမ်းပွဲတွေအဖြစ်  စင်္ကာပူ၊ လက်ဘနွန်အသင်းတို့နဲ့ ယှဉ်ပြိုင်ကစားခဲ့တာမှာ ၂ ပွဲစလုံး အရေးနိမ့်ခဲ့ပါတယ်။

ဒီခြေစမ်းပွဲတွေမှာ မြန်မာအသင်းအတွက် အပေါင်းလက္ခဏာဆောင်တဲ့ အရာတွေက သွင်းဂိုးတွေရယူပြီး ပြိုင်ဘက် အသင်းကို ဦးဆောင်နိုင်ခဲ့တာပါ။

ဒါပေမယ့် မြန်မာအသင်းဟာ ၂ ပွဲစလုံး ပွဲပြီးခါနီးတွေမှာ ချေပဂိုးနဲ့ အနိုင်ဂိုးတွေ ပေးခဲ့ရပြီး အရေးနိမ့်ခဲ့တာ ဖြစ်ပါတယ်။ မြန်မာအသင်း ကစားသမားတွေဟာ ပွဲတိုင်းလိုလို ပွဲပြီးခါနီးတွေမှာ သက်လုံကျပြီး ကစားအား ကျသွားတာကြောင့် ဂိုးတွေပြန်ပေးနေရတာက အားနည်းချက်လို ဖြစ်နေတာပါ။ 

မြန်မာအသင်းရဲ့ အုပ်စုပြိုင်ဘက်တွေရဲ့ အခြေအနေကို ပြောပြချင်ပါတယ်။

အင်ဒိုနီးရှားအသင်း အကြောင်းပြောရရင် အင်ဒိုနီးရှားအသင်းဟာ ၂၀၂၆ ကမ္ဘာ့ဖလားပြိုင်ပွဲ (အာရှဇုန်) ခြေစစ်ပွဲ တွေမှာ ရလဒ်တွေ ကောင်းနေတဲ့ အသင်းဖြစ်ပြီး ဒီပြိုင်ပွဲမှာလည်း ဗိုလ်စွဲဖို့ ရေပန်းစားနေတဲ့ အသင်းတွေထဲက တစ်သင်းလည်းဖြစ်တာပါ။ 

ဒါပေမယ့် အာဆီယံ ချန်ပီယံရှစ်ပြိုင်ပွဲဟာ ဖီဖာဘောလုံးပြက္ခဒိန်အတိုင်း ကျင်းပတဲ့ ပြိုင်ပွဲမဟုတ်တာကြောင့် ကလပ်အသင်းတွေက ကစားသမားတွေ စေလွှတ်ခြင်း မရှိပါဘူး။ 

နည်းပြ ဦးမျိုးလှိုင်ဝင်းကို တွေ့ရစဉ်

အဲဒါကြောင့် အင်ဒိုနီးရှားအသင်းဟာ အဓိက ကစားသမားတွေ အစုံအလင် ပါဝင်နိုင်မှာ မဟုတ်ပေမယ့် လူစာရင်းက တောင့်တင်းနေဆဲဖြစ်ပါတယ်။ 

အာဆီယံ ချန်ပီယံရှစ်ပြိုင်ပွဲမှာ ချန်ပီယံဆုကို ၂ ကြိမ်ရယူထားတဲ့ ဗီယက်နမ်အသင်းကတော့ ဒီနှစ်ကျင်းပမယ့် ပြိုင်ပွဲမှာ ချန်ပီယံဆုကို ရယူနိုင်ဖို့ ပစ်မှတ်ထားနေတာပါ။ 

ဗီယက်နမ်အသင်းဟာ ၂၀၂၄ ခုနှစ်အတွင်းမှာ ရလဒ်တွေ မကောင်းခဲ့တာကြောင့် ပြိုင်ပွဲမတိုင်ခင် တောင်ကိုရီးယား နိုင်ငံမှာ သွားရောက် လေ့ကျင့်မှုတွေပြုလုပ်ပြီး အကောင်းဆုံး ပြင်ဆင်မှုတွေ ပြုလုပ်ထားတာဖြစ်ပါတယ်။ 

အာဆီယံချန်ပီယံရှစ်ပြိုင်ပွဲမှာ အမြင့်ဆုံး ဆီမီးဖိုင်နယ်အထိ ရောက်ခဲ့တဲ့ ဖိလစ်ပိုင်အသင်းဟာ ၂၀၂၄ ခုနှစ်ထဲ ကစားခဲ့တဲ့ပွဲတွေမှာ ရလဒ်တွေ မကောင်းခဲ့တဲ့အတွက် ဒီပြိုင်ပွဲမှာ ရလဒ်ကောင်းတွေ ပြန်ရယူနိုင်ဖို့ မျှော်လင့် နေတာပါ။ 

ဖိလစ်ပိုင်အသင်း လူစာရင်းဟာ တောင့်တင်းနေဆဲ ဖြစ်တဲ့အတွက် အုပ်စုတွင်းမှာရှိတဲ့ ပြိုင်ဘက်အသင်းတွေကို ရလဒ်ဆိုး ကြုံတွေ့အောင် လုပ်နိုင်သေးတာဖြစ်ပါတယ်။

လာအိုအသင်းဟာ ဒီအုပ်စုမှာ အင်အားအနည်းဆုံး အသင်းအဖြစ်ရှိနေပြီး အာဆီယံ ချန်ပီယံရှစ်ပြိုင်ပွဲမှာ အုပ်စု ကနေ ကျော်ဖြတ်နိုင်ခြင်း မရှိသေးပါဘူး။

 မြန်မာအသင်းကိုတွေ့ရစဉ်

လာအိုအသင်းဟာ နိုဝင်ဘာမှာကစားခဲ့တဲ့ ခြေစမ်းပွဲမှာ ထိုင်းအသင်းနဲ့ ၁ ဂိုးစီ သရေကျခဲ့တာကြောင့် အုပ်စုတွင်း မှာ ဘာတွေလုပ်ပြနိုင်မလဲဆိုတာ စောင့်ကြည့်ချင်စရာ ကောင်းနေပါတယ်။ 

မြန်မာအသင်းကတော့ အဓိက ကစားသမားအချို့ မပါဝင်နိုင်ခဲ့ပေမယ့် နည်းပြချုပ် ဦးမျိုးလှိုင်ဝင်းဟာ ဒီပြိုင်ပွဲ အတွက် အတောင့်တင်းဆုံး လူစာရင်းကို ရွေးချယ်ထားတာပါ။ 

အာဆီယံ ချန်ပီယံရှစ်ပြိုင်ပွဲဟာ ဦးမျိုးလှိုင်ဝင်းအတွက် မြန်မာအသင်းနည်းပြဘဝ ပထမဆုံးပြိုင်ပွဲဖြစ်တာကြောင့် အုပ်စုကနေ နောက်တဆင့်တက်နိုင်ဖို့ မျှော်လင့်ချက်ထားကာ ပြင်ဆင်မှုတွေ ပြုလုပ်နေတာ ဖြစ်ပါတယ်။ 

မြန်မာအသင်းဟာ အာဆီယံ ချန်ပီယံရှစ်ပြိုင်ပွဲမှာ အမြင့်ဆုံးအောင်မြင်မှုအဖြစ် စတုတ္ထနဲ့ ဆီမီးဖိုင်နယ်အထိ တက်ရောက်နိုင်ခဲ့ပါတယ်။

မြန်မာအသင်းအတွက် ဒီဇင်ဘာ ၉ ရက်မှာ ကစားမယ့် အင်ဒိုနီးရှားအသင်းနဲ့ အိမ်ကွင်းအဖွင့်ပွဲစဉ်ဟာ အလွန် အရေးကြီးနေပြီး ဒီပွဲမှာသာ ရလဒ်ကောင်း ရယူနိုင်ရင် နောက်လာမယ့်ပွဲတွေကို ကျော်ဖြတ်နိုင်ဖို့ စိတ်ပိုင်းဆိုင်ရာ အလွန်အားကောင်းသွားမှာပါ။ 

အဲဒါကြောင့် အင်ဒိုနီးရှားအသင်းနဲ့ပွဲစဉ်မှာ မြန်မာအသင်း ဘယ်လောက်အထိ စွမ်းဆောင်နိုင်မလဲဆိုတာ စောင့်ကြည့်ရမှာ ဖြစ်ပါတယ်။