- By CNI
- Category: အားကစား
- Hits: 472
CNI Sport News
၂၀၂၃ ခုနှစ်၊ မတ်လ ၂၂
ဝါရင့်တိုက်စစ်မှူး အီဘရာဟီမိုဗစ်ဟာ အသက်အရွယ် ရနေပြီဖြစ်ပေမယ့် လာမယ့် ယူရို ၂၀၂၄ ပြိုင်ပွဲမှာ ပါဝင် ကစားနိုင်ဖို့ မျှော်လင့်တယ်လို့ ပြောလိုက်ပါတယ်။
အီဘရာဟီမိုဗစ်က “ဒဏ်ရာတွေနဲ့ ဒီလိုမျိုး ကြုံတွေ့ခဲ့ရတာတွေကို ကြိုပြီးတွေးထားလို့ မရပါဘူး။ ရုပ်ပိုင်းဆိုင်ရာ သာ ကောင်းမွန်တယ်လို့ ခံစားရရင်တော့ ကျနော်ဆက်ပြီးသွားမှာပါ”လို့ ဆွီဒင်အသင်း ခြေစစ်ပွဲအောင်ရင် ယူရို ၂၀၂၄ ပြိုင်ပွဲမှာ ကစားဖို့ ရည်ရွယ်ထားလားဆိုတာနဲ့ ပတ်သက်ပြီး သတင်းထောက်တွေက မေးမြန်းချိန်မှာ ဖြေခဲ့ တာပါ။
မကြာသေးခင်ကမှ ဒဏ်ရာကနေ ပြန်ကောင်းလာပြီး အေစီမီလန် အသင်းအတွက် ပါဝင်ကစားပေးနိုင်ခဲ့ပြီဖြစ်တဲ့ အီဘရာဟီမိုဗစ်ကို ဆွီဒင်လက်ရွေးစင်အသင်းက ယူရို ၂၀၂၄ ခြေစစ်ပွဲ လူစာရင်းမှာ ရွေးချယ်ခဲ့တာ ဖြစ်ပါတယ်။
အီဘရာဟီမိုဗစ်ဟာ အသက် ၄၁ နှစ် အရွယ်ရှိပြီ ဖြစ်တာကြောင့် ယူရိုခြေစစ်ပွဲမှာ ပါဝင်ခဲ့ရင် ၁၉၈၃ က စံချိန်တင် ထားတဲ့ အီတလီဂိုးသမားကြီး ဒီဇိုဇော့ဖ်ရဲ့ စံချိန်ကို ကျော်ဖြတ်နိုင်မှာပါ။
ဒီနိုဇော့ဖ်ဟာ အသက် ၄၀ နှစ်၊ ၉၀ ရက်နဲ့ စံချိန်တင်ထားခဲ့တာ ဖြစ်ပါတယ်။
အေစီမီလန်မှာ ကစားနေတဲ့ အီဘရာဟီမိုဗစ်ကိုတွေ့ရစဉ်
ဝါရင့်တိုက်စစ်မှူးဟာ မကြာသေးခင်က အေစီမီလန်အသင်းအတွက် ဂိုးသွင်းယူပြီးနောက် စီးရီးအေသမိုင်းမှာ အသက်ကြီးဆုံး ဂိုးသွင်းတဲ့သူအဖြစ် စံချိန်သစ် တင်နိုင်ခဲ့တာပါ။ အီဘရာဟီမိုဗစ်ဟာ ပြီးခဲ့တဲ့နှစ်က ကျင်းပခဲ့တဲ့ ကမ္ဘာ့ဖလားပြိုင်ပွဲမှာ ဆွီဒင်အသင်း ခြေစစ်ပွဲ မအောင်မြင်ခဲ့ပြီးနောက် သူဟာ ကစားနိုင်တဲ့အချိန်ထိ ဆက်ပြီး ကစားပေးသွားဦးမယ်လို့ ပြောခဲ့ပါတယ်။
အီဘရာဟီမိုဗစ်က “ကျနော်ဟာ ပရဟိတ လုပ်ငန်းလုပ်ဖို့ ဒီကိုလာတာ မဟုတ်ပါဘူး။ ပွဲကစားဖို့နဲ့ ကျနော့်ရဲ့ စွမ်းဆောင်ရည်တွေ ကနေတဆင့် ရလဒ်ကောင်းတွေ ယူဆောင်လာဖို့အတွက် ဒီမှာ ရှိနေတာပါ။ ဒါကြောင့်လည်း ကျနော်ဟာ ဆက်ပြီး လုပ်နိုင်မယ်လို့ မျှော်လင့်ကြောင်း”ပြောခဲ့တာပါ။
ဆွီဒင်အသင်းသာ လာမယ့်နှစ် ယူရိုပြိုင်ပွဲကို ခြေစစ်ပွဲအောင်ပြီး အီဘရာဟီမိုဗစ် အနေနဲ့ ဝင်ရောက် ကစားနိုင်ခဲ့ မယ်ဆိုရင်တော့ နောက်ထပ် စံချိန်တစ်ခုကို ထပ်ပြီး ချိုးဖျက်နိုင်ဖို့ရှိတာ ဖြစ်ပါတယ်။
ဆွီဒင်အသင်းဟာ ယူရို ၂၀၂၄ ခြေစစ်ပွဲအဖြစ် သောကြာနေ့မှာ ဘယ်လ်ဂျီယံ၊ တနင်္လာနေ့မှာ အဇာဘိုင်ဂျန် အသင်းတို့နဲ့ ယှဉ်ပြိုင်ရမှာပါ။ ဆွီဒင် အသင်း ပါဝင်တဲ့ ဒီအုပ်စုမှာ ဒီ ၃ သင်းအပြင် အက်စတိုးနီးယားနဲ့ သြစတြီးယားတို့လည်း ပါဝင်နေပြီး ထိပ်ဆုံးရတဲ့ ၂ သင်းဟာ ခြေစစ်ပွဲ အောင်မြင်မှာ ဖြစ်ပါတယ်။
အသက် ၄၁ နှစ်အရွယ်ရှိ အီဘရာဟီမိုဗစ်ဟာ ဆွီဒင်လက်ရွေးစင်အတွက် ၂၀၀၁ ကတည်းက ပါဝင်ကစားခဲ့တာ ဖြစ်ပြီး ၁၂၁ ပွဲကစားထားကာ ၆၂ ဂိုးသွင်းယူထားတာ ဖြစ်ပါတယ်။
Source: Besoccer
- By CNI
- Category: အားကစား
- Hits: 450
CNI Sport News
၂၀၂၃ ခုနှစ်၊ မတ်လ ၂၂
အာဆင်နယ် ကစားသမားဟောင်း ရော်ဘတ်ပီးရတ်ဇ်က ပြင်သစ်လက်ရွေးစင်အသင်းရဲ့ အသင်းခေါင်းဆောင် အဖြစ် ဘတ်ပီကို ခန့်အပ်တာဟာ တိုက်စစ်မှူး ဂရစ်ဇ်မန်းအပေါ် လေးစားမှုမရှိကြောင်း ပြသတာလို့ ပြောလိုက် ပါတယ်။
ရော်ဘတ်ပီးရတ်ဇ်က “ဒါက ယုတ္တိတန်တဲ့ ရွေးချယ်မှုလား။ ရိုးရိုးသားသား ပြောရရင် ဒီလိုမဟုတ်ပါဘူး။ အသင်း ခေါင်းဆောင်ဖြစ်ဖို့ ဆန်ကာတင် စာရင်းမှာ ပါဝင်တဲ့ သူတွေထဲက ဂရစ်ဇ်မန်းဖြစ်ဖို့ မျှော်လင့်ခဲ့တာပါ။ ဒီဆုံးဖြတ်ချက်ကို ကျနော်အံ့သြမိပါတယ်။ ဘတ်ပီကို ဆန့်ကျင်တာ ဘာမှမရှိဘူးလို့ အခိုင်အမာ ပြောနေရင်တောင် ဒါဟာ ဂရစ်ဇ်မန်းအပေါ် လေးစားမှု မရှိကြောင်း ပြသတယ်လို့ ကျနော်ထင်ကြောင်း”ပြောခဲ့ပါတယ်။
ပြင်သစ်အသင်း ခေါင်းဆောင်အဖြစ် တာဝန်ယူနေတဲ့ ဂိုးသမား လိုရစ်ဟာ ကမ္ဘာ့ဖလား ပြိုင်ပွဲအပြီးမှာ လက်ရွေးစင် ကစားသမားဘဝကနေ အနားယူခဲ့တာကြောင့် နည်းပြ ဒက်ချမ့်စ်ဟာ အသင်းခေါင်းဆောင်သစ် ခန့်အပ်ဖို့ ရွေးချယ်ခဲ့ရတာ ဖြစ်ပါတယ်။
နည်းပြ ဒက်ချမ့်စ်ဟာ ဘတ်ပီ၊ ဂရစ်ဇ်မန်းတို့နဲ့ စကားပြောဆိုမှုတွေ ပြုလုပ်ပြီးနောက် ဘတ်ပီကို အသင်း ခေါင်းဆောင်သစ်အဖြစ် ခန့်အပ်ကာ ဂရစ်ဇ်မန်းကို ဒုအသင်းခေါင်းဆောင်အဖြစ် ခန့်အပ်ခဲ့တာပါ။
ဂရစ်ဇ်မန်းဟာ ဘတ်ပီထက် လက်ရွေးစင်အသင်းမှာ ကစားတာ ပိုပြီးသက်တမ်း ကြာပြီဖြစ်တဲ့အတွက် ဒီလို ရွေးချယ်မှုအပေါ် ဝေဖန်မှုတွေရှိခဲ့တာ ဖြစ်ပါတယ်။
ဘတ်ပီ အသင်းခေါင်းဆောင်အဖြစ် ၂၀၂၂ ကမ္ဘာ့ဖလားပြိုင်ပွဲတစ်ခုမှာ တာ၀န်ယူခဲ့စဉ်
ဂရစ်ဇ်မန်းဟာ ဘတ်ပီကို လက်ရွေးစင် အသင်းခေါင်းဆောင်အဖြစ် ခန့်အပ်တာကို စိတ်ပျက်နေပြီး ပြင်သစ်ကနေ အနားယူဖို့အထိ စဉ်းစားနေတယ်လို့လည်း သတင်းတွေ ထွက်ပေါ်ခဲ့သေးပါတယ်။
ဘတ်ပီဟာ အသက် ၂၄ နှစ် အရွယ်သာ ရှိသေးပေမယ့် ပြင်သစ်အသင်းကို ၂၀၁၈ ကမ္ဘာ့ဖလားပြိုင်ပွဲမှာ ချန်ပီယံ ဖြစ်အောင်နဲ့ ၂၀၂၂ ပြိုင်ပွဲမှာ ဗိုလ်လုပွဲအထိ ရောက်ရှိအောင် ပို့ဆောင်ပေးနိုင်ခဲ့ပါတယ်။
ဒက်ချမ့်စ်ကတော့ ဘတ်ပီဟာ အသင်းခေါင်းဆောင်အဖြစ် တာဝန်ယူဖို့အတွက် ထူးချွန်တဲ့ အရည်အချင်းတွေ အားလုံး ရှိတယ်လို့ ပြောပါတယ်။
ဒက်ချမ့်စ်က “သူ့မှာ အရည်အချင်း တစ်ခုအပြင် အခြားအရည်အချင်းတွေလည်း အများကြီး ရှိပါတယ်။ သူဟာ တော်လည်းတော်သလို ပေါင်းသင်း ဆက်ဆံရေးလည်း ကောင်းပါတယ်။ ဒါဆိုရင်တော့ သူ့ကို အသင်း ခေါင်းဆောင်ခန့်တာက ပြဿနာလို့ မထင်ပါဘူး”လို့ ပြောခဲ့ပါတယ်။
ပြင်သစ်အသင်းဟာ လာမယ့် ယူရို ၂၀၂၄ ခြေစစ်ပွဲအဖြစ် နယ်သာလန်၊ အိုင်ယာလန် အသင်းတို့နဲ့ ယှဉ်ပြိုင်ရမှာ ဖြစ်ပြီး ဒီပွဲတွေမှာ ဘတ်ပီဟာ အသင်းခေါင်းဆောင်အဖြစ် စတင် တာဝန်ယူရတော့မှာ ဖြစ်ပါတယ်။
Source: Daily Mail
- By CNI
- Category: Watch TV
- Hits: 368
- By CNI
- Category: အားကစား
- Hits: 423
CNI Sport News
၂၀၂၃ ခုနှစ်၊ မတ်လ ၂၁
ပီအက်စ်ဗွီအသင်းဟာ ယူရိုပါလိဂ်ပွဲစဉ်မှာ ဆီဗီလာဂိုးသမား ဒီမီထရိုဗစ်ကို တိုက်ခိုက်ခဲ့တဲ့ ပရိသတ်တစ်ဦးကို ကွင်းအတွင်း ဝင်ရောက်ကြည့်ရှုခွင့် နှစ်ပေါင်း ၄၀ ကြာ ပိတ်ပင်တဲ့ ပြစ်ဒဏ် ချမှတ်လိုက်ပါတယ်။
အသက် ၂၀ အရွယ်ရှိ အမျိုးသား ပရိသတ်တစ်ဦးဟာ အမျိုးသား အားကစားကွင်းမှာလည်း ဝင်ရောက်ကြည့်ရှုခွင့် ပိတ်ပင်ခံထားရသလို ထောင်ဒဏ် ၃ လလည်း ချမှတ်ခံထားရတာပါ။
ဒါအပြင် ပီအက်စ်ဗွီအသင်းရဲ့ အိမ်ကွင်းအနီးရှိ ဧရိယာတွေမှာလည်း လာရောက်ခွင့် ၂ နှစ် ပိတ်ပင်ခဲ့တာ ဖြစ်ပါ တယ်။ ဒတ်ချ်ကလပ်ဖြစ်တဲ့ ပီအက်စ်ဗွီအသင်းဟာ ဆုံးရှုံးသွားခဲ့တဲ့ ငွေကြေးတွေ အတွက်လည်း အဆိုပါ ပရိသတ် ဆီကနေ ပြန်လည်ရယူဖို့ ကြိုးစားသွားမယ်လို့ ပြောခဲ့တာပါ။
ပီအက်စ်ဗွီအသင်းဟာ ဒီဖြစ်ရပ်ကြောင့် ယူအီးအက်ဖ်အေရဲ့ စည်းကမ်းပိုင်းဆိုင်ရာ အရေးယူမှုနဲ့ ရင်ဆိုင်ရမှာ ဖြစ်လို့ ဒဏ်ကြေးငွေ ကြီးကြီးမားမား ပေးဆောင်ရဖွယ် ရှိနေပါတယ်။
ဒီမီထရိုဗစ်က သူ့ကို ထိုးဖို့လာတဲ့ ပရိသတ်တစ်ဦးကို လုံးထွေးသတ်ပုတ်နေစဉ်
ကွင်းအတွင်း ဝင်ရောက် ကျူးကျော်လာတဲ့သူဟာ သူ့ရဲ့ သူငယ်ချင်း ဝယ်ယူထားတဲ့ လက်မှတ်ကို အသုံးပြုပြီး ဝင်ရောက် လာခဲ့တာလို့ သတင်းမှာ ဖော်ပြထားတာပါ။ ယူရိုပါလိဂ် ပလေးအော့ဖ်အဆင့် ဒုတိယအကျော့ ပွဲစဉ် အဖြစ် ကစားခဲ့တဲ့ ဒီပွဲမှာ အဲဒီပရိသတ်ဟာ ကွင်းထဲကို ဝင်ရောက်လာပြီး ဒီမီထရိုဗစ်အနားကို ချဉ်းကပ်ကာ မျက်နှာကို ထိုးဖို့ ကြိုးပမ်းခဲ့တာ ဖြစ်ပါတယ်။
ဒါပေမယ့် မီထရိုဗစ်ဟာ ရန်ပြုမယ့် အမျိုးသားကို နပန်းလုံးပြီး ထိန်းချုပ်ဖမ်းဆီးကာ ကွင်းအတွင်းရှိ လုံခြုံရေးတွေကို လွှဲပြောင်းပေးခဲ့ပါတယ်။
ဒီပွဲမှာ ဆီဗီလာအသင်းဟာ ပီအက်စ်ဗွီအသင်းကို ၂ ဂိုး- ဂိုးမရှိနဲ့ အရေးနိမ့်ခဲ့ပေမယ့် နှစ်ကျော့ပေါင်း ရလဒ် ၃ ဂိုး-၂ ဂိုးနဲ့ ယူရိုပါလိဂ်ပြိုင်ပွဲမှာ နောက်တစ်ဆင့် တက်နိုင်ခဲ့တာ ဖြစ်ပါတယ်။
ဆီဗီလာအသင်းဟာ ၁၆ သင်းအဆင့်မှာ ဖီနာဘာချီအသင်းကို နှစ်ကျော့ပေါင်း ရလဒ် ၂ ဂိုး-၁ ဂိုးနဲ့ အနိုင်ရပြီး ကွာတားဖိုင်နယ် အဆင့်ကို ရောက်ရှိခဲ့ကာ ယူနိုက်တက်အသင်းနဲ့ ယှဉ်ပြိုင်ရမှာပါ။
စပိန်ကလပ် ဆီဗီလာအသင်းဟာ ယူရိုပါလိဂ်ပြိုင်ပွဲမှာ ၆ ကြိမ် ဗိုလ်စွဲထားပြီး အအောင်မြင်ဆုံး အသင်းအဖြစ် ရပ်တည်နေပေမယ့် ဒီရာသီ လာလီဂါပြိုင်ပွဲမှာတော့ ရလဒ်တွေဆိုးနေပြီး အဆင့် ၁၄ နေရာမှာ ရပ်တည်နေတာ ဖြစ်ပါတယ်။
Source: BBC
- By CNI
- Category: အားကစား
- Hits: 545
CNI Sport News
၂၀၂၃ ခုနှစ်၊ မတ်လ ၂၁
စပါးအသင်းဥက္ကဋ္ဌ ဒန်နီရယ်လီဗိုင်းဟာ အသင်းကစားသမားတွေအပေါ်မှာ နှုတ်နဲ့ တိုက်ခိုက်မှုတွေ ပြုလုပ်ခဲ့တဲ့ နည်းပြ ကွန်တီကို ရာထူးကနေ ထုတ်ပယ်ဖို့ ပြင်ဆင်နေပြီ ဖြစ်ပါတယ်။
စပါးအသင်းဟာ စနေနေ့က ကစားခဲ့တဲ့ ဆောက်သမ်တန်အသင်းနဲ့ ၃ ဂိုးစီ သရေကျတဲ့ ပွဲအပြီးမှာ နည်းပြ ကွန်တီဟာ ခံစားချက်တွေ မထိန်းချုပ်နိုင်ခဲ့ဘဲ သတင်းစာ ရှင်းလင်းပွဲမှာ အသင်းကို ပြင်းပြင်းထန်ထန် ဝေဖန်မှုတွေ ပြုလုပ်ခဲ့ပါတယ်။
စပါးအသင်းဟာ ဒီပွဲမှာ ၃ ဂိုး- ၁ ဂိုးနဲ့ ဦးဆောင် နေခဲ့ပေမယ့် ပွဲအပြီးမှာ ပေးခဲ့ရတဲ့ ပင်နယ်တီဂိုးကြောင့် သရေရလဒ်နဲ့သာ ပြီးဆုံးခဲ့ရတာ ဖြစ်ပါတယ်။
ဒန်နီရယ်လီဗိုင်းဟာ ကွန်တီကို ထုတ်ပယ်ဖို့ အလေးအနက် စဉ်းစားနေတဲ့ အချိန်မှာ အီတလီလူမျိုး နည်းပြကတော့ သူ့ရဲ့နိုင်ငံကို ပြန်လာခဲ့တာပါ။
စပါးအသင်းကိုတွေ့ရစဉ်
အခုလာမယ့် ရက်သတ္တပတ်မှာ နိုင်ငံတကာ ပွဲစဉ်တွေ ယှဉ်ပြိုင်ရမှာ ဖြစ်တဲ့အတွက် ကွန်တီဟာ မိသားစုနဲ့အတူ အနားယူဖို့ အီတလီကို ပြန်လာခဲ့ပေမယ့် ဒီခရီးစဉ်ဟာ သူ့ရဲ့ အလုပ်ကို ဆုံးရှုံးရမယ့် အခြေအနေကို ရောက်ရှိနေတာ ဖြစ်ပါတယ်။
ကွန်တီက ပွဲအပြီး အင်တာဗျူးမှာ ကစားသမားတွေရဲ့ စိတ်နေ သဘောထားတွေကို မေးခွန်းထုတ်ခဲ့ပြီး အသင်းမှာ ရှိတဲ့ ကစားသမားတွေဟာ တစ်ကိုယ်ကောင်းဆန်တယ်လို့ ပြောခဲ့သလို အသင်းပိုင်ရှင်ကိုလည်း ဝေဖန်မှုတွေ ပြုလုပ်ခဲ့ပါတယ်။
ကွန်တီရဲ့ ဒီလိုပြောဆိုမှုတွေဟာ အသင်းရဲ့အတွင်းထဲမှာ စိုးရိမ်မှုတွေ တိုးပွားလာစေခဲ့တာကြောင့် လီဗိုင်းဟာ နိုင်ငံတကာပွဲစဉ် ယှဉ်ပြိုင်နေချိန်အတွင်းမှာ ကွန်တီနဲ့ စာချုပ်ဖျက်သိမ်းဖို့ ပြင်ဆင်နေတာ ဖြစ်ပါတယ်။
ကွန်တီနဲ့ စပါးအသင်းတို့ ချုပ်ဆိုထားတဲ့ စာချုပ်ဟာ အခုရာသီအကုန်မှာ ကုန်ဆုံးတော့မှာ ဖြစ်တဲ့အတွက် အီတလီလူမျိုး နည်းပြဟာ အခုအချိန်မှာ မထုတ်ပယ်ခဲ့ရင်တောင် ရာသီအကုန်မှာ ထွက်ခွာဖို့ ရှိနေတာပါ။
ကွန်တီကိုတွေ့ရစဉ်
စပါးအသင်းဟာ လာမယ့်ရာသီမှာ ချန်ပီယံလိဂ် ဝင်ခွင့်ရဖို့ကို အဓိက ပစ်မှတ်ထားနေတာကြောင့် အသင်းကို ထိခိုက်စေမယ့် ဆုံးဖြတ်ချက်ကို လီဗိုင်းက မချမှတ်ချင်တာ ဖြစ်ပါတယ်။
ဒါပေမယ့် ကွန်တီ ဆက်လက် ရှိနေမယ်ဆိုရင် အသင်းသားတွေရဲ့ စိတ်ဓါတ်ကို အပျက်သဘော ဆောင်နိုင်မယ့် အခြေအနေအပေါ် ဘုတ်အဖွဲ့က သတိပြုမိတဲ့အတွက် ဒါကို စိုးရိမ်မှုတွေ ရှိနေတာပါ။
စပါးအသင်းဟာ မကြာသေးခင်က ချန်ပီယံလိဂ်ကနေ ထွက်ခွာခဲ့ရပေမယ့် ကလပ်အသင်းကတော့ ကွန်တီနဲ့ ရာသီ အကုန်ထိ ဆက်သွားဖို့ အစီအစဉ်ရှိခဲ့တာ ဖြစ်ပါတယ်။
ဒါပေမယ့် သူ့ရဲ့ ဒေါသထွက်ပြီး ပြောခဲ့တဲ့ စကားတွေကြောင့် အခြေအနေတွေဟာ ပြောင်းလဲသွားခဲ့ပြီး စပါး အသင်းဟာ ကွန်တီရဲ့ နေရာမှာ ရိုင်ယန်မေဆင်ကို ရာသီအကုန်ထိ ယာယီနည်းပြအဖြစ် ခန့်အပ်သွားဖို့ လုပ်ဆောင် နေတာပါ။
ရိုင်ယန်မေဆင်ဟာ မော်ရင်ဟို ထုတ်ပယ်ခံခဲ့ရတဲ့ ၂၀၂၀ ကလည်း အသင်းကို ယာယီနည်းပြအဖြစ် ၇ ပွဲ ကိုင်တွယ် ခဲ့တာမှာ ၄ ပွဲနိုင်၊ ၃ ပွဲရှုံးနိမ့်တဲ့ မှတ်တမ်းတစ်ခုကို ရရှိခဲ့တာ ဖြစ်ပါတယ်။
Source: Daily Mail
- By CNI
- Category: Watch TV
- Hits: 362
- By CNI
- Category: အားကစား
- Hits: 500
CNI Sport News
၂၀၂၃ ခုနှစ်၊ မတ်လ ၂၀
ဝိန်းရွန်းနီရဲ့ အကြီးဆုံးသားဖြစ်သူ ကိုင်ရွန်းနီဟာ မန်စီးတီးအသင်းကို ၂ ဂိုး- ဂိုးမရှိနဲ့ အနိုင်ရခဲ့တဲ့ ယူ-၁၃ National Cup North ဗိုလ်လုပွဲမှာ ယူနိုက်တက်အသင်းအတွက် ၁ ဂိုး သွင်းယူပေးနိုင်ခဲ့ပါတယ်။
ဂါဘရီရယ်လ်နဲ့ ၁၃ နှစ်အရွယ်ရှိ ကိုင်တို့ဟာ မန်ချက်စတာဒါဘီပွဲစဉ်မှာ သွင်းဂိုး သွင်းယူနိုင်ခဲ့တာဖြစ်ပြီး ၂၀၂၂-၂၃ ရာသီ ယူနိုက်တက် လူငယ်အသင်းအတွက် ဆုဖလား ရယူပေးနိုင်ခဲ့တာပါ။
ယူနိုက်တက်အသင်းဟာ ဒီပွဲမှာ အနိုင်ရခဲ့တာကြောင့် National ဗိုလ်လုပွဲအဖြစ် အာဆင်နယ်အသင်းနဲ့ ယှဉ်ပြိုင်ရမှာ ဖြစ်ပါတယ်။ ကိုင်ဟာ တစ်သင်းလုံးနဲ့ အောင်ပွဲခံနေတဲ့ ပုံတွေ၊ ဆုတံဆိပ်နဲ့ ဆုဖလားတွေ ပါဝင်တဲ့ ပုံတွေကို ဂုဏ်ယူစွာနဲ့ သူ့ရဲ့ အကောင့်မှာ တင်ထားခဲ့တာပါ။
ပြီးခဲ့တဲ့နှစ်က ဒေးလီးမေးလ်ရဲ့ ဖော်ပြချက်အရ ကိုင်ရွန်းနီဟာ ယူ-၁၂ အသင်းအတွက် ၅၆ ဂိုးသွင်းပြီး ၂၈ ဂိုး ဖန်တီးကာ စံချိန်တင်နိုင်ခဲ့တယ်လို့ သိရပါတယ်။
ဒီထဲမှာ လီဗာပူးလ်အသင်းကို ၄ ဂိုး သွင်းယူခဲ့တာ ပါဝင်ပြီး ရော်နယ်ဒိုရဲ့ သားဖြစ်သူ ခရစ္စတီယာနိုဂျူနီယာနဲ့ အတူတွဲကစားခဲ့တာပါ။
ယူ-၁၃ ဗိုလ်လုပွဲမှာတွေ့ရတဲ့ ကိုင်ရွန်းနီ
ကိုင်ရဲ့ ဖခင်ဖြစ်သူ ဝိန်းရွန်းနီဟာ ယူနိုက်တက် အသင်းအတွက် ၅၅၉ ပွဲ ပါဝင်ကစားခဲ့ပြီး ၂၅၃ ဂိုး သွင်းယူကာ အသင်းရဲ့ ဂိုးသွင်း အများဆုံး ကစားသမားအဖြစ် ရပ်တည်နေပါတယ်။
၂၀၁၃ တုန်းက ကိုင်ဟာ ဖခင်ဖြစ်သူနဲ့အတူ ယူနိုက်တက်အသင်းရဲ့ အောင်ပွဲခံ အခမ်းအနားမှာ ပါဝင်ခဲ့တာဖြစ်ပြီး အဲဒီနှစ်က ပရီးမီးယားလိဂ်ဖလားကို မန်ချက်စတာ အသင်းအနေနဲ့ နောက်ဆုံး ရယူနိုင်ခဲ့တာပါ။
ကိုင်ဟာ ပြီးခဲ့တဲ့နှစ်က ပူးမားအားကစားကုမ္ပဏီကြီးအတွက် ကြော်ငြာ ရိုက်ကူးပေးခဲ့တာ ဖြစ်ပါတယ်။
ကိုင်ဟာ လာမယ့် ၁၀ နှစ်အတွင်းမှာ ယူနိုက်တက်အသင်းကြီးမှာ ပါဝင်နိုင်ဖို့ ရည်မှန်းထားတဲ့ အကြောင်းကို မကြာသေးခင်က ပြောထားတာပါ။
ကိုင်ရွန်းနီက “လာမယ့် ၁၀ နှစ်အတွင်းမှာ ကျနော်ဟာ ယူနိုက်တက် အသင်းနဲ့အတူ ပရီးမီးယားလိဂ်မှာ ကစားခွင့် ရဖို့ မျှော်လင့်ထားပါတယ်။ ဒါကို ကျနော်ကိုယ်တိုင် မြင်တွေ့နေရပေမယ့် ကြိုးကြိုးစားစား လုပ်ဆောင်ပြီး နောက် ကွယ်က အရာအားလုံးကို အကောင်အထည်ဖော်ဖို့ လိုအပ်ပါတယ်”လို့ ပြောခဲ့တာ ဖြစ်ပါတယ်။
Source: The Sun
- By CNI
- Category: အားကစား
- Hits: 678
CNI Sport News
၂၀၂၃ ခုနှစ်၊ မတ်လ ၂၀
အာဆင်နယ်အသင်းနည်းပြ အာတီတာက ပရီးမီးယားလိဂ်နောက်ဆုံးပွဲစဉ် ၁၀ ပွဲကို ဗိုလ်လုပွဲလို ကစားဖို့အတွက် နိုင်ငံပွဲတွေအပြီးမှာ တူညီတဲ့ စိတ်ထား၊ဆာလောင်မှုတွေနဲ့အတူ ပြန်လာဖို့ အသင်းသားတွေကို ပြောလိုက်ပါတယ်။
အာတီတာက “ကျနော်တို့ဟာ ပွဲတွေကို ထိန်းချုပ်နိုင်ပြီး လိဂ်မှာဆို ၆ ပွဲဆက်တိုက်အနိုင်ရခဲ့တာက အလွန် ကောင်းပါတယ်။ကျနော်တို့ကစားခဲ့တဲ့ ကစားပုံစံတွေ၊ ရရှိခဲ့တဲ့ ရလဒ်တွေကြောင့်လည်း ဒါက အလွန်ကောင်းမွန် တယ်လို့ ကျနော်တို့ ခံစားရပါတယ်။အခုအချိန်မှာတော့ ကျနော်တို့ ဒါကို ရပ်တန့်ရတော့မှာပါ။ဒါပေမယ့် နိုင်ငံ ပွဲစဉ်တွေကနေ ပြန်လာတဲ့အချိန်မှာ တူညီတဲ့ စိတ်ထား၊ ဆာလောင်မှုတွေနဲ့ ပြန်လာခဲ့ကြပါ။ကျနော်တို့ နောက်ထပ်ကစားရမှာက လိဒ်စ်နဲ့ ဖြစ်ပြီး အဲ့ဒီပွဲအတွက်ကို အာရုံစိုက်ထားပါတယ်”လို့ ပြောခဲ့တာပါ။
အာဆင်နယ်အသင်းဟာ တနင်္ဂနွေနေ့က ကစားခဲ့တဲ့ပွဲမှာ ပဲလေ့စ်အသင်းကို ၄ ဂိုး- ၁ ဂိုးနဲ့ အနိုင်ရခဲ့တာကြောင့် ဒုတိယနေရာက မန်စီးတီးအသင်းထက် ၁ ပွဲပို ကစားထားပြီး ရမှတ် ၈ မှတ်အသာနဲ့ ပရီးမီးယားလိဂ် အမှတ်ပေး ဇယားကို ဦးဆောင်နေတာဖြစ်ပါတယ်။အာဆင်နယ်အသင်းဟာ ၂၀၀၃-၀၄ နောက်ပိုင်း ပထမဆုံးအကြိမ် ပရီးမီးယားလိဂ်ချန်ပီယံဆုကို ရယူနိုင်ဖို့ ပစ်မှတ်ထားနေတာဖြစ်ပြီး သူတို့ရဲ့ လက်ကျန် ၁၀ ပွဲထဲမှာ လီဗာပူးလ်၊ မန်စီးတီး၊ ချယ်လ်ဆီးနဲ့ နယူးကာဆယ်အသင်းတို့ ပါဝင်နေတာပါ။
အာဆင်နယ်အသင်းတောင်ပံကစားသမား ဆာကာကတော့ ဒီလက်ကျန် ၁၀ ပွဲကို ဗိုလ်လုပွဲလို ကစားပြီး ကွင်းထဲ မှာ အရာအားလုံးပေးသွားမယ်လို့ ပြောခဲ့ပါတယ်။ဆာကာဟာ ဒီရာသီ အာဆင်နယ်အသင်းရဲ့ ပရီးမီးယားလိဂ်ပွဲ တိုင်းကို ပွဲစကတည်းက ပါဝင်ခွင့်ရခဲ့ပြီး သွင်းဂိုးနဲ့ ဂိုးဖန်တီးမှု ၁၀ ဂိုးနဲ့အထက် ပြုလုပ်နိုင်ခဲ့တဲ့ မှတ်တမ်းတစ်ခု ကိုလည်း ရရှိထားတာပါ။
ဆာကာက “ကျနော်တို့ ဗိုလ်လုပွဲ ၁၀ ပွဲကိုသွားရပါမယ်။ကျနော်တို့ဟာ ပြိုင်ပွဲတိုင်းမှာမရှိဘဲ ပရီးမီးယားလိဂ် တစ်ခုတည်းသာရှိတာပါ။ကျနော်တို့ဟာ ဒီပြိုင်ပွဲအတွက် အကောင်းဆုံးပြင်ဆင်ပြီး ကွင်းထဲမှာလည်း အရာ အားလုံးကို ပေးသွားမှာပါ။ကျနော်တို့ဟာ လူသားတွေဖြစ်တဲ့အတွက် ပင်ပန်းပါတယ်။ တစ်ခါတစ်ရံမှာ ခက်ခဲ ပေမယ့် အဆုံးမှာရတဲ့ ဆုဖလားက ကျနော်တို့ကို အရာအားလုံးပေးစွမ်းနိုင်မှာပါ” လို့ ပြောခဲ့ပါတယ်။
အာဆင်နယ်အသင်းဟာ မကြာသေးခင်ရက်ပိုင်းက စပို့တင်းလစ္စဘွန်းအသင်းကို ပင်နယ်တီအဆုံးအဖြတ်နဲ့ အရေးနိမ့်ပြီး ယူရိုပါလိဂ်က ထွက်ခွာခဲ့ရတာကြောင့် ပရီးမီးယားလိဂ်ဆုဖလားကို ရဖို့ ပိုပြီးအာရုံစိုက်လာနိုင်မှာ ဖြစ်တယ်လို့ ဘောလုံးပွဲဝေဖန်သုံးသပ်သူတွေက ပြောထားပါတယ်။
Source:DailyMail
- By CNI
- Category: ဆောင်းပါး
- Hits: 1846
CNI Sport Article
၂၀၂၃ ခုနှစ်၊ မတ်လ ၁၉
မကြာသေးခင် နှစ်တွေက အီတလီကလပ်တွေဟာ ဥရောပပြိုင်ပွဲမှာ အောင်မြင်မှုရဖို့ အလှမ်းဝေးနေခဲ့ပေမယ့် အခုနှစ် ရာသီမှာတော့ ဥရောပပြိုင်ပွဲတွေမှာ ပြန်ပြီး ခေါင်းမော့လာနိုင်မယ့် အရိပ်အယောင်တွေရှိနေတာ ဖြစ်ပါတယ်။
အီတလီကလပ်တွေဟာ ဥရောပပြိုင်ပွဲမှာ အောင်မြင်မှုတွေ အများအပြား ရယူနိုင်ခဲ့ပေမယ့် နောက်ပိုင်းနှစ်တွေမှာ တခြားနိုင်ငံက ကလပ်အသင်းတွေနဲ့ ယှဉ်ပြိုင်နိုင်ဖို့ ခက်ခဲတဲ့ အနေအထားမှာ ရှိခဲ့တာကို မြင်တွေ့ခဲ့ရပါတယ်။
ဒါပေမယ့် ဒီနှစ် ဥရောပပြိုင်ပွဲ ၃ ခုစလုံးရဲ့ ကွာတားဖိုင်နယ်အဆင့်မှာ အီတလီကလပ်တွေ ပါဝင်နေပြီး ချန်ပီယံ လိဂ် ပြိုင်ပွဲမှာဆို တခြားနိုင်ငံ အသင်းတွေထက် များပြားနေခဲ့တာ ဖြစ်ပါတယ်။
ချန်ပီယံလိဂ် ပြိုင်ပွဲရဲ့ ကွာတားဖိုင်နယ် အဆင့်မှာတော့ အီတလီ ထိပ်တန်း အသင်းကြီးတွေဖြစ်တဲ့ အေစီမီလန်၊ အင်တာမီလန်နဲ့ နာပိုလီအသင်းတို့ တက်ရောက်နေခဲ့တာပါ။ ဒါဟာ ၁၇ နှစ်အတွင်း ပထမဆုံးအကြိမ် အီတလီ ကလပ် ၃ သင်း ချန်ပီယံလိဂ် ပြိုင်ပွဲရဲ့ ကွာတားဖိုင်နယ်ကို ပထမဆုံးအကြိမ် တက်နိုင်ခဲ့တာ ဖြစ်ပါတယ်။
ဒီအချက်အလက်ကို ကြည့်လိုက်ရင် အီတလီကလပ်တွေ ချန်ပီယံလိဂ်ပြိုင်ပွဲမှာ အောင်မြင်မှုနဲ့ ဘယ်လောက်အထိ ဝေးနေလဲဆိုတာကို မြင်တွေ့ရမှာပါ။ အင်တာမီလန်ကတော့ ၂၀၁၁ နောက်ပိုင်းမှ ပထမဆုံးအကြိမ် ချန်ပီယံလိဂ် ကွာတားဖိုင်နယ် တက်နိုင်ခဲ့တာဖြစ်ပြီး အေစီမီလန်အသင်းဟာ ၂၀၁၂ နောက်ပိုင်း ပထမဆုံးအကြိမ် တက်နိုင်ခဲ့ ကာ နာပိုလီကတော့ သမိုင်းတစ်လျှောက် ပထမဆုံးအကြိမ် တက်နိုင်ခဲ့တာ ဖြစ်ပါတယ်။
ချန်ပီယံလိဂ်ပြိုင်ပွဲမှာ အီတလီကလပ် အသင်းတွေဟာ ချန်ပီယံဆုကို ၁၂ ကြိမ်အထိ ရရှိထားတာဖြစ်ပြီး နောက်ဆုံးအကြိမ် ရယူနိုင်ခဲ့တာက ၂၀၀၉ -၁၀ ရာသီက ဖြစ်ပါတယ်။
ရိုးမားအသင်းကိုတွေ့ရစဉ်
အဲဒီနှစ်မှာ မော်ရင်ဟို ကိုင်တွယ်ခဲ့တဲ့ အင်တာမီလန်အသင်းက ရယူနိုင်ခဲ့တာပါ။ အဲဒီနောက်ပိုင်းမှာ ဂျူဗင်တပ်စ် အသင်းက ၂၀၁၆-၁၇ ရာသီက ဗိုလ်လုပွဲအထိ တက်နိုင်ခဲ့တာကသာ အမြင့်ဆုံး အောင်မြင်မှု ဖြစ်ခဲ့ပါတယ်။
ပြီးခဲ့တဲ့ နောက်ပိုင်းနှစ်တွေမှာ အင်္ဂလန်နဲ့ စပိန်ကလပ်တွေသာ ချန်ပီယံလိဂ်ကို ကြီးစိုးပြီး အောင်မြင်မှုတွေ အများကြီး ရယူနိုင်ခဲ့ပါတယ်။ ဒါကို ကြည့်လိုက်ရင် ချန်ပီယံလိဂ်ပြိုင်ပွဲမှာ အီတလီကလပ်တွေ အောင်မြင်မှုနဲ့ ဘယ်လောက် ကြာကြာ ဝေးကွာနေလဲဆိုတာကို သိရမှာ ဖြစ်ပါတယ်။
အခုနှစ် ချန်ပီယံလိဂ် ကွာတားဖိုင်နယ် ပွဲစဉ်တွေ မဲခွဲလိုက်ချိန်မှာ အီတလီကလပ်တွေထဲက ၁ သင်းကတော့ အနိမ့် ဆုံး ဗိုလ်လုပွဲအထိ တက်နိုင်မယ့် လမ်းကြောင်းထဲမှာ ရောက်ရှိနေပါတယ်။
ကွာတားဖိုင်နယ်အတွက် မဲခွဲမှုမှာ အေစီမီလန်နဲ့ နာပိုလီအသင်းတို့ တွေ့ဆုံနေခဲ့ပြီး ဘင်ဖီကာနဲ့ အင်တာမီလန်တို့ တွေ့ဆုံနေခဲ့တာဖြစ်ကာ အနိုင်ရတဲ့ ၂ သင်းဟာ ဆီမီးဖိုင်နယ်မှာ တွေ့ရတော့မှာပါ။ အင်တာမီလန်သာ ဘင်ဖီကာ ကို အနိုင်ယူခဲ့မယ်ဆိုရင် အီတလီကလပ်တွေထဲက ၁ သင်းဟာ သေချာပေါက် ဗိုလ်လုပွဲကို တက်ဖို့ သေချာသွား မှာ ဖြစ်ပါတယ်။
ယူရိုပါလိဂ်ဘက်ကို ကြည့်ရရင် ကွာတားဖိုင်နယ်အဆင့်ကို ဂျူဗင်တပ်စ်နဲ့ ရိုးမားအသင်းတို့ တက်နိုင်ခဲ့တာပါ။
အင်တာအသင်းကိုတွေ့ရစဉ်
ဂျူဗင်တပ်စ်အသင်းဟာ ချန်ပီယံလိဂ်ကနေ ထွက်ခွာခဲ့ရပြီးနောက် ယူရိုပါလိဂ်ကို ဆင်းပြီး ကစားခဲ့ရတာဖြစ်ပြီး ရိုးမားကတော့ ယူရိုပါကွန်းဖရန့်စ်လိဂ် ပြိုင်ပွဲမှာ ချန်ပီယံဆုကို ရယူနိုင်ခဲ့တဲ့အတွက် ယူရိုပါလိဂ်ကို ဝင်ပြီးယှဉ်ပြိုင် ခဲ့ရတာ ဖြစ်ပါတယ်။
လက်ရှိ ကွာတားဖိုင်နယ်ကို တက်ရောက်လာတဲ့ ၈ သင်းမှာ အီတလီကလပ်က ၂ သင်းနဲ့ အများဆုံး ဖြစ်နေတာပါ။ ပြီးတော့ ကွာတားဖိုင်နယ်အတွက် မဲခွဲမှုတွေ ပြုလုပ်တာမှာလည်း ဒီ ၂ သင်းဟာ ထိပ်တိုက်တွေ့ဆုံမှု မရှိဘဲ ဆီမီးဖိုင်နယ်အတွက် လမ်းကြောင်းမှာလည်း တွေ့ဆုံမှုမရှိတာ ဖြစ်ပါတယ်။
အဲဒါကြောင့် အီတလီကလပ် ၂ သင်းဟာ ဗိုလ်လုပွဲမှာ ထိပ်တိုက်တွေ့ဆုံနိုင်တဲ့ အလားအလာမှာ ရှိနေတာပါ။
ဂျူဗင်တပ်စ်အသင်းကိုတွေ့ရစဉ်
ယူရိုပါလိဂ်ပြိုင်ပွဲမှာ အီတလီကလပ် အသင်းတွေဟာ ၉ ကြိမ်အထိ ဗိုလ်စွဲထားနိုင်ခဲ့ပေမယ့် နောက်ဆုံးအကြိမ် ဗိုလ်စွဲခဲ့တာက ၁၉၉၈- ၉၉ ရာသီက ပါးမားအသင်း ရယူနိုင်ခဲတာဖြစ်ပြီး အဲဒီနောက်ပိုင်း ၂၀၁၉-၂၀ ရာသီက အင်တာမီလန်အသင်း ဗိုလ်လုပွဲတက်နိုင်ခဲ့တာက အမြင့်ဆုံး အောင်မြင်မှု ဖြစ်ခဲ့ပါတယ်။
ယူရိုပါကွန်းဖရန့်စ်လိဂ်မှာတော့ ဖီအိုရင်တီးနား တစ်သင်းတည်းသာ တက်နိုင်ခဲ့ပြီး သူလည်း ခြေစွမ်းကောင်းမွန်ပြီး ရလဒ်ကောင်းတွေ ယူနိုင်မယ်ဆိုရင် ဗိုလ်လုပွဲတက်နိုင်မယ့် အခြေအနေမှာ ရှိနေတာပါ။ အဲဒါကြောင့် အီတလီ ကလပ် အသင်းတွေဟာ ဥရောပပြိုင်ပွဲတွေမှာ အောင်မြင်မှု ပြန်ရနိုင်မယ့် လမ်းစပေါ်မှာ ရှိနေပြီး ဒီပုံစံအတိုင်းသာ ဆက်သွားနိုင်ရင် အီတလီကလပ်တွေရဲ့ အောင်မြင်မှုကို မြင်ရဖို့ သိပ်ပြီး မလိုတော့တာ ဖြစ်ပါတယ်။
အီတလီကလပ်တွေသာ အောင်မြင်ခဲ့ရင် လက်ရွေးစင် အသင်းကြီးအတွက်လည်း အောင်ပွဲတွေကို ပြန်ရှာဖွေနိုင်ဖို့ အခြေအနေ ကောင်းလာမှာပါ။
အီတလီအသင်းဟာ ပြီးခဲ့တဲ့ ယူရို ၂၀၂၀ ပြိုင်ပွဲမှာ ချန်ပီယံဖြစ်ခဲ့ပေမယ့် ကမ္ဘာ့ဖလား ၂ ကြိမ်ဆက် မပါဝင်နိုင်ခဲ့ တာက နိုင်ငံရဲ့ပုံရိပ်ကို ကြီးမားစွာ ကျဆင်းစေခဲ့ပါတယ်။ အဲဒါကြောင့် ကလပ်အသင်းတွေရဲ့ အောင်မြင်မှုနဲ့ အစပျိုးပြီး နိုင်ငံရဲ့အောင်မြင်မှုတွေကို ပြန်ပြီး ရယူနိုင်မလားဆိုတာကို စောင့်ကြည့်ရမှာလည်း ဖြစ်ပါတယ်။
- By CNI
- Category: Watch TV
- Hits: 389
- By CNI
- Category: အားကစား
- Hits: 502
CNI Sport News
၂၀၂၃ ခုနှစ်၊ မတ်လ ၁၈
ပေါ်တူဂီအသင်းနည်းပြ မာတီးနတ်ဇ်က ရော်နယ်ဒိုဟာ အသင်းအတွက် အလွန်အရေးပါတဲ့သူ ဖြစ်တယ်လို့ ယူရို ၂၀၂၄ ပြိုင်ပွဲ ခြေစစ်ပွဲအတွက် လူစာရင်း ထုတ်ပြန်ခဲ့တာမှာ ပြောလိုက်ပါတယ်။
မာတီးနတ်ဇ်က “ရော်နယ်ဒိုဟာ နိုင်ငံအသင်းအတွက် အလွန်စိတ်အား ထက်သန်တဲ့ ကစားသမားပါ။ ရော်နယ်ဒို ဟာ အသင်းအတွက် သူ့ရဲ့ အတွေ့အကြုံတွေ ယူဆောင်ပေးလာနိုင်ပြီး အလွန်အရေးပါတဲ့ သူပါ။ အသက်အရွယ်နဲ့ တခြား ရှုထောင့်တွေကို ကျနော် မကြည့်ပါဘူး။ ရော်နယ်ဒိုဟာ အသင်းကို အကူအညီပေးဖို့နဲ့ သူ့ရဲ့ ကစားသမား ဘဝ အတွေ့အကြုံတွေကို တခြား ကစားသမားတွေဆီ ပို့ဆောင်ပေးနိုင်ဖို့ အခွင့်အရေး ရှိတယ်လို့ ကျနော် ထင်ပါ တယ်။ ဒီအဆင့်က ဒီမှာရှိနေတဲ့ ကစားသမားတွေအတွက် အရေးပါပါတယ်။ ကျနော်တို့ဟာ အနိုင်ရတဲ့အသင်း၊ ပြိုင်ဆိုင်မှုရှိတဲ့ အသင်းဖြစ်အောင် လုပ်ချင်ပါတယ်”လို့ ပြောခဲ့တာပါ။
ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲအပြီးမှာ အသက် ၃၈ နှစ်အရွယ်ရှိ ရော်နယ်ဒိုရဲ့ လက်ရွေးစင် အနာဂတ်နဲ့ ပတ်သက်တဲ့ မေးခွန်းတွေ အများကြီး ထွက်ခဲ့ပါတယ်။
ပေါ်တူဂီ အသင်းခေါင်းဆောင်ဟာ နည်းပြဟောင်း ဖာနန်ဒိုဆန်းတို့စ်ရဲ့ ကမ္ဘာ့ဖလားနောက်ဆုံး ၂ ပွဲမှာ လူစားဝင် ကစားသမားအဖြစ်သာ ပါဝင်ခဲ့ရပေမယ့် နည်းပြသစ် မာတီးနတ်ဇ်ကတော့ သူ့ကို ပွဲထွက် ကစားသမားအဖြစ် အသုံးပြုသွားဖို့ ရှိနေတာပါ။
ရော်နယ်ဒိုနဲ့ မာတီးနတ်ဇ်ကိုတွေ့ရစဉ်
ရော်နယ်ဒိုဟာ ပေါ်တူဂီအသင်းအတွက် ၁၉၆ ပွဲ ကစားထားအပြီးမှာ စံချိန်တင် ၁၁၈ ဂိုး သွင်းယူထားကာ နိုင်ငံတကာ ဂိုးသွင်း အများဆုံး ကစားသမားအဖြစ် ရပ်တည်နေတာ ဖြစ်ပါတယ်။
ရော်နယ်ဒိုဟာ လက်ရှိအချိန်မှာ ဆော်ဒီကလပ် အယ်လ်နာဆာအသင်းအတွက် ပါဝင်ကစားပေးနေပြီး ၉ ပွဲမှာ ၈ ဂိုးအထိ သွင်းယူထားကာ ဖေဖော်ဝါရီလအတွက် ဆော်ဒီလိဂ်ရဲ့ တစ်လတာ အကောင်းဆုံး ကစားသမားဆုကို ရယူနိုင်ခဲ့တာပါ။
ယူရိုခြေစစ်ပွဲ ကစားမယ့် ပေါ်တူဂီအသင်း လူစာရင်းမှာ ဝါရင့်နောက်ခံလူ ပီပီ၊ ဘာနာဒိုဆေးလ်ဗား၊ ဘရူနို ဖာနန် ဒက်စ်၊ ဂျာအိုဖိလစ်၊ ရာဖေးလ်လီယိုတို့ ပါဝင်နေခဲ့တာ ဖြစ်ပါတယ်။
မာတီးနတ်ဇ်က “ပေါ်တူဂီ ကစားသမားတွေရဲ့ အရည်အသွေးတွေကို ပြသနိုင်တဲ့ အသင်းတစ်သင်းကို တည် ဆောက် ချင်ပါတယ်။ ဒါက စမှတ်ဖြစ်ပြီး အရည်အသွေးတွေ၊ အတွေ့အကြုံတွေ၊ လူငယ်၊ ပြည်တွင်းမှာရော၊ ပြည်ပမှာပါ ကစားတဲ့ ကစားသမားတွေကို ကျနော်မြင်ပါတယ်။ နိုင်ငံအသင်းအတွက် သူတို့တွေအားလုံးရဲ့ ကတိကဝတ်တွေ အများကြီးကို ကျနော်တွေ့ခဲ့ရပါတယ်”လို့ ပြောခဲ့တာပါ။
ပေါ်တူဂီအသင်းဟာ ယူရို ၂၀၂၄ ခြေစစ်ပွဲအဖြစ် မတ်လ ၂၃ ရက်မှာ လက်ချင်စတိန်းနဲ့ အိမ်ကွင်း၊ နောက် ၃ ရက် အကြာ လူဇင်ဘတ်နဲ့ အဝေးကွင်းပွဲစဉ် ယှဉ်ပြိုင်ရမှာ ဖြစ်ပါတယ်။
Source: ESPN
- By CNI
- Category: အားကစား
- Hits: 437
CNI Sport News
၂၀၂၃ ခုနှစ်၊ မတ်လ ၁၇
ပရီးမီးယားလိဂ်ကလပ် ခရစ္စတယ်ပဲလေ့စ်အသင်းဟာ ၁၂ ပွဲဆက် နိုင်ပွဲပျောက်ဆုံးပြီးနောက် နည်းပြဖြစ်သူ ဗီအဲရာကို ရာထူးကနေ ထုတ်ပယ်လိုက်ပြီ ဖြစ်ပါတယ်။
ခရစ္စတယ်ပဲလေ့စ် အသင်းဟာ ၂၀၂၃ ထဲမှာ နိုင်ပွဲ လုံးဝမရသေးဘဲ နောက်ဆုံး ကစားတဲ့ပွဲမှာ ဘရိုက်တန်အသင်း ကို ၁ ဂိုး- ဂိုးမရှိနဲ့ အရေးနိမ့်ခဲ့ကာ ၃ ပွဲဆက် ရှုံးပွဲကြုံတွေ့ခဲ့တာပါ။
ခရစ္စတယ်ပဲလေ့စ်အသင်းဟာ အမှတ်ပေးဇယားအဆင့် ၁၂ နေရာမှာ ရပ်တည်နေပေမယ့် တန်းဆင်းဇုန်အဆင့် ၁၈ က ဘုန်းမောက်အသင်းနဲ့ ၃ မှတ်သာကွာဟပြီး ဘုန်းမောက်အသင်းဟာ ပွဲကစားဖို့ ၁ ပွဲကျန်ရှိနေတာ ဖြစ်ပါတယ်။
ခရစ္စတယ်ပဲလေ့စ်ဥက္ကဋ္ဌ စတိဗ်ပါရစ်က “ခက်ခဲတဲ့ ဆုံးဖြတ်ချက်ကို ချလိုက်ရတာပါ။ မကြာသေးခင် လတွေ အတွင်းက ရလဒ်တွေက ကျနော်တို့ကို လိဂ်မှာ မရေရာတဲ့ အနေအထားမှာ ရှိနေစေခဲ့ပါတယ်။ ပရီးမီးယားလိဂ် အဆင့်အတန်းကို ဆက်ထိန်းထားနိုင်ဖို့အတွက် အပြောင်းအလဲတစ်ခု လိုအပ်တယ်လို့ ခံစားရကြောင်း” ပြောခဲ့ တာပါ။
ဗီအဲရာကို တွေ့ရစဉ်
ခရစ္စတယ်ပဲလေ့စ်အသင်းဟာ ၂၀၂၁-၂၂ ရာသီ မစတင်ခင်က ဗီအဲရာကို နည်းပြသစ်အဖြစ် ခန့်အပ်ခဲ့ပြီး အဆင့် ၁၂ နေရာနဲ့ ရာသီအဆုံးသတ်ခဲ့ကာ အသင်းကို တိုက်စစ်ကစားပုံစတိုင် ပြုလုပ်ပေးခဲ့လို့ ချီးကျူးမှုတွေ ရရှိခဲ့ပါတယ်။
ဒါပေမယ့် အခုနှစ် ရာသီမှာတော့ အသင်းဟာ ၂၇ ပွဲ ကစားအပြီးမှာ ၂၁ ဂိုးသာ သွင်းယူနိုင်ခဲ့ပြီး သူတို့ထက် သွင်းဂိုး နည်းတာဆိုလို့ ဝုလ်ဗ်စ်၊ အဲဗာတန်နဲ့ ဆောက်သမ်တန်အသင်းတို့သာ ရှိခဲ့တာပါ။
ဘရိုက်တန်အသင်းကို အရေးမနိမ့်ခင်မှာ ပဲလေ့စ်အသင်းဟာ ၃ ပွဲဆက်တိုက် ဂိုးပေါက်တည့်မှု မရှိခဲ့ပါဘူး။
ဗီအဲရာရဲ့ နည်းပြအဖွဲ့ဝင် ၃ ဦးစလုံးကလည်း အသင်းကနေ ထွက်ခွာခဲ့ပြီး ကလပ်အသင်းကတော့ နည်းပြသစ် ရှာဖွေရေး လုပ်ငန်းစဉ်တွေကို လုပ်ဆောင်နေပြီ ဖြစ်ပါတယ်။
ခရစ္စတယ်ပဲလေ့စ်အသင်းဟာ တနင်္ဂနွေနေ့မှာ ပရီးမီးယားလိဂ် ပွဲစဉ်အဖြစ် ဗီအဲရာရဲ့ အသင်းဟောင်း အာဆင်နယ် အသင်းနဲ့ ယှဉ်ပြိုင်ရမှာ ဖြစ်ပါတယ်။
Source: BBC
- By CNI
- Category: Watch TV
- Hits: 393
- By CNI
- Category: အားကစား
- Hits: 539
CNI Sport News
၂၀၂၃ ခုနှစ်၊ မတ်လ ၁၅
မန်စီးတီးအသင်းက လိုက်ပ်ဇစ်အသင်းကို ၇ ဂိုး- ဂိုးမရှိနဲ့ ဂိုးပြတ်အနိုင်ရခဲ့တဲ့ပွဲမှာ ၅ ဂိုးသွင်းယူနိုင်ခဲ့တဲ့ ဟာလန်း အနေနဲ့ စံချိန်တွေထပ်တင်ရင် ဘဝက ပျင်းစရာကောင်းတော့မယ်လို့ နည်းပြဖြစ်သူ ဂွာဒီယိုလာက ပြောလိုက်ပါတယ်။
ဂွာဒီယိုလာက “ဟာလန်းသာ အသက် ၂၂ နှစ်အရွယ်မှာတင် ဒီမှတ်တိုင်ကို အောင်မြင်ခဲ့မယ်ဆိုရင် သူ့ဘဝက ပျင်းစရာကောင်းသွားပါလိမ့်မယ်။ဒါကြောင့် အနာဂတ်မှာ ဒါကိုလုပ်နိုင်ဖို့ သူရည်မှန်းထားရပါမယ်။ ဒီနေရာမှာရော နေရာတိုင်းမှာပါ။ ဒါကြောင့် သူ့ကို ကျနော်လူစားလဲခဲ့တာ”လို့ ပြောခဲ့တာပါ။
ဟာလန်းဟာ ဒီပွဲမှာ ၅ ဂိုးသွင်းယူနိုင်ခဲ့တဲ့အတွက် ချန်ပီယံလိဂ်သမိုင်းမှာ တစ်ပွဲတည်း ၅ ဂိုးသွင်းယူနိုင်ခဲ့တဲ့ တတိယမြောက်ကစားသမား ဖြစ်လာခဲ့ပါတယ်။ ဟာလန်းရဲ့အရှေ့မှာ တစ်ပွဲတည်း ၅ ဂိုးသွင်းယူထားတဲ့ ကစားသမား ၂ ဦးကတော့ အက်ဒရီယာနိုနဲ့ မက်ဆီတို့ပါ။ ဒါပေမယ့် မန်စီးတီးတိုက်စစ်မှူးဟာ သူတို့နှစ်ဦးထက် မိနစ်အနည်းငယ်နဲ့ ၅ ဂိုးသွင်းယူနိုင်တဲ့ မှတ်တမ်းတစ်ရပ်ကို ရရှိခဲ့ပါတယ်။
ချန်ပီယံလိဂ်သမိုင်းမှာ တစ်ပွဲတည်း ၆ ဂိုးသွင်းယူထားတဲ့ ကစားသမားအခုထိ မရှိသေးပါဘူး။အဲဒါကြောင့် ဟာလန်းက ဒီစံချိန်ကို တင်နိုင်ဖို့အတွက် မျှော်လင့်လို့ရခဲ့ပေမယ့် နည်းပြ ဂွာဒီယိုလာက ပွဲချိန် ၆၃ မိနစ်မှာ လူစားလဲခဲ့တာကြောင့် မျှော်လင့်ချက် ပျက်ပြယ်ခဲ့ရတာဖြစ်ပါတယ်။ဟာလန်းကလည်း သူ့ကိုလူစားလဲချိန်မှာ နည်းပြ ဂွာဒီယိုလာကို ဒီထက်ပိုပြီး ဂိုးသွင်းယူချင်တဲ့အကြောင်း ပြောခဲ့တယ်လို့ ဖွင့်ဟခဲ့ပါတယ်။
ဟာလန်းက “ကျနော်လူစားလဲ ခံရချိန်တုန်းက ဟတ်ထရစ် ၂ ကြိမ်သွင်းယူချင်တယ်လို့ ဂွာဒီယိုလာကို ပြောခဲ့ပါတယ်။ဒါပေမယ့် ကျနော်ဘာလုပ်နိုင်မှာလဲ။ကျနော် ဒီပြိုင်ပွဲကို အလွန်နှစ်သက်ပြီး ချန်ပီယံလိဂ်ပြိုင်ပွဲကို သဘောကျပါတယ်”လို့ ပြောခဲ့တာပါ။
ဟာလန်းဟာ လက်ရှိချန်ပီယံလိဂ်ပြိုင်ပွဲမှာ ၂၅ ပွဲကစားထားတာမှာ ၃၃ ဂိုးအထိ သွင်းယူထားပြီး ချန်ပီယံလိဂ် သမိုင်းတစ်လျှောက် အသက်အငယ်ဆုံးနဲ့ အမြန်ဆုံးသွင်းဂိုး ၃၀ ပြည့်တဲ့ ကစားသမားအဖြစ်လည်း မှတ်တမ်းတင် နိုင်ခဲ့ပါတယ်။ နော်ဝေတိုက်စစ်မှူးဟာ ဒီရာသီမှာ မန်စီးတီးအသင်းအတွက် ခြေစွမ်းပြသနေပြီး ပြိုင်ပွဲစုံ ၃၆ ပွဲ ကစားထားတာမှာ ၃၉ ဂိုးအထိ သွင်းယူထားတာပါ။
မန်စီးတီးအသင်းဟာ ချန်ပီယံလိဂ် ၁၆ သင်းအဆင့် ဒုတိယအကျော့ပွဲစဉ်မှာ လိုက်ပ်ဇစ်အသင်းကို ၇ ဂိုးပြတ်နဲ့ အနိုင်ရခဲ့တာကြောင့် နှစ်ကျော့ပေါင်းရလဒ် ၈ ဂိုး- ၁ ဂိုးနဲ့ ကွာတားဖိုင်နယ်အဆင့်ကို တက်ရောက်သွားပြီ ဖြစ်ပါတယ်။ မန်စီးတီးအသင်းဟာ ဒီတစ်ပတ်မှာတော့ အက်ဖ်အေဖလား ကွာတားဖိုင်နယ်ပွဲစဉ်အဖြစ် ဘန်လေ အသင်းနဲ့ ယှဉ်ပြိုင်ရမှာဖြစ်ပါတယ်။
Source:ChannelNewsAsia
Page 6 of 80
Connect with us
