CNI International News

တိုကျို၊ ဧပြီ ၈

အီရန်နိုင်ငံတွင် ဖြစ်ပွားနေသော စစ်ပွဲကြောင့် ဂျပန်နိုင်ငံ၏ စီးပွားရေးအပေါ် ရိုက်ခတ်မှုများမှာ  ပြင်းထန်စွာ သက်ရောက်နေကြောင်း Nikkei Asia မှ ဖော်ပြထားသည်။

ဟော်မုဇ်ရေလက်ကြား ပိတ်ဆို့မှုကြောင့် ဂျပန်နိုင်ငံ၏ အဓိက အားထားရာ အရှေ့အလယ်ပိုင်းမှ ရေနံတင်သွင်းမှု လမ်းကြောင်းမှာ အနှောင့်အယှက်များနှင့် ရင်ဆိုင်နေရသည်။

လောင်စာဆီဈေးနှုန်း မြင့်တက်လာမှုကြောင့် လျှပ်စစ်ဓာတ်အားခနှင့် တင်သွင်းရသည့် အခြေခံ စားသောက်ကုန် များမှာလည်း သိသိသာသာ ဈေးနှုန်း မြင့်တက်လာခဲ့သည်။

ဂျပန်နိုင်ငံရှိ ရိုးရာအများသုံး ရေချိုးခန်း (Sento) များသည် ရေပူများ ထောက်ပံ့ပေးရန် ကုန်ကျစရိတ် မြင့်မား လာခြင်းကြောင့် ဝန်ဆောင်ခများကို တိုးမြှင့်လိုက်ရသည်။

တစ်ချိန်တည်းမှာပင် ယန်းငွေတန်ဖိုး ကျဆင်းမှုနှင့် သယ်ယူပို့ဆောင်ရေး စရိတ်များကြောင့် ပေါင်မုန့်၊ ကြက်ဥနှင့် နို့ထွက်ပစ္စည်းများမှာ စံချိန်တင် ဈေးနှုန်းများသို့ ရောက်ရှိနေသည်။

ဂျပန်နိုင်ငံသားများကို တွေ့ရစဉ်

ရေနံစိမ်းဈေးနှုန်းမှာ တစ်စည်လျှင် အမေရိကန်ဒေါ်လာ ၁၁၀ ကျော်အထိ မြင့်တက်သွားခြင်းက ဂျပန်စွမ်းအင် ကုမ္ပဏီများအတွက် ကြီးမားသော ဝန်ထုပ်ဝန်ပိုး ဖြစ်စေသည်။

ဂျပန်အစိုးရသည် ပြည်သူများကို စွမ်းအင်ချွေတာ သုံးစွဲကြရန် တိုက်တွန်းထားရသည့်အပြင် အရေးပေါ် သိုလှောင်ထားသည့် အရန်ရေနံများကိုလည်း စတင်ထုတ်သုံးနေရပြီ ဖြစ်သည်။

တိုကျိုစတော့ အိတ်ချိန်း ဈေးကွက်တွင်လည်း Nikkei 225 အညွှန်းကိန်းများ သိသိသာသာ ကျဆင်းနေပြီး ရင်းနှီးမြှုပ်နှံသူများကြား စိုးရိမ်မှုများ မြင့်တက်နေသည်။

သင်္ဘောလိုင်းများ လမ်းကြောင်း ပြောင်းရခြင်းကြောင့် ကုန်စည်စီးဆင်းမှု ကြန့်ကြာကာ ကုန်ထုတ်လုပ်မှုကဏ္ဍ တွင်လည်း အခက်အခဲများ ကြုံတွေ့နေရသည်။

ထို့ကြောင့် အီရန်စစ်ပွဲ ကြာရှည်လာသည်နှင့်အမျှ ဂျပန်နိုင်ငံ၏ စီးပွားရေးမှာ ငွေကြေးဖောင်းပွမှုနှင့် စီးပွားရေး တုံ့ဆိုင်းမှုဒဏ်ကို တစ်ပြိုင်နက်တည်း ခံစားရနိုင်ခြေရှိကြောင်း ကျွမ်းကျင်သူများက သုံးသပ်ထားသည်။

Source: Nikkei Asia

CNI International News

ဘန်ကောက် ၊ ဧပြီ ၈

အီရန်ပဋိပက္ခကြောင့် ကမ္ဘာ့ရေနံဈေးနှုန်းများ အရှိန်အဟုန်ဖြင့် မြင့်တက်လာမှုသည် ထိုင်းနိုင်ငံ၏ ငါးဖမ်းလုပ်ငန်း ကဏ္ဍအပေါ် ကြီးမားသော ရိုက်ခတ်မှုများ ဖြစ်ပေါ်စေကြောင်း Nikkei Asia မှ ဖော်ပြခဲ့သည်။

ငါးဖမ်းလုပ်ငန်း၏ ကုန်ကျစရိတ် ၇၀ ရာခိုင်နှုန်းခန့်မှာ လောင်စာဆီ စရိတ်ဖြစ်သဖြင့် လက်ရှိ ဈေးနှုန်းများအရ ပင်လယ်ထဲသို့ ငါးဖမ်းထွက်ပါက အရှုံးပေါ်နိုင်ခြေ ပိုများနေသည်။

လက်ရှိတွင် သင်္ဘော အများအပြားသည် ဆိပ်ကမ်းများတွင်သာ ရပ်နားထားရပြီး အချို့မှာ လုပ်ငန်းများကို ယာယီ ရပ်ဆိုင်းထားရကြောင်း ထိုင်းငါးဖမ်းလုပ်ငန်းအဖွဲ့ချုပ်က ပြောကြားခဲ့သည်။

ယခုကဲ့သို့ ငါးဖမ်းသင်္ဘောများ ပင်လယ်ပြင် မထွက်နိုင်ခြင်းက ပြည်တွင်း ပင်လယ်စာ ဈေးကွက်တွင် ကုန်ပစ္စည်း ပြတ်လပ်မှုနှင့် ဈေးနှုန်းကြီးမြင့်မှုကို ဖြစ်ပေါ်စေနိုင်သည်။

ထိုင်းစက်သုံးဆီဆိုင်ကို တွေ့ရစဉ်

ထိုင်းအစိုးရ အနေဖြင့် ငါးဖမ်းသမားများအတွက် လောင်စာဆီ ထောက်ပံ့ကြေးပေးရန် စဉ်းစားနေသော်လည်း ဘဏ္ဍာရေး ဝန်ထုပ်ဝန်ပိုးကြောင့် အခက်တွေ့နေသည်ဟု ဆိုသည်။

စစ်ပွဲကြာရှည်လာသည်နှင့်အမျှ ထိုင်းနိုင်ငံ၏ ပင်လယ်စာ ပို့ကုန်ကဏ္ဍသည်လည်း ကမ္ဘာ့ဈေးကွက်တွင် ယှဉ်ပြိုင် နိုင်စွမ်း ကျဆင်းလာမည့် အရေးကို စိုးရိမ်နေကြကာ ငါးဖမ်းသမားများနှင့် ရေလုပ်သား ထောင်ပေါင်းများစွာမှာ လည်း နေ့စဉ်ဝင်ငွေ မရှိတော့ဘဲ စားဝတ်နေရေး အကျပ်အတည်းနှင့် ရင်ဆိုင်နေရသည်။

သယ်ယူပို့ဆောင်ရေးနှင့် အအေးခန်း သိုလှောင်မှု စရိတ်များပါ မြင့်တက်လာခြင်းကြောင့် ငါးဖမ်းလုပ်ငန်းခွင် တစ်ခုလုံး၏ ထောက်ပံ့ရေးကွင်းဆက်မှာ ကမောက်ကမ ဖြစ်နေသည်။

အကယ်၍ လောင်စာဆီ ဈေးနှုန်းများ ဆက်လက် မြင့်တက်နေပါက ထိုင်းငါးဖမ်းလုပ်ငန်း၏ ရေရှည်တည်တံ့မှုမှာ ကြီးမားသော ခြိမ်းခြောက်မှုအောက်သို့ ရောက်ရှိသွားမည်ဖြစ်သည်။

Source: Nikkei Asia

CNI International News

ဘန်ကောက်၊ ဧပြီ ၇

ပြည်ပခရီးသွားများ အနေဖြင့် ထိုင်းနိုင်ငံသို့ မဝင်ရောက်မီ မတော်တဆထိခိုက်မှု အာမခံ (Accident Insurance) မဖြစ်မနေ ဝယ်ယူထားရှိရန် လိုအပ်မည့် စည်းမျဉ်းသစ်များ ချမှတ်နိုင်ရန် ထိုင်းအစိုးရက တွန်းအားပေး လုပ် ဆောင်နေသည်ဟု ဘန်ကောက်ပို့စ်မှ ဖော်ပြခဲ့သည်။

ခရီးသွားများ ဆေးကုသစရိတ် မပေးဆောင်နိုင်မှုနှင့် မတော်တဆမှု အန္တရာယ်များ မြင့်တက်လာခြင်းကြောင့် ပြည်သူ့ကျန်းမာရေးကဏ္ဍအပေါ် ဝန်ထုပ်ဝန်ပိုး ဖြစ်လာခြင်းကို ဖြေရှင်းရန် ယခုကဲ့သို့ စီစဉ်လာခဲ့ခြင်းဖြစ်သည်။

“အာမခံမရှိတဲ့ ပြည်ပနိုင်ငံသား လူနာတွေရဲ့ ဆေးကုသစရိတ်အတွက် ကျနော်တို့ ဆေးရုံက တစ်နှစ်ကို ဘတ် ၁၀ သန်းလောက် အရှုံးခံ စိုက်ထုတ်ပေးနေရပါတယ်”ဟု Vachira Phuket ဆေးရုံ၏ ညွှန်ကြားရေးမှူးက ပြောကြား ခဲ့သည်။

ဆိုင်ကယ်စီး ကျွမ်းကျင်မှု မရှိခြင်း၊ အရက်နှင့် မူးယစ်ဆေးဝါး သုံးစွဲခြင်းတို့ကြောင့် မတော်တဆမှုများ ဖြစ်ပွားရ ခြင်းဖြစ်ကြောင်း ၎င်းက ထောက်ပြခဲ့သည်။

“ဖူးခက်ကို လာလည်တဲ့ ခရီးသွား အများစုဟာ ဆိုင်ကယ်ကို ပထမဆုံးအကြိမ် စပြီး စီးကြည့်ကြတာဖြစ်လို့ မတော်တဆ ဖြစ်ပွားနိုင်ခြေ အန္တရာယ် ပိုများနေပါတယ်”ဟု ၎င်းက ပြောသည်။

နိုင်ငံခြားသား လူနာများထံမှ ဆေးကုသစရိတ် မရဘဲ ကျန်ရှိနေသည့် ပမာဏမှာ တစ်နှစ်လျှင် အနည်းဆုံး ဘတ် သန်း ၁၀၀ ခန့်ရှိမည်ဟု ထိုင်းပြည်သူ့ကျန်းမာရေးဝန်ကြီးဌာနက ခန့်မှန်းထားသည်။

ထိုင်းလေဆိပ်မှာ ခရီးသွားများကို တွေ့ရစဉ် 

အထူးသဖြင့် ကမ္ဘာလှည့်ခရီးသွား အများဆုံး လာရောက်သည့် ဖူးခက် (Phuket) နှင့် ချင်းမိုင် (Chiang Mai) ကဲ့သို့သော မြို့ကြီးများတွင် အဆိုးရွားဆုံး သက်ရောက်မှု ရှိနေသည်ဟု ဆိုသည်။

လူသားချင်းစာနာထောက်ထားမှုဆိုင်ရာ ကျင့်ဝတ်များအရ အရေးပေါ် ကုသမှုများကို အချိန်ရွှေ့ဆိုင်းထား၍ မရ သောကြောင့် ဆေးရုံများ အနေဖြင့် လူနာတွင် ငွေပေးချေနိုင်သည်ဖြစ်စေ၊ မပေးချေနိုင်သည်ဖြစ်စေ ကုသပေးရ လေ့ ရှိသည်။

ထို့ကြောင့် ဆေးရုံများနှင့် ကျန်းမာရေးဌာနများမှာ ထိုကုန်ကျစရိတ်များကို စိုက်ထုတ်ပြီး ကုသပေးနေရသည်။

ခရီးသွားလုပ်ငန်းဆိုင်ရာ အချက်အလက်များအရ သီတင်းပတ်နှစ်ပတ်ကြာ နေထိုင်မည့် ခရီးစဉ်အတွက် ခရီးသွား အာမခံကြေးမှာ ဘတ် ၁,၁၀၀ ခန့်သာ ကျသင့်ပြီး ထိုအာမခံတွင် ဆေးကုသမှုအတွက် ဘတ် ၃ ဒသမ ၆ သန်းမှ ၉ သန်း အထိ အာမခံငွေ ပေးထားလေ့ရှိသည်။

သို့သော် အာမခံကြေးမှာ သက်သာသော်လည်း ခရီးသွား အများစုမှာ အာမခံမရှိဘဲ လာရောက်နေကြဆဲ ဖြစ်ကြောင်း သတင်းတွင် ဖော်ပြထားသည်။

Source: ဘန်ကောက်ပို့စ်

CNI International News

ဒါကာ၊ ဧပြီ ၇

အီရန်စစ်ပွဲကြောင့် ဘင်္ဂလားဒေ့ရှ် အထည်ချုပ် လုပ်ငန်းများ ကုန်ကျစရိတ် မြင့်တက်လာနေကြောင်း Nikkei Asia မှ ဖော်ပြခဲ့သည်။

အဆိုပါ စစ်ပွဲကြောင့် အဓိကကျသည့် ဓာတုချည်မျှင်များနှင့် ဓာတုပစ္စည်း ဈေးနှုန်းများ ၁၀ ရာခိုင်နှုန်းမှ ၁၅ ရာခိုင်နှုန်းအထိ မြင့်တက်လာခြင်းနှင့် အထည်ထုပ်ပိုးရာတွင် အသုံးပြုသည့် Polybag အိတ်ဈေးနှုန်းများက ၃ ဆအထိ မြင့်တက်သွားခြင်းတို့ကြောင့် ဘင်္ဂလားဒေ့ရှ်နိုင်ငံ၏ အထည်ချုပ်လုပ်ငန်းရှင်များမှာ အခက်တွေ့နေကြ သည်။

လက်ရှိ အော်ဒါများအတွက် ဝယ်ယူသူများဘက်မှ ဈေးပိုပေးရန်  ငြင်းဆန်နေကြသဖြင့် လုပ်ငန်းအမြတ်ငွေ ရရှိမှုအပေါ် ဖိအားများ သက်ရောက်လျက်ရှိသည်။

ဘင်္ဂလားဒေ့ရှ် အထည်ချုပ်လုပ်ငန်းသည် အမြတ်ငွေ ၄ ရာခိုင်နှုန်း အောက်တွင် လည်ပတ်နေရခြင်းဖြစ်ပြီး ယခု အခါ၌ အော်ဒါအဟောင်းများအတွက် ဝယ်ယူသူများဘက်မှ ဈေးနှုန်း တိုးမပေးခြင်းကြောင့် ကုန်ကြမ်း ဈေးတက် သည့်ဒဏ်ကို စက်ရုံပိုင်ရှင်များကသာ အရှုံးခံပြီး လည်ပတ်နေရခြင်းဖြစ်သည်။

ထို့ပြင် အီရန်စစ်ပွဲကြောင့် ကမ္ဘာ့စီးပွားရေး မတည်ငြိမ်သည့် အချိန်မျိုးတွင် ဥရောပနှင့် အမေရိကန်မှ ဝယ်ယူ သူများက အော်ဒါများကို လျှော့ချလာခြင်း သို့မဟုတ် နီးစပ်ရာ နိုင်ငံများတွင်သာ အော်ဒါမှာယူခြင်းမျိုး လုပ်လာ ခဲ့ကြသည်ဟု ဆိုသည်။

ဘင်္ဂလားဒေ့ရှ် အထည်ချုပ်လုပ်ငန်းကို တွေ့ရစဉ်

တစ်ချိန်တည်းမှာပင် ဘင်္ဂလားဒေ့ရှ်နိုင်ငံသည် စွမ်းအင်အတွက် အရှေ့အလယ်ပိုင်းကို မှီခိုနေရသဖြင့် စစ်ပွဲကြောင့် လောင်စာဆီနှင့် သဘာဝဓာတ်ငွေ့ ပြတ်လပ်မှုများနှင့် ရင်ဆိုင်နေရသည်။

ထို့ကြောင့် စက်ရုံများတွင် လျှပ်စစ်မီး မှန်မှန်မရဘဲ ကုန်ထုတ်လုပ်မှု လုပ်ငန်းစဉ်များ ရပ်တန့်ရမည့် အခြေအနေ မျိုးအထိ သက်ရောက်မှု ရှိနေသည်။

၂၀၂၆ ခုနှစ်၊ မတ်လတွင် ဘင်္ဂလားဒေ့ရှ်၏ အထည်ချုပ် ပို့ကုန်သည် ပြီးခဲ့သည့် ကာလတူနှင့် နှိုင်းယှဉ်ပါက ၁၉ ဒသမ ၃၅ ရာခိုင်နှုန်းအထိ ကျဆင်းသွားသည်။

အထူးသဖြင့် ဥရောပဈေးကွက်သို့ တင်ပို့မှုမှာ အဆိုးရွားဆုံး ထိခိုက်ခဲ့ပြီး ၂၀၂၆ ခုနှစ်၊ ဇန်နဝါရီလမှာပင် ၂၅ ရာခိုင်နှုန်းကျော် ကျဆင်းခဲ့သည်ဟု နောက်ဆုံးရ သတင်းများတွင် ဖော်ပြထားသည်။

ပြီးခဲ့သည့်နှစ်က ပို့ကုန်ဝင်ငွေ ဒေါ်လာ ၄၈ ဘီလျံကျော် ရရှိခဲ့ပြီး နိုင်ငံ့ပို့ကုန်ဝင်ငွေ စုစုပေါင်း၏ ၈၀ ရာခိုင်နှုန်း ကျော်ကို ရှာဖွေပေးနေသည့် ဘင်္ဂလားဒေ့ရှ် အထည်ချုပ်ကဏ္ဍသည် အလုပ်သမားပေါင်း ၄ သန်းခန့်ကို အလုပ် အကိုင် ပေးထားသည်။

Source: Nikkei Asia

CNI International News

နယူးဒေလီ၊ ဧပြီ ၃

အရှေ့အလယ်ပိုင်းဒေသတွင် အမေရိကန်၊ အစ္စရေးနှင့် အီရန်ကြား ဖြစ်ပွားနေသည့် စစ်ပွဲကြောင့် အိန္ဒိယ၏ ဖန်ထည်လုပ်ငန်း ထိခိုက်လာခဲ့သည်ဟု ရိုက်တာမှ ဖော်ပြခဲ့သည်။

ထို့နောက် အိန္ဒိယ၏ ကုန်ထုတ်လုပ်မှုကဏ္ဍ မြှင့်တင်ရေး ကြိုးပမ်းမှုအတွက် စိန်ခေါ်မှုဖြစ်လာသည်။

အနှစ် ၄၀၀ ကြာ ဖန်ထည်များ ထုတ်လုပ်မှု အစဉ်အလာကြောင့် ဖန်သားမြို့တော် (Glass City) ဟု လူသိများ သည့် အိန္ဒိယနိုင်ငံ၊ ဖီရိုဇာဘတ် (Firozabad) မြို့၏ ဖန်ထည်လုပ်ငန်းများတွင် အသုံးပြုနေသည့် မီးဖိုကြီးများသည် လောင်စာပြတ်လပ်မှုနှင့် ရင်ဆိုင်နေရသည်။

ထို့ပြင် ပုံမှန်အားဖြင့် ဖန်ထည်လုပ်ငန်း ထုတ်လုပ်မှု အကောင်းဆုံး ရာသီဖြစ်သည့် ယခုအချိန်မျိုးတွင် ထောင်နှင့်ချီ သော နေ့စား အလုပ်သမားများသည် အလုပ်လက်မဲ့ ဖြစ်ခဲ့သည်။

အရှေ့အလယ်ပိုင်းတွင် ဖြစ်ပွားနေသော စစ်ပွဲကြောင့် လောင်စာ အများအပြား အသုံးပြုရသည့် ဖန်ထည် လုပ်ငန်းသည် အကြီးအကျယ် ထိခိုက်ပျက်စီး နေရခြင်းဖြစ်သည်။

ဖန်ထည်လုပ်ငန်း တစ်ခုကို တွေ့ရစဉ်

ဖန်ထည်များ ပြုလုပ်ရာတွင် ဖန်ရည်များ ပျစ်ခဲမသွားစေရန်နှင့် အနာအဆာများ မဖြစ်ပေါ်စေရန်အတွက် ဂတ်စ် ဖြင့် လောင်စာပေးရသော အပူပေးခန်းများကို ၁၀၀၀ ဒီဂရီဆဲလ်စီးယပ်စ် အထက်တွင် အမြဲမပြတ် အပူပေးထား ရန် လိုအပ်သည်။

အိန္ဒိယနိုင်ငံ၏ စီးပွားရေးကဏ္ဍတွင် လုပ်ငန်းကြီးများ၊ လုပ်ငန်းငယ်များ၊ အိမ်ထောင်စုများ၊ စိုက်ပျိုးရေးနှင့် ပြည်သူ့ သယ်ယူပို့ဆောင်ရေး လုပ်ငန်းများ၌ သဘာဝဓာတ်ငွေ့ကို အလွန်အမင်း မှီခိုနေရခြင်းကြောင့် အာရှမှာ အီရန်စစ်ပွဲ ၏ ဂယက်ရိုက်ခတ်မှုဒဏ်ကို အိန္ဒိယစက်ရုံများက အဆိုးရွားဆုံး ခံစားနေရသည်။

အိန္ဒိယအစိုးရသည် လောင်စာအတွက် ရေနံကိုသာ အရေးပေါ်အဖြစ် အရန် သိုလှောင်ထားလေ့ ရှိသော်လည်း ဓာတ်ငွေ့ကိုမူ သိုလှောင်ထားခြင်း မရှိပေ။

ထို့ကြောင့် ဓာတ်ငွေ့ရရှိမှု လျော့နည်းလာပါက စက်မှုလုပ်ငန်းများသို့ ဖြန့်ဖြူးပေးမှုကို ဦးစွာဖြတ်တောက်လေ့ ရှိသည်။

ထိုကဲ့သို့ ဓာတ်ငွေ့များ ပြတ်လပ်လာမှုကြောင့် ပြီးခဲ့သည့်လအထိ အလုပ်သမား ၅၀၀ ကျော် ခန့်အပ်ထားသည့် ဖန်ထည်လုပ်ငန်းခွင် တစ်ခုတွင် ယခုအခါ အလုပ်သမား ၂၀၀ အောက်သာရှိတော့ကြောင်း ဖန်ထည်လုပ်ငန်း လုပ်ကိုင်သူတစ်ဦးက ပြောကြားခဲ့သည်။

အသေးစား ဖန်ထည်လက်မှုပညာရှင် အများအပြားမှာလည်း သဘာဝဓာတ်ငွေ့ ပြန်လည်ရရှိမည့် အချိန်နှင့် ဈေးနှုန်းသက်သာစွာ ဝယ်ယူနိုင်မည့် အချိန်ကို စောင့်ဆိုင်းနေပြီး ၎င်းတို့၏ အရောင်းဆိုင်များကို ပိတ်ထားရသည်။

Source: ရိုက်တာ

CNI International News

ဘန်ကောက်၊ ဧပြီ ၂

အမေရိကန်-အီရန် စစ်ပွဲ၏ နောက်ဆက်တွဲ ဂယက်ရိုက်ခတ်မှုများကြောင့် ထိုင်းနိုင်ငံသည် နိုင်ငံခြား ခရီးသွား ဝင်ရောက်မှု ခန့်မှန်းချက်ကို လျှော့ချလိုက်ကြောင်း The Nation မှ ဖော်ပြခဲ့သည်။

အရှေ့အလယ်ပိုင်း စစ်ပွဲသည် နိုင်ငံတကာ ခရီးသွားကဏ္ဍ၏ စီးပွားရေး အခြေအနေများ ပြောင်းလဲသွားစေခဲ့ပြီး ထိုင်းနိုင်ငံမှာလည်း မရေရာသော အခြေအနေများနှင့် ရင်ဆိုင်နေရသည်။

ထို့ကြောင့် ထိုင်းနိုင်ငံသည် ၂၀၂၆ ခုနှစ်အတွက် နိုင်ငံခြားခရီးသွားဝင်ရောက်မှု ခန့်မှန်းချက်ကို ခရီးသည် ၃၂ ဒသမ ၁၄ သန်းနှင့် ခန့်မှန်းဝင်ငွေ ဘတ် ၁ ဒသမ ၅၂ ထရီလျံအထိ လျှော့ချသတ်မှတ်လိုက်သည်။

နယ်မြေဒေသအသီးသီးရှိ လုပ်ငန်းရှင် ၇၄၀ ကို စစ်တမ်းကောက်ယူ၍ ပြုစုထားသော ၂၀၂၆ ခုနှစ် ပထမသုံးလ ပတ် ကာလအတွက် ခရီးသွားလုပ်ငန်းဆိုင်ရာ ယုံကြည်မှုညွှန်းကိန်း (Tourism Confidence Index) တွင် ရမှတ် ၈၁ မှတ်ရှိခဲ့သည်။

ခရီးသွားများကို တွေ့ရစဉ်

ထိုရလဒ်သည် ပြီးခဲ့သည့် သုံးလပတ်က ရရှိခဲ့သော ရမှတ် ၇၂ မှတ်ထက် သိသိသာသာ ပြန်လည်ကောင်းမွန် လာခြင်းဖြစ်သော်လည်း ပြီးခဲ့သည့်နှစ်က ရရှိခဲ့သည့် ရမှတ် ၈၃ မှတ်အောက်တွင်သာ ရှိနေသေးသည်။

ခရီးသွားများ ဝင်ရောက်မှု ခန့်မှန်းချက်ကို လျှော့ချလိုက်ရခြင်း၏ အဓိကအကြောင်းရင်းမှာ ဖေဖော်ဝါရီ ၂၈ ရက် တွင် အီရန်အပေါ် အမေရိကန်နှင့် အစ္စရေး၏ တိုက်ခိုက်မှုများအပြီး ဟော်မုဇ်ရေလက်ကြား ပိတ်ဆို့သွားခြင်း ကြောင့် ဖြစ်သည်။

ကမ္ဘာ့ရေနံ ထောက်ပံ့မှု၏ ၅ ပုံ ၁ ပုံခန့်မှာ အနှောင့်အယှက် ဖြစ်သွားခဲ့သဖြင့် Brent Crude) ရေနံဈေးနှုန်းမှာ တစ်စည်လျှင် ဒေါ်လာ ၁၀၀ အထက်သို့ ကျော်လွန်ရောက်ရှိသွားခဲ့သည်။

ထိုင်းနိုင်ငံ၏ ပြည်တွင်း ဒီဇယ်ဈေးနှုန်းမှာလည်း မတ်လကုန်ပိုင်းတွင် တစ်လီတာလျှင် ၆ ဘတ်ခန့် မြင့်တက် သွားခဲ့ပြီး ဆီဆိုင်များရှိ အရောင်းဈေးမှာ တစ်လီတာလျှင် ၄၀ ဘတ် နီးပါးအထိ ထိုးတက်သွားခဲ့သည်။

လက်ရှိ အခြေအနေများကို လေ့လာဆန်းစစ်မှုများအရ လောင်စာဆီ ဈေးနှုန်းမှာ တစ်လီတာလျှင် ဘတ် ၄၀ မှ ၄၅ ဘတ်အထိ ရောက်ရှိနိုင်သည်ဟု ခန့်မှန်းထားပြီး အဆိုးရွားဆုံး အခြေအနေတွင်မူ ဘတ် ၅၀ မှ ဘတ် ၆၀ အထိ မြင့်တက်သွားနိုင်ကြောင်း ခန့်မှန်းထားသည်။

ထိုသို့ ဖြစ်လာပါက ခရီးသွားလုပ်ငန်း ကွင်းဆက်တစ်ခုလုံးရှိ ကဏ္ဍအသီးသီး၏ လုပ်ငန်းလည်ပတ်မှု ကုန်ကျ စရိတ်များကို တစ်ပြိုင်နက်တည်း မြင့်တက်သွားမည့် အလားအလာ ရှိနေသည်။

Source: The Nation

CNI International News 

ဘရပ်ဆဲလ်၊ ဧပြီ ၁

အမေရိကန်နှင့် တရုတ်ကြား ကုန်သွယ်ရေးဆိုင်ရာ ယာယီသဘောတူညီချက် ပျက်ပြားသွားပါက ဖြစ်ပေါ်လာနိုင် သည့် အကျိုးဆက်ကို ဥရောပအနေဖြင့် ကိုယ့်နည်းကိုယ်ဟန်ဖြင့် ရင်ဆိုင်ဖြေရှင်းရန် ပြင်ဆင်ထားသင့်ကြောင်း ကျွမ်းကျင်သူများက တိုက်တွန်းထားသည်ဟု South China Morning Post မှ ဖော်ပြခဲ့သည်။

ပြီးခဲ့သည့် အောက်တိုဘာလ အတွင်းက အမေရိကန်နှင့် တရုတ်သည် ကျိုးပျက်လွယ်သည့် ကုန်သွယ်ရေးဆိုင်ရာ ယာယီ ပြေငြိမ်းရေး သဘောတူညီချက် တစ်ရပ်ကို ရရှိခဲ့ကြသည်။

ထိုသဘောတူညီချက်ကြောင့် တရုတ်နိုင်ငံ၏ မြေရှားသတ္တု တင်ပို့မှု ကန့်သတ်ချက်များ ရပ်တန့်သွားခဲ့ပြီး ချစ်ပ်ပြားထုတ်လုပ်သည့် Nexperia ကုမ္ပဏီနှင့် ပတ်သက်ပြီး တရုတ်နှင့် နယ်သာလန်ကြား ဖြစ်ပွားနေသော အငြင်းပွားမှုကိုလည်း ယာယီဖြေရှင်းနိုင်ခဲ့သည့်အတွက် ဥရောပအစိုးရများမှာ သက်ပြင်းချနိုင်ခဲ့ကြသည်။

မည်သို့ပင်ဆိုစေ ယခုအခါတွင် အမေရိကန်နှင့် တရုတ်ကြား သဘောတူညီချက် ပျက်ပြားသွားပါက သို့မဟုတ် သဘောတူညီချက်၏ သက်တမ်း ကုန်ဆုံးသွားပါက ဥရောပသမဂ္ဂ အနေဖြင့် အရေးပေါ် အစီအစဉ် တစ်ရပ်ကို ချမှတ်ထားရန် တိုက်တွန်း နှိုးဆော်ချက်များ ထွက်ပေါ်နေသည်။

သတ္ထုတူးဖော်နေကြစဉ်

အင်အားကြီး နိုင်ငံများအကြား တင်းမာမှုများ မြင့်တက်လာခြင်းကြောင့် တရုတ်နိုင်ငံ၏ ပို့ကုန်ထိန်းချုပ် ကန့်သတ် မှုဒဏ်ကို EU အနေဖြင့် ခံရနိုင်ခြေရှိကြောင်း ဥရောပသမဂ္ဂ ပြည်ပဆက်ဆံရေးကောင်စီ (ECFR) ၏ စာတမ်း အသစ် တစ်စောင်တွင် ဖော်ပြထားသည်။

ထိုအခြေအနေ ဖြစ်လာပါက ယူကရိန်းအတွက် စစ်ရေးအရ ပံ့ပိုးကူညီမှုများ၊ ဥရောပ၏ ကိုယ်ပိုင်လက်နက် တပ်ဆင်ရေး ကြိုးပမ်းမှုများနှင့် စက်မှုကဏ္ဍ အဆင့်မြှင့်တင်ရေး လုပ်ငန်းစဉ်များကိုပါ အကြီးအကျယ် ထိခိုက် ပျက်စီးစေနိုင်သည်ဟု လေ့လာသူများက ထောက်ပြခဲ့သည်။

ထို့ကြောင့် ဥရောပ အနေဖြင့် မိမိတို့ လက်ဝယ်တွင်ရှိသော စီးပွားရေးဆိုင်ရာ အားသာချက်များကို သဘောပေါက် နားလည်ပြီး မိမိကိုယ်တိုင် ကိုင်တွယ်ဖြေရှင်းရမည့် နည်းလမ်းများကို သင်ယူရမည်ဖြစ်ကြောင်း ECFR ၏ စာတမ်း တွင် ဖော်ပြထားသည်။

ဥရောပနဲ့ အမေရိကန်-တရုတ်ကို တွေ့ရစဉ်

 “ဒီသဘောတူညီချက်ဟာ နောက်ထပ် လအနည်းငယ် အတွင်းမှာပဲ သက်တမ်း ကုန်ဆုံးသွားနိုင်ပါတယ်။ တကယ် လို့ ဒီအစီအစဉ် ပြီးဆုံးသွားရင် ဘာတွေ ဆက်ဖြစ်လာမလဲ။ တရုတ်နိုင်ငံဘက်က ပို့ကုန်ထိန်းချုပ် ကန့်သတ်မှုတွေ ကို ပြန်လည် ကျင့်သုံးလာခဲ့မယ်ဆိုရင် ခင်ဗျားတို့ဘက်က အသင့်ပြင်ထားတာ ပိုကောင်းပါလိမ့်မယ်။ နောက်ထပ် အကျပ်အတည်းတစ်ခု ဆိုက်ရောက်လာတဲ့အထိ စောင့်မနေသင့်ပါဘူး၊ အခုချိန်ကတည်းက ခင်ဗျားတို့ရဲ့ အားသာ ချက်တွေကို ကြိုတင်စုဆောင်း ထားရပါမယ်” ဟု ECFR အစီရင်ခံစာကို အဓိကပြုစုသည့် ပထဝီစီးပွားရေးဆိုင်ရာ ကျွမ်းကျင်သူ တိုဘီယက်စ် ဂါကီ (Tobias Gehrke) က ပြောကြားခဲ့သည်။

တရုတ်နိုင်ငံနှင့် ဆက်ဆံရာတွင် ဥရောပသမဂ္ဂ အနေဖြင့် အသုံးချနိုင်သည့် စီးပွားရေးဆိုင်ရာ အားသာချက် အများအပြားကိုလည်း ထိုအစီရင်ခံစာတွင် ဖော်ပြခဲ့သည်။

Source: South China Morning Post

CNI International News

ဘန်ကောက်၊ မတ်လ ၃၁

ထိုင်းနိုင်ငံ၏ ကုန်ထုတ်လုပ်သူများက လောင်စာဆီဈေးနှုန်း ၂၀ ရာခိုင်နှုန်း မြင့်တက်လာမှုကို ၎င်းတို့ဘာသာ တာဝန်ယူ ဖြေရှင်းသွားမည်ဖြစ်ပြီး စားသုံးသူများအပေါ် သက်ရောက်မှု မရှိအောင် ကုန်ဈေးနှုန်းကို ကာကွယ် ပေးထားမည်ဖြစ်ကြောင်း The Nation မှ ဖော်ပြခဲ့သည်။

လက်ရှိတွင် လောင်စာဆီ ဈေးနှုန်းများ မြင့်တက်နေသော်လည်း အချိန်ကာလ အတိုင်းအတာ တစ်ခုအထိ လူသုံး ကုန် ပစ္စည်းများ၏ လက်လီဈေးနှုန်းများကို တည်ငြိမ်အောင် ထိန်းသိမ်းထားမည်ဖြစ်ကြောင်း ထိုင်းနိုင်ငံ၏ နာမည် ကြီး ကုန်ပစ္စည်းထုတ်လုပ်ရေးကုမ္ပဏီများက ပြည်သူလူထုကို အသိပေး ပြောကြားခဲ့သည်။

အရှေ့အလယ်ပိုင်းဒေသ ပဋိပက္ခသည် ၁ လကျော်ပြီး ၂ လထဲသို့ ရောက်ရှိလာသည်နှင့်အမျှ ကမ္ဘာ့စွမ်းအင် ဈေးကွက် မတည်ငြိမ်မှုများကြောင့် ထိုင်းနိုင်ငံ၏ လက်လီ စက်သုံးဆီ ဈေးနှုန်းမှာ တစ်လီတာလျှင် ၆ ဘတ် ခန့်အထိ မြင့်တက်လာခဲ့ပြီး ကုန်စည်ပို့ဆောင်ရေး ကုန်ကျစရိတ်များကို ချက်ချင်း မြင့်တက်စေခဲ့သည်။

ထိုသို့ ဖိအားများ ရှိနေသော်လည်း ခေါက်ဆွဲခြောက် ထုတ်လုပ်သူများမှအစ Coca Cola ကဲ့သို့  ကမ္ဘာကျော် အဖျော်ယမကာ ကုမ္ပဏီများအပြင် ထိပ်သီး ကျန်းမာရေး စောင့်ရှောက်မှု အမှတ်တံဆိပ်များအထိ ပါဝင်သော လုပ်ငန်းရှင်ကြီးများသည် မြင့်တက်လာသော ကုန်ကျစရိတ်များကို ၎င်းတို့ဘာသာ အဆင်ပြေသလို တာဝန်ယူ ဖြေရှင်းသွားမည်ဟု ကတိပြုထားကြသည်။

စားသောက်ကုန်များ စာရင်းကို စစ်ဆေးနေစဉ်

စားသုံးသူများ၏ ဝယ်ယူနိုင်စွမ်းသည် အားနည်းနေသဖြင့် ကုန်ဈေးနှုန်းများ မြှင့်တင်လိုက်ပါက အရောင်းပမာဏ ကို မလွဲမသွေ ကျဆင်းစေလိမ့်မည်ဟု လုပ်ငန်းအဖွဲ့အစည်းများ၏ ဘုတ်အဖွဲ့ဝင်များက တစ်ညီတစ်ညွတ်တည်း လက်ခံထားကြသည်။

နာမည်ကျော် မာမား (Mama) ခေါက်ဆွဲခြောက် ထုတ်လုပ်သည့် Thai President Foods PCL ၏ ဥက္ကဋ္ဌ ပွန် ပန်နီယန်ဗစ် (Pun Paniangvait) ကလည်း ၎င်းတို့ ကုမ္ပဏီအနေဖြင့် ခေါက်ဆွဲခြောက် ဈေးနှုန်းများကို မြှင့်တင် ရန် အစီအစဉ်မရှိကြောင်း အတည်ပြု ပြောကြားခဲ့သည်။

ပုံမှန်အားဖြင့် ဆီလီတာ ၁၀၀ လျှင် ယခင်ကထက် ဘတ် ၆၀၀ ခန့် ပိုမိုကုန်ကျနေပြီ ဖြစ်သော်လည်း ကုမ္ပဏီ အနေဖြင့် ဂျုံမှုန့်နှင့် စားအုန်းဆီများကို ကြိုတင်စုဆောင်းထားသည့် မဟာဗျူဟာကြောင့် အနည်းဆုံး စက်တင်ဘာလအထိ လောင်စာဆီ ဈေးနှုန်းမြင့်တက်မှု၏ ဂယက် ရိုက်ခတ်မှုဒဏ်ကို ခံနိုင်ရည်ရှိလိမ့်မည်ဟု ၎င်းက မှတ်ချက်ပြုခဲ့သည်။

ဈေးကွက် ကျွမ်းကျင်သူများကမူ ကုန်ပစ္စည်းများ၏ ဈေးနှုန်းသည် ပြောင်းလဲမှုမရှိဘဲ တည်ငြိမ်နေနိုင်သော်လည်း လုပ်ငန်းရှင်များအနေဖြင့် ဈေးနှုန်းမတင်ဘဲ ကုန်ပစ္စည်း၏ ပမာဏကို လျှော့ချနိုင်မည့် နည်းလမ်းကို စောင့်ကြည့် နေကြောင်း သုံးသပ်ခဲ့သည်။

ဥပမာ ပြရမည်ဆိုပါက အချိုရည်ဘူး တစ်ဘူး၏ ဈေးနှုန်းကို ပုံမှန်အတိုင်း ထိန်းထားသော်လည်း ထိုအချိုရည်ဘူး ၏ အရွယ်အစားကို အနည်းငယ် ချုံ့ပစ်လိုက်ခြင်းဖြင့် အချိုရည်ပါဝင်မှု ပမာဏ လျှော့ချလိုက်သည့် နည်းလမ်း မျိုးအား လုပ်ငန်းရှင်များက စဉ်းစားနေနိုင်သည်ဟု ကျွမ်းကျင်သူများက ပြောကြားခဲ့သည်။

Source: The Nation

CNI International News

ဘန်ကောက်၊ မတ်လ ၂၆

အရှေ့အလယ်ပိုင်းဒေသတွင် တင်းမာမှုများ အရှိန်မြင့်လာခြင်းကြောင့် ကမ္ဘာ့ရေနံဈေးနှုန်းများ ရုတ်တရက် မြင့်တက်သွားခြင်းသည် ထိုင်းနိုင်ငံ၏ စီးပွားရေးအပေါ် ဂယက်ရိုက်ခတ်မှုများ ဖြစ်ပေါ်စေကြောင်း The Nation မှ ဖော်ပြခဲ့သည်။

ထိုကဲ့သို့ သက်ရောက်မှုများသည် ရေကြောင်းပို့ဆောင်ရေး၊ ကုန်းလမ်းသယ်ယူပို့ဆောင်ရေးနှင့် လေကြောင်း ကဏ္ဍများတွင် ကုန်ကျစရိတ်များ မြင့်တက်စေသည့်အပြင် အသေးစား လုပ်ငန်းရှင်များမှစ၍ အဓိက အီလက်ထရောနစ် ပလက်ဖောင်းကြီးများအထိ ဈေးနှုန်းများ မြင့်တက်လာခဲ့သည်။

အလားတူ စားသောက်ကုန်နှင့် လက်လီ လုပ်ငန်းများ၏ ထုတ်လုပ်မှုနှင့် ထောက်ပံ့ပို့ဆောင်ရေး စရိတ်များလည်း မြင့်တက်လာနေသည်။

Chao Phraya Express Boat Ltd (CPX) ၏ မန်နေဂျင်းဒါရိုက်တာ ချာရွန်ပွန် ချာရွန်သမ် (Charoenporn Charoentham) ကမူ ၎င်းတို့၏ ရေကြောင်းပို့ဆောင်ရေး လုပ်ငန်းသည် လောင်စာဆီစရိတ် မြင့်မားလာမှုနှင့် အနာဂတ်တွင် စက်သုံးဆီ ရရှိနိုင်မည့် ပမာဏအပေါ် မရေရာမှုများကြောင့် အကြီးအကျယ် ထိခိုက်နေရကြောင်း ပြောကြားခဲ့သည်။

ထိုင်းလေကြောင်းလိုင်းကို တွေ့ရစဉ်

အကယ်၍ ဒီဇယ်ဈေးနှုန်းမှာ ဆက်လက် မြင့်တက်နေပါက CPX အနေဖြင့် ခရီးစဉ် ဝန်ဆောင်မှုများကို လျှော့ချရန် သို့မဟုတ် လုပ်ငန်း လည်ပတ်မှုများကိုပါ ရပ်ဆိုင်းရန်အထိ ဖြစ်လာနိုင်ကြောင်း ၎င်းက သတိပေးထားသည်။

စက်သုံးဆီဈေးနှုန်း မြင့်တက်မှုဒဏ်အပြင် ခရီးသည် အရေအတွက် လျော့နည်းသွားသည့် အခြေအနေနှင့်လည်း ရင်ဆိုင်နေရသည်ဟု ချာရွန်ပွန်က ပြောကြားခဲ့သည်။

ထို့ပြင် Transport Co, Ltd. ၏ ဘတ်စ်ကားလုပ်ငန်း လည်ပတ်မှုဆိုင်ရာ လက်ထောက်မန်နေဂျင်း ဒါရိုက်တာ ဆူဖန် ဆီလာအာဖွန် (Suphang Sila-aphon) ကမူ ၎င်းတို့အနေဖြင့် လောင်စာဆီ ရရှိမှုကို စီမံခန့်ခွဲနိုင်ဆဲဖြစ်ပြီး ဝန်ဆောင်မှုများကိုလည်း ချောမွေ့စွာ ဆက်လက် ထိန်းသိမ်းထားနိုင်သေးကြောင်း ပြောကြားခဲ့သည်။

“ဒါပေမယ့် ရေနံဈေးနှုန်းတွေက ရေရှည်မှာ ဆက်ပြီး မြင့်တက်နေမယ်ဆိုရင်တော့ ဒါဟာ လုပ်ငန်းရှင်တွေရဲ့ ကုန်ကျစရိတ်ကို ရိုက်ခတ်လာနိုင်ပြီး ခရီးစဉ် လက်မှတ်ခတွေကို မတိုးဘဲ ဆက်ထိန်းထားနိုင်ဖို့ ခက်ခဲသွားပါ လိမ့်မယ်” ဟု ၎င်းက သတိပေးခဲ့သည်။

ထိုင်းဘတ်စ်ကားလိုင်းကို တွေ့ရစဉ်

Thai Airways International (THAI) ၏ စီးပွားရေးလုပ်ငန်း အမှုဆောင်ချုပ် ချိုင် အမ်စီရီ (Chai Eamsiri) ကလည်း လေယာဉ်ဆီ စျေးနှုန်းသည် တစ်စည်လျှင် အမေရိကန်ဒေါ်လာ ၈၀ ဝန်းကျင် မှ ဒေါ်လာ ၂၀၀ ကျော် အထိ ထိုးတက်သွားခဲ့ကြောင်း ပြောကြားခဲ့သည်။

ထိုသို့ လေယာဉ်ဆီစျေးများ အဆမတန် မြင့်မားလာမှုကြောင့် လေကြောင်းလိုင်း အနေဖြင့် လက်မှတ်စျေးနှုန်း များကို ပျမ်းမျှ ၁၀ ရာခိုင်နှုန်းမှ ၁၅ ရာခိုင်နှုန်းအထိ တိုးမြှင့်ရမည့် အခြေအနေသို့ ရောက်ရှိစေခဲ့ကြောင်း ၎င်းက ဆိုသည်။

လက်မှတ်ခ စျေးနှုန်းများကို ချက်ချင်း ပြောင်းလဲခဲ့သော်လည်း ကုန်ကျစရိတ် အားလုံးကို ချက်ချင်း ကာမိစေရန်မှာ မဖြစ်နိုင်ကြောင်း ၎င်းက ရှင်းပြသည်။

အဘယ်ကြောင့်ဆိုသော် လေယာဉ် လက်မှတ် အများအပြားကို လောင်စာဆီစျေးနှုန်း မတက်မီကပင် ကြိုတင် ရောင်းချထားပြီး ဖြစ်သောကြောင့် ကုန်ကျစရိတ်နှင့် ဝင်ငွေအကြား ကွာဟမှု  ဖြစ်ပေါ်နေခြင်းဖြစ်သည်။

သို့သော် Thai Airways သည် ယခုနှစ်လယ်အထိ လောင်စာဆီ လိုအပ်ချက်၏ ၅၀ ရာခိုင်နှုန်းခန့်ကို ကြိုတင် စျေးနှုန်း သတ်မှတ်ဝယ်ယူသည့် နည်းလမ်းဖြင့် လုပ်ဆောင်ထားသောကြောင့် ရိုက်ခတ်မှုကို အတိုင်းအတာ တစ်ခုအထိ လျှော့ချနိုင်ခဲ့ကြောင်း ထုတ်ပြန်ခဲ့သည်။

Source: The Nation