CNI International News

တိုကျို၊ ဇွန်လ ၁၄

ဇွန်လ ၁၃ ရက် နံနက် အစောပိုင်းက အီရန်ကို အစ္စရေးက တိုက်ခိုက်ခဲ့ပြီးနောက် တင်းမာမှုများ မြင့်တက်လာခဲ့ ကာ အာရှ ရှယ်ယာတန်ဖိုးများ ကျဆင်းခဲ့ပြီး ရေနံဈေးနှုန်းများ မြင့်တက်လာခဲ့ကြောင်း Nikkei Asia မှ ဖော်ပြခဲ့ သည်။

ဂျပန်၏ ယန်းငွေကြေးမှလွဲပြီး အာရှနိုင်ငံအများစု၏ နိုင်ငံသုံးငွေကြေး တန်ဖိုးများသည် အမေရိကန် ဒေါ်လာနှင့် ငွေလှဲနှုန်းတွင် တန်ဖိုးများ ကျဆင်းသွားခဲ့သည်။

ဒေါ်လာနှင့်ငွေလဲနှုန်းတွင် ကိုရီးယား၏ ဝမ်ငွေကြေး တန်ဖိုးသည် ၀ ဒသမ ၉ ရာခိုင်နှုန်း၊ အိန္ဒိယနှင့် မလေးရှား၏ ရူပီးငွေကြေး တန်ဖိုးများသည် ၀ ဒသမ ၄ ရာခိုင်နှုန်းစီနှင့် စင်္ကာပူဒေါ်လာ၏ တန်ဖိုးသည် ၀ ဒမသ ၂ ရာခိုင်နှုန်း ကျဆင်းခဲ့သည်။

သို့သော် ဂျပန်၏ ယန်းငွေကြေးတန်ဖိုးသည် ဒေါ်လာနှင့်ငွေလဲနှုန်းတွင် ၀ ဒသမ ၇၃ မြင့်တက်ခဲ့သည်။

ရေနံများ အဓိကထုတ်လုပ်သည့် အရှေ့အလယ်ပိုင်းဒေသတွင် ရန်လိုမုန်းတီးမှုများ မြင့်တက်လာမှုနှင့်အတူ အီရန်ကို အစ္စရေးက တိုက်ခိုက်ခဲ့ပြီးနောက် ကမ္ဘာလုံးဆိုင်ရာ ရေနံဈေးများသည်လည်း မြင့်တက်လာခဲ့သည်။

ရေနံတူးဖော်နေစဉ်

Brent Crude စံသတ်မှတ်ချက်တွင် ရေနံစိမ်း တစ်စည်လျှင် ၇၄ ဒသမ ၄၉ ဒေါ်လာ အထိရှိခဲ့ကာ တစ်စည်လျှင် ၅ ဒသမ ၄၃ ဒေါ်လာမြင့်တက်ခဲ့ပြီး WTI စံသတ်မှတ်ချက်တွင်လည်း ရေနံစိမ်းတစ်စည်လျှင် ၇၃ ဒသမ ၅၉ ဒေါ်လာ ရှိခဲ့ကာ တစ်စည်လျှင် ၅ ဒသမ ၅၅ ဒေါ်လာ မြင့်တက်ခဲ့သည်။

ထို့ပြင် ရွှေဈေးများသည်လည်း တစ်အောင်စလျှင် ၃၄၄၄ ဒသမ ၀၆ ဒေါ်လာအထိ မြင့်တက်ခဲ့ကာ ထိုနှုန်းထား သည့် ဧပြီလက ရွှေတစ်အောင်စလျှင် ၃၅၀၀ ဒသမ ၀၅ ဒေါ်လာ အထိရှိခဲ့သည့် စံချိန်တင် အမှတ်နီးပါးအထိ ရောက်ရှိခဲ့သည်။

အမေရိကန် S&P E-mini (ES) စတော့ရှယ်ယာ ဈေးကွက်တွင် တန်ဖိုး ၁ ဒသမ ၆ ရာခိုင်နှုန်း၊ Nasdaq စတော့ ရှယ်ယာတွင် တန်ဖိုး ၁ ဒသမ ၇ ရာခိုင်နှုန်း၊ Pan-European STOXX 50 ဈေးကွက်တွင် တန်ဖိုး ၁ ဒသမ ၇ ရာခိုင်နှုန်း ကျဆင်းခဲ့သည်။

“ပထဝီနိုင်ငံရေးဆိုင်ရာ တင်းမာမှုတွေ မြင့်တက်လာတာက အရင်ကတည်းက သေချာရေရာမှုမရှိတဲ့ အခြေအနေ ကို ပိုမိုဆိုးရွားစေခဲ့ပါတယ်” ဟု ဒိန်းမတ်နိုင်ငံ၏ Saxo ဘဏ်လုပ်ငန်းမှ ရင်းနှီးမြှုပ်နှံ့ရေး မဟာဗျူဟာပညာရှင် ချာရူ ချာနာနာ (Charu Chanana) က ပြောကြားခဲ့သည်။

Source: Nikkei Asia

CNI International News

နယူးယောက်၊ ဇွန်လ ၁၂

တရုတ်နှင့်အမေရိကန် အရာရှိများသည် ဗြိတိန်နိုင်ငံ၊ လန်ဒန် (London) မြို့တော်တွင် ကုန်သွယ်ရေး ဆွေးနွေးပွဲ များကို ၂ ရက်ကြာ ပြုလုပ်ခဲ့ပြီးနောက် တင်းမာမှုများအား လျှော့ချရန် မူဘောင်တစ်ခု ရေးဆွဲရေးအတွက် သဘောတူညီခဲ့ကြောင်း Nikkei Asia မှ ဖော်ပြခဲ့သည်။

စူပါပါဝါ နှစ်နိုင်ငံကြား ဆက်ဆံရေးများတွင် အဓိက ပွတ်တိုက်မှု ဖြစ်နေသည့် အချက်မှာ နည်းပညာမြင့်ပစ္စည်း များ ထုတ်လုပ်ရာတွင် မရှိမဖြစ် လိုအပ်သော မြေရှားသတ္တုများနှင့် သံလိုက်များကို တရုတ်က တင်ပို့ရောင်းချမှု ကန့်သတ်ထားသည့်အချက်ဖြစ်သည်။

ထိုအချက်ကို ဖြေရှင်းနိုင်ခဲ့ပြီဖြစ်ကြောင်း အမေရိကန်ကုန်သွယ်ရေးဝန်ကြီး ဟောင်းဝပ် လုစ်နစ် (Howard Lutnick) က သတင်းထောက်များကို ပြောကြားခဲ့သည်။

အမေရိကန်နဲ့တရုတ် ကိုယ်စားလှယ်အဖွဲ့ တွေ့ဆုံ ဆွေးနွေးကြစဉ်

ဧပြီလအတွင်းက အမေရိကန်သမ္မတ ဒေါ်နယ်ထရမ့် (Donald Trump) ၏ ကုန်သွယ်ခွန်များ တိုးမြှင့်ကောက်ခံမှု ကြောင့် ဖြစ်ပွားခဲ့သည့် ကုန်သွယ်ရေးစစ်ပွဲကို အဖြေရှာရန် ဆွေးနွေးညှိနှိုင်းမှုများ ဆက်လက် ပြုလုပ်သွားမည် ဖြစ်သည်။

ယခုပြုလုပ်ခဲ့သည့် ဆွေးနွေးမှုများသည် ၂ ရက်အတွင်း နာရီပေါင်း ၂၀ ကျော် ကြာမြင့်ခဲ့ပြီး အမေရိကန်ဘက်မှ ဘဏ္ဍာရေးဝန်ကြီး စကော့ ဘက်ဆန့် (Scott Bessent) ၊ ကုန်သွယ်ရေးဝန်ကြီး ဟောင်းဝပ် လုစ်နစ်နှင့် ကုန်သွယ်ရေး ကိုယ်စားလှယ် ဂျေမီဆန် ဂရီယာ (Jamieson Greer) တို့ ပါဝင်ခဲ့သည်။

တရုတ်ကိုယ်စားလှယ်အဖွဲ့ကိုမူ တရုတ်အစိုးရ၏ ထိပ်သီး ဆွေးနွေးညှိနှိုင်းသူ ဒုတိယဝန်ကြီးချုပ် ဟီလီဖန် (He Lifeng) က ဦးဆောင်ခဲ့သည်။

သဘောတူညီချက်ကို အကောင်အထည် ဖော်နိုင်ခဲ့သဖြင့် မြေရှားသတ္တုများနှင့် သံလိုက်များ ရောင်းဝယ်ရေးနှင့် ပတ်သက်သည့် စိုးရိမ်စရာကိစ္စများ လျော့ကျသွားပြီဖြစ်ကြောင်း လုစ်နစ်က ပြောကြားခဲ့သည်။

အမေရိကန်နဲ့တရုတ် ကိုယ်စားလှယ်အဖွဲ့ကို တွေ့ရစဉ်

သို့သော် ဧပြီလက တရုတ်၏ ကုန်စည်းများအပေါ် အခွန် ၁၀၀ ရာခိုင်နှုန်းကျော် တိုးမြှင့်ကောက်ခံသည့် ထရမ့်၏ ဆုံးဖြတ်ချက်ကြောင့် မေလတွင် အမေရိကန်သို့ တင်ပို့သည့် တရုတ်ကုန်စည်များသည် ပြီးခဲ့သည့်နှစ် ကာလတူနှင့် နှိုင်းယှဉ်ပါက ၃၅ ရာခိုင်နှုန်း ကျဆင်းသွားခဲ့ကာ ထိုပြဿနာကို ဖြေရှင်းနိုင်ခြင်းမရှိသေးပေ။

အပြန်အလှန် ကုန်သွယ်ခွန်များ တိုးမြှင့်ကောက်ခံနေမှုကို ဖြေရှင်းရန် ပြီးခဲ့သည့်လက ဂျီနီဗာ (Geneva) တွင် ပြုလုပ်ခဲ့သည့် ကနဦး ကုန်သွယ်ရေး သဘောတူညီချက်အတွက် ဆွေးနွေးမှုများသည်လည်း တစ်ဖက်နှင့်တစ်ဖက် အပြန်အလှန် စွပ်စွဲမှုများဖြင့်သာ အဆုံးသတ်ခဲ့သည်။

သို့သော် ကုန်သွယ်ရေးစစ်ပွဲသည် နှစ်နိုင်ငံစလုံးကို ထိခိုက်စေခဲ့ပြီး တရုတ်က မြေရှားသတ္တုများ တင်ပို့မှုကို ကန့်သတ်ခဲ့ကာ အမေရိကန်ကလည်း တစ်ပိုင်းလျှပ်ကူးပစ္စည်းများ တင်ပို့မှုကို ကန့်သတ်ခဲ့သည်။

တရုတ်၏ ထိန်းချုပ်မှုကြောင့် ကမ္ဘာလုံးဆိုင်ရာ မြေရှားသတ္တုများ ထောက်ပံ့မှု ကွင်းဆက် ရပ်ဆိုင်းသွားခဲ့ပြီး ယခုနှစ် နွေရာသီတွင် မော်တော်ယာဉ် ထုတ်လုပ်မှု လုပ်ငန်းများ ရပ်ဆိုင်းသွားရမည့် အခြေအနေနှင့် ရင်ဆိုင်ခဲ့ရ သည်။

Source: Nikkei Asia

စီးပွားရေးပြုပြင်ပြောင်းလဲမှုများကို နိုက်ဂျီးရီးယားသမ္မတ ကာကွယ်ပြော

CNI International News

အဘူဂျာ၊ မေလ ၃၁

နိုက်ဂျီးရီးယားသမ္မတ ဘိုလာ တင်နူဘူ (Bola Tinubu) ၎င်းတို့ အစိုးရအဖွဲ့က လုပ်ဆောင်နေသည့် စီးပွားရေး ပြုပြင်ပြောင်းလဲမှု အစီအစဉ်များကို မေလ ၂၉ ရက်၌ ပြောကြားခဲ့သည့် မိန့်ခွန်းအတွင်း ကာကွယ်ပြောဆိုခဲ့ သည်ဟု DW သတင်းဝက်ဘ်ဆိုက်မှ ဖော်ပြခဲ့သည်။

“ကျနော်တို့ရဲ့ စီးပွားရေး ပြုပြင်ပြောင်းလဲမှုတွေက အလုပ်ဖြစ်ပါတယ်။ စီးပွားရေးအရ ပိုမိုကြီးမြတ်ပြီး တည်ငြိမ်မှု ရှိတဲ့ နိုင်ငံအဖြစ် ထူထောင်တဲ့ လမ်းကြောင်းပေါ်ကို ရောက်နေပါပြီ” ဟု တင်နူဘူက သမ္မတသက်တမ်း ၂ နှစ်ပြည့် နှစ်ပတ်လည်တွင် မိန့်ခွန်းပြောကြားခဲ့သည်။

တင်နူဘူ၏ အစိုးရသည် အာဏာရ လာခဲ့ပြီးနောက်ပိုင်း နိုက်ဂျီးရီးယားနိုင်ငံသုံး ငွေဖြစ်သည့် နိုင်ရာ ငွေကြေး တန်ဖိုးကို ၂ ကြိမ် လျှော့ချခဲ့ပြီ လျှပ်စစ်ဓာတ်အားခနှင့် လောင်စာစျေးနှုန်းများတွင် အစိုးရ၏ ထောက်ပံ့မှုများကို လျှော့ချခဲ့သည်။

နိုက်ဂျီးရီးယားသည် အာဖရိကတွင် ရေနံစိမ်း ထုတ်လုပ်မှု အများဆုံးနိုင်ငံဖြစ်သည်။

ပုံစာ- နိုက်ဂျီးရီးယားက ဈေးတန်းကိုတွေ့ရစဉ်

“စားဝတ်နေရေးအတွက် ထိခိုက်မှုတွေ ရှိခဲ့ပေမယ့် ကျနော်တို့ဟာ မငြင်းနိုင်လောက်တဲ့ တိုးတက်မှုတွေ ရရှိခဲ့ ပါတယ်။ ကျ‌နော်တို့ရဲ့ စီးပွားရေးဟာ တည်ငြိမ်သွားပါပြီ။ အခုဆိုရင် ကမ္ဘာလုံးဆိုင်ရာ စီးပွားရး ဂယက်ရိုက်ခတ် မှုတွေကို ကြံ့ကြံ့ခံနိုင်အောင် ပြင်ဆင်ထားပြီး ဖွံ့ဖြိုးတိုးတက်ရေး လမ်းကြောင်းပေါ်ကို ရောက်နေပါပြီ”ဟု တင်နူဘူက ပြောသည်။

နိုက်ဂျီးရီးယားနိုင်ငံသည် ငွေကြေးဖောင်းပွမှု ဆက်လက် မြင့်တက်နေမှုနှင့် ရင်ဆိုင်နေရကြောင်း ကမ္ဘာ့ဘဏ်က သတိပေးခဲ့သော်လည်း တစ်ချိန်တည်းမှာပင် နိုက်ဂျီးရီးယားသည် တင်နူဘူ၏ စီးပွားရေး ပြုပြင်ပြောင်းလဲမှုများ ကြောင့် ၁၀ နှစ်အတွင်း စီးပွားရေးဖွံ့ဖြိုးတိုးတက်မှုနှုန်း အမြင့်ဆုံး အနေအထား ဖြစ်လာကြောင်း ထုတ်ပြန်ခဲ့ သည်။

တင်နူဘူ၏ စီးပွားရး ပြုပြင်ပြောင်းလဲမှုများ စတင် လုပ်ဆောင်ချိန်ကစပြီး နိုက်ဂျီးရီးယားတွင် ငွေကြေးဖောင်းပွမှု နှုန်းသည် ၂၃ ရာခိုင်နှုန်း မြင့်တက်ခဲ့သည်။

လောင်စာစျေးနှုန်းများ မြင့်တက်ခြင်း၊ အစားအစာ စျေးနှုန်းများ ဖောင်းပွခြင်း၊ မီတာခများ ပိုမိုမြင့်တက်ခြင်း အစရှိသည့် အခြေအနေများက နိုက်ဂျီးရီးယား၏ အောက်ခြေပြည်သူများကို စိတ်ပျက်စေခဲ့သည်။

ထို့ပြင် လူသုံးကုန်ပစ္စည်းများ မြင့်တက်မှုကြောင့် ပြည်သူများကြား ဒေါသများ မြင့်တက်ခဲ့ပြီး ပြီးခဲ့သည့်နှစ်နှင့် ယခုနှစ်များတွင် လမ်းများပေါ်၌ ဆန္ဒပြမှုများ ဖြစ်ပွားခဲ့သည်။

အချို့ဆန္ဒပြမှုများသည် ဆူပူအုံကြွမှုများအဖြစ်သို့ ပြောင်းလဲသွားခဲ့ပြီး ဆန္ဒပြသူများနှင့် လုံခြုံရေးတပ်ဖွဲ့များကြား ခိုက်ရန် ဖြစ်ပွားခဲ့သဖြင့် သေဆုံးမှုများလည်း ရှိခဲ့သည်။

Source: DW

ထိုင်း-အမေရိကန် ကုန်သွယ်ရေးဆွေးနွေးမှုများ ရပ်တန့်ခြင်းမရှိ

CNI International News

ဘန်ကောက်၊ မေလ ၃၁

အမေရိကန် ကုန်သွယ်ရေးတရားရုံးက သမ္မတ ဒေါ်နယ်ထရမ့် (Donald Trump) ၏ ကုန်သွယ်ခွန် တိုးမြှင့် ကောက်ခံမှုများကို ပိတ်ပင်ခဲ့သည့်တိုင် အမေရိကန်နှင့် ကုန်သွယ်ရေး ဆွေးနွေးမှုများကို ဆက်လက် လုပ်ဆောင် သွားမည်ဟု ထိုင်းဝန်ကြီးချုပ် ပေတုန်တန် ရှင်နာဝပ် (Paetongtarn Shinawatra) က ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

တရားရုံး၏ ဆုံးဖြတ်ချက်သည် အမေရိကန်၏ ပြည်တွင်းရေးကိစ္စ တစ်ခုသာဖြစ်ပြီး ထရမ့်သည် ကုန်သွယ်ခွန် တိုးမြှင့်မှုကို မည်သို့ ဆက်လက် လုပ်ဆောင်မည်ဆိုခြင်းကို သေချာစွာ မသိရသေးကြောင်း ပေတုန်တန်က ပြောသည်။

မည်သို့ပင်ဆိုစေ ထိုင်းအစိုးရသည် အမေရိကန်နှင့်ကုန်သွယ်ရေး ဆွေးနွေးညှိနှိုင်းမှုများ ပြုလုပ်နေသည့် အားထုတ် ကြိုးပမ်းမှုများကို ရပ်တန့်မည်မဟုတ်ဘဲ ဆက်လက် လုပ်ဆောင်သွားမည်ဟု ပေတုန်တန်က မေလ ၂၉ ရက်တွင် ပြောကြားခဲ့သည်။

မကြာသေးမီက မလေးရှားနိုင်ငံတွင် ကျင်းပခဲ့သည့် အာဆီယံ ထိပ်သီးအစည်းအဝေး၌ အမေရိကန်၏ သွင်းကုန်ခွန် စည်းကြပ်မှုကိစ္စကို ဒေသတွင်း ခေါင်းဆောင်များက ဆွေးနွေးခဲ့သည်ဟု  ပေတုန်တန်က ပြောကြားခဲ့သည်။

ပုံစာ- ထိုင်းဝန်ကြီးချုပ် ပေတုန်တန်ကို တွေ့ရစဉ်

အာဆီယံအဖွဲ့ဝင် နိုင်ငံများအားလုံးသည် လက်ရှိတွင် ထိုင်းနိုင်ငံကဲ့သို့ အမေရိကန်နှင့် ကုန်သွယ်ရေး ဆွေးနွေးမှု များ ပြုလုပ်ရန် အဆိုပြုထားပြီး အမေရိကန်၏ တုံ့ပြန်မှုကို စောင့်ဆိုင်းနေကြကြောင်း ၎င်းက ဆိုသည်။

ထိုင်းနှင့် အမေရိကန်ကြား ကုန်သွယ်ရေး ဆွေးနွေးမှုများကို အမေရိကန် ကုန်သွယ်မှုတရားရုံး၏ စီရင်ချက် မချမီ ကတည်းက ပြုလုပ်ခဲ့ခြင်းဖြစ်သည်ဟု ပေတုန်တန်က ပြောသည်။

ကုန်သွယ်ခွန် တိုးမြှင့်သည့် ကိစ္စနှင်ပတ်သက်၍ ရက်ပေါင်း ၉၀ အတွင်း အမေရိကန်နှင့် သဘောတူညီမှုရရှိရန် မူဘောင် ချမှတ်ထားပြီး အစီအစဉ်များကို နှေးကွေးလေးလံစွာ လုပ်ဆောင်မည် မဟုတ်ကြောင်း ထိုင်းဝန်ကြီးချုပ် က ပြောသည်။

“ထိုင်းနဲ့ အမေရိကန်ကြားမှာ အလွတ်သဘော ဆက်သွယ် ဆွေးနွေးမှုတွေအတွက် လမ်းဖွင့်ထားဆဲ ဖြစ်ပါတယ်။ နှစ်ဖက်စလုံးက နောက်ဆုံးရ အခြေအနေတွေနဲ့ ပတ်သက်ပြီး အချက်အလက်တွေကို မျှဝေနေကြပါတယ်” ဟု ပေတုန်တန်က ပြောသည်။

ထိုကဲ့သို့ ထိတွေ့ဆက်ဆံမှုများ ဆက်လက် ပြုလုပ်နေခြင်းသည် အပြုသဘောဆောင်သည့် လက္ခဏာတစ်ခု ဖြစ်ပြီး ဆက်သွယ်ရေးတွင် ပြတ်တောက်သွားသည့် အရိပ်လက္ခဏာများ မရှိကြောင်းလည်း ပေတုန်တန်က ပြောကြားခဲ့သည်။

Source: ဘန်ကောက်ပို့စ်

CNI International News

မနီလာ၊ မေလ ၂၁

ဖိလစ်ပိုင်သမ္မတ ဖာဒီနန်မားကို့စ်ဂျူနီယာ (Ferdinand Marcos Jr.) က သက်တမ်းဝက် ရွေးကောက်ပွဲအပြီး ၅ ရက် အကြာတွင် နိုင်ငံ၏ စီးပွားရေးလုပ်ငန်းစဉ်ကို အာရုံစိုက် လုပ်ဆောင်သွားမည်ဟု ပြောကြားခဲ့ကြောင်း Nikkei Asia မှ ဖော်ပြခဲ့သည်။

မကြာသေးမီက ပြုလုပ်ခဲ့သည့် သက်တမ်းဝက် ရွေးကောက်ပွဲတွင် ၎င်း၏ ကိုယ်စားလှယ်လောင်းများသည် အထက်လွှတ်တော်၌ ယခုထက်ပိုပြီး အနိုင်ရခဲ့သင့်ကြောင်းလည်း ဝန်ခံပြောကြားခဲ့သည်။

“ဒီထက်ပိုပြီးကောင်းတဲ့ ရလဒ်တွေကို မျှော်လင့်ခဲ့တာပါ။ ဒါပေမယ့် ကျနော်တို့ ထပ်ပြီး တိုက်ပွဲဝင်ရပါလိမ့်မယ်” ဟု မားကို့စ်က မေလ ၁၇ ရက်တွင် ပြောကြားခဲ့သည်။

သက်တမ်းဝက် ရွေးကောက်ပွဲတွင် အထက်လွှတ်တော်၏ နေရာ ၁၂ နေရာစလုံးကို အနိုင်ရရန် မားကို့စ်က မျှော်မှန်းထားသော်လည်း ၅ နေရာကိုသာ အနိုင်ရရှိခဲ့သည်။

လက်ရှိတွင် မားကို့စ်သည် နိုင်ငံ့စီးပွားရေး လုပ်ငန်းစဉ်များအား အာရုံစိုက် လုပ်ဆောင်လျက်ရှိပြီး ဝယ်လိုအားကို ထိန်းသိမ်းပြီး အစားအစာ လုံခြုံရေးကို စိတ်ချသေချာအောင် လုပ်ဆောင်နေသည်ဟု ဆိုသည်။

 ဖိလစ်ပိုင်နိုင်ငံကို တွေ့ရစဉ်

ထို့ပြင် COVID-19 ကပ်ရောဂါကြောင့် ထိခိုက်နစ်နာခဲ့ရသည့် အခြေအနေကို လျှော့ချပြီး macroeconomic အခြေခံ အုတ်မြစ်များကို ထိန်းသိမ်းကာ အရည်အသွေး ပိုမိုကောင်းမွန်သော အလုပ်အကိုင် အခွင့်အလမ်းများကို ဖန်တီးရန် ရည်ရွယ်ထားသည်ဟု မားကို့စ်က ပြောသည်။

အခြေခံ အဆောက်အအုံ ဖွံ့ဖြိုးတိုးတက်ရေးအတွက် “ပိုကောင်းအောင် တည်ဆောက်” (Build Better More) ဟူသည့် စီမံကိန်းဖြင့် သယ်ယူပို့ဆောင်ရေး၊ စွမ်းအင်၊ ကျန်းမာရေး၊ စိုက်ပျိုးမွေးမြူရေးကဲ့သို့ နယ်ပယ်ကဏ္ဍ အသီးသီးတွင် စီမံကိန်း ၁၉၄ ခု ပါဝင်သည့် အခြေခံအဆောက်အအုံ စီမံကိန်းများကို ဆက်လက် လုပ်ဆောင် နေသည်ဟု ဆိုသည်။

အဆိုပါ စီမံကိန်း ၁၉၄ ခုအနက် ၁၂၃ ခုသည် မားကို့စ်အစိုးရအဖွဲ့ လက်ထက်တွင် အသစ် ဖန်တီးခဲ့သည့် စီမံကိန်းများဖြစ်သည်။

ထို့ပြင် ၂၀၂၈ ခုနှစ်တွင် ဘတ်ဂျက် လိုငွေပြမှုကို ၆ ဒသမ ၅ ရာခိုင်နှုန်းမှ ၃  ရာခိုင်နှုန်းအထိ လျှော့ချနိုင်ရန် ဘဏ္ဍာရေး စည်းမျဉ်းစည်းကမ်းများကိုလည်း သင့်တော်သလို ထိန်းညှိဆောင်ရွက်သွားမည်ဟု မားကို့စ်က ပြောကြားခဲ့သည်။

Source: Nikkei Asia

CNI International News

ဘေဂျင်း၊ မေလ ၁၅

တရုတ်နှင့် ကိုလံဘီယာ ခေါင်းဆောင်များသည် ဘေဂျင်းမြို့တော်တွင် တွေ့ဆုံခဲ့ကြပြီးနောက် နှစ်နိုင်ငံကြား ပတ်လမ်း၊ ရပ်ဝန်း စီမံကိန်း (BRI) နှင့်ပတ်သက်သည့် ပူးပေါင်းဆောင်ရွက်ရေး အစီအစဉ်တစ်ခုကို လက်မှတ်ရေးထိုးခဲ့ကြောင်း ရိုက်တာမှ ဖော်ပြခဲ့သည်။

မကြာသေးမီ နှစ်များအတွင်း BRI စီမံကိန်းကြောင့် တရုတ်သည် အမေရိကန်အတွက် မဟာဗျူဟာမြောက် အရေးကြီးသည့် လက်တင်အမေရိကနှင့် ကာရစ်ဘီယံဒေသမှ နိုင်ငံများအပေါ် ဩဇာလွှမ်းမိုးမှု မြင့်တက်ခဲ့သည်။

တရုတ်၏ BRI စီမံကိန်းနှင့် ပူးပေါင်းရန် ဆုံးဖြတ်ခဲ့ခြင်းသည် ဆယ်စုနှစ်များအတွင်း ကိုလံဘီယာနိုင်ငံ၏ အကြီးမားဆုံး လုပ်ဆောင်ချက် တစ်ခုဖြစ်ကြောင်း ကိုလံဘီယာနိုင်ငံခြားရေးဝန်ကြီး လော်ရာ ဆရာဘီယာ (Laura Sarabia) က မေလ ၁၄ ရက်တွင် ပြောကြားခဲ့သည်။

ကိုလံဘီယာသမ္မတ ပက်ထရိုကို တွေ့ရစဉ်

“အခုလို ပူပေါင်းဆောင်ရွက်ရေး အစီအစဉ်ကို လက်မှတ်ရေးထိုးတာဟာ ကုန်သွယ်ရေး၊ ရင်းနှီးမြှုပ်နှံမှုနဲ့ ခရီးသွား ကဏ္ဍတွေအတွက် အဆုံးမရှိတဲ့ အခွင့်အလမ်းတွေကို ပေါ်ပေါက်လာစေခဲ့ပါတယ်။ နောက်ကြောင်း ပြန်လှည့်မှာ မဟုတ်ပါဘူး။ ကိုလံဘီယာဟာ ကမ္ဘာကြီးအတွက် တံခါးဖွင့်ထားပါတယ်” ဟု ဆရာဘီယာက X လူမှုမီဒီယာတွင် ရေးသားခဲ့သည်။

တရုတ်သည် အမေရိကန်ပြီးလျှင် ကိုလံဘီယာ၏ အကြီးမားဆုံး ကုန်သွယ်ဖက်နိုင်ငံဖြစ်ပြီး မကြာသေးမီက ကိုလံဘီယာ၏ သွင်းကုန်ကဏ္ဍတွင် အကြီးဆုံး မိတ်ဖက်နိုင်ငံ ဖြစ်ခဲ့သည်။

တရုတ်သည် ကိုလံဘီယာနိုင်ငံထံမှ အရည်အသွေးမြင့် ထုတ်ကုန်များကို တင်သွင်းဝယ်ယူရန် အသင့်ရှိနေပြီး တရုတ်ကုမ္ပဏီများသည်လည်း ကိုလံဘီယာ၏ အခြေခံ အဆောက်အအုံ စီမံကိန်းများတွင် ပူးပေါင်းဆောင်ရွက် ရန်၊ စီးပွားရေး လုပ်ငန်းများလုပ်ရန်နှင့် ရင်းနှီးမြှုပ်နှံမှုများ လုပ်ရန်ရှိကြောင်း တရုတ်သမ္မတ ရှီကျင့်ဖျင် (Xi Jinping) က ကိုလံဘီယာသမ္မတ ပက်ထရို (Gustavo Petro) ကို ပြောကြားခဲ့သည်ဟု တရုတ်နိုင်ငံပိုင် ဆင်ဟွာ သတင်းအေဂျင်စီက ဖော်ပြခဲ့သည်။

ကာရေဘီယံနိုင်ငံများမှ ခေါင်းဆောင်များကို တွေ့ရစဉ်

ကိုလံဘီယာသည် ၂၀၁၃ ခုနှစ်က ရှီကျင့်ဖျင် စတင်ခဲ့သည့် BRI စီမံကိန်းကို ပူးပေါင်းမည်ဖြစ်ကြောင်း မေလ ၁၂ ရက် ကတည်းက ပက်ထရိုက ပြောကြားခဲ့သည်။

လက်ရှိတွင် တရုတ်၏ BRI စီမံကိန်းတွင်  လက်တင်အမေရိကနိုင်ငံ ၂၀ အပါအဝင် ကမ္ဘာ့နိုင်ငံပေါင်း ၁၅၀ ကျော် က ပူးပေါင်းပါဝင်ထားသည်။

သို့သော် ပနားမားနိုင်ငံသည် ဖေဖော်ဝါရီလက BRI မှ နုတ်ထွက်ခဲ့ပြီး ထိုနုတ်ထွက်မှုနှင့် ပတ်သက်ပြီး တရုတ်က အမေရိကန်ကို အပြစ်တင်ခဲ့သည်။

၂၀၂၂ ခုနှစ်၊ ဩဂုတ်လကတည်းက အာဏာရရှိခဲ့သည့် ပက်ထရိုသည် ၂၀၂၃ ခုနှစ်၊ အောက်တိုဘာလက ၎င်း၏ ပထမဆုံး ပြည်ပခရီးစဉ်အဖြစ် တရုတ်နိုင်ငံသို့ သွားရောက်ခဲ့ပြီး ၁၉၈၀ ပြည့်နှစ်ကတည်းက ထူထောင်ခဲ့သည့် မဟာဗျူဟာမြောက် မိတ်ဖက်ဆက်ဆံရေးကို တိုးမြှင့်ခဲ့သည်။

Source: ရိုက်တာ

CNI International News

ဟောင်ကောင်၊ မေလ ၁၃

အမေရိကန်နှင့် တရုတ်သည် တစ်ဖက်နှင့်တစ်ဖက် ပို့ကုန်များအပေါ် စည်းကြပ်ကောက်ခံသည့် အခွန်များကို ယာယီလျှော့ချရန် မေလ ၁၂ ရက်က သဘောတူခဲ့ကြကြောင်း Nikkei Asia မှ ဖော်ပြခဲ့သည်။

ကမ္ဘာလုံးဆိုင်ရာ စီးပွားရေးကို ကမောက်ကမ ဖြစ်စေခဲ့သည့် အမေရိကန်-တရုတ် ကုန်သွယ်ရေးစစ်ပွဲ ဖြစ်ပွား ပြီးနောက် ယခုသဘောတူညီချက်သည် သိသာထင်ရှားသော ပြောင်းလဲမှုတစ်ခု ဖြစ်ခဲ့သည်။

နှစ်နိုင်ငံပူးတွဲ ထုတ်ပြန်ခဲ့သည့် ကြေညာချက်တွင် အမေရိကန်အစိုးရသည် တရုတ်၏ ပို့ကုန်များအပေါ် ကောက်ခံ သော အခွန်နှုန်းထား ၁၄၅ ရာခိုင်နှုန်းကို ၃၀ ရာခိုင်နှုန်းအထိ ရက်ပေါင်း ၉၀ ကြာ လျှော့ချမည်ဟု ဖော်ပြထား သည်။

ထို့ပြင် တရုတ်ကလည်း အမေရိကန် ပို့ကုန်များအပေါ် စည်းကြပ်ကောက်ခံသည့် အခွန်နှုန်းထား ၁၂၅ ရာခိုင်နှုန်း ကို ၁၀ ရာခိုင်နှုန်းအထိ ရက်ပေါင်း ၉၀ ကြာ လျှော့ချပေးရမည်ဖြစ်သည်။

လက်ရှိတွင် ကုန်သွယ်ခွန် ကိစ္စနှင့်ပတ်သက်၍ အမေရိကန်နှင့်တရုတ်ကြား ဆွေးနွေးညှိနှိုင်းမှုများကို ဆက်လက် ပြုလုပ်နေပြီး ကုန်သွယ်ခွန် လျှော့ချမှုသည် မေလ ၁၄ ရက်တွင် စတင်အကျုံးဝင် သက်ရောက်မည်ဖြစ်သည်။

အမေရိကန်သံတမန်ကို တွေ့ရစဉ်

တရုတ်နှင့်အမေရိကန်သည် ကုန်သွယ်ရေးစစ်ပွဲ ဖြစ်ပွားပြီးနောက် ပထမဆုံးအကြိမ်အဖြစ် ဆွစ်ဇာလန်တွင် ဆွေးနွေးမှုများ ပြုလုပ်ခဲ့ပြီးနောက် ယခုကဲ့သို့ ကြေညာချက် ထုတ်ပြန်ခဲ့ခြင်းဖြစ်သည်။

နှစ်နိုင်ငံကြား သဘောတူညီချက် ရရှိခဲ့သည့် သတင်းကြောင့် ရှယ်ယာစျေးကွက်များ ပြန်လည်မြင့်တက် လာခဲ့သည်။

ပြီးခဲ့သည့်လက အမေရိကန်နှင့် တရုတ်ကြား ကုန်သွယ်ရေးစစ်ပွဲကြောင့် ကမ္ဘာလုံးဆိုင်ရာ ငွေကြေးစျေးကွက်များ ကမောက်ကမဖြစ်ခဲ့ပြီး ကမ္ဘာ့စီးပွားပျက်ကပ် ဖြစ်ပွားနိုင်ခြေရှိသည့် စိုးရိမ်မှုများကို မြင့်တက်စေခဲ့သည်။

ပူးတွဲကြေညာချက်တွင်မူ နှစ်နိုင်ငံစလုံးသည် စီးပွားရေး၊ ကုန်သွယ်ရေး ဆက်ဆံမှုများနှင့်ပတ်သက်ပြီး ဆွေးနွေး မှုများ ဆက်လက် ပြုလုပ်ရန် ယန္တရားတစ်ခု ထူထောင်သွားမည်ဟုလည်း ဖော်ပြခဲ့သည်။

Source: Nikkei Asia

CNI International News

ဘေဂျင်း၊ မေလ ၁

တရုတ်သည် အမေရိကန်၏ ကုန်သွယ်ခွန်များ တိုးမြှင့်ကောက်ခံမှုကို တုံ့ပြန်သည့် အနေဖြင့် ဝါဒဖြန့် ယန္တရားကို ပိုမိုအရှိန်မြှင့်တင်နေသည်ဟု ရိုက်တာမှ ဖော်ပြခဲ့သည်။

ထို့နောက် စစ်အေးကာလက ရုပ်ပုံများအား အသုံးပြု၍ ဗွီဒီယိုများကို လူမှုမီဒီယာများတွင် ဖြန့်နေသည်။

ထိုဗွီဒီယိုများထဲတွင် နယ်ချဲ့များကို ပြင်းထန်စွာ ဝေဖန်ထားပြီး တရုတ်အနေဖြင့် ဒူးထောက် အညံ့ခံသွားမည် မဟုတ်ကြောင်း ပြောကြားထားသည်။

အမေရိကန်၏ ကုန်သွယ်ခွန်များ တိုးမြှင့်ကောက်ခံမှုသည် အနိုင်ကျင့် ဗိုလ်ကျခြင်းဖြစ်ပြီး ဖန်တနိုင်းကဲ့သို့ မူးယစ်ဆေးဝါးများ စီးဆင်းမှုကို ဖြေရှင်းနိုင်မည် မဟုတ်ဘဲ ကမ္ဘာ့ဒုတိယ စီးပွားရေး အင်အားအကြီးဆုံး တရုတ်၏ တိုးတက်လာမှုကိုလည်း တားဆီးနိုင်မည် မဟုတ်ကြောင်း ပြောကြားခဲ့သည်။

တရုတ်နိုင်ငံခြားရေးဝန်ကြီးဌာန၏ ဧပြီ ၂၉ ရက်က ထုတ်ပြန်ခဲ့သည့် ဗွီဒီယိုတစ်ခုတွင် အင်္ဂလိပ်ဘာသာစကားကို အမေရိကန် လေယူလေသိမ်းဖြင့် ပြောကြားထားသည့် နောက်ခံစကားပြောသံ ပါဝင်ပြီး အမေရိကန်သမ္မတ ဒေါ်နယ်ထရမ့် (Donald Trump) ၏ ကုန်သွယ်ခွန် ၁၄၅ ရာခိုင်နှုန်း တိုးမြှင့်ကောက်ခံမှုသည် အဆိပ်ကို သောက်သုံးနေခြင်းနှင့် တူညီနေကြောင်း ပြောကြားခဲ့သည်။

တရုတ်အလံလွှင့်ထားတဲ့ အဆောက်အအုံကို တွေ့ရစဉ်

“တရုတ်က ဒူးထောက်သွားမှာ မဟုတ်ပါဘူး။ ဘာကြောင့်လဲဆိုတော့ ကျနော်တို့ဟာ ပူးပေါင်းဆောင်ရွက်မှု အလားအလာကို ဖွင့်ပေးထားဖို့ ပြင်ဆင်ထားပါတယ်။ တစ်ချိန်တည်းမှာပဲ ပူးပေါင်းဆောင်ရွက်မှုကို အဆုံးသတ် ပစ်ဖို့လည်း ဝန်လေးမှာ မဟုတ်ပါဘူး”ဟု ထိုဗွီဒီယိုတွင် ပြောကြားထားသည်။

အဆိုပါ နောက်ခံ စကားပြောသံနှင့်အတူ ကိုရီးယားစစ်ပွဲအတွင်းက အမေရိကန် ဂျက်လေယာဉ်တစ်စင်းကို တရုတ်၏ MiG-15 တိုက်လေယာဉ်က ပစ်ချနေသည့် ဗွီဒီယိုမှတ်တမ်းကို ဖော်ပြထားသည်။

“နယ်ချဲ့တွေဆိုတာ အမြဲတမ်း ရန်လိုနေပါတယ်။ သူတို့ကတော့ မလွှဲသာလို့ လုပ်လိုက်ရတာဆိုတဲ့ အကြောင်း ပြချက်ကိုပဲ ပေးလေ့ရှိပါတယ်” ဆိုသည့် နောက်ခံစကားပြောသံနှင့်အတူ ကိုရီးယားစစ်ပွဲကို အဆုံးသတ်စေခဲ့သည့် စစ်ပြေငြိမ်းရေး သဘောတူညီချက် လက်မှတ်ရေးထိုးသည့် ဗွီဒီယိုမှတ်တမ်းကို ဖော်ပြခဲ့သည်။

တရုတ်နိုင်ငံခြားရေးဝန်ကြီး ဝမ်ယိ (Wang Yi) ကလည်း ထရမ့်၏ ကုန်သွယ်ရေး မူဝါဒသည် ကြီးနိုင်ငယ်ညှင်း ဖြစ်သည့် တောတွင်းဥပဒေကို ပြန်လည်အသက်သွင်းခြင်းဖြစ်ကြောင်း ဧပြီ ၂၈ ရက်က ပြောကြားခဲ့သည်။

တရုတ်၏ WeChat လူမှုမီဒီယာတွင်လည်း ထရမ့်၊ ဒုသမ္မတ ဗန့်စ် (Vance) နှင့် Tesla ကုမ္ပဏီအကြီးအကဲ အီလွန်မာ့စ် (Elon Musk) တို့ ၃ ယောက်သည် စက်ရုံတစ်ရုံတွင် ဖိနပ်များ ထုတ်လုပ်နေသည့်ပုံကို AI ဖြင့် ဖန်တီးပြီး မျှဝေခဲ့သည်။

Source: ရိုက်တာ

CNI International News

ဘန်ကောက်၊ ဧပြီ ၂၃

အမေရိကန်နှင့် တရုတ်ကြား ကုန်သွယ်ရေးစစ်ပွဲကြောင့် ရေရာမှုမရှိသည့် ကမ္ဘာ့ကုန်သွယ်ရေး အခြေအနေသည် ထိုင်းနိုင်ငံ၏ ပို့ကုန်နှင့် ထောက်ပံ့ရေးကွင်းဆက်ကို သွယ်ဝိုက်ပြီး ထိခိုက်စေနိုင်ကြောင်း ကျွမ်းကျင်သူများက စိုးရိမ်နေကြသည်ဟု ဘန်ကောက်ပိုပစ်မှ ဖော်ပြခဲ့သည်။

အထူးသဖြင့် အမေရိကန်နှင့် တရုတ်တို့သည် ၎င်းတို့၏ ရပ်တည်ချက်များကို အလျှော့မပေးပါက ကုန်သွယ်ရေး စစ်ပွဲသည် တစ်နှစ်အထိ ကြာမြင့်နိုင်သည်ဟု CGS-CIMB Securities ကုမ္ပဏီမှ အကြီးတန်းအမှုဆောင်ဒုဥက္ကဋ္ဌ နတ္တဝတ် အွန်ရတ် (Nattawat Onratn)က ပြောကြားခဲ့သည်။

“အကြီးမားဆုံး ပြဿနာကတော့ အမေရိကန်သမ္မတ ဒေါ်နယ်ထရမ့် (Donald Trump) က ဘာကိုလိုချင်နေတာ လဲဆိုတာကို ဘယ်သူမှ မသိနိုင်တာ ဖြစ်ပါတယ်။ အပြန်အလှန် ကုန်သွယ်ခွန် တိုးမြှင့်တဲ့ကိစ္စနဲ့ ပတ်သက်ပြီး  ဂျပန် အပါအဝင် အမေရိကန်နဲ့ ဆွေးနွေးထားတဲ့ နိုင်ငံတွေဟာ သူတို့ရဲ့ ဆွေးနွေးမှုတွေကနေ သိသာထင်ရှားတဲ့ တိုးတက်မှုတွေ မရခဲ့ဘူးလို့ ပြောကြပါတယ်” ဟု နတ္တဝတ်က ပြောကြားခဲ့သည်။

ထိုင်းဝန်ကြီးချုပ် ပေတုန်တန်နဲ့ ပြည်သူများကိုတွေ့ရစဉ်

“အကျပ်အတည်းဆိုတဲ့ စကားလုံးကို တစ်ယောက်နဲ့တစ်ယောက် အဓိပ္ပာယ်ဖွင့်ပုံခြင်း မတူကြပါဘူး။ ကျနော့် အမြင်ကို ပြောရမယ်ဆိုရင်တော့ ရင်းနှီးမြှုပ်နှံသူတွေက ငွေတွေကို ပိုကိုင်ထားသင့်တဲ့အချိန်မှာ ကျနော်တို့ဟာ အကျပ်အတည်းနဲ့ ရင်ဆိုင်နေရပြီပဲဖြစ်ပါတယ်”ဟု မစ္စတာ နတ္တဝတ်က ပြောကြားခဲ့သည်။

ထို့ပြင် ထိုင်းစတော့အိတ်ချိန်း (SET) ၏ အခြေအနေသည် ရေတိုတွင် ပြန်လည်ကောင်းမွန်လာသည်ကို မြင်တွေ့ ရသော်လည်း ရှယ်ယာတန်ဖိုးသည် ထရမ့်၏ အကောက်ခွန် မူဝါဒ၏ အနုတ်လက္ခဏာဆောင်သော လွှမ်းမိုးမှု အောက်၌ ရှိနေလိမ့်မည်ဖြစ်ကြောင်း နတ္တဝတ်က ပြောကြားခဲ့သည်။

ထိုင်းနိုင်ငံသည် အမေရိကန်-တရုတ် ကုန်သွယ်ရေးစစ်ပွဲ၏ အကျိုးသက်ရောက်မှုများကို အနည်းနှင့်အများ ဆိုသလို ရင်ဆိုင်ရဖွယ်ရှိကြောင်း ၎င်းက ဆိုသည်။

ထို့ပြင် ထိုင်းနိုင်ငံ၏ ဂျီဒီပီ တိုးတက်မှုသည် ၂၀၂၄ ခုနှစ်တွင် ၂ ဒသမ ၅ ရာခိုင်နှုန်းရှိခဲ့ရာမှ ယခုနှစ်တွင် ၂ ဒသမ ၂ ရာခိုင်နှုန်း၊ ၂၀၂၆ ခုနှစ်တွင် ၂ ဒသမ ၁ ရာခိုင်နှုန်းသို့ ကျဆင်းသွားဖွယ်ရှိကြောင်း ဂျာမနီနိုင်ငံ၏ ဘဏ္ဍာရေး ဝန်ဆောင်မှုကုမ္ပဏီ Allianz SE ကုမ္ပဏီက  ပြောကြားခဲ့သည်။

ထိုင်းဝန်ကြီးချုပ် ပေတုန်တန်နဲ့ ပြည်သူများကိုတွေ့ရစဉ်

အမေရိကန်၏ အပြန်အလှန် ကုန်သွယ်ခွန် တိုးမြှင့်ကောက်ခံမှုသည် ကမ္ဘာလုံးဆိုင်ရာ ကုန်သွယ်ရေးတွင် ကုန်ကျ စရိတ်များကို မြင့်တက်စေခဲ့သည်။

အထူးသဖြင့် မော်တော်ယာဉ်လုပ်ငန်း၊ ကုန်ထုတ်လုပ်ငန်းနှင့် လျှပ်စစ်ပစ္စည်း လုပ်ငန်းများကို သက်ရောက်စေ ခဲ့သည်ဟု Allianz SE ကုမ္ပဏီ၏ ရင်းနှီးမြှုပ်နှံရေးအရာရှိနှင့် စီးပွားရေးပညာရှင် လူဒိုဗစ် ဆူဘရန် (Ludovic Subran) က ပြောကြားခဲ့သည်။

ထို့ပြင် ကုန်သွယ်ရေးစစ်ပွဲကြောင့် ၂၀၂၅ ခုနှစ်တွင် ကမ္ဘာလုံးဆိုင်ရာ ဂျီဒီပီ ဖွံ့ဖြိုးတိုးတက်မှုနှုန်းသည်လည်း ၂ ဒသမ ၃ ရာခိုင်နှုန်းသို့ ကျဆင်းသွားဖွယ်ရှိပြီး ထိုနှုန်းထားသည် Covid-19 ကပ်ရောဂါကာလ နောက်ပိုင်း အနိမ့်ဆုံး နှုန်းထားဖြစ်သည်ဟု Allianz SE ကုမ္ပဏီက ခန့်မှန်းခဲ့သည်။

Source: ဘန်ကောက်ပို့စ်