CNI International News

နယူးဒေလီ၊ မေလ ၂၅

အိန္ဒိယဆေးဝါးလုပ်ငန်းကဏ္ဍသည် ၂၀၃၀ ပြည့်နှစ်တွင် ဒေါ်လာ ၁၃၀ ဘီလျံ တန်ဖိုးအထိ ရှိလာစေရန် မျှော်မှန်း ထားသည်ဟု အိန္ဒိယဆေးဝါးလုပ်ငန်း၏ အကြီးအကဲတစ်ဦးက CPHI & PMEC India ကုန်စည်ပြပွဲ၌ ပြောကြားခဲ့ ကြောင်း wionews မှ ဖော်ပြခဲ့သည်။

“အိန္ဒိယဆေးဝါးလုပ်ငန်းကဏ္ဍဟာ အရမ်းစိတ်ဝင်စားဖို့ကောင်းတဲ့ ဖွံ့ဖြိုးတိုးတက်မှု လမ်းကြောင်းပေါ်မှာ ရှိနေပါ တယ်။ နှစ်အလိုက် ပို့ကုန်ကဏ္ဍဟာ ၈ ရာခိုင်နှုန်း မြင့်တက်ခဲ့ပြီး ပြီးခဲ့တဲ့နှစ် အောက်တိုဘာလ တစ်လထဲမှာပဲ ၂၉ ရာခိုင်နှုန်း မြင့်တက်ခဲ့ပါတယ်။ ကျယ်ပြန့်လာတဲ့ စျေးကွက် အခွင့်အလမ်းတွေ၊ အမေရိကန်ရဲ့ ဝယ်လိုအား မြင့်တက်မှုတွေ၊ အမေရိကန်နဲ့ ဥရောပမှာ ဆေးဝါးပြတ်လပ်မှုတွေကြောင့် အဲဒီလို မြင့်တက်လာခဲ့တာပါ”ဟု အိန္ဒိယဆေးဝါး ပို့ကုန်မြှင့်တင်ရေးကောင်စီ (Pharmexcil) ၏ ဥက္ကဋ္ဌဖြစ်သည့် ဒေါက်တာ ဗီရာမာနီ အက်စ်ဗွီ (Veeramani S.V.) က ပြောကြားခဲ့သည်။

ဓနသဟာယအဖွဲ့ဝင်နိုင်ငံများတွင် စိန်ခေါ်မှုများနှင့် ရင်ဆိုင်နေရသည့်တိုင် အိန္ဒိယ၏ ဆေးဝါးတင်ပို့မှုကဏ္ဍသည် တစ်ကမ္ဘာလုံး အတိုင်းအတာနှင့် နှိုင်းယှဉ်ပါက ကောင်းမွန်နေဆဲဖြစ်ကြောင်း ၎င်းက ဆိုသည်။

အိန္ဒိယရဲ့ ဆေးဝါးထုတ်လုပ်မှုကို တွေ့ရစဉ်

“ပြည်တွင်းစျေးကွက်ဟာ အထင်ကြီးလောက်စရာကောင်းအောင် တိုးတက်ခဲ့ပြီး ဒီအရှိန်အဟုန်နဲ့အတူ ၁၀ ရာခိုင်နှုန်းကျော် မြင့်တက်ခဲ့ပါတယ်။ ၂၀၃၀ ပြည့်နှစ်မှာဆိုရင် ဒေါ်လာ ၁၃၀ အထိ ရှိလာလိမ့်မယ်လို့ ကျနော် ယုံကြည်ပါတယ်”ဟု ဗီရာမာနီက ပြောသည်။

အိန္ဒိယဆေးဝါး ထုတ်လုပ်သူများအဖွဲ့ (OPPI) ၏ ညွှန်ကြားရေးမှူးချုပ် အန်နီ မာတိုင် (Anil Matai) ကလည်း ၂၀၃၀ ပြည့်နှစ်တွင် အိန္ဒိယ၏ ဆေးဝါးလုပ်ငန်း အခင်းအကျင်းသည် တိုးတက်ပြောင်းလဲလာမည်ဖြစ်၍ မိမိတို့၏ ဆေးဝါးကဏ္ဍကို အမြော်အမြင်ရှိရှိဖြင့် ၂၀၄၇ ခုနှစ်အထိ မျှော်မှန်းချက်များထားရှိရန် ဆွေးနွေးညှိနှိုင်းမှုများ ပြုလုပ်နေကြောင်း ပြောကြားခဲ့သည်။

“ကျနော်တို့ဟာ စဉ်ဆက်မပြတ် ဖွံ့ဖြိုးတိုးတက်မှု လမ်းကြောင်းပေါ်မှာ ရှိနေပါတယ်။ မျှော်မှန်းထားတဲ့ ဒေါ်လာ ၁၃၀ ဘီလျံထက် ကျော်လွန်ပြီး ဆေးဝါးဌာန (DOP) ဟာ ဒေါ်လာ ၂၀၀ ဘီလျံအထိ ရရှိဖို့ ရည်မှန်းထားပါတယ်။ ဆေးဝါးလုပ်ငန်း ဖွံ့ဖြိုးတိုးတက်မှုကို မြှင့်တင်ဖို့၊ လူနာတွေရဲ့ လိုအပ်ချက်တွေကို ဖြည့်ဆည်းဖို့၊ ဆန်းသစ်တီထွင်မှု တွေကို သိရှိနားလည်ပြီး ကပ်ရောဂါကာလက ရရှိခဲ့တဲ့ သင်ခန်းစာတွေနဲ့အတူ ရည်မှန်းချက်ကို အကောင်အထည် ဖော်သွားမှာပါ” ဟု ၎င်းက ပြောကြားခဲ့သည်။

ဆေးဝါးလုပ်ငန်းကဏ္ဍ၏ အလားအလာနှင့် စပ်လျဉ်းပြီး မိမိတို့သည် ၁၃ ရာခိုင်နှုန်းမှ ၁၄ ရာခိုင်နှုန်းခန့် တိုးတက်မှု ကို တည်ငြိမ်စွာ ထိန်းသိမ်းပြီး ခိုင်မာသည့် မူဝါဒများဖြင့် ဆက်လက် လုပ်ဆောင်ရမည်ဟုလည်း မာတိုင်က ပြော ကြားခဲ့သည်။

အိန္ဒိယရဲ့ ဆေးဝါးကို တွေ့ရစဉ်

အိန္ဒိယသည် အဓိက ဆေးဝါးတင်ပို့ရောင်းချသည့် နိုင်ငံဖြစ်ပြီး နိုင်ငံပေါင်း ၂၀၀ ကျော်သို့ အိန္ဒိယနိုင်ငံလုပ် ဆေးဝါးများကို တင်ပို့ရောင်းချခဲ့သည်။

အိန္ဒိယသည် အာဖရိက၏ ဆေးဝါးလိုအပ်မှု၏ ၅၀ ရာခိုင်နှုန်း၊ အအမေရိကန်၏ ဆေးဝါးဝယ်လိုအား၏ ၄၀ ရာခိုင်နှုန်းနှင့် ဗြိတိန်၏ ဆေးဝါးဝယ်လိုအား၏၂၅ ရာခိုင်နှုန်းကို ထောက်ပံ့ပေးထားသည်။

ထို့ပြင် အိန္ဒိယသည် ကမ္ဘာလုံးဆိုင်ရာ ကာကွယ်ဆေးများ ဝယ်လိုအား၏ ၆၀ ရာခိုင်နှုန်းကို ထောက်ပံ့ပေးနေပြီး ဆုံဆို့နာကာကွယ်ဆေး၊ မေးခိုင်ကာကွယ်ဆေးနှင့် ငှက်ဖျားကာကွယ်ဆေးများကို အဓိက တင်ပို့ရောင်းချပေးနေ ကာ ကမ္ဘာ့ကျန်းမာရေးအဖွဲ့ (WHO) ၏ အဓိက ကာကွယ်ဆေး စုစုပေါင်း၏ ၇၀ ရာခိုင်နှုန်းသည် အိန္ဒိယမှ ထုတ်လုပ်သည့် ကာကွယ်ဆေးများဖြစ်သည်။

Source: winnows

CNI International News

ဝါရှင်တန်၊ မေလ ၂၅

အမေရိကန်သည် ဩဂုတ်လ ၁ ရက်မှစပြီး တရုတ်မှ အမေရိကန်သို့ တင်သွင်းသည့် လျှပ်စစ်ကားများနှင့် ကား ဘက္ကထရီများ၊ ကွန်ပြူတာ ချစ်ပ်ပြားများနှင့် ဆေးဝါးထုတ်ကုန်များ အပါအဝင် များစွာသော တရုတ်ပို့ကုန်များ အပေါ် စည်းကြပ်ကောက်ခံမည့် အခွန်နှုန်းကို တိုးမြှင့်သွားမည်ဟု အမေရိကန် ကုန်သွယ်ရေး ကိုယ်စားလှယ်ရုံး (USTR)က မေလ ၂၂ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

အမေရိကန်သမ္မတ ဂျိုးဘိုင်ဒန် (Joe Biden) သည် ယခင်သမ္မတ ဒေါ်နယ်ထရမ့် (Donald Trump) လက်ထက်က လုပ်ဆောင်ခဲ့သည့် တရုတ်ထံမှတင်ပို့သည့် ကုန်စည်များအပေါ် အခွန်တိုးမြှင့်ကောက်ခံသည့် အစီအစဉ်ကို ဆက်လက် လုပ်ဆောင်ခဲ့သည်။

တရုတ်လျှပ်စစ်ကားများအပေါ် အခွန်များ လေးဆမြင့်တင်ပြီး ၁၀၀ ရာခိုင်နှုန်း၊ တစ်ပိုင်းလျှပ်ကူး ပစ္စည်းများအပေါ် အခွန်များ ၂ ဆမြှင့်တင်ပြီး ၅၀ ရာခိုင်နှုန်း တိုးမြှင့်မှုအပြင် အခြားကုန်စည်များကိုလည်း အခွန်များတိုးမြှင့်ခဲ့သည်။

ထိုအစီအစဉ်နှင့်ပတ်သက်ပြီး ပြည်သူလူထုအား မှတ်ချက်ပေးခွင့်ပြုထားသည့် ရက်ပေါင်း ၃၀ တာကာလသည် ဇွန်လ ၂၈ ရက်တွင် အဆုံးသတ်မည်ဟု USTR က ဖက်ဒရယ်နို့တစ်စာ ထုတ်ပြန်ခဲ့သည်။

အမေရိကန်သမ္မတ ဂျိုးဘိုင်ဒန်ကို တွေ့ရစဉ်

အမေရိကန် ကုန်သွယ်ရေး အေဂျင်စီသည် ဆေးဘက်ဆိုင်ရာသုံး နှာခေါင်းစည်းများနှင့် လက်အိတ်များအပေါ် အခွန် ၂၅ ရာခိုင်နှုန်း၊ ဆေးထိုးပြွန်များအပေါ် အခွန် ၅၀ ရာခိုင်နှုန်း တိုးမြှင့်ကောက်ခံဖို့ အဆိုပြုထားသည့် အခွန်နှုန်းထားထက် ပိုမိုတိုးမြှင့်ရန် သင့်၊မသင့်နှင့် ထိုသို့ အခွန်နှုန်းထားများ တိုးမြှင့်မှုသည် စားသုံးသူများနှင့် အမေရိကန်၏ စီးပွားရေးအပေါ် သက်ရောက်မှုများ ရှိ၊မရှိကို အကြံပြုချက်များ ရရှိရန် ကြိုးပမ်းလျက်ရှိသည်။

အမေရိကန်သည် ၂၀၂၃ ခုနှစ်တွင် တရုတ်နိုင်ငံမှ တင်ပို့သည့် ဒေါ်လာ သန်း ၆၄၀ နီးပါးတန်ဖိုးရှိ လက်အိတ်များ၊ နှာခေါင်းစည်းများနှင့် ဆေးထိုးပြွန်များကို ဝယ်ယူခဲ့ပြီး အခွန်နှုန်းထားများ တိုးမြှင့်မှု၌ ထိုကုန်ပစ္စည်းများအပေါ် သက်ရောက်မှုရှိမည်ဖြစ်သည်။

USTR မှ ထုတ်ပြန်သည့် နို့တစ်စာတွင် အခွန်နှုန်းထား အသစ်များ သတ်မှတ်မည့် စာရင်းတွင် အကျုံးဝင် သက်ရောက်မည့် အခြားထုတ်ကုန် အမျိုးအစား ၃၈၇ မျိုး၏ အခွန်ကုဒ်နံပါတ်များကိုလည်း ဖော်ပြထားသည်။ 

ထိုစာရင်းတွင်ပါသည့် ထုတ်ကုန် အမျိုးအစားများကို ၂၀၂၅ ခုနှစ်၊ ဇန်နဝါရီ ၁ ရက်နှင့် ၂၀၂၆ ခုနှစ်၊ ဇန်နဝါရီ ၁ ရက်တို့တွင် စတင်အကျုံးဝင်လိမ့်မည်ဟု USTR က ပြောကြားခဲ့သည်။

တရုတ်၏ ပို့ကုန်များအပေါ် အခွန်နှုန်းထား တိုးမြှင့်သည့် အဆိုပြုချက်တွင် မကြာသေးမီက အမေရိကန်၏ ရင်းနှီးမြှုပ်နှံမှုများရှိနေသည့် ကဏ္ဍများနှင့် သက်ဆိုင်သော တရုတ်ထုတ်ကုန်များ၊ ဩဇာလွှမ်းမိုးရေးအတွက် ရည်ရွယ်ထားသည့် တရုတ်ထုတ်ကုန်များကို ပစ်မှတ်ထားခြင်းဖြစ်သည်။

 တရုတ်ကားစက်ရုံကို တွေ့ရစဉ်

အမေရိကန်သည် သန့်ရှင်းသည့် အမေရိကန်လုပ် လျှပ်စစ်ကားများ၊ ဆိုလာနှင့် အခြား စက်မှုလုပ်ငန်းများတွင် ဒေါ်လာ ဘီလျံပေါင်းမြောက်များစွာ ရင်းနှီးမြှုပ်နှံနေသည်။

တရုတ်အစိုးရ၏ ထောက်ပံ့မှုဖြင့် ထုတ်ကုန်ပမာဏ အများအပြား ဝင်ရောက်လာမှုသည် ထိုလုပ်ငန်းများ၌ အမေရိကန်ကုမ္ပဏီများ၏ အလားအလာအပေါ် ခြိမ်းခြောက်နေကြောင်း အမေရိကန်က ပြောကြားခဲ့သည်။

ထို့ကြောင့် အမေရိကန် စျေးကွက်များအတွင်းသို့ စျေးပေါသည့် တရုတ်ကုန်ပစ္စည်းများ အများအပြား ဝင်ရောက် လာမည့်အရေးကို စိုးရိမ်ရပြီး အမေရိကန်၏ အလုပ်အကိုင် စျေးကွက်ကို ကာကွယ်ရန်အတွက် အခွန်နှုန်းထား များကို တိုးမြှင့်ရန် စီစဉ်ရခြင်းဖြစ်သည်ဟု USTR က ပြောကြားခဲ့သည်။

Source: ရိုက်တာ

CNI International News

ဘေကျင်း၊ မေလ ၂၄

ပြည်ပမှ ဘွဲ့ယူပြီးပြန်လာသည့် တရုတ်ကျောင်းသားများသည် တရုတ်၏ ပြိုင်ဆိုင်မှု ပြင်းထန်သော  အလုပ်အကိုင် စျေးကွက်နှင့် ရင်ဆိုင်နေရပြီး အချို့ကျောင်းသားများသည် ၎င်းတို့ မျှော်မှန်းထားသည့် လစာငွေထက် ၃ ပုံ ၁ ပုံ ကျော်ကိုသာ ရရှိနေကြောင်း South China Morning Post မှ ဖော်ပြခဲ့သည်။

ကျောင်းသားများနှင့် မိဘများပါဝင်သည့် လူပေါင်း ၉၀၀၀ ကျော်ကို ကောက်ယူသည့် စစ်တမ်းတွင် ပြည်ပ၌ ပညာသင်ကြား၍ ပြည်တွင်းသို့ ပြန်လည်ဝင်ရောက်လာသော ကျောင်းသားများသည် အလုပ်ရပြီး ပထမလတွင် ၎င်းတို့ မျှော်မှန်းထားသည့် လစာငွေ၏ ၂၃ ရာခိုင်နှုန်းမှ ၃၄ ရာခိုင်နှုန်းကိုသာ ရရှိကြောင်း ဖော်ပြထားသည်။

New Oriental Education & Technology Group မှ ပြုလုပ်ခဲ့သည့် ထိုစစ်တမ်း ကောက်ယူမှု၌ ပြည်ပတွင် ပညာသင်ကြားခဲ့သည့် ဘွဲ့ကြိုကျောင်းသားများ၏ ပထမဆုံး လစာငွေမှာ ပျမ်းမျှ ၇၉၂၈ ယွမ် (၁၀၉၇ ဒေါ်လာ) ရရှိခဲ့ပြီး ၎င်းတို့မျှော်မှန်းထားသည့် လစာငွေထက် ယွမ် ၂၇၀၀ လျော့နည်းနေသည်ဟု ဖော်ပြထားသည်။

မာစတာဘွဲ့များရခဲ့သည့် ကျောင်းသားများ၏ ပျမ်းမျှလစာငွေမှာ ၉၅၂၆ ယွမ်ဖြစ်ပြီး ၎င်းတို့ မျှော်မှန်းထားသည့် လစာငွေထက် ယွမ် ၂၂၀၀ လျော့နည်းနေသည်ဟု ဆိုသည်။

တရုတ်က အလုပ်အကိုင်ပြပွဲကိုတွေ့ရစဉ်

ကမ္ဘာ့ဒုတိယ စီးပွားရေးအင်အား အကြီးဆုံးဖြစ်သည့် တရုတ်၏ စီးပွားရေးသည် အပြည့်အဝ နာလန်မထူသေးချိန် တွင် ယခုနှစ်အတွင်း တရုတ်၏ အလုပ်အကိုင် စျေးကွက်အတွင်းသို့ တက္ကသိုလ်ကျောင်းသား ၁၁ ဒသမ ၇၉ သန်း ခန့် စံချိန်တင် ဝင်ရောက်လာဖွယ်ရှိသည်။

ဧပြီလအတွင်းက တရုတ်၏ အလုပ်လက်မဲ့နှုန်းကို တိုင်းတာ ဖော်ပြချက်တစ်ခုတွင် အသက် ၁၆ နှစ်မှ ၂၄ နှစ်ကြား လူငယ်များ၏ အလုက်လက်မဲနှုန်းသည် မတ်လတုန်းကကဲ့သို့ အပြောင်းအလဲ မရှိဘဲ ၁၅ ဒသမ ၃ ရာခိုင်နှုန်းရှိခဲ့ သည်ဟု တရုတ်အမျိုးသား စာရင်းဇယားဗျူရိုက ထုတ်ပြန်ခဲ့သည်။

ထိုအသက်အရွယ် အပိုင်းအခြားတွင် အလုပ်လက်မဲ့နှုန်း အမြင့်ဆုံးကာလမှာ ၂၀၂၃ ခုနှစ်၊ ဇွန်လတွင်ဖြစ်ပြီး ၂၁ ဒသမ ၃ ရာခိုင်နှုန်းအထိ ရှိခဲ့ကာ ဒီဇင်ဘာလတွင် အလုပ်လက်မဲ့နှုန်းမှာ ၁၄ ဒသမ ၉ ရာခိုင်နှုန်းအထိ လျော့ကျ သွားခဲ့သည်။

တရုတ်က အလုပ်ခေါ်စာများကို ကြည့်နေစဉ်

ပြီးခဲ့သည့်လက အသက် ၂၅ နှစ်မှ ၂၉ နှစ်အရွယ် လူငယ်များအကြား အလုပ်လက်မဲ့နှုန်းမှာလည်း အပြောင်းအလဲ မရှိဘဲ ၇ ဒသမ ၂ ရာခိုင်နှုန်းရှိခဲ့သည်။

“လူငယ် အလုပ်လက်မဲ့ ပြဿနာဟာ အလုပ်သမား စျေးကွက်ကို ပုံမှန်ပြန်လည် မလုပ်ဆောင်ခဲ့တဲ့ အကြောင်းရင်း တွေထဲက တစ်ခုဖြစ်ပါတယ်။ ကျနော်တို့ဟာ အချက်အလက်တချို့ ပျောက်ဆုံးနေပါတယ်”ဟု  Allianz Trade အာမခံကုမ္ပဏီ၏ အာရှ-ပစိဖိတ်ရေးရာ စီးပွားရေးပညာရှင် ဖရန်ကို့စ် ဟောင် (Francoise Huang) က ပြောကြား ခဲ့သည်။

Source: SCMP

CNI International News

နယူးဒေလီ၊ မေလ ၂၄

အိန္ဒိယနှင့် ဆော်ဒီအာရေဗျနိုင်ငံတို့သည် ပြီးခဲ့သည့် ၁၀ နှစ်အတွင်း ၎င်းတို့၏ စီးပွားရေး ဆက်ဆံမှုများကို သိသိသာသာ တိုးမြှင့်ခဲ့ပြီး နှစ်နိုင်ငံဆက်ဆံရေးအား ခိုင်မာအားကောင်းသော မိတ်ဖက်ဆက်ဆံမှု တစ်ခုအဖြစ် ပြောင်းလဲထူထောင်ခဲ့သည်ဟု Gulf News သတင်းဝက်ဘ်ဆိုက်မှ ဖော်ပြခဲ့သည်။

ထိုကဲ့သို့ ပြောင်းလဲတိုးတက်မှုသည် နှစ်နိုင်ငံအကြား စီးပွားရေး ကွဲပြားခြားနားမှု၊ စွမ်းအင်လုံခြုံရေးနှင့် ပထဝီ နိုင်ငံရေး အခြေအနေတို့ကို ထည့်သွင်းစဉ်းစားခြင်းဖြင့် မဟာဗျူဟာမြောက် အကျိုးစီးပွားများ ဖလှယ်မှုကို ဖြစ်ပေါ်စေခဲ့သည်။

ကမ္ဘာလုံးဆိုင်ရာ အခင်းအကျင်း လျင်မြန်စွာ ပြောင်းလဲနေမှုကြောင့် ရှုပ်ထွေးပွေလီသည့် အရေးကိစ္စများကို အိန္ဒိယနှင့်ဆော်ဒီတို့က စီမံဖြေရှင်းနေရချိန်တွင် ၎င်းတို့၏ စီးပွားရေး မိတ်ဖက်ဆက်ဆံမှုသည် ပိုမိုနက်ရှိုင်းသော ပူးပေါင်းဆောင်ရွက်မှုဆီသို့ ဦးတည်ခဲ့သည်။

ဆော်ဒီနဲ့ အိန္ဒိယဆက်ဆံရေးကို ညွှန်ပြနေစဉ်

ဆော်ဒီအာရေဗျသည် အိန္ဒိယ၏ အကြီးဆုံး ကုန်သွက်ဖက်နိုင်ငံများထဲတွင် ပါဝင်လာမှုနှင့်အအတူ နှစ်နိုင်ငံအကြား ကုန်သွယ်မှု တန်ဖိုးမှာလည်း မြင့်တက်ခဲ့ကာ ၂၀၂၁ ခုနှစ်က နှစ်နိုင်ငံအကြား ကုန်သွယ်မှုတန်ဖိုးသည် ဒေါ်လာ ၃၄ ဘီလျံရှိခဲ့သည်။

အိန္ဒိယသည် ၎င်း၏ စွမ်းအင်လိုအပ်ချက်ကို ဖြည့်တင်းရန်အတွက် ဆော်ဒီနိုင်ငံထံမှ ရေနံစိမ်းများကို တင်သွင်း ဝယ်ယူခဲ့သည်။ 

အပြန်အလှန်အနေဖြင့် အိန္ဒိယက ဆော်ဒီကို သန့်စင်ပြီး ရေနံထုတ်ကုန်များ၊ ဓာတုပစ္စည်းများနှင့် လယ်ယာသုံး ထုတ်ကုန်များ အပါအဝင် ကုန်စည် အများအပြားကို တင်ပို့ရောင်းချခဲ့သည်။

နှစ်နိုင်ငံအကြား ထိပ်သီးအဆင့် သွားရောက်သည့် ခရီးစဉ်များနှင့် မဟာဗျူဟာမြောက် သဘောတူညီချက်များက မိတ်ဖက်ဆက်ဆံမှုကို ပိုမိုခိုင်မာအားကောင်းစေခဲ့သည်။

၂၀၁၉ ခုနှစ်က လက်မှတ်ရေးထိုးခဲ့သည့် အိန္ဒိယ-ဆော်ဒီ မဟာဗျူဟာမြောက် မိတ်ဖက်ဆက်ဆံရေးကောင်စီ သဘောတူညီချက်သည် နှစ်နိုင်ငံအကြား နယ်ပယ်ကဏ္ဍ အသီးသီးတွင် ပူးပေါင်းဆောင်ရွက်မှုအတွက် အခရာ ကျခဲ့သည်။

မိုဒီနဲ့ဆော်ဒီမင်းသားကို တွေ့ရစဉ်

ထို့ပြင် ၂၀၃၀ ဆော်ဒီ အတွေးအမြင် (Saudi Vision 2030) ထုတ်ပြန်ချက်သည်လည်း အိန္ဒိယ၏ စီးပွားရေး ရည်မှန်းချက်များနှင့် ကိုက်ညီနေပြီး အခြေခံ အဆောက်အအုံ၊ ပြန်ပြည့်မြဲ စွမ်းအင်နှင့် နည်းပညာကဏ္ဍကဲ့သို့ နယ်ပယ်များတွင် ပူးပေါင်းဆောင်ရွက်မှုကို မြင့်တက်စေခဲ့သည်။

စွမ်းအင်ကဏ္ဍသည်လည်း နှစ်နိုင်ငံ ဆက်ဆံရေး၏ မှတ်ကျောက်တစ်ခု ဖြစ်ခဲ့သည်။ ဆော်ဒီသည် အိန္ဒိယ၏ စွမ်းအင် လိုအပ်ချက်၏ ကြီးမားသည့် ပမာဏကို ဖြည့်တင်းပေးနိုင်ခဲ့သည်။ 

ရေနံအပြင် ရေနံဓာတုပစ္စည်းများနှင့် ပြန်ပြည့်မြဲ စွမ်းအင်စီမံကိန်းများတွင် ပူးပေါင်းဆောင်ရွက်မှုများကို မြှင့်တင်ခဲ့သည်။

ဆော်ဒီနိုင်ငံကလည်း အိန္ဒိယတွင် အိမ်ခြံမြေ၊ ကျန်းမာရေး စောင့်ရှောက်မှုနှင့် နည်းပညာကဏ္ဍ အပါအဝင် ကွဲပြားခြားနားသည့် ကဏ္ဍအများအပြား၌ ရင်းနှီးမြှုပ်နှံမှုများ ပြုလုပ်ခဲ့သည်။

Source: Gulf News

CNI International News

နယူးဒေလီ၊ မေလ ၂၂

အီရန်နိုင်ငံ၊ စစ္စတန်ဘာလူချီစတန် (Sistan Baluchistan) ပြည်နယ်တွင် တည်ရှိသည့် ချာဘာဟာ (Chabahar) မြို့သည် အိန္ဒိယ၏ ဗဟိုအာရှဒေသသို့ ဝင်ပေါက်တစ်ခုသဖွယ် ဖြစ်နေသည်ဟု The Hindu သတင်းဝက်ဘ်ဆိုက်မှ ဖော်ပြခဲ့သည်။ 

အိန္ဒိယနှင့် အီရန်အကြား ဆက်ဆံရေးများသည် ၁၉၇၉ ခုနှစ် တော်လှန်ရေးမတိုင်မီက အရမ်းနီးစပ်သည့် ဆက်ဆံရေးမျိုး မဟုတ်ပေ။ ထိုအချိန်က အီရန်၏ ရှားဘုရင်သည် အမေရိကန်ဘက်ကို ယိမ်းနေပြီး အိန္ဒိယက မဟာမိတ် မဖွဲ့ရေးမူဝါဒကို တွန်းအားပေး လုပ်ဆောင်ခဲ့ခြင်းကြောင့်ဖြစ်သည်။

သို့သော်လည်း လက်ရှိအချိန်တွင် ပထဝီနိုင်ငံရေး အခြေအနေများကြောင့် အိန္ဒိယနှင့် အီရန်အကြား ဆက်ဆံရေး များ တိုးတက်ကောင်းမွန်လာပြီး  အိန္ဒိယသည် ချာဘာဟာဆိပ်ကမ်း ဖွံ့ဖြိုးတိုးတက်ရေးနှင့် လည်ပတ်မှုအတွက် အီရန်နှင့် ၁၀ နှစ်ကြာ လက်တွဲလုပ်ဆောင်မည့် သဘောတူညီချက်တစ်ခုကို လက်မှတ်ရေးထိုးခဲ့သည်။

အနောက်အာရှတွင် တင်းမာမှုများ မြင့်တက်နေသည့်တိုင် အိန္ဒိယသည် အီရန်နှင့် အခြေခံ အဆောက်အအုံနှင့် ကုန်သွယ်ရေး မိတ်ဖက်ဆက်ဆံမှုကို နောက်တဆင့်သို့ မြှင့်တင်ခဲ့ခြင်းဖြစ်သည်။

အိန္ဒိယသည် ချာဘာဟာမြို့ရှိ ရှာဟစ် ဘီဟက်ရှ်တီ (Shahid Beheshti) ဆိပ်ကမ်းနှင့် ဆက်စပ် စီမံကိန်းများတွင် သင်္ဘောဆိပ်တစ်ခု ထပ်မံတည်ဆောက်ရန် ဒေါ်လာ သန်း  ၁၂၀ ရင်းနှီးမြှုပ်နှံမည်ဖြစ်ပြီး ကြွေးမြီ ထုတ်ချေးမှုကို ဒေါ်လာ သန်း ၂၅၀ လျာထားသတ်မှတ်ခဲ့သည်။

အီရန်နဲ့ အိန္ဒိယ ခေါင်းဆောင်များကိုတွေ့ရစဉ်

အမေရိကန်နိုင်ငံခြားရေးဝန်ကြီးဌာနကမူ အီရန်နှင့် စီးပွားရေးလုပ်ရန် စဉ်းစားနေသည့် အဖွဲ့အစည်းများအနေဖြင့် သတိထား လုပ်ဆောင်ရန်လိုအပ်ကြောင်း အဘယ်ကြောင့်ဆိုသော် အီရန်အပေါ် ချမှတ်ထားသည့် ပိတ်ဆို့မှုများနှင့် ဆက်နွှယ်ပြီး အန္တရာယ်ရှိနိုင်သောကြောင့်ဖြစ်ကြောင်း ပြောကြားခဲ့သည်။

အမေရိကန်သည် အီရန်အပေါ် ချမှတ်ထားသည့် ပိတ်ဆို့မှုများကို ဖြေလျှော့ပေးခဲ့ပြီးနောက် အိန္ဒိယနှင့် အီရန် အကြား ထိုပူးပေါင်းဆောင်ရွက်ရေးအတွက် နားလည်မှုစာချွန်လွှာကို ၂၀၁၅ ခုနှစ်တွင် လက်မှတ်ရေးထိုးခဲ့ခြင်း ဖြစ်သည်။

ထို့နောက် ၂၀၁၆ ခုနှစ်တွင် အိန္ဒိယဝန်ကြီးချုပ် နာရန်ဒရာမိုဒီ (Narendra Modi) က အီရန်သို့ သွားရောက် လည်ပတ်သည့် ခရီးစဉ်အတွင်း ထိုစာချုပ်ကို တရားဝင် အကောင်အထည်ဖော်ခဲ့သည်။

ချာဘာဟာ ဆိပ်ကမ်းသည် အိန္ဒိယအတွက် ကန်သွယ်ရေးလမ်းကြောင်းကို ပြောင်းလဲစေနိုင်ပြီး ဗဟိုအာရှနှင့် ကုန်သွယ်ရေးကို ပိုမိုတိုးတက်ကောင်းမွန် စေလိမ့်မည်ဟု ကျွမ်းကျင်သူများက ပြောကြားခဲ့သည်။

Source: The Hindu

CNI International News

အစ္စလာမ်မာဘက်၊ မေလ ၂၁ 

ပါကစ္စတန်တွင် ဘွဲ့ရလူငယ်များအကြား အလုပ်လက်မဲ့နှုန်း မြင့်တက်နေမှုသည် ကြီးမားသည့် စိန်ခေါ်မှုတစ်ခု ဖြစ်နေသည်ဟု Daily Asian Age သတင်းဝက်ဘ်ဆိုက်မှ ဖော်ပြခဲ့သည်။

လက်ရှိတွင် ပါကစ္စတန်နိုင်ငံအတွင်း ပျမ်းမျှအလုပ်လက်မဲ့နှုန်း၏ ၃ ဆ နီးပါးရှိလာသည်။

ပါကစ္စတန်တွင် ဘွဲ့ရလူငယ် စုစုပေါင်း၏ ၃၁ ရာခိုင်နှုန်းမှာ အလုပ်လက်မဲ့များဖြစ်ပြီး ပါကစ္စတန်၏ အလုပ်လက်မဲ့ လူဦးရေ စုစုပေါင်း၏ ၅၁ ရာခိုင်နှုန်းမှာ အမျိုးသမီးများ ဖြစ်နေသည်။

ပြီးခဲ့သည့် ၂ နှစ်အတွင်း အင်ဂျင်နီယာများအကြား အလုပ်လက်မဲ့နှုန်းသည် ၂ ဆခန့် မြင့်တက်ခဲ့ပြီး ၁၁ ရာခိုင်နှုန်းမှ ၂၃ ဒသမ ၅ ရာခိုင်နှုန်းရှိခဲ့သည်။ 

အလားတူပင် ကွန်ပြူတာသိပ္ပံ ဘာသာရပ်ဖြင့် ဘွဲ့ရခဲ့သူများအကြား အလုပ်လက်မဲ့နှုန်းမှာလည်း ၂ နှစ်အတွင်း ၁၄ ဒသမ ၂ ရာခိုင်နှုန်းမှ ၂၂ ဒသမ ၆ ရာခိုင်နှုန်း မြင့်တက်ခဲ့သည်။

 ပါကစ္စတန် လူငယ်များကိုတွေ့ရစဉ်

စိုက်ပျိုးရေး သိပ္ပံဘာသာရပ်ဖြင့် ဘွဲရခဲ့သည့် လူငယ်များအကြား အလုပ်လက်မဲ့နှုန်းမှာလည်း ၁၁ ဒသမ ၄ ရာခိုင်နှုန်းမှ ၂၉ ဒသမ ၄ ရာခိုင်နှုန်းအထိ မြင့်တက်ခဲ့ပြီး ဆေးဝါးသိပ္ပံဘာသာရပ်ဖြင့် ဘွဲရဲ့ခဲ့သူများပင် လျှင် နှစ်နှစ်အတွင်း အလုပ်လက်မဲ့နှုန်း ၆ ဒသမ ၄ ရာခိုင်နှုန်းမှ ၁၀ ဒသမ ၈ ရာခိုင်နှုန်းအထိ မြင့်တက်ခဲ့သည်။

လုပ်သားအင်အား စျေးကွက် ဖွံ့ဖြိုးတိုးတက်မှု အားနည်းနေခြင်းကြောင့် ဘွဲ့ရလူငယ်များအကြား အလုပ်လက်မဲ့ နှုန်းများ လျင်မြန်စွာ မြင့်တက်လာခဲ့ခြင်းဖြစ်သည်။

ပါကစ္စတန် စီးပွားရေး ဖွံ့ဖြိုးတိုးတက်မှု အင်စတီကျု (PIDE)က ပြုလုပ်ခဲ့သည့် သုတေသနတစ်ခုတွင် အလုံး စုံ အလုပ်လက်မဲ့နှုန်းသည် ၆ ဒသမ ၃ ရာခိုင်နှုန်းဖြစ်ပြီး ဘွဲ့ရလူငယ်များအကြား အလုပ်လက်မဲ့နှုန်းသည် ၁၆ ဒသမ ၁ ရာခိုင်နှုန်း ဖြစ်သဖြင့် ကွာဟချက်မှာ ၁၀ ရာခိုင်နှုန်းခန့် ရှိနေသည်ကို ဖော်ပြထားသည်။

ထို့ကြောင့် ပညာရေးအဆင့်နှင့် အချိုးချကြည့်ပါက ပါကစ္စတန်တွင် အလုပ်လက်မဲ့ အရေအတွက် ဆက်လက် မြင့်တက်လာမည့် အရိပ်လက္ခဏာကို ထိုသုတေသနက ညွှန်ပြနေသည်။

ပါကစ္စတန် လူငယ်များကိုတွေ့ရစဉ်

ပါကစ္စတန် လူဦးရေ စုစုပေါင်း၏ ၆၄ ရာခိုင်နှုန်းသည် အသက် ၃၀ အောက် အရွယ်များဖြစ်သည်။ 

ထိုအသက်အရွယ်အရ လူငယ်များဟု သတ်မှတ်နိုင်သဖြင့် အလုပ်လက်မဲ့နှုန်း ပြဿနာကို မဖြေရှင်းနိုင်ပါက နိုင်ငံစီးပွားရေးနှင့် လူမှုရေးအတွက် ဆိုးရွားသည့် သက်ရောက်မှုများ ဖြစ်ပွားလာနိုင်သည်ဟု ကျွမ်းကျင်သူများက ပြောကြားခဲ့သည်။

ပါကစ္စတန်၏ အလုပ်သမား စျေးကွက်သည် COVID-19 ကပ်ရောဂါနှင့် စီးပွားရေး အကျပ်အတည်းမှ နာလန် မထူနိုင်သေးသဖြင့် ယခုနှစ်အတွင်း အလုပ်လက်မဲ့ လူဦးရေသည် ၅ ဒသမ ၆ သန်းခန့် ရှိလာနိုင်သည်ဟု ၂၀၂၃ ခုနှစ်၊ စက်တင်ဘာလက နိုင်ငံတကာ အလုပ်သမား အဖွဲ့အစည်း (ILO) က ကြေညာခဲ့သည်။

Source: Daily Asian Age

CNI International News

ဘေကျင်း၊ မေလ ၂၀ 

တရုတ်သည် ကုန်ထုတ်လုပ်မှုကဏ္ဍအား ပိုမိုမြှင့်တင်နေသဖြင့် အမေရိကန်နှင့် ကုန်သွယ်ရေး ထိပ်တိုက်တွေ့မှု တွင် နစ်နာထိခိုက်စေမည့် အခြေအနေသို့ ရောက်ရှိစေခဲ့ပြီး ပြည်တွင်း ဝယ်လိုအားကို တိုးမြှင့်ရန် အရဲစွန့် လုပ်ဆောင်နေသည်ဟု Bloomberg မှ ဖော်ပြခဲ့သည်။

ဧပြီလအတွင်း တရုတ်၏ စားသုံးသူကဏ္ဍ သုံးစွဲမှုသည် ၂ ဒသမ ၃ ရာခိုင်နှုန်းဖြင့် အပြောင်းအလဲ မရှိခဲ့ပေ။

ထိုနှုန်းထားသည် ၂၀၂၂ ခုနှစ်နောက်ပိုင်း အရှိန်အဟုန် အနှေးကွေးဆုံးဖြစ်ခဲ့ပြီး စက်မှုထုတ်ကုန်ကဏ္ဍသည် ပြီးခဲ့သည့် လက်ထက် ၆ ဒသမ ၇ ရာခိုင်နှုန်း မြင့်တက်ခဲ့သည်ဟု အမျိုးသား စာရင်းဇယားဗျူရိုမှ မေလ ၁၇ ရက် တွင် ထုတ်ပြန်ခဲ့သည်။

တရုတ် ထုတ်ကုန်လုပ်ငန်းကို တွေ့ရစဉ်

တရုတ်သည် ပို့ကုန်ကဏ္ဍနှင့် ကုန်ထုတ်လုပ်မှုကဏ္ဍကို တိုးမြှင့်ခြင်းဖြင့် ဟန်ချက်ညီမှု မရှိသည့် စီးပွားရေး နာလန် ထူမှုကို ပြုလုပ်နေသဖြင့် အမေရိကန်၊ ဥရောပနှင့် ကုန်သွယ်ရေးတွင် တင်းမာမှုများကို မြင့်တက်လာစေနိုင် ကြောင်း ကျွမ်းကျင်သူများက ပြောကြားခဲ့သည်။

တစ်ချိန်တည်းမှာပင် တရုတ်၏ အိမ်ခြံမြေကဏ္ဍသည် ယိုယွင်းနေသဖြင့် အစိုးရက ချေးငွေရယူသူများအတွက် စည်းမျဉ်းများ ဖြေလျှော့ခြင်း၊ အိမ်များဝယ်ယူရန် ပြည်သူ့ရန်ပုံငွေများ ထုတ်ပေးမည့် ကတိကဝတ်များ အပါအဝင် အိမ်ခြံမြေကဏ္ဍကို ပြန်လည် ထောင်မတ်စေရန် အစီအစဉ်သစ်များကို မေလ ၁၇ ရက်က ကြေညာခဲ့သည်။

“ကုန်သွယ်ရေး ပွတ်တိုက်မှုတွေလို့ ခေါ်တဲ့ ဟန်ချက်မညီတဲ့ အခြေအနေတွေဟာ ပို့ကုန်ကဏ္ဍကို တိုးမြှင့်ပြီး စီးပွားရေးနာလန်ထူတဲ့ အစီအစဉ်အတွက် ပြဿနာတွေ ရှိလာနိုင်ပါတယ်”ဟု  Standard Chartered Plc ကုမ္ပဏီမှ တရုတ်နှင့် မြောက်အာရှရေးရာ စီးပွားရေးပညာရှင် တင်းရှူအန် (Ding Shuang) က ပြောကြားခဲ့သည်။

ကွန်မြူနစ်ပါတီသည် တရုတ်၏ စွမ်းအင်ကဏ္ဍကို အာရုံစိုက်ထားပြီး ကုန်ထုတ်လုပ်မှုကို အရှိန်မြှင့်တင်နေသဖြင့် အမေရိကန်နှင့် ဥရောပသမဂ္ဂတို့က တရုတ်၏ စျေးပေါသည့် ထုတ်ကုန်များသည် ၎င်းတို့၏ ပြည်တွင်း စျေးကွက် များအတွင်း အလုပ်အကိုင်များကို ခြိမ်းခြောက်ရာ ရောက်ကြောင်း ဝေဖန်ခဲ့ကြသည်။

တရုတ် ထုတ်ကုန်လုပ်ငန်းကို တွေ့ရစဉ်

အမေရိကန်သမ္မတ ဂျိုးဘိုင်ဒန် (Joe Biden) ၏ အစိုးရအဖွဲ့က တရုတ်၏ လျှပ်စစ်ကားများနှင့် တရုတ်၏ စီးပွားရေးလှုံ့ဆော်မှုတွင် ပါဝင်နေသည်ဟု ယူဆရသည့် အခြားပို့ကုန်များအပေါ် ၁၀၀ ရာခိုင်နှုန်း စည်းကြပ်ခွန် ကောက်ခံသည့် အစီအစဉ်ကို ကြေညာခဲ့သည်။

ထိုကဲ့သို့ ဝေဖန်ကန့်ကွက်မှုများ ရှိနေသည့်တိုင် တရုတ်အစိုးရသည် ဝယ်လိုအားကို မြှင့်တင်ရန် ထောက်ပံ့မှုများ ပိုမိုလုပ်ဆောင်ပေးမည့် လက္ခဏာများကို ပြသခဲ့သည်။

ထို့ပြင် တရုတ်အစိုးရသည် မေလ ၁၇ ရက်က ယွမ် ၁ ထရီလျံ (ဒေါ်လာ ၁၃၈ ဘီလျံ) တန်ကြေးရှိသည့် နှစ်ရှည် ငွေတိုက်စာချုပ်များကို စတင်ရောင်းချခဲ့ပြီး ဗဟိုဘဏ်ကလည်း အရစ်ကျ အိမ်ဝယ်ယူမည့် သူများအတွက် လစဉ် ပြန်လည်ပေးသွင်းရမည့် နှုန်းထားကို လျှော့ချခဲ့သည်။

Source: Bloomberg

CNI International News

ဘေကျင်း၊ မေလ ၁၈

ရုရှားသမ္မတ ပူတင် (Vladimir Putin) သည် မေလ ၁၇ ရက်က တရုတ်သမ္မတ ရှီကျင့်ဖျင် (Xi Jinping) နှင့် မဟာဗျူဟာမြောက် ခေတ်သစ်ထူထောင်ရန် ကတိပြုခဲ့ပြီးနောက် တရုတ်၏ အရှေ့မြောက်ဒေသရှိ ရုရှားနယ်စပ် အနီးတွင် ကုန်သွယ်ရေး မြှင့်တင်မှု၏ အရေးကြီးပုံကို အလေးထား ပြောဆိုခဲ့သည်ဟု ရိုက်တာမှ ဖော်ပြခဲ့သည်။

ပူတင်သည် ဟေလုံကျန်း (Heilongjiang) ပြည်နယ်၊ ဟာပင် (Harbin) မြို့သို့ နှစ်ရက်ကြာ ခရီးစဉ်အဖြစ် ရောက်ရှိ ခဲ့ပြီး နှစ်နိုင်ငံအကြား ကုန်သွယ်ရေးနှင့် ယဉ်ကျေးမှု ဖလှယ်မှုများကို လုပ်ဆောင်ခဲ့သည်။

ထို့နောက် ပူတင်သည် ရုရှား-တရုတ် ကုန်စည်ပြပွဲသို့ သွားရောက်ခဲ့ပြီး ဒေသတွင်း ပူးပေါင်းဆောင်ရွက်ရေး ဖိုရမ်ကို တက်ရောက်ခဲ့သည်။

ယူကရိန်းစစ်ပွဲကြောင့် ရုရှားကို အနောက်နိုင်ငံများက ပိတ်ဆို့မှုများပြုလုပ်ခဲ့ပြီး အဆက်အသွယ် ဖြတ်တောက် ထားချိန်တွင် ပူတင်သည် စစ်ပွဲအတွက် လိုအပ်သည့် ဘဏ္ဍာရေး အခြေအနေအတွက် တရုတ်နှင့် ဆက်ဆံမှုများ တိုးမြှင့်ခဲ့သည်။

၎င်း၏ နိုင်ငံတော်ခရီးစဉ်အတွင်း ပူတင်နှင့် ရှီတို့သည် မေလ ၁၇ ရက်က ကမ္ဘာလုံးဆိုင်ရာ စီးပွားရေးနှင့် လုံခြုံရေး ကဏ္ဍတွင် အမေရိကန်၏ လွှမ်းမိုးထားမှုကို တန်ပြန်ရန် နှစ်နိုင်ငံအကြား ခေတ်သစ်တစ်ခု ဖွင့်လှစ်သည့် ပူးတွဲ ထုတ်ပြန်ချက်မှာ လက်မှတ်ရေးထိုးခဲ့ကြသည်။

ပူတင်နဲ့ရှီကျင့်ဖျင်ကို တွေ့ရစဉ်

“လက်ရှိ တရုတ်-ရုရှား ဆက်ဆံရေးဟာ ခိုင်မာမှုရှိနေပြီး အဲဒီဆက်ဆံရေးကို အမြတ်တနိုး ထိန်းသိမ်းဖို့ လိုပါ တယ်”ဟု ရှီက ပူတင်ကို ပြောကြားခဲ့သည်။

“တရုတ်ဟာ သက်ဆိုင်ရာ နိုင်ငံတွေနဲ့ ဖွံ့ဖြိုးတိုးတက်မှုတွေရရှိဖို့ ပူးပေါင်းဆောင်ရွက်ချင်တဲ့ ဆန္ဒရှိပြီး ကမ္ဘာပေါ် မှာ တရားမျှတမှုကို ထိန်းသိမ်းဖို့ အတူတကွ လုပ်ဆောင်ချင်ပါတယ်” ဟု ရှီက ထပ်လောင်း ပြောကြားခဲ့သည်။

ရုရှားက ယူကရိန်းကို မကျူးကျော်မီ ရက်ပိုင်အလိုဖြစ်သည့် ၂၀၂၂ ခုနှစ်၊ ဖေဖော်ဝါရီလကလည်း ပူတင်သည် တရုတ်နိုင်ငံသို့ ရောက်ရှိခဲ့ပြီး နှစ်နိုင်ငံအကြား အကန့်အသတ်မရှိသည့် မိတ်ဖက်ဆက်ဆံရေးကို ကြေညာခဲ့သည်။

တရုတ်သည် ယူကရိန်းစစ်ပွဲတွင် ရုရှားကို ဒရုန်းများနှင့် ဒုံးကျည်နည်းပညာများ၊ ဂြိုဟ်တုဓာတ်ပုံများနှင့် စက်ယန္တရားများ ထောက်ပံ့ပေးနေသည်ဟု အမေရိကန်အရာရှိများက ပြီးခဲ့သည့်လအတွင်း ပြောကြားခဲ့ သော်လည်း တရုတ်ကမူ ရုရှားကို မည်သည့်လက်နက်မှ ထောက်ပံ့ပေးခြင်းမရှိကြောင်း ပြောကြားထားသည်။

အနောက်နိုင်ငံများ၏ ဖယ်ကြဉ်ထားမှုကြောင့် ရုရှားသည် တရုတ်နှင့်ကုန်သွယ်ရေးကို တိုးမြှင့်ခဲ့ပြီး ပြီးခဲ့သည့် နှစ်က နှစ်နိုင်ငံကုန်သွယ်မှု တန်ဖိုးသည် ၂၆ ဒသမ ၃ ရာခိုင်နှုန်းမြင့်တက်ခဲ့သည်။

Source: ရိုက်တာ

CNI International News

နယူးဒေလီ၊ မေ ၁၈

လွန်ခဲ့သည့် ၉ နှစ်က အိန္ဒိယနှင့် အာဖရိကသမဂ္ဂအကြား ထိတွေ့ဆက်ဆံမှု သိပ်မရှိခဲ့သော်လည်း လက်ရှိတွင် စက်မှုထိပ်သီးနိုင်ငံ (၂၀)မှာ အိန္ဒိယနှင့် အာဖရိကသမဂ္ဂ (AU) တို့ ပါဝင်လာမှုနှင့်အတူ ယခုနှစ်ကုန်ပိုင်း၌ စတုတ္ထ အကြိမ်မြောက်ဖိုရမ်(IAFS)ကို ကျင်းပရန် စီစဉ်ထားသည်ဟု The Print သတင်းဝက်ဘ်ဆိုက်မှ ဖော်ပြခဲ့သည်။

အာဖရိကသမဂ္ဂမှ ကိုယ်စားလှယ်အဖွဲ့သည် အိန္ဒိယနိုင်ငံခြားရေးဝန်ကြီးဌာနမှ တာဝန်ရှိသူများနှင့် ပြီးခဲ့သည့်လ အတွင်း တွေ့ဆုံခဲ့ပြီး အဆိုပါ ဖိုရမ်အတွက် ပြင်ဆင်မှုများ ဆွေးနွေးခဲ့သည်ဟု သံတမန် သတင်းအရင်းအမြစ် တစ်ခုက The Print ကို ပြောကြားခဲ့သည်။

IAFS သည် အာဖရိကသမဂ္ဂ လက်အောက်တွင် အာဖရိကတိုက်မှ နိုင်ငံပေါင်း ၅၄ နိုင်ငံနှင့် အိန္ဒိယအကြား နိုင်ငံရေး အင်စတီကျု ယန္တရားသဖွယ် ဖြစ်သည်။ 

နောက်ဆုံအကြိမ် IAFS ညီလာခံကို ၂၀၁၅ ခုနှစ်က နယူးဒေလီ (New Delhi) မြို့တော်တွင် ပြုလုပ်ခဲ့ပြီး နိုင်ငံ့ခေါင်းဆောင် ၄၀ ခန့် အပါအဝင် AU အဖွဲ့ဝင် ၅၄ နိုင်ငံစလုံးမှ ကိုယ်စားလှယ်များ တက်ရောက်ခဲ့သည်။

ယခုနှစ်အတွင်း ကျင်းပမည့် ဖိုရမ်ကိုလည်း အာဖရိကနိုင်ငံ အများအပြားမှ ခေါင်းဆောင်များ တက်ရောက်ဖွယ် ရှိသည်။

 အိန္ဒိယနဲ့အာဖရိက ဖိုရမ်ကို တွေ့ရစဉ်

ထိုဖိုရမ်နှင့်ပတ်သက်သည့် အသေးစိတ် အချက်အလက်များ ထွက်ပေါ်လာခြင်း မရှိသေးသော်လည်း ထိုဖိုရမ်ကို အီသီယိုပီးယားနိုင်ငံ၊ အဒစ် အဘာဘာ (Addis Ababa) မြို့တော်တွင် ပြုလုပ်ဖွယ်ရှိသည်။

အိန္ဒိယသည် အာဖရိကနှင့် ထိတွေ့ဆက်ဆံမှုကို နယ်ပယ် ၃ ခုတွင် အရှိန်မြှင့် လုပ်ဆောင်နေပြီး ထိုနယ်ပယ် သုံးခုမှာ သံတမန်ရေး၊ ရင်းနှီးမြှုပ်နှံမှုနှင့် ကုန်သွယ်ရေးတို့ဖြစ်သည်။

၂၀၀၈ ခုနှစ်က အိန္ဒိယဝန်ကြီးချုပ် မန်မိုဟန်ဆင်း (Manmohan Singh) ဦးဆောင်သည့် အစိုးရအဖွဲ့သည် ထိုဖိုရမ်များကို ၃ နှစ်လျှင် တစ်ကြိမ် ကျင်းပရန် စီစဉ်ခဲ့သော်လည်း စတုတ္ထမြောက်ဖိုရမ်ကို ၂၀၂၀ ပြည့်နှစ်၌ ပြုလုပ်ရန် ရွှေ့ဆိုင်းခဲ့သည်။

သို့သော်လည်း ထိုအချိန်က COVID-19 ကပ်ရောဂါ ဖြစ်ပွားခဲ့သဖြင့် ညီလာခံကို ထပ်မံရွှေ့ဆိုင်းခဲ့ရသည်။

အိန္ဒိယနဲ့ အာဖရိက သံတမန်ဆက်ဆံရေးညွန်းပြနေစဉ်

“နောက်ဆုံးအကြိမ် အိန္ဒိယ-အာဖရိက ဖိုရမ်ညီလာခံကို နယူးဒေလီမှာ ၂၀၁၅ ခုနှစ်က ပြုလုပ်ခဲ့ပါတယ်။ အဲဒီ အချိန်ကစပြီး ပထဝီနိုင်ငံရေး၊ စီးပွားရေးနဲ့ ကမ္ဘာလုံးဆိုင်ရာ ဦးစားပေးကိစ္စတွေဟာ တော်တော်ပြောင်းလဲသွား ခဲ့ပါတယ်။ အရင်ပြုလုပ်ခဲ့ဖူးတဲ့ ညီလာခံတွေရဲ့ အောင်မြင်မှုတွေအပေါ် အခြေခံပြီး တိုးတက်ပြောင်းလဲနေတဲ့ ကမ္ဘာ့အခင်းအကျင်းမှာ လိုအပ်ချက်တွေနဲ့ ကိုက်ညီအောင် စတုတ္တမြောက် ညီလာခံကို ပြုလုပ်သွားမှာ ဖြစ်ပါ တယ်”ဟု လေ့လာရေးသုတေသန ဖောင်ဒေးရှင်း (ORF) မှ ကျွမ်းကျင်သူ ဆာမီယာ ဘက်တာချာယာ (Samir Bhattacharya) က ပြောကြားခဲ့သည်။

အာဖရိကတိုက်သည် သယံဇာတများ ပေါကြွယ်ဝပြီး အထူးသဖြင့် အိန္ဒိယနိုင်ငံတွင် မရှိသည့် စွမ်းအင်ကဏ္ဍတွင် အရင်းအမြစ်များစွာရှိသည်ဟု ဘက်တာချာယာက ပြောသည်။

၂၀၅၀ ပြည့်နှစ်တွင် အာဖရိကတိုက်၌ လူဦးရေ ၂ ဒသမ ၅ ဘီလျံ ရှိလာလိမ့်မည်ဟု ခန့်မှန်းထားပြီး လက်ရှိမှာ တော့ လူဦးရေ ၁ ဒသမ ၄ ဘီလျံရှိနေကာ အာဖရိကတိုက်၏ စီးပွားရေးသည် ဒေါ်လာ ၃ ထရီလျံနီးပါး ရှိသည်ဟု ခန့်မှန်းချက်များ ထွက်ပေါ်ခဲ့သည်။

Source: The Print