CNI International News

ဝါရှင်တန်၊ ဖေဖော်ဝါရီ ၄

အမေရိကန်သမ္မတ ဒေါ်နယ်ထရမ့် (Donald Trump) က ပြည်ပနိုင်ငံများမှ အမေရိကန်သို့ တင်သွင်းသည့် ကုန်စည်များအပေါ် အခွန်များတိုးမြှင့်ကောက်ခံသော သမ္မတအုပ်ချုပ်ရေးအမိန့်များကို လက်မှတ်ရေးထိုး ခဲ့ပြီးနောက် ဒေါ်လာဈေးများ မြင့်တက်ခဲ့ပြီး စတော့ရှယ်ယာဈေးများ ကျဆင်းသွားခဲ့သည်ဟု ရိုက်တာမှ ဖော်ပြခဲ့သည်။

ထရမ့်က ကနေဒါ၊ မက္ကဆီကိုနှင့် တရုတ် သွင်းကုန်များအပေါ် အခွန်များတိုးမြှင့် ကောက်ခံမည်ဟု ပြောကြား ခဲ့ပြီးနောက် ဒေါ်လာဈေးနှုန်းသည် ၂ နှစ်ကျော်အတွင်း အမြင့်ဆုံးနှုန်းထားအဖြစ် ၁ ရာခိုင်နှုန်း မြင့်တက်ခဲ့သည်။

ကနေဒါ ဒေါ်လာသည် ၂၀၀၃ ခုနှစ်နောက်ပိုင်း အားအနည်းဆုံး နှုန်းထားအထိ ကျဆင်းခဲ့ပြီး ထရမ့်က ဥရောပ ကုန်စည်များကိုလည်း အခွန်တိုးကောက်မည်ဟု ပြောကြားခဲ့သဖြင့် ယူရိုငွေ တန်ဖိုးလည်း ကျဆင်းခဲ့သည်။

ထို့ပြင် ထရမ့်၏ အခွန်တိုးကောက်မည့် အစီအစဉ်၏ ဂယက်ရိုက်ခတ်မှုအဖြစ် ဖေဖော်ဝါရီ ၃ ရက်တွင် ကမ္ဘာလုံး ဆိုင်ရာ စတော့ရှယ်ယာ ဈေးနှုန်းများလည်း ကျဆင်းခဲ့သည်။

အထူးသဖြင့် မော်တော်ကားကုမ္ပဏီများနှင့် နည်းပညာလုပ်ငန်းများ၏ စတော့ရှယ်ယာများသည် ၁ ဒသမ ၆ ရာခိုင်နှုန်း ကျဆင်းကြောင်း Stoxx Europe 600 စတော့ရှယ်ယာညွှန်းကိန်းတွင် ဖော်ပြထားသည်။

စတော့ရှယ်ယာစျေးကွက်ကို စောင့်ကြည့်နေကြစဉ်

ထို့ပြင် ကမ္ဘာ့အခိုင်မာဆုံး ဒစ်ဂျစ်တယ် ငွေကြေးဖြစ်သည့် Bitcoin တန်ဖိုးလည်း ပြုတ်ကျခဲ့ကာ ရေနံစိမ်းနှင့် စက်မှုလုပ်ငန်းသုံး သတ္တုဈေးနှုန်းများလည်း ကျဆင်းခဲ့သည်။

ထရမ့်၏ အခွန်တိုးကောက်မည့် အစီအစဉ်များသည် ဆယ်စုနှစ် တစ်စုနီးပါးအတွင်း အမေရိကန်သမ္မတ တစ်ဦး၏ ပြည်တွင်းဈေးကွက်ကို ပြည်ပ၏ယှဉ်ပြိုင်မှုမှ ကာကွယ်သည့် အပြင်းထန်ဆုံး လုပ်ဆောင်ချက်အဖြစ် ရှုမြင်ခံခဲ့ရ သည်။

ထို့ကြောင့် ထရမ့်၏ အစီအစဉ်များသည် ငွေကြေးဖောင်းပွမှုမှအစ ပထဝီနိုင်ငံရေးနှင့် စီးပွားရေး ဖွံ့ဖြိုးတိုးတက်မှု တို့အဆုံး နယ်ပယ်အသီးသီးကို ဂယက် ရိုက်ခတ်သွားစေခဲ့သည်။

ထရမ့်ကမူ ကနေဒါ၊ မက္ကဆီကိုတို့နှင့် ဆွေးနွေးရန် စီစဉ်ထားသော်လည်း ၎င်း၏ အခွန်တိုးမြှင့် ကောက်ခံမှုသည် ဖေဖော်ဝါရီ ၄ ရက်တွင် အသက်ဝင်မည်ဖြစ်သဖြင့် နောက်ဆုံးမိနစ်၌ သဘောတူညီမှု ရရှိရန် လိုအပ်သည်။

“ထရမ့်က ပိုကာကစားတဲ့ ဖဲသမားတစ်ယောက်လိုပါပဲ။ သူ့လက်ထဲမှာ အနိုင်ဖဲချပ်တွေကို ကိုင်ထားတာပါ” ဟု Standard Chartered Plc ဘဏ်လုပ်ငန်းအဖွဲ့အစည်း၏G-10 FX သုသေတသဌာန အကြီးအကဲဖြစ်သည့် စတီဗင် အင်ဂလန်ဒါ (Steven Englander) က ပြောကြားခဲ့သည်။

Source: ရိုက်တာ

CNI International News

ဘန်ကောက်၊ ဇန်နဝါရီ ၃၁

ထိုင်းနိုင်ငံတွင် လာမည့် ၃ နှစ်အတွင်း စီးပွားရေးကို ပြန်လည်အသက်သွင်းရန် ဦးစားပေး လုပ်ဆောင်သွားမည်ဟု ထိုင်းဝန်ကြီးချုပ်ဟောင်း သက်ဆင်(Thaksin Shinawatra) က ကတိပြုပြောကြားခဲ့သည်။

ဖေဖော်ဝါရီ ၁ ရက်တွင် ပြုလုပ်မည့် ဒေသန္တရရွေးကောက်ပွဲ၌ အာဏာရ ဖြူးထိုင်းပါတီ၏ ကိုယ်စားလှယ်လောင်း တစ်ဦးအတွက် မဲဆွယ်သည့်အနေဖြင့် ချင်းရိုင် (Chiang Rai) မြို့ရှိ ဖန်း (Phan)ရပ်ကွက်မှာ ပြုလုပ်သည့် မဲဆွယ် စည်းရုံးပွဲတွင် ၎င်းက ပြောကြားခဲ့ခြင်း ဖြစ်သည်။

ထိုင်းနိုင်ငံ၏ စီးပွားရေးသည် ဟန်ချက်မညီမျှမှုနှင့် ရင်ဆိုင်နေရကြောင်း သက်ဆင်က ပြောသည်။

“နိုင်ငံတစ်ဝန်းမှာ  စီးပွားရေးက ပြိုလဲနေပါတယ်။ လူတွေရဲ့ ဝင်ငွေတွေလည်း လျော့နည်းလာပါတယ်။ ဘဏ် တွေရဲ့ အကျိုးအမြတ်ကလည်း ၁၄ ရာခိုင်နှုန်း မြင့်တက်ခဲ့ပြီး ဂျီဒီပီ ဖွံ့ဖြိုးတိုးတက်မှု ၃ ရာခိုင်နှုန်းနဲ့ ဆန့်ကျင်နေ ပါတယ်။ ဒါက ဘာကိုပြလဲဆိုတော့ အတိတ်ကာလက စီမံခန့်ခွဲမှု ညံ့ဖျင်းခဲ့တာကြောင့် စီးပွားရေး ဟန်ချက်ပျက် နေတာကို ပြသနေပါတယ်”ဟု ၎င်းက ပြောသည်။

ထိုင်းနိုင်ငံ၏ လက်ရှိစီးပွားရေး အခြေအနေသည် ၁၉၉၇ ခုနှစ် အာရှစီးပွားပျက်ကပ် ကာလက အခြေအနေထက် ပိုမိုဆိုးရွားနေပြီး စီးပွားပျက်ကပ်ကာလက ထိုင်းစီးပွားရေး၏ အပေါ်ပိုင်း အလွှာများကို မထိခိုက်စေရန် ထိန်းသိမ်း ထားနိုင်ခဲ့ကြောင်း သက်ဆင်က ပြောသည်။

ထိုင်းဝန်ကြီးချုပ် ပေတုန်တန်ကိုတွေ့ရစဉ် 

၎င်း၏ သမီးဖြစ်သူ ဝန်ကြီးချုပ် ပေတုန်တန်(Paetongtarn Shinawatr) သည် သူ့လက်သူ့ခြေဖြင့် နိုင်ငံကို အုပ်ချုပ်နေသော်လည်း စီးပွားရေးကို ပြန်လည် အသက်သွင်းနေသည့် အစိုးရအဖွဲ့၏ အားထုတ်ကြိုးပမ်းမှုများကို မိမိက နောက်ကွယ်မှ အကူအညီပေးခဲ့ကြောင်း သက်ဆင်က ပြောကြားခဲ့သည်။

လာမည့် ၃ နှစ်အတွင်း စီးပွားရေးပြဿနာများကို ဖြေရှင်းရန်၊ ချမ်းသာဝပြောရေးကို ထိန်းသိမ်းရန် ဝန်ကြီးချုပ် အဖြစ် တာဝန်ထမ်းဆောင်ချိန်ကကဲ့သို့ မဆုတ်မနစ် အားထုတ်ကြိုးပမ်းသွားမည်ဟုလည်း သက်ဆင်က ပြောကြားခဲ့သည်။

သက်ဆင်က သူ ဝန်ကြီးချုပ်အဖြစ် တာဝန်ထမ်းဆောင်ခဲ့ချိန်က နိုင်ငံ၏ ဘတ်ဂျက်သည် ဟန်ချက်ညီခဲ့ပြီး စီးပွားရေး ဖွံ့ဖြိုးတိုးတက်မှုနှုန်း မြန်ဆန်ခဲ့ကြောင်း ပြောကြားခဲ့သည်။

စီးပွားရေးကို ပြန်လည်အသက်သွင်းရန် အစိုးရ၏ အားထုတ်ကြိုးပမ်းမှုများတွင် စိုက်ပျိုးမွေးမြူရေး ထုတ်ကုန်များ ကို တရုတ်သို့ တင်ပို့ခြင်းအား ပိုမိုချဲ့ထွင်ရန် အချက်လည်း ပါဝင်နေသည်။

တရုတ်သည် မကြာသေးမီက ထိုင်းနိုင်ငံထံမှ ပီလောပီနံ တန်ချိန် ၃၀၀,၀၀၀ ဝယ်ယူရန် သဘောတူညီခဲ့သဖြင့် ဈေးနှုန်းများ မြင့်တက်စေခဲ့ကြောင်း သက်ဆင်က ပြောသည်။

ဆန်နှင့်ရာဘာ အပါအဝင် အခြားသီးနှံများ၏ ဈေးနှုန်းများကိုလည်း မြှင့်တင်ရန် နည်းလမ်းများ ရှာဖွေသွား မည်ဖြစ်ကြောင်း သက်ဆင်က ပြောကြားခဲ့သည်။

Source: ဘန်ကောက်ပို့စ်

CNI International News

ဘေကျင်း၊ ဇန်နဝါရီ ၂၉

တရုတ်နှင့် အိန္ဒိယအကြား ဇန်နဝါရီ ၂၇ ရက်က ထိပ်သီးအဆင့် ဆွေးနွေးပွဲများ ပြုလုပ်ခဲ့ပြီးနောက် နှစ်နိုင်ငံ အကြား တိုက်ရိုက်လေကြောင်းလိုင်းများ ပြန်လည်ပြေးဆွဲရန်နှင့် နယ်စပ်ဖြတ်ကျော် ပူးပေါင်းဆောင်ရွက်မှုများကို တိုးမြှင့်ရန် သဘောတူညီခဲ့ကြကြောင်း South China Morning Post မှ ဖော်ပြခဲ့သည်။

တိဘက်ကုန်းပြင်မြင့် ( Tibetan Plateau)ပေါ်တွင် ကြီးမားသည့် ရေကာတာ တည်ဆောက်မည့် တရုတ်၏ အစီအစဉ်များနှင့်ပတ်သက်ပြီး တရုတ်နှင့်အိန္ဒိယအကြား တင်းမာမှုများ မြင့်တက်နေသည့်တိုင် ထိုကဲ့သို့ သဘောတူညီချက် ရရှိခဲ့ခြင်းဖြစ်သည်။

တရုတ်၏ လက်ထောက်နိုင်ငံခြားရေးဝန်ကြီး ဆွန်းဝေတုံး (Sun Weidong) သည် အိန္ဒိယနိုင်ငံခြားရေးဝန်ကြီး ဗစ်ကရမ် မစ္စရီ (Vikram Misri) နှင့် တွေ့ဆုံဆွေးနွေးခဲ့ပြီး နှစ်နိုင်ငံအကြား မဟာဗျူဟာမြောက် ဆက်သွယ်ရေး တိုးမြှင့်ရေး၊ အပြန်အလှန် ယုံကြည်မှုကို တိုးမြှင့်ရေးတို့အတွက် သဘောတူခဲ့ကြကြောင်း တရုတ်နိုင်ငံခြားရေး ဝန်ကြီးဌာနက ပြောကြားခဲ့သည်။

အိန္ဒိယခရီးသွားများကို တွေ့ရစဉ်

တရုတ်နှင့်အိန္ဒိယအကြား တိုက်ရိုက်လေကြောင်းလိုင်းများ ပြန်လည်ပြေးဆွဲရန်၊ နှစ်နိုင်ငံအကြား စစ်မှုထမ်းများ ထိတွေ့ဖလှယ်မှုများ၊ သတင်းထောက်များ အချင်းချင်း ထိတွေ့ဖလှယ်မှုများကို လွယ်ကူချောမွေ့စေရန် အစီအစဉ် များကို ချမှတ်လုပ်ဆောင်ရန် တရုတ်က ဇန်နဝါရီ ၂၈ ရက် အစောပိုင်းကတည်းက ထုတ်ပြန်ခဲ့ခြင်းဖြစ်သည်။

အိန္ဒိယ ဘုရားဖူးများအတွက် တိဘက်သို့ သွားရောက်ခွင့် ရရှိရေးကို အမြန်ဆုံး အကောင်အထည်ပေါ်စေရန်နှင့် နယ်စပ်ဖြတ်ကျော် ပူးပေါင်းဆောင်ရွက်မှုများအတွက် လုပ်ငန်းစဉ်များကို ဆွေးနွေးညှိနှိုင်း သွားမည်ဖြစ်ကြောင်း ထုတ်ပြန်ချက်တွင် ဖော်ပြခဲ့သည်။

နှစ်နိုင်ငံအကြား မဟာဗျူဟာမြောက် ရေရှည်ဆက်ဆံရေးကို ထိန်းသိမ်းပြီး ရေရှည်ဖွံ့ဖြိုးတိုးတက်ရေး၊ ဆွေးနွေးပွဲ များကို မြှင့်တင်ရေး၊ ခိုင်မာသည့် သဘောထားများနှင့်အတူ လက်တွေ့ကျသည့် ပူးပေါင်းဆောင်ရွက်မှု ပြုလုပ်ရေး၊ မတူကွဲပြားမှုများကို သင့်တော်စွာ ကိုင်တွယ်ဖြေရှင်းရန်နှင့် တရုတ်-အိန္ဒိယ ဆက်ဆံရေးကို ကောင်းမွန်ပြီး တည်ငြိမ်သည့် လမ်းကြောင်းပေါ်တွင် ရှိနေစေရန် တရုတ်က အလေးထား ပြောဆိုခဲ့သည်ဟု ထုတ်ပြန်ချက်တွင် ဖော်ပြခဲ့သည်။

Air India လေကြောင်းလိုင်းကို တွေ့ရစဉ်

၂၀၂၀ ပြည့်နှစ်က ဂေါ်ဝန်တောင်ကြား (Galwan Valley) ဒေသရှိ ဟိမဝန္တာ (Himalayan) နယ်စပ်တစ်လျှောက် တရုတ်နှင့်အိန္ဒိယ စစ်သားများအကြား ခိုက်ရန်ဖြစ်ပွားခဲ့သဖြင့် တရုတ်စစ်သား ၄ ဦးသေဆုံးပြီး အိန္ဒိယစစ်သား ၂၀ သေဆုံးခဲ့ပြီးနောက် နှစ်နိုင်ငံဆက်ဆံရေးများ တင်းမာခဲ့သည်။

ထိုဖြစ်ရပ် ဖြစ်ပွားခဲ့ပြီးနောက် အိန္ဒိယသည် ပြည်တွင်းတွင် တရုတ်၏ ရင်းနှီးမြှုပ်နှံမှုများကို ကန့်သတ်သည့် အစီအစဉ်များ ချမှတ်ခဲ့ကာ နာမည်ကြီး တရုတ်အက်ပလီကေးရှင်းများကို ပိတ်ပင်ခြင်း၊ တိုက်ရိုက်လေကြောင်း လိုင်းများကို ဖျက်သိမ်းခြင်းတို့ ပြုလုပ်ခဲ့သည်။

သို့သော် ပြီးခဲ့သည့်နှစ် အောက်တိုဘာလက တရုတ်နှင့် အိန္ဒိယအကြား အငြင်းပွားနေသည့် နယ်စပ်ဒေသမှ စစ်သားများကို ထိတွေ့မှု ဖြုတ်သိမ်းရန် သဘောတူညီခဲ့ပြီးနောက် နှစ်နိုင်ငံ ဆက်ဆံရေး ပြန်လည်နွေးထွေး လာခဲ့သည်။

Source: South China Morning Post

CNI International News

ဘန်ကောက်၊ ဇန်နဝါရီ ၂၈

ထိုင်းဝန်ကြီးချုပ် ပေတုန်တန်(Paetongtarn Shinawatra) က စီးပွားရေး လှုံ့ဆော်ရေး ရည်မှန်းချက်ဖြင့် ထိုင်းလူမျိုးများအား ဘတ် ၁၀,၀၀၀ စီ ထောက်ပံ့ပေးမည့် ဒုတိယအသုတ် အစီအစဉ် စတင်ကြောင်း ဖွင့်ပွဲ အခမ်းအနားကို သဘာပတိအဖြစ် ကြီးမှူးကျင်းပခဲ့ကြောင်း ဘန်ကောက်ပို့စ် သတင်းမှ ဖော်ပြခဲ့သည်။

ဇန်နဝါရီ ၂၇ ရက် မနက် ၁၀ နာရီတွင် အစိုးရအိမ်တော်၌ ပြုလုပ်သည့် ဖွင့်ပွဲ အခမ်းအနားကို ပေတုန်တန်က စက်ခလုပ်နှိပ်ပြီး ဖွင့်လှစ်ပေးခဲ့သည်။

ဒုတိယအသုတ် ငွေကြေး ထောက်ပံ့ပေးမှုတွင် အသက် ၆၀ အထက် အသက်ကြီးပိုင်း ၃ သန်းခန့်ကို ဘတ် ၁၀,၀၀၀ စီ ထောက်ပံ့ပေးမည်ဖြစ်သည်။

ပေတုန်တန်၏ ဖွင့်ပွဲ အခမ်းအနား မိန့်ခွန်းတွင် ၎င်းတို့ အစိုးရအဖွဲ့သည် စီးပွားရေး လှုံ့ဆော်ရေးကို ဦးစားပေး လုပ်ဆောင်နေပြီး ပြည်သူများ၏ ကောင်းကျိုးချမ်းသာအား မြှင့်တင်ပေးရန် အာရုံစိုက် လုပ်ဆောင်နေသည်ဟု ပြောကြားခဲ့သည်။

ပြီးခဲ့သည့်နှစ် စက်တင်ဘာလက ပြုလုပ်ခဲ့သည့် ပထမအသုတ် ရန်ပုံငွေ ထောက်ပံ့မှုတွင် လူပေါင်း ၁၄ ဒသမ ၅ သန်းခန့် ထောက်ပံ့ငွေများ လက်ခံရရှိခဲ့ပြီး ထိုပထမအသုတ်တွင်  လူမှုဖူလုံရေးကဒ်များ ကိုင်ဆောင်သူများနှင့် မသန်စွမ်းများကို ဦးစားပေး ထောက်ပံ့ခဲ့သည်။

ဘတ် ၁၀၀၀၀ ထောက်ပံ့ခြင်း အခမ်းအနားတွင် ပေတုန်တန်ကို တွေ့ရစဉ်

သက်ကြီးပိုင်း ပုဂ္ဂိုလ်အများစုသည် ၎င်းတို့ လက်ခံရရှိမည့် ဘတ် ၁၀,၀၀၀ ထောက်ပံ့ကြေးကို ရရှိရန် အလောတကြီး စောင့်မျှော်ခဲ့ကြကြောင်း ပေတုန်တန်က ပြောကြားခဲ့သည်။

ပထမအသုတ် ထောက်ပံ့ကြေး ပေးသည့်အဆင့်တွင် လက်ခံရရှိသူများက ၎င်းတို့အစိုးရ၏ အစီအစဉ်ကို ကောင်းမွန်သည့် မှတ်ချက်များပေးခဲ့ကြောင်း ပေတုန်တန်က ပြောကြားခဲ့သည်။

အချို့လူများက ထောက်ပံ့ကြေးကို ၎င်းတို့ လိုအပ်သည့် အရာများအတွက် အသုံးပြုခဲ့ပြီး အချို့လူများကလည်း ၎င်းတို့ရရှိသော ထောက်ပံ့ငွေများအား ရင်းနှီးမြှုပ်နှံမှုများ ပြုလုပ်ခဲ့ကြောင်း ပေတုန်တန်က ပြောသည်။

ယခု ဒုတိယအသုတ် ငွေကြေး ထောက်ပံ့မှုသည်လည်း နိုင်ငံ့စီးပွားရေးကို လှုံ့ဆော်နိုင်လိမ့်မည်ဟု ယုံကြည် ကြောင်း ထိုင်းဝန်ကြီးချုပ်က ပြောကြားခဲ့သည်။

Source: ဘန်ကောက်ပို့စ်

CNI International News

ဘေကျင်း၊ ဇန်နဝါရီ ၂၂

တရုတ်သည် ၂၀၂၄ ခုနှစ်အတွင်း မြို့ပြအလုပ်အကိုင်သစ် စုစုပေါင်း ၁၂ ဒသမ ၅၆ သန်း ဖန်တီးပေးခဲ့ကြောင်း Global Times မှ ဖော်ပြခဲ့သည်။

ထိုပမာဏသည် တစ်နှစ်တာအတွင်း မြို့ပြအလုပ်အကိုင်သစ်ပေါင်း ၁၂ သန်း ဖန်တီးရန် ရည်မှန်းထားသည့် အစိုးရ၏ လျာထားချက်ကို ကျော်လွန်သွားခြင်း ဖြစ်သည်ဟုလည်း လူသားရင်းမြစ်နှင့် လူမှုလုံခြုံရေးဝန်ကြီး ဌာန၏ အချက်အလက်များကို ကိုးကားပြီး ဆင်ဟွာသတင်းအေဂျင်စီက ဖော်ပြခဲ့သည်။

၂၀၂၄ ခုနှစ်အတွင်း မြို့ပြတွင် နေထိုင်သူများအကြား အလုပ်လက်မဲ့နှုန်း ၅ ဒသမ ၁ ရာခိုင်နှုန်းရှိခဲ့ပြီး ထိုနှုန်းထား သည် ၂၀၂၃ ခုနှစ်ကထက် ၀ ဒသမ ၁ ရာခိုင်နှုန်း ကျဆင်းခဲ့ကြောင်း တရားဝင် အချက်အလက်များတွင် ဖော်ပြ ထားသည်။

အဓိက စက်မှုလုပ်ငန်းများ၊ မြို့ပြနှင့် ကျေးလက်ဒေသနေ ပြည်သူများအတွက် အလုပ်အကိုင်ရရှိရေး၊ အသေးစား၊ အလတ်စား စီးပွားရေးလုပ်ငန်းများကို ထောက်ပံ့ပေးသည့် အစီအစဉ်များကို အကောင်အထည် ဖော်သွားမည် ဖြစ် သလို အကြီးစား ပရောဂျက်များတွင် အလုပ်အကိုင်များ ရရှိစေမည့် ယန္တရားတစ်ခုကို ထူထောင်သွားမည်ဟု လူသားရင်းမြစ်နှင့် လူမှုလုံခြုံရေးဝန်ကြီးဌာနက ထုတ်ပြန်ခဲ့သည်။

တရုတ်လူငယ်တွေ အလုပ်အကိုင်ရှာဖွေနေကြစဉ်

မတူကွဲပြားသည့် လုပ်သားအင်အားစုများကို မြှင့်တင်ရန် ဘွဲ့ရပညာတတ်များ၏ အလုပ်အကိုင် ရရှိမှုကို မှတ်တမ်း တင်ပြီး ကျေးလက်ဒေသဖွံ့ဖြိုးတိုးတက်ရေး၊ အုပ်ချုပ်ရေး၊ လူမှုလုံခြုံရေးနှင့် ကျန်းမာရေး စောင့်ရှောက်မှုကဲ့သို့ နယ်ပယ်များတွင် လူငယ်များအတွက် အလုပ်အကိုင် အခွင့်အလမ်းသစ်များ ဖန်တီးပေးမည်ဟု ထုတ်ပြန်ချက်တွင် ဖော်ပြခဲ့သည်။

တရုတ်တွင် ၂၀၂၅ ခုနှစ်အတွင်း ဘွဲ့ရကျောင်းသား အရေအတွက် များပြားလာဖွယ်ရှိသည်ဟု ကျွမ်းကျင်သူများက ခန့်မှန်းထားသည်။

ပြီးခဲ့သည့်နှစ်ကထက် ဘွဲ့ရပညာတတ်လူငယ် ၄၃၀,၀၀၀ ခန့် မြင့်တက်လာဖွယ် ရှိမှုနှင့်အတူ တရုတ်တွင် ဘွဲ့ရပညာတတ် လူငယ်အရေအတွက် ၁၂ ဒသမ ၂၂ သန်း ရှိလာလိမ့်မည်ဟု တရားဝင် မှတ်တမ်းများတွင် ဖော်ပြခဲ့သည်။

Source: Global Times

CNI International News

ဘန်ကောက်၊ ဇန်နဝါရီ ၁၁

၂၀၂၄ ခုနှစ် ပထမ(၉)လတာ ကာလအတွင်း ထိုင်းနိုင်ငံမှ ကွန်ဒိုများကို ဝယ်ယူမှု အများဆုံးစာရင်းတွင် မြန်မာနိုင်ငံ သားများသည် တရုတ်ပြီးလျှင် ဒုတိယအများဆုံး ဝယ်ယူသူများ ဖြစ်လာခဲ့ကြောင်း ဘန်ကောက်ပို့စ်မှ ဖော်ပြခဲ့ သည်။

မြန်မာနိုင်ငံတွင် နိုင်ငံရေးအကျပ်အတည်း ဖြစ်ပွားနေချိန်၌ မြန်မာနိုင်ငံသားများသည် ထိုင်းကွန်ဒိုများကို ဝယ်ယူမှု မှာ ရုရှားနိုင်ငံသားများကို ကျော်တက်သွားခဲ့ခြင်းဖြစ်သည်။

ပြီးခဲ့သည့်နှစ် ဧပြီလနောက်ပိုင်း ထိုင်းရှိ ကွန်ဒိုများကို မြန်မာနိုင်ငံမှ ဝယ်သူများ ဝယ်ယူမှု ယာယီရပ်ဆိုင်းသွားခဲ့ ကြောင်း အိမ်ခြံမြေသုတေသနနှင့် အတိုင်ပင်ခံကုမ္ပဏီဖြစ်သည့် Cushman & Wakefield Thailand ၏ အကြီးအကဲ သူရချက် ကွန်ချိပ် (Surachet Kongcheep) က ပြောကြားခဲ့သည်။

“ထိုင်းကွန်ဒိုတွေကို ဝယ်ယူတဲ့ မြန်မာနိုင်ငံက ဝယ်သူတွေကို မြန်မာအာဏာပိုင်တွေက ကန့်သတ်တားမြစ်မှုတွေ လုပ်ခဲ့တဲ့ အကျိုးဆက်အနေနဲ့ ဈေးကွက်အတွင်း ကွန်ဒိုရောင်းချမှု ယာယီရပ်တန့်သွားခဲ့တာ ဖြစ်ပါတယ်” ဟု သူရချက်က ပြောကြားခဲ့သည်။

၂၀၂၄ ခုနှစ် ပထမ(၉)လတာ ကာလအတွင်းမှာပင် မြန်မာနိုင်ငံမှ ဝယ်သူများက ထိုင်းကွန်ဒိုများကို ဝယ်ယူမှု ပမာဏသည် စံချိန်သစ်တင်ခဲ့ပြီး ၂၀၂၃ ခုနှစ် တစ်နှစ်လုံးတွင် ဝယ်ယူသည့် ကွန်ဒိုအရေအတွက်ထက် များပြား ခဲ့သည်ဟု ဆိုသည်။

ထိုင်းမှာ ကွန်ဒိုဝယ်ယူမှုအများဆုံး နိုင်ငံများစာရင်းကို တွေ့ရစဉ်

ပြီးခဲ့သည့်နှစ် ပထမ(၉)လအတွင်း မြန်မာနိုင်ငံမှ ဝယ်သူများကို ရောင်းချခဲ့သည့် ကွန်ဒိုယူနစ်ပေါင်း ၁၀၅၀ ယူနစ်ရှိခဲ့ပြီး တန်ဖိုးအားဖြင့် ဘတ် ၅ ဒသမ ၄၆ ဘီလျံရှိခဲ့သည်ဟု Real Estate Information Center (REIC) က ထုတ်ပြန်ခဲ့သည်။

ထိုပမာဏသည် မြန်မာနိုင်ငံမှ ဝယ်သူများအား ကွန်ဒိုယူနစ် ၃၄၇ ယူနစ်၊ တန်ဖိုးအားဖြင့် ဘတ် ၂ ဒသမ ၂၄ ဘီလျံ ရောင်းချနိုင်ခဲ့သည့် ၂၀၂၃ ခုနှစ် ပထမ(၉)လတာ ကာလကထက် သိသာထင်ရှားစွာ မြင့်တက်ခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြခဲ့သည်။

၂၀၂၄ ခုနှစ် ပထမ(၆)လတာ ကာလအတွင်းမှာပင် မြန်မာနိုင်ငံမှ ဝယ်သူများကို ကွန်ဒိုယူနစ် ၆၃၈ ယူနစ်၊ တန်ဖိုး အားဖြင့်ဘတ် ၃ ဒသမ ၂၄ ဘီလျံ ရောင်းချခဲ့သည်ဟု ဆိုသည်။

၂၀၂၃ ခုနှစ် တစ်နှစ်လုံးတွင် မြန်မာနိုင်ငံမှ ဝယ်သူများကို ကွန်ဒိုယူနစ် ၅၆၄ ယူနစ်၊ တန်ဖိုးအားဖြင့် ဘတ် ၃ ဒသမ ၇ ဘီလျံ ရောင်းချနိုင်ခဲ့ပြီး ထိုပမာဏသည် ၂၀၂၂ ခုနှစ်ကထက် ပိုမိုမြင့်တက်ခဲ့သည်။

ထိုင်းကွန်ဒိုများကို အများဆုံး ဝယ်ယူသူများသည် တရုတ်နိုင်ငံမှဖြစ်ပြီး ၂၀၂၄ ခုနှစ် ပထမ(၉)လတာ ကာလ အတွင်း တရုတ်နိုင်ငံမှ ဝယ်သူများသည် ထိုင်းကွန်ဒို ယူနစ် ၄၃၈၆ ယူနစ်၊ တန်ဖိုးအားဖြင့် ဘတ် ၂၀ ဒသမ ၂ ဘီလျံခန့် ဝယ်ယူခဲ့သည်။

Source: ဘန်ကောက်ပို့စ်

CNI International News

ဘန်ကောက်၊ ဇန်နဝါရီ ၈

၂၀၂၄ ခုနှစ် ပထမ ၁၁ လတာ ကာလအတွင်း ထိုင်းနိုင်ငံ၏ နယ်စပ်ကုန်သွယ်မှု တန်ဖိုးသည် ၂၀၂၃ ခုနှစ်ကထက် ၆ ရာခိုင်နှုန်း မြင့်တက်ခဲ့ပြီး ဘတ် ၁ ဒသမ ၆၆ ထရီလျံအထိ ရှိလာခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

ထိုင်း၏ နိုင်ငံခြားကုန်သွယ်ရေးဌာနမှ ညွှန်ကြားရေးမှူးချုပ် အာရာဒါ ဖူအန်သွန်း (Arada Fuengthong) က ၂၀၂၄ ခုနှစ်၊ နိုဝင်ဘာလအတွင်း နယ်စပ်ကုန်သွယ်မှုနှင့် ကြားခံကုန်သွယ်မှု တန်ဖိုးသည် ဘတ် ၁၅၀ ဘီလျံရှိခဲ့ပြီး ပြီးခဲ့သည့်နှစ်ကထက် ၄ ရာခိုင်နှုန်း မြင့်တက်ခဲ့သည်ဟု ပြောကြားခဲ့သည်။

ပို့ကုန်ကဏ္ဍတွင်လည်း ၂၀၂၃ ခုနှစ်ကထက် ၁၅ ဒသမ ၃ ရာခိုင်နှုန်း မြင့်တက်ခဲ့ပြီး တန်ဖိုးအားဖြင့် ဘတ် ၈၅ ဒသမ ၇ ဘီလျံ ရှိခဲ့သည်ဟုဆိုသည်။

သို့သော် သွင်းကုန်ကဏ္ဍတွင် ၈ ရာခိုင်နှုန်း ကျဆင်းခဲ့ပြီး ဘတ် ၆၄ ဒသမ ၅ ဘီလျံရှိခဲ့သဖြင့် ကုန်သွယ်ရေး ပိုငွေပြမှုသည် ဘတ် ၂၁ ဒသမ ၂ ဘီလျံရှိခဲ့သည်။

၂၀၂၄ ခုနှစ် ပထမ ၁၁ လတာ ကာလအတွင်း နယ်စပ်ကုန်သွယ်မှုနှင့် ကြားခံကုန်သွယ်မှုမှ ပို့ကုန်ကဏ္ဍသည် ဘတ် ၂၅၈ ဘီလျံရှိခဲ့ပြီး ၂၀၂၃ ခုနှစ်ကထက် ၆ ဒသမ ၅ ရာခိုင်နှုန်း မြင့်တက်ခဲ့သည်။ ထို့နောက် နယ်စပ်ကုန်သွယ်မှုနှင့် ကြားခံကုန်သွယ်မှုမှ သွင်းကုန်ကဏ္ဍသည် ၇၀၇ ဘီလျံရှိခဲ့ပြီး ၂၀၂၃ ခုနှစ်ကထက် ၅ ဒသမ ၄ ဘီလျံမြင့်တက်ခဲ့ သည်။

ထိုင်းနဲ့မလေးရှား နယ်စပ်ပေါက်ကိုတွေ့ရစဉ်

မလေးရှားနိုင်ငံသည် ဘတ် ၂၅ ဒသမ ၄ ဘီလျံဖြင့် ကုန်သွယ်မှုတန်ဖိုး အများဆုံးဖြစ်ခဲ့ပြီး မလေးရှားပြီးလျင် လာအို၊ မြန်မာနှင့် ကမ္ဘောဒီးယားနိုင်ငံတို့က အစဉ်လိုက် ရပ်တည်နေသည်။

နယ်စပ်ကုန်သွယ်မှုတွင် အဓိကထုတ်ကုန်များမှာ ဒီဇယ်၊ ဓာတ်ဆီနှင့် ရာဘာတို့ဖြစ်သည်။

အဓိကတင်ပို့ရောင်းချသည့် နိုင်ငံများထဲတွင် တရုတ်၊ စင်္ကာပူနှင့် ဗီယက်နမ်တို့ဖြစ်ပြီး အဓိကပို့ကုန်များသည် ကွန်ပြူတာ hard disk များ၊ ရာဘာထုတ်ကုန်များ၊ TSNR ရာဘာတုံးများဖြစ်သည်။

အိမ်နီးချင်း မြန်မာနိုင်ငံတွင် ပဋိပက္ခများ ဖြစ်ပွားနေသည့်တိုင် ပြီးခဲ့သည့်နှစ် နိုဝင်ဘာလက နယ်စပ်ကုန်သွယ်မှု တန်ဖိုးသည် ၂၀၂၃ ခုနှစ်ကတထက် ၆ ဒသမ ၅ ရာခိုင်နှုန်း မြင့်တက်ခဲ့ပြီး ဘတ် ၁၁ ဒသမ ၄ ဘီလျံရှိခဲ့ကြောင်း မစ္စစ် အာရာဒါက ပြောကြားခဲ့သည်။

Source: ဘန်ကောက်ပို့စ်

CNI International News

ဟောင်ကောင်၊ ဇန်နဝါရီ ၇

၂၀၂၅ ခုနှစ်အတွင်း တရုတ်၏ စီးပွားရေးအရင်းခံ အချက် ၅ ချက်ကို စောင့်ကြည့်ရမည်ဟု Nikkei Asia မှ ဖော်ပြခဲ့သည်။

ကမ္ဘာ့ဒုတိယ စီးပွားရေးအင်အား အကြီးဆုံး တရုတ်နိုင်ငံသည် စီးပွားရေး ပရမ်းပတာ အခြေအနေဖြင့် ၂၀၂၅ ခုနှစ်အတွင်းသို့ ဝင်လာခဲ့သည်။

၂၀၂၄ ခုနှစ် တစ်နှစ်လုံးကို ပြန်လည် သုံးသပ်ကြည့်ရမည်ဆိုပါက တရုတ်သည် အိမ်ခြံမြေဈေးကွက် အကျပ် အတည်း၊ ဒေသန္တရအစိုးရများ၏ ရန်ပုံငွေ အကျပ်အတည်း၊ နှေးကွေးလေးလံသည့် အလုပ်သမား ဈေးကွက်တို့နှင့် လုံးပန်းခဲ့ရသည်။

ထိုအခြေအနေများက စားသုံးသူများနှင့် စီးပွားရေး လုပ်ငန်းရှင်များအကြား နဂိုကတည်းက ကျိုးပျက်လွယ်သည့် ယုံကြည်မှုကို ပိုမိုထိခိုက်စေခဲ့သည်။

ထို့ကြောင့် ၂၀၂၅ ခုနှစ်အတွင်း တရုတ်၏ စီးပွားရေးကို ခန့်မှန်းရမည်ဆိုပါက အောက်ဖော်ပြပါ အချက် ၅ ချက်က လွှမ်းမိုးဖွယ်ရှိနေသည်။

ရှီကျင့်ဖျင်နဲ့ အလုပ်သမားများကိုတွေ့ရစဉ်

ပထမအချက်မှာ စီပွားရေး ဖွံ့ဖြိုးတိုးတက်မှုနှုန်းဖြစ်သည်။ 

တရုတ်သည် ၂၀၂၄ ခုနှစ်က မျှော်မှန်းထားသကဲ့သို့ ၂၀၂၅ ခုနှစ်တွင်လည်း ဂျီဒီပီ ဖွံ့ဖြိုးတိုးတးက်မှုနှုန်းကို ၅ ရာခိုင်နှုန်းအထိ မျှော်မှန်းထားသည်။ 

သို့သော် ကျွမ်းကျင်သူ အချို့ကမူ ပြည်တွင်းမူဝါဒများနှင့် ကမ္ဘာလုံးဆိုင်ရာ စီးပွားရေး အခြေအနေများကြောင့် တရုတ်၏ ဂျီဒီပီကို ၃ ရာခိုင်နှုန်းမှ ၄ ဒသမ ၅ ရာခိုင်နှုန်းသာ ခန့်မှန်းထားသည်။

ဒုတိယအချက်မှာ အစိုးရ၏ စီးပွားရေးလှုံ့ဆော်သည့် အစီအစဉ်များဖြစ်သည်။ 

စီးပွားရေး စိန်ခေါ်မှုများကို တန်ပြန်ရန် တရုတ်အစိုးရသည် ပိုမိုထိရောက်သည့် စီးပွားရေး မူဝါဒများကို ချမှတ် အကောင်အထည်ဖော်ရန် စီစဉ်ထားသည်။

ထိုအစီအစဉ်များထဲတွင် ငွေတိုက်စာချုပ် အာမခံများ၊ အထူးငွေတိုက်စာချုပ်များ အပါအဝင် ငွေကြေး မူဝါဒများ ပါဝင်သည်။

တတိယအချက်မှာ နည်းပညာ ခေတ်မီတိုးတက်မှုဖြစ်သည်။

တရုတ်သည် တစ်ပိုင်းလျှပ်ကူး ပစ္စည်းများ၊ လျှပ်စစ်ကားများ၊ ဇီဝနည်းပညာနှင့် အဆင့်မြင့် ကုန်ထုတ်ကဏ္ဍများ တွင် နည်းပညာအရ မိမိကိုယ်ကိုယ် မှီခိုအားထားပြီး လုပ်ဆောင်နိုင်ရန် အာရုံစိုက်ထားသည်။

ဈေးဝယ်နေကြတဲ့ တရုတ်လူမျိုးများကိုတွေ့ရစဉ်

စတုတ္ထအချက်မှာ လူဦးရေ ပြဿနာဖြစ်သည်။ 

တရုတ်သည် သက်ကြီးပိုင်းလူဦးရေ လျင်မြန်စွာ များပြားလာမှုနှင့် ရင်ဆိုင်နေရသဖြင့် လုပ်သားဈေးကွက်နှင့် စီးပွားရေး ဖွံ့ဖြိုးတိုးတက်မှုတို့အပေါ် သက်ရောက်မှု ရှိလာနိုင်သည်။ 

၂၀၅၀ ပြည့်နှစ်တွင် တရုတ်၏ လူဦးရေ စုစုပေါင်း၏ ၃၉ ရာခိုင်နှုန်းသည် ပင်စင်စားအရွယ်များ ဖြစ်လာလိမ့်မည်ဟု ခန့်မှန်းထားသည်။

ပဉ္စမအချက်မှာ ကမ္ဘာလုံးဆိုင်ရာ ကုန်သွယ်ရေးဖြစ်သည်။ 

အထူးသဖြင့် အမေရိကန်က တရုတ်၏ သွင်းကုန်များအပေါ် အခွန်များ တိုးမြှင့်ကောက်ခံရန် စီစဉ်ထားသဖြင့် တရုတ်၏ ပို့ကုန်ကဏ္ဍအတွက် အန္တရာယ်တစ်ခု ဖြစ်နေသည်။ 

ထို့ကြောင့် တရုတ်သည် အခြားမိတ်ဖက်နိုင်ငံများနှင့် ကုန်သွယ်မှု ဆက်ဆံရေးများကို တိုးမြှင့်ရန် ကြိုးပမ်းခဲ့ခြင်း ဖြစ်သည်။

အထက်ဖော်ပြပါ အချက်များသည် ၂၀၂၅ ခုနှစ်အတွက် တရုတ်၏ စီးပွားရေး မြှင့်တင်ရေး အစီအစဉ်များ၏ အဓိက အကြောင်းခံများဖြစ်ပြီး တရုတ်အနေဖြင့် စဉ်ဆက်မပြတ် ဖွံ့ဖြိုးတိုးတးက်မှုကို ရရှိရန် ဂရုတစိုက် လုပ်ဆောင်ရန် လိုအပ်မည်ဖြစ်သည်။

Source: Nikkei Asia

CNI International News

ဘန်ကောက်၊ ဇန်နဝါရီ ၆

ထိုင်းဝန်ကြီးချုပ် ပေတုန်တန် ရှင်နာဝပ် (Paetongtarn Shinawatra) သည် စုစုပေါင်း ဘတ် ၁၀ ဘီလျံနီးပါး တန်ဖိုးရှိသည့် ကုမ္ပဏီ ၂၀ နီးပါးတွင် ထည့်ဝင်ထားသည့် ရှယ်ယာများကို ၎င်းတို့မိသားစုဝင်များ ပိုင်ဆိုင်သော ကုမ္ပဏီ ၃ ခုနှင့် လက်အောက်ခံ ကုမ္ပဏီခွဲများထံသို့ လွှဲပြောင်းခဲ့ကြောင်း The Nation မှ ဖော်ပြခဲ့သည်။

ပြီးခဲ့သည့် သီတင်းပတ်က ထိုင်း၏ အမျိုးသား အဂတိလိုက်စားမှု တိုက်ဖျက်ရေးကော်မရှင်သည် ပေတုန်တန်၏ ပိုင်ဆိုင်မှုများကို လူသိထင်ရှား ထုတ်ပြန်ကြေညာခဲ့သည်။

Alpine Golf and Sport Club ကုမ္ပဏီတွင် ထည့်ဝင်ထားသည့် ဘတ် ၂၂၄ ဒသမ ၁ သန်း တန်ကြေးရှိသည့် အစုရှယ်ယာ ၂၂,၄၁၀,၀၀၀ ကို ပေတုန်တန်က သူ့မိခင်ဖြစ်သူ ခွန်ယင်း ပိုဂျာမန် ဒါမာပွန် (Khunying Pojaman Damapong) ထံသို့ ၂၀၂၄ ခုနှစ်၊ စက်တင်ဘာ ၄ ရက်က လွှဲပြောင်းပေးခဲ့သည်။

တစ်ချိန်က Manchester City FC (Thailand) ဟု လူသိများခဲ့သည့် Pramaisuree Property ကုမ္ပဏီတွင် ထည့်ဝင်ထားသော ဘတ် ၁၆၉ ဒသမ ၄ သန်း တန်ကြေးရှိသည့် အစုရှယ်ယာ ၁၆,၉၄၉,၉၉၀ ကို ပေတန်တန်၏ အစ်မဖြစ်သူ ပင်တွန်တာ ရှင်နာဝပ် ခူနာကွန်ဝေါင် (Pintongta Shinawatra Kunakornwong) အား ၂၀၂၄ ခုနှစ်၊ စက်တင်ဘာ ၅ ရက်တွင် လွှဲပြောင်းပေးခဲ့သည်။

ပေတုန်တန်ကို တွေ့ရစဉ်

Alpine Golf and Sport Club ကုမ္ပဏီ၏ လက်အောက်ခံ ကုမ္ပဏီခွဲဖြစ်သည့် Alpine Garden Design ကုမ္ပဏီ တွင် ထည့်ဝင်ထားသည့် ဘတ် ၁၉ ဒသမ ၉၉ သန်း တန်ဖိုးရှိ အစုရှယ်ယာ ၁,၉၉၉,၈၀၀ ကို Alpine Golf and Sport Club ကုမ္ပဏီသို့ ၂၀၂၄ ခုနှစ်၊ ဩဂုတ် ၂၉ ရက်တွင် လွှဲပြောင်းခဲ့သည်။

ထို့ပြင် ထိုင်းစတော့ အိတ်ချိန်းတွင် ပါဝင်ခြင်းမရှိသည့် ကုမ္ပဏီ ၁၁ ခုကို ၂၀၀၀ ပြည့်နှစ် ပြည်သူ့ဝန်ကြီးဌာန ဆိုင်ရာ ရှယ်ယာများနှင့် စတော့များ စီမံခန့်ခွဲရေးအက်ဥပဒေနှင့်အညီ Kiatnakin Phatra Asset Management ကုမ္ပဏီလက်အောက်သို့ လွှဲပြောင်းခဲ့သည်။

ထိုကုမ္ပဏီများထဲတွင် ဘတ် ၅ သန်း တန်ကြေးရှိသည့် ရှယ်ယာ ၅ သန်းနှင့်အထက်ရှိ ထည့်ဝင်ထားသည့် Rama 9 Hospital ကုမ္ပဏီလည်း ပါဝင်ခဲ့သည်။ ထိုရှယ်ယာများကို စီမံခန့်ခွဲရန်အတွက် Land and House Asset Management ကုမ္ပဏီသို့ လွှဲပြောင်းခဲ့သည်။

၂၀၂၄ ခုနှစ်၊ ဩဂုတ် ၂၈ ရက်အထိ ပေတုန်တန်သည်  SC Asset Corporation Pcl ကုမ္ပဏီတွင် ဘတ်  ၁ ဒသမ ၂၁၆ ဘီလျံ တန်ဖိုးရှိသည့် အစုရှယ်ယာ ၁,၂၁၆,၁၄၉,၈၇၀ ကို လွှဲပြောင်းပေးခဲ့ပြီး ထိုရှယ်ယာများကို လွှဲပြောင်း ပေးခဲ့ခြင်း ရှိ/မရှိကိုမူ သတင်းများ ထွက်ပေါ်ခဲ့ခြင်း မရှိသေးပေ။

Source: The Nation