CNI International News

နယူးဒေလီ၊ ဧပြီ ၂၃

အိန္ဒိယ၏ လေကြောင်းအာကာသ၊ စွမ်းအင်နှင့် အခြေခံ အဆောက်အအုံ ကဏ္ဍအတွက် ထုတ်ကုန်များ ထုတ်လုပ် ပေးနေသည့် Godrej & Boyce ကုမ္ပဏီသည် ကုန်ကျစရိတ်များကို လျှော့ချရန်အတွက် AI နည်းပညာနယ်ပယ်တွင် ရင်းနှီးမြှုပ်နှံနေကြောင်း Nikkei Asia မှ ဖော်ပြခဲ့သည်။

AI နည်းပညာသည် အကျိုးအမြတ်များသည့် လူသုံးကုန်ပစ္စည်းများကို ထုတ်လုပ်ရန် ရုန်းကန်ရဖွယ်ရှိသော်လည်း အိန္ဒိယ၏ စက်မှုကဏ္ဍအား အကျိုးရှိစေခဲ့ကြောင်း Godrej & Boyce ကုမ္ပဏီ၏ ဒစ်ဂျစ်တယ်နှင့် သတင်း အချက်အလက် အကြီးအကဲ ဗီဂျေး ဘလာကရစ္စနန် (Vijay Balakrishnan) က ပြောကြားခဲ့သည်။

AI နည်းပညာအသုံးပြုသည့် စက်မှုလုပ်ငန်းများသည် လုပ်သားအင်အားရင်းမြစ်ကို လျှော့ချနိုင်ခြင်း၊ လုပ်ငန်း လည်ပတ်မှုကို ပိုမိုမြန်ဆန်စေခြင်း၊ အလေအလွင့် လျော့နည်းခြင်းတို့နှင့်အတူ လုပ်ငန်းလည်ပတ်မှုအတွက် ကုန်ကျစရိတ်ကို သက်သာစေနိုင်ကြောင်း ကျွမ်းကျင်သူများက ပြောကြားခဲ့သည်။

လက်ရှိတွင် Godrej & Boyce ကုမ္ပဏီသည် ကုန်ထုတ်လုပ်ရေး လုပ်ငန်းများ၌ လုပ်သားအင်အားကို လျှော့ချရန် AI နည်းပညာ ပေါင်းစပ်ထည့်သွင်းထားသည့် စက်ရုပ်လက်တံများအား  အသုံးပြုဖို့ လုပ်ဆောင်လျက်ရှိသည်။

 လူသားစက်ရုံကို တွေ့ရစဉ်

ဥပမာအားဖြင့် AI စနစ်သည် ရေခဲသေတ္တာများနှင့် လေအေးပေးစက်များအတွက် တပ်ဆင်ရမည့် စက်ပစ္စည်း အစိတ်အပိုင်းများကို အစီအစဉ်တကျ နေရာချထားရာတွင် အထောက်အကူ ဖြစ်စေမည်ဖြစ်သည်။

AI နည်းပညာ ထည့်သွင်းထားသည့် စက်ရုပ်လက်တံများသည် ချွတ်ယွင်းချက်များနှင့် အပြစ်အနာအဆာများကို ထောက်လှမ်းသိရှိနိုင်ပြီး စက်ယန္တရားများ၏ စွမ်းဆောင်ရည်ကိုလည်း လေ့လာသုံးသပ်နိုင်သည်ဟု ကျွမ်းကျင် သူများက ပြောကြားခဲ့သည်။

ထို့ပြင် စက်ရုံ၏ အပူချိန်၊ အအေးပေးစနစ် သို့မဟုတ် စက်ယန္တရား လည်ပတ်မှုများကို AI က ထောက်လှမ်းသိရှိနိုင် သဖြင့် Godrej & Boyce ကုမ္ပဏီအနေဖြင့် စွမ်းအင်အတွက် အသုံးပြုရသည့် မီတာခများနှင့် ကာဘွန်ထုတ်လွှတ်မှု ပမာဏကို လျှော့ချနိုင်မည်ဖြစ်သည်။

AI နည်းပညာသုံး စက်ပစ္စည်းများကို အသုံးပြုမှုသည် သာမန်အလုပ်ချိန်အား ၁၅ ရာခိုင်နှုန်းမှ ၂၀ ရာခိုင်နှုန်းအထိ လျှော့ချပေးနိုင်ပြီး ကုန်ထုတ်လုပ်မှုကဏ္ဍတွင် ၃၀ ရာခိုင်နှုန်းမှ ၄၀ ရာခိုင်နှုန်းအထိ တိုးတက်ကောင်းမွန်စေမည် ဖြစ်သည်။

ထို့ကြောင့် Godrej & Boyce ကုမ္ပဏီသည် ပို့ကုန်၊ သွင်းကုန်ကဏ္ဍတွင် ယှဉ်ပြိုင်မှုများ၊ အထူးသဖြင့် တရုတ်နှင့် ယှဉ်ပြိုင်မှု၌ AI စနစ်များ၏ အထောက်အကူရရှိရန် ပြင်ဆင်လာခဲ့ခြင်းဖြစ်သည်ဟု ကျွမ်းကျင်သူများက ပြောကြား ခဲ့သည်။

Source: Nikkei Asia

CNI International News

ဘေဂျင်း၊ ဧပြီ ၂၃

အမေရိကန်နှင့်ဖြစ်ပွားနေသည့် ကုန်သွယ်ရေးစစ်ပွဲကြောင့် အမေရိကန်သို့ တင်ပို့နေသော တရုတ်၏ သတ္တုတင်ပို့ မှုကို လျော့ကျလာစေခဲ့ကြောင်း South China Morning Post မှ ဖော်ပြခဲ့သည်။

မတ်လအတွင်း တရုတ်၏ သတ္တုများ တင်ပို့မှုသည် လျော့ကျခဲ့ပြီး အရေးကြီးသည့် သတ္တုအမျိုးအစားအချို့ ပို့ဆောင်မှုများသည်လည်း အလုံးစုံ ရပ်တန့်သွားခဲ့ကြောင်း အကောက်ခွန် မှတ်တမ်းများတွင် ဖော်ပြထားသည်။

တရုတ်၏ ပို့ကုန်များအပေါ် ကုန်သွယ်ခွန် တိုးမြှင့်ကောက်ခံခဲ့သော အမေရိကန်ကို တုန့်ပြန်သည့် အနေဖြင့် တရုတ်ကလည်း အမေရိကန်၏ ပို့ကုန်များအပေါ် အခွန်များ တိုးမြှင့်ကောက်ခံခဲ့သည်။

ထို့ကြောင့် တရုတ်ထံမှ တင်ပို့သည့် မြေရှားသတ္တုများကို မှီခိုနေရသော အမေရိကန်၏ ကုန်ထုတ်လုပ်ရေး လုပ်ငန်းများအပေါ်ကိုလည်း ဖိအားများ ကျရောက်ဖွယ်ရှိနေသည်။

တရုတ်သည် မြေရှားသတ္တု ထောက်ပံ့ရေး ကွင်းဆက်တွင် အဓိကနေရာ၌ ရပ်တည်နေပြီး ကမ္ဘာလုံးဆိုင်ရာ စျေးကွက်ကို လက်ဝါးကြီးအုပ် ထားနိုင်လုနီးပါး အခြေအနေမှာ ရှိနေသည်။

 တရုတ်သတ္တု တူးဖော်မှုကို တွေ့ရစဉ်

မြေရှားသတ္တုသည် စမတ်ဖုန်းများမှအစ နည်းပညာမြင့် စစ်လက်နက် ပစ္စည်းများအဆုံး ခေတ်မီ အသုံးအဆောက် ပစ္စည်းများ အားလုံးအတွက် မရှိမဖြစ်လိုအပ်သည့် သတ္တုတစ်မျိုးဖြစ်သည်။

ပြီးခဲ့သော သီတင်းပတ်ကုန်က ထုတ်ပြန်ခဲ့သော အချက်အလက်များအရ အမေရိကန်သို့ တင်ပို့သည့် သတ္တုတင်ပို့ မှုသည် မတ်လအတွင်း သိသိသာသာ ကျဆင်းသွားသဖြင့် ကုန်သွယ်ရေးစစ်ပွဲတွင် တရုတ်သည် မြေရှား သတ္တုကဲ့သို့ ရှားပါးသတ္တုများကို အနိုင်ဖဲချပ် တစ်ချပ်အဖြစ် ကိုင်ထားဖွယ်ရှိနေသည်။

တရုတ်မှ  အမေရိကန်သို့ တင်ပို့သည့် tellurium သတ္တုသည်လည်း တင်ပို့မှုနှုန်း ၄၄ ရာခိုင်နှုန်း လျော့ကျသွား ခဲ့သည်။

အဆိုပါ သတ္တုသည် ဆိုလာပြားများနှင့် သာမိုလျှပ်စစ် ပစ္စည်းများတွင် တွင်ကျယ်စွာ အသုံးပြုသည့် သတ္တု အမျိုးအစားဖြစ်သည်။

ထို့ပြင် တရုတ်မှ အမေရိကန်သို့ တင်ပို့သည့် Tungsten သတ္တုချောင်းများ တင်ပို့မှုနှုန်းသည်လည်း ၈၈ ရာခိုင်နှုန်း လျော့ကျခဲ့သည်။

ထိုသတ္တုနှင့်ဆက်နွှယ်သည့် ထုတ်ကုန်များ တင်ပို့မှုနှုန်းသည်လည်း ၇၇ ရာခိုင်နှုန်းအထိ လျော့ကျခဲ့သည်။

Source: South China Morning Post

CNI International News

နယူးဒေလီ၊ ဧပြီ ၂၂

အမေရိကန် ကမ္ဘာလုံးဆိုင်ရာ အခွန်တိုးမြှင့် ကောက်ခံမည်ဖြစ်ကြောင်း ကြေညာထားပြီးနောက် အမေရိကန် ဒုသမ္မတ ဂျေဒီဗန့်(JD Vance) သည် အိန္ဒိယသို့ ရောက်ရှိနေစဉ် ဝန်ကြီးချုပ် မိုဒီနှင့် ဆွေးနွေးကြမည်ဟု ရိုက်တာမှ ဖော်ပြခဲ့သည်။

အမေရိကန်ဒုသမ္မတ ဂျေဒီဗန့် (JD Vance) သည် ဧပြီ ၂၁ ရက်တွင် အိန္ဒိယနိုင်ငံသို့ လေးရက်ကြာ ခရီးစဉ်အဖြစ် ရောက်ရှိလာခဲ့ပြီး  ဝန်ကြီးချုပ် နရန်ဒရာမိုဒီ(Narendra Modi) နှင့် တွေ့ဆုံဆွေးနွေးမည်ဖြစ်သည်။

အိန္ဒိယအစိုးရသည် အစောပိုင်း ကုန်သွယ်ရေး သဘောတူညီချက်ဖြင့် အမေရိကန်၏ စည်းကြပ်ခွန်များကို ရှောင်ရှားရန်၊ ဒေါ်နယ်ထရမ့် အစိုးရနှင့် ဆက်ဆံရေး တိုးမြှင့်ရန်အတွက် ကြိုးပမ်းနေချိန် ဗန့်က အိန္ဒိယသို့ ရောက်ရှိလာခြင်းဖြစ်သည်။

ဗန့်သည် အိန္ဒိယခရီးစဉ်အတွင်း ရာဂျက်စ်သမ်ပြည်နယ် ဂျိုင်ပူရမြို့ရှိ အလယ်ခေတ် Amber ခံတပ်၊ အာဂရာမြို့ရှိ တာ့ဂျ်မဟာ အဆောက်အအုံများသို့ သွားရောက် လည်ပတ်မည်ဖြစ်သည်။

ဗန့်နှင့်အတူ အိန္ဒိယရွှေ့ပြောင်းမိဘများက မွေးဖွားခဲ့သည့် ဇနီးသည် အာရှာ (Usha) နှင့် သားသမီး ၃ ဦးလည်း အိန္ဒိယသို့ လိုက်ပါလာခဲ့သည်။

အမေရိကန် ဒုသမ္မတ ဂျေဒီဗန့်ကို တွေ့ရစဉ်

ဗန့်သည် ရောမမြို့သို့ သွားရောက်ခဲ့ပြီး ဧပြီ ၂၀ ရက်တွင် ပုပ်ရဟန်းမင်းကြီး ဖရန်စစ်(Pope Francis)နှင့် သီးသန့် တွေ့ဆုံခဲ့သည်။

ထို့နောက် ဧပြီ ၂၁ ရက်တွင် နယူးဒေလီ၏  Palam လေဆိပ်သို့ ရောက်ရှိလာခြင်းဖြစ်သည်။

မိုဒီနှင့် ဗန့်တို့သည် ဝါရှင်တန်တွင် မိုဒီက သမ္မတဒေါ်နယ်ထရမ့်(Donald Trump)နှင့် တွေ့ဆုံချိန် ဖေဖော်ဝါရီလ၌  ဖော်ပြထားသော နှစ်နိုင်ငံ လုပ်ငန်းစဉ်များတွင် လုပ်ဆောင်ခဲ့သော တိုးတက်မှုများကို ပြန်လည်သုံးသပ်ရန် မျှော်လင့်ထားသည်။

ထိုလုပ်ငန်းစဉ်များတွင် ၎င်းတို့၏ နှစ်ဘက်ကုန်သွယ်မှု၌ တရားမျှတမှုရှိရေးနှင့် ၎င်းတို့၏ ကာကွယ်ရေးကဏ္ဍမှာ  ဆက်ဆံမှုများ မြင့်တက်နေသည့် အကြောင်းအရာများကိုလည်း ဆွေးနွေးမည်ဖြစ်သည်။

မိုဒီသည် ဒေါ်နယ်ထရမ့် အမေရိကန်နိုင်ငံ၏ သမ္မတအဖြစ် တာဝန်ထမ်းဆောင်ခဲ့ပြီးနောက် ထရမ့်နှင့်တွေ့ဆုံ ခဲ့သော ပထမဆုံး ကမ္ဘာ့ခေါင်းဆောင်များတွင် အပါအဝင် ဖြစ်သည်။

အိန္ဒိယနှင့် အမေရိကန်သည် ကုန်သွယ်ရေး သဘောတူညီချက် တစ်ခုကို ဆွေးနွေးနေပြီး အိန္ဒိယကမူ ယခုလ အတွင်း ထရမ့်၏ ကုန်သွယ်ခွန်ကောက်ခံမှု ဆိုင်းငံ့ကာလ ရက်ပေါင်း ၉၀ အတွင်း အဆိုပါ သဘောတူညီချက်ကို ရရှိရန် မျှော်မှန်းထားသည်။

ထရမ့်သည် အိန္ဒိယအပေါ် ကုန်သွယ်ခွန် ၂၆ ရာခိုင်နှုန်း တိုးမြှင့်ခဲ့ခြင်းဖြစ်သည်။

Source: ရိုက်တာ

CNI International News

ဒါကာ ၊ ဧပြီ ၁၁

အမေရိကန်သမ္မတ ဒေါ်နယ်ထရမ့် (Donald Trump)သည် ၂၀၂၅ ခုနှစ် ဧပြီတွင် ဘင်္ဂလားဒေ့ရှ်မှ အမေရိကန်သို့ တင်ပို့သည့် ပို့ကုန်များအပေါ် အခွန် ၃၇ ရာခိုင်နှုန်း တိုးမြှင့်ခဲ့သဖြင့် ဘင်္ဂလားဒေ့ရှ်၏ အထည်ချုပ်လုပ်ငန်းအပေါ် ခြိမ်းခြောက်မှုများ ရှိလာခဲ့ကြောင်း Nikkei Asia မှ ဖော်ပြခဲ့သည်။

ထရမ့်သည် ဘင်္ဂလားဒေ့ရှ်၏ ပို့ကုန်များကို ပုံမှန်ကောက်ခံနေကြ ကုန်သွယ်ခွန် ၁၅ ရာခိုင်နှုန်းထက်ပိုပြီး ၃၇ ရာခိုင်နှုန်းအထိ တိုးမြှင့်ခဲ့ခြင်းဖြစ်သည်။

ထရမ့်သည် အမေရိကန်လုပ်ငန်းများကို ကာကွယ်ရန် ရည်ရွယ်ချက်ဖြင့် ကုန်သွယ်ခွန်များ တိုးမြှင့်ကောက်ခံခဲ့ခြင်း ဖြစ်သော်လည်း ၎င်း၏ အစီအစဉ်သည် ဘင်္ဂလားဒေ့ရှ်၏ စီးပွားရေး၊ အထူးသဖြင့် အထည်ချုပ်လုပ်ငန်းကို ကြီးမား စွာ သက်ရောက်စေခဲ့သည်။

ဘင်္ဂလားဒေ့ရှ် ဈေးတန်းကိုတွေ့ရစဉ်

ဘင်္ဂလားဒေ့ရှ်နိုင်ငံ၏ ဒေါ်လာ ၂၅ ဘီလျံ တန်ဖိုးရှိသည့် နှစ်စဉ်ပို့ကုန် စုစုပေါင်း၏ ၈၀ ရာခိုင်နှုန်းသည် အထည်ချုပ်လုပ်ငန်းကဏ္ဍမှ ဖြစ်သည်။

လက်ရှိတွင် ဘင်္ဂလားဒေ့ရှ် ကြားဖြတ်အစိုးရအဖွဲ့အကြီးအကဲ မိုဟာမက်ယူနွတ် (Muhammad Yunus) သည် ဘင်္ဂလားဒေ့ရှ် ပို့ကုန်များအပေါ် ကုန်သွယ်ခွန် တိုးမြှင့်ကောက်ခံမှုအား ၃ လကြာ ဆိုင်းငံ့ပေးရန် အမေရိကန်ကို တရားဝင် တောင်းဆိုထားသည်။

အမေရိကန်ထံမှ သဘာဝဓာတ်ငွေ့ရည်နှင့် စိုက်ပျိုးရေးထွက်ကုန်များ ဝယ်ယူရန် သဘောတူညီချက်များ အပါအဝင် အမေရိကန်၏ ကုန်စည်များကို ပိုမိုတိုးမြှင့်ဝယ်ယူမည့် ဘင်္ဂလားဒေ့ရှ်၏ အစီအစဉ်ကို ယူနွတ်က အလေးထားဖော်ပြခဲ့သည်။

ဘင်္ဂလားဒေ့ရှ်၏ အကြီးဆုံး အထည်ချုပ် ပို့ကုန်ဈေးကွက်ဖြစ်သည့် ဥရောပသမဂ္ဂသည် ကုန်သွယ်မှုဆိုင်ရာ အထူးအခွင့်အရေးများနှင့် စီးပွားရေး သက်ရောက်မှုတို့ကို ပေါင်းစပ်ပြီး အခြေအနေကို သုံးသပ်လျက်ရှိသည်။

ဘင်္ဂလားဒေ့ရှ် အထည်ချုပ်စက်ရုံတစ်ခုကိုတွေ့ရစဉ်

ထို့ကြောင့် ထိုအခြေအနေများသည် ဘင်္ဂလားဒေ့ရှ်၏ သန်းနှင့်ချီသည့် အထည်ချုပ် စက်ရုံဝန်ထမ်းများ၏ စားဝတ်နေရေးကို  ခြိမ်းခြောက်လာဖွယ်ရှိသည်ဟု ကျွမ်းကျင်သူများက ပြောကြားခဲ့သည်။

ဘင်္ဂလားဒေ့ရှ် အထည်ချုပ် လုပ်သားအများစု၏ တစ်လ လုပ်ခလစာသည် ၁၀၄ ဒေါ်လာသာရှိသည်။

ထိုအခြေအနေမျိုးတွင် ကုန်သွယ်ခွန်များ မြင့်တက်မှုကြောင့် အမေရိကန် ဝယ်သူများက ဘင်္ဂလားဒေ့ရှ်ထံမှ အဝတ်အထည်များ အော်ဒါမှာယူမှုကို လျှော့ချလိုက်မည်ဆိုပါက ဘင်္ဂလားဒေ့ရှ် အထည်ချုပ်စက်ရုံများ ပိတ်ရ မည်ဖြစ်ပြီး အလုပ်အကိုင်များ ဆုံးရှုံးရဖွယ်ရှိသည်။

ဘင်္ဂလားဒေ့ရှ် အာဏာပိုင်များ အနေဖြင့်လည်း အမေရိကန်၏ ကုန်သွယ်ခွန် တိုးမြှင့်မှုနှင့် ဥရောပသမဂ္ဂနှင့် ကုန်သွယ်ရေး အခြေအနေတို့ကို မည်သို့ တုန့်ပြန်မည်ဆိုခြင်းကို ပြည်သူများက စောင့်ကြည့်နေကြသည်။

Source: Nikkei Asia

CNI International News

မွမ်ဘိုင်း၊ ဧပြီ ၁၀

အိန္ဒိယသည် အမေရိကန်၏ ကုန်သွယ်ခွန် တိုးမြှင့်ကောက်ခံမှုကြောင့် ရုန်းကန်နေရသည့် စီးပွားရေးကို မြှင့်တင်ရန် ကြိုးပမ်းနေချိန်တွင် အိန္ဒိယဗဟိုဘဏ်(RBI)က ကာလတို ချေးငွေများအတွက် အတိုးနှုန်းကို ဒုတိယအကြိမ်မြောက် လျှော့ချပေးခဲ့သည်ဟု ရိုက်တာမှ ဖော်ပြခဲ့သည်။

ထို့ပြင် နောက်ထပ် အတိုးနှုန်းများ ထပ်မံလျှော့ချဖွယ်ရှိသည့် ငွေကြေးမူဝါဒကိုလည်း ပြောင်းလဲခဲ့သည်။

အမေရိကန်၏ ကုန်သွယ်ခွန် ကောက်ခံမှုများ ကြေညာခဲ့ပြီးနောက် နယူးဇီလန် ဗဟိုဘဏ်သည် အတိုးနှုန်းများကို လျှော့ချခဲ့သည်။ 

ထို့နောက် အိန္ဒိယဗဟိုဘဏ်ကလည်း အတိုးနှုန်းကို လျှော့ချသည့် ဒုတိယမြောက် ဗဟိုဘဏ်တစ်ခု ဖြစ်လာခဲ့ သည်။

အမေရိကန်၏ ကုန်သွယ်ခွန် ကောက်ခံမှုများသည် ကမ္ဘာလုံးဆိုင်ရာ စီးပွားရေးကို နှောင့်နှေးသွားစေနိုင်သည့် အန္တရာယ်ကို မြင့်တက်စေခဲ့သည်။

အိန္ဒိယဗဟိုဘဏ်ကို တွေ့ရစဉ်

စျေးကွက်ပေါ်ထွန်းစ နိုင်ငံများ၏ ဗဟိုဘဏ်များသည် စီးပွားရေးဖွံ့ဖြိုးတိုးတက်မှုကို အထောက်အကူဖြစ်စေရန် အတိုးနှုန်းများကို လျှော့ချမည်လော သို့မဟုတ် အားနည်းနေသည့် ၎င်းတို့၏ နိုင်ငံသုံးငွေကြေး တန်ဖိုးများကို မြင့်တက်စေရန် လုပ်ဆောင်မည်လော အစရှိသည့် အချက်နှစ်ချက်ထဲမှ တစ်ချက်ကို ခက်ခဲစွာ ရွေးချယ်နေရ သည်။

အိန္ဒိယဗဟိုဘဏ်၏ ထိပ်သီးတာဝန်ရှိသူ ၃ ဦးနှင့် ပြင်ပကျွမ်းကျင်သူ ၃ ဦး ပါဝင်သည့် အိန္ဒိယ၏ ငွေကြေးမူဝါ ကော်မတီ (MPC)သည် ကာလတို ချေးငွေများအတွက် အတိုးနှုန်းကို ၆ ရာခိုင်နှုန်းအထိ လျှော့ချပေးခဲ့သည်။

အိန္ဒိယဗဟိုဘဏ်သည် ၂၀၂၀ ပြည့်နှစ် မေလနောက်ပိုင်း ပထမဆုံးအကြိမ်အဖြစ် ၂၀၂၅ ခုနှစ်၊ ဖေဖော်ဝါရီလက အတိုးနှုန်းကို လျှော့ချပေးခဲ့ဖူးသလို ယခုအကြိမ်သည် ဒုတိယအကြိမ် ဖြစ်သည်။

အိန္ဒိယဗဟိုဘဏ်အုပ်ချုပ်ရေးမှူး ဆန်ဂျေး မယ်လ်ဟိုထရာကို တွေ့ရစဉ်

ထို့ပြင် အိန္ဒိယဗဟိုဘဏ်သည် ငွေကြေးဆိုင်ရာမူဝါဒ ရပ်တည်ချက်ကို ဘက်မလိုက် ရပ်တည်ချက်မှ လိုက်လျော ညီထွေ ရပ်တည်ချက်အဖြစ် ပြောင်းလဲခဲ့သည်။

အမေရိကန်က အိန္ဒိယ၏ ပို့ကုန်များအပေါ် အပြန်အလှန် ကုန်သွယ်ခွန် ၂၆ ရာခိုင်နှုန်း ကြေညာခဲ့ခြင်းသည် အိန္ဒိယ၏ စီးပွားရေးကို မရေရာမှုများ ဖြစ်စေခဲ့သော်လည်း သက်ရောက်မှု အတိုင်းအတာအား အတိအကျသိရန် ခက်ခဲကြောင်း ဗဟိုဘဏ်အုပ်ချုပ်ရေးမှူး ဆန်ဂျေး မယ်လ်ဟိုထရာ (Sanjay Malhotra) က ပြောကြားခဲ့သည်။

“စီးပွားရေး ဖွံ့ဖြိုးတိုးတက်မှု ပမာဏဟာ ကျနော်တို့ မျှော်မှန်းထားတာထက် နိမ့်နေခဲ့ပေမယ့် ၂၀၂၄-၂၅ ဘဏ္ဍာရေးနှစ် ပထမနှစ်ဝက်မှာ စီးပွားရေး စွမ်းဆောင်ရည် အားနည်းခဲ့ပြီး တိုးတက်မှု အနည်းငယ်တော့ ရှိခဲ့ပါတယ်”ဟု မယ်လ်ဟိုထရာက ပြောကြားခဲ့သည်။

 Source: ရိုက်တာ

CNI International News

ဘန်ကောက်၊ ဧပြီ ၉

ထိုင်းနိုင်ငံ၏ ခရီးသွားလာရေးအာဏာပိုင်အဖွဲ့ (TAT) သည် အမေရိကန် အကောက်ခွန် မူဝါဒအသစ်၏ သက်ရောက်မှု အခြေအနေကို စောင့်ကြည့်နေပြီး ဆမူအီ (Samui) ကျွန်းမှ ခရီးသွားလုပ်ငန်းများက ခရီးသွား ကဏ္ဍမှ ဝင်ငွေများ ဆုံးရှုံးနိုင်မည့် အရေးကို စိုးရိမ်နေကြသည်ဟု ဘန်ကောက်ပို့စ်မှ ဖော်ပြခဲ့သည်။

ဆမူအီနှင့် ဖူးခက် (Phuket) ကျွန်းများပေါ်၌ ရိုက်ကူးခဲ့သည့် The White Lotus အမည်ရှိ ရုပ်သံဇာတ်လမ်းတွဲ ကြောင့် ဆမူအီကျွန်းသည် ခရီးသွားများအကြား ရေပန်းစားလာခဲ့သော်လည်း ယခုနှစ်တွင် ယခင်နှစ်ကလောက် ဝင်ငွေရရှိဖွယ်မရှိကြောင်း TAT ၏ ဒုဥက္ကဋ္ဌ ရတ်ချာပွန်း ပူလ်ဆာဝါဒီ (Ratchaporn Poolsawadee) က ပြောကြား ခဲ့သည်။

အမေရိကန်၏ ကုန်သွယ်ခွန် ကောက်ခံမှုများကြောင့် အမေရိကန်တွင် စားဝတ်နေရေးအတွက် ကုန်ကျစရိတ် ပိုမို မြင့်တက်လာသဖြင့် အမေရိကန်ပြည်သူများသည် ခရီးသွားရာတွင် သုံးစွဲမည့် ငွေကြေးများအား လိုအပ်သည့် ပစ္စည်းများကို ဝယ်ယူရန်အတွက်သာ သုံးစွဲဖွယ်ရှိသည်ဟု ခိုစမူအီ (Koh Samui) ခရီးသွားအသင်း၏ ဥက္ကဋ္ဌ ဟောင်းဖြစ်သည့် ရတ်ချာပွန်းက ပြောကြားခဲ့သည်။

ဆမူအီ (Samui) ကျွန်းမှ ခရီးသွားတစ်ဦးကိုတွေ့ရစဉ်

အမေရိကန်သမ္မတ ဒေါ်နယ်ထရမ့် (Donald Trump) က အမေရိကန်၏ နိုင်ငံတကာဖွံ့ဖြိုးတိုးတက်ရေး အေဂျင်စီ ဖြစ်သည့် (USAID) ကို ဆိုင်းငံ့လိုက်ခြင်းကြောင့် ထိုင်းနိုင်ငံတွင် ကာလကြာရှည် နေထိုင်သည့် USAID ဝန်ထမ်းများ သည် ထိုင်းမှ ပြန်လည်ထွက်ခွာသွားမှု အပါအဝင် ယခုနှစ်အတွင်း ထိုင်းနိုင်ငံ၏ ခရီးသွားကဏ္ဍသည် ထိခိုက်နစ်နာ မှုများနှင့် ဆက်တိုက် ကြုံတွေ့ခဲ့ရသည်ဟု ၎င်းက ဆိုသည်။

သို့သော်လည်း ထိုင်းနိုင်ငံသည် အခြားနိုင်ငံများနှင့် နှိုင်းယှဉ်ပါက ကုန်ကျစားရိတ် သက်သာစွာဖြင့် ကောင်းမွန်စွာ နေထိုင်နိုင်မည့် နေရာများတွင် အခြေချနေထိုင်လိုသည့် ပြည်ပနိုင်ငံသားများကို ဆွဲဆောင်နိုင်လိမ့်မည်ဟု မစ္စတာ ရက်ချာပွန်းက ပြောသည်။

ကုန်သွယ်ခွန်များ မြင့်မားခြင်းကြောင့် အမေရိကန်တွင် စားဝတ်နေရေးအတွက် ကုန်ကျစရိတ်များ ပိုမို မြင့်တက်လာနိုင်သဖြင့် ပြည်ပနိုင်ငံများသို့ ခရီးထွက်ရန် ပြင်ဆင်နေသည့် ခရီးသွားများအပေါ် သက်ရောက်မှု ရှိနေသည်ဟုလည်း TAT က ပြောကြားခဲ့သည်။

ဆမူအီ (Samui) ကျွန်းမှ ခရီးသွားတစ်ဦးကိုတွေ့ရစဉ်

မတ်လ ၃၁ ရက်အထိ ထိုင်းနိုင်ငံသို့ လာရောက်သည့် အမေရိကန် ခရီးသွား အရေအတွက်သည် ၃၂၀,၆၃၁ ဦးရှိပြီး ပြီးခဲ့သည့် နှစ်ကထက် ၁၄ ဒသမ ၄ ရာခိုင်နှုန်း မြင့်တက်ခဲ့ကြောင်း သိရသည်။

၂၀၂၄ ခုနှစ်က ထိုင်းနိုင်ငံသို့ လာရောက်သည့် အမေရိကန် ခရီးသွား အရေအတွက် ၁ ဒသမ ၀၃ သန်းကျော်ရှိခဲ့ပြီး ထိုအရေအတွက်သည် စံချိန်တင် အများဆုံးဖြစ်ခဲ့သည်။

လက်ရှိတွင် အမေရိကန်ရှိ TAT ရုံးခွဲများသည် လာမည့်လ အနည်းငယ်အတွင်း စျေးကွက်များ၏ အခြေအနေကို ခန့်မှန်းရန်အတွက် ခရီးသွားများ၏ သဘောထားများကို လေ့လာစောင့်ကြည့်နေသည်။

Source: ဘန်ကောက်ပို့စ်

CNI International News

ဘန်ကောက်၊ ဧပြီ ၇

ထိုင်းဝန်ကြီးချုပ် ပေတုန်တန် (Paetongtarn Shinawatra)က အစိုးရအနေဖြင့် လတ်တလော ငလျင်ဘေးနှင့် အမေရိကန်ကုန်သွယ်ရေး မူဝါဒများ၏ သက်ရောက်မှုများကို လျော့ပါးသက်သာစေရန် အတတ်နိုင်ဆုံး ဆောင်ရွက်သွားမည်ဟု ထိုင်းပြည်သူများကို အာမခံပြောကြားခဲ့ကြောင်း The Nation မှ ဖော်ပြခဲ့သည်။

လက်ရှိတွင် ထိုင်းနိုင်ငံသည် မတ်လ ၂၈ ရက်က လှုပ်ခတ်ခဲ့သော ငလျင်ဘေးနှင့် ထိုင်းကုန်ပစ္စည်းများအပေါ် အပြန်အလှန် အကောက်ခွန် ၃၇ ရာခိုင်နှုန်း ကောက်ခံမည်ဆိုသည့် အမေရိကန်၏ ကြေညာချက် အပါအဝင် မကြုံစဖူး စိန်ခေါ်မှုများနှင့် ရင်ဆိုင်နေရသည်ဟု ပေတုန်တန်က ပြောကြားခဲ့သည်။

လူ့အသက်များနှင့် အိုးအိမ် အဆောက်အအုံများကို သိသိသာသာ ပျက်စီးစေခဲ့သော ငလျင်နှင့်ပတ်သက်ပြီး အစိုးရ အနေဖြင့် ငလျင်ဒဏ်သင့် ပြည်သူများ၏ ဒုက္ခကို လျော့ပါးသက်သာစေရန် တတ်နိုင်သမျှ အားလုံးဆောင်ရွက် ပေးမည်ဟု ပေတုန်တန်က ကတိပြုခဲ့သည်။

အမေရိကန်သမ္မတ ဒေါ်နယ်ထရမ့်က အခွန်တိုးကောက်မည့် နိုင်ငံများကို ကြေညာနေစဉ်

“ကျမတို့တွေ အရင်တုန်းက နိုင်ငံနဲ့ပတ်သက်ပြီး အကျပ်အတည်းတွေ အတော်များများကို ကျော်လွှားခဲ့ပါတယ်။ ကျမတို့ ပြည်သူတွေရဲ့ စည်းလုံးညီညွတ်မှု၊ ကူညီထောက်ပံ့မှုနဲ့ သနားကြင်နာမှုတွေနဲ့အတူ ဒီအကျပ်အတည်း ကိုလည်း ကျော်လွှားနိုင်လိမ့်မယ်လို့ ယုံကြည်ပါတယ်”ဟု ပေတုန်တန်က ပြောကြားခဲ့သည်။

အမေရိကန်ကုန် သွယ်ရေး မူဝါဒများနှင့်ပတ်သက်ပြီး အခြားနိုင်ငံ အများအပြားကလည်း အလားတူ အခြေအနေ မျိုးနှင့် ရင်ဆိုင်နေရကာ သက်ရောက်မှုများကို လျော့နည်းစေရန် စီမံချက်များ လုပ်ဆောင်နေကြောင်း ပေတုန်တန် က ဆိုသည်။

အမေရိကန်အစိုးရနှင့် စေ့စပ်ဆွေးနွေးရန် နိုင်ငံအများအပြားက စီစဉ်နေကြကြောင်း၊ အမေရိကန်၏ မူဝါဒများ သည် ထိုင်းပို့ကုန်များ အထူးသဖြင့် လျှပ်စစ်ပစ္စည်း၊ ပြုပြင်ထားသော အစားအစာများနှင့် လယ်ယာထွက်ကုန်များ အပေါ် သက်ရောက်မှု ရှိမည်ဖြစ်ကြောင်း သူမက ပြောကြားခဲ့သည်။

ထိုင်းဝန်ကြီးချုပ် ပေတုန်တန်ကို တွေ့ရစဉ်

ထိုင်းအစိုးရသည် ထိုင်းပို့ကုန်များအပေါ် ကုန်သွယ်မှု မူဝါဒများ၏ အကျိုးသက်ရောက်မှုများကို လျှော့ချရန် နည်းလမ်းများ အဆိုပြုရန်အတွက် ပုဂ္ဂလိကကဏ္ဍနှင့် အမေရိကန် ကိုယ်စားလှယ်များနှင့် ဆွေးနွေးရန် ဇန်နဝါရီ ၆ ရက်တွင် လုပ်ငန်းတာဝန်အဖွဲ့တစ်ဖွဲ့ကို ဖွဲ့စည်းခဲ့ကြောင်း ပေတုန်တန်က မှတ်ချက်ပြုခဲ့သည်။

လာမည့် သီတင်းပတ်တွင် ဘဏ္ဍာရေးဝန်ကြီး ပီချိုင်းချွန်ဟာဗာဂျီရာ(Pichai Chunhavajira)သည်  အမေရိကန်၏ ကုန်သွယ်မှု မူဝါဒတွင် သိသာထင်ရှားသော အပြောင်းအလဲများနှင့် ပတ်သက်ပြီး အစိုးရအဖွဲ့အစည်းများ၊ ပုဂ္ဂလိက ကဏ္ဍနှင့် အခြားသက်ဆိုင်သူများ အပါအဝင် အကြောင်းအရာ အများအပြားကို ဆွေးနွေးရန် အမေရိကန်သို့ သွားရောက်မည်ဖြစ်သည်။

“ထိုင်းနိုင်ငံဟာ ပို့ကုန်တင်ပို့သူ တစ်ဦးဖြစ်ရုံသာမကဘဲ ယုံကြည်စိတ်ချရပြီး ကာလကြာရှည် စီးပွားရေး မိတ်ဖက် ဖြစ်တယ်ဆိုတာ အမေရိကန်မိတ်ဖက်တွေ ရှင်းရှင်းလင်းလင်း သိသွားအောင် ဆောင်ရွက်သွားမှာပါ” ပေတုန်တန် က ပြောကြားခဲ့သည်။

ထို့ပြင် ထိုင်းနိုင်ငံသည် အမေရိကန်တွင် ထိုင်းရင်းနှီးမြှုပ်နှံမှုကို မြှင့်တင်ရန်နှင့် သွင်းကုန် အတားအဆီးများကို လျှော့ချရန် ကြိုးပမ်းသွားမည်ဖြစ်ကြောင်းလည်း ပေတုန်တန်က ပြောကြားခဲ့သည်။

Source: The Nation

CNI International News

ကွာလာလမ်ပူ၊ ဧပြီ ၇

လက်ရှိ အာဆီယံဥက္ကဋ္ဌဖြစ်သည့် မလေးရှားဝန်ကြီးချုပ် အန်ဝါ အီဘရာဟင် (Anwar Ibrahim) သည် အမေရိကန်၏ အခွန်တိုးကောက်မှုနှင့်ပတ်သက်ပြီး အဖွဲ့ဝင် ၅ နိုင်ငံဖြင့် ဆွေးနွေးခဲ့ကြောင်း The Nation မှ ဖော်ပြခဲ့သည်။

အာဆီယံဥက္ကဋ္ဌ မလေးရှား ဝန်ကြီးချုပ် အန်ဝါသည် အင်ဒိုနီးရှား၊ ဖိလစ်ပိုင်၊ ဘရူနိုင်း၊ စင်္ကာပူနိုင်ငံ၊ မလေးရှားတို့၏ ခေါင်းဆောင်များဖြင့် ဆွေးနွေးခဲ့ကြောင်း မတ်လ ၅ ရက်က ၎င်း၏ Facebook page တွင် တင်ခဲ့သည်။

အမေရိကန်ပြည်ထောင်စု၏ အပြန်အလှန် အကောက်ခွန်ဆိုင်ရာ အစီအမံများကို ပူးတွဲတုန့်ပြန်ရေးအတွက် အမြင်ချင်းဖလှယ်ရန် ရည်ရွယ်ပြီး ဖုန်းဆက်သွယ် ဆွေးနွေးခဲ့ခြင်း ဖြစ်သည်ဟု ဆိုသည်။

ဒေါ်နယ်ထရမ့် အခွန်တိုးကောက်မည့် နိုင်ငံစာရင်းကို ကြေညာစဉ်

အာဆီယံဥက္ကဋ္ဌ နေရာကို ရရှိထားသည့် မလေးရှားသည် အာဆီယံ-အမေရိကန် ဆွေးနွေးပွဲများ အပါအဝင် နိုင်ငံတကာ ကုန်သွယ်ရေး စေ့စပ်ညှိနှိုင်းမှုတွင် တရားမျှတမှုနှင့် တန်းတူညီမျှမှုဆိုင်ရာ အခြေခံမူများ ချမှတ်ရန် အဖွဲ့ဝင်နိုင်ငံများအကြား သဘောတူညီမှုရရှိရန် ကြိုးပမ်းလျက်ရှိသည်။

လာမည့် သီတင်းပတ်တွင် ပြုလုပ်ရန် စီစဉ်ထားသည့် အာဆီယံ စီးပွားရေးဝန်ကြီးများ အစည်းအဝေးတွင် ထိုကိစ္စ နှင့်ပတ်သက်ပြီး ဆွေးနွေးသွားမည်ဖြစ်သည်။

ထို့‌နောက် အဖွဲ့ဝင် နိုင်ငံအားလုံးအတွက် အကောင်းဆုံး ဖြေရှင်းနည်းများကို ရှာဖွေသွားမည် ဖြစ်ကြောင်း အန်ဝါက ပြောကြားခဲ့သည်။ 

ဧပြီ ၅ ရက်က အမေရိကန်သမ္မတ ဒေါ်နယ်ထရမ့် (Donald Trump) သည်  နိုင်ငံအသီးသီးမှ တင်သွင်းလာသော ကုန်ပစ္စည်းများအပေါ် အပြန်အလှန် စည်းကြပ်ခွန် အသစ်များ ကောက်ခံမည်ဟု ကြေညာပြီးနောက် အရှေ့တောင် အာရှနိုင်ငံများသည် ကြီးလေးသော အကောက်ခွန် နှုန်းထားများနှင့် ရင်ဆိုင်နေရသည်။

အာဆီယံအလှည့်ကျဥက္ကဋ္ဌနဲ့ အဖွဲ့ဝင်နိုင်ငံများမှ ခေါင်းဆောင်များကို တွေ့ရစဉ်

မကြာသေးမီက ဗီယက်နမ်နှင့် ကမ္ဘောဒီးယားတို့သည် အမေရိကန်၏ အခွန်တိုးကောက်မည့် အစီအစဉ်ကြောင့် သက်ရောက်မှုများကို လျော့ပါးသက်သာစေရန် အစီအစဉ်များကို အကောင်အထည်ဖော်ပြီး နည်းလမ်းများ ရှာဖွေရန် ကြိုးပမ်းခဲ့ကြသည်။

ထရမ့်ကမူ သူသည် ဗီယက်နမ်သမ္မတ တိုလမ် (To Lam) နှင့် တယ်လီဖုန်းဖြင့် စကားပြောဆိုခဲ့ကြောင်း လူမှုမီဒီယာမှတဆင့် ထုတ်ဖော်ပြောဆိုခဲ့သည်။

အဆိုပါ ဆွေးနွေးမှုများအတွင်း နှစ်နိုင်ငံကုန်သွယ်ရေး သဘောတူညီချက်ကို အကောင်အထည် ဖော်ရန်အတွက် တိုလမ်သည် အမေရိကန်၏ စည်းကြပ်ခွန်များကို လျှော့ချပေးစေလိုကြောင်း ပြောကြားခဲ့သည်ဟု ပြောသည်။

ကမ္ဘောဒီးယားဝန်ကြီးချုပ် ဟွန်မာနက် (Hun Manet) ကလည်း အမေရိကန်ကို ပေးဆောင်ရမည့် အခွန်နှုန်းထား ကို အရေးပေါ် စေ့စပ်ညှိနှိုင်းရန်နှင့် အခွန်တိုးမြှင့် ကောက်ခံမှုကို ဆိုင်းငံ့ပေးထားရန် ထရမ့်အား စာတစ်စောင် ရေးသားပေးပို့ခဲ့သည်။

Source: The Nation

CNI International News

ဘန်ကောက်၊ ဧပြီ ၃

၂၀၂၄ ခုနှစ်အတွင်း အွန်လိုင်းမှ ငွေကြေးလိမ်ညာမှုများကြောင့် ထိုင်းနိုင်ငံ၏ စီးပွားရေးသည် ဘတ် ၆၀ ဘီလီယံ ဆုံးရှုံးခဲ့ပြီး သန်းပေါင်းများစွာသော နိုင်ငံသားများသည် ကျားဖြန့်လုပ်ငန်းများ၏ သားကောင်ဖြစ်ခဲ့ရသည်ဟု The Nation မှ ဖော်ပြခဲ့သည်။

ထိုကဲ့သို့ စိုးရိမ်စရာကောင်းသည့် အခြေအနေကြောင့် စီးပွားရေးအပေါ် အကျိုးသက်ရောက်မှုများကို တိုက်ဖျက်ရန် မီဒီယာကျွမ်းကျင် တတ်မြောက်မှုနှင့် အချက်အလက်များကို အမှား/အမှန် စစ်ဆေးသည့် အစီအစဉ်များ အားကောင်းလာစေရန် ရည်ရွယ်ပြီး နိုင်ငံတော်အဆင့် ဆွေးနွေးပွဲတစ်ခုကို ပြုလုပ်ခဲ့သည်။

၂၀၂၅ ခုနှစ် နိုင်ငံတကာ အချက်အလက် စစ်ဆေးရေးနေ့ (“International Fact-Checking Day 2025”) ဟု အမည်ပေးထားသည့် ထိုဆွေးနွေးပွဲကို ထိုင်းကျန်းမာရေး မြှင့်တင်ရေးဖောင်ဒေးရှင်း (ThaiHealth) ၊ Cofact Thailand နှင့် မိတ်ဖက်အဖွဲ့ ၂၀ ပေါင်းစည်းထားသည့် ညွန့်ပေါင်းအဖွဲ့တို့က ဧပြီ ၂ ရက်တွင် ဦးစီးကျင်းပခဲ့သည်။

 Cofact (Thailand) ၏ ပူးတွဲတည်ထောင်သူ ဆူပီညာ ကလန်နာရွန်ကို တွေ့ရစဉ်

ထို့နောက် သတင်းအမှားဖြန့်မှုကို တိုက်ဖျက်ရန် အရေးတကြီး လိုအပ်ကြောင်း အလေးထား ပြောကြားခဲ့ကြသည်။

အမှန်တရားအတွက် တိုက်ပွဲ- သတင်းအချက်အလက် ဂုဏ်သိက္ခာ တည်တံ့ခိုင်မြဲရေးခေတ်တွင် သံသယတိုက်ပွဲ (“The Battle for Truth: The Battle of Distrust in the Age of Integrity in the Information Integrity” ) ဟူသည့် ခေါင်းစဉ်ဖြင့် ပြုလုပ်သည့် ထိုဆွေးနွေးပွဲတွင် ပြီးခဲ့သည့်နှစ်အတွင်း ထိုင်းနိုင်ငံသားများအား လိမ်ညာ သည့် ဖုန်းခေါ်ဆိုမှုပေါင်း ၃၈ သန်းနှင့် လိမ်ညာပြီးပို့သည့် မက်ဆေ့ချ်အစောင်ရေ သန်း ၁၃၀ ရှိခဲ့ကြောင်း ထုတ်ဖော်ပြောဆိုခဲ့သည်။

ထိုပမာဏသည် ၅ နှစ်အတွင်း အများဆုံး အရေအတွက်ဖြစ်ခဲ့သည်။

ထိုကဲ့သို့ လိမ်လည်မှုများသည် စီးပွားရေးအပေါ် ဂယက်ရိုက်ခတ်ခဲ့ပြီး အများပြည်သူ၏ ယုံကြည်မှုကို ပျက်ပြား စေရုံသာမက စီးပွားရေးကိုပါ ဆိုးရွားစွာ ထိခိုက်စေနိုင်ကြောင်း Cofact (Thailand) ၏ ပူးတွဲတည်ထောင်သူ ဆူပီညာ ကလန်နာရွန် (Supinya Klangnarong) က ပြောကြားခဲ့သည်။

 အွန်လိုင်းသုံးနေကြတဲ့ ထိုင်းပြည်သူများကို တွေ့ရစဉ်

ထိုအခြေအနေကို တန်ပြန်ရန်အတွက် Cofact Thailand သည် ThaiHealth နှင့် မီဒီယာအဖွဲ့အစည်း ၁၁ ခုတို့ဖြင့်  ပူးပေါင်းပြီး သတင်းမှားများကို တိုက်ဖျက်သည့် ကြိုးပမ်းအားထုတ်မှုများအား အရှိန်မြှင့်တင်နေကြောင်း ၎င်းက ဆိုသည်။

လက်ရှိ လုပ်ဆောင်နေသည့် အစီအစဉ်များထဲတွင် သတင်းအမှားများအတွက် အလှူငွေ ကောက်ခံသည့် လှုပ်ရှားမှုလည်း ပါဝင်သည်။

ထိုလုပ်ရှားမှုသည် သတင်းအချက်အလက် အမှားများကို ခွဲခြမ်းစိတ်ဖြာ၊ စစ်ဆေး အတည်ပြုရန်နှင့် အချက်အလက် စစ်ဆေးခြင်းတွင် တက်ကြွစွာ ပါဝင်ဆောင်ရွက်သော သတင်းသမားများနှင့် content creator များအတွက် ဆုများချီးမြှင့်ရန် ရည်ရွယ်ထားသည်။

သတင်းအမှားများနှင့် လိုရာဆွဲပြီး ပုံဖျက်ထားသည့် သတင်းများ လျင်မြန်စွာ ပျံ့နှံ့နေခြင်းသည် လူမှုတည်ငြိမ်ရေး နှင့် စီးပွားရေး ဖွံ့ဖြိုးတိုးတက်မှုတို့ကို သိသာစွာ ခြိမ်းခြောက်လာကြောင်း ThaiHealth ၏ လက်ထောက်မန်နေဂျာ ဘန်ဂျမာပွန် လင်ပီဆာသီယန် (Benjamaporn Limpisathian) က သတိပေးခဲ့သည်။

၂၀၂၄ ခုနှစ်၏ ပထမသုံးလပတ် ကာလအတွင်း အွန်လိုင်းပေါ်မှ လိမ်လည်မှုပေါင်း ၄၀၀,၀၀၀ ကျော်ရှိခဲ့ပြီး ဘတ် ၆၀ ဘီလီယံ ဆုံးရှုံးခဲ့ကြောင်း  ထိုင်းတော်ဝင်ရဲတပ်ဖွဲ့ (RTP) က ထုတ်ပြန်ခဲ့သည်။

Source: The Nation