CNI International News

ပေကျင်း၊ နိုဝင်ဘာ ၆

စီးပွားရေးပြုပြင်ပြောင်းလဲမှုများ၏ အရှိန်အဟုန်နှင့်ပတ်သက်ပြီး စိတ်ရှည်ရှည်ထားကြရန် တရုတ်သမ္မတ ရှီကျင့်ဖျင် (Xi Jinping) က ပြည်နယ်ဆိုင်ရာ ခေါင်းဆောင်များကို တိုက်တွန်းခဲ့သည်ဟု South China Morning Post မှ ဖော်ပြခဲ့သည်။

ထို့ပြင် ပြဿနာများကို ဖြေရှင်းရာတွင်လည်း အလျင်စလို လုပ်ဆောင်ခြင်းမပြုရန် ရှီက သတိပေးခဲ့သည်ဟု အာဏာရ ကွန်မြူနစ်ပါတီ၏ People’s Daily သတင်းစာက ဖော်ပြခဲ့သည်။

နိုင်ငံတော်အဆင့် စျေးကွက်ကို တိုးတက်ကောင်းမွန်စေရန် သက်ဆိုင်ရာပြည်နယ် တစ်ခုချင်းစီအလိုက် ရင်းနှီး မြှုပ်နှံမှုများအတွက် အဟန့်အတားများအား ဖယ်ရှားရန်လည်း ရှီက တိုက်တွန်းခဲ့သည်။

ပြုပြင်ပြောင်းလဲမှုသည် တစ်ဆင့်ချင်းစီ ပြုလုပ်ရသည့် လုပ်ငန်းစဉ်ဖြစ်ပြီး ချက်ချင်း အောင်မြင်လိမ့်မည် မဟုတ် ကြောင်း ရှီက ပြီးခဲ့သည့် သီတင်းပတ်တွင် ပြုလုပ်ခဲ့သည့် အာဏာရပါတီ၏ စီးပွားရေးဦးတည်ချက်ဆိုင်ရာ အစည်းအဝေးတွင် အရာရှိများကို ပြောကြားခဲ့သည်။

ယခုသီတင်းပတ်အတွင်း ဒေသန္တရအစိုးရ၏ ကြွေးမြီသဘောတူညီချက် ဥပဒေမူကြမ်း ထုတ်ပြန်ရေး၊ စီးပွားရေး ဖွံ့ဖြိုးတိုးတက်မှုကို မြှင့်တင်ရေးနှင့် ကာလတို စီးပွားရေး ထိခိုက်နစ်နာမှုများအား ဖြေရှင်းမည့် ဘဏ္ဍာရေး မူဝါဒ အစီအစဉ်များကို ဆွေးနွေးခဲ့သည့် ထိုအစည်းအဝေးကို စီးပွားရေးလုပ်ငန်းရှင်များက အနီးကပ် စောင့်ကြည့်ခဲ့ကြ သည်။

တရုတ်စက်မှုလုပ်ငန်းတစ်ခုကိုတွေ့ရစဉ်

People’s Daily သတင်းစာတွင်မူ အစည်းအဝေးကို တက်ရောက်ခဲ့သည့် အရာရှိများအား ပြောကြားခဲ့သည့် ရှီ၏ မိန့်ခွန်းအကျဉ်းချုပ်ကို ဖော်ပြခဲ့သလို ရှီ၏ မိန့်ခွန်းအပေါ် အခြေခံသည့် အတွေးအမြင်ကဏ္ဍကိုလည်း ဖော်ပြခဲ့ သည်။

တရုတ်အစိုးရသည် ရုန်းကန်နေရသည့် စီးပွားရေးကို မြှင့်တင်ရန် ရည်ရွယ်ထားသော  ဘဏ္ဍာရေး လှုံ့ဆော်မှု အစီအစဉ်သစ်များအား ထုတ်ပြန်ရန် မျှော်မှန်းထားချိန်တွင် တရုတ်သမ္မတရှီ၏ မှတ်ချက်စကားများ ထွက်ပေါ်ခဲ့ ခြင်းဖြစ်သည်။

အောက်တိုဘာ ၁၈ ရက်က ထုတ်ပြန်ချက်တွင် တရုတ်၏ တတိယ သုံးလပတ်ကာလ စီးပွားရေး ဖွံ့ဖြိုးတိုးတက်မှု နှုန်းသည် ၄ ဒသမ ၆ ရာခိုင်နှုန်းရှိခဲ့ပြီး ထိုနှုန်းထားအရ ပြီးခဲ့သည့်နှစ် အစောပိုင်းမှစပြီး အနိမ့်ဆုံးနှုန်းထား ဖြစ်ခဲ့ သည်။

ထို့ကြောင့် ယခုနှစ်အတွက် စီးပွားရေး ဖွံ့ဖြိုးတိုးတက်မှုနှုန်းကို ၅ ရာခိုင်နှုန်းအထိ ရှိစေရန် မျှော်မှန်းထားသည့် ခန့်မှန်းနှုန်းထား ပြည့်မီနိုင်ခြေ ရှိ/မရှိ စိုးရိမ်စိတ်များ ထွက်ပေါ်ခဲ့သည်။

Source: South China Morning Post

CNI International News

ဘန်ကောက်၊ နိုဝင်ဘာ ၅

ထိုင်းအလုပ်သမားရေးဝန်ကြီးဌာနသည် စင်္ကာပူနိုင်ငံသို့ ထိုင်းလုပ်သားများ ပိုမို စေလွှတ်ရန် ရည်ရွယ်ထား ကြောင်း ဘန်ကောက်ပို့စ်မှ ဖော်ပြခဲ့သည်။

အထူးသဖြင့် သင်္ဘောကျင်းနှင့်သက်ဆိုင်သည့် လုပ်ငန်းများတွင် လုပ်သားများကို စေလွှတ်လိမ့်မည်ဟု ထိုင်းအလုပ်သမားရေးဝန်ကြီးဌာနက ပြောသည်။

ထိုင်းအလုပ်သမားရေးဝန်ကြီး  ဖီဖက်(Phiphat Ratchakitprakarn) က သူသည် ပြီးခဲ့သည့် သီတင်းပတ်ကုန် အတွင်း ဝန်ကြီးဌာန အမြဲတမ်းအတွင်းဝန် ဘွန်ဆောင် ( Boonsong Thapchaiyuth) နှင့်အတူ စင်္ကာပူနိုင်ငံသို့ သွားရောက်ခဲ့သည်။

ထိုခရီးစဉ်တွင် စင်္ကာပူအလုပ်သမားရုံးမှ အရာရှိများ၊ စင်္ကာပူ စီးပွားရေးလုပ်ငန်းရှင်များ၊ စင်္ကာပူနိုင်ငံဆိုင်ရာ ထိုင်းသံအမတ် ယူရီယက် (Ureerat Chareontoh) တို့နှင့် စင်္ကာပူရှိ ထိုင်းသံရုံးတွင် တွေ့ဆုံဆွေးနွေးခဲ့သည်ဟု နိုဝင်ဘာ ၃ ရက်က ပြောကြားခဲ့သည်။

ထိုင်းဂဟေဆော် အလုပ်သမားများကို တွေ့ရစဉ်

စင်္ကာပူတွင် အလုပ်လုပ်နေသည့် ထိုင်းလူမျိုး ၄၀၀၀ နီးပါးရှိပြီး အများစုသည် ဆောက်လုပ်ရေး လုပ်သားများ၊ ကုန်ထုတ်လုပ်ရေး လုပ်သားများ၊ ဂဟေဆော်သူများ၊ လေယာဉ်အမှုထမ်းများ၊ အလုပ်ကြမ်းလုပ်သူများ၊ လျှပ်စစ် ပစ္စည်း ထုတ်လုပ်ရေး လုပ်သားများ၊ ပိုက်ဆက်သမားများနှင့် အထွေထွေ လုပ်သားများဖြစ်သည်ဟု မစ္စတာ ဖီဖက်က ပြောသည်။

"စင်္ကာပူမှာ အဲဒီအလုပ်တွေ လာလုပ်တာက ထိုင်းလုပ်သားတွေရဲ့ ကျွမ်းကျင်မှုကို ပိုမိုတိုးတက်စေပြီး သူတို့ မိသားစုတွေကို ငွေကြေး ပိုမို ထောက်ပံ့ပေးနိုင်ပါတယ်"ဟု ဖီဖက်က ပြောသည်။

ထိုင်းလုပ်သားများကို ပြည်ပနိုင်ငံများသို့ စေလွှတ်ရေးသည် ထိုင်းအလုပ်သမားရေးဝန်ကြီးဌာန၏ အဓိကမူဝါဒ ဖြစ်ပြီး ထိုင်းအစိုးရသည် ပြည်ပတွင် အလုပ်လုပ်ခဲ့သည့် ကျွမ်းကျင်လုပ်သားများကို နိုင်ငံအတွင်းသို့ ပြန်လည် ခေါ်ဆောင်နိုင်ရန် ရည်ရွယ်ထားသည်။

ထိုင်းနိုင်ငံတွင်းက တစ်နေရာကို တွေ့ရစဉ်

"စင်္ကာပူအရာရှိတွေ၊ လုပ်ငန်းရှင်တွေနဲ့ ဆွေးနွေးမှုဟာ စင်္ကာပူရဲ့ အလုပ်သမား စျေးကွက်ကို ပိုမိုချဲ့ထွင်ဖို့ အထောက်အကူ ဖြစ်စေပါလိမ့်မယ်" ဟု ဖီဖက်က ပြောကြားခဲ့သည်။

စင်္ကာပူသည် သင်္ဘောများ တည်ဆောက်သည့် ကဏ္ဍတွင် ဂဟေဆော်သူများကို လိုအပ်နေပြီး လျှပ်စစ်ပစ္စည်းများ ထုတ်လုပ်သည့်ကဏ္ဍ၌ ကျွမ်းကျင် လုပ်သားများနှင့် ဆောက်လုပ်ရေးကဏ္ဍမှာ အတွေ့အကြုံရှိသည့် လုပ်သားများ ကို လိုအပ်နေသည်ဟု ၎င်းက ဆိုသည်။

"များပြားတဲ့ ပရောဂျက်တွေ၊ အထူးသဖြင့် သင်္ဘောကျင်းကဏ္ဍကို ချဲ့ထွင်ဖို့အတွက် စင်္ကာပူမှာ လုပ်သားလိုအပ် ချက် ကြီးမားနေပါတယ်" ဟု ဖီဖက်က ဆိုသည်။

သင်္ဘောကျင်းကဏ္ဍတွင် သင်္ဘောတည်ဆောက်ခြင်း၊ ပြုပြင်ခြင်း၊ အထွေထွေလုပ်သား၊ ဆေးသုတ်သမားများ အစရှိသည့် အလုပ်နေရာများကို လုပ်ကိုင်နိုင်သည်ဟု ၎င်းက ပြောကြားခဲ့သည်။

Source: ဘန်ကောက်ပို့စ်

CNI International News

တိုကျို၊ နိုဝင်ဘာ ၂

အောက်တိုဘာလအတွင်း အာရှ၏ ကုန်ထုတ်လုပ်မှုကဏ္ဍသည် တုံ့ဆိုင်းနေခဲ့ကာ တရုတ်၏ စီးပွားရေး နာလန်ထူမှုသည် အခြားဒေသတွင်း နိုင်ငံများအပေါ် ကောင်းကျိုးသက်ရောက်မှု အနည်းငယ်သာရှိခဲ့ကြောင်း ရိုက်တာမှ ဖော်ပြခဲ့သည်။

ယခုသီတင်းပတ်အတွင်း အာရှ၏ ကုန်ထုတ်လုပ်မှုကဏ္ဍ တုံ့ဆိုင်းမှုသည် အမေရိကန်နှင့် တရုတ်အကြား ကုန်သွယ်ရေး တင်းမာမှုများ ဖြစ်ပွားလာနိုင်သည့် အခြေအနေအပေါ် ပြင်ဆင်နေသော မူဝါဒချမှတ်သူများအတွက် စိန်ခေါ်မှုအသစ်များ ဖြစ်လာခဲ့သည်။

ကုန်သွယ်ရေးကဏ္ဍတွင် ကျစ်ကျစ်လစ်လစ်မရှိဘဲ ပြန့်ကြဲနေမှု၊ တရုတ်၏ အိမ်ခြံမြေပြဿနာနှင့် စျေးကွက် မတည်ငြိမ်မှုတို့ကြောင့် အာရှ၏ စီးပွားရေးသည် အန္တရာယ်ကြီးမားကြောင်း နိုင်ငံတကာငွေကြေးရန်ပုံငွေအဖွဲ့ (IMF) က သတိပေးခဲ့သည်။

ပြည်တွင်း ဝယ်လိုအား ကျဆင်းမှုကြောင့် ဂျပန်နှင့် တောင်ကိုရီးယား၏ ကုန်ထုတ်လုပ်ရေးကဏ္ဍ ကျဆင်းနေကာ အမေရိကန်၊ ဥရောပနှင့် တရုတ်၏ စီးပွားရေးများ နှေးကွေးနေကြောင်း ကုန်စည်ဝယ်ယူရေး မန်နေဂျာများ၏ ညွှန်းကိန်း (PMI) တွင် ဖော်ပြထားသည်။

အပြုသဘောဆောင်သည့် တစ်ချက်မှာ တရုတ်အစိုးရ၏ မကြာသေးမီက စီးပွားရေး လှုံ့ဆော်မှု အစီအစဉ်များ ကြောင့် တရုတ်၏ ကုန်ထုတ်လုပ်ရေး လှုပ်ရှားမှုများသည် အောက်တိုဘာလအတွင်း မြင့်တက်ခဲ့သည်။

စက်မှုလုပ်ငန်းတစ်ခုကိုတွေ့ရစဉ်

Caixin/S&P Global ကုန်ထုတ်လုပ်ရေး PMI သည် စက်တင်ဘလတွင် ၄၉ ဒသမ ၃ ရာခိုင်နှုန်းရှိခဲ့ရာမှ အောက်တိုဘာလအတွင်း ၅၀ ဒသမ ၃ ရာခိုင်နှုန်းအထိ မြင့်တက်ခဲ့သည်။

ထိုကဲ့သို့ တိုးတက်မှုများအရ တရုတ်၏ ကုန်ထုတ်လုပ်ရေးကဏ္ဍသည် ဧပြီလနောက်ပိုင်း ပထမဆုံးအကြိမ်အဖြစ် မြင့်တက်လာခြင်းဖြစ်ပြီး ဆက်လက် တည်ငြိမ်နေမည့် လက္ခဏာများကိုလည်း မြင်တွေ့နေရသည်။

သို့သော် IMF ၏ အာရှနှင့် ပစိဖိတ်ဌာနဆိုင်ရာ အကြီးအကဲ ခရစ်ရှ်နာ ဆရီနီဗာဆန် (Krishna Srinivasan) တရုတ်တွင် ငွေတန်ဖိုးကျုံ့သည့် အန္တရာယ်များသည် မြင့်မားနေဆဲဖြစ်ကြောင်း သတိပေးခဲ့ပြီး အိမ်ခြံမြေကဏ္ဍကို ဦးစားပေးလုပ်ဆောင်ရန် တိုက်တွန်းခဲ့သည်။

"တရုတ်ရဲ့ စီးပွားရေး နှေးသွားရင် အာရှရဲ့ စီးပွားရေးလည်း နှေးကွေးသွားမှာပါ" ဟု ၎င်းက ပြောကြားခဲ့သည်။

ထို့နောက် တရုတ်အနေဖြင့် ရင်းနှီးမြှုပ်နှံမှုကဏ္ဍမှ စားသုံးသူကဏ္ဍအပေါ် အာရုံပြောင်းပြီး လုပ်ဆောင်သင့် ကြောင်း ဆရီနီဗာဆန် တိုက်တွန်းခဲ့သည်။

Source: ရိုက်တာ

CNI International News

ဘန်ကောက်၊ နိုဝင်ဘာ ၂

ထိုင်းအစိုးရက ရွှေ့ပြောင်းနေထိုင်သူများနှင့် တိုင်းရင်းသား လူနည်းစုများကို နိုင်ငံသားဖြစ်ခွင့်ပေးမည့် ၎င်း၏ ဆုံးဖြတ်ချက်အား ကာကွယ်ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

ထိုမူဝါဒသည် ဥပဒေနှင့်အညီ လုပ်ဆောင်ခြင်းဖြစ်ကြောင်းလည်း ထိုင်းအစိုးရအဖွဲ့က ပြောကြားခဲ့သည်။

ထိုင်းနိုင်ငံတွင် နှစ်ရှည်နေထိုင်သူများ သို့မဟုတ် ထိုင်း၌ မွေးဖွားခဲ့သည့် ရွှေ့ပြောင်းများနှင့် တိုင်းရင်းသား လူနည်းစုများ စုစုပေါင်း ၄၈၃,၀၀၀ ကျော်ကို ထိုင်းနိုင်ငံသား ဖြစ်ခွင့်ပြုရန် မူဝါဒကို အစိုးရအဖွဲ့က အောက်တိုဘာ ၂၉ ရက်တွင် အတည်ပြုခဲ့ခြင်းဖြစ်သည်။

ရွှေ့ပြောင်းများနှင့် တိုင်းရင်းသား လူနည်းစုများအား အလုပ်လုပ်ခွင့် တားမြစ်ထားသည့်စနစ်ကို ဖယ်ရှားပြီး စီးပွားရေးကို လှုံ့ဆော်ကာ နိုင်ငံသားဖြစ်မှုနှင့် နေထိုင်ခွင့်ဆိုင်ရာ ပြဿနာများက ဖြေရှင်းရန်အတွက် ထိုသို့ ဆုံးဖြတ်ခဲ့ခြင်းဖြစ်သည်ဟု ထိုင်းဝန်ကြီးချုပ် ပေတုန်တန်(Paetongtarn Shinawatra) က ပြောကြားခဲ့သည်။

မည်သို့ပင်ဆိုစေ ဝေဖန်ရေးသမားများကမူ ထိုမူဝါဒကို ဆန့်ကျင်ခဲ့ပြီး ထိုမူဝါဒကြောင့် ရွှေ့ပြောင်း နေထိုင်သူများ အား ထိန်းမနိုင်သိမ်းမရ ဖြစ်စေနိုင်ကြောင်း ပြောကြားခဲ့ကြသည်။

အထက်လွှတ်တော် အမတ်ဟောင်းဖြစ်သည့် ဒီရက်ကရစ် ဂျာနယ်ခရောင်ထန် (Direkrit Janekrongtham) ကမူ ရွှေ့ပြောင်းနေထိုင်သူ ၅၀၀,၀၀၀ နီးပါးသည် ထိုင်းလူမျိုးများကဲ့သို့ တူညီသည့် အခွင့်အရေးနှင့် အကျိုးအမြတ်များ ရရှိလိမ့်မည်ဖြစ်ကြောင်း Facebook တွင် ရေးသားခဲ့သည်။

ထိုင်းအစိုးရအဖွဲ့ကို တွေ့ရစဉ်

ထို့ကြောင့် ရွှေ့ပြောင်းများသည် ထိုင်းအစိုးရကို ကျေးဇူးတင်ပြီး ထိုမူဝါဒအား တွန်းအားပေး ဆောင်ရွက်ခဲ့သည့် ညွှန့်ပေါင်းပါတီများအပေါ် သစ္စာစောင့်သိကြလိမ့်မည်ဟု ဒီရက်ကရစ်က ရေးသားခဲ့သည်။

ယခုအခါတွင် ရွှေ့ပြောင်းများသည် ဒေသန္တရရွေးကောက်ပွဲနှင့် အထွေထွေရွေးကောက်ပွဲများ၌ မဲပေးခွင့်၊ ရွေးကောက်ပွဲ ဝင်ရောက်ယှဉ်ပြိုင်ခွင့်၊ အစိုးရဝန်ထမ်းဖြစ်ခွင့်၊ နိုင်ငံရေးပါတီဝင်ခွင့်၊ နိုင်ငံရေးပါတီ ထူထောင်ခွင့် အစရှိသည့် အခွင့်အရေးများကို ရရှိလာလိမ့်မည်ဖြစ်ကြောင်း ၎င်းက ဆိုသည်။

ထို့ပြင် ရွှေ့ပြောင်းများ အနေဖြင့် မြေနှင့် အဆောက်အအုံ ပိုင်ဆိုင်ခွင့်၊ အလုပ်သမား သမဂ္ဂအဖွဲ့ဝင်များဖြစ်ခွင့်နှင့် အလုပ်သမားသမဂ္ဂ ထူထောင်ခွင့်တို့လည်း ရရှိလိမ့်မည်ဟု ဆိုသည်။

ထိုင်းပြည်ထဲရေးဝန်ကြီးဌာန၏ ပြောရေးဆိုခွင့်ရှိသူ တရိုင်ဆူလီ တိုင်ဆာရန်နာကူလ် (Traisulee Taisaranakul) က ထိုမူဝါဒသည် ထိုင်းနိုင်ငံသားအဖြစ် လျှောက်ထားမှုတွင် အချိန်တိုတိုနှင့် ပိုမိုထိရောက်မှုရှိစေကြောင်း ပြောကြားခဲ့သည်။

ထိုင်းနိုင်ငံသားအဖြစ် လျှောက်ထားခွင့် ရရှိသူ ၄၈၀,၀၀၀ ကျော်အနက် ၃၄၀,၀၀၀ သည် ထိုင်းနိုင်ငံသို့ ၁၉၉၉ ခုနှစ် မတိုင်မီ ဝင်ရောက် နေထိုင်ကြသူများဖြစ်ပြီး ကျန်ရှိသောသူများမှာ ထိုင်းနိုင်ငံတွင် မွေးဖွားကြသူများ ဖြစ်သည်။

Source: ဘန်ကောက်ပို့စ်

CNI International News

ဘရပ်ဆဲလ်၊ အောက်တိုဘာ ၃၁

အောက်တိုဘာ ၂၉ ရက် ညသန်းခေါင် အချိန်မှစပြီး EU က တရုတ်လုပ် လျှပ်စစ်ကားများကို သွင်းကုန်အခွန်များ တိုးမြှင့်ကောက်ခံခဲ့ကြောင်း South China Morning Post မှ ဖော်ပြခဲ့သည်။

တရုတ်လုပ် လျှပ်စစ်ကားများကို ဥရောပသို့ တင်သွင်းမှုနှင့်ပတ်သက်ပြီး ဥရောပသမဂ္ဂ (EU)၏ စုံစမ်းစစ်ဆေး မှုများ ၁ နှစ်အကြာနှင့် ဆွေးနွေးညှိနှိုင်းမှုများ ၄ လကြာ ပြုလုပ်ခဲ့ပြီးနောက် ယခုလို အခွန်တိုးမြှင့် ကောက်ခံခဲ့ခြင်း ဖြစ်သည်။

တရုတ်လုပ် လျှပ်စစ်ကားများကို သွင်းကုန်အခွန် ၃၅ ဒသမ ၃ ရာခိုင်နှုန်းအထိ တိုးမြှင့်ကောက်ခံခဲ့သည့် ဥရောပ ကော်မရှင်ကမူ ထိုအကြောင်းအရာနှင့်ပတ်သက်ပြီး တရုတ်အစိုးရနှင့် ဆွေးနွေးမှုများ ဆက်လက် ပြုလုပ်သွားမည် ဟု ကတိပြုခဲ့သည်။

မည်သို့ပင်ဆိုစေ EU က အသစ်ထုတ်ပြန်ခဲ့သည့် မှတ်တမ်းများတွင် တရုတ်လျှပ်စစ်ကားများ တင်သွင်းမှုနှင့် ပတ်သက်ပြီး ရှည်လျားသော ဆွေးနွေးညှိနှိုင်းမှု လုပ်ငန်းစဉ်ကို ဖော်ပြထားသည်။

စာမျက်နှာ ၂၇၈ မျက်နှာပါရှိသည့် ထိုမှတ်တမ်းများတွင် ဥရောပကော်မရှင်၊ တရုတ်အစိုးရ၊ စီးပွားရေး အသင်းအဖွဲ့ အများအပြား၊ ကားကုမ္ပဏီများ၊ ဘက္ကထရီ ကုမ္ပဏီများအကြား အပြန်အလှန် ဆွေးနွေးညှိနှိုင်းရေး အစီအစဉ်များ ကို ဖော်ပြထားသည်။

လျှပ်စစ်ကားများကို တွေ့ရစဉ်

ဂျာမနီနိုင်ငံ အပါအဝင် EU အဖွဲ့ဝင်နိုင်ငံများ၏ ဖိအားပေးမှုကြောင့် ဥရောပကော်မရှင်သည် တရုတ်ဘက်မှ အခွန်များ ပြန်လည်တိုးမြှင့် ကောက်ခံမည့် အရေးကို လျော့ကျစေရန် တရုတ်သို့ သွားရောက်ပြီး ဆွေးနွေးညှိနှိုင်းမှု များပြုလုပ်ရန် ပြင်ဆင်နေသည်။

သို့သော် EU ကော်မရှင်နှင့် တရုတ်အကြား အနာဂတ်တွင် သွင်းကုန်အပေါ် စည်းကြပ်ကောက်ခံသည့် အခွန်များ နှင့်ပတ်သက်ပြီး သဘောတူညီမှုရရှိရန် ခက်ခဲလိမ့်မည်ဖြစ်ကြောင်း ကျွမ်းကျင်သူများက သုံးသပ်ခဲ့သည်။

"အပြီးသတ် ဆုံးဖြတ်ချက် မချခင်မှာ စောင့်ကြည်ရမှာပါ။ လက်ရှိ အနေအထားကိုကြည့်ပြီး ကောက်ချက်ချလို့ မရသေးပါဘူး။ EU နဲ့ တရုတ် နှစ်ဖက်စလုံးက သူတို့အသာစီးရဖို့ပဲ ကြိုးစားနေကြတာပါ" ဟု အမည်မဖော်လို သည့် ဥရောပသမဂ္ဂထိပ်သီး အရာရှိတစ်ဦးက ပြောကြားခဲ့သည်။

တရုတ်လုပ် လျှပ်စစ်ကားများအပေါ် အခွန်များ တိုးမြှင့်ကောက်ခံမည့်အကြောင်း ဥရောပကော်မရှင်က ဇူလိုင် ၄ ရက်တွင် ကြေညာခဲ့ပြီးနောက် တရုတ်ကုန်သွယ်ရေးဝန်ကြီးဌာန၊ ကုန်သည်ကြီးများအသင်းနှင့် တရုတ်ကား ကုမ္ပဏီများသည် EU ၏ အစီအစဉ်ကို စောဒကတက်ခဲ့ကြသည်။

တရုတ်ကားကုမ္ပဏီများကလည်း ဥရောပသမဂ္ဂ အနေဖြင့် အခြားနိုင်ငံများမှ တင်သွင်းသည့် လျှပ်စစ်ကား များကိုလည်း သွင်းကုန်အခွန်များ အလားတူ ကောက်ခံရန် တောင်းဆိုခဲ့သည်။

Source: SCMP

CNI International News

ရန်ကုန်၊ အောက်တိုဘာ ၂၉

ထိုင်းကုမ္ပဏီများသည် မြန်မာနှင့်ပူးပေါင်း၍ ပြောင်းစိုက်ပျိုးရောင်းချရေး ပြုလုပ်ရန် သဘောတူခဲ့သည်ဟု The Nation မှ ဖော်ပြခဲ့သည်။

ထိုင်းနိုင်ငံ၏ Charoen Pokphand Group (CP) ၊  Charoen Pokphand Produce (CPP) နှင့် Bangkok Produce (BKP) ကုမ္ပဏီတို့သည် တိရစ္ဆာန်များကို ကျွေးမွေးရန်အတွက် CP မှ ထုတ်လုပ်သည့် ပြောင်းဆန်များ အတွက် အရင်းအမြစ်များကို ခြေရာခံနိုင်သော စနစ်တစ်ခုအား အကောင်အထည်ဖော်ရန် မြန်မာနိုင်ငံရှိ မိတ်ဖက် များနှင့်အတူ ပူးပေါင်းခဲ့သည်။

ထိုစနစ်အရ ထောက်ပံ့ရေး ကွင်းဆက်နှင့် ဆက်စပ်နေသည့် ထုတ်လုပ်သူများ၊ မိတ်ဖက်များနှင့် သက်ဆိုင်ရာ အဖွဲ့အစည်းများသည် မြန်မာနိုင်ငံ၏ ပြောင်းစိုက်ပျိုးရေးကဏ္ဍတွင် သိသာထင်ရှားသော အောင်မြင်မှုကို ရရှိစေမည်ဖြစ်သည်။

ထိုစီမံကိန်းကို ကြေညာရန် ရန်ကုန်တွင် ပြုလုပ်ခဲ့သည့် သတင်းစာ ရှင်းလင်းပွဲ၌ သစ်တောပြုန်းတီးမှု သို့မဟုတ် စိုက်ခင်းမီးရှို့မှုများကြောင့် ထိခိုက်ပျက်စီးခဲ့သော နေရာများမှာ စိုက်ပျိုးထားသည့် ပြောင်းဖူးများကို ဝယ်ယူမည် မဟုတ်ကြောင်း ကတိပြုခဲ့သည်။

မြန်မာ-ထိုင်း ပြောင်းစိုက်ပျိုးမှု ဆွေးနွေးပွဲ တက်ရောက်လာသူများကို တွေ့ရစဉ်

Myanmar Corn Traceability Project အမည်ရှိ ခေါင်းစဉ်အောက်တွင် ပြုလုပ်သည့် ထိုပွဲအခမ်းအနားကို မြန်မာနိုင်ငံဆိုင်ရာ ထိုင်းသံအမတ်ကြီး မစ္စတာမွန်းကို(Mr. Mongkol Visittsthumph)၊ ထိုင်းသံရုံး၏ အတိုင်ပင်ခံ ပုဂ္ဂိုလ် (စီးပွားရေး) မစ္စတာသမ်နာပဆစ်သန်(Mr. Akwat Thanaprasitpattan)၊ CP ၏ Feed Ingredients Business စီအီးအို မစ္စတာတီတီ လူကျင်သနန်(Mr. Titi Lujintanon)၊ မြန်မာနိုင်ငံ၏ Integrated Crop Business မှ လုပ်ငန်းလည်ပတ်မှုဆိုင်ရာ အရာရှိချုပ် မစ္စတာဝေါရက်စ်ဆစ် စီသီဝီချန်(Mr. Worrasit Sithiwichai)နှင့် မြန်မာ့ ပြောင်းလုပ်ငန်းအသင်းဥက္ကဋ္ဌ ဦးအေးချမ်းအောင်၊ ရှမ်းပြည်နယ်၊ မန္တလေးတိုင်းနှင့် အခြေားနေရာဒေသများမှ ပြောင်းစိုက်တောင်သူများ အပါအဝင် ဖိတ်ကြားထားသည့် ဧည့်သည်တော်များ တက်ရောက်ခဲ့သည်။

ပွဲအခမ်းအနားကို တက်ရောက်လာသည့် ထိုင်းနှင့်မြန်မာ လုပ်ငန်းရှင်များနှင့်တောင်သူများက ထိုစီမံကိန်းကို ထောက်ခံခဲ့ကြပြီး မြန်မာနိုင်ငံ၏ ပြောင်းစိုက်ပျိုးရေးကဏ္ဍတွင် ပွင့်လင်းမြင်သာမှုနှင့် လူမှုကောင်းကျိုးများကို မြှင့်တင်ရန် ပါဝင်ဆောင်ရွက်လိုသည့် ဆန္ဒရှိကြောင်း ပြသခဲ့ကြသည်။

ပြောင်းစိုက်ခင်းကို တွေ့ရစဉ်

ယခု ပူးပေါင်းဆောင်ရွက်မှုသည် လေထုညစ်ညမ်းမှုကို လျှော့ချရန် ရည်ရွယ်သော ထိုင်းနိုင်ငံ၏ “Clear Sky”  မဟာဗျူဟာကို အထောက်အကူပြုသည့် အရေးကြီးသော ခြေလှမ်းတစ်ခုဖြစ်ပြီး မြန်မာနိုင်ငံ၏ ပြောင်း စိုက်ပျိုးရေးကဏ္ဍကို ပိုမိုတိုးတက်စေနိုင်မည်ဖြစ်ကြောင်း မြန်မာနိုင်ငံဆိုင်ရာ ထိုင်းသံအမတ်ကြီး မစ္စတာမွန်းကို (Mr. Mongkol Visittsthumph) က ပြောကြားခဲ့သည်။

ထို့ပြင် ယခုစီမံကိန်းသည် ထိုင်းနှင့် မြန်မာအကြား နိုင်ငံတကာ ကုန်သွယ်ရေးတွင် ယုံကြည်မှု တည်ဆောက်ရာ၌ အရေးကြီးသည့် ခြေလှမ်းတစ်ရပ်ဖြစ်ကြောင်းလည်း ထိုင်းသံရုံး၏ အတိုင်ပင်ခံပုဂ္ဂိုလ် (စီးပွားရေး)  မစ္စတာ သမ်နာပဆစ်သန်(Mr. Akwat Thanaprasitpattan)က ပြောကြားခဲ့သည်။

Source: The Nation

CNI International News

ပေကျင်း၊ အောက်တိုဘာ ၂၆

တရုတ်သည် အာဖဂန်နစ္စတန်၏ ကျယ်ပြန့်သည့် ဆောက်လုပ်ရေး၊ စွမ်းအင်နှင့် စားသုံးကုန်ကဏ္ဍများအတွက် အကောက်ခွန်မဲ့ ကုန်သွယ်ရေးကို တာလီဘန်အဖွဲ့အား ကမ်းလှမ်းသွားမည်ဟု အာဖဂန်နစ္စတန်နိုင်ငံဆိုင်ရာ တရုတ်သံအမတ် (Zhao Xing) က ပြောကြားခဲ့သည်ဟု ရိုက်တာမှ ဖော်ပြခဲ့သည်။

အာဖဂန်နစ္စတန်နိုင်ငံသည် သဘာဝ သယံဇာတ ပေါဝကြွယ်ဝသည့် နိုင်ငံဖြစ်သော်လည်း သံတမန်ရေးအရ ဖယ်ကြဉ်ခံထားသော တာလီဘန်အစိုးရသည် စျေးကွက်များ ထူထောင်ရန် မျှော်မှန်းထားသည်။

အာဖဂန်တွင် ၂၀၂၁ ခုနှစ်က တာလီဘန်တို့ အာဏာပြန်ရလာခဲ့ချိန်ကတည်းက တရုတ်သည် တာလီဘန်အဖွဲ့နှင့် ဆက်ဆံမှုများပြုလုပ်ရန် ကြိုးပမ်းခဲ့သော်လည်း အခြားနိုင်ငံများကဲ့သို့ပင် တာလီဘန်အဖွဲ့ကို တရားဝင် အသိအမှတ်ပြုခြင်းမရှိခဲ့ပေ။

သို့သော် အာဖဂန်၏ ပေါကြွယ်ဝသည့် သတ္တုအရင်းအမြစ်များသည် တရုတ်၏ ထောက်ပံ့ရေး ကွင်းဆက်လုံခြုံရေး ကို ပိုမိုတိုးတက်စေသည့် အလားအလာတွင်ရှိသည်။

တရုတ်အလံနဲ့ တာလီဘန်အလံကို တွေ့ရစဉ်

အာဖဂန်တွင် တရုတ်၏ ရှင်ကျန်းဒေသနှင့် ပါကစ္စတန်ရှိ တရုတ်၏ ရင်းနှီးမြှုပ်နှံမှုများကို ခြိမ်းခြောက်နေသည့် စစ်သွေးကြွအဖွဲ့များ ရှိနေသည့်တိုင် တရုတ်သည် အာဖဂန်နစ္စတန်ကို စီးပွားရေးအရ လျစ်လျူမရှုနိုင်ခဲ့ပေ။

"တရုတ်က အာဖဂန်နစ္စတန်ကို အကောက်ခွန်မဲ့ ကုန်သွယ်ရေး ကမ်းလှမ်းသွားမှာပါ" ဟု ကျိုးရှင်းက အာဖဂန် လက်ထောက်ဝန်ကြီးချုပ် အဗ္ဗဒူလ် ကာဘီယာ (Abdul Kabir) နှင့် အစည်းအဝေး ပြုလုပ်နေသည့် ဓာတ်ပုံနှင့် အတူ X လူမှုမီဒီယာတွင် အောက်တိုဘာ ၂၄ ရက်က ရေးသားဖော်ပြခဲ့သည်။

အာဖဂန်နစ္စတန်၏ လစ်သီယံ၊ ကြေးနီနှင့် သံများကို တရုတ်အား ရောင်းချခြင်းဖြင့် တာလီဘန်အဖွဲ့သည် ပြိုလဲနေသည့် အာဖဂန်၏ စီးပွားရေးကို ပြန်လည်ထူထောင်နိုင်မည်ဖြစ်သည်။

ထို့ပြင် ပြည်ပနိုင်ငံများရှိ ဘဏ်များတွင် စုဆောင်းထားသည့် အာဖဂန်၏ အရံငွေကြေးများ ထုတ်ယူခွင့် ပိတ်ပင်ခံ ထားရချိန်တွင် တရုတ်ကို သတ္တုများ ရောင်းချခြင်းဖြင့် အာဖဂန်၏ ဝင်ငွေကို အများအပြား ရရှိစေမည်ဖြစ်ကြောင်း ကျွမ်းကျင်သူများက ပြောကြားခဲ့သည်။

ပြီးခဲ့သည့်နှစ်က အာဖဂန်နစ္စတန်သည် တရုတ်ကို ဒေါ်လာ ၆၄ သန်း တန်ကြေးရှိသည့် ကုန်ပစ္စည်းများ တင်ပို့ ရောင်းချခဲ့ကြောင်း တရုတ်အကောက်ခွန်ဌာန၏ မှတ်တမ်းများတွင် ဖော်ပြခဲ့သည်။

Source: ရိုက်တာ

CNI International News

တိုကျို၊ အောက်တိုဘာ ၂၆

ဂျပန်သည် ၂၀၂၃ ခုနှစ်၊ ဩဂုတ်လက ပို့ကုန်ကဏ္ဍတွင် တင်းကျပ်သည့် တားမြစ်ကန့်သတ်ချက်များ ချမှတ်ခဲ့ ပြီးနောက် တစ်နှစ်အကြာ၌ ရုရှးသို့ တစ်ပတ်ရစ်ကားများ ဆက်လက် တင်ပို့ရောင်းချနေဆဲဖြစ်ကြောင်း Nikkei Asia မှ ဖော်ပြခဲ့သည်။

ယူကရိန်းကို ရုရှားက ကျူးကျော် ဝင်ရောက် တိုက်ခိုက်ခဲ့ပြီးနောက် ဂျပန်ကားကုမ္ပဏီများသည် ရုရှားကို ကား အသစ်များရောင်းချမှု သိသာစွာ လျော့ကျခဲ့သည့်တိုင် တစ်ပတ်ရစ် ကားများကိုမူ ရုရှားသို့ ဆက်လက်တင်ပို့ ရောင်းချနေဆဲ ဖြစ်သည်။

ယခုနှစ် ဇန်နဝါရီလမှ ဩဂုတ်လအတွင်း ရုရှားသို့ တစ်ပတ်ရစ်ကား အစီးရေ ၁၃၂,၂၁၇ စီး တင်ပို့ရောင်းချခဲ့ ကြောင်း ဂျပန်၏ တစ်ပတ်ရစ်ကား တင်ပို့ရောင်းချသူများအသင်း (JUMVEA) က ထုတ်ပြန်ခဲ့သည်။

ထိုပမာဏသည် ၂၀၂၃ ခုနှစ်၊ ဇန်နဝါရီလမှ ဩဂုတ်လအတွင်း ရုရှားသို့ ရောင်းချခဲ့သည့် တစ်ပတ်ရစ်ကား အရေအတွက်နှင့် နှိုင်းယှဉ်ပါက ၂၀ ရာခိုင်နှုန်း လျော့ကျခဲ့သော်လည်း ရုရှားသည် ဂျပန်၏ တစ်ပတ်ရစ်ကား တင်ပို့ရောင်းချသူများအတွက် အရေးအကြီးဆုံး စျေးကွက်များထဲတွင်  တစ်ခုအပါအဝင် ဖြစ်နေဆဲဖြစ်သည်။

ဂျပန်ကားများ တပ်ဆင်နေစဉ်

ရုရှားသည် ယူအေအီးနိုင်ငံပြီးပါက တစ်ပတ်ရစ်ကားများ ဝယ်ယူတင်သွင်းသည့် ဒုတိယအကြီးဆုံး စျေးကွက် တစ်ခုအဖြစ် ဆက်လက် ရပ်တည်လျက်ရှိသည်။

ယူကရိန်းစစ်ပွဲနှင့် ပတ်သက်ပြီး ရုရှားသည် ပိတ်ဆို့မှုများ ချမျတ်ခံထားရသည့်တိုင် ၂၀၂၂ ခုနှစ်ကလည်း ဂျပန်နှင့် တောင်ကိုရီးယားတို့မှ ရုရှားသို့ ကားအသစ်များနှင့် တစ်ပတ်ရစ်ကား တင်ပို့ရောင်းချမှုနှုန်းသည် သိသိသာသာ မြင့်တက်လာခဲ့ကြောင်း ရုရှား၏ စီမံခန့်ခွဲရေးကုမ္ပဏီတစ်ခု၏ ကုန်စည်ဌာနအကြီးအကဲ ဗစ်တာ လူးဆစ်ခ် (Viktor Lutsyk) က ပြောကြားခဲ့သည်။

ရုရှားသို့ တင်ပို့သည့် ကားအများစုမှာ SUV များ၊ မီနီဗန်ကားများနှင့် အကြီးစား ဇိမ်ခံကား မော်ဒယ်များ ဖြစ်ကြောင်း ၎င်းက ဆိုသည်။

အနောက်နိုင်ငံများနှင့် ဂျပန်သည် ယူကရိန်းစစ်ပွဲကြောင့် ရုရှားကို စီးပွားရေးပိတ်ဆို့မှုများ ချမှတ်ခဲ့သော်လည်း ၂၀၂၂ ခုနှစ်၊ မေလမှစပြီး ဇွန်လကုန်ပိုင်းအထိ ရုရှား၏အရှေ့ဖျား ဆိပ်ကမ်းသို့ ဂျပန်၏ တစ်ပတ်ရစ်ကားများ တင်ပို့မှုသည် သုံးဆအထိ မြင့်တက်လာခဲ့သည်ဟု ဆိုသည်။

ဗလာဒီဗော့စတော့ (Vladivostok) မြို့အခြေစိုက် တစ်ပတ်ရစ်ကားများ တင်သွင်းသည့် Carwin PLC ကုမ္ပဏီ၏ စီအီးအို ဒီမီထရီ ဇာဘိုရာကမူ တစ်ပတ်ရစ်ကားများ တင်သွင်းမှု မြင့်တက်လာသည့် ထင်မှတ်မထားသော အခြေအနေကြောင့် အံ့အားသင့်ခဲ့ရကြောင်းလည်း ပြောကြားခဲ့သည်။

Source: Nikkei Asia

CNI International News

ဘရပ်ဆဲလ်၊ အောက်တိုဘာ ၁၅

ဥရောပသမဂ္ဂသည် တရုတ်နိုင်ငံမှ တင်သွင်းသည့် လျှပ်စစ်ကားများအပေါ် အခွန်ကောက်ခံမှုနှုန်းထားကို တိုးမြှင့် တော့မည်ဖြစ်သဖြင့် တရုတ်ထံမှ တန်ပြန်ကုန်သွယ်ရေး ကန့်သတ်မှုများနှင့် ရင်ဆိုင်ရနိုင်ကြောင်း SCMP မှ ဖော်ပြခဲ့သည်။

ဥရောပသမဂ္ဂသည် ယခုလကုန်ပိုင်းမှစပြီး တရုတ်လျှပ်စစ်ကားများအပေါ် အခွန်ကောက်ခံမှုကို ၃၅ ဒသမ ၃ ရာခိုင်နှုန်း တိုးမြှင့်သွားမည်ဖြစ်ပြီး တရုတ်က ထိုအစီအစဉ်ကို ဒေါသတကြီး ကန့်ကွက်ခဲ့သည်။

ထိုပြဿနာကို ဖြေရှင်းရန် ဥရောပသမဂ္ဂနှင့် တရုတ်အကြား ဆွေးနွေးညှိနှိုင်းမှုများ ပြုလုပ်ခဲ့သော်လည်း သဘောတူညီချက် တစ်စုံတစ်ရာမရခဲ့ကြောင်း ထိုဆွေးနွေးညှိနှိုင်းမှုများနှင့် နီးစပ်သူများက ပြောကြားခဲ့သည်။

တရုတ်ကုန်သွယ်ရေးဝန်ကြီးဌာနမှ ညှိနှိုင်းရေးအရာရှိများသည် သဘောတူညီမှု တစ်စုံတစ်ရာ မရခဲ့ဘဲ အောက်တိုဘာ ၁၂ ရက်တွင် ဘေကျင်းသို့ ပြန်လည်ရောက်ရှိလာခဲ့ကာ နှစ်ဖက်စလုံး၏ တောင်းဆိုမှုများသည် လက်ခံနိုင်သည့် အနေအထားသို့ ရောက်ရှိခဲ့ခြင်းမရှိကြောင်း တရုတ်ကုန်သွယ်ရေးဝန်ကြီးဌာနက ပြောကြားခဲ့ သည်။

တရုတ်ကမူ ဥရောပသမဂ္ဂသို့ တင်သွင်းသည့် ပြည်ပ ကားကုမ္ပဏီ အားလုံးအတွက် တူညီသည့် အခွန်နှုန်းထား ကောက်ခံစေရန် ဆန္ဒရှိခဲ့သော်လည်း ဥရောပကော်မရှင်ကမူ ပုဂ္ဂလိက ကားကုမ္ပဏီများအနေဖြင့် ဥရောပသမဂ္ဂ နှင့် သဘောတူညီချက်များရရှိရန် ကိုယ်တိုင် ဆွေးနွေးညှိနှိုင်းရမည်ဖြစ်ကြောင်း ပြောကြားခဲ့သည်။

တရုတ်ထုတ် လျှပ်စစ်ကားကိုတွေ့ရစဉ်

တရုတ်ကမူ ဥရောပသမဂ္ဂအနေဖြင့် တရုတ်ကိုသာ သီးသန့်အခွန်တိုးမြှင့်ပြီး အခြားကုမ္ပဏီများကို အခွန်နှုန်းတိုး မြှင့်ခြင်းမပြုပါက ဘက်လိုက်မှု ဖြစ်လာလိမ့်မည်ဖြစ်ပြီး အပြန်အလှန်ယုံကြည်မှုကို ထိခိုက်စေလိမ့်မည်ဟု ပြောကြားခဲ့သည်။

ဥရောပသမဂ္ဂ အဖွဲ့ဝင်နိုင်ငံများသည် အောက်တိုဘာ ၄ ရက်က တရုတ်လျှပ်စစ်ကားများ တင်သွင်းမှုအပေါ် အခွန်တိုးမြှင့်ကောက်ခံရန် ထောက်ခံခဲ့ကြပြီး တရုတ်အစိုးရကမူ ကုန်သွယ်ရေးအရ အရေးယူမှုများ တန်ပြန် ပြုလုပ်သွားမည်ဟု ခြိမ်းခြောက်ခဲ့သည်။

ထိုအရေးယူမှုများထဲတွင် အင်ဂျင်ပါဝါကြီးသည့် ကားများတင်သွင်းမှုအပေါ် တရုတ်က တန်ပြန် အခွန်တိုးမြှင့် ကောက်ခံပါက ဂျာမနီနှင့် ဆလိုဗက်ကီးယားနိုင်ငံတို့ကို ထိခိုက်စေမည်ဖြစ်သည်။

ထို့ကြောင့် ဂျာမနီနှင့် ဆလိုဗက်ကီးယားနိုင်ငံတို့က တရုတ်လျှပ်စစ်ကားများအပေါ် အခွန်တိုးမြှင့်ကောက်ခံမည့် ဥရောပသမဂ္ဂ၏ အစီအစဉ်ကို ဆန့်ကျင်ခဲ့ကြခြင်းဖြစ်သည်။

တရုတ်အစိုးရ၏ ထောက်ပံ့မှုများဖြင့် တရုတ်လျှပ်စစ်ကားများ ပြည်ပသို့ အများအပြား တင်ပို့နေမှုအပေါ် အမေရိကန်နှင့် ဥရောပသမဂ္ဂတို့က စိုးရိမ်ခဲ့ကြသည်။

စျေးပေါသည့် တရုတ်လျှပ်စစ်ကားများ စျေးကွက်အတွင်း ဝင်ရောက်လာပါက ပြည်တွင်း ကားကုမ္ပဏီများကို ထိခိုက်စေလိမ့်မည်ဖြစ်ကြောင်း အမေရိကန်နှင့် ဥရောပသမဂ္ဂက ပြောကြားခဲ့သည်။

Source: SCMP