CNI International News

ဘရပ်ဆဲလ်၊ အောက်တိုဘာ ၁၅

ဥရောပသမဂ္ဂသည် တရုတ်နိုင်ငံမှ တင်သွင်းသည့် လျှပ်စစ်ကားများအပေါ် အခွန်ကောက်ခံမှုနှုန်းထားကို တိုးမြှင့် တော့မည်ဖြစ်သဖြင့် တရုတ်ထံမှ တန်ပြန်ကုန်သွယ်ရေး ကန့်သတ်မှုများနှင့် ရင်ဆိုင်ရနိုင်ကြောင်း SCMP မှ ဖော်ပြခဲ့သည်။

ဥရောပသမဂ္ဂသည် ယခုလကုန်ပိုင်းမှစပြီး တရုတ်လျှပ်စစ်ကားများအပေါ် အခွန်ကောက်ခံမှုကို ၃၅ ဒသမ ၃ ရာခိုင်နှုန်း တိုးမြှင့်သွားမည်ဖြစ်ပြီး တရုတ်က ထိုအစီအစဉ်ကို ဒေါသတကြီး ကန့်ကွက်ခဲ့သည်။

ထိုပြဿနာကို ဖြေရှင်းရန် ဥရောပသမဂ္ဂနှင့် တရုတ်အကြား ဆွေးနွေးညှိနှိုင်းမှုများ ပြုလုပ်ခဲ့သော်လည်း သဘောတူညီချက် တစ်စုံတစ်ရာမရခဲ့ကြောင်း ထိုဆွေးနွေးညှိနှိုင်းမှုများနှင့် နီးစပ်သူများက ပြောကြားခဲ့သည်။

တရုတ်ကုန်သွယ်ရေးဝန်ကြီးဌာနမှ ညှိနှိုင်းရေးအရာရှိများသည် သဘောတူညီမှု တစ်စုံတစ်ရာ မရခဲ့ဘဲ အောက်တိုဘာ ၁၂ ရက်တွင် ဘေကျင်းသို့ ပြန်လည်ရောက်ရှိလာခဲ့ကာ နှစ်ဖက်စလုံး၏ တောင်းဆိုမှုများသည် လက်ခံနိုင်သည့် အနေအထားသို့ ရောက်ရှိခဲ့ခြင်းမရှိကြောင်း တရုတ်ကုန်သွယ်ရေးဝန်ကြီးဌာနက ပြောကြားခဲ့ သည်။

တရုတ်ကမူ ဥရောပသမဂ္ဂသို့ တင်သွင်းသည့် ပြည်ပ ကားကုမ္ပဏီ အားလုံးအတွက် တူညီသည့် အခွန်နှုန်းထား ကောက်ခံစေရန် ဆန္ဒရှိခဲ့သော်လည်း ဥရောပကော်မရှင်ကမူ ပုဂ္ဂလိက ကားကုမ္ပဏီများအနေဖြင့် ဥရောပသမဂ္ဂ နှင့် သဘောတူညီချက်များရရှိရန် ကိုယ်တိုင် ဆွေးနွေးညှိနှိုင်းရမည်ဖြစ်ကြောင်း ပြောကြားခဲ့သည်။

တရုတ်ထုတ် လျှပ်စစ်ကားကိုတွေ့ရစဉ်

တရုတ်ကမူ ဥရောပသမဂ္ဂအနေဖြင့် တရုတ်ကိုသာ သီးသန့်အခွန်တိုးမြှင့်ပြီး အခြားကုမ္ပဏီများကို အခွန်နှုန်းတိုး မြှင့်ခြင်းမပြုပါက ဘက်လိုက်မှု ဖြစ်လာလိမ့်မည်ဖြစ်ပြီး အပြန်အလှန်ယုံကြည်မှုကို ထိခိုက်စေလိမ့်မည်ဟု ပြောကြားခဲ့သည်။

ဥရောပသမဂ္ဂ အဖွဲ့ဝင်နိုင်ငံများသည် အောက်တိုဘာ ၄ ရက်က တရုတ်လျှပ်စစ်ကားများ တင်သွင်းမှုအပေါ် အခွန်တိုးမြှင့်ကောက်ခံရန် ထောက်ခံခဲ့ကြပြီး တရုတ်အစိုးရကမူ ကုန်သွယ်ရေးအရ အရေးယူမှုများ တန်ပြန် ပြုလုပ်သွားမည်ဟု ခြိမ်းခြောက်ခဲ့သည်။

ထိုအရေးယူမှုများထဲတွင် အင်ဂျင်ပါဝါကြီးသည့် ကားများတင်သွင်းမှုအပေါ် တရုတ်က တန်ပြန် အခွန်တိုးမြှင့် ကောက်ခံပါက ဂျာမနီနှင့် ဆလိုဗက်ကီးယားနိုင်ငံတို့ကို ထိခိုက်စေမည်ဖြစ်သည်။

ထို့ကြောင့် ဂျာမနီနှင့် ဆလိုဗက်ကီးယားနိုင်ငံတို့က တရုတ်လျှပ်စစ်ကားများအပေါ် အခွန်တိုးမြှင့်ကောက်ခံမည့် ဥရောပသမဂ္ဂ၏ အစီအစဉ်ကို ဆန့်ကျင်ခဲ့ကြခြင်းဖြစ်သည်။

တရုတ်အစိုးရ၏ ထောက်ပံ့မှုများဖြင့် တရုတ်လျှပ်စစ်ကားများ ပြည်ပသို့ အများအပြား တင်ပို့နေမှုအပေါ် အမေရိကန်နှင့် ဥရောပသမဂ္ဂတို့က စိုးရိမ်ခဲ့ကြသည်။

စျေးပေါသည့် တရုတ်လျှပ်စစ်ကားများ စျေးကွက်အတွင်း ဝင်ရောက်လာပါက ပြည်တွင်း ကားကုမ္ပဏီများကို ထိခိုက်စေလိမ့်မည်ဖြစ်ကြောင်း အမေရိကန်နှင့် ဥရောပသမဂ္ဂက ပြောကြားခဲ့သည်။

Source: SCMP

CNI International News

မွန်ဘိုင်း၊ အောက်တိုဘာ ၉

အိန္ဒိယနိုင်ငံတွင် ဆန္ဒပြမှုများ လုပ်ဆောင်နေသည့် Samsung ကုမ္ပဏီ၏ အလုပ်သမားများနှင့် အစိုးရအရာရှိ များအကြား အောက်တိုဘာ ၈ ရက်က ဆွေးနွေးညှိနှိုင်းမှုများ ပြုလုပ်ခဲ့သော်လည်း အောင်မြင်ခဲ့ခြင်းမရှိသဖြင့် Samsung အလုပ်သမားများက ဆန္ဒပြမှုများကို ဆက်လက် လုပ်ဆောင်ခဲ့သည်ဟု Nikkei Asia မှ ဖော်ပြခဲ့သည်။

Samsung ကုမ္ပဏီ အလုပ်သမားများနှင့် ၎င်းတို့၏ ကိုယ်စားလှယ်များကမူ ၎င်းတို့သည် လုပ်ခလစာနှင့် လုပ်ငန်းခွင် အခြေအနေများအတွက်သာမက Samsung ကုမ္ပဏီနှင့် အိန္ဒိယအစိုးရတို့က ဆမ်ဆောင်း အိန္ဒိယ အလုပ်သမားများ သမဂ္ဂ (SIWU) ကို အသိအမှတ်ပြုရန်အတွက်ပါ ဆန္ဒပြခြင်းဖြစ်ကြောင်း ပြောကြားခဲ့သည်။

ချန်နိုင်း (Chennai) မြို့အနီး သီရိပါရွမ်ဘူဒါ (Sriperumbudur) မြို့ရှိ Samsung စက်ရုံတွင် ကုမ္ပဏီ၏ စီမံခန့်ခွဲမှုဆိုင်ရာ ထိပ်သီးအရာရှိများနှင့် ဆန္ဒပြ အလုပ်သမားများအကြား ဆွေးနွေးညှိနှိုင်းမှုများ ဆက်တိုက် ပြုလုပ်ခဲ့ပြီးနောက် ကျေလည်မှု ရရှိခဲ့သည်ဟု Economic Times မှ ဖော်ပြခဲ့သည်။

အိန္ဒိယရှိ Samsung ကုမ္ပဏီရုံးကို တွေ့ရစဉ်

သို့သော် ဆန္ဒပြသူများဘက်မှ အဓိကတောင်းဆိုချက်ဖြစ်သည့် အသစ်ဖွဲ့စည်းထားသော (SIWU) သမဂ္ဂကို အသိအမှတ်ပြုရန် ငြင်းဆိုခဲ့သဖြင့် ဆန္ဒပြမှုကို ဆက်လက် လုပ်ဆောင်သွားမည်ဟု အိန္ဒိယ ကုန်သွယ်ရေး သမဂ္ဂစင်တာ (CITU) က ပြောကြားခဲ့သည်။

တမီလ်နာဒူး (Tamil Nadu) ပြည်နယ်အစိုးရကမူ Samsung India Electronics မှ ဝန်ထမ်းများအနေဖြင့် ဆန္ဒပြမှုကို ရပ်နားပြီး လုပ်ငန်းခွင်ကို ချက်ချင်းပြန်ဝင်ကြရန်၊ အခြားဝန်ထမ်းများနှင့် ၎င်းတို့အား မှီခိုနေသည့် မိသားစုများကို ထည့်သွင်းစဉ်းစားကြရန် တိုက်တွန်းခဲ့သည်။

စက်မှုရေးရာဝန်ကြီး တီအာဘီ ရာဂျား (TRB Rajaa) ကမူ ဆန္ဒပြသူများ တောင်းဆိုသည့် အချက်အချို့ကို လိုက်လျောလိုသော်လည်း ၎င်းတို့ဖွဲ့စည်းထားသည့် အလုပ်သမားသမဂ္ဂကို အသိအမှတ် မပြုနိုင်သဖြင့် ဆန္ဒပြမှုများ ဆက်လက် ဖြစ်ပွားခဲ့သည်ဟု ဆိုသည်။

အိန္ဒိယရှိ Samsung ကုမ္ပဏီမှ အလုပ်သမားများ ဆန္ဒပြနေကြစဉ်

"သမဂ္ဂကို အသိအမှတ်ပြုဖို့ ကိစ္စဆိုတာ တရားရေးအရ တားမြစ်ထားတဲ့ အခြေအနေ ဖြစ်ပါတယ်။ ကျနော်တို့ အနေနဲ့ အဲဒီကိစ္စကို မဆွေးနွေးနိုင်ပါဘူး။ အစိုးရနဲ့ ပြည်နယ်ဝန်ကြီးချုပ် အမ်ကေ စတာလင် (M K Stalin) ဟာ သင်တို့ဘက်ကရှိနေပြီး သင်တို့ရဲ့ အခြေအနေအားလုံးကို စဉ်းစားသုံးသပ်နေပါတယ်။ အဲဒါကြောင့် လုပ်ငန်းခွင်ကို ချက်ချင်းပြန်ဝင်သင့်ပါတယ်" ဟု ရာဂျားက ပြောကြားခဲ့သည်။

Samsung ကုမ္ပဏီ ဝန်ထမ်းများဘက်မှ တောင်းဆိုသည့် အချက်များတွင် လုပ်ခလစာငွေ ပြန်လည်စိစစ်ပေးရေး၊ လုပ်ငန်းခွင် အခြေအနေကို တိုးမြှင့်ပေးရေး၊ CITU က ထောက်ခံထားသည့် (SIWU) သမဂ္ဂကို အသိအမှတ်ပြုရေး အစရှိသည့် အချက်များ ပါဝင်သည်။

တမီလ်နာဒူးပြည်နယ်ရှိ Samsung ကုမ္ပဏီ ဝန်ထမ်း စုစုပေါင်း ၁၇၅၀ အနက် ၁၁၀၀ ခန့်သည် စက်တင်ဘာ ၉ ရက်မှ စတင်ပြီး လုပ်ငန်းခွင်မဝင်ဘဲ သပိတ်မှောက် ဆန္ဒပြခဲ့ခြင်းဖြစ်သည်။

Source: Nikkei Asia

CNI International News

ကွာလာလမ်ပူ၊ အောက်တိုဘာ ၅

မလေးရှားဝန်ကြီးချုပ် အန်ဝါအီဘရာဟင်(Anwar Ibrahim)က အလုပ်သမားပြဿနာများကို အဓိကဆွေးနွေးရန် အတွက် အောက်တိုဘာ ၄ ရက်တွင် ဘင်္ဂလားဒေ့ရှ်သို့ သွားရောက်ရန် စီစဉ်ထားကြောင်း ဒါကာတာဝန်ရှိသူများက ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထိုခရီးစဉ်သည်  ဘင်္ဂလားဒေ့ရှ်တွင် ဝန်ကြီးချုပ် ရှိတ်ဟာဆီနာ ရာထူးမှ နုတ်ထွက်ပြီး ငြိမ်းချမ်းရေးနိုဘယ်ဆုရှင် မူဟာမက်ယူနွတ် (Muhammad Yunus) ဦးဆောင်သည့် ကြားဖြတ်အစိုးရတစ်ရပ် စတင်ဦးဆောင်ပြီးနောက် ပြည်ပအစိုးရ အကြီးအကဲတစ်ဦး၏ ပထမဆုံးအကြိမ် နိုင်ငံတော်အဆင့် ခရီးစဉ် ဖြစ်လာလိမ့်မည်ဖြစ်သည်။

ဝန်ကြီးချုပ်အန်ဝါသည် ယူနွတ်နှင့် တွေ့ဆုံကာ စီးပွားရေး ပူးပေါင်းဆောင်ရွက်မှု၊ နိုင်ငံရေးဆိုင်ရာ ဆက်ဆံရေး များ၊ ကုန်သွယ်မှုနှင့် ရင်းနှီးမြှုပ်နှံမှုများ၊ ပညာရေး၊ နည်းပညာ၊ အခြေခံ အဆောက်အအုံ ဖွံ့ဖြိုးတိုးတက်ရေးနှင့် ကာကွယ်ရေး ပူးပေါင်းဆောင်ရွက်မှုများ အပါအဝင် အကြောင်းအရာများ ကျယ်ကျယ်ပြန့်ပြန့် ဆွေးနွေးသွားရန် မျှော်မှန်းထားကြောင်း ဘင်္ဂလားဒေ့ရှ် နိုင်ငံခြားရေးဝန်ကြီးဌာနက တာဝန်ရှိသူတစ်ဦးက ပြောကြားခဲ့သည်။

နှစ်နိုင်ငံလုံးက အလုပ်သမားရေးရာ ကိစ္စရပ်ကို ပူးပေါင်းဆောင်ရွက်မှု ပိုမိုအားကောင်းစေရန် ကြိုးပမ်းနေချိန် ဖြစ်သောကြောင့် အလုပ်သမား ရွှေ့ပြောင်းမှုသည် ဆွေးနွေးပွဲ၏ အဓိကအကြောင်းအရာ ဖြစ်လာလိမ့်မည်ဟုဆို သည်။

ဘင်္ဂလားဒေ့ရှ် ကြားဖြတ်အစိုးရခေါင်းဆောင် မူဟာမက်ယူနွတ်ကို တွေ့ရစဉ်

ဘင်္ဂလားဒေ့ရှ်သည် မလေးရှားအတွက် အဓိကလုပ်သား အရင်းအမြစ်တစ်ခုဖြစ်ကာ အထူးသဖြင့် ဆောက်လုပ် ရေး၊ ထုတ်လုပ်ရေးနှင့် စိုက်ပျိုးရေးကဲ့သို့ ကဏ္ဍများတွင် အဓိက အားထားရာ ဖြစ်သည်။

မလေးရှားတွင် ဘင်္ဂလားဒေ့ရှ်လုပ်သား ၁ သန်းကျော် အလုပ်လုပ်ကိုင်နေခြင်းနှင့်အတူ ထိုဆွေးနွေးမှုများသည် လုပ်ခလစာ၊ အလုပ်အကိုင် အခြေအနေများနှင့် အထောက်အထားမဲ့ အလုပ်သမားစည်းမျဉ်းများ အပါအဝင် ရွှေ့ပြောင်းအလုပ်သမားများ ရင်ဆိုင်နေရသည့် စိန်ခေါ်မှုများကို ဖြေရှင်းနိုင်ရန် ရည်ရွယ်ထားသည်ဟု နောက်ထပ် တာဝန်ရှိသူတစ်ဦးက ဆိုသည်။

နှစ်နိုင်ငံလုံးက လူသစ်စုဆောင်းရေး လုပ်ငန်းစဉ်များ ချောမွေ့မှုရှိစေရန်နှင့် အလုပ်သမား အခွင့်အရေး ကာကွယ် ရေးများ မြှင့်တင်ရန် နည်းလမ်းများကို ဆွေးနွေးသွားဖွယ်ရှိသည်။

ဘင်္ဂလားဒေ့ရှ် နိုင်ငံတကာ အလုပ်အကိုင် ရှာဖွေရေး အေဂျင်စီများအသင်း  (BAIRA) က လတ်တလော နှစ်များ အတွင်း ရွှေ့ပြောင်းလုပ်သားများကို ပို့ဆောင်ပေးနေသည့် အလုပ်အကိုင်ရှာဖွေရေး အေဂျင်စီများကို ဖျက်သိမ်းပေး ရန် ဘင်္ဂလားဒေ့ရှ်နှင့် မလေးရှား ခေါင်းဆောင်များထံ တောင်းဆိုခဲ့သည်။

၂၀၂၂ ခုနှစ်၊ သြဂုတ်လနောက်ပိုင်း နှစ်နိုင်ငံလုံးမှ အလုပ်အကိုင် ရှာဖွေရေးအေဂျင်စီ ၁၀၁ ခုအောက်တွင် ပျမ်းမျှ ဘင်္ဂလားဒေ့ရှ်လုပ်သား ၄၅၀,၀၀၀ သည် မလေးရှားသို့ သွားရောက် လုပ်ကိုင်ခဲ့သဖြင့် ထိုအလုပ်အကိုင် ရှာဖွေရေး အေဂျင်စီများ၏ ပွင့်လင်းမြင်သာမှုနှင့် မျှတမှုများအပေါ် စိုးရိမ်မှုများ မြင့်တက်လျက်ရှိသည်။

Source: ရိုက်တာ

CNI News

၂၀၂၄ ခုနှစ်၊ အောက်တိုဘာ ၂

ထိုင်း - မြန်မာ နယ်စပ်ကုန်သွယ်ရေးလမ်းကြောင်း တစ်ခုဖြစ်သည့် မြဝတီနယ်စပ်ကုန်သွယ်ရေးလမ်းကြောင်း ပိတ်ထားရာကနေ နှစ်ဖက်ညှိနှိုင်းမှုကြောင့် ပြန်လည်စတင်လာနိုင်ဖွယ်ရှိသည်ဟု ကုန်သည်များနှင့် စီးပွားရေး လုပ်ငန်းရှင်များက ပြောသည်။ 

ထိုင်း-မြန်မာ နယ်စပ်ကုန်သွယ်ရေးလမ်း (အာရှလမ်းမကြီး)တစ်လျှောက်တွင်  နယ်မြေ မတည်ငြိမ်ခြင်းနှင့် လမ်းပန်းဆက်သွယ်ရေး အခက်အခဲများကြောင့် ကုန်သွယ်မှု ရပ်တန့်နေသည်မှာ ကြာမြင့်နေပြီဖြစ်သည်။

ထို့နောက် ထိုင်းနိုင်ငံက အာရှလမ်းမကြီး ပြန်လည် ဖွင့်လှစ်နိုင်ရန်အတွက် ပျက်စီးမှုများကို ပြင်ဆင်သွားမည် ဖြစ်သလို နယ်မြေတည်ငြိမ်အေးကိုလည်း ဆောင်ရွက်သွားမည်ဟု ပြောကြားထားသည်။

ထိုသို့ မြဝတီ နယ်စပ်ကုန်သွယ်ရေးလမ်းကြောင်း ပြန်လည်စတင်နိုင်မည်ဆိုပါက လက်ရှိ ဈေးကွက်အတွင်း မြင့်တက်နေသည့် ကုန်ဈေးနှုန်းများလည်း ကျဆင်းလာနိုင်သည်ဟု စီးပွားရေး လေ့လာသုံးသပ်သူ ဦးအောင်ပြည့်စုံ က CNI သတင်းဌာနသို့ ပြောသည်။

၎င်းက “ညှိနှိုင်းဆွေးနွေးပြီးတော့ အဖြေရှာတဲ့လမ်းကြောင်းက ကျနော်တို့ တိုင်းပြည်အတွက် ကောင်းတဲ့ လမ်း ကြောင်း တစ်ခုဖြစ်တဲ့အတွက် ကျနော်တို့ဘက်က ကြိုဆိုပါတယ်။ ကုန်သည်တွေဘက်ကလည်း ဒီကိစ္စက လက်ခံ ရမယ့်ကိစ္စ ဖြစ်ပါတယ်။ အဓိကက သုံးစွဲတဲ့ ကာစတန်မာတွေအတွက်လည်း ကုန်ပစ္စည်းတွေ ပြန်ဝင်လာ နိုင်မယ် ဆိုရင် ဈေးနှုန်းတွေက အထိုက်အလျောက် ပြန်ပြီးတော့ ကျဆင်းသွားနိုင်ပါတယ်။ အခုဆိုရင် ထိုင်းဘက်ကပဲ ဖြစ် ဖြစ်၊ တရုတ်ဘက်ကပဲဖြစ်ဖြစ် border ကနေ သွင်းရတဲ့ ပစ္စည်းတွေရဲ့ ဈေးနှုန်းကလည်း ဈေးကွက်ထဲမှာ တက်နေ ကြတာ ပုံမှန်ထက်ကို တက်သွားကြတယ်။ ဒေါ်လာဈေးတွေကျပြီး ရွှေဈေးတွေလည်း ထိန်းချုပ်ထားတယ်၊ ဒါပေမယ့် ဘာကြောင့် ကုန်ပစ္စည်းတွေရဲ့ ဈေးနှုန်းတွေ မကျသေးတာလဲဆိုတာရဲ့ ပြဿနာက သွားရေးလာရေး ခက်ခဲတဲ့ လမ်းပန်းဆက်သွယ်ရေး အခြေအနေကြောင့် ဖြစ်ပါတယ်။ ဒီအခြေအနေကို ထိုင်းနိုင်ငံအနေနဲ့ ထိုင်း အစိုးရကလည်း ညှိနှိုင်းပြီးတော့ လမ်းတွေ ပြန်ပြင်တာမျိုး ရှိမယ်၊ အဓိကကတော့ လုံခြုံရေးပေါ့နော်၊ လုံခြုံရေး အခြေအနေတွေကို သူတို့ ဆောင်ရွက်ပေးနိုင်မယ်၊ ဒါပေမယ့် ထိုင်းကတော့ ကျနော်တို့နိုင်ငံရဲ့ လုံခြုံရေး အခြေအနေကို ဆောင်ရွက်ပေးနိုင်မှာ မဟုတ်ဘူး”ဟု ပြောသည်။

 မြဝတီနယ်စပ်ကုန်သွယ်ရေးလမ်း ပျက်စီးမှု တံတားပြုပြင်နေစဉ်

သို့သော်လည်း ထိုင်းအစိုးရသည် ပျက်စီးသွားသည် လမ်းများကို ပြုပြင်ပေး၍ အာရှလမ်းမကြီး ပြန်လည် ဖွင့်လှစ် နိုင်အောင် ကူညီမည်ဆိုပါက ကြိုဆိုရမည်ဟု ဦးအောင်ပြည့်စုံက ဆက်ပြောသည်။

၎င်းက “သူတို့အနေနဲ့ ပျက်စီးသွားတဲ့ လမ်းတွေကို ရာသီဥတုကြောင့်ပဲဖြစ်စေ၊ တိုက်ပွဲတွေကြောင့်ပဲဖြစ်စေ ပျက်စီးသွားတဲ့ လမ်းတွေကို သူတို့ ပြန်ပြင်ပေးမယ်ဆိုတာမျိုးတော့ ကျနော်တို့ ကြိုဆိုပါတယ်။ အဓိကကတော့ လမ်းပန်းဆက်သွယ်ရေး ကောင်းမွန်လာပြီဆိုရင် လုံခြုံရေးကလည်း စိတ်ချရတဲ့ အနေအထားမျိုး ဖြစ်လာပြီဆိုရင် တော့ ကုန်စည်စီးဆင်းမှုတွေက ပိုပြီးတော့ ဆောင်ရွက်နိုင်မှာဖြစ်ပြီး ကုန်ဈေးနှုန်းတွေလည်း အထိုက်အလျောက် ကျသွားမယ်လို့ ကျနော်တို့အနေနဲ့ ထင်ပါတယ်ဗျ” ဟု CNI သတင်းဌာနသို့ ပြောသည်။

မြဝတီနယ်စပ် ကုန်သွယ်ရေးလမ်းကြောင်းကို အသုံးပြု၍ မရသည့်အတွက် ပို့ကုန်လုပ်ငန်းရှင်များသည် ရှမ်းပြည် နယ်အရှေ့ပိုင်း တာချီလိတ် နယ်စပ်ကုန်သွယ်ရေးလမ်းကြောင်းကို အသုံးပြုနေရသလို ပင်လယ်ရေကြောင်းဖြင့် ရန်ကုန် - ရနောင်း ကုန်သွယ်ရေးလမ်းကြောင်းကို အသုံးပြုနေရကြောင်း၊ ထို့ကြောင့် ကုန်ကျစရိတ်များလည်း မြင့်တက်လျက်ကြောင်း ကုန်သည်များက ပြောသည်။

မြဝတီနယ်စပ် ကုန်သွယ်ရေးလမ်းကြောင်း ပြန်လည်အသုံးပြု၍ ရသွားမည်ဆိုပါက ကုန်စည်စီးဆင်းမှုများ မြန်ဆန်လာမည်ဖြစ်သလို ပို့ကုန်တင်ပို့နေသည့် ကုန်စည်နှင့်ပတ်သက်၍လည်း တောင်သူများ ဈေးနှုန်းပိုမို ရရှိသွားနိုင်သည်ဟု မြန်မာနိုင်ငံပြောင်းလုပ်ငန်းအသင်း ဒုတိယဥက္ကဋ္ဌ ဦးသန့်ဇင်ထွန်းက CNI သတင်းဌာနသို့ ပြောသည်။

မြဝတီ-ကော့ကရိတ် အာရှလမ်းမကြီးပေါ်က ကုန်ကားများကိုတွေ့ရစဉ်

၎င်းက “မြဝတီလမ်းကြောင်း ပွင့်သွားလို့ရှိရင် အသေးစိတ် တွက်ချက်လို့ရှိရင် ပြောင်း ၁ ပိဿာကို ၅၀ ကနေ ၇၀ လောက်အထိ တောင်သူကို ပိုပေးလို့ ရသွားတယ်။ ၁ ပိဿာကို ၅၀ နဲ့ ပြောမယ်ဆိုလို့ရှိရင် ၁ တင်းကို ၁၀၀၀ လောက်ပေါ့နော် ၁၀၀၀ လောက်အထိ တောင်သူက ပိုရသွားနိုင်တယ်။ အခုက ထိုင်းကို ရောင်းတာက တာချီလိတ် ကနေသွားတဲ့ လမ်းကြောင်းတစ်ခု ရှိမယ်၊ မြဝတီက မနှစ်ကဆို လုံးဝကို မသွားနိုင်ဘူးလို့ ပြောရမှာပေါ့နော်။ အဲဒီတော့ ကော့သောင်း - ရနောင်း ရေလမ်းကနေ သွားတယ်။ အဲဒီ လမ်း ၂ လမ်းလုံးက ကန့်သတ်ချက်တွေ ရှိ တယ်။ တာချီလိတ်လမ်းကလည်း မြဝတီလမ်းလိုပေါ့နော် ကားတွေ အများကြီး သွားလို့ မရနိုင်ဘူး။ တောင်တက်၊ တောင်ဆင်းတွေ ရှိသလို တချို့နေရာတွေမှာလည်း တံတားတွေရဲ့ ခံနိုင်ဝန်တွေပေါ် မူတည်ပြီးတော့ ကန့်သတ်  ချက်တွေ ရှိတယ်။ ပင်လယ်ရေကြောင်းကသွားတာလည်း သင်္ဘောတွေရဲ့ အစီးရေ ကန့်သတ်ချက်တွေ ရှိတာပေါ့ နော်။ အဲဒါကြောင့်မို့လို့ တကယ်လို့သာ မြဝတီလမ်း ပွင့်သွားမယ်ဆိုလို့ရှိရင် လက်ရှိ တာချီလိတ်လမ်းကလည်း လက်ရှိသွားနေတဲ့ အရေအတွက်ကနေပြီးတော့ လျော့ကျသွားမယ်၊ ဒါဆိုရင်တော့ ပိုပြီးတော့ မြန်သွားမှာပေါ့နော်” ဟု ပြောသည်။

မြဝတီ နယ်စပ်ကုန်သွယ်ရေးမှတဆင့် အဓိက ကုန်သွယ်နေသည့် မြန်မာ - ထိုင်း နယ်စပ်ကုန်သွယ်ရေးသည် လမ်းပန်းဆက်သွယ်ရေး အခက်အခဲနှင့် နယ်မြေ မတည်ငြိမ်မှုများကြောင့် ဧပြီလဆန်းပိုင်းမှ စတင်ပြီး ရပ်တန့်နေ သည်မှာ ယနေ့အချိန်ထိ ဖြစ်သည်။

CNI International News

ဘန်ကောက်၊ စက်တင်ဘာ ၂၈

ထိုင်းအစိုးရအဖွဲ့၏ အစီအစဉ်များထဲတွင် ဆင်းရဲမွဲတေမှု တိုက်ဖျက်ရေးနှင့် ချမ်းသာကြွယ်ဝသည့် စီးပွားရေးကို ထူထောင်ရန် ရည်မှန်းချက်များ ပါဝင်သည်ဟု ဝန်ကြီးချုပ်၏ အကြံပေးပုဂ္ဂိုလ်တစ်ဦးက ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

ထိုင်းဝန်ကြီးချုပ် ပေတုန်တန် (Paetongtarn Shinawatra) အစိုးရအဖွဲ့၏ လက်ကျန်သက်တမ်း ၂ နှစ်ကျော် အတွင်း ထိုင်းလူမျိုးများကို ဆင်းရဲတွင်းထဲက လွတ်မြောက်စေရန် အစွမ်းကုန် လုပ်ဆောင်သွားမည်ဟု ပေတုန်တန်၏ အဖွဲ့ဝင် ၅ ဦးပါ အကြံပေးအဖွဲ့၏ ဒုဥက္ကဋ္ဌ  ဆူရာပွန် ဆူဘွန်လီ (Surapong Suebwonglee) က ပြောကြားခဲ့သည်။

နိုင်ငံအတွက်ထားသည့် ရည်ရွယ်ချက်မှာ စီးပွားရေးပြဿနာများကို ကျော်လွှားရန်ဖြစ်ပြီး ချမ်းသာကြွယ်ဝသည့် စီးပွားရေး ပေါ်ပေါက်လာရန် လမ်းဖွင့်သွားမည်ဟု ဒေါက်တာ ဆူရာပွန်က ပြောကြားခဲ့သည်။

ပေတုန်တန်သည် စက်တင်ဘာ၂၆ ရက်က အစိုးရဧည့်ဂေဟာဖြစ်သည့်  Baan Phitsanulok တွင် အကြံပေးပုဂ္ဂိုလ် များနှင့် တွေ့ဆုံခဲ့ပြီးနောက် ဆူရာပွန်က ထိုကဲ့သို့ မှတ်ချက်စကားများ ပြောကြားခဲ့ခြင်းဖြစ်သည်။

"Baan Phitsanulok ရုံးကို တရားဝင် ဖွင့်လိုက်ပါပြီး" ဟု မစ္စစ် ပေတုန်တန်က ၎င်း၏ X လူမှုမီဒီယာတွင် ရေးသားခဲ့ပြီး အကြံပေးပုဂ္ဂိုလ်များနှင့် တွေ့ဆုံနေသည့် ဓာတ်ပုံများကိုလည်း လူမှုမီဒီယာ၌ တင်ခဲ့သည်။

ပေတုန်တန် အစိုးရက ထိုင်းအခြေခံလူတန်းစားကို ဘတ် ၁၀၀၀၀ ထောက်ပံ့ပေးစဉ်

ယခုလ အစောပိုင်းက ပေတုန်တန်သည်  နိုင်ငံရေးအတွေ့အကြုံ ရင့်ကျက်သည့် ပညာရှင် ၅ ဦးပါဝင်သော အကြံပေးအဖွဲ့ကို ဖွဲ့စည်းခဲ့ပြီးနောက် ပထမဆုံးအကြိမ်အဖြစ် အစည်းအဝေး ပြုလုပ်ခဲ့ခြင်းဖြစ်သည်။

ထိုအကြံပေးအဖွဲ့၏ ဥက္ကဋ္ဌမှာ ပန်ဆက် ဗင်ယာရတ် ပန်ဆက် (Pansak Vinyaratn. Pansak) ဖြစ်ပြီး ကျန်အဖွဲ့ဝင် ၄ ဦးမှာ ဒေါက်တာဆူရာပွန်၊ ဆူပါဝူ ဆိုင်ချင်ဝါ (Supavud Saicheua) ၊ ထုံထန် ချန်ဒရန်ဆူ (Tongthong Chandransu) နှင့် ပွန်သက် သက်ကန်ဂျာနာ (Pongthep Thepkanjana) တို့ဖြစ်သည်။

ဝန်ကြီးချုပ်ပေတုန်တန်သည် နယ်ပယ်ကဏ္ဍ အသီးသီးတွင် အတွေ့အကြုံ ရင့်ကျက်သည့် အကြံပေးပုဂ္ဂိုလ်များ၏ အကြံဉာဏ်များကို နားထောင်ရန် အဆင်သင့်ရှိနေကြောင်း ဒေါက်တာ ဆူရာပွန်က အစည်းအဝေးအပြီး၌ ပြောကြားခဲ့သည်။

ထိုအစည်းအဝေးတွင် စီးပွားရေးကိစ္စများကို ကျွမ်းကျင်ပိုင်နိုင်သည့် အမျိုးသား စီးပွားရေးနှင့် လူမှုရေး ဖွံ့ဖြိုး တိုးတက်ရေးကောင်စီ (NESDC) ဥက္ကဋ္ဌ ဆူပါဝူက စီးပွားရေးမူဝါဒများနှင့်ပတ်သက်ပြီး ၎င်း၏ အကြံဉာဏ်များကို တင်ပြခဲ့သည်ဟု ဆူရာပွန်က ပြောကြားခဲ့သည်။

Source: ဘန်ကောက်ပို့စ်

CNI International News

ဘန်ကောက်၊ စက်တင်ဘာ ၂၇

ထိုင်းလူမျိုးများကို တစ်ဦးလျှင် ဘတ် ၁၀,၀၀၀ စီ ဒစ်ဂျစ်တယ်ငွေကြေး ထောက်ပံ့ပေးမည့် အစီအစဉ်အတွက် အစိုးရတွင် ငွေကြေးအလုံအလောက် ရှိ/မရှိ  မသေချာသဖြင့် ထောက်ပံ့ငွေ ဒုတိယအသုတ်ကို အရစ်ကျ ခွဲပေးရဖွယ် ရှိကြောင်း ထိုင်းဒုတိယဘဏ္ဍာရေးဝန်ကြီး ဂျူလာပန် အမ်မွန်ဗီဗက် (Julapun Amornvivat) က ဝန်ခံပြောဆိုခဲ့ သည်ဟု The Nation မှ ဖော်ပြခဲ့သည်။

ဘတ်ဂျက် မလုံလောက်ပါက ငွေကြေးထောက်ပံ့မှု ဒုတိယအသုတ်ကို ဘတ် ၅၀၀၀ စီ နှစ်ကြိမ်ခွဲပြီး ထောက်ပံ့ပေး မည်ဟု ဂျူလာပန်က ပြောသည်။

ထောက်ပံ့ငွေ ပထမအသုတ်တွင် ငွေကြေးလက်ခံသူများ၏ ဘဏ်အကောင့်များထဲကို ငွေများထည့်ပေးခြင်းဖြစ်ပြီး ဒုတိယအသုတ်ကိုမူ digital wallet system အရ မိုဘိုင်းဖုန်းများ၌ ဖွင့်ထားသည့် ဒစ်ဂျစ်တယ်ငွေကြေး အက်ပလီကေးရှင်းများထဲသို့ ထည့်ပေးမည့်စနစ်ကို ကျင့်သုံးမည်ဟုဆိုသည်။

ဒစ်ဂျစ်တယ်ငွေကြေး ပေးခြေမှုကို တွေ့ရစဉ်

အဆိုပါ ငွေကြေးထောက်ပံ့မှု အစီအစဉ်ကို လက်ခံရယူရန် စာရင်းပေးသွင်းခဲ့သူ စုစုပေါင်း ၃၆ သန်းရှိခဲ့ပြီး ပထမ အသုတ် ဦးစားပေး ထောက်ပံ့ပေးခဲ့သူ ၁၀ သန်းသည် ဆင်းရဲနွမ်းပါးသူများနှင့် မသန်စွမ်းများပါဝင်သည့် အုပ်စုဖြစ် သည်ဟု ဂျူလာပန်က ပြောသည်။

ထို့ကြောင့် ကျန်ရှိသည့် လူ ၂၆ သန်းသည် ဒုတိယအသုတ်တွင် ထောက်ပံ့ငွေများကို လက်ခံရရှိမည်ဖြစ်သည်။

ဆင်းရဲနွမ်းပါးသူများနှင့် လူမှုဖူလုံရေးကဒ်များ ကိုင်ဆောင်ထားသည့် ပထမအသုတ်ထဲတွင် ပါဝင်သောလူများကို စက်တင်ဘာ ၃၀ ရက်တွင် အပြီးသတ် ငွေကြေးထောက်ပံ့ပေးပြီးပါက အစိုးရသည် စမတ်ဖုန်းမရှိသည့် ငွေကြေး လက်ခံရရှိသူများကို စာရင်းကောက်သွားမည်ဖြစ်သည်။

စမတ်ဖုန်းမရှိသည့် ဆင်းရဲနွမ်းပါးသူ အရေအတွက် ၄ သန်းခန့်ရှိလိမ့်မည်ဟု အစိုးရက ခန့်မှန်းထားပြီး ထိုလူ ၄ သန်းခန့်ကို ဒုတိယအသုတ်ထဲတွင် ထည့်သွင်းပြီး ငွေကြေးထောက်ပံ့ပေးမည်ဖြစ်ကြောင်း ဂျူလာပန်က ပြော သည်။

မည်သို့ပင်ဆိုစေ ဘတ်ဂျက် အနေအထားပေါ် မူတည်ပြီး ဒုတိယအသုတ် လက်ခံရရှိမည့် သူများသည် တစ်ပြိုင် နက်တည်း သို့မဟုတ် ၂ ကြိမ်ခွဲပြီး ထောက်ပံ့ငွေ လက်ခံရရှိမည်ဖြစ်သည်။

ထိုအခြေအနေနှင့်ပတ်သက်ပြီး ဝန်ကြီးချုပ် ပေတုန်တန်က ဦးဆောင်ပြုလုပ်မည့် စီးပွားရေး လှုံ့ဆော်ရေးမူဝါဒ ကော်မတီ အစည်းအဝေးတွင် ဆုံးဖြတ်သွားမည်ဖြစ်ကြောင်း ဂျူလာပန်က ပြောကြားခဲ့သည်။ 

ထိုင်းဒုတိယဘဏ္ဍာရေးဝန်ကြီး ဂျူလာပန် အမ်မွန်ဗီဗက်ကို တွေ့ရစဉ်

ထိုအစည်းအဝေးကိုမူ မည်သည့်နေ့ရက်တွင် ကျင်းပမည်ဆိုခြင်းကို မသိရသေးပေ။

ထောက်ပံ့ငွေ လက်ခံမည့်သူ အရေအတွက်သည် ၂၆ သန်းထက် ကျော်လွန်ခြင်းမရှိဘဲ အစိုးရတွင်လည်း ဘတ်ဂျက် အလုံအလောက်ရှိမည်ဆိုပါက ထောက်ပံ့ငွေကို တစ်ကြိမ်ထဲနှင့် အပြီးပေးမည်ဖြစ်သည်။

သို့သော် ဘတ်ဂျက်သည် ဘတ် ၁၀၀ ဘီလျံ လိုအပ်မည်ဆိုပါက ထောက်ပံ့ငွေကို ၂ ကြိမ် ခွဲပေးမည်ဖြစ်သည်။

ဒစ်ဂျစ်တယ်ငွေကြေး ထောက်ပံ့မှု အစီအစဉ်သည် နိုင်ငံ့စီးပွားရေးကို မြှင့်တင်ရန်နှင့် ပြည်သူများကို ငွေကြေး သုံးစွဲမှု မြင့်တက်စေရန် ဘတ် ၄၅၀ ဘီလျံ တန်ကြေးရှိသည့် အစီအစဉ်ဖြစ်သည်။ 

အခြားစီးပွားရေး ပြုပြင်ပြောင်းလဲမှုများတွင် နည်းပညာနှင့် အခြားစီးပွားရေး လုပ်ငန်းများ ပါဝင်သည်။

Source: The Nation

CNI International News

ဘန်ကောက်၊ စက်တင်ဘာ ၂၆

ထိုင်းအစိုးရသည် ဘတ်ဂျက်လိုငွေပြမှု ပိုမိုကျယ်ပြန့်လာချိန်တွင် နိုင်ငံအတွင်း ကာစီနို လောင်းကစားရုံလုပ်ငန်းကို တရားဝင် ခွင့်ပြုရန် စီစဉ်လာခဲ့ခြင်းဖြစ်သည်ဟု Nikkei Asia မှ ဖော်ပြခဲ့သည်။

အာဏာရ ဖြူးထိုင်းပါတီကလည်း နိုင်ငံအတွင်း ကာစီနိုလုပ်ငန်းများ ထူထောင်ပေးမည့် စီမံကိန်းနှင့်ပတ်သက်ပြီး ဝေဖန်မှုများကို ကာကွယ်ပြောဆိုခဲ့သည်။

တရားမဝင် မြေအောက်စီးပွားရေး လုပ်ငန်းများကို တရားဝင် လည်ပတ်ခွင့်ပြုခြင်းဖြင့် အစိုးရအတွက် အခွန် ဘဏ္ဍာငွေများ ရရှိနိုင်လိမ့်မည်ဖြစ်ကြောင်း ပြောကြားခဲ့သည်။

ကာစီနိုရုံများကဲ့သို့ မြေအောက် လောင်းကစား လုပ်ငန်းများသည် ဂျီဒီပီ၏ ၅၀ ရာခိုင်နှုန်းကျော် ရှိနိုင်သဖြင့် နိုင်ငံ၏ စီးပွားရေးကို မြှင့်တင်နိုင်မည်ဖြစ်သည်။

ကာစီနိုလောင်းကစားလုပ်ငန်းကိုတွေ့ရစဉ်

ထိုလုပ်ငန်းများမှ ရရှိသည့် အခွန်ဘဏ္ဍာများကို ပညာရေးနှင့် အခြားနယ်ပယ်များတွင် ဖွံ့ဖြိုးတိုးတက်မှုများ ရရှိအောင် သုံးစွဲနိုင်မည်ဖြစ်ကြောင်း ဖြူးထိုင်းပါတီက ထုတ်ပြန်ခဲ့သည်။

ပြီးခဲ့သည့် နှစ်ပေါင်း ၂၀ အတွင်း ကာစီနိုလုပ်ငန်းများကို တရားဝင် ခွင့်ပြုပေးရန် အားထုတ်ကြိုးပမ်းမှုများ ရှိခဲ့သော်လည်း ထိုင်းလူ့အဖွဲ့အစည်း၏ ဆန့်ကျင်ကန့်ကွက်မှုများကြောင့် အောင်မြင်ခဲ့ခြင်း မရှိကြောင်း ဖြူးထိုင်းပါတီက ထုတ်ပြန်ခဲ့သည်။

သို့သော် မကြာသေးမီ နှစ်များအတွင်း ယခင်အစိုးရအဖွဲ့များနှင့် လက်ရှိ အစိုးရလက်ထက်တွင် လေ့လာချက် စစ်တမ်းများအရ ကာစီနိုလုပ်ငန်းများကို တရားဝင် ခွင့်ပြုပေးရန် ဖြစ်နိုင်ခြေရှိကြောင်း လေ့လာတွေ့ရှိခဲ့သည်ဟု ထုတ်ပြန်ချက်၌ ဖော်ပြခဲ့သည်။

ကမ္ဘာလုံးဆိုင်ရာ ကာစီနိုစျေးကွက် တန်ဖိုးသည် အမေရိကန်ဒေါ်လာ ၁၃ ဒသမ ၇ ထရီလျံ (ဘတ် ၄၈၃ ထရီလျံ ခန့်) တန်ကြေးရှိပြီး ထိုလုပ်ငန်းများမှတဆင့် နိုင်ငံ့ဝင်ငွေများ ပိုမိုတိုးမြင့်ရရှိမည့် အလားအလာကို မြင်တွေ့နေရ ကြောင်း ထိုင်းအစိုးရက ပြောကြားခဲ့သည်။

ကာစီနိုလောင်းကစားလုပ်ငန်းကိုတွေ့ရစဉ်

အစိုးရသတင်းရင်းမြစ်များ၏ ပြောကြားချက်များအရ ဘဏ္ဍာရေးဝန်ကြီးဌာနသည် ဖျော်ဖြေရေးလုပ်ငန်းအက် ဥပဒေမူကြမ်းကို အပြီးသတ် ရေးဆွဲခဲ့ပြီဖြစ်ပြီး ဖွဲ့စည်းပုံအခြေခံဥပဒေအရ ထိုဥပဒေမူကြမ်းကို လူထုအား ချပြ၍ နာစစ်ဆေးမှု ခံယူသွားမည်ဟု ဆိုသည်။

ထိုဥပဒေမူကြမ်း၏ ပိုဒ်ခွဲ ၆၅ အရ လောင်းကစား လုပ်ငန်းများသည် နှစ်ပေါင်း ၃၀ သက်တမ်းရှိသည့် လိုင်စင်ဖြင့် လုပ်ငန်း လည်ပတ်ရမည်ဖြစ်ပြီး လုပ်ငန်းမှတ်ပုံတင်ကြေးသည် ဘတ် ၅ ဘီလျံဖြစ်၍ နှစ်စဉ်  ဘတ် ၁ ဘီလျံစီ ပေးဆောင်ရမည်ဖြစ်သည်။

အနှစ် ၃၀ လိုင်စင်သက်တမ်း ပြည့်သွားပါက ၁၀ နှစ်တစ်ကြိမ်စီ သက်တမ်း တိုးနိုင်မည်ဖြစ်သည်။

ထိုလောင်းကစားရုံများတွင် အသက် ၂၀ ပြည့်မှ ကစားနိုင်မည်ဖြစ်ကာ ပြည်ပနိုင်ငံခြားသားများကိုမူ ဝင်ကြေး အခမဲ့ သတ်မှတ်ထားသော်လည်း ထိုင်းနိုင်ငံသားများကိုမူ ဝင်ကြေး ဘတ် ၅၀၀၀ သတ်မှတ်ထားသည်။

Source: Nikkei Asia

CNI International News

ဘန်ကောက်၊ စက်တင်ဘာ ၂၄

ထိုင်းနိုင်ငံတွင် အောက်တိုဘာ ၁ ရက်မှစပြီး တစ်နေ့လျှင် အနိမ့်ဆုံးလုပ်ခအဖြစ် ဘတ် ၄၀၀ (၁၂ ဒသမ ၁၅ ဒေါ်လာ) အထိ တိုးမြှင့်ပေးမည့် အစီအစဉ်ကို သီတင်း ၂ ပတ်ကြာ ရွှေ့ဆိုင်းမည်ဟု ရိုက်တာမှ ဖော်ပြခဲ့သည်။

ထိုအစီအစဉ်နှင့်ပတ်သက်ပြီး ဖွဲ့စည်းထားသည့် ကော်မတီအစည်းအဝေးတွင် လိုအပ်သည့် ထောက်ခံမှု မရရှိခဲ့ သဖြင့် ထိုကဲ့သို့ ရွှေ့ဆိုင်းရခြင်းဖြစ်ကြောင်း ထိပ်သီး အလုပ်သမားရေးရာ အရာရှိတစ်ဦးက စက်တင်ဘာ ၂၃ ရက် ၌ ပြောကြားခဲ့သည်။

အလုပ်ရှင်များ၊ အလုပ်သမားများနှင့် အစိုးရအဖွဲ့၏ ကိုယ်စားလှယ်များ ပါဝင်သည့် ထိုကော်မတီသည် တစ်နေ့ လျှင် အနိမ့်ဆုံးလုပ်ခ မြှင့်တင်ရေးနှင့်ပတ်သက်ပြီး ဆွေးနွေးခဲ့သည့် ယခင်အစည်းအဝေး နှစ်ကြိမ်တွင်လည်း လိုအပ်သည့် ထောက်ခံမှုမရခဲ့ကြောင်း အလုပ်သမားရေးရာဝန်ကြီးဌာန၏ အမြဲတမ်းအတွင်းဝန် ပိုင်ရော့ချ် ချိုတီကာဆာသီယမ် (Pairoj Chotikasathien) က ပြောကြားခဲ့သည်။

"ကျနော်တို့ ဒီအစဉ်အစဉ်ကို တတ်နိုင်သမျှအမြန်ဆုံး ဆက်လက် ဆောင်ရွက်သွားမှာပါ" ဟု ၎င်းက ပြောကြားခဲ့ သည်။

ထိုအစီအစဉ်ကို အလုပ်သမားအင်အား ၂၀၀ ကျော်ရှိသည့် စီးပွားရေး လုပ်ငန်းများအတွက်သာ ပြဋ္ဌာန်းသွားမည်ဟု ပိုင်ရော့ချ်က ပြောသည်။

ထိုင်းအလုပ်သမားရေးရာဝန်ကြီးဌာန၏ အမြဲတမ်းအတွင်းဝန် ပိုင်ရော့ချ် ချိုတီကာဆာသီယမ်ကို တွေ့ရစဉ်

ဖြူထိုင်းပါတီ၏ မဲဆွယ်စည်းရုံးချိန်ကာလက ကတိကဝတ်ကြောင့် လက်ရှိတွင် တစ်နေ့ အနိမ့်ဆုံးလုပ်ခကို ဘတ် ၃၃၀ မှ ၃၇၀ အထိ တိုးမြှင့်ပေးထားပြီး ၂၀၂၇ ခုနှစ်လျှင် တစ်နေ့ အနိမ့်ဆုံးလုပ်ခကို ဘတ် ၆၀၀ အထိ တိုးမြှင့် ပေးမည်ဟု ဖြူးထိုင်းပါတီက ကတိပြုခဲ့သည်။

အနိမ့်ဆုံး လုပ်ခလစာ မြှင့်တင်ရေး အစီအစဉ်သည် အရှေ့တောင်အာရှ၏ ဒုတိယ စီးပွားရေး အင်အားအကြီးဆုံး နိုင်ငံဖြစ်သည့် ထိုင်းနိုင်ငံတွင် ဖွံ့ဖြိုးတိုးတက်မှုများကို မြင့်တက်စေရန် အစိုးရ၏ ရည်မှန်းချက်များထဲမှ တစ်စိတ် တစ်ပိုင်းဖြစ်သည်။

အစိုးရသည် ထိုင်းလူမျိုးများကို တစ်ဦးလျှင် ဘတ် ၁၀,၀၀၀ စီ ထောက်ပံ့ပေးမည့် ဘတ် ၄၅၀ ဘီလျံ တန်ကြေးရှိ ဒစ်ဂျစ်တယ်ငွေကြေး ထောက်ပံ့မှု အစီအစဉ်လည်းရှိနေသည်။

ထိုအစီအစဉ်၏ ပထမအဆင့်ကို ယခုလ မကုန်မီ စတင်ဖော်ဆောင်သွားမည်ဖြစ်သည်။

ထိုင်းဗဟိုဘဏ်ကမူ ယခုနှစ်အတွင်း ထိုင်း၏ စီးပွားရေး ဖွံ့ဖြိုးတိုးတက်မှုသည် ၂ ဒသမ ၉ ရာခိုင်နှုန်း ရှိလိမ့်မည်ဟု မျှော်မှန်းထားသည်။

အဆိုပါ နှုန်းထားသည် ၂၀၂၃ ခုနှစ်က စီးပွားရေး ဖွံ့ဖြိုးတိုးတက်မှုနှုန်း ၁ ဒသမ ၉ ရာခိုင်နှုန်းမှ မြင့်တက်လာခြင်း ဖြစ်သည်။

Source: ရိုက်တာ

CNI International News

ကိုလံဘို၊ စက်တင်ဘာ ၂၀

သီရိလင်္ကာနိုင်ငံမှ ဆင်းရဲသားများက လာမည့်သမ္မတရွေးကောက်ပွဲတွင် အနိုင်ရရှိမည့် သမ္မတသစ်အပေါ် မျှော်လင့်ချက်များ ကြီးမားစွာ ထားရှိနေကြသည်ဟု ရိုက်တာမှ ဖော်ပြခဲ့သည်။

သီရိလင်္ကာတွင် စက်တင်ဘာ ၂၁ ရက်၌ သမ္မတရွေးကောက်ပွဲ ပြုလုပ်မည်ဖြစ်သည်။

ထိုရွေးကောက်ပွဲတွင် လက်ရှိသမ္မတ ရာနေးလ် ဝစ်ကရီမီဆင်းဟီ (Ranil Wickremesinghe) ၊ အတိုက်အခံ ခေါင်းဆောင် ဆာဂျစ် ပရီမက်ဒါဆာ ( Sajith Premadasa) နှင့် မာ့စ်ဝါဒီ အနူရာ ကူမာရာ ဒစ္စနာယာကီ (Anura Kumara Dissanayake) တို့ ယှဉ်ပြိုင်ကြမည်ဖြစ်သည်။

၎င်းတို့ ၃ ဦးစလုံးသည် နိုင်ငံ၏ စီးပွားရေးကို ပြန်လည်ထူထောင်ရန်၊ အခွန်များကို လျှော့ချရန်နှင့် စီးပွားရေး လုပ်ငန်းများကို ထောက်ပံ့ပေးရန် မဟာဗျူဟာ အသစ်များကို ချမှတ်လုပ်ဆောင်မည်ဟု ကတိပြု ပြောကြား ထားသည်။

ထို့ကြောင့် နိုင်ငံအတွင်းရှိ ဆင်းရဲမွဲတေသူများသည် လာမည့်ရွေးကောက်ပွဲတွင် အနိုင်ရမည့် သမ္မတသစ်က ၎င်းတို့၏ လူနေမှုဘဝကို မြှင့်တင်ပေးနိုင်လိမ့်မည်ဟု မျှော်လင့်ချက် ကြီးကြီးမားမား ထားရှိခဲ့ကြသည်။

သီရိင်္လကာက အောက်ခြေလူတန်းစားများကိုတွေ့ရစဉ်

သီရိလင်္ကာ၏ အောက်ခြေ လူတန်းစားနှင့် လူလတ်တန်းစားများသည် သာတူညီမျှရှိသည့် စီးပွားရေး နာလန်ထူ မှုကို လိုလားနေကြောင်း ကိုလံဘိုတက္ကသိုလ် (University of Colombo) မှ စီးပွားရေးပညာ သင်ကြားပြသနေ သည့် ဆရာတစ်ဦးဖြစ်သူ အူမက်ရှ် မိုရာမူဒါလီ (Umesh Moramudali) က ပြောကြားခဲ့သည်။

"ဆင်းရဲတဲ့လူတွေက တော်တော်ကို ရုန်းကန်နေရပါတယ်။ ကုန်စျေးနှုန်း ကြီးမြင့်မှုတွေ၊ အထူးသဖြင့် အစားအစာ စျေးနှုန်း မြင့်တက်မှုတွေက သူတို့ကို အရမ်းထိခိုက် နစ်နာစေပါတယ်" ဟု ၎င်းက ပြောကြားခဲ့သည်။

ပြီးခဲ့သည့်လက သီရိလင်္ကာတွင် ငွေကြေးဖောင်းပွမှု ၀ ဒသမ ၅ ရာခိုင်နှုန်းအထိ လျော့ကျသွားခဲ့ပြီး ၂၀၂၄ ခုနှစ် အတွင်း ဂျီဒီပီ တိုးတက်မှုနှုန်း ၃ ရာခိုင်နှုန်း ရှိလာနိုင်ကြောင်း ခန့်မှန်းချက်များ ထွက်ပေါ်ခဲ့သော်လည်း စီးပွားရေး အကျပ်အတည်းကို ဖြေရှင်းနိုင်ခြင်းမရှိသေးဘူးဟု ကျွမ်းကျင်သူများက ပြောကြားခဲ့သည်။

သီရိင်္လကာတွင် COVID-19 ကပ်ရောဂါကြောင့် ထိခိုက်ခဲ့သည့် စီးပွားရေး အကျပ်အတည်းကြောင့် နိုင်ငံခြား ငွေကြေးနှင့် အခြေခံကုန်ပစ္စည်းများ ပြတ်လပ်ခဲ့ပြီး ၂၀၂၂ ခုနှစ်တွင် စီးပွားရေး အကျပ်အတည်း ဖြစ်ပွားခဲ့သည်။

၂၀၂၃ ခုနှစ်တွင် အစိုးရက ထုတ်ပြန်သည့် အချက်အလက်အရ နိုင်ငံ့လူဦးရေ၏ ၃ ပုံ ၁ ပုံ နီးပါးဖြစ်သည့် သီရိလင်္ကာနိုင်ငံသား ၇ သန်းခန့်သည် ဆင်းရဲမွဲတေနေကြောင်း ဖော်ပြခဲ့သည်။

Source: ရိုက်တာ