CNI International News

ဘေကျင်း၊ ဩဂုတ် ၂၂

တရုတ်နိုင်ငံတွင် သန်းနှင့်ချီသည့် ဘွဲ့ရပညာတတ် လူငယ်များအကြား အလုပ်လက်မဲ့နှုန်း မြင့်တက်နေကြောင်း ရိုက်တာမှ ဖော်ပြခဲ့သည်။

ထို့နောက် တရုတ် ဘွဲ့ရပညာတတ် လူငယ်များသည် အလုပ်အကိုင်ရရန် လစာငွေနည်းသည့် အလုပ်များကိုသာ ဝင်လုပ်နေပြီး အချို့လူငယ်များဆိုလျှင် မိဘများ၏ ပင်စင်ငွေများကိုပင် မှီခိုနေရခြင်းကြောင့် အလုပ်သမား လူတန်းစား အသစ်တစ်ခုကို ပေါ်ပေါက်စေခဲ့သည်။

တရုတ်နိုင်ငံတွင် ၂၀၂၁ ခုနှစ်ကစပြီး စီးပွားရေး မတည်ငြိမ်မှုကြောင့် အပြီးသတ် မဆောက်လုပ်နိုင်သေးသည့် လူနေအိမ် ဆောက်လုပ်ရေးလုပ်ငန်းခွင်များ သန်းနှင့်ချီရှိခဲ့ပြီး လက်စမသတ်နိုင်သေးသော ထိုလူနေတိုက်ခန်း များကို "အမြီးပိုင်း ပုတ်နေသည့် အဆောက်အအုံများ (rotten-tail buildings)” ဟု ခေါ်ဆိုခဲ့သည်။

လက်ရှိတွင် အလုပ်လက်မဲ့လူငယ်များ မြင့်တက်နေသဖြင့် ထိုစကားလုံးကို အငှားယူသုံးသည့် အနေဖြင့် အမြီးပိုင်း ပုတ်နေသည့် ကလေးများ (rotten-tail kids)ဟူသော စကားလုံးဖြင့် အလုပ်သမား လူတန်းစားအသစ်တစ်ခု ပေါ်ထွက်လာခဲ့သည်။

တရုတ်လူငယ်များ အလုပ်အကိုင်ရှာဖွေနေကြစဉ်

တရုတ်၏ ဘဏ္ဍာရေး၊ နည်းပညာနှင့် ပညာရေး ကဏ္ဍများအပေါ် စည်းမျဉ်းစည်းကမ်း တင်းကြပ်မှုများနှင့် COVID-19 ကပ်ရောဂါကြောင့် ထိခိုက်ခဲ့ရသည့် အလုပ်သမားစျေးကွက်တွင် ယခုနှစ်အတွင်း တရုတ်ဘွဲ့ရလူငယ် အများအပြားသည် အလုပ်အကိုင်ရရှိရန် ရုန်းကန်နေရသည်။

၂၀၂၃ ခုနှစ်၊ ဧပြီလအတွင်း အသက် ၁၆ နှစ်မှ ၂၄ နှစ်အရွယ်ရှိ တရုတ်လူငယ် သန်း ၁၀၀ အတွက် အလုပ်အကိုင် ရရှိနိုင်မှု နှုန်းထားမှာ ၂၀ ရာခိုင်နှုန်းသာရှိခဲ့သည်။ 

ထို့နောက် ၂၀၂၃ ခုနှစ်၊ ဇွန်လတွင် ၂၁ ဒသမ ၃ ရာခိုင်နှုန်း ရှိခဲ့သည်ဟု တရားဝင် ထုတ်ပြန်သည့် စာရင်းများတွင် ဖော်ပြထားသည်။

အရေအတွက်နှင့် ဖော်ပြရပါက တရုတ်လူငယ် သန်း ၁၀၀ အတွက် အလုပ်အကိုင် သန်း ၂၀ သာရှိနေသည့် သဘောဖြစ်သည်။

၂၀၂၄ ခုနှစ်တွင်လည်း အလုပ်လက်မဲ့နှုန်း မြင့်တက်လာခဲ့ပြီး တရုတ်လူငယ်သန်း ၁၀၀ အတွက် အလုပ်အကိုင် ရရှိနိုင်သည့် နှုန်းထားမှာ ၁၇ ဒသမ ၁ ရာခိုင်နှုန်းသာ ရှိခဲ့သည်။

တရုတ်လူငယ်များ အလုပ်အကိုင်ရှာဖွေနေကြစဉ်

တရုတ်၏ အိမ်ခြံမြေစျေးကွက် အကျပ်အတည်းကြောင့် အာဏာပိုင်များက စီးပွားရေးကို ချိန်ညှိလုပ်ဆောင်နေချိန် တွင် ယခုနှစ်နွေရာသီအတွင်း တရုတ်တွင် ဘွဲ့ယူခဲ့သည့် လူငယ်ပေါင်း ၁၁ ဒသမ ၇၉ သန်းရှိခဲ့သည်။

တရုတ်သမ္မတ ရှီကျင့်ဖျင် (Xi Jinping) သည် လူငယ်များအတွက် အလုပ်အကိုင် ရရှိစေရေးသည် ဦးစားပေးကိစ္စ ဖြစ်ကြောင်း မကြာခဏ ပြောကြားခဲ့သည်။

ထို့နောက် အစိုးရအဖွဲ့သည် အလုပ်အကိုင် ပြပွဲများကဲ့သို့ လူငယ်များအတွက် အလုပ်များရရှိစေရန် နည်းမျိုးစုံ ကြိုးပမ်းခဲ့သော်လည်း အလုပ်လက်မဲ့နှုန်း မြင့်တက်နေခြင်းဖြစ်သည်။

"တရုတ်ဘွဲ့ရလူငယ် အများစုဟာ သာမန်လူတွေထက် အလုပ်အကိုင် အခွင့်အလန်းတွေ ပိုမိုကောင်းမွန်တဲ့ အလားအလာကို မျှော်လင့်ခဲ့ကြပါတယ်။ အခုတော့ ဘွဲ့ရရင်တောင် အလုပ်ရဖို့ မသေချာတော့တဲ့ အခြေအနေနဲ့ ကြုံတွေ့နေရပါတယ်" ဟု မီချီဂန်တက္ကသိုလ်မှ လူမှုဗေဒ လက်ထောက်ပါမောက္ခတစ်ဦးဖြစ်သူ ယွမ်ကျိုး (Yun Zhou) က ပြောကြားခဲ့သည်။

Source: ရိုက်တာ

CNI International News

ကွာလာလမ်ပူ၊ ဩဂုတ် ၂၁

မလေးရှားနှင့် စင်္ကာပူနိုင်ငံတို့၏ တင်းကြပ်သည့် ဗဟိုဘဏ်မူဝါဒများကြောင့် မလေးရှားနှင့်စင်္ကာပူ ငွေကြေးများ သည် လွန်ခဲ့သည့် ၁၈ လအတွင်း အမေရိကန်ဒေါ်လာနှင့် နှိုင်းယှဉ်ပါက တန်ဖိုးများ မြင့်တက်ခဲ့ကြောင်း Nikkei Asia မှ ဖော်ပြခဲ့သည်။

အာရှနိုင်ငံများ၏ ငွေကြေးများအကြား မလေးရှား၏ ရင်းဂစ်ငွေကြေးနှင့် စင်္ကာပူဒေါ်လာတို့သည် အမေရိကန် ဒေါ်လာနှင့် နှိုင်းယှဉ်ပါက စွမ်းဆောင်ရည်အမြင့်ဆုံး အာရှငွေကြေးများဖြစ်လာသည်။

အမေရိကန်ဗဟိုဘဏ်ကမူ အတိုးနှုန်းများ လျှော့ချဖြတ်တောက်ရန် စဉ်းစားနေချိန်တွင် မလေးရှားငွေ ရင်းဂစ်နှင့် စင်္ကာပူဒေါ်လာ တန်ဖိုးများ ခိုင်မာနေခြင်းဖြစ်သည်။

ထို့ပြင် အမေရိကန်တွင် ပြုလုပ်မည့် Jackson Hole ဆွေးနွေးပွဲမတိုင်မီ မလေးရှားနှင့် စင်္ကာပူ ဗဟိုဘဏ်များက ငွေကြေးမူဝါဒများကို တင်းကြပ်ထားခဲ့ခြင်းလည်း ဖြစ်သည်။

စီးပွားရေးလေ့လာသုံးသပ်သူများနှင့် ရင်းနှီးမြှုပ်နှံသူများသည် အမေရိကန်နိုင်ငံ၊ ဝိုင်အိုမင် (Wyoming) ပြည်နယ် Jackson Hole အပန်းဖြေစခန်းမြို့တွင် ဩဂုတ် ၂၂ ရက်မှ ၂၄ ရက်အထိ ပြုလုပ်မည့် Jackson Hole စီးပွားရေး ဆွေးနွေးပွဲ၌ အမေရိကန်ဗဟိုဘဏ်ဥက္ကဋ္ဌ ဂျရုမ်း ပေါ်ဝဲလ် (Jerome Powell) ၏ မိန့်ခွန်းပြောကြားမှုကို လေ့လာ သုံးသပ်သွားကြမည်ဖြစ်သည်။

စင်္ကာပူဒေါ်လာကို တွေ့ရစဉ်

ဩဂုတ် ၂၀ ရက်က အမေရိကန်တစ်ဒေါ်လာလျှင် မလေးရှားရင်းဂစ် ၄ ဒသမ ၃၇ ရင်းဂစ်ရှိခဲ့ပြီး ရင်းဂစ်ငွေကြေး၏ တန်ဖိုးသည် ဆက်လက်ခိုင်မာမှုရှိနေသည်။

မလေးရှားနိုင်ငံ၏ Bank Muamalat Malaysia Bhd ဘဏ်၏ စီးပွားရေးပညာရှင် ဒေါက်တာ မိုဟာမက် အက်ဖ်ဇာနီဇမ် အဗ္ဗဒူ ရာရှစ် (Mohd Afzanizam Abdul Rashid) ကလည်း အမေရိကန် တစ်ဒေါ်လာလျှင် ၄ ဒသမ ၃၇ ရင်းဂစ်မဖြစ်ခင် ၁ ဒသမ ၃၆၃၅ ရင်းဂစ်အထိ တန်ဖိုးမြင့်တက်ခဲ့ကြောင်း ပြောကြားခဲ့သည်။

လက်ရှိ ငွေလဲလှယ်မှု နှုန်းထားသည် ၂၀၂၃ ခုနှစ်၊ ဖေဖော်ဝါရီလနောက်ပိုင်း အမြင့်ဆုံး အဆင့်အထိ ရောက်ရှိခဲ့ခြင်း ဖြစ်ကြောင်း ရာရှစ်က ပြောကြားခဲ့သည်။

စင်္ကာပူဒေါ်လာသည်လည်း မလေးရှား ရင်းဂစ်(မလေးရှားငွေ)ပြီးလျှင် ဒုတိယ စွမ်းဆောင်ရည် အကောင်းဆုံး အာရှငွေကြေးဖြစ်ခဲ့ပြီး အမေရိကန်ဒေါ်လာနှင့် နှိုင်းယှဉ်ပါက ၀ ဒသမ ၂ ရာခိုင်နှုန်း မြင့်တက်ခဲ့သည်။

ဩဂုတ် ၂၀ ရက်က အမေရိကန် တစ်ဒေါ်လာလျှင် စင်္ကာပူဒေါ်လာ ၁ ဒသမ ၃၁ ဒေါ်လာရှိခဲ့ပြီး ထိုနှုန်းထားသည် ၂၀၂၃ ခုနှစ်၊ ဖေဖော်ဝါရီ ၂ ရက်နောက်ပိုင်း အမြင့်ဆုံးနှုန်းထားဖြစ်ခဲ့သည်။

Source: Nikkei Asia

CNI International News

ဘန်ကောက်၊ ဩဂုတ် ၂၀

ထိုင်းနိုင်ငံတွင် ဖွဲ့စည်းပုံအခြေခံဥပဒေဆိုင်ရာခုံရုံးက သီတင်းတစ်ပတ်အတွင်း အတိုက်အခံ Move Forward Party (MFP) ကို ဖျက်သိမ်းပြီး ဝန်ကြီးချုပ် ဆရီသာ သာဗီဆင် (Srettha Thavisin)အား ရာထူးမှထုတ်ပယ်သည့် အံ့အားသင့်ဖွယ် စီရင်ချက်နှစ်ခုကို ချမှတ်ခဲ့သည်။

အဆိုပါ အခြေအနေများက ထိုင်း၏ နိုင်ငံရေးအခင်းအကျင်းကို လှုပ်ခတ်သွားစေရုံသာမက တရားဥပဒေစိုးမိုးရေး၊ ဒီမိုကရေစီစနစ်နှင့် စီးပွားရေးအပေါ် သက်ရောက်မှုများ ဖြစ်ပေါ်ခဲ့ပြီး အချေအတင် ငြင်းခုံဆွေးနွေးမှုများလည်း ဖြစ်လာစေခဲ့သည်ဟု Thai PBS World မှ ဖော်ပြခဲ့သည်။

ထိုင်း၏ အဓိက ကုန်သွယ်ဖက် နိုင်ငံများဖြစ်သည့် အမေရိကန်နှင့် ဥရောပသမဂ္ဂတို့ကမူ ဩဂုတ် ၇ ရက်က MFP ကို ဖျက်သိမ်းပြီး ဩဂုတ် ၁၄ ရက်တွင် ဆရီသာအား ရာထူးမှဖယ်ရှားခဲ့သည့် ဖွဲ့စည်းပုံအခြေခံဥပဒေဆိုင်ရာခုံရုံး၏ စီရင်ချက်များနှင့်ပတ်သက်ပြီး စိုးရိမ်မှုများကို ဖော်ပြခဲ့သည်။

ထိုင်း၀န်ကြီးချုပ်သစ် ပေတုန်တန်ကို တွေ့ရစဉ်

ဒီမိုကရေစီနိုင်ငံများရှိ ပြည်ပမီဒီယာများကလည်း ခုံရုံး၏ စီရင်ချက်များကို သုံးသပ်နေပြီး အထူးသဖြင့် နိုင်ငံရေး ပါတီတစ်ခုအား တားမြစ်ပိတ်ပင်ခြင်းသည် ထိုင်း၏ တိုးတက်ပြောင်းလဲရေး အင်အားစုများကို အရှိန်လျော့ကျ စေရန် လုပ်ဆောင်မှု တစ်ခုဖြစ်သည်ဟု ရှုမြင်ခဲ့ကြသည်။

ထိုင်းစီးပွားရေး ပညာရှင်များနှင့် စီးပွားရေး လုပ်ငန်းရှင်များက ဝန်ကြီးချုပ်ဆရီသာ ဖယ်ရှားခံရပြီးနောက် အစိုးရသစ် ဖွဲ့စည်းနိုင်ခြင်း မရှိသေးသည့်အချိန်တွင် အာဏာလေဟာနယ် (power vacuum) ဖြစ်နေသဖြင့် ထိုအခြေအနေသည် စီးပွားရေးကဏ္ဍနှင့် ရင်းနှီးမြှုပ်နှံသူများ၏ ယုံကြည်မှုများအပေါ် သက်ရောက်စေမည်ကို စိုးရိမ်နေကြသည်။

အထူးသဖြင့် ထိုင်း၏ စီးပွားရေး ဖွံ့ဖြိုးတိုးတက်မှု နှေးကွေးနေခြင်း၊ သက်ကြီးပိုင်း လူဦးရေ များပြားလာခြင်းနှင့် ပထဝီနိုင်ငံရေး တင်းမာမှုများ မြင့်တက်နေချိန်တွင် စီးပွားရေးအပေါ် သက်ရောက်မည့် အလားအလာကို စိုးရိမ် နေကြခြင်း ဖြစ်သည်။

ထို့ကြောင့် စီးပွားရေးပညာရှင်များနှင့် လုပ်ငန်းရှင်များက အစိုးရအဖွဲ့သစ် အမြန်ဆုံးဖွံ့စည်းရန် တိုက်တွန်း ခဲ့ကြသည်။

ထိုင်းဈေးသယ်တစ်ဦးကိုတွေ့ရစဉ်

ထိုစိုးရိမ်မှုများကို လျှင်မြန်စွာ တုန့်ပြန်ဖြေရှင်းသည့် အနေဖြင့် အာဏာရညွန့်ပေါင်းအဖွဲ့မှ လွှတ်တော်အမတ် အများစု အပါအဝင် အောက်လွှတ်တော် အမတ်များသည် ဩဂုတ် ၁၆ ရက်တွင် ဝန်ကြီးချုပ်ဟောင်း သက်ဆင် ရှင်နာဝပ် (Thaksin Shinawatra) ၏ သမီးဖြစ်သည့် ဖြူးထိုင်းပါတီခေါင်းဆောင် ပေတုန်တန် ရှင်နာဝပ် (Paetongtarn Shinawatra) ကို ဝန်ကြီးချုပ်အဖြစ် ရွေးကောက်တင်မြှောက်ခဲ့သည်။

ထိုင်းနိုင်ငံ၏ အစုရှယ်ယာကုမ္ပဏီဖြစ်သည့် InnovestX Securities ကုမ္ပဏီကမူ ယခုနှစ်အတွင်း ထိုင်းနိုင်ငံ၏ စီးပွားရေး ဖွံ့ဖြိုးတိုးတက်မှု ခန့်မှန်းချက်ကို ၂ ဒသမ ၅ ရာခိုင်နှုန်းမှ ၂ ဒသမ ၃ ရာခိုင်နှုန်းအထိ လျှော့ချခဲ့သလို လာမည့်နှစ်အတွက် စီးပွားရေး ဖွံ့ဖြိုးတိုးတက်မှု ခန့်မှန်းချက်အား ၃ ရာခိုင်နှုန်းမှ ၂ ဒသမ ၇ ရာခိုင်နှုန်းအထိ လျှော့ချခဲ့သည်ဟု ကုမ္ပဏီ၏ စီးပွားရေးသုတေသနအကြီးအကဲ ပီယဆက် မာနာဆန် (Piyasak Manason) က ပြောကြားခဲ့သည်။

နိုင်ငံရေး အခြေအနေ အပြောင်းအလဲများကြောင်း ၂၀၂၅ ခုနှစ် ဘဏ္ဍာနှစ်အတွက် အစိုးရအသုံးစရိတ်သည် သီတင်းနှစ်ပတ်ကြာ နှောင့်နှေးကြန့်ကြာ သွားနိုင်သည့်အတွက် စီးပွားရေး ဖွံ့ဖြိုးတိုးတက်မှု ခန့်မှန်းချက်ကို လျှော့ချခဲ့ခြင်းဖြစ်ကြောင်း ၎င်းက ရှင်းလင်းပြောဆိုခဲ့သည်။

Source: Thai PBS World

CNI International News

ကရာချီ၊ ဩဂုတ် ၁၉

တရုတ်၏ လျှပ်စစ်ကားထုတ်လုပ်သည့် BYD ကားကုမ္ပဏီက ပါကစ္စတန်တွင် ကားထုတ်လုပ်ရေးစက်ရုံ တည်ဆောက်ဖွင့်လှစ်ရန် စီစဉ်နေသည်ဟု ရိုက်တာမှ ဖော်ပြခဲ့သည်။

ထို့နောက် BYD ကားကုမ္ပဏီက Mega Motors ကုမ္ပဏီနှင့်လက်တွဲကာ ကားမော်ဒယ် ၃ မျိုး ရောင်းချသွားမည် ဖြစ်ကြောင်း ဩဂုတ် ၁၇ ရက်က ကြေညာခဲ့သည်။

BYD သည် လျှပ်စစ်ကားများ အားသွင်းသည့် ရုံများမရှိသည့် ပါကစ္စတန်၏ စျေးကွက်တွင် ပထမဆုံးဝင်ရောက် လာသော အကြီးစား လျှပ်စစ်ကားကုမ္ပဏီ ဖြစ်သည်။

"ပါကစ္စတန်စျေးကွက်ထဲကို ဝင်ရောက်တာဟာ ဖောက်သည်တွေအတွက် အဆင့်မြင့် ကားအသစ်တွေ ထုတ်လုပ် ပေးဖို့ တစ်ခုတည်း မဟုတ်ပါဘူး။ သဘာဝပတ်ဝန်းကျင်နဲ့ လိုက်လျောညီထွေရှိပြီး နည်းပညာဆိုင်ရာ ဆန်းသစ် တီထွင်မှုကို ပိုမိုတိုးချဲ့ဖို့လည်း ဖြစ်ပါတယ်" ဟု BYD ၏ အာရှ-ပစိဖိတ်ရေးရာ မန်နေဂျာချုပ် လျူရှေးလျန် (Liu Xueliang) က ပြောကြားခဲ့သည်။

BYD သည် ကရာချီ (Karachi)၊ လာဟိုး (Lahore) နှင့် အစ္စလာမ်မာဘက် (Islamabad) မြို့များတွင်လည်း မော်တော်ယာဉ်နှင့်ပတ်သက်သည့် စတိုးဆိုင်များနှင့် စင်တာများ ဖွင့်လှစ်သွားမည်ဖြစ်ကြောင်း လာဟိုးမြို့တွင် ပြုလုပ်သည့် ဖွင့်ပွဲအခမ်းအနား၌ ပြောကြားခဲ့သည်။

BYD လျှပ်စစ်ကားကိုတွေ့ရစဉ်

ထို့ပြင် ၂၀၂၄ ခုနှစ် စတုတ္ထသုံးလပတ် ကာလတွင် SUV မော်ဒယ်နှင့် ဆီဒင် ကားအမျိုးအစားများကိုလည်း ရောင်းချသွားမည်ဖြစ်သည်ဟု ထပ်လောင်းပြောကြားခဲ့သည်။

BYD နှင့် လက်တွဲလုပ်ဆောင်မည့် Mega Motors ကုမ္ပဏီသည် ပါကစ္စတန်၏ အကြီးဆုံး ပုဂ္ဂလိက လူသုံးကုန် ပစ္စည်း ထုတ်လုပ်သည့် ကုမ္ပဏီဖြစ်သော Hub Power ကုမ္ပဏီလိမိတက်၏ လက်ခွဲဖြစ်သည်။

"BYD ရဲ့ ဆန်းသစ်တဲ့ လျှပ်စစ်အားတွေ ထုတ်လုပ်ဖို့အတွက် ပါကစ္စတန်မှာ ပထမဆုံး လျှပ်စစ်ကားစက်ရုံကို ကျနော်တို့ တည်ဆောက်သွားမှာပါ" ဟု Hub Power ၏ အမှုဆောင်ချုပ် ကမ်ရန် ရာမယ် (Kamran Kamal) က ပြောကြားခဲ့ပြီး ထိုသဘောတူညီချက်သည် အထင်ကရ ရင်းနှီးမြှုပ်နှံမှုဖြစ်ကြောင်း သုံးနှုန်းပြောဆိုခဲ့သည်။

ထိုစက်ရုံသစ်ကို ၂၀၂၆ ခုနှစ်တွင် စတင်ပြီး လုပ်ငန်းလည်ပတ်သွားမည်ဟု ကာမယ်က သတင်းထောက်များကို ပြောကြားခဲ့သည်။

Hubco ဟုလည်း လူသိများသည့် Hub Power ကုမ္ပဏီသည် ပါကစ္စတန်၏ အထင်ကရမြို့များတွင် လျှပ်စစ်ကား များကို အားသွင်းသည့်ရုံများကိုလည်း တည်ဆောက်သွားမည်ဟု ပြောကြားခဲ့သည်။

Source: ရိုက်တာ

CNI International News

ဂျာကာတာ၊ ဩဂုတ် ၁၇

အင်ဒိုနီးရှားသမ္မတ ဂျိုကို ဝီဒိုဒို (Joko Widodo) သည် သမ္မတရာထူးမှ မဆင်းမီ လအနည်းငယ်အလိုတွင် ဩဂုတ် ၁၆ ရက်က ၎င်း၏ နောက်ဆုံးအကြိမ် နိုင်ငံတော်မိန့်ခွန်းကို ပြောကြားခဲ့သည်။

ထိုမိန့်ခွန်းအတွင်း အင်ဒိုနီးရှား၏ စီးပွားရေး၊ အခြေခံ အဆောက်အအုံနှင့် ဖွံ့ဖြိုးတိုးတက်ရေးအောင်မြင်မှုများ အကြောင်းကို ၎င်းက အသားပေး ပြောဆိုခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

ဝီဒိုဒိုသည် အရှေ့တောင်အာရှ၏ စီးပွားရေး အင်အားအကြီးဆုံးဖြစ်သည့် အင်ဒိုနီးရှားနိုင်ငံကို ဆယ်စုနှစ်တစ်စုကြာ အုပ်ချုပ်ခဲ့ပြီးနောက် အောက်တိုဘာလတွင် ရာထူးသက်တမ်း ကုန်ဆုံးမည်ဖြစ်သည်။

အင်ဒိုနီးရှားနိုင်ငံရဲ့ မြို့တစ်မြို့ကိုတွေ့ရစဉ်

ဝီဒိုဒိုက ကမ္ဘာ့အကြီးဆုံး ကျွန်းစုနိုင်ငံဖြစ်သည့် အင်ဒိုနီးရှားနိုင်ငံတစ်ဝန်းတွင် လမ်းများခင်းခြင်း၊ တံတားများ ထိုးခြင်းနှင့် ဆိပ်ကမ်းများ တည်ဆောက်မှုတွင် အောင်မြင်မှုများရရှိခဲ့ကြောင်း ပြောကြားခဲ့သည်။

"ကျနော်တို့ဟာ အခြေခံအုတ်မြစ်အသစ်နဲ့ လူမှုတိုးတက်ရေးကို တည်ထောင်နိုင်စွမ်းရှိခဲ့ပါတယ်။ နိုင်ငံရဲ့ အစွန် အဖျားဒေသတွေ၊ ကျေးရွာတွေနဲ့ လူသူအရောက်အပေါက်နည်းတဲ့ နေရာတွေမှာ အခြေခံ အဆောက်အအုံတွေကို တည်ထောင်ခဲ့ပါတယ်" ဟု ဝီဒိုဒိုက ပြောကြားခဲ့သည်။
လက်ရှိအချိန်အထိ ၎င်း၏ အစိုးရအဖွဲ့သည် ကီလိုမီတာ ၂၇၀၀ အရှည်ရှိ လမ်းအသစ် ဖောက်လုပ်ခြင်း၊ ဆိပ်ကမ်း များနှင့် လေဆိပ်များ ၅၀ ခန့် တည်ဆောက်ခြင်း၊ ၁ ဒသမ ၁ သန်း ဟက်တာအကျယ်ရှိ ဆည်မြောင်းများ တည်ဆောက်ခြင်းတို့ကို လုပ်ဆောင်ပေးခဲ့သည်ဟု ၎င်းက ဆိုသည်။

တစ်ချိန်က ဂျာဗား (Java) ပြည်နယ်တွင် အောင်မြင်သည့် ပရိဘောဂ စီးပွားရေး လုပ်ငန်းရှင်ဟောင်းဖြစ်သည့် ဝီဒိုဒိုသည် အင်ဒိုနီးရှား၏ စီးပွားရေး အခြေအနေကိုလည်း အသားပေးပြောဆိုခဲ့ပြီး ကမ္ဘာလုံးဆိုင်ရာ စီးပွားရေး မတည်ငြိမ်မှုများ ရှိနေသည့်တိုင် နိုင်ငံ၏ ဖွံ့ဖြိုးတိုးတက်မှုနှုန်းသည် ၅ ရာခိုင်နှုန်းဖြင့် တည်ငြိမ်နေကြောင်း ထောက်ပြပြောဆိုခဲ့သည်။

လူဦးရေ သန်း ၂၇၀ ကျော် နေထိုင်သည့် အင်ဒိုနီးရှားတွင် အလွန်အမင်း ဆင်းရဲမွဲတေမှုနှုန်းကို ၆ ဒသမ ၁ ရာခိုင်နှုန်းမှ ၁ ရာခိုင်နှုန်းအောက်သို့ လျှော့ချပေးနိုင်ခဲ့သည်။

ကုန်ထုတ်ဆိပ်ကမ်းတစ်ခုကိုတွေ့ရစဉ်

ထို့နောက် အစိုးရကျန်းမာရေး စောင့်ရှောက်မှုစနစ်ကို ထူထောင်ကာ ရာဇဝတ်မှုဆိုင်ရာ ဥပဒေများအား အလုံးစုံ စစ်ဆေးပြုပြင်မှုများတွင် အောင်မြင်မှုများ ရရှိခဲ့သည်ဟု ဝီဒိုဒိုက ပြောသည်။

အင်ဒိုနီးရှားသမ္မတသည် ကောင်းမွန်သည့် စီးပွားရေး စွမ်းဆောင်ရည်များနှင့်အတူ ရာထူးမှ ထွက်ခွာမည် ဖြစ်သော်လည်း တရားရေးနှင့် အကျင့်ပျက်ခြစားမှု တိုက်ဖျက်ရေးကဏ္ဍများတွင် အားနည်းနေခြင်း၊ ၎င်း၏ နိုင်ငံရေးမျိုးဆက်ကို ချန်ထားခြင်းတို့ အပါအဝင် ဝေဖန်မှုများနှင့်လည်း ရင်ဆိုင်နေရသည်။

ပြီးခဲ့သည့် အောက်တိုဘာလက ဝီဒိုဒို၏ ယောက်ဖ ဦးဆောင်သည့် ဖွဲ့စည်းပုံအခြေခံဥပဒေဆိုင်ရာခုံရုံးသည် ရွေးကောက်ပွဲဝင် ကိုယ်စားလှယ်လောင်းများအတွက် အသက်ကန့်သတ်ချက်ကို ပြုပြင်ပြောင်းလဲခဲ့သဖြင့် ဝီဒိုဒို၏ အကြီးဆုံးသားဖြစ်သည့် ဂျီဘရန် ဂျီဘရန် ရာကာဘူမင် ရာကာ (Gibran Rakabuming Raka) သည် ရွေးကောက်ပွဲ ဝင်ခွင့်ရခဲ့ပြီး ဒုတိယသမ္မတနေရာကို အနိုင်ရရှိခဲ့သည်။

အသက် ၃၆ နှစ်အရွယ် ဂျီဘရန်သည် သမ္မတအဖြစ် ရွေးကောက်ခံရသည့် ပရာဘိုဝို ဆူဘင်ယန်တို (Prabowo Subianto) နှင့်အတူ အောက်တိုဘာ ၂၀ ရက်တွင် ကျမ်းသစ္စာကျိန်ဆိုမည်ဖြစ်သည်။

Source: ဘန်ကောက်ပို့စ်

CNI International News

ဘန်ကောက်၊ ဩဂုတ် ၁၆

ထိုင်းနိုင်ငံတွင် ဝန်ကြီချုပ် ဆရီသာ သာဗီဆင် (Srettha Thavisin) ရာထူးမှ ဖယ်ရှားခံရမှုကြောင့် ပေါ်ပေါက်လာ သည့် နိုင်ငံရေးအကျပ်အတည်းသည် ယခင်ကတည်းက ရုန်းကန်နေရသည့် စီးပွားရေးအတွက် နောက်ထပ် ထိုးနှက်ချက်တစ်ခု ဖြစ်လာနိုင်ကြောင်း ရိုက်တာမှ ဖော်ပြခဲ့သည်။

အရှေ့တောင်အာရှ၏ ဒုတိယစီးပွားရေး အင်အားအကြီးဆုံးဖြစ်သည့် ထိုင်းတွင် ယခုနှစ် ပထမသုံးလပတ်ကာလ အတွင်း စီးပွားရေးဖွံ့ဖြိုးတိုးတက်မှုသည် ၁ ဒသမ ၅ ရာခိုင်နှုန်းရှိခဲ့ပြီး ယခင်နှစ် နောက်ဆုံး သုံးလပတ်ကာလ၏ စီးပွားရေးဖွံ့ဖြိုးတိုးတက်မှု ၁ ဒသမ ၇ ရာခိုင်နှုန်းနှင့် နှိုင်းယှဉ်ပါက သိသာစွာ ကျဆင်းသွားခဲ့သည်။

COVID-19 ကပ်ရောဂါကြောင့် ထိခိုက်ခဲ့ရသည့် ခရီးသွားကဏ္ဍကို ပြန်လည်နာလန်ထူရန် ရုန်းကန်နေရသည့် လူဦးရေ ၆၆ သန်းနေထိုင်သော ထိုင်းနိုင်ငံသည် မော်တော်ယာဉ်လုပ်ငန်း အပါအဝင် အဓိက ဖွံ့ဖြိုးတိုးတက်ရေး နယ်ပယ်ကဏ္ဍများလည်း အထစ်ထစ် အငေ့ါငေါ့ ဖြစ်နေဆဲဖြစ်သည်။

ထိုင်းနိုင်ငံအတွင်း သွားလာနေကြသူများကိုတွေ့ရစဉ်

လက်ရှိ နိုင်ငံရေး မတည်ငြိမ်မှုကြောင့် ထိုင်းပြည်သူများအား ဘတ် ၅၀၀ ဘီလျံတန်ကြေးရှိ ဒစ်ဂျစ်တယ်ငွေကြေး ထောက်ပံ့မှု အစီအစဉ် အပါအဝင် ၂၀၂၅ ခုနှစ် ဘဏ္ဍာနှစ်အတွက် ဘတ်ဂျက် ၃ ဒသမ ၇၅ ထရီလျံ လျာထားသည့် အစီအစဉ်များအပေါ် သံသယများ ရှိလာစေခဲ့သည်ဟု Standard Chartered Bank ၏ ထိပ်သီး စီးပွားရေးပညာ ရှင် တင်မ် လီလာဟာဖန် (Tim Leelahaphan) က ပြောကြားခဲ့သည်။

"နိုင်ငံရေး သေချာရေရာမှုမရှိတဲ့ အခြေအနေနဲ့ မပြတ်သားတဲ့ နိုင်ငံရေး အလားအလာဟာ ဘဏ္ဍာရေးမူဝါဒ အတွက် ကောင်းကျိုးမပြုတဲ့ ဂယက်ရိုက်ခတ်မှုတွေကို ရှိလာစေပါတယ်" ဟု တင်မ်က ပြောကြားခဲ့သည်။

ထိုင်းယာယီ ဘဏ္ဍာရေးဝန်ကြီးကမူ အစိုးရဘတ်ဂျက်သည် နှောင့်နှေးကြန့်ကြာ လိမ့်မည်မဟုတ်ကြောင်း ဩဂုတ် ၁၅ ရက်က ပြောကြားခဲ့သည်။

ဆရီသာ၏ အစိုးရအဖွဲ့သည် ရွေးကောက်ပွဲ မဲဆွယ်ကတိကဝတ်ဖြစ်သည့် ပြည်သူများကို ဘတ် ၅၀၀ ဘီလျံ တန်ကြေးရှိသည့် ဒစ်ဂျစ်တယ် ငွေကြေးထောက်ပံ့မှု အစီအစဉ်အတွက် စာရင်းသွင်းခဲ့ပြီးနောက် တစ်ရက်အကြာ တွင် ဖွဲ့စည်းပုံအခြေခံဥပဒေဆိုင်ရာခုံရုံးက ဆရီသာကို ရာထူးမှ ဖယ်ရှားခဲ့ခြင်းဖြစ်သည်။

ထိုင်းနိုင်ငံရေးသမားများကို တွေ့ရစဉ်

လက်ရှိတွင် ဒစ်ဂျစ်တယ် ငွေကြေးထောက်ပံ့မှု အစီအစဉ်အတွက် မှတ်ပုံတင် စာရင်းပေးသွင်းမှုကို စတင်ဖွင့်လှစ် သည့် နေ့မှာပင် ပါဝင်စာရင်းပေးသွင်းခဲ့သော ထိုင်းပြည်သူပေါင်း ၁၆ သန်းကျော် ရှိနေသည်။

ထိုအခြေအနေက သာမန် ထိုင်းပြည်သူများအကြား ငွေကြေးထောက်ပံ့မှုကို အရေးတကြီး လိုအပ်နေသည့် အခြေအနေကို ပြသရာရောက်ခဲ့သည်။

မတ်လကုန်ပိုင်းအထိ ထိုင်းနိုင်ငံတွင် အိမ်ထောင်စုများ၏ ကြွေးမြီသည် ဘတ် ၁၆ ဒသမ ၄ ထရီလျံ သို့မဟုတ် ဂျီဒီပီ၏ ၉၀ ဒသမ ၈ ရာခိုင်နှုန်းရှိပြီး အာရှတိုက်တွင် အမြင့်ဆုံးနှုန်းထားများထဲတွင် ပါဝင်နေသည်။

"ထိုင်းနိုင်ငံဟာ နက်ရှိုင်းတဲ့ နိုင်ငံရေးသဘောထား ကွဲလွဲမှုကို ပေါင်းကူးတံတားထိုးဖို့ ဖော်မြူလာတစ်ခုကို ရှာမတွေ့သေးပါဘူး" ဟု Capital Economics ကုမ္ပဏီ၏ အာရှရေးရာ ထိပ်သီးစီးပွားရေးပညာရှင် ဂါရတ် လက်သာ (Gareth Leather) က ပြောကြားခဲ့သည်။

Source: ရိုက်တာ

CNI News

၂၀၂၄ ခုနှစ်၊ ဩဂုတ် ၁၅

ထိုင်းဝန်ကြီးချုပ် ဆရီသာကို ရာထူးမှဖယ်ရှားရန်ဆုံးဖြတ်ခဲ့ပြီးနောက် အခြားသော နိုင်ငံရေး အပြောင်းအလဲ များကြားတွင် ရွှေ့ပြောင်းလုပ်သားများနှင့်သက်ဆိုင်သည့် လုပ်ငန်းစဉ်များမှာ ကြန့်ကြာသွားနိုင်ကြောင်း အလုပ်သမားအရေး ဆောင်ရွက်နေသူများက CNI သတင်းဌာနသို့ ပြောသည်။

ထိုင်းဖွဲ့စည်းပုံအခြေခံဥပဒေဆိုင်ရာခုံရုံးက ထိုင်းဝန်ကြီးချုပ် ဆရီသာကို ရာထူးမှဖယ်ရှားရန် သြဂုတ် ၁၄ ရက်နေ့ မှာ ဆုံးဖြတ်ခဲ့ခြင်းဖြစ်ပြီး သူသည် ဖြူးထိုင်းပါတီမှ ဖြစ်သည့်အတွက် ဝန်ကြီးချုပ်အသစ် ရွေးချယ်ရာတွင်လည်း ဖြူးထိုင်းပါတီမှ ဖြစ်နိုင်ကြောင်း သုံးသပ်ကြသည်။

ထို့ကြောင့် ရွှေ့ပြောင်းအလုပ်သမားများနှင့်ပတ်သက်၍ မူဝါဒအပြောင်းအလဲများ မဖြစ်နိုင်သော်လည်း အချိန် ကြန့်ကြာမှုများ ရှိသွားနိုင်ကြောင်း အလုပ်သမားအခွင့်အရေးဖောင်ဒေးရှင်း LRF မှ ဦးအောင်ကျော်က CNI သတင်းဌာနသို့ ပြောသည်။

 ရာထူးက ဖယ်ရှားခံလိုက်ရတဲ့ ထိုင်း၀န်ကြီးချုပ် ဆရီသာကိုတွေ့ရစဉ်

၎င်းက “မူလက ကျ‌နော်တို့က ထိုင်းနိုင်ငံအတွင်းမှာ ရှိနေကြတဲ့ မြန်မာ၊ ကမ္ဘောဒီးယား၊ လာအို၊ ဗီယက်နမ်ဆိုတဲ့ အလုပ်သမားတွေကို နေထိုင် အလုပ်လုပ်ကိုင်ခွင့်လက်မှတ် ပြုလုပ်ပေးတော့မယ်ဆိုပြီး ရှေ့ပြေးအနေနဲ့ ကြေညာ ချက်ထွက်ပြီးသား။ သို့သော် နောက်ဆက်တွဲ အလုပ်သမားဝန်ကြီးဌာနရယ်၊ ကျန်းမာရေးဌာနရယ်၊ ပြည်ထဲရေး ဝန်ကြီးဌာနရယ်က တိုင်ပင်ပြီးမှ ဘယ်နေ့၊ ဘယ်ရက်မှာ ဘယ်လိုပုံစံနဲ့ စမယ်ဆိုတာကို ကြေညာပါမယ်လို့ ထုတ်ပြန်ချက် ထုတ်ထားတယ်။ ဒီအခြေအနေမျိုးမှာ အခုလိုမျိုး လျှပ်တစ်ပြက်ကြီး အပြောင်းအလဲတွေ ဖြစ်ကုန် တယ်ဆိုတော့ နောက်ထပ် အစိုးရအသစ် ဖွဲ့စည်းပြီးသည်အထိ စောင့်ဆိုင်းရမှာ ဖြစ်တဲ့အတွက်ကြောင့် ထိုင်းနိုင်ငံ အတွင်းမှာ နေထိုင်အလုပ်လုပ်ခွင့် လက်မှတ်ရဖို့ စောင့်ဆိုင်းနေကြတဲ့ ရွှေ့ပြောင်း လုပ်သားတွေအတွက်တော့ နည်းနည်း အဟန့်အတား ဖြစ်သွားတာပေါ့။ လုပ်တော့လုပ်ပေးလိမ့်မယ်၊ ဒါပေမယ့် အချိန်အားဖြင့် တော်တော် နောက်ဆုတ်သွားလိမ့်မယ်” ဟု ပြောသည်။

ဝန်ကြီးချုပ် ဆရီသာသည် ရာဇဝတ်မှုဖြင့် စီရင်ချက် ချခံခဲ့ရသူ မစ္စတာပီချစ်ကို အစိုးရအဖွဲ့အတွင်း ရာထူး ခန့်အပ်ခဲ့ခြင်းကြောင့် ကျင့်ဝတ်ချိုးဖောက်သည်ဟုဆိုကာ တရားရုံးက ဆုံးဖြတ်ခဲ့ခြင်းဖြစ်သည်။

ဖွဲ့စည်းပုံအခြေခံဥပဒေဆိုင်ရာခုံရုံးက ဆရီသာကို ရာထူးမှဖယ်ရှားရန် မဲခွဲဆုံးဖြတ်ရာတွင် ၅ မဲအနက် ၄ မဲက သဘောတူကြောင်း မဲပေးခဲ့ခြင်းဖြစ်သည်။

ဆရီသာကို ဝန်ကြီးချုပ်ရာထူးမှ ဖယ်ရှားလိုက်ခြင်းကြောင့် ထိုင်းနိုင်ငံရေးတွင် အကျပ်အတည်းဖြစ်ပေါ် လာနိုင်ကြောင်း သုံးသပ်လျက်ရှိနေသည်။

ရွှေ့ပြောင်းလုပ်သားများကိုတွေ့ရစဉ်

သို့သော် ဝန်ကြီးချုပ်အသစ် ရာထူးအတွက် ဖြူးထိုင်းပါတီမှ မဟုတ်ဘဲ အခြားပါတီမှ အရွေးချယ်ခံရမည်ဆိုပါက အပြောင်းအလဲများ ဖြစ်သွားနိုင်ကြောင်း ပညာရေးနှင့်ဖွံ့ဖြိုးတိုးတက်ရေးဖောင်ဒေးရှင်း FED မှ အလုပ်သမား တာဝန်ခံ ဦးမင်းဦးက CNI သတင်းဌာနသို့ ပြောသည်။

၎င်းက “ဆရီသာတို့ ပါတီကပဲ အတည်ပြုပြီး ရွေးကောက်တင်မြှောက် တယ်ဆိုရင်တော့ ဒါက ပါတီရဲ့ မူဝါဒ လမ်းစဉ်က ရှိထားပြီးသား အဲဒီအတိုင်းပဲ ဆက်သွားမှာ။ သိပ်ကွာမှာ မဟုတ်ဘူး။ ဒါပေမယ့် ဖြစ်နိုင်ခြေရှိတာ ၅၀ ရာခိုင်နှုန်းက အရင်တုန်းက စစ်အစိုးရလက်ထက်တုန်းက ဒုဝန်ကြီးချုပ်နဲ့ ကျန်းမာရေးဝန်ကြီး လုပ်သွားပြီးတော့မှ ဒီဘက် ရွေးကောက်ပွဲ ဝင်တဲ့အခါကြတော့ သူ့ပါတီက အတိုင်းအတာတစ်ခုအထိ မဲရခဲ့တယ်။ ဆိုတော့ သူ့ကို လည်း ရနိုင်တယ်လို့ ပြောတယ်။ အဲဒီအပေါ် မူတည်တာပေါ့။ တကယ်လို့ သူရတယ်ဆိုရင်တော့ တစ်မျိုးဖြစ်နိုင် တယ်။ ဘာလို့ဆို သူက သူ့ပါတီနဲ့ သူ့မူဝါဒရှိတယ်လေ” ဟု ပြောသည်။

ဖြူးထိုင်းပါတီသည် မဲဆွယ်စည်းရုံးစဉ် ကာလကတည်းက ရွှေ့ပြောင်း အလုပ်သမားများနှင့်ပတ်သက်ပြီး ကတိကဝတ်များ ပြုခဲ့ကြသဖြင့် ထိုင်းဝန်ကြီးချုပ် ဆရီသာ လက်ထက်တွင် ရွှေ့ပြောင်းအလုပ်သမားများ အခြေခံလုပ်ခလစာအား ဘတ် ၄၀၀ သို့ တိုးမြှင့်ပေးရန်၊ နေထိုင်အလုပ်လုပ်ကိုင်ခွင့် အထောက်အထားများ ထုတ်ပေးရန်တို့ကို လုပ်ဆောင်ခဲ့သည်။

လက်ရှိ ထိုင်းနိုင်ငံတွင် ဝန်ကြီးချုပ် အပြောင်းအလဲသာမက အခြားတစ်ဖက်တွင်လည်း ဖွဲ့စည်းပုံအခြေခံ ဥပဒေဆိုင်ရာခုံရုံးက အတိုက်အခံပါတီဖြစ်သည့် Move Forward Party(MFP)ကို ဖျက်သိမ်းရန် ဆုံးဖြတ်ခဲ့သလို ပါတီခေါင်းဆောင်များကိုလည်း နိုင်ငံရေးလုပ်ခွင့် ၁၀ နှစ်ပိတ် ပင်ခဲ့သည်။

CNI Internaional News

ဆိုးလ်၊ ဩဂုတ် ၁၄

တောင်ကိုရီးယားတွင် လျှပ်စစ်ကားများ၏ ဘက်ထရီများ မီးလောင်ကျွမ်းခဲ့သည့် ဖြစ်စဉ်များကြောင့် ဘေးကင်း လုံခြုံမှုဆိုင်ရာ စည်းကမ်းများကို ပိုမိုတင်းကြပ်ရန် တိုက်တွန်းမှုများ ထွက်ပေါ်ခဲ့သည်ဟု Nikkei Asia မှ ဖော်ပြခဲ့ သည်။

ထို့နောက် တောင်ကိုရီးယား မော်တော်ယာဉ်လုပ်ငန်းကို ထိုခိုက်စေမည့် စိုးရိမ်မှုများလည်း ထွက်ပေါ်နေသည်။

ဩဂုတ် ၁၃ ရက်က တောင်ကိုရီးယား အရာရှိများသည် လျှပ်စစ်ကားများ မီးလောင်မှုကြောင့် လူထု၏ စိုးရိမ်စိတ် များကို ဖြေရှင်းရန်အတွက် အစည်းအဝေး ခေါ်ယူခဲ့သည်။

မကြာသေးမီနှစ်များအတွင်း လျှပ်စစ်ကားများ၏ ဘက်ထရီများ မီးလောင်မှု ဖြစ်စဉ်များရှိခဲ့သည်။

လျှပ်စစ်ကားများ အားသွင်းနေစဉ်

၂၀၂၃ ခုနှစ်က မီးလောင်မှု ၇၂ ကြိမ်၊ ၂၀၂၂ ခုနှစ်က ၄၃ ကြိမ်နှင့် ၂၀၂၁ ခုနှစ်က ၂၄ ကြိမ်ရှိခဲ့သည်ဟု အစိုးရ၏ မှတ်တမ်းများတွင် ဖော်ပြထာသည်။

၂၀၂၃ ခုနှစ်၊ ဩဂုတ် ၁ ရက်က ဆိုးလ် (Seoul) မြို့တော် အနောက်ဘက် အင်ချွမ် (Incheon) မြို့ရှိ လူနေ အဆောက်အအုံ၏ မြေအောက်ထပ် ကားပါကင်တွင် Mercedes-Benz လျှပ်စစ်ကားတစ်စီး စတင်မီးလောင် ကျွမ်းခဲ့ပြီးနောက် အနီးနားရှိ ကားအစီးရေ ၁၄၀ ခန့် မီးကူးစက်လောင်ကျွမ်းခဲ့သည်။

တောင်ကိုရီးယားနိုင်ငံသား အများစုသည် အင်ချွန်မြို့တွင် မီးလောင်ကျွမ်းမှု ဖြစ်ပွားခဲ့သည့် ထိုအဆောက်အအုံ ကဲ့သို့ လူနေထူထပ်သော အဆောက်အအုံများ၌ နေထိုင်လျက်ရှိပြီး အဆောက်အအုံ၏  မြေအောက် ကားပါကင် များ၌  ကားများကို ရပ်နားထားကြခြင်းဖြစ်သည်။

လျှပ်စစ်ကားများ၏ ဘက်ထရီများသည် နာရီပေါင်းများစွာကြာ မီးလောင်ကျွမ်းနိုင်ပြီး ငြှိမ်းသတ်ရ ခက်ခဲသည်ဟု တောင်ကိုရီးယား မီးသတ်ဌာနက ပြောကြားခဲ့သည်။

"လျှပ်စစ်ကားတွေ မီးလောင်တာကို သာမန် မီးသတ်ဆေးဘူးတွေနဲ့ ငြှိမ်းသတ်လို့ မရပါဘူး။ ဘာလို့လဲဆိုတော့ ကားတွေအောက်မှာ တပ်ထားတဲ့ လစ်သီယံဘက်ထရီတွေရဲ့ ပေါက်ကွဲမှုကြောင့် အပူချိန်ဟာ အရမ်းမြင့်မား နေလို့ပါပဲ" ဟု မီးသတ်ဌာနက ပြောကြားခဲ့သည်။

မီးလောင်ကျွမ်းနေတဲ့ လျှပ်စစ်ကားကို တွေ့ရစဉ်

ဇွန်လအတွင်းကလည်း လစ်သီယံဘက်ထရီ စက်ရုံတစ်ရုံတွင် ပြင်းထန်သည့် မီးလောင်ကျွမ်းမှု ဖြစ်ပွားခဲ့သဖြင့် အလုပ်သမား ၂၃ ဦး သေဆုံးခဲ့သည်။

ထို့ကြောင့် ပညာရှင်များနှင့် အရပ်ဘက် လူ့အဖွဲ့အစည်းများက လူနေရပ်ကွက်များတွင် လျှပ်စစ်ကားများ မီးလောင်ကျွမ်းမှုအန္တရာယ်ကို လျှော့ချရန် တင်းကျပ်သည့် ဘေးကင်းလုံခြုံမှုဆိုင်ရာ စည်းကမ်းများ ထုတ်ပြန်ရန် အစိုးရကို တိုက်တွန်းခဲ့သည်။

ပြည်သူများ၏ နေအိမ်များနှင့် သာမန်ကားများကို မီးကူးစက် လောင်ကျွမ်းမည့် အန္တရာယ်မှ လျှော့ချရန်အတွက် လူနေ အဆောက်အအုံများ၏ မြေအောက်ထပ် ကားပါကင်များတွင် လျှပ်စစ်ကားများ အားသွင်းသည့် နေရာများ အား မြေပြင်ဘေးရှိ လေဟာပြင်နေရာများသို့ ပြောင်းရွှေ့ရန် ကျွမ်းကျင်သူများက တိုက်တွန်းခဲ့သည်။

အင်ချွမ်မြို့တွင် ဖြစ်ပွားခဲ့သည့် မီးလောင်ကျွမ်းမှု ဖြစ်စဉ်သည် လျှပ်စစ်ကားများအတွက် ဘေးကင်းလုံခြုံရေး ဆိုင်ရာ စံချိန်စံညွှန်းများကို တင်းကြပ်ရန် သင်ခန်းစာတစ်ခုဖြစ်ကြောင်း ဒေလင်မ် (Daelim) တက္ကသိုလ်မှ မော်တော်ယာဉ် လေ့လာရေးဘာသာရပ်၏ ပါမောက္ခ ကင်မ် ဖီလ် ဆူး (Kim Pil-soo) က တိုက်တွန်းခဲ့သည်။

Source: Nikkei Asia

CNI News

၂၀၂၄ ခုနှစ်၊ ဇူလိုင် ၃၀

မိမိတို့နိုင်ငံ လက်ရှိအခြေအနေအရ စီးပွားရေးကဏ္ဍ ဖွံ့ဖြိုးတိုးတက်အောင် ဆောင်ရွက်ရာတွင် သမဝါယမစနစ် သည် အသင့်လျော်ဆုံးဖြတ်သည်ကို တွေ့ရသည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ၂၀၂၄ ခုနှစ်၊ ဇူလိုင် ၂၉ ရက်နေ့က ကျင်းပသည့် ပြည်ထောင်စုအစိုးရအဖွဲ့ အစည်းအဝေးမှာ ပြောကြားခဲ့သည်။

ခေတ်အဆက်ဆက်၌ အစိုးရများအနေဖြင့် စီးပွားရေးစနစ်အမျိုးမျိုးကို အကောင်အထည်ဖော် ဆောင်ရွက်ခဲ့ကြ ကြောင်း၊ မိမိတို့နိုင်ငံ၏ လက်ရှိ အခြေအနေအရ စီးပွားရေးကဏ္ဍ ဖွံ့ဖြိုးတိုးတက်အောင် ဆောင်ရွက်ရာတွင် သမဝါယမစနစ်သည် အသင့်လျော်ဆုံးဖြစ်သည်ကို တွေ့ရကြောင်း ၎င်းက ပြောသည်။

နစကဥက္ကဋ္ဌက “သမဝါယမစနစ်ဆိုသည်မှာ စိတ်ဆန္ဒ၊ ရည်ချယ်ချက်တူညီသည့် လုပ်ငန်းရှင် အချင်းချင်း၊ တောင်သူ အချင်းချင်း စုဖွဲ့ဆောင်ရွက်ရသည့် အသင်းအဖွဲ့စနစ်တစ်ခုဖြစ်ကြောင်း၊ ပါတီစုံဒီမိုကရေစီစနစ်တွင် အစိုးရက ပါဝင်ဆောင်ရွက်နိုင်သည့် လုပ်ငန်းနှင့်အစိုးရက ပါဝင်ဆောင်ရွက်နိုင်ခြင်းမရှိသည့် လုပ်ငန်းများရှိ ကြောင်း၊ ယင်းလုပ်ငန်းများ အဆင်ပြေချောမွေ့စွာ ဆောင်ရွက်နိုင်ရန် သမဝါယမစနစ်သည် သင့်လျော်သည့် စနစ်တစ်ခုဖြစ်သည်”ဟု ပြောသည်။

ကုန်စိမ်များ ရောင်းချနေစဉ်

ထို့ကြောင့် သမဝါယမအသင်းများ ဖွဲ့စည်း၍ စိုက်ပျိုးရေး၊ မွေးမြူရေးနှင့် ကုန်ထုတ်လုပ်ငန်းများကို မျိုး၊ မြေ၊ ရေ၊ နည်း(၄)ချက်နှင့်အညီ ဖွံ့ဖြိုးတိုးတက်အောင် ဆောင်ရွက်ပြီး ထိုမှတဆင့် စိုက်ပျိုးရေးနှင့် မွေးမြူရေး ထုတ်ကုန် များကို အခြေခံသည့် စက်ရုံ၊ အလုပ်ရုံများ တည်ထောင် ဆောင်ရွက်သွားစေလိုကြောင်း၊ ထိုသို့ ဆောင်ရွက်ရာ တွင် နိုင်ငံတော်အနေဖြင့် အရင်းအနှီး၊ နည်းပညာနှင့် အခြားလိုအပ်သည်များကို ထောက်ပံ့ကူညီသွားမည်ဖြစ် ကြောင်း ၎င်းက ပြောသည်။

ထို့နောက် ပြည်တွင်း၌ အရည်အသွေးပြည့်မီသည့် စားသောက်ကုန်များ ထုတ်လုပ်လျက်ရှိသကဲ့သို့ အရည် အသွေးပြည့်မီသည့် လူသုံးကုန်ပစ္စည်းများ၊ အဝတ်အထည်များနှင့် တန်ဖိုးမြင့်ထုတ်ကုန်များ ထုတ်လုပ်နိုင်ရေး ကြိုးပမ်းဆောင်ရွက်သွားစေလိုကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

မြန်မာနိုင်ငံ၏ စီးပွားရေး ဈေးကွက်ကို သမဝါယမစနစ်ဖြင့် ပြန်လည် ကျင့်သုံးမည်ဆိုသည်မှာ မျက်မှောက်နိုင်ငံ တကာ အခင်းအကျင်းနှင့် ကိုက်ညီမှုရှိသော စနစ်ဖြင့်ရန်လိုအပ်သလို ဘယ်လို သမဝါယမစနစ်ကို ကျင့်သုံးမှာ လဲဆိုသည်ကို ရှင်းရှင်းလင်းလင်း ချပြရန်လိုအပ်ကြောင်း စီးပွားရေး လုပ်ငန်းရှင်များက ပြောသည်။

 ပြည်ထောင်စုအစိုးရအဖွဲ့ အစည်းအဝေးကျင်းပနေစဉ်

အလားတူ နိုင်ငံရေးအကဲခတ်များကတော့ ဦးနေဝင်းနှင့် ဦးသန်းရွှေ လက်ထက်က ကျင့်သုံးခဲ့သော သမဝါယမ စနစ်မျိုးဆိုလျှင် မြန်မာနိုင်ငံ၏ စီးပွားရေးသည် ပိုမိုကျဆင်းသွားနိုင်ကြောင်း၊ နည်းပညာခေတ်တွင် သမဝါယမ စနစ်ကို ပြန်လည် ကျင့်သုံးမည်ဆိုပါက လက်တွေ့ကျမကျကို သုံးသပ်သင့်ကြောင်း ထောက်ပြကြသည်။

၂၀၀၈ ဖွဲ့စည်းပုံအခြေခံဥပဒေ၏ ပုဒ်မ ၃၅ တွင် နိုင်ငံတော်၏ စီးပွားရေးစနစ်သည် ဈေးကွက်စီးပွားရေးစနစ်ဖြစ် သည်ဟု ပြဋ္ဌာန်းထားသည်။

ထို့နောက် ပုဒ်မ ၃၆ (က) အမျိုးသားစီးပွားရေး တိုးတက်ဖွံ့ဖြိုးရေးအတွက် နိုင်ငံတော်၊ ဒေသဆိုင်ရာ အဖွဲ့အစည်းများ၊ သမဝါယမအဖွဲ့အစည်းများ၊ ဖက်စပ်အဖွဲ့အစည်းများ၊ ပုဂ္ဂလိကစသည့် စီးပွားရေး အင်အားစု အားလုံးကို စီးပွားရေးလုပ်ငန်းများတွင် ပါဝင်ဆောင်ရွက်ခွင့်ပြုသည်ဟု ပြဋ္ဌာန်းထားသည်။