CNI International News

ဘန်ကောက်၊ နိုဝင်ဘာ ၁၂

ထိုင်းနိုင်ငံတွင် အလုပ်လုပ်ခွင့်ပါမစ် သက်တမ်းကုန်နေသည့် ကမ္ဘောဒီးယားလုပ်သား ၉၀,၀၀၀ နေရာအတွက် အစားထိုးဖို့ အလုပ်သမားအသစ်များ ခေါ်ယူရန် ပြင်ဆင်နေကြောင်း အလုပ်သမားရေးဝန်ကြီး ထရီနွတ်ချ် သီယန်သွန်း (Trinuch  Thienthong) က ပြောကြားခဲ့သည်ဟု The Nation မှ ဖော်ပြခဲ့သည်။

၂၀၂၅ ခုနှစ်၊ ဩဂုတ်လက ယာယီဝန်ကြီးချုပ် ဖွမ်သမ် ဝီချာယာချိုင်း (Phumtham Wechayachai) ၏ အစိုးရ လက်ထက်တွင် အတည်ပြုပေးခဲ့သည့် ကမ္ဘောဒီးယားနိုင်ငံသားများအား ပါမစ်သက်တမ်းထက် ကျော်လွန်နေထိုင် ခွင့်ကို ဆိုင်းငံ့ရန် ဝန်ကြီးချုပ်နှင့် ပြည်ထဲရေးဝန်ကြီး အနူတင် ချန်ဗီရာကူလ် (Anutin Charnvirakul) က အမိန့် ထုတ်ပြန်ခဲ့ပြီးနောက် ထရီနွတ်ချ်က ထိုကဲ့သို့ ပြောကြားခဲ့ခြင်းဖြစ်သည်။

မကြာသေးမီက နယ်စပ်ဒေသတွင် တင်းမာမှုများ မြင့်တက်ခဲ့ပြီး မြေမြှုပ်မိုင်းတစ်လုံး ပေါက်ကွဲမှုကြောင့် ထိုင်း စစ်သား တချို့ ဒဏ်ရာရခဲ့သည့် ဖြစ်စဉ်ကို တုန့်ပြန်သည့် အနေဖြင့် ထိုင်းနိုင်ငံက ကမ္ဘောဒီးယားနှင့် ငြိမ်းချမ်းရေး ကြေညာချက်အား ဆိုင်းငံ့ခဲ့ပြီးနောက် ယခုကဲ့သို့ ဆုံးဖြတ်ခဲ့ခြင်းဖြစ်သည်။

ပါမစ် သက်တမ်း ကုန်နေသည့် ကမ္ဘောဒီးယား နိုင်ငံသားများအား နေထိုင်ခွင့် ဆိုင်းငံ့မှုကြောင့် ကမ္ဘောဒီးယား လုပ်သားများကို မှီခိုအားထားနေရသည့် လုပ်ငန်းများ၊ အထူးသဖြင့် စိုက်ပျိုးမွေးမြူရေး လုပ်ငန်းများတွင် အလုပ် များ ရပ်တန့်မှုဖြစ်နိုင်ကြောင်း ထရီနွတ်ချ်က ပြောသည်။

ကမ္ဘောဒီးယား အလုပ်သမားတွေကို တွေ့ရစဉ်

“ထိုင်းနိုင်ငံက မြန်မာ၊ လာအိုနဲ့ ဗီယက်နမ်နိုင်ငံတွေက လုပ်သားတွေနဲ့ အစားထိုးဖို့အတွက် လုပ်ဆောင်ထားပါ တယ်။ ဒီအကြောင်းအရာကို အတည်ပြုဖို့နဲ့ ညွှန်ကြားချက်တွေ ရရှိဖို့အတွက် အစိုးရအဖွဲ့ကို တင်ပြသွားမှာပါ” ဟု ၎င်းက ဆိုသည်။

လက်ရှိတွင် ထိုင်းနိုင်ငံ၌ ကမ္ဘောဒီးယားလုပ်သား ၁၀၀,၀၀၀ ခန့်ရှိပြီး ၎င်းတို့အနက် ၉၀,၀၀၀ ခန့်သည် ပါမစ် သက်တမ်း ကုန်နေသည့် တရားဝင် လုပ်သားများဖြစ်ကာ နယ်စပ်များ ပိတ်ဆို့ထားမှုကြောင့် နေရပ်သို့ မပြန်နိုင်ဘဲ ထိုင်းတွင် သောင်တင်နေခြင်းဖြစ်သည်။

ပါမစ်သက်တမ်း ကုန်နေသည့် လုပ်သားများကို နေရပ်သို့ ပြန်ပို့မည် ဟုတ်/မဟုတ် သတင်းထောက်များက မေးမြန်းချိန်တွင် ထရီနွတ်ချ်က ထိုကိစ္စသည် လုံခြုံရေးတပ်ဖွဲ့များ အပါအဝင် အေဂျင်စီ အများအပြား ပါဝင် ရလိမ့်မည်ဖြစ်ပြီး အစိုးရအဖွဲ့ အစည်းအဝေးအတွင်း ဆွေးနွေးသွားမည်ဟု ဖြေကြားခဲ့သည်။

အလုပ်သမားရေးဝန်ကြီး ထရီနွတ်ချ် သီယန်သွန်းကို တွေ့ရစဉ်

“ထိုင်းနိုင်ငံအနေနဲ့ လုပ်သားအင်အား ပြတ်လပ်မှုကို ပိုမိုဆိုးရွားသွားတာမျိုး အဖြစ်မခံနိုင်ပါဘူး။ ထိုင်းနိုင်ငံရဲ့ အဓိက ပြည်ပလုပ်သား အင်အားစုထဲမှာ ပါဝင်နေတဲ့ ဗီယက်နမ်၊ လာအိုနဲ့ မြန်မာနိုင်ငံတွေက လုပ်သားတွေ အတွက် ပါမစ်တွေ သက်တမ်း ထပ်တိုးပေးဖို့ ပြင်ဆင်ထားပါတယ်”ဟု ထရီနွတ်ချ်က ပြောသည်။

လုပ်သားအင်အား အစားထိုးရေးနှင့် ပတ်သက်ပြီး ဒုက္ခသည် စခန်းများမှ လုပ်သားအင်အား ၄၀,၀၀၀ ကျော်ကို စုဆောင်းရန် အပါအဝင် မြန်မာနှင့်ဗီယက်နမ် လုပ်သားများအတွက် ပါမစ်သက်တမ်းတိုးရေး အစီအစဉ်များကို အလျင်အမြန် လုပ်ဆောင်သွားမည်ဟုလည်း ထရီနွတ်ချ်က ပြောကြားခဲ့သည်။

Source: The Nation

CNI International News

နယူးဒေလီ၊ နိုဝင်ဘာ ၅

အိန္ဒိယနိုင်ငံတောင်ပိုင်း ကီရာလာ (Kerala) ပြည်နယ်သည် အလွန်အမင်း ဆင်းရဲမွဲတေမှုမှ လွတ်မြောက်သွားပြီ ဖြစ်ကြောင်း နိုဝင်ဘာ ၁ ရက်တွင် ကြေညာခဲ့သဖြင့် အိန္ဒိယ၌ အလွန်အမင်း ဆင်းရဲမွဲတေမှု ကင်းစင်သွားသည့် ပထမဆုံးပြည်နယ် ဖြစ်လာခဲ့သည်ဟု CNA မှ ဖော်ပြခဲ့သည်။

ကီရာလာပြည်နယ်တွင် အလွန်အမင်း ဆင်းရဲမွဲတေမှု ပပျောက်ရေး စီမံချက်အရ ဒေသခံ အာဏာပိုင် အဖွဲ့အစည်း များက ဦးဆောင်သည့် ၄ နှစ်ကြာ စီမံကိန်းအပြီး၌ ကီရာလာပြည်နယ်ဝန်ကြီးချုပ် ပီနာရာယီ ဗီဂျာယန် (Pinarayi Vijayan) က ထိုကဲ့သို့ ကြေညာခဲ့ခြင်း ဖြစ်သည်။

ကမ္ဘာ့ဘဏ်၏ သတ်မှတ်ချက်အရ လူတစ်ဦးသည် တစ်ရက်လျှင် ၃ ဒေါ်လာအောက်သာ ရရှိပါက အလွန်အမင်း ဆဲရဲမွဲတေစွာ နေထိုင်နေရကြောင်း ဖော်ပြထားသည်။

ကီရာလာပြည်နယ်ဝန်ကြီးချုပ် ပီနာရာယီ ဗီဂျာယန်ကို တွေ့ရစဉ်

ထိုသတ်မှတ်ချက်အရ ၂၀၂၅ ခုနှစ်တွင် ကမ္ဘာတစ်ဝန်း၌ လူပေါင်း သန်း ၈၃၀ ကျော်သည် အလွန်အမင်း ဆင်းရဲ မွဲတေမှု သတ်မှတ်ချက်ထဲ၌ အကျူံးဝင်နေသည်။

ကီရာလာပြည်နယ်တွင် အလွန်အမင်း ဆင်းရဲမွဲတေသည့် သတ်မှတ်ချက်ထဲ၌ ပါဝင်နေသော မိသားစုဝင်ပေါင်း ၆၄,၀၀၀ ကျော်ရှိကြောင်း ၂၀၂၁ ခုနှစ်က စစ်တမ်းကောက်ယူခဲ့ပြီးနောက် ဆင်းရဲမွဲတေမှု လျှော့ချရေး စီမံကိန်းကို စတင် လုပ်ဆောင်ခဲ့ခြင်းဖြစ်သည်။

ကီရာလာပြည်နယ် အာဏာပိုင်များသည် ဝင်ငွေ တစ်ခုတည်းကိုသာ အာရုံစိုက်ချင်းထက် ပုံမှန်ဝင်ငွေမရှိမှု၊ အိုးအိမ်၊ အစားအစာနှင့် ကျန်းမာရေး စောင့်ရှောက်မှုကဏ္ဍ အားလုံးကို အကဲဖြတ် ချင့်တွက်ပြီး စီမံကိန်းအား လုပ်ဆောင်ခဲ့ခြင်းဖြစ်သည်။

ကီရာလာပြည်နယ် လူထုရဲ့ လူနေမှုဘဝကို တွေ့ရစဉ်

“လူမှုသက်သာ ချောင်ချိရေး အစီအစဉ်တွေနဲ့ မကြုံဖူးတဲ့ မိသားစုတွေ ရှိနေပါတယ်။ အလွန်အမင်း ဆင်းရဲမွဲတေမှု ဆိုတဲ့ သတ်မှတ်ချက်ထဲမှာ ပါဝင်နေတဲ့ မိသားစုတွေဟာ ပြည်နယ်အစိုးရရဲ့ ထောက်ပံ့မှုကို မရဘဲ ရှင်သန်ခဲ့ရ ပါတယ်”ဟု ဒေသန္တရအစိုးရ၊ ယစ်မျိုးခွန်နှင့် လွှတ်တော်ရေးရာ ပြည်နယ်ဝန်ကြီး အမ်ဘီ ရာဂျက်ရှ် (MB Rajesh) က ပြောကြားခဲ့သည်။

လွန်ခဲ့သည့် လေးနှစ်ကျော်က အစိုးရဌာန အများအပြားသည် ထိုမိသားစုများကို ဆင်းရဲတွင်းမှ ဆွဲထုတ်နိုင်ရန် ပူးပေါင်းဆောင်ရွက်ခဲ့ကြပြီး အစားအစာ၊ နေစရာနေရာ၊ ဆေးဝါးနှင့် ကလေးများအတွက် ပညာသင်ဆုများ ထောက်ပံ့ပေးခဲ့သည်။

ထို့ပြင် အိန္ဒိယတွင် တစ်နိုင်ငံလုံး အတိုင်းအတာနှင့် အလွန်အမင်း ဆင်းရဲမွဲတေမှုနှုန်းကို လျှော့ချရာ၌ တိုးတက် မှုများ ရရှိခဲ့သည်။

အိန္ဒိယတွင် လွန်ခဲ့သည့် ဆယ်စုနှစ်က အလွန်အမင်း ဆင်းရဲမွဲတေမှုနှုန်း ၁၆ ဒသမ ၂ ရာခိုင်နှုန်းရှိခဲ့ရာမှ ၂၀၂၃ ခုနှစ် ဘဏ္ဍာနှစ်အတွင်း  အလွန်အမင်း ဆင်းရဲမွဲတေမှုနှုန်း ၂ ဒသမ ၃ ရာခိုင်နှုန်းသာ ရှိတော့ကြောင်း ကမ္ဘာ့ဘဏ်က ထုတ်ပြန်ခဲ့သည်။

Source: CAN

CNI International News

၂၀၂၅ ခုနှစ်၊ အောက်တိုဘာ ၃၁

တောင်ကိုရီးယားနိုင်ငံတွင် အမေရိကန်သမ္မတ ဒေါ်နယ်ထရမ့် (Donald Trump)နှင့် တရုတ်သမ္မတ ရှီကျင့်ဖျင် (Xi Jinping) တို့ အစည်းအဝေးအပြီး၌ ကမ္ဘာလုံးဆိုင်ရာ ရှယ်ယာစျေးကွက်များ အနည်းငယ် ကျဆင်းခဲ့ကြောင်း ရိုက်တာမှ ဖော်ပြခဲ့သည်။

ထရမ့်နှင့်ရှီတို့၏ အစည်းအဝေး အပြီးတွင် ကုန်သွယ်ရေးနှင့် ပထဝီနိုင်ငံရေးသည် သေချာရေရာမှု မရှိသေးဘဲ ရင်းနှီးမြှုပ်နှံသူများကလည်း အခြေအနေကို လေ့လာစောင့်ကြည့်နေသည်။

ထရမ့်သည် ရှီနှင့် ၂ နာရီနီးပါးကြာ အစည်းအဝေး ပြုလုပ်ခဲ့ပြီးနောက် တရုတ်၏ သွင်းကုန်များအပေါ် ကုန်သွယ် ခွန်များ လျှော့ချပေးမည်ဟု သဘောတူခဲ့ပြီး အပြန်အလှန် အနေဖြင့် တရုတ်က အမေရိကန်ထံမှ ပဲပိစပ်များကို ပြန်လည်ဝယ်ယူခြင်း၊ မြေရှားသတ္တု တင်ပို့ရောင်းချမှုအား ဆက်လက် ဖွင့်ပေးထားခြင်းနှင့် ဖန်တနိုင်းလ် မူးယစ် ဆေးများ မှောင်ခိုကူးမှုကို တိုက်ဖျက်ရေးတို့ ပြုလုပ်ပေးမည်ဟု သဘောတူခဲ့ကြောင်း ပြောကြားခဲ့သည်။

ရှီကလည်း အမေရိကန်နှင့် ပူးပေါင်းဆောင်ရွက်မှုများကို မြှင့်တင်ရန် ပြောကြားခဲ့သည်ဟု တရုတ်နိုင်ငံပိုင် မီဒီယာက ဖော်ပြခဲ့သည်။

သမ္မတ ရှီကျင့်ဖျင်နဲ့ သမ္မတ ဒေါ်နယ်ထရမ့်ကို တွေ့ရစဉ်

သို့သော် ကုန်သည်များက အမေရိကန်နှင့်တရုတ်ကြား ရှင်းလင်းတိကျသည့် ပူးပေါင်းဆောင်ရွက်မှု လက္ခဏာများ ကို လေ့လာသုံးသပ်နေချိန်တွင် စတော့ရှယ်ယာ စျေးကွက်သည်လည်း အပြောင်းအလဲ မြန်နေဆဲဖြစ်ကြောင်း လေ့လာသူများက ပြောကြားခဲ့သည်။

ထိုအချိန်အတွင်း အမေရိကန်၏ အကြီးဆုံး နည်းပညာကုမ္ပဏီ ၂ ခုဖြစ်သည့် Microsoft နှင့် Meta ကုမ္ပဏီတို့၏ ဝင်ငွေများ ထုတ်ပြန်မှုသည် ရင်းနှီးမြှုပ်နှံသူများကို စိတ်ပျက်စေခဲ့ပြီး Microsoft ၏ ရှယ်ယာသည် ၃ ရာခိုင်နှုန်းနှင့် Meta ၏ ရှယ်ယာစျေးသည် ၇ ရာခိုင်နှုန်း အသီးသီးကျဆင်းခဲ့သည်။

ဥရောပ စတော့အိတ်ချိန်းဖြစ်သည့် STOXX 600 တွင်လည်း ရှယ်ယာစျေး ၀ ဒသမ ၃ ရာခိုင်နှုန်း ကျဆင်းခဲ့သည်။

ဒေါ်လာစျေးသည်လည်း အောက်တိုဘာ ၃၀ ရက်က ဂျပန်နိုင်ငံသုံး ယန်းငွေမှလွဲပြီး ကျန်ငွေကြေးများနှင့် နှိုင်းယှဉ် ပါက တန်ဖိုးအနည်းငယ် လျော့ကျသွားခဲ့ပြီး ယန်းငွေနှင့် ငွေလဲနှုန်းတွင် ငွေတန်ဖိုး အပြောင်းအလဲ သိပ်မရှိခဲ့ပေ။

Source: ရိုက်တာ

CNI International News

ရှန်ကျန်း၊ အောက်တိုဘာ ၃၁

ပြီးခဲ့သည့်လအတွင်း တရုတ်၏ လျှပ်စစ်ကားကုမ္ပဏီဖြစ်သည့် BYD ကုမ္ပဏီသည် ဥရောပတွင် လျှပ်စစ်ကားများ စံချိန်တင် ရောင်းအားမြင့်တက်ခဲ့ကြောင်း South China Morning Post မှ ဖော်ပြခဲ့သည်။

BYD သည် ၎င်း၏ လျှပ်စစ်ကားများကို မော်ဒယ်အမျိုးမျိးဖြင့် အများအပြား ထုတ်လုပ်ခဲ့ပြီး ၎င်း၏ အရောင်း ကွန်ရက်ကို ချဲ့ထွင်ခဲ့သဖြင့် လျှပ်စစ်ကား စျေးကွက်တွင် လွှမ်းမိုးထားသည့် Tesla ကုမ္ပဏီနှင့် ရောင်းအား ကွာခြားမှုကို ကျဉ်းမြောင်းစေခဲ့သည်။

ရှန်ကျန်း(Shenzhen)မြို့ အခြေစိုက် BYD ကုမ္ပဏီသည် စက်တင်ဘာလအတွင်း ဥရောပတွင် လျှပ်စစ်ကား အစီး ရေ ၂၄,၉၆၃ စီး ရောင်းချနိုင်ခဲ့ပြီး ပြီးခဲ့သည့်နှစ် ကာလတူက ရောင်းချနိုင်ခဲ့သည့် ကားအစီးရေ ၅၀၁၃ စီးနှင့် နှိုင်းယှဉ်ပါက ရောင်းအား ၅ ဆနီးပါး မြင့်တက်ခဲ့ခြင်းဖြစ်ကြောင်း ဥရောပမော်တော်ယာဉ် ထုတ်လုပ်သူများ အသင်း (ACEA) ၏ မှတ်တမ်းများအရ သိရသည်။

ACEA သည် ဥရောပသမဂ္ဂ၊ ဗြိတိန်၊ အိုက်စလန်၊ လက်ချက်စတိန်း၊ နော်ဝေ၊ ဆွစ်ဇာလန်နိုင်ငံများတွင် မော်တော်ယာဉ် ရောင်းချမှုများကို စာရင်းကောက်ခံသည့် အဖွဲ့ဖြစ်သည်။

တရုတ်ထုတ် လျှပ်စစ်ကားများကို တွေ့ရစဉ်

ယခုနှစ် စက်တင်ဘာလက အမေရိကန်၏ Tesla ကုမ္ပဏီသည် ပြီးခဲ့သည့်နှစ် စက်တင်ဘာလက ဥရောပတွင် မော်တော်ယာဉ် ရောင်းချမှုပမာဏနှင့် နှိုင်းယှဉ်ပါက ၁၀ ဒသမ ၅ ရာခိုင်နှုန်း လျော့ကျခဲ့ပြီး ကားအစီးရေ ၃၉,၈၃၇ စီး ရောင်းချနိုင်ခဲ့သည်။

“ကိန်းဂဏန်းတွေအရ BYD ရဲ့ နိုင်ငံတကာ မဟာဗျူဟာက တော်တော် အလုပ်ဖြစ်တယ်ဆိုတာ သက်သေပြနေ ပါတယ်”ဟု ရှန်ဟိုင်းမြို့ရှိ တစ်သီးပုဂ္ဂလ လေ့လာသူဖြစ်သည့် ကော်ရှန်း (Gao Shen) က ပြောကြားခဲ့သည်။

“ကမ္ဘာ့အကြီးဆုံး EV ကုမ္ပဏီအဖြစ် BYD အနေနဲ့ ၎င်းရဲ့ ဒီဇိုင်းနှင့် ကုန်ထုတ်စွမ်းရည်တွေကို ပြသဖို့ တရုတ်နိုင်ငံ အပြင်ဘက်မှာ ရောင်းအားကို ဆက်လက် မြှင့်တင်ဖို့ လိုအပ်နေဆဲဖြစ်တယ်”၎င်းက ဆိုသည်။

BYD ကုမ္ပဏီသည် ၂၀၂၆ ခုနှစ်တွင် ဥရောပ၌ ၎င်း၏ ကားအရောင်းပြခန်းများကို လက်ရှိထက် ၂ ဆ ပိုမို ဖွင့်လှစ် ရန် စီစဉ်ထားကြောင်း BYD ကုမ္ပဏီ၏ အလုပ်အမှုဆောင် ဒုဥက္ကဋ္ဌ စတယ်လာ လီ (Stella Li) က ပြီးခဲ့သည့်လ အတွင်းက မြူးနစ်မြို့တွင် ပြုလုပ်သည့် IAA Mobility ညီလာခံမှာ ပြောကြားခဲ့သည်။

ဥရောပတွင် BYD ကုမ္ပဏီ၏ ကားမော်ဒယ် ၁၃ မျိုးကို ရောင်းချနေပြီး ၂၀၂၈ ခုနှစ်၌ ဥရောပတွင် ရောင်းချမည့် ကားများအားလုံးကို ပြည်တွင်းမှာ ထုတ်လုပ်သွားမည်ဖြစ်ကြောင်း ပြောကြားခဲ့သည်။

Source: South China Morning Post

CNI International News

ရာဂျက်စသန်၊ အောက်တိုဘာ ၃၁

ဆိုလာစျေးကွက်တွင် တရုတ်၏ လွှမ်းမိုးမှုကို ရင်ဆိုင်ရာ၌ အိန္ဒိယ၏ ဆိုလာပြား ထုတ်လုပ်ရေးကဏ္ဍကို မြှင့်တင်ရန် ရည်ရွယ်ခဲ့သည့် ကုန်သွယ်ခွန် တိုးမြှင့်ကောက်ခံမှုသည် ပရောဂျက်များနှင့် စားသုံးသူများအတွက် ကုန်ကျစရိတ်များ မြင့်တက်စေခဲ့သည်ဟု Nikkei Asia မှ ဖော်ပြခဲ့သည်။

အိန္ဒိယသည် ၂၀၂၂ ခုနှစ်၊ ဧပြီလ ကတည်းက ပြည်ပမှ ဝယ်ယူတင်သွင်းသည့် ဆိုလာပြားများအပေါ် အခွန် ၄၀ ရာခိုင်နှုန်း၊ ဆိုလာဆဲလ် (ဆိုလာပြားတွင် ပါဝင်သည့် ဆိုလာအကွက်) များအပေါ် အခွန် ၂၅ ရာခိုင်နှုန်း တိုးမြှင့် ခဲ့သည်။

အိန္ဒိယ၏ ဆိုလာပြား ဝယ်ယူတင်သွင်းမှု စုစုပေါင်း၏ ၈၀ ရာခိုင်နှုန်းကျော်မှာ တရုတ်နိုင်ငံမှ ဝယ်ယူတင်သွင်းနေ ရခြင်းဖြစ်သဖြင့် ထိုကဲ့သို့ ကုန်သွယ်ခွန် တိုးမြှင့်မှုသည် တရုတ်ထုတ်ကုန်များအပေါ် မှီခိုမှုအား လျှော့ချရန် ရည်ရွယ်ခဲ့ခြင်းဖြစ်သည်။

သို့သော် ထိုကဲ့သို့ အခွန်တိုးမြှင့်မှုကြောင့် အိန္ဒိယ၏ ဆိုလာပြား ထုတ်လုပ်ရေး ပရောဂျက်များအတွက် ကုန်ကျ စရိတ်များသည် ၂၀ ရာခိုင်နှုန်းမှ ၂၅ ရာခိုင်နှုန်းအထိ ပိုမိုများပြားလာခဲ့သည်ဟု လေ့လာသူများက ပြောကြား ခဲ့သည်။

အိန္ဒိယဆိုလာစီမံကိန်းကို တွေ့ရစဉ်

ထို့ပြင် အခွန်တိုးမြှင့်ကောက်ခံမှု မတိုင်မီ ဆိုလာ ပရောဂျက်များကို လေလံဆွဲခဲ့သည့် လုပ်ငန်းရှင်များသည် ကုန်ကျစရိတ်များ မြင့်တက်လာမှုကြောင့် ၎င်းတို့၏ ပရောဂျက်များကို ဆက်လက် လုပ်ကိုင်ရန် ရုန်းကန်နေ ရသည်။

ထိုကဲ့သို့ ကုန်ကျစရိတ်များ မြင့်တက်မှုကြောင့် ဆိုလာပြား ထုတ်လုပ်သူများသာမက တစ်ဆင့်ခံ ဖြန့်ချိပေးသည့် ကုမ္ပဏီများနှင့် စားသုံးသူများ အတွက်လည်း စျေးနှုန်း အခက်အခဲများနှင့် ရင်ဆိုင်ခဲ့ရသည်။

ထို့ကြောင့် ကုန်သွယ်ခွန် တိုးမြှင့်မှုသည် ပြည်တွင်း ဆိုလာ ထုတ်လုပ်သူများကို ကာကွယ်ပေးရန် ရည်ရွယ် သော်လည်း ဆိုလာစွမ်းအင် စျေးနှုန်းများအား ပိုမိုမြင့်တက်စေခဲ့သည်။

အိန္ဒိယသည် ၂၀၃၀ ပြည့်နှစ်တွင် ဆိုလာစွမ်းအင်ကဲ့သို့ ပြန်ပြည့်မြဲစွမ်းအင် ထုတ်လုပ်အားကို ၅၀၀ ဂဂ္ဂါဝပ်အထိ ထုတ်လုပ်နိုင်ရန် မျှော်မှန်းထားသော်လည်း သတ်မှတ်ချက်ကို ပြည့်မီရန် ကုန်ကျစရိတ် မြင့်တက်မှုများက အတားအဆီးသဖွယ် ဖြစ်နေသည်။

ဆိုလာ ထုတ်လုပ်သူများကလည်း ဆိုလာပြား အသစ်များ ရောင်းချမှု အခြေအနေသည် နှေးကွေးလာနိုင်ပြီး အိန္ဒိယ၏ ရာသီဥတုနှင့် စွမ်းအင်လုံခြုံရေး ရည်မှန်းချက်များကို ထိခိုက်စေနိုင်ကြောင်း သတိပေးခဲ့သည်။

Source: Nikkei Asia

CNI International News

ဟောင်ကောင်၊ အောက်တိုဘာ ၂၇

ဒစ်ဂျစ်တယ် ငွေကြေးများသည် ကမ္ဘာလုံးဆိုင်ရာ ပထဝီနိုင်ငံရေးတွင် အလွန်အင်အားကြီးပြီး အနှောင့်အယှက် ပေးနိုင်သည့် လက်ကိုင်တုတ် တစ်ခုဖြစ်လာကာ အရေးကြီးလာသည်ဟု South China Morning Post မှ ဖော်ပြခဲ့သည်။

ထို့နောက် ပဋိပက္ခဖြစ်နေသည့် အချိန်များတွင် ဘဏ္ဍာရေးဆိုင်ရာ စစ်မြေပြင်ကို အခြေခံကျကျ ပုံဖော်လာနိုင် ကြောင်း တရုတ်ကွန်မြူနစ်ပါတီက ထုတ်ဝေသည့် Study Times သတင်းစာ၏ ဆောင်းပါး၌ ဖော်ပြခဲ့သည်။

ကမ္ဘာလုံးဆိုင်ရာ ပဋိပက္ခများတွင် ဒစ်ဂျစ်တယ် ငွေကြေးများကို စစ်ဘက်ဆိုင်ရာနှင့် မဟာဗျူဟာ နည်းလမ်းများ အရ အသုံးပြု လာကြသည်ဟုလည်း ထိုဆောင်းပါး၌ ဖော်ပြထားသည်။

ဒစ်ဂျစ်တယ် ယွမ်ငွေ (e-CNY) ကို တွေ့ရစဉ်

ဒစ်ဂျစ်တယ် ငွေကြေးသည် နိုင်ငံများအတွက် ပိတ်ဆို့မှုများကို ရှောင်လွှဲရန်၊ စစ်ပွဲကာလ စစ်ဆင်ရေးများကို ငွေကြေး ထောက်ပံ့ပေးနိုင်ရန်နှင့် စီးပွားရေး တည်ငြိမ်မှုကို ထိန်းသိမ်းနိုင်ရန် အထောက်အကူ ပြုနိုင်သည်ဟု ဆိုသည်။

ဒစ်ဂျစ်တယ် ငွေကြေးများသည် လျှင်မြန်လုံခြုံပြီး အမည်မဖော်ဘဲ ငွေလွှဲပြောင်းမှုများ ပြုလုပ်နိုင်သဖြင့် အမေရိကန်နှင့် ၎င်း၏ မဟာမိတ်များ ထိန်းချုပ်ထားသည့် ကမ္ဘာလုံးဆိုင်ရာ ဘဏ်စနစ်ကို ရှောင်လွှဲလိုသော အစိုးရများနှင့် အဖွဲ့အစည်းများအတွက် အသုံးဝင်ကြောင်း ဆောင်းပါးရှင် ရှူးကျီချန်း (Xue Zichen) က ရေးသားခဲ့သည်။

၂၀၂၅ ခုနှစ် အမေရိကန် အမျိုးသားကာကွယ်ရေး ခွင့်ပြုချက် အက်ဥပဒေတွင် ပင်တဂွန်၏ Defense Blockchain Internal Testing Program အမည်ရှိ စီမံကိန်းတစ်ခု ပါဝင်ခဲ့သည်ဟု ရှူးက ရေးသားခဲ့သည်။

ထိုစီမံကိန်းသည် အချက်အလက်များကို လုံခြုံစွာနှင့် ပွင့်လင်းမြင်သာစွာ သိမ်းဆည်းနိုင်သည့် ဒစ်ဂျစ်တယ် စနစ်နှင့် ဒစ်ဂျစ်တယ် ပိုင်ဆိုင်မှုများကို အမေရိကန်စစ်တပ်နှင့် ကာကွယ်ရေးကဏ္ဍအတွက် အသုံးပြုနိုင်မည့် နည်းလမ်းများကို ရှာဖွေရန် ဖြစ်ကြောင်း ၎င်းက ပြောသည်။

ထိုအခြေအနေများကြောင့် ဒစ်ဂျစ်တယ် ငွေကြေးများသည် မကြာမီ အချိန်အတွင်း နိုင်ငံတကာ ဘဏ္ဍာရေးဆိုင်ရာ ပြိုင်ဆိုင်မှုတွင် မဟာဗျူဟာမြောက် လက်နက်တစ်ခု ဖြစ်လာမည်ကို ပြသနေကြောင်း ဆောင်းပါး၌ ဖော်ပြထား သည်။

ဒစ်ဂျစ်တယ်ငွေကြေး ဘဏ်ကိုတွေ့ရစဉ်

တရုတ်အနေဖြင့် ဒစ်ဂျစ်တယ် ငွေကြေးများကို စစ်ဘက်ဆိုင်ရာ ရည်ရွယ်ချက်များအတွက် အသုံးပြုမည့် အစီအစဉ်ကို ထိုဆောင်းပါးတွင် ဖော်ပြမထားပေ။

သို့သော် တရုတ်အစိုးရသည် ပိတ်ဆို့မှုများ ဖြစ်ပွားလာပါက အမျိုးသားလုံခြုံရေးနှင့် စီးပွားရေး ကြံ့ကြံ့ခံနိုင်မှုကို စိတ်ချသေချာစေရန်အတွက် ဒစ်ဂျစ်တယ်ငွေကြေး နယ်ပယ်ကို ထိန်းချုပ်ခြင်း၊ သုတေသနပြုခြင်းများကို တင်းကျပ်သင့်ကြောင်း ဆောင်းပါးတွင် အကြံပြုရေးသားထားသည်။

တရုတ်သည် ယခင်ကတည်းက ဒစ်ဂျစ်တယ် ယွမ်ငွေ (e-CNY) ဟု လူသိများသည့် ဗဟိုဘဏ် ဒစ်ဂျစ်တယ် ငွေကြေး (CBDC) တစ်ခုကို ထူထောင်ထားပြီး ထိုငွေကြေးစနစ်ကို မြို့ကြီးအချို့တွင် စမ်းသပ်အသုံးပြုနေသည်။

e-CNY ငွေကြေးစနစ်အရ အာဏာပိုင်များသည် နိုင်ငံတကာ ငွေကြေးကွန်ရက် တစ်ခုဖြစ်သည့် SWIFT ကဲ့သို့ အမေရိကန်က ထိန်းချုပ်ထားသည့် ငွေကြေးပေးချေမှု စနစ်များအပေါ် မှီခိုမှုမှ လျှော့ချနိုင်မည်ဖြစ်ကာ ငွေကြေး လွှဲပြောင်းမှုများကို စောင့်ကြည့်နိုင်မည်ဖြစ်သည်။

ပိတ်ဆို့မှုများကို ရှောင်လွှဲရန် ဒစ်ဂျစ်တယ် ငွေကြေးများကို အသုံးပြုနိုင်မည်ဆိုပါက ထိုအခြေအနေသည် ကမ္ဘာ လုံးဆိုင်ရာ ဘဏ္ဍာရေး အခြေအနေကို ပြန်လည် ပုံဖော်နိုင်မည်ဖြစ်ပြီး အနောက်နိုင်ငံများ၏ စီးပွားရေး ဖိအား များကို ခံနေရသည့် နိုင်ငံများသည် တရုတ်၊ ရုရှားနှင့် အီရန်ကဲ့သို့ နိုင်ငံများကို ပိုမိုမှီခို အားထား လာလိမ့်မည်ဟု ကျွမ်းကျင်သူများက ပြောကြားခဲ့သည်။

သို့သော် ထိုအခြေအနေသို့ ရောက်ရှိခဲ့ပါက အမေရိကန်နှင့် ၎င်း၏ မဟာမိတ်များ၏ တန်ပြန် ဘဏ္ဍာရေး အစီအစဉ်များကြောင့် တင်းမာမှုများလည်း မြင့်တက်လာနိုင်သည်ဟု ကျွမ်းကျင်သူများက ပြောကြားခဲ့သည်။

Source: South China Morning Post

CNI International News

ဘာလင်၊ အောက်တိုဘာ ၂၇

ဥရောပသမဂ္ဂ (EU) သည် မြေရှားသတ္တုများ ရရှိရေးအတွက် တရုတ်အပေါ် မှီခိုမှုကို အဆုံးသတ်ရန် လုပ်ဆောင်နေ ကြောင်း ဥရောပကော်မရှင်ဥက္ကဋ္ဌ အာဆူလာ ဗွန် ဒါလီယန် (Ursula von der Leyen) က အောက်တိုဘာ ၂၅ ရက်တွင် ပြောကြားခဲ့သည်ဟု DW သတင်းဝက်ဘ်ဆိုက်မှ ဖော်ပြခဲ့သည်။

တရုတ်သည် စမတ်ဖုန်းများ၊ လျှပ်စစ်ကားများ ထုတ်လုပ်မှုနှင့် စစ်ရေး နည်းပညာများအတွက် အရေးကြီးသည့် မြေရှားသတ္တုများကို ထုတ်လုပ်၊ တင်ပို့သည့် အဓိကနိုင်ငံဖြစ်သည်။

ဧပြီလအတွင်းက တရုတ်သည် မြေရှားသတ္တု တင်ပို့ရေးအတွက် လိုင်စင်လိုအပ်ချက် အသစ်များကို ထုတ်ပြန်ခဲ့ သဖြင့် ကမ္ဘာလုံးဆိုင်ရာ ကုန်ထုတ်လုပ်မှုကဏ္ဍကို ဂယက်ရိုက်ခတ် သွားစေခဲ့သည်။

ထို့ပြင် တရုတ်သည် အမေရိကန်နှင့် ကုန်သွယ်ရေး အငြင်းပွားမှု ဖြစ်ပွားနေချိန်တွင် ၎င်း၏ အနေအထားကို အသာစီးရရန်အတွက် မြေရှားသတ္တု တင်ပို့မှုများကို ထိန်းချုပ်ကန့်သတ်မှု အသစ်များ ကြေညာခဲ့သည်။

မြေရှားသတ္တု တူးဖော်နေစဉ် 

တရုတ်၏ အစီအမံများကြောင့် ဥရောပသမဂ္ဂ၏ ကုန်မ္ပဏီအချို့သည် ထုတ်ကုန်များကို ဆိုင်းငံ့ရသည့် အခြေအနေ သို့ ရောက်ရှိခဲ့ပြီး စီးပွားရေးအရ ထိခိုက်နစ်နာစေခဲ့သည်ဟု ဥရောပသမဂ္ဂက ပြောကြားခဲ့သည်။

ဥရောပသမဂ္ဂသည် ရေတိုတွင် တရုတ်နှင့် ညှိနှိုင်း အဖြေရှာ သွားမည်ဖြစ်သော်လည်း လိုအပ်လာပါက မိမိတို့၌ ရှိသမျှ နည်းလမ်းအားလုံးကို အသုံးပြုရန် အသင့်ရှိကြောင်း ဗွန်ဒါလီယန်က အောက်တိုဘာ ၂၅ ရက်က ပြုလုပ် သည့် Berlin Global Dialogue ညီလာခံမှာ ပြောကြားခဲ့သည်။

မြေရှားသတ္တုများ ဝယ်ယူရရှိရေးတွင် အားနည်းချက်များ ရှိနေသည့် အခြေအနေကြောင့် ရေတိုနှင့် ရေရှည်၌ မိမိတို့ ဥရောပ စက်မှုလုပ်ငန်းများအတွက် မြေရှားသတ္တုများကို အခြားအရင်းအမြစ်များထံမှ ဝယ်ယူနိုင်ရန် တွန်းအားပေးရာ ရောက်ခဲ့ကြောင်း ၎င်းက ပြောသည်။

ထို့ပြင် စိန်ခေါ်မှုများကို ဖြေရှင်းနိုင်ရန်အတွက် ဖွဲ့စည်းတည်ဆောက်ပုံဆိုင်ရာ အပြောင်းအလဲများ ပြုလုပ်ရန် လိုအပ်လိမ့်မည်ဖြစ်ကြောင်း ဗွန်ဒါလီယန်က ပြောကြားခဲ့သည်။

“စွမ်းအင်၊ ကုန်ကြမ်းပစ္စည်း၊ ကာကွယ်ရေး နဲ့ ဒစ်ဂျစ်တယ် ကဏ္ဍတွေမှာ ဥရောပသမဂ္ဂဟာ ကိုယ့်ကိုယ်ကို အားကိုးဖို့ ကြိုးပမ်းရပါလိမ့်မယ်” ဟု ၎င်းက ပြောကြားခဲ့သည်။

Source: DW

CNI International News

ရှန်ဟိုင်း၊ အောက်တိုဘာ ၂၅

တရုတ်နိုင်ငံသည် လာမည့် ၅ နှစ်အတွင်း ကုန်ထုတ်လုပ်မှုကဏ္ဍကို ပိုမိုခိုင်မာစေရန်နှင့် အဆင့်မြှင့်တင် မွမ်းမံ မှုများ ပြုလုပ်သွားမည်ဖြစ်ကြောင်း တရုတ်ထိပ်သီး အရာရှိများက အောက်တိုဘာ ၂၄ ရက်တွင် ပြောကြားခဲ့ သည်ဟု Nikkei Asia မှ ဖော်ပြခဲ့သည်။

ထိုအစီအစဉ်အရ တရုတ်၏ စက်မှုလုပ်ငန်းကို ပိုမိုခေတ်မီ တိုးတက်စေရန်နှင့် တစ်ပိုင်းလျှပ်ကူး ပစ္စည်းများ၊ စက် ယန္တရားများနှင့် ပြန်ပြည့်မြဲ စွမ်းအင်ကဲ့သို့ နည်းပညာမြင့် လုပ်ငန်းများတွင် မိမိကိုယ်ကိုယ် မှီခိုအားထားမှုကို ပိုမို ခိုင်မာစေရန် ရည်ရွယ်ထားခြင်း ဖြစ်သည်ဟု လေ့လာသူများက ပြောကြားခဲ့သည်။

တရုတ်အရာရှိများကလည်း ကုန်ထုတ်စွမ်းအားသည် တရုတ်စီးပွားရေးအတွက် အဓိကကျောရိုးဖြစ်ကြောင်း ပြောကြားခဲ့သည်။

တရုတ်အစိုးရသည် သံမဏိ၊ သင်္ဘောတည်ဆောက်မှု၊ ဓာတုပစည်းများကဲ့သို့ သမားရိုးကျ စက်မှုလုပ်ငန်းများကို အဆင့်မြှင့်တင်မည်ဖြစ်ပြီး တစ်ချိန်တည်းမှာပင် ကွမ်တမ်နည်းပညာ၊ ဇီဝထုတ်ကုန်များကဲ့သို့ ကဏ္ဍသစ်များကို လည်း ဦးစားပေး လုပ်ဆောင်မည်ဖြစ်ကြောင်း တရုတ်၏ အမျိုးသား ဖွံ့ဖြိုးတိုးတက်ရေးနှင့် ပြုပြင်ပြောင်းလဲရေး ကော်မရှင် (NDRC) က ပြောကြားခဲ့သည်။

ထို့ပြင် တရုတ်အစိုးရသည် ရေရှည်ချေးငွေများ၊ ရင်းနှီးမြှုပ်နှံမှုဆိုင်ရာ မက်လုံးများ အပါအဝင် နည်းပညာမြင့် ကုန်ထုတ်စွမ်းအားအတွက် ဘဏ္ဍာရေး ထောက်ပံ့မှုများ ပိုပေးမည်ဟု ကတိပြုခဲ့သည်။

တရုတ် ကုန်ထုတ်လုပ်ငန်း တစ်ခုကိုတွေ့ရစဉ်

မည်သို့ပင်ဆိုစေ ထိုကတိကဝတ်သည် တရုတ်၏ ထုတ်ကုန်များ အလျှံအပယ် ထွက်ရှိလာမှုအပေါ် ကမ္ဘာလုံး ဆိုင်ရာ စိုးရိမ်မှုများ မြင့်တက်နေခြင်းကို လျှော့ချနိုင်ဖွယ်မရှိပေ။

အထူးသဖြင့် တရုတ်လုပ် လျှပ်စစ်ကားများ၊ ဆိုလာပြားများနှင့် ဘက်ထရီများသည် ပြည်ပစျေးကွက်များတွင် အစုလိုက်အပြုံလိုက် ရောက်ရှိနေသဖြင့် အမေရိကန်၊ ဥရောပနိုင်ငံများနှင့် ကုန်သွယ်ရေး တင်းမာမှုများ မြင့်တက်နေသည်။

စီးပွားရေးပညာရှင်များကမူ တရုတ်တွင် ပြည်တွင်းဝယ်လိုအား လျော့ကျနေပြီး ပို့ကုန်ကဏ္ဍ နှေးကွေးနေမှုနှင့် အတူ စီးပွားရေးသည် ရုန်းကန်နေရချိန်၌ ကုန်ထုတ်စွမ်းအားကို မြှင့်တင်ရန် အာရုံစိုက်နေခြင်းဖြစ်ကြောင်း ပြောကြားခဲ့သည်။

တရုတ်၏ ရည်ရွယ်ချက်သည် ကုန်ထုတ်လုပ်မှုကဏ္ဍတွင် အရေအတွက်မှ အရည်အသွေးသို့ ကူးပြောင်းရန်ဖြစ်ပြီး ဆန်းသစ်တီထွင်မှုနှင့် ကုန်ထုတ် စွမ်းအားမှတဆင့် ရေရှည်စီးပွားရေး တည်ငြိမ်မှုကို စိတ်ချသေချာစေရန် ဖြစ်ကြောင်း ကာဂျစ်စတန်နိုင်ငံ  Ala-Too နိုင်ငံတကာတက္ကသိုလ် ( Ala-Too International University) မှ ကျွမ်းကျင်သူ တစ်ဦးဖြစ်သည့် Kubanychbek Taabaldiev က ဆင်ဟွာသတင်းဌာနနှင့် ပြုလုပ်သည့် အင်တာဗျူးတွင် ပြောကြားခဲ့သည်။

Source: Nikkei Asia

CNI International News

ရှန်ဟိုင်း၊ အောက်တိုဘာ ၁၀

တရုတ်သည် အမျိုးသားလုံခြုံရေးနှင့် အကျိုးစီးပွားများကို ကာကွယ်ရန်အတွက် မြေရှားသတ္တုများ၊ လစ်သီယံ အိုင်းယွန်း ဘက်ထရီများနှင့် လူလုပ်စိန်များ တင်ပို့ရောင်းချမှုတွင် ထိန်းချုပ်ကန့်သတ်မှု အသစ်များအား အောက်တိုဘာ ၉ ရက်က ကြေညာခဲ့သည်ဟု Nikkei Asia မှ ဖော်ပြခဲ့သည်။

ထိုထိန်းချုပ် ကန့်သတ်မှုများအရ တရားမဝင် ပြည်ပ ပူးပေါင်းဆောင်ရွက်မှုများကို တားမြစ်ပိတ်ပင်ပြီး ပြည်ပ နိုင်ငံများ၏ ကာကွယ်ရေးကဏ္ဍနှင့် တစ်ပိုင်းလျှပ်ကူးပစ္စည်းများ တင်ပို့မှုကို ရည်ရွယ်ချက်ရှိရှိ ကန့်သတ်လိုက်ခြင်း ဖြစ်သည်။

တရုတ်သည် ဧပြီလအတွင်းက မြေရှားသတ္တုများ တင်ပို့ရောင်းချမှုကို ထိန်းချုပ်သည့် အစီအစဉ်များကို ကြေညာခဲ့ ပြီးနောက် ယခုထုတ်ပြန်ခဲ့သည့် တရုတ် ကုန်သွယ်ရေးဝန်ကြီးဌာန၏ ကြေညာချက်သည် ယခင်ကြေညာခဲ့သည့် အစီအစဉ်များကို ပိုမိုချဲ့ထွင်ခဲ့ခြင်းဖြစ်သည်။

ဧပြီလအတွင်းက ကြေညာခဲ့သည့် မြေရှားထိန်းချုပ်မှု အစီအစဉ်များကြောင့် အမေရိကန်၊ ဥရောပနိုင်ငံများနှင့် သဘောတူညီချက်များ မရရှိမီ ကမ္ဘာတစ်ဝန်းတွင် မြေရှားသတ္တုများကို သိသိသာသာ ပြတ်လပ်သွားစေခဲ့သည်။

တရုတ်သည် ကမ္ဘာပေါ်တွင် သန့်စင်ပြီး မြေရှားသတ္တုများနှင့် မြေရှားသတ္တုသံလိုက် စုစုပေါင်း၏ ၉၀ ရာခိုင်နှုန်း ကျော်ကို ထုတ်လုပ်သည့် နိုင်ငံဖြစ်သည်။

သတ္တု ၁၇ မျိုး ပါဝင်သည့် မြေရှားသတ္တုအုပ်စုသည် လျှပ်စစ်ကားများ၊ လေယာဉ်အင်ဂျင်များမှအစ စစ်ဘက်သုံး ရေဒါစနစ်များအထိ နည်းပညာမြင့်ပစ္စည်းများ ထုတ်လုပ်ရာတွင် မရှိမဖြစ် သတ္တုအမျိုးအစားများဖြစ်သည်။

သတ္တုတူးဖော်ရေး လုပ်ကွက်ကို တွေ့ရစဉ်

မြေရှားသတ္တု သံလိုက်များ ပြုလုပ်နိုင်သည့် နည်းပညာကို ရောင်းချမှုအား တားမြစ်ကန့်သတ်ခြင်းသည် သံလိုက် အမျိုးအစား ပြုလုပ်ရာတွင် ခက်ခဲစေနိုင်ပြီး တရုတ်သည် ထိုသတ္တုများ ပါဝင်သော  အစိတ်အပိုင်းများ တင်ပို့ ရောင်းချမှုကိုလည်း ကန့်သတ်တော့မည်ဖြစ်သည်။

တရုတ်သည် မြေရှားသတ္တု နည်းပညာနှင့် သန့်စင်ပြီး မြေရှားသတ္တုများကို အသုံးပြုသည့် ပစ္စည်းများ ထုတ်လုပ် ရာတွင် ကမ္ဘာ့ထိပ်သီးနိုင်ငံဖြစ်၍ လက်ရှိတွင် တင်ပို့ရောင်းချမှုများအတွက် လိုင်စင်လိုအပ်တော့မည်ဖြစ်သည်။

ပြည်ပနိုင်ငံများမှ ကာကွယ်ရေးပစ္စည်း ထုတ်လုပ်သူများသည် လိုင်စင်များ ရရှိလိမ့်မည် မဟုတ်ဘဲ ခေတ်မီ တစ်ပိုင်းလျှပ်ကူး ပစ္စည်းများနှင့် ဆက်နွှယ်သည့် အသုံးပြုခွင့် လျှောက်ထားမှုများကို တစ်ခုချင်းစီ ဆန်းစစ်လေ့လာ ပြီးမှ အတည်ပြု ပေးမည်ဖြစ်သည်။

အောက်တိုဘာ ၈ ရက်တွင်မူ အမေရိကန် လွှတ်တော်အမတ်များက တရုတ်သို့ ချစ်ပ်ပြားများ ပြုလုပ်သည့် ပစ္စည်း များ တင်ပို့ရောင်းချမှုကို ပိတ်ပင်ချက်အား ချဲ့ထွင်ရန် တိုက်တွန်းခဲ့သည်။

ထိုအကြောင်းအရာနှင့် ပတ်သက်ပြီး Samsung Electronics၊ TSMC နှင့် SK Hynix ကုမ္ပဏီတို့က မှတ်ချက်ပေးရန် တောင်းခံမှုကို ချက်ချင်း တုံ့ပြန်ခဲ့ခြင်း မရှိပေ။

Source: Nikkei Asia