CNI News

၂၀၂၅ ခုနှစ်၊ ဇန်နဝါရီ ၂၀

ဘရာဇီးလ်တိုက်စစ်မှူး နေမာဟာ သူ့ရဲ့ငယ်ဘဝ ကလပ်ဖြစ်တဲ့ ဆန်းတို့စ်အသင်းထံ ပြန်လာဖို့ နီးစပ်နေပြီလို့ အပြောင်းအရွှေ့ကျွမ်းကျင်သူ ဖာဘရီဇီယိုရိုမာနိုက ဖော်ပြထားပါတယ်။

အယ်လ်ဟီလယ်အသင်းနည်းပြ ဂျော့ချ်ဂျီးဆပ်က နေမာဟာ ထိပ်တန်းအဆင့်မှာ ကစားနိုင်ခြင်း မရှိတော့ဘူးလို့ ပြောခဲ့တာကြောင့် ဘရာဇီးလ်ကစားသမားဟာ ဆော်ဒီကလပ်ကနေ ထွက်ခွာဖို့ရှိနေတာပါ။

အသက် ၃၂ နှစ်အရွယ်ရှိ နေမာဟာ ၂၀၂၃ ခုနှစ် နွေရာသီ အပြောင်းအရွှေ့က ပီအက်စ်ဂျီအသင်းကနေ ပေါင် ၇၈ သန်းနဲ့ အယ်လ်ဟီလယ်အသင်းထံ ပြောင်းရွှေ့လာခဲ့ပေမယ့် ဒဏ်ရာတွေနဲ့ ရုန်းကန်ခဲ့ပြီး ပြိုင်ပွဲစုံ ၇ ပွဲသာ ပါဝင် ကစားထားနိုင်ခဲ့တာ ဖြစ်ပါတယ်။ 

အယ်လ်ဟီလယ်အသင်းနည်းပြက နေမာကို ဒီရာသီ ဆော်ဒီပရိုလိဂ်ပြိုင်ပွဲ ဒုတိယရာသီဝက်အတွက် အသင်း လူစာရင်းထဲ စာရင်းသွင်းမှာ မဟုတ်ဘူးလို့ အတည်ပြုခဲ့ပြီးနောက် ဆန်းတို့စ်အသင်းက သူ့ကို ခေါ်ယူဖို့ ကမ်းလှမ်းမှု ပြုလုပ်ခဲ့တာပါ။

နေမာကို တွေ့ရစဉ်

ဆန်းတို့စ်အသင်းဟာ နေမာကို အငှားနဲ့ခေါ်ယူဖို့ ကမ်းလှမ်းမှု ပြုလုပ်ထားတာကြောင့် နေမာဟာ အသင်းဟောင်း ထံ ပြန်လာနိုင်ဖို့ နီးစပ်နေပြီလို့ ဖာဘရီဇီယိုရိုမာနိုက သူ့ရဲ့ဆိုရှယ်မီဒီယာမှာ ရေးသားထားပါတယ်။ 

နေမာကို ခေါ်ယူဖို့ မေဂျာလိဂ်ကလပ် ချီကာဂိုအသင်းကလည်း စိတ်ဝင်စားနေတာကြောင့် ဆန်းတို့စ်အသင်းဟာ အမြန်ဆုံးအငှားနဲ့ခေါ်ယူနိုင်ဖို့ ကြိုးပမ်းနေပြီး အယ်လ်ဟီလယ်အသင်းက မီးစိမ်းပြတာကို စောင့်ဆိုင်းနေတာပါ။ 

ဆန်းတို့စ်အသင်းဟာ နေမာကို အသင်းထံပြန်လာရင် သူရဲကောင်းတစ်ဦးလို ကြိုဆိုဖို့အသင့်ရှိနေတာ ဖြစ်ပါတယ်။ 

ဆန်းတို့စ်အသင်း လူငယ်စီမံကိန်းကနေ ထွက်ပေါ်လာခဲ့တဲ့ နေမာဟာ ဆန်းတို့စ်အသင်းကြီးအတွက် ပွဲပေါင်း ၂၂၅ ပွဲ ပါဝင်ကစားခဲ့ပြီး ၁၃၆ ဂိုးသွင်းယူကာ ထိပ်တန်းအသင်းတိုင်း အလိုရှိတဲ့သူအဖြစ် ရှိခဲ့တာပါ။ 

နေမာဟာ ဆန်းတို့စ်အသင်းမှာ ၅ ရာသီကြာ ကစားပြီးနောက် ဘာစီလိုနာ၊ ပီအက်စ်ဂျီအသင်းတွေထံ ပြောင်းခဲ့ပြီး ဆုဖလားအောင်မြင်မှု အများအပြားရရှိခဲ့ကာ အယ်လ်ဟီလယ်အသင်းအတွက် ကစားခဲ့တဲ့ ၇ ပွဲမှာ ၁ ဂိုး သွင်းယူ နိုင်ခဲ့တာ ဖြစ်ပါတယ်။

Source: Dailymail

CNI Sport News

၂၀၂၅ ခုနှစ်၊ ဇန်နဝါရီ ၂၀

မန်စီးတီးအသင်းဟာ အဝေးကွင်းမှာ အစ်စဝှစ်ချ်အသင်းကို ၆ ဂိုး-ဂိုးမရှိနဲ့ ဂိုးပြတ် အနိုင်ရပြီးနောက် နည်းပြ ဂွာဒီယိုလာက သူ့ရဲ့အသင်းဟာ အရင်ပုံစံအတိုင်း ပြန်လာပြီလို့ ပြောခဲ့ပါတယ်။ 

ဂွာဒီယိုလာက “၃ မှတ်နဲ့အတူ ချန်ပီယံလိဂ် ဝင်ခွင့်နေရာကို တက်နိုင်ခဲ့တဲ့အတွက် အလွန်ကျေနပ်ပါတယ်။ အသင်းဟာ လွန်ခဲ့တဲ့ ၁၀ နှစ်က သတ်မှတ်ထားတဲ့ အရာတွေကို လုပ်ပြီးပြန်လာနေပါတယ်။ ဒါက ကျနော်တို့ရဲ့ အကောင်းဆုံးပုံစံ မဟုတ်ပေမယ့် ပွဲမှာ ကျနော်တို့ရှိနေရမယ့် လိုက်လျောညီထွေမှုနဲ့ ပိုနီးစပ်ပါတယ်။ ဘောလုံး ရှိတဲ့ သူတိုင်းဟာ ပါးနပ်ပြီး၊ မြန်ဆန်သလို လူတိုင်းက ဆက်စပ်မှုတွေ ရှိနေပါတယ်။ ခံစစ်ပိုင်းနဲ့ မချိတ်ဆက်နိုင် ဘူးဆိုရင် ကောင်းမွန်စွာ လုပ်နိုင်မှာ မဟုတ်ပါဘူး”လို့ ပြောခဲ့တာပါ။ 

ပြီးခဲ့တဲ့လ အနည်းငယ်အတွင်းက ရုန်းကန်ခဲ့ရတဲ့ မန်စီးတီးအသင်းဟာ အစ်စဝှစ်ချ်အသင်းကို အနိုင်ရပြီးနောက် ပရီးမီးယားလိဂ် အမှတ်ပေးဇယားအဆင့် ၄ နေရာကို တက်နိုင်ခဲ့ပါတယ်။

ဒီပွဲမှာ မန်စီးတီးအသင်းအတွက် ဂိုးတွေကို ဖိုဒန်က ၂ ဂိုး၊ ကိုဗာဆစ်၊ ဒိုကူ၊ ဟာလန်းနဲ့ မက်အတီးတို့က သွင်းယူခဲ့ တာပါ။ 

မန်စီးတီးအသင်းဟာ ၂၀၂၅ ခုနှစ်ထဲမှာ ပြိုင်ပွဲစုံ ၄ ပွဲ ကစားထားပြီး ၃ ပွဲနိုင်၊ ၁ ပွဲသရေကျကာ ရလဒ်ကောင်းတွေ ပြန်လည် ရယူနိုင်ခဲ့တာပါ။ 

ဂွာဒီယိုလာကို တွေ့ရစဉ်

အစ်စဝှစ်ချ်အသင်းကတော့ အိမ်ကွင်းဂိုးပြတ် အရေးနိမ့်မှုကြောင့် ပရီးမီးယားလိဂ် အမှတ်ပေးဇယား  အဆင့် ၁၈ နေရာမှာ ရပ်တည်နေပြီး တန်းဆင်းဇုန်ကနေ လွတ်မြောက်ဖို့ ရုန်းကန်ရတော့မှာ ဖြစ်ပါတယ်။  

အစ်စဝှစ်ချ်အသင်း နောက်ခံလူ အိုရှီးယားက သူတို့ဟာ အမှားအယွင်း ပြုလုပ်ခဲ့တာတွေကို ပြန်ကြည့်ပြီး သင်ခန်းစာ ယူရမှာဖြစ်ကာ ဒီအဖွဲ့နဲ့ ကလပ်ဟာ ကြီးမားတဲ့ ယုံကြည်မှုရှိတယ်လို့ ပြောခဲ့တာပါ။ 

မန်စီးတီးအသင်းဟာ လာမယ့် ကြားရက်ထဲမှာ ချန်ပီယံလိဂ် အရေးကြီးပွဲစဉ်အဖြစ် ပီအက်စ်ဂျီအသင်း အိမ်ကွင်း သွားရောက် ယှဉ်ပြိုင်ရမှာ ဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဇန်နဝါရီ ၂၀

ယူနိုက်တက်အသင်းဟာ အိမ်ကွင်းမှာ ဘရိုက်တန်အသင်းကို ၃ ဂိုး-၁ ဂိုးနဲ့ အရေးနိမ့်ပြီးနောက် သူ့ရဲ့အသင်းဟာ ကလပ်သမိုင်းမှာ အဆိုးရွားဆုံးအသင်း ဖြစ်နိုင်တယ်လို့ နည်းပြအာမိုရင်က ပြောခဲ့ပါတယ်။

အာမိုရင်က “ပြီးခဲ့တဲ့ နည်းပြထက်ပိုပြီးရှုံးတဲ့ နည်းပြအသစ်ကို ကျနော်တို့ ရရှိနေပါပြီ။ ဒါကို ကျနော် အပြည့်အဝ သိပေမယ့် ကျနော်ကတော့ ပြောင်းလဲသွားမှာ မဟုတ်ပါဘူး။ ကျနော်တို့ အောင်မြင်မှု ရရှိနိုင်တယ်ဆိုတာ သိပေ မယ့် လက်ရှိ အခိုက်အတန့်ကို ရှင်သန်နေဖို့လိုပါတယ်။ ကျနော်ဟာ နုံအတဲ့သူ မဟုတ်ပါဘူး။ ကျ
နော်တို့ဟာ ယူနိုက်တက်သမိုင်းမှာ အဆိုးရွားဆုံးအသင်းဖြစ်နိုင်တယ်”လို့ ပြောခဲ့တာပါ။ 

ပေါ်တူဂီလူမျိုး နည်းပြအာမိုရင်ဟာ ယူနိုက်တက်အသင်းကို စတင်ကိုင်တွယ်ပြီးကတည်းက ပရီးမီးယားလိဂ် ပြိုင်ပွဲမှာ အိမ်ကွင်းရှုံးပွဲ ၄ ပွဲအထိ ကြုံတွေ့ထားသလို သူကိုင်တွယ်ခဲ့တဲ့ လိဂ်ပွဲပေါင်း ၁၁ ပွဲမှာ ရမှတ် ၁၁ မှတ်သာ ရယူနိုင်ခဲ့တာ ဖြစ်ပါတယ်။

ယူနိုက်တက်အသင်းဟာ ဘရိုက်တန်အသင်းနဲ့ပွဲစဉ်မှာ ဆိုးရွားတဲ့ စွမ်းဆောင်ရည်သာ ပြသနိုင်ခဲ့ပြီး အသင်း ခေါင်းဆောင် ဘရူနိုဖာနန်ဒက်စ်ရဲ့ ပင်နယ်တီကန်သွင်းတဲ့ တစ်ကြိမ်သာ ဂိုးပေါက်တည့်ခဲ့တာပါ။ 

ယူနိုက်တက်အသင်းဟာ ပြီးခဲ့တဲ့ လီဗာပူးလ်နဲ့ အာဆင်နယ်အသင်းတို့ ပွဲတွေမှာ ရလဒ်ကောင်းနဲ့ စွမ်းဆောင်ရည် ကောင်းကို ပြသနိုင်ခဲ့ပေမယ့် ဆောက်သမ်တန် အသင်းနဲ့ပွဲစဉ်မှာ နောက်ကျ သွင်းဂိုးတွေကြောင့် အနိုင်ရခဲ့ပြီး အခု ဘရိုက်တန်အသင်းကို အရေးနိမ့်ခဲ့တာ ဖြစ်ပါတယ်။ 

အာမိုရင်နဲ့ ယူနိုက်တက်အသင်းကစားသမားများကို တွေ့ရစဉ်

နည်းပြအာမိုရင်ဟာ ယူနိုက်တက်အသင်းကို ၁၅ ပွဲ ကိုင်တွယ်အပြီးမှာ ရှုံးပွဲ ၇ ပွဲ ကြုံတွေ့ထားတာပါ။ 

ယူနိုက်တက်အသင်းဟာ ဘရိုက်တန်အသင်းကို အရေးနိမ့်ပြီးနောက် ပရီးမီးယားလိဂ် အမှတ်ပေးဇယား အဆင့် ၁၃ နေရာမှာ ရပ်တည်နေပြီး တန်းဆင်းဇုန်နေရာနဲ့ ၁၀ မှတ်သာကွာဟတာ ဖြစ်ပါတယ်။

ယူနိုက်တက်အသင်းနည်းပြ အာမိုရင်က အသင်းမှာရှိတဲ့ လူတိုင်းရဲ့ စွမ်းဆောင်ရည်ဟာ နိမ့်ကျနေပြီး ပွဲ အများအပြား ရှုံးနိမ့်တာဟာ လက်ခံနိုင်စရာမရှိဘူးလို့ ပြောခဲ့ပါတယ်။ 

ဒါအပြင် ယူနိုက်တက်အသင်းဟာ အလွန်ခက်ခဲတဲ့ အခိုက်အတန့်ကို ရောက်ရှိနေပေမယ့် တခြားနည်းလမ်းမရှိဘဲ ရှေ့ဆက်သွားဖို့ပဲ လိုတယ်လို့ ပြောခဲ့တာပါ။

ယူနိုက်တက်အသင်းဟာ လာမယ့်ကြားရက်မှာ ယူရိုပါလိဂ် ပွဲစဉ်အဖြစ် ရိန်းဂျားစ်အသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဇန်နဝါရီ ၁၈

ဘယ်လ်ဂျီယံ ဘောလုံးအဖွဲ့ချုပ်ဟာ ပြီးခဲ့တဲ့ ယူရို ၂၀၂၄ ပြိုင်ပွဲနဲ့ နေးရှင်းလိဂ် ပြိုင်ပွဲတွေမှာ အသင်းရလဒ် ဆိုးရွားမှုကြောင့် နည်းပြဖြစ်သူ တီဒက်စ်ကို-ကို ရာထူးကနေ ထုတ်ပယ်လိုက်ပြီ ဖြစ်ပါတယ်။

တီဒက်စ်ကိုဟာ ထွက်ခွာသွားတဲ့နည်းပြ ရော်ဘတ်တိုမာတီနက်ဇ်ရဲ့နေရာမှာ အစားထိုး ဝင်ရောက်ပြီး ဘယ်လ်ဂျီယံအသင်း နည်းပြသစ်အဖြစ် ၂၀၂၃ ခုနှစ်၊ ဖေဖော်ဝါရီမှာ ခန့်အပ်ခြင်းခံခဲ့ရတာပါ။

တီဒက်စ်ကိုဟာ ဘယ်လ်ဂျီယံအသင်းကို ယူရို ၂၀၂၄ ပြိုင်ပွဲ ယှဉ်ပြိုင်ခွင့်ရရှိအောင် ဦးဆောင် ပေးနိုင်ခဲ့ပေမယ့် ၁၆ သင်းအဆင့်မှာ ပြင်သစ်အသင်းကို အရေးနိမ့်ပြီး ထွက်ခွာခဲ့ရပါတယ်။

ဒါအပြင် ဘယ်လ်ဂျီယံအသင်းဟာ ပြီးခဲ့တဲ့ နေးရှင်းလိဂ်ပြိုင်ပွဲ အုပ်စုအဆင့်မှာ တတိယနေရာသာ ရရှိခဲ့လို့ တန်းမဆင်းရဖို့ ပလေး‌အော့ဖ် ယှဉ်ပြိုင်ရမှာပါ။

တီဒက်စ်ကိုဟာ ဘယ်လ်ဂျီယံအသင်းကို ကိုင်တွယ်ချိန်အတွင်း ရီးရယ်လ်အသင်း ဂိုးသမား ကော့တွိုက်စ်နဲ့ အဆင်မပြေမှုတွေရှိခဲ့ပြီး ကော့တွိုက်စ်က သူ့ရဲ့လက်အောက်မှာ နိုင်ငံအသင်းအတွက် ကစားပေးမှာ မဟုတ်ဘူးလို့ ကြေညာထားပါတယ်။

တီဒက်စ်ကိုကတော့ ဘယ်လ်ဂျီယံအသင်းကို နည်းပြအဖြစ် ကိုင်တွယ်ခဲ့ရတာကို အမြဲတမ်းဂုဏ်ယူပြီး အသင်း အနာဂတ်မှာ အကောင်းဆုံးဖြစ်ဖို့ ဆုတောင်းပေးကြောင်း ပြောခဲ့တာပါ။

ဘယ်လ်ဂျီယံအသင်းဟာ တီဒက်စ်ကိုရဲ့ နေရာမှာ အစားထိုးဖို့အတွက် နည်းပြသစ် ရှာဖွေမှုတွေ ပြုလုပ်နေပြီး အသင်းကို လက်ထောက်နည်းပြအဖြစ် ကိုင်တွယ်ခဲ့တဲ့ အွန်နရီဟာ နည်းပြသစ် ဖြစ်လာနိုင်တဲ့ စာရင်းထဲမှာ ပါဝင်နေတယ်လို့ သိရပါတယ်။

ဘယ်လ်ဂျီယံအသင်းဟာ မတ်လထဲမှာ နေးရှင်းလိဂ် ပလေးအော့ဖ်ပွဲအဖြစ် ယူကရိန်းအသင်းနဲ့ အိမ်ကွင်း၊ အဝေးကွင်း ယှဉ်ပြိုင်ရမှာဖြစ်ပြီး ဇွန်ထဲမှာ ၂၀၂၆ ကမ္ဘာ့ဖလား ခြေစစ်ပွဲအဖြစ် မြောက်မက်ဆီဒိုးနီးယားအသင်းနဲ့ စတင်ယှဉ်ပြိုင်ရမှာဖြစ်ပါတယ်။

Source: besoccer

CNI Sport News
၂၀၂၅ ခုနှစ်၊ ဇန်နဝါရီ ၁၈ 

ချယ်လ်ဆီးအသင်းကြယ်ပွင့် ကိုးလ်ပါလ်မာ အပါအဝင် ကစားသမား ၄ ဦးဟာ ဝုလ်ဗ်စ်အသင်းနဲ့ ပရီးမီးယားလိဂ် ပွဲစဉ်ကို လွဲချော်ဖွယ်ရှိတယ်လို့ နည်းပြမာရက်စ်ကာက ပြောခဲ့ပါတယ်။

မာရက်စ်ကာက “ကိုးလ်ပါလ်မာ၊ ကိုဝဲလ်၊ လာဗီးယားနဲ့ အန်ဇိုတို့ဟာ လေ့ကျင့်ခန်း အစီအစဉ်မှာ ပါဝင်ခဲ့ခြင်း မရှိတဲ့အတွက် ဝုလ်ဗ်စ်နဲ့ပွဲကို ပါဝင်နိုင်ဖို့ မသေချာပါဘူး။ သူတို့တွေဟာ နောက်ဆုံး ကစားခဲ့တဲ့ပွဲမှာ ဒဏ်ရာ ရရှိခဲ့ကြပါတယ်။ ကိုးလ်ပါလ်မာဟာ ခြေချင်းဝတ် ဒဏ်ရာရရှိခဲ့ပြီး ပြိုင်ဘက်ရဲ့ကန်ခြင်းကို ခံခဲ့ရတာပါ။ နောက်နေ့ တွေမှာ သူ လေ့ကျင့်ခန်း ဆင်းနိုင်မလားဆိုတာ ကျနော်မသိပါဘူး။ အန်ဇို၊ လာဗီးယားနဲ့ ကိုဝဲလ်တို့လည်း အလားအတူ အခြေအနေပါပဲ”လို့ ပြောခဲ့တာပါ။

 ချယ်လ်ဆီးအသင်းဟာ ပြီးခဲ့တဲ့ မိုကမ်ဘီအသင်းနဲ့ FA ဖလားပွဲစဉ်မှာ ၅ ဂိုး-ဂိုးမရှိနဲ့ ဂိုးပြတ် အနိုင်ရရှိခဲ့ပေမယ့် နောက်ဆုံးကစားခဲ့တဲ့ ပရီးမီးယားလိဂ် ၅ ပွဲစလုံး နိုင်ပွဲပျောက်ဆုံးနေတာ ဖြစ်ပါတယ်။

ချယ်လ်ဆီးအသင်းဟာ နိုင်ပွဲပြန်လည် ရယူနိုင်ဖို့ ပြင်ဆင်နေတဲ့အချိန်မှာ အဓိက ကစားသမား ၄ ဦးဒဏ်ရာ ရရှိနေတာကို ကြုံတွေ့နေရတာပါ။ 

ကိုးလ်ပါလ်မာဟာ ဒီရာသီမှာ ချယ်လ်ဆီး အသင်းအတွက် ၁၄ ဂိုး သွင်းယူကာ ဂိုးဖန်တီးမှု ၆ ကြိမ် ပြုလုပ် ထားပေမယ့် နည်းပြ မာရက်စ်ကာက သူမပါဝင်နိုင်လည်း အသင်းဟာ နိုင်ပွဲရယူနိုင်ဖို့ အဖြေရှာရမယ်လို့ ပြောထားပါတယ်။
 
ချယ်လ်ဆီးအသင်းဟာ ခံစစ်ပိုင်းဒဏ်ရာ အခက်အခဲကြောင့် ပြီးခဲ့တဲ့နွေရာသီက ခရစ္စတယ်ပဲလေ့စ်အသင်းထံ အငှားချခဲ့တဲ့ နောက်ခံလူ ချာလိုဘာကို ပြန်ပြီးခေါ်ယူခဲ့တာပါ။ 

ချာလိုဘာဟာ ခရစ္စတယ်ပဲလေ့စ် အသင်းအတွက် ၁၄ ပွဲ ပါဝင်ကစားခဲ့ပြီး ၃ ဂိုးသွင်းယူနိုင်ခဲ့ပါတယ်။ 

ချယ်လ်ဆီးအသင်းနည်းပြ မာရက်စ်ကာက ချာလိုဘာကို ပြန်ခေါ်ခဲ့တာဟာ အကောင်းဆုံး ဖြေရှင်းချက်ဖြစ်ပြီး သူဒီမှာရှိနေရတာကို အလွန်ပျော်ရွှင်နေတယ်လို့ ပြောခဲ့ပါတယ်။ 

ချယ်လ်ဆီးအသင်းဟာ ပရီးမီးယားလိဂ်မှာ နိုင်ပွဲတွေ ဆက်တိုက် ပျောက်ဆုံးခဲ့လို့ အဆင့် ၄ အပြင်ဘက်ကို ရောက်ရှိသွားခဲ့တဲ့အတွက် ဝုလ်ဗ်စ်အသင်းနဲ့ပွဲစဉ်မှာ နိုင်ပွဲပြန်လည်ရယူပြီး ထိပ်ဆုံး ၄ သင်းထဲ ပြန်ဝင်ရောက်နိုင်ဖို့ 
ပစ်မှတ်ထားနေတာ ဖြစ်ပါတယ်။ 

Source: Metro

CNI Sport News

၂၀၂၅ ခုနှစ်၊ ဇန်နဝါရီ ၁၈

မန်စီးတီးအသင်းနည်းပြ ဂွာဒီယိုလာက တိုက်စစ်မှူး ဟာလန်းရဲ့ နှစ်ရှည်စာချုပ်သစ်ဟာ သူက အသင်းကို ယုံကြည်မှုရှိကြောင်း ပြသတာလို့ ပြောခဲ့ပါတယ်။ 

ဂွာဒီယိုလာက “ဒါက ယုံကြည်မှုပါပဲ။ ကစားသမားတစ်ဦးဟာ ဒီလိုမျိုး စာချုပ်အပေါ်မှာ လက်မှတ်ရေးထိုးတဲ့အခါ အသင်းမှာဆက်ရှိဖို့ ဘယ်လောက်အထိ စိတ်အားထက်သန်လဲဆိုတာကို ပြသတာပါ။ သူဟာ ကလပ်နဲ့ ဒီအနီးအနားမှာရှိတဲ့ လူတွေအားလုံးကို ချစ်ပါတယ်။ သူဟာ ပရီးမီးယားလိဂ်ကိုလည်း ချစ်ပါတယ်။ သူ့မိသားစုဟာ နောက် ၁၀ နှစ်အတွင်း ဒီထက်ပိုကောင်းတဲ့နေရာမရှိဘူးလို့ ဆုံးဖြတ်ပြီး ဒီမှာဆက်ရှိခဲ့တာပါ”လို့ ပြောခဲ့တာပါ။ 

ဟာလန်းဟာ မန်စီးတီးအသင်းမှာ ၂၀၃၄ ခုနှစ်အထိရှိမယ့် ၉ နှစ်ခွဲ စာချုပ်သစ် ချုပ်ဆိုခဲ့တာဖြစ်ပါတယ်။ 

အဲဒါကြောင့် ဟာလန်းဟာ ကမ္ဘာပေါ်မှာ လုပ်ခလစာ အများဆုံးရရှိတဲ့ အားကစားကြယ်ပွင့်တွေထဲက တစ်ဦးဖြစ် လာတော့မှာပါ။ 

ဟာလန်းကို တွေ့ရစဉ်

မန်စီးတီးအသင်းဟာ လက်ရှိအချိန်မှာ ဘဏ္ဍာရေးစည်းမျဉ်း ချိုးဖောက်မှုစွဲချက် ၁၁၅ မှုအတွက် စီရင်ချက်ကို စောင့်ဆိုင်းနေရတာ ဖြစ်ပါတယ်။ 

မန်စီးတီးအသင်းအနေနဲ့ အပြစ်ရှိကြောင်း တွေ့ရမယ်ဆိုရင် ရမှတ်လျှော့ ဒါမှမဟုတ် ပရီးမီးယားလိဂ်ကနေ တန်းဆင်းတဲ့ ပြစ်ဒဏ်ချမှတ်ခံရနိုင်တာပါ။ 

မန်စီးတီးအသင်းဟာ ဒီလိုအခြေအနေ ရင်ဆိုင်နေရပေမယ့် ဟာလန်းဟာ နှစ်ရှည်စာချုပ်သစ် ချုပ်ဆိုခဲ့ပြီး အသင်းအပေါ် ယုံကြည်မှုရှိကြောင်း ပြသခဲ့တယ်လို့ နည်းပြဂွာဒီယိုလာက ပြောခဲ့တာဖြစ်ပါတယ်။

၂၀၂၂ ခုနှစ်နွေရာသီ အပြောင်းအရွှေ့က ဒေါ့မွန်အသင်းကနေ ပြောင်းရွှေ့လာခဲ့တဲ့ ဟာလန်းဟာ မန်စီးတီးအသင်း အတွက် ပြိုင်ပွဲစုံ ၁၂၆ ပွဲ ပါဝင်ကစားထားတာမှာ ၁၁၁ ဂိုး သွင်းယူထားပြီး ပရီးမီးယားလိဂ်ဖလား ၂ ကြိမ်၊ ချန်ပီယံလိဂ်ဖလား ၁ ကြိမ် အပါအဝင် ဆုဖလား အများအပြား ရယူထားတာပါ။ 

ဒီရာသီ ပရီးမီးယားလိဂ်ပြိုင်ပွဲမှာ အမှတ်ပေးဇယား အဆင့် ၆ နေရာ ရပ်တည်နေတဲ့ မန်စီးတီးအသင်းဟာ ဒီတစ်ပတ်ပွဲစဉ်အဖြစ် အစ်စဝှစ်ချ်အသင်းနဲ့ ယှဉ်ပြိုင်ရမှာဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ ဇန်နဝါရီ ၁၈

ပီအက်စ်ဂျီအသင်းဟာ နာပိုလီအသင်း တောင်ပံကစားသမား ကာဗီချာကို ခေါ်ယူမှုအပြီးသတ်ပြီး အပြောင်းအရွှေ့ ကြေညာခဲ့ပါတယ်။ 

ပီအက်စ်ဂျီအသင်းဟာ ကာဗီချာအတွက် နာပိုလီအသင်းကို ယူရိုသန်း ၆၀ ထပ်တိုးပေးချေမှု ယူရို ၁၀ သန်း ပေးချေရမှာဖြစ်ပြီး ၂၀၂၉ ခုနှစ်၊ ဇွန်လအထိ စာချုပ်ချုပ်ခဲ့ပါတယ်။ 

ဂျော်ဂျီယာ လက်ရွေးစင် ကစားသမားဟာ အခုဇန်နဝါရီ အပြောင်းအရွှေ့မှာ ပီအက်စ်ဂျီအသင်း ခေါ်ယူတဲ့ ပထမဆုံး ကစားသမားဖြစ်ပြီး ပြင်သစ်ကလပ်ဟာ ဆုဖလားအောင်မြင်မှုတွေ ရယူနိုင်ဖို့ အသင်းရဲ့တိုက်စစ်ပိုင်းကို ထပ်ပြီးအားဖြည့်ခဲ့တာပါ။ 

ကာဗီချာက “ဒီမှာရှိနေရတာက အိပ်မက်တစ်ခုပါပဲ။ ပီအက်စ်ဂျီနဲ့ ပတ်သက်ပြီး အပြုသဘောဆောင်တဲ့ အရာတွေ အများကြီး ကြားခဲ့ရပါတယ်။ ဒီအသင်းကို ပြောင်းရွှေ့ခွင့်ရတဲ့အတွက် ဂုဏ်ယူမိတယ်”လို့ ပြောခဲ့ပါတယ်။ 

ကာဗီချာကို တွေ့ရစဉ်

ပြီးခဲ့တဲ့ အပြောင်းအရွှေ့တွေမှာ လီဗာပူးလ်၊ ယူနိုက်တက်၊ ဘာစီလိုနာအသင်း အပါအဝင် ဥရောပထိပ်တန်း ကလပ်တွေနဲ့ ချိတ်ဆက်ခံမှုတွေခံခဲ့ရတဲ့ ကာဗီချာနဲ့ နာပိုလီအသင်းတို့ဟာ ၂၀၂၇ ခုနှစ်အထိ စာချုပ်ရှိနေခဲ့တာပါ။ 

နာပိုလီအသင်းဟာ ကာဗီချာကို စာချုပ်သက်တမ်း တိုးချင်ပေမယ့် သူကငြင်းဆန်ခဲ့ပြီး အခုအပြောင်းအရွှေ့မှာ အသင်းကနေ ထွက်ခွာဖို့ တောင်းဆိုခဲ့တာ ဖြစ်ပါတယ်။ 

ကာဗီချာဟာ နာပိုလီအသင်း နှစ်ပေါင်း ၃၃ နှစ်အကြာမှ ပထမဆုံး စီးရီးအေဖလား ရယူနိုင်ခဲ့တဲ့ ၂၀၂၂-၂၃ ရာသီမှာ စီးရီးအေပြိုင်ပွဲရဲ့ အကောင်းဆုံး ကစားသမားဆုကို ရရှိခဲ့တာပါ။ 

ကာဗီချာဟာ ဒီရာသီမှာ နာပိုလီအသင်းအတွက် ၁၉ ပွဲ ပါဝင်ကစားခဲ့ပြီး ၅ ဂိုးသွင်းယူခဲ့တာ အပါအဝင် ပြိုင်ပွဲစုံ ၁၀၇ ပွဲ ပါဝင်ကစားခဲ့ကာ သွင်းဂိုး ၃၀ သွင်းယူနိုင်ခဲ့ပါတယ်။ 

အသက် ၂၃ နှစ်အရွယ်ရှိ ကာဗီချာဟာ လန်းစ်အသင်းနဲ့ ပြင်သစ်လီဂူး-၁ ပွဲစဉ်မှာ ပီအက်စ်ဂျီအသင်းအတွက် ပွဲဦးထွက်အဖြစ် ပါဝင်လာနိုင်တာဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဇန်နဝါရီ ၁၇

ယူနိုက်တက်အသင်း နည်းပြဟောင်း ဆိုးလ်ရှားဟာ တူရကီကလပ် ဘက်ဆစ်တပ်အသင်းကို ကိုင်တွယ်ပြီး နည်းပြလောကထဲကို ပြန်လည်ဝင်ရောက်ဖို့ နီးစပ်နေပြီဖြစ်ပါတယ်။ 

ဆိုးလ်ရှားဟာ ၂၀၂၁ ခုနှစ်၊ နိုဝင်ဘာက ယူနိုက်တက်အသင်းကနေ ထွက်ခွာပြီးကတည်းက ဘယ်အသင်းကိုမှ ကိုင်တွယ်ရခြင်း မရှိသေးတာပါ။ 

နော်ဝေလူမျိုး နည်းပြဟာ ကလပ်အသင်းတွေ အပါအဝင် နိုင်ငံအသင်းတွေရဲ့ နည်းပြရာထူးအတွက် ကမ်းလှမ်းမှုတွေ ရရှိခဲ့ပေမယ့် ပယ်ချထားတာ ဖြစ်ပါတယ်။ 

အခုအချိန်မှာတော့ ဆိုးလ်ရှားဟာ ဘက်ဆစ်တပ်အသင်းကို ကိုင်တွယ်ဖို့ နီးစပ်နေပြီလို့ တူရကီဂျာနယ်လစ် ဒစ်ခ်မီက ပြောထားပါတယ်။ 

ဆိုးလ်ရှားဟာ ဘက်ဆစ်တပ်အသင်းကို ကိုင်တွယ်ခဲ့မယ်ဆိုရင် ဖီနာဘာချီအသင်းကို ကိုင်တွယ်နေတဲ့ ယူနိုက်တက်အသင်းနည်းပြဟောင်း မော်ရင်ဟိုနဲ့ ရင်ဆိုင်ရမှာပါ။ 

ဘက်ဆစ်တပ်အသင်းဟာ ပြီးခဲ့တဲ့ ဒီဇင်ဘာက နည်းပြ ဗန်ဘရွန်ခရော့စ်နဲ့ လမ်းခွဲခဲ့ပြီးနောက် ယာယီနည်းပြ ဆာဒါက အသင်းကို ကိုင်တွယ်နေတာ ဖြစ်ပါတယ်။ 

ဆိုးလ်ရှားကို တွေ့ရစဉ်

ဘက်ဆစ်တပ်အသင်း အကြီးအကဲတွေဟာ အမြဲတမ်းနည်းပြ တစ်ဦးကို ခန့်အပ်နိုင်ဖို့ ရှာဖွေနေပြီး ဆိုးလ်ရှားဟာ နည်းပြသစ်ဖြစ်လာဖို့ ရေပန်းအစားဆုံး ဖြစ်နေခဲ့တာပါ။ 

ဘက်ဆစ်တပ်အသင်းဟာ ဆိုးလ်ရှားကို တရားဝင် ကမ်းလှမ်းမှု ပြုလုပ်ထားသလို နောက်ထပ်အဆင့်တွေ ထပ်ပြီး ဆွေးနွေးသွားဖို့ ရှိနေတာဖြစ်ပါတယ်။ 

ဆိုးလ်ရှားဟာ ဘက်ဆစ်တပ်အသင်းကို တရားဝင်ပွဲ မကိုင်တွယ်ခင် ဆမ်ဆန်စပေါ်အသင်းနဲ့ပွဲကို တက်ရောက် ကြည့်ရှုဖွယ်ရှိနေတာပါ။ 

ယူနိုက်တက်အသင်း နည်းပြဟောင်းဟာ ဘက်ဆစ်တပ်အသင်းကို ဇန်နဝါရီ ၂၂ ရက်မှာ ကစားမယ့် ဘီလ်ဘာအို အသင်းနဲ့ ယူရိုပါလိဂ်ပွဲစဉ်မှာ ပထမဆုံးပွဲစဉ်အဖြစ် စတင်ကိုင်တွယ်နိုင်တယ်လို့ သိရပါတယ်။ 

ဘက်ဆစ်တပ်အသင်းဟာ ဒီရာသီ တူရကီစူပါလိဂ်ပြိုင်ပွဲမှာ အမှတ်ပေးဇယားအဆင့် ၅ နေရာ ရပ်တည်နေပြီး အဆင့် ၁ နေရာက ဂါလာတာစာရေးအသင်းနဲ့ ရမှတ် ၂၀ အထိကွာဟနေတာပါ။

ဘက်ဆစ်တပ်အသင်းဟာ ယူရိုပါလိဂ်ပြိုင်ပွဲမှာလည်း ရလဒ်တွေဆိုးနေပြီး ၆ ပွဲ ကစားထားတာမှာ ရမှတ် ၆ မှတ်နဲ့ အဆင့် ၂၈ နေရာမှာ ရပ်တည်နေတာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဇန်နဝါရီ ၁၇

အယ်လ်ဟီလယ်အသင်းနည်းပြ ဂျော့ချ်ဂျီးဆပ်စ်က တိုက်စစ်မှူးနေမာကို ဆော်ဒီပရိုလိဂ်ရာသီ ဒုတိယရာသီဝက် အတွက် လူစာရင်းထဲ စာရင်းမသွင်းဘူးလို့ အတည်ပြုခဲ့ပါတယ်။ 

ဂျော့ချ်ဂျီးဆပ်စ်က “နေမာကို ဆော်ဒီပရိုလိဂ် ပြိုင်ပွဲအတွက် အသင်းလူစာရင်းထဲ စာရင်းသွင်းမှာ မဟုတ်ပါဘူး။ သူဟာ အာရှချန်ပီယံလိဂ်ပြိုင်ပွဲမှာ ပါဝင်ကစားနိုင်ပါတယ်။ ဆော်ဒီလိဂ်က ကမ္ဘာ့အကောင်းဆုံးလိဂ်တွေထဲက တစ်ခုဖြစ်ပြီး အယ်လ်ဟီလယ် ကစားသမားတွေဟာ ဥရောပမှာရှိတဲ့ ဘယ်အသင်းမှာမဆို ကစားနိုင်ပါတယ်။ နေမာဟာ ကျနော်တို့ သွားနေတဲ့ အဆင့်မှာ မကစားနိုင်ပါဘူး။ သူ့ရဲ့အနာဂတ်ကို ဆုံးဖြတ်ဖို့က သူ့အပေါ်မှာ မူတည်သလို အသင်းကို အုပ်ချုပ်တဲ့ သူတွေအပေါ်မှာလည်း မူတည်တယ်”လို့ ပြောခဲ့တာပါ။ 

နေမာဟာ အယ်လ်ဟီလယ်အသင်းကို ရောက်ရှိလာပြီးကတည်းက ဒဏ်ရာတွေနဲ့ ရုန်းကန်နေရပြီး လက်ရှိ အချိန် အထိ ပြိုင်ပွဲစုံ ၇ ပွဲသာ ပါဝင်ကစားနိုင်ခဲ့ပါတယ်။ 

နေမာဟာ အယ်လ်ဟီလယ်အသင်းနဲ့အတူ ဆော်ဒီပရိုလိဂ်ရာသီ ဒုတိယရာသီဝက်မှာ ပါဝင်ကစားနိုင်ဖို့ ရည်မှန်း ထားပေမယ့် နည်းပြရဲ့ပြောဆိုမှုကြောင့် သူဟာ အာရှချန်ပီယံလိဂ် ပြိုင်ပွဲမှာသာ ပါဝင်ကစားလို့ ရရှိမှာဖြစ်ပါ တယ်။

နေမာကို တွေ့ရစဉ်

နေမာနဲ့ အယ်လ်ဟီလယ်အသင်းတို့ရဲ့ စာချုပ်ဟာ ဒီရာသီကုန်ရင် ကုန်ဆုံးပြီဖြစ်ပေမယ့် နောက်ထပ် တစ်နှစ် သက်တမ်းတိုးခွင့် ရှိနေတာပါ။ 

လက်ရှိအချိန်မှာ နေမာကို ခေါ်ယူဖို့ မေဂျာလိဂ် ကလပ်တွေနဲ့ ဘရာဇီးလ်ကလပ် ဆန်းတို့စ်အသင်းက ပစ်မှတ်ထားနေပြီး ကစားသမားအနေနဲ့ သူ့ရဲ့အနာဂတ်ကို ဆုံးဖြတ်ရဖို့ရှိနေတာ ဖြစ်ပါတယ်။ 

အယ်လ်ဟီလယ်အသင်းဟာ အာရှချန်ပီယံလိဂ်ပြိုင်ပွဲမှာ ၁၆ သင်းအဆင့်ကို တက်ရောက်ထားပြီးဖြစ်သလို ဗိုလ်လုပွဲအထိ တက်နိုင်မယ်ဆိုရင် နေမာအနေနဲ့ အယ်လ်ဟီလယ်အသင်းအတွက် အာရှချန်ပီယံလိဂ်ပြိုင်ပွဲမှာ ပွဲအများအပြား ပါဝင်ကစားရဖို့ ရှိနေတာပါ။

ဒါအပြင် အယ်လ်ဟီလယ်အသင်းဟာ နွေရာသီမှာ ကျင်းပမယ့် ဖီဖာကလပ် ကမ္ဘာ့ဖလားပြိုင်ပွဲကိုလည်း ယှဉ်ပြိုင်ခွင့် ရရှိထားပါတယ်။ 

အယ်လ်ဟီလယ်အသင်းဟာ နောက်ဆုံးကစားခဲ့တဲ့ ဆော်ဒီပရိုလိဂ်ပွဲစဉ်မှာ အယ်လ်ဖာတက်အသင်းကို ၉ ဂိုး-ဂိုး မရှိနဲ့ ဂိုးပြတ်အနိုင်ရပြီး အမှတ်ပေးဇယား ထိပ်ဆုံးနေရာမှာ ရပ်တည်နေတာဖြစ်ပါတယ်။ 

Source: Goal