CNI Sport News

၂၀၂၆ ခုနှစ်၊ မတ်လ ၆

အင်တာမိုင်ယာမီအသင်းဟာ အသင်းသမိုင်းတစ်လျှောက် ပထမဆုံးအကြိမ် မေဂျာလိဂ်ဖလား ရယူနိုင်ခဲ့ပြီးနောက် အိမ်ဖြူတော်မှာ ကျင်းပတဲ့ အမေရိကန်သမ္မတ ဒေါ်နယ်ထရမ့်ရဲ့ ဂုဏ်ပြုဧည့်ခံပွဲ အခမ်းအနားကို တက်ရောက် ခဲ့ပါတယ်။

သမ္မတထရမ့်၊ အသင်းပူးတွဲပိုင်ရှင် ဂျော့ချ်မက်စ်တို့နဲ့အတူ အခန်းထဲကို ဝင်ရောက်လာခဲ့တဲ့ မက်ဆီဟာ နောက်ပိုင်းမှာ သမ္မတထရမ့်ကို အင်တာမိုင်ယာမီအသင်း လက်မှတ်ပါဝင်တဲ့ ပန်းရောင်ဘောလုံးကို လက်ဆောင် အဖြစ် ပေးခဲ့တာပါ။ 

ထရမ့်ဟာ ဂျော့ချ်မက်စ်၊ နည်းပြချုပ် မာရှေယာနိုတို့ထံကနေ မိုင်ယာမီဂျာစီနဲ့ နာရီတစ်လုံးကိုလည်း လက်ခံ ရရှိခဲ့ပါတယ်။ 

၂၀၂၃ ခုနှစ်၊ ဇူလိုင်လမှာ အင်တာမိုင်ယာမီအသင်းထံ ရောက်ရှိလာပြီးနောက် မက်ဆီဟာ အိမ်ဖြူတော်ထံ ပထမဆုံးအကြိမ် လာရောက်ခဲ့တာပါ။ 

မက်ဆီရဲ့ အဓိက ပြိုင်ဘက်ကြီးဖြစ်တဲ့ ပေါ်တူဂီအသင်း ခေါင်းဆောင် ရော်နယ်လ်ဒိုကလည်း ပြီးခဲ့တဲ့ နိုဝင်ဘာလ မှာ ညစာစားပွဲ တက်ရောက်ခဲ့ပြီးနောက် သမ္မတဒေါ်နယ်ထရမ့်နဲ့ တွေ့ဆုံခဲ့ပါတယ်။ 

အင်တာမိုင်ယာမီအသင်းကို တွေ့ရစဉ်

ဒေါ်နယ်ထရမ့်က “ကျနော်တို့ဟာ တကယ့်ကို ထူးချွန်တဲ့သူတွေကို ဂုဏ်ပြုနေတာပါ။ အမေရိကန်သမ္မတ တစ်ဦး ကမှ အရင်က ပြောခဲ့ခြင်းမရှိတဲ့ အိမ်ဖြူတော်ထံ ကြိုဆိုပါတယ်၊ မက်ဆီဆိုပြီး ပြောခွင့်ရတာက ကျနော့်အတွက် ထူးခြားတဲ့ အခွင့်အရေးပါပဲ။ ကျနော့်သား ဘာရွန်က ခင်ဗျားရဲ့ အမာခံ ပရိသတ်တစ်ဦးပါ။ သူက ခင်ဗျားကို အလွန်ကောင်းတဲ့သူလို့ ထင်ထားပါတယ်။ သူဟာ ရော်နယ်လ်ဒိုရဲ့ ပရိသတ်လည်း ဟုတ်ပါတယ်။ ရော်နယ်လ်ဒို လည်း အလွန်ကောင်းသလို၊ ခင်ဗျားလည်း အလွန်ကောင်းပါတယ်”လို့ ပြောခဲ့ပါတယ်။ 

အင်တာမိုင်ယာမီအသင်းဟာ ပြီးခဲ့တဲ့ရာသီမှာ မေဂျာလိဂ်ဖလား ရယူနိုင်ခဲ့သလို မက်ဆီကလည်း လိဂ်ပြိုင်ပွဲရဲ့ အကောင်းဆုံး ကစားသမားဆုကို ၂ ရာသီ ဆက်တိုက် ရယူနိုင်ခဲ့တာပါ။ 

အင်တာမိုင်ယာမီအသင်းဟာ မက်ဆီ ရောက်ရှိလာပြီးနောက် ရာသီတိုင်း ဆုဖလား ရယူနိုင်ခဲ့ပါတယ်။ 

ဒေါ်နယ်ထရမ့်က အင်တာမိုင်ယာမီအသင်းကို ရွေးချယ်ခဲ့တဲ့အတွက် မက်ဆီကို ကျေးဇူးတင်ကြောင်းနဲ့ မက်ဆီဟာ ပီလီထက် ပိုပြီးကောင်းနိုင်တယ်လို့လည်း ပြောခဲ့တာပါ။ 

ဒီဧည့်ခံပွဲအပြီးမှာ ဒေါ်နယ်ထရမ့်ဟာ အင်တာမိုင်ယာမီအသင်းကို Oval Office ထံ ဖိတ်ကြားခဲ့ပါတယ်။ 

အင်တာမိုင်ယာမီအသင်းနဲ့ ၂၀၂၈ ခုနှစ်အထိ စာချုပ် သက်တမ်းတိုးထားတဲ့ မက်ဆီဟာ ပြီးခဲ့တဲ့ အော်လန်ဒိုစီးတီး အသင်းနဲ့ မေဂျာလိဂ်ပွဲမှာ အသင်းအတွက် ၂ ဂိုးသွင်းယူပြီး ခြေစွမ်းပြသနိုင်ခဲ့ပါတယ်။ 

Source: ESPN

CNI Sport News

၂၀၂၆ ခုနှစ်၊ မတ်လ ၅

အက်သလက်တီကိုအသင်း တိုက်စစ်မှူး ဂရစ်ဇ်မန်းဟာ သူ့ရဲ့အသင်း ကိုပါဒယ်ရေးဖလား ဗိုလ်လုပွဲထံ တက်နိုင်ခဲ့ ပြီးနောက် ဒီရာသီမှာ မေဂျာလိဂ်ကလပ် အော်လန်ဒိုစီးတီးအသင်းထံ ပြောင်းရွှေ့နိုင်ဖွယ်ရှိတာကို ရပ်ဆိုင်းခဲ့ပါ တယ်။

ဂရစ်ဇ်မန်းဟာ အက်သလက်တီကိုအသင်းနဲ့ ၂၀၂၇ ခုနှစ်အထိ စာချုပ်ရှိနေပေမယ့် အပြောင်းအရွှေ့အတွက် အော်လန်ဒိုစီးတီးအသင်းနဲ့ ဆွေးနွေးခဲ့တယ်လို့ ESPN က ပြီးခဲ့တဲ့အပတ်မှာ ဖော်ပြခဲ့ပါတယ်။ 

အော်လန်ဒိုစီးတီးအသင်းဟာ မေဂျာလိဂ် အပြောင်းအရွှေ့ နောက်ဆုံးရက်ဖြစ်တဲ့ မတ်လ ၂၆ ရက်မတိုင်မီ ဂရစ်ဇ်မန်းကို ခေါ်ယူနိုင်ဖို့ ကမ်းလှမ်းခဲ့တယ်လို့ သတင်းရင်းမြစ်တွေက ပြောခဲ့ပါတယ်။ 

အော်လန်ဒိုစီးတီးအသင်းရဲ့ ဂရစ်ဇ်မန်းကို ကမ်းလှမ်းမှုဟာ ဒီအပြောင်းအရွှေ့အတွက်သာ အကျုံးဝင်ပြီး သူတို့ဟာ လာမယ့် အပြောင်းအရွှေ့မှာ အခြား ရွေးချယ်စရာတွေ ရှိနိုင်တာပါ။ 

ဂရစ်ဇ်မန်းကို တွေ့ရစဉ်

ဂရစ်ဇ်မန်းဟာ အက်သလက်တီကိုအသင်းရဲ့ ဂိုးသွင်း အများဆုံး ကစားသမားဖြစ်ပြီး ၂၁၀ ဂိုးအထိ သွင်းယူထား ပေမယ့် မကြာသေးမီ နှစ်တွေအတွင်း ဆုဖလားတွေနဲ့ ဝေးကွာနေတာဖြစ်ပါတယ်။ 

ဂရစ်ဇ်မန်းဟာ ဒီရာသီမှာ အက်သလက်တီကိုအသင်းနဲ့ ကိုပါဒယ်ရေးဖလား ရယူနိုင်ဖို့ အခွင့်အရေး ရှိနေတာ ကြောင့် အသင်းဟာ သူ့ကို ရာသီကုန်အထိ ဆက်ရှိစေချင်နေတာပါ။ 

အက်သလက်တီကိုအသင်း နည်းပြ ဆီမြွန်နီက ဂရစ်ဇ်မန်းဟာ အသင်းအတွက် အရေးပါတဲ့ ကစားသမားဖြစ်သလို အသင်းကို ပံ့ပိုးပေးခဲ့တဲ့ အရာတွေကြောင့် သူလုပ်ချင်တာကို ရွေးချယ်ဖို့ ထိုက်တန်တဲ့ နေရာမှာ ရှိတယ်လို့ ပြောခဲ့ပါတယ်။ 

အက်သလက်တီကိုအသင်းဟာ ကိုပါဒယ်ရေးဖလား ဗိုလ်လုပွဲမှာ ဆိုစီဒက်အသင်းနဲ့ ယှဉ်ပြိုင်ရမှာဖြစ်ပြီး ချန်ပီယံလိဂ် ၁၆ သင်း အဆင့်မှာတော့ စပါးအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: ESPN

CNI Sport News

၂၀၂၆ ခုနှစ်၊ မတ်လ ၅

လီဗာပူးလ်နဲ့မန်စီးတီးအသင်းရဲ့ ပစ်မှတ်ဖြစ်တဲ့ ဘိုင်ယန်မြူးနစ်အသင်း တောင်ပံကစားသမား အိုလီဆီဟာ လာလီဂါမှာ သူ့ကိုယ်သူ သွားရောက် စမ်းသပ်ခံဖို့ ဆန္ဒရှိနေပါတယ်။ 

၂၀၂၄ ခုနှစ်က ခရစ္စတယ်ပဲလေ့စ်အသင်းကနေ ရောက်လာခဲ့တဲ့ အိုလီဆီဟာ ဘိုင်ယန်မြူးနစ်အသင်းအတွက် ပွဲဦးထွက်ခဲ့တဲ့ရာသီမှာ ၂၀ ဂိုးသွင်းပြီး ၂၃ ဂိုးဖန်တီးနိုင်ခဲ့တာပါ။ 

ပြင်သစ်ကစားသမားဟာ ဒီရာသီမှာလည်း သူ့ရဲ့အကောင်းဆုံးပုံစံကို ဆက်ထိန်းထားပြီး ၁၃ ဂိုးသွင်းယူကာ ဂိုးဖန်တီးမှု ၂၅ ကြိမ် ပြုလုပ်ထားတာ ဖြစ်ပါတယ်။ 

လီဗာပူးလ်၊ မန်စီးတီးနဲ့ PSG အသင်းတို့ရဲ့ စောင့်ကြည့်မှုတွေ ခံနေရတဲ့ အိုလီဆီအတွက် ဘိုင်ယန်မြူးနစ်အသင်း ဟာ ကမ်းလှမ်းမှုတွေကို လက်ခံဖို့ ရည်ရွယ်ထားခြင်း မရှိတာပါ။ 

Team Talk က လီဗာပူးလ်နဲ့ မန်စီးတီးအသင်းတို့ဟာ အိုလီဆီအတွက် စုံစမ်းမေးမြန်းမှုတွေ ပြုလုပ်ခဲ့ပေမယ့် သူတို့ရဲ့ချဉ်းကပ်မှုတွေဟာ ငြင်းပယ်ခံခဲ့ရတယ်လို့ ဖော်ပြထားပါတယ်။ 

အိုလီဆီကို တွေ့ရစဉ်

လီဗာပူးလ်အသင်းဟာ ဆာလက်ရဲ့ နေရာမှာ ရေရှည်အစားထိုးဖို့ ကစားပုံချင်းတူညီတဲ့ အိုလီဆီကို ပစ်မှတ်ထား နေတာဖြစ်ပြီး မန်စီးတီးအသင်းကလည်း ဘိုင်ယန်မြူးနစ်အသင်းနဲ့ ၂၀၂၉ ခုနှစ်အထိ စာချုပ်ရှိနေတဲ့ သူ့ကို စိတ်ဝင် စားနေတာပါ။ 

အိုလီဆီဟာ ဘိုင်ယန်မြူးနစ်အသင်းမှာ ပျော်ရွှင်နေသလို အခုအချိန်မှာ အသင်းကနေ ထွက်ခွာဖို့ စဉ်းစားထားခြင်း မရှိတာဖြစ်ပါတယ်။ 

ဒါပေမယ့် အိုလီဆီဟာ အနာဂတ်မှာတော့ လာလီဂါထံ သွားရောက်ပြီး သူ့ကိုယ်သူ စမ်းသပ်ခံဖို့ ဆန္ဒရှိနေတာ ကြောင့် ရီးရယ်လ်နဲ့ ဘာစီလိုနာအသင်းတို့က သူ့ရဲ့တိုးတက်မှုကို အနီးကပ် စောင့်ကြည့်နေကြပါတယ်။ 

သတင်းတွေမှာတော့ ဘိုင်ယန်မြူးနစ်အသင်းဟာ အိုလီဆီအတွက် ယူရိုသန်း ၁၀၀ အောက် ကမ်းလှမ်းမှုတွေကို စဉ်းစားသွားမှာ မဟုတ်ဘဲ စာချုပ်သစ် ချုပ်နိုင်ခဲ့ရင် ဒီထက်မြင့်မားတဲ့ ပြောင်းရွှေ့ကြေး တောင်းဆိုနိုင်တယ်လို့ ဖော်ပြထားပါတယ်။ 

Source: Sportsmole

CNI Sport News

၂၀၂၆ ခုနှစ်၊ မတ်လ ၅

ယူနိုက်တက်အသင်းဟာ နည်းပြမိုက်ကယ်ကာရစ် လက်ထက်မှာ ၇ ပွဲဆက် ရှုံးပွဲမရှိအောင် ကစားနိုင်ခဲ့ပေမယ့် နယူးကာဆယ်အသင်းကို ၂ ဂိုး-၁ ဂိုးနဲ့ အရေးနိမ့်ပြီးနောက် ပထမဆုံး ရှုံးပွဲကြုံတွေ့ခဲ့ပါတယ်။ 

ဒီပွဲမှာ ယူနိုက်တက်အသင်းဟာ ပထမပိုင်း ပွဲချိန်အတွင်း နယူးကာဆယ်အသင်း ကွင်းလယ်လူ ရမ်ဆေး ထုတ်ပယ် ခံခဲ့ရလို့ တစ်ဦးအသာနဲ့ ကစားခဲ့ရပေမယ့် မိနစ် ၉၀ မှာ ပေးခဲ့ရတဲ့ လူစားဝင် အိုဆူလာရဲ့သွင်းဂိုးကြောင့် ရှုံးပွဲ ကြုံတွေ့ခဲ့ပါ။

ယူနိုက်တက်အသင်းဟာ ဒီရှုံးပွဲကြောင့် နည်းပြမိုက်ကယ်ကာရစ် လက်ထက်ကစားခဲ့တဲ့ ၈ ပွဲမှာ ၆ ပွဲနိုင်၊ ၁ ပွဲ သရေနဲ့ ၁ ပွဲရှုံးနိမ့်ခဲ့တာ ဖြစ်ပါတယ်။ 

မိုက်ကယ်ကာရစ်က “အလွန်စိတ်ပျက်ဖို့ ကောင်းခဲ့ပြီး နာကျင်စရာပါပဲ။ ကျနော်တို့ဟာ ကောင်းမွန်တဲ့ပုံစံနဲ့ ဒီကို ရောက်လာခဲ့ပြီး ပွဲကနေ တစ်ခုခု ရယူနိုင်ဖို့ ကြိုးစားခဲ့ပါတယ်။ ဒါပေမယ့် မလုပ်နိုင်ခဲ့တဲ့အတွက် စိတ်ပျက်မိပါ တယ်။ ဒီပွဲက နာကျင်စရာကောင်းခဲ့ပေမယ့် ကျနော်တို့ အနားမှာ အလွန်ကောင်းမွန်တဲ့ အသင်းတွေ  ရှိနေတာ ကြောင့် လာမယ့်ပွဲတွေကို အနိုင်ရအောင် ကြိုးစားရမယ်”လို့ ပြောခဲ့တာပါ။ 

ယူနိုက်တက်နဲ့နယူးကာဆယ် ယှဉ်ပြိုင်နေစဉ် 

ယူနိုက်တက်အသင်းဟာ ဒီပွဲအရေးနိမ့်ခဲ့ပေမယ့် အက်စတွန်ဗီလာအသင်းကလည်း ချယ်လ်ဆီးအသင်းကို အရေး နိမ့်ခဲ့တာကြောင့် ပရီးမီးယားလိဂ် အမှတ်ပေးဇယားအဆင့် ၃ နေရာမှာ ဆက်ပြီး ရပ်တည်နေပါတယ်။ 

ဒါပေမယ့် ယူနိုက်တက်အသင်းဟာ အက်စတွန်ဗီလာအသင်းနဲ့ ရမှတ်တူနေပြီး အဆင့် ၅ နေရာက ချယ်လ်ဆီး အသင်းနဲ့ ၃ မှတ်သာ ကွာဟတာကြောင့် လာမယ့်ပွဲတွေမှာ အမှားအယွင်း လုပ်ခဲ့ရင် အဆင့် ကျဆင်းသွားနိုင် ပါတယ်။ 

အဲ့ဒါကြောင့် နည်းပြမိုက်ကယ်ကာရစ်က ယူနိုက်တက်အသင်းအနေနဲ့ လက်ကျန်ပွဲတွေမှာ တစ်ပွဲချင်းစီကို အာရုံစိုက်ဖို့ ပြောခဲ့ပါတယ်။ 

ယူနိုက်တက်အသင်းဟာ လာမယ့် ပရီးမီးယားလိဂ် ပွဲအဖြစ် မတ်လ ၁၅ ရက်မှာ အက်စတွန်ဗီလာအသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: ESPN

CNI Sport News

၂၀၂၆ ခုနှစ်၊ မတ်လ ၅

အာဆင်နယ်အသင်းက ဘရိုက်တန်အသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ ပရီးမီးယားလိဂ်ပွဲမှာ အာဆင်နယ် အသင်းရဲ့ အချိန်ဆွဲတဲ့ နည်းဗျူဟာကို ဘရိုက်တန်အသင်းနည်းပြ ဟာဇယ်လာက ဝေဖန်ခဲ့ပြီး ပရီးမီးယားလိဂ် အနေနဲ့ ဝင်ရောက်စွက်ဖက်ဖို့ တောင်းဆိုခဲ့ပါတယ်။ 

ဟာဇယ်လာက “ဒီပွဲကိုအနိုင်ရဖို့ သူတို့အရာအားလုံး လုပ်ခဲ့ကြတယ်လို့ ခံစားရပါတယ်။ နောက်ဆုံးမှာ စည်းမျဉ်း တွေနဲ့ပဲ သက်ဆိုင်ပြီး ပရီးမီးယားလိဂ်မှာ ဒိုင်လူကြီးက အရာအားလုံးကို ခွင့်ပြုရင် ခက်ခဲပါတယ်။ သူတို့က ကိုယ်ပိုင် စည်းမျဉ်းတွေ ချမှတ်ထားပါတယ်။ အချိန်ဆွဲလို့ ဂိုးသမားကို အဝါကတ် ၂ ကတ် ပြသပြီး ထုတ်ပယ် ချင်လား၊ ဒါက ဘယ်တော့မှဖြစ်မှာ မဟုတ်ပါဘူး။ ဒါကြောင့် စည်းမျဉ်းတွေကို ကန့်သတ်ဖို့ လိုအပ်ပါတယ်။ ဒိုင်လူကြီးတွေကို ကာကွယ်နိုင်တာကြောင့် ရှင်းလင်းတဲ့ စည်းမျဉ်းတွေ လိုအပ်ကြောင်း”ပြောခဲ့တာပါ။ 

အာဆင်နယ်အသင်းဟာ ဒီနိုင်ပွဲကြောင့် နော်တင်ဟမ်ဖောရက်စ်အသင်းနဲ့ သရေကျခဲ့တဲ့ မန်စီးတီးအသင်းကို ၁ ပွဲ ပိုကစားပြီး ရမှတ် ၇ မှတ်ဖြတ်ကာ အမှတ်ပေးဇယား ထိပ်ဆုံးနေရာမှာ ရပ်တည်နိုင်ခဲ့ပါတယ်။

ဒီပွဲမှာ အာဆင်နယ်အသင်းဟာ ပွဲကို အချိန်ဆွဲပြီး ကစားဖို့ ကြိုးစားတာကြောင့် ကွင်းဘေးစည်းမှာ အာတီတာနဲ့ ဟာဇယ်လာတို့ အပြန်အလှန် စကားပြောဆိုမှုတွေလည်း ရှိခဲ့တာပါ။ 

အာဆင်နယ်အသင်းကို တွေ့ရစဉ်

ဘရိုက်တန်အသင်းဟာ ဒီပွဲမှာ အာဆင်နယ်အသင်းထက် ဘောလုံးပိုင်ဆိုင်မှုရော၊ ဂိုးပေါက်ကန်သွင်းမှုတွေမှာ အသာရခဲ့ပေမယ့် ရှုံးနိမ့်ခဲ့တာဖြစ်ပါတယ်။

အဲ့ဒါကြောင့် ဘရိုက်တန်အသင်းနည်းပြ ဟာဇယ်လာက အာဆင်နယ်အသင်းကို ဝေဖန်ခဲ့ကာ ဒီပွဲမှာ ဘောလုံး ကစားဖို့ ကြိုးစားခဲ့တာ သူတို့တစ်သင်းပဲရှိပြီး သူဟာ ဒီလိုနည်းနဲ့ အနိုင်ရဖို့ ကြိုးစားတဲ့ နည်းပြမျိုး ဘယ်တော့မှ ဖြစ်မှာ မဟုတ်ဘူးလို့ ပြောခဲ့ပါတယ်။ 

အာဆင်နယ်အသင်းနည်းပြ အာတီတာက ဟာဇယ်လာရဲ့ မှတ်ချက်စကားတွေဟာ အံ့သြစရာဖြစ်ပြီး အရင်ပွဲ တွေကို ပြန်ကြည့်လိုက်ရင်လည်း ဒီလိုမှတ်ချက်တွေ အများကြီး မြင်တွေ့ရမယ်လို့ တုန့်ပြန်ခဲ့ပါတယ်။ 

အာဆင်နယ်အသင်းဟာ လာမယ့်ပွဲတွေအဖြစ် မန်စ်ဖီးလ်တောင်းအသင်းနဲ့ FA ဖလား၊ လေဗာကူဆင်အသင်းနဲ့ ချန်ပီယံလိဂ် ၁၆ သင်းအဆင့် ယှဉ်ပြိုင်ရမှာဖြစ်ပါတယ်။ 

Source: Metro

CNI Sport News

၂၀၂၆ ခုနှစ်၊ မတ်လ ၄

ရီးရယ်လ်အသင်း တိုက်စစ်မှူး ရိုဒရီဂိုဟာ ဒူးအရွတ်စုတ်ပြဲ(ACL)ဒဏ်ရာကြောင့် ရာသီကုန်အထိ အနားယူရ တော့မှာ ဖြစ်သလို ဘရာဇီးလ်အသင်းနဲ့ ၂၀၂၆ ကမ္ဘာ့ဖလားပြိုင်ပွဲကို လွဲချော်သွားခဲ့ပါတယ်။ 

ရိုဒရီဂိုဟာ ရီးရယ်လ်အသင်းက ဂီတာဖေးအသင်းကို ၁ ဂိုး-ဂိုးမရှိနဲ့အရေးနိမ့်ခဲ့တဲ့ လာလီဂါပွဲစဉ်မှာ ACL ဒဏ်ရာ ရရှိသွားခဲ့တာပါ။

ACL ဒဏ်ရာဟာ ဘောလုံးသမားတိုင်း ကြောက်ရတဲ့ ဒဏ်ရာဖြစ်ပြီး ဒီဒဏ်ရာကြောင့် ပွဲတွေ ပြန်ကစားနိုင်ဖို့ အချိန် အကြာကြီး ယူရနိုင်တာ ဖြစ်ပါတယ်။ 

ရိုဒရီဂိုက သူ့ဘဝရဲ့ အဆိုးရွားဆုံး နေ့ရက်တွေထဲက တစ်ရက်ဖြစ်တယ်လို့ ဆိုရှယ်မီဒီယာမှာ ရေးသားခဲ့ပါတယ်။

ရိုဒရီဂိုက “ကျနော်ဟာ ကလပ်အသင်းနဲ့ ရာသီကုန်အထိ မကစားနိုင်တော့သလို နိုင်ငံအသင်းနဲ့လည်း ကမ္ဘာ့ဖလား ပြိုင်ပွဲမှာ မပါဝင်ရတော့ပါဘူး။ အခုအချိန်မှာ ကျနော် လုပ်နိုင်တဲ့အရာက အမြဲတမ်းလိုပဲ သန်မာနေဖို့ပါပဲ။ အလွန် ခက်ခဲတဲ့ အချိန်ဖြစ်နေပေမယ့် ဒီနေရာမှာ မရပ်တန့်ဘူးဆိုတာ ကျနော် ကတိပေးနိုင်ပါတယ်”လို့ ပြောခဲ့ပါတယ်။ 

ရိုဒရီဂိုကို တွေ့ရစဉ်

ဘရာဇီးလ်ဘောလုံးအဖွဲ့ချုပ်(CBF)က ရိုဒရီဂို အမြန်ဆုံး ပြန်လည်ကောင်းမွန်လာစေဖို့နဲ့ ကွင်းထဲ အမြန်ဆုံး ပြန်လာနိုင်ဖို့ ဆုတောင်းပေးတယ်လို့ သူတို့ရဲ့ ကြေညာချက်ထဲမှာ ဖော်ပြထားပါတယ်။ 

ရိုဒရီဂိုဟာ ဒီရာသီမှာ ရီးရယ်လ်အသင်းအတွက် ၂၇ ပွဲ ပါဝင်ကစားခဲ့ပြီး ၃ ဂိုး သွင်းယူထားတာပါ။ 

ရီးရယ်လ်အသင်းဟာ လက်ရှိအချိန်မှာ အဓိက ကစားသမားတွေဖြစ်တဲ့ ဘတ်ပီနဲ့ဘယ်လင်ဂမ်တို့ကို ဒဏ်ရာ ကြောင့် အနားပေးထားရချိန် ရိုဒရီဂိုရဲ့ဒဏ်ရာ သတင်းဟာ သူတို့အတွက် ကြီးမားတဲ့ ထိုးနှက်ချက် ဖြစ်ခဲ့ပါတယ်။ 

နောက်ဆုံးကစားခဲ့တဲ့ လာလီဂါ ၂ ပွဲဆက်တိုက် ရှုံးပွဲကြုံတွေ့ပြီး ရလဒ်တွေ ပြန်ဆိုးနေတဲ့ ရီးရယ်လ်အသင်းဟာ လာမယ့်ပွဲတွေအဖြစ် ဆယ်တာဗီဂိုအသင်းနဲ့လာလီဂါ၊ မန်စီးတီးအသင်းနဲ့ ချန်ပီယံလိဂ် ၁၆ သင်းအဆင့် ယှဉ်ပြိုင် ရမှာ ဖြစ်ပါတယ်။ 

Source: BBC

CNI Sport News

၂၀၂၆ ခုနှစ်၊ မတ်လ ၄

ဆော်ဒီပရိုလိဂ်မှာ အခက်အခဲတွေနဲ့ ရင်ဆိုင်နေရတဲ့ လီဗာပူးလ်အသင်း တိုက်စစ်မှူးဟောင်း ဒါဝင်နူနက်ဇ်ဟာ နွေရာသီမှာ ပရီးမီးယားလိဂ်ပြိုင်ပွဲထံ ပြန်လာဖွယ် ရှိနေပါတယ်။ 

လီဗာပူးလ်အသင်းမှာ ကစားခဲ့ချိန်က ခြေစွမ်းပြသနိုင်ခဲ့ခြင်း မရှိတာကြောင့် ဗြိတိန်မီဒီယာတွေရဲ့ ဝေဖန်မှု အများအပြား ခံခဲ့ရတဲ့ ဒါဝင်နူနက်ဇ်ဟာ ပြီးခဲ့တဲ့နွေရာသီမှာ ဆော်ဒီထိပ်သီး အယ်လ်ဟီလယ်အသင်းထံ ပြောင်းရွှေ့ခဲ့တာပါ။ 

ဒါပေမယ့် ဒါဝင်နူနက်ဇ်ဟာ အယ်လ်ဟီလယ်အသင်းမှာ အဆင်မပြေမှုတွေ ရှိခဲ့ပြီးနောက် ပရီးမီးယားလိဂ် ထိပ်သီး ကလပ်တွေက သူ့ကို နွေရာသီ အပြောင်းအရွှေ့မှာ ခေါ်ယူမယ့်စာရင်းထဲ ထည့်သွင်းခဲ့တာဖြစ်ပါတယ်။ 

ChronicleLive က အဓိက တိုက်စစ်မှူးတစ်ဦးကို ရှာဖွေမှုတွေ ပြုလုပ်နေတဲ့ ချယ်လ်ဆီးအသင်းဟာ ဒါဝင်နူနက်ဇ် ကို ခေါ်ယူချင်နေတဲ့ အသင်းတွေထဲမှာ တစ်သင်းအနေနဲ့ ပါဝင်တယ်လို့ ဖော်ပြထားတာပါ။

ဒါဝင်နူနက်ဇ်ကို တွေ့ရစဉ်

ချယ်လ်ဆီးအသင်းရဲ့ ပရီးမီးယားလိဂ် ပြိုင်ဘက်တွေဖြစ်တဲ့ နယူးကာဆယ်နဲ့ စပါးအသင်းတို့ကလည်း ဒါဝင်နူနက်ဇ်ကို ခေါ်ယူဖို့ စိတ်ဝင်စားနေတာ ဖြစ်ပါတယ်။ 

ချယ်လ်ဆီး၊ နယူးကာဆယ်နဲ့ စပါးအသင်းတို့ဟာ ဒါဝင်နူနက်ဇ်ကို ပတ်ဝန်းကျင်အသစ်မှာ ထွန်းတောက်လာနိုင်တဲ့ ကစားသမားတစ်ဦးအဖြစ် ရှုမြင်နေကြတာပါ။

ဒါဝင်နူနက်ဇ်အနေနဲ့ ပရီးမီးယားလိဂ်ပြိုင်ပွဲထံ ပြန်လာခဲ့ရင် လီဗာပူးလ်အသင်းမှာ ရုန်းကန်ခဲ့ရတာကို အကောင်း ဆုံးပုံစံ ပြသနိုင်မယ့် အခွင့်အရေးအပြင် သူ့ရဲ့ ကစားသမားဘဝကို ပိုပြီးအားကောင်းအောင် လုပ်နိုင်မယ့် အခွင့် အရေး ရှိနေတာဖြစ်ပါတယ်။ 

ဒါဝင်နူနက်ဇ်ဟာ အယ်လ်ဟီလယ်အသင်းထံ ဘန်ဇီမာ ရောက်ရှိလာခြင်းကြောင့် ပြည်တွင်း ပြိုင်ပွဲတွေမှာ ပါဝင် ကစားခွင့် မရတော့ဘဲ အာရှချန်ပီယံလိဂ် ပြိုင်ပွဲမှာသာ ကစားခွင့် ရရှိခဲ့တာပါ။ 

အယ်လ်ဟီလယ်အသင်းကလည်း ဒါဝင်နူနက်ဇ်အတွက် သင့်တော်တဲ့ ကမ်းလှမ်းမှုရခဲ့ရင် နွေရာသီမှာ ရောင်းချနိုင် ပါတယ်။ 

ဒါဝင်နူနက်ဇ်ဟာ အယ်လ်ဟီလယ်အသင်းအတွက် ၂၄ ပွဲ ကစားထားပြီး ၉ ဂိုး သွင်းယူထားပါတယ်။ 

Source: Goal

CNI Sport News

၂၀၂၆ ခုနှစ်၊ မတ်လ ၄

ဘာစီလိုနာအသင်းဟာ ကိုပါဒယ်ရေးဖလား ဆီမီးဖိုင်နယ်ပွဲမှာ အက်သလက်တီကိုအသင်းကို နှစ်ကျော့ပေါင်း ရလဒ် ၄ ဂိုး-၃ ဂိုးနဲ့ အရေးနိမ့်ကာ ဗိုလ်လုပွဲ မတက်နိုင်ခဲ့ပြီးနောက် နည်းပြဟန်ဆီဖလစ်က စိတ်ပျက်မိတယ်လို့ ပြောခဲ့ပါတယ်။ 

ဟန်ဆီဖလစ်က “ကျနော်တို့ စိတ်ပျက်မိပေမယ့် ကျနော်တို့ ပြသခဲ့တဲ့ စွမ်းဆောင်ရည်အတွက် အလွန်ဂုဏ်ယူ နိုင်ပါတယ်။ ကျနော်တို့အတွက် အံ့သြစရာကောင်းတဲ့ ပွဲဖြစ်ခဲ့ပြီး ဂိုးတွေပိုပြီးသွင်းယူနိုင်ဖို့ အခွင့်အရေးတွေ အများကြီး ဖန်တီးနိုင်ခဲ့ပါတယ်။ အဆုံးသတ်မှာ ဗိုလ်လုပွဲတက်ဖို့ မဖြစ်ခဲ့တာကို ကျနော်တို့ လက်ခံရမှာပါ”လို့ ပြောခဲ့တာပါ။ 

ဘာစီလိုနာအသင်းဟာ ကိုပါဒယ်ရေးဖလား ဆီမီးဖိုင်နယ် ဒုတိယအကျော့ပွဲမှာ အက်သလက်တီကိုအသင်းကို ၃ ဂိုး-ဂိုးမရှိနဲ့ အနိုင်ရခဲ့ပါတယ်။ 

ဒါပေမယ့် ပထမအကျော့ပွဲစဉ်မှာ အက်သလက်တီကိုအသင်းက ၄ ဂိုး-ဂိုးမရှိနဲ့ အနိုင်ရခဲ့တာကြောင့် နှစ်ကျော့ ပေါင်း ရလဒ် ၄ ဂိုး-၃ ဂိုးနဲ့ အက်သလက်တီကိုအသင်း အနိုင်ရပြီး ဗိုလ်လုပွဲ တက်နိုင်ခဲ့တာပါ။ 

ဘာစီလိုနာနဲ့ အက်သလက်တီကိုအသင်း ယှဉ်ပြိုင်နေစဉ်

အက်သလက်တီကိုအသင်းဟာ နှစ်ပေါင်း ၁၃ နှစ်အကြာမှ ကိုပါဒယ်ရေးဖလား ဗိုလ်လုပွဲကို ပြန်ပြီးတက်နိုင်ခဲ့တာ ဖြစ်ပါတယ်။ 

အက်သလက်တီကိုအသင်းဟာ ဆိုစီဒက်နဲ့ဘီလ်ဘာအိုအသင်းတို့ရဲ့ ဆီမီးဖိုင်နယ်ပွဲစဉ်မှာ အနိုင်ရတဲ့အသင်းနဲ့ ဧပြီလထဲ ဗိုလ်လုပွဲ ယှဉ်ပြိုင်ရမှာပါ။ 

ဘာစီလိုနာအသင်းဟာ ကိုပါဒယ်ရေးဖလား ပြိုင်ပွဲကနေ ထွက်ခွာခဲ့ရတာကြောင့် လာလီဂါနဲ့ ချန်ပီယံလိဂ်ပြိုင်ပွဲကို အာရုံစိုက်ရတော့မှာ ဖြစ်ပါတယ်။ 

ဘာစီလိုနာအသင်းနည်းပြ ဟန်ဆီဖလစ်က ဒီပွဲမှာမြင်တွေ့ခဲ့ရတဲ့ အသင်းရဲ့ အရည်အသွေးက မယုံနိုင်စရာဖြစ်ပြီး ပွဲတိုင်းကို ဒီလိုပုံစံ ပြသရမယ်လို့ ပြောခဲ့ပါတယ်။

လာလီဂါအမှတ်ပေးဇယားကို ၄ မှတ်ဖြတ်ပြီး ဦးဆောင်ထားတဲ့ ဘာစီလိုနာအသင်းဟာ လာမယ့်လိဂ်ပွဲအဖြစ် ဘီလ်ဘာအိုအသင်းနဲ့ ယှဉ်ပြိုင်ရမှာဖြစ်ပြီး အက်လသလက်တီကိုအသင်းကတော့ ဆိုစီဒက်အသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: ESPN

CNI Sport News

၂၀၂၆ ခုနှစ်၊ မတ်လ ၄

အမေရိကန်သမ္မတ ဒေါ်နယ်ထရမ့်က အမေရိကန်၊ မက္ကဆီကိုနဲ့ ကနေဒါနိုင်ငံတို့ ပူးတွဲအိမ်ရှင်အဖြစ် ကျင်းပမယ့် ၂၀၂၆ ကမ္ဘာ့ဖလားပြိုင်ပွဲမှာ အီရန်ပါဝင်ခြင်း ရှိ၊မရှိကို သူဂရုမစိုက်ဘူးလို့ ပြောခဲ့ပါတယ်။ 

“ကျနော် တကယ် ဂရုမစိုက်ပါဘူး။ အီရန်ဟာ အလွန်ဆိုးရွားစွာ ရှုံးနိမ့်နေတဲ့ နိုင်ငံတစ်ခုလို့ ကျနော်ထင်ကြောင်း” ကမ္ဘာ့ဖလားပြိုင်ပွဲမှာ အီရန်ပါဝင်မယ့် အကြောင်းနဲ့ပတ်သက်ပြီး ဒေါ်နယ်ထရမ့်က Politico ကို ပြောခဲ့တာပါ။ 

အီရန်နိုင်ငံဟာ ဒီရက်သတ္တပတ်ထဲ အတ္တလန်တာမှာ ကျင်းပခဲ့တဲ့ ကမ္ဘာ့ဖလားပြိုင်ပွဲဝင် အသင်းတွေအတွက် ဖီဖာ စီမံကိန်း ရေးဆွဲရေး ထိပ်သီးအစည်းအဝေးကို ပျက်ကွက်ခဲ့တဲ့ တစ်ခုတည်းသော နိုင်ငံဖြစ်ခဲ့ပါတယ်။

အဲ့ဒါကြောင့် ဒေသတွင်း စစ်ပွဲတွေ မြင့်တက်နေချိန်မှာ အီရန်အသင်းဟာ အမေရိကန်မြေပေါ်မှာ ယှဉ်ပြိုင်ရမယ့် သူတို့ရဲ့ ၂၀၂၆ ကမ္ဘာ့ဖလားပွဲတွေကို ယှဉ်ပြိုင်မလားဆိုတဲ့ မေးခွန်းတွေကလည်း ပိုပြီးထွက်ပေါ်နေခဲ့တာပါ။ 

အမေရိကန်သမ္မတ ဒေါ်နယ်ထရမ့်ကို တွေ့ရစဉ်

အမေရိကန်နဲ့အစ္စရေးတို့ဟာ အီရန်ကို တိုက်ခိုက်နေသလို အီရန်ကလည်း ပင်လယ်ကွေ့ရှိ အမေရိကန်ရဲ့ မဟာမိတ် နိုင်ငံတွေကို ပြန်ပြီး တိုက်ခိုက်ကာ တုန့်ပြန်နေတာ ဖြစ်ပါတယ်။ 

ကမ္ဘာ့ဖလားပြိုင်ပွဲကို ၄ ကြိမ်ဆက် ယှဉ်ပြိုင်ခွင့် ရရှိထားတဲ့ အီရန်အသင်းဟာ ၂၀၂၆ ကမ္ဘာ့ဖလားပြိုင်ပွဲမှာ နယူးဇီလန်၊ ဘယ်လ်ဂျီယံ၊ အီဂျစ်အသင်းတို့နဲ့ တစ်အုပ်စုတည်း ကျရောက်နေပြီး သူတို့ရဲ့ပွဲတွေကို လော့အိန် ဂျလိစ်နဲ့ ဆီတယ်လ်မှာ ကစားရမှာပါ။ 

အီရန်အသင်းဟာ ကမ္ဘာ့ဖလားပြိုင်ပွဲကနေ နုတ်ထွက်ခြင်း မရှိသေးပေမယ့် ဝင်ရောက်ယှဉ်ပြိုင်ဖို့ မသေချာဘူးလို့ အဖွဲ့ချုပ်အကြီးအကဲက ပြောထားပါတယ်။

ဒါပေမယ့် နိုင်ငံရဲ့ အားကစား အကြီးအကဲတွေက နောက်ဆုံး ဆုံးဖြတ်ချက်ကို ချမယ်လို့ သူကပြောခဲ့ပါတယ်။ 

ဖီဖာအထွေထွေအတွင်းရေးမှူး ဂရပ်ဖ်စထရွမ်က သူတို့ရဲ့ အဓိက အာရုံစိုက်မှုက လူတိုင်းပါဝင်တဲ့ ကမ္ဘာ့ဖလား ပြိုင်ပွဲကို ဘေးကင်းစွာကျင်းပဖို့ ဖြစ်တယ်လို့ ပြောထားပါတယ်။ 

Source: Reuters