CNI Sport News

၂၀၂၆ ခုနှစ်၊ ဇွန်လ ၅

လီဗာပူးလ်အသင်းဟာ ထုတ်ပယ်ခဲ့တဲ့ ဒတ်ချ်လူမျိုးနည်းပြအာနီဆလော့ရဲ့နေရာမှာ စပိန်လူမျိုးနည်းပြ အီရာအိုလာကို နည်းပြသစ်အဖြစ်ခန့်အပ်ကြောင်း အတည်ပြုကြေညာခဲ့ပါတယ်။ 

အီရာအိုလာဟာ ဘုန်းမောက်အသင်းကို ၃ နှစ်ကြာကိုင်တွယ်ခဲ့ပြီး မနှစ်ကရာသီပရီးမီးယားလိဂ်ပြိုင်ပွဲမှာ အဆင့် ၆ နေရာရပ်တည်ကာ အသင်းသမိုင်းတစ်လျှောက် ပထမဆုံးအကြိမ် ဥရောပဝင်ခွင့်ရအောင် ဦးဆောင် ပေးနိုင်ခဲ့တာပါ။ 

ရာသီကုန်ရင် ဘုန်းမောက်အသင်းကနေ ထွက်ခွာမယ်လို့ ကြေညာခဲ့တဲ့ အီရာအိုလာကို လီဗာပူးလ်အသင်းက နည်းပြသစ်အဖြစ် ၂ နှစ်စာချုပ်ချုပ်ကာ ခန့်အပ်ခဲ့ပါတယ်။ 

အီရာအိုလာက “အလွန်စိတ်လှုပ်ရှားနေပါတယ်။ ဘာလို့လဲဆိုရင် လီဗာပူးလ်အသင်းက ကမ္ဘာပေါ်မှာ အကြီးမားဆုံးအသင်းတွေထဲက တစ်သင်းဖြစ်လို့ပါ။ လီဗာပူးလ်ဆီကနေ ဆွဲဆောင်ဖို့အရာတွေ အများကြီးမလိုအပ်ပါဘူး။ လီဗာပူးလ်က လီဗာပူးလ်ပါပဲ။ လီဗာပူးလ်အသင်း မျှော်လင့်ထားတဲ့ အရာတွေကို နားလည်ပြီး စိန်ခေါ်မှုအတွက် ကျနော်အသင့်ဖြစ်နေပါပြီ” လို့ ကလပ်ဝက်ဘ်ဆိုက်ကို ပြောခဲ့ပါတယ်။ 

လီဗာပူးလ်အသင်းနှင့် နည်းပြသစ် အီရာအိုလာကို တွေ့ရစဉ်

ဒတ်ချ်လူမျိုးနည်းပြအာနီဆလော့ဟာ လီဗာပူးလ်အသင်းနည်းပြဘ၀ ပထမဆုံးရာသီမှာ အသင်းကို ပရီးမီးယားလိဂ်ဖလားရယူပေးနိုင်ခဲ့ပေမယ့် ပေါင်သန်း ၄၅၀ အထိစံချိန်တင်သုံးစွဲခဲ့တဲ့ မနှစ်ကရာသီမှာ အောင်မြင်မှုရအောင် လုပ်ပေးနိုင်ခဲ့ခြင်းမရှိတာပါ။ 

လီဗာပူးလ်အသင်းဟာ ပရီးမီးယားလိဂ်မှာ အဆင့် ၅ နေရာရပ်တည်ပြီး ချန်ပီယံလိဂ်ဝင်ခွင့်ရခဲ့ပေမယ့် ရလဒ်တွေဆိုးပြီး ဆုဖလားလက်မဲ့နဲ့ ရာသီအဆုံးသတ်ခဲ့တာ ဖြစ်ပါတယ်။

အဲဒါကြောင့် ရာသီကုန်ချိန်မှာ သုံးသပ်မှုတွေပြုလုပ်ပြီးနောက် နည်းပြအာနီဆလော့ကို ထုတ်ပယ်ဖို့ ဆုံးဖြတ်ခဲ့တာပါ။ 

လီဗာပူးလ်အသင်းနည်းပြသစ်ဖြစ်လာတဲ့ အီရာအိုလာဟာ သူ့ရဲ့နည်းပြဘဝကို ဆိုက်ပရပ်စ်ကလပ် AEK လာနာကာအသင်းနှာ စတင်ခဲ့ပြီး စပိန်ကလပ်မီရန်ဒက်စ်နဲ့ ဗယ်လက်ကာနိုအသင်းတို့ကိုလည်း ကိုင်တွယ်ခဲ့ပါတယ်။ 

CNI Sport News

၂၀၂၆ ခုနှစ်၊ ဇွန်လ ၄

ဂျူဗင်တပ်စ်အသင်းနဲ့ ကာလရှည်ကြာစွာ စာချုပ်ဆွေးနွေးမှုတွေပြုလုပ်ခဲ့တဲ့ တိုက်စစ်မှူးဗလာဟိုဗစ်ဟာ အသင်းကနေ အလွတ်နဲ့ ထွက်ခွာမယ်လို့ အီတလီမီဒီယာတွေက ဖော်ပြထားပါတယ်။ 

၂၀၂၂ ခုနှစ်၊ ဇန်နဝါရီလမှာ ဖီအိုရင်တီးနားအသင်းကနေ ဂျူဗင်တပ်စ်အသင်းထံ ၄ နှစ်ခွဲစာချုပ်နဲ့ ရောက်လာခဲ့တဲ့ ဗလာဟိုဗစ်ရဲ့စာချုပ်ဟာ ဇွန်လ ၃၀ ရက်ဆိုရင် ကုန်ဆုံးမှာဖြစ်ပြီး စာချုပ်သက်တမ်းတိုးဖို့ သဘောတူညီမှုမရရှိခဲ့တာပါ။ 

နောက်ဆုံးအကြိမ်ဆွေးနွေးမှုမှာ ဗလာဟိုဗစ်ရဲ့တောင်းဆိုမှုနဲ့ ဂျုဗင်တပ်စ်အသင်းဘုတ်အဖွဲ့က ကမ်းလှမ်းမှု တွေဟာ ဟွာဟမှုတွေရှိခဲ့တာ ဖြစ်ပါတယ်။ 

La Gazzetta dello Sport က ဗလာဟိုဗစ်ဟာ စာချုပ်သစ်အတွက် တစ်နှစ်ကို လုပ်ခလစာယူရို ၈ သန်းအပြင် များပြားတဲ့ လက်မှတ်ထိုးအပိုဆုကြေးနဲ့ အေးဂျင့်ကော်မရှင်တွေကို တောင်းဆိုခဲ့တယ်လို့ ဖော်ပြထားတာပါ။

တိုက်စစ်မှူးဗလာဟိုဗစ်

ဂျူဗင်တပ်စ်အသင်းကတော့ ယူရို ၆ သန်းအပြင် စွမ်းဆောင်ရည်နဲ့ဆက်စပ်တဲ့ အပိုဆုကြေးတွေပေးဖို့ ဆန္ဒရှိပေမယ့် အပိုကုန်ကျမယ့်တောင်းဆိုမှုတွေကို လိုက်လျောပေးဖို့ ငြင်းဆန်ခဲ့ပါတယ်။ 

အဲဒါကြောင့် ဆွေးနွေးမှုတွေဟာ ရပ်ဆိုင်းခဲ့ပြီး ဗလာဟိုဗစ် ဂျုဗင်တပ်စ်အသင်းကနေ ထွက်ခွာဖို့ဖြစ်လာခဲ့တာပါ။

ချယ်လ်ဆီး၊ နယူးကာဆယ်၊ ဘာစီလိုနာနဲ့ ဘိုင်ယန်မြူးနစ်အသင်းတို့ဟာ ဗလာဟိုဗစ်ရဲ့အေးဂျင့်ထံ ဆက်သွယ် ခဲ့တယ်လို့ သတင်းတွေထွက်နေပေမယ့် ဗလာဟိုဗစ်အနေနဲ့ ဘယ်အသင်းထံ ပြောင်းရွှေ့မလဲဆိုတာ ရှင်းရှင်းလင်းလင်းမသိရသေးတာ ဖြစ်ပါတယ်။ 

ဗလာဟိုဗစ် အသင်းကနေ ထွက်ခွာမှာက ဂျူဗင်တပ်စ်အသင်းနည်းပြ စပယ်လက်တီအတွက် ကြီးမားတဲ့ထိုးနှက်ချက် ဖြစ်ခဲ့တာပါ။ 

ဗလာဟိုဗစ်ဟာ ဂျူဗင်တပ်စ်အသင်းအတွက် ၁၆၈ ပွဲကစားပြီး ၆၈ ဂိုးသွင်းယူကာ ကိုပါအီတာလီယာဖလား  ၁ ကြိမ်ရရှိခဲ့ပါတယ်။ 

CNI Sport News

၂၀၂၆ ခုနှစ်၊ ဇွန်လ ၄

ချယ်လ်ဆီးအသင်းဟာ မန်စီးတီးနဲ့ ဘာစီလိုနာအသင်းအပါအဝင် အသင်းတချို့ရဲ့ချိတ်ဆက်မှုတွေခံနေရတဲ့ စပိန်နောက်ခံလူ ကူကူရယ်လာအတွက် ပြောင်းရွှေ့ကြေးသတ်မှတ်ခဲ့တယ်လို့ ဗြိတိန်မီဒီယာတွေက ဖော်ပြထားပါတယ်။ 

၂၀၂၂ ခုနှစ်က ဘရိုက်တန်အသင်းကနေ ရောက်လာခဲ့တဲ့ ကူကူရယ်လာဟာ ချယ်လ်ဆီးအသင်းကစားသမားဘ၀ အစပိုင်းမှာ ဝေဖန်မှုအများအပြားခံခဲ့ရပေမယ့် အခုအချိန်မှာတော့ အသင်းရဲ့အဓိက ကစားသမားဖြစ်လာခဲ့တာပါ။

ဒါ့အပြင် ကူကူရယ်လာဟာ ကမ္ဘာ့အကောင်းဆုံးဘယ်နောက်ခံလူတွေထဲက တစ်ဦးအဖြစ်သတ်မှတ်ခံရတဲ့အထိ အကောင်းဆုံးခြေစွမ်းတွေကို ပြသထားတာ ဖြစ်ပါတယ်။ 

ကူကူရယ်လာဟာ ပြီးခဲ့တဲ့ ၂ ရာသီစလုံးမှာ ချယ်လ်ဆီးအသင်းအတွက် ပွဲပေါင်း ၅၀ ကျော်စီကစားခဲ့ပြီး ကွန်းဖရန့်လိဂ်နဲ့ ဖီဖာကလပ်ကမ္ဘာ့ဖလားရရှိအောင် ကူညီပေးနိုင်ခဲ့တာပါ။ 

ဒါပေမယ့် ချယ်လ်ဆီးအသင်းဟာ လာမယ့်ရာသီ ဥရောပဝင်ခွင့်မရတာကြောင့် ကူကူရယ်လာရဲ့အနာဂတ်ဟာ မရေမရာဖြစ်လာခဲ့ပါတယ်။ 

စပိန်နောက်ခံလူ ကူကူရယ်လာကို တွေ့ရစဉ်

ဒီအချိန်မှာ ချယ်လ်ဆီးအသင်းနည်းပြဟောင်းမာရက်စ်ကာဟာ မန်စီးတီးအသင်းကို ကိုင်တွယ်ခွင့်ရရင် ကူကူရယ်လာနဲ့ ပြန်ပြီးလက်တွဲဖို့ စိတ်ဝင်စားနေပြီး စပိန်ထိပ်သီးတွေဖြစ်တဲ့ ဘာစီလိုနာနဲ့ အက်သလက်တီကိုအသင်းတို့ကလည်း သူ့ကိုခေါ်ယူဖို့ ချိတ်ဆက်နေတာပါ။ 

ချယ်လ်ဆီးအသင်းကတော့ ကူကူရယ်လာအတွက် သူတို့သတ်မှတ်ထားတဲ့ ယူရိုသန်း ၇၀ ပေးမယ်ဆိုရင် နွေရာသီမှာရောင်းချဖို့ အဆင်သင့်ဖြစ်နေပါတယ်။ 

ကူကူရယ်လာနဲ့ ချယ်လ်ဆီးအသင်းရဲ့စာချုပ်ဟာ နောက်ထပ် ၃ နှစ်ကျန်ရှိသေးတာပါ။

နွေရာသီအပြောင်းအရွှေ့မှာ ချယ်လ်ဆီးအသင်းကနေ ထွက်ခွာဖို့ ချိတ်ဆက်ခံနေရတာဟာ ကူကူရယ်လာတစ်ဦးတည်းသာ မဟုတ်ဘဲ ကွင်းလယ်လူ အန်ဇိုဖာနန်ဒက်ဇ်ကို ရီးရယ်လ်အသင်းက စိတ်ဝင်စားနေပါတယ်။ 

ဒါပေမယ့် ချယ်လ်ဆီးအသင်းနည်းပြသစ် ဇာဘီအလွန်ဆိုဟာ သူတို့နှစ်ဦးကို အသင်းမှာ ဆက်ထိန်းဖို့ရှိ၊မရှိ စောင့်ကြည့်ရဦးမှာ ဖြစ်ပါတယ်။ 

CNI Sport News

၂၀၂၆ ခုနှစ်၊ ဇွန်လ ၄

မန်စီးတီးအသင်းဟာ အင်္ဂလန်ကွင်းလယ်လူအဲလီးယော့အန်ဒါဆန်အတွက် အဖွင့်ကမ်းလှမ်းမှုပြုလုပ်ခဲ့တာကို နော်တင်ဟမ်ဖောရက်စ်အသင်းက ပယ်ချခဲ့တယ်လို့ ဗြိတိန်မီဒီယာတွေက ဖော်ပြထားပါတယ်။ 

အဲလီးယော့အန်ဒါဆန်ကို ခေါ်ယူဖို့ ယူနိုက်တက်အသင်းကလည်း စိတ်ဝင်စားနေပေမယ့် သူကတော့ မန်စီးတီး အသင်းထံ ပြောင်းရွှေ့ချင်နေတာပါ။ 

အဲဒါကြောင့် မန်စီးတီးအသင်းဟာ နော်တင်ဟမ်ဖောရက်စ်အသင်းနဲ့ဆွေးနွေးမှုတွေကို ဆက်ပြီးလုပ်ဆောင် သွားမှာ ဖြစ်ပါတယ်။ 

နော်တင်ဟမ်ဖောရက်စ်အသင်းပိုင်ရှင် မာရီနာကစ်က အသင်းရဲ့အကောင်းဆုံးကစားသမားတွေကို ထွက်ခွာခွင့်ပြုဖို့ ဆန္ဒမရှိဖြစ်နေပေမယ့် ပေါင်သန်း ၁၀၀ ကျော်ပေးရင်တော့ အဲလီးယော့အန်ဒါဆန်ကို ရောင်းချနိုင်တာပါ။ 

အင်္ဂလန်အသင်းနဲ့အတူ ကမ္ဘာ့ဖလားပြိုင်ပွဲအတွက် လေ့ကျင့်မှုတွေပြုလုပ်နေတဲ့ အန်ဒါဆန်ရဲ့စာချုပ်ဟာ ၃ နှစ်ကျန်ရှိသေးတာ ဖြစ်ပါတယ်။ 

အဲလီးယော့အန်ဒါဆန်ကိုတွေ့ရစဉ်

၂၀၂၄ ခုနှစ်မှာ နယူးကာဆယ်အသင်းကနေ ပေါင် ၃၅ သန်းနဲ့ ပြောင်းရွှေ့လာခဲ့တဲ့ အဲလီးယော့အန်ဒါဆန်ဟာ နော်တင်ဟမ်ဖောရက်စ်အသင်းအတွက် ဒီရာသီမှာ ပြိုင်ပွဲစုံပွဲပေါင်း ၅၀ ပါဝင်ကစားခဲ့တာအပါအဝင် ၉၂ ပွဲကစားထားပြီး ၆ ဂိုးသွင်းယူထားတာပါ။ 

မန်စီးတီးအသင်းဟာ ကမ္ဘာ့ဖလားပြိုင်ပွဲမတိုင်မီ အန်ဒါဆန်ရဲ့အပြောင်းအရွှေ့ကို သဘောတူညီမှုရချင်နေတာ ဖြစ်ပါတယ်။ 

မန်စီးတီးအသင်းဟာ ကွင်းလယ်လူဘာနာဒိုဆေးလ်ဗားနဲ့ နောက်ခံလူဂျွန်စတုန်းစ်တို့ကို ထွက်ခွာခွင့်ပြုပြီးနောက် ကစားသမားသစ်တွေအားဖြည့်ဖို့ရှိနေသလို ကစားသမားတချို့ကိုလည်း ရောင်းချသွားဖို့စီစဉ်နေတာပါ။

တောင်ပံကစားသမားဆာဗင်ဟိုဟာ စပါးအသင်းနဲ့ဆွေးနွေးမှုတွေရှိနေသလို ကွင်းလယ်လူ နီကိုဂွန်ဇာလက် အတွက်လည်း သင့်တော်တဲ့ ကမ်းလှမ်းမှုရောက်လာရင် ရောင်းချနိုင်တာ ဖြစ်ပါတယ်။ 

CNI Sport News

၂၀၂၆ ခုနှစ်၊ ဇွန်လ ၄

ရီးရယ်လ်အသင်းရဲ့ ဥက္ကဋ္ဌလောင်း တစ်ဦးဖြစ်တဲ့ ရီကွယ်လ်မီက သူသာ ဥက္ကဋ္ဌအဖြစ် ရွေးကောက်ခံရရင် မန်စီးတီးအသင်းက တိုက်စစ်မှူး ဟာလန်းနဲ့ ကွင်းလယ်လူ ရိုဒရီတို့ကို ခေါ်ယူမယ်လို့ ကတိပြုခဲ့ပါတယ်။ 

ရီကွယ်လ်မီဟာ TV အစီအစဉ်တစ်ခုမှာ ဟာလန်းရဲ့ နာမည်ပါဝင်တဲ့ ရီးရယ်လ်အသင်းဂျာစီကို ကိုင်ပြီး ပြသသွားခဲ့တာပါ။

ဟာလန်းဟာ မန်စီးတီးအသင်းနဲ့ ၂၀၃၄ ခုနှစ်အထိ စာချုပ်ရှိနေသလို သူ့ရဲ့ ဖခင်နဲ့အေးဂျင့်တို့က ရီကွယ်လ်မီနဲ့ ဘာသဘောတူညီမှုမှ မရှိဘူးလို့ ငြင်းဆန်ထားပါတယ်။ 

အသက် ၃၇ နှစ်အရွယ်ရှိ ရီကွယ်လ်မီက မန်စီးတီးအသင်းနဲ့ စာချုပ်သက်တမ်း ၁ နှစ်သာ ကျန်ရှိတော့တဲ့ ရိုဒရီဟာ ရီးရယ်လ်အသင်းမှာ ကစားသင့်တဲ့ ကစားသမားမျိုး ဖြစ်တယ်လို့ ပြီးခဲ့တဲ့အပတ်က ထုတ်ပြောခဲ့ပါတယ်။ 

ဒါ့အပြင် ရီကွယ်လ်မီက ရီးရယ်လ်အသင်းရဲ့ဂန္ထဝင်တွေဖြစ်တဲ့ ရာအူးလ်ကို အားကစားဒါရိုက်တာနဲ့ ဟီရာရိုကို အကယ်ဒမီ အကြီးအကဲအဖြစ် တာဝန်ပေးသွားမယ်လို့ ကြေညာထားတာပါ။

 မော်ရင်ဟိုကို တွေ့ရစဉ် 

အသက် ၇၉ နှစ်အရွယ်ရှိ ပီရက်ဇ်ကတော့ ရီးရယ်လ်အသင်းဥက္ကဋ္ဌအဖြစ် ပြန်ပြီးရွေးကောက်ခံရရင် ၂၀၁၀ ကနေ ၂၀၁၃ ခုနှစ်အတွင်း အသင်းကို ကိုင်တွယ်ခဲ့ဖူးတဲ့ မော်ရင်ဟိုဟာ နည်းပြသစ် ဖြစ်လာမယ်လို့ အတည်ပြုခဲ့ပါတယ်။ 

ဒါ့အပြင် ပီရက်ဇ်က လီဗာပူးလ်အသင်းကနေ ထွက်ခွာခဲ့တဲ့ ပြင်သစ်နောက်ခံလူ ကိုနာတေးကိုလည်း အသင်း အတွက် ခေါ်ယူမယ်လို့ ပြောထားတာ ဖြစ်ပါတယ်။

ရီးရယ်လ်အသင်းဟာ ၂ ရာသီဆက်တိုက် အဓိကဆုဖလားတွေ မရရှိခဲ့ပြီးနောက် ဥက္ကဋ္ဌရွေးကောက်ပွဲ ပြုလုပ်ဖို့ ဆုံးဖြတ်ခဲ့တာပါ။ 

နှစ်ပေါင်း ၂၀ အတွင်း ပထမဆုံးအကြိမ် ပြုလုပ်မယ့် ရီးရယ်လ်အသင်းဥက္ကဋ္ဌ ရွေးကောက်ပွဲကို ဇွန်လ ၇ ရက်မှာ ကျင်းပသွားမှာ ဖြစ်ပါတယ်။

Source: ESPN

CNI Sport News

၂၀၂၆ ခုနှစ်၊ ဇွန်လ ၃

ဘရာဇီးလ်အသင်းနည်းပြ အန်ဆယ်လော့တီက ခြေသလုံးဒဏ်ရာရရှိနေတဲ့ တိုက်စစ်မှူးနေမာ ပွဲတွေမှာ ပါဝင်နိုင်ဖို့ အလျင်စလိုလုပ်မှာမဟုတ်ဘူးလို့ ကမ္ဘာ့ဖလားပြိုင်ပွဲအတွက် အမေရိကန်နိုင်ငံထံ ရောက်ရှိချိန်မှာ ပြောခဲ့ပါတယ်။ 

အန်ဆယ်လော့တီက “သူ့ရဲ့အခြေအနေတိုးတက်မှုရှိလာသလို သူကောင်းမွန်စွာလုပ်ဆောင်နေပါတယ်။ ကျနော်တို့ ဘာကိုမှ အလျင်စလိုလုပ်သွားမှာမဟုတ်ဘူး”လို့ ပြောခဲ့တာပါ။

အန်ဆယ်လော့တီဟာ ဒီမတိုင်မီက နေမာဟာ ဘရာဇီးလ်အသင်းရဲ့အုပ်စုအဖွင့်ပွဲ ဒါမှမဟုတ် ဒုတိယပွဲမှာ ပါဝင်ဖို့ကြံ့ခိုင်မှုပြည့်ဝနေလိမ့်မယ်လို့ ပြောထားပါတယ်။ 

နည်းပြအန်ဆယ်လော့တီကို တွေ့ရစဉ်

ပြီးခဲ့အပတ်က ဘရာဇီးလ်အသင်းဆရာဝန်ရိုဒရီဂိုလက်စ်မာက နေမာဟာ ခြေသလုံးဒဏ်ရာကြောင့် ၃ ပတ်ကြာအထိ အနားယူရမယ်လို့ ပြောခဲ့တာပါ။ 

နေမာဟာ ဒဏ်ရာတွေကြောင့် ဘရာဇီးလ်အသင်းနဲ့ ၃ နှစ်နီးပါးကြာဝေးကွာနေပေမယ့် နည်းပြအန်ဆယ်လော့တီ ထုတ်ပြန်ခဲ့တဲ့ ကမ္ဘာ့ဖလားပြိုင်ပွဲအတွက် ကစားသမား ၂၆ ဦးစာရင်းမှာ ပါဝင်ခဲ့ပါတယ်။

ဘရာဇီးလ်အသင်းအတွက် ၁၂၈ ပွဲကစားထားပြီး ၇၉ ဂိုးသွင်းယူကာ ဂိုးသွင်းအများဆုံးကစားသမားဖြစ်တဲ့ နေမာဟာ သူ့ရဲ့ ၄ ကြိမ်မြောက်ကမ္ဘာ့ဖလားပြိုင်ပွဲကို ပါဝင်ယှဉ်ပြိုင်ရမှာ ဖြစ်ပါတယ်။

တိုက်စစ်မှူးနေမာကို တွေ့ရစဉ်

ဘရာဇီးလ်အသင်းဟာ ကမ္ဘာ့ဖလားပြိုင်ပွဲမတိုင်မီကစားခဲ့တဲ့ ပထမခြေစမ်းပွဲမှာ ပနားမားအသင်းကို ၆ ဂိုး-၂ ဂိုးနဲ့ အနိုင်ရခဲ့ပြီး ဒုတိယခြေစမ်းပွဲအဖြစ် ဇွန်လ ၆ ရက်မှာ အီဂျစ်အသင်းနဲ့ ယှဉ်ပြိုင်မှာပါ။ 

ကမ္ဘာ့ဖလားချန်ပီယံဆုကို ၆ ကြိမ်မြောက် ရယူနိုင်ဖို့ ပစ်မှတ်ထားနေတဲ့ ဘရာဇီးလ်အသင်းဟာ အုပ်စုအဖွင့်ပွဲအဖြစ် ဇွန်လ ၁၃ ရက်မှာ မော်ရိုကိုအသင်းနဲ့ ယှဉ်ပြိုင်မှာ ဖြစ်ပါတယ်။ 

CNI Sport News

၂၀၂၆ ခုနှစ်၊ ဇွန်လ ၃

မန်စီးတီးနဲ့ ဘာစီလိုနာအသင်းကစားသမားဟောင်း ယာယာတိုရေးဟာ သူ့ရဲ့ပထမဆုံးနည်းပြချုပ်ရာထူးကို ရရှိဖို့ နီးစပ်နေတယ်လို့ စပိန်သတင်းစာမာကာက ဖော်ပြထားပါတယ်။ 

၂၀၁၉ ခုနှစ်မှာ ကစားသမားဘဝကနေ အနားယူခဲ့တဲ့ အသက် ၄၃ နှစ်အရွယ်ရှိ ယာယာတိုရေးဟာ ဒီအချိန်ကနေ စပြီး လက်ထောက်နည်းပြနဲ့ အကယ်ဒမီနည်းပြအဖြစ်ဆောင်ရွက်ခဲ့တာပါ။ 

ယာယာတိုရေးဟာ စပါးအသင်းအကယ်ဒမီမှာ နည်းပြအဖြစ် မဆောင်ရွက်မီ ယူကရိန်းနဲ့ ရုရှားကလပ်မှာ လက်ထောက်နည်းပြအဖြစ် တာဝန်ယူခဲ့တာ ဖြစ်ပါတယ်။ 

ဒီနောက်ပိုင်းမှာ ယာယာတိုရေးဟာ ဘယ်လ်ဂျီယံကလပ်နဲ့ ဆော်ဒီလက်ရွေးစင်အသင်းတွေမှာ လက်ထောက်နည်းပြအဖြစ် ဆောင်ရွက်ခဲ့တာပါ။ 

အိုင်ဗရီကို့စ်လက်ရွေးစင်အသင်းအတွက် ၁၀၁ ပွဲကစားထားတဲ့ ယာယာတိုရေးဟာ လက်ထောက်နည်းပြ ဘဝကနေ ဆလိုဗားကီးယားနိုင်ငံမှာ သူ့ရဲ့ပထမဆုံးနည်းပြချုပ်ရာထူးကို ရရှိတော့မယ်လို့ သိရပါတယ်။ 

ယာယာတိုရေးကို တွေ့ရစဉ်

ယာယာတိုရေးဟာ ၅ နှစ်ကြာကိုင်တွယ်ပြီးနောက် ထွက်ခွာခဲ့တဲ့ ဗလာဒီမာဝီစ်ရဲ့နေရာမှာ ဆလိုဗန်ဘရာတီဆလာဗာအသင်းကို ကိုင်တွယ်ဖို့ နီးစပ်နေတာပါ။ 

ဆလိုဗန်အသင်းဟာ ဆလိုဗားကီးယားနိုင်ငံမှာ ကြာရှည်စွာလွှမ်းမိုးထားနိုင်တဲ့ အသင်းဖြစ်ပေမယ့် ဥရောပပြိုင်ပွဲတွေမှာ ရလဒ်ဆိုးတွေနဲ့ ကြုံတွေ့ခဲ့ရတာ ဖြစ်ပါတယ်။ 

ပြီးခဲ့တဲ့ရာသီမှာဆိုရင် ဆလိုဗန်အသင်းဟာ ချန်ပီယံလိဂ်ခြေစစ်ပွဲနဲ့ယူရိုပါလိဂ်ပလေးအော့ဖ်မှာ အရေးနိမ့်ခဲ့တာကြောင့် ကွန်းဖရန့်လိဂ်ကစားခဲ့ရတာပါ။ 

ဆလိုဗန်အသင်းဟာ ကွန်းဖရန့်လိဂ်မှာရှိတဲ့ အသင်း ၃၆ သင်းထဲမှာ အဆင့် ၂၉ နေရာရပ်တည်ခဲ့ပါတယ်။ ဆလိုဗန်အသင်းဟာ ပြီးခဲ့တဲ့ရာသီလိဂ်ပြိုင်ပွဲမှာ ချန်ပီယံဖြစ်ခဲ့လို့ လာမယ့်ရာသီချန်ပီယံလိဂ် ဒုတိယအဆင့်ခြေစစ်ပွဲကစားရမှာ ဖြစ်ပါတယ်။ 

CNI Sport News

၂၀၂၆ ခုနှစ်၊ ဇွန်လ ၃

ယူနိုက်တက်အသင်းဟာ စီးရီးအေကလပ်အတ္တလန်တာအသင်းရဲ့ဘရာဇီးလ်ကွင်းလယ်လူ အီဒါဆန်ကို ပေါင် ၃၅ သန်းနဲ့ ခေါ်ယူဖို့ သဘောတူညီမှုရရှိခဲ့ပါတယ်။ 

အီဒါဆန်ဟာ ယူနိုက်တက်အသင်းနဲ့ ၄ နှစ်စာချုပ်ချုပ်မှာ ဖြစ်ပြီး နောက်ထပ် ၁ နှစ်သက်တမ်းတိုးခွင့်ပါဝင်မှာပါ။

ယူနိုက်တက်အသင်းဟာ ရာသီကြိုလေ့ကျင့်မှုတွေပြန်မစတင်မီ ဇူလိုင်လအစောပိုင်းမှာ အီဒါဆန်ရဲ့ အပြောင်းအရွှေ့ကို အပြီးသတ်မှာ ဖြစ်ပါတယ်။ 

အီဒါဆန်ဟာ နည်းပြမိုက်ကယ်ကာရစ်လက်ထက်မှာ ယူနိုက်တက်အသင်း ပထမဆုံးခေါ်ယူတဲ့ ကစားသမား ဖြစ်လာပြီး အသင်းဟာ ဒီအပြောင်းအရွှေ့အတွက် ပေါင် ၃.၉ သန်းထပ်ပြီးပေးချေရမှာပါ။

ယူနိုက်တက်အသင်းဟာ ကတ်စီမီရိုထွက်ခွာခဲ့တာကြောင့် ကွင်းလယ်နေရာမှာ ကစားသမား ၃ ဦးအားဖြည့် ဖို့ရှိနေပြီး အီဒါဆန်ဟာ ပထဆုံးခေါ်ယူမှုဖြစ်ခဲ့ပါတယ်။ 

ဘရာဇီးလ်အသင်းအတွက် ၃ ပွဲပါဝင်ကစားထားတဲ့ အသက် ၂၆ နှစ်အရွယ်ရှိအီဒါဆန်ဟာ ကမ္ဘာ့ဖလားပြိုင်ပွဲ မှာတော့ ချန်လှပ်ခြင်းခံခဲ့ရတာပါ။ 

အီဒါဆန်ကိုတွေ့ရစဉ်

အီဒါဆန်ဟာ ကွင်းလယ်နေရာစုံမှာ အံ့ဝင်နိုင်အောင်ကစားပြီး အတ္တလန်တာအသင်းအတွက် ပွဲပေါင်း ၁၈၀ ပါဝင် ကစားထားတာမှာ ၁၆ ဂိုးသွင်းယူပြီး ၂၀၂၃-၂၄ ရာသီက ယူရိုပါလိဂ်ဖလားရယူနိုင်ခဲ့ပါတယ်။ 

ယူနိုက်တက်အသင်းဟာ ပရီးမီးယားလိဂ်ကနေ တန်းဆင်းခဲ့တဲ့ ဝက်စ်ဟမ်းအသင်းကွင်းလယ်လူ မာတီးယက်စ် ဖာနန်ဒက်စ်ကိုလည်း ပစ်မှတ်ထားနေပြီး နော်တင်ဟမ်ဖောရက်စ် အသင်းကွင်းလယ်လူ အန်ဒါဆန်ကတော့ မန်စီးတီးအသင်းထံ ပြောင်းရွှေ့ချင်နေတာပါ။ 

ယူနိုက်တက်အသင်းရဲ့နွေရာသီမှာ ခေါ်ယူမယ့်စာရင်းထဲမှာ နယူးကာဆယ်အသင်းနောက်ခံလူ လူးဝစ်ဟောလ် လည်း ပါဝင်နေတာ ဖြစ်ပါတယ်။

ယူနိုက်တက်အသင်းဟာ လာမယ့်ရာသီချန်ပီယံလိဂ်ပြိုင်ပွဲ ယှဉ်ပြိုင်ရမှာဖြစ်လို့ လူစာရင်းအင်အား ပိုပြီး  တောင့်တင်းအောင် အားဖြည့်မှုတွေပြုလုပ်ဖို့ ဈေးကွက်ထဲမှာ ရှာဖွေနေတာ ဖြစ်ပါတယ်။ 

CNI Sport News

၂၀၂၆ ခုနှစ်၊ ဇွန်လ ၃

လီဗာပူးလ်အသင်းဟာ ဒတ်ချ်လူမျိုးနည်းပြ အာနီဆလော့ရဲ့ နေရာမှာ ဘုန်းမောက်အသင်းကနေ ထွက်ခွာခဲ့တဲ့ စပိန်လူမျိုးနည်းပြ အီရာအိုလာကို နည်းပြသစ်အဖြစ် ခန့်အပ်ဖို့ သဘောတူညီမှု ရရှိခဲ့ပါတယ်။ 

အီရာအိုလာဟာ ဘုန်းမောက်အသင်းမှာ အတူလက်တွဲခဲ့ဖူးတဲ့ လီဗာပူးလ်အသင်း အားကစားဒါရိုက်တာ ရစ်ချတ်ဟုချ်စ်နဲ့ အပြုသဘောဆောင်တဲ့ ဆွေးနွေးမှုတွေ ပြုလုပ်ပြီးနောက် လာမယ့်ရက်ပိုင်းအတွင်း လီဗာပူးလ် အသင်းရဲ့ နည်းပြသစ်အဖြစ် တရားဝင်ခန့်အပ်ခံရမှာပါ။ 

လီဗာပူးလ်အသင်းဟာ နည်းပြအာနီဆလော့ကို ထုတ်ပယ်ပြီးနောက် နည်းပြသစ် ရှာဖွေချိန်မှာ ပြီးခဲ့တဲ့ရာသီက ဘုန်းမောက်အသင်းကို ပရီးမီးယားလိဂ်အဆင့် ၆ နေရာမှာ ရပ်တည်ပြီး ပထမဆုံးအကြိမ် ဥရောပပြိုင်ပွဲ ယှဉ်ပြိုင် ခွင့်ရအောင် ကိုင်တွယ်ပေးခဲ့တဲ့ အီရာအိုလာကို အဓိက ပစ်မှတ်ထားခဲ့တာ ဖြစ်ပါတယ်။

အီရာအိုလာဟာ လီဗာပူးလ်အသင်းနဲ့ ၂ နှစ် စာချုပ်ချုပ်မယ်လို့ ဗြိတိန်မီဒီယာတွေက ဖော်ပြထားတာပါ။ 

 အီရာအိုလာနဲ့ နည်းပြအဖွဲ့ကို တွေ့ရစဉ်

အီရာအိုလာဟာ သူ့ရဲ့နည်းပြဘဝ တစ်လျှောက် ကိုင်တွယ်ခဲ့တဲ့ အသင်းတွေမှာ နှစ်ရှည် စာချုပ်တွေ ချုပ်ဆိုလေ့ မရှိဘူးလို့ သိရပါတယ်။ 

စပိန်လူမျိုးနည်းပြဟာ ဘုန်းမောက်အသင်းမှာ သူ့ရဲ့ လက်ထောက် နည်းပြတွေဖြစ်တဲ့ အယ်လ်ဖစ်နဲ့ ရှောင်ကူးပါး တို့ကို လီဗာပူးလ်အသင်းထံ ခေါ်ယူချင်နေပြီး အယ်လ်ဖစ်ဟာ လီဗာပူးလ်အသင်းရဲ့ အမာခံပရိသတ် တစ်ဦး ဖြစ်ပါတယ်။ 

လီဗာပူးလ်အသင်းဂန္ထဝင် စတီဗင်ဂျရတ်က အီရာအိုလာရဲ့ ကစားပုံစတိုင်ဟာ လီဗာပူးလ်အသင်းနဲ့ ကိုက်ညီ လိမ့်မယ်လို့ထင်ကြောင်း TNT Sports ကို ပြောခဲ့တာပါ။ 

လီဗာပူးလ်အသင်းဟာ ပြီးခဲ့တဲ့ရာသီမှာ ငွေကြေး အများအပြား သုံးစွဲပြီး ကစားသမားသစ်တွေ အားဖြည့်ခဲ့ပေမယ့် ဆုဖလားလက်မဲ့ ဖြစ်ခဲ့တာကြောင့် ရာသီသစ်မှာ အောင်မြင်မှုတွေ ရယူနိုင်ဖို့ မျှော်လင့်နေပါတယ်။ 

လီဗာပူးလ်အသင်းဟာ ဇူလိုင်လမှာ ရာသီကြို လေ့ကျင့်မှုတွေ ပြန်လည် စတင်မှာဖြစ်ပြီး အမေရိကန်နိုင်ငံမှာ ခြေစမ်းပွဲတွေကစားဖို့ စီစဉ်ထားတာ ဖြစ်ပါတယ်။  

Source: ESPN