CNI Sport News

၂၀၂၆ ခုနှစ်၊ မေလ ၁၃

PSG အသင်းနည်းပြ လူးဝစ်အင်းနရစ်ဟာ အာဆင်နယ်အသင်းနဲ့ ယှဉ်ပြိုင်ရမယ့် ချန်ပီယံလိဂ် ဗိုလ်လုပွဲကို အပြည့်အဝ အာရုံစိုက်ပြီး ပြင်ဆင်နေတာကြောင့် ပြင်သစ်လီဂူး-၁ ဆုပေးပွဲ အခမ်းအနားကို တက်ရောက်ဖို့ ငြင်းဆန်ခဲ့ပါတယ်။ 

လူးဝစ်အင်းနရစ်က “ကျနော် ဒီလိုမျိုးပွဲတွေကို ဘယ်တော့မှ မသွားဘဲ အိမ်မှာနေရတာကို ပိုပြီးနှစ်သက်ပါတယ်။ ကျနော်ဟာ အာဆင်နယ်အသင်း အကြောင်းကို လေ့လာဖို့ လိုအပ်ပါတယ်။ ဒါပေမယ့် PSG ကစားသမားတွေ အသိအမှတ်ပြုခံရတာကို မြင်တွေ့ရတာ အလွန်ဝမ်းသာမိပြီး၊ သူတို့နဲ့ထိုက်တန်ပါတယ်။ အကောင်းဆုံးနည်းပြ ဆုနဲ့ ထိုက်တန်ခဲ့တဲ့ ပီယာဆေ့ချ်ကိုလည်း ဂုဏ်ပြုချင်ပါတယ်”လို့ ဆုပေးပွဲ အခမ်းအနား မတက်ခဲ့တဲ့အပေါ် မေးမြန်းမှုကို ဖြေခဲ့တာပါ။ 

PSG အသင်းဟာ မေလ ၃၀ ရက် အာဆင်နယ်အသင်းနဲ့ ယှဉ်ပြိုင်ရမယ့် ချန်ပီယံလိဂ် ဗိုလ်လုပွဲမှာ နိုင်ပွဲရယူပြီး ချန်ပီယံလိဂ်ဖလားကို ၂ ရာသီ ဆက်တိုက် ရယူနိုင်ဖို့ မျှော်လင့်နေတာ ဖြစ်ပါတယ်။

အာဆင်နယ်အသင်းကို တွေ့ရစဉ်

ပြင်သစ်လီဂူး-၁ တစ်နှစ်တာ အကောင်းဆုံးဆုပေးပွဲမှာ လန်းစ်အသင်းနည်းပြ ပီယာဆေ့ချ်က အကောင်းဆုံး နည်းပြဆုကို ရရှိခဲ့တာပါ။ 

PSG အသင်း ကစားသမားတွေဖြစ်တဲ့ ဒမ်ဘီလီက အကောင်းဆုံး ကစားသမားဆုကို ရခဲ့ပြီး ဒူယီက အကောင်းဆုံး လူငယ် ကစားသမားဆုကို ရရှိခဲ့ပါတယ်။

နူနိုမန်ဒက်စ်၊ ပါချို၊ ဟာကီမီ၊ ဗီတင်ညာနဲ့ ဒမ်ဘီလီတို့ဟာ ပြင်သစ်လီဂူး -၁ တစ်နှစ်တာ အကောင်းဆုံးအသင်းမှာ ပါဝင်ခဲ့ပေမယ့် နည်းပြ လူးဝစ်အင်းနရစ်က ဆုပေးပွဲ အခမ်းအနားကို တက်ရောက်ခဲ့ခြင်း မရှိတာပါ။ 

လူးဝစ်အင်းနရစ်ဟာ ချန်ပီယံလိဂ် ဗိုလ်လုပွဲ မတိုင်မီမှာ သူ့ရဲ့ကစားသမားတွေ ဒဏ်ရာရမယ့် အခြေအနေကနေ ရှောင်ရှားနိုင်ဖို့အတွက် လာမယ့် ပြင်သစ်လီဂူး-၁ ပွဲတွေမှာ ပွဲထွက် လူစာရင်းတွေကို ကြီးကြီးမားမား အပြောင်း အလဲ ပြုလုပ်သွားဖို့ ရှိနေတာဖြစ်ပါတယ်။ 

Source: Metro

CNI International News

၂၀၂၆ ခုနှစ်၊ မေလ ၁၃

ပြီးခဲ့သည့် သီတင်းပတ်အတွင်း ဖိလစ်ပိုင်နိုင်ငံတွင် ကျင်းပခဲ့သော အာဆီယံထိပ်သီး အစည်းအဝေး၌ မြန်မာနိုင်ငံ ၏ ခေါင်းဆောင်ပိုင်းကို တက်ရောက်ခွင့် မပေးခဲ့ဘဲ မြန်မာနိုင်ငံအား အာဆီယံအဖွဲ့အတွင်းမှ ဖယ်ထုတ်ထားရန် ခွဲခြားဆက်ဆံသော လုပ်ရပ်များ လုပ်ဆောင်နေကြောင်း မြန်မာအစိုးရက မေလ ၁၁ ရက်မှာ ကန့်ကွက်ပြောခဲ့ ကြောင်း Thai PBS World မှ ဖော်ပြခဲ့သည်။။

၂၀၂၁ ခုနှစ်က မြန်မာနိုင်ငံတွင် တပ်မတော်က အာဏာလွှဲပြောင်း ရယူခဲ့ပြီးနောက် အဖွဲ့ဝင် ၁၁ နိုင်ငံ ပါဝင်သော အာဆီယံသည် မြန်မာနိုင်ငံကို ထိပ်သီးအစည်းအဝေးများ တက်ရောက်ခွင့် ပိတ်ပင်ထားခဲ့သည်။

ငါးနှစ်ကြာပြီးနောက် မြန်မာနိုင်ငံတွင် ရွေးကောက်ပွဲ ကျင်းပခဲ့ပြီး ပြီးခဲ့သည့်လ၌ တပ်မတော်ကာကွယ်ရေး ဦးစီးချုပ်ဟောင်း ဗိုလ်ချုပ်မှူးကြီးဦးမင်းအောင်လှိုင်က အရပ်သားသမ္မတအဖြစ် ရာထူးရယူခဲ့သည်။

ပြီးခဲ့သည့် သီတင်းပတ်က ဖိလစ်ပိုင်နိုင်ငံ စီဘူးမြို့တွင် ကျင်းပခဲ့သော အာဆီယံထိပ်သီး အစည်းအဝေး၌ အိမ်ရှင် ဖြစ်သည့် ဖိလစ်ပိုင်နိုင်ငံသမ္မတ ဖာဒီနန် မားကို့စ်ဂျူနီယာ (Ferdinand Marcos Jr)က မြန်မာ့အရေးနှင့် ပတ်သက် ပြီး မည်သည့် တိုးတက်မှုမျှ မရှိသေးကြောင်း ထုတ်ဖော် ပြောကြားခဲ့သည်။

သမ္မတ ဦးမင်းအောင်လှိုင်ကို တွေ့ရစဉ်

ထိုပြောကြားချက်နှင့်ပတ်သက်ပြီး မြန်မာနိုင်ငံခြားရေးဝန်ကြီးဌာနက ထုတ်ပြန်ချက် တစ်ခုဖြင့် တုံ့ပြန်ရာတွင် မြန်မာနိုင်ငံ၌ အပြုသဘောဆောင်သော တိုးတက်မှုများကို အာဆီယံအဖွဲ့ဝင်နိုင်ငံ အများစုက ကောင်းစွာ အသိအမှတ်ပြုကြောင်း ဖော်ပြထားသည်။

သို့သော်လည်း အဖွဲ့ဝင်နိုင်ငံ အနည်းငယ်ကသာ ကန့်သတ်ချက်များ၊ ခွဲခြားဆက်ဆံမှုများနှင့် မြန်မာအစိုးရအား တန်းတူရည်တူ ကိုယ်စားပြုခွင့် မပေးဘဲ ဖယ်ကြဉ်ထားမှုများကို ဆက်လက် လုပ်ဆောင်နေကြောင်း ထုတ် ပြန်ချက်တွင် ဖော်ပြခဲ့သည်။

မြန်မာပဋိပက္ခကို အဆုံးသတ်ရန် ချမှတ်ထားသည့် အာဆီယံ၏ ငြိမ်းချမ်းရေး အစီအစဉ်မှာ တိုးတက်မှု မရှိသည့် အပေါ်  စိတ်ပျက်မှုများ မြင့်တက်လာနေပြီ မြန်မာ့အရေးနှင့် ပတ်သက်၍ အာဆီယံအတွင်း ဘုံသဘောတူညီချက် များ ပျက်ပြားလာကြောင်း လေ့လာဆန်းစစ်သူများက ထောက်ပြကြသည်။

အိမ်နီးချင်း ထိုင်းနိုင်ငံကဲ့သို့သော အချို့နိုင်ငံများကမူ ဗိုလ်ချုပ်မှူးကြီးဦးမင်းအောင်လှိုင် သမ္မတဖြစ်လာခြင်းကို ဂုဏ်ပြုစကားဆိုခဲ့ကြပြီး နှစ်နိုင်ငံနယ်စပ် တည်ငြိမ်အေးချမ်းစေရန် ကြိုးပမ်းသွားမည်ဟု ကတိပြုခဲ့ကြသည်။

အာဆီယံဥက္ကဋ္ဌနဲ့ မြန်မာကိုယ်စားလှယ်ကို တွေ့ရစဉ်

ဖိလစ်ပိုင်နိုင်ငံတွင် ကျင်းပသည့် ထိပ်သီး အစည်းအဝေး၌ မလေးရှားနိုင်ငံခြားရေးဝန်ကြီး မိုဟာမက် ဟက်ဆန် (Mohamad Hasan) က မြန်မာနိုင်ငံအတွင်း ပဋိပက္ခများ ဆက်လက် ဖြစ်ပွားနေဆဲဖြစ်၍ မြန်မာနိုင်ငံ အနေဖြင့် အာဆီယံစားပွဲဝိုင်းမှာ ထိုင်ခုံနေရာ ပြန်လည်ရယူရန် အဆင်သင့် မဖြစ်သေးကြောင်း ပြောကြားခဲ့သည်။

အင်ဒိုနီးရှားနှင့် လာမည့်နှစ်တွင် အာဆီယံအလှည့်ကျဥက္ကဋ္ဌ တာဝန်ယူမည့် စင်္ကာပူနိုင်ငံတို့သည် မလေးရှားနှင့် သဘောထားချင်း တူညီကြောင်း အများစုက ယူဆထားကြသည်။

သို့သော် မြန်မာနိုင်ငံခြားရေးဝန်ကြီးဌာနကမူ မြန်မာအစိုးရသစ်နှင့် အပြုသဘော မဆောင်သော ခွဲခြားဆက်ဆံမှု များ ပြုလုပ်ခြင်းသည် ဒီမိုကရေစီနည်းကျ မဲပေးခဲ့သည့် မြန်မာပြည်သူများ၏ သဘောဆန္ဒကို လျစ်လျူရှုရာ ရောက်ကြောင်း ထုတ်ပြန်ခဲ့သည်။

ပြီးခဲ့သည့် ငါးနှစ်တာ ကာလအတွင်း အာဆီယံနိုင်ငံ အချို့၏ သဘောထားဖြင့် မြန်မာနိုင်ငံအပေါ် ခွဲခြားဆက်ဆံမှု များ ပြုလုပ်သော်လည်း မြန်မာနိုင်ငံအနေဖြင့် စိတ်ရှည်သည်းခံပြီး အာဆီယံ အဖွဲ့ဝင်နိုင်ငံ တစ်နိုင်ငံ တာဝန် ဝတ္တရားများနှင့်အညီ ပူးပေါင်းဆောင်ရွက်ခဲ့ကြောင်း ထုတ်ပြန်ချက်တွင် ဖော်ပြခဲ့သည်။

ထိုထုတ်ပြန်ချက်တွင် နိုင်ငံများ၏ အမည်များကို အတိအကျ ထည့်သွင်းပြောကြားခြင်း မရှိသော်လည်း အချို့နိုင်ငံ များသည် မြန်မာနိုင်ငံ၏ ပြည်တွင်းရေးကို ဝင်ရောက်စွက်ဖက်ခြင်း၊ ဝေဖန်ပြောဆိုခြင်း၊ ဖိအားပေးခြင်းများကို ဆောင်ရွက်လျက်ရှိကြောင်း ဖော်ပြထားသည်။

CNI Sport News

၂၀၂၆ ခုနှစ်၊ မေလ ၁၂

ဘရာဇီးလ်အသင်းနည်းပြ အန်ဆယ်လော့တီဟာ ၂၀၂၆ ကမ္ဘာ့ဖလား ပြိုင်ပွဲအတွက် ကမ္ဘာ့ဘောလုံးအဖွဲ့ချုပ် (ဖီဖာ)ထံ တင်သွင်းခဲ့တဲ့ အသင်းယာယီ ၅၅ ဦး လူစာရင်းမှာ ဆန်းတို့စ်အသင်း ကြယ်ပွင့် နေမာ ပါဝင်ခဲ့ပါတယ်။

နေမာဟာ ဘရာဇီးလ်အသင်းရဲ့ အပြီးသတ် ၂၆ ဦး လူစာရင်းမှာ ပါဝင်ဖို့ မသေချာသေးပေမယ့် ပါဝင်ခွင့်ရနိုင် အောင် ကြိုးစားဖို့ မျှော်လင့်ချက် ရှိနေတာပါ။ 

ဘရာဇီးလ်အသင်းနည်းပြ အန်ဆယ်လော့တီက အမြင့်ဆုံးအဆင့်မှာ ယှဉ်ပြိုင်ဖို့ ကြံ့ခိုင်မှုပိုင်း အပြည့်ဖြစ်နေတဲ့ ကစားသမားတွေကိုသာ ကမ္ဘာ့ဖလားအတွက် ခေါ်ယူသွားမယ်လို့ ပြောထားခဲ့ပါတယ်။ 

နေမာကလည်း သူ့ရဲ့နောက်ဆုံး ကမ္ဘာ့ဖလားပြိုင်ပွဲ ဖြစ်နိုင်တဲ့ ၂၀၂၆ ပြိုင်ပွဲမှာ ပါဝင်နိုင်ဖို့ အစွမ်းကုန် ကြိုးပမ်းမှု တွေ ပြုလုပ်နေတာပါ။

ဘရာဇီးလ်အသင်းရဲ့ ယာယီလူစာရင်းမှာ နေမာ ပါဝင်ခဲ့ပေမယ့် ဒဏ်ရာရရှိနေတဲ့ ချယ်လ်ဆီးအသင်း တောင်ပံ ကစားသမား အက်စ်တီဗာအို ပါဝင်ခဲ့ခြင်း မရှိပါဘူး။ 

ဘရာဇီးလ်အသင်းကိုတွေ့ရစဉ်

ပါမီးလ်ရပ်စ်အသင်းမှာ ရှေးရိုးစွဲ ကုသမှုခံယူနေတဲ့ အက်စ်တီဗာအိုဟာ ကမ္ဘာ့ဖလားပြိုင်ပွဲအတွက် အချိန်မီ ပြန်ကောင်းလာဖွယ် မရှိဘူးလို့ ဘရာဇီးလ်ဘောလုံးအဖွဲ့ချုပ် ဆေးဘက်ဆိုင်ရာဌာနက ဆုံးဖြတ်ခဲ့ပါတယ်။ 

အက်စ်တီဗာအိုဟာ ကမ္ဘာ့ဖလား အိပ်မက်အတွက် ကြိုးပမ်းနေပေမယ့် ဘရာဇီးလ်အသင်းရဲ့ အပြီးသတ် လူစာရင်းမှာ ပါဝင်နိုင်ဖို့ မရှိတော့တာပါ။ 

ဘရာဇီးလ်အသင်းဟာ ကမ္ဘာ့ဖလားပြိုင်ပွဲ သွားမယ့် အပြီးသတ် လူစာရင်းကို မေလ ၁၈ ရက်မှာ ကြေညာသွားမယ် လို့ သိရပါတယ်။ 

ဘရာဇီးလ်အသင်းဟာ ကမ္ဘာ့ဖလားပြိုင်ပွဲ မတိုင်မီ ပနားမား၊ အီဂျစ်အသင်းတို့နဲ့ ခြေစမ်းပွဲကစားပြီး ဇွန်လ ၁၃ ရက်မှာ အုပ်စုအဖွင့်ပွဲအဖြစ် မော်ရိုကိုအသင်းနဲ့ ယှဉ်ပြိုင်မှာ ဖြစ်ပါတယ်။ 

Source: Goal

CNI Sport News

၂၀၂၆ ခုနှစ်၊ မေလ ၁၂

အာဂျင်တီးနားတိုက်စစ်မှူး ဒိုင်ဘားလားက ရိုးမားအသင်းဟာ သူ့ရဲ့အနာဂတ်နဲ့ ပတ်သက်ပြီး ဆွေးနွေးဖို့ ချဉ်းကပ်ခြင်း မရှိတာကြောင့် လာဇီယိုအသင်းနဲ့ပွဲဟာ ရိုးမားအသင်းအတွက် သူ့ရဲ့နောက်ဆုံးအိမ်ကွင်းပွဲ ဖြစ်နိုင်တယ်လို့ ပြောခဲ့ပါတယ်။ 

ဒိုင်ဘားလားက “အမှန်တရားက ကျနော်ကိုယ်တိုင် တစ်ခုခု သိချင်ပေမယ့် ကလပ်အသင်းက ကျနော့်ကို ချဉ်းကပ်တာ မရှိသေးပါဘူး။ စာချုပ်အရ လာဇီယိုနဲ့ဒါဘီပွဲဟာ ရိုးမားအသင်း ပရိသတ်တွေအရှေ့မှာ ကျနော့်ရဲ့ နောက်ဆုံးပွဲ ဖြစ်နိုင်ပါတယ်။ ရာသီကုန်မှာ ဘာတွေ ဖြစ်လာမလဲဆိုတာတော့ ကျနော်တို့ မြင်တွေ့ရမှာပါ”လို့ Sky Italia ကို ပြောခဲ့တာပါ။ 

ဂျူဗင်တပ်စ်အသင်းမှာ ၇ နှစ်ကြာ ကစားပြီးနောက် ၂၀၂၂ ခုနှစ်မှာ ရိုးမားအသင်းထံ ပြောင်းရွှေ့လာခဲ့တဲ့ ဒိုင်ဘားလားရဲ့ စာချုပ်ဟာ ဒီရာသီကုန်ရင် ကုန်ဆုံးပြီဖြစ်ပါတယ်။

ဒိုင်ဘားလားဟာ ဒီရာသီမှာ ဒဏ်ရာတွေနဲ့ ရုန်းကန်နေရပြီး ဒူးခွဲစိတ်မှုခံယူခဲ့လို့ ရိုးမားအသင်းရဲ့ ပွဲအများအပြားကို လွဲချော်ခဲ့ပါတယ်။ 

ဒိုင်ဘားလားကို တွေ့ရစဉ်

ရိုးမားအသင်းက ပါးမားအသင်းကို ၃ ဂိုး-၂ ဂိုးနဲ့ အနိုင်ရပြီး ချန်ပီယံလိဂ် ဝင်ခွင့်အတွက် ကြီးမားတဲ့ခြေလှမ်းကို လှမ်းနိုင်ခဲ့တဲ့ပွဲမှာ ဒိုင်ဘားလားဟာ ဂိုးဖန်တီးမှု ၁ ကြိမ် ပြုလုပ်ပေးနိုင်ခဲ့တာပါ။

ဒိုင်ဘားလားက သူတို့ဟာ ချန်ပီယံလိဂ် ဝင်ခွင့်ရယူနိုင်ဖို့ကို အဆုံးထိ တိုက်ပွဲဝင်သွားမယ်လို့လည်း ပြောခဲ့ပါတယ်။ 

အသက် ၃၂ နှစ်အရွယ်ရှိ ဒိုင်ဘားလားဟာ ဒီရာသီမှာ ရိုးမားအသင်းအတွက် ပြိုင်ပွဲစုံ ၂၅ ပွဲ ပါဝင်ကစားထားပြီး ၃ ဂိုး သွင်းယူကာ ဂိုးဖန်တီးမှု ၅ ကြိမ် ပြုလုပ်ထားတာပါ။

သတင်းအများအပြားက ဒိုင်ဘားလားဟာ ရိုးမားအသင်းနဲ့ စာချုပ်ကုန်ဆုံးပြီးနောက် သူ့ရဲ့နိုင်ငံဖြစ်တဲ့ အာဂျင်တီးနားကို ပြန်ကာ ဘိုကာဂျူနီယာအသင်းမှာ ကစားမယ်လို့ ဖော်ပြထားပါတယ်။ 

Source: CNA

CNI Sport News

၂၀၂၆ ခုနှစ်၊ မေလ ၁၂

ချယ်လ်ဆီးအသင်းဟာ ရီးရယ်လ်အသင်း နည်းပြဟောင်း အလွန်ဆိုကို နည်းပြသစ်အဖြစ် ခန့်အပ်ဖို့ စတင် ကြိုးပမ်းနေပြီး တခြားရွေးချယ်စရာတွေကိုလည်း စောင့်ကြည့်မှုတွေ ပြုလုပ်နေပါတယ်။ 

လေဗာကူဆင်အသင်းကို ၂၀၂၃-၂၄ ရာသီဘွန်ဒက်လီဂါ ပြိုင်ပွဲမှာ ရှုံးပွဲမရှိ ချန်ပီယံဖြစ်အောင် ကိုင်တွယ်ပေးနိုင် ခဲ့တဲ့ အလွန်ဆိုဟာ ရီးရယ်လ်အသင်းကို ၆ လကြာ ကိုင်တွယ်ပြီးနောက် ဇန်နဝါရီလမှာ ထွက်ခွာခဲ့တာပါ။ 

အလွန်ဆိုဟာ အသင်းဟောင်း လီဗာပူးလ်အသင်းနဲ့ ချိတ်ဆက်မှုတွေ ရှိနေပေမယ့် လီဗာပူးလ်အသင်းက လက်ရှိ နည်းပြ အာနီဆလော့ကို လာမယ့်ရာသီဆက်ပြီး တာဝန်ယူခိုင်းဖို့ ရှိနေပါတယ်။ 

အဲ့ဒါကြောင့် အလွန်ဆိုဟာ ချယ်လ်ဆီးအသင်းကို ကိုင်တွယ်ဖို့ စိတ်ကူးရှိနေတယ်လို့ ဗြိတိန်မီဒီယာတွေက ဖော်ပြထားတာပါ။

ချယ်လ်ဆီးအသင်းကို တွေ့ရစဉ်

ချယ်လ်ဆီးအသင်းရဲ့ နည်းပြသစ် ဖြစ်လာနိုင်တဲ့ စာရင်းထဲမှာ ၆ ဦးအထိရှိနေပြီး ဘုန်းမောက်အသင်း နည်းပြ အီရာအိုလာနဲ့ ဖူလ်ဟမ်အသင်းနည်းပြ မာကိုဆေးလ်ဗားတို့ ပါဝင်နေပါတယ်။ 

ဒါ့အပြင် ဒီရာသီကုန်ရင် ခရစ္စတယ်ပဲလေ့စ်အသင်းကနေ ထွက်ခွာမယ့် ဂလက်စ်နာနဲ့ အသင်းရဲ့ ကစားသမား ဟောင်းတွေဖြစ်တဲ့ ဖာဘရီဂတ်စ်နဲ့ ဖီလစ်ပီလူးဝစ်တို့ ပါဝင်နေတာ ဖြစ်ပါတယ်။ 

ဖာဘရီဂတ်စ်ဟာ လက်ရှိအချိန်မှာ ကိုမိုအသင်းကို လာမယ့်ရာသီ ဥရောပပြိုင်ပွဲ ယှဉ်ပြိုင်ခွင့် ရရှိအောင် ကိုင်တွယ် ပေးထားပြီး ဖီလစ်ပီလူးဝစ်ဟာ ဖလာမင်ဂိုအသင်းကို အောင်မြင်မှုတွေ ရယူပြီးနောက် ထွက်ခွာခဲ့တာပါ။ 

ချယ်လ်ဆီးအသင်းဟာ ဇွန်လအလယ်မှာ နည်းပြသစ် ခန့်အပ်နိုင်ဖို့ မျှော်လင့်နေပြီး အလွန်ဆိုဟာ သူတို့ရဲ့ ဦးစားပေးအဖြစ် ရှိနေပါတယ်။ 

လန်ဒန်ကလပ်ဟာ သူတို့ရဲ့အမြင်နဲ့ ကိုက်ညီပြီး၊ အသင်းကို တိုးတက်အောင် လုပ်ဆောင်ပေးကာ တည်ငြိမ်တဲ့ စွမ်းဆောင်ရည်နဲ့ ရလဒ်တွေကို ပေးနိုင်တဲ့ နည်းပြကို ခန့်အပ်ချင်နေတာပါ။ 

ချယ်လ်ဆီးအသင်းဟာ လက်ရှိအချိန်မှာ ရာသီကုန်အထိ မက်ဖာလိန်းကို ယာယီနည်းပြအဖြစ် တာဝန်ပေးထားပြီး သူဟာ လာမယ့် FA ဖလားဗိုလ်လုပွဲအတွက် အသင်းကို ပြင်ဆင်မှုတွေ ပြုလုပ်နေတာ ဖြစ်ပါတယ်။ 

Source: Dailymail

CNI Sport News

၂၀၂၆ ခုနှစ်၊ မေလ ၁၂

စပါးအသင်းဟာ လိဒ်စ်အသင်းနဲ့ပွဲမှာ ၁ ဂိုးစီ သရေကျကာ တန်းဆင်းဇုန်ထဲက အသင်းကို အမှတ် ဖြတ်နိုင်မယ့် အခွင့်အရေး လက်လွှတ်ခဲ့ရပြီးနောက် နည်းပြဒီဇာဘီက အသင်းဟာ အမှားတွေ များလွန်းခဲ့တယ်လို့ ပြောခဲ့ပါ တယ်။ 

ဒီဇာဘီက “ကျနော်တို့ အမှားတွေ အများကြီး လုပ်ခဲ့ကြပြီး အနိုင်ရချင်ရင် အမှားတွေကို လျှော့ချရမှာပါ။ အနိုင် ရသင့်တယ်လို့ ထင်ခဲ့ပေမယ့် ဖိအားတွေ၊ အရေးကြီးတဲ့ပွဲ၊ ရာသီရဲ့ အရေးကြီးတဲ့ အပိုင်းတွေမှာ ကျနော်တို့ အများကြီး ခံစားခဲ့ရပါတယ်။ ဒီပွဲမတိုင်ခင်ကတည်းက ရာသီကုန်အထိ၊ နောက်ဆုံးပွဲတွေအထိ ခက်ခဲမယ်ဆိုတာ ကျနော်တို့ သိခဲ့ပါတယ်”လို့ Match of the Day ကို ပြောခဲ့တာပါ။ 

စပါးအသင်းဟာ ဒီပွဲမှာ မာသီးစ်တဲလ်ရဲ့ သွင်းဂိုးနဲ့ ဦးဆောင်နိုင်ခဲ့ပေမယ့် ဂိုးဧရိယာအတွင်းမှာ သူ့ရဲ့ဘောလုံးရှင်း ထုတ်မှုကြောင့် လိဒ်စ်အသင်းကို ပယ်နယ်တီ ပေးရပြီး ချေပဂိုး ခွင့်ပြုခဲ့ရပါတယ်။ 

စပါးအသင်း ယှဉ်ပြိုင်နေစဉ်

စပါးအသင်းဟာ ဒီပွဲရဲ့မိနစ် ၉၀ ပြည့်ပြီး ထပ်ဆောင်း အချိန်ပိုမှာ ပယ်နယ်တီ ရနိုင်မယ့် အခြေအနေ ရှိခဲ့ပေမယ့် ကွင်းလယ်ဒိုင်လူကြီးက ခွင့်မပြုခဲ့တာကြောင့် နစ်နာခဲ့ရပါတယ်။ 

စပါးအသင်းနည်းပြ ဒီဇာဘီက ဝက်စ်ဟမ်းနဲ့ အာဆင်နယ်အသင်းပွဲမှာ ဖြစ်ခဲ့တဲ့အရာတွေကြောင့် ဒိုင်လူကြီးတွေ ဟာ ဖိအားတွေကို ခံစားနေရတဲ့အတွက် တည်ငြိမ်မှု မရှိဘူးလို့ထင်ကြောင်း ပြောခဲ့သလို မာသီးတဲလ်စ်ဟာ သူ့ရဲ့ အမှားအတွက် တောင်းပန်ခဲ့တယ်လို့လည်း ပြောခဲ့တာပါ။

စပါးအသင်းဟာ ဒီပွဲရလဒ်ကြောင့် တန်းဆင်းဇုန်ထဲက ဝက်စ်ဟမ်းအသင်းကို ၂ မှတ်အသာနဲ့ အဆင့် ၁၇ နေရာမှာ ရပ်တည်နေပါတယ်။ 

စပါးအသင်းဟာ ပရီးမီးယားလိဂ် လက်ကျန် ၂ ပွဲအဖြစ် ချယ်လ်ဆီး၊ အဲဗာတန်အသင်းတို့နဲ့ ယှဉ်ပြိုင်ရမှာဖြစ်ပြီး ဝက်စ်ဟမ်းအသင်းက နယူးကာဆယ်၊ လိဒ်စ်အသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: CNA

CNI Sport News

၂၀၂၆ ခုနှစ်၊ မေလ ၁၁

ဘာစီလိုနာအသင်း လာလီဂါဖလား ရယူနိုင်ခဲ့တဲ့ ရီးရယ်လ်အသင်းနဲ့ပွဲမှာ ခြေစွမ်းပြသပြီး ဂိုးသွင်းခဲ့တဲ့ ရက်ရှ်ဖို့ဒ်က သူသာမှော်ဆရာဖြစ်ရင် ဘာစီလိုနာအသင်းမှာပဲ ဆက်နေမယ်လို့ ပြောခဲ့ပါတယ်။ 

ရက်ရှ်ဖို့ဒ်က “လာမယ့်ရာသီ ဘာစီလိုနာ ကစားသမားအဖြစ် ဆက်ရှိမလားဆိုတာ ကျနော် မသိပါဘူး။ ကျနော်က မှော်ဆရာ မဟုတ်ပေမယ့် မှော်ဆရာဖြစ်ခဲ့ရင် ဆက်နေမှာပါ။ ကျနော်တို့ စောင့်ကြည့်ရမှာပါ။ ကျနော်ဟာ အနိုင်ရ ယူဖို့ ဒီကို ရောက်လာခဲ့တာဖြစ်ပြီး ဒီအသင်းရဲ့ အစိတ်အပိုင်း ဖြစ်ရတာ အလွန်ထူးခြားပါတယ်။ ဘာစီလိုနာ အသင်းဟာ အနာဂတ်မှာ အောင်မြင်မှုတွေ အများကြီး ရယူနိုင်တော့မှာပါ”လို့ ပြောခဲ့တာပါ။ 

ယူနိုက်တက်အသင်းကနေ အငှားနဲ့ ရောက်လာခဲ့တဲ့ ရက်ရှ်ဖို့ဒ်ရဲ့ အငှားစာချုပ်ဟာ လာမယ့်လဆိုရင် ကုန်ဆုံး တော့မှာ ဖြစ်ပါတယ်။ 

ရက်ရှ်ဖို့ဒ်ကို တွေ့ရစဉ်

ဘာစီလိုနာအသင်းဟာ ရက်ရှ်ဖို့ဒ်ကို ယူရိုသန်း ၃၀ နဲ့ အပြီးသတ် ဝယ်ယူဖို့ ရွေးချယ်ခွင့် ရှိပေမယ့် အငှားစာချုပ်ကို နောက်ထပ် တစ်ရာသီ သက်တမ်းတိုး ချင်နေတယ်လို့ သတင်းတွေမှာ ဖော်ပြထားတာပါ။ 

ရက်ရှ်ဖို့ဒ်ဟာ ဘာစီလိုနာအသင်းမှာ ဆက်နေချင်သလို ယူနိုက်တက်အသင်းကလည်း သူ့ကို အပြီးသတ် ရောင်းချ ချင်နေတာ ဖြစ်ပါတယ်။

ဘာစီလိုနာအသင်းဟာ ဒီရာသီပြီးရင် ရက်ရှ်ဖို့ဒ်ရဲ့ အနာဂတ်ကို ဆုံးဖြတ်မှာဖြစ်ပြီး ယူနိုက်တက်အသင်းနဲ့ ဆွေးနွေးမှုတွေ ပြုလုပ်ဖို့ရှိ နေတာပါ။ 

လက်ရှိအချိန်မှာ ရက်ရှ်ဖို့ဒ်ကို ခေါ်ယူဖို့ အသင်းတချို့က စောင့်ကြည့်မှုတွေ ပြုလုပ်နေကြပါတယ်။

ရက်ရှ်ဖို့ဒ်ဟာ ဒီရာသီမှာ ဘာစီလိုနာအသင်းအတွက် ပြိုင်ပွဲစုံ ၄၇ ပွဲ ကစားထားပြီး ၁၄ ဂိုး သွင်းယူကာ ဂိုးဖန်တီးမှု ၁၄ ကြိမ် ပြုလုပ်ထားတာ ဖြစ်ပါတယ်။ 

Source: ESPN

CNI Sport News

၂၀၂၆ ခုနှစ်၊ မေလ ၁၁

ခယ်လ်ဆီးအသင်း ယာယီနည်းပြ မက်ဖာလိန်းက မန်စီးတီးအသင်းနဲ့ ယှဉ်ပြိုင်ရမယ့် FA ဖလားဗိုလ်လုပွဲမှာ နက်တိုနဲ့ ဂါနာချိုတို့ ဒဏ်ရာကနေ ပြန်ကောင်းလာပြီး ပါဝင်နိုင်ဖို့ မျှော်လင့်နေပါတယ်။ 

နက်တိုနဲ့ဂါနာချိုတို့ဟာ လီဗာပူးလ်အသင်းနဲ့ ၁ ဂိုးစီ သရေကျပြီး ပရီးမီးယားလိဂ်မှာ ချယ်လ်ဆီးအသင်း ၆ ပွဲဆက် အရေးနိမ့်မှုကို ရပ်တန့်နိုင်ခဲ့တဲ့ပွဲမှာ ပါဝင်နိုင်ခဲ့ခြင်း မရှိပါဘူး။ 

ချယ်လ်ဆီးအသင်းရဲ့ တောင်ပံကစားသမားတွေဖြစ်တဲ့ အက်စ်တီဗာအို၊ ဂစ်တန်စ်နဲ့ ဒယ်ရီတို့ကလည်း ဒဏ်ရာ ရနေတာကြောင့် အသင်းဟာ တောင်ပံနေရာအတွက် ရွေးချယ်စရာမရှိဘူး ဖြစ်နေပါတယ်။ 

အဲ့ဒါကြောင့် မက်ဖာလိန်းက FA ဖလား ဗိုလ်လုပွဲမှာ နက်တိုနဲ့ ဂါနာချိုတို့ ၂ ဦးစလုံး ပါဝင်နိုင်ဖို့ မျှော်လင့်နေတာ ပါ။ 

 နက်တိုကို တွေ့ရစဉ်

မက်ဖာလိန်းက သူတို့တွေဟာ လေ့ကျင့်ခန်း ပြန်ဆင်းမှာဖြစ်လို့ အခြေအနေကို စောင့်ကြည့်ရဦးမှာ ဖြစ်ပေမယ့် အသုံးပြုနိုင်ဖို့ မျှော်လင့်နေတာ ဖြစ်ပါတယ်။ 

နက်တိုဟာ ချယ်လ်ဆီးအသင်း FA ဖလား ဗိုလ်လုပွဲတက်တဲ့ လမ်းကြောင်းမှာ အရေးပါတဲ့ ကစားသမားဖြစ်ပြီး ၅ ပွဲမှာ ၄ ဂိုးသွင်းယူကာ ဂိုးဖန်တီးမှု ၂ ကြိမ် ပြုလုပ်နိုင်ခဲ့တာပါ။ 

နက်တိုဟာ ချယ်လ်ဆီးအသင်းက လိဒ်စ်အသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ ဆီမီးဖိုင်နယ်ပွဲမှာ အန်ဇိုဖာနန်ဒက်ဇ် ရဲ့ သွင်းဂိုးကို ဖန်တီးပေးခဲ့တာ ဖြစ်ပါတယ်။ 

ဂါနာချိုကတော့ ရက်စ်ဟမ်း၊ ပေါ့ဗေးလ်အသင်းတို့ကို အနိုင်ရခဲ့တဲ့ FA ဖလားပွဲတွေမှာ ချယ်လ်ဆီးအသင်းအတွက် ဂိုးသွင်းယူနိုင်ခဲ့ပါတယ်။

ချယ်လ်ဆီးအသင်းဟာ ပရီးမီးယားလိဂ်မှာ ရလဒ်တွေ မကောင်းတာကြောင့် FA ဖလားကို ရယူပြီး လာမယ့်ရာသီ ဥရောပပြိုင်ပွဲ ယှဉ်ပြိုင်ခွင့်ရနိုင်ဖို့ ပစ်မှတ်ထားနေပါတယ်။ 

Source: Sportsmole 

CNI Sport News

၂၀၂၆ ခုနှစ်၊ မေလ ၁၁

ဘာစီလိုနာအသင်းဟာ ရီးရယ်လ်အသင်းကို ၂ ဂိုး-ဂိုးမရှိနဲ့ အနိုင်ရပြီးနောက် ဒီရာသီလိဂ်ပွဲတွေ ကစားဖို့ ၃ ပွဲ ကျန်ရှိသေးချိန်မှာ သူတို့ရဲ့ ၂၉ ကြိမ်မြောက် လာလီဂါဖလားကို ရရှိခဲ့ပါတယ်။ 

ဒီပွဲမှာ ဘာစီလိုနာအသင်းအတွက် ဂိုးတွေကို ရက်ရှ်ဖို့ဒ်နဲ့ ဖယ်ရန်တောရက်စ်တို့က သွင်းယူခဲ့တာပါ။ 

ဘာစီလိုနာအသင်းဟာ ဒီနိုင်ပွဲကြောင့် အဆင့် ၂ နေရာက ရီးရယ်လ်အသင်းကို ၁၄ မှတ် ဖြတ်နိုင်ခဲ့တဲ့အတွက် လာလီဂါဖလားကို ၂ ရာသီဆက်တိုက် ရယူနိုင်ခဲ့တာဖြစ်ပါတယ်။ 

ဘာစီလိုနာအသင်းနည်းပြ ဟန်ဆီဖလစ်ဟာ ဒီပွဲမတိုင်မီမှာ သူ့ရဲ့ဖခင် ကွယ်လွန်သွားခဲ့ပေမယ့် အသင်းကို ကိုင်တွယ်ပြီး လာလီဂါဖလား ရရှိအောင် စွမ်းဆောင်ပေးနိုင်ခဲ့ပါတယ်။ 

ဘာစီလိုနာအသင်းကစားသမားတွေဟာ သွင်းဂိုးတွေ သွင်းယူအပြီးမှာ နည်းပြ ဟန်ဆီဖလစ်နဲ့အတူ အောင်ပွဲခံခဲ့ ပြီး ပွဲအပြီးမှာ နည်းပြကို လေပေါ်မြှောက်ကာ အောင်ပွဲခံခဲ့ကြပါတယ်။ 

ဘာစီလိုနာနဲ့ ရီးရယ်လ်အသင်း ယှဉ်ပြိုင်နေစဉ်

ဟန်ဆီဖလစ်က “ခက်ခဲတဲ့ နေ့တစ်နေ့ဖြစ်ပြီး ဒီနေ့ကို ဘယ်တော့မှမေ့နိုင်မှာ မဟုတ်ပါဘူး။ လူတိုင်းကို ကျေးဇူး တင်ပြီး၊ အရာအားလုံးအတွက် ကျေးဇူးတင်သလို အမှန်တကယ်ကို တိုက်ပွဲဝင်ပေးတဲ့ အတွက်လည်း ကျေးဇူးတင် ပါတယ်။ အရာအားလုံးကို နှစ်သက်ပြီး ဒါက မိသားစုတစ်စုလိုပါပဲ”လို့ ပြောခဲ့ပါတယ်။ 

ဒါ့အပြင် ဟန်ဆီဖလစ်က ချန်ပီယံလိဂ်ဖလား ရယူချင်တဲ့အသင်း ရည်မှန်းချက်ဟာ အောင်မြင်နိုင်မှာဖြစ်ပြီး အိပ်မက်တွေ ပိုများလာတာက လာမယ့်ရာသီအတွက် ကောင်းမွန်တယ်လို့ ပြောခဲ့တာပါ။ 

ဘာစီလိုနာအသင်းဟာ ဒီရာသီ လာလီဂါပြိုင်ပွဲမှာ ရမှတ် ၁၀၀ ရယူပြီး အဆုံးသတ်ဖို့က နောက်ထပ် ရည်မှန်းချက် ဖြစ်တယ်လို့လည်း နည်းပြဟန်ဆီဖလစ်က ပြောခဲ့ပါတယ်။

ဘာစီလိုနာအသင်းဟာ လာလီဂါပွဲစဉ် ၃၅ ပွဲကစားအပြီးမှာ ၉၁ မှတ် ရရှိထားပြီး လက်ကျန် ၃ ပွဲစလုံးကို နိုင်ပွဲရယူ နိုင်ခဲ့ရင် ရမှတ် ၁၀၀ နဲ့အဆုံးသတ်နိုင်မှာ ဖြစ်ပါတယ်။ 

Source: BBC