CNI Sport News

၂၀၂၅ ခုနှစ်၊ နိုဝင်ဘာ ၁၉

အက်စတွန်ဗီလာအသင်းမှာ အငှားကစားတာ အဆင်မပြေဖြစ်နေတဲ့ အင်္ဂလန်တောင်ပံ ကစားသမား ဆန်ချိုဟာ တူရကီကလပ် ၃ သင်းနဲ့ အပြောင်းအရွှေ့ ဆွေးနွေးမှု ပြုလုပ်ခဲ့တယ်လို့ သတင်းတွေ ထွက်ပေါ်လာခဲ့ပါတယ်။ 

ဆန်ချိုဟာ နည်းပြအာမိုရင်ရဲ့ အစီအစဉ်ထဲမှာ မပါဝင်တာကြောင့် ပြီးခဲ့တဲ့နွေရာသီ အပြောင်းအရွှေ့ နောက်ဆုံး နေ့မှာ ယူနိုက်တက်အသင်းကနေ အက်စတွန်ဗီလာအသင်းထံ အငှားနဲ့ ပြောင်းရွှေ့ခဲ့တာပါ။

ဒါပေမယ့် ဆန်ချိုဟာ အက်စတွန်ဗီလာအသင်းမှာ ပွဲကစားချိန် မိနစ်တွေရဖို့ ရုန်းကန်နေရတာကြောင့် နောက်ထပ် အသင်းတစ်သင်းထံ ပြောင်းရွှေ့ဖို့ စဉ်းစားနေပြီလို့ ယူဆရပါတယ်။ 

ဆန်ချိုဟာ ယူနိုက်တက်အသင်းမှာ နည်းပြဟောင်း အဲရစ်တန်ဟတ်နဲ့ အဆင်မပြေဖြစ်ပြီး အသင်းလူ စာရင်းကနေ ဖယ်ရှားခံခဲ့ရတဲ့ ၂၀၂၃-၂၄ ရာသီအစကတည်းက ခြေစွမ်းပိုင်း ကျဆင်းသွားခဲ့တာပါ။ 

ဆန်ချိုဟာ အဆိုပါရာသီရဲ့ ဒုတိယရာသီဝက်မှာ အသင်းဟောင်း ဒေါ့မွန်အသင်းထံ အငှားနဲ့ သွားရောက် ကစားခဲ့ ပြီး နွေရာသီမှာ ယူနိုက်တက်အသင်းထံ ပြန်ရောက်လာခဲ့ပါတယ်။ 

ဆန်ချိုကို တွေ့ရစဉ်

ဆန်ချိုဟာ ပြီးခဲ့တဲ့ရာသီမှာ ချယ်လ်ဆီးအသင်းထံ အငှားချ ခံခဲ့ရပေမယ့် ပုံမှန်ခြေစွမ်း မပြသနိုင်လို့ အပြီးသတ် ခေါ်ယူခြင်း မခံခဲ့ရပါဘူး။ 

ယူနိုက်တက်အသင်းဟာ ဆန်ချိုကို ပြီးခဲ့တဲ့ နွေရာသီမှာ အပြီးသတ် ရောင်းချဖို့ စီစဉ်ခဲ့ပေမယ့် ဝယ်ယူမယ့် အသင်း မရှိတာကြောင့် အက်စတွန်ဗီလာအသင်းထံ အငှားချခဲ့ပါတယ်။ 

ဆန်ချိုဟာ အက်စတွန်ဗီလာအသင်းမှာ ၃ ပွဲသာ ပွဲထွက်လူစာရင်းထဲ ပါဝင်ထားရသေးတဲ့အတွက် သူ့ရဲ့ အနာဂတ်နဲ့ ပတ်သက်ပြီး မေးခွန်းတွေ ထပ်မံ ထွက်ပေါ်နေခဲ့တာပါ။ 

Caughtoffside က ဆန်ချိုနဲ့ သူ့ရဲ့ ကိုယ်စားလှယ်တွေဟာ ဖီနာဘာချီ၊ ဘက်ဆစ်တပ်၊ ဂါလာတာစာရေးအသင်း တို့နဲ့ ဆွေးနွေးခဲ့တယ်လို့ ဖော်ပြထားပါတယ်။ 

ဆန်ချိုဟာ တူရကီကလပ်တွေထံ ပြောင်းရွှေ့ဖို့အတွက် သူ့ရဲ့လုပ်ခလစာ အများအပြားကို လျှော့ချဖို့ ဆန္ဒရှိနေ တယ်လို့ သိရပါတယ်။ 

ဒေါ့မွန်အသင်းကလည်း ဆန်ချိုကို ဇန်နဝါရီ အပြောင်းအရွှေ့မှာ ထပ်ပြီးခေါ်ယူဖို့ စိတ်ဝင်စားနေတယ်လို့ Bild က ဖော်ပြထားပါတယ်။ 

Source: Goal

CNI Sport News

၂၀၂၅ ခုနှစ်၊ နိုဝင်ဘာ ၁၉

အာဆင်နယ်အသင်းဟာ ဘရာဇီးလ်အသင်းအတွက် ပါဝင်ကစားပြီး ရခဲ့တဲ့ ဒဏ်ရာကြောင့် နောက်ခံလူ ဂါဘရီရယ်လ် ဇန်နဝါရီအထိ အသင်းအတွက် မပါဝင်နိုင်မှာကို စိုးရိမ်မှုရှိနေပါတယ်။ 

ဂါဘရီရယ်လ်ဟာ ဘရာဇီးလ်အသင်းက ဆီနီဂေါအသင်းကို အနိုင်ရခဲ့တဲ့ ခြေစမ်းပွဲမှာ ပေါင်ခြံဒဏ်ရာ ရရှိခဲ့တာပါ။ 

အာဆင်နယ်အသင်း နောက်ခံလူဟာ ဒဏ်ရာကြောင့် တူနီးရှားအသင်းနဲ့ ခြေစမ်းပွဲမှာ ဘရာဇီးလ်အသင်းအတွက် မပါဝင်နိုင်ခဲ့သလို ကနဦးစစ်ဆေးမှုတွေ အပြီးမှာ ညာဘက် ပေါင်ကြွက်သား ဒဏ်ရာရခဲ့ကြောင်း တွေ့ရှိခဲ့ရတယ် လို့ ဖော်ပြထားပါတယ်။ 

ဂါဘရီရယ်လ်ဟာ ဒီရာသီမှာ ရလဒ်ကောင်းတွေ ရနေတဲ့ အာဆင်နယ်အသင်းအတွက် ခြေစွမ်းပြသနေတာဖြစ်ပြီး အသင်းဖော်ဆာလီဘာနဲ့ တွဲဖက်ကာ ပရီးမီးယားလိဂ်ပြိုင်ပွဲမှာ ပေးဂိုး ၅ ဂိုးသာ ပေးရအောင် စွမ်းဆောင်ထား တာပါ။

ဂါဘရီရယ်လ်ရဲ့ ဒဏ်ရာ အခြေအနေကို နောက်ထပ် စစ်ဆေးမှုတွေ ပြုလုပ်ဖို့ စောင့်ဆိုင်းနေပြီး ကနဦး စစ်ဆေး မှုတွေအရ ဇန်နဝါရီအထိ အနားယူရနိုင်တယ်လို့ ဘီဘီစီက ဖော်ပြထားပါတယ်။ 

 ဂါဘရီရယ်လ်ကို တွေ့ရစဉ်

အာဆင်နယ်အသင်းဟာ ဒီကာလအတွင်းမှာ ပွဲအများအပြား ကစားရမှာ ဖြစ်တဲ့အတွက် ဂါဘရီရယ်လ်ကို အနား ပေးရမှာက အသင်းအတွက် ကြီးမားတဲ့ ထိုးနှက်ချက် ဖြစ်လာနိုင်တာပါ။

ဂါဘရီရယ်လ်ဟာ ဒဏ်ရာကြောင့် စပါးအသင်းနဲ့ မြောက် လန်ဒန်ဒါဘီပွဲစဉ်ကို သေချာပေါက် လွဲချော်မှာ ဖြစ်ပါတယ်။ 

ဂါဘရီရယ်လ်အနေနဲ့ ဇန်နဝါရီအထိ အနားယူရမယ်ဆိုရင် အာဆင်နယ်အသင်းရဲ့ ပွဲပေါင်း ၁၁ ပွဲကို ပါဝင်နိုင်မှာ မဟုတ်ပါဘူး။ 

အာဆင်နယ်အသင်းဟာ ဂါဘရီရယ်လ် မပါဝင်နိုင်ချိန်မှာ နွေရာသီက ခေါ်ယူထားတဲ့ မိုစကွဲယားနဲ့ ဟင်ကာပီတို့ကို သူ့ရဲ့နေရာမှာ အစားထိုးပြီး အသုံးပြုလို့ရတာ ဖြစ်ပါတယ်။

မိုစကွဲယားဟာ ဆာလီဘာဒဏ်ရာကြောင့် မပါဝင်နိုင်ချိန်မှာ အာဆင်နယ်အသင်းအတွက် ပါဝင်ပြီး ခြေစွမ်း ပြသထားတာပါ။ 

ဟင်ကာပီကတော့ အာဆင်နယ်အသင်းအတွက် ပရီးမီးယားလိဂ်မှာ ပွဲထွက် လူစာရင်းထဲ ပါဝင်ခွင့်မရသေးပေမယ့် နည်းပြ အာတီတာနှစ်သက်တဲ့ ကစားသမားတစ်ဦး ဖြစ်ပါတယ်။ 

ဒါ့ပြင် အာဆင်နယ်အသင်းဟာ ကာလာဖီအိုရီကိုလည်း ဗဟိုနောက်ခံလူ နေရာမှာ အသုံးပြုနိုင်တယ်လို့ သိရပါ တယ်။ 

Source: metro

CNI Sport News

၂၀၂၅ ခုနှစ်၊ နိုဝင်ဘာ ၁၉

စကော့တလန်အသင်းဟာ ၂၀၂၆ ကမ္ဘာ့ဖလားခြေစစ်ပွဲ အုပ်စုနောက်ဆုံးပွဲစဉ်မှာ ဒိန်းမတ်အသင်းကို ၄ ဂိုး-၂ ဂိုးနဲ့ အနိုင်ရခဲ့ပြီးနောက် ၁၉၉၈ နောက်ပိုင်း ကမ္ဘာ့ဖလားပြိုင်ပွဲကို ပထမဆုံးအကြိမ် ယှဉ်ပြိုင်ခွင့် ရရှိသွားခဲ့ပါတယ်။ 

စကော့တလန်အသင်းဟာ ဒီပွဲမှာ တိုမီနေးရဲ့ သွင်းဂိုးနဲ့ ဦးဆောင်နိုင်ခဲ့ပေမယ့် ဟော့ဂျ်လန်းက ဒိန်းမတ်အသင်း အတွက် ချေပဂိုး ပြန်သွင်းယူနိုင်ခဲ့ပါတယ်။

ဒိန်းမတ်အသင်းဟာ ပွဲချိန် ၆၁ မိနစ်မှာ ကစားသမားတစ်ဦး လျော့သွားခဲ့ပြီးနောက် စကော့တလန်အသင်းက ဦးဆောင်ဂိုး သွင်းနိုင်ခဲ့ပေမယ့် ဒိန်းမတ်အသင်းက ချေပဂိုးပြန်ပြီး သွင်းယူနိုင်ခဲ့တာပါ။

ဒီပွဲသရေရလဒ်နဲ့ ပြီးဆုံးမယ်ဆိုရင် ဒိန်းမတ်အသင်းက ကမ္ဘာ့ဖလားခြေစစ်ပွဲ တိုက်ရိုက် အောင်မြင်မှာဖြစ်ပြီး စကော့တလန်အသင်းက ပလေးအော့ဖ် ယှဉ်ပြိုင်ရမှာဖြစ်ပါတယ်။ 

ဒါပေမယ့် မိနစ် ၉၀ ပြည့်ပြီး ထပ်ဆောင်းအချိန်ပို ၃ မိနစ်မှာ တီယာနေးက စကော့တလန်အသင်းအတွက် ဦးဆောင်ဂိုး သွင်းယူနိုင်ခဲ့ပြီး ၈ မိနစ်မှာ မက်လင်းက နောက်ထပ် သွင်းဂိုးသွင်းယူခဲ့တာပါ။

 စကော့တလန်အသင်းကို တွေ့ရစဉ် 

အဲ့ဒါကြောင့် စကော့တလန်အသင်းဟာ ဒိန်းမတ်အသင်းကို ၄ ဂိုး-၂ ဂိုးနဲ့ အနိုင်ရပြီး ၂၀၂၆ ကမ္ဘာ့ဖလားပြိုင်ပွဲ ယှဉ်ပြိုင်ခွင့် ရဖို့ ခြေစစ်ပွဲ အောင်မြင်သွားခဲ့ပါတယ်။

စကော့တလန်အသင်းဟာ ကမ္ဘာ့ဖလားပြိုင်ပွဲကို ၄ ကြိမ်မြောက်အဖြစ် ဝင်ရောက်ယှဉ်ပြိုင်မှာပါ။ 

စကော့တလန် အသင်းခေါင်းဆောင် ရော်ဘတ်ဆန်က “ဘယ်တော့မှ သေဆုံးသွားပြီလို့ မပြောပါနဲ့။ ကျနော်တို့ ဟာ အဆုံးထိ ဆက်သွားနေပြီး ဒီပွဲက ရူးသွပ်ဖို့ အကောင်းဆုံးပွဲတွေထဲက တစ်ပွဲပါ။ ကျနော်တို့ ကမ္ဘာ့ဖလားပြိုင်ပွဲ ကို သွားရတော့မှာ ဖြစ်တဲ့အတွက် မယုံကြည်နိုင်အောင် ဖြစ်နေမိတယ်”လို့ ပြောခဲ့ပါတယ်။ 

စကော့တလန်အသင်း နည်းပြ စတိဗ်ကလာ့ခ်က ကမ္ဘာ့ဖလားပြိုင်ပွဲ ယှဉ်ပြိုင်ခွင့်ရနိုင်အောင် ကစားသမားတွေ လုပ်နိုင်မယ်ဆိုတာ အလွန်ယုံကြည်ခဲ့တယ်လို့ ပြောခဲ့တာပါ။ 

၂၀၂၆ ကမ္ဘာ့ဖလားပြိုင်ပွဲအတွက် ဥရောပဇုန် ခြေစစ်ပွဲ အုပ်စုပွဲစဉ်တွေ ပြီးဆုံးသွားပြီဖြစ်တာကြောင့် ခြေစစ်ပွဲ တိုက်ရိုက် အောင်မြင်တဲ့ အသင်းတွေ အားလုံး ထွက်ပေါ်လာခဲ့ပါတယ်။ 

ဒီအသင်းတွေကတော့ ဂျာမနီ၊ ဆွစ်ဇာလန်၊ စကော့တလန်၊ ပြင်သစ်၊ စပိန်၊ ပေါ်တူဂီ၊ နယ်သာလန်၊ သြစတြီးယား၊ နော်ဝေ၊ ဘယ်လ်ဂျီယံ၊ အင်္ဂလန်နဲ့ ခရိုအေးရှားအသင်းတို့ ဖြစ်ပါတယ်။ 

Source: CNA

CNI Sport News

၂၀၂၅ ခုနှစ်၊ နိုဝင်ဘာ ၁၈

အာဆင်နယ်အသင်းဟာ လာမယ့် ဇန်နဝါရီ အပြောင်းအရွှေ့ကာလမှာ အသင်းရဲ့ ကစားသမား ၃ ဦးကို ထွက်ခွာ ခွင့် ပေးဖို့ရှိနေပြီး သူတို့အတွက် ကမ်းလှမ်းမှုတွေကို နားထောင်ဖို့ အသင့်ရှိနေပါတယ်။ 

အာဆင်နယ်အသင်းဟာ ပြီးခဲ့တဲ့ နွေရာသီမှာ ဇူဘီမန်ဒီ၊ ယိုကီရက်စ်၊ အီဇီ၊ မာဒူကီ၊ မိုစကွီယာ၊ နော်ဂတ်၊ ကယ်ပါနဲ့ ဟင်ကာပီတို့ကို ခေါ်ယူခဲ့ပြီး အပြောင်းအရွှေ့အတွက် ပေါင်သန်း ၂၅၀ ကျော် အသုံးပြုခဲ့ပါတယ်။ 

ကစားသမားသစ်တွေဟာ အာဆင်နယ်အသင်းမှာ လျင်မြန်စွာ အသားကျခဲ့ပြီး အသင်းဟာ နောက်ဆုံးကစားခဲ့တဲ့ ပြိုင်ပွဲစုံ ၁၄ ပွဲစလုံး ရှုံးပွဲမရှိခဲ့ဘဲ ပရီးမီးယားလိဂ်ပြိုင်ပွဲမှာ အဆင့် ၂ နေရာက မန်စီးတီးအသင်းကို ၄ မှတ်ဖြတ်ပြီး ထိပ်ဆုံးနေရာမှာ ရပ်တည်နေတာပါ။ 

အာဆင်နယ်အသင်းဟာ မာဒူကီ၊ အိုဒီဂတ်၊ ယိုကီရက်စ်၊ မာတင်နယ်လီနဲ့ ဟာဗက်ဇ်တို့ကို ဒဏ်ရာကြောင့် အနားပေးထားရပြီး ဒဏ်ရာပြဿနာတွေနဲ့ ရင်ဆိုင်နေရပေမယ့် ရလဒ်ကောင်းတွေ ရရှိထားပါတယ်။ 

အာဆင်နယ်အသင်းဟာ လာမယ့် ဇန်နဝါရီအပြောင်းအရွှေ့ ဖွင့်ချိန်မှာ ကစားသမားသစ်တွေ ခေါ်ယူဖို့မရှိဘဲ အသင်းမှာရှိနေတဲ့ ကစားသမား ၃ ဦးကို သင့်တော်တဲ့ ကမ်းလှမ်းမှုရရင် ထွက်ခွာခွင့်ပေးဖို့ ရှိနေတယ်လို့ ဒေးလီးမေးလ်က ဖော်ပြထားပါတယ်။ 

အာဆင်နယ်ကစားသမားတွေကို တွေ့ရစဉ်

ဒီရာသီမှာ အာဆင်နယ်အသင်းအတွက် လူစားဝင်အဖြစ် ပါဝင်ပြီး ခြေစွမ်းပြသနေတဲ့ မာတင်နယ်လီရဲ့ စာချုပ်ဟာ နောက်ရာသီကုန်ရင် ကုန်ဆုံးမှာဖြစ်လို့ ဇန်နဝါရီမှာ ဆော်ဒီပရိုလိဂ် အသင်းတစ်သင်းရဲ့ ကြီးမားတဲ့ ကမ်းလှမ်းမှု ရမယ်ဆိုရင် သူ့ကို ထွက်ခွာခွင့်ပေးဖို့ ရှိနိုင်တာပါ။ 

တင်ဘာစ် ခြေစွမ်းပြမှုကြောင့် ဒီရာသီ အာဆင်နယ်အသင်းမှာ ပွဲကစားခွင့်ရဖို့ ရုန်းကန်နေရတဲ့ ဘင်ဝှိုက် အတွက်လည်း လန်ဒန်ကလပ်ဟာ ကမ်းလှမ်းမှုတွေကို လက်ခံဖို့ အသင့်ရှိနေတာဖြစ်ပါတယ်။ 

ဒဏ်ရာကနေ သက်သာပြီး အာဆင်နယ်အသင်းရဲ့ လေ့ကျင့်ခန်း အစီအစဉ်တွေမှာ ပြန်ပါဝင်နေတဲ့ ဂျီးဆပ်ဟာ ယိုကီရက်စ်၊ ဟာဗက်ဇ်တို့နဲ့နေရာအတွက် ယှဉ်ပြိုင်ရဖို့ ရှိနေတာပါ။ 

အဲ့ဒါကြောင့် အာဆင်နယ်အသင်းဟာ ဇန်နဝါရီမှာ ဂျီးဆပ်စ်အတွက် ကမ်းလှမ်းမှုရရင် ထွက်ခွာခွင့်ပေးဖို့ ဆုံးဖြတ် ထားပါတယ်။ 

အာဆင်နယ်အသင်းဟာ ကစားသမား ၃ ဦးကို ထွက်ခွာခွင့်ပေးဖို့ စဉ်းစားနေသလို အဓိက ကစားသမား ၃ ဦးကို တော့ ကာလရှည် စာချုပ်သက်တမ်း တိုးချင်နေတယ်လို့ သိရပါတယ်။

အာဆင်နယ်အသင်း စာချုပ်သက်တမ်း တိုးချင်နေတဲ့ ကစားသမား ၃ ဦးကတော့ ဆာကာ၊ တင်ဘာစ်နဲ့ ဒီကလန်ရိုက်စ်တို့ ဖြစ်ပါတယ်။ 

Source: Metro

CNI Sport News

၂၀၂၅ ခုနှစ်၊ နိုဝင်ဘာ ၁၈

ပြင်သစ်အသင်းခေါင်းဆောင် ဘတ်ပီဟာ PSG အသင်းထံကနေ ယူရို ၂၆၃ သန်း ရယူချင်နေပြီး PSG အသင်း ကလည်း သူ့ဆီကနေ ယူရိုသန်း ၂၄၀ တောင်းဆိုထားတာကြောင့် သူတို့ရဲ့ရေရှည် အငြင်းပွားမှုဟာ တနင်္လာနေ့မှာ ပါရီအလုပ်သမားခုံရုံးအထိ ရောက်ရှိခဲ့ပါတယ်။ 

ဘတ်ပီဟာ PSG အသင်းဆီကနေ မရရှိသေးတဲ့ လုပ်ခလစာ ယူရို ၅၅ သန်း အပါအဝင် စာချုပ် အငြင်းပွားမှု၊ အသင်းရဲ့ ဆက်ဆံပုံတွေအတွက် လျော်ကြေးအဖြစ် ရယူချင်နေတာပါ။

PSG အသင်းကလည်း ၂၀၂၃ ခုနှစ်က ဘတ်ပီရဲ့ အယ်လ်ဟီလယ်အသင်းထံ ယူရိုသန်း ၃၀၀ အပြောင်းအရွှေ့ ပျက်ပြယ်ခဲ့တဲ့အတွက် သူတို့ရဲ့လျော်ကြေးငွေကို တောင်းဆိုနေတာ ဖြစ်ပါတယ်။ 

ဘတ်ပီဟာ PSG အသင်းရဲ့ စာချုပ်သက်တမ်းတိုးဖို့ ကမ်းလှမ်းမှုကို ငြင်းပယ်ခဲ့ပြီးနောက် မနှစ်က နွေရာသီမှာ ရီးရယ်လ်အသင်းထံ အလွတ်နဲ့ ပြောင်းရွှေ့ခဲ့ပါတယ်။ 

ဘတ်ပီနဲ့ PSG အသင်းတို့ရဲ့ ရေရှည်အငြင်းပွားမှုဟာ ၂၀၂၃ ခုနှစ်၊ ဇူလိုင်မှာ ပြင်သစ်တိုက်စစ်မှူးက ဆော်ဒီ ပရိုလိဂ်ထံ အပြောင်းအရွှေ့ ပယ်ချခဲ့ပြီးနောက် စတင်ခဲ့ပါတယ်။ 

ဘတ်ပီကို တွေ့ရစဉ်

ဘတ်ပီဟာ ဒီအဖြစ်အပျက်ကြောင့် ရာသီကြို ခြေစမ်းခရီးစဉ် လူစာရင်းမှာလည်း ချန်လှပ်ခံခဲ့ရပြီး PSG အသင်းရဲ့ ရာသီအစပွဲကိုလည်း လွဲချော်ခဲ့တာပါ။ 

ဘတ်ပီဟာ နောက်ပိုင်းမှာ PSG အသင်းအတွက် ပြန်ပါဝင်ကစားခဲ့ပေမယ့် ရာသီကုန်ပြီးနောက် ထွက်ခွာချိန်မှာ ကျန်ရှိနေတဲ့ လစာငွေတွေနဲ့ အပိုဆုကြေးတွေရဖို့ စောင့်ဆိုင်းနေတာ ဖြစ်ပါတယ်။

တနင်္လာနေ့က ကြားနာမှုအပြီးမှာ ဘတ်ပီဟာ စာချုပ် ကတိကဝတ်တွေကို ချိုးဖောက်ခဲ့တဲ့အတွက် ကလပ် ထိခိုက်နစ်နာခဲ့ရတဲ့ အရာတွေကို ပြန်ရဖို့ကြိုးပမ်းနေတယ်လို့ PSG အသင်းက ပြောခဲ့ပါတယ်။ 

ဒါ့ပြင် PSG က ဘတ်ပီဟာ စာချုပ်သက်တမ်းမတိုးမယ့် သူ့ရဲ့ဆုံးဖြတ်ချက်ကို ဖုံးကွယ်ပြီး သစ္စာမဲ့စွာ လုပ်ဆောင် ခဲ့တယ်လို့ ပြောခဲ့တာပါ။

ဘတ်ပီဟာ PSG အသင်းမှာ ၂၀၁၇ ကနေ ၂၀၂၄ ခုနှစ်အထိ ကစားခဲ့ပြီး ၃၀၈ ပွဲမှာ ၂၅၆ ဂိုးသွင်းယူကာ ဆုဖလား ပေါင်း ၁၅ ခု ရယူနိုင်ခဲ့တာ ဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ နိုဝင်ဘာ ၁၈

ဂျာမနီအသင်းဟာ ၂၀၂၆ ကမ္ဘာ့ဖလားခြေစစ်ပွဲ အုပ်စုနောက်ဆုံးပွဲစဉ်မှာ ဆလိုဗက်ကီးယားအသင်းကို ၆ ဂိုး-ဂိုး မရှိနဲ့ ဂိုးပြတ်အနိုင်ရပြီး ခြေစစ်ပွဲ တိုက်ရိုက် အောင်မြင်သွားခဲ့ပါတယ်။

ဂျာမနီအသင်းဟာ ဒီပွဲမှာ အနိမ့်ဆုံး သရေတစ်မှတ် ရယူနိုင်တာနဲ့ ခြေစစ်ပွဲ အောင်မြင်မှာ ဖြစ်ပေမယ့် ဂိုးပြတ် အနိုင်ရလဒ် ရယူပြီး ဆလိုဗက်ကီးယားအသင်းကို သူတို့အိမ်ကွင်းမှာ အရေးနိမ့်ခဲ့တဲ့ ရှုံးကြွေးကိုလည်း ပြန်ဆပ် နိုင်ခဲ့ပါတယ်။ 

နယူးကာဆယ်အသင်း တိုက်စစ်မှူး ဝေါ်လ်တီမာဒီဟာ ဂျာမနီအသင်းအတွက် ၂ ပွဲဆက် ဂိုးသွင်းနိုင်ခဲ့ပြီး လီဗာပူးလ်အသင်းမှာ ခြေစွမ်းပြသနိုင်ဖို့ ရုန်းကန်နေရတဲ့ ဖလော်ရီယန်ဗစ်ဇ်ဟာ ဆာနေးသွင်းယူတဲ့ ၂ ဂိုးကို ဂိုးဖန်တီးမှု ပြုလုပ်နိုင်ခဲ့ပါတယ်။

ဂျာမနီအသင်းနည်းပြ နာဂယ်လ်စမန်းက “ကစားသမားတိုင်းက အရာအားလုံး ပေးခဲ့ကြပါတယ်။ ကျနော်တို့ဟာ အလွန်ကောင်းတဲ့ ပွဲတစ်ပွဲကို ကစားခဲ့ပြီး အလွန်ကြိုးစားခဲ့ကြပါတယ်။ဖိအားတွေ ရှိခဲ့ပေမယ့် သူတို့ကိုယ် သူတို့ တွန်းအားပေးနိုင်ခဲ့ပြီး ကောင်းမွန်တဲ့ အသင်းလိုက် စိတ်ဓါတ်ကို ပြသနိုင်ခဲ့ပါတယ်။ အသင်းအတွက် ကျနော် ဂုဏ် ယူတယ်”လို့ ပြောခဲ့ပါတယ်။

ဂျာမနီအသင်းကို တွေ့ရစဉ်

ဂျာမနီအသင်း တိုက်စစ်မှူး ဝေါ်လ်တီမာဒီက သူတို့ဟာ ပွဲအစကနေ နောက်ဆုံးစက္ကန့်အထိ နောက်တန်းမှာ ဘယ်လိုအရာကိုမှ ခွင့်မပြုခဲ့ဘဲ ဂိုးရနိုင်မယ့် ဖန်တီးမှုတွေသာ ပြုလုပ်ခဲ့ပြီး အခုအချိန်မှာ ကမ္ဘာ့ဖလား ယှဉ်ပြိုင်ခွင့် ရဖို့ ခြေစစ်ပွဲအောင်မြင်ခဲ့ပြီလို့ ပြောခဲ့တာပါ။

ဂျာမနီအသင်းဟာ ကမ္ဘာ့ဖလားပြိုင်ပွဲကို ၂၁ ကြိမ်မြောက် ယှဉ်ပြိုင်မှာဖြစ်ပြီး ဘရာဇီးလ်အသင်း ၂၃ ကြိမ်ပြီးရင် ဒုတိယမြောက် အများဆုံးအသင်း ဖြစ်ပါတယ်။

ဂျာမနီအသင်းဟာ ၂၀၁၄ ကမ္ဘာ့ဖလားပြိုင်ပွဲမှာ ဗိုလ်စွဲပြီးနောက်ပိုင်း အဓိကပြိုင်ပွဲတွေမှာ အောင်မြင်မှုနဲ့ ဝေးကွာ နေတာပါ။ 

ဂျာမနီအသင်းကို အရေးနိမ့်ခဲ့တဲ့ ဆလိုဗက်ကီးယားအသင်းဟာ အုပ်စုတွင်း ဒုတိယနေရာမှာ ရပ်တည်ခဲ့တာ ကြောင့် ပလေးအော့ဖ်အဆင့် ထပ်ပြီးယှဉ်ပြိုင်ရဦးမှာ ဖြစ်ပါတယ်။

Source: CNA

CNI Sport News

၂၀၂၅ ခုနှစ်၊ နိုဝင်ဘာ ၁၇

အာဖရိကဘောလုံးအဖွဲ့ချုပ်(CAF)ဟာ ၂၀၂၅ ခုနှစ်အတွက် ချီးမြှင့်မယ့် တစ်နှစ်တာ အကောင်းဆုံး ကစားသမားဆု အတွက် နောက်ဆုံး ၃ ဦးစာရင်း ထုတ်ပြန်ခဲ့တာမှာ အမျိုးသားဆုအတွက် ဟာကီမီ၊ ဆာလက်နဲ့ အိုဆီမန်တို့ ယှဉ်ပြိုင်ကြရမယ်လို့ CNA သတင်းမှာ ဖော်ပြထားပါတယ်။ 

မော်ရိုကိုနောက်ခံလူ ဟာကီမီဟာ ပြီးခဲ့တဲ့ရာသီမှာ PSG အသင်းကို အသင်းသမိုင်းတစ်လျှောက် ချန်ပီယံလိဂ် ဖလား ပထမဆုံးအကြိမ် ရရှိနိုင်အောင် ကူညီပေးနိုင်ခဲ့သလို ပြင်သစ်လိဂ်နဲ့ ဖလား၊ ဥရောပစူပါဖလားတို့ကိုလည်း ရရှိအောင် စွမ်းဆောင်ပေးနိုင်ခဲ့ပါတယ်။

အီဂျစ်တောင်ပံကစားသမား ဆာလက်ကတော့ မနှစ်ကရာသီ လီဗာပူးလ်အသင်း ပရီးမီးယားလိဂ်ဖလား ရယူနိုင်ခဲ့ တာမှာ အဓိက အခန်းကဏ္ဍကနေ ပါဝင်ခဲ့ပြီး ၂၉ ဂိုးသွင်းယူကာ ၁၈ ဂိုး ဖန်တီးနိုင်ခဲ့ပါတယ်။ 

အာဖရိက အကောင်းဆုံး ကစားသမား ၃ ဦးကို တွေ့ရစဉ်

၂၀၁၇ နဲ့ ၂၀၁၈ မှာ အာဖရိက တစ်နှစ်တာ အကောင်းဆုံး ကစားသမားဆုကို ရရှိခဲ့တဲ့ ဆာလက်ဟာ ဒီဆုကို တတိယအကြိမ်မြောက် ရယူနိုင်ဖို့ မျှော်လင့်နေတာပါ။ 

နိုင်ဂျီးရီးယား တိုက်စစ်မှူး အိုဆီမန်ဟာ ဂါလာတာစာရေးအသင်းကို ပြီးခဲ့တဲ့ရာသီမှာ လိဂ်နဲ့ ဖလား ၂ ခုစလုံး ရယူပေးနိုင်ခဲ့ပြီး ၂၆ ဂိုးနဲ့ တူရကီစူပါလိဂ်ရဲ့ ထိပ်တန်း ဂိုးသွင်းရှင်ဆုကိုလည်း ရရှိခဲ့ပါတယ်။ 

သူတို့ ၃ ဦးစလုံးဟာ ၂၀၂၃ ခုနှစ်က ဆုပေးပွဲမှာလည်း နောက်ဆုံး ၃ ဦးစာရင်းထဲ ပါဝင်ခဲ့ပြီး အိုဆီမန်က ဆုရရှိခဲ့ ကာ ဟာကီမီက ဒုတိယနဲ့ ဆာလက်က တတိယရရှိခဲ့ပါတယ်။ 

ပြီးခဲ့တဲ့ နှစ်က အာဖရိက တစ်နှစ်တာ အကောင်းဆုံး ကစားသမားဆုကို ရခဲ့တဲ့ လွတ်ခ်မန်းကတော့ ဒီနှစ်အတွက် နောက်ဆုံး ၃ ဦးစာရင်းထဲမှာ ပါဝင်လာခဲ့ခြင်း မရှိတာပါ။

နိုဝင်ဘာ ၁၉ ရက် ရာဘတ်မှာ ကျင်းပမယ့် ၂၀၂၅ ခုနှစ်အတွက် CAF Awards မှာ အခြားဆု အများအပြားကိုလည်း ပေးသွားမှာ ဖြစ်ပါတယ်။ 

Source: CNA

CNI Sport News

၂၀၂၅ ခုနှစ်၊ နိုဝင်ဘာ ၁၇

ဘရာဇီးလ်အသင်းနည်းပြ အန်ဆယ်လော့တီက နိုင်ငံနဲ့ ကလပ်အသင်းအတွက် ခြေစွမ်းပြသနေတဲ့ အက်စ်တီဗာအိုလို ကစားသမားမျိုး ပိုင်ဆိုင်တာက သူတို့အတွက်ရော ချယ်လ်ဆီးအသင်း အတွက်ပါ ကံကောင်းတယ်လို့ ပြောခဲ့ပါတယ်။ 

အန်ဆယ်လော့တီက “သူ့အသက်အရွယ်နဲ့ ဒီအဆင့်မှာ လုပ်ပြနေတာက အံ့အားသင့်စရာပါပဲ။ အက်စ်တီဗာအိုနဲ့ ဘရာဇီးလ်ရဲ့ အနာဂတ်ဟာ အာမခံချက် ရှိသွားပြီလို့ ကျနော် ပြောနိုင်ပါတယ်။ သူဟာ သူ့ရဲ့ အရည်အသွေးတွေ ကို ချယ်လ်ဆီးအသင်းမှာလည်း ပွဲတိုင်းပြသနိုင်ပြီး ဒီလိုမျိုးလုပ်ပြဖို့ မိနစ် အများကြီး မလိုပါဘူး။ ၅ မိနစ် ကစားခွင့် ရရင်တောင် သူ့ရဲ့ အရည်အသွေးကို ပြသနိုင်ပါတယ်။ သူ့ကိုပိုင်ဆိုင်တာ ဘရာဇီးလ်အသင်းအတွက် အလွန် ကံ ကောင်းသလို ချယ်လ်ဆီးအသင်းလည်း အတူတူပါပဲ”လို့ ပြောခဲ့တာပါ။ 

အက်စ်တီဗာအိုဟာ ဘရာဇီးလ်အသင်းက ဆီနီဂေါအသင်းကို ၂ ဂိုး-ဂိုးမရှိနဲ့ အနိုင်ရခဲ့တဲ့ ခြေစမ်းပွဲမှာ အသင်း အတွက် အဖွင့်ဂိုး သွင်းယူနိုင်ခဲ့ပါတယ်။ 

အက်စ်တီဗာအိုဟာ ပြီးခဲ့တဲ့ အောက်တိုဘာက တောင်ကိုရီးယားအသင်းနဲ့ ခြေစမ်းပွဲမှာလည်း ဘရာဇီးလ်အသင်း အတွက် ၂ ဂိုး သွင်းယူနိုင်ခဲ့ပါတယ်။ 

အက်စ်တီဗာအိုကို တွေ့ရစဉ်

အသက် ၁၈ နှစ်အရွယ်ရှိ အက်စ်တီဗာအိုဟာ ဘရာဇီးလ်အသင်းအတွက် ၁၀ ပွဲ ပါဝင်ကစားထားအပြီးမှာ ၄ ဂိုး သွင်းယူကာ အကောင်းဆုံးပုံစံ ပြသနေတာပါ။ 

အက်စ်တီဗာအိုဟာ ချယ်လ်ဆီးအသင်း အတွက်လည်း ဒီရာသီ ၁၆ ပွဲ ကစားအပြီးမှာ ၄ ဂိုး သွင်းယူထားတာ ဖြစ်ပါတယ်။ 

ဘရာဇီးလ်အသင်းနည်းပြ အန်ဆယ်လော့တီက အက်စ်တီဗာအိုကို ချီးကျူးခဲ့ပြီး သူ့ကိုရထားတာ သူတို့အတွက် ရော ချယ်လ်ဆီး အသင်းအတွက်ပါ ကံကောင်းတယ်လို့ ပြောခဲ့ပါတယ်။ 

ဘရာဇီးလ်အသင်းဟာ နည်းပြ အန်ဆယ်လော့တီ လက်ထက်မှာ ၇ ပွဲ ကစားထားပြီး ၄ ပွဲနိုင်၊ ၁ ပွဲသရေ၊ ၂ ပွဲ ရှုံးနိမ့်ထားပါတယ်။ 

ဘရာဇီးလ်အသင်းဟာ လာမယ့် ခြေစမ်းပွဲအဖြစ် တူနီးရှားအသင်းနဲ့ ယှဉ်ပြိုင်မှာဖြစ်ပြီး ဒီပွဲပြီးရင် လာမယ့်နှစ်၊ မတ်လ ရောက်မှသာ ပြင်သစ်၊ ခရိုအေးရှားအသင်းတို့နဲ့ ခြေစမ်းပွဲ ယှဉ်ပြိုင်မှာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ နိုဝင်ဘာ ၁၇

အင်္ဂလန်အသင်းနည်းပြ တူချယ်လ်က အယ်လ်ဘေးနီးယားအသင်းနဲ့ ခြေစစ်ပွဲမှာ လူစားလဲချိန် စိတ်ပျက်တဲ့ ပုံစံ ပြသခဲ့တဲ့ ကွင်းလယ်လူ ဘယ်လင်ဂမ် အနေနဲ့ သူ့ရဲ့ ဆုံးဖြတ်ချက်တွေကို လက်ခံရမယ်လို့ ပြောခဲ့ပါတယ်။

တူချယ်လ်က “ဒါက ဆုံးဖြတ်ချက်ဖြစ်ပြီး ဒီဆုံးဖြတ်ချက်ကို သူလက်ခံရပါမယ်။ သူ့သူငယ်ချင်းက ကွင်းဘေးမှာ စောင့်ဆိုင်းနေတယ်၊ ဒါကြောင့် လက်ခံရမယ်၊ လေးစားရမယ်၊ ဆက်သွားရမှာပါ။ ဒီအဖြစ်အပျက်ကို ကျနော် ပြန်ပြီးသုံးသပ်ရမှာပါ။ သူမပျော်ရွှင်ဘူးဆိုတာကို ကျနော်မြင်ပါတယ်။ အခုအချိန်မှာတော့ ဒါကို ပိုပြီးကြီးမား အောင် ကျနော် မလုပ်ချင်ပါဘူး”လို့ ပြောခဲ့တာပါ။

အင်္ဂလန်အသင်းက အယ်လ်ဘေးနီးယားအသင်းကို ၂ ဂိုး-ဂိုးမရှိနဲ့ အနိုင်ရခဲ့တဲ့ ၂၀၂၆ ကမ္ဘာ့ဖလား ခြေစစ်ပွဲ အုပ်စု နောက်ဆုံးပွဲစဉ်မှာ ဘယ်လင်ဂမ်ဟာ ဇွန်လနောက်ပိုင်း ပထမဆုံးအကြိမ် အသင်းရဲ့ ပွဲထွက် လူစာရင်းထဲ ပါဝင်ခွင့် ရခဲ့ပါတယ်။ 

ဒါပေမယ့် ပွဲပြီးဆုံးဖို့ ၆ မိနစ်ကျော်သာ ကျန်ရှိတော့တဲ့ အချိန်မှာ နည်းပြတူချယ်လ်ဟာ သူ့ကို မော်ဂန်ရော်ဂျာစ်နဲ့ လူစားလဲခဲ့တာပါ။

ဘယ်လင်ဂမ်ကို တွေ့ရစဉ်

ဘယ်လင်ဂမ်ဟာ စိတ်ပျက်လက်ပျက်နဲ့ သူ့ရဲ့လက်တွေကို လေထဲမြှောက်ခဲ့ပြီး နည်းပြတူချယ်လ်ဟာ ဒီတုန့်ပြန်မှုကို နှစ်သက်ခြင်းမရှိတာ ဖြစ်ပါတယ်။ 

အဲ့ဒါကြောင့် နည်းပြတူချယ်လ်က ဆုံးဖြတ်ချက်တွေကို လက်ခံဖို့နဲ့ ဒီအဖြစ်အပျက်ကို ပြန်ပြီးသုံးသပ်သွားမယ်လို့ ပြောခဲ့တာပါ။

အင်္ဂလန်အသင်းဟာ နည်းပြတူချယ်လ် လက်ထက်ကစားခဲ့တဲ့ ခြေစစ်ပွဲ ၈ ပွဲစလုံး ရာနှုန်းပြည့် နိုင်ပွဲရခဲ့သလို ပေးဂိုးလည်း ပေးဂိုးရခြင်း မရှိပါဘူး။

တူချယ်လ်က ပွဲကစားဖို့ လပေါင်းများစွာ ကျန်ရှိသေးတဲ့အတွက် ကမ္ဘာ့ဖလားပြိုင်ပွဲမှာ အသုံးပြုမယ့် ပွဲထွက် လူစာရင်း အကြောင်း မတွေးသေးသလို ဒီပွဲကနေလည်း သူတို့အများကြီး သင်ယူခဲ့ရတယ်လို့ ပြောခဲ့ပါတယ်။ 

အင်္ဂလန်အသင်းကို အရေးနိမ့်ခဲ့တဲ့ အယ်လ်ဘေးနီးယားအသင်းဟာ ကမ္ဘာ့ဖလား ဝင်ခွင့်ရနိုင်ဖို့အတွက် ပလေးအော့ဖ် ထပ်ပြီး ယှဉ်ပြိုင်ရမှာ ဖြစ်ပါတယ်။

Source: ESPN