CNI Sport News

၂၀၂၆ ခုနှစ်၊ မေလ ၁၉

အာဆင်နယ်အသင်းဟာ ပရီးမီးယားလိဂ်ဖလားကို နှစ်ပေါင်း ၂၂ နှစ်အတွင်း ပထမဆုံးအကြိမ် ရယူနိုင်ဖို့ နီးစပ်ခဲ့ပြီး နောက် နည်းပြအာတီတာက သူဟာ ဘုန်းမောက်အသင်းရဲ့ အမာခံပရိသတ်တစ်ဦး ဖြစ်လာလိမ့်မယ်လို့ ပြောခဲ့ပါ တယ်။ 

လာမယ့် ၂၄ နာရီကြာ ဘုန်းမောက်အသင်း ပရိသတ်အဖြစ် ရှိနေမလားလို့ မေးမြန်းချိန်မှာ အာတီတာက “အကြီး မားဆုံး အမာခံ ပရိသတ်အဖြစ် ရှိနေမှာပါ။ ကျနော်တို့ အားလုံး ဘုန်းမောက်အသင်းကို အားပေးမယ့်သူတွေ ဖြစ်မယ်လို့ ကျနော်ထင်ပါတယ်။ ဒါက ဘာကိုဆိုလိုမှန်း ကျနော်တို့သိကြပါတယ်”လို့ ဖြေခဲ့တာပါ။ 

အာဆင်နယ်အသင်းဟာ ဘန်လေအသင်းနဲ့ပွဲမှာ ၁ ဂိုး-ဂိုးမရှိနဲ့ အနိုင်ရခဲ့ပြီးနောက် အဆင့် ၂ နေရာက မန်စီးတီး အသင်းထက် ၁ ပွဲပိုကစားပြီး ရမှတ် ၅ မှတ်အသာနဲ့ ပရီးမီးယားလိဂ် အမှတ်ပေးဇယားကို ဦးဆောင်နေတာ ဖြစ်ပါတယ်။ 

မန်စီးတီးအသင်းဟာ ပရီးမီးယားလိဂ် နောက်ဆုံးပွဲအထိ အာဆင်နယ်အသင်းကို ချန်ပီယံဆုအတွက် ဖိအားပေးဖို့ဆိုရင် ဘုန်းမောက်အသင်းနဲ့ပွဲမှာ အနိုင်ရရှိဖို့ လိုအပ်နေတာပါ။ 

အာဆင်နယ်အသင်း ယှဉ်ပြိုင်နေစဉ်

မန်စီးတီးအသင်းအနေနဲ့ ဘုန်းမောက်အသင်းကို အနိုင်မရဘူးဆိုရင် အာဆင်နယ်အသင်းဟာ ပရီးမီးယားလိဂ် ဖလားကို ရယူနိုင်မှာဖြစ်ပါတယ်။ 

အဲ့ဒါကြောင့် အာဆင်နယ်အသင်းနည်းပြ အာတီတာက သူဟာ ဘုန်းမောက်အသင်း ပရိသတ်အဖြစ် ရှိနေမယ်လို့ ပြောခဲ့တာပါ။ 

မန်စီးတီးအသင်းက ဘုန်းမောက်အသင်းကို အနိုင်ရခဲ့ရင်လည်း အာဆင်နယ်အသင်းဟာ နောက်ဆုံးပွဲမှာ ခရစ္စတယ်ပဲလေ့စ်အသင်းကို အနိုင်ရရင် ချန်ပီယံဆုကို ကိုင်မြှောက်နိုင်မှာ ဖြစ်ပါတယ်။ 

အာဆင်နယ်အသင်းဟာ ပရီးမီးယားလိဂ် ချန်ပီယံဆုကို ရယူဖို့ ပြင်ဆင်ထားသလို PSG အသင်းကို အနိုင်ယူပြီး ချန်ပီယံလိဂ်ဖလားကို ပထမဆုံးအကြိမ် ရယူနိုင်ဖို့လည်း ပစ်မှတ်ထားနေပါတယ်။ 

Source: ESPN

CNI Sport News

၂၀၂၆ ခုနှစ်၊ မေလ ၁၈

ဒိန်းမတ်တိုက်စစ်မှူးဟော့ဂျ်လန်းဟာ ယူနိုက်တက်အသင်းကနေ အငှားကစားနေတဲ့ နာပိုလီအသင်းထံ အပြီးသတ်ပြောင်းရွှေ့မယ်လို့ သူ့ရဲ့ဆိုရှယ်မီဒီယာကနေ အတည်ပြုသွားခဲ့ပါတယ်။

နာပိုလီအသင်းဟာ ပီဆာအသင်းကို ၃ ဂိုး-ဂိုးမရှိနဲ့ အနိုင်ရခဲ့ပြီးနောက် ချန်ပီယံလိဂ်ပြိုင်ပွဲယှဉ်ပြိုင်ခွင့်ရခဲ့ပါတယ်။ 

ယူနိုက်တက်နဲ့နာပိုလီအသင်း ချုပ်ဆိုထားတဲ့ အငှားစာချုပ်ထဲမှာ နာပိုလီအသင်းဟာ လာမယ့်ရာသီ ချန်ပီယံလိဂ် ဝင်ခွင့်ရရင် ဟော့ဂျ်လန်းကို ပေါင် ၃၈ သန်းနဲ့ အပြီးသတ်ခေါ်ယူရမယ့် အချက်ပါဝင်နေတာပါ။ 

အဲဒါကြောင့် ဟော့ဂျ်လန်းဟာ နာပိုလီအသင်းထံ အပြီးသတ်ပြောင်းရွှေ့တော့မှာ ဖြစ်ပါတယ်။ 

ဟော့ဂျ်လန်းက သူဟာ နာပိုလီအသင်းနဲ့ ချန်ပီယံလိဂ်ဝင်ခွင့်ရယူနိုင်ခဲ့တဲ့အတွက် စာချုပ်အရ နာပိုလီအသင်း ကစားသမား ဖြစ်လာခဲ့ပြီး ယူနိုက်တက်အသင်းကို နှုတ်ဆက်တယ်လို့ ပြောခဲ့ပါတယ်။ 

ဒါ့အပြင်ဟော့ဂျ်လန်းက သူ့ရဲ့ငယ်ဘဝအိပ်မက်ဖြစ်တဲ့ အနီရောင်ဂျာစီနဲ့ အိုးထရက်ဖိုဒ့်မှာ ကစားချင်တဲ့အရာကို အကောင်အထည်ဖော်နိုင်ခဲ့သလို ဒီလိုမျိုးဖြစ်အောင်လုပ်ပေးခဲ့တဲ့ ယူနိုက်တက်အသင်းနဲ့ သက်ဆိုင်တဲ့သူတွေ အားလုံးကို ကျေးဇူးတင်တယ်လို့ ပြောခဲ့တာပါ။ 

ဟော့ဂျ်လန်းဟာ ယူနိုက်တက်အသင်းမှာကစားခဲ့ချိန်က ရုန်းကန်ခဲ့ရပေမယ့် နာပိုလီအသင်းမှာ ခြေစွမ်းပြသနိုင်ခဲ့ပြီး ပါဝင်ကစားထားတဲ့ ၄၃ ပွဲမှာ ၁၅ ဂိုးသွင်းယူကာ ဂိုးဖန်တီးမှု ၈ ကြိမ်ပြုလုပ်နိုင်ခဲ့ပါတယ်။ 

နာပိုလီအသင်းဟာ စီးရီးအေနောက်ဆုံးပွဲမှာ အူဒီးနီးစ်အသင်းကို အနိုင်ရရင် အမှတ်ပေးဇယားအဆင့် ၂ နေရာနဲ့ ရာသီအဆုံးသတ်နိုင်မှာ ဖြစ်ပါတယ်။ 

Source: Goal

CNI International News

ဆိုးလ်၊ မေလ ၁၈

မြောက်ကိုရီးယား အမျိုးသမီး ဘောလုံးအသင်း တစ်သင်းသည် အာရှကလပ် ချန်ပီယံရှစ် ပြိုင်ပွဲအတွက် မေလ ၁၇ ရက်က တောင်ကိုရီးယားနိုင်ငံသို့ ရောက်ရှိလာခဲ့ကြောင်း CNN မှ ဖော်ပြခဲ့သည်။

ထိုဖြစ်စဉ်သည် တောင်ကိုရီးယားနိုင်ငံ အနေဖြင့် ၇ နှစ်ကျော်အတွင်း ပထမဆုံးအကြိမ်အဖြစ် မြောက်ကိုရီးယား အားကစားသမားများကို လက်ခံတွေ့ဆုံခြင်းဖြစ်သည်။

ပြုံးယမ်း (Pyongyang) မြို့တော်အခြေစိုက် Naegohyang အမျိုးသမီး ဘောလုံးကလပ်မှ ကစားသမားများနှင့် ဝန်ထမ်း စုစုပေါင်း ၃၉ ဦးသည် တရုတ်နိုင်ငံ၊ ဘေဂျင်းမြို့တော်မှတစ်ဆင့် လေကြောင်းခရီးစဉ်ဖြင့် အင်ချွန်း အပြည်ပြည်ဆိုင်ရာလေဆိပ် (Incheon International Airport) သို့ ဆိုက်ရောက် လာပြီးနောက် ၎င်းတို့ကို ကြိုဆိုသည့် တက်ကြွလှုပ်ရှားသူများ၊ မီဒီယာများနှင့် လုံခြုံရေးဝန်ထမ်းများကြားမှ အမြန်ဖြတ်သန်းသွားခဲ့သည်။

တောင်ကိုရီးယားမှ တက်ကြွလှုပ်ရှားသူများ မြောက်ကိုရီးယားအမျိုးသမီးအသင်းကို ကြိုဆိုနေကြစဉ်

ဝတ်စုံတူ ကုတ်အင်္ကျီနှင့် စကတ်များကို သပ်ရပ်စွာ ဝတ်ဆင်ထားသည့် မြောက်ကိုရီးယား ကစားသမားများသည် ၎င်းတို့အား ကြိုဆိုကြောင်း အော်ဟစ်အားပေးနေကြသည့် ကိုရီးယားနှစ်နိုင်ငံ ပြန်လည်ပေါင်းစည်းမှုကို ထောက်ခံ သည့် အဖွဲ့များအား တစ်ချက်မျှ လှည့်မကြည့်ဘဲ ၎င်းတို့၏ ဘတ်စ်ကားဆီသို့ တန်းတန်းမတ်မတ် လျှောက်လှမ်း သွားခဲ့ကြသည်။

ထိုကစားသမားများနှင့် ဝန်ထမ်းများသည် ဘတ်စ်ကား တံခါးပိတ်ပြီး ရဲတပ်ဖွဲ့၏ လိုက်ပါစောင့်ရှောက်မှုဖြင့် ဆူဝမ် (Suwon) မြို့သို့ ထွက်ခွာသွားချိန်အထိ တစ်ခွန်းမျှမပြောဘဲ တည်ငြိမ်စွာပင် လိုက်ပါသွားခဲ့ကြသည်။

မေလ ၂၀ ရက်တွင် ယှဉ်ပြိုင်မည့် အာရှအမျိုးသမီးကလပ် ချန်ပီယံရှစ် (AFC Women’s Champions League) ဆီမီးဖိုင်နယ် ပွဲစဉ်တွင် မြောက်ကိုရီးယား အမျိုးသမီး ဘောလုံးအသင်းသည် တောင်ကိုရီးယား၏ ဆူဝမ် အမျိုးသမီး ဘောလုံးကလပ်နှင့် ယှဉ်ပြိုင်ရမည်ဖြစ်သည်။

ဆူဝမ်မြို့တွင် ပြုလုပ်မည့် ထိုပွဲစဉ်အတွက် လက်မှတ် အစောင်ရေ ၇၀၀၀ ခန့်မှာ အလျင်အမြန် ရောင်းကုန်သွား ခဲ့သည်။

မြောက်ကိုရီးယား အမျိုးသမီးအသင်း တောင်ကိုရီးယားကို ရောက်လာစဉ်

ထိုပွဲစဉ်တွင် မြောက်ကိုရီးယားအသင်းက အနိုင်ရခဲ့မည်ဆိုပါက မေလ ၂၃ ရက်တွင် ယှဉ်ပြိုင်မည့် ဗိုလ်လုပွဲကို ကစားရန် မြောက်ကိုရီးယား ကစားသမား ၂၇ ဦး အပါအဝင် မြောက်ကိုရီးယား ဘောလုံးကလပ်အဖွဲ့ဝင် ၃၉ ဦးသည် တောင်ကိုရီးယားနိုင်ငံ၌ တစ်ပတ်ကြာ နေထိုင်ခွင့် ရရှိထားသည်။

မြောက်ကိုရီးယား အမျိုးသမီးဘောလုံးအသင်း၏ လာရောက် လည်ပတ်မှုသည် ကိုရီးယားနှစ်နိုင်ငံကြား ဆက်ဆံရေး အထူးကောင်းမွန်နေသည့် အချိန်မျိုးတွင် ပေါ်ပေါက်လာခြင်း မဟုတ်ပေ။

ပြီးခဲ့သည့်လက မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) သည် ဖွဲ့စည်းပုံအခြေခံဥပဒေကို ပြင်ဆင်ပြီး၊ ကိုရီးယားနှစ်နိုင်ငံ ပြန်လည်ပေါင်းစည်းရေးဆိုင်ရာ ပြဋ္ဌာန်းချက်ကိုလည်း ပယ်ဖျက်ခဲ့သည်။

Source: CNN

CNI Sport News

၂၀၂၆ ခုနှစ်၊ မေလ ၁၈

အီရန်အသင်းဟာ ၂၀၂၆ ကမ္ဘာ့ဖလားပြိုင်ပွဲကို ယှဉ်ပြိုင်ဖို့မသွားရောက်မီ ပြင်ဆင်မှုတွေအဖြစ် တူရကီနိုင်ငံမှာ လေ့ကျင့်ရေးစခန်းသွင်းမှုတွေ၊ ခြေစမ်းပွဲတွေနဲ့ ဗီဇာပြီးမြောက်အောင် လုပ်ဆောင်နေပါတယ်။ 

အီရန်အသင်းဟာ ကစားသမား ၃၀ ဦး ပါဝင်တဲ့ လူစာရင်းနဲ့ မတ်လတုန်းက လေ့ကျင့်ပြီး ခြေစမ်းပွဲတွေကစားခဲ့တဲ့ အန်တယ်လ်ယာကို ပြန်လာခဲ့တာပါ။ 

အီရန်အသင်းဟာ ဒီကစားသမားတွေက ၄ ဦးကို လျှော့ချပြီး ကမ္ဘာ့ဖလား ပြိုင်ပွဲအတွက် အပြီးသတ်ကစားသမား ၂၆ ဦးစာရင်းကို ထုတ်ပြန်ရမှာဖြစ်ပါတယ်။

အီရန်အသင်းနည်းပြ ဂါလီနိုအီက ကမ္ဘာ့ဖလားပြိုင်ပွဲမတိုင်မီ နောက်ဆုံးလေ့ကျင့်ရေးစခန်းအတွက် ကစားသမား ၃၀ ဦးရွေးချယ်ရတာဟာ သူ့ရဲ့နည်းပြဘဝတစ်လျှောက်မှာ အခက်အခဲဆုံးနည်းစနစ်ပိုင်းဆိုင်ရာ ဆုံးဖြတ်ချက် ဖြစ်တယ်လို့ ပြောခဲ့ပါတယ်။ 

အီရန်အသင်းဟာ အန်တယ်လ်ယာမှာ ခြေစမ်းပွဲ ၂ ပွဲကစားဖို့ မျှော်လင့်ထားပြီး မေလ ၂၉ ရက်မှာ ကစားမယ့် ဂမ်ဘီယာအသင်းနဲ့ပွဲက အတည်ပြုပြီးဖြစ်ပါတယ်။ 

အီရန်အသင်းကစားသမားတွေဟာ ဗီဇာရဖို့အတွက် လိုအပ်တဲ့လုပ်ငန်းစဉ်တွေကို ပြီးမြောက်မှာ တူရကီမှာ လုပ်ဆောင်သွားဖို့ရှိနေတာပါ။ 

အီရန်အသင်းဟာ ကမ္ဘာ့ဖလားပြိုင်ပွဲအတွက် အမေရိကန်နိုင်ငံထံကို ရောက်ရှိချိန် မှာ အရီဇိုးနားရှိ တူဆွန်မှာ အခြေစိုက်စခန်းပြုလုပ်သွားမှာဖြစ်ပါတယ်။ 

ကမ္ဘာ့ဖလားပြိုင်ပွဲမှာ ဘယ်လ်ဂျီယံ၊ အီဂျစ်၊ နယူးဇီလန်အသင်းတို့နဲ့ တစ်အုပ်စုတည်းကျရောက်နေတဲ့ အီရန် အသင်းဟာ အဖွင့်ပွဲစဉ်အဖြစ် ဇွန်လ ၁၅ ရက် လော့စ်အိန်ဂျလိစ်မှာ နယူးဇီလန်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source:Besoccer

CNI Sport News

၂၀၂၆ ခုနှစ်၊ မေလ ၁၈

ဝက်စ်ဟမ်းအသင်းဟာ နယူးကာဆယ်အသင်းနဲ့ပွဲမှာ ၃ ဂိုး-၁ ဂိုးနဲ့ အရေးနိမ့်ပြီးနောက် ပရီးမီးယားလိဂ် ပြိုင်ပွဲ ကနေ တန်းဆင်းဖို့ နီးစပ်သွားခဲ့ပါတယ်။ 

ဝက်စ်ဟမ်းအသင်းဟာ ဒီရှုံးပွဲကြောင့် အဆင့် ၁၇ နေရာက စပါးအသင်းထက် ၁ ပွဲ ပိုကစားပြီး ရမှတ် ၂ မှတ်လျော့နဲ့ တန်းဆင်းဇုန်အဆင့် ၁၈ နေရာမှာ ရပ်တည်နေတာပါ။ 

စပါးအသင်းဟာ လာမယ့် ချယ်လ်ဆီးအသင်းနဲ့ပွဲမှာ ရလဒ်ကောင်း ရယူနိုင်ရင် ဝက်စ်ဟမ်းအသင်းဟာ ပရီးမီးယားလိဂ်ကနေ တန်းဆင်းမှာ ဖြစ်ပါတယ်။ 

တကယ်လို့ စပါးအသင်းဟာ ချယ်လ်ဆီးအသင်းကို အရေးနိမ့်ခဲ့ရင် ဝက်စ်ဟမ်းအသင်းဟာ နောက်ဆုံးပွဲမှာ လိဒ်စ် အသင်းကို အနိုင်ရဖို့ လိုအပ်သလို စပါးအသင်းက အဲဗာတန်အသင်းကို အရေးနိမ့်ဖို့ လိုအပ်နေပါတယ်။ 

အဲ့ဒါကြောင့် ဝက်စ်ဟမ်းအသင်းဟာ ပရီးမီးယားလိဂ်မှာ ဆက်ရှိနေနိုင်ဖို့အတွက် စပါးအသင်း ရှုံးပွဲကြုံတွေ့ဖို့ မျှော်လင့်ရမှာပါ။ 

ဝက်စ်ဟမ်းအသင်းကိုတွေ့ရစဉ်

ဝက်စ်ဟမ်းအသင်းနည်းပြ နူနိုဆန်တိုက ဒီပွဲမှာ အခွင့်အရေးတစ်ခုကို လက်လွှတ်ခဲ့ရတဲ့အတွက် ပရီးမီးယားလိဂ် မှာ ဆက်ပြီးရှိနေဖို့ အလွန်ခက်ခဲသွားပြီလို့ ဝန်ခံခဲ့ပါတယ်။ 

ဒါ့အပြင် နူနိုဆန်တိုက အသင်းဟာ အမှားအယွင်းတွေ များလွန်းခဲ့တာကြောင့် စိတ်ပျက်စရာကောင်းခဲ့ပြီး လာမယ့် လိဒ်စ်အသင်းနဲ့အိမ်ကွင်းပွဲမှာ ပိုကောင်းတဲ့ စွမ်းဆောင်ရည်ပြသနိုင်ဖို့ ကြိုးစားသွားမယ်လို့ ပြောခဲ့ပါတယ်။ 

ဝက်စ်ဟမ်းအသင်း ပရိသတ်တွေဟာ ပွဲအပြီးမှာ အသင်းရဲ့  ကစားသမားတွေဟာ ဒီအင်္ကျီကိုဝတ်ဆင်ဖို့ မထိုက်တန်ဘူးဆိုပြီး သီကြွေးမှုတွေ ပြုလုပ်ခဲ့ကြတာပါ။ 

ဝက်စ်ဟမ်းအသင်းနည်းပြ နူနိုဆန်တိုက ပရိသတ်တွေပြောတာ မှန်ကန်ပြီး အသင်းရဲ့  ရလဒ်ဆိုးတွေဟာ အသင်းနဲ့ သက်ဆိုင်တဲ့သူတွေအားလုံးကို နာကျင်စေတယ်လို့ ပြောခဲ့ပါတယ်။ 

Source: Dailymail

CNI Sport News

၂၀၂၅ ခုနှစ်၊ မေလ ၁၈

ပြင်သစ်ကစားသမားဟောင်း ဂရစ်ဇ်မန်းဟာ အက်သလက်တီကိုအသင်းအတွက် သူ့ရဲ့နောက်ဆုံး အိမ်ကွင်းပွဲကို ပါဝင်ကစားခဲ့ပြီးနောက် အသင်းရဲ့ ချစ်ခင်မှုတွေအတွက် ကျေးဇူးတင်ကြောင်းနဲ့ ဘာစီလိုနာအသင်းထံ ပြောင်းရွှေ့ ခဲ့မှုအတွက် ပရိသတ်တွေကို တောင်းပန်ခဲ့ပါတယ်။ 

ဂရစ်ဇ်မန်းက “အားလုံးကို ကျေးဇူးတင်ပြီး ဒါက အံ့သြစရာပါပဲ။ ဘာစီလိုနာအသင်းထံ ပြောင်းရွှေ့မိခဲ့တဲ့အတွက် ကျနော် ထပ်တောင်းပန်ချင်ပြီး အဲ့ဒီအချိန်တုန်းက ဒီမှာ ကျနော့်အပေါ်ထားတဲ့ ချစ်ခြင်းတွေကို သတိမပြုမိခဲ့ပါဘူး။ ကျနော်ဟာ ငယ်ရွယ်သေးတာကြောင့်လည်း အမှားလုပ်မိခဲ့ပါတယ်။ အဲ့ဒီနောက်မှာ ကျနော် သေချာပြန်စဉ်းစားပြီး ဒီမှာ ပျော်ရွှင်စွာ ဖြတ်သန်းနိုင်ဖို့ အရာအားလုံးကို လုပ်ခဲ့ပါတယ်”လို့ ပြောခဲ့တာပါ။ 

ဒီနွေရာသီမှာ မေဂျာလိဂ်ကလပ် အော်လန်ဒိုစီးတီးအသင်းကို ပြောင်းရွှေ့တော့မယ့် ဂရစ်ဇ်မန်းကို ဂျီရိုနာအသင်းနဲ့ ပွဲအပြီးမှာ အက်သလက်တီကိုအသင်းက နှုတ်ဆက်မှု ပြုလုပ်ခဲ့ပါတယ်။ 

ဂရစ်ဇ်မန်းဟာ အက်သလက်တီကိုအသင်းအတွက် ဂိုးအများဆုံး သွင်းယူထားသူဖြစ်သလို စတုတ္ထမြောက်ပွဲ အများဆုံး ကစားထားတဲ့သူလည်း ဖြစ်ပါတယ်။ 

ဂရစ်ဇ်မန်းဟာ အက်သလက်တီကိုအသင်းနဲ့ ယူရိုပါလိဂ်၊ ဥရောပစူပါဖလားနဲ့ စပိန်စူပါဖလားတို့ကို ရယူနိုင်ခဲ့ ပေမယ့် လာလီဂါနဲ့ ချန်ပီယံလိဂ်ဖလားကို ရယူနိုင်ခဲ့ခြင်း မရှိပါဘူး။ 

ဂရစ်ဇ်မန်းကို တွေ့ရစဉ်

၂၀၁၄ ခုနှစ်မှာ အက်သလက်တီကိုအသင်းထံ ရောက်လာခဲ့တဲ့ ဂရစ်ဇ်မန်းဟာ ၂၀၁၉ ခုနှစ်မှာ ဘာစီလိုနာအသင်း ထံ ပြောင်းရွှေ့ခဲ့ပေမယ့် ၂ နှစ်အကြာမှာ အက်သလက်တီကိုအသင်းထံ ပြန်ရောက်လာခဲ့တာပါ။ 

ဂရစ်ဇ်မန်းက ကမ္ဘာ့ချန်ပီယံဖြစ်ခဲ့ပြီး ကမ္ဘာပေါ်မှာ အကောင်းဆုံးလို့ ခံစားရအောင် ပြုလုပ်ပေးခဲ့တဲ့ နည်းပြ ဆီမြွန်နီကို အလွန်ကျေးဇူးတင်ကြောင်းနဲ့ သူ့အတွက် တိုက်ပွဲဝင်ရတာ ဂုဏ်ယူဖို့ကောင်းတယ်လို့ ပြောခဲ့ပါတယ်။ 

ဒါ့အပြင် ဂရစ်ဇ်မန်းက လာလီဂါနဲ့ ချန်ပီယံလိဂ်ဖလားကို ရယူနိုင်ခဲ့ခြင်း မရှိပေမယ့် ဒီမှာရှိတဲ့အချစ်တွေက သူ့အတွက် အများကြီး တန်ဖိုးရှိပြီး ဒါကို သူ့ဘဝတစ်လျှောက်လုံး သယ်ဆောင်သွားမယ်လို့ ပြောခဲ့ပါတယ်။

အက်သလက်တီကိုအသင်းဟာ ဒီရာသီကိုလည်း ဆုဖလားလက်မဲ့နဲ့ အဆုံးသတ်ခဲ့ရပြီး လာလီဂါပြိုင်ပွဲမှာ အဆင့် ၄၊ ကိုပါဒယ်ရေးဖလားပြိုင်ပွဲမှာ ဒုတိယနဲ့ ချန်ပီယံလိဂ်ပြိုင်ပွဲမှာ ဆီမီးဖိုင်နယ်ကနေ ထွက်ခွာခဲ့ရတာ ဖြစ်ပါတယ်။ 

Source: ESPN

CNI Sport News

၂၀၂၆ ခုနှစ်၊ မေလ ၁၆

ဝက်စ်ဟမ်းအသင်းနဲ့ပွဲမှာ နယူးကာဆယ်အသင်းအတွက် ပါဝင်နိုင်ဖွယ်မရှိတဲ့ အင်္ဂလန်ကြယ်ပွင့် ဂေါ်ဒွန်ဟာ နွေရာသီမှာ နယူးကာဆယ်အသင်းကနေ ထွက်ခွာဖွယ် ရှိနေပါတယ်။ 

ဧပြီလလယ်မှာ တင်ပါးဆုံရိုး ဒဏ်ရာရခဲ့တဲ့ ဂေါ်ဒွန်ဟာ ဘုန်းမောက်၊ အာဆင်နယ်အသင်းတို့နဲ့ ပွဲတွေမှာ နယူးကာဆယ်အသင်းအတွက် ပါဝင်နိုင်ခဲ့ခြင်း မရှိတာပါ။

ဒဏ်ရာကနေ ဂေါ်ဒွန်ပြန်လည် ကောင်းမွန်လာတယ်လို့ ယူဆပြီးနောက် ကစားခဲ့တဲ့ ဘရိုက်တန်၊ နော်တင်ဟမ် ဖောရက်စ်အသင်းတို့နဲ့ပွဲတွေမှာလည်း နည်းပြအက်ဒီဟောင်းက သူ့ကို လူစာရင်းထဲ ချန်လှပ်ခဲ့တာ ဖြစ်ပါတယ်။ 

နယူးကာဆယ်အသင်းနည်းပြ အက်ဒီဟောင်းက “သူမပါဝင်နိုင်တဲ့ ပွဲတွေမှာ အသင်းကောင်းမွန်စွာ ကစားနိုင်ခဲ့ တယ်လို့ ကျနော် ထင်ပါတယ်။ ဂေါ်ဒွန်ရဲ့ ကစားချိန် ကန့်သတ်မှုက လာမယ့် ရာသီအသင်းရဲ့ အစီအစဉ်တွေကို ထင်ဟပ်စေသလားဆိုရင်တော့ ဟုတ်ပါတယ်။ ကျနော်တို့ရဲ့ အာရုံစိုက်မှုက အနာဂတ်အတွက် တစ်စိတ်တစ်ပိုင်း ဖြစ်နေပါပြီ”လို့ ပြောခဲ့တာပါ။ 

ဂေါ်ဒွန်ကို တွေ့ရစဉ်

ဂေါ်ဒွန်ဟာ လာမယ့် နွေရာသီ အပြောင်းအရွှေ့မှာ ဘိုင်ယန်မြူးနစ်အသင်းထံ ပြောင်းရွှေ့ဖို့ ချိတ်ဆက်မှုတွေ ခံနေရပြီး ပုဂ္ဂိုလ်ရေးဆိုင်ရာ သဘောတူညီမှု ရရှိပြီးဖြစ်တယ်လို့ သတင်းတွေမှာ ဖော်ပြထားပါတယ်။

ဒါပေမယ့် ကလပ်အသင်းတွေရဲ့ ဆွေးနွေးမှုတွေက ဝေးကွာနေဆဲ ဖြစ်ပါတယ်။ 

နယူးကာဆယ်အသင်းဟာ ဂေါ်ဒွန်အတွက် ယူရိုသန်း ၈၀ တောင်းဆိုထားပြီး ဘိုင်ယန်မြူးနစ်အသင်းဟာ ဒီပြောင်းရွှေ့ကြေးကို ပေးချေဖို့ မဖြစ်နိုင်ပါဘူး။ 

ဘိုင်ယန်မြူးနစ်အသင်းဟာ ဒီပြောင်းရွှေ့ကြေး ပမာဏကို လျှော့ချစေချင်နေပြီး ကလပ်အသင်း ၂ သင်းအကြားမှာ ဆွေးနွေးမှုတွေ စတင်နေပေမယ့် မြန်မြန် သဘောတူညီမှုရနိုင်မှာ မဟုတ်ဘူးလို့ သိရပါတယ်။ 

ဒီရာသီမှာ နယူးကာဆယ်အသင်းအတွက် ၄၆ ပွဲ ကစားထားပြီး ၁၇ ဂိုး သွင်းယူထားတဲ့ ဂေါ်ဒွန်ရဲ့စာချုပ်ဟာ ၂၀၃၀ ခုနှစ်အထိ ရှိနေတာ ဖြစ်ပါတယ်။ 

Source: Goal

CNI Sport News

၂၀၂၆ ခုနှစ်၊ မေလ ၁၆

အိုင်ဗရီကို့စ်အသင်းဟာ ၂၀၂၆ ကမ္ဘာ့ဖလား ပြိုင်ပွဲဝင်မယ့် အသင်းလူစာရင်း ထုတ်ပြန်ခဲ့တာမှာ ခရစ္စတယ်ပဲလေ့စ် အသင်း ကစားသမားဟောင်း ဇာဟာ ချန်လှပ်ခံခဲ့ရပါတယ်။ 

မေဂျာလိဂ်ကလပ် ချာလော့အသင်းမှာ ကစားနေတဲ့ ဇာဟာ,ဟာ ပြီးခဲ့တဲ့ အာဖရိကဖလားပြိုင်ပွဲမှာ အိုင်ဗရီကို့စ် အသင်းအတွက် ပါဝင်ကစားခဲ့ပေမယ့် ကမ္ဘာ့ဖလား လူစာရင်းမှာတော့ ချန်လှပ်ခြင်းခံခဲ့ရတာပါ။ 

အိုင်ဗရီကို့စ်အသင်းရဲ့ ကမ္ဘာ့ဖလားလူစာရင်းမှာ ပရီးမီးယားလိဂ် ကစားသမားတွေဖြစ်တဲ့ ဝုလ်ဗ်စ်အသင်းက အက်ဘာဒူ၊ နော်တင်ဟမ်ဖောရက်စ်အသင်းက ဆန်ဂါရီ၊ ယူနိုက်တက်အသင်းက အာမက်နဲ့ ပဲလေ့စ်အသင်းက ဂူဆန်တို့ ပါဝင်ခဲ့ကြပါတယ်။

ပုံစာ- အိုင်ဗရီကို့စ်အသင်း လူစာရင်းကို တွေ့ရစဉ်

အင်္ဂလန်ထိပ်တန်းလိဂ် အတွေ့အကြုံတွေရှိခဲ့ကြတဲ့ ဆီကိုဖိုဖာနာ၊ ဆီရီ၊ အဒင်ဂါရာ၊ ပီပီတို့ကိုလည်း အိုင်ဗရီကို့စ် အသင်း နည်းပြဖေးက ရွေးချယ်ခဲ့ပါတယ်။

ပရီးမီးယားလိဂ်ထံ ပြောင်းရွှေ့ဖို့ ချိတ်ဆက်မှုတွေ ခံနေရတဲ့ လိုက်ပ်ဇစ်အသင်းက ဒိုင်အိုမန်ဒီ၊ အင်တာမီလန် အသင်းက ဘိုနီတို့ဟာ အိုင်ဗရီကို့စ်အသင်းရဲ့ တိုက်စစ်မှူး စာရင်းထဲမှာ ပါဝင်ခဲ့တာပါ။ 

၂၀၂၄ ခုနှစ်က အာဖရိကဖလား ဗိုလ်လုပွဲမှာ အိုင်ဗရီကို့စ်အသင်းအတွက် အနိုင်ဂိုး သွင်းယူခဲ့တဲ့ တိုက်စစ်မှူး ဟော်လာဟာ ကမ္ဘာ့ဖလား လူစာရင်းထဲမှာ မပါဝင်ခဲ့ပေမယ့် အရန်သင့် အစားထိုးမယ့် ကစားသမား ၅ ဦးထဲမှာ ပါဝင်နေတာ ဖြစ်ပါတယ်။

အိုင်ဗရီကို့စ်အသင်းဟာ ၂၀၂၆ ကမ္ဘာ့ဖလား ပြိုင်ပွဲရဲ့အုပ်စု E မှာ ဂျာမနီ၊ အီကွေဒေါ၊ ကူရာဆောအသင်းတို့နဲ့ ကျရောက်နေတာပါ။ 

အိုင်ဗရီကို့စ်အသင်းဟာ ကမ္ဘာ့ဖလားပြိုင်ပွဲ မတိုင်မီ ပြင်ဆင်မှုအဖြစ် ဇွန်လ ၄ ရက်မှာ ပြင်သစ်အသင်းနဲ့ ခြေစမ်းပွဲ ယှဉ်ပြိုင်မှာ ဖြစ်ပါတယ်။ 

Source: BBC

CNI Sport News

၂၀၂၆ ခုနှစ်၊ မေလ ၁၆

မန်စီးတီးအသင်းဟာ ပရီးမီးယားလိဂ်နဲ့ FA ဖလား ချန်ပီယံဆုတွေကို ရယူနိုင်ခြင်း ရှိ၊မရှိ အောင်မြင်တဲ့ ရာသီ တစ်ခုကို ပိုင်ဆိုင်ထားတယ်လို့ နည်းပြဂွာဒီယိုလာက ပြောခဲ့ပါတယ်။ 

ဂွာဒီယိုလာက “ဒါဟာ ဆုဖလားတွေ ဘယ်လောက် ရယူနိုင်လဲဆိုတဲ့အပေါ် မူတည်ပါတယ်။ တစ်ခါတလေမှာ ဆုဖလားတွေ ကိုင်မြှောက်ပြီး ရာသီက အောင်မြင်ခဲ့ပါတယ်။ တစ်ခါတစ်လေမှာ ဆုဖလားတွေ ကိုင်မြှောက် နိုင်ပေမယ့် ရာသီက အလွန်ဆိုးရွားခဲ့ပါတယ်။ ဒီရာသီက ကောင်းမွန်တယ်လို့ ကျနော် ရက်သတ္တပတ် အနည်း ငယ်က ပြောခဲ့ပါတယ်။ တကယ်ကို ကောင်းမွန်ပါတယ်”လို့ ပြောခဲ့တာပါ။ 

မန်စီးတီးအသင်းဟာ ပရီးမီးယားလိဂ်ပြိုင်ပွဲမှာ ထိပ်ဆုံးနေရာ ရပ်တည်နေတဲ့ အာဆင်နယ်အသင်းကို ဖိအားပေး နေသလို FA ဖလား ဗိုလ်လုပွဲကို ၄ ရာသီ ဆက်တိုက် ယှဉ်ပြိုင်ဖို့ ရှိနေပါတယ်။

မန်စီးတီးအသင်းဟာ ဒီရာသီမှာ ချန်ပီယံလိဂ် ပြိုင်ပွဲကနေ စောစီးစွာ ထွက်ခွာခဲ့ရပေမယ့် ကာရာဘောင်း လိဂ်ဖလားမှာ အာဆင်နယ်အသင်းကို အနိုင်ရပြီး ချန်ပီယံဆုကို ရယူနိုင်ခဲ့တာပါ။ 

မန်စီးတီးကစားသမား တစ်ဦး လေ့ကျင့်ခန်းလုပ်နေစဉ်

မန်စီးတီးအသင်းဟာ FA ဖလားပြိုင်ပွဲမှာ ချန်ပီယံဆုကို ရယူနိုင်ခဲ့ရင် ဒီရာသီ ပြည်တွင်းဖလား ၂ ခုကို ရယူနိုင်မှာ ဖြစ်ပေမယ့် နည်းပြ ဂွာဒီယိုလာကတော့ နောက်ထပ် ဆုဖလား ရယူနိုင်ခြင်း ရှိ၊မရှိ အသင်းရဲ့ဒီရာသီက ကောင်းမွန် တယ်လို့ ပြောခဲ့ပါတယ်။ 

မန်စီးတီးအသင်းဟာ နောက်ဆုံးကစားခဲ့တဲ့ FA ဖလားဗိုလ်လုပွဲ ၂ ကြိမ်မှာ ယူနိုက်တက်နဲ့ ခရစ္စတယ်ပဲလေ့စ် အသင်းတို့ကို အရေးနိမ့်ထားတာပါ။ 

ဂွာဒီယိုလာက မန်စီးတီးအသင်းဟာ ပြီးခဲ့တဲ့ ၂ ကြိမ်ကထက် ပိုပြီးကောင်းအောင် လုပ်နိုင်ဖို့ မျှော်လင့်တယ် လို့လည်း ပြောခဲ့ပါတယ်။ 

ဒါ့အပြင် ဂွာဒီယိုလာက သူ့ရဲ့အနာဂတ်နဲ့ ပတ်သက်ပြီး ထင်ကြေး သတင်းတွေ ထွက်ပေါ်နေချိန်မှာ မန်စီးတီး အသင်းနဲ့ နောက်ထပ် တစ်နှစ်စာချုပ် ရှိသေးတယ်လို့ ပြောခဲ့ပါတယ်။ 

Source: besoccer