CNI Sport News

၂၀၂၅ ခုနှစ်၊ ဇွန်လ ၂၃

ရီးရယ်လ်အသင်းဟာ ပါချူကာအသင်းနဲ့ ဖီဖာကလပ်ကမ္ဘာ့ဖလား အုပ်စုဒုတိယပွဲစဉ်မှာ ပွဲချိန် ၇ မိနစ်ကတည်းက ကစားသမားတစ်ဦးလျော့နဲ့ ကစားခဲ့ရပေမယ့် ၃ ဂိုး-၁ ဂိုးနဲ့ အနိုင်ရခဲ့ပြီးနောက် ကွင်းလယ်လူ ဘယ်လင်ဂမ်က နည်းပြဇာဘီအလွန်ဆိုကို ချီးကျူးမှုပြုလုပ်ခဲ့ပါတယ်။ 

ဘယ်လင်ဂမ်က “အဆန်စီယို ထုတ်ခံရပြီးနောက် ခက်ခဲခဲ့ပါတယ်။ နည်းပြ အလွန်ဆိုက ပုံစံကိုပြောင်းဖို့ ဆုံးဖြတ် ခဲ့ပြီး ကျနော်တို့ အားလုံးကလည်း ဒီတာဝန်ကို ကောင်းမွန်စွာ ယူနိုင်ခဲ့ပါတယ်။ ရာသီဥတုဒဏ်ရော၊ ပါချူကာ အသင်းရဲ့ ကန်ချက် အများအပြားကိုလည်း ခံခဲ့ရပါတယ်။ ကော့တွိုက်စ်က အလွန်ကောင်းပါတယ်။ ကောင်းမွန်တဲ့ နိုင်ပွဲဖြစ်ခဲ့ပေမယ့် ပြီးပြည့်စုံမှုတော့ မရှိပါဘူး။ နည်းပြရဲ့ စိတ်ကူးကတော့ အံ့သြစရာကောင်းခဲ့ပြီး ကျနော်တို့ ဆက်သွားရမှာပါ”လို့ ပြောခဲ့တာပါ။ 

ရီးရယ်လ်အသင်းဟာ နည်းပြ ဇာဘီအလွန်ဆို စတင်ကိုင်တွယ်တဲ့ ပထမဆုံးပွဲစဉ်မှာ အယ်လ်ဟီလယ်အသင်းနဲ့ ၁ ဂိုးစီ သရေကျခဲ့ပြီး ဒုတိယပွဲစဉ်ဖြစ်တဲ့ ပါချူကာအသင်းနဲ့ပွဲစဉ်မှာ ကစားသမားတစ်ဦး စောစီးစွာ ထုတ်ပယ်ခံခဲ့ ရတာကြောင့် ခက်ခဲမှုတွေနဲ့ ရင်ဆိုင်ခဲ့ရပါတယ်။ 

ဒါပေမယ့် ရီးရယ်လ်အသင်းဟာ အကောင်းဆုံး ရင်ဆိုင်နိုင်ခဲ့ပြီး ဘယ်လင်ဂမ်၊ ဂူလာနဲ့ ဗယ်လ်ဗာဒီတို့က ၁ ဂိုးစီ သွင်းယူကာ ပါချုကာအသင်းကို ဦးဆောင်နိုင်ခဲ့တာပါ။ 

ပါချူကာအသင်းအတွက် ချေပဂိုးကို မွန်တီရယ်လ်က သွင်းယူခဲ့တာဖြစ်ပါတယ်။ 

နည်းပြ အလွန်ဆိုကို တွေ့ရစဉ်

ဘယ်လင်ဂမ်ဟာ ဒီပွဲမှာ သွင်းဂိုးလည်း သွင်းယူနိုင်ခဲ့သလို ခြေစွမ်းလည်း ပြသနိုင်ခဲ့တာကြောင့် အကောင်းဆုံး ကစားသမားဆုကို ရရှိခဲ့ပါတယ်။

အင်္ဂလန်ကွင်းလယ်လူ ဘယ်လင်ဂမ်ဟာ ကာလရှည်ကြာ ခံစားနေရတဲ့ ပခုံးနာကျင်မှုကို ဖီဖာကလပ်ကမ္ဘာ့ဖလား ပြိုင်ပွဲအပြီးမှာ ခွဲစိတ်မှုခံယူမယ်လို့လည်း အတည်ပြုခဲ့တာပါ။

ဒီပွဲအပြီးမှာ ရီးရယ်လ်အသင်း နောက်ခံလူ ရူဒီဂါဟာ လူမျိုးရေး ခွဲခြားခံခဲ့ရတယ်လို့ ပြောခဲ့ပြီး နည်းပြ ဇာဘီအလွန်ဆိုက ဒီဖြစ်ရပ်ကို ဖီဖာက စုံစမ်းစစ်ဆေးနေတယ်လို့ ပြောခဲ့ပါတယ်။ 

ရီးရယ်လ်အသင်းဟာ ပါချူကာအသင်းကို အနိုင်ရခဲ့ပြီးနောက် အုပ်စုပွဲစဉ် ၂ ပွဲ ကစားအပြီးမှာ ရမှတ် ၄ မှတ် ရရှိထားကာ အုပ်စုနောက်ဆုံးပွဲစဉ်အဖြစ် ဆဲလ်ဘတ်အသင်းနဲ့ ယှဉ်ပြိုင်ရမှာဖြစ်ပါတယ်။ 

Source: ESPN

ဂိုးသမားစတီဂန်နဲ့ ဆွေးနွေးမှုပြုလုပ်ဖို့ ဟန်ဆီဖလစ် စီစဉ် 

CNI Sport News

၂၀၂၅ ခုနှစ်၊ ဇွန်လ ၂၁

ဘာစီလိုနာအသင်းနည်းပြ ဟန်ဆီဖလစ်ဟာ အသင်းမှာ ဆက်နေပြီး ပွဲထွက်ခွင့် နေရာအတွက် တိုက်ပွဲဝင်ချင် နေတဲ့ ဂိုးသမား စတီဂန်နဲ့ ဆွေးနွေးမှု ပြုလုပ်ဖို့ စီစဉ်နေပါတယ်။ 

Football Espana က ဘာစီလိုနာအသင်းဟာ အက်စ်ပန်ညို ဂိုးသမား ဂါစီယာကို ယူရို ၂၅ သန်းနဲ့ ခေါ်ယူခဲ့ ပြီးနောက် စတီဂန်ဟာ သူ့ရဲ့အနာဂတ်အတွက် နည်းပြဟန်ဆီဖလစ်နဲ့ ဆွေးနွေးမယ်လို့ ဖော်ပြထားတာပါ။ 

ဘာစီလိုနာအသင်းဟာ သူ့ရဲ့နံပါတ်တစ် နေရာကို အစားထိုးချင်တဲ့ ဆန္ဒနဲ့ပတ်သက်ပြီး စတီဂန်ကို အသိပေးထား ခြင်းမရှိသေးသလို ဂျာမန်ဂိုးသမားကလည်း သူ့ရဲ့နေရာအတွက် ဆက်ပြီးတိုက်ပွဲဝင်ဖို့ ဆုံးဖြတ်ထားတာ ဖြစ်ပါ တယ်။ 

ပုံစာ- စတီဂန်ကို တွေ့ရစဉ်

ဘာစီလိုနာအသင်းမှာရှိတာ ၁၁ နှစ်ကြာပြီဖြစ်တဲ့ စတီဂန်ဟာ ပြီးခဲ့တဲ့ရာသီက ဒဏ်ရာကြောင့် တစ်ရာသီလုံးနီးပါး အနားယူခဲ့ရပြီး ရာသီကုန်ခါနီးမှသာ အသင်းအတွက် ပြန်ပါဝင်ကစားနိုင်ခဲ့တာပါ။ 

ဘာစီလိုနာအသင်းဟာ စတီဂန်ဒဏ်ရာကြောင့် အနားယူချိန်မှာ ခေါ်ယူခဲ့တဲ့ ဂိုးသမားဆက်ဇနီကို စာချုပ် သက်တမ်း တိုးဖို့လည်း စီစဉ်နေတာဖြစ်ပါတယ်။ 

အဲဒါကြောင့် စတီဂန်ဟာ လာမယ့်ရာသီ ဘာစီလိုနာအသင်းမှာ ဆက်ရှိမယ်ဆိုရင် ပွဲထွက်ခွင့်နေရာရဖို့ အပြိုင်အဆိုင် ကြိုးစားရတော့မှာပါ။ 

စတီဂန်ကို ခေါ်ယူဖို့ တူရကီကလပ်အသင်းတွေက စိတ်ဝင်စားနေပေမယ့် သူကတော့ ဘာစီလိုနာအသင်းမှာ ဆက်ရှိချင်နေတာ ဖြစ်ပါတယ်။ 

ဘာစီလိုနာ အသင်းခေါင်းဆောင်ဖြစ်တဲ့ စတီဂန်နဲ့ အသင်းရဲ့စာချုပ်ဟာ ၂၀၂၈ ခုနှစ်ရာသီကုန်အထိ သက်တမ်းရှိ နေတာပါ။ 

၂၀၁၄ က မိုချန်ဂလာဘတ်အသင်းကနေ ရောက်ရှိလာခဲ့တဲ့ စတီဂန်ဟာ ဘာစီလိုနာအသင်းအတွက် ၄၂၂ ပွဲ ပါဝင်ကစားထားပြီး လာလီဂါဖလား ၆ ကြိမ်၊ ချန်ပီယံလိဂ်ဖလား ၁ ကြိမ် အပါအဝင် ဆုဖလားပေါင်း ၁၇ ခု ရရှိထားတာဖြစ်ပါတယ်။

Source: Goal

အန်တိုနီကို ကိုမိုအသင်းက ခေါ်ယူဖို့ စိတ်ဝင်စား

CNI Sport News

၂၀၂၅ ခုနှစ်၊ ဇွန်လ ၂၁

အီတလီစီးရီးအေကလပ် ကိုမိုအသင်းဟာ ယူနိုက်တက်အသင်းမှာ အနာဂတ် မရေမရာဖြစ်နေတဲ့ တောင်ပံ ကစားသမား အန်တိုနီကို ခေါ်ယူဖို့ စိတ်ဝင်စားနေပါတယ်။ 

၂၀၂၂ ခုနှစ်က အေဂျက်စ်အသင်းကနေ ရောက်ရှိလာခဲ့တဲ့ အန်တိုနီဟာ ယူနိုက်တက်အသင်းမှာ ခြေစွမ်းပြသနိုင်ဖို့ ရုန်းကန်ခဲ့ရပြီး သူ့ကိုခေါ်ယူခဲ့တုန်းက ပေးခဲ့ရတဲ့ ပြောင်းရွှေ့ကြေးပေါင် ၈၆ သန်းတန်ကြေးကို ဖြည့်ဆည်း ပေးနိုင် ခြင်း မရှိတာပါ။ 

အန်တိုနီဟာ ယူနိုက်တက်အသင်းအတွက် ၉၆ ပွဲ ပါဝင်ကစားထားပြီး ၁၂ ဂိုးသွင်းယူကာ ဂိုးဖန်တီးမှု ၅ ကြိမ် ပြုလုပ်နိုင်ခဲ့ပါတယ်။

အန်တိုနီနဲ့ ယူနိုက်တက်အသင်းရဲ့ စာချုပ်ဟာ ၂၀၂၇ ခုနှစ် ရာသီကုန်အထိ ရှိနေပေမယ့် နည်းပြအာမိုရင်ရဲ့ အစီအစဉ်မှာ ပါဝင်ဖို့ မသေချာတော့တာပါ။ 

ပုံစာ- အန်တိုနီကို တွေ့ရစဉ်

အန်တိုနီဟာ ပြီးခဲ့တဲ့ဇန်နဝါရီက ဘက်တစ်အသင်းမှာ အငှားသွားရောက် ကစားခဲ့ပြီး ၂၆ ပွဲမှာ ဂိုးပါဝင်ပတ်သက်မှု ၁၄ ဂိုးရှိကာ ခြေစွမ်းပြသနိုင်ခဲ့ပါတယ်။ 

အဲဒါကြောင့်လည်း အန်တိုနီဟာ ပြီးခဲ့တဲ့ နိုင်ငံတကာပွဲတွေမှာ ဘရာဇီးလ်အသင်း လူစာရင်းထဲ ပြန်လည် ခေါ်ယူခြင်းခံခဲ့ရတာပါ။ 

အန်တိုနီဟာ ဘက်တစ်အသင်းနဲ့ အငှားစာချုပ် ကုန်ဆုံးခဲ့ပြီဖြစ်လို့ ရာသီကြို လေ့ကျင့်မှုတွေ ပြုလုပ်ဖို့ ယူနိုက်တက် အသင်းထံ ပြန်လာရတော့မှာ ဖြစ်ပါတယ်။ 

ဒါပေမယ့် ယူနိုက်တက်အသင်းဟာ သူ့ကို နွေရာသီ အပြောင်းအရွှေ့မှာ အပြီးသတ်ရောင်းချဖို့ ဆန္ဒရှိနေတာ ပါတယ်။ 

ဘက်တစ်အသင်းဟာ အန်တိုနီကို အပြီးသတ် ခေါ်ယူခွင့် အပါအဝင် အငှားနဲ့ နောက်ထပ် ခေါ်ယူဖို့ ပစ်မှတ်ထား နေသလို ကိုမိုအသင်းကလည်း သူ့ကိုခေါ်ယူဖို့ ကြိုးပမ်းလာခဲ့တယ်လို့ ဖာဘရီဇီယိုရိုမန်နိုက ဖော်ပြထားတာပါ။

ကိုမိုအသင်းကို အာဆင်နယ်နဲ့ ချယ်လ်ဆီးအသင်း ကစားသမားဟောင်း ဖာဘရီဂတ်စ် ကိုင်တွယ်နေပြီး ၂၀၂၄-၂၅ ရာသီစီးရီးအေပြိုင်ပွဲမှာ အဆင့် ၁၀ နဲ့ ရာသီအဆုံးသတ်ခဲ့ပါတယ်။ 

အန်တိုနီအနေနဲ့ အသင်းသစ် မရရှိသေးရင် အမေရိကန်ကို ထွက်ခွာမယ့် ရာသီကြို ခြေစမ်းခရီးစဉ်မှာ ယူနိုက်တက် အသင်းနဲ့ လိုက်ပါခွင့်ရမှာ မဟုတ်ဘဲ ကာရင်တန်မှာသာ လေ့ကျင့်မှုတွေ ဆက်ပြီးပြုလုပ်ရမယ်လို့ သိရပါတယ်။ 

Source: Dailymail

CNI Sport News

၂၀၂၅ ခုနှစ်၊ ဇွန်လ ၂၁

လေဗာကူဆင်အသင်းကနေ ကလပ်စံချိန်တင် ပြောင်းရွှေ့ကြေး ပေါင် ၁၁၆ သန်းနဲ့ လီဗာပူးလ်အသင်းကို ပြောင်းရွှေ့လာခဲ့တဲ့ ကစားသမားသစ် ဖလော်ရီယန်ဗစ်ဇ်က လီဗာပူးလ်အသင်းနဲ့ ဆုဖလားအားလုံး ရယူချင်တယ်လို့ ပြောခဲ့ပါတယ်။ 

ဖလော်ရီယန်ဗစ်ဇ်က “ကျနော်ဟာ နှစ်တိုင်း အရာအားလုံးကို အနိုင်ယူချင်ပါတယ်။ အရင်ဆုံးကတော့ ကိုယ်လုပ်ရမယ့် အလုပ်ကို အကောင်းဆုံး ကြိုးစားရမှာပါ။ လီဗာပူးလ်အသင်းဟာ ပြီးခဲ့တဲ့ရာသီက ပရီးမီးယားလိဂ်ဖလားကို ရယူနိုင်ခဲ့တဲ့အတွက် ကျနော်ဟာ ပရီးမီးယားလိဂ်ဖလားကို ထပ်ပြီးရယူနိုင်ဖို့နဲ့ ချန်ပီယံလိဂ်ဖလားကို ရယူနိုင်ဖို့ ရည်မှန်းထားပါတယ်။ စွန့်စားမှုအသစ်အတွက် စိတ်လှုပ်ရှားမိပြီး ကျနော် အကောင်းဆုံးလုပ်နိုင်ဖို့ မျှော်လင့်တယ်”လို့ ပြောခဲ့တာပါ။ 

သောကြာနေ့က လီဗာပူးလ်အသင်းရဲ့ လေ့ကျင့်ရေးကွင်းမှာ ဆေးစစ်မှု ပြီးမြောက်ခဲ့တဲ့ ဖလော်ရီယန်ဗစ်ဇ်ဟာ အသင်းမှာ ၂၀၃၀ ခုနှစ်အထိရှိမယ့် ၅ နှစ် စာချုပ်ချုပ်ဆိုခဲ့တာဖြစ်ပါတယ်။

ဖလော်ရီယန်ဗစ်ဇ်ကို တွေ့ရစဉ်

လီဗာပူးလ်အသင်းဟာ ဖလော်ရီယန်ဗစ်ဇ်အတွက် လေဗာကူဆင်အသင်းကို ပေါင်သန်း ၁၀၀ အရင်ဆုံး ပေးရမှာဖြစ်ပြီး သူ့ရဲ့စွမ်းဆောင်ရည်အပေါ် မူတည်ကာ နောက်ထပ် ပေါင် ၁၆ သန်းထပ်ပေးရမှာပါ။ 

ဖလော်ရီယန်ဗစ်ဇ်ဟာ လေဗာကူဆင်အသင်းအတွက် ၁၉၇ ပွဲ ကစားခဲ့ပြီး ၅၇ ဂိုးသွင်းယူကာ ဘွန်ဒက်လီဂါ၊ ပိုကယ်ဖလားနဲ့ ဂျာမန်စူပါဖလားတို့ကို ရယူနိုင်ခဲ့ပါတယ်။

လီဗာပူးလ်အသင်းဟာ နွေရာသီ အပြောင်းအရွှေ့မှာ ဖလော်ရီယန်ဗစ်ဇ် မတိုင်မီ သူ့ရဲ့ လေဗာကူဆင် အသင်းဖော် ဖရင်ပေါင်ကို ပေါင် ၂၉.၅ သန်းနဲ့ ပြီးခဲ့တဲ့လက ခေါ်ယူထားတာပါ။ 

လီဗာပူးလ်အသင်းဟာ နောက်ထပ် ခေါ်ယူမှုအဖြစ် ဘုန်းမောက်အသင်း ဘယ်နောက်ခံလူ ကာကတ်ဇ်ကို ခေါ်ယူဖို့လည်း သဘောတူညီမှု ရရှိထားတာဖြစ်ပါတယ်။

Source: BBC

CNI Sport News

၂၀၂၅ ခုနှစ်၊ ဇွန်လ ၂၁

အာဂျင်တီးနားကလပ် ရေးဗားပလိတ်အသင်းဟာ ကျင်းပနေတဲ့ ဖီဖာကလပ် ကမ္ဘာ့ဖလားပြိုင်ပွဲမှာ ပေါ်တူဂီ အသင်းခေါင်းဆောင် ရော်နယ်ဒိုကို အသင်းအတွက် ပါဝင်ကစားစေဖို့ ကြိုးစားခဲ့တယ်လို့ နည်းပြဂယ်လာဒိုက ပြောခဲ့ပါတယ်။

ဂယ်လာဒိုက “ကျနော်တို့ ကလပ်ကမ္ဘာ့ဖလား ကစားဖို့ရှိတယ်၊ ကစားဖို့ စိတ်ဝင်စားလား။ ဒီလိုပြိုင်ပွဲတွေက မင်းတို့လို လူတွေအတွက် လုပ်ပေးထားတဲ့ ပြိုင်ပွဲဆိုပြီး သူ့ကိုပြောခဲ့ပါတယ်။ သူဟာ ဒါကိုဂုဏ်ယူသလို ခံစားခဲ့ ရပြီး စဉ်းစားဖို့လည်း အချိန်ယူခဲ့ပါတယ်။ ဒါပေမယ့် အဆုံးမှာ လာမယ့်ရာသီအတွက် ပြင်ဆင်မှုတွေပြုလုပ်ဖို့ အာရုံစိုက်ရမယ်ဆိုပြီး ကျနော့်ကို သူပြောခဲ့ပါတယ်”လို့ ပြောခဲ့တာပါ။ 

ရော်နယ်ဒိုက သူဟာ ကလပ်ကမ္ဘာ့ဖလားပြိုင်ပွဲကို ပါဝင်ကစားဖို့အတွက် အာဂျင်တီးနားကလပ် အသင်း တစ်သင်းရဲ့ ဖိတ်ခေါ်မှုကို ရရှိခဲ့တယ်လို့ ပြောခဲ့ပေမယ့် အသင်းအမည်ကိုတော့ ပြောခဲ့ခြင်းမရှိတာ ဖြစ်ပါတယ်။ 

အခုအချိန်မှာတော့ ရေးဗားပလိတ်အသင်းဟာ ရော်နယ်ဒိုကို ကလပ်ကမ္ဘာ့ဖလားပြိုင်ပွဲမှာ သူတို့အတွက် ပါဝင် ကစားစေဖို့ ကြိုးစားခဲ့တယ်လို့ အတည်ပြုခဲ့တာပါ။

 ရော်နယ်ဒိုကို တွေ့ရစဉ်  

ရော်နယ်ဒိုဟာ ဒီပြိုင်ပွဲမှာ ပါဝင်ကစားဖို့အတွက် အသင်းအချို့ရဲ့ ကမ်းလှမ်းမှုတွေလည်း ရရှိခဲ့တာဖြစ်ပါတယ်။ 

ဒါပေမယ့် ပေါ်တူဂီကစားသမားက သူဟာ ဖီဖာကလပ် ကမ္ဘာ့ဖလားပြိုင်ပွဲမှာ ပါဝင်မကစားဘူးလို့ ပြောခဲ့တာပါ။ 

ရော်နယ်ဒိုဟာ ဒီလကုန်ရင် ဆော်ဒီပရိုလိဂ်ကလပ် အယ်လ်နာဆာအသင်းနဲ့ စာချုပ်ကုန်ဆုံးမှာဖြစ်ပေမယ့် နောက်ထပ် တစ်ရာသီ စာချုပ်သက်တမ်းတိုးဖို့ ရှိနေပါတယ်။ 

ရေးဗားပလိတ်အသင်းဟာ ဖီဖာကလပ် ကမ္ဘာ့ဖလား အုပ်စုအဖွင့်ပွဲစဉ်မှာ အူရာဝါရတ်အသင်းကို ၃ ဂိုး-၁ ဂိုးနဲ့ အနိုင်ရရှိထားပြီး ၃ မှတ်ရရှိထားတာပါ။

ရေးဗားပလိတ်အသင်းဟာ အုပ်စုဒုတိယမြောက် ပွဲစဉ်အဖြစ် အဖွင့်ပွဲစဉ်မှာ အင်တာမီလန်အသင်းနဲ့ ၁ ဂိုးစီ သရေကျထားတဲ့ မွန်တာရေးအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဇွန်လ ၂၀

အာဆင်နယ်အသင်းဟာ နွေရာသီအပြောင်းအရွှေ့မှာ ချယ်လ်ဆီးအသင်း တောင်ပံကစားသမား မာဒူကီကို ခေါ်ယူဖို့ စိတ်ဝင်စားနေတဲ့ အသင်းတွေထဲမှာ တစ်သင်းအနေနဲ့ ပါဝင်လာခဲ့ပါတယ်။ 

အာဆင်နယ်အသင်းဟာ နွေရာသီမှာ တိုက်စစ်မှူးတစ်ဦး ခေါ်ယူနိုင်ဖို့ ပစ်မှတ်ထားနေသလို တောင်ပံတိုက်စစ် ကစားသမားတစ်ဦးကိုလည်း ခေါ်ယူချင်နေတာပါ။ 

အာဆင်နယ်အသင်းဟာ အစောပိုင်းက ဘီလ်ဘာအိုအသင်းက နီကိုဝီလီယံစ်ကို ခေါ်ယူဖို့ ကြိုးပမ်းခဲ့ပေမယ့် သူက ဘာစီလိုနာအသင်းထံ ပြောင်းရွှေ့ဖို့ သဘောတူညီမှု ရရှိသွားခဲ့ပါတယ်။ 

အဲဒါကြောင့် အာဆင်နယ်အသင်းဟာ တောင်ပံနေရာအတွက် ရီးရယ်လ်အသင်းက ရိုဒရီဂိုနဲ့ နယူးကာဆယ် အသင်းက ဂေါ်ဒွန်တို့ကိုလည်း သူတို့ရဲ့ ရွေးချယ်စရာတွေထဲ ထည့်သွင်းထားတာပါ။

မာဒူကီကို တွေ့ရစဉ်

The Daily Telegraph က မာဒူကီဟာ အာဆင်နယ်အသင်း ခေါ်ယူဖို့ ပစ်မှတ်ထားတဲ့ စာရင်းထဲမှာ ပါဝင်တယ်လို့ ဖော်ပြထားပါတယ်။ 

အာဆင်နယ်အသင်းဟာ လက်ရှိအချိန်မှာ မာဒူကီအတွက် ချယ်လ်ဆီးအသင်းကို ချဉ်းကပ်မှု မပြုလုပ်ထားပေမယ့် သူဟာ တောင်ပံနှစ်ဖက်စလုံးမှာ ကစားပြီး ဂိုးတွေသွင်းယူနိုင်တဲ့သူ ဖြစ်တာကြောင့် အသင်းနဲ့ အံ့ဝင်နိုင်မယ့် သူအဖြစ် ယူဆနေတာပါ။ 

အာဆင်နယ်နဲ့ ချယ်လ်ဆီးအသင်းတို့ဟာ လန်ဒန်ပြိုင်ဘက်တွေ ဖြစ်ပေမယ့် ပြီးခဲ့တဲ့နှစ်တွေအတွင်းမှာ ကစားသမား အရောင်းအဝယ်တွေ ရှိခဲ့ကြပါတယ်။

အာဆင်နယ်အသင်းဟာ ချယ်လ်ဆီးအသင်းကနေ ဒေးဗစ်လူးဝစ်ဇ်၊ ဟာဗက်ဇ်၊ ဂျော်ဂျင်ဟိုနဲ့ စတာလင်တို့ကို ခေါ်ယူခဲ့သလို ဒီနွေရာသီမှာ ဂိုးသမားကယ်ပါကို ခေါ်ယူနိုင်ဖို့လည်း စီစဉ်နေတာပါ။

အင်္ဂလန်ကြယ်ပွင့် မာဒူကီဟာ ပြီးခဲ့တဲ့ရာသီက ချယ်လ်ဆီးအသင်းအတွက် ပြိုင်ပွဲစုံ ၁၁ ဂိုးသွင်းပြီး ၅ ဂိုး ဖန်တီးနိုင်ခဲ့ပေမယ့် အသင်းမှာ အနာဂတ် မရေမရာ ဖြစ်နေပါတယ်။

ပြီးခဲ့တဲ့လပိုင်းက သတင်းတွေမှာ မာဒူကီဟာ ချယ်လ်ဆီးအသင်း ရောင်းချမယ့် ကစားသမား စာရင်းထဲမှာ ပါဝင်တယ်လို့ ဖော်ပြခြင်းခံထားရတာပါ။ 

၂၀၂၃ ခုနှစ်က PSV အသင်းကနေ ရောက်ရှိလာခဲ့တဲ့ မာဒူကီဟာ ချယ်လ်ဆီးအသင်းအတွက် ပြိုင်ပွဲစုံ ၈၈ ပွဲ ပါဝင်ကစားထားပြီး သွင်းဂိုး ၂၀ သွင်းယူကာ ပြီးခဲ့တဲ့ရာသီက ကွန်းဖရန့်လိဂ်ဖလား ရယူနိုင်ခဲ့ပါတယ်။ 

Source: metro

CNI Sport News

၂၀၂၅ ခုနှစ်၊ ဇွန်လ ၂၀

ရီးရယ်လ်အသင်း တိုက်စစ်မှူး ဘတ်ပီဟာ အစာအိမ်နဲ့ အူလမ်းကြောင်း ရောင်ရမ်းနေတဲ့အတွက် ကုသမှု ခံယူပြီးနောက် ဆေးရုံကနေဆင်းပြီလို့ အသင်းက ထုတ်ပြန်ခဲ့ပါတယ်။ 

ပြင်သစ်အသင်းခေါင်းဆောင် ဘတ်ပီဟာ အဖျားရောဂါ ခံစားခဲ့ရတာကြောင့် အင်္ဂါနေ့က ပြုလုပ်ခဲ့တဲ့ ရီးရယ်လ် အသင်းရဲ့ လေ့ကျင့်ခန်း အစီအစဉ်ကို လွဲချော်ခဲ့ပြီး အယ်လ်ဟီလယ်အသင်းနဲ့ ၁ ဂိုးစီ သရေကျခဲ့တဲ့ ဖီဖာကလပ် ကမ္ဘာ့ဖလား အုပ်စုအဖွင့်ပွဲစဉ်မှာ ပါဝင်နိုင်ခဲ့ခြင်း မရှိပါဘူး။ 

ရီးရယ်လ်အသင်းက ဘတ်ပီဟာ အစာအိမ်နဲ့ အူလမ်းကြောင်း ရောင်ရမ်းနေတဲ့အတွက် ဆေးရုံတက် ကုသမှု ခံယူခဲ့ရတယ်လို့ ကြေညာခဲ့ပြီး နာရီပိုင်းအကြာမှာ သူဟာ ဆေးရုံကနေ ဆင်းခဲ့ပြီလို့ ထုတ်ပြန်ခဲ့ပါတယ်။

ဘတ်ပီဟာ ရီးရယ်လ်အသင်းရဲ့ အုပ်စုဒုတိယမြောက် ပွဲစဉ်ဖြစ်တဲ့ ပါချူကာအသင်းနဲ့ပွဲစဉ်မှာ ပါဝင်ဖို့ မသေချာ သေးပေမယ့် ဆဲလ်ဘတ်အသင်းနဲ့ ယှဉ်ပြိုင်ရမယ့် အုပ်စုနောက်ဆုံး ပွဲစဉ်မှာတော့ ပါဝင်နိုင်ဖို့ရှိနေတာပါ။ 

ဘတ်ပီကို တွေ့ရစဉ်

ဘတ်ပီဟာ ရီးရယ်လ်အသင်း ကစားသမားဘဝ ပထမဆုံးရာသီမှာ ပြိုင်ပွဲစုံ ၅၆ ပွဲ ကစားထားပြီး ၄၃ ဂိုးသွင်းယူ ကာ လာလီဂါရဲ့ ဂိုးသွင်း အများဆုံး ရွှေဖိနပ်ဆုနဲ့ ဥရောပရွှေဖိနပ်ဆုတွေကို ရယူနိုင်ခဲ့ပါတယ်။ 

ရီးရယ်လ်အသင်းဟာ ၂၀၂၄-၂၅ ရာသီမှာ ဥရောပစူပါဖလားနဲ့ ဖီဖာတိုက်ကြီးများ ဖလားတွေမှာသာ ချန်ပီယံဆု ရယူနိုင်ခဲ့ပြီး ပြည်တွင်းပြိုင်ပွဲနဲ့ ချန်ပီယံလိဂ်ပြိုင်ပွဲမှာ အောင်မြင်မှုနဲ့ ဝေးကွာခဲ့တာပါ။ 

အဲဒါကြောင့် ရီးရယ်လ်အသင်းဟာ ရာသီကုန်ချိန်မှာ ထွက်ခွာခဲ့တဲ့ နည်းပြအန်ဆယ်လော့တီရဲ့ နေရာမှာ ကစားသမားဟောင်း ဇာဘီအလွန်ဆိုကို နည်းပြသစ်အဖြစ် ခန့်အပ်ကာ ဖီဖာကလပ် ကမ္ဘာ့ဖလားပြိုင်ပွဲမှာ အောင်မြင်မှုရယူနိုင်ဖို့ ပစ်မှတ်ထားနေတာဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ ဇွန်လ ၂၀

ယူနိုက်တက်အသင်းဟာ အတ္တလန်တာအသင်း ကွင်းလယ်လူ အီဒါဆန်ကို ခေါ်ယူဖို့ အဆင်မပြေခဲ့ပြီးနောက် ဘိုင်ယန်မြူးနစ်အသင်း ကွင်းလယ်လူ ပယ်လ်ဟင်ညာကို အငှားနဲ့ခေါ်ယူဖို့ စိတ်ဝင်စားနေပါတယ်။ 

ပြီးခဲ့တဲ့နွေရာသီက ဖူလ်ဟမ်အသင်းကနေ ပေါင် ၄၈ သန်းနဲ့ ဘိုင်ယန်မြူးနစ်အသင်းကို ရောက်ရှိလာခဲ့တဲ့ ပယ်လ်ဟင်ညာဟာ ဂျာမန်ကလပ်မှာ ပုံမှန်ပွဲထွက်ခွင့်ရဖို့ ရုန်းကန်နေရတာကြောင့် နွေရာသီမှာ အငှားနဲ့ ထွက်ခွာခွင့် ရရှိနိုင်တာပါ။ 

GiveMeSport က ဘိုင်ယန်မြူးနစ်နဲ့ ယူနိုက်တက်အသင်းတို့ဟာ ပယ်လ်ဟင်ညာအတွက် အတွင်းပိုင်း ဆွေးနွေးမှုတွေ ပြုလုပ်နေတယ်လို့ ဖော်ပြထားပါတယ်။

 ယူနိုက်တက်အသင်းဟာ ဝုလ်ဗ်စ်အသင်းက ကွန်ညာကို ခေါ်ယူခဲ့ပြီးနောက် အသုံးစရိတ် ကန့်သတ်မှုတွေကြောင့် ပရီးမီးယားလိဂ်မှာ သက်သေပြပြီးသား ကစားသမားတစ်ဦးကို အသင်းရဲ့ လူစာရင်းထဲမှာ ထည့်သွင်းချင်နေတာပါ။ 

ပယ်လ်ဟင်ညာဟာ အင်္ဂလန်မှာ အတွေ့အကြုံ ရှိပြီးသားသူ ဖြစ်တဲ့အတွက် ယူနိုက်တက်အသင်းရဲ့ ကွင်းလယ်ကို အားကောင်းအောင် ကူညီမှုတွေ ပြုလုပ်ပေးနိုင်တာ ဖြစ်ပါတယ်။ 

ယူနိုက်တက်အသင်းဟာ ပယ်လ်ဟင်ညာကို အငှားနဲ့ခေါ်ယူဖို့အတွက် ကစားသမားအချို့ကို ရောင်းချဖို့လည်း ရှိနေတာပါ။

ပယ်လ်ဟင်ညာကို တွေ့ရစဉ်

ဘိုင်ယန်မြူးနစ်အသင်းဟာ ပယ်လ်ဟင်ညာကို ပေါင်သန်း ၃၀ ဝန်းကျင်နဲ့ အပြီးသတ်ရောင်းချဖို့ ဆန္ဒရှိခဲ့ပေမယ့် သူ့ရဲ့ပုံစံကို ပြန်လည်ရရှိအောင် ကူညီဖို့အတွက် အငှားချဖို့ စဉ်းစားနေတာဖြစ်ပါတယ်။ 

ပယ်လ်ဟင်ညာရဲ့ စာချုပ်ဟာ ၄ နှစ် ကျန်ရှိနေသေးတဲ့အတွက် ဘိုင်ယန်မြူးနစ်အသင်းဟာ သူ့ကိုရောင်းချဖို့ အလျင်စလို ပြုလုပ်ဖို့မရှိတာပါ။

ယူနိုက်တက်အသင်းကတော့ ပယ်လ်ဟင်ညာဟာ ကုန်ကျစရိတ်နည်းပြီး နည်းပြအာမိုရင်ရဲ့ နည်းဗျူဟာပိုင်းမှာ အံ့ဝင်နိုင်မယ့်သူအဖြစ် မြင်နေတာပါ။ 

ယူနိုက်တက်အသင်းဟာ ပယ်လ်ဟင်ညာအတွက် တရားဝင် ကမ်းလှမ်းမှု မပြုလုပ်မီ ဘိုင်ယန်မြူးနစ်အသင်းရဲ့ နောက်ဆုံး ရပ်တည်မှုကို စောင့်ဆိုင်းနေပြီး အဆင်ပြေခဲ့ရင် သူ့ကို ရာသီကြို ခြေစမ်းပွဲတွေ မတိုင်မီ ခေါ်ယူနိုင်ဖို့ မျှော်လင့်နေတာဖြစ်ပါတယ်။

Source: Goal

CNI Sport News

၂၀၂၅ ခုနှစ်၊ ဇွန်လ ၂၀

အင်တာမိုင်ယာမီအသင်းဟာ ဖီဖာကလပ်ကမ္ဘာ့ဖလား အုပ်စုဒုတိယမြောက်ပွဲစဉ်မှာ အသင်းခေါင်းဆောင် မက်ဆီ ရဲ့ လှပတဲ့ဖရီးကစ် သွင်းဂိုးကြောင့် ပေါ်တိုအသင်းကို ၂ ဂိုး-၁ ဂိုးနဲ့ အနိုင်ရရှိခဲ့ပါတယ်။ 

ဒီပွဲမှာ ပေါ်တိုအသင်းက ဦးဆောင်ဂိုး စတင်ရရှိခဲ့ပြီး အဂီဟိုဝါက ပင်နယ်တီကနေ သွင်းယူခဲ့ကာ အင်တာမိုင်ယာမီ အသင်းအတွက် ချေပဂိုးကို ဆီဂိုဗီယာနဲ့ အနိုင်ဂိုးကို မက်ဆီက သွင်းယူခဲ့တာပါ။

အဲဒါကြောင့် အင်တာမိုင်ယာမီအသင်းဟာ ဖီဖာကလပ် ကမ္ဘာ့ဖလားပြိုင်ပွဲမှာ ပထမဆုံးနိုင်ပွဲကို ရယူနိုင်ခဲ့ပါတယ်။ 

အင်တာမိုင်ယာမီအသင်းဟာ အုပ်စုအဖွင့်ပွဲစဉ်မှာ အယ်လ်အာလီအသင်းနဲ့ ဂိုးမရှိ သရေကျခဲ့ပေမယ့် ဒီပွဲအနိုင် ရရှိခဲ့တဲ့အတွက် အုပ်စုပွဲစဉ် ၂ ပွဲ ကစားအပြီးမှာ ရမှတ် ၄ မှတ်နဲ့ ၁၆ သင်းအဆင့် တက်နိုင်ဖို့ အခြေအနေကောင်း ခဲ့တာပါ။ 

အင်တာမိုင်ယာမီအသင်းအတွက် အနိုင်ဂိုး သွင်းယူပေးပြီး ခြေစွမ်းပြသနိုင်ခဲ့တဲ့ အသင်းခေါင်းဆောင် မက်ဆီဟာ ဒီပွဲရဲ့အကောင်းဆုံး ကစားသမားဆုကို ရရှိခဲ့ပါတယ်။

မက်ဆီကို တွေ့ရစဉ်

မက်ဆီက ဒီနိုင်ပွဲဟာ တစ်သင်းလုံးရဲ့ ကြိုးစားအားထုတ်မှုကြောင့် ရရှိခဲ့တာလို့ ပွဲအပြီး DAZN နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့ပါတယ်။ 

မက်ဆီက “ဒီနိုင်ပွဲဟာ အလွန်အရေးပါတဲ့အတွက် ကျနော်တို့ ဒါကို ပျော်ပျော်ရွှင်ရွှင်ခံစားမှာပါ။ ဖရီးကစ်ကတော့ ဂိုးသမားရဲ့ နေရာလွတ်ကို အခွင့်ကောင်းယူကာ ဂိုးသွင်းယူနိုင်ဖို့ ကြိုးစားခဲ့တာပါ။ ကျနော်တို့ရဲ့ နောက်လာမယ့် ပွဲက ပါလ်မီးရပ်စ်နဲ့ တွေ့ဆုံရမှာဖြစ်ပြီး ဒီအသင်းဟာ ကမ္ဘာပေါ်မှာ အကြီးမားဆုံးအသင်းပါ။ ဒီပွဲက ကျနော်တို့ အတွက် နောက်ထပ်ခက်ခဲတဲ့ ပွဲတစ်ပွဲဖြစ်လာလိမ့်မယ်”လို့ ပြောခဲ့တာပါ။ 

အင်တာမိုင်ယာမီအသင်းဟာ ဖီဖာရဲ့နိုင်ငံတကာ ကလပ်ပြိုင်ပွဲမှာ ဥရောပအသင်းကို အနိုင်ရတဲ့ ပထမဆုံး ကွန်ကာကပ်ဖ် အသင်းအဖြစ်လည်း မှတ်တမ်းဝင်ခဲ့ပါတယ်။ 

မက်ဆီအတွက်လည်း ဒီပွဲမှာသွင်းယူခဲ့တဲ့ သွင်းဂိုးကြောင့် အင်တာမိုင်ယာမီအသင်း ကစားသမားဘဝ ပွဲပေါင်း ၆၁ ပွဲမှာ သွင်းဂိုး ၅၀ ပြည့်ခဲ့တာပါ။ 

အင်တာမိုင်ယာမီအသင်းနည်းပြ မာရှေယာနိုက သူတို့ဟာ ဘယ်အသင်းနဲ့မဆို ယှဉ်ပြိုင်နိုင်တယ်ဆိုတာ ကမ္ဘာနဲ့ ကိုယ့်ကိုယ်ကို ပြသနိုင်ခဲ့တယ်လို့ ပြောခဲ့ပါတယ်။ 

အင်တာမိုင်ယာမီအသင်းဟာ အုပ်စုနောက်ဆုံး ပွဲစဉ်အဖြစ် ပါလ်မီးရပ်စ်အသင်းနဲ့ ယှဉ်ပြိုင်ရမှာဖြစ်ပြီး ပါလ်မီးရပ်စ် အသင်းကလည်း အုပ်စုပွဲစဉ် ၂ ပွဲကစားအပြီးမှာ ရမှတ် ၄ မှတ် ရရှိထားတာဖြစ်ပါတယ်။ 

Source: ESPN