CNI Sport News

၂၀၂၅ ခုနှစ်၊ မတ်လ ၂၁ 

ပေါ်တူဂီအသင်းကို အနိုင်ရခဲ့တဲ့ နေးရှင်းလိဂ် ကွာတားဖိုင်နယ် ပထမအကျော့ပွဲစဉ်မှာ ဒိန်းမတ်အသင်းအတွက် အနိုင်ဂိုး သွင်းယူပြီးနောက် 'Siu' အောင်ပွဲခံမှု ပြုလုပ်ခဲ့တာဟာ သူ့ရဲ့ Idol ရော်နယ်ဒိုကို လှောင်ပြောင်ဖို့ ကြိုးစားတာ မဟုတ်ဘူးလို့ ဟော့ဂျ်လန်းက ပြောခဲ့ပါတယ်။

ဟော့ဂျ်လန်းက “ရော်နယ်ဒိုက ကျနော့်ရဲ့ Idol ပါ။ ဒါက သူ့ကို လှောင်ပြောင်ခဲ့တာ မဟုတ်ပါဘူး။ သူဟာ ကျနော် နဲ့ ကျနော့်ရဲ့ ကစားသမားဘဝအတွက် ကြီးမားတဲ့ သက်ရောက်မှုရှိခဲ့ပါတယ်။ ရော်နယ်ဒိုနဲ့ ပေါ်တူဂီကို ဂိုးသွင်း နိုင်ခဲ့တာက ကြီးမားပါတယ်။ ၂၀၁၁ က ဖရီးကစ်ကနေ သူဂိုးသွင်းယူခဲ့တာကို ကျနော်မှတ်မိပြီး အဲဒီအချိန် ကတည်းကနေ ကျနော်ဟာ ရော်နယ်ဒိုရဲ့ ကြီးမားတဲ့ ပရိသတ်ဖြစ်ခဲ့ပါတယ်။ ဒီနေ့ကတော့ ကျနော့်အတွက် အလွန်ကောင်းမွန်တဲ့နေ့ ဖြစ်ခဲ့ပါတယ်”လို့ ဒိန်းမတ်ရုပ်သံ TV2 ကို ပြောခဲ့တာပါ။

ဒိန်းမတ်အသင်းက ပေါ်တူဂီအသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ နေးရှင်းလိဂ် ကွာတားဖိုင်နယ် ပထမအကျော့ ပွဲစဉ်မှာ ဟော့ဂျ်လန်းဟာ ဒုတိယပိုင်း ပွဲချိန် ၆၉ မိနစ်မှာ လူစားလဲ ဝင်ရောက်လာခဲ့ပြီး ၇၈ မိနစ်မှာ အနိုင်ဂိုး သွင်းယူခဲ့တာ ဖြစ်ပါတယ်။ 

ဟော့ဂျ်လန်းဟာ ဂိုးသွင်းယူပြီးနောက်မှာ ပေါ်တူဂီအသင်းခေါင်းဆောင် ရော်နယ်ဒိုရဲ့ နာမည်ကြီး အောင်ပွဲခံ ဟန်ဖြစ်တဲ့ 'Siu' အောင်ပွဲခံမှုကို ပြုလုပ်သွားခဲ့တာပါ။ 

ဒိန်းမတ်အသင်းသားတွေကို တွေ့ရစဉ်

ရော်နယ်ဒိုဟာ ဟော့ဂျ်လန်းရဲ့ အောင်ပွဲခံမှုကို ကြည့်ခဲ့ရပေမယ့် ယူနိုက်တက်အသင်း တိုက်စစ်မှူးကတော့ ဒီအောင်ပွဲခံမှုဟာ ရော်နယ်ဒိုကို လှောင်ပြောင်ခဲ့တာ မဟုတ်ဘူးလို့ ပြောခဲ့ပါတယ်။ 

ဒီပွဲမှာ ဒိန်းမတ်အသင်းဟာ ပထမပိုင်းပွဲချိန်အတွင်း ပင်နယ်တီ ကန်ခွင့်ရခဲ့ပြီး အဲရစ်ဆန်ရဲ့ ကန်သွင်းမှုကို ပေါ်တူဂီ အသင်းဂိုးသမား ကော်စတာ ကာကွယ်နိုင်ခဲ့တာပါ။ 

ပေါ်တူဂီအသင်းဟာ ဒီပွဲအရေးနိမ့်ခဲ့ပေမယ့် ဒုတိယအကျော့ ကစားဖို့ ကျန်ရှိနေသေးတဲ့အတွက် နောက်တဆင့် တက်ဖို့ မျှော်လင့်ချက်ရှိတယ်လို့ ရော်နယ်ဒိုက သူ့ရဲ့ဆိုရှယ်မီဒီယာမှာ ရေးသားခဲ့ပါတယ်။ 

ပေါ်တူဂီနဲ့ ဒိန်းမတ်အသင်းတို့ရဲ့ နေးရှင်းလိဂ် ကွာတားဖိုင်နယ် ဒုတိယအကျော့ပွဲစဉ်ကို မတ်လ ၂၄ ရက်မှာ ယှဉ်ပြိုင်သွားမှာ ဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ မတ်လ ၂၀

လေဗာကူဆင်အသင်းကွင်းလယ်လူ ဖလော်ရီယန်ဗစ်ဇ်ရဲ့အနာဂတ်နဲ့ ပတ်သက်တဲ့ဆုံးဖြတ်ချက်ကြောင့် သူ့ကို ခေါ်ယူဖို့ ပစ်မှတ်ထားနေတဲ့ မန်စီးတီးနဲ့ ဘိုင်ယန်မြူးနစ်အသင်းတို့ စိတ်ပျက်ရဖွယ်ရှိနေပါတယ်။ 

Sport Bild က ဖလော်ရီယန်ဗစ်ဇ်ဟာ သူ့ရဲ့နောက်ဆုံး ဆုံးဖြတ်ချက်ကို ဧပြီအစောပိုင်းမှာ ပြုလုပ်ဖွယ်ရှိနေပြီး သူ့ရဲ့ဦးစားပေးက လေဗာကူဆင်အသင်းမှာ ဆက်ရှိနေဖို့ဖြစ်တယ်လို့ ဖော်ပြထားတာပါ။ 

ဖလော်ရီယန်ဗစ်ဇ်ရဲ့ အကြံပေးတွေဖြစ်တဲ့ သူ့ရဲ့မိသားစုတွေဟာ ၂၀၂၆ ကမ္ဘာ့ဖလားပြိုင်ပွဲအပြီးမှာ အပြောင်းအရွှေ့ပြုလုပ်ရင် သူ့ရဲ့ ကစားသမားဘ၀ ပိုပြီးအကျိုးရှိနိုင်မယ်လို့ ယုံကြည်နေတာဖြစ်ပါတယ်။ 

ဂျာမန်ကွင်းလယ်လူအနေနဲ့ လေဗာကူဆင်အသင်းမှာဆက်ရှိဖို့ဆုံးဖြတ်ခဲ့ရင် အသင်းဟာ သူ့ကို ၂၀၂၈ ခုနှစ်အထိ ၁ နှစ်စာချုပ်သက်တမ်းတိုးဖို့ စီစဉ်နေတာပါ။ 

စာချုပ်သစ်ထဲမှာ စာချုပ်ဖျက်သိမ်းကြေး ယူရို ၁၂၅ သန်းပါဝင်မှာဖြစ်ပြီး ဒါက ၂၀၂၆ ခုနှစ်ရောက်ရင် အသက်ဝင် မယ်လို့ သိရပါတယ်။ 

ဒီအချက်ဟာ မန်စီးတီး၊ဘိုင်ယန်မြူးနစ်နဲ့ ရီးရယ်လ်အသင်းတို့ကို အနာဂတ်မှာ ဖလော်ရီယန်ဗစ်ဇ်ကို ခေါ်ယူဖို့ကမ်းလှမ်းမှုတွေပြုလုပ်လို့ရမှာဖြစ်ပေမယ့် လေဗာကူဆင်အသင်းက သူ့ကို ဆက်ပြီး ထိန်းသိမ်းလို့ရရှိဦးမှာပါ။ 

ဒါပေမယ့် ဖလော်ရီယန်ဗစ်ဇ်အနေနဲ့ ၂၀၂၆ ခုနှစ်ထက်စောပြီး ထွက်ခွာဖို့ဆုံးဖြတ်ခဲ့ရင် လေဗာကူဆင်အသင်းဟာ ပြောင်းရွှေ့ကြေး အနည်းဆုံးယူရိုသန်း ၁၅၀ တောင်းဆိုသွားမယ်လို့ သိရပါတယ်။

ဘိုင်ယန်မြူးနစ်အသင်းဟာ ဖလော်ရီယန်ဗစ်ဇ်ကို ခေါ်ယူချင်တယ်လို့ အတည်ပြုထားပေမယ့် ဘဏ္ဍာရေး အခြေ အနေကြောင့် ခေါ်ယူဖို့ အခက်အခဲရှိနိုင်တာပါ။ 

လာမယ့်ရာသီအတွက် ကြိုတင်ပြင်ဆင်မှုတွေပြုလုပ်နေတဲ့ မန်စီးတီးအသင်းဟာ ဖလော်ရီယန်ဗစ်ဇ်ကို နွေရာသီမှာ ခေါ်ယူနိုင်ဖို့ ကြိုးပမ်းနေသလို ရီးရယ်လ်အသင်းကလည်း ဝါရင့်ကွင်းလယ်လူ မိုဒရစ်ရဲ့နေရာမှာ ရေရှညအစားထိုးဖို့ ဖလော်ရီယန်ဗစ်ဇ်ကို ပစ်မှတ်ထားနေပါတယ်။

ဒဏ်ရာကြောင့် အနားယူနေရတဲ့ ဖလော်ရီယန်ဗစ်ဇ်ဟာ ဒီရာသီမှာ လေဗာကူဆင်အသင်းအတွက် ၃၉ ပွဲ ပါဝင် ကစားထားပြီး ၁၅ ဂိုးသွင်းယူကာ ဂိုးဖန်တီးမှု ၁၃ ကြိမ်ပြုလုပ်ထားတာဖြစ်ပါတယ်။ 

Source:Goal

CNI Sport News

၂၀၂၅ ခုနှစ်၊ မတ်လ ၂၀ 

ယူနိုက်တက်အသင်း တိုက်စစ်မှူးဟောင်း ဂရင်းဝုဒ်ဟာ ပြင်သစ်ပွဲဦးထွက်ရာသီမှာ ခြေစွမ်းပြသနေပေမယ့် ရာသီကုန်မှာ မာဆေးလ်အသင်းကနေ ထွက်ခွာရဖွယ်ရှိနေတယ်လို့ ပြင်သစ်မီဒီယာတွေက ဖော်ပြထားပါတယ်။ 

အသက် ၂၃ နှစ်အရွယ်ရှိ ဂရင်းဝုဒ်ဟာ ဒီရာသီမှာ မာဆေးလ်အသင်းအတွက် ၂၈ ပွဲ ကစားထားပြီး ၁၅ ဂိုး သွင်းယူကာ ပြင်သစ်လီဂူး-၁ ဂိုးသွင်းရွှေဖိနပ်ဆုအတွက် ဒုတိယနေရာမှာ ရပ်တည်နေတာပါ။

ဒါပေမယ့် မာဆေးလ်အသင်းနည်းပြ ဒီဇာဘီရဲ့ မကြာသေးခင်က ဝေဖန်မှုတွေဟာ ဂရင်းဝုဒ်ရဲ့ အနာဂတ်ကို သံသယ ဖြစ်လာစေခဲ့ပါတယ်။

ဂရင်းဝုဒ်ဟာ ဒီရာသီမှာ မာဆေးလ်အသင်းရဲ့ အဓိက ကစားသမား ဖြစ်နေပေမယ့် နောက်ဆုံး ကစားခဲ့တဲ့ပွဲတွေမှာ ပွဲထွက်လူစာရင်းကနေ ချန်လှပ်ခြင်းခံခဲ့ရတာပါ။ 

မာဆေးလ်အသင်းနည်းပြ ဒီဇာဘီက သူဟာ ဂရင်းဝုဒ်ကို အများကြီး လေးစားမှုရှိသလို အများကြီးလည်း မျှော်လင့် ထားပေမယ့် သူလက်ရှိပြသနေတဲ့ အရာတွေက လုံလောက်မှုမရှိတာကြောင့် ဒီထက်ပိုပြီး လုပ်ရမယ်လို့ ပြောထား ပါတယ်။ 

 ဂရင်းဝုဒ်ကို တွေ့ရစဉ်

RMC Sport ဂျာနယ်လစ် ဂျာမိန်းက ဂရင်းဝုဒ်အနေနဲ့ နည်းပြရဲ့ အကြံပေးချက်အတိုင်း မလုပ်နိုင်ဘူးဆိုရင် မာဆေးလ်အသင်းကနေ ထွက်ခွာရဖို့ ဦးတည်နိုင်တယ်လို့ ပြောခဲ့တာပါ။ 

မကြာသေးခင်က နည်းပြဒီဇာဘီနဲ့ မာဆေးလ်အသင်း စီမံခန့်ခွဲမှုတို့ဟာ ဂရင်းဝုဒ်ရဲ့ စိတ်နေသဘောထားနဲ့ အားထုတ်မှု နည်းပါးမှုတွေအပေါ် စိတ်ပျက်မှုတွေ ပိုပြီးတိုးလာတယ်လို့ RMC Sport က ဖော်ပြခဲ့ပါတယ်။ 

ပြီးခဲ့တဲ့ရာသီက အငှားကစားခဲ့တဲ့ ဂီတာဖေးအသင်းမှာ ၁၀ ဂိုးသွင်းပြီး ဂိုးဖန်တီးမှု ၆ ကြိမ် ပြုလုပ်ခဲ့တဲ့ ဂရင်းဝုဒ်ဟာ နွေရာသီက မာဆေးလ်အသင်းထံ အပြီးသတ် ပြောင်းရွှေ့လာခဲ့တာပါ။ 

မာဆေးလ်အသင်းမှာ ပြသနေတဲ့ ဂရင်းဝုဒ်ရဲ့ ခြေစွမ်းကြောင့် အသင်းကြီးတချို့က သူ့ကိုခေါ်ယူဖို့ စိတ်ဝင် စားနေကြပါတယ်။

မာဆေးလ်အသင်းဟာ ဒီရာသီ ပြင်သစ်လီဂူး-၁ ပြိုင်ပွဲမှာ အမှတ်ပေးဇယားအဆင့် ၂ နေရာ ရပ်တည်နေပြီး အဆင့် ၁ နေရာက ပီအက်စ်ဂျီအသင်းနဲ့ ၁၉ မှတ်ကွာဟနေတာ ဖြစ်ပါတယ်။ 

Source:Dailymail

CNI Sport News

၂၀၂၅ ခုနှစ်၊ မတ်လ ၂၀

ချယ်လ်ဆီးအသင်းဟာ စပို့တင်းလစ္စဘွန်းအသင်း ကစားသမား ၂ ဦးဖြစ်တဲ့ ကွမ်ဒါနဲ့ အက်စ်ဆူဂိုတို့ နှစ်ဦးကို ပေါင် ၆၂.၄ သန်းနဲ့ ခေါ်ယူမှု အပြီးသတ်ခဲ့တယ်လို့ ပေါ်တူဂီကလပ်က အတည်ပြုခဲ့ပါတယ်။ 

ယူနိုက်တက်အသင်း အပါအဝင် အသင်းအချို့ရဲ့ စိတ်ဝင်စားမှုခံခဲ့ရတဲ့ အသက် ၁၇ နှစ်အရွယ်ရှိ ကွမ်ဒါအတွက် ချယ်လ်ဆီးအသင်းဟာ စပို့တင်းလစ္စဘွန်းအသင်းကို ပေါင် ၄၄ သန်းပေးရမှာပါ။ 

ပေါ်တူဂီကစားသမားဟာ ၂၀၂၅-၂၆ ရာသီကုန်မှသာ ချယ်လ်ဆီးအသင်းထံ ပြောင်းရွှေ့မှာ ဖြစ်ပါတယ်။ 

ကွမ်ဒါဟာ ဒီရာသီမှာ စပို့တင်းလစ္စဘွန်းအသင်းကြီးအတွက် စတင် ပါဝင်ခွင့်ရခဲ့ပြီး ၄၄ ပွဲ ကစားထားကာ ၂ ဂိုး သွင်းယူထားတာပါ။ 

ကွမ်ဒါဟာ စပို့တင်းလစ္စဘွန်းအသင်းမှာ ခြေစွမ်းပြသနေတာကြောင့် နေးရှင်းလိဂ်ပြိုင်ပွဲ ယှဉ်ပြိုင်နေတဲ့ ပေါ်တူဂီ အသင်း လူစာရင်းမှာ ရွေးချယ်ခံထားရပါတယ်။ 

လက်စ်ပါးမားစ်အသင်းမှာ အငှားနဲ့ ကစားနေတဲ့ အသက် ၂၀ နှစ်အရွယ်ရှိ ကွင်းလယ်ခံစစ် ကစားသမား အက်စ်ဆူဂိုဟာ ဒီနွေရာသီမှာ ချယ်လ်ဆီးအသင်းထံ ပြောင်းရွှေ့မှာပါ။ 

အက်စ်ဆူဂိုကို တွေ့ရစဉ်

ချယ်လ်ဆီးအသင်းဟာ အက်စ်ဆူဂိုအတွက် စပို့တင်းလစ္စဘွန်းအသင်းကို ပေါင် ၁၈.၄ သန်းပေးချေရမှာ ဖြစ်ပါတယ်။ 

အက်စ်ဆူဂိုဟာ လက်စ်ပါးမားစ်အသင်းမှာ ခြေစွမ်းပြသနေပေမယ့် နောက်ဆုံး ကစားထားတဲ့ ၄ ပွဲမှာ အနီကတ် ၂ ကြိမ်အထိ ပြသခံထားရတာပါ။ 

ချယ်လ်ဆီးအသင်း ပရိသတ်တွေဟာ ကွမ်ဒါကို မြင်တွေ့ရဖို့ စောင့်ဆိုင်းရဦးမှာဖြစ်ပေမယ့် အက်စ်ဆူဂိုကိုတော့ လာမယ့်နွေရာသီမှာ ကျင်းပမယ့် ဖီဖာကလပ် ကမ္ဘာ့ဖလားပြိုင်ပွဲမှာ မြင်တွေ့ရဖို့ရှိနေပါတယ်။ 

ချယ်လ်ဆီးအသင်းဟာ အနာဂတ်အတွက် ရည်ရွယ်ကာ လူငယ်ကစားသမားတွေကို အားဖြည့်နေပြီး နွေရာသီမှာ လူငယ် ကစားသမားတွေဖြစ်တဲ့ ဘရာဇီးလ်က အီစတီဗာအိုနဲ့ အီကွေဒေါက ကန်ဒရီပက်ဇ်တို့ဟာ အသင်းထံ လာရောက်ပူးပေါင်းမှာပါ။ 

ချယ်လ်ဆီးအသင်းဟာ ဒီရာသီ ပရီးမီးယားလိဂ်ပြိုင်ပွဲမှာ အမှတ်ပေးဇယား အဆင့် ၄ နေရာ ရပ်တည်နေပြီး ကွန်းဖရန့်လိဂ်ပြိုင်ပွဲမှာ ကွာတားဖိုင်နယ်ကို ရောက်ရှိနေတာဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ မတ်လ ၂၀

ယူနိုက်တက်အသင်း နောက်ခံလူ ဒါလော့က ပေါ်တူဂီကစားသမားတိုင်းဟာ အသင်းခေါင်းဆောင် ရော်နယ်ဒို ကစားသမားဘဝကနေ အနားမယူခင် ကမ္ဘာ့ဖလားရယူပေးဖို့ ဆန္ဒရှိတယ်လို့ ပြောခဲ့ပါတယ်။

ဒါလော့က “ရော်နယ်ဒိုကို ဖော်ပြဖို့အတွက် နောက်ထပ် နာမဝိသေသနတွေကို ရှာဖွေဖို့က အလွန်ခက်ခဲပါတယ်။ ရော်နယ်ဒို နိုင်ငံအသင်းမှာ ဆက်ရှိနေပြီး အခိုက်အတန့်တွေကို မျှဝေခွင့်ရတာဟာ ကျနော်တို့အတွက် ကြီးမားတဲ့ အခွင့်ထူးပါ။ သူ့ရဲ့ ကစားသမားဘဝ တစ်လျှောက်လုံးမှာ ပြသခဲ့တဲ့ ချစ်ခြင်းမေတ္တာတွေဟာ မေးခွန်းထုတ်လို့ မရ ပါဘူး။ ကျနော်တို့ဟာ ဒါကို ဥပမာအနေနဲ့အသုံးပြုပြီး ပေါ်တူဂီအတွက် သူအနိုင်ရတာကို မြင်တွေ့ရမှာဟာ လှပတဲ့ ဇာတ်လမ်းတစ်ပုဒ် ဖြစ်လာပါလိမ့်မယ်။ ကစားသမားတိုင်းကလည်း ဒါကိုလိုချင်တယ်ဆိုတာ ကျနော် ယုံကြည်ပါတယ်”လို့ ပြောခဲ့တာပါ။

အသက် ၄၀ နှစ် အရွယ်ရှိပြီဖြစ်တဲ့ ရော်နယ်ဒိုအတွက် လာမယ့် ၂၀၂၆ ကမ္ဘာ့ဖလားပြိုင်ပွဲဟာ ကမ္ဘာ့ဖလားချန်ပီယံ ဆုကို ရယူချင်တဲ့ သူ့ရဲ့နောက်ဆုံး အခွင့်အရေးဖြစ်လာဖို့ ရှိနေပါတယ်။

ရော်နယ်ဒိုကတော့ အခုအချိန်ထိ အနားယူမယ့်ရက်ကို ထုတ်ဖော်ပြောထားခြင်း မရှိသေးပေမယ့် ၂၀၂၆ ကမ္ဘာ့ဖလားပြိုင်ပွဲပြီးရင် သူအနားယူလိမ့်မယ်လို့ အများအပြားက ခန့်မှန်းထားကြတာပါ။ 

ရော်နယ်ဒိုကို တွေ့ရစဉ်

ရော်နယ်ဒိုဟာ ပေါ်တူဂီအသင်းကို ယူရို ၂၀၁၆ နဲ့ ၂၀၁၉ နေးရှင်းလိဂ် ပြိုင်ပွဲတွေမှာ ချန်ပီယံဆု ရရှိအောင် ကူညီပေးထားတာ ဖြစ်ပါတယ်။ 

ဒါလော့ကတော့ ရော်နယ်ဒိုနဲ့ ပေါ်တူဂီအသင်းမှာ အတူတွဲကစားခွင့်ရတဲ့ အချိန်အတွင်းမှာ ဆုဖလားတွေ ရယူပေးနိုင်ဖို့ မျှော်လင့်နေတာပါ။

ပေါ်တူဂီအသင်းဟာ လက်ရှိအချိန်မှာ နေးရှင်းလိဂ် ကွာတားဖိုင်နယ်ကစားဖို့ လေ့ကျင့် ပြင်ဆင်မှုတွေ ပြုလုပ်နေပြီး ဒိန်းမတ်အသင်းနဲ့ နှစ်ကျော့ယှဉ်ပြိုင်ရမှာ ဖြစ်ပါတယ်။ 

ဒိန်းမတ်နဲ့ ပေါ်တူဂီအသင်းတို့ရဲ့ ပထမအကျော့ပွဲစဉ်ကို မတ် ၂၁ ရက်မနက်ပိုင်း ယှဉ်ပြိုင်သွားမှာပါ။ 

ဒီပွဲစဉ်မှာ အနိုင်ရတဲ့ အသင်းဟာ ၂၀၂၆ ကမ္ဘာ့ဖလား ခြေစစ်ပွဲအဖြစ် ဟန်ဂေရီ၊ အိုင်ယာလန်၊ အာမေးနီးယား အသင်းတို့နဲ့ ယှဉ်ပြိုင်ရမှာဖြစ်ပြီး အရေးနိမ့်တဲ့အသင်းက ဂရိ၊ စကော့တလန်၊ ဘယ်လာရုစ်အသင်းတို့နဲ့ ယှဉ်ပြိုင်ရမှာဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ မတ်လ ၁၉

ခရိုအေးရှား ဝါရင့်ကစားသမား မိုဒရစ်ဟာ ရီးရယ်လ်အသင်းမှာ နောက်ထပ် တစ်ရာသီ ဆက်ရှိချင်နေတယ်လို့ နာမည်ကြီးဂျာနယ်လစ် ဖာဘရီဇီယိုရိုမာနိုက ဖော်ပြထားပါတယ်။ 

မိုဒရစ်ရဲ့ စာချုပ်ဟာ ဒီရာသီကုန်ရင် ကုန်ဆုံးမှာဖြစ်တဲ့အတွက် သူဟာ ၂၀၂၆ ခုနှစ်၊ ဇွန်လအထိ ရီးရယ်လ်အသင်း မှာ ဆက်ရှိမယ့် စာချုပ်သက်တမ်း တိုးချင်နေတာပါ။

ပြီးခဲ့တဲ့ ဆယ်စုနှစ်အတွင်း ရီးရယ်လ်အသင်းရဲ့ အောင်မြင်မှုတွေမှာ အဓိက အရေးပါတဲ့သူဖြစ်ခဲ့တဲ့ မိုဒရစ်ဟာ လာမယ့် စက်တင်ဘာဆိုရင် အသက် ၄၀ နှစ်ပြည့်တော့မှာ ဖြစ်ပါတယ်။ 

ဒါပေမယ့် မိုဒရစ်က သူဟာ ထိပ်တန်းအဆင့်မှာ ကစားနိုင်ကြောင်းကို စာချုပ်သက်တမ်းတိုးပြီး ပြသချင်နေတာပါ။ 

မိုဒရစ်ဟာ ဒီရာသီမှာ ရီးရယ်လ်အသင်းအတွက် ပြိုင်ပွဲစုံ ၄၅ ပွဲ ပါဝင်ကစားထားပြီး ၄ ဂိုးသွင်းယူကာ ဂိုးဖန်တီးမှု ၇ ကြိမ် ပြုလုပ်ထားပေမယ့် ပွဲထွက်လူစာရင်းထက် အရန်ကစားသမားအဖြစ်သာ ပါဝင်နေရတာက ပိုပြီးများနေပါ တယ်။

မိုဒရစ်ကို တွေ့ရစဉ်

မိုဒရစ်ကတော့ သူ့ရဲ့ဦးစားပေး ရွေးချယ်မှုဟာ အမြဲတမ်း ရီးရယ်လ်အသင်း ဖြစ်နေတာကြောင့် အသင်း အောင်မြင် မှုတွေ ရယူနိုင်ဖို့အတွက် ဆက်ပြီး ပါဝင်ကူညီနေချင်နေတာပါ။ 

ရီးရယ်လ်အသင်းဟာ ပြီးခဲ့တဲ့ ရာသီကလည်း မိုဒရစ်ကို စာချုပ်သက်တမ်း ၁ နှစ်တိုးခဲ့သလို ဒီရာသီအကုန်မှာ လည်း နောက်ထပ် ၁ နှစ် သက်တမ်း တိုးဖွယ်ရှိနေပါတယ်။ 

ရီးရယ်လ်အသင်းနည်းပြ အန်ဆယ်လော့တီက မိုဒရစ်ဟာ ဘောလုံးအတွက် လက်ဆောင်ဖြစ်တယ်လို့ ပြောထားတာပါ။

၂၀၁၂ ခုနှစ်ကတည်းက စပါးအသင်းကနေ ရောက်ရှိလာခဲ့တဲ့ မိုဒရစ်ဟာ ရီးရယ်လ်အသင်းအတွက် ပြိုင်ပွဲစုံ ၅၇၉ ပွဲ ပါဝင်ကစားထားပြီး ၄၃ ဂိုး သွင်းယူထားပါတယ်။

မိုဒရစ်ဟာ ရီးရယ်လ်အသင်းမှာ ဆုဖလားပေါင်း ၂၈ ခုအထိ ရရှိထားပြီး ရီးရယ်လ်အသင်းသမိုင်းမှာ အောင်မြင်မှု အများဆုံးရရှိထားတဲ့ ကစားသမားအဖြစ် ရပ်တည်နေတာဖြစ်ပါတယ်။ 

Source: besoccer

CNI Sport News

၂၀၂၅ ခုနှစ်၊ မတ်လ ၁၉

အေစီမီလန်အသင်းဟာ ရာသီကုန်အထိ အငှားနဲ့ခေါ်ယူထားတဲ့ ညာနောက်ခံလူ ဝေါ်လ်ကာကို မန်စီးတီး အသင်းထံကနေ လျှော့ဈေးနဲ့ အပြီးသတ်ခေါ်ယူဖို့ ဆန္ဒရှိနေတယ်လို့ Tuttosport က ဖော်ပြထားပါတယ်။

အေစီမီလန်အသင်းဟာ ဝေါ်လ်ကာကို အပြီးသတ် ခေါ်ယူချင်တဲ့အတွက် ပြီးခဲ့တဲ့ နွေရာသီက စပါးအသင်းကနေ ခေါ်ယူထားတဲ့ ညာနောက်ခံလူ အီမာဆန်ကို တစ်ရာသီအကြာမှာ ပြန်ရောင်းချဖို့ လုပ်ဆောင်နေတာပါ။ 

စီးရီးအေကလပ်ဟာ ဝေါ်လ်ကာကို ဦးစားပေး ညာနောက်ခံလူအဖြစ် သတ်မှတ်ခဲ့တာကြောင့် အီမာဆန်ဟာ အသင်းရဲ့အစိတ်အပိုင်းမှာ ပါဝင်ခြင်း မရှိတော့ဘူးလို့ ယူဆထားတာဖြစ်ပါတယ်။ 

အေစီမီလန်အသင်းဟာ ဝေါ်လ်ကာကို ရာသီကုန်ချိန်မှာ မန်စီးတီးအသင်းထံကနေ ယူရို ၅ သန်းနဲ့ အပြီးသတ် ဝယ်ယူဖို့ ရွေးချယ်ခွင့်ရှိထားတာပါ။ 

ဝေါ်ကာကို တွေ့ရစဉ်

ဒါပေမယ့် အေစီမီလန်အသင်းဟာ မန်စီးတီးအသင်းနဲ့ သဘောတူညီမှု ရရှိထားတဲ့ ပြောင်းရွှေ့ကြေးကို အနည်းငယ် လျှော့ဈေးလိုချင်နေတာ ဖြစ်ပါတယ်။ 

ဝေါ်လ်ကာကလည်း အေစီမီလန်အသင်းမှာ ပျော်ရွှင်နေပြီး ဆက်ရှိချင်နေတာပါ။ 

အင်္ဂလန်နောက်ခံလူဟာ မန်စီးတီးအသင်းမှာ သူ့အနာဂတ် မရှိတော့ဘူးဆိုတဲ့ အချက်ကို ကောင်းမွန်စွာ သိရှိထားတာ ဖြစ်ပါတယ်။ 

အေစီမီလန်အသင်းရဲ့ ဝါရင့်ညာနောက်ခံလူဖြစ်တဲ့ ဖလော်ရန်ဇီကလည်း အသင်းမှာ သူ့ရဲ့နေရာအတွက် တိုက်ပွဲဝင်ချင်နေတာကြောင့် ဇွန်လ ၃၀ ရက်မှာ ကုန်ဆုံးမယ့် သူ့ရဲ့စာချုပ်ကို သက်တမ်းတိုးချင်နေတာပါ။ 

ဖလော်ရန်ဇီဟာ အေစီမီလန်အသင်းမှာ ဆက်ရှိဖို့အတွက် သူရရှိနေတဲ့ လစာ အများအပြားကို လျှော့ပြီးယူဖို့ ဆန္ဒရှိနေတာ ဖြစ်ပါတယ်။ 

အေစီမီလန်အသင်းဟာ ဒီရာသီမှာ ရယူနိုင်စရာ ဆုဖလားအဖြစ် ကိုပါအီတာလီယာဖလားပြိုင်ပွဲသာ ကျန်ရှိ တော့ပြီး ဆီမီးဖိုင်နယ်အဆင့်ကို ရောက်ရှိနေကာ မြို့ခံပြိုင်ဘက် အင်တာမီလန်အသင်းနဲ့ ယှဉ်ပြိုင်ရမှာပါ။ 

အေစီမီလန်အသင်းဟာ စီးရီးအေပြိုင်ပွဲမှာ အမှတ်ပေးဇယား အဆင့် ၉ နေရာ ရပ်တည်နေပြီး ဥရောပ ဝင်ခွင့်ရနိုင်ဖို့အတွက် လက်ကျန်ပွဲတွေမှာ ရလဒ်ကောင်းတွေ ရယူနိုင်ဖို့ မျှော်လင့်နေတာပါ။ 

အေစီမီလန်အသင်းဟာ နိုင်ငံတကာ ပွဲစဉ်တွေအပြီးမှာ စီးရီးအေပွဲစဉ်အဖြစ် နာပိုလီအသင်းနဲ့ ယှဉ်ပြိုင်ရမှာ ဖြစ်ပါတယ်။ 

CNI Sport News

၂၀၂၅ ခုနှစ်၊ မတ်လ ၁၉

ဒိန်းမတ်ကွင်းလယ်လူ အဲရစ်ဆန်က စာချုပ်ကုန်ဆုံးမယ့် ဒီရာသီကုန်မှာ ယူနိုက်တက်အသင်းကနေ ထွက်ခွာဖို့ မျှော်လင့်တယ်လို့ ပြောခဲ့ပါတယ်။ 

အဲရစ်ဆန်က “ကလပ်ဆီကနေ ပြောတဲ့အသံ ဘာမှမကြားရတဲ့အတွက် ပူးပေါင်းဆောင်ရွက်မှုတွေ ပြီးဆုံး သွားမယ်လို့ ထင်ပါတယ်။ အားလုံးက ကျနော် စာချုပ်ကုန်ဆုံးမယ်ဆိုတာကို သိပါတယ်။ အဲဒါကြောင့် ဒီနည်းလမ်းက တစ်ခုတည်းပဲရှိဖို့ ကျနော်မျှော်လင့်ပါတယ်။ ကျနော် အများကြီး မတွေးထားဘဲ စိတ်ထဲမှာတော့ အသစ်တစ်ခုရှာဖို့ ပြင်ဆင်နေပါတယ်။ ကျနော် ဆုံးဖြတ်ချက် မချရသေးဘဲ မိသားစုနဲ့ အဆင်ပြေမယ့် အရာတွေ ကို ကြည့်သွားမှာပါ”လို့ ဒိန်းမတ် TV နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။ 

၂၀၂၂ ခုနှစ်က ယူနိုက်တက်အသင်းကို ရောက်ရှိလာခဲ့တဲ့ အဲရစ်ဆန်ဟာ ဒီရာသီ နည်းပြအာမိုရင် လက်ထက်မှာ ပွဲကစားခွင့်ရဖို့ ရုန်းကန်နေရတာ ဖြစ်ပါတယ်။

ယူနိုက်တက်အသင်းအတွက် ပြိုင်ပွဲစုံ ၉၉ ပွဲ ပါဝင်ကစားထားပြီး ၇ ဂိုး သွင်းယူထားတဲ့ အဲရစ်ဆန်ဟာ စာချုပ်သစ် အတွက် ဆွေးနွေးမှုမရှိတာကြောင့် ရာသီကုန်ရင် အသင်းကနေ ထွက်ခွာရတော့မှာပါ။ 

အဲရစ်ဆန်ကို တွေ့ရစဉ်

အဲရစ်ဆန်ဟာ ဒိန်းမတ်လက်ရွေးစင် ကစားသမားဖြစ်ပေမယ့် သူ့ရဲ့ပရော်ဖက်ရှင်နယ် ကစားသမားဘဝ တစ်လျှောက်လုံးကို ဒိန်းမတ် အပြင်ဘက်မှာ ကစားနေခဲ့တာဖြစ်ပါတယ်။

အသက် ၃၃ နှစ်အရွယ်ရှိ အဲရစ်ဆန်ဟာ အေဂျက်စ်၊ စပါး၊ အင်တာမီလန်၊ ဘရန်ဖို့ဒ်နဲ့ အခု ယူနိုက်တက်အသင်း တွေမှာ ကစားသမားဘဝကို ဖြတ်သန်းနေတာပါ။ 

အဲရစ်ဆန်ဟာ ယူနိုက်တက်အသင်းကနေ ထွက်ခွာခဲ့ရင် ဥရောပမှာ ဆက်ပြီးရှိချင်ပေမယ့် ဒိန်းမတ်ကို ပြန်ဖို့စောသေးတယ်လို့ ပြောခဲ့ပါတယ်။ 

အဲရစ်ဆန်ဟာ လက်ရှိအချိန်မှာ ပေါ်တူဂီအသင်းနဲ့ နေးရှင်းလိဂ် ကွာတားဖိုင်နယ်ပွဲစဉ် ကစားဖို့အတွက် ဒိန်းမတ်အသင်းနဲ့အတူ လေ့ကျင့်ပြင်ဆင်မှုတွေ ပြုလုပ်နေတာပါ။

အဲရစ်ဆန်ဟာ ဒိန်းမတ်အသင်းအတွက် ပွဲပေါင်း ၁၄၀ ပါဝင်ကစားထားပြီး ၄၃ ဂိုး သွင်းယူထားတာဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ မတ်လ ၁၉

ဘာစီလိုနာအသင်းကြယ်ပွင့် ယာမဲလ်က သူတို့ဟာ ဒီရာသီ ချန်ပီယံလိဂ်ဖလားကို ရယူဖို့ ရေပန်းအစားဆုံးလို့ Sport နဲ့ ပြုလုပ်ခဲ့တဲ့ အင်တာဗျူးမှာ ပြောသွားခဲ့ပါတယ်။ 

ယာမဲလ်က “ကျနော်တို့ဟာ ချန်ပီယံလိဂ်ပြိုင်ပွဲမှာ ရေပန်းအစားဆုံးပါ။ အုပ်စုအဆင့်တွေ ပြီးဆုံးသွားချိန်မှာ လီဗာပူးလ်အသင်းက ထိပ်ဆုံးနေရာ ရပ်တည်ခဲ့လို့ သူတို့ရေပန်းအစားဆုံးလို့ ကျနော် ပြောခဲ့ပါတယ်။ အခုသူတို့ ပြိုင်ပွဲကနေ ထွက်ခွာသွားပြီဖြစ်လို့ ရေပန်းအစားဆုံးက ကျနော်တို့ပါ။ ကျနော်တို့ဟာ ပြီးခဲ့တဲ့နှစ်ကနဲ့ မတူညီတဲ့ အသင်းဖြစ်နေပါပြီ။ ကျနော်တို့ဟာ မိသားစုတစ်စုဖြစ်ပြီး ဘယ်ပြိုင်ဘက်ကိုမှ မကြောက်ဘူး”လို့ ပြောခဲ့တာပါ။ 

ဘာစီလိုနာအသင်းဟာ ဒီရာသီ နည်းပြ ဟန်ဆီဖလစ်လက်အောက်မှာ အကောင်းဆုံးပုံစံ ရရှိနေပြီး ၂၀၂၅ ခုနှစ်ထဲ ကစားခဲ့တဲ့ပွဲတွေမှာ ရှုံးပွဲလုံးဝ မရှိသေးတာဖြစ်ပါတယ်။ 

စပိန်ကလပ်ဟာ ဒီရာသီ ချန်ပီယံလိဂ်ပြိုင်ပွဲမှာ ရှုံးပွဲတစ်ပွဲသာ ကြုံတွေ့ထားပြီး ၁၆ သင်းအဆင့်မှာ ဘင်ဖီကာ အသင်းကို ကျော်ဖြတ်ကာ ကွာတားဖိုင်နယ်ကို တက်ရောက်ထားတာပါ။

ယာမဲလ်ကို တွေ့ရစဉ်

ဘာစီလိုနာအသင်းဟာ လာလီဂါပြိုင်ပွဲမှာ အမှတ်ပေးဇယား ထိပ်ဆုံးနေရာ ရပ်တည်နေပြီး ကိုပါဒယ်ရေးဖလား ပြိုင်ပွဲမှာလည်း ဆီမီးဖိုင်နယ်အဆင့်ကို ရောက်ရှိနေတာဖြစ်ပါတယ်။ 

ဘာစီလိုနာအသင်းဟာ ဒီရာသီကစားထားတဲ့ ပြိုင်ပွဲစုံ ၄၃ ပွဲမှာ စံချိန်တင် ၁၃၂ ဂိုးအထိ သွင်းယူထားတာပါ။ 

ဒီရာသီ ချန်ပီယံလိဂ်ပြိုင်ပွဲမှာ ဗိုလ်စွဲဖို့ ရေပန်းအစားဆုံး အသင်းတစ်သင်းဖြစ်လာခဲ့တဲ့ ဘာစီလိုနာအသင်းဟာ ချန်ပီယံလိဂ်ဖလားကို ၂၀၁၄-၁၅ ရာသီက နောက်ဆုံးအကြိမ် ရယူနိုင်ခဲ့တာ ဖြစ်ပါတယ်။ 

အဲဒါကြောင့် ချန်ပီယံလိဂ်ဖလား ရယူနိုင်ဖို့ ၁၀ နှစ်ကြာ စောင့်ဆိုင်းနေရတာကို ဒီရာသီမှာ အဆုံးသတ်နိုင်မလား ဆိုတာ စောင့်ကြည့်ရမှာပါ။ 

ဘာစီလိုနာအသင်းဟာ ချန်ပီယံလိဂ် ကွာတားဖိုင်နယ်မှာ ဒေါ့မွန်အသင်းနဲ့ ယှဉ်ပြိုင်ရမှာဖြစ်ပြီး အုပ်စုအဆင့်မှာ တွေ့ဆုံခဲ့တုန်းက နိုင်ပွဲရယူနိုင်ခဲ့တာဖြစ်ပါတယ်။ 

Source: Goal