- By CNI
- Category: အားကစား
- Hits: 190
CNI Sport News
၂၀၂၆ ခုနှစ်၊ မေလ ၂၇
အီဘိုလာဗိုင်းရပ်စ်နဲ့ ဆက်စပ်တဲ့ ခရီးသွားလာမှုကန့်သတ်ချက်တွေကြောင့် အမေရိကန်နိုင်ငံထဲ ဝင်ရောက်ခွင့် မရတဲ့ ပရိသတ်တွေဝယ်ယူထားတဲ့ ကမ္ဘာ့ဖလားလက်မှတ်ဖိုးတွေကို ပြန်ပေးဖို့ DR ကွန်ဂိုဘောလုံးအဖွဲ့ချုပ်က ကမ္ဘာ့ဘောလုံးအဖွဲ့ချုပ်(ဖီဖာ)ကို တောင်းဆိုခဲ့ပါတယ်။
DR ကွန်ဂိုအသင်းဟာ ၁၉၇၄ ခုနှစ်နောက်ပိုင်း ကမ္ဘာ့ဖလားပြိုင်ပွဲကို ပထမဆုံးအကြိမ်ယှဉ်ပြိုင်ခွင့်ရခဲ့ပေမယ့် ကမ္ဘာ့ကျန်းမာရေးအဖွဲ့ (WHO)က ကြေညာထားတဲ့ အီဘိုလာဗိုင်းရပ်စ်ကြောင့် ပရိသတ်တွေဟာ အမေရိကန် နိုင်ငံကို ခရီးသွားလာခွင့်ပိတ်ပင်ခံရနိုင်တာပါ။
WHO က ခရီးသွားလာမှုကန့်သတ်ချက်တွေချမှတ်မှုမရှိသေးပေမယ့် အမေရိကန်ကတော့ DR ကွန်ဂို၊ ယူဂန်ဒါ ဒါမှမဟုတ် တောင်ဆူဒန်မှာ ပြီးခဲ့တဲ့ ၂၁ ရက်အတွင်းရှိနေခဲ့တဲ့ အမေရိကန်မဟုတ်တဲ့သူတွေကို ပြည်ဝင်ခွင့်ပိတ်ပင်ထားပါတယ်။
ဒါ့အပြင် DR ကွန်ဂိုအသင်းကိုလည်း ကမ္ဘာ့ဖလားပြိုင်ပွဲမတိုင်မီ ၂၁ ရက်ကြာသီးသန့်နေထိုင်ဖို့ ညွှန်ကြားထားတာပါ။
DR ကွန်ဂိုအသင်း
DR ကွန်ဂိုဘောလုံးအဖွဲ့ချုပ်အကြီးအကဲကတော့ လက်မှတ်တွေဟာ ဈေးအနည်းငယ်ကြီးတာကြောင့် ပြန်အမ်းပေးဖို့ ဖီဖာကို တောင်းဆိုထားကြောင်းနဲ့ ဘောလုံးကို ချစ်တဲ့၊ ကမ္ဘာ့ဖလားကိုချစ်တဲ့ သူတို့ရဲ့ပရိသတ်တွေ ဘာကိုမှမဆုံးရှုံးစေချင်ဘူးလို့ BBC Sport Africa ကို ပြောခဲ့ပါတယ်။
DR ကွန်ဂိုအသင်းဟာ ကမ္ဘာ့ဖလားပြိုင်ပွဲကို ယှဉ်ပြိုင်ဖို့မသွားရောက်မီ ဘယ်လ်ဂျီယံမှာ စခန်းသွင်းကာ ခြေစမ်းပွဲတွေ ကစားသွားမှာပါ။
DR ကွန်ဂိုအသင်းဟာ ၂၀၂၆ ကမ္ဘာ့ဖလားပြိုင်ပွဲရဲ့အုပ်စု K မှာ ပေါ်တူဂီ၊ ကိုလံဘီယာ၊ ဥဇဘတ်ကစ္စတန် အသင်းတို့နဲ့ တစ်အုပ်စုတည်း ကျရောက်နေပါတယ်။
DR ကွန်ဂိုအသင်းဟာ အုပ်စုအဖွင့်ပွဲအဖြစ် ဇွန်လ ၁၇ ရက်မှာ ပေါ်တူဂီအသင်းနဲ့ ယှဉ်ပြိုင်ရမှာဖြစ်ပြီး ပေါ်တူဂီအသင်းကို အံ့အားသင့်ဖွယ်ရလဒ်ရရှိအောင် လုပ်ပြမယ်လို့ ပြောထားပါတယ်။
- By CNI
- Category: အားကစား
- Hits: 169
CNI Sport News
၂၀၂၆ ခုနှစ်၊ မေလ ၂၇
မန်စီးတီးအသင်းဟာ နည်းပြဂွာဒီယိုလာနဲ့အတူ သူတို့ရဲ့အံ့သြဖွယ်ကောင်းတဲ့ ခရီးစဉ်အဆုံးသတ်သွားခဲ့ပြီးနောက် တိုက်စစ်မှူးဟာလန်းက သူတို့ဟာ အရာအားလုံးကို အနိုင်ရဖို့ဆက်တိုက်ပွဲဝင်သွားမယ်လို့ ပြောခဲ့ပါတယ်။
ဟာလန်းက “ကျနော်တို့ဟာ အကြီးမားဆုံးဆုဖလားတွေရယူနိုင်ဖို့ ကြိုးစားသွားမှာပါ။ ဒါက ကျနော်တို့အနိုင်ရချင်တဲ့ အရာဖြစ်တဲ့အတွက် အရာအားလုံးကို ပြန်ပြီးအနိုင်ရဖို့တိုက်ပွဲဝင်သွားမှာပါ။ ဘာနာဒို၊ဂျွန်၊နည်းပြဂွာဒီယိုလာတို့နဲ့ လက်တွဲရတာဟာ ကျေနပ်ဖို့ကောင်းပါတယ်။ အံ့သြစရာကောင်းတဲ့ ခရီးဖြစ်ပေမယ့် သူတို့မရှိရင်တောင် ကျနော်တို့ဆက်ကြိုးစားပြီး တိုက်ပွဲဝင်သွားရမှာပါ။ သူတို့ဟာ ကလပ်ရဲ့ဂန္ထဝင်တွေပါ”လို့ ပြောခဲ့တာပါ။
စပိန်လူမျိုးနည်းပြဂွာဒီယိုလာဟာ မန်စီးတီးအသင်းကို ၁၀ နှစ်ကြာကိုင်တွယ်ပြီးနောက် ဒီနွေရာသီမှာ ထွက်ခွာပြီဖြစ်ပါတယ်။
ဒါ့အပြင် အသင်းမှာနှစ်ပေါင်းများစွာကြာကစားခဲ့တဲ့ အသင်းခေါင်းဆောင်ဘာနာဒိုဆေးလ်ဗားနဲ့ နောက်ခံလူဂျွန်စတုန်းစ်တို့လည်း စာချုပ်ကုန်ဆုံးပြီဖြစ်လို့ ထွက်ခွာမှာပါ။
မန်စီးတီးအသင်းဟာ ရာသီအပြီးဆုဖလားတွေနဲ့အောင်ပွဲခံမှုပြုလုပ်ခဲ့တဲ့ အခမ်းအနားမှာ ဂွာဒီယိုလာ၊ဘာနာဒိုဆေးလ်ဗားနဲ့ဂျွန်စတုန်းစ်တို့ကို နှုတ်ဆက်မှုပြုလုပ်ခဲ့ကြပါတယ်။
ဂွာဒီယိုလာဟာ မန်စီးတီးအသင်းကို ကိုင်တွယ်ခဲ့တဲ့ ၁၀ နှစ်အတွင်း ဆုဖလား ၂၀ ခုရယူပေးနိုင်ခဲ့ပြီး ဟာလန်းကတော့ ဂွာဒီယိုလာထွက်ခွာသွားပေမယ့် အသင်းဟာ ဆုဖလားအောင်မြင်မှုတွေရယူနိုင်တယ်လို့ ပြောခဲ့တာပါ။
မန်စီးတီးအသင်းဟာ ဂွာဒီယိုလာရဲ့နေရာမှာ ချယ်လ်ဆီးအသင်းနည်းပြဟောင်း မာရက်စ်ကာကို နည်းပြသစ်အဖြစ်ခန့်အပ်မှာ ဖြစ်ပါတယ်။
မာရက်စ်ကာဟာ မန်စီးတီးအသင်းမှာ ဂွာဒီယိုလာရဲ့နည်းပြအဖွဲ့ဝင်အဖြစ် ဆောင်ရွက်ခဲ့ဖူးပါတယ်။
- By CNI
- Category: အားကစား
- Hits: 159
CNI Sport News
၂၀၂၆ ခုနှစ်၊ မေလ ၂၇
ကိုဗင်ထရီအသင်းကို ပရီးမီးယားလိဂ်ထံ ပြန်ပြီးရောက်ရှိအောင် ကိုင်တွယ်ပေးနိုင်ခဲ့တဲ့ နည်းပြဖရန့်လမ်းပတ်ဟာ လိဂ်မန်နေဂျာများအဖွဲ့အစည်း (LMA)ရဲ့တစ်နှစ်တာအကောင်းဆုံးနည်းပြဆုကို ရရှိခဲ့ပါတယ်။
ကိုဗင်ထရီအသင်းဟာ၂၀၂၅-၂၆ ရာသီချန်ပီယံရှစ်ပြိုင်ပွဲမှာ ရမှတ် ၁၁ မှတ်အသာနဲ့ ချန်ပီယံဖြစ်ပြီး ၂၀၀၀-၀၁ ရာသီနောက်ပိုင်း ပထမဆုံးအကြိမ် ပရီးမီးယားလိဂ်ထံ တန်းပြန်တက်နိုင်ခဲ့တာပါ။
လိဂ်မှာရှိတဲ့ နည်းပြတွေရဲ့မဲပေးရွေးချယ်မှုနဲ့ ချီးမြှင့်တဲ့ ဒီဆုကို ယူနိုက်တက်အသင်းနည်းပြဟောင်း ဆာအဲလက်စ်ဖာဂူဆန်ဆုလို့လည်း ခေါ်ဆိုတာဖြစ်ပါတယ်။
၂၀၂၆ ခုနှစ်အတွက် LMA ဆုကို အင်္ဂလန်အသင်းနည်းပြတူချယ်လ်က ဖရန့်လမ်းပတ်ကို ဆုချီးမြှင့်ပေးခဲ့ပြီး ဆာအဲလက်စ်ဖာဂူဆန်ပေးတဲ့ စာကို ဖတ်ပြခဲ့ပါတယ်။
ဒီစာထဲမှာ လမ်းပတ်ရဲ့ကိုဗင်ထရီအသင်းဟာ ယုံကြည်မှုအပြည့်နဲ့ ကောင်းမွန်တဲ့ ဘောလုံးကစားခဲ့ပြီး သူတို့ရဲ့ပွဲတွေကို ကြည့်ရတာနှစ်သက်ကြောင်းနဲ့ လာမယ့်ရာသီ ပရီးမီးယားလိဂ်မှာ အကောင်းဆုံးဖြစ်ဖို့ ဆန္ဒပြုကြောင်း ရေးသားထားပါတယ်။
ဖရန့်လမ်းပတ်ဟာ LMA တစ်နှစ်တာအကောင်းဆုံးနည်းပြဆုကို အာဆင်နယ်အသင်းနည်းပြအာတီတာ၊အက်စတွန်ဗီလာအသင်းနည်းပြ အူနှိုင်းအမ်မရီ၊ဘုန်းမောက်အသင်းနည်းပြအီရာအိုလာနဲ့ မန်စီးတီးအသင်းနည်းပြဂွာဒီယိုလာတို့ကို မဲအသာရပြီး ရရှိခဲ့တာပါ။
ဒီဆုဟာ လမ်းပတ်အတွက် သူ့ရဲ့နည်းပြဘဝမှာ အကြီးမားဆုံးတစ်ဦးချင်းဂုဏ်ပြုဆုလည်း ဖြစ်ခဲ့ပါတယ်။
လမ်းပတ်ဟာ ဒါဘီ၊ချယ်လ်ဆီးနဲ့ အဲဗာတန်အသင်းတို့ကို ကိုင်တွယ်ချိန်မှာ အောင်မြင်မှုမရခဲ့ပေမယ့် ကိုဗင်ထရီအသင်းကိုတော့ အောင်မြင်မှုရယူပေးနိုင်ခဲ့တာပါ။
ကိုဗင်ထရီအသင်းဟာ ပြီးခဲ့တဲ့ရာသီ ချန်ပီယံရှစ်ပြိုင်ပွဲမှာ ဂိုးသွင်းအများဆုံးအသင်းဖြစ်သလို ခံစစ်မှတ်တမ်းကောင်းကိုလည်း ပိုင်ဆိုင်ခဲ့ပါတယ်။
- By CNI
- Category: အားကစား
- Hits: 190
CNI Sport News
၂၀၂၆ ခုနှစ်၊ မေလ ၂၆
ဒဏ်ရာရနေတဲ့ အသင်းခေါင်းဆောင် အယ်လ်ဖွန်ဆိုဒေးဗီးစ်ဟာ ပူးတွဲအိမ်ရှင် ကနေဒါအသင်းရဲ့ ၂၀၂၆ ကမ္ဘာ့ ဖလားပြိုင်ပွဲ အုပ်စုအဖွင့်ပွဲကို လွဲချော်ဖွယ်ရှိပေမယ့် ဒီပြိုင်ပွဲမှာ ပါဝင်ကစားနိုင်မယ်လို့ နည်းပြ ဂျက်ဆီမာ့ရှ်က ယုံကြည်နေပါတယ်။
အယ်လ်ဖွန်ဆိုဒေးဗီးစ်ဟာ မေလ ၆ ရက်က PSG အသင်းနဲ့ ယှဉ်ပြိုင်ခဲ့တဲ့ ချန်ပီယံလိဂ် ဆီမီးဖိုင်နယ် ဒုတိယ အကျော့ပွဲမှာ တံကောက်ကြောဒဏ်ရာ ရရှိခဲ့တာပါ။
ဘိုင်ယန်မြူးနစ်အသင်းက နောက်ခံလူ အယ်လ်ဖွန်ဆိုဒေးဗီးစ်ဟာ ရက်သတ္တပတ် အများအပြား အနားယူရဖို့ မျှော်လင့်ကြောင်း ပြောခဲ့ပါတယ်။
အယ်လ်ဖွန်ဆိုဒေးဗီးစ်ဟာ ဒီရာသီမှာ ဒဏ်ရာတွေနဲ့ ရုန်းကန်ခဲ့ရပြီး ဘိုင်ယန်မြူးနစ်အသင်းအတွက် ပြိုင်ပွဲစုံ ၂၃ ပွဲသာ ပါဝင်ကစားနိုင်ခဲ့ပါတယ်။
ကနေဒါအသင်းဟာ ၂၀၂၆ ကမ္ဘာ့ဖလားပြိုင်ပွဲ အုပ်စုအဖွင့်ပွဲအဖြစ် ဇွန်လ ၁၂ ရက်မှာ ဘော့စနီးယားအသင်းနဲ့ ယှဉ်ပြိုင်ရမှာပါ။
အယ်လ်ဖွန်ဆိုဒေးဗီးစ်ကို တွေ့ရစဉ်
ကနေဒါအသင်းနည်းပြ ဂျက်ဆီမာ့ရှ်က အယ်လ်ဖွန်ဆိုဒေးဗီးစ်ဟာ ကမ္ဘာ့ဖလားအဖွင့်ပွဲအတွက် အသင့်ဖြစ် နေမယ်လို့ မထင်ပေမယ့် ပြိုင်ပွဲမှာ ပါဝင်ကစားနိုင်မှာဖြစ်ကြောင်း သတင်းထောက်တွေနဲ့ တွေ့ဆုံချိန်မှာ ပြောခဲ့ပါတယ်။
ဒေးဗီးစ်ဟာ ကနေဒါအသင်း စခန်းသွင်း လေ့ကျင့်မှုတွေ ပြုလုပ်ဖို့ ခေါ်ခြင်းခံထားရတဲ့ ကစားသမား ၃၂ ဦးထဲမှာ ပါဝင်ပေမယ့် ဥဇဘတ်ကစ္စတန်အသင်းနဲ့ ဇွန်လ ၁ ရက် ခြေစမ်းပွဲ မတိုင်မီမှသာ ပူးပေါင်းမှာပါ။
ကနေဒါအသင်းဟာ ကမ္ဘာ့ဖလားပြိုင်ပွဲအတွက် ပြင်ဆင်မှုအဖြစ် ဇွန်လ ၅ ရက်မှာ အိုင်ယာလန်အသင်းနဲ့ ခြေစမ်းပွဲ ယှဉ်ပြိုင်ဦးမှာ ဖြစ်ပါတယ်။
- By CNI
- Category: အားကစား
- Hits: 166
CNI Sport News
၂၀၂၆ ခုနှစ်၊ မေလ ၂၆
ဝက်စ်ဟမ်းအသင်းဟာ ပရီးမီးယားလိဂ်ကနေ တန်းဆင်းသွားခဲ့ပေမယ့် အသင်းခေါင်းဆောင် ဘိုဝင်ဟာ လာမယ့် ရာသီအသင်းမှာ ဆက်နေဖွယ်ရှိနေပါတယ်။
ဘိုဝင်က “အနာဂတ်အကြောင်း ပြောတာဟာ ကလပ်နဲ့ ပရိသတ်တွေကို မလေးမစား ပြုလုပ်တာပါ။ ကလပ်ဟာ ပရီးမီးယားလိဂ်မှာရှိဖို့ ထိုက်တန်တာကြောင့် ကျနော်တို့ရဲ့ရည်မှန်းချက်က ပရီးမီးယားလိဂ်ကို ပြန်ရောက်ဖို့ပါ။ အနာဂတ်အကြောင်းပြောပြီး ဘာတွေ ဖြစ်လာမလဲဆိုတာ ပြောနေတာက လူတိုင်းကို မလေးစားတာပါပဲ။ ကျနော် ကတော့ ကလပ်ကို ပရီးမီးယားလိဂ်ထံ ပြန်ရောက်အောင် လုပ်ပေးဖို့ ရည်မှန်းထားပါပဲ”လို့ ပြောခဲ့တာပါ။
ဝက်စ်ဟမ်းအသင်းဟာ ဒီရာသီ ပရီးမီးယားလိဂ် နောက်ဆုံးပွဲမှာ လိဒ်စ်အသင်းကို ၃ ဂိုး-ဂိုးမရှိနဲ့ အနိုင်ရခဲ့ပေမယ့် စပါးအသင်းက အဲဗာတန်အသင်းကို ၁ ဂိုး-ဂိုးမရှိနဲ့ အနိုင်ရခဲ့တာကြောင့် တန်းဆင်းခဲ့ရပါတယ်။
ဘိုဝင်ကို တွေ့ရစဉ်
ဝက်စ်ဟမ်းအသင်းဟာ လာမယ့်ရာသီ ချန်ပီယံရှစ်ပြိုင်ပွဲမှာ ကစားရမှာဖြစ်လို့ အသင်းမှာရှိတဲ့ အဓိက ကစားသမား တချို့ကို ဆုံးရှုံးရနိုင်တာပါ။
ဒီအထဲမှာ ဘိုဝင်လည်း တစ်ဦးအနေနဲ့ ပါဝင်ပြီး သူ့ကိုခေါ်ယူဖို့ လီဗာပူးလ်၊ ယူနိုက်တက်၊ ချယ်လ်ဆီးနဲ့ နယူးကာဆယ်အသင်းတို့က ချိတ်ဆက်မှုတွေ ရှိနေပါတယ်။
၂၀၂၀ ခုနှစ်၊ ဇန်နဝါရီမှာ ဟားလ်စီးတီးအသင်းကနေ ရောက်လာခဲ့တဲ့ ဘိုဝင်ဟာ ဝက်စ်ဟမ်းအသင်းအတွက် အကောင်းဆုံးစွမ်းဆောင်ပေးနေပြီး ၂၈၀ ပွဲပါဝင်ကစားထားတာမှာ ၈၅ ဂိုးသွင်းယူထားတာပါ။
ဝက်စ်ဟမ်းအသင်းနဲ့ ၂၀၃၀ ခုနှစ်အထိ စာချုပ်ရှိနေတဲ့ ဘိုဝင်ကတော့ အသင်းကို ချန်ပီယံရှစ်ကနေ ပရီးမီးယားလိဂ် ပြိုင်ပွဲထံ တန်းပြန်တက်အောင် လုပ်ဆောင်ပေးဖို့ ရည်မှန်းထားတာ ဖြစ်ပါတယ်။
Source: Metro
- By CNI
- Category: အားကစား
- Hits: 151
CNI Sport News
၂၀၂၆ ခုနှစ်၊ မေလ ၂၆
အေစီမီလန်အသင်းဟာ ချန်ပီယံလိဂ်ဝင်ခွင့် မရခဲ့ပြီးနောက် အသင်းအကြီးအကဲတွေက ကျရှုံးတဲ့ရာသီအဖြစ် ဖော်ပြကာ နည်းပြအယ်လီဂရီကို ရာထူးကနေ ထုတ်ပယ်ခဲ့ပါတယ်။
အေစီမီလန်အသင်းဟာ စီးရီးအေရာသီနောက်ဆုံးပွဲမှာ ကာဂလီယာရီအသင်းကို ၂ ဂိုး-၁ ဂိုးနဲ့ အရေးနိမ့်ခဲ့တာ ကြောင့် လာမယ့်ရာသီချန်ပီယံလိဂ်ဝင်ခွင့်ဆုံးရှုံးခဲ့ပြီး ယူရိုပါလိဂ်ပြိုင်ပွဲသာ ယှဉ်ပြိုင်ရတော့မှာပါ။
ပွဲအပြီးမှာ အေစီမီလန်အသင်းဟာ အသင်းပရိသတ်တွေရဲ့လှောင်ပြောင်မှုတွေကို ခံခဲ့ရပါတယ်။
အေစီမီလန်အသင်းဟာ ဒီရာသီမှာ စီးရီးအေချန်ပီယံဆုကို ယှဉ်ပြိုင်နိုင်တဲ့ အနေအထားရှိခဲ့ပေမယ့် နောက်ဆုံး ကစားခဲ့တဲ့ ၁၀ ပွဲမှာ ၃ ပွဲသာအနိုင်ရပြီး ရလဒ်တွေဆိုးခဲ့တာကြောင့် အဆင့် ၅ နေရာအထိကျဆင်းသွားခဲ့တာပါ။
အေစီမီလန်အသင်းကို တွေ့ရစဉ်
အဲဒါကြောင့် အေစီမီလန်အသင်းရဲ့အမေရိကန်ပိုင်ရှင် RedBird အုပ်စုက ပြောင်းလဲမှုတွေပြုလုပ်ဖို့နဲ့ ဘောလုံးလည်ပတ်မှုတွေကို ပြန်လည်ဖွဲ့စည်းဖို့ အချိန်ရောက်ပြီလို့ ထုတ်ပြန်ခဲ့ပါတယ်။
အေစီမီလန်အသင်းဟာ နည်းပြအယ်လီဂရီအပြင် CEO ဖာလာနီ၊ အားကစားဒါရိုက်တာ တာရီ၊ နည်းစနစ် ဒါရိုက်တာ မွန်ကာဒါတို့နဲ့လည်း လမ်းခွဲခဲ့တာပါ။
ဒါပေမယ့် ကလပ်အသင်းရဲ့အထူးအကြံပေး အီဘရာဟီမိုဗစ်ကတော့ သူ့ရဲ့ရာထူးအတိုင်းဆက်ပြီးရှိနေမှာ ဖြစ်ပါတယ်။
အယ်လီဂရီဟာ အေစီမီလန်အသင်းကို ၂၀၁၀ ကနေ ၂၀၁၄ ခုနှစ်အထိ ပထမအကြိမ်ကိုင်တွယ်ခဲ့တုန်းက စီးရီးအေဖလားနဲ့ အီတလီစူပါဖလားရယူပေးနိုင်ခဲ့တာပါ။
အဲဒါကြောင့် အေစီမီလန်အသင်းဟာ အသင်းကို ချန်ပီယံလိဂ်ပြိုင်ပွဲ ပြန်လည်ယှဉ်ပြိုင်ခွင့်ရဖို့နဲ့ အောင်မြင်မှုတွေရအောင် ကိုင်တွယ်ပေးဖို့ ပြီးခဲ့တဲ့နှစ်မေလမှာ အယ်လီဂရီကို နည်းပြသစ်အဖြစ် ဒုတိယအကြိမ်ခန့်အပ်ခဲ့ပါတယ်။
ဒါပေမယ့် အယ်လီဂရီဟာ အေစီမီလန်အသင်းကို သူတို့ရည်မှန်းချက်အတိုင်း မလုပ်ပေးနိုင်ခဲ့တာကြောင့် ထုတ်ပယ်ခံခဲ့ရတာ ဖြစ်ပါတယ်။
- By CNI
- Category: အားကစား
- Hits: 155
CNI Sport News
၂၀၂၆ ခုနှစ်၊ မေလ ၂၆
မက္ကဆီကိုသမ္မတ ကလော်ဒီယာရှိန်းဘန်းက ၂၀၂၆ ကမ္ဘာ့ဖလားပြိုင်ပွဲအတွင်း အီရန်အသင်းကို နိုင်ငံမှာ အခြေစိုက်ဖို့အတွက် ခွင့်ပြုဖို့ သဘောတူခဲ့ပြီး အမေရိကန်ဟာ သူတို့ကို နိုင်ငံအတွင်းထားရှိဖို့ ဆန္ဒမရှိဘူးလို့ ပြောခဲ့ပါတယ်။
ကလော်ဒီယာရှိန်းဘန်းက “မက္ကဆီကိုမှာ ဆက်နေခွင့်ကို ငြင်းပယ်ဖို့အကြောင်းရင်းမရှိပါဘူး။ အမေရိကန်က အီရန်အသင်းကို ညအိပ်ပြီးမထားချင်ပေမယ့် သူတို့ဟာ အဲ့ဒီမှာ ၃ ပွဲကစားဖို့စီစဉ်ထားပါတယ်။ အဲ့ဒါကြောင့် သူတို့ဟာ မက္ကဆီကိုမှာ ညအိပ်တည်းခိုပြီး အမေရိကန်မှာ ပွဲကစားလို့ရလားဆိုပြီး ဖီဖာက မေးမြန်းခဲ့ပါတယ်။ ဘာပြဿနာမှမရှိတဲ့အတွက် ရတယ်လို့ ပြန်ဖြေလိုက်ကြောင်း”ပြောခဲ့တာပါ။
အဲဒါကြောင့် အီရန်အသင်းဟာ ကမ္ဘာ့ဖလားပွဲတွေမတိုင်မီ မက္ကဆီကိုမှာ အိပ်စက်ပြီးနောက် အမေရိကန်နိုင်ငံထံ သွားကာ ပွဲတွေကို ကစားရမှာဖြစ်ပါတယ်။
ဖီဖာကလည်း အီရန်အသင်းဟာ မက္ကဆီကိုမှာ အခြေစိုက်ပြီး လေ့ကျင့်မှုတွေပြုလုပ်သွားမယ်လို့ တနင်္လာနေ့က ထုတ်ပြန်ထားပါတယ်။
အီရန်အသင်းကစားသမားများကို တွေ့ရစဉ်
အီရန်အသင်းဟာ အစောပိုင်းက အရီဇိုးနားမှာ အခြေစိုက်ပြီး သူတို့ရဲ့လေ့ကျင့်မှုတွေပြုလုပ်ဖို့ စီစဉ်ထားပေမယ့် အရှေ့အလယ်ပိုင်းမှာ လက်ရှိဖြစ်နေတဲ့စစ်ပွဲနဲ့ ဆက်စပ်တဲ့လုံခြုံရေးစိုးရိမ်မှုတွေကြောင့် အခြေစိုက်မယ့်နေရာကို ပြောင်းလဲခဲ့ရတာပါ။
အီရန်အသင်းဟာ အခု တူရကီနိုင်ငံမှာ ကမ္ဘာ့ဖလားပြိုင်ပွဲအတွက် ပြင်ဆင်မှုတွေပြုလုပ်နေပါတယ်။
အီရန်အားကစားဝန်ကြီး ဒွန်ယာမာလီက ကမ္ဘာ့ဘောလုံးအဖွဲ့ချုပ်ဟာ အီရန်အသင်းကို အမေရိကန်နိုင်ငံမှာ ကစားဖို့ ဗီဇာပေးမယ်လို့ အတည်ပြုထားပါတယ်။
အီရန်အသင်းဟာ ကမ္ဘာ့ဖလားအုပ်စုအဖွင့်ပွဲအဖြစ် ဇွန်လ ၁၅ ရက်မှာ နယူးဇီလန်အသင်းနဲ့ ယှဉ်ပြိုင်ရမှာ ဖြစ်ပါတယ်။
- By CNI
- Category: အားကစား
- Hits: 157
CNI Sport News
၂၀၂၆ ခုနှစ်၊ မေလ ၂၅
နာပိုလီအသင်းကို ပြီးခဲ့တဲ့ရာသီမှာ စီးရီးအေချန်ပီယံဖြစ်အောင် ကိုင်တွယ်ပေးနိုင်ခဲ့တဲ့ နည်းပြကွန်တီဟာ ဒီနွေရာသီမှာ အသင်းကနေ ထွက်ခွာမယ်လို့ ကြေညာခဲ့ပါတယ်။
၂၀၂၄ ခုနှစ်မှာ နာပိုလီအသင်းကို စတင်ကိုင်တွယ်ခဲ့တဲ့ ကွန်တီဟာ သူ့ရဲ့ပထမဆုံးရာသီမှာ အသင်းကို စီးရီးအေ ဖလားရရှိအောင် ဦးဆောင်ပေးနိုင်ခဲ့တာပါ။
ဒါပေမယ့် နာပိုလီအသင်းဟာ ဒီရာသီမှာတော့ ချန်ပီယံဖြစ်ခဲ့တဲ့ အင်တာမီလန်အသင်းနဲ့ ၁၁ မှတ်အကွာ စီးရီးအေအမှတ်ပေးဇယားအဆင့် ၂ နေရာမှာ ရာသီအဆုံးသတ်ခဲ့ပါတယ်။
နည်းပြကွန်တီဟာ ချန်ပီယံလိဂ်ပြိုင်ပွဲမှာ နာပိုလီအသင်းကို ရှုံးထွက်အဆင့်ရောက်ရှိအောင် ကိုင်တွယ်ပေးနိုင် ခဲ့ခြင်းမရှိပါဘူး။
နာပိုလီအသင်းက အူဒီးနီးစ်အသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ ဒီရာသီ စီးရီးအေ နောက်ဆုံးပွဲ အပြီးမှာ ကွန်တီက သူဟာ အသင်းကနေထွက်ခွာမှာ ဖြစ်တယ်လို့ ပြောခဲ့ပါတယ်။
ကွန်တီက “နာပိုလီအသင်းကို နည်းပြရတာ ဂုဏ်ယူစရာကောင်းပြီး အလွန်ကောင်းမွန်တဲ့ ရာသီနှစ်ခု၊ ထူးခြားတဲ့ အတွေ့အကြုံပါပဲ။ ဒါက ကျနော့်ရဲ့ဆုံးဖြတ်ချက်ပါ၊ လွန်ခဲ့တဲ့ရက်သတ္တပတ်အနည်းငယ်ထဲက ဥက္ကဋ္ဌကို ပြောခဲ့ ပါတယ်။ နာပိုလီအသင်းက အမြဲတမ်းအိမ်ဖြစ်ပါလိမ့်မယ်”လို့ ပြောခဲ့တာပါ။
ကွန်တီဟာ အီတလီအသင်းနည်းပြရာထူးအတွက် ချိတ်ဆက်ခံနေရပြီး သူကတော့ ဂွာဒီယိုလာကို ခန့်အပ်ဖို့ အကြံ ပေးချင်ကြောင်း မီဒီယာသမားတွေရဲ့မေးမြန်းမှုကို ဖြေခဲ့ပါတယ်။
ကွန်တီဟာ ပြီးခဲ့တဲ့နွေရာသီကတည်းက နာပိုလီ အသင်းကနေ ထွက်ခွာဖို့ အစီအစဉ်ရှိခဲ့ပေမယ့် အသင်းအကြီးအကဲ ဒီလော်ရန်းတစ်နဲ့ ဆွေးနွေးမှု ပြုလုပ်ခဲ့ပြီး နောက် ဆက်ရှိနေခဲ့တာပါ။
နာပိုလီအသင်းဟာ ပြီးခဲ့တဲ့နွေရာသီမှာ မန်စီးတီးအသင်းကွင်းလယ်လူဟောင်း ဒီဘရိုင်းနဲ့ ယူနိုက်တက်အသင်း တိုက်စစ်မှူးဟော့ဂျ်လန်းတို့ကို ခေါ်ယူခဲ့ပေမယ့် ဒဏ်ရာတွေ၊တသမတ်တည်းမရှိမှုတွေက စီးရီးအေချန်ပီယံဆုကို ကာကွယ်နိုင်ခဲ့ခြင်းမရှိတာ ဖြစ်ပါတယ်။
Source: BBC
- By CNI
- Category: အားကစား
- Hits: 158
CNI International News
ဇူးရစ်၊ မေလ ၂၅
အာဖဂန်နစ္စတန် အမျိုးသမီး ဒုက္ခသည် ဘောလုံးအသင်းကို ကမ္ဘာ့ဘောလုံးအဖွဲ့ချုပ်(FIFA) အောက်ရှိ နိုင်ငံတကာ ပြိုင်ပွဲများတွင် ဝင်ရောက် ယှဉ်ပြိုင်ခွင့်ပြုရန် FIFA က တရားဝင် အသိအမှတ် ပြုလိုက်ပြီဖြစ်ကြောင်း Nikkei Asia မှ ဖော်ပြခဲ့သည်။
၂၀၂၁ ခုနှစ်တွင် အာဖဂန်နစ္စတန်၌ တာလီဘန်များ အာဏာပြန်လည် ရရှိလာခဲ့ပြီးနောက် အာဖဂန်အမျိုးသမီး အားကစားသမားများသည် ပြည်ပသို့ ထွက်ပြေးတိမ်းရှောင် ခဲ့ရပြီးနောက်ပိုင်း ယခုအခါတွင် ပထမဆုံးအကြိမ် အဖြစ် FIFA ၏ အသိအမှတ်ပြုမှုကို ရရှိခဲ့ခြင်းဖြစ်သည်။
ယခုဆုံးဖြတ်ချက်သည် လွန်ခဲ့သည့် ၅ နှစ်တာအတွင်း တာလီဘန်တို့၏ အုပ်ချုပ်မှုအောက်တွင် ရပိုင်ခွင့်များ၊ ပညာသင်ကြားခွင့်များနှင့် လူထုအခန်းကဏ္ဍ၌ ပါဝင်ခွင့်များကို ပိတ်ပင်ခြင်း ခံထားရသည့် အာဖဂန်အမျိုးသမီး များအတွက် ရှားပါးပြီး တန်ဖိုးကြီးသည့် အောင်မြင်မှုတစ်ခု ဖြစ်သည်။
ယခင်က Afghan Women United ဟု လူသိများခဲ့သော အသင်းကို ယခုအခါ အာဖဂန်နစ္စတန် အမျိုးသမီး ဘောလုံးအသင်းအဖြစ် တရားဝင် အသိအမှတ် ပြုမည်ဖြစ်ကြောင်း FIFA ကောင်စီက ကြေညာခဲ့သည်။
အာဖဂန်နစ္စတန်အမျိုးသမီး ဘောလုံးသမားကို တွေ့ရစဉ်
တာလီဘန်အစိုးရက ထိန်းချုပ်ထားသော အာဖဂန်နစ္စတန် ဘောလုံးအဖွဲ့ချုပ်က အမျိုးသမီးအားကစားကို အသိအမှတ်ပြုရန် ငြင်းဆန်ထားသော်လည်း ယခုကဲ့သို့ FIFA က အသိအမှတ်ပြုခဲ့သဖြင့် အာဖဂန်အမျိုးသမီး ဘောလုံးသမားများသည် နိုင်ငံတကာပြိုင်ပွဲများတွင် ဝင်ရောက်ယှဉ်ပြိုင်ခွင့် ရရှိတော့မည်ဖြစ်သည်။
ယခု ဆုံးဖြတ်ချက်သည် အားကစားလောကနှင့် ကစားသမားများ အတွက်သာမက နိုင်ငံရေးအရ ပြတ်သားသော သင်္ကေတတစ်ခုဖြစ်လာခဲ့သည်။
တာလီဘန်တို့သည် အာဖဂန်တွင် အာဏာပြန်ရလာပြီးကတည်းက ပညာရေး၊ အလုပ်အကိုင်နှင့် အားကစားကဏ္ဍ အပါအဝင် လူထုအခန်းကဏ္ဍတွင် အမျိုးသမီးများနှင့် မိန်းကလေးငယ်များ၏ အခွင့်အရေးများကို ပိတ်ပင်ခဲ့သည်။
၂၀၂၁ ခုနှစ်တွင် အမျိုးသမီးအားကစားကဏ္ဍကို လုံးဝ ပိတ်သိမ်းခဲ့သဖြင့် အာဖဂန်အမျိုးသမီး အားကစားသမား အများအပြားမှာ ဖိနှိပ်ညှဉ်းပန်းခံရမည့် ဘေးမှလွတ်ရန် နိုင်ငံတွင်းမှ ထွက်ပြေးတိမ်းရှောင်ခဲ့ကြရသည်။
အာဖဂန်နစ္စတန်အမျိုးသမီး ဘောလုံးအသင်းကို တွေ့ရစဉ်
FIFA ၏ စည်းမျဉ်းများအရ နိုင်ငံကိုယ်စားပြု လက်ရွေးစင်အသင်းများသည် နိုင်ငံတကာ ပြိုင်ပွဲများတွင် ဝင်ရောက် ယှဉ်ပြိုင်နိုင်ရန်အတွက် မိခင်နိုင်ငံများရှိ တရားဝင် ဘောလုံးအဖွဲ့ချုပ်များ၏ အသိအမှတ်ပြုမှုကို ရရှိရန် လိုအပ် သည်။
တာလီဘန်တို့ ထိန်းချုပ်ထားသော အဖွဲ့ချုပ်က အာဖဂန်အမျိုးသမီး ဘောလုံးအသင်းကို အသိအမှတ်ပြုရန် ငြင်းဆန်ထားသော်လည်း အာဖဂန်ဒုက္ခသည်များ ပါဝင်ယှဉ်ပြိုင်ခွင့် ရရှိစေရန်အတွက် FIFA က ၎င်း၏ စည်းမျဉ်းများကို ပြင်ဆင်ရန် မဲခွဲဆုံးဖြတ်ခဲ့ခြင်းဖြစ်သည်။
မိမိတို့ မတတ်နိုင်သည့် အခြေအနေများကြောင့် ပြိုင်ပွဲဝင်ခွင့် ပိတ်ပင်ခံထားရသော အားကစားသမားများကို ပံ့ပိုးကူညီရန် ယခုဆုံးဖြတ်ချက်ကို ချမှတ်ခဲ့ခြင်းဖြစ်ကြောင်း FIFA ဥက္ကဋ္ဌ ဂျီယန်နီ အင်ဖန်တီနို (Gianni Infantino) က ပြောကြားခဲ့သည်။
Source: Nikkei Asia
- By CNI
- Category: အားကစား
- Hits: 153
CNI Sport News
၂၀၂၆ ခုနှစ်၊ မေလ ၂၅
ကိုမိုအသင်းနည်းပြဖာဘရီဂတ်စ်ဟာ အာဂျင်တီးနားကြယ်ပွင့်နီကိုပက်ဇ်နဲ့ အင်တာမီလန်အသင်းရဲ့ အပြောင်း အရွှေ့သတင်းကို ငြင်းဆန်ပြီး သူ့ရဲ့အနာဂတ်ကို ရီးရယ်လ်အသင်းကသာ ထိန်းချုပ်နိုင်တယ်လို့ ပြောခဲ့ပါတယ်။
ဖာဘရီဂတ်စ်က “နီကိုပတ်ဇ်က ၅၀ ရာခိုင်နှုန်း ကိုမိုကစားသမားဖြစ်သလို ဒီကိစ္စမှာ ပြောခွင့်ရှိတဲ့ တစ်ခုတည်း သောကလပ်က ရီးရယ်လ်မက်ဒရစ်ပါ။ ကျနော်တို့ကိုမိုကို လေးစားရမှာဖြစ်သလို ရီးရယ်လ်ကိုလည်း လေးစား ရပါမယ်။ သေချာတာတစ်ခုကတော့ နီကိုဟာ အင်တာမီလန်အတွက် မကစားဘူးဆိုတာပါပဲ၊ ဒါကို ကျနော် ပြောနိုင်တယ်”လို့ ပြောခဲ့တာပါ။
အသက် ၂၁ နှစ်အရွယ်ရှိ ရီးရယ်လ်အကယ်ဒမီထွက် နီကိုပက်ဇ်ဟာ ဒီရာသီမှာ ကိုမိုအသင်း ချန်ပီယံလိဂ်ဝင်ခွင့် ရရှိအောင် စွမ်းဆောင်ပေးနိုင်ခဲ့တဲ့ ကစားသမားတစ်ဦးဖြစ်ပါတယ်။
၂၀၂၄ ခုနှစ် သြဂုတ်လမှာ ကိုမိုအသင်းထံ ပြောင်းရွှေ့လာခဲ့တဲ့ နီကိုပက်ဇ်ကို ရီးရယ်လ်အသင်းက ပြန်လည်ဝယ်ယူပြီး ခေါ်ယူခွင့်ရှိနေတာပါ။
စီးရီးအေချန်ပီယံအင်တာမီလန်အသင်းအကြီးအကဲ ဇနက်တီက နီကိုပက်ဇ်ဟာ အနာဂတ်မှာ အသင်းရဲ့အရောင် တွေကို ဝတ်ဆင်နိုင်တယ်လို့ ဆိုရှယ်မီဒီယာနဲ့ ရေဒီယိုမှာ အရိပ်အမြွက်ပြောခဲ့ပါတယ်။
ကိုမိုအသင်းနည်းပြ ဖာဘရီဂတ်စ်ကတော့ နီကိုပက်ဇ်ဟာ အင်တာမီလန်အသင်းအတွက် ကစားမှာမဟုတ်ဘဲ ရီးရယ်လ်အသင်းကသာ ဒီအကြောင်းကို ပြောခွင့်ရှိတယ်လို့ တုန့်ပြန်ခဲ့ပါတယ်။
နီကိုပက်ဇ်ဟာ ကိုမိုအသင်းကနေ ထွက်ခွာခဲ့ရင် ရီးရယ်လ်အသင်းထံ ပြန်ဖို့ ဆန္ဒရှိနေတာပါ။
ကိုမိုအသင်းအတွက် ၇၅ ပွဲကစားထားပြီး ၁၉ ဂိုးသွင်းယူထားတဲ့ နီကိုပက်ဇ်ဟာ လာမယ့်ကမ္ဘာ့ဖလားပြိုင်ပွဲမှာ အာဂျင်တီးနားအသင်း အတွက် ပါဝင်ကစားသွားမှာ ဖြစ်ပါတယ်။
Source: Besoccer
Page 6 of 482
Connect with us
