CNI Sport News

၂၀၂၅ ခုနှစ်၊ မတ်လ ၁

ချယ်လ်ဆီးအသင်းဟာ ဂိုးသမားနှစ်ဦးဖြစ်တဲ့ ဆန်းချက်ဇ်နဲ့ ယော်ဂင်ဆန်တို့ လက်စွမ်းပိုင်းတည်ငြိမ်မှုမရှိပေမယ့် နွေရာသီမှာ ဂိုးသမားသစ်တစ်ဦးခေါ်ယူဖို့ အစီအစဉ်မရှိဘူးလို့ ဗြိတိန်မီဒီယာတွေက ဖော်ပြထားပါတယ်။ 

စပိန်ဂိုးသမား ဆန်းချက်ဇ်ဟာ ဒီရာသီအစပိုင်းမှာ ချယ်လ်ဆီးအသင်းရဲ့ နံပါတ်တစ်ဂိုးသမားအဖြစ် ပွဲထွက်ခွင့်ရခဲ့ပေမယ့် အမှားယွင်းတွေအများကြီးပြုလုပ်ခဲ့တာပါ။

အဲဒါကြောင့် ချယ်လ်ဆီးအသင်းနည်းပြ မာရက်စ်ကာဟာ ဆန်းချက်ဇ်ကို နံပါတ်တစ်နေရာကနေ ဖယ်ရှားပြီး ယော်ဂင်ဆန်ကို ပွဲထွက်ဂိုးသမားအဖြစ် ပြောင်းလဲအသုံးပြုခဲ့တာ ဖြစ်ပါတယ်။ 

ပြီးခဲ့တဲ့နွေရာသီက ဗီလာရီးရယ်လ်အသင်းကနေ ရောက်ရှိလာခဲ့တဲ့ ယော်ဂင်ဆန်ဟာ ဆန်းချက်ဇ်ရဲ့နေရာမှာ နံပါတ်တစ်ဂိုးသမားအဖြစ် အစားမထိုးခံရခင်က ဖလားပြိုင်ပွဲတွေမှာသာ ပါဝင်ခဲ့ရတာပါ။

ဒါပေမယ့် ယော်ဂင်ဆန်ဟာ ဘရိုက်တန်၊အက်စတွန်ဗီလာအသင်းတို့နဲ့ ပရီးမီးယားလိဂ်ပွဲတွေမှာ အမှားအယွင်းတွေပြုလုပ်ခဲ့တာကြောင့် ဝေဖန်မှုတွေခံခဲ့ရပါတယ်။ 

ပုံစာ-ချယ်လ်ဆီးအသင်း ဂိုးသမားကို တွေ့ရစဉ်

ဆန်းချက်ဇ်နဲ့ ယော်ဂင်ဆန်တို့ရဲ့ လက်စွမ်းပိုင်းမတည်ငြိမ်မှုတွေကြောင့် နွေရာသီမှာ ဂိုးသမားသစ် တစ်ဦးခေါ်ယူဖို့ ချယ်လ်ဆီးအသင်းကို ပရိသတ်တွေနဲ့ ဘောလုံးဝေဖန်သုံးသပ်သူတွေက တိုက်တွန်းထားကြပါတယ်။ 

ဒီလိုတောင်းဆိုမှုတွေ ရှိနေပေမယ့် ချယ်လ်ဆီးအသင်းဟာ နွေရာသီမှာ ဂိုးသမားသစ် ခေါ်ယူဖို့ အစီအစဉ်မရှိဘူးလို့ သိရပါတယ်။

ချယ်လ်ဆီးအသင်းဟာ အငှားချထားတဲ့ ဂိုးသမားတွေအသင်းထံ ပြန်ရောက်ရှိလာမှာဖြစ်လို့ နံပါတ်တစ်နေရာအတွက် အပြိုင်အဆိုင် ကြိုးစားကြမှာကို မြင်တွေ့ချင်နေတာပါ။ 

နည်းပြဟောင်း ပိုချက်တီနို လက်ထက်မှာ နံပါတ်တစ်ဂိုးသမားဖြစ်ခဲ့တဲ့ ပီထရိုဗစ်ဟာ ပြင်သစ်ကလပ်မှာ လက်စွမ်းပြသနေသလို စပိန်ဂိုးသမား ကီပါကလည်း ဘုန်းမောက်အသင်းမှာ လက်စွမ်းပြသနေတာဖြစ်ပါတယ်။ 

ဒါပေမယ့် ကီပါရဲ့အနာဂတ်ကတော့ ချယ်လ်ဆီးအသင်းမှာ မရေမရာဖြစ်နေပြီး နွေရာသီမှာ အပြီးသတ်ထွက်ခွာဖွယ်ရှိနေတာပါ။

ချယ်လ်ဆီးအသင်းဟာ လာမယ့် ကြားရက်ထဲမှာ ကိုပင်ဟေဂင်အသင်းနဲ့ ကွန်းဖရန့်လိဂ် ၁၆ သင်းအဆင့် ပထမအကျော့ပွဲစဉ်ကစားရမှာဖြစ်ပြီး ယော်ဂင်ဆန်နဲ့ ဆန်းချက်ဇ်တို့ နှစ်ဦးထဲက ဘယ်သူ့ကိုပွဲထွက်အသုံးပြုမလဲဆိုတာ စောင့်ကြည့်ရမှာဖြစ်ပါတယ်။ 

Source:Metro

CNI Sport News

၂၀၂၅ ခုနှစ်၊ မတ်လ ၁

ယူနိုက်တက်အသင်းနည်းပြ အာမိုရင်က ကွင်းလယ်လူဟောင်း ရွိုင်ကိန်းရဲ့ဝေဖန်မှုကို ခံခဲ့ရတဲ့ အသင်းခေါင်းဆောင် ဘရူနိုဖာနန်ဒက်စ်ဘက်ကနေ ရပ်တည်ခဲ့ပြီး နည်းပြရဲ့အမြင်က ပိုအရေးပါတယ်လို့ ပြောခဲ့ပါတယ်။

အာမိုရင်က “ကျနော် ဒီအကြောင်းကို ကြားခဲ့ပါတယ်။ ကျနော့်မှာလည်း မတူညီတဲ့အမြင်ရှိပါတယ်။ ဘရူနိုက အသင်းအတွက်ရော ကျနော့်အတွက်ပါ အလွန်အရေးပါတဲ့သူပါ။ သူဟာ အသင်းဖော်တွေကို စိတ်ပျက်ပြီး ဝေဖန်တဲ့ပုံစံတွေလုပ်တာကို ကျနော်သိပါတယ်။ လူတိုင်းမှာအမြင်ရှိပြီး၊ ရွိုင်ကိန်းဟာ သူကစားခဲ့တဲ့အချိန်တုန်းက ကြီးမားတဲ့စံနှုန်းတွေရှိခဲ့ပါတယ်။ ကျနော်က နည်းပြဖြစ်တဲ့အတွက် ရွိုင်ကိန်းရဲ့အမြင်ထက် ကျနော့်ရဲ့အမြင်က ပိုအရေးပါတယ်လို့ထင်ကြောင်း" ပြောခဲ့တာပါ။

ယူနိုက်တက်အသင်း ခေါင်းဆောင်ဟောင်း ရွိုင်ကိန်းဟာ အာဆင်နယ်အသင်းတိုက်စစ်မှူးဟောင်း အီယန်ရိုက်နဲ့ ပြုလုပ်ခဲ့တဲ့ Overlap podcast မှာ ဘရူနိုဟာ အရည်အသွေးရှိတဲ့သူဖြစ်ပေမယ့် ဒါက မလုံလောက်ကြောင်းနဲ့ သူဟာ တိုက်ပွဲဝင်နေတဲ့သူမဟုတ်ဘူးလို့ပြောခဲ့တာဖြစ်ပါတယ်။ 

ဒါ့အပြင် ရွိုင်ကိန်းက ယူနိုက်တက်တစ်သင်းလုံးကို အယောင်ဆောင်တဲ့သူတွေလို့ တံဆိပ်ကပ်ဖော်ပြခဲ့တာပါ။ 

ယူနိုက်တက်အသင်းနည်းပြ အာမိုရင်ကတော့ သူ့ရဲ့ကစားသမား ဘရူနိုဖာနန်ဒက်စ်ဘက်ကနေ ရပ်တည်သွားခဲ့တာ ဖြစ်ပါတယ်။

ဒါ့အပြင် နည်းပြအာမိုရင်ဟာ ပြီးခဲ့တဲ့ပွဲတွေက အမှားတွေကြောင့် ဝေဖန်မှုတွေခံနေရတဲ့ ဂိုးသမား အိုနာနာကိုလည်း ကာကွယ်မှုတွေပြုလုပ်ခဲ့တာပါ။ 

အိုနာနာဟာ အဲဗာတန်နဲ့ အစ်စဝှစ်ချ်အသင်းပွဲတွေမှာ လက်စွမ်းပြသနိုင်ဖို့ ရုန်းကန်နေရပြီး ယူနိုက်တက်အသင်းပရိသတ်တွေက သူ့ကိုစိတ်ပျက်နေကြတာဖြစ်ပါတယ်။ 

ဒါပေမယ့် ဒုတိယဂိုးသမား ဘာယင်ဒါဟာ ဒဏ်ရာရရှိနေတာကြောင့် ဖူလ်ဟမ်အသင်းနဲ့ ယှဉ်ပြိုင်ရမယ့် FA ဖလားပဉ္စမအဆင့်ပွဲစဉ်မှာ အိုနာနာကပဲ ယူနိုက်တက်အသင်းရဲ့ပွဲထွက်လူစာရင်းထဲ ပါဝင်ရဖို့ရှိနေတာပါ။

ယူနိုက်တက်အသင်းဟာ ဖူလ်ဟမ်အသင်းနဲ့ပွဲစဉ်ပြီးရင် ဆိုစီဒက်အသင်းနဲ့ ယူရိုပါလိဂ် ၁၆ သင်းအဆင့် ပထမအကျော့ပွဲစဉ်ယှဉ်ပြိုင်ရမှာဖြစ်ပါတယ်။

Source:ESPN

CNI Sport News

၂၀၂၅ ခုနှစ်၊ မတ်လ ၁

အာဂျင်တီးနားအသင်းခေါင်းဆောင် မက်ဆီက ပီအက်စ်ဂျီအသင်းမှာ ကစားခဲ့တဲ့ ၂ ရာသီအတွင်းမပျော်ရွှင်ခဲ့ဘူးလို့ ပြောခဲ့ပါတယ်။

မက်ဆီက “ပီအက်စ်ဂျီမှာ နောက်ဆုံးနှစ်ဖြတ်သန်းခဲ့ရတဲ့ အခြေအနေကြောင့် အင်တာမိုင်ယာမီမှာ ကစားဖို့ရခဲ့တာက အခွင့်အလမ်းတစ်ခု ဖြစ်ခဲ့ပါတယ်။ ကျနော်ဟာ ပီအက်စ်ဂျီမှာ မပျော်ရွှင်ခဲ့တဲ့ ၂ နှစ်ကိုဖြတ်သန်းခဲ့ရပါတယ်။ လေ့ကျင့်ရေး၊ပွဲတွေနဲ့အတူ နေ့တိုင်းကို ကျနော်မပျော်ရွှင်ခဲ့ရပါဘူး။ ဒါတွေအားလုံးကို လိုက်လျောညီထွေဖြစ်အောင် လုပ်ရတာကခက်ခဲပါတယ်”လို့ Apple Music Zane Lowe နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။

မက်ဆီဟာ ၂၁ နှစ်ကြာရှိခဲ့တဲ့ ဘာစီလိုနာအသင်းကနေ ထွက်ခွာပြီးနောက် ၂၀၂၁ ခုနှစ်မှာပီအက်စ်ဂျီအသင်းထံ ၂ နှစ်စာချုပ်နဲ့ပြောင်းရွှေ့ခဲ့တာဖြစ်ပါတယ်။ 

မက်ဆီဟာ ပီအက်စ်ဂျီအသင်းအတွက် ၇၆ ပွဲပါဝင်ကစားခဲ့ပြီး ၃၂ ဂိုးသွင်းယူကာ ဂိုးဖန်တီးမှု ၃၅ ကြိမ်ပြုလုပ်နိုင်ခဲ့တာပါ။ 

အာဂျင်တီးနားကစားသမားဟာ ပီအက်စ်ဂျီအသင်းနဲ့အတူ အောင်မြင်မှုအဖြစ် လီဂူး-၁ ဖလား ၂ ကြိမ် အပါအဝင် ဆုဖလား ၃ လုံးရယူနိုင်ခဲ့တာဖြစ်ပါတယ်။

မက်ဆီဟာ ပီအက်စ်ဂျီအသင်းမှာ ပရိသတ်တွေနဲ့ ဆက်ဆံရေး အဆင်မပြေမှုတွေရှိခဲ့ပြီး ထွက်ခွာချိန်မှာအသင်းကို ဝေဖန်မှုတွေပြုလုပ်ခဲ့တာပါ။ 

မက်ဆီဟာ ပီအက်စ်ဂျီအသင်းကနေထွက်ခွာပြီးနောက်မေဂျာလိဂ်ကလပ် အင်တာမိုင်ယာမီအသင်းထံပြောင်းရွှေ့ကာ အသင်းကို သမိုင်းတစ်လျှောက်ပထမဆုံးဆုဖလား ၂ ခုရယူပေးထားနိုင်ခဲ့ပါတယ်။ 

အင်တာမိုင်ယာမီအသင်းအတွက် ၄၂ ပွဲကစားထားပြီး ဂိုးပါဝင်ပတ်သက်မှု ၅၆ ဂိုးအထိရှိထားတဲ့ မက်ဆီက ကလပ်အသင်းနဲ့မေဂျာလိဂ်ပြိုင်ပွဲကို ကြီးထွားဖို့ကူညီပေးချင်နေတာပါ။

အင်တာမိုင်ယာမီအသင်းဟာ ရီးရယ်လ်၊ချယ်လ်ဆီး၊မန်စီးတီးနဲ့ ပီအက်စ်ဂျီအသင်းတို့ ပါဝင်ယှဉ်ပြိုင်မယ့် ၂၀၂၅ ခုနှစ်ဖီဖာကလပ်ကမ္ဘာ့ဖလားပြိုင်ပွဲကို ပါဝင်ခွင့်ရရှိထားတာဖြစ်ပါတယ်။

Source:BBC

CNI Sport News

၂၀၂၅ ခုနှစ်၊ ဖေဖော်ဝါရီ ၂၈

ဘိုင်ယန်မြူးနစ်အသင်းဟာ ကင်မစ်ချ်ကို စာချုပ်သက်တမ်းတိုးဖို့ ကမ်းလှမ်းမှုကနေ နုတ်ထွက်ခဲ့တာကြောင့် ကင်မစ်ချ်ဟာ နွေရာသီမှာ ဂျာမန်ကလပ်ကနေ ထွက်ခွာဖွယ်ရှိနေပါတယ်။ 

ကင်မစ်ချ်ရဲ့ စာချုပ်ဟာ နွေရာသီမှာ ကုန်ဆုံးတော့မှာ ဖြစ်တဲ့အတွက် အသင်းမှာဆက်ရှိနိုင်ဖို့ ဘိုင်ယန်မြူးနစ် အသင်းနဲ့ အချိန်အကြာကြီး ဆွေးနွေးမှုတွေ ပြုလုပ်ခဲ့တာပါ။ 

ဘိုင်ယန်မြူးနစ်အသင်းဟာ အဓိက ကစားသမားတွေဖြစ်တဲ့ နူအာ၊ မူစီယာလာနဲ့ အယ်လ်ဖွန်ဆိုဒေးဗီးစ်တို့ကို စာချုပ် သက်တမ်းတိုးခဲ့တာကြောင့် ကင်မစ်ချ်ကိုလည်း စာချုပ်သက်တမ်းတိုးနိုင်ဖို့ မျှော်လင့်ခဲ့တာဖြစ်ပါတယ်။ 

ဘိုင်ယန်မြူးနစ်အသင်း အားကစားဒါရိုက်တာက သူတို့ဟာ ကင်မစ်ချ်ကို စာချုပ်သက်တမ်းတိုးဖို့ စိတ်အား ထက်သန်နေပေမယ့် ဆုံးဖြတ်ချက်က သူ့အပေါ်မှာ မူတည်တယ်လို့ ပြောထားတာပါ။

ဒါပေမယ့် ဂျာမန်သတင်းစာ Bild က ဘိုင်ယန်မြူးနစ်အသင်းဟာ ကင်မစ်ချ်ရဲ့ တုန့်ဆိုင်းနေမှုကို စိတ်ပျက်နေ တာကြောင့် သက်တမ်းတိုးဖို့ ကမ်းလှမ်းမှုကနေ နုတ်ထွက်ခဲ့တယ်လို့ ဖော်ပြထားပါတယ်။

ကင်မစ်ချ်ကိုတွေ့ရစဉ် 

အဲဒါကြောင့် ကင်မစ်ချ်ဟာ စာချုပ်ကုန်ဆုံးမယ့် နွေရာသီမှာ ဘိုင်ယန်မြူးနစ်အသင်းကနေ ထွက်ခွာဖို့ ပိုပြီးများလာခဲ့တာပါ။

ပရီးမီးယားလိဂ် ထိပ်သီးကလပ်တွေဖြစ်တဲ့ လီဗာပူးလ်နဲ့ မန်စီးတီးအသင်းတို့ဟာ ကင်မစ်ချ်ရဲ့ အခြေအနေကို စောင့်ကြည့်နေတာ ဖြစ်ပါတယ်။ 

ကင်မစ်ချ်ဟာ ကွင်းလယ်နေရာအပြင် ညာနောက်ခံ နေရာမှာလည်း ကစားနိုင်တဲ့သူဖြစ်လို့ လီဗာပူးလ်အသင်းဟာ နွေရာသီမှာ ထွက်ခွာဖွယ်ရှိတဲ့ အာနိုးလ်ရဲ့နေရာမှာ သူ့ကိုအစားထိုးဖို့ ပစ်မှတ်ထားနေတာပါ။ 

မန်စီးတီးအသင်းကလည်း ကင်မစ်ချ်ကို နည်းပြဂွာဒီယိုလာနဲ့ ပြန်ပြီးလက်တွဲ အလုပ်လုပ်နိုင်ဖို့ နွေရာသီမှာ ခေါ်ယူချင်နေတာ ဖြစ်ပါတယ်။ 

ဂျာမနီအသင်းခေါင်းဆောင် ကင်မစ်ချ်ကို အလွတ်နဲ့ခေါ်ယူဖို့ ဘာစီလိုနာအသင်းကလည်း စိတ်ဝင်စားနေတာပါ။ 

၂၀၁၅ ခုနှစ်က လိုက်ပ်ဇစ်အသင်းကနေ ရောက်ရှိလာခဲ့တဲ့ ကင်မစ်ချ်ဟာ ဘိုင်ယန်မြူးနစ်အသင်းအတွက် ပွဲပေါင်း ၄၃၀ ကျော် ပါဝင်ကစားထားပြီး ဆုဖလားအောင်မြင်မှု အများအပြား ရယူထားတာဖြစ်ပါတယ်။

CNI Sport News

၂၀၂၅ ခုနှစ်၊ ဖေဖော်ဝါရီ ၂၈

အင်္ဂလန်တောင်ပံကစားသမား ရက်ရှ်ဖို့ဒ်ဟာ လာမယ့် နွေရာသီ အပြောင်းအရွှေ့ ဈေးကွက်ဖွင့်ချိန်မှာ ယူနိုက်တက်အသင်းကနေ အက်စတွန်ဗီလာအသင်းထံ အပြီးသတ် ပြောင်းရွှေ့ဖို့ ဆုံးဖြတ်ခဲ့ပါတယ်။ 

ရက်ရှ်ဖို့ဒ်ဟာ ယူနိုက်တက်အသင်းမှာ နည်းပြအာမိုရင်နဲ့ အဆင်မပြေမှုတွေ ရှိခဲ့တာကြောင့် ပွဲကစားခွင့် ဆုံးရှုံးခဲ့ ရပြီးနောက် ဇန်နဝါရီအပြောင်းအရွှေ့က အက်စတွန်ဗီလာအသင်းထံ ရာသီအကုန်ထိ အငှားစာချုပ်နဲ့ ပြောင်းရွှေ့ခဲ့ တာပါ။ 

The Sun က ရက်ရှ်ဖို့ဒ်ဟာ အက်စတွန်ဗီလာအသင်းမှာ ကောင်းမွန်စွာ စတင်နိုင်ခဲ့ပြီးနောက် သူ့ရဲ့အနာဂတ်ကို ဆုံးဖြတ်ခဲ့တယ်လို့ ဖော်ပြထားပါတယ်။ 

ရက်ရှ်ဖို့ဒ်ဟာ နည်းပြ အူနှိုင်းအမ်မရီရဲ့ လက်အောက်မှာ တိုးတက်မှုတွေနဲ့အတူ အက်စတွန်ဗီလာအသင်းထံ အပြီးသတ် ပြောင်းရွှေ့ချင်နေတာပါ။

ရက်ရှ်ဖို့ဒ်ကို တွေ့ရစဉ်

ရက်ရှ်ဖို့ဒ်က သူဟာ နည်းပြ အူနှိုင်းအမ်မရီရဲ့ လက်အောက်မှာ သူ့ရဲ့ကစားသမားဘဝ ပြန်လည် အသက်ဝင် လာတယ်လို့ ခံစားနေရပြီး နည်းပြဟာ သူ့ကို လက်ရွေးစင်အသင်း လူစာရင်းထဲ ပြန်လည် ပါဝင်နိုင်အောင် လုပ်ပေးနိုင်မယ်လို့ ယုံကြည်ကြောင်း သူငယ်ချင်းတွေကို ပြောခဲ့တယ်လို့ သိရပါတယ်။ 

အင်္ဂလန်အသင်း လူစာရင်းနဲ့ ဝေးကွာနေတဲ့ ရက်ရှ်ဖို့ဒ်ဟာ နည်းပြသစ် တူချယ်လ်ရဲ့ လက်ထက်မှာ လူစာရင်းထဲ ပြန်ပါဝင်ပြီး ၂၀၂၆ ကမ္ဘာ့ဖလားပြိုင်ပွဲမှာ ပါဝင်ကစားချင်နေတာပါ။

ရက်ရှ်ဖို့ဒ်ရဲ့ အငှားစာချုပ်ထဲမှာ အက်စတွန်ဗီလာအသင်းဟာ ရာသီကုန်ချိန်မှာ သူ့ကို ယူနိုက်တက်အသင်းကနေ ပေါင်သန်း ၄၀ နဲ့ အပြီးသတ် ဝယ်ယူနိုင်ဖို့ ရွေးချယ်ခွင့်ပါဝင်တာ ဖြစ်ပါတယ်။ 

ရက်ရှ်ဖို့ဒ်နဲ့ ယူနိုက်တက်အသင်းတို့ရဲ့ စာချုပ်ဟာ ၂၀၂၈ ခုနှစ်အထိ သက်တမ်းရှိနေပေမယ့် နည်းပြအာမိုရင် တာဝန်ယူနေချိန်အတွင်း သူ့အတွက် ငယ်ဘဝကလပ်မှာ ပြန်ကစားခွင့်ရဖို့ ခက်ခဲနိုင်တာပါ။ 

ရက်ရှ်ဖို့ဒ်ဟာ ကာဒစ်ဖ်အသင်းနဲ့ FA ဖလား ပဉ္စမအဆင့် ပွဲမတိုင်ခင်အထိ အက်စတွန်ဗီလာ အသင်းအတွက် ၅ ပွဲ ပါဝင်ကစားထားပြီး ဂိုးဖန်တီးမှု ၂ ကြိမ် ပြုလုပ်ထားတာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဖေဖော်ဝါရီ ၂၈

လက်စတာအသင်းဟာ ဝက်စ်ဟမ်းအသင်းကို ၂ ဂိုး-ဂိုးမရှိနဲ့ အရေးနိမ့်ပြီး ရလဒ်တွေ ဆိုးရွားနေပေမယ့် အသင်းဟာ ပရီးမီးယားလိဂ်မှာ ဆက်ပြီးရှိနေနိုင်ဖို့ တိုက်ပွဲဝင်နေဆဲလို့ နည်းပြနစ္စတယ်ရွိုင်းက ပြောခဲ့ပါတယ်။

နစ္စတယ်ရွိုင်းက “ကျနော်တို့ဟာ ရလဒ်ကောင်းတွေရရှိအောင် ပြန်လုပ်ရတော့မှာဖြစ်ပြီး ဒီတိုက်ပွဲထဲမှာရှိနေဆဲပါ။ သင်္ချာနည်းအရ ကျနော်တို့ ဒီမှာရှိနေတဲ့အတွက် ကျနော်တို့ဟာ ကျနော်တို့ လုပ်နိုင်သလောက် ဆက်တိုက်ပွဲ ဝင်သွားမှာဖြစ်ပါတယ်။ ဒါပေမယ့် ဒီနေ့တိုက်ပွဲက တစ်ပိုင်းပဲရှိခဲ့တဲ့အတွက် မလုံလောက်ဘူးဆိုတာ ရှင်းပါတယ်”လို့ ပြောခဲ့တာပါ။ 

နစ္စတယ်ရွိုင်းဟာ လက်စတာအသင်းကို တာဝန်ယူ ကိုင်တွယ်ခဲ့တဲ့ ပရီးမီးယားလိဂ် ၁၄ ပွဲမှာ ၂ ပွဲသာ နိုင်ပွဲ ရရှိအောင် ကိုင်တွယ်နိုင်ခဲ့ပြီး အသင်းဟာ နောက်ဆုံးကစားခဲ့တဲ့ ၁၂ ပွဲမှာ ၁၁ ပွဲအထိ အရေးနိမ့်ခဲ့တာ ဖြစ်ပါတယ်။ 

လက်စတာအသင်းဟာ ဒီရလဒ်တွေကြောင့် ပရီးမီးယားလိဂ် အမှတ်ပေးဇယား အဆင့် ၁၉ နေရာမှာ ရပ်တည်နေ ပြီး တန်းဆင်းဇုန်အထက်က ဝုလ်ဗ်စ်အသင်းနဲ့ ၅ မှတ်ကွာဟနေတာပါ။ 

နစ္စတယ်ရွိုင်းကို တွေ့ရစဉ်

နစ္စတယ်ရွိုင်းအတွက်လည်း လက်စတာအသင်းရဲ့ ရလဒ်ဆိုးတွေကြောင့် နည်းပြရာထူးကနေ ထုတ်ပယ်ခံရမယ့် ဖိအားတွေ ပိုပြီးများလာခဲ့တာ ဖြစ်ပါတယ်။ 

နစ္စတယ်ရွိုင်းကတော့ သူဟာ အလုပ်ကို ဆက်လုပ်သွားမှာဖြစ်ပြီး အမှတ်ပေးဇယား အခြေအနေကို သိပေမယ့် ရလဒ်ကောင်းတွေ ပြန်ရအောင် လုပ်နိုင်မယ်လို့ ယုံကြည်နေတာပါ။ 

လက်စတာအသင်းဟာ ပရီးမီးယားလိဂ် နောက်ဆုံး ၄ ပွဲစလုံး ဂိုးမသွင်းနိုင်ဘဲ အရေးနိမ့်ခဲ့တာဖြစ်ပြီး ဒီရာသီ လိဂ်ပြိုင်ပွဲမှာ ပေးဂိုးမပေးရတာ ၁ ပွဲပဲရှိခဲ့ပါတယ်။

လက်စတာအသင်းဟာ လာမယ့် ပရီးမီးယားလိဂ် ပွဲစဉ်အဖြစ် မတ်လ ၉ ရက်မှာ ချယ်လ်ဆီးအသင်း အိမ်ကွင်း သွားရောက် ယှဉ်ပြိုင်ရမှာဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ ဖေဖော်ဝါရီ ၂၈

ဖီနာဘာချီအသင်းနည်းပြ မော်ရင်ဟိုဟာ ဂါလာတာစာရေးအသင်းနဲ့ အစ္စတန်ဘူလ် ဒါဘီပွဲအပြီးမှာ ပြောခဲ့တဲ့ မှတ်ချက်တွေကြောင့် တူရကီဘောလုံးအဖွဲ့ချုပ်က ၄ ပွဲပယ်နဲ့ ဒဏ်ကြေးငွေ ပေါင် ၃၅,၁၉၄ ချမှတ်ခဲ့ပါတယ်။

မော်ရင်ဟိုဟာ ဂိုးမရှိ သရေကျခဲ့တဲ့ ဒီပွဲအပြီးမှာ လူမျိုးရေးခွဲခြားတဲ့ မှတ်ချက် ပြုလုပ်ခဲ့တယ်လို့ ဂါလာတာစာရေး အသင်းရဲ့ စွပ်စွဲမှုကိုခံထားရတာပါ။ 

ပေါ်တူဂီလူမျိုးနည်းပြဟာ ဒီပွဲကို ကိုင်တွယ်ခဲ့တဲ့ ဆလိုဗေးနီးယားလူမျိုး ဗင်ဆင့်ကို ချီးကျူးခဲ့ပြီး တူရကီဒိုင်လူကြီး တွေကို ဝေဖန်ခဲ့တာ ဖြစ်ပါတယ်။

မော်ရင်ဟိုဟာ အစ္စတန်ဘူလ် ဒါဘီပွဲအပြီးမှာ ဒိုင်လူကြီး အဝတ်လဲခန်းထဲကို သွားရောက်ကာ ခင်ဗျားသာ ဒီပွဲကို ကိုင်တွယ်ရင် အလွန်ဆိုးရွား သွားလိမ့်မယ်ဆိုပြီး စတုတ္ထဒိုင်လူကြီးကို ပြောခဲ့တယ်လို့ သိရပါတယ်။ 

အဲဒါကြောင့် တူရကီဘောလုံးအဖွဲ့ချုပ်ဟာ မော်ရင်ဟိုကို အရေးယူမှုပြုလုပ်ခဲ့တာပါ။ 

မော်ရင်ဟိုဟာ တူရကီဒိုင်လူကြီးတွေကို စော်ကားတဲ့ ပြောစကားတွေကြောင့် ၂ ပွဲပယ်နဲ့ ဒဏ်ကြေးငွေ၊ ပွဲအပြီး သတင်းစာ ရှင်းလင်းပွဲမှာ အားကစားကို ဆန့်ကျင်တဲ့ လုပ်ရပ်ကြောင့် ၂ ပွဲပယ်နဲ့ ဒဏ်ကြေးငွေ ချမှတ်ခြင်းခံခဲ့ရတာ ဖြစ်ပါတယ်။

မော်ရင်ဟိုကို တွေ့ရစဉ်

ဖီနာဘာချီအသင်းကတော့ တူရကီဘောလုံးအဖွဲ့ချုပ်က နည်းပြမော်ရင်ဟိုကို ချမှတ်ခဲ့တဲ့ ပြစ်ဒဏ်တွေကို အယူခံ ဝင်သွားမယ်လို့ BBC ကို အတည်ပြုထားတာပါ။ 

ဂါလာတာစာရေးအသင်းဟာ မော်ရင်ဟိုကို လူမျိုးရေး ခွဲခြားတဲ့ မှတ်ချက်ကြောင့် ရာဇဝတ်မှုဆိုင်ရာ စွဲချက်တင်ဖို့ လုပ်ဆောင်နေပြီး FIFA နဲ့ UEFA ကိုလည်း တရားဝင် တိုင်ကြားထားတာ ဖြစ်ပါတယ်။ 

ဖီနာဘာချီအသင်းကလည်း ဂါလာတာစာရေးအသင်းရဲ့ စွပ်စွဲမှုတွေအတွက် ဥပဒေအရ အရေးယူဖို့ စီစဉ် သွားမယ်လို့ ပြောထားတာပါ။

မော်ရင်ဟိုဟာ ဖီနာဘာချီအသင်းကို ကိုင်တွယ်ပြီး ကတည်းက တူရကီဒိုင်လူကြီးတွေကို ပြောခဲ့တဲ့ မှတ်ချက်တွေ ကြောင့် ပွဲပယ်နဲ့ ဒဏ်ကြေးငွေ ချမှတ်ခြင်းကို ခံခဲ့ရပါတယ်။ 

ဖီနာဘာချီအသင်းဟာ ဒီရာသီ တူရကီလိဂ်ပြိုင်ပွဲမှာ အမှတ်ပေးဇယား အဆင့် ၂ နေရာ ရပ်တည်နေပေမယ့် တူရကီဖလားပြိုင်ပွဲမှာ ရလဒ်ကောင်း ရရှိထားသလို ယူရိုပါလိဂ်ပြိုင်ပွဲမှာ ၁၆ သင်းအဆင့်ကို ရောက်ရှိနေတာ ဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ ဖေဖော်ဝါရီ ၂၇

ချယ်လ်ဆီးအသင်းဂန္ထဝင် ဒရော့ဘာဟာ အသင်းဟောင်း ဂါလာတာစာရေးအသင်းက လူမျိုးရေးခွဲခြားတယ်လို့ စွပ်စွဲထားတဲ့ သူ့ရဲ့နည်းပြဟောင်း မော်ရင်ဟိုဘက်ကနေ ရပ်တည်ပြီး ကာကွယ်မှုပြုလုပ်ခဲ့ပါတယ်။

ဒရော့ဘာက “ကျနော်ဟာ ဂါလာတာစာရေးအသင်းရဲ့ အဝါရောင်နဲ့ အနီရောင်ဂျာစီ ဝတ်ဆင်ရတာ ဘယ်လောက် အထိ ဂုဏ်ယူလဲဆိုတာ သိပါတယ်။ မော်ရင်ဟိုနဲ့ ပတ်သက်ပြီး မကြာသေးခင်က မှတ်ချက်တွေပေးတာကို တွေ့ခဲ့ ပါတယ်။ ကျနော်ဟာ သူနဲ့ ၂၅ နှစ်ကြာသိခဲ့ပြီး သူဟာ အရင်တုန်းကရော အခုရော လူမျိုးရေးခွဲခြားတဲ့သူ မဟုတ် ဘူးဆိုတာ သက်သေပြလို့ရပါတယ်။ ကျနော့်အဖေက ဘယ်လိုလုပ် လူမျိုးရေးခွဲခြားမှာလဲ၊ ကြယ် ၅ ပွင့် တပ်ဆင် နိုင်ဖို့သာ အာရုံစိုက်ပါ”လို့ သူ့ရဲ့ဆိုရှယ်မီဒီယာမှာ ရေးသားခဲ့တာပါ။ 

ဂါလာတာစာရေးနဲ့ ဖီနာဘာချီအသင်းတို့ ဂိုးမရှိ သရေကျခဲ့တဲ့ ပွဲစဉ်အပြီးမှာ ဖီနာဘာချီအသင်းနည်းပြ မော်ရင်ဟို က ဂါလာတာစာရေးအသင်းရဲ့အရန်ခုံတန်းဟာ မျောက်တွေလို ခုန်ပေါက်နေတယ်လို့ မှတ်ချက်ပေးခဲ့ပါတယ်။

မော်ရင်ဟိုကို တွေ့ရစဉ်

အဲဒါကြောင့် ဂါလာတာစာရေးအသင်းက မော်ရင်ဟိုဟာ လူမျိုးရေးခွဲခြားမှု ပြုလုပ်ခဲ့တယ်ဆိုပြီး စွပ်စွဲကာ ရာဇဝတ်မှုဆိုင်ရာ အရေးယူမှုတွေပါ ပြုလုပ်ဖို့ စီစဉ်နေတာပါ။ 

ဒါအပြင် FIFA နဲ့ UEFA ကိုလည်း တရားဝင် တိုင်ကြားသွားမယ်လို့ သိရပါတယ်။ 

ဒီအချိန်မှာ ဂါလာတာစာရေးအသင်းရဲ့ ကစားသမားဟောင်းဖြစ်ခဲ့တဲ့ ဒရော့ဘာက သူ့ရဲ့နည်းပြဟောင်း မော်ရင်ဟို ကို ကာကွယ်ပေးခဲ့ပြီး သူ့အတွက် ဖခင်တစ်ဦးလိုဖြစ်ကြောင်း ပြောခဲ့တာပါ။ 

မော်ရင်ဟိုနဲ့ ဒရော့ဘာတို့ဟာ ချယ်လ်ဆီးအသင်းမှာ အတူလက်တွဲခဲ့ပြီး အောင်မြင်မှု အများအပြား ရယူနိုင်ခဲ့ ကြတာ ဖြစ်ပါတယ်။

ဖီနာဘာချီအသင်းကလည်း မော်ရင်ဟိုအပေါ် ဂါလာတာစာရေးအသင်းရဲ့ စွပ်စွဲမှုကို ပြန်လည်တုန့်ပြန်ထားတာပါ။

မော်ရင်ဟိုဟာ တူရကီလိဂ်ကို ရောက်လာပြီးကတည်းက တူရကီဒိုင်လူကြီးတွေရဲ့ အရည်အသွေးတွေကို မကြာခဏ ဆိုသလို မေးခွန်းထုတ် ဝေဖန်မှုတွေ ပြုလုပ်နေပြီး ဂါလာတာစာရေးအသင်းနဲ့ ထိပ်တိုက်တွေ့ဆုံမှု တွေလည်း ရှိနေတာဖြစ်ပါ
တယ်။ 

Source: Metro

CNI Sport News

၂၀၂၅ ခုနှစ်၊ ဖေဖော်ဝါရီ ၂၇

နိုင်ဂျီးရီးယားတိုက်စစ်မှူး အိုဆင်ဟမ်က လာမယ့် နွေရာသီမှာ ဘာဖြစ်မလဲဆိုတာ မသိပေမယ့် ဂါလာတာစာရေး အသင်းမှာ ဆက်ရှိနိုင်မယ့် အရိပ်အမြွက် ပြောခဲ့ပါတယ်။
အိုဆင်ဟမ်က “ရိုးရိုးသားသား ပြောရရင် အနာဂတ်နဲ့ပတ်သက်ပြီး ကျနော် မသိပါဘူး။ လွန်ခဲ့တဲ့ လအနည်းငယ် ကလည်း ဂါလာတာစာရေးအသင်းကို ကျနော် လာမယ်လို့ ကျနော်ဘယ်တုန်းကမှ မယုံကြည်ခဲ့ပါဘူး။ အခုလည်း နွေရာသီမှာ ဘာတွေဖြစ်မလဲဆိုတာ မသိပေမယ့် ဒီကလပ်ကို ကျနော် ချစ်တယ်ဆိုတာ လူတိုင်း နားလည်စေချင် ပါတယ်။ ပရိသတ်တွေရော အသင်းနဲ့ ပတ်သက်တဲ့သူ အားလုံးကိုရော ကျနော်ချစ်ပါတယ်။ ဒီမှာရှိနေရတဲ့ အချိန် တွေကို ကျနော်ပျော်ရွှင်တယ်”လို့ ပြောခဲ့တာပါ။

ပြီးခဲ့တဲ့နွေရာသီက နာပိုလီအသင်းကနေ အငှားနဲ့ ရောက်ရှိလာခဲ့တဲ့ အိုဆင်ဟမ်ဟာ ဂါလာတာစာရေးအသင်း အတွက် ၂၆ ပွဲ ပါဝင်ကစားအပြီးမှာ သွင်းဂိုး ၂၀ သွင်းယူထားတာ ဖြစ်ပါတယ်။

အိုဆင်ဟမ်ဟာ နာပိုလီအသင်းအတွက် ကစားခဲ့တဲ့ ပြီးခဲ့တဲ့ ၄ ရာသီမှာ သွင်းဂိုး ၇၆ ဂိုးသွင်းယူပြီး ခြေစွမ်း ပြသနိုင်ခဲ့ပေမယ့် နည်းပြကွန်တီနဲ့ အဆင်မပြေမှုတွေ ရှိခဲ့တာကြောင့် အသင်းကနေ အငှားနဲ့ ထွက်ခွာခဲ့တာပါ။ 

အိုဆင်ဟမ်ကို တွေ့ရစဉ်

နာပိုလီအသင်းဟာ အိုဆင်ဟမ်အတွက် သူတို့သတ်မှတ်ထားတဲ့ ပြောင်းရွှေ့ကြေးရရင် လာမယ့်နွေရာသီမှာ ရောင်းချသွားဖို့ရှိနေပါတယ်။ 

တိုက်စစ်မှူးသစ် ခေါ်ယူချင်နေတဲ့ အာဆင်နယ်၊ ချယ်လ်ဆီးနဲ့ ယူနိုက်တက်အသင်းတို့ဟာ အိုဆင်ဟမ်ကို ခေါ်ယူဖို့ စိတ်ဝင်စားနေပြီး စောင့်ကြည့်မှုတွေ ပြုလုပ်နေကြတာပါ။ 

ဒီ ၃ သင်းစလုံးဟာ တိုက်စစ်ပိုင်း အခက်အခဲတွေကြောင့် လာမယ့်နွေရာသီ အပြောင်းအရွှေ့မှာ တိုက်စစ်မှူးသစ် ခေါ်ယူနိုင်ဖို့ ပစ်မှတ်ထားနေပါတယ်။

ယူနိုက်တက်အသင်း နောက်ခံလူဟောင်း ရီယိုဖာဒီနန်က ပြီးခဲ့တဲ့ဇန်နဝါရီ အပြောင်းအရွှေ့က အိုဆင်ဟမ်ကို အငှားနဲ့ခေါ်ယူဖို့ အသင်းကို တိုက်တွန်းမှုတွေပြုလုပ်ခဲ့သေးတာပါ။

အိုဆင်ဟမ် ပါဝင်ကစားနေတဲ့ ဂါလာတာစာရေးအသင်းဟာ တူရကီစူပါလိဂ်ပြိုင်ပွဲမှာ အမှတ်ပေးဇယားကို ဦးဆောင်ထားပေမယ့် ဥရောပပြိုင်ပွဲကနေ ထွက်ခွာခဲ့ရပြီဖြစ်ပါတယ်။ 

Source: Metro