CNI Sport News

၂၀၂၆ ခုနှစ်၊ ဇန်နဝါရီ ၅

ပေါ်တူဂီလူမျိုးနည်းပြ အာမိုရင်က သူဟာ ယူနိုက်တက်အသင်းမှာ နည်းပြမဟုတ်ဘဲ မန်နေဂျာဖြစ်ကြောင်းနဲ့ ကလပ်ရဲ့ ကင်းထောက်ဌာနနဲ့ အားကစားဒါရိုက်တာအနေနဲ့ သူတို့ရဲ့အလုပ်ကို သူတို့လုပ်ဖို့ လိဒ်စ်အသင်းနဲ့ ၁ ဂိုးစီ သရေကျခဲ့တဲ့ ပွဲအပြီးမှာ ပြောခဲ့ပါတယ်။

အာမိုရင်က “ကျနော်ဟာ ယူနိုက်တက်အသင်းကို မန်နေဂျာအဖြစ် လာခဲ့တာပါ၊ နည်းပြ မဟုတ်ပါဘူး။ ဒါက ရှင်းပါတယ်။ ဒီအတိုင်း ၁၈ လသွားမယ် ဒါမှမဟုတ် ဘုတ်အဖွဲ့က အပြောင်းအလဲပြုလုပ်ဖို့ ဆုံးဖြတ်တဲ့ အချိန် အထိပေါ့။ ကျနော်က ကျနော့်အလုပ်လုပ်မှာဖြစ်ပြီး ဌာနတိုင်း၊ ကင်းထောက်ဌာနနဲ့ အားကစား ဒါရိုက်တာတို့က သူတို့အလုပ် သူတို့လုပ်မှာပါ။ ကျနော်နုတ်ထွက်မှာမဟုတ်ပါဘူး။ ကျနော့်နေရာကို အစားထိုးမယ့်သူ ရောက်လာ တဲ့အထိ ကျနော့်ရဲ့ အလုပ်ကို လုပ်သွားမယ်”လို့ ပြောခဲ့တာပါ။ 

ယူနိုက်တက်အသင်းနည်းပြ အာမိုရင်နဲ့ အသင်းရဲ့ ဘောလုံးဒါရိုက်တာ ဝီလ်ကော့စ်တို့ အကြားမှာ တင်းမာမှုတွေ ရှိနေတယ်လို့ ဗြိတိန်မီဒီယာတွေ အများအပြားက ဖော်ပြထားပါတယ်။

အာမိုရင်ဟာ ဇန်နဝါရီအပြောင်းအရွှေ့မှာ အသင်းဘက်က ကစားသမားသစ်တွေ ထပ်မံခေါ်ယူပေးဖွယ် မရှိတဲ့ အပေါ် စိတ်ပျက်နေတာပါ။ 

 ယူနိုက်တက်အသင်း ယှဉ်ပြိုင်နေစဉ်

ယူနိုက်တက်အသင်းဟာ အဓိက ကစားသမား အများအပြားကို ဒဏ်ရာကြောင့် အနားပေးထားရသလို အာဖရိကဖလားပြိုင်ပွဲထံ စေလွှတ်ထားရတာကြောင့် ရလဒ်ကောင်းတွေ ရရှိဖို့ ရုန်းကန်နေရပါတယ်။ 

ယူနိုက်တက်အသင်းဟာ ပရီးမီးယားလိဂ် ၂ ပွဲဆက်တိုက် သရေကျခဲ့ပြီး ရမှတ်တွေ ဆုံးရှုံးနေတာပါ။ 

နည်းပြအာမိုရင်ဟာ လက်ရှိအချိန်မှာ သူ့ရဲ့ မှတ်ချက်တွေကြောင့် ယူနိုက်တက်အသင်းမှာ သူ့ရဲ့ အနာဂတ်အပေါ် သံသယတွေ ပိုပြီးတိုးလာခဲ့တာ ဖြစ်ပါတယ်။ 

၂၀၂၄ ခုနှစ်၊ နိုဝင်ဘာက စပို့တင်းလစ္စဘွန်းအသင်းကနေ ရောက်ရှိလာခဲ့တဲ့ အာမိုရင်နဲ့ ယူနိုက်တက်အသင်းတို့ရဲ့ စာချုပ်ဟာ ၂၀၂၇ ခုနှစ်၊ ဇွန်လအထိ သက်တမ်းရှိနေပါတယ်။ 

ပရီးမီးယားလိဂ် အမှတ်ပေးဇယားအဆင့် ၆ နေရာမှာ ရပ်တည်နေတဲ့ ယူနိုက်တက်အသင်းဟာ လာမယ့်လိဂ်ပွဲ အဖြစ် ဘန်လေအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: ESPN

CNI Sport News

၂၀၂၆ ခုနှစ်၊ ဇန်နဝါရီ ၅

မန်စီးတီးအသင်းဟာ ချယ်လ်ဆီးအသင်းနဲ့ ၁ ဂိုးစီ သရေကျခဲ့ပြီးနောက် ကွင်းလယ်လူ ရိုဒရီက ချန်ပီယံဆုအတွက် သွားရမယ့်လမ်းက အဝေးကြီး ကျန်သေးတဲ့အတွက် သူတို့အကောင်းဆုံး လုပ်သွားမယ်လို့ အာဆင်နယ်အသင်းကို မက်ဆေ့ချ်ပေးပို့ခဲ့ပါတယ်။ 

ရိုဒရီက “ကျနော်တို့ဟာ ဂိုးပြတ်အနိုင်ရဖို့ လုံလောက်တဲ့ အခွင့်အရေး အများအပြား ဖန်တီးနိုင်ခဲ့ပေမယ့် စိတ်ပျက် စရာဖြစ်ခဲ့ပြီး ဒါကဘောလုံးပါပဲ။ ကျနော်တို့ဟာ ဒီအဖြစ်အပျက်ကနေ သင်ယူရမှာဖြစ်ပြီး အဝေးကြီး ကျန်နေ သေးတဲ့အတွက် လာမယ့်ပွဲကို အာရုံစိုက်ဖို့လိုပါတယ်။ ဒုတိယပိုင်းမှာ ပွဲကိုဘယ်လို ကစားရမလဲဆိုတာ ကျနော်တို့ မေ့သွားတဲ့အတွက် သူတို့က ပွဲကိုထိန်းချုပ်ခဲ့ပြီး လွယ်ကူတဲ့ ဘောလုံးတွေကလည်း ဆုံးရှုံးခဲ့ပါတယ်။ ရှည်လျားတဲ့ ရာသီ ဖြစ်တဲ့အတွက် ကျနော်တို့ ဆက်သွားရမှာပါ”လို့ ပြောခဲ့ပါတယ်။ 

ဒီပွဲမှာ မန်စီးတီးအသင်းဟာ ကွင်းလယ်လူ ရိန်းဒါးစ်ရဲ့ ပထမပိုင်းမှာ သွင်းယူတဲ့ဂိုးနဲ့ ဦးဆောင်နိုင်ခဲ့ပေမယ့် မိနစ် ၉၀ ပြည့်ပြီး ထပ်ဆောင်းအချိန်ပိုမှာ အန်ဇိုဖာနန်ဒက်ဇ်က ချယ်လ်ဆီးအသင်းအတွက် ချေပဂိုး သွင်းယူခဲ့တာ ဖြစ်ပါတယ်။ 

ရိုဒရီကိုတွေ့ရစဉ်

မန်စီးတီးအသင်းဟာ ပြီးခဲ့တဲ့ ကြားရက်က ဆန်းဒါလန်းအသင်းနဲ့ပွဲမှာ သရေကျခဲ့ပြီး ဒီပွဲမှာလည်း သရေကျခဲ့တဲ့ အတွက် ၂ ပွဲဆက်တိုက် ရမှတ်တွေ ဆုံးရှုံးခဲ့တာပါ။ 

အဲ့ဒါကြောင့် မန်စီးတီးအသင်းဟာ ပရီးမီးယားလိဂ်ဖလားရဖို့ ရေပန်း အစားဆုံးဖြစ်နေတဲ့ အာဆင်နယ်အသင်းနဲ့ ၆ မှတ် ကွာဟသွားခဲ့တာ ဖြစ်ပါတယ်။

ဒီပွဲမှာ မန်စီးတီးအသင်းအတွက် ဂိုးသွင်းခဲ့တဲ့ ရိန်းဒါးစ်က သူတို့ဟာ အခြေအနေတွေကို ပြောင်းလဲအောင် လုပ်နိုင် မယ်လို့ ယုံကြည်မှုရှိနေဆဲဖြစ်ပြီး လာမယ့်ပွဲက အလွန်အရေးကြီးတယ်လို့ ပြောခဲ့ပါတယ်။ 

မန်စီးတီးအသင်းရဲ့ အဓိကနောက်ခံလူ ၂ ဦးဖြစ်တဲ့ ရူဘင်ဒီယက်ဇ်နဲ့ ဂျီဗာဒီရယ်လ်တို့ဟာ ဒီပွဲမှာ ဒဏ်ရာကြောင့် လူစားလဲခဲ့ရပါတယ်။ 

မန်စီးတီးအသင်းနည်းပြ ဂွာဒီယိုလာက နောက်တန်း ကစားသမား အများအပြားရဲ့ ဒဏ်ရာကြောင့် စိုးရိမ်မှုရှိနေပြီး သူတို့မှာ ကစားသမားတွေ မရှိဘူးလို့ ပြောခဲ့ပါတယ်။

မန်စီးတီးအသင်းဟာ လာမယ့် ပရီးမီးယားလိဂ် ပွဲစဉ်အဖြစ် ဘရိုက်တန်အသင်းနဲ့ ယှဉ်ပြိုင်ရမှာဖြစ်ပြီး အာဆင်နယ် အသင်းက လီဗာပူးလ်အသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: Metro

CNI Sport News

၂၀၂၆ ခုနှစ်၊ ဇန်နဝါရီ ၃

ယူနိုက်တက်အသင်းဟာ ဇန်နဝါရီအပြောင်းအရွှေ့ကာလမှာ ကစားသမား ခေါ်ယူမှု ဒါမှမဟုတ် ထွက်ခွာမှုနဲ့ ပတ်သက်ပြီး ဘာအစီအစဉ်မှ မရှိဘူးလို့ နည်းပြအာမိုရင်က ပြောခဲ့ပါတယ်။ 

အာမိုရင်က “အသင်းလူစာရင်းကို အပြောင်းအလဲတွေ ပြုလုပ်ဖို့ ကျနော်တို့ ဆွေးနွေးထားတာ မရှိပါဘူး။ ချန်ပီယံ လိဂ် ဝင်ခွင့်နေရာနဲ့ နီးစပ်နေပေမယ့် လာမယ့်ပွဲကို အာရုံစိုက်သွားမှာပါ။ ဘယ်သူ့မှ ထွက်ခွာဖို့ တောင်းဆိုထား တာလည်း မရှိပါဘူး။ သူတို့ ကျနော့် ဆီလာပြီး ပြောဖို့ကိုလည်း မမျှော်လင့်ထားပါဘူး”လို့ ပြောခဲ့တာပါ။ 

ယူနိုက်တက်အသင်းဟာ ဒဏ်ရာရ ကစားသမားတွေနဲ့ အာဖရိကဖလားပြိုင်ပွဲထံ စေလွှတ်ထားရတဲ့ ကစားသမား တွေ ရှိတာကြောင့် ဇန်နဝါရီအပြောင်းအရွှေ့မှာ ကစားသမားသစ်တွေ ခေါ်ယူဖွယ်ရှိတယ်လို့ သတင်းတွေ ထွက်နေ တာပါ။ 

ဒါပေမယ့် နည်းပြအာမိုရင်က သူတို့ဟာ အပြောင်းအရွှေ့နဲ့ပတ်သက်ပြီး ဘာမှ ဆွေးနွေးထားခြင်း မရှိဘူးလို့ ပြောခဲ့ပါတယ်။ 

 ယူနိုက်တက်အသင်းကို တွေ့ရစဉ် 

ယူနိုက်တက်အသင်းဟာ နောက်ဆုံးကစားခဲ့တဲ့ ပရီးမီးယားလိဂ်ပွဲမှာ အမှတ်ပေးဇယား အောက်ဆုံးက ဝုလ်ဗ်စ် အသင်းနဲ့ သရေကျခဲ့တာကြောင့် ဝေဖန်မှုတွေခံခဲ့ရပါတယ်။ 

ယူနိုက်တက်အသင်း တွေ့ဆုံရမယ့် လိဒ်စ်အသင်းဟာ လက်ရှိအချိန်မှာ ရှုံးပွဲမရှိ အကောင်းဆုံးပုံစံ ပြသနေတာ ကြောင့် ခက်ခဲတဲ့ပွဲဖြစ်လာဖို့ ရှိနေတာပါ။

ယူနိုက်တက်အသင်းနည်းပြ အာမိုရင်က သူတို့ဟာ ဘယ်ပွဲကိုမဆို အနိုင်ယူနိုင်တယ်ဆိုတာ သက်သေပြပြီးဖြစ်လို့ အနိုင်ရယူနိုင်ဖို့ ကြိုးစားသွားမယ်လို့ ပြောခဲ့ပါတယ်။ 

Source: CNA

CNI Sport News

၂၀၂၆ ခုနှစ်၊ ဇန်နဝါရီ ၃

ဝက်စ်ဟမ်းအသင်းထံ ပြောင်းဖို့ ငြင်းခဲ့တဲ့ အင်္ဂလန်တောင်ပံကစားသမား စတာလင်ဟာ ချယ်လ်ဆီးအသင်းရဲ့ လန်ဒန်ပြိုင်ဘက်ထံ ပြောင်းရွှေ့နိုင်ဖို့ မျှော်လင့်နေပါတယ်။ 

ပြီးခဲ့တဲ့ရာသီက အာဆင်နယ်အသင်းမှာ အငှားကစားခဲ့တဲ့ စတာလင်ဟာ ဒီရာသီ ချယ်လ်ဆီးအသင်းကြီးနဲ့ အဝေးမှာ သီးခြားလေ့ကျင့်မှုတွေ ပြုလုပ်နေရတာပါ။ 

ချယ်လ်ဆီးအသင်းဟာ တစ်ပတ်လုပ်ခပေါင် ၃၂၅,၀၀၀ ပေးချေနေရတဲ့ စတာလင်ကို ရောင်းချချင်နေပြီး ဝက်စ်ဟမ်းအသင်းအသင်းက သူ့ကို အငှားနဲ့ခေါ်ယူဖို့ စိတ်ဝင်စားနေပါတယ်။ 

The Times က စတာလင်ဟာ ဝက်စ်ဟမ်းအသင်းရဲ့ ချဉ်းကပ်မှုကို ငြင်းပယ်ခဲ့ပြီး အနောက်လန်ဒန်ပြိုင်ဘက် ဖူလ်ဟမ်အသင်းထံ ပြောင်းရွှေ့ချင်နေတယ်လို့ ဖော်ပြထားပါတယ်။ 

ဝက်စ်ဟမ်းအသင်းဟာ တန်းဆင်းဇုန်အန္တရာယ် ကျရောက်နေပြီး ဖူလ်ဟမ်အသင်းက အဆင့် ၁၁ နေရာမှာ ရပ်တည်နေတာပါ။ 

စတာလင်ကို တွေ့ရစဉ် 

၂၀၂၂ ခုနှစ်က ပေါင်သန်း ၅၀ နဲ့ မန်စီးတီးအသင်းကနေ ပြောင်းရွှေ့လာခဲ့တဲ့ စတာလင်ဟာ ချယ်လ်ဆီးအသင်းနဲ့ ၁၈ လ စာချုပ် ကျန်ရှိနေတာ ဖြစ်ပါတယ်။ 

မန်စီးတီးအသင်းနဲ့ ပရီးမီးယားလိဂ်ဖလား ၄ ကြိမ် ရယူနိုင်ခဲ့တဲ့ စတာလင်ဟာ စတမ်းဖို့ဒ်ဘရစ်ချ်ကနေ အပြီးသတ် ထွက်ခွာဖို့ ဆန္ဒရှိနေပါတယ်။ 

စတာလင်ဟာ ပြီးခဲ့တဲ့နွေရာသီက ဥရောပထိပ်တန်း အသင်းအချို့ရဲ့ ကမ်းလှမ်းမှု ရခဲ့ပေမယ့် မိသားစုနဲ့ အနီးကပ် ရှိချင်တာကြောင့် လန်ဒန်မှာပဲ ဆက်နေချင်တာ ဖြစ်ပါတယ်။

ဖူလ်ဟမ်အသင်း တောင်ပံကစားသမား ထရာအိုရေးဟာ ဝက်စ်ဟမ်းအသင်းထံ ပြောင်းရွှေ့ခဲ့ရင် ဖူလ်ဟမ်အသင်း ထံ ပြောင်းရွှေ့ချင်တဲ့ စတာလင်ရဲ့ မျှော်လင့်ချက် ပိုပြီးခိုင်မာလာမှာပါ။ 

အသက် ၃၁ နှစ်အရွယ်ရှိ စတာလင်ဟာ ချယ်လ်ဆီးအသင်းအတွက် ၈၁ ပွဲ ကစားခဲ့ပြီး ၁၉ ဂိုးသွင်းခဲ့ပါတယ်။

Source: The Sun

CNI Sport News

၂၀၂၆ ခုနှစ်၊ ဇန်နဝါရီ ၃

မန်စီးတီးအသင်း နည်းပြရာထူးအတွက် မာရက်စ်ကာနဲ့ ထင်ကြေး သတင်းတွေ ထွက်ပေါ်နေချိန်မှာ စပိန်လူမျိုး နည်းပြ ဂွာဒီယိုလာက မန်ချက်စတာကလပ်မှာ ဆက်နေချင်တဲ့ သူ့ရဲ့ဆန္ဒကို အတည်ပြုခဲ့ပါတယ်။

ဂွာဒီယိုလာက “ကျနော့်မှာ စာချုပ်ရှိတယ်ဆိုတာ အကြိမ်ပေါင်းများစွာ ပြောခဲ့ပါတယ်။ ဒီမှာရှိတာ ၁၀ နှစ်ရှိပြီ ဖြစ်ပြီး တစ်နေ့ကျရင် ထွက်ခွာသွားမှာ ဖြစ်ပေမယ့် ကျနော့်မှာ စာချုပ်ရှိပါတယ်။ ကျနော် ပျော်ရွှင်နေသလို အသင်းနဲ့အတူ တိုက်ပွဲဝင်ချင်ပါတယ်။ အသင်းအကြီးအကဲတွေက ကျနော့်ကို လေးစားမှုရှိတယ်ဆိုတာ ပြီးခဲ့တဲ့ ရာသီမှာ ဖြစ်ပျက်ခဲ့တာတွေက သက်သေပြခဲ့ပါတယ်”လို့ ပြောခဲ့ပါတယ်။ 

မန်စီးတီးနဲ့ ဂွာဒီယိုလာတို့ရဲ့ စာချုပ်ဟာ ၂၀၂၇ ခုနှစ် နွေရာသီအထိ သက်တမ်းရှိနေတာပါ။

ဂွာဒီယိုလာဟာ ဒီရာသီကုန်မှာ မန်စီးတီးအသင်းကနေ ထွက်ခွာဖို့ ဆုံးဖြတ်ခဲ့ရင် သူ့ရဲ့ လက်ထောက်နည်းပြ ဟောင်း မာရက်စ်ကာက သူ့ရဲ့ နေရာကို အစားထိုး ဝင်ရောက်နိုင်တယ်လို့ သတင်းတွေမှာ ဖော်ပြခဲ့ပါတယ်။ 

ဂွာဒီယိုလာကို တွေ့ရစဉ်

မာရက်စ်ကာဟာ ချယ်လ်ဆီးအသင်းကနေ ထွက်ခွာခဲ့တာကြောင့် မန်စီးတီးအသင်း နည်းပြရာထူးကို ရယူနိုင် ဖွယ်ရှိတဲ့ ထင်ကြေးသတင်းတွေဟာ ပိုပြီး ထွက်ပေါ်လာခဲ့တာပါ။ 

ဂွာဒီယိုလာက သူဟာ မန်စီးတီးအသင်းနဲ့ စာချုပ်ရှိနေပြီး ချယ်လ်ဆီးအသင်းဟာ မယုံနိုင်ဖွယ်ကောင်းတဲ့ နည်းပြ တစ်ဦးကို ဆုံးရှုံးခဲ့တယ်လို့ ပြောခဲ့ပါတယ်။

မန်စီးတီးအသင်းဟာ ပရီးမီးယားလိဂ်ပွဲအဖြစ် ချယ်လ်ဆီးအသင်းနဲ့ ယှဉ်ပြိုင်ရမှာ ဖြစ်ပြီး နည်းပြဂွာဒီယိုလာက ပြိုင်ဘက်အသင်း အကြောင်းထက် ကိုယ်ဘာလုပ်ရမလဲဆိုတာ တွေးပြီး အကောင်းဆုံးလုပ်ဖို့ အာရုံစိုက်နေ တယ်လို့ ပြောခဲ့တာပါ။ 

မန်စီးတီးအသင်းဟာ ၂၀၂၆ ခုနှစ်ထဲ ပထမဆုံး ကစားခဲ့တဲ့ပွဲမှာ ဆန်းဒါးလန်းအသင်းနဲ့ ဂိုးမရှိ သရေကျပြီး ရမှတ် ၂ မှတ် လျော့ခဲ့တဲ့အတွက် အာဆင်နယ်အသင်းရဲ့ ၄ မှတ်ဖြတ် ဦးဆောင်ခြင်းကို ခံခဲ့ရတာဖြစ်ပါတယ်။ 

Source: ESPN

CNI Sport News

၂၀၂၆ ခုနှစ်၊ ဇန်နဝါရီ ၃

အာဆင်နယ်အသင်းဟာ နှစ်သစ်ကူးနေ့မှာ ပရီးမီးယားလိဂ် ထိပ်ဆုံးနေရာ ရပ်တည်ခဲ့ပြီးရင် အမှတ်ပေးဖလားကို ဘယ်တုန်းကမှ ရခဲ့ခြင်း မရှိပေမယ့် နည်းပြအာတီတာက ဒီရာသီမှာ ဒီကျိန်စာဆိုးကို ချိုးဖျက်နိုင်ဖို့ မျှော်လင့် တယ်လို့ ပြောခဲ့ပါတယ်။ 

အာတီတာက “ဒါကို ချိုးဖျက်ကြရအောင်ပါ။ ကစားသမားတွေဟာ ဘယ်လောက်အထိ လိုချင်နေကြလဲဆိုတာ သူတို့ရဲ့ စိတ်ဆန္ဒနဲ့ စွမ်းအင်ကို မြင်နိုင်ပါတယ်။ ၅ လကျန်သေးပြီး နေ့တိုင်းကို ပျော်ပျော်ရွှင်ရွှင် ဖြတ်သန်းသွား မှာပါ။ ကျနော်တို့ဟာ အမြဲတမ်း ပိုကောင်းလာနိုင်သလို တိုးတက်အောင် လုပ်ရမယ့် အရာတွေလည်း ရှိပါတယ်။ ဇန်နဝါရီအစပိုင်းပဲရှိသေးတဲ့အတွက် ကျနော်တို့ အများကြီးပိုလုပ်ရဦးမှာပါ”လို့ ပြောခဲ့ပါတယ်။ 

ဒီရာသီ ပရီးမီးယားလိဂ် ရာသီဝက် ပြီးဆုံးသွားတဲ့အချိန်မှာ အာဆင်နယ်အသင်းဟာ မန်စီးတီးအသင်းကို ၄ မှတ် အသာရပြီး အမှတ်ပေးဇယား ထိပ်ဆုံးနေရာမှာ ရပ်တည်နေတာ ဖြစ်ပါတယ်။ 

အာဆင်နယ်အသင်းဟာ မနှစ်က ရာသီတွေတုန်းကလည်း ရာသီရဲ့ ဒုတိယပိုင်းမှာ ရမှတ်တွေဆုံးရှုံးပြီး ဆုဖလားနဲ့ လွဲချော်ခဲ့ရတာပါ။ 

အာဆင်နယ်အသင်း ယှဉ်ပြိုင်နေစဉ် 

အာဆင်နယ်အသင်းနည်းပြ အာတီတာကတော့ သူတို့ဟာ ဒီရာသီမှာ ပရီးမီးယားလိဂ်ဖလား ရယူပြီး မှတ်တမ်း ဆိုးကို ချိုးဖျက်နိုင်ဖို့ မျှော်လင့်နေတာ ဖြစ်ပါတယ်။

Opta က အာဆင်နယ်အသင်းဟာ ပရီးမီးယားလိဂ်ဖလား ရရှိဖို့ ၇၈.၉၈ ရာခိုင်နှုန်းနဲ့ ရေပန်းအစားဆုံး အသင်း ဖြစ်တယ်လို့ ဖော်ပြထားပါတယ်။

ဒဏ်ရာကြောင့် အက်စတွန်ဗီလာအသင်းနဲ့ပွဲကို မပါဝင်နိုင်ခဲ့တဲ့ ကွင်းလယ်လူ ဒီကလန်ရိုက်စ် ဘုန်းမောက်အသင်း နဲ့ ပွဲမှာ ပါဝင်နိုင်ဖွယ် ရှိ/မရှိ စောင့်ကြည့်ရဦးမယ်လို့ နည်းပြအာတီတာက ပြောခဲ့ပါတယ်။ 

ဒါ့ပြင် အာတီတာက ဘုန်းမောက်အသင်းဟာ သူတို့ကို ဒုက္ခပေးနိုင်တဲ့ အသင်းဖြစ်တဲ့အတွက် ဒီပွဲရဲ့ ခက်ခဲမှုကို သိတယ်လို့ ပြောခဲ့ပါတယ်။ 

Source: CNA

CNI Sport News

၂၀၂၆ ခုနှစ်၊ ဇန်နဝါရီ ၂

ယူနိုက်တက်အသင်းကနေ အငှားနဲ့ လာရောက်ကစားပြီး ခြေစွမ်းပြသနေတဲ့ ဒိန်းမတ်တိုက်စစ်မှူး ဟော့ဂျ်လန်းကို နာပိုလီအသင်းက အပြီးသတ်ဝယ်ယူဖို့ သေချာတယ်လို့ ကလပ်အသင်းရဲ့ အားကစားဒါရိုက်တာက ပြောခဲ့ပါတယ်။ 

ဟော့ဂျ်လန်းဟာ ယူနိုက်တက်အသင်း နည်းပြ အာမိုရင်ရဲ့ အစီအစဉ်မှာ မပါဝင်ကြောင်း အသိပေးခံရပြီးနောက် နွေရာသီ အပြောင်းအရွှေ့မှာ စီးရီးအေထံ ပြန်လည်ပြောင်းရွှေ့လာခဲ့တာပါ။ 

ဟော့ဂျ်လန်းဟာ ပြီးခဲ့တဲ့ရာသီက ယူနိုက်တက်အသင်းမှာ ပရီးမီးယားလိဂ်သွင်းဂိုး ၄ ဂိုးသာ သွင်းယူနိုင်ခဲ့ပေမယ့် ဒီရာသီနာပိုလီအသင်းမှာ စီးရီးအေသွင်းဂိုး ၆ ဂိုး အပါအဝင် ပြိုင်ပွဲစုံ ၉ ဂိုးအထိ သွင်းပြီး ခြေစွမ်းပြသနေတာ ဖြစ်ပါတယ်။ 

ဒါ့ပြင် ဟော့ဂျ်လန်းဟာ နာပိုလီအသင်းအတွက် ၃ ဂိုး ဖန်တီးမှု ပြုလုပ်ထားတာပါ။ 

နာပိုလီအသင်း အားကစားဒါရိုက်တာ ဂျီယိုဗန်နီမန်နာက ဟော့ဂျ်လန်းဟာ လာမယ့် ရာသီအသင်းရဲ့ သွင်းဂိုးတွေ မှာ ဆက်ပြီးပါဝင်သွားမယ်လို့ Corriere dello Sport နဲ့ အင်တာဗျူးမှာ ပြောခဲ့ပါတယ်။ 

ဟော့ဂျ်လန်းကို တွေ့ရစဉ် 

နာပိုလီအသင်းဟာ လာမယ့် ရာသီ ချန်ပီယံလိဂ် ဝင်ခွင့်ရရင် ဟော့ဂျ်လန်းကို ပေါင် ၃၈ သန်းနဲ့ အပြီးသတ် ဝယ်ယူ နိုင်မယ့် အချက်ရှိနေတာကြောင့် သူ့ကို အပြီးသတ် ဝယ်ယူနိုင်မယ်လို့ ယုံကြည်မှုရှိနေတာ ဖြစ်ပါတယ်။ 

ဂျီယိုဗန်နီမန်နာက ဟော့ဂျ်လန်းဟာ သူ့ကိုယ်သူ နာပိုလီကစားသမားလို့ ထင်မြင်နေပြီး အသင်းဘက်ကလည်း အတူတူပဲဖြစ်တာကြောင့် ဒါက အလွန်အရေးကြီးတယ်လို့ ပြောခဲ့ပါတယ်။ 

နာပိုလီအသင်းဟာ ဒီရာသီ စီးရီးအေပြိုင်ပွဲမှာ အဆင့် ၃ နေရာ ရပ်တည်နေပြီး အဆင့် ၁ နေရာက အင်တာမီလန် အသင်းနဲ့ ၂ မှတ်သာ ကွာဟတာကြောင့် ချန်ပီယံဆုကို ဆက်ပြီး ကာကွယ်နိုင်ဖို့ ပစ်မှတ်ထားနေပါတယ်။ 

အီတလီစူပါဖလား ချန်ပီယံဆုကို ရယူထားတဲ့ နာပိုလီအသင်းဟာ လာမယ့် စီးရီးအေပွဲအဖြစ် လာဇီယိုအသင်း အိမ်ကွင်း သွားရောက်ယှဉ်ပြိုင်ရမှာ ဖြစ်ပါတယ်။ 

Source: Dailymail

CNI Sport News

၂၀၂၆ ခုနှစ်၊ ဇန်နဝါရီ ၂

မန်စီးတီးအသင်း နောက်ခံလူဟောင်း ကန်ဆယ်လိုဟာ ဇန်နဝါရီအပြောင်းအရွှေ့ ဈေးကွက်ဖွင့်တဲ့ အချိန်မှာ ဆော်ဒီပရိုလိဂ်ကလပ် အယ်လ်ဟီလယ် အသင်းကနေ ထွက်ခွာပြီး ဥရောပထံ ပြန်လာဖို့ အံ့အားသင့်ဖွယ် ပြင်ဆင်နေပါတယ်။ 

ကန်ဆယ်လိုကို ခေါ်ယူဖို့ ဘာစီလိုနာအသင်းအပြင် စီးရီးအေ ထိပ်သီးတွေဖြစ်တဲ့ အင်တာမီလန်နဲ့ ဂျူဗင်တပ်စ် အသင်းတို့ကလည်း စိတ်ဝင်စားနေပါတယ်။ 

ဖာဘရီဇီယိုရိုမာနိုက အင်တာမီလန်အသင်းဟာ ကန်ဆယ်လိုကို အငှားနဲ့ခေါ်ယူဖို့ အယ်လ်ဟီလယ်အသင်းထံ ချဉ်းကပ်ခဲ့ပြီး အသင်းဟောင်း ဘာစီလိုနာနဲ့ ဂျူဗင်တပ်စ်အသင်းတို့ကလည်း သူ့ရဲ့ အခြေအနေအကြောင်း မေးမြန်းဖို့ ဆက်သွယ်မှုတွေ ပြုလုပ်ခဲ့တယ်လို့ ဖော်ပြထားပါတယ်။ 

ကန်ဆယ်လိုဟာ ၂၀၂၃-၂၄ ရာသီကို ဘာစီလိုနာအသင်းမှာ အငှားနဲ့ကုန်ဆုံးခဲ့ပြီး ကွင်းထဲမှာရော ကွင်းပြင်ပမှာပါ အထင်ကြီးဖွယ် စွမ်းဆောင်နိုင်ခဲ့ပါတယ်။ 

ကန်ဆယ်လိုကို တွေ့ရစဉ် 

ဘာစီလိုနာအသင်းဟာ နောက်ခံလူ ခရစ္စတန်ဆန် ဒဏ်ရာကြောင့် ကာလရှည်ကြာ အနားယူရဖွယ် ရှိနေတဲ့ အတွက် ဗဟိုနောက်ခံလူ တစ်ဦးကို ဈေးကွက်ထဲမှာ ရှာဖွေဖို့ရှိပေမယ့် နေရာစုံ ကစားနိုင်တဲ့ ကန်ဆယ်လိုရဲ့ နာမည်ဟာ ထွက်ပေါ်လာခဲ့တာ ဖြစ်ပါတယ်။ 

ကန်ဆယ်လိုဟာ ဘယ်နောက်ခံလူ၊ ညာနောက်ခံလူအပြင် ကွင်းလယ်လူအဖြစ်တောင် ကစားနိုင်တဲ့အတွက် ဘာစီလိုနာအသင်းရဲ့ နေရာ အများအပြားကို ဖြေရှင်းမှုတွေ ပြုလုပ်ပေးနိုင်တာပါ။

အင်တာမီလန်အသင်းဟာ ညာတောင်ပံ နောက်ခံလူ နေရာအတွက် ကန်ဆယ်လိုကို ခေါ်ယူချင်နေပြီး အယ်လ်ဟီလယ်အသင်းရဲ့ ဆုံးဖြတ်ချက်ကို စောင့်ဆိုင်းနေတာဖြစ်ပါတယ်။ 

၂၀၂၄ ခုနှစ်နွေရာသီမှာ အယ်လ်ဟီလယ်အသင်းထံ ပြောင်းရွှေ့လာခဲ့တဲ့ ကန်ဆယ်လိုဟာ အသင်းအတွက် ၄၅ ပွဲ ကစားထားပြီး ၃ ဂိုးသွင်းယူထားကာ ၂၀၂၇ ရာသီကုန်အထိ စာချုပ်ရှိနေတာ ဖြစ်ပါတယ်။ 

Source: Goal

CNI Sport News

၂၀၂၆ ခုနှစ်၊ ဇန်နဝါရီ ၁

စတမ်းဖို့ဒ်ဘရစ်ချ်မှာ ဖိအားတွေ တိုးလာနေတဲ့ အီတလီလူမျိုးနည်းပြ မာရက်စ်ကာရဲ့ ချယ်လ်ဆီးအသင်း နည်းပြ နေရာကို ဆက်ခံဖို့ ဘာစီလိုနာအသင်း နည်းပြဟောင်း ဇာဗီက ရေပန်းအစားဆုံး ဖြစ်လာခဲ့ပါတယ်။

ချယ်လ်ဆီးအသင်းဟာ နောက်ဆုံးကစားခဲ့တဲ့ ပရီးမီးယားလိဂ် ၇ ပွဲမှာ ၁ ပွဲသာ အနိုင်ရခဲ့ပြီး ချန်ပီယံဆုကို စိန်ခေါ်နိုင်မယ့် မျှော်လင့်ချက်တွေလည်း ပျောက်ကွယ်သွားခဲ့ပါတယ်။

ချယ်လ်ဆီးအသင်းဟာ နောက်ဆုံး ကစားခဲ့တဲ့ပွဲမှာ ဘုန်းမောက်အသင်းနဲ့ ၂ ဂိုးစီ သရေကျခဲ့ပြီး ပရီးမီးယားလိဂ် ၃ ပွဲ ဆက်တိုက် နိုင်ပွဲပျောက်ဆုံးခဲ့တာပါ။ 

မာရက်စ်ကာဟာ ဘုန်းမောက်အသင်းနဲ့ပွဲမှာ ကိုးလ်ပါလ်မာကို လူစားလဲချိန် အသင်းပရိသတ်တွေရဲ့ လှောင်ပြောင် မှုတွေ ခံခဲ့ရသလို ပွဲအပြီးမှာ လှောင်ပြောင်မှုတွေ ပိုများလာခဲ့တာ ဖြစ်ပါတယ်။ 

သတင်းတွေမှာတော့ မာရက်စ်ကာဟာ ဒီရလဒ်ကြောင့် နည်းပြရာထူးကို ဆုံးရှုံးမယ့် အန္တရာယ်နဲ့ ချက်ချင်းရင်ဆိုင် နေရတာ မဟုတ်ဘူးလို့ ဖော်ပြထားပါတယ်။ 

ဒါပေမယ့် Daily Telegraph က ရလဒ်တွေ မြန်မြန်ဆန်ဆန် တိုးတက်မလာဘူးဆိုရင်တော့ အခြေအနေတွေက ပြောင်းလဲသွားနိုင်တယ်လို့ ဖော်ပြထားတာပါ။

ချယ်လ်ဆီးအသင်းဟာ လာမယ့်ပွဲအဖြစ် မန်စီးတီးအသင်းနဲ့ ခက်ခဲတဲ့ပွဲ ယှဉ်ပြိုင်ရမှာဖြစ်ပြီး ဇန်နဝါရီလထဲမှာ အာဆင်နယ်နဲ့ ကာရာဘောင်းဖလား ဆီမီးဖိုင်နယ်၊ နာပိုလီအသင်းနဲ့ ချန်ပီယံလိဂ်ပွဲစဉ် ယှဉ်ပြိုင်ကစားရဖို့ ရှိနေပါတယ်။ 

ဇာဗီကို တွေ့ရစဉ်

ချယ်လ်ဆီးအသင်း နည်းပြရာထူးကနေ မာရက်စ်ကာ ထုတ်ပယ်ခံရရင် သူ့ရဲ့နေရာမှာ အစားထိုး ဝင်ရောက်ဖို့ ဇာဗီက ရေပန်းစားနေတယ်လို့ Bet Victor က ဖော်ပြထားတာပါ။ 

ဇာဗီဟာ ၂၀၂၄ ခုနှစ်မှာ ဘာစီလိုနာအသင်းကနေ ထွက်ခွာပြီးကတည်းက ဘယ်အသင်းကိုမှ ကိုင်တွယ်ရခြင်း မရှိသေးတာ ဖြစ်ပါတယ်။ 

စထရာဘောင်းအသင်းနည်းပြ ရိုစီနီယာ၊ ခရစ္စတယ်ပဲလေ့စ်အသင်း နည်းပြ ဂလက်စ်နာတို့ဟာ ဇာဗီရဲ့အနောက် မှာ ချယ်လ်ဆီးအသင်း နည်းပြရာထူးအတွက် ရေပန်းစားတဲ့သူတွေအဖြစ် ရှိနေတာပါ။ 

ခရစ္စမတ်မတိုင်မီက သတင်းတွေမှာ စပိန်လူမျိုးနည်းပြ ဂွာဒီယိုလာဟာ ဒီရာသီအကုန်မှာ မန်စီးတီးအသင်းကနေ ထွက်ခွာခဲ့ရင် မာရက်စ်ကာဟာ မန်ချက်စတာကလပ်ရဲ့ နည်းပြရာထူးကို ရယူနိုင်တယ်လို့ ဖော်ပြထားပါတယ်။ 

မာရက်စ်ကာဟာ မန်စီးတီးလူငယ်အသင်းမှာ နည်းပြချုပ်နဲ့ ဂွာဒီယိုလာလက်အောက် အသင်းကြီးမှာ လက်ထောက် နည်းပြအဖြစ် လုပ်ကိုင်ခဲ့ဖူးတာဖြစ်ပါတယ်။ 

Source: Metro