CNI Sport News

၂၀၂၆ ခုနှစ်၊ ဖေဖော်ဝါရီ ၅

မန်စီးတီးအသင်းနည်းပြ ဂွာဒီယိုလာက အာဆင်နယ်အသင်းနဲ့ ကာရာဘောင်းဖလား ဗိုလ်လုပွဲမှာ နောက်ခံလူ ဂူဟီ ပါဝင်ကစားနိုင်ဖို့အတွက် အင်္ဂလိပ်ဘောလုံးလိဂ် (EFL) ရဲ့ စည်းမျဉ်းတွေကို ပြောင်းလဲစေချင်နေပါတယ်။ 

ဂွာဒီယိုလာက “ဂူဟီ ဘာကြောင့် ဗိုလ်လုပွဲမှာ ကစားခွင့် မရနိုင်တာလဲဆိုတာ ကျနော် နားမလည်နိုင်ပါဘူး။ ကစားသမား တစ်ဦးကို ငွေကြေး အများအပြား သုံးပြီးဝယ်ခဲ့ပေမယ့် သူက ဒီစည်းမျဉ်းကြောင့် ကစားခွင့် မရဘူး ဖြစ်နေပါတယ်။ သူတို့ဒါကို ပြောင်းလဲနိုင်မယ်လို့ မျှော်လင့်ပါတယ်။ ကျနော်တို့ဟာ ဂူဟီရဲ့ လစာကို ပေးချေ နေရတာဖြစ်ပြီး သူက ကျနော်တို့ရဲ့ကစားသမားပါ။ ကလပ်အသင်းကိုလည်း မေးခိုင်းထားပြီး သူကစားခွင့်ရနိုင်ဖို့ ကျနော်တို့ကြိုးစားသွားမယ်”လို့ ပြောခဲ့ပါတယ်။

ဇန်နဝါရီ အပြောင်းအရွှေ့မှာ ခရစ္စတယ်ပဲလေ့စ်အသင်းကနေ ရောက်လာခဲ့တဲ့ ဂူဟီဟာ မန်စီးတီးအသင်းက နယူးကာဆယ်အသင်းကို ၃ ဂိုး-၁ ဂိုးနဲ့ အနိုင်ရခဲ့တဲ့ ကာရာဘောင်းဖလား ဆီမီးဖိုင်နယ် ဒုတိယအကျော့ပွဲစဉ်ကို ပါဝင်ကစားခွင့် မရခဲ့ပါဘူး။ 

မန်စီးတီးအသင်းဟာ ဒီနိုင်ပွဲကြောင့် နယူးကာဆယ်အသင်းကို နှစ်ကျော့ပေါင်း ရလဒ် ၅ ဂိုး-၁ ဂိုးနဲ့ အနိုင်ရပြီး ဗိုလ်လုပွဲ တက်နိုင်ခဲ့ပါတယ်။ 

မန်စီးတီးအသင်းဟာ နယူးကာဆယ်အသင်းကို ဆီမီးဖိုင်နယ် ပထမအကျော့ပွဲစဉ်မှာ အနိုင်ရပြီးနောက် ဂူဟီကို ခေါ်ယူခဲ့တဲ့အတွက် ဆီမီးဖိုင်နယ်ပွဲစဉ်တိုင်မီ လူစာရင်းထဲ စာရင်းသွင်းခွင့် မရခဲ့တာပါ။ 

ဂူဟီကို တွေ့ရစဉ်

ဗိုလ်လုပွဲမှာ ပါဝင်ကစားခွင့်ရဖို့ အတွက်ဆိုရင် ဆီမီးဖိုင်နယ် ပွဲစဉ်မတိုင်မီ လူစာရင်းထဲ စာရင်းသွင်းရမှာဖြစ်လို့ ဂူဟီဟာ ဗိုလ်လုပွဲကိုလည်း လွဲချော်ဖို့ရှိနေပါတယ်။

မန်စီးတီးအသင်းဟာ ဂူဟီနဲ့အတူ ဇန်နဝါရီ အပြောင်းအရွှေ့မှာ ခေါ်ယူခဲ့တဲ့ ဆီမန်ညိုကတော့ ဗိုလ်လုပွဲမှာ ပါဝင်ကစားခွင့် ရမှာဖြစ်ပါတယ်။ 

ဆီမန်ညိုဟာ ကာရာဘောင်းဖလား ဆီမီးဖိုင်နယ်ပွဲ မတိုင်မီ မန်စီးတီးအသင်းကို ရောက်ရှိလာခဲ့တာဖြစ်ပြီး နယူးကာဆယ်အသင်းနဲ့ ပထမအကျော့ပွဲမှာ အသင်းအတွက် ဂိုးသွင်းနိုင်ခဲ့တာပါ။

EFL ဟာ ပြီးခဲ့တဲ့နှစ်တွေအတွင်းမှာ ကစားသမားတစ်ဦးကို တူညီတဲ့ပြိုင်ပွဲ တစ်ခုမှာ အသင်း ၂ သင်းအတွက် ပါဝင်ကစားခွင့် မပြုခဲ့ပေမယ့် အခုရာသီမှာ ဒီစည်းမျဉ်းကို ပြောင်းလဲပေးခဲ့ပါတယ်။ 

အဲ့ဒါကြောင့်လည်း မန်စီးတီးအသင်းဟာ ဘုန်းမောက်အသင်းအတွက် ကာရာဘောင်းဖလား ပြိုင်ပွဲမှာ ကစားခဲ့တဲ့ ဆီမန်ညိုကို အသုံးပြုလို့ရခဲ့တာပါ။ 

မန်စီးတီးအသင်းနဲ့ အာဆင်နယ်အသင်းရဲ့ ကာရာဘောင်းဖလား ဗိုလ်လုပွဲကို မတ်လ ၂၂ ရက်မှာ ကျင်းပသွားမှာ ဖြစ်ပါတယ်။ 

Source: BBC

CNI Sport News

၂၀၂၆ ခုနှစ်၊ ဖေဖော်ဝါရီ ၄

ဂျီရိုနာအသင်းထံ အငှားသွားရောက်ကစားနေတဲ့ ဂိုးသမားစတီဂန်ဟာ နောက်ထပ်ဒဏ်ရာ ဆုတ်ယုတ်မှု ကြုံတွေ့ခဲ့ရပေမယ့် ဂျာမနီအသင်းနည်းပြနာဂယ်လ်စမန်းက သူ့ကို ကမ္ဘာ့ဖလားပြိုင်ပွဲအတွက် ထောက်ခံမှု ပြုလုပ်ထားတယ်လို့ ပြောခဲ့ပါတယ်။ 

ပွဲကစားချိန်ပိုပြီးရနိုင်ဖို့မျှော်လင့်ချက်နဲ့ ဘာစီလိုနာအသင်းကနေ ရာသီကုန်အထိ အငှားစာချုပ်နဲ့ ပြောင်းလာခဲ့တဲ့ စတီဂန်ဟာ ဂျီရိုနာအသင်းအတွက် ပါဝင်ကစားတဲ့ ဒုတိယမြောက်ပွဲမှာ ပေါင်ကြွက်သားဒဏ်ရာရရှိခဲ့တာပါ။ 

စတီဂန်ဟာ ဒဏ်ရာကြောင့် လအနည်းငယ်ကြာအနားယူရဖွယ်ရှိနေပြီး ၂၀၂၆ ကမ္ဘာ့ဖလားပြိုင်ပွဲမှာ ဂျာမနီ အသင်းအတွက် ပါဝင်နိုင်ဖို့ သံသယဖြစ်ဖွယ်ရှိလာပါတယ်။

ဂျာမနီအသင်းနည်းပြ နာဂယ်လ်စမန်းကတော့ သူတို့ဟာ စတီဂန်နိုင်ငံအသင်းမှာ ပြန်ပါဝင်နိုင်ဖို့ အလွန် မျှော်လင့်နေကြပြီး အခုအချိန်မှာ အရေးကြီးတာက ဘာဖိအားမှမရှိဘဲ ဒဏ်ရာအခြေအနေကနေ ကောင်းမွန် လာဖို့လို့ ပြောခဲ့ပါတယ်။ 

ဒါ့အပြင် သူတို့အားလုံးဟာ စတီဂန်ကို ထောက်ခံမှုရှိတယ်လို့ နာဂယ်လ်စမန်းက ပြောခဲ့တာပါ။ 

ဘိုင်ယန်မြူးနစ်အသင်းဂိုးသမား နူအာရှိချိန်မှာ ဂျာမနီအသင်းရဲ့နံပတ် ၂ ဂိုးသမားဖြစ်ခဲ့တဲ့ စတီဂန်ဟာ နူအာအနားယူပြီးနောက် ဒဏ်ရာတွေနဲ့ ရုန်းကန်နေရပါတယ်။ 

အဲဒါကြောင့် စတီဂန်ဟာ ဘာစီလိုနာအသင်းမှာ တတိယဦးစားပေးဂိုးသမားဖြစ်ခဲ့ပြီး အသင်းကနေ အငှားနဲ့ ထွက်ခွာခဲ့ရတာပါ။ 

ဂျာမနီအသင်းနည်းပြ နာဂယ်လ်စမန်းနဲ့ ဘောလုံးအဖွဲ့ချုပ် အားကစားဒါရိုက်တာ ရူဒီဗောင်လာတို့ဟာ စတီဂန်သာ ကြံ့ခိုင်မှုပြည့်ဝရင် နိုင်ငံအသင်းရဲ့နံပတ် ၁ ဂိုးသမားဖြစ်တယ်လို့ အတည်ပြု ထားပါတယ်။

စတီဂန်မပါဝင်နိုင်ချိန်မှာ ဟော့ဖန်ဟိမ်းအသင်းဂိုးသမားအိုလီဗာဟာ သူ့ရဲ့နေရာကို အစားထိုးဝင်ရောက်နေရတဲ့ အတွက် ဂိုးသမားနူအာကို ဂျာမနီအသင်းထံ ပြန်လာဖို့တောင်းဆိုမှုတွေ ရှိနေကြပါတယ်။ 

ဂျာမနီအသင်းဟာ မတ်လထဲမှာ ခြေစမ်းပွဲတွေအဖြစ် ဆွစ်ဇာလန်၊ဂါနာအသင်းတို့နဲ့ ယှဉ်ပြိုင်သွားမှာဖြစ်ပါတယ်။ 

Source: Besoccer

CNI Sport News

၂၀၂၆ ခုနှစ်၊ ဖေဖော်ဝါရီ ၄

ဆဲလ်တစ်အသင်းနည်းပြ မာတင်အိုနေးလ်ဟာ အင်္ဂလန် ကွင်းလယ်လူဟောင်း ချိန်ဘာလိန်နဲ့ ဆွေးနွေးမှုတွေ ပြုလုပ်ခဲ့ပြီး သူ့ကိုခေါ်ယူဖို့ အလွန်စိတ်ဝင်စားမယ်လို့ ပြောခဲ့ပါတယ်။ 

မာတင်အိုနေးလ်က “ကျနော်သူနဲ့ စကားပြောခဲ့ပါတယ်။ ဒါပေမယ့် သူ့မှာရွေးချယ်စရာတွေ အများကြီးရှိမယ်လို့ ကျနော် ယုံကြည်ပါတယ်၊ လန်ဒန်နဲ့ ပိုပြီးနီးတဲ့ နေရာလည်း ဖြစ်နိုင်ပါတယ်။ ကျနော်တို့ ပြောနေတာတွေအတွက် သူ အလွန် စိတ်လှုပ်ရှားနေမယ်လို့ ကျနော် ထင်ပါတယ်။ ကလပ်အသင်းအကြောင်းကို သူသိပါတယ်။ ကျနော်တို့ သူ့ကို ခေါ်ဖို့ စိတ်ဝင်စားပေမယ့် အကောင်အထည် မပေါ်နိုင်ရင်တော့ ဖြစ်လာမှာမဟုတ်ပါဘူး”လို့ ပြောခဲ့တာပါ။ 

အသက် ၃၂ နှစ်အရွယ်ရှိ ချိန်ဘာလိန်ဟာ တူရကီကလပ် ဘီဆစ်တပ်အသင်းကနေ ထွက်ခွာအပြီးမှာ အသင်း လက်မဲ့ ဖြစ်နေခဲ့ပါတယ်။

အင်္ဂလန်အသင်းအတွက် ၃၅ ပွဲ ပါဝင်ကစားခဲ့တဲ့ ချိန်ဘာလိန်ဟာ လက်ရှိအချိန်မှာ အသင်းဟောင်း အာဆင်နယ် အသင်းနဲ့ လေ့ကျင့်မှုတွေ ပြုလုပ်နေတာပါ။ 

ချိန်ဘာလိန်ကို တွေ့ရစဉ်

ချိန်ဘာလိန်ဟာ အင်္ဂလန်ကလပ် အသင်းတချို့နဲ့ ချိတ်ဆက်မှုတွေ ရှိခဲ့ပေမယ့် အပြောင်းအရွှေ့ ဖြစ်ခြင်း မရှိသေး ပါဘူး။ 

ချိန်ဘာလိန်ဟာ ပြီးခဲ့တဲ့နှစ် သြဂုတ်လကုန်ပိုင်းမှာ ဘီဆစ်တပ်အသင်းနဲ့ နှစ်ဦး သဘောတူ စာချုပ် ဖျက်သိမ်းခဲ့ တာဖြစ်ပါတယ်။ 

လီဗာပူးလ်အသင်းကနေ ထွက်ခွာပြီးနောက် ဘီဆစ်တပ်အသင်းကို ပြောင်းခဲ့တဲ့ ချိန်ဘာလိန်ဟာ ပွဲပေါင်း ၅၀ ပါဝင် ကစားခဲ့ပြီး ၅ ဂိုးသွင်းယူကာ ၂၀၂၄ ခုနှစ်မှာ တူရကီဖလား ရရှိခဲ့ပါတယ်။

ဆဲလ်တစ်အသင်းဟာ ပြီးခဲ့တဲ့ ဇန်နဝါရီ အပြောင်းအရွှေ့မှာ ကစားသမားသစ် အားဖြည့်မှုတွေ ပြုလုပ်ခဲ့ပြီး သူတို့ဟာ အသင်းကို ကူညီပေးနိုင်မယ်လို့ထင်ကြောင်း နည်းပြ မာတင်အိုနေးလ်က ပြောခဲ့တာပါ။ 

ဆဲလ်တစ်အသင်းဟာ ဒီရာသီ စတော့တလန်လိဂ်မှာ အဆင့် ၂ နေရာ ရပ်တည်နေပြီး ယူရိုပါလိဂ်ပြိုင်ပွဲမှာ ၁၆ သင်း အဆင့်တက်နိုင်ဖို့ ပလေးအော့ဖ်ပွဲအဖြစ် စတုဂတ်အသင်းနဲ့ ယှဉ်ပြိုင်ရမှာဖြစ်ပါတယ်။ 

Source: BBC

CNI Sport News

၂၀၂၆ ခုနှစ်၊ ဖေဖော်ဝါရီ ၄

ဘာစီလိုနာအသင်းဟာ ကိုပါဒယ်ရေးဖလား ကွာတားဖိုင်နယ်မှာ အယ်လ်ဘာစီတီအသင်းကို ၂ ဂိုး-၁ ဂိုးနဲ့ အနိုင် ရပြီး ဆီမီးဖိုင်နယ် တက်နိုင်ခဲ့ပေမယ့် နည်းပြ ဟန်ဆီဖလစ်က သူတို့ဟာဒီပွဲမှာ ပိုပြီးလွယ်ကူအောင် လုပ်နိုင်ခဲ့ သင့်တယ်လို့ ပြောခဲ့ပါတယ်။ 

ဟန်ဆီဖလစ်က “အဆုံးသတ်မှာ ခက်ခဲတဲ့ပွဲဖြစ်ခဲ့ပြီး အလွန်ခက်ခဲ ခဲ့ပါတယ်။ ပထမပိုင်းမှာရော ဒုတိယပိုင်းမှာပါ ကျနော်တို့ ထိန်းချုပ်နိုင်ခဲ့တာကြောင့် ကျနော်တို့ ပိုပြီးလွယ်ကူအောင် လုပ်နိုင်ခဲ့သင့်ပါတယ်။ အခွင့်အရေးတွေ လည်း အများကြီး ဖန်တီးနိုင်ခဲ့ပါတယ်။ ဖလားပွဲတွေကို အနိုင်ရယူရမှာဖြစ်ပြီး ဒါကို ကျနော်တို့ လုပ်နိုင်ခဲ့ပါတယ်။ အခုကျနော်တို့ ဆီမီးဖိုင်နယ် ရောက်ရှိနေပါပြီ”လို့ ပြောခဲ့ပါတယ်။ 

ပြီးခဲ့တဲ့အဆင့်မှာ ရီးရယ်လ်အသင်းကို အနိုင်ယူခဲ့တဲ့ အယ်လ်ဘာစီတီအသင်းကို ဘာစီလိုနာအသင်းဟာ ယာမဲလ်၊ အာရူဟိုတို့ရဲ့ သွင်းဂိုးတွေနဲ့ ဦးဆောင်နိုင်ခဲ့တာပါ။ 

ဒါပေမယ့် ပွဲချိန် ၈၇ မိနစ်မှာ အယ်လ်ဘာစီတီအသင်းက ချေပဂိုး ပြန်သွင်းခဲ့ပြီး နောက်ထပ်ချေ ပဂိုးရရှိဖို့ ကြိုးပမ်းခဲ့လို့ ဘာစီလိုနာအသင်း အနိုင်ရလဒ်ကို ထိန်းခဲ့ရတာ ဖြစ်ပါတယ်။ 

ဘာစီလိုနာအသင်းကိုတွေ့ရစဉ်

အဲ့ဒါကြောင့် ဘာစီလိုနာအသင်းနည်းပြ ဟန်ဆီဖလစ်က အခွင့်အရေးတွေကို ပိုပြီးကောင်းအောင် အဆုံးသတ် ရမယ်လို့ ပြောခဲ့တာပါ။ 

ဒါ့ပြင် ဟန်ဆီဖလစ်က စိတ်ပိုင်းရာ အခြေအနေကြောင့် အနားယူပြီးနောက် အသင်းရဲ့ ပွဲထွက်လူစာရင်းထဲ ပထမဆုံးအကြိမ် ပြန်ပါဝင်ကာ ဂိုးသွင်းခဲ့တဲ့ အာရူဟိုကို အသင်းက ဆက်ပြီး ပံ့ပိုးမှုတွေ ပြုလုပ်သွားမယ်လို့ ပြောခဲ့ပါတယ်။

အာရူဟိုကလည်း နည်းပြနဲ့ သူ့အသင်းဖော်တွေ ဆီကနေ ရရှိတဲ့ အားပေးမှုတွေအတွက် ကျေးဇူးတင်ကြောင်းနဲ့ အချိန်တိုင်း ပိုပြီးကောင်းမွန် လာတယ်လို့ ခံစားရကြောင်း ပြောခဲ့ပါတယ်။ 

လာလီဂါ အမှတ်ပေးဇယား ထိပ်ဆုံးနေရာ ရပ်တည်နေတဲ့ ဘာစီလိုနာအသင်းဟာ လာမယ့် လိဂ်ပွဲအဖြစ် မာယော့ကာအသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: ESPN

CNI Sport News

၂၀၂၆ ခုနှစ်၊ ဖေဖော်ဝါရီ ၄

ချယ်လ်ဆီးအသင်းကို အနိုင်ယူပြီး ကာရာဘောင်းဖလား ဗိုလ်လုပွဲ တက်နိုင်ခဲ့တဲ့ အာဆင်နယ်အသင်းရဲ့ အောင်မြင်မှုကို မိမိတို့ခန္ဓာကိုယ်ထဲ အကောင်းဆုံး ဗီတာမင်တွေ ဖြည့်သွင်းလိုက်သလိုပဲလို့ နည်းပြအာတီတာက ပြောခဲ့ပါတယ်။ 

အာတီတာက “ကျနော်တို့ တစ်ပွဲပဲ လိုပါတော့တယ်။ ကျနော်တို့ဟာ ၃ ရက်ကို တစ်ပွဲနှုန်း ကစားနေရတာကြောင့် ဒါဟာ ကျနော်တို့ ခန္ဓာကိုယ်ထဲ အကောင်းဆုံး ဗီတာမင်တွေ ဖြည့်သွင်းလိုက်သလိုပါပဲ။ ဒါပေမယ့် ကျနော်တို့ဟာ ဒီအခိုက်အတန့်တွေကို ရရှိဖို့နဲ့ ဒီအခိုက်အတန့်တွေကို အတူတူပိုင်ဆိုင်ဖို့ အလွန်ကြိုးစားခဲ့ကြတယ်ဆိုတဲ့ အချက် က မှော်ဆန်ပါတယ်။ ကလပ်မှာ အလုပ်လုပ်တဲ့ လူတိုင်းရဲ့ပျော်ရွှင်မှု၊ အပြုံးတွေနဲ့ စွမ်းအင်တွေကို မြင်တွေ့နိုင်ပါ တယ်။ အနိုင်ရတာက အများကြီး အထောက်အကူ ပြုပါတယ်”လို့ ပြောခဲ့တာပါ။ 

အာဆင်နယ်အသင်းဟာ ဆီမီးဖိုင်နယ် ဒုတိယအကျော့မှာ ချယ်လ်ဆီးအသင်းကို ၁ ဂိုး-ဂိုးမရှိနဲ့ အနိုင်ရခဲ့တာဖြစ်ပြီး ကိုင်ဟာဗက်ဇ်က မိနစ် ၉၀ ပြည့်ပြီး ထပ်ဆောင်းအချိန်ပို ၇ မိနစ်မှာ သွင်းယူခဲ့ပါတယ်။ 

 အာဆင်နယ်အသင်းကိုတွေ့ရစဉ် 

အာဆင်နယ်အသင်းဟာ ပထမအကျော့ကလည်း ၃ ဂိုး-၂ ဂိုးနဲ့ အနိုင်ရထားတာကြောင့် နှစ်ကျော့ပေါင်း ရလဒ် ၄ ဂိုး-၂ ဂိုးနဲ့ ချယ်လ်ဆီးအသင်းကို အနိုင်ယူပြီး ဗိုလ်လုပွဲ တက်နိုင်ခဲ့တာ ဖြစ်ပါတယ်။ 

အာဆင်နယ်အသင်းဟာ ကာရာဘောင်းဖလား ဗိုလ်လုပွဲကို ၈ နှစ်အကြာမှ ပြန်ရောက်ရှိခဲ့တာဖြစ်သလို ၂၀၂၀ ခုနှစ် နောက်ပိုင်း အသင်းအတွက် ပထမဆုံး ဆုဖလားရယူနိုင်ဖို့ နီးစပ်လာခဲ့တာပါ။ 

ပြီးခဲ့တဲ့နှစ်အတွင်းမှာ ဒဏ်ရာတွေနဲ့ ရုန်းကန်ခဲ့ရတဲ့ ကိုင်ဟာဗက်ဇ် ဂိုးသွင်းအပြီးမှာ အာဆင်နယ်အသင်း ဖော်တွေက သူ့ကိုဝိုင်းပြီး ဂုဏ်ပြုမှုတွေ ပြုလုပ်ခဲ့ကြပါတယ်။ 

အာဆင်နယ်အသင်းနည်းပြ အာတီတာက ဒီပွဲဟာ ကိုင်ဟာဗက်ဇ်အတွက် အထူးအခိုက်အတန့်ဖြစ်ပြီး သူနဲ့ အပြည့်အဝ ထိုက်တန်တာကြောင့် သူပျော်ရွှင်မယ်လို့ မျှော်လင့်ကြောင်းလည်း ပြောခဲ့ပါတယ်။

ဒီရာသီဆုဖလား ၄ လုံး လမ်းကြောင်းပေါ်မှာရှိနေတဲ့ အာဆင်နယ်အသင်းဟာ လာမယ့်လိဂ်ပွဲအဖြစ် ဆန်းဒါးလန်း အသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: ESPN

CNI Sport News

၂၀၂၆ ခုနှစ်၊ ဖေဖော်ဝါရီ ၃

ဘာစီလိုနာအသင်းမှာ အငှားကစားနေတဲ့ ရက်ရှ်ဖို့ဒ်ဟာ နွေရာသီမှာ ယူနိုက်တက်အသင်းထံ ပြန်လာဖို့ ဆန္ဒမရှိဘဲ ၂၀၂၆ ကမ္ဘာ့ဖလားပြိုင်ပွဲ မတိုင်မီ သူ့ရဲ့အနာဂတ်ကို ဖြေရှင်းနိုင်ဖို့ မျှော်လင့်နေပါတယ်။ 

ဘာစီလိုနာအသင်းဟာ အငှားစာချုပ် ကုန်ဆုံးမယ့် ရာသီကုန်ချိန်မှာ ရက်ရှ်ဖို့ဒ်ကို ပေါင် ၂၆ သန်းနဲ့ အပြီးသတ် ဝယ်ယူဖို့ ရွေးချယ်ခွင့် ရှိနေတာပါ။

ယူနိုက်တက်အသင်းကို ယာယီနည်းပြအဖြစ် ကိုင်တွယ်နေတဲ့ မိုက်ကယ်ကာရစ်ဟာ အမြဲတမ်းနည်းပြအဖြစ် ခန့်အပ်ခံရမယ်ဆိုရင် ရက်ရှ်ဖို့ဒ်ကို အသင်းထံ ပြန်ခေါ်ယူချင်နေပေမယ့် သူကတော့ မန်ချက်စတာကလပ်ထံ ပြန်လာဖို့ ဆန္ဒမရှိတော့တာ ဖြစ်ပါတယ်။ 

Daily Mirror က ရက်ရှ်ဖို့ဒ်ဟာ ဘာစီလိုနာအသင်းမှာ ဆက်နေချင်နေပြီး ဒီမှာ ဆက်နေခွင့် ရဖို့အတွက် လုပ်ခ လစာ လျှော့ပြီးယူဖို့ အစီအစဉ်ရှိနေတာပါ။ 

ဘာစီလိုနာအသင်းကလည်း ရက်ရှ်ဖို့ဒ်ကို အပြီးသတ် ခေါ်ယူချင်နေပေမယ့် ရာသီကုန်ချိန်မှသာ အစည်းအဝေး ပြုလုပ်ပြီး ဆုံးဖြတ်သွားဖို့ ရှိနေပါတယ်။ 

ရက်ရှ်ဖို့ဒ်ကို တွေ့ရစဉ်

ရက်ရှ်ဖို့ဒ်က ဘာစီလိုနာအသင်းမှာ ဆက်နေဖို့က သူ့ရဲ့ရည်မှန်းချက် ဖြစ်ပေမယ့် လက်ရှိအချိန်မှာ အသင်းကို ဆုဖလား အောင်မြင်မှုတွေ ရရှိအောင် ကူညီပေးသွားမယ်လို့ မကြာသေးမီက အင်တာဗျူးမှာ ပြောထားပါတယ်။

ရက်ရှ်ဖို့ဒ်ဟာ ဒီရာသီမှာ ဘာစီလိုနာအသင်းအတွက် ၃၂ ပွဲ ကစားထားပြီး ၁၀ ဂိုးသွင်းယူကာ ဂိုးဖန်တီးမှု ၁၂ ကြိမ် ပြုလုပ်ထားတာပါ။

ရက်ရှ်ဖို့ဒ်နဲ့ ယူနိုက်တက်အသင်းတို့ ချုပ်ဆိုထားတဲ့ စာချုပ်ဟာ ၂၀၂၈ ခုနှစ်၊ ဇွန်လအထိ သက်တမ်း ကျန်ရှိနေပြီး အသင်းကလည်း သူ့ကိုရောင်းချပြီး ရရှိလာမယ့် ပြောင်းရွှေ့ကြေးကို နွေရာသီ အသုံးစရိတ်ထဲ ထည့်နိုင်ဖို့ မျှော်လင့် နေပါတယ်။ 

Source: Goal

CNI Sport News

၂၀၂၆ ခုနှစ်၊ ဖေဖော်ဝါရီ ၃

အတ္တလန်တာအသင်းနဲ့ ဂိုးမရှိ သရေကျခဲ့တဲ့ပွဲမှာ ကိုမိုအသင်းအတွက် အနိုင်ဂိုး ဖြစ်စေမယ့် ပယ်နယ်တီကို နီကိုပက်ဇ် လွဲချော်ခဲ့ပြီးနောက် နည်းပြဖာဘရီဂတ်စ်က ဒါဟာ ဘောလုံးခရီးရဲ့ အစိတ်အပိုင်း ဖြစ်တယ်လို့ ပြော ကာ ကာကွယ်ခဲ့ပါတယ်။ 

ဖာဘရီဂတ်စ်က “လူငယ်ကစားသမားတွေကို အပြုသဘောဆောင်ပြီး အားပေးတဲ့ မက်ဆေ့ချ်ပို့ပေးဖို့ အရေးကြီး ပါတယ်။ ပယ်နယ်တီ လွဲတာက ဘောလုံးရဲ့ အစိတ်အပိုင်းတစ်ခုပါ။ ကျနော် ကိုယ်တိုင်လည်း ပယ်နယ်တီ လွဲဖူး တယ်၊ မက်ဆီလည်း လွဲတယ်၊ ဂျွန်တယ်ရီလည်း ချန်ပီယံလိဂ် ဗိုလ်လုပွဲမှာ လွဲခဲ့ပါတယ်။ ဒါတွေက တကယ်ကို နာကျင်စရာပါ။ နီကိုပက်ဇ်ကတော့ ဆိုးရွားတယ်ဆိုပြီး ခံစားနေမှာ ဖြစ်ပေမယ့် ကျနော်တို့ကတော့ အဲ့ဒီလို မမြင်ပါဘူး။ အမြဲတမ်း ကြိုးစားနေတာက အရေးကြီးပါတယ်”လို့ DAZN ကို ပြောခဲ့တာပါ။ 

ကိုမိုအသင်းအတွက် ဒုတိယမြောက် ရာသီအဖြစ် ကစားနေတဲ့ နီကိုပက်ဇ်ဟာ စီးရီးအေကလပ် ကစားသမား ဘဝ မှာ တတိယမြောက် ပယ်နယ်တီ လွဲချော်ခဲ့တာ ဖြစ်ပါတယ်။

နီကိုပက်ဇ်ကို တွေ့ရစဉ်

အသက် ၂၁ နှစ်အရွယ်ရှိ နီကိုပက်ဇ်ဟာ ကိုမိုအသင်းကို ရောက်ရှိလာကတည်းက ခြေစွမ်းပြသနေတဲ့ သူဖြစ်ပြီး ဒီရာသီမှာ ကစားထားတဲ့ ၂၅ ပွဲမှာ ၉ ဂိုးသွင်းယူကာ ဂိုးဖန်တီးမှု ၆ ကြိမ် ပြုလုပ်ထားတာပါ။ 

နည်းပြဖာဘရီဂတ်စ် လက်ထက်မှာ အကောင်းဆုံးပုံစံ ရရှိနေတဲ့ ကိုမိုအသင်းဟာ ဒီရာသီ စီးရီးအေ ၂၃ ပွဲကစား အပြီးမှာ ရမှတ် ၄၁ မှတ်နဲ့ အဆင့် ၆ နေရာ ရပ်တည်နေပြီး လာမယ့်ရာသီ ဥရောပဝင်ခွင့် ရရှိနိုင်ဖို့ မျှော်လင့်ချက် ရှိနေပါတယ်။

ကိုမိုအသင်းဟာ စီးရီးအေပြိုင်ပွဲမှာ ရလဒ်ကောင်းနေသလို ကိုပါအီတာလီယာဖလားပြိုင်ပွဲမှာလည်း ကွာတား ဖိုင်နယ်ကို ရောက်ရှိနေပါတယ်။ 

ကိုမိုအသင်းဟာ ကိုပါအီတာလီယာဖလား ကွာတားဖိုင်နယ်မှာ နာပိုလီအသင်းနဲ့ ယှဉ်ပြိုင်ရမှာဖြစ်ပါတယ်။ 

Source:besoccer

CNI Sport News

၂၀၂၆ ခုနှစ်၊ ဇန်နဝါရီ ၃

အက်သလက်တီကိုအသင်းဟာ နိုင်ဂျီးရီးယားကြယ်ပွင့် လွတ်ခ်မန်းကို အတ္တလန်တာအသင်းကနေ ပေါင် ၃၀.၃ သန်းနဲ့ ခေါ်ယူပြီး ၂၀၃၀ ခုနှစ်၊ ဇွန်လအထိ စာချုပ်ချုပ်ခဲ့ပါတယ်။ 

ဒီအပြောင်းအရွှေ့ကြောင့် လွတ်ခ်မန်းဟာ ပရီးမီးယားလိဂ်၊ ဘွန်ဒက်လီဂါ၊ စီးရီးအေနဲ့ လာလီဂါမှာ ကစားတဲ့ ပထမဆုံး အင်္ဂလိပ်ဖွား ကစားသမားတစ်ဦး ဖြစ်လာခဲ့ပါတယ်။

၂၀၂၂ ခုနှစ်မှာ အတ္တလန်တာအသင်းကို ရောက်လာခဲ့တဲ့ လွတ်ခ်မန်းဟာ အသင်းအတွက် ၁၃၇ ပွဲ ကစားခဲ့ပြီး ၅၅ ဂိုး သွင်းယူကာ ဂိုးဖန်တီးမှု ၂၇ ကြိမ် ပြုလုပ်နိုင်ခဲ့တာပါ။ 

လွတ်ခ်မန်းဟာ ပြီးခဲ့တဲ့ နွေရာသီကတည်းက အတ္တလန်တာအသင်းကနေ ထွက်ခွာဖို့ ကြိုးပမ်းခဲ့တာဖြစ်ပြီး အခု အပြောင်းအရွှေ့မှ ထွက်ခွာနိုင်ခဲ့တာ ဖြစ်ပါတယ်။ 

အသက် ၂၈ နှစ်အရွယ် ကစားသမားဟာ ၂၀၂၄ ခုနှစ်က လေဗာကူဆင်အသင်းနဲ့ ယူရိုပါလိဂ်ဗိုလ်လုပွဲမှာ ဟက်ထရစ်သွင်းပြီး အတ္တလန်တာအသင်းကို ပထမဆုံး ဥရောပဖလား ရရှိအောင် စွမ်းဆောင်ပေးနိုင်ခဲ့ပါတယ်။ 

လွတ်ခ်မန်းကို တွေ့ရစဉ်

လွတ်ခ်မန်းဟာ ၂၀၂၄ ခုနှစ်အတွက် အာဖရိကတစ်နှစ်တာ အကောင်းဆုံး ကစားသမားဆုကို ရခဲ့ပြီး Ballon d'Or မှာလည်း နံပါတ် ၁၄ နေရာ ရပ်တည်ခဲ့တာပါ။

လွတ်ခ်မန်းဟာ အင်္ဂလန် လူငယ်အသင်းတွေမှာ ကစားခဲ့ပြီး ၂၀၁၇ ခုနှစ်က ယူ-၂၀ ကမ္ဘာ့ဖလား ချန်ပီယံဆု ရရှိခဲ့ပါတယ်။

ဒါပေမယ့် လွတ်ခ်မန်းဟာ နိုင်ဂျီးရီးယား လက်ရွေးစင်အသင်းအတွက် ကိုယ်စားပြုခဲ့ပြီး ၂၀၂၂ ခုနှစ်မှာ ပွဲဦးထွက် ခဲ့ကာ လက်ရှိအချိန်ထိ ၄၁ ပွဲ ကစားထားတာမှာ ၁၁ ဂိုး သွင်းယူထားပါတယ်။ 

ချာလ်တန်အသင်းမှာ ကစားသမားဘဝ စတင်ခဲ့တဲ့ လွတ်ခ်မန်းဟာ ပရီးမီးယားလိဂ် ကလပ်တွေဖြစ်တဲ့ အဲဗာတန်၊ ဖူလ်ဟမ်နဲ့ လက်စတာအသင်းတွေမှာလည်း ကစားခဲ့တာပါ။ 

အက်သလက်တီကိုအသင်းဟာ ဒီရာသီ လာလီဂါပြိုင်ပွဲမှာ အဆင့် ၃ နေရာ ရပ်တည်နေပြီး အဆင့် ၁ နေရာက ဘာစီလိုနာအသင်းနဲ့ ၁၀ မှတ် ကွာဟနေတာ ဖြစ်ပါတယ်။ 

Source: BBC

CNI Sport News

၂၀၂၆ ခုနှစ်၊ ဖေဖော်ဝါရီ ၃

ဝါရင့်တိုက်စစ်မှူး ဘန်ဇီမာဟာ အယ်လ်အစ်တီဟတ်အသင်းနဲ့ စာချုပ်ဖျက်သိမ်းပြီး ဆော်ဒီပရိုလိဂ်ပြိုင်ဘက် အယ်လ်ဟီလယ်အသင်းထံ ပြောင်းရွှေ့ခဲ့ပါတယ်။ 

ဘန်ဇီမာဟာ အယ်လ်အစ်တီဟတ်အသင်းရဲ့ စိတ်ပျက်စရာကောင်းတဲ့ စာချုပ် သက်တမ်းတိုးဖို့ ကမ်းလှမ်းမှုကို ငြင်းပယ်ခဲ့ပြီးနောက် အယ်လ်ဟီလယ်အသင်းထံ ပြောင်းရွှေ့ခဲ့တာပါ။

အယ်လ်အစ်တီဟတ်အသင်းရဲ့ ပြီးခဲ့တဲ့ လိဂ် ၂ ပွဲကို ပါဝင်ကစားခဲ့ခြင်း မရှိတဲ့ ဘန်ဇီမာကို အယ်လ်ဟီလယ် အသင်းက အလွတ်ပြောင်းရွှေ့ကြေးနဲ့ ၁ နှစ်ခွဲ စာချုပ်ချုပ်ကာ ခေါ်ယူခဲ့တယ်လို့ ကြေညာခဲ့ပါတယ်။ 

အယ်လ်အစ်တီဟတ်နဲ့ အယ်လ်ဟီလယ်အသင်းတို့ကို ဆော်ဒီ အများပြည်သူ ရင်းနှီးမြှုပ်နှံမှု ရန်ပုံငွေအဖွဲ့(PIF)က ရှယ်ယာ ၇၅ ရာခိုင်နှုန်းစီ ပိုင်ဆိုင်ထားတာကြောင့် ဘန်ဇီမာရဲ့ အပြောင်းအရွှေ့ ဖြစ်ခဲ့တာပါ။

ဘန်ဇီမာကို တွေ့ရစဉ်

PIF ဟာ ဘန်ဇီမာကို အယ်လ်ဟီလယ်အသင်းထံ ပြောင်းရွှေ့စေခဲ့တဲ့အပေါ် အယ်လ်နာဆာအသင်း ခေါင်းဆောင် ရော်နယ်လ်ဒိုက ဒေါသထွက်နေတယ်လို့ သိရပါတယ်။

ရော်နယ်လ်ဒိုက PIF ဟာ အယ်လ်နာဆာအသင်းကို လုံလောက်တဲ့ အားဖြည့်မှုတွေ မလုပ်ပေးဘူးလို့ ယူဆကာ ပြီးခဲ့တဲ့ အယ်လ်ရီယက်ဒ်အသင်းနဲ့ ဆော်ဒီပရိုလိဂ်ပွဲကို ပါဝင်ကစားဖို့ ငြင်းဆန်သွားခဲ့ပါတယ်။ 

၂၀၂၃ ခုနှစ်မှာ အယ်လ်အစ်တီဟတ်အသင်းထံ ရောက်ရှိလာခဲ့တဲ့ ဘန်ဇီမာဟာ ပြီးခဲ့တဲ့ရာသီမှာ အသင်းနဲ့အတူ ဆော်ဒီပရိုလိဂ်နဲ့ ဘုရင့်ဖလားတို့ကို ရယူနိုင်ခဲ့ပါတယ်။ 

အယ်လ်အစ်တီဟတ်အသင်းအတွက် ၈၇ ပွဲ ကစားခဲ့ပြီး ၅၇ ဂိုး သွင်းယူခဲ့တဲ့ ဘန်ဇီမာက အသင်းရဲ့ အရောင်တွေ ကို ဝတ်ဆင်ခွင့် ရခဲ့တဲ့အတွက်နဲ့ မျှဝေခဲ့တဲ့ အရာအားလုံးကို ဂုဏ်ယူမိတယ်လို့ သူ့ရဲ့ X ဆိုရှယ်မီဒီယာမှာ ရေးသား ခဲ့ပါတယ်။

ဒီရာသီ ဆော်ဒီပရိုလိဂ်ပြိုင်ပွဲမှာ အယ်လ်ဟီလယ်အသင်းဟာ အဆင့် ၂ နေရာက အယ်လ်နာဆာအသင်းကို ၁ မှတ် အသာနဲ့ ထိပ်ဆုံးနေရာမှာ ရပ်တည်နေပါတယ်။ 

Source: CNA