CNI Sport News

၂၀၂၅ ခုနှစ်၊ ဇူလိုင် ၁၉

ချယ်လ်ဆီးအသင်းကနေ အာဆင်နယ်အသင်းထံ ပြောင်းရွှေ့လာခဲ့တဲ့ အင်္ဂလန်ကြယ်ပွင့် မာဒူကီက သူဟာ အာဆင်နယ်အသင်းနဲ့အတူ ယှဉ်ပြိုင်တဲ့ ပြိုင်ပွဲတိုင်း အနိုင်ယူချင်တယ်လို့ ပြောခဲ့ပါတယ်။

မာဒူကီက “ကျနော်တို့ ယှဉ်ပြိုင်တဲ့ ပြိုင်ပွဲတိုင်း အနိုင်ယူချင်တာက ကျနော့်ရဲ့ ရည်မှန်းချက်ပါ။ ကျနော်တို့ဒါကို သေချာပေါက် လုပ်နိုင်မယ်လို့လည်း ကျနော်ခံစားရပါတယ်။ ကျနော်ဟာ တတ်နိုင်တဲ့ နည်းလမ်းပေါင်းစုံနဲ့ အသင်းကို ကူညီဖို့ ကြိုးစားသွားမှာပါ။ ဒီအပြောင်းအရွှေ့အတွက် ပျော်ရွှင်ပြီး ဂုဏ်လည်းယူမိပါတယ်။ ကောင်းမွန် တဲ့ ကစားသမားတစ်ဦး အနေနဲ့သာမကဘဲ ကောင်းမွန်တဲ့ လူပုဂ္ဂိုလ်ဖြစ်ဖို့လည်း လုပ်ဆောင်သွားမှာပါ”လို့ ပြောခဲ့တာပါ။

အာဆင်နယ်အသင်းဟာ မာဒူကီကို ပြောင်းရွှေ့ကြေးပေါင် ၄၈ သန်း၊ add-ons ပေါင် ၄ သန်းနဲ့ ခေါ်ယူပြီး ၅ နှစ် စာချုပ်ချုပ်ဆိုခဲ့တာ ဖြစ်ပါတယ်။

မာဒူကီဟာ အာဆင်နယ်အသင်းမှာ ကျောနံပါတ် ၂၀ ဝတ်ဆင်သွားမှာပါ။ 

မာဒူကီဟာ ပြီးခဲ့တဲ့ ဖီဖာကလပ် ကမ္ဘာ့ဖလားပြိုင်ပွဲမှာ ချယ်လ်ဆီးအသင်း လူစာရင်းထဲ ပါဝင်ခဲ့ပေမယ့် PSG အသင်းကို အနိုင်ရခဲ့တဲ့ ဗိုလ်လုပွဲမတိုင်မီ အသင်းရဲ့စခန်းကနေ ထွက်ခွာကာ အာဆင်နယ်အသင်းထံ အပြောင်းအရွှေ့ အပြီးသတ်နိုင်ဖို့ လုပ်ဆောင်ခဲ့တာဖြစ်ပါတယ်။

 မာဒူကီနဲ့ အာဆင်နယ်အသင်း စာချုပ်ချုပ်နေစဉ်

အာဆင်နယ်အသင်း နည်းပြ အာတီတာက မာဒူကီဟာ အသက် ၂၃ နှစ်ပဲ ရှိသေးပေမယ့် ကလပ်နဲ့ နိုင်ငံတကာ အတွေ့အကြုံတွေ ပိုင်ဆိုင်ထားပြီး ပရီးမီးယားလိဂ် အကြောင်းကိုလည်း ကောင်းမွန်စွာ သိတဲ့သူလို့ ပြောခဲ့တာပါ။ 

ဒါအပြင် အာတီတာက ပြီးခဲ့တဲ့ရာသီတွေအတွင်းမှာ မာဒူကီရဲ့ အရည်အသွေးတွေကို အနီးကပ် မြင်တွေ့ခဲ့ ရတာကြောင့် သူရောက်ရှိလာမှုဟာ အသင်းရဲ့လူစာရင်းကို ပိုပြီးတိုးတက်စေမယ်လို့ ပြောခဲ့ပါတယ်။

မာဒူကီဟာ နွေရာသီ အပြောင်းအရွှေ့မှာ အာဆင်နယ်အသင်းကို ရောက်ရှိလာတဲ့ ၄ ဦးမြောက် ကစားသမားဖြစ် ပြီး သူမတိုင်မီမှာ ဇူဘီမန်ဒီ၊ ကယ်ပါနဲ့ နော်ဂတ်တို့ ရောက်ရှိထားတာပါ။

အာဆင်နယ်အသင်းဟာ ဗလင်စီယာအသင်း နောက်ခံလူ မိုစကွီယာနဲ့ စပို့တင်းလစ္စဘွန်းအသင်း တိုက်စစ်မှူး ယိုကီရက်စ်တို့ရဲ့ အပြောင်းအရွှေ့ကိုလည်း ကြေညာဖို့ရှိနေတာ ဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ ဇူလိုင် ၁၈

နွေရာသီ အပြောင်းအရွှေ့မှာ ယူနိုက်တက်အသင်းကနေ ထွက်ခွာဖို့ရှိနေတဲ့ ဘရာဇီးလ်တောင်ပံ ကစားသမား အန်တိုနီဟာ သူ့အတွက် သားတစ်ဦးလိုပဲလို့ လေဗာကူဆင်အသင်းနည်းပြ အဲရစ်တန်ဟတ်က ပြောခဲ့ပါတယ်။

အဲရစ်တန်ဟတ်က “အန်တိုနီဆီမှာ အရည်အသွေးကောင်းတွေ အများကြီးရှိပါတယ်။ ကျနော်သူ့ကို နှစ်ကြိမ် လက်မှတ်ထိုး ခေါ်ယူခဲ့ပါတယ်။ သူဟာ ကျနော့်အတွက် သားတစ်ဦးလိုဖြစ်သလို အခုထိလည်း သားတစ်ဦးလို ဖြစ်နေဆဲပါပဲ။ အခုအချိန်မှာတော့ သူ့ကို ခေါ်ယူဖို့ ကျနော်တို့ စိတ်မဝင်စားပါဘူး။ ဒါပေမယ့် အနာဂတ်မှာ ဘာတွေဖြစ်လာမလဲဆိုတာ ကျနော်တို့ မြင်တွေ့ရမှာပါ”လို့ Bild နဲ့ အင်တာဗျူးမှာ ပြောခဲ့တာပါ။

ဒတ်ချ်လူမျိုးနည်းပြ အဲရစ်တန်ဟတ်ဟာ အေဂျက်စ်အသင်းမှာ သူနဲ့အတူ လက်တွဲခဲ့တဲ့ အန်တိုနီကို ယူနိုက်တက် အသင်းကို သူကိုင်တွယ်ချိန်မှာ ပေါင် ၈၆ သန်းနဲ့ ခေါ်ယူခဲ့တာဖြစ်ပါတယ်။

အန်တိုနီဟာ ယူနိုက်တက်အသင်းမှာ ရုန်းကန်ခဲ့ရပြီး ဝေဖန်မှုတွေလည်း အများအပြား ခံခဲ့ရကာ ပြီးခဲ့တဲ့ ဇန်နဝါရီ အပြောင်းအရွှေ့မှာ ဘက်တစ်အသင်းထံ အငှားနဲ့ ပြောင်းရွှေ့ခဲ့တာပါ။ 

ဘက်တစ်အသင်းမှာ ခြေစွမ်းပြသနိုင်ခဲ့တဲ့ အန်တိုနီဟာ လက်ရှိအချိန်မှာ ယူနိုက်တက်အသင်းကနေ အပြီးသတ် ထွက်ခွာဖို့ ပြင်ဆင်နေပါတယ်။

အန်တိုနီနဲ့ အဲရစ်တန်ဟတ်ကို တွေ့ရစဉ်

အန်တိုနီကို ဘက်တစ်အသင်းက ပြန်လည်ခေါ်ယူဖို့ ကြိုးပမ်းနေသလို အဲရစ်တန်ဟတ် ကိုင်တွယ်နေတဲ့ လေဗာ ကူဆင်၊ လိုက်ပ်ဇစ်၊ ဘရိုက်တန်နဲ့ နယူးကာဆယ်အသင်းတို့ကလည်း ခေါ်ယူဖို့ စိတ်ဝင်စားနေတာပါ။ 

အဲရစ်တန်ဟတ်ကလည်း လေဗာကူဆင်အသင်းမှာ အန်တိုနီနဲ့ ပြန်လည်လက်တွဲဖို့ လမ်းဖွင့်ခဲ့ပေမယ့် အခုအချိန် မှာ ခေါ်ယူဖို့ စိတ်မဝင်စားဘူးလို့ ပြောခဲ့ပါတယ်။ 

ယူနိုက်တက်အသင်းဟာ အစောပိုင်းက အန်တိုနီကို ပေါင်သန်း ၂၀ ကနေ ပေါင်သန်း ၃၀ ကြားရရင် ထွက်ခွာ ခွင့်ပေးဖို့ စဉ်းစားခဲ့ပေမယ့် အခုအချိန်မှာ ပေါင်သန်း ၅၀ နီးပါးအထိ လိုချင်နေတယ်လို့ သိရပါတယ်။

ယူနိုက်တက်အသင်းဟာ အန်တိုနီ အပါအဝင် ရက်ရှ်ဖို့ဒ်၊ ဆန်ချို၊ ဂါနာချိုနဲ့ မာလာစီယာတို့ကို အသင်းကြီး ကစားသမားတွေ လေ့ကျင့်မှု ပြုလုပ်အပြီး ထွက်ခွာချိန်မှာ လေ့ကျင့်မှုတွေလာပြီး ပြုလုပ်ခွင့်ပေးထားတာ ဖြစ်ပါတယ်။

Source: Goal

CNI Sport News

၂၀၂၅ ခုနှစ်၊ ဇူလိုင် ၁၈

အဲဗာတန်အသင်းကနေ ထွက်ခွာပြီးနောက် အသင်းလက်မဲ့ဖြစ်နေတဲ့ အက်ရှ်လေယန်းဟာ သူ့ရဲ့ငယ်ဘဝကလပ် ဝက်ဖို့ဒ်အသင်းထံ ပြောင်းရွှေ့ဖွယ် ရှိနေပါတယ်။

ချန်ပီယံရှစ်ကလပ် ဝက်ဖို့ဒ်အသင်းဟာ အသက် ၄၀ နှစ်အရွယ်ရှိ အက်ရှ်လေယန်းကို ခေါ်ယူဖို့ စိတ်ဝင်စား နေတယ်လို့ talkSPORT က ဖော်ပြထားတာပါ။ 

အဲဗာတန်အသင်းမှာ ၂ ရာသီကြာ ပွဲပေါင်း ၇၀ ပါဝင်ကစားခဲ့တဲ့ အက်ရှ်လေယန်းဟာ လက်ရှိအချိန်မှာ အသင်းသစ် ရှာဖွေမှုတွေ ပြုလုပ်နေတာဖြစ်ပါတယ်။ 

ဝက်ဖို့ဒ်အသင်း နည်းပြ ပီဇိုလာနိုဟာ အက်ရှ်လေယန်းကို ခေါ်ယူဖွယ် ရှိ/မရှိ ဆုံးဖြတ်ချက် ချသွားမယ်လို့ သတင်းမှာ ဖော်ပြထားပါတယ်။ 

ပြီးခဲ့တဲ့ရာသီက အဲဗာတန်အသင်းမှာ ကစားချိန် ဂိုးသွင်းယူနိုင်ခဲ့တဲ့ အက်ရှ်လေယန်းဟာ ပရီးမီးယားလိဂ်ရဲ့ စတုတ္ထမြောက် အသက်အကြီးဆုံး ဂိုးသွင်းတဲ့သူအဖြစ် မှတ်တမ်းဝင်ထားတာပါ။ 

အက်ရှ်လေယန်းကို တွေ့ရစဉ် 

ပြီးခဲ့တဲ့ ချန်ပီယံရှစ်ပြိုင်ပွဲမှာ အဆင့် ၁၄ နဲ့ ရာသီအဆုံးသတ်ခဲ့တဲ့ ဝက်ဖို့ဒ်အသင်းဟာ ပရီးမီးယားလိဂ်ပြိုင်ပွဲထံ တန်းပြန်တက်ချင်နေတာကြောင့် လာမယ့်ရာသီမှာ အက်ရှ်လေယန်းရဲ့ အတွေ့အကြုံတွေကို အသုံးချနိုင်မယ်လို့ ယုံကြည်နေပါတယ်။

အက်ရှ်လေယန်းဟာ ဝက်ဖို့ဒ်အသင်း လူငယ်စီမံကိန်းကနေ ထွက်ပေါ်လာတဲ့သူဖြစ်ပြီး အသင်းကြီးအတွက် ၂၀၀၃ ခုနှစ်မှာ စတင်ပွဲထွက်ကာ ၂၀၀၇ ခုနှစ်မှာ အက်စတွန်ဗီလာအသင်းထံ ပြောင်းရွှေ့ခဲ့တာပါ။ 

အက်ရှ်လေယန်းဟာ ဝက်ဖို့ဒ်အသင်းအတွက် ၁၁၀ ပွဲကစားခဲ့ပြီး ၂၂ ဂိုး သွင်းယူနိုင်ခဲ့ပါတယ်။ 

အက်ရှ်လေယန်းဟာ သူ့ရဲ့ ကစားသမားဘဝမှာ အက်စတွန်ဗီလာ၊ ယူနိုက်တက်နဲ့ အင်တာမီလန်အသင်းတွေမှာ ကစားခဲ့ပြီး ဆုဖလားအောင်မြင်မှုတွေ ရယူနိုင်ခဲ့တာပါ။

အက်ရှ်လေယန်းဟာ သူ့ရဲ့ ကစားသမားဘဝ စတင်ခဲ့တဲ့ ဝက်ဖို့ဒ်အသင်းမှာ ကစားသမားဘဝကို အဆုံးသတ်ချင် နေပြီး မကြာမီမှာ နောက်ဆုံး ဆုံးဖြတ်ချက်ကို ချနိုင်ဖို့ မျှော်လင့်နေတာဖြစ်ပါတယ်။

Source: Goal

CNI Sport News

၂၀၂၅ ခုနှစ်၊ ဇူလိုင် ၁၈

ယူနိုက်တက်အသင်းဟာ အမ်ဘူမိုအတွက် ဘရန်ဖို့ဒ်အသင်းကို တတိယအကြိမ်မြောက် ကမ်းလှမ်းမှု ပြုလုပ်ခဲ့ ပြီးနောက် အမ်ဘူမိုကို ခေါ်ယူနိုင်ဖို့ ယုံကြည်မှုရှိနေပါတယ်။ 

ယူနိုက်တက်အသင်းဟာ အမ်ဘူမိုအတွက် ဘရန်ဖို့ဒ်အသင်းကို ပေါင် ၆၅ သန်း၊ add-ons ပေါင် ၅ သန်းနဲ့ ပြောင်းရွှေ့ကြေးတိုးပြီး ထပ်မံကမ်းလှမ်းမှု ပြုလုပ်ထားတာပါ။

ဒါပေမယ့် ဘရန်ဖို့ဒ်အသင်း ဘက်ကတော့ ယူနိုက်တက်အသင်းရဲ့ ဒီကမ်းလှမ်းမှုအပေါ် တုံ့ပြန်မှု မရှိသေးပါဘူး။ 

ယူနိုက်တက်အသင်းဟာ အမ်ဘူမိုကို ရာသီကြို ခြေစမ်းပွဲ ယှဉ်ပြိုင်ဖို့ အမေရိကန်နိုင်ငံ ထွက်ခွာမယ့် အသင်းရဲ့ လူစာရင်းထဲမှာ ထည့်သွင်းနိုင်ဖို့ မျှော်လင့်နေတာဖြစ်ပါတယ်။ 

ယူနိုက်တက်အသင်းဟာ ကွန်ညာရဲ့ အပြောင်းအရွှေ့ကို အပြီးသတ်ပြီးကတည်းက အမ်ဘူမိုကို ခေါ်ယူနိုင်ဖို့ ကြိုးပမ်းနေတာပါ။

အမ်ဘူမိုကို တွေ့ရစဉ်

ပြီးခဲ့တဲ့ရာသီက ပရီးမီးယားလိဂ် ပြိုင်ပွဲမှာ သွင်းဂိုး ၂၀ အထိ သွင်းယူနိုင်ခဲ့တဲ့ အသက် ၂၅ နှစ်အရွယ်ရှိ အမ်ဘူမိုကို ခေါ်ယူဖို့ စပါးအသင်း အပါအဝင် အသင်းအချို့က စိတ်ဝင်စားမှုတွေ ရှိခဲ့ပါတယ်။

ဒါပေမယ့် အမ်ဘူမိုကတော့ ယူနိုက်တက်အသင်းကို ပြောင်းရွှေ့ဖို့ ဆုံးဖြတ်ထားတာပါ။ 

ပြီးခဲ့တဲ့ရာသီက ဘရန်ဖို့ဒ်အသင်းမှာ အမ်ဘူမိုနဲ့အတွဲညီခဲ့တဲ့ တိုက်စစ်မှူး ဝီဆာကို နယူးကာဆယ်အသင်းက ပစ်မှတ်ထားနေပါတယ်။

ဘရန်ဖို့ဒ်အသင်းဟာ ဒီနွေရာသီ အပြောင်းအရွှေ့မှာ အမ်ဘူမိုနဲ့ ဝီဆာတို့ နှစ်ဦးစလုံးကို မဆုံးရှုံးချင်တာကြောင့် စဉ်းစားမှုတွေ ပြုလုပ်နေတာပါ။

ယူနိုက်တက်အသင်းဟာ အမ်ဘူမိုရဲ့ အပြောင်းအရွှေ့ကို အမြန်ဆုံး အပြီးသတ်ချင်နေတဲ့အတွက် ဘရန်ဖို့ဒ်အသင်း အနေနဲ့ ဆုံးဖြတ်ချက်ချရတော့မှာ ဖြစ်ပါတယ်။ 

ယူနိုက်တက်အသင်းဟာ ဒီနွေရာသီ အပြောင်းအရွှေ့မှာ ကွန်ညာနဲ့ နောက်ခံလူ ဒီယေဂိုလီယွန်တို့ကို အားဖြည့် ထားပြီး နောက်ထပ် ကစားသမားသစ်တွေ မခေါ်ယူမီ အသင်းမှာရှိတဲ့ ကစားသမားတွေကို ရောင်းချဖို့လည်း လုပ်ဆောင်နေတာပါ။ 

ယူနိုက်တက်အသင်းဟာ အမေရိကန် ရာသီကြို ခရီးစဉ်မတိုင်မီ ဇူလိုင် ၁၉ ရက်မှာ လိဒ်စ်အသင်းနဲ့ ခြေစမ်းပွဲ ယှဉ်ပြိုင်သွားမှာ ဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ ဇူလိုင် ၁၈

အင်္ဂလန်အသင်းဟာ အမျိုးသမီးယူရို ၂၀၂၅ ပြိုင်ပွဲ ကွာတားဖိုင်နယ်ပွဲစဉ်မှာ ဆွီဒင်အသင်းကို ပင်နယ်တီ အဆုံးအဖြတ်နဲ့ အနိုင်မရမီမှာ သူတို့ရဲ့ဒီပြိုင်ပွဲ ခရီးပြီးဆုံးသွားပြီလို့ အနည်းဆုံး ၃ ကြိမ် တွေးခဲ့မိကြောင်း နည်းပြဝီဂ်မန်းက ပြောခဲ့ပါတယ်။ 

ဝီဂ်မန်းက “ကောင်းမွန်တဲ့ စတင်မှု မဟုတ်ခဲ့သလို သူတို့ဘက်က ဒုတိယမြောက်ဂိုးကို သွင်းယူပြီးချိန်မှာ အသင်း ဟာ ပွဲထဲကို ဝင်ရောက်ဖို့ ရုန်းကန်ခဲ့ရပါတယ်။ ဒုတိယပိုင်းမှာ ဘောလုံးလည်း ပိုပြီးရခဲ့သလို အခွင့်အရေးတွေ လည်း ပိုပြီးဖန်တီးခဲ့တာကြောင့် သွင်းဂိုးတွေ ရရှိခဲ့ပါတယ်။ ဒီပွဲမှာ အသင်းဟာ ပြိုင်ပွဲကနေ ထွက်ခွာရမယ် ဆိုတာကို ၃ ကြိမ်လောက် တွေးမိခဲ့ပါတယ်။ ဒါပေမယ့် အသင်းဟာ အလွန်ပြင်းထန်တဲ့ အရည်အသွေးတွေ၊ အတူတိုက်ပွဲဝင်မှုတွေနဲ့ ခံနိုင်ရည်ရှိမှုတွေကို ပြသနိုင်ခဲ့တယ်”လို့ ပြောခဲ့တာပါ။

ယူရိုပြိုင်ပွဲရဲ့ လက်ရှိချန်ပီယံ အင်္ဂလန်အသင်းဟာ ဒီပွဲရဲ့ပွဲချိန် ၂၅ မိနစ်မှာ ကတည်းက ဆွီဒင်အသင်းကို ၂ ဂိုး-ဂိုးမရှိနဲ့ အရေးနိမ့်နေခဲ့တာ ဖြစ်ပါတယ်။ 

အင်္ဂလန်အသင်းကိုတွေ့ရစဉ်

ဒါပေမယ့် အင်္ဂလန်အသင်းဟာ ပွဲပြီးခါနီးမှာ ချေပဂိုးတွေ ပြန်သွင်းယူနိုင်ခဲ့တာကြောင့် ပွဲချိန်အတွင်းမှာ ၂ ဂိုးစီ သရေကျခဲ့တာပါ။

ပင်နယ်တီ အဆုံးအဖြတ်မှာ အင်္ဂလန်အသင်းဟာ ဂိုးသမား ဟမ်တန်ရဲ့ လက်စွမ်းပြသမှုတွေကြောင့် ဆွီဒင် အသင်းကို ၃ ဂိုး-၂ ဂိုးနဲ့ အနိုင်ရပြီး ဆီမီးဖိုင်နယ် တက်နိုင်ခဲ့တာ ဖြစ်ပါတယ်။ 

အင်္ဂလန်အသင်းနည်းပြ ဝီဂ်မန်းက ဒီပွဲမှာသူဟာ စိတ်ခံစားမှုတွေ အများအပြားရှိခဲ့ပြီး သူမရဲ့နည်းပြဘဝမှာ ဒီလိုမျိုးအရာတွေကို မမှတ်မိနိုင်အောင် ဖြစ်မိတယ်လို့ ပြောခဲ့ပါတယ်။ 

အင်္ဂလန်အသင်းနည်းပြ ဝီဂ်မန်းဟာ ပင်နယ်တီ အဆုံးအဖြတ်မှာ လက်စွမ်းပြသနိုင်ခဲ့တဲ့ ဂိုးသမား ဟမ်တန်ရဲ့ စွမ်းဆောင်ရည်ကို အလွန်ကျေနပ်ကြောင်းပြောခဲ့သလို အသင်းအတွက် ပထမချေပဂိုး သွင်းယူခဲ့တဲ့ ဘရုဇ်ကို လည်း ချီးကျူးမှုတွေ ပြုလုပ်ခဲ့တာပါ။

အင်္ဂလန်အသင်းဟာ လက်ရှိချန်ပီယံဆုကို ကာကွယ်နိုင်ဖို့အတွက် ဆီမီးဖိုင်နယ်ပွဲစဉ်အဖြစ် နော်ဝေအသင်းကို အနိုင်ရခဲ့တဲ့ အီတလီအသင်းနဲ့ ယှဉ်ပြိုင်ရမှာဖြစ်ပါတယ်။

Source:ESPN

CNI Sport News

၂၀၂၅ ခုနှစ်၊ ဇူလိုင် ၁၇

အင်တာမိုင်ယာမီအသင်းဟာ မေဂျာလိဂ်ပြိုင်ပွဲမှာ စင်စင်နာတီအသင်းကို ၃ ဂိုး-ဂိုးမရှိနဲ့ အရေးနိမ့်ခဲ့တာကြောင့် အသင်းခေါင်းဆောင် မက်ဆီရဲ့ လိဂ်ပြိုင်ပွဲမှာ ဂိုးသွင်းစံချိန် မှတ်တမ်းကောင်း ရပ်တန့်သွားခဲ့ပါတယ်။

မက်ဆီဟာ စင်စင်နာတီအသင်းနဲ့ ပွဲမတိုင်မီ နောက်ဆုံးကစားခဲ့တဲ့ မေဂျာလိဂ် ၅ ပွဲစလုံးကို ၂ ဂိုးစီ သွင်းယူပြီး လိဂ်ပြိုင်ပွဲမှာ စံချိန်သစ်တစ်ခု တင်ထားနိုင်ခဲ့တာပါ။ 

ဒါပေမယ့် စင်စင်နာတီအသင်းနဲ့ပွဲစဉ်မှာ မက်ဆီရဲ့ မေဂျာလိဂ်စံချိန်ဟာ ရပ်တန့်သွားခဲ့တာ ဖြစ်ပါတယ်။ 

အင်တာမိုင်ယာမီအသင်းအတွက်လည်း စင်စင်နာတီအသင်းကို အရေးနိမ့်ခဲ့တာကြောင့် မေဂျာလိဂ်ပြိုင်ပွဲမှာ နောက်ဆုံး ၅ ပွဲစလုံးအနိုင်ရရှိထားတဲ့ မှတ်တမ်းကောင်းအဆုံးသတ်သွားခဲ့တာပါ။

အင်တာမိုင်ယာမီ အသင်းနည်းပြ မာရှေယာနိုက “ဒီပွဲမှာ ကျနော်တို့ အဆင့်အတန်း မမီဘူးဆိုတာ ရှင်းခဲ့တယ်လို့ ကျနော် ထင်ပါတယ်။ ပွဲအစကတည်းက ကျနော်တို့ လိုချင်တဲ့ပွဲကို မကစားနိုင်ခဲ့ဘဲ ရုန်းကန်ခဲ့ရပါတယ်။ သူတို့ဟာ ကျနော်တို့ကို အချိန်တိုင်း ဖိအားပေးပြီး အနိုင်ရယူသွားခဲ့ပါတယ်”လို့ ပြောခဲ့ပါတယ်။ 

 မာရှေယာနိုကို တွေ့ရစဉ်

အင်တာမိုင်ယာမီအသင်းဟာ ဒီပွဲအရေးနိမ့်မှုကြောင့် မေဂျာလိဂ် အရှေ့ပိုင်းဇုန် အမှတ်ပေးဇယား အဆင့် ၅ နေရာ မှာ ရပ်တည်နေပြီး အဆင့် ၁ နေရာက ဖီလာဒဲလ်ဖီးယားအသင်းထက် ၃ ပွဲလျော့ ကစားကာ ရမှတ် ၈ မှတ်ကွာဟ နေပါတယ်။ 

အသက် ၃၈ နှစ်အရွယ်ရှိ မက်ဆီဟာ ဒီရာသီ မေဂျာလိဂ်ပြိုင်ပွဲမှာ အင်တာမိုင်ယာမီ အသင်းအတွက် ၁၆ ပွဲ ကစားထားပြီး ၁၆ ဂိုးသွင်းယူကာ ပြိုင်ပွဲစုံ ၂၇ ပွဲမှာတော့ ၂၂ ဂိုးသွင်းယူထားတာပါ။ 

အင်တာမိုင်ယာမီအသင်းဟာ လာမယ့် မေဂျာလိဂ် ပွဲစဉ်အဖြစ် နယူးယော့ခ် ရက်ဘူးလ်အသင်း အိမ်ကွင်း သွားရောက် ယှဉ်ပြိုင်ရမှာဖြစ်ပါတယ်။

Source: ESPN

CNI Sport News

၂၀၂၅ ခုနှစ်၊ ဇူလိုင် ၁၇

အမေရိကန်ကြယ်ပွင့် ပူလီဆစ်ဟာ ပေါ်တူဂီအသင်းခေါင်းဆောင် ရော်နယ်ဒိုနဲ့ အယ်လ်နာဆာအသင်းမှာ အတူတွဲ ကစားခွင့်ရမယ့် အခွင့်အရေးကို ငြင်းပယ်ခဲ့ပါတယ်။

Corriere dello Sport က ပူလီဆစ်ဟာ အီတလီမှာ ဆက်ပြီး ရှိချင်နေတာကြောင့် အေစီမီလန်အသင်းကနေ အယ်လ်နာဆာအသင်းထံ ပြောင်းရွှေ့ခွင့်ရမယ့် အခွင့်အရေးကို ငြင်းပယ်ခဲ့တယ်လို့ ဖော်ပြထားတာပါ။

ပူလီဆစ်နဲ့ အေစီမီလန် အသင်းတို့ကြားမှာ စာချုပ်သက်တမ်းတိုးဖို့ ဆွေးနွေးမှုတွေက ရပ်တန့်နေတယ်လို့ သတင်းတွေ ထွက်နေပေမယ့် သူဟာ အသင်းရဲ့ ရာသီကြို လေ့ကျင့်ပြင်ဆင်မှုတွေမှာ နည်းပြသစ် အယ်လီဂရီကို အထင်ကြီးမှု ရရှိစေခဲ့တာဖြစ်ပါတယ်။

၂၀၂၃ ခုနှစ်က ချယ်လ်ဆီးအသင်းကနေ ရောက်ရှိလာခဲ့တဲ့ ပူလီဆစ်ဟာ ပြီးခဲ့တဲ့ရာသီမှာ အေစီမီလန်အသင်း အတွက် ပြိုင်ပွဲစုံပွဲပေါင်း ၅၀ ပါဝင်ကစားခဲ့ပြီး ၁၇ ဂိုးသွင်းယူကာ ဂိုးဖန်တီးမှု ၁၂ ကြိမ် ပြုလုပ်နိုင်ခဲ့တာပါ။ 

ပူလီဆစ်နဲ့ မိုဒရစ်ကို တွေ့ရစဉ်

ပူလီဆစ်ဟာ ရာသီသစ်မှာ အေစီမီလန်အသင်းကို ရလဒ်ကောင်းတွေ ရရှိအောင် ကူညီပေးချင်တာကြောင့် လန်းလန်းဆန်းဆန်း ရှိနေဖို့အတွက် ပြီးခဲ့တဲ့ ကွန်ကာကပ်ဖ် ရွှေဖလားပြိုင်ပွဲမှာ အမေရိကန်အသင်းအတွက် ပါဝင်ကစားဖို့ ငြင်းဆန်ခဲ့ပါတယ်။

အေစီမီလန်အသင်းဟာ ပြီးခဲ့တဲ့ရာသီက စီးရီးအေပြိုင်ပွဲမှာ အဆင့် ၈ နေရာနဲ့ ရာသီအဆုံးသတ်ခဲ့တာကြောင့် ရာသီသစ်မှာ ဥရောပပြိုင်ပွဲ ယှဉ်ပြိုင်ခွင့် ဆုံးရှုံးခဲ့တာပါ။

ပူလီဆစ်နဲ့ အေစီမီလန်အသင်းရဲ့ စာချုပ်ဟာ ၂၀၂၇ ခုနှစ်၊ ဇွန်လ ၃၀ ရက်အထိ သက်တမ်းရှိနေပါတယ်။ 

အေစီမီလန်အသင်းဟာ ဒီနွေရာသီ အပြောင်းအရွှေ့မှာ တိုရီနိုအသင်း ကွင်းလယ်လူ ရီချီနဲ့ ရီးရယ်လ်အသင်းကနေ ထွက်ခွာခဲ့တဲ့ ဝါရင့်ကွင်းလယ်လူ မိုဒရစ်တို့ကို အားဖြည့်ထားတာပါ။ 

အေစီမီလန်အသင်းဟာ ရာသီသစ် မတိုင်မီ ခြေစမ်းပွဲတွေအဖြစ် အာဆင်နယ်၊ လီဗာပူးလ်၊ ပါ့ချ်ဂလိုရီ၊ လိဒ်စ်၊ ချယ်လ်ဆီးအသင်းတို့နဲ့ ယှဉ်ပြိုင်သွားမှာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဇူလိုင် ၁၇

အီတလီအသင်းဟာ အမျိုးသမီးယူရို ၂၀၂၅ ပြိုင်ပွဲ ကွာတားဖိုင်နယ်ပွဲစဉ်မှာ နော်ဝေအသင်းကို ၂ ဂိုး-၁ ဂိုးနဲ့ အနိုင်ရပြီး ဆီမီးဖိုင်နယ်တက်ကာ ယူရိုဆီမီးဖိုင်နယ်တက်ဖို့ ၂၈ နှစ်ကြာ စောင့်ဆိုင်းခဲ့ရတာကို အဆုံးသတ် နိုင်ခဲ့တာ ဖြစ်ပါတယ်။ 

ဒီပွဲမှာ အီတလီအသင်း ခေါင်းဆောင် ဂျီရယ်လီက ပွဲချိန်မိနစ် ၅၀ မှာ ဦးဆောင်ဂိုး သွင်းယူခဲ့ပြီး ၆၆ မိနစ်မှာ ဟီဂါဘတ်က နော်ဝေအသင်းအတွက် ချေပဂိုး သွင်းယူနိုင်ခဲ့တာပါ။ 

ဒါပေမယ့် မိနစ် ၉၀ မှာ ဂျီရယ်လီက အီတလီအသင်းအတွက် အဖိုးတန် အနိုင်ဂိုး သွင်းယူခဲ့တာကြောင့် အီတလီ အသင်းဟာ ၁၉၉၇ ခုနှစ်နောက်ပိုင်း ပထမဆုံးအကြိမ်အဖြစ် ယူရိုဆီမီးဖိုင်နယ်ကို တက်နိုင်ခဲ့တာဖြစ်ပါတယ်။ 

ဂျီရယ်လီက ဒါဟာ လက်တွေ့ဖြစ်လာတဲ့ အိပ်မက်ဖြစ်ပြီး အံ့သြစရာကောင်းတယ်လို့ ပွဲအပြီးအင်တာဗျူးမှာ ပြောခဲ့တာပါ။

ဂျီရယ်လီက “ဒါက အသင်းအတွက် အောင်ပွဲတင် မဟုတ်ဘဲ အီတလီ အမျိုးသမီး ဘောလုံးလောကမှာရှိတဲ့ လူတိုင်းနဲ့ သက်ဆိုင်မှုရှိပါတယ်။ မျိုးဆက်သစ်အတွက် မယုံနိုင်စရာဖြစ်သလို ဥရောပရဲ့ထိပ်ဆုံး ၄ သင်းထဲမှာ ပါဝင်ဖို့က အိပ်မက်တစ်ခု အမှန်တကယ် ဖြစ်လာတာပါ။ ဒုက္ခတွေ အများကြီး ခံစားခဲ့ရပေမယ့် တစ်သင်းလုံး အဆုံးထိ တိုက်ပွဲဝင်နိုင်ခဲ့ပါတယ်”လို့ RAI ကို ပြောခဲ့ပါတယ်။

အီတလီအမျိုးသမီး အသင်းကို တွေ့ရစဉ်

အီတလီအသင်းနည်းပြ ဆွန်စင်ဟာ ယူရိုဆီမီးဖိုင်နယ် တက်နိုင်ခဲ့တဲ့အတွက် ဂုဏ်ယူနေပြီး အခုအချိန်မှာ ပျော်ရွှင်မှုကို အပြည့်အဝ ခံစားပြီးရင် ဆီမီးဖိုင်နယ်အကြောင်းကို စဉ်းစားရတော့မယ်လို့ ပြောခဲ့တာပါ။ 

အီတလီအသင်းခေါင်းဆောင် ဂျီရယ်လီက နည်းပြဆွန်စင်ကို ချီးကျူးမှုတွေ ပြုလုပ်ခဲ့ပြီး သူ့ကြောင့် အသင်းဟာ ယုံကြည်မှုတွေ အများကြီး တိုးလာခဲ့တယ်လို့ ပြောခဲ့ပါတယ်။

အီတလီအသင်းဟာ ယူရိုဆီမီးဖိုင်နယ် ပွဲစဉ်အဖြစ် အင်္ဂလန်နဲ့ ဆွီဒင်အသင်းတို့ ပွဲစဉ်က အနိုင်ရတဲ့အသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဇူလိုင် ၁၇

စပိန်ကြယ်ပွင့် ယာမဲလ်ဟာ အသင်းရဲ့ အထင်ကရ ကျောနံပါတ်ဖြစ်တဲ့ နံပါတ် ၁၀ အင်္ကျီကို ဝတ်ဆင်မယ်လို့ ဘာစီလိုနာအသင်းက အတည်ပြုခဲ့ပါတယ်။ 

အသက် ၁၈ နှစ်ပြည့်ခဲ့ပြီဖြစ်တဲ့ ယာမဲလ်ဟာ မိုနာကိုအသင်းထံ ရာသီကုန်အထိ အငှားစာချုပ်နဲ့ ပြောင်းရွှေ့သွား ခဲ့တဲ့ အန်ဆုဖာတီဆီကနေ ကျောနံပါတ် ၁၀ အမွေအနှစ်ကို ဆက်ခံမှာပါ။ 

ယာမဲလ်ဟာ ပြီးခဲ့တဲ့လက ဘာစီလိုနာအသင်းမှာ ၂၀၃၁ ခုနှစ်အထိရှိမယ့် စာချုပ်သစ်ချုပ်ဆိုဖို့ သဘောတူညီမှု ရရှိခဲ့တာ ဖြစ်ပါတယ်။ 

မက်ဆီဟာ ဘာစီလိုနာအသင်းရဲ့ကျောနံပါတ် ၁၀ ကို ၂၀၀၈ ကနေ ၂၀၂၁ ခုနှစ်အထိ ဝတ်ဆင်ခဲ့ပြီး အသင်းရဲ့ ဂန္ထဝင် တစ်ဦးအဖြစ်နဲ့ ဆုဖလားအောင်မြင်မှု အများအပြား ရယူနိုင်ခဲ့တာပါ။

မက်ဆီထွက်ခွာပြီးနောက် အန်ဆုဖာတီဟာ သူ့ရဲ့ကျောနံပါတ် ၁၀ အမွေအနှစ်ကို ဆက်ခံခဲ့ပေမယ့် ဒဏ်ရာတွေနဲ့ ရုန်းကန်ခဲ့ရတာကြောင့် ပွဲကစားခွင့်ဆုံးရှုံးခဲ့ပြီး နောက်ဆုံးမှာ အသင်းကနေ အငှားနဲ့ ထွက်ခွာခဲ့ရပါတယ်။ 

ယာမဲလ်ကတော့ နံပါတ် ၁၀ ဟာ သူ့အတွက် ဖိအားမရှိဘဲ ဒီနံပါတ်ကို ဝတ်ဆင်ခဲ့တဲ့ သူတွေရဲ့ အမွေအနှစ်တွေကို ဆက်ပြီးထိန်းသိမ်းဖို့ ကြိုးစားသွားမယ်လို့ ပြောခဲ့တာပါ။ 

ယာမဲလ်ကို တွေ့ရစဉ်

ယာမဲလ်က “ငယ်ငယ်ကတည်းက ကျနော့်ရဲ့အိပ်မက်က ဘာစီလိုနာအသင်းအတွက် ပွဲထွက်ပြီး ကြီးပြင်းလာဖို့နဲ့ နံပါတ် ၁၀ ဝတ်ဆင်ပြီးကစားဖို့ပါ။ ဘာစီလိုနာမှာ မွေးတဲ့ကလေးတိုင်းက ဒါကို အိပ်မက်မက်ကြပါတယ်။ မက်ဆီ က သူ့ရဲ့ပုံစံနဲ့ အကောင်းဆုံး လုပ်ခဲ့သလို ကျနော်လည်း ကျနော့်ရဲ့ပုံစံနဲ့ပဲ အကောင်းဆုံးလုပ်သွားမှာပါ”လို့ ပြောခဲ့ပါတယ်။

ယာမဲလ်ဟာ ဘာစီလိုနာအသင်းအတွက် ပွဲဦးထွက်ခဲ့တဲ့ ၂၀၂၂-၂၃ ရာသီမှာ ကျောနံပါတ် ၄၁ ဝတ်ဆင်ခဲ့ပြီး၊ နောက်ပိုင်းမှာ ကျောနံပါတ် ၂၇ ဝတ်ဆင်ခဲ့တာပါ။ 

ပြီးခဲ့တဲ့ရာသီမှာတော့ ယာမဲလ်ဟာ ကျောနံပါတ် ၁၉ ဝတ်ဆင်ခဲ့ပြီး ရာသီသစ်မှာ ကျောနံပတ် ၁၀ ဝတ်ဆင်သွားမှာ ဖြစ်ပါတယ်။

ယာမဲလ်ဟာ ဘာစီလိုနာအသင်းအတွက် ၁၀၆ ပွဲ ကစားထားပြီး ၂၅ ဂိုးသွင်းယူကာ လာလီဂါဖလား ၂ ကြိမ်၊ ကိုပါဒယ်ရေးနဲ့ စပိန်စူပါဖလားတို့ကို ရယူနိုင်ခဲ့တာပါ။

ယာမဲလ်ဟာ ပြီးခဲ့တဲ့ရက်ပိုင်းက အသက် ၁၈ နှစ်ပြည့် မွေးနေ့ပါတီ ကျင်းပခဲ့တာမှာ မသန်စွမ်းမှုဆိုင်ရာ ဥပဒေ တွေကို ချိုးဖောက်နိုင်ဖွယ်ရှိတဲ့ စွပ်စွဲချက်တွေနဲ့ စပိန်အစိုးရရဲ့ စုံစမ်းစစ်ဆေးမှုတွေကို ခံနေရပါတယ်။ 

ယာမဲလ်က သူဟာ ဘာစီလိုနာအသင်းအတွက် အလုပ်လုပ်ပေမယ့် လေ့ကျင့်ရေးစင်တာနဲ့ ဝေးကွာတဲ့အချိန်မှာ သူ့ရဲ့ဘဝကို ပျော်ပျော်ရွှင်ရွှင် ဖြတ်သန်းတယ်လို့ ပြောခဲ့ပါတယ်။

Source: ESPN