CNI Sport News

၂၀၂၆ ခုနှစ်၊ ဇန်နဝါရီ ၂၉

ချယ်လ်ဆီးအသင်း ကစားသမားဟောင်း စတာလင်ရဲ့ ငွေကြေးဆိုင်ရာ မျှော်လင့်ချက်တွေက နာပိုလီအသင်းထံ ပြောင်းရွှေ့ဖို့ ဖြစ်နိုင်ဖွယ်မရှိဘူးလို့ အီတလီကလပ် အားကစားဒါရိုက်တာ ဂျီယိုဗန်နီမန်နာက ပြောခဲ့ပါတယ်။ 

ဂျီယိုဗန်နီမန်နာက “စတာလင်ဟာ အလွန်ကောင်းပေမယ့် သူပွဲမကစားရတာ အတော်ကြာနေပါပြီ။ နွေရာသီတုန်း က ကျနော်တို့ သူနဲ့စကားပြောခဲ့ပေမယ့် အခုအချိန်မှာ ခက်ခဲတယ်လို့ ကျနော် မြင်ပါတယ်။ သူ့မှာ ငွေကြေး ဆိုင်ရာ မျှော်လင့်ချက်တွေ အများကြီးရှိတယ်”လို့ Sky Italy ကိုပြောခဲ့တာပါ။ 

နာပိုလီအသင်းဟာ စတာလင်ကို ခေါ်ယူဖို့ စိတ်ဝင်စားကြောင်း ပြသခဲ့တဲ့ အသင်းတွေထဲက တစ်သင်းဖြစ်ပြီး နွေရာသီမှာ ဆွေးနွေးမှုတွေ ပြုလုပ်ခဲ့တာ ဖြစ်ပါတယ်။ 

ဒါပေမယ့် စတာလင်ရဲ့ လစာတောင်းဆိုမှုတွေကြောင့် ဒီအပြောင်းအရွှေ့ ဖြစ်ဖွယ်မရှိဘူးလို့ နာပိုလီအသင်း အားကစား ဒါရိုက်တာက ပြောခဲ့ပါတယ်။

စတာလင်ကို တွေ့ရစဉ် 

စတာလင်ဟာ တစ်ပတ်လုပ်ခ ပေါင် ၃၂၅,၀၀၀ ရရှိနေတဲ့ ချယ်လ်ဆီးအသင်းကနေ နှစ်ဦးသဘောတူညီမှုနဲ့ ထွက်ခွာခဲ့ပြီ ဖြစ်ပါတယ်။ 

အသင်းလက်မဲ့ ဖြစ်သွားပြီဖြစ်တဲ့ စတာလင်ဟာ လန်ဒန်ကလပ်တွေထံ ပြောင်းရွှေ့ဖို့ ချိတ်ဆက်မှုတွေရှိခဲ့သလို ပြည်ပထွက်ခွာပြီး ကစားဖို့လည်း စဉ်းစားနေတာပါ။ 

ပြီးခဲ့တဲ့ရာသီမှာ အာဆင်နယ်အသင်းထံ အငှားကစားခဲ့တဲ့ စတာလင်ဟာ ဒီရာသီရဲ့ပထမရာသီဝက်မှာ ချယ်လ်ဆီး အသင်းကြီးနဲ့အဝေးမှာ သီးခြား လေ့ကျင့်မှုတွေသာ ပြုလုပ်ခဲ့ရပါတယ်။ 

စတာလင်ဟာ လက်ရှိအချိန်မှာ သူ့အတွက် ရွေးချယ်စရာ အားလုံးကို လမ်းဖွင့်ထားပြီး မကြာမီမှာ အသင်း တစ်သင်းထံ ပြောင်းရွှေ့နိုင်ဖို့ မျှော်လင့်နေတာဖြစ်ပါတယ်။ 

Source: Dailymail

CNI Sport News

၂၀၂၆ ခုနှစ်၊ ဇန်နဝါရီ ၂၉

ယူနိုက်တက်အသင်းဟာ စာချုပ်သက်တမ်းတိုးဖို့ တရားဝင် ဆွေးနွေးမှုတွေ မစတင်ရသေးတာကြောင့် နောက်ခံလူ မက်ဂွဲယားဟာ အသင်းမှာ အနာဂတ် မရေမရာဖြစ်နေပါတယ်။ 

မက်ဂွဲယားနဲ့ ယူနိုက်တက်အသင်းတို့ ချုပ်ဆိုထားတဲ့ စာချုပ်ဟာ ဒီရာသီကုန်ရင် ကုန်ဆုံးတော့မှာပါ။ 

အာဆင်နယ်နဲ့ မန်စီးတီးအသင်းတို့ကို အနိုင်ရခဲ့တဲ့ပွဲတွေမှာ အကောင်းဆုံး စွမ်းဆောင်ရည်တွေ ပြသနိုင်ခဲ့တဲ့ မက်ဂွဲယားကို အီတလီနဲ့ တူရကီကလပ် အသင်းတွေအပြင် အသင်းတချို့က ခေါ်ယူဖို့ စိတ်ဝင်စားနေကြပါတယ်။ 

မက်ဂွဲယားဟာ ဇန်နဝါရီ ၁ ရက်ကနေစပြီး ပြည်ပကလပ် အသင်းတွေနဲ့ လွတ်လပ်စွာ ဆွေးနွေးမှုတွေ ပြုလုပ်ပြီး အကြိုစာချုပ်ချုပ်လို့ ရနေပြီဖြစ်ပါတယ်။ 

The Athletic က အီတလီစီးရီးအေနဲ့ တူရကီစူပါလိဂ် ၂ ခုလုံးရှိ ကလပ်အသင်းတွေကို ကိုယ်စားပြုတဲ့ အေးဂျင့် တွေဟာ ကစားသမားရဲ့ ကိုယ်စားလှယ်တွေနဲ့ ဆက်သွယ်မှု ပြုလုပ်ပြီးဖြစ်တယ်လို့ ဖော်ပြထားပါတယ်။ 

မက်ဂွဲယားကို တွေ့ရစဉ်

မက်ဂွဲယားကို ဆော်ဒီကလပ် အသင်းတွေကလည်း စိတ်ဝင်စားနေပေမယ့် သူကတော့ ဆော်ဒီလိဂ်ထံ ပြောင်းရွှေ့ ဖို့ ဖြစ်နိုင်ဖွယ်နည်းနေတာပါ။

ယူနိုက်တက်အသင်းဟာ ပြီးခဲ့တဲ့နှစ်တွေ အတွင်းမှာ ကစားသမားတွေကို လုပ်ခလစာ အများအပြား ပေးခဲ့တာ ကြောင့် အခုအချိန်မှာ ဒီအခြေအနေကို ထိန်းချုပ်နိုင်ဖို့ လုပ်ဆောင်နေတဲ့အတွက် အသင်းအကြီးအကဲတွေဟာ သူတို့ရဲ့ရွေးချယ်စရာတွေကို ချိန်ဆမှုတွေပြုလုပ်နေတာ ဖြစ်ပါတယ်။ 

မက်ဂွဲယားဟာ ဒီရာသီအစပိုင်းမှာ ဒဏ်ရာတွေကြောင့် ရုန်းကန်ခဲ့ရပေမယ့် လီဗာပူးလ်၊ ချယ်လ်ဆီး၊ မန်စီးတီး၊ အာဆင်နယ် အသင်းတို့ကို အနိုင်ရခဲ့တဲ့ပွဲတွေမှာ ပါဝင်ပြီး ခြေစွမ်းပြသနိုင်ခဲ့လို့ ပွဲကြီးပွဲကောင်း ကစားသမား တစ်ဦးလို့ သတ်မှတ်ခံထားရပါတယ်။

 မက်ဂွဲယားဟာ နည်းပြ မိုက်ကယ်ကာရစ် လက်ထက်မှာ လီဆန်ဒရိုမာတီနက်ဇ်နဲ့အတူ တွဲဖက်ပြီး ယူနိုက်တက် အသင်းရဲ့ ခံစစ်ကို အကောင်းဆုံးဖြစ်အောင် စွမ်းဆောင်ထားတာ ဖြစ်ပါတယ်။

Source: Goal

CNI Sport News

၂၀၂၆ ခုနှစ်၊ ဇန်နဝါရီ ၂၉

မန်စီးတီးအသင်းဟာ ဂါလာတာစာရေးအသင်းကို ၂ ဂိုး-ဂိုးမရှိနဲ့ အနိုင်ရကာ ချန်ပီယံလိဂ် ၁၆ သင်းအဆင့်ကို တိုက်ရိုက် တက်နိုင်ခဲ့ပြီးနောက် နည်းပြဂွာဒီယိုလာက ပလေးအော့ဖ်အဆင့်ကို ရှောင်နိုင်ခဲ့တဲ့အတွက် ကျေနပ် တယ်လို့ ပြောခဲ့ပါတယ်။ 

ဂွာဒီယိုလာက “ချန်ပီယံလိဂ်ရဲ့ အခြေအနေ ဘယ်လို ဖြစ်လာမလဲဆိုတာ ထည့်သွင်းစဉ်းစားရင် ထိပ်ဆုံး ၈ သင်း ထဲမှာ အဆုံးသတ်နိုင်ခဲ့လို့ အလွန် ကျေနပ်ပါတယ်။ အသင်းတိုင်းက တကယ်ကို ခက်ခဲတာပါ။ ကျနော်တို့ ပလေး အော့ဖ်အဆင့် မကစားရတာကို ကျနော် အလွန်ကျေနပ်ပြီး ၁၆ သင်းအဆင့်အတွက် အကောင်းဆုံး အခြေအနေနဲ့ ရောက်ရှိလာမယ်လို့ မျှော်လင့်ကြောင်း”ပြောခဲ့တာပါ။ 

ပြီးခဲ့တဲ့ ချန်ပီယံလိဂ်ပွဲမှာ ဘိုဒိုဂလင့်မ်အသင်းကို အရေးနိမ့်ခဲ့တာကြောင့် ၁၆ သင်းအဆင့်ကို တိုက်ရိုက် မတက်နိုင် မှာ စိုးရိမ်နေတဲ့ မန်စီးတီးအသင်းဟာ ဒီနိုင်ပွဲကြောင့် အဆင့် ၈ နေရာမှာ ရပ်တည်ကာ ၁၆ သင်းအဆင့် တက်နိုင်ခဲ့ ပါတယ်။

မန်စီးတီးအသင်းဟာ ရီးရယ်လ်အသင်းရဲ့ ရလဒ်ကြောင့်လည်း ၁၆ သင်းအဆင့်ကို တိုက်ရိုက် တက်နိုင်ခဲ့တာဖြစ်ပြီး ရီးရယ်လ်အသင်းသာ ဘင်ဖီကာအသင်းနဲ့ သရေကျခဲ့ရင် ပလေးအော့ဖ် ယှဉ်ပြိုင်ရမှာပါ။ 

ဂွာဒီယိုလာကို တွေ့ရစဉ်

မန်စီးတီးအသင်းနည်းပြ ဂွာဒီယိုလာက ဘင်ဖီကာအသင်း ဂိုးသမား ရီးရယ်လ်အသင်း ဂိုးဧရိယာထဲ ရောက်ရှိသွား ချိန်မှာ အနည်းငယ် စိုးရိမ်မိခဲ့တယ်လို့ ပြောခဲ့ပြီး သူ့ရဲ့ပြိုင်ဘက်ဟောင်း မော်ရင်ဟိုကို ကျေးဇူးတင်ကြောင်း မက်ဆေ့ချ် ပေးပို့ခဲ့ပါတယ်။

ဂါလာတာစာရေးအသင်းဟာ ဒီပွဲအရေး နိမ့်ခဲ့ပေမယ့် ချန်ပီယံလိဂ် ၁၆ သင်းအဆင့် တက်နိုင်ဖို့အတွက် ပလေးအော့ဖ် ယှဉ်ပြိုင်ခွင့် ရရှိခဲ့ပါတယ်။ 

မန်စီးတီးအသင်းဟာ လာမယ့် ပရီးမီးယားလိဂ် ပွဲအဖြစ် စပါးအသင်း အိမ်ကွင်း သွားရောက်ယှဉ်ပြိုင်ရမှာ ဖြစ်ပါ တယ်။ 

Source: ESPN

ထရူဘင်ရဲ့နောက်ဆုံးမိနစ်ဂိုးကို သမိုင်းဝင်ဂိုးလို့ မော်ရင်ဟို ပြော 

CNI Sport News

၂၀၂၆ ခုနှစ်၊ ဇန်နဝါရီ ၂၉

ဘင်ဖီကာအသင်းက ရီးရယ်လ်အသင်းကို ၄ ဂိုး-၂ ဂိုးနဲ့ အနိုင်ရခဲ့တဲ့ ချန်ပီယံလိဂ်ပွဲမှာ နောက်ဆုံးမိနစ် သွင်းဂိုး သွင်းပြီး အသင်းကို ဒီပြိုင်ပွဲမှာ ဆက်ပြီးရှိနေစေခဲ့တဲ့ ယူကရိန်းဂိုးသမား ထရူဘင်ရဲ့ဂိုးကို သမိုင်းဝင်ဂိုးလို့ ဘင်ဖီကာအသင်းနည်းပြ မော်ရင်ဟိုက ပြောခဲ့ပါတယ်။ 

မော်ရင်ဟိုက “၃ ဂိုး-၂ ဂိုးဆိုတဲ့ ရလဒ်က မလုံလောက်တဲ့ အချိန်မှာ ကံကောင်းတာက ကျနော်တို့ တည်ကန်ဘော ရခဲ့ပါတယ်။ ကျနော်ဟာ ထရူဘင်ကို ဂိုးဧရိယာထဲ သွားခွင့်ပေးခဲ့ပြီး သူဟာ ဂိုးဧရိယာထဲဝင်ကာ အံ့သြဖွယ်ကောင်း တဲ့ သွင်းဂိုး၊ သမိုင်းဝင် သွင်းဂိုးသွင်းယူခဲ့ပါတယ်။ အားကစားကွင်းကြီး ပြိုကျတော့မလိုကို ခံစားခဲ့ရပါတယ်။ မယုံနိုင်စရာပါပဲ”လို့ Movistar Plus နဲ့ ပွဲအပြီးအင်တာဗျူးမှာ ပြောခဲ့တာပါ။ 

ဘင်ဖီကာအသင်းဟာ ရီးရယ်လ်အသင်းကို ၃ ဂိုး-၂ ဂိုးနဲ့သာ အနိုင်ရခဲ့ရင် ချန်ပီယံလိဂ် ပြိုင်ပွဲကနေ ထွက်ခွာရမှာ ဖြစ်ပေမယ့် နောက်ဆုံးမိနစ်မှာ ရရှိတဲ့ ဖရီးကစ်ကို ဂိုးသမား ထရူဘင်က ခေါင်းတိုက်ပြီး သွင်းဂိုး ရယူပေးနိုင်ခဲ့တာ ဖြစ်ပါတယ်။ 

ဘင်ဖီကာအသင်းဟာ ဒီသွင်းဂိုးကြောင့် ၁၆ သင်းအဆင့်ကို တက်နိုင်ဖို့ ပလေးအော့ဖ် ဆက်ပြီး ယှဉ်ပြိုင်ခွင့် ရရှိခဲ့ပါ တယ်။ 

မော်ရင်ဟိုကို တွေ့ရစဉ်

ရီးရယ်လ်အသင်းကလည်း ဒီရှုံးပွဲကြောင့် ၁၆ သင်းအဆင့်ကို တိုက်ရိုက် မတက်နိုင်ဘဲ ပလေးအော့ဖ် ယှဉ်ပြိုင် ရမှာပါ။ 

ရီးရယ်လ်အသင်းကို အနိုင်ရခဲ့တာဟာ ဘင်ဖီကာအသင်းအတွက် မယုံနိုင်လောက်အောင် ဂုဏ်သိက္ခာရှိပြီး အနိုင်ရဖို့ ထိုက်တန်တယ်လို့လည်း မော်ရင်ဟိုက ပြောခဲ့ပါတယ်။ 

ဘင်ဖီကာအသင်း ဂိုးသမား ထရူဘင်က ရူးသွပ်စရာကောင်းတဲ့ အခိုက်အတန့်ဖြစ်ပြီး ဒါဟာ သူ့ရဲ့အသက် ၂၄ နှစ် အရွယ်မှာ ပထမဆုံးအကြိမ် ဖြစ်တဲ့အတွက် မယုံနိုင်လောက်အောင်ပါပဲလို့ ပြောခဲ့တာပါ။ 

ဘင်ဖီကာအသင်းဟာ နှစ်ကျော့ကစားရမယ့် ချန်ပီယံလိဂ် ပလေးအော့ဖ်မှာ ရီးရယ်လ်အသင်း ဒါမှမဟုတ် အင်တာမီလန်အသင်းနဲ့ တွေ့ဆုံရမယ်လို့ သိရပါတယ်။ 

Source: CNA

CNI Sport News

၂၀၂၆ ခုနှစ်၊ ဇန်နဝါရီ ၂၈

ကင်မရွန်းဂိုးသမား အိုနာနာရဲ့ အေးဂျင့်တွေနဲ့ အင်တာမီလန်အသင်းတို့ ဆွေးနွေးမှုတွေ ပြုလုပ်ခဲ့ပြီးနောက် အိုနာနာဟာ ဒီနွေရာသီမှာ ယူနိုက်တက်အသင်းကနေ အသင်းဟောင်းထံ ပြန်လာဖွယ်ရှိနေပါတယ်။ 

အိုနာနာရဲ့ ကိုယ်စားလှယ်တွေဟာ အလားအလာရှိတဲ့ သဘောတူညီချက် အများအပြားကို ဆွေးနွေးဖို့ မီလန်မြို့ ကို ရောက်ရှိနေတာဖြစ်ပြီး Daily Mail Sport က အင်တာမီလန်အသင်းထံ ပြန်သွားနိုင်ဖွယ်ရှိတဲ့ အရာကို ဆွေးနွေးခဲ့တယ်လို့ ဖော်ပြထားပါတယ်။

အိုနာနာဟာ ယူနိုက်တက်အသင်းမှာ နံပါတ်တစ်နေရာ ဆုံးရှုံးခဲ့ပြီးနောက် တူရကီကလပ် ထရက်ဇွန်စပေါ် အသင်းထံ အငှားသွားရောက် ကစားနေတာပါ။ 

အိုနာနာဟာ သူ့ရဲ့ အိုးထရက်ဖို့ဒ် ကစားသမားဘဝကို မစွန့်လွှတ်ချင်ပေမယ့် ရာသီကုန်ချိန်မှာ အပြီးသတ် ထွက်ခွာရဖွယ်ရှိနေတဲ့အတွက် အင်တာမီလန်အသင်းမှာ ဆွန်မားရဲ့ နေရာကို အစားထိုးဝင်ရောက်ဖို့ ဆွေးနွေး နေတာ ဖြစ်ပါတယ်။ 

အိုနာနာကို တွေ့ရစဉ်

အိုနာနာဟာ အင်တာမီလန်အသင်းမှာ တစ်ရာသီကြာသာ ကစားခဲ့ပေမယ့် အသင်းကို ချန်ပီယံလိဂ်ဗိုလ်လုပွဲ ရောက်ရှိအောင် ပို့ဆောင်ပေးနိုင်ခဲ့သလို အီတလီဖလားနဲ့ စူပါဖလား ရရှိအောင် ကူညီပေးနိုင်ခဲ့တာပါ။ 

အဲ့ဒါကြောင့် ယူနိုက်တက်အသင်းဟာ အိုနာနာကို ပေါင် ၄၇.၂ သန်းနဲ့ ခေါ်ယူခဲ့ပေမယ့် သူဟာအသင်းအတွက် ကစားခဲ့တဲ့ ၂ ရာသီမှာ လက်စွမ်းပိုင်း မတည်ငြိမ်မှုတွေကြောင့် အငှားချခံခဲ့ရတာ ဖြစ်ပါတယ်။ 

အိုနာနာဟာ ထရက်ဇွန်စပေါ်အသင်းမှာတော့ လက်စွမ်းကောင်းတွေ ပြန်ပြသနိုင်ခဲ့ပြီး ၁၆ ပွဲ ကစားထားတာမှာ ၃ ပွဲသာ ရှုံးပွဲကြုံတွေ့ထားခဲ့ပါတယ်။

ထရက်ဇွန်စပေါ်အသင်းဟာ တူရကီလိဂ်မှာ ဂါလာတာစာရေး၊ ဖီနာဘာချီအသင်းတို့ရဲ့နောက် အဆင့် ၃ နေရာ ရပ်တည်နေပြီး လာမယ့် ရာသီချန်ပီယံလိဂ် ဝင်ခွင့်ရဖို့ မျှော်လင့်နေပါတယ်။ 

ထရက်ဇွန်စပေါ်အသင်းကလည်း အိုနာနာကို အပြီးသတ် ခေါ်ယူချင်နေတာကြောင့် ယူနိုက်တက်အသင်းဟာ သူ့ကိုရောင်းချပြီး လာမယ့်နွေရာသီ အပြောင်းအရွှေ့ အသုံးစရိတ်ကို တိုးချင်နေတာဖြစ်ပါတယ်။ 

Source: Dailymail

CNI Sport News

၂၀၂၆ ခုနှစ်၊ ဇန်နဝါရီ ၂၈

စပိန်ကွင်းလယ်လူ ဖာမင်လိုပက်ဇ်ဟာ ဘာစီလိုနာအသင်းနဲ့ ၂၀၃၁ ခုနှစ် ရာသီကုန်အထိ စာချုပ်သက်တမ်းတိုးဖို့ သဘောတူညီမှု ရရှိခဲ့တာကြောင့် သူ့ကိုခေါ်ယူချင်နေတဲ့ ချယ်လ်ဆီးအသင်းရဲ့ စိတ်ဝင်စားမှုတွေဟာ ရပ်တန့် သွားခဲ့ပါတယ်။ 

ချယ်လ်ဆီးအသင်းဟာ ပြီးခဲ့တဲ့နွေရာသီမှာ ဖာမင်လိုပက်ဇ်ကို ခေါ်ယူဖို့ ကြိုးပမ်းခဲ့ပေမယ့် အပြောင်းအရွှေ့ ဖြစ်မြောက်ခဲ့ခြင်း မရှိတာပါ။ 

ဒါပေမယ့် ချယ်လ်ဆီးအသင်းဟာ ဖာမင်လိုပက်ဇ်ကို ငွေကြေး အများအပြားနဲ့ ကမ်းလှမ်းမှုပြုလုပ်ဖို့ စောင့်ဆိုင်းမှုတွေ ရှိနေတာဖြစ်ပါတယ်။ 

ဒါကြောင့် ဘာစီလိုနာအသင်းဟာ အခုလ အစောပိုင်းမှာ ဖာမင်လိုပက်ဇ်ရဲ့ စာချုပ်ကို သက်တမ်းတိုးဖို့ ဆွေးနွေးမှုတွေ စတင်ခဲ့တာပါ။ 

ဘာစီလိုနာအသင်းဟာ ဖာမင်လိုပက်ဇ်ကို ခေါ်ယူချင်နေတဲ့ ချယ်လ်ဆီးအသင်းရဲ့ စိတ်ဝင်စားမှုကို တားဆီးဖို့ သာမက အခုရာသီမှာ သူ့ရဲ့စွမ်းဆောင်ရည်အတွက် ချီးမြှင့်ဖို့ စာချုပ်သက်တမ်း တိုးချင်ခဲ့တာဖြစ်ပါတယ်။ 

ဖာမင်လိုပက်ဇ်ကို တွေ့ရစဉ်

ဘာစီလိုနာအသင်းဟာ မတ်လမတိုင်မီ ဖာမင်လိုပက်ဇ်ရဲ့ စာချုပ်သက်တမ်းတိုးမှုကို အပြီးသတ်ချင်နေသလို နည်းပြ ဟန်ဆီဖလစ်ကလည်း ပြီးခဲ့တဲ့ နွေရာသီကလို ကစားသမားရဲ့ အနာဂတ်ထင်ကြေးတွေကို ထပ်ပြီး ဖြစ်လိုခြင်း မရှိတာပါ။ 

ဖာမင်လိုပက်ဇ်နဲ့ ဘာစီလိုနာအသင်း အရင်ချုပ်ဆိုထားတဲ့ စာချုပ်ဟာ ၃ နှစ် ကျန်ရှိနေပြီး ဒီစာချုပ်ထဲမှာ ယူရိုသန်း ၅၀၀ တန်ကြေးရှိတဲ့ စာချုပ် ဖျက်သိမ်းကြေး ပါဝင်ပါတယ်။ 

ဘာစီလိုနာအသင်းဖော် အော်လ်မိုက ဖာမင်လိုပက်ဇ် စာချုပ်သက်တမ်းတိုးမှာက သတင်းကောင်းဖြစ်ပြီး သူနဲ့ကစားတဲ့ နေရာချင်း တူညီပေမယ့် ဘယ်တုန်းကမှ ပြဿနာမရှိသလို အတူတွဲ ကစားခွင့်ရတာကို ပျော်ရွှင်တယ်လို့ ပြောခဲ့ပါတယ်။ 

ဘာစီလိုနာအကယ်ဒမီထွက် ဖာမင်လိုပက်ဇ်ဟာ ဒီရာသီမှာ အသင်းအတွက် ပြိုင်ပွဲစုံမှာ ၁၀ ဂိုး သွင်းယူထားသလို ဂိုးဖန်တီးမှုလည်း ၁၀ ကြိမ် ပြုလုပ်ထားပါတယ်။ 

Source: ESPN

CNI Sport News

၂၀၂၆ ခုနှစ်၊ ဇန်နဝါရီ ၂၈

စပါးအသင်းနည်းပြ သောမတ်စ်ဖရန့်ခ်က အသေးစား ကားမတော်တဆမှုဖြစ်ခဲ့တဲ့ ပြင်သစ်တိုက်စစ်မှူး မူအာနီရဲ့ အခြေအနေ ကောင်းမွန်တယ်လို့ ပြောခဲ့ပါတယ်။ 

အင်္ဂါနေ့က ဆိုရှယ်မီဒီယာပေါ်ပျံ့နှံ့ခဲ့တဲ့ ဓါတ်ပုံတွေထဲမှာ မူအာနီနဲ့ အသင်းဖော် အိုဒိုဘတ်တို့ဟာ ပျက်ဆီးနေတဲ့ ဖာရာရီကားဘေးမှာ ရပ်နေခဲ့တာပါ။ 

အိုဒိုဘတ်ကလည်း သူ့ရဲ့ကိုယ်ပိုင်ကားနဲ့ သွားနေတာဖြစ်ပြီး မူအာနီကို ကူညီဖို့ ကားကို ရပ်တန့်ခဲ့ပါတယ်။ 

ဒီမတော်ဆမှုဟာ ဖရန့်ဖတ်အသင်းနဲ့ ချန်ပီယံလိဂ် League Phase နောက်ဆုံးပွဲအတွက် ဂျာမနီနိုင်ငံကို ထွက်ခွာဖို့ လေဆိပ်ထံသွားချိန်မှာ ဖြစ်ခဲ့တာလို့ သတင်းမှာ ဖော်ပြထားတာပါ။ 

မူအာနီနဲ့ အိုဒိုဘတ်တို့ ၂ ဦးစလုံးဟာ စပါးအသင်းထံ အနောက်ကနေ လိုက်ပါ ပူးပေါင်းမှာဖြစ်ပြီး နည်းပြ သောမတ်စ်ဖရန့်ခ်က မတော်တဆမှုမှာ ပါဝင်ခဲ့တဲ့ သူအားလုံး အခြေအနေ ကောင်းမွန်တယ်လို့ ပြောခဲ့ပါတယ်။ 

မူအာနီကိုတွေ့ရစဉ် 

မူအာနီနဲ့ အိုဒိုဘတ်တို့ ၂ ဦးစလုံး ဖရန့်ဖတ်အသင်းနဲ့ပွဲမှာ ပါဝင်နိုင်မယ်လို့လည်း သောမတ်စ်ဖရန့်ခ်က အပြည့်အဝ မျှော်လင့်နေပါတယ်။ 

PSG အသင်းကနေ အငှားနဲ့ လာရောက်ကစားနေတဲ့ မူအာနီဟာ စပါးအသင်းအတွက် ဥရောပပြိုင်ပွဲမှာ ၂ ဂိုး သွင်းယူကာ ဂိုးဖန်တီးမှု ၂ ကြိမ် ပြုလုပ်ထားပါတယ်။

မူအာနီဟာ ဒီအပြောင်းအရွှေ့မှာ အသင်းဟောင်း ဂျူဗင်တပ်စ်အသင်းထံ ပြန်သွားဖို့ သတင်းတွေ ထွက်ပေါ် နေတာပါ။ 

စပါးအသင်းရဲ့ အဓိကနောက်ခံလူတွေဖြစ်တဲ့ ဗန်ဒီဗန်နဲ့ ပေါ်ရိုတို့ကတော့ ဒဏ်ရာတွေကြောင့် ဖရန့်ဖတ်အသင်း နဲ့ပွဲကို လွဲချော်မှာဖြစ်ပါတယ်။

စပါးအသင်းဟာ ချန်ပီယံလိဂ် ပြိုင်ပွဲမှာ ရလဒ်ကောင်းနေပေမယ့် ပရီးမီးယားလိဂ် ပြိုင်ပွဲမှာ ရလဒ်ဆိုးနေပြီး အဆင့် ၁၄ နေရာမှာ ရပ်တည်နေတာ ဖြစ်ပါတယ်။ 

Source: BBC

CNI Sport News

၂၀၂၆ ခုနှစ်၊ ဇန်နဝါရီ ၂၈

ချယ်လ်ဆီးအသင်းနည်းပြ ရိုစီနီယာက အသင်းရဲ့အဓိက ကစားသမားဖြစ်တဲ့ ကိုးလ်ပါလ်မာဟာ ယူနိုက်တက် အသင်းထံ ပြောင်းရွှေ့ချင်တယ်ဆိုတဲ့ လက်တွေ့မကျတဲ့ သတင်းတွေကို ဆွေးနွေးဖို့ အဓိပ္ပါယ်မရှိဘူးလို့ ပြောခဲ့ပါတယ်။ 

ရိုစီနီယာက “ဒီသတင်းတွေက လက်တွေ့ မကျသလို ဆွေးနွေးစရာ အကြောင်းလည်း မရှိပါဘူး။ ကိုးလ်က အလွန် ပျော်ရွှင်နေပြီး သူနဲ့ကျနော် အကြိမ်ပေါင်းများစွာ စကားပြောဆိုမှုတွေ ရှိခဲ့ပါတယ်။ သူဟာ ဒီမှာရှိနေရတာကို နှစ်သက်သလို ချယ်လ်ဆီး ကစားသမား ဖြစ်ချင်တာပါ။ ထင်ကြေးပေးမှုတွေကို ရပ်တန့်လို့ရမှာ မဟုတ်ပေမယ့် တချို့က အမှန်တရားနဲ့ ဝေးကွာလွန်းပါတယ်။ ဒီအကြောင်း ဆွေးနွေးဖို့ အဓိပ္ပါယ်မရှိဘူးလို့”ပြောခဲ့တာပါ။ 

အသက် ၂၃ နှစ်အရွယ်ရှိ ကစားသမားဟာ စတမ်းဖို့ဒ်ဘရစ်ချ်မှာ မတည်မငြိမ်ဖြစ်နေပြီး အနောက်လန်ဒန်မှာ အခက်အခဲဆုံး အချိန်တွေနဲ့ ရုန်းကန်နေရတဲ့အတွက် ကလေးဘဝက အားပေးခဲ့တဲ့ ယူနိုက်တက်အသင်းထံ ပြောင်းရွှေ့ချင်နေတယ်လို့ ထင်ကြေးသတင်းတွေ ထွက်ပေါ်ခဲ့တာ ဖြစ်ပါတယ်။

မန်စီးတီးအသင်းကနေ ရောက်ရှိလာပြီးကတည်းက ချယ်လ်ဆီးအသင်းမှာ အဓိက ကစားသမားအဖြစ် ခြေစွမ်း ပြသနေတဲ့ ကိုးလ်ပါလ်မာဟာ ဒီရာသီမှာ ဒဏ်ရာတွေကြောင့် ပွဲကစားခွင့် အကန့်အသတ်နဲ့သာ ရရှိထားတာပါ။ 

ကိုးလ်ပါလ်မာကို တွေ့ရစဉ်

ချယ်လ်ဆီးအသင်းဟာ ကိုးလ်ပါလ်မာ နောက်ထပ် ဒဏ်ရာရရှိမှာကို စိုးရိမ်တဲ့အတွက် ကစားချိန် မိနစ်တွေကို သတိထားပြီး အသုံးပြုနေတာ ဖြစ်ပါတယ်။ 

ကိုးလ်ပါလ်မာဟာ နာပိုလီအသင်းနဲ့ ယှဉ်ပြိုင်မယ့် ချန်ပီယံလိဂ် League Phase နောက်ဆုံးပွဲမှာ ချယ်လ်ဆီး အသင်းအတွက် ပါဝင်ရဖွယ် ရှိနေပါတယ်။ 

မာရက်စ်ကာရဲ့ နေရာမှာ အစားထိုး ဝင်ရောက်ပြီး ချယ်လ်ဆီးအသင်းကို ကိုင်တွယ်နေတဲ့ နည်းပြရိုစီနီယာဟာ အသင်းကို ၅ ပွဲ ကိုင်တွယ်ထားတာမှာ ၄ ပွဲ အနိုင်ရရှိထားတာပါ။

ချယ်လ်ဆီးအသင်းဟာ အပယ်ခံ ကစားသမားဖြစ်တဲ့ စတာလင်ရဲ့ စာချုပ်ကို အဆုံးသတ်ဖို့ရှိနေပြီး နည်းပြ ရိုစီနီယာက သူ့ကို အလွန်လေးစားပေမယ့် အခုအချိန်မှာ သူ့ရဲ့အခြေအနေအကြောင်းကို မပြောချင်ဘူးလို့ ဖွင့်ဟခဲ့ပါတယ်။ 

စတာလင်ဟာ ချယ်လ်ဆီးအသင်းအတွက် ၂၀၂၃-၂၄ ရာသီမှာ နောက်ဆုံး ပါဝင်ကစားခဲ့တာဖြစ်ပြီး မနှစ်က ရာသီမှာ အာဆင်နယ်အသင်းထံ အငှားသွားကစားခဲ့တာဖြစ်ပါတယ်။ 

Source: ESPN

CNI Sport News

၂၀၂၆ ခုနှစ်၊ ဇန်နဝါရီ ၂၇

ရီးရယ်လ်အသင်းကနေ အငှားနဲ့ပြောင်းရွှေ့လာခဲ့တဲ့ ဘရာဇီးလ်တိုက်စစ်မှူး အန်းဒရစ်ဟာ မက်ဇ်အသင်းကို ၅ ဂိုး-၂ ဂိုးနဲ့ အနိုင်ရခဲ့တဲ့ပွဲမှာ လိုင်ယွန်အသင်းအတွက် ဟက်ထရစ် သွင်းပြီးနောက် ဒါက အစပဲရှိသေးတယ်လို့ ပြောခဲ့ပါ တယ်။ 

အန်းဒရစ်က “ဒါက ကျနော့်ဘဝရဲ့ ပထမဆုံး ဟက်ထရစ်ဖြစ်ပြီး ကျနော် အလွန်ပျော်ပါတယ်။ ဒီဘောလုံးကို ကျနော် ထိန်းသိမ်းထားမှာဖြစ်ပြီး ကျနော့်ဘဝရဲ့ မယုံနိုင်စရာနေ့ တစ်နေ့ပါပဲ။ လီဂူး-၁ မှာ ကစားရတာက အလွန် ကောင်းပြီး လိုင်ယွန်အသင်းထံ ရောက်လာတာက အမှားမဟုတ်ပါဘူး။ ဘဝက ဒီလိုပဲဖြစ်ပြီး ကျနော့်ဘဝက အမြဲတမ်း ခက်ခဲခဲ့ပါတယ်။ ကျနော့် ပတ်ဝန်းကျင်က လူတွေဆီကနေ ရတဲ့ခွန်အားတွေကြောင့် သန်မာနေတာ ဖြစ်ပြီး ဒါက အစပဲရှိသေးတယ်”လို့ ပြောခဲ့ပါတယ်။ 

အန်းဒရစ်ဟာ ရီးရယ်လ်အသင်းမှာ ပွဲကစားချိန် မိနစ်တွေရဖို့ အလွန်ခက်ခဲခဲ့တာကြောင့် ဇန်နဝါရီ အပြောင်းအရွှေ့ မှာ လိုင်ယွန်အသင်းထံ ရာသီကုန်အထိ အငှားနဲ့ပြောင်းရွှေ့လာခဲ့တာပါ။

အန်းဒရစ်ဟာ လိုင်ယွန်အသင်းအတွက် ၃ ပွဲသာ ပါဝင်ကစားရသေးပေမယ့် ၄ ဂိုးသွင်းပြီး ဂိုးဖန်တီးမှု ၁ ကြိမ် ပြုလုပ်ထားပါတယ်။

အန်းဒရစ်ကိုတွေ့ရစဉ်

လိုင်ယွန်အသင်းထံ မပြောင်းရွှေ့မီမှာ ဘရာဇီးလ်အသင်း နည်းပြ အန်ဆယ်လော့တီဆီကနေ အကြံရယူခဲ့တဲ့ အန်းဒရစ်က ဒီအသင်းမှာ ရှိနေရတာဟာ အလွန်ကံကောင်းတယ်လို့ ခံစားနေရပါတယ်။ 

အန်းဒရစ်ဟာ လိုင်ယွန်အသင်းမှာ ပြသနေတဲ့ လက်ရှိပုံစံကို ဆက်ထိန်းနိုင်ရင် ၂၀၂၆ ကမ္ဘာ့ဖလားပြိုင်ပွဲမှာ ဘရာဇီးလ်အသင်း လူစာရင်းထဲ ပါဝင်ခွင့်ရဖို့ မျှော်လင့်ချက် ရှိနေပါတယ်။ 

ဘရာဇီးလ်အသင်းနည်းပြ အန်ဆယ်လော့တီက ကစားသမားတွေ အနေနဲ့ ကမ္ဘာ့ဖလား လူစာရင်းထဲ ပါဝင်ချင်ရင် ပုံမှန်ကစားခွင့် ရဖို့လိုသလို ကြံ့ခိုင်မှုပိုင်း အကောင်းဆုံးဖြစ်ဖို့ လိုတယ်လို့ ပြောထားပါတယ်။ 

အသက် ၁၉ နှစ်အရွယ်ရှိ အန်းဒရစ်ဟာ ဘရာဇီးလ်အသင်းအတွက် ၁၄ ပွဲ ကစားပြီး ၃ ဂိုးသွင်းယူထားကာ ၂၀၂၅ ခုနှစ်ထဲမှာ ၁ ပွဲသာ ကစားခွင့်ရခဲ့တာဖြစ်ပါတယ်။ 

Source: ESPN