CNI Sport News

၂၀၂၅ ခုနှစ်၊ ဇူလိုင် ၇

မက္ကဆီကိုအသင်း တိုက်စစ်မှူး ဂျီမီနက်ဇ်ဟာ ကွန်ကာကပ်ဖ် ရွှေဖလားဗိုလ်လုပွဲမှာ အသင်းအတွက် သွင်းဂိုး သွင်းယူပြီးနောက် ကွယ်လွန်သွားခဲ့တဲ့ အသင်းဖော်ဟောင်း ဂျိုတာရဲ့ အောင်ပွဲခံတဲ့ပုံစံ ပြုလုပ်သွားခဲ့ပါတယ်။

၂၀၂၅ ကွန်ကာကပ်ဖ် ရွှေဖလားဗိုလ်လုပွဲအဖြစ် ယှဉ်ပြိုင်ခဲ့တဲ့ မက္ကဆီကိုအသင်းနဲ့ အမေရိကန်အသင်းတို့ ပွဲစဉ်မှာ မက္ကဆီကိုအသင်းက ၂ ဂိုး-၁ ဂိုးနဲ့ အနိုင်ရပြီး ချန်ပီယံဆုကို ရယူနိုင်ခဲ့တာပါ။ 

မက္ကဆီကိုအသင်း တိုက်စစ်မှူးဂျီမီနက်ဇ်ဟာ ဒီပွဲမှာအသင်းအတွက် အဖိုးတန် ချေပဂိုး သွင်းယူပြီးနောက် ဂျိုတာရဲ့ နံပါတ် ၂၀ နဲ့ နာမည်ပါအင်္ကျီကို မြက်ခင်းပေါ်ချကာ ဂျိုတာရဲ့နာမည်ကြီးအောင်ပွဲခံပုံစံဖြစ်တဲ့ ဂိမ်းကစားနေတဲ့ ပုံစံ ပြု လုပ်ခဲ့တာ ဖြစ်ပါတယ်။

ဂျီမီနက်ဇ်ဟာ ဒီပွဲကစားဖို့ ကွင်းထဲဝင်ရောက် လာချိန်မှာလည်း ဒီအင်္ကျီကိုဝတ်ဆင်ပြီး ဝင်ရောက်လာခဲ့တာပါ။

ဂျီမီနက်ဇ်နဲ့ ဂျိုတာတို့ဟာ ပရီးမီးယားလိဂ် ကလပ်ဝုလ်ဗ်စ် အသင်းမှာ အသင်းဖော်တွေအဖြစ် ၂၀၁၈ ကနေ ၂၀၂၀ ခုနှစ်အထိ နှစ်ရာသီကြာ တွဲကစားခဲ့တာဖြစ်ပါတယ်။

ဂျီမီနက်ဇ်က ဂျိုတာဟာ အလွန်ကောင်းမွန်တဲ့ အသင်းဖော်ဖြစ်ပြီး သူတို့နှစ်ဦးဟာ အလွန်လှပတဲ့ အခိုက်အတန့် တွေကို မျှဝေခဲ့တယ်လို့ ဗိုလ်လုပွဲမတိုင်မီ ပွဲကြိုမီဒီယာတွေ့ဆုံမှုမှာ ပြောထားတာပါ။ 

ဂျီမီနက်ဇ်ကို တွေ့ရစဉ် 

လီဗာပူးလ်နဲ့ ပေါ်တူဂီကစားသမား ဂျိုတာဟာ ဇူလိုင် ၃ ရက်က စပိန်နိုင်ငံ၊ ဇာမိုရာအနီးမှာ သူ့ရဲ့ညီဖြစ်သူ အန်ဒရီနဲ့အတူ ယာဉ်မတော်တဆမှုကြောင့် ကွယ်လွန်ခဲ့တာဖြစ်ပါတယ်။

မက္ကဆီကိုအသင်းဟာ အမေရိကန်အသင်းနဲ့ ကွန်ကာကပ်ဖ် ရွှေဖလားဗိုလ်လုပွဲမှာ ဦးဆောင်ဂိုး သွင်းယူခြင်း ခံခဲ့ရပေမယ့် ဂျီမီနက်ဇ်က ချေပဂိုးသွင်းပြီး အယ်လ်ဗာရက်ဇ်က အနိုင်ဂိုး သွင်းယူနိုင်ခဲ့တာကြောင့် ချန်ပီယံဆုကို ရရှိခဲ့တာပါ။ 

မက္ကဆီကိုအသင်းဟာ ကွန်ကာကပ်ဖ် ရွှေဖလားချန်ပီယံဆုကို ၁၀ ကြိမ်မြောက် ရယူနိုင်ခဲ့သလို ၂ ကြိမ်ဆက် ရယူနိုင်ခဲ့တာလည်း ဖြစ်ပါတယ်။ 

၂၀၂၅ ကွန်ကာကပ်ဖ် ရွှေဖလားပြိုင်ပွဲရဲ့ အကောင်းဆုံး ကစားသမားဆုကို မက္ကဆီကိုအသင်းက အယ်လ်ဗာရက်ဇ်၊ အကောင်းဆုံး ဂိုးသမားဆုကို မက္ကဆီကိုအသင်းက မာလာဂွန်နဲ့ ဂိုးသွင်း အများဆုံး ကစားသမားဆုကို ပနားမား အသင်းက အစ္စမေးလ်ဒီယက်ဇ်က ၆ ဂိုးနဲ့ ရရှိခဲ့ပါတယ်။ 

Source: ESPN

လာအိုကလပ်နဲ့ ရှမ်းယူနိုက်တက် ယှဉ်ပြိုင်ရမည် 

CNI Sport News

၂၀၂၅ ခုနှစ်၊ ဇူလိုင် ၅

မြန်မာနေရှင်လိဂ် ချန်ပီယံ ရှမ်းယူနိုက်တက်အသင်းဟာ AFF Shopee Cup 2025-26 ပြိုင်ပွဲကို ခြေစစ်ပွဲအဆင့် ကနေ စတင်ရမှာဖြစ်ပြီး လာအိုကလပ် EZRA FC အသင်းနဲ့ ယှဉ်ပြိုင်ရမှာဖြစ်ပါတယ်။

ခြေစစ်ပွဲအဆင့်ကို နှစ်ကျော့ ကစားရမှာဖြစ်ပြီး ပထမအကျော့အဖြစ် သြဂုတ် ၈ ရက်မှာ လာအိုနိုင်ငံ သွားရောက် ယှဉ်ပြိုင်ရမှာဖြစ်ပြီး ဒုတိယအကျော့ကို သြဂုတ် ၁၅ ရက် သုဝဏ္ဏကွင်းမှာ ယှဉ်ပြိုင်ရမှာပါ။ 

ဒီပွဲအနိုင်ရရှိတဲ့ အသင်းဟာ အုပ်စု B မှာ ထိုင်းကလပ် ဘန်ကောက် ယူနိုက်တက်၊ မလေးရှားကလပ် ဂျိုဟိုးလ် ဒါရူးလ်၊ ဗီယက်နမ်ကလပ် နမ်ဒင်း၊ စင်္ကာပူကလပ် လိုင်းယွန်းစီးတီး၊ ဖိလစ်ပိုင်ကလပ် PKR ဆာဗေးအသင်းနဲ့ ယှဉ်ပြိုင်ရမှာဖြစ်ပါတယ်။

အုပ်စု A မှာတော့ ထိုင်းကလပ် ဘူရီယမ်၊ ဘီဂျီပသန်ယူနိုက်တက်၊ မလေးရှားကလပ် ဆီလန်ဂေါ၊ ဗီယက်နမ် ကလပ် ဟနွိုင်း၊ စင်္ကာပူကလပ် တန်ပိုင်းစ်ရိုဗာစ်အသင်းတို့နဲ့ ခြေစစ်ပွဲအဆင့်က အနိုင်ရတဲ့အသင်းတို့ တစ်အုပ်စု တည်း ကျရောက်နေတာပါ။

ဒီအုပ်စု A အတွက် ခြေစစ်ပွဲအဖြစ် ဘရူနိုင်းကလပ် ကာဆူကာနဲ့ ဖိလစ်ပိုင်ကလပ် ဆီဘူးအသင်းတို့ ယှဉ်ပြိုင်ရမှာ ဖြစ်ပါတယ်။ 

အုပ်စုအဆင့်ပွဲတွေကို ၂၀၂၅ ခုနှစ်၊ သြဂုတ်ကနေ ၂၀၂၆ ခုနှစ်၊ ဖေဖော်ဝါရီအထိ ယှဉ်ပြိုင်သွားမှာပါ။

ရှမ်းယူနိုက်တက်အသင်းဟာ ပြီးခဲ့တဲ့ရာသီက AFF Shopee Cup ပြိုင်ပွဲမှာ အုပ်စုပွဲစဉ် ၅ ပွဲကစားပြီး ၅ ပွဲစလုံး အရေးနိမ့်ကာ အုပ်စုကနေ ထွက်ခွာခဲ့ရတာ ဖြစ်ပါတယ်။

CNI Sport News

၂၀၂၅ ခုနှစ်၊ ဇူလိုင် ၆

မန်စီးတီးအသင်း နောက်ခံလူ ဝေါ်လ်ကာဟာ ပရီးမီးယားလိဂ် တန်းတက်ကလပ် ဘန်လေအသင်းထံ ပြောင်းရွှေ့ကြေး ပေါင် ၅ သန်းကျော်နဲ့ ပြောင်းရွှေ့ခဲ့ပြီလို့ ဗြိတိန်မီဒီယာတွေက ဖော်ပြထားပါတယ်။

လာမယ့် ရာသီကုန်ရင် မန်စီးတီးအသင်းနဲ့ စာချုပ်ကုန်ဆုံးမယ့် ဝေါ်လ်ကာဟာ ဖီနာဘာချီအသင်း အပါအဝင် အသင်းအချို့ရဲ့ စိတ်ဝင်စားမှုကို ခံခဲ့ရပေမယ့် ပရီးမီးယားလိဂ်မှာ ဆက်ရှိနေဖို့ ဆုံးဖြတ်ခဲ့တာပါ။

ဝေါ်လ်ကာဟာ စပါးအသင်းမှာ ကစားခဲ့ချိန်က အသင်းဖော်တွေအဖြစ် ရှိခဲ့တဲ့ ဘန်လေအသင်းနည်းပြ စကော့ပါ ကားနဲ့ ပြန်လည်ပြီး အတူတွဲ အလုပ်လုပ်ရတော့မှာ ဖြစ်ပါတယ်။ 

အသက် ၃၅ နှစ်အရွယ်ရှိ ဝေါ်လ်ကာဟာ ဘန်လေအသင်းနဲ့ ၂ နှစ် စာချုပ်ချုပ်ဆိုမှာပါ။

ဝေါ်လ်ကာဟာ ဘန်လေအသင်းရဲ့ပွဲ ၇၀ ရာခိုင်နှုန်းကို ပါဝင်ကစားပြီး အသင်းဟာ ပရီးမီးယားလိဂ်မှာ ဆက်ပြီး ရှိနေမယ်ဆိုရင် မန်စီးတီးအသင်းကို ပြောင်းရွှေ့ကြေးပေါင် ၅ သန်းကျော် ပေးချေရမယ်လို့ သိရပါတယ်။ 

ဝေါ်လ်ကာကို တွေ့ရစဉ် 

အင်္ဂလန်နောက်ခံလူဟာ ပြီးခဲ့တဲ့ဇန်နဝါရီ အပြောင်းအရွှေ့က အေစီမီလန်အသင်းမှာ အငှားနဲ့သွားရောက် ကစားခဲ့ပြီး ပြိုင်ပွဲစုံ ၁၆ ပွဲ ပါဝင်ကစားခဲ့ပေမယ့် အသင်းက သူ့ကို အပြီးသတ် မခေါ်ယူခဲ့တာပါ။ 

ဝေါ်လ်ကာဟာ မန်စီးတီးအသင်းရဲ့ ဖီဖာကလပ် ကမ္ဘာ့ဖလား လူစာရင်းမှာလည်း ချန်လှပ်ခံရတဲ့အတွက် အသင်းသစ် ရှာဖွေနေခဲ့တာဖြစ်ပါတယ်။

ဝေါ်လ်ကာအနေနဲ့ ဘန်လေအသင်းထံ အပြောင်းအရွှေ့ အပြီးသတ်နိုင်ခဲ့ရင် မန်စီးတီးအသင်းမှာ ၈ နှစ်ကြာ ရှိခဲ့တာကို အဆုံးသတ်ရတော့မှာပါ။

ဝေါ်လ်ကာဟာ မန်စီးတီးအသင်းနဲ့ ပရီးမီးယားလိဂ်ဖလား ၆ ကြိမ်၊ ချန်ပီယံလိဂ်ဖလား ၁ ကြိမ် အပါအဝင် ဆုဖလားပေါင်း ၁၇ ခုအထိ ရယူနိုင်ခဲ့တာ ဖြစ်ပါတယ်။

ဘန်လေအသင်းဟာ ဒီနွေရာသီ အပြောင်းအရွှေ့မှာ တွမ်ဇီဘီ၊ ဟာ့တ်မန်း၊ မတ်ဇ်ဝီးစ်နဲ့ တီချာအိုနာတို့ကို ခေါ်ယူထားပြီး ဝေါ်လ်ကာဟာ အသင်းရဲ့ ၅ ဦးမြောက် ကစားသမားခေါ်ယူမှု ဖြစ်လာမှာပါ။

ဘန်လေအသင်းဟာ ရာသီသစ် ပရီးမီးယားလိဂ် အဖွင့်ပွဲစဉ်အဖြစ် စပါးအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ ဇူလိုင် ၅

ချယ်လ်ဆီးအသင်းဟာ ဖီဖာကလပ်ကမ္ဘာ့ဖလား ကွာတားဖိုင်နယ် ပွဲစဉ်မှာ ပါလ်မီးရပ်စ်အသင်းကို ၂ ဂိုး-၁ ဂိုးနဲ့ အနိုင်ရပြီး ဆီမီးဖိုင်နယ်ကို တက်နိုင်ခဲ့ပါတယ်။ 

ဒီပွဲရဲ့ပထမပိုင်းမှာ ချယ်လ်ဆီးအသင်းဟာ ကိုးလ်ပါမားရဲ့ သွင်းဂိုးနဲ့ ဦးဆောင်နိုင်ခဲ့ပြီး ဒုတိယပိုင်းမိနစ် ၅၀ ကျော် မှာ အီစတီဗာအိုက ပါလ်မီးရပ်စ်အသင်းအတွက် ချေပဂိုး ပြန်သွင်းယူနိုင်ခဲ့တာပါ။ 

အီစတီဗာအိုဟာ ဖီဖာကလပ် ကမ္ဘာ့ဖလား ပြိုင်ပွဲအပြီးမှာ ချယ်လ်ဆီးအသင်းနဲ့ ပူးပေါင်းမှာဖြစ်ပြီး မပူးပေါင်းမီမှာ သွင်းဂိုးသွင်းယူနိုင်ခဲ့တာ ဖြစ်ပါတယ်။ 

ဒီပွဲရဲ့မိနစ် ၈၀ ကျော်မှာ ချယ်လ်ဆီးအသင်း အနိုင်ဂိုးရခဲ့ပြီး ဂတ်စ်တို့ရဲ့ ကန်သွင်းမှုကို ပါလ်မီးရပ်စ်အသင်း ဂိုးသမား ဝီဗာတန်ရဲ့ဖမ်းရာမှာ ကိုယ့်ဂိုးကိုယ် သွင်းယူမိသလို ဖြစ်ခဲ့တာပါ။

ချယ်လ်ဆီး ကစားသမားနဲ့ ပြိုင်ဘက်ကစားသမားကိုတွေ့ရစဉ်

အဲဒါကြောင့် ချယ်လ်ဆီးအသင်းဟာ ပါလ်မီးရပ်စ်အသင်းကို ၂ ဂိုး-၁ ဂိုးနဲ့ အနိုင်ရပြီး ၂၀၂၅ ဖီဖာကလပ် ကမ္ဘာ့ဖလားပြိုင်ပွဲ ဆီမီးဖိုင်နယ်ကို တက်နိုင်ခဲ့တာ ဖြစ်ပါတယ်။

ဒီပွဲမတိုင်မီ ကစားခဲ့တဲ့ ဖလူမင်နန်စီအသင်းနဲ့ အယ်လ်ဟီလယ်အသင်းတို့ရဲ့ ဖီဖာကလပ်ကမ္ဘာ့ဖလား ကွာတား ဖိုင်နယ် ပွဲစဉ်မှာ ဖလူမင်နန်စီအသင်းက ၂ ဂိုး-၁ ဂိုးနဲ့ အနိုင်ရရှိခဲ့တာပါ။

အဲဒါကြောင့် ချယ်လ်ဆီးနဲ့ ဖလူမင်နန်စီအသင်းဟာ ဖီဖာကလပ်ကမ္ဘာ့ဖလား ဆီမီးဖိုင်နယ်အဖြစ် ထိပ်တိုက် တွေ့ဆုံရမှာဖြစ်ပါတယ်။

ချယ်လ်ဆီးနဲ့ ဖလူမင်နန်စီအသင်းရဲ့ ဖီဖာကလပ် ကမ္ဘာ့ဖလား ဆီမီးဖိုင်နယ်ပွဲစဉ်ကို ဇူလိုင် ၈ ရက်မှာ ယှဉ်ပြိုင် သွားမှာပါ။ 

ဖီဖာကလပ် ကမ္ဘာ့ဖလား နောက်ထပ် ကွာတားဖိုင်နယ် ပွဲစဉ်တွေအဖြစ် PSG နဲ့ ဘိုင်ယန်မြူးနစ်၊ ရီးရယ်လ်နဲ့ ဒေါ့မွန်အသင်းတို့ ယှဉ်ပြိုင်ကြမှာ ဖြစ်ပါတယ်။

Source: Dailymail

CNI Sport News

၂၀၂၅ ခုနှစ်၊ ဇူလိုင် ၅

ယူနိုက်တက်အသင်းဟာ ရက်ရှ်ဖို့ဒ်၊ ဂါနာချို၊ အန်တိုနီ၊ ဆန်ချိုနဲ့ မာလာစီယာတို့ကို အသင်းသစ် ရှာဖွေရာမှာ အဆင်ပြေနိုင်စေဖို့အတွက် အသင်းရဲ့ရာသီကြို လေ့ကျင့်မှု အစီအစဉ်ကို နောက်ကျပြီးမှ လာရောက်ပူးပေါင်းဖို့ ခွင့်ပြုခဲ့ပါတယ်။

သူတို့ ၅ ဦးစလုံးဟာ ဒီနွေရာသီ အပြောင်းအရွှေ့မှာ အသင်းကနေ ထွက်ခွာချင်တဲ့ အကြောင်းကို ယူနိုက်တက် အသင်းထံ အသိပေး အကြောင်းကြားထားတာပါ။ 

ယူနိုက်တက်အသင်းဟာ တနင်္လာနေ့မှာ ရာသီကြို လေ့ကျင့်မှုတွေစတင်ဖို့ စီစဉ်ထားတာဖြစ်ပါတယ်။ 

ဒါပေမယ့် ယူနိုက်တက်အသင်းဟာ သူတို့ ၅ ဦးကို အပြောင်းအရွှေ့ကိစ္စတွေ စီစဉ်နိုင်ဖို့အတွက် အသင်းနဲ့ နောက်ကျပြီးမှ ပူးပေါင်းခွင့်ပြုခဲ့တာပါ။ 

သူတို့တွေအနေနဲ့ အပြောင်းအရွှေ့ကိစ္စတွေ အကောင်အထည်ဖော်နိုင်ခြင်း မရှိဘူးဆိုရင် ဇူလိုင်လကုန်ပိုင်းမှာ အသင်းထံ ပြန်လည်သတင်းပို့ပြီး လေ့ကျင့်ခန်း အစီအစဉ်တွေမှာ ပါဝင်ရဖို့ရှိနေတာ ဖြစ်ပါတယ်။ 

ဂါနာချိုကို တွေ့ရစဉ် 

ယူနိုက်တက်အသင်း နည်းပြအာမိုရင်ဟာ အသင်းကို ကြီးမားတဲ့ အောင်မြင်မှုတွေ ရယူပေးချင်နေတာကြောင့် စိန်ခေါ်မှု အပြည့်အဝရှိပြီး စည်းလုံးတဲ့အသင်းကို လိုချင်နေတာပါ။

ပြီးခဲ့တဲ့ ဇန်နဝါရီ အပြောင်းအရွှေ့မှာ အက်စတွန်ဗီလာအသင်းထံ အငှားနဲ့ သွားရောက်ကစားခဲ့တဲ့ ရက်ရှ်ဖို့ဒ်ဟာ သူ့ရဲ့ကျောနံပါတ် ၁၀ ကို ဆုံးရှုံးမယ်လို့ ယူနိုက်တက်အသင်းရဲ့ ပြောကြားမှုကို ခံထားရပါတယ်။

ယူနိုက်တက်အသင်းဟာ ဝုလ်ဗ်စ်အသင်းကနေ ခေါ်ယူခဲ့တဲ့ ကစားသမားသစ် ကွန်ညာကို ကျောနံပါတ် ၁၀ ပေး ဝတ်သွားမှာ ဖြစ်ပါတယ်။ 

အန်တိုနီနဲ့ မာလာစီယာတို့ဟာ ပြီးခဲ့တဲ့ဇန်နဝါရီက ယူနိုက်တက်အသင်းကနေ ထွက်ခွာပြီး ဘက်တစ်နဲ့ PSV အသင်းတွေမှာ အငှားနဲ့ သွားရောက်ကစားခဲ့ပြီး ဆန်ချိုက ချယ်လ်ဆီးအသင်းထံ ရာသီကုန်အထိ အငှားနဲ့ ကစားခဲ့ တာပါ။

ချယ်လ်ဆီးအသင်းက သူ့ကို အပြီးသတ် မခေါ်ယူခဲ့တာကြောင့် သူဟာ ယူနိုက်တက်အသင်းထံ ပြန်လာရမှာ ဖြစ်ပါတယ်။

ယူနိုက်တက်အသင်းဟာ အမေရိကန်နိုင်ငံကို ရာသီကြို ခြေစမ်းပွဲ ခရီးမထွက်ခွာမီ ပထမဆုံးခြေစမ်းပွဲအဖြစ် ဇူလိုင် ၁၉ ရက်မှာ လိဒ်စ်အသင်းနဲ့ ယှဉ်ပြိုင်မှာဖြစ်ပါတယ်။ 

Source: ESPN 

CNI Sport News

၂၀၂၅ ခုနှစ်၊ ဇူလိုင် ၄

မိုနာကိုအသင်း ကစားသမားသစ်အဖြစ် တရားဝင် မိတ်ဆက်တဲ့ အခမ်းအနားမှာ ပေါ့ဘာက သူဟာ ပြင်သစ် လက်ရွေးစင် အသင်းအတွက် ပြန်ပါဝင်နိုင်ဖို့ မျှော်လင့်ထားပေမယ့် လုပ်ငန်းစဉ်တွေအတွက် အဆင့်တွေရှိတယ်လို့ ပြောခဲ့ပါတယ်။ 

ပေါ့ဘာက “ပြင်သစ် ဘောလုံးသမားတိုင်းရဲ့ ဆန္ဒက ပြင်သစ်လက်ရွေးစင် အသင်းအတွက် ကိုယ်စားပြုပါဝင်ဖို့ပါ။ ဒါပေမယ့်လည်း ပါဝင်ခွင့်ရဖို့ အဆင့်တွေရှိပါတယ်။ ဒီနေ့မှာတော့ ကျနော်ဟာ အဆင့်တစ်ဆင့်ကို ရောက်ရှိ နေပါပြီ။ ကျနော်ကောင်းမွန်တဲ့ စွမ်းဆောင်ရည်တွေပြသပြီး ပြင်သစ်လက်ရွေးစင်အသင်းထဲ ပြန်ပါဝင်ခွင့်ရအောင် လုပ်မှာပါ”လို့ ပြောခဲ့တာပါ။ 

တားမြစ်ဆေးသုံးစွဲမှုကြောင့် ၁၈ လကြာ ပွဲပယ်ပြစ်ဒဏ် ကျခံခဲ့ရတဲ့ ယူနိုက်တက်နဲ့ ဂျူဗင်တပ်စ်အသင်း ကွင်းလယ်လူဟောင်း ပေါ့ဘာဟာ ပြင်သစ်လီဂူး-၁ ကလပ် မိုနာကိုအသင်းနဲ့ ၂ နှစ် စာချုပ်ချုပ်ဆိုခဲ့တာ ဖြစ်ပါတယ်။ 

ပြင်သစ်လက်ရွေးစင် အသင်းအတွက် ၉၁ ပွဲ ပါဝင်ကစားထားပြီး ၂၀၁၈ ကမ္ဘာ့ဖလား ချန်ပီယံဆု ရယူနိုင်ခဲ့တဲ့ ပေါ့ဘာဟာ ၂၀၂၂ ခုနှစ်က နိုင်ငံအသင်းအတွက် နောက်ဆုံး ပါဝင်ကစားထားတာပါ။ 

 ပေါ့ဘာကိုတွေ့ရစဉ်

ပေါ့ဘာဟာ ပြင်သစ် လက်ရွေးစင်အသင်းအတွက် ပြန်ပါဝင် ကစားပေးချင်တာကြောင့် ဆော်ဒီပရိုလိဂ်ရဲ့ မက်လောက်စရာ ကမ်းလှမ်းမှုကို ငြင်းပယ်ခဲ့ပြီး လာမယ့်ရာသီ ချန်ပီယံလိဂ်ပြိုင်ပွဲ ယှဉ်ပြိုင်ခွင့်ရရှိထားတဲ့ မိုနာကို အသင်းကို ပြောင်းရွှေ့ဖို့ ရွေးချယ်ခဲ့တာ ဖြစ်ပါတယ်။ 

ပေါ့ဘာဟာ သူ့ကို ယုံကြည်မှုရှိတဲ့ မိုနာကိုအသင်းကို ကျေးဇူးတင်ပြီး အသင်းအတွက် အကောင်းဆုံး ကြိုးစားပေး သွားမယ်လို့ စာချုပ်ပေါ်မှာ လက်မှတ်ရေးထိုးချိန် ပြောခဲ့တာပါ။ 

မိုနာကိုအသင်းဟာ ဒီနွေရာသီ အပြောင်းအရွှေ့မှာ ပေါ့ဘာအပြင် စပါးနဲ့ ဘိုင်ယန်မြူးနစ်အသင်း နောက်ခံလူ ဟောင်း ဒိုင်ယာနဲ့ ဘာစီလိုနာအသင်း တိုက်စစ်မှူး အန်ဆုဖာတီကို အငှားနဲ့ ခေါ်ယူခဲ့တာဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဇူလိုင် ၄

ဆော်ဒီပရိုလိဂ်ကလပ် အယ်လ်နာဆာအသင်းဟာ နွေရာသီ အပြောင်းအရွှေ့မှာ အသင်းကနေ ထွက်ခွာမယ့် ကိုလံဘီယာ တိုက်စစ်မှူး ဒူရန်ရဲ့နေရာမှာ အာဆင်နယ်အသင်း တောင်ပံကစားသမား မာတင်နယ်လီကို အစားထိုးခေါ်ယူဖို့ စိတ်ဝင်စားနေတာ ဖြစ်ပါတယ်။ 

ရာသီသစ်မတိုင်မီ အသင်းရဲ့လူစာရင်းကို အားကောင်းအောင် ပြုလုပ်ချင်နေတဲ့ အယ်လ်နာဆာအသင်းဟာ လီဗာပူးလ်အသင်း တောင်ပံကစားသမား လူးဝစ်ဒီယက်ဇ်ကို ခေါ်ယူဖို့ကြိုးပမ်းခဲ့ပေမယ့် အဆင်ပြေမှုမရှိခဲ့တာပါ။ 

အဲဒါကြောင့် အယ်လ်နာဆာအသင်းဟာ အာဆင်နယ်အသင်း တောင်ပံကစားသမား မာတင်နယ်လီကို ခေါ်ယူဖို့ ပစ်မှတ်ထားလာခဲ့ပြီး ကြီးမားတဲ့ ပြောင်းရွှေ့ကြေးနဲ့ ကမ်းလှမ်းမှုပြုလုပ်ဖို့ ပြင်ဆင်နေတာ ဖြစ်ပါတယ်။

ပြီးခဲ့တဲ့ ဇန်နဝါရီကမှ အက်စတွန်ဗီလာအသင်းကနေ ရောက်ရှိလာခဲ့တဲ့ ဒူရန်ဟာ ဖီနာဘာချီအသင်းထံ အငှားနဲ့ ပြောင်းရွှေ့ဖို့ စီစဉ်ထားတာပါ။

အယ်လ်နာဆာအသင်းဟာ မာတင်နယ်လီကို ခန့်မှန်းခြေယူရို ၈၅ သန်းနဲ့ ကမ်းလှမ်းမှုပြုလုပ်ပြီး အာဆင်နယ် အသင်းကို စမ်းသပ်ဖို့ ဆန္ဒရှိနေတာ ဖြစ်ပါတယ်။ 

အာဆင်နယ်အသင်းဟာ မာတင်နယ်လီကို ချက်ချင်း ထွက်ခွာခွင့်ပြုဖို့ ရည်ရွယ်ထားခြင်း မရှိပေမယ့် ဒီကမ်းလှမ်းမှု ပမာဏကြောင့် ဆွေးနွေးညှိနှိုင်းမှုတွေ ပြုလုပ်ဖို့ တံခါးဖွင့် ပေးနိုင်ဖွယ်ရှိနေတာပါ။

ဒူရန်ကို တွေ့ရစဉ်

အာဆင်နယ်အသင်းဟာ တောင်ပံတိုက်စစ် ကစားသမားတွေဖြစ်တဲ့ ရီးရယ်လ်အသင်းက ရိုဒရီဂိုနဲ့ နယူးကာဆယ် အသင်းက ဂေါ်ဒွန်တို့ကိုလည်း ချိတ်ဆက်မှုတွေ ပြုလုပ်ထားပါတယ်။ 

မာတင်နယ်လီကို ရောင်းချတာကနေ ရရှိလာမယ့် ပြောင်းရွှေ့ကြေးဟာ ဒီကစားသမား ၂ ဦးထဲက ၁ ဦးကို ခေါ်ယူနိုင်ဖို့ အထောက်အကူ ဖြစ်လာနိုင်တာပါ။ 

အယ်လ်နာဆာအသင်းဟာ ဝက်စ်ဟမ်းအသင်းက ကူဒက်စ်နဲ့ လေဗာကူဆင်အသင်းက ဘိုနီဖေ့စ်တို့ကို ခေါ်ယူနိုင် ဖို့လည်း စဉ်းစားနေပါတယ်။ 

အယ်လ်နာဆာအသင်းဟာ ပြီးခဲ့တဲ့ရာသီက ဆုဖလားအောင်မြင်မှု မရရှိခဲ့တာကြောင့် ရာသီသစ်မှာ အောင်မြင်မှု ရယူနိုင်ဖို့ ထိပ်တန်းအဆင့် ကစားသမားတွေကို ခေါ်ယူနိုင်ဖို့ ကြိုးပမ်းနေတာပါ။

အယ်လ်နာဆာအသင်းဟာ အယ်လ်ဟီလယ်အသင်းကို ဆုဖလား အောင်မြင်မှုတွေ ရရှိအောင် ကိုင်တွယ်ပေး နိုင်ခဲ့တဲ့ ဂျော့ချ်ဂျီးဆပ်ကိုလည်း နည်းပြသစ်အဖြစ် ခန့်အပ်ထားတာဖြစ်ပါတယ်။

Source: Goal

CNI Sport News

၂၀၂၅ ခုနှစ်၊ ဇူလိုင် ၄

ဒေါ့မွန်အသင်းက အင်္ဂလန်တောင်ပံ ကစားသမား ဂစ်တန်စ်ဟာ ချယ်လ်ဆီးအသင်းထံ ပြောင်းရွှေ့မယ်လို့ အတည်ပြု ထုတ်ပြန်ခဲ့ပါတယ်။

ချယ်လ်ဆီးအသင်းဟာ အသက် ၂၀ နှစ်အရွယ်ရှိ ဂစ်တန်စ်ကို ပေါင် ၅၅ သန်းနဲ့ ၇ နှစ် စာချုပ်ချုပ်ဆိုမှာပါ။ 

ချယ်လ်ဆီးနဲ့ ဒေါ့မွန်အသင်းတို့ဟာ ဖီဖာကလပ် ကမ္ဘာ့ဖလားပြိုင်ပွဲ ယှဉ်ပြိုင်နေတဲ့ အမေရိကန်နိုင်ငံမှာ ရှိနေ ကြတာဖြစ်ပြီး ကွာတားဖိုင်နယ်ပြိုင်ပွဲအတွက် ပြင်ဆင်မှုတွေ ပြုလုပ်နေကြတာ ဖြစ်ပါတယ်။ 

နှစ်သင်းစလုံးဟာ အမေရိကန်နိုင်ငံမှာ အပြောင်းအရွှေ့အတွက် သဘောတူညီမှုရရှိခဲ့ကာ အပြောင်းအရွှေ့ အပြီးသတ်နိုင်ဖို့ အချက်အနည်းငယ် ကျန်ရှိနေသေးတာဖြစ်ပါတယ်။ 

ဂစ်တန်စ်ဟာ ၂၀၂၀ ခုနှစ်က မန်စီးတီး လူငယ်အသင်းကနေ ဒေါ့မွန်လူငယ်အသင်းကို ရောက်ရှိလာခဲ့တာဖြစ်ပြီး ၂၀၂၂ ခုနှစ်မှာ အသင်းကြီးအတွက် စတင်ပွဲဦး ထွက်ခွင့်ရခဲ့တာပါ။ 

ဂစ်တန်စ်ဟာ ဒေါ့မွန်အသင်းအတွက် ပြိုင်ပွဲစုံ ၁၀၇ ပွဲ ပါဝင်ကစားထားပြီး ၁၇ ဂိုး သွင်းယူနိုင်ခဲ့ကာ မနှစ်က ရာသီမှာ ပြသခဲ့တဲ့ စွမ်းဆောင်ရည်ကြောင့် အသင်းကြီးတွေရဲ့ ပစ်မှတ်ဖြစ်လာခဲ့ပါတယ်။

ဒေါ့မွန်အသင်းယှဉ်ပြိုင်နေစဉ်

ဂစ်တန်စ်ကို ခေါ်ယူဖို့ ဘိုင်ယန်မြူးနစ်အသင်းကလည်း စိတ်ဝင်စားခဲ့ပေမယ့် ချယ်လ်ဆီးအသင်းက သူ့ကို ခေါ်ယူနိုင်ခဲ့တာပါ။ 

ချယ်လ်ဆီးအသင်းဟာ ပြီးခဲ့တဲ့ရာသီက ယူနိုက်တက်အသင်းကနေ အငှားနဲ့ လာရောက်ကစားခဲ့တဲ့ ဆန်ချိုကို အပြီးသတ် မဝယ်ယူခဲ့တာကြောင့် ဘယ်တောင်ပံနေရာကို အားကောင်းအောင် ပြုလုပ်ဖို့ ရှာဖွေခဲ့ပြီး အခုအချိန်မှာ ဂစ်တန်စ်ကို ခေါ်ယူနိုင်ခဲ့တာဖြစ်ပါတယ်။ 

ဂစ်တန်စ်ဟာ ဒေါ့မွန်အသင်းအတွက် ဖီဖာကလပ် ကမ္ဘာ့ဖလားပြိုင်ပွဲမှာ ပါဝင်ကစားနေတာကြောင့် ဒီပြိုင်ပွဲ ပြီးမှသာ ချယ်လ်ဆီးအသင်းအတွက် ပါဝင်ကစားနိုင်မှာပါ။ 

ချယ်လ်ဆီးအသင်းဟာ ဒီနွေရာသီ အပြောင်းအရွှေ့မှာ အစ်စဝှစ်ချ်အသင်းက ဒီလပ်၊ ဘရိုက်တန်အသင်းက ပက်ဒရို၊ စပို့တင်းလစ္စဘွန်းအသင်းက အက်ဆူဂို၊ စထရာဘောင်းအသင်းက မာမာဒူဆားတို့ကိုလည်း ခေါ်ယူ အားဖြည့်ထားတာ ဖြစ်ပါတယ်။

Source: ESPN

CNI Sport News

၂၀၂၅ ခုနှစ်၊ ဇူလိုင် ၄

လီဗာပူးလ်အသင်းဟာ ဇူလိုင် ၃ ရက်မှာ ယာဉ်မတော်တဆမှုနဲ့ ကွယ်လွန်ခဲ့တဲ့ ပေါ်တူဂီတိုက်စစ်မှူး ဂျိုတာရဲ့ ကျောနံပါတ် ၂၀ ကို အနားပေးကြောင်း အတည်ပြုခဲ့ပါတယ်။ 

အသက် ၂၈ နှစ်အရွယ်ရှိ ဂျိုတာနဲ့ အသက် ၂၆ နှစ် အရွယ်ရှိ ညီဖြစ်သူ အန်ဒရီတို့ စီးနင်းလာတဲ့ Lamborghini ကားဟာ စပိန်နိုင်ငံ၊ ဇာမိုရာမှာ ကားတစ်စီးကို ကျော်ဖြတ်ဖို့ ကြိုးစားရင်း ကားဘီးပေါက်ပြီး လမ်းချော်ကာ ကားမီး လောင်သွားခဲ့တာပါ။ 

အဲဒါကြောင့် ဂျိုတာတို့ ညီအစ်ကို နှစ်ဦးစလုံးဟာ ကားမတော်တဆမှုဖြစ်တဲ့ နေရာမှာပဲ ပွဲချင်းပြီး သေဆုံးသွားခဲ့ ကြတာ ဖြစ်ပါတယ်။ 

ဂျိုတာဟာ အသေးစား ခွဲစိတ်မှု ခံယူထားတာကြောင့် ဆရာဝန်တွေက သူ့ကို လေယာဉ်မစီးဖို့ အကြံပြုထားတဲ့ အတွက် လီဗာပူးလ်အသင်းရဲ့ ရာသီကြို လေ့ကျင့်ခန်း အစီအစဉ်ကို ပူးပေါင်းနိုင်အောင် သင်္ဘောဖယ်ရီစီးဖို့ သွားရောက်ခဲ့တာပါ။

ဒါပေမယ့် ဂျိုတာနဲ့ သူ့ရဲ့ညီဟာ ကံဆိုးပြီး ဖြစ်ရပ်ဆိုးနဲ့ ကြုံတွေ့သွားခဲ့ရတာ ဖြစ်ပါတယ်။ 

ဂျိုတာဟာ သူသေဆုံးမယ့် ရက်မတိုင်မီ ပြီးခဲ့တဲ့ ၁၁ ရက်ကမှ သူ့ရဲ့ချစ်သူဖြစ်သူ ကာဒိုဆိုနဲ့ လက်ထပ်ခဲ့တာဖြစ်ပြီး သူတို့နှစ်ဦးဟာ ကလေး ၃ ဦး ပိုင်ဆိုင်ထားတာပါ။

 ဂျိုတာ လွမ်းသူပန်းခွေ ချထားကြစဉ်

ဂျိုတာ သေဆုံးမှုအတွက် လီဗာပူးလ်အသင်းအပြင် ကမ္ဘာပေါ်မှာရှိတဲ့ အသင်းတွေ အများအပြားက ဝမ်းနည်း ကြောင်း ဖော်ပြခဲ့ကြပြီး လီဗာပူးလ်အသင်းဖော်တွေ၊ ပေါ်တူဂီအသင်းဖော်တွေနဲ့ ကစားသမား အများအပြား ကလည်း သူတို့ရဲ့ဝမ်းနည်းမှုတွေကို ဖော်ထုတ်ခဲ့ကြပါတယ်။

ပရိသတ်အများအပြားဟာ အန်ဖီးလ်ကွင်း အပြင်ဘက်မှာ လွမ်းသူပန်းခွေ၊ ပန်းစည်းတွေ၊ သူ့ရဲ့ဂျာစီတွေကို ထားပြီး ဂျိုတာအတွက် ဝမ်းနည်းခြင်း အထိမ်းအမှတ် ပြုလုပ်ခဲ့ကြတာပါ။ 

လီဗာပူးလ်အသင်းကလည်း အသင်းမှာ ဂျိုတာဝတ်ဆင်ခဲ့တဲ့ ကျောနံပါတ် ၂၀ ကို ဘယ်သူ့ကိုမှ ပေးဝတ်မှာ မဟုတ်တော့ဘဲ ထာဝရအနားပေးခဲ့ပါတယ်။

ဂျိုတာနဲ့ ညီဖြစ်သူ အန်ဒရီရဲ့ ဈာပန အခမ်းအနားကို စနေနေ့ကျရင် ပေါ်တူဂီနိုင်ငံ၊ ပေါ်တိုမှာ ပြုလုပ်သွားမယ်လို့ သိရပါတယ်။

ဂျိုတာဟာ ပါကို့စ်ဒီဖာရဲရားအသင်းမှာ ပရော်ဖက်ရှင်နယ် ကစားသမားဘဝ စတင်ခဲ့ပြီး အသလက်တီကို၊ ပေါ်တို၊ ဝုလ်ဗ်စ်နဲ့ လီဗာပူးလ်အသင်းတွေမှာ ကစားခဲ့တာပါ။ 

ဂျိုတာဟာ ကလပ်အသင်းတွေအတွက် ပွဲပေါင်း ၃၉၅ ပွဲ ပါဝင်ကစားခဲ့ပြီး ၁၃၃ ဂိုးသွင်းယူခဲ့ကာ ဝုလ်ဗ်စ်အသင်းနဲ့ EFL ချန်ပီယံရှစ်ဖလား၊ လီဗာပူးလ်အသင်းနဲ့ ပရီးမီးယားလိဂ်၊ FA နဲ့ ကာရာဘောင်းဖလားတို့ကို ရယူနိုင်ခဲ့ပါတယ်။ ဂျိုတာဟာ ပေါ်တူဂီလက်ရွေးစင် အသင်းအတွက် ၄၉ ပွဲ ကစားခဲ့ပြီး ၁၄ ဂိုးသွင်းယူကာ နေးရှင်းလိဂ်ဖလား ၂ ကြိမ် ရယူနိုင်ခဲ့တာဖြစ်ပါတယ်။ 

Source: BBC