CNI Sport News

၂၀၂၅ ခုနှစ်၊ ဇူလိုင် ၁၀

စပါးအသင်းဟာ ဝက်စ်ဟမ်းအသင်းရဲ့ ကွင်းလယ်တိုက်စစ်နဲ့ တောင်ပံကစားသမား ကူဒက်စ်ကို ပေါင် ၅၅ သန်းနဲ့ ခေါ်ယူဖို့ သဘောတူညီမှု ရရှိခဲ့ပြီဖြစ်ပါတယ်။ 

ဂါနာလက်ရွေးစင် ကူဒက်စ်ဟာ စပါးအသင်းနဲ့ ဆေးစစ်မှုခံယူပြီး အသင်းမှာ ကာလရှည်ရှိမယ့် ၆  နှစ် စာချုပ် ချုပ်ဆိုမှာပါ။ 

ဝက်စ်ဟမ်းအသင်းဟာ အစောပိုင်းက ကူဒက်စ်အတွက် စပါးအသင်းရဲ့ ပေါင်သန်း ၅၀ နဲ့ ကမ်းလှမ်းမှုကို ပယ်ချ ခဲ့ပေမယ့် စပါးအသင်းက ပြောင်းရွှေ့ကြေးတိုးပြီး ကမ်းလှမ်းခဲ့တာကြောင့် အပြောင်းအရွှေ့ကို သဘောတူညီ ခဲ့တာလို့ BBC Sport က ဖော်ပြထားပါတယ်။ 

၂၀၂၃ ခုနှစ်က အေဂျက်စ်အသင်းကနေ ပေါင် ၃၈ သန်းနဲ့ ရောက်ရှိလာတဲ့ ကူဒက်စ်နဲ့ ဝက်စ်ဟမ်းအသင်းရဲ့ စာချုပ် ထဲမှာ စာချုပ်ဖျက်သိမ်းကြေး ပေါင် ၈၅ သန်း ပါဝင်နေတာပါ။

အသက် ၂၄ နှစ်အရွယ်ရှိ ကူဒက်စ်ဟာ ဝက်စ်ဟမ်းအသင်းအတွက် ပရီးမီးယားလိဂ် ပွဲပေါင်း ၆၅ ပွဲ ပါဝင်ကစားခဲ့ပြီး ၁၃ ဂိုးသွင်းယူကာ ဂိုးဖန်တီးမှု ၉ ကြိမ် ပြုလုပ်နိုင်ခဲ့ပါတယ်။ 

ကူဒက်စ်ကို တွေ့ရစဉ် 

ကူဒက်စ်ကို ခေါ်ယူဖို့ ပြီးခဲ့တဲ့ ရက်သတ္တပတ်အတွင်းမှာ ထိပ်သီးကလပ် ၆ သင်းက ဆက်သွယ်မှုတွေ ပြုလုပ်ခဲ့ ပေမယ့် သူကတော့ စပါးအသင်းကို ပြောင်းရွှေ့ဖို့ ရွေးချယ်ခဲ့တာပါ။ 

လာမယ့်ရာသီ ချန်ပီယံလိဂ်ပြိုင်ပွဲ ယှဉ်ပြိုင်ခွင့် ရရှိထားတဲ့ စပါးအသင်းဟာ ဘရန်ဖို့ဒ်အသင်း တိုက်စစ်မှူး ဝီဆာ ကို ခေါ်ယူနိုင်ဖို့လည်း ကြိုးပမ်းနေပါတယ်။ 

စပါးအသင်းဟာ ဒီနွေရာသီ အပြောင်းအရွှေ့မှာ ပြီးခဲ့တဲ့ရာသီက အငှားနဲ့ ခေါ်ယူခဲ့တဲ့ ဒန်ဆိုနဲ့ မာသီးတဲလ်ကို အပြီးသတ် ခေါ်ယူထားသလို ဂျပန်ကစားသမား တာကာအီကိုလည်း ခေါ်ယူအားဖြည့်ထားတာပါ။ 

ဘရန်ဖို့ဒ်အသင်း နည်းပြဟောင်း သောမတ်စ်ဖရန့်ခ်ကို နည်းပြသစ်အဖြစ် ခန့်အပ်ထားတဲ့ စပါးအသင်းဟာ လာမယ့်ရာသီမှာ အောင်မြင်မှုတွေ ရယူနိုင်ဖို့ ရည်မှန်းထားတယ်လို့ အသင်းအကြီးအကဲ လီဗိုင်းက ပြောထား ပါတယ်။

ရာသီကြို ပြင်ဆင်မှုတွေ စတင်နေပြီဖြစ်တဲ့ စပါးအသင်းဟာ ရာသီသစ်မတိုင်မီ ခြေစမ်းပွဲတွေအဖြစ် ရက်ဒင်း၊ လူတန်၊ အာဆင်နယ်၊ နယူးကာဆယ်၊ ဘိုင်ယန်မြူးနစ်အသင်းတို့နဲ့ ယှဉ်ပြိုင်သွားမှာဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ ဇူလိုင် ၁၀

လိုင်ယွန်အသင်းဟာ ပြင်သစ်လီဂူး-၂ ပြိုင်ပွဲထံ တန်းဆင်းတဲ့ ပြစ်ဒဏ်ချမှတ်ခဲ့တဲ့ ဆုံးဖြတ်ချက်အပေါ် အယူခံ ဝင်ခဲ့တာမှာ အောင်မြင်ခဲ့တာကြောင့် လာမယ့်ရာသီ ပြင်သစ်လီဂူး-၁ ပြိုင်ပွဲမှာ ဆက်ရှိမယ်လို့ ပြင်သစ်ဘောလုံး အဖွဲ့ချုပ်က အတည်ပြုခဲ့ပါတယ်။

ပြင်သစ်ဘောလုံးရဲ့ ဘဏ္ဍာရေး အခြေအနေတွေကို စောင့်ကြည့်မှုတွေ ပြုလုပ်နေတဲ့ (DNCG)က လိုင်ယွန် အသင်းကို ဘဏ္ဍာရေး ပြဿနာတွေကြောင့် တန်းဆင်းတဲ့ ပြစ်ဒဏ်ချမှတ်ခဲ့တာပါ။ 

လိုင်ယွန်အသင်းကတော့ ဒီဆုံးဖြတ်ချက်ကို အယူခံဝင်ခဲ့ပြီး သူတို့ကို ချမှတ်ထားတဲ့ တန်းဆင်းတဲ့ပြစ်ဒဏ်ကို ပယ်ဖျက်နိုင်တဲ့ အစီအစဉ်သစ် တစ်ခုကို ကော်မတီထံ တင်ပြခဲ့တာဖြစ်ပါတယ်။

လိုင်ယွန်အသင်းကိုတွေ့ရစဉ်

ကြွေးမြီပေါင်း ယူရို ၅၄၁ သန်း ရှိနေတာက လိုင်ယွန်အသင်းရဲ့ အဓိကပြဿနာ ဖြစ်နေခဲ့ပြီး အသင်းဟာ ပိုင်ရှင် ပြောင်းလဲခဲ့သလို ဒါကို ဖြေရှင်းဖို့ ကတိကဝတ်တွေ ပေးခဲ့တာကြောင့် အယူခံအောင်မြင်သွားခဲ့တာပါ။

လိုင်ယွန်အသင်းကတော့ သူတို့ကို ပြင်သစ်လီဂူး-၁ ပြိုင်ပွဲမှာ ဆက်ပြီးထားရှိမယ့် DNCG ရဲ့ ဆုံးဖြတ်ချက်ကို ကြိုဆိုပြီး အားကစား ရည်မှန်းချက်တွေအပေါ် အပြည့်အဝ အာရုံစိုက်ကာ လာမယ့်ရာသီအတွက် အပြည့်အဝ ပြင်ဆင်နိုင်ပြီလို့ ကြေညာချက် ထုတ်ပြန်ခဲ့ပါတယ်။ 

လိုင်ယွန်အသင်းဟာ တန်းဆင်းတဲ့ ပြစ်ဒဏ်ကနေ လွတ်မြောက်ခဲ့သလို လာမယ့်ရာသီ ယူရိုပါလိဂ်ပြိုင်ပွဲ ယှဉ်ပြိုင် ခွင့်လည်း ရရှိမှာပါ။

လိုင်ယွန်အသင်း အယူခံအောင်မြင်မှုကြောင့် ခရစ္စတယ်ပဲလေ့စ်အသင်းရဲ့ယူရိုပါလိဂ် ဝင်ခွင့်နေရာဟာ မရေမရာမှုတွေ ရှိလာပါတယ်။ 

ဥရောပဘောလုံးအဖွဲ့ချုပ်(UEFA)ဟာ ပိုင်ရှင်တူနေတဲ့ ကလပ်အသင်း နှစ်သင်းကို တူညီတဲ့ ဥရောပပြိုင်ပွဲမှာ ယှဉ်ပြိုင်ခွင့်ပြုမှာ မဟုတ်ဘူးဆိုတဲ့ စည်းမျဉ်းရှိနေတာပါ။ 

လိုင်ယွန်နဲ့ ခရစ္စတယ်ပဲလေ့စ်အသင်းတို့ဟာ Eagle Football Holdings အစုအဖွဲ့ရဲ့ ပိုင်ဆိုင်မှုအောက်မှာ ရှိနေတာ ဖြစ်ပါတယ်။

ခရစ္စတယ်ပဲလေ့စ်အသင်းရဲ့ ရှယ်ယာ ၄၅ ရာခိုင်နှုန်းကို ပိုင်ဆိုင်တဲ့ ဂျွန်တက်စ်တာဟာ သူ့ရဲ့ရှယ်ယာတွေကို New York Jets ပိုင်ရှင်ဝူဒီဂျွန်ဆင်ထံ ပေါင်သန်း ၁၉၀ နဲ့ ရောင်းချဖို့ လုပ်ဆောင်နေပေမယ့် အရောင်းအဝယ်ကို တရားဝင် အတည်ပြုထားခြင်း မရှိသေးတာပါ။

UEFA ဟာ ခရစ္စတယ်ပဲလေ့စ်အသင်းကို ယူရိုပါလိဂ်ပြိုင်ပွဲ ဝင်ရောက် ယှဉ်ပြိုင်ခွင့်ပြုဖို့ ရှိ/မရှိ ဆုံးဖြတ်ချက်ကို လာမယ့် ရက်ပိုင်းအတွင်း ချမှတ်သွားဖို့ရှိနေတာ ဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ ဇူလိုင် ၁၀

PSG အသင်းဟာ ဖီဖာကလပ် ကမ္ဘာ့ဖလား ဆီမီးဖိုင်နယ်ပွဲစဉ်မှာ ရီးရယ်လ်အသင်းကို ၄ ဂိုး-ဂိုးမရှိနဲ့ ဂိုးပြတ် အနိုင်ရရှိကာ ဗိုလ်လုပွဲ တက်နိုင်ခဲ့ပြီးနောက် နည်းပြလူးဝစ်အင်းနရစ်က ဒီဆုဖလားကို ရယူပြီး နောက်ထပ် သမိုင်း မှတ်တမ်းဖန်တီးဖို့ ပစ်မှတ်ထားနေပါတယ်။

လူးဝစ်အင်းနရစ်က “လှပတဲ့ နိုင်ပွဲဖြစ်ပြီး ဗိုလ်လုပွဲ တက်နိုင်ခဲ့တဲ့အတွက် ကျနော်တို့ အလွန်ပျော်ရွှင်ပါတယ်။ ဒါက အစကတည်းက ကျနော်တို့ရဲ့ ရည်မှန်းချက်ဖြစ်ပေမယ့် ဒီလိုအရာတွေကို အောင်မြင်ဖို့က အမြဲတမ်း အလွန်ခက်ခဲပါတယ်။ ကျနော်တို့ဟာ ပါဝင်ယှဉ်ပြိုင်တဲ့ ပြိုင်ပွဲတိုင်း အနိုင်ရပြီး ပဲရစ်နဲ့ ပြင်သစ်ကလပ်အတွက် သမိုင်းမှတ်တမ်းဖန်တီးဖို့ ၁ ပွဲပဲ လိုပါတော့တယ်။ ဒါက ကျနော်တို့အတွက်နဲ့ ကျနော်တို့ရဲ့ ပရိသတ်တွေအတွက် အများကြီးအဓိပ္ပါယ်ရှိပါတယ်”လို့ ပြောခဲ့တာပါ။ 

PSG အသင်းဟာ ဒီပွဲမှာ ရီးရယ်လ်အသင်းကို အသာစီးနဲ့ ကစားနိုင်ခဲ့ပြီး ပထမပိုင်းမှာ ၃ ဂိုး၊ ဒုတိယပိုင်းမှာ ၁ ဂိုး သွင်းယူခဲ့တာဖြစ်ပြီး သွင်းဂိုးတွေကို ဖာဘီယန်ရုပ်ဇ်က ၂ ဂိုး၊ ဒမ်ဘီလီနဲ့ ဂွန်ကာလိုရာမို့စ်က ၁ ဂိုးစီ သွင်းယူခဲ့တာ ဖြစ်ပါတယ်။ 

ပီအက်စ်ဂျီနဲ့ ရီးရယ်လ် ယှဉ်ပြိုင်နေစဉ် 

PSG အသင်းဟာ ပြီးခဲ့တဲ့ ချန်ပီယံလိဂ် ဗိုလ်လုပွဲမှာ အင်တာမီလန်အသင်းကို ၅ ဂိုး-ဂိုးမရှိနဲ့ ဂိုးပြတ် အနိုင်ရရှိကာ ချန်ပီယံလိဂ်ဖလားကို ပထမဆုံးအကြိမ် ရယူနိုင်ခဲ့သလို ဖီဖာကလပ် ကမ္ဘာ့ဖလားပြိုင်ပွဲမှာ အသင်းကြီးတွေဖြစ်တဲ့ အသလက်တီကိုအသင်းကို ၄ ဂိုး-ဂိုးမရှိ၊ ဘိုင်ယန်မြူးနစ်အသင်းကို ၂ ဂိုး-ဂိုးမရှိနဲ့ ဂိုးပြတ်အနိုင်ရရှိခဲ့တာပါ။

ရီးရယ်လ်အသင်း တိုက်စစ်မှူး ဘတ်ပီဟာ အသင်းဟောင်း PSG အသင်းနဲ့ ပြိုင်ဘက်အဖြစ် ရင်ဆိုင်ခဲ့ရတဲ့ ဒီပွဲမှာ ခြေစွမ်းပြသနိုင်ဖို့ ရုန်းကန်ခဲ့ရတာပါ။

ရီးရယ်လ်အသင်းနည်းပြ ဇာဘီအလွန်ဆိုက သူတို့ဟာ ဒီရှုံးနိမ့်မှုကနေ သင်ယူဖို့ ကြိုးစားရမှာဖြစ်ပြီး PSG အသင်း က ၂ နှစ်ကြာ တည်ဆောက်ထားတဲ့ အသင်းဖြစ်ပေမယ့် သူတို့က အခုမှ စတင်နေရတဲ့အတွက် အချိန်ယူရမယ်လို့ ပြောခဲ့ပါတယ်။ 

PSG အသင်းနည်းပြ လူးဝစ်အင်းနရစ်ကလည်း ရီးရယ်လ်အသင်းနည်းပြ ဇာဘီအလွန်ဆိုအတွက် ရာသီကြို လိုအပ်ပြီး အခြေအနေ နှစ်ခုကို နှိုင်းယှဉ်လို့ မရဘူးလို့ ပြောခဲ့ပါတယ်။ 

ဖီဖာကလပ် ကမ္ဘာ့ဖလား ဗိုလ်လုပွဲ တက်နိုင်ခဲ့တဲ့ PSG အသင်းဟာ ဗိုလ်လုပွဲအဖြစ် ချယ်လ်ဆီးအသင်းနဲ့ ယှဉ်ပြိုင် ရမှာပါ။

ဖီဖာကလပ် ကမ္ဘာ့ဖလား ဗိုလ်လုပွဲကို ဇူလိုင် ၁၄ ရက် မနက် ၁ နာရီခွဲအချိန်မှာ ကျင်းပသွားမှာ ဖြစ်ပါတယ်။

Source: france24

CNI Sport News

၂၀၂၅ ခုနှစ်၊ ဇူလိုင် ၈

အေစီမီလန်အသင်း နည်းပြသစ် အယ်လီဂရီက ခရိုအေးရှား ဝါရင့်ကွင်းလယ်လူ မိုဒရစ်ဟာ ရီးရယ်လ်အသင်းနဲ့ ဖီဖာကလပ် ကမ္ဘာ့ဖလားပြိုင်ပွဲ ယှဉ်ပြိုင်အပြီးမှာ အသင်းထံ ပြောင်းရွှေ့လာမယ်လို့ ပြောခဲ့ပါတယ်။ 

အသက် ၃၉ နှစ်အရွယ်ရှိ မိုဒရစ်ဟာ ဖီဖာကလပ် ကမ္ဘာ့ဖလားပြိုင်ပွဲ အပြီးမှာ ၁၃ နှစ်ကြာ ကစားခဲ့တဲ့ ရီးရယ်လ် အသင်းကနေ ထွက်ခွာမယ်လို့ ပြီးခဲ့တဲ့ မေလက ကြေညာထားတာပါ။ 

အေစီမီလန်အသင်း နည်းပြသစ် အယ်လီဂရီဟာ သူ့ရဲ့ပထမဆုံး ပြုလုပ်ခဲ့တဲ့ မီဒီယာတွေ့ဆုံမှုမှာ အသင်းနဲ့ ပတ်သက်တဲ့ သတင်းတွေကို အတည်ပြုခဲ့ပြီး ဒီအထဲမှာ သြဂုတ်လထဲ မိုဒရစ်အသင်းထံ ရောက်ရှိလာမှာလည်း ပါဝင်ခဲ့တာဖြစ်ပါတယ်။ 

ရီးရယ်လ်အသင်းဟာ ဖီဖာကလပ် ကမ္ဘာ့ဖလားပြိုင်ပွဲမှာ ဆီမီးဖိုင်နယ် ရောက်ရှိနေပြီး PSG အသင်းနဲ့ ယှဉ်ပြိုင် ရမှာပါ။ 

မိုဒရစ်ကို တွေ့ရစဉ် 

၂၀၁၂ ခုနှစ်က စပါးအသင်းကနေ ရောက်ရှိလာခဲ့တဲ့ မိုဒရစ်ဟာ ရီးရယ်လ်အသင်းနဲ့အတူ ချန်ပီယံလိဂ်ဖလား ၆ ကြိမ်၊ လာလီဂါဖလား ၄ ကြိမ် အပါအဝင် ဆုဖလားပေါင်း ၂၈ ခု ရရှိထားပါတယ်။ 

၂၀၁၈ ခုနှစ်က ဘောလွန်းဒီအောဆုကို ရရှိထားတဲ့ မိုဒရစ်ဟာ ၂၀၂၆ ကမ္ဘာ့ဖလားပြိုင်ပွဲမှာ ခရိုအေးရှားအသင်း အတွက် ပါဝင်ကစားချင်တာကြောင့် အမြင့်ဆုံးအဆင့်မှာ ဆက်ပြီးကစားနိုင်ဖို့ အေစီမီလန်အသင်းထံ ပြောင်းရွှေ့ ခဲ့တာပါ။ 

ပြီးခဲ့တဲ့ရာသီက စီးရီးအေပြိုင်ပွဲမှာ အဆင့် ၈ နေရာနဲ့ ရာသီအဆုံးသတ်ခဲ့တဲ့ အေစီမီလန်အသင်းဟာ ကွင်းလယ်လူ ရိုင်းဒါးစ်ကို မန်စီးတီးအသင်းထံ ရောင်းချထားသလို ဘယ်နောက်ခံလူ သီယိုဟာနန်ဒက်ဇ်ကလည်း ဆော်ဒီကလပ် အယ်လ်ဟီလယ်အသင်းထံ ပြောင်းရွှေ့မှာဖြစ်ပါတယ်။

အေစီမီလန်အသင်းကို ၂၀၁၁ ခုနှစ်က စီးရီးအေဖလား ရရှိအောင် ကိုင်တွယ်ပေးထားတဲ့ နည်းပြအယ်လီဂရီဟာ ဥရောပအသင်းကြီးတွေရဲ့ ပစ်မှတ်ဖြစ်တဲ့ ဂိုးသမား မိုင်ဂ်နန်နဲ့ ရာဖေးလ်လီယိုတို့ အသင်းမှာ ဆက်ရှိမယ်လို့ အတည်ပြုခဲ့ပါတယ်။

ရာသီသစ်မှာ ဆုဖလား အောင်မြင်မှုတွေ ရယူနိုင်ဖို့ ပစ်မှတ်ထားနေတဲ့ အေစီမီလန်အသင်းဟာ ရာသီသစ် စီးရီးအေ အဖွင့်ပွဲစဉ်အဖြစ် သြဂုတ် ၂၃ ရက်မှာ ခရီမိုနီစီအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ ဇူလိုင် ၉

ပေါ်တူဂီကြယ်ပွင့် ဂျာအိုဖီးလစ်ဟာ သူ့ရဲ့ငယ်ဘဝကလပ် ဘင်ဖီကာအသင်းထံ ပြန်သွားချင်တယ်လို့ ဝန်ခံခဲ့ ပေမယ့် သူ့ရဲ့လုပ်ခလစာနဲ့ ပြောင်းရွှေ့ကြေးကြောင့် အပြောင်းအရွှေ့ ဖြစ်နိုင်ဖို့ နည်းပါးတာ ဖြစ်ပါတယ်။ 

ဂျာအိုဖီးလစ်က “ဘင်ဖီကာဟာ ကျနော် အနှစ်သက်ဆုံး အသင်းဆိုတာ တစ်ကမ္ဘာလုံး သိပါတယ်။ ဒါက ကျနော့် အိမ်ဖြစ်ပြီး ကျနော်တစ်နေ့ ပြန်လာမှာပါ။ အခုလား ဒါမှမဟုတ် နှစ်အနည်းငယ် အတွင်းမှာ ဖြစ်မလားဆိုတာ မသိပေမယ့် အခုဖြစ်ခဲ့ရင်လည်း ကျနော် အလွန်ပျော်ရွှင်မှာပါ။ အင်္ဂလန်မှာနေမလား ဒါမှမဟုတ် ဘင်ဖီကာကို ပြန်လာမလားဆိုတဲ့ ရွေးချယ်စရာနှစ်ခုရှိပါတယ်”လို့ ပြောခဲ့တာပါ။

ဂျာအိုဖီးလစ်ဟာ ဘင်ဖီကာ အသင်းကနေ ထွက်ခွာပြီး အသလက်တီကိုအသင်းထံ ပြောင်းရွှေ့ကြေး အများအပြား နဲ့ ပြောင်းရွှေ့ခဲ့ပြီးနောက်ပိုင်း ရုန်းကန်နေရတာ ဖြစ်ပါတယ်။

ဂျာအိုဖီးလစ်ဟာ ချယ်လ်ဆီးနဲ့ ဘာစီလိုနာအသင်းတွေမှာ အငှားနဲ့ ကစားခဲ့ပြီး မနှစ်က နွေရာသီမှာ ချယ်လ်ဆီး အသင်းထံ အပြီးသတ် ပြောင်းရွှေ့လာခဲ့တာပါ။ 

 ဂျာအိုဖီးလစ်ကို တွေ့ရစဉ် 

ဒါပေမယ့် ဂျာအိုဖီးလစ်ဟာ ပြီးခဲ့တဲ့ ဇန်နဝါရီက အေစီမီလန်အသင်းထံ အငှားနဲ့ ပြောင်းရွှေ့ခဲ့ပြီး ၂၁ ပွဲ ပါဝင် ကစားခဲ့တာမှာ ၃ ဂိုးသွင်းပြီး ၁ ဂိုးဖန်တီးနိုင်ခဲ့ပါတယ်။

ဂျာအိုဖီးလစ်ဟာ ဖီဖာကလပ် ကမ္ဘာ့ဖလား ပြိုင်ပွဲဝင်နေတဲ့ ချယ်လ်ဆီးအသင်း လူစာရင်းမှာ ချန်လှပ်ခံခဲ့ရပြီး အနာဂတ် မရေမရာဖြစ်နေတာပါ။

ဂျာအိုဖီးလစ်ကတော့ ဘင်ဖီကာအသင်းထံ ပြန်ချင်နေပေမယ့် ချယ်လ်ဆီးအသင်းရဲ့ ပြောင်းရွှေ့ကြေး တောင်းဆို မှုနဲ့ သူ့ရဲ့လုပ်ခလစာဟာ ပေါ်တူဂီကလပ်ရဲ့ အသုံးစရိတ်ထက် ကျော်လွန်နေတာ ဖြစ်ပါတယ်။ 
ချယ်လ်ဆီးအသင်းဟာ ဂျာအိုဖီးလစ်ကို ယူရို ၅၂ သန်းနဲ့ ဝယ်ယူခဲ့ပြီး ၇ နှစ် စာချုပ်ချုပ်ဆိုထားတာပါ။ 

ချယ်လ်ဆီးအသင်းဟာ ဂျာအိုဖီးလစ်ကို ရောင်းချခြင်နေသလို ဘင်ဖီကာအသင်း နည်းပြကလည်း သူ့ကို ခေါ်ယူချင်တဲ့ ဆန္ဒကို ဖွင့်ဟထားပါတယ်။

ဂျာအိုဖီးလစ်အနေနဲ့ ဘင်ဖီကာအသင်းထံ ပြန်သွားချင်တယ်ဆိုရင် သူ့ရဲ့လုပ်ခလစာကို လျှော့ချဖို့ လိုအပ်နေ ပါတယ်။ 

ဂျာအိုဖီးလစ်ဟာ ချယ်လ်ဆီးအသင်းနည်းပြ မာရက်စ်ကာရဲ့ အစီအစဉ်မှာ မပါဝင်တာကြောင့် ဘင်ဖီကာအသင်းထံ မပြောင်းရွှေ့ဖြစ်ခဲ့ရင် အခြားရွေးချယ်စရာတွေကို ရှာဖွေရမှာဖြစ်ပါတယ်။

Source: Goal

CNI Sport News

၂၀၂၅ ခုနှစ်၊ ဇူလိုင် ၈

ယူနိုက်တက်အသင်းဟာ ဂိုးသမားအိုနာနာအတွက် ပြောင်းရွှေ့ကြေး ပေါင်သန်း ၃၀ သတ်မှတ်ထားပေမယ့် အိုနာနာဟာ လာမယ့်ရာသီအသင်းမှာ ဆက်နေဖွယ်ရှိတယ်လို့ ဗြိတိန်မီဒီယာတွေက ဖော်ပြထားပါတယ်။

ပြင်သစ်ကလပ် မိုနာကိုအသင်းဟာ ပြီးခဲ့တဲ့လကုန်ပိုင်းက အိုနာနာနဲ့ ပတ်သက်ပြီး မေးမြန်းမှုတွေ ပြုလုပ်ခဲ့ချိန်က ယူနိုက်တက်အသင်းဟာ သူ့အတွက် ပြောင်းရွှေ့ကြေးပေါင်သန်း ၃၀ သတ်မှတ်ခဲ့တာပါ။ 

မိုနာကိုအသင်းဟာ အိုနာနာရဲ့ အခြေအနေကို စောင့်ကြည့်နေပေမယ့် ယူနိုက်တက်အသင်း သတ်မှတ်ထားတဲ့ ပြောင်းရွှေ့ကြေးကို ပေးချေဖွယ်မရှိဘူးလို့ ပြင်သစ်သတင်းရင်းမြစ်တွေက ဖော်ပြထားပါတယ်။ 

ယူနိုက်တက်အသင်းဟာ ကင်မရွန်းဂိုးသမား အိုနာနာကို ပြီးခဲ့တဲ့ ၂ နှစ်က အင်တာမီလန် အသင်းကနေ ပေါင် ၄၇.၂ သန်းနဲ့ ဝယ်ယူခဲ့တာပါ။ 

ဆော်ဒီကလပ် နီယွန်အသင်းဟာ အိုနာနာကို ခေါ်ယူဖို့ စိတ်ဝင်စားခဲ့ပေမယ့် ပြီးခဲ့တဲ့ရက်ပိုင်းက နိုက်စ်အသင်း ဂိုးသမား ဘူလ်ခါကို ခေါ်ယူခဲ့တာဖြစ်ပါတယ်။ 

အိုနာနာကတော့ ယူနိုက်တက်အသင်းမှာ ဆက်ရှိဖို့ ဆန္ဒရှိနေပြီး အသင်းဘက်ကလည်း သူ့ကို နံပါတ်တစ် ဂိုးသမား အဖြစ် ဆက်ထားဖွယ်ရှိနေတာပါ။

အိုနာနာကို တွေ့ရစဉ် 

အိုနာနာဟာ ယူနိုက်တက်အသင်းရဲ့ ရာသီကြိုလေ့ကျင့်ခန်း အစီအစဉ်ကို ပူးပေါင်းနေပြီး လာမယ့်ရာသီမှာ အကောင်းဆုံး စွမ်းဆောင်ရည် ပြသနိုင်ဖို့ မျှော်လင့်နေပါတယ်။ 

ယူနိုက်တက်အသင်းဟာ အက်စတွန်ဗီလာအသင်း ဂိုးသမား မာတီနက်ဇ်ကို ခေါ်ယူဖို့ စိတ်ဝင်စားနေတယ်လို့ သတင်းထွက်နေပေမယ့် အိုနာနာကို ရောင်းချနိုင်မှသာ ဒီအပြောင်းအရွှေ့ကို စဉ်းစားဖွယ်ရှိနေတာပါ။ 

ယူနိုက်တက်အသင်းဟာ လာမယ့်ရာသီ ဥရောပပြိုင်ပွဲ ယှဉ်ပြိုင်ခွင့်ရမှာ မဟုတ်သလို အသင်းရဲ့ဘဏ္ဍာရေး အခြေအနေကြောင့် ဂိုးသမားနေရာထက် အခြားနေရာတွေကို ဦးစားပေး အားဖြည့်ချင်နေတာ ဖြစ်ပါတယ်။

ယူနိုက်တက်အသင်းဟာ ဝုလ်ဗ်စ်အသင်းက ကွန်ညာကို ခေါ်ယူပြီးနောက် ဘရန်ဖို့ဒ်အသင်းက အမ်ဘူမိုကို ခေါ်ယူနိုင်ဖို့ ကြိုးပမ်းနေတာပါ။

မန်ချက်စတာကလပ်ဟာ အသင်းကနေ ထွက်ခွာချင်နေတဲ့ ရက်ရှ်ဖို့ဒ်၊ ဆန်ချို၊ အန်တိုနီ၊ ဂါနာချိုနဲ့ မာလာစီယာ တို့ကို အမြန်ဆုံး ရောင်းချပြီး သူတို့ဆီကနေ ရရှိမယ့် ပြောင်းရွှေ့ကြေးတွေကို ကစားသမားသစ် ခေါ်ယူတာမှာ အသုံးပြုချင်နေတာ ဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ ဇူလိုင် ၈

အာဆင်နယ်အသင်း အားကစားဒါရိုက်တာ ဘာတာဟာ ပေါ်တူဂီနိုင်ငံမှာ စပို့တင်းလစ္စဘွန်းအသင်း တာဝန်ရှိသူ တွေနဲ့ မျက်နှာချင်းဆိုင် တွေ့ဆုံဆွေးနွေးမှု ပြုလုပ်ခဲ့ပြီးနောက် အာဆင်နယ်အသင်းဟာ တိုက်စစ်မှူး ယိုကီရက်စ် ကို ခေါ်ယူနိုင်ဖို့ နီးစပ်လာခဲ့ပြီ ဖြစ်ပါတယ်။

အာဆင်နယ်အသင်းဟာ ယိုကီရက်စ်ကို ၅ နှစ် စာချုပ်ချုပ်ဖို့ ကစားသမားနဲ့ ပုဂ္ဂိုလ်ရေးဆိုင်ရာ သဘောတူညီမှု ရရှိပြီးနောက် မကြာသေးမီ ရက်ပိုင်းအတွင်းမှာ ကလပ်အသင်း နှစ်သင်းကြား ဆွေးနွေးမှုတွေဟာ အရှိန်မြှင့် လာခဲ့တာပါ။ 

အာဆင်နယ်အသင်း အားကစားဒါရိုက်တာ ဘာတာဟာ ယိုကီရက်စ်ရဲ့ အပြောင်းအရွှေ့အတွက် စပို့တင်းလစ္စဘွန်း အသင်း အကြီးအကဲတွေနဲ့ တိုက်ရိုက် ဆွေးနွေးမှုတွေ ပြုလုပ်ဖို့ လစ္စဘွန်းကို ထွက်ခွာသွားခဲ့တာဖြစ်ပါတယ်။ 

အာဆင်နယ်အသင်းဟာ ယိုကီရက်စ်ကို ပေါင်သန်း ၇၀ ဝန်းကျင်နဲ့ ခေါ်ယူနိုင်ဖို့ နီးစပ်နေပြီး စာချုပ်ကိစ္စ အပြီး သတ်ဖို့ ကျန်ရှိနေပေမယ့် လန်ဒန်ကလပ်ဟာ ဆွီဒင်တိုက်စစ်မှူးကို မကြာမီခေါ်ယူနိုင်မယ်လို့ ယုံကြည်ထား တာပါ။ 

ယိုကီရက်စ်ကို တွေ့ရစဉ်

ယိုကီရက်စ် ကိုယ်တိုင်ကလည်း အာဆင်နယ်အသင်းကို ပြောင်းရွှေ့ဖို့ ဆုံးဖြတ်ထားတာဖြစ်ပါတယ်။ 

ဒီနွေရာသီ အပြောင်းအရွှေ့မှာ ချယ်လ်ဆီးအသင်း ဂိုးသမား ကယ်ပါနဲ့ ဆိုစီဒက်အသင်း ကွင်းလယ်လူ ဇူဘီမန်ဒီကို ခေါ်ယူထားတဲ့ အာဆင်နယ်အသင်းဟာ ဘရန်ဖို့ဒ်အသင်း ခေါင်းဆောင် နော်ဂတ်ရဲ့ အပြောင်းအရွှေ့ကိုလည်း ကြေညာဖို့ ရှိနေတာပါ။

ဒါအပြင် အာဆင်နယ်အသင်းဟာ ချယ်လ်ဆီးအသင်း တောင်ပံကစားသမား မာဒူကီနဲ့ ခရစ္စတယ်ပဲလေ့စ်အသင်း ကွင်းလယ်တိုက်စစ် ကစားသမား အီဇီကို ခေါ်ယူနိုင်ဖို့လည်း ဆွေးနွေးမှုတွေ ပြုလုပ်နေပါတယ်။ 

အာဆင်နယ်အသင်းဟာ မာဒူကီနဲ့ ပုဂ္ဂိုလ်ရေး သဘောတူညီမှု ရရှိထားပြီး ချယ်လ်ဆီးအသင်းက သူ့အတွက် ပြောင်းရွှေ့ကြေး ယူရိုသန်း ၅၀ လိုချင်နေတာပါ။ 

အာဆင်နယ်အသင်းအနေနဲ့ အီဇီကို ခေါ်ယူချင်တယ်ဆိုရင် သူ့ရဲ့ စာချုပ် ဖျက်သိမ်းကြေး ယူရို ၆၅ သန်းပေးဖို့ လိုအပ်တာ ဖြစ်ပါတယ်။ 

Source:BBC

CNI Sport News

၂၀၂၅ ခုနှစ်၊ ဇူလိုင် ၇

အင်တာမိုင်ယာမီအသင်းဟာ အသင်းခေါင်းဆောင်မက်ဆီရဲ့ အာဂျင်တီးနားအရင်းအနှီးဆုံးအသင်းဖော်တွေထဲက တစ်ဦးဖြစ်တဲ့ အသလက်တီကိုအသင်းကွင်းလယ်လူ ဒီပေါလ်ကို ခေါ်ယူဖို့ ချိတ်ဆက်မှုတွေပြုလုပ်နေပါတယ်။ 

မက်ဆီရဲ့အနာဂတ်ဟာ မရေမရာဖြစ်နေတာကြောင့် အင်တာမိုင်ယာမီအသင်းက သူအသင်းမှာ စာချုပ်သက်တမ်း တိုးပြီး ဆက်ရှိနေနိုင်ဖို့ ကြိုးစားတဲ့အနေနဲ့ ဒီပေါလ်ကို ခေါ်ယူနိုင်ဖို့ ကြိုးပမ်းနေတာပါ။ 

အသလက်တီကို အသင်း ဟာ ဒီပေါလ်ကို ရောင်းချမယ့်စာရင်းထဲထည့်သွင်းထားပြီး ပေါင် ၁၂ သန်းကျော်ရရင်ထွက်ခွာခွင့်ပေးဖို့ ရှိနေပါတယ်။ 

အင်တာမိုင်ယာမီအသင်းရဲ့ပိုင်ရှင်တစ်ဦးဖြစ်တဲ့ ဂျော့ချ်မက်စ်ဟာ မက်ဒရစ်မှာ ရှိနေတယ်လို့ The Miami Herald သတင်းက ဖော်ပြထားတာပါ။

ဒီပေါလ်ဟာ အကောင်းဆုံးကွင်းလယ်လူတွေထဲက တစ်ဦးဖြစ်ပြီး ထိပ်တန်းအဆင့်မှာ ကစားနိုင်တဲ့ အသက် ၃၁ နှစ်သာရှိသေးတာကြောင့် အင်တာမိုင်ယာမီအသင်းက သူဟာ အကောင်းဆုံးခေါ်ယူမှုဖြစ်လာနိုင်မယ်လို့ ယုံကြည် နေတာဖြစ်ပါတယ်။

ဒီပေါလ်နဲ့ အသလက်တီကိုအသင်းတို့ရဲ့စာချုပ်ဟာ ၂၀၂၆ ခုနှစ်၊ဇွန်လအကုန်တွင် ကုန်ဆုံးမှာ ဖြစ်ပေမယ့် နည်းပြဆီမြွန်နီက သူ့ကိုအသင်းမှာ ဆက်ထိန်းသိမ်းချင်နေတယ်လို့ သတင်းတွေမှာ ဖော်ပြထားတာ ပါ။

အင်တာမိုင်ယာမီအသင်းရဲ့ အဓိကကွင်းလယ်လူ ဘတ်စ်ကွက်စ်ဟာ ဒီရာသီကုန်ရင် စာချုပ်ကုန်ဆုံးမှာဖြစ်လို့ အသင်းဟာ သူ့ရဲ့နေရာမှာ ရေရှည်အစားထိုးဖို့ ဒီပေါလ်ကို ခေါ်ယူချင်နေတာဖြစ်ပါတယ်။

ဒီပေါလ်ဟာ အာဂျင်တီးနားအသင်း ၂၀၂၂ ကမ္ဘာ့ဖလားနဲ့ ကိုပါအမေရိကဖလားပြိုင်ပွဲတွေမှာ ဆုဖလားအောင်မြင်မှု တွေရယူနိုင်ခဲ့ချိန် အဓိက ကစားသမားအဖြစ်ပါဝင်ခဲ့သလို အသလက်တီကိုအသင်းမှာလည်း အရေးပါတဲ့ ကွင်းလယ်လူအဖြစ်ရှိခဲ့တာပါ။

၂၀၂၁ ခုနှစ်က အူဒီးနီးစ်အသင်းကနေ ရောက်ရှိလာခဲ့တဲ့ ဒီပေါလ်ဟာ အသလက်တီကိုအသင်းအတွက် ၁၈၇ ပွဲကစားထားပြီး ၁၄ ဂိုးသွင်းယူထားတာဖြစ်ပါတယ်။

Source:Goal

CNI Sport News

၂၀၂၅ ခုနှစ်၊ ဇူလိုင် ၇

ကိုလံဘီယာ တိုက်စစ်မှူး ဒူရန်ဟာ ဆော်ဒီပရိုလိဂ်ကလပ် အယ်လ်နာဆာအသင်းကနေ တူရကီကလပ် ဖီနာဘာချီအသင်းထံ တစ်ရာသီအငှားစာချုပ်နဲ့ ပြောင်းရွှေ့ခဲ့ပါတယ်။

ဒူရန်ဟာ ပြီးခဲ့တဲ့ဇန်နဝါရီကမှ အက်စတွန်ဗီလာအသင်းကနေ ယူရို ၈၅ သန်းနဲ့ အယ်လ်နာဆာအသင်းထံ ပြောင်းရွှေ့ခဲ့ပေမယ့် ဆော်ဒီကလပ်မှာ ၆ လကြာသာကစားကာ ဖီနာဘာချီအသင်းထံ ပြောင်းရွှေ့ခဲ့တာပါ။ 

အသက် ၂၁ နှစ်အရွယ်ရှိ ဒူရန်ဟာ အယ်လ်နာဆာအသင်းအတွက် ၁၈ ပွဲ ကစားခဲ့ပြီး ၁၂ ဂိုးသွင်းယူကာ အသင်းကို ဆော်ဒီပရိုလိဂ်ပြိုင်ပွဲမှာ အမှတ်ပေးဇယား အဆင့် ၃ နဲ့ အာရှချန်ပီယံလိဂ်ပြိုင်ပွဲမှာ ဆီမီးဖိုင်နယ်အထိ ရောက်ရှိ အောင် ကူညီပေးနိုင်ခဲ့ပါတယ်။ 

ဒူရန်ဟာ အယ်လ်နာဆာအသင်းမှာ အဆင်မပြေမှုတွေ ရှိခဲ့ပြီးနောက် နွေရာသီ အပြောင်းအရွှေ့ကာလမှာ ပြန်လည် ထွက်ခွာနိုင်ဖို့ ကြိုးပမ်းခဲ့တာပါ။ 

ဒူရန်ကိုတွေ့ရစဉ်

ဖီနာဘာချီအသင်းနည်းပြ မော်ရင်ဟိုနဲ့ ဒါရိုက်တာ အိုဇက်တို့ဟာ ဒူရန်ကို ခေါ်ယူနိုင်ဖို့ အဓိကပစ်မှတ်ထားခဲ့ တာကြောင့် အသင်းဟာ သူ့ကို အငှားနဲ့ ခေါ်ယူနိုင်ဖို့ လုပ်ဆောင်ခဲ့ရတာဖြစ်ပါတယ်။

ဖီနာဘာချီအသင်းဟာ ဒူရန်ကို အသင်းနဲ့အတူ အောင်မြင်တဲ့ရာသီ ဖြတ်သန်းနိုင်ဖို့ မျှော်လင့်နေတာပါ။ 

ပြီးခဲ့တဲ့ရာသီရဲ့ ပထမရာသီဝက်မှာ အက်စတွန်ဗီလာအသင်းအတွက် ခြေစွမ်းပြသနိုင်ခဲ့တာကြောင့် ဥရောပ ထိပ်သီးတွေရဲ့ ပစ်မှတ်ဖြစ်ခဲ့တဲ့ ဒူရန်ဟာ ဖီနာဘာချီအသင်းမှာ ကျောနံပါတ် ၉ ဝတ်ဆင်သွားမှာ ဖြစ်ပါတယ်။ 

ဖီနာဘာချီအသင်းဟာ နည်းပြမော်ရင်ဟို လက်ထက် ပြီးခဲ့တဲ့ရာသီက ဆုဖလားအောင်မြင်မှု မရခဲ့တာကြောင့် ရာသီသစ်မှာ အောင်မြင်မှုရယူနိုင်ဖို့ ပစ်မှတ်ထားနေကာ ကစားသမားသစ်တွေ ထပ်ပြီးအားဖြည့်နိုင်ဖို့ လုပ်ဆောင် နေတာပါ။ 

ဖီနာဘာချီအသင်းဟာ ပြီးခဲ့တဲ့ရာသီ တူရကီစူပါလိဂ်ပြိုင်ပွဲမှာ အဆင့် ၂ နေရာနဲ့ ရာသီအဆုံးသတ်ခဲ့လို့ ချန်ပီယံလိဂ်ပြိုင်ပွဲကို ယှဉ်ပြိုင်ခွင့်ရရှိဖို့အတွက် တတိယအဆင့် ခြေစစ်ပွဲကနေ စတင်ယှဉ်ပြိုင်ရမှာဖြစ်ပါတယ်။ 

Source: ESPN