CNI Sport News

၂၀၂၄ ခုနှစ်၊ စက်တင်ဘာ ၁၁

မက္ကဆီကို ဝါရင့်ဂိုးသမား အိုချူအာက နိုင်ငံအသင်းနဲ့အတူ ၂၀၂၆ ကမ္ဘာ့ဖလားပြိုင်ပွဲမှာ ပါဝင်ကစားချင်တယ်လို့ ပြောလိုက်ပါတယ်။ 

အသက် ၃၉ နှစ်အရွယ်ရှိ အိုချူအာဟာ မက္ကဆီကိုအသင်းကို အဂွီရီနဲ့ မားကွက်ဇ်တို့ တာဝန်ယူပြီးကတည်းက ရွေးချယ်ခံရခြင်း မရှိတော့တာပါ။ 

၂၀၀၅ ခုနှစ်ကတည်းက မက္ကဆီကိုအသင်းအတွက် စတင်ပွဲထွက်ခဲ့တဲ့ အိုချူအာဟာ ပွဲပေါင်း ၁၅၀ အထိ ပါဝင် ကစားထားပြီး ကမ္ဘာ့ဖလားပြိုင်ပွဲ ၅ ကြိမ်အထိ ယှဉ်ပြိုင်ထားတာ ဖြစ်ပါတယ်။ 

အဲဒါကြောင့် အိုချူအာဟာ မက္ကဆီကိုနိုင်ငံက ပူးတွဲအိမ်ရှင်အဖြစ် ကျင်းပမယ့် ၂၀၂၆ ကမ္ဘာ့ဖလားပြိုင်ပွဲကို စံချိန်တင် ၆ ကြိမ်မြောက်အဖြစ် ပါဝင်ယှဉ်ပြိုင်ချင်နေတာပါ။ 

အိုချူအာဟာ မက္ကဆီကို အသင်းနဲ့အတူ ကွန်ကာကပ်ဖ် ရွှေဖလား ချန်ပီယံဆုကို ၅ ကြိမ်အထိ ရယူနိုင်ခဲ့ပေမယ့် ကမ္ဘာ့ဖလားပြိုင်ပွဲမှာတော့ အောင်မြင်မှု ရယူနိုင်ခြင်း မရှိသေးပါဘူး။

အိုချူအာကို တွေ့ရစဉ်

ကမ္ဘာ့ဖလားပြိုင်ပွဲမှာ ပါဝင်တိုင်း လက်စွမ်းပြသနိုင်ခဲ့တဲ့ အိုချူအာဟာ စီးရီးအေကလပ် ဆလာနီတာနာအသင်းက ထွက်ခွာပြီးနောက် ပေါ်တူဂီကလပ် AVS အသင်းထံ ပြောင်းရွှေ့ခဲ့ပါတယ်။ 

အိုချူအာဟာ သူ့ကို ခေါ်ယူဖို့ ကမ်းလှမ်းမှု အများအပြား ရှိခဲ့ပေမယ့် မက္ကဆီကို အသင်းဖော်တွေ ကစားခဲ့တဲ့ ပေါ်တူဂီလိဂ်ထံ ပြောင်းရွှေ့ဖို့ ရွေးချယ်ခဲ့တာပါ။ 

အိုချူအာဟာ AVS အသင်းရဲ့ ကစားသမားသစ်အဖြစ် မိတ်ဆက်ခံရချိန်မှာ ကလပ်နဲ့ နိုင်ငံအသင်းကို ကူညီဖို့ ရုပ်ပိုင်းနဲ့ စိတ်ပိုင်းဆိုင်ရာ ကောင်းမွန်တယ်လို့ ခံစားရကြောင်း ပြောခဲ့ပါတယ်။

အိုချူအာရဲ့အသင်းသစ် AVS အသင်းဟာ ဒီရာသီ ပေါ်တူဂီလိဂ် ၄ ပွဲ ကစားအပြီးမှာ ၁ ပွဲနိုင်၊ ၁ ပွဲသရေ၊ ၂ ပွဲရှုံး ရလဒ် ထွက်ပေါ်ထားပြီး အဆင့် ၁၂ နေရာမှာ ရပ်တည်နေတာပါ။

အိုချူအာက သူဟာ AVS အသင်းကို ရလဒ်ကောင်းတွေရအောင် ကူညီပေးချင်ပြီး အမြန်ဆုံး ပွဲထွက် ပါဝင်ချင် နေပြီလို့ ပြောခဲ့တာ ဖြစ်ပါတယ်။ 

Source: besoccer

CNI Sport News

၂၀၂၄ ခုနှစ်၊ စက်တင်ဘာ ၁၁

စပါးနဲ့ ချယ်လ်ဆီးအသင်းနည်းပြဟောင်း ပိုချက်တီနိုဟာ အမေရိကန်အမျိုးသားအသင်းနည်းပြသစ်အဖြစ် ခန့်အပ် ခြင်းခံခဲ့ရပါတယ်။ 

ပိုချက်တီနိုဟာ ကိုပါအမေရိကဖလားပြိုင်ပွဲမှာ အုပ်စုကနေ ထွက်ခဲ့ရပြီးနောက် ထုတ်ပယ်ခံခဲ့ရတဲ့ နည်းပြဟောင်း ဘာဟယ်လ်တာရဲ့နေရာမှာ အစားထိုးဝင်ရောက်ပြီး အမေရိကန်အမျိုးသားအသင်းနည်းပြသစ်အဖြစ် တာဝန်ယူ ရမှာပါ။ 

အမေရိကန်ဘောလုံးအဖွဲ့ချုပ်ဟာ ပိုချက်တီနိုကို ၂၀၂၆ ကမ္ဘာ့ဖလားပြိုင်ပွဲအထိ ကိုင်တွယ်စေမယ့် ၂ နှစ် စာချုပ်ချုပ်ဆိုခဲ့တာဖြစ်ပါတယ်။ 

အမေရိကန်ဘောလုံးအဖွဲ့ချုပ်ဟာ ပိုချက်တီနိုကို နည်းပြသစ်အဖြစ် ခန့်အပ် ကြောင်းကို နယူးဇီလန်အသင်းနဲ့ ခြေစမ်းပွဲမတိုင်ခင် ကြေညာခဲ့တာပါ။ 

ပိုချက်တီနိုက “အမေရိကန်အသင်းကို ကိုင်တွယ်ဖို့ဆုံးဖြတ်ချက်က ကျနော့်အတွက် ဘောလုံးအကြောင်းတင် မဟုတ်ဘဲ ဒီအသင်းနဲ့ ဒီနိုင်ငံရဲ့လျှောက်လှမ်းနေတဲ့ ခရီးအတွက်ပါ။ ဒီနေရာက သမိုင်းဝင်အောင်မြင်မှုရရှိဖို့ စွမ်းအင်တွေ၊စိတ်အားထက်သန်မှုတွေက ကျနော့်ကို လှုံ့ဆော်ပေးတဲ့အရာတွေပါ။ အရည်အချင်းနဲ့ အလား အလာအပြည့်ရှိတဲ့ ကစားသမားအစုအဖွဲ့ကို မြင်တွေ့ခဲ့ရပြီး တစ်နိုင်ငံလုံးဂုဏ်ယူနိုင်တဲ့ ထူးခြားတဲ့အရာကို အတူတူတည်ဆောက်သွားမယ်” လို့ ပြောခဲ့ပါတယ်။ 

အမေရိကန်နိုင်ငံဟာ လာမယ့် ၂၀၂၆ ကမ္ဘာ့ဖလားပြိုင်ပွဲကို ကနေဒါ၊မက္ကဆီကိုနိုင်ငံတို့နဲ့အတူ ပူးတွဲအိမ်ရှင်အဖြစ် ကျင်းပမှာဖြစ်လို့ အောင်မြင်မှုရယူနိုင်ဖို့အတွက် အမေရိကန်ဘောလုံးအဖွဲ့ချုပ်က ပစ်မှတ်ထားနေတာပါ။ 

အဲဒါကြောင့် နာမည်ကြီးနည်းပြတွေကို ရှာဖွေခဲ့ပြီး ထိပ်တန်းအသင်းတွေကို ကိုင်တွယ်ခဲ့တဲ့ ပိုချက်တီနိုကို နည်းပြသစ်အဖြစ်ခန့်အပ်ခဲ့တာဖြစ်ပါတယ်။ 

အမေရိကန်အသင်းဟာ နောက်ဆုံးကစားခဲ့တဲ့ ကိုပါ အမေရိက ဖလားပြိုင်ပွဲနဲ့ ခြေစမ်းပွဲတွေမှာ ရလဒ်တွေဆိုးခဲ့တာကြောင့် ပိုချက်တီနိုဟာ ရလဒ်ကောင်းတွေရရှိအောင် ကိုင်တွယ်ပေးရတော့မှာပါ။ 

အမေရိကန်အသင်းဟာ အောက်တိုဘာထဲမှာ ပနားမား၊မက္ကဆီကိုအသင်းတို့နဲ့ ခြေစမ်းပွဲယှဉ်ပြိုင်မှာ ဖြစ်ပြီး ပိုချက်တီနိုဟာ ဒီပွဲတွေကို သူ့ရဲ့အမေရိကန်အသင်းနည်းပြဘ၀ ပထမဆုံးပွဲစဉ်တွေအဖြစ် ကိုင်တွယ်ရမှာ ဖြစ်ပါတယ်။

Source:BBC

CNI Sport News

၂၀၂၄ ခုနှစ်၊ စက်တင်ဘာ ၁၁

အင်္ဂလန်အသင်းခေါင်းဆောင် ဟာရီကိန်းဟာ အင်္ဂလန်အသင်းက ဖင်လန်အသင်းကို ၂ ဂိုး-ဂိုးမရှိနဲ့ အနိုင်ရခဲ့တဲ့ ပွဲမှာ လက်ရွေးစင်ကစားသမားဘဝ ပွဲပေါင်း ၁၀၀ ပြည့်ခဲ့ပြီး အသင်းရရှိခဲ့တဲ့ ၂ ဂိုးစလုံးကို သွင်းယူနိုင်ခဲ့ပါတယ်။ 

အင်္ဂလန်အသင်းနဲ့ ဖင်လန်အသင်းတို့ရဲ့ နေးရှင်းလိဂ်ပွဲ မစတင်ခင်မှာ ဟာရီကိန်းဟာ အင်္ဂလန်ဘောလုံးအဖွဲ့ချုပ် ကပေးတဲ့ ရာပြည့်အထိမ်းအမှတ် ရွှေရောင်ဦးထုပ်ကို လက်ခံရရှိခဲ့ပြီး ရွှေရောင်ဖိနပ်ကို ဝတ်ဆင်ကာ အသင်း အတွက် ခြေစွမ်းပြသပြီး သွင်းဂိုးတွေ သွင်းယူနိုင်ခဲ့တာပါ။

ဟာရီကိန်းဟာ ဒီပွဲမှာ သွင်းယူခဲ့တဲ့ ၂ ဂိုးကြောင့် အင်္ဂလန်အသင်းအတွက် ကစားထားတဲ့ ပွဲပေါင်း ၁၀၀ မှာ စံချိန်တင် ၆၈ ဂိုးအထိ သွင်းယူနိုင်ခဲ့တာ ဖြစ်ပါတယ်။ 

ဘိုင်ယန်မြူးနစ်အသင်း တိုက်စစ်မှူးဟာ အင်္ဂလန်အသင်းအတွက် ပွဲ ၁၀၀ ပြည့်မှာ ဂိုးသွင်းယူနိုင်တဲ့ တတိယ မြောက် ကစားသမားလည်း ဖြစ်လာခဲ့တာပါ။

အရင်က ဒီလိုမှတ်တမ်း ရယူနိုင်ခဲ့တဲ့ သူတွေကတော့ ဝိန်းရွန်နီနဲ့ ဘော်ဘီချာလ်တန်တို့ ဖြစ်ပါတယ်။ 

ဟာရီကိန်းကို တွေ့ရစဉ်

ဟာရီကိန်းဟာ ပြီးခဲ့တဲ့ ယူရို ၂၀၂၄ ပြိုင်ပွဲမှာ ခြေစွမ်း မပြသနိုင်ခဲ့လို့ ဝေဖန်မှုတွေ ခံခဲ့ရပေမယ့် ဒီသွင်းဂိုးတွေနဲ့ ဝေဖန်သူတွေကို နှုတ်ဆိတ်စေခဲ့တာပါ။

ဟာရီကိန်းက “ဒါက ကျနော့်အတွက် အလွန်ဂုဏ်ယူစရာ ကောင်းတဲ့ညပါ။ ကျနော်ဟာ ဂိုးတွေသွင်းပြီး အသင်းကို ကူညီချင်ပါတယ်။ သံသယဝင်တဲ့ လူတိုင်းကို မှားယွင်းကြောင်း သက်သေပြသဖို့အတွက် ပိုပြီးဆာလောင်လာ ပါတယ်။ သွင်းဂိုးတွေနဲ့အတူ အနာဂတ်အတွက် အလွန်စိတ်လှုပ်ရှားမိတယ်”လို့ ပြောခဲ့ပါတယ်။ 
အင်္ဂလန်အသင်းဟာ ဖင်လန်အသင်းကို အနိုင်ရခဲ့တာကြောင့် ယာယီနည်းပြ လီကာစလေလက်ထက် ကစားခဲ့တဲ့ ၂ ပွဲစလုံးကို ရာနှုန်းပြည့် နိုင်ပွဲရယူနိုင်ခဲ့ပြီး ပေးဂိုးလည်း ပေးရခြင်း မရှိသေးတာပါ။ 

အင်္ဂလန်အသင်းဟာ လာမယ့် အောက်တိုဘာလထဲမှာ နောက်ထပ် နေးရှင်းလိဂ်ပွဲစဉ်တွေအဖြစ် ဂရိ၊ ဖင်လန် အသင်းတို့နဲ့ ယှဉ်ပြိုင်ရမှာဖြစ်ပါတယ်။ 

Source: CNA

CNI Sport News

၂၀၂၄ ခုနှစ်၊ စက်တင်ဘာ ၁၀

ယူနိုက်တက်အသင်းဟာ ဒဏ်ရာကနေ ပြန်လည် သက်သာလာပြီဖြစ်တဲ့ တိုက်စစ်မှူး ဟော့ဂျ်လန်းကို အလျင်စလို အသုံးမပြုချင်သေးတာကြောင့် ကစားသမားဟာ လာမယ့် ဆောက်သမ်တန်အသင်းနဲ့ပွဲစဉ်မှာ ပါဝင်နိုင်ဖွယ် မရှိဘူးလို့ သတင်းတွေ ထွက်ပေါ်လာခဲ့ပါတယ်။

ဟော့ဂျ်လန်းဟာ အာဆင်နယ်အသင်းနဲ့ ကစားခဲ့တဲ့ ရာသီကြိုခြေစမ်းပွဲစဉ်မှာ တံကောက်ကြောဒဏ်ရာ ရရှိခဲ့တာ ကြောင့် ဒီရာသီမှာ ယူနိုက်တက်အသင်းအတွက် ပါဝင်ကစားရခြင်း မရှိသေးပါဘူး။

ဒိန်းမတ်တိုက်စစ်မှူးဟာ ရာသီအစ ပွဲစဉ်တွေကို လွဲချော်ခဲ့ပေမယ့် နိုင်ငံတကာပွဲစဉ်အပြီး ပြန်ကစားမယ့် ဆောက်သမ်တန်အသင်း နဲ့ပွဲစဉ်မှာ ကြံ့ခိုင်မှုအပြည့်နဲ့ ပါဝင်နိုင်ဖို့ မျှော်လင့်ခဲ့တာပါ။ 

ဒါပေမယ့် ယူနိုက်တက်အသင်းဟာ ဟော့ဂျ်လန်း နောက်ထပ် ဒဏ်ရာရရှိမှာကို စိုးရိမ်တာကြောင့် သူ့ရဲ့ ပြန်လာနိုင်မှုဟာ နှောင့်နှေးနိုင်တယ်လို့ ESPN က ဖော်ပြထားပါတယ်။ 

ဟော့ဂျ်လန်းရဲ့ အခြေအနေကို ဒီရက်သတ္တပတ်ထဲမှာ အကဲဖြတ်မှုတွေ ပြုလုပ်မှာဖြစ်တာကြောင့် ကစားသမား ဟာ ပါဝင်နိုင်ဖွယ် ရှိနေသေးပေမယ့် ယူနိုက်တက်အသင်းဟာ သူ့ကို သတိထားပြီး ချဉ်းကပ်မှုတွေ ပြုလုပ်သွားဖို့ ရှိနေတာပါ။ 

 ဟော့ဂျ်လန်းကို တွေ့ရစဉ် 

ဟော့ဂျ်လန်းဟာ ဆောက်သမ်တန် အသင်းနဲ့ပွဲစဉ်မှာ မပါဝင်နိုင်ခဲ့ရင်လည်း ဘန်စလေအသင်းနဲ့ ကာရာဘောင်း ဖလားပွဲစဉ်၊ ပဲလေ့စ်အသင်းနဲ့ ပရီးမီးယားလိဂ် ပွဲစဉ်တွေမှာ ယူနိုက်တက်အသင်းအတွက် စတင်ပါဝင်နိုင်တာ ဖြစ်ပါတယ်။ 

ယူနိုက်တက်အသင်းနည်းပြ အဲရစ်တန်ဟတ်ဟာ ဒီရာသီ အစပိုင်းမှာကတည်းက ဒဏ်ရာထိုးနှက်ချက်တွေနဲ့ ရင်ဆိုင်နေရပြီး ဟော့ဂျ်လန်း အပါအဝင် လုပ်ခ်ရှော၊ ယိုရိုနဲ့ မာလာစီယာတို့ဟာ အသင်းအတွက် ပါဝင်နိုင်ခြင်း မရှိသေးတာပါ။ 

ကွင်းလယ်လူ မေဆန်မောင့်ကလည်း တံကောက်ကြောဒဏ်ရာကြောင့် အောက်တိုဘာလအထိ အနားယူရဖွယ် ရှိနေပါတယ်။ 

ယူနိုက်တက်အသင်းဟာ ဒီရာသီအစပိုင်းမှာ တိုက်စစ်ပိုင်းက သွင်းဂိုး ရယူနိုင်ဖို့  ရုန်းကန်နေရပြီး ပရီးမီးယားလိဂ် ၃ ပွဲကစားအပြီးမှာ ၂ ဂိုးသာ သွင်းယူထားနိုင်တာပါ။ 

ဆောက်သမ်တန် အသင်းနဲ့ပွဲစဉ်မှာ ဟော့ဂျ်လန်း မပါဝင်နိုင်ရင် နည်းပြ အဲရစ်တန်ဟတ်ဟာ ဒတ်ချ်တိုက်စစ်မှူး ဇက်ခ်ဇီကို ပွဲထွက်လူစာရင်းမှာ ထပ်ပြီး အသုံးပြုသွားဖို့ရှိနေတာ ဖြစ်ပါတယ်။ 

Source: Metro

CNI Sport News

၂၀၂၄ ခုနှစ်၊ စက်တင်ဘာ ၁၀

အိုင်ယာလန် လက်ရွေးစင်ဂိုးသမား ကယ်လီဟာက သူဟာ ပုံမှန်ပွဲ ကစားခွင့်ရဖို့အတွက် လီဗာပူးလ်အသင်းကနေ ထွက်ခွာချင်တယ်လို့ ပြောလိုက်ပါတယ်။

ကယ်လီဟာက “ကျနော်ဟာ နံပါတ်တစ် ဂိုးသမားဖြစ်ချင်ပြီး အပတ်တိုင်း ပုံမှန်ပွဲကစားခွင့်ရမယ့် အသင်းကို သွားချင်တယ်ဆိုတာ ပြီးခဲ့တဲ့နှစ် အနည်းငယ်ကတည်းက ရှင်းရှင်းလင်းလင်း ပြောပြီးသားပါ။ ကလပ်က နောက်ထပ် ဂိုးသမားကို ခေါ်ယူဖို့ဆုံးဖြတ်ခဲ့ပြီး ဒါကိုကြည့်ရတာ သူတို့ဟာ တခြားလမ်းကြောင်းကို သွားဖို့ ဆုံးဖြတ်လိုက်တဲ့ပုံပါပဲ”လို့ ပြောခဲ့တာပါ။

ကယ်လီဟာဟာ လီဗာပူးလ်အသင်းမှာ ဘရာဇီးလ်ဂိုးသမား အလီဆွန်ရဲ့ အရန်ဂိုးသမားအဖြစ်သာ ရှိနေပြီး ပထမဦးစားပေး ဂိုးသမားဖြစ်ချင်တဲ့ သူ့ရဲ့ဆန္ဒကို မကြာခဏဆိုသလို ပြောနေခဲ့တာ ဖြစ်ပါတယ်။

ဒါပေမယ့် လီဗာပူးလ်အသင်းဟာ ဗလင်စီယာအသင်းဂိုးသမား မာမာဒက်ရှ်ဗီလီကို ပြီးခဲ့တဲ့လက ပေါင်သန်း ၃၀ နဲ့ ခေါ်ယူပြီးနောက် အန်ဖီးလ်ကလပ်မှာ နံပါတ်တစ် ဂိုးသမားဖြစ်ချင်တဲ့ ကယ်လီဟာရဲ့ မျှော်လင့်ချက်ကို ထိခိုက် စေခဲ့တာပါ။ 

ကယ်လီဟာကို တွေ့ရစဉ်

ကယ်လီဟာဟာ လာမယ့်ရာသီမှာ လီဗာပူးလ်အသင်းထံ ရောက်ရှိလာမယ့် မာမာဒက်ရှ်ဗီလီကြောင့် ရာသီအကုန် မှာ အသင်းကနေ ထွက်ခွာဖို့ရှိနေတာ ဖြစ်ပါတယ်။

နော်တင်ဟမ်ဖောရက်စ်အသင်းဟာ နွေရာသီက ကယ်လီဟာကို ခေါ်ယူဖို့ ကမ်းလှမ်းခဲ့ပေမယ့် လီဗာပူးလ် အသင်းက ပယ်ချခဲ့တာပါ။ 

အသက် ၂၅ နှစ်အရွယ်ရှိ ကယ်လီဟာဟာ လီဗာပူးလ်အသင်း လူငယ်စီမံကိန်းက ထွက်ပေါ်လာတဲ့သူဖြစ်ပြီး ၂၀၁၉ ခုနှစ်မှာ အသင်းကြီးအတွက် စတင်ပါဝင်ခွင့်ရရှိခဲ့ပါတယ်။ 

လီဗာပူးလ်အသင်းအတွက် ၄၇ ပွဲ ပါဝင်ကစားထားတဲ့ ကယ်လီဟာနဲ့ အသင်းတို့ ချုပ်ဆိုထားတဲ့ စာချုပ်ဟာ ၂၀၂၆ ခုနှစ်၊ဇွန်လ ၃၀ ရက်ဆိုရင် ကုန်ဆုံးမှာဖြစ်ပါတယ်။ 

Source: Metro

CNI Sport News

၂၀၂၄ ခုနှစ်၊ စက်တင်ဘာ ၁၀

ဘယ်လ်ဂျီယံအသင်းခေါင်းဆောင် ဒီဘရိုင်းက ပြင်သစ်အသင်းကို အရေးနိမ့်ခဲ့တဲ့ နေးရှင်းလိဂ် ပွဲစဉ်အပြီးမှာ သူ့ရဲ့ အသင်းဖော်တွေကို ပြစ်တင်ဝေဖန်မှုတွေ ပြုလုပ်သွားခဲ့ပါတယ်။

ဒီဘရိုင်းက “ဘာတွေမှားခဲ့လဲဆိုတာ ဒီနေရာမှာ ကျနော်မပြောနိုင်ပါဘူး။ မီဒီယာမှာ ထပ်ပြီး မပြောတော့ပေမယ့် နည်းလမ်းတိုင်းက ပိုပြီးကောင်းမွန်ရပါမယ်။ ကျနော်တို့ဟာ အကောင်းဆုံးကို ရောက်ရှိချင်ပေမယ့် ဒီအဆင့်ကို ရောက်ရှိဖို့ မလုံလောက်ဘူးဆိုရင် အရာအားလုံးကိုပေးရမှာပါ။ ဒီလိုမလုပ်နိုင်ဘူးဆိုရင် ပြီးဆုံးသွားပါပြီ။ ကျနော် တို့ဟာ ၂၀၁၈ တုန်းကလောက် မကောင်းဘူးဆိုတာ လက်ခံပေမယ့် တခြားအရာတွေကတော့ လက်ခံနိုင်စရာ မရှိဘူး”လို့ ပြောခဲ့တာပါ။

ဘယ်လ်ဂျီယံအသင်းဟာ ပြင်သစ်အသင်းနဲ့ ကစားခဲ့တဲ့ နေးရှင်းလိဂ်ပွဲစဉ်မှာ ၂ ဂိုး-ဂိုးမရှိနဲ့ အရေးနိမ့်ခဲ့တာ ဖြစ်ပါတယ်။ 

ဘယ်လ်ဂျီယံအသင်းဟာ ဒီပွဲမှာ ပြင်သစ်အသင်းကို ဂိုးကန်သွင်းမှု အများအပြား ခွင့်ပြုခဲ့ရသလို သူတို့လည်း ဂိုးရနိုင်မယ့် အခွင့်အရေးတွေ ရခဲ့ပေမယ့် အသုံးမချနိုင်ခဲ့တာပါ။

အဲဒါကြောင့် ဒီဘရိုင်းဟာ ပွဲအပြီးမှာ အလွန်စိတ်ပျက်နေခဲ့ပြီး သူတို့အများကြီး မှားယွင်းခဲ့တယ်လို့ ပြောခဲ့ပါတယ်။ 

 ဒီဘရိုင်းကို တွေ့ရစဉ်

ဘယ်လ်ဂျီယံအသင်းနည်းပြ တီဒက်စ်ကိုက ဒီဘရိုင်းဟာ အသင်းခေါင်းဆောင်ဖြစ်ပြီး နိုင်လိုစိတ်ကြီးမားတဲ့ သူဖြစ်တဲ့အတွက် သူ့ရဲ့ဒေါသကို နားလည်တယ်လို့ ပွဲအပြီးအင်တာဗျူးမှာ ပြောခဲ့တာပါ။ 

ဘယ်လ်ဂျီယံအသင်းဟာ နေးရှင်းလိဂ် အုပ်စုပထမပွဲစဉ်မှာ အစ္စရေးအသင်းကို ၃ ဂိုး-၁ ဂိုးနဲ့ အနိုင်ရခဲ့ပေမယ့် ဒုတိယပွဲစဉ်မှာ အရေးနိမ့်ခဲ့ပြီး ပြင်သစ်အသင်းကတော့ အုပ်စုပထမပွဲစဉ်မှာ အီတလီအသင်းကို အရေးနိမ့်ခဲ့တာ ဖြစ်ပါတယ်။ 

အဲဒါကြောင့် ပြင်သစ်အသင်းဟာ နေးရှင်းလိဂ်အုပ်စု ၂ ပွဲ ကစားအပြီးမှာ ပထမဆုံးနိုင်ပွဲကို ရယူနိုင်ခဲ့တာပါ။ 

၂၀၂၄-၂၅ နေးရှင်းလိဂ် အုပ်စု A2 ရဲ့ ၂ ပွဲစီ ကစားအပြီးမှာ အီတလီအသင်းက ရမှတ် ၆ မှတ် ရရှိထားပြီး ပြင်သစ်နဲ့ ဘယ်လ်ဂျီယံအသင်းက ၃ မှတ်စီ ရရှိထားကာ အစ္စရေးအသင်းကတော့ ရမှတ်မရရှိသေးတာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ စက်တင်ဘာ ၁၀

နော်ဝေအသင်းခေါင်းဆောင် အိုဒီဂတ်ဟာ အာဆင်နယ်အသင်းရဲ့ လန်ဒန်ဒါဘီပွဲစဉ် မတိုင်ခင် သြစတြီးယား အသင်းနဲ့ နေးရှင်းလိဂ်ပွဲစဉ်မှာ ခြေချင်းဝတ်ဒဏ်ရာ ရရှိသွားခဲ့ပါတယ်။ 

နော်ဝေအသင်းက သြစတြီးယားအသင်းကို ၂ ဂိုး-၁ ဂိုးနဲ့ အနိုင်ရခဲ့တဲ့ ဒီပွဲစဉ်မှာ အိုဒီဂတ်ဟာ ဒဏ်ရာကြောင့် ကွင်းအတွင်း ကုသမှုခံယူချိန် သူ့ရဲ့မျက်နှာကို လက်နဲ့အုပ်ထားခဲ့တာပါ။ 

အိုဒီဂတ်ဟာ သြစတြီးယားကစားသမားရဲ့ ဖျက်ထုတ်မှုကြောင့် အလွန်နာကျင်နေခဲ့ပြီး ကွင်းထဲကနေ ထွက်ခွာ ချိန်မှာ ငိုကြွေးနေခဲ့တာ ဖြစ်ပါတယ်။

မန်စီးတီးအသင်းတိုက်စစ်မှူး ဟာလန်းက သူ့ရဲ့အသင်းဖော် အိုဒီဂတ်ကို နှစ်သိမ့်မှုတွေ ပြုလုပ်ခဲ့ပါတယ်။ 

နော်ဝေအသင်းနည်းပြ ဆိုလ်ဘက်ကန်က “အိုဒီဂတ်ဟာ အဝတ်လဲခန်းထဲမှာ နာကျင်နေတာကို မြင်တွေ့ ခဲ့ရပါတယ်။ ခြေချင်းဝတ် ထိခိုက်ခဲ့တာဖြစ်ပြီး အရွတ်မပြဲဘူးဆိုရင်တော့ ကံကောင်းပြီး အဆင်ပြေသွားနိုင်ပါတယ်”လို့ TV2 ကို ပြောခဲ့တာပါ။

အိုဒီဂတ်ကို တွေ့ရစဉ်

နော်ဝေအသင်းဆရာဝန်က အိုဒီဂတ်ရဲ့ဒဏ်ရာအခြေအနေကို ဟိုတယ်ပြန်ရောက်ရင် အာထရာဆောင်း အသုံးပြု ပြီး စစ်ဆေးမှုတွေ ပြုလုပ်သွားမှာဖြစ်သလို MRI ရိုက်ပြီးလည်း စစ်ဆေးနိုင်တယ်လို့ ပြောခဲ့ပါတယ်။ 

အိုဒီဂတ်ရဲ့ ဒဏ်ရာဟာ အာဆင်နယ်အသင်းနည်းပြ အာတီတာအတွက်တော့ အလွန်စိတ်ပျက် စရာဖြစ်ခဲ့ရတာပါ။ 

အာဆင်နယ်အသင်းဟာ ဒီတစ်ပတ် ပရီးမီးယားလိဂ်ပွဲစဉ်အဖြစ် စပါးအသင်းနဲ့ လန်ဒန်ဒါဘီပွဲစဉ် ယှဉ်ပြိုင်ရမှာ ဖြစ်ပြီး ကွင်းလယ်လူ ဒီကလန်ရိုက်စ်ဟာ ပွဲပယ်ကြောင့် ပါဝင်နိုင်မှာ မဟုတ်သလို ကစားသမားသစ် မယ်ရီနိုက လည်း ဒဏ်ရာကြောင့် လွဲချော်မှာ ဖြစ်ပါတယ်။ 

လက်ရှိအချိန်မှာ အိုဒီဂတ်ဟာ ဒဏ်ရာကြောင့် စပါးအသင်းနဲ့ပွဲကို လွဲချော်နိုင်ပြီး အီတလီနောက်ခံလူ ကာလာဖီအိုရီကလည်း ပြင်သစ်အသင်းနဲ့ပွဲစဉ်မှာ ရခဲ့တဲ့ဒဏ်ရာကြောင့် အီတလီအသင်းလူစာရင်းကနေ နုတ်ထွက်ထားတာပါ။ 

အဲဒါကြောင့် အာဆင်နယ်အသင်းဟာ စပါးအသင်းနဲ့ပွဲစဉ်ကို အဓိက ကစားသမားအချို့ မပါဝင်ဘဲ ယှဉ်ပြိုင်ရဖို့ ရှိနေတာ ဖြစ်ပါတယ်။ 

Source: ESPN

CNI Sport News

၂၀၂၄ ခုနှစ်၊ စက်တင်ဘာ ၉

အာဂျင်တီးနားအသင်းနည်းပြ စကာလိုနီက ခြေချင်းဝတ် ဒဏ်ရာကနေ ပြန်လည်ကောင်းမွန်လာဖို့ နီးစပ် နေပြီဖြစ်တဲ့ အသင်းခေါင်းဆောင် မက်ဆီဟာ လာမယ့်နှစ်ပတ်အတွင်း ပြန်ကစားနိုင်မယ်လို့ ယုံကြည်မှု ရှိနေပါတယ်။

စကာလိုနီက “မက်ဆီဟာ ထူးခြားတဲ့ ကစားသမားဖြစ်တဲ့အတွက် ဘောလုံးနဲ့ ပတ်သက်ရင် သူ့အပေါ် မမှီခိုဖို့က အသင်းတစ်သင်းအတွက် ခက်ခဲပါတယ်။ မက်ဆီဟာ ခန့်မှန်းခြေ နှစ်ပတ်အတွင်း ပြန်ကစားနိုင်မယ်လို့ ကျနော် ထင်ပါတယ်။ ပြီးရင်တော့ သူ့ရဲ့ကြံ့ခိုင်မှု အခြေအနေကို ကျနော်တို့ စောင့်ကြည့်ရမှာပါ”လို့ ပြောခဲ့တာပါ။ 

မက်ဆီဟာ ပြီးခဲ့တဲ့ ကိုလံဘီယာအသင်းနဲ့ ကိုပါအမေရိကဖလား ဗိုလ်လုပွဲမှာ ဒဏ်ရာ ရရှိပြီးကတည်းက အင်တာမိုင်ယာမီအသင်းအတွက် ပါဝင်ကစားနိုင်ခြင်း မရှိတော့သလို အာဂျင်တီးနားအသင်းနဲ့ ကမ္ဘာ့ဖလား ခြေစစ်ပွဲ ၂ ပွဲစလုံးကို လွဲချော်ခဲ့တာဖြစ်ပါတယ်။ 

ခြေချင်းဝတ် ဒဏ်ရာရရှိနေတဲ့ မက်ဆီဟာ မကြာသေးခင်က အင်တာမိုင်ယာမီအသင်းနဲ့ လေ့ကျင့်မှုတွေ ပြန်လည် ပြုလုပ်နေပြီ ဖြစ်တာပါ။

 မက်ဆီကို တွေ့ရစဉ်

အဲဒါကြောင့် အာဂျင်တီးနားအသင်းနည်းပြ စကာလိုနီက မက်ဆီ နှစ်ပတ်အတွင်း ပြန်ကစားနိုင်မယ်လို့ ပြောခဲ့တာ ဖြစ်ပါတယ်။

အင်တာမိုင်ယာမီအသင်းနည်းပြ မာတီနိုက မက်ဆီကို မေဂျာလိဂ် ပလေးအော့ဖ်ပွဲတွေ မတိုင်ခင်မှာ အသင်း အတွက် အသုံးပြုနိုင်ဖို့ မျှော်လင့်ထားတာပါ။ 

မက်ဆီအနေနဲ့ ဒဏ်ရာကသက်သာပြီး ကြံ့ခိုင်မှု အပြည့်အဝရှိမယ်ဆိုရင် အာဂျင်တီးနားအသင်းဟာ သူ့ကို အောက်တိုဘာလ နိုင်ငံတကာပွဲစဉ်တွေအတွက် လူစာရင်းမှာ ရွေးချယ်သွားဖို့ရှိနေပါတယ်။ 

သတင်းတွေအရ မက်ဆီဟာ စက်တင်ဘာ ၁၄ ရက်မှာ ကစားမယ့် ဖီလာဒဲလ်ဖီးယားအသင်းနဲ့ မေဂျာလိဂ်ပွဲစဉ်မှာ အင်တာမိုင်ယာမီအသင်းအတွက် ပါဝင်လာနိုင်တယ်လို့ ဖော်ပြထားတာ ဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ စက်တင်ဘာ ၉

အိန္ဒိယစူပါလိဂ် ကလပ်အသင်း တစ်သင်းဟာ အီတလီတိုက်စစ်မှူးဟောင်း ဘာလော့တယ်လီကို ခေါ်ယူနိုင်မယ့် အခွင့်အရေးရခဲ့ပေမယ့် ငြင်းပယ်ခဲ့ပါတယ်။ 

ပြီးခဲ့တဲ့နွေရာသီက တူရကီကလပ် ဒီမာစပေါ်အသင်းမှာ ကစားခဲ့တဲ့ ဘာလော့တယ်လီဟာ ရာသီကုန်ချိန်မှာ ထွက်ခွာခဲ့ပြီးနောက် အသင်းလက်မဲ့ ဖြစ်နေခဲ့တာပါ။

ဘာလော့တယ်လီဟာ နွေရာသီမှာ စိန်ခေါ်မှုအသစ်တွေကို ရှာဖွေဖို့ အခွင့်အရေးရခဲ့ပြီး ကီရာလာဘလာစတာ အသင်းနဲ့ အပြောင်းအရွှေ့အတွက် ချိတ်ဆက်မှုတွေ ရှိခဲ့တယ်လို့ သတင်းထွက်ပေါ်လာခဲ့တာ ဖြစ်ပါတယ်။ 

ဒါပေမယ့် The Times of India က အိန္ဒိယစူပါလိဂ်ကလပ် ကီရာလာအသင်းဟာ ဘာလော့တယ်လီကို ခေါ်ယူနိုင်မယ့် အခွင့်အရေးကို ငြင်းပယ်ခဲ့တယ်လို့ ဖော်ပြထားတာပါ။

ကီရာလာအသင်းဟာ ဘာလော့တယ်လီကို မခေါ်ယူဖို့ ဆုံးဖြတ်ခဲ့တဲ့ အဓိကအကြောင်းအရင်း ၂ ခုရှိတယ်လို့လည်း သိရပါတယ်။ 

ကီရာလာအသင်းက ဘာလော့တယ်လီဟာ သူတို့ရဲ့လက်တွေ့ကျတဲ့ ပစ်မှတ်မဟုတ်ဘူးလို့ ယုံကြည်ခဲ့သလို သူ့ရဲ့ အရင်ကဖြစ်ပျက်ခဲ့တဲ့ အငြင်းပွားဖွယ် ဖြစ်ရပ်တွေကြောင့် စာချုပ် မချုပ်ဆိုခဲ့တာပါ။

ဘာလော့တယ်လီကို တွေ့ရစဉ်

ဘာလော့တယ်လီဟာ ခြေစွမ်းပိုင်း ကောင်းမွန်သူဖြစ်ပေမယ့် သူ့ရဲ့ဆိုးသွမ်းတဲ့ အပြုအမူတွေကြောင့် အသင်း အများအပြားက သူ့ကိုခေါ်ယူဖို့ ငြင်းဆန်မှုတွေရှိခဲ့တာ ဖြစ်ပါတယ်။

အင်တာမီလန်၊ မန်စီးတီး၊ အေစီမီလန်၊ လီဗာပူးလ်နဲ့ နိုက်စ်အသင်းတို့ အပါအဝင် အသင်း အများအပြားမှာ ပါဝင် ကစားခဲ့တဲ့ ဘာလော့တယ်လီဟာ ကလပ်အသင်းသစ် ရှာဖွေမှုကို ဆက်ပြီး ပြုလုပ်ရဖို့ရှိနေတာပါ။ 

ဘာလော့တယ်လီဟာ ပြီးခဲ့တဲ့ရာသီက ဒီမာစပေါ်အသင်းအတွက် ၁၆ ပွဲသာ ကစားနိုင်ခဲ့ပြီး ဒူးဒဏ်ရာကြောင့် ပွဲအများအပြားကို လွဲချော်ခဲ့ရတာ ဖြစ်ပါတယ်။ 

အသက် ၃၄ နှစ်အရွယ်ရှိ တိုက်စစ်မှူးဟာ ဒီမာစပေါ်အသင်းအတွက် ၁၆ ပွဲသာ ကစားနိုင်ခဲ့ပေမယ့် ၇ ဂိုးသွင်း ယူနိုင်ခဲ့တာပါ။ 

ဘာလော့တယ်လီဟာ အီတလီအသင်းအတွက် ၃၆ ပွဲ ပါဝင်ကစားထားပြီး ၁၄ ဂိုး သွင်းယူကာ ၂၀၁၈ ခုနှစ် နောက်ပိုင်း လက်ရွေးစင်အသင်းမှာ ပါဝင်ခြင်းမရှိတော့တာ ဖြစ်ပါတယ်။ 

Source: Goal