CNI Sport News

၂၀၂၅ ခုနှစ်၊ ဇူလိုင် ၁

အင်တာမီလန်အသင်းဟာ ဖီဖာကလပ် ကမ္ဘာ့ဖလားပြိုင်ပွဲ ၁၆ သင်းအဆင့်မှာ ဖလူမင်နန်စီအသင်းကို ၂ ဂိုး-ဂိုးမရှိနဲ့ အရေးနိမ့်ကာ ပြိုင်ပွဲကနေ ထွက်ခွာခဲ့ရပြီးနောက် အသင်းခေါင်းဆောင် လောတရိုမာတီနက်ဇ်က အသင်းကို ဝေဖန်မှု ပြုလုပ်သွားခဲ့ပါတယ်။ 

လောတရိုမာတီနက်ဇ်က “ကျနော်ဟာ အဓိကဆုဖလားတွေအတွက် တိုက်ပွဲဝင်ချင်ပါတယ်။ အင်တာမီလန်မှာ ဆက်နေချင်တဲ့သူတိုင်းက ဒီအတွက် တိုက်ပွဲဝင်ကြရမှာပါ။ ဒါပေမယ့် မနေချင်တဲ့သူတွေကတော့ ထွက်သွား နိုင်ပါတယ်။ ကျနော်တို့ဟာ အသင်းမှာ ဆက်ရှိချင်တဲ့ ကစားသမားတွေကိုပဲ လိုချင်ပါတယ်။ ဒီလိုအရေးပါတဲ့ အင်္ကျီကို ဝတ်ဆင်ထားပြီဆိုရင် ထိပ်တန်းအဆင့် စိတ်ဓါတ်မျိုးရှိဖို့ လိုပါတယ်။ ဒါမှမဟုတ်ရင်တော့ ကျေးဇူးပြုပြီး ထွက်သွားပါ”လို့ ပြောခဲ့တာပါ။ 

ဒီပွဲမှာ အင်တာမီလန်အသင်းဟာ ဖလူမင်နန်စီအသင်းဘက်ကို ဘောလုံးပိုင်ဆိုင်မှု အသာစီးနဲ့ ကစားနိုင်ခဲ့ပေမယ့် ထိရောက်တဲ့ ဂိုးပေါက် ခြိမ်းခြောက်မှု နည်းခဲ့တဲ့အတွက် ကလပ်ကမ္ဘာ့ဖလားပြိုင်ပွဲကနေ စောစီးစွာ ထွက်ခွာခဲ့ရ တာ ဖြစ်ပါတယ်။ 

ဘရာဇီးလ်ကလပ် ဖလူမင်နန်စီအသင်းအတွက် ဒီပွဲမှာ သွင်းဂိုးတွေကို ပွဲချိန် ၃ မိနစ်မှာ ကာနိုနဲ့ မိနစ် ၉၀ ပြည့်ပြီး နာကျင်အချိန်ပို ၃ မိနစ်မှာ ဟာကူလက်စ်တို့က သွင်းယူခဲ့တာပါ။ 

အင်တာမီလန်အသင်း ယှဉ်ပြိုင်နေစဉ်

အင်တာမီလန်အသင်းဟာ ပြီးခဲ့တဲ့ ချန်ပီယံလိဂ် ဗိုလ်လုပွဲမှာ PSG အသင်းကို ၅ ဂိုး-ဂိုးမရှိနဲ့ ဂိုးပြတ်အရေး နိမ့်ခဲ့သလို ကလပ်ကမ္ဘာ့ဖလား ပြိုင်ပွဲကနေ ထွက်ခဲ့ရတဲ့အတွက် ဒီရာသီကို ဆုဖလားလက်မဲ့ အဖြစ်နဲ့ အဆုံးသတ်ခဲ့ရတာဖြစ်ပါတယ်။ 

အင်တာမီလန်အသင်းခေါင်းဆောင် လောတရိုမာတီနက်ဇ်က အသင်းအတွက် ဆုဖလားတွေရရှိဖို့ တိုက်ပွဲဝင်မယ့် ကစားသမားတွေသာလိုချင်ပြီး ဆိုးရွားတဲ့ရာသီအတွက် အသင်းပရိသတ်တွေကို တောင်းပန်ကြောင်း ပြောခဲ့တာ ပါ။ 

ဒီပွဲမှာ ဖလူမင်နန်စီအသင်းကို အကောင်းဆုံး ဦးဆောင်ပြီး ကွာတားဖိုင်နယ် ရောက်ရှိအောင် ပို့ဆောင်ပေးနိုင်ခဲ့တဲ့ အသင်းခေါင်းဆောင် သီယာဂိုဆေးလ်ဗားဟာ ပွဲအပြီးမှာ ငိုကြွေးပြီးအောင်ပွဲခံခဲ့ပါတယ်။ 

၂၀၂၅ ဖီဖာကလပ် ကမ္ဘာ့ဖလားပြိုင်ပွဲကို ဝင်ရောက်ယှဉ်ပြိုင်နေတဲ့ ဘရာဇီးလ်ကလပ်အသင်း ၄ သင်းထဲမှာ ဖလူမင်နန်စီနဲ့ ပါလ်မီးရပ်စ်အသင်းတို့ ကွာတားဖိုင်နယ်တက်ခဲ့ကြပြီး ဘိုတာဖိုဂိုနဲ့ ဖလာမင်ဂိုအသင်းတို့ ၁၆ သင်းအဆင့်ကနေ ထွက်ခွာခဲ့ရတာဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဇွန် ၃၀

လီဗာပူးလ်အသင်းဟာ အင်္ဂလန်နောက်ခံလူ ဂူဟီကို ခေါ်ယူနိုင်ဖို့အတွက် စကော့တလန် တောင်ပံကစားသမား ဘန်ဒုတ်နဲ့ ခရစ္စတယ်ပဲလေ့စ်အသင်းကို ကမ်းလှမ်းဖို့ ပြင်ဆင်နေပါတယ်။ 

လီဗာပူးလ်အသင်းရဲ့ နောက်ခံလူ တစ်ဦးဖြစ်တဲ့ ကွမ်ဆာဟာ လေဗာကူဆင်အသင်းထံ ပြောင်းရွှေ့မှာ ဖြစ်တဲ့ အတွက် အသင်းဟာ သူ့ရဲ့နေရာမှာ အစားထိုးဖို့ ဂူဟီကို ခေါ်ယူချင်နေတာပါ။ 

ဂူဟီကို ခေါ်ယူဖို့ နယူးကာဆယ်အသင်း အပါအဝင် ပရီးမီးယားလိဂ် ကလပ်အသင်း အချို့ကလည်း စိတ်ဝင်စားနေ တာကြောင့် လီဗာပူးလ်အသင်းဟာ အပြောင်းအရွှေ့ဖြစ်မြောက်ဖို့ သူတို့နဲ့ ယှဉ်ပြိုင်ရဖွယ်ရှိနေတာ ဖြစ်ပါတယ်။

The Sun က ခရစ္စတယ်ပဲလေ့စ်အသင်းဟာ ပြီးခဲ့တဲ့ရာသီက မယ်ဒယ်ဘရော့အသင်းမှာ အငှားသွားရောက် ကစား ပြီး ခြေစွမ်းပြသနိုင်ခဲ့တဲ့ လီဗာပူးလ်အသင်း ကြယ်ပွင့်ဘန်ဒုတ်ကို ခေါ်ယူချင်နေတယ်လို့ ဖော်ပြထားတာပါ။ 

ဘန်ဒုတ်ကို တွေ့ရစဉ်

ဘန်ဒုတ်ဟာ မယ်ဒယ်ဘရော့အသင်းအတွက် ၃ ဂိုးသွင်းပြီး ၇ ဂိုးဖန်တီးနိုင်ခဲ့ပေမယ့် အသင်းကို ပရီးမီးယားလိဂ်ထံ တန်းပြန်တက်အောင်တော့ ကူညီပေးနိုင်ခဲ့ခြင်းမရှိတာ ဖြစ်ပါတယ်။ 

အဲဒါကြောင့် လီဗာပူးလ်အသင်းဟာ ဂူဟီရဲ့ အပြောင်းအရွှေ့မှာ ဘန်ဒုတ်နဲ့ ကမ်းလှမ်းမှုပြုလုပ်ဖို့ ပြင်ဆင်နေ တာပါ။ 

ခရစ္စတယ်ပဲလေ့စ်အသင်းဟာ အသင်းနဲ့ စာချုပ် ၁ နှစ်သာ ကျန်ရှိတော့တဲ့ ဂူဟီကို ပြောင်းရွှေ့ကြေး ပေါင်သန်း ၅၀ သတ်မှတ်ထားပြီး ဒီနွေရာသီ အပြောင်းအရွှေ့မှာ မရောင်းချရင် လာမယ့်ရာသီကုန်ရင် အလွတ်နဲ့ ဆုံးရှုံးရမှာ ဖြစ်ပါတယ်။ 

လီဗာပူးလ်အသင်းဟာ လာမယ့်ရာသီမှာ ပရီးမီးယားလိဂ် ချန်ပီယံဆု ဆက်ထိန်းဖို့နဲ့ ချန်ပီယံလိဂ်ပြိုင်ပွဲမှာ အောင်မြင်မှု ရယူနိုင်ဖို့အတွက် ကစားသမားသစ် အားဖြည့်မှုတွေကို ဆက်တိုက် ပြုလုပ်နေတာပါ။ 

လီဗာပူးလ်အသင်းဟာ လက်ရှိအချိန်ထိ ဖရင်ပေါင်၊ ဖလော်ရီယန်ဗစ်ဇ်၊ ကာကတ်ဇ်၊ ပီချီနဲ့ ဝုဒ်မန်းတို့ကို ခေါ်ယူ ထားပြီး တိုက်စစ်မှူးသစ်တစ်ဦး ခေါ်ယူနိုင်ဖို့လည်း ကြိုးပမ်းနေပါတယ်။

လီဗာပူးလ်အသင်းဟာ လာမယ့် ဇူလိုင် ပထမအပတ်မှာ ရာသီကြိုလေ့ကျင့်မှု အစီအစဉ်တွေ စတင်ပြီး ဟောင်ကောင်နဲ့ ဂျပန်နိုင်ငံတွေမှာ ခြေစမ်းပွဲကစားဖို့ စီစဉ်ထားတာဖြစ်ပါတယ်။  

Source: Goal

CNI Sport News

၂၀၂၅ ခုနှစ်၊ ဇွန်လ ၃၀

ဘိုင်ယန်မြူးနစ်အသင်း တိုက်စစ်မှူး ဟာရီကိန်းက သူတို့ဟာ ဘယ်အသင်းကိုမဆို အနိုင်ယူနိုင်တယ်လို့ ပြောပြီး ဖီဖာကလပ် ကမ္ဘာ့ဖလားပြိုင်ပွဲ ကွာတားဖိုင်နယ်မှာ တွေ့ဆုံရမယ့် PSG အသင်းကို သတိပေးမှု ပြုလုပ်ခဲ့ပါတယ်။ 

ဟာရီကိန်းက “နောက်ထပ် ခက်ခဲတဲ့ပွဲ တစ်ပွဲဖြစ်လာမှာပါ။ PSG အသင်းဟာ အံ့အားသင့်စရာကောင်းတဲ့ ရာသီ တစ်ခုကို ပိုင်ဆိုင်ထားပါတယ်။ ကျနော်တို့ဟာ သူတို့နဲ့ ချန်ပီယံလိဂ်ပြိုင်ပွဲမှာ တွေ့ဆုံထားပြီး အနိုင်ယူထား ပါ တယ်။ ဒီပွဲက ခက်ခဲမယ်ဆိုတာကို ကျနော်တို့သိပေမယ့် ကျနော်တို့ရဲ့အဆင့်ကို ရောက်ရှိလာတဲ့အချိန်မှာ ဘယ် အသင်းကိုမဆို အနိုင်ယူနိုင်တယ်လို့ ကျနော်တို့ ခံစားရပါတယ်။ ကျနော်တို့ ကောင်းမွန်စွာပြင်ဆင်ပြီး ပွဲအတွက် အဆင်သင့်ဖြစ်အောင် လုပ်ရမယ်”လို့ ပြောခဲ့တာပါ။ 

ဘိုင်ယန်မြူးနစ်အသင်းဟာ ဖီဖာကလပ်ကမ္ဘာ့ဖလား ၁၆ သင်းအဆင့်မှာ ဖလာမင်ဂိုအသင်းကို ၄ ဂိုး-၂ ဂိုးနဲ့ အနိုင် ရပြီး ကွာတားဖိုင်နယ်ကို တက်နိုင်ခဲ့တာ ဖြစ်ပါတယ်။ 

ဘိုင်ယန်မြူးနစ်နဲ့ ပီအက်စ်ဂျီယှဉ်ပြိုင်နေစဉ် 

ဒီပွဲမှာ ဟာရီကိန်းဟာ ဘိုင်ယန်မြူးနစ်အသင်းအတွက် ၂ ဂိုး သွင်းယူနိုင်ခဲ့ပြီး ဒီသွင်းဂိုးတွေကြောင့် သူဟာ ဒီရာသီ အသင်းအတွက် ပြိုင်ပွဲစုံ ၄၁ ဂိုးအထိ သွင်းယူထားတာပါ။ ဘိုင်ယန်မြူးနစ်အသင်းဟာ ကွာတားဖိုင်နယ်မှာ ချန်ပီယံလိဂ်ချန်ပီယံ PSG အသင်းနဲ့ ယှဉ်ပြိုင်ရမှာဖြစ်ပါတယ်။ 

ဘိုင်ယန်မြူးနစ်နဲ့ PSG အသင်းတို့ဟာ ပြီးခဲ့တဲ့ ချန်ပီယံလိဂ်ပြိုင်ပွဲ အုပ်စုအဆင့်မှာ တွေ့ဆုံခဲ့ပြီး ဘိုင်ယန်မြူးနစ် အသင်းက ၁ ဂိုး-ဂိုးမရှိနဲ့ အနိုင်ရခဲ့တာပါ။ 

ဒါပေမယ့် PSG အသင်းဟာ အုပ်စုအဆင့် ပွဲစဉ်တွေ ပြီးဆုံးခါနီးမှာ အလွန်ကောင်းမွန်တဲ့ ခြေစွမ်းတွေပြသနိုင်ခဲ့ပြီး ချန်ပီယံလိဂ်ဖလားကို ရရှိခဲ့တာဖြစ်ပါတယ်။ 

ဘိုင်ယန်မြူးနစ်အသင်း နည်းပြကွန်ပနီက သူတို့ဟာ PSG အသင်းနဲ့ ပွဲစဉ်အတွက် အဆင်သင့်ဖြစ်အောင် ပြုလုပ်ရမယ်လို့ ပြောခဲ့တာပါ။ 

ဘိုင်ယန်မြူးနစ်နဲ့ PSG အသင်းတို့ရဲ့ ဖီဖာကလပ် ကမ္ဘာ့ဖလား ကွာတားဖိုင်နယ် ပွဲစဉ်ကို ဇူလိုင် ၅ ရက်မှာ ယှဉ်ပြိုင်သွားမှာ ဖြစ်ပါတယ်။ 

Source:tntsport 

CNI Sport News

၂၀၂၅ ခုနှစ်၊ ဇွန်လ ၃၀

မာဆေးလ်အသင်းပိုင်ရှင် ဖရန့်ခ်မက်ကော့က တိုက်စစ်မှူး ဂရင်းဝုဒ်ကို အသင်းမှာ ဆက်ထိန်းထားချင်ပြီး လာမယ့် ရာသီမှာ PSG အသင်းကို စိန်ခေါ်နိုင်အောင် ကြိုးစားဖို့ ပြောခဲ့ပါတယ်။ 

ဖရန့်ခ်မက်ကော့က “ဂရင်းဝုဒ် အပါအဝင် အဓိက ကစားသမားတွေကို ဆက်ထိန်းထားချင်တာက ကျနော့်ရဲ့ ဆန္ဒပါ။ ကျနော်က အားကစားဒါရိုက်တာ မဟုတ်သလို ဥက္ကဋ္ဌလည်း မဟုတ်ပါဘူး။ ကျနော့်ရဲ့ ရည်ရွယ်ချက် ကတော့ ပါဘလို၊ ဘီနာတီယာနဲ့ သူတို့ရဲ့အသင်းတွေကို ရေတို၊ အလယ်အလတ်နဲ့ ရေရှည်တွေမှာ အကောင်းဆုံး ဆုံးဖြတ်ချက်တွေ ချနိုင်ဖို့အတွက် အကောင်းဆုံး အခြေအနေမှာ ရှိအောင်ထားဖို့ပါ။ နာမည်ဖော်ပြခဲ့တဲ့ ကစားသမားတွေကို အသင်းမှာ ဆက်ထိန်းပြီး သူတို့ရဲ့ဝန်းကျင်မှာ အသင်းကို တည်ဆောက်သွားမယ်”လို့ JDD ကို ပြောခဲ့တာပါ။

ပြီးခဲ့တဲ့နွေရာသီက ယူနိုက်တက်အသင်းကနေ ရောက်ရှိလာခဲ့တဲ့ ဂရင်းဝုဒ်ဟာ မာဆေးလ်အသင်းမှာ ဆက်ရှိချင် တဲ့ သူ့ရဲ့ဆန္ဒကို ပြောထားပေမယ့် သူ့ရဲ့အနာဂတ်နဲ့ ပတ်သက်တဲ့ ထင်ကြေးတွေ အများအပြား ထွက်ပေါ်နေတာ ဖြစ်ပါတယ်။ 

မာဆေးလ်အသင်းအတွက် ပွဲဦးထွက် ရာသီမှာ ၂၂ ဂိုးအထိ သွင်းယူနိုင်ခဲ့တဲ့ ဂရင်းဝုဒ်ရဲ့ စာချုပ်ဟာ ၄ နှစ် ကျန်ရှိနေသေးတာပါ။

ဆန္ဒပြသူနဲ့ ရဲတပ်ဖွဲ့ အဓိကရုဏ်းဖြစ်ပွားနေစဉ်

မာဆေးလ်အသင်းဟာ ပြီးခဲ့တဲ့ရာသီက ပြင်သစ်လီဂူး-၁ ပြိုင်ပွဲမှာ PSG အသင်းရဲ့နောက် အဆင့် ၂ နေရာနဲ့ ရာသီ အဆုံးသတ်ခဲ့တာ ဖြစ်ပါတယ်။ 

အဲဒါကြောင့် မာဆေးလ်အသင်းဟာ လာမယ့်ရာသီ ချန်ပီယံလိဂ်ပြိုင်ပွဲကို ယှဉ်ပြိုင်ခွင့်ရရှိမှာပါ။ 

လက်ရှိအချိန်မှာ မာဆေးလ်အသင်းရဲ့အဓိက ကစားသမားတွေဖြစ်တဲ့ ရာဘီယော့၊ ဘယ်လာဒီ၊ ဂိုယူရီနဲ့ ဂရင်းဝုဒ် တို့ဟာ အပြောင်းအရွှေ့ သတင်းတွေ ထွက်ပေါ်နေတာ ဖြစ်ပါတယ်။ 

မာဆေးလ်အသင်း ပိုင်ရှင်ကတော့ သူတို့တွေကို အသင်းမှာ ဆက်ထိန်းသိမ်းမှာ ဖြစ်သလို လူစာရင်းကို ပိုပြီး အားကောင်းလည်း ပြုလုပ်ချင်နေတာပါ။ 

မာဆေးလ်အသင်းဟာ ဒီနွေရာသီ အပြောင်းအရွှေ့မှာ လိုင်လီအသင်းနဲ့ စာချုပ်ကုန်ဆုံးခဲ့ပြီဖြစ်တဲ့ အိန်ဂျယ်လ် ဂိုးမက်စ်ကို ခေါ်ယူထားသလို အင်္ဂလန်ကွင်းလယ်လူ ဟန်ဒါဆန်ကို ခေါ်ယူဖို့လည်း ချိတ်ဆက်မှုတွေ ပြုလုပ် နေတာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဇွန်လ ၃၀

အင်တာမိုင်ယာမီအသင်းဟာ ဖီဖာကလပ် ကမ္ဘာ့ဖလားပြိုင်ပွဲ ၁၆ သင်းအဆင့်မှာ PSG အသင်းကို ၄ ဂိုး-ဂိုးမရှိနဲ့ ဂိုးပြတ် အရေးနိမ့်ပြီး ပြိုင်ပွဲကနေ ထွက်ခွာခဲ့ရပေမယ့် အသင်းခေါင်းဆောင် မက်ဆီက သူတို့ဟာ ဒီပြိုင်ပွဲမှာ ကောင်းမွန်တဲ့ပုံရိပ် ချန်ထားနိုင်ခဲ့တယ်လို့ ပြောခဲ့ပါတယ်။

မက်ဆီက “ပွဲကတော့ မျှော်လင့်ထားသလိုပါပဲ။ PSG အသင်းဟာ ကြီးမားတဲ့ အသင်းဖြစ်ပြီး နောက်ဆုံး ကစား ထားတဲ့ ချန်ပီယံလိဂ်ပြိုင်ပွဲမှာ ဗိုလ်စွဲထားတဲ့အသင်းပါ။ ဒါက အလွန်ကောင်းမွန်ပါတယ်။ ကျနော်တို့ဟာ ဖြစ်နိုင် သမျှ အကောင်းဆုံး ကြိုးစားကစားခဲ့ကြပြီး ကလပ်ကမ္ဘာ့ဖလားအဆင့်မှာ ကောင်းမွန်တဲ့ပုံရိပ်ကို ချန်ထားနိုင်ခဲ့ ပါတယ်”လို့ ပွဲအပြီးအင်တာဗျူးမှာ ပြောခဲ့ပါတယ်။ 

ဒီပွဲရဲ့ပထမပိုင်းမှာ အင်တာမိုင်ယာမီအသင်းဟာ PSG အသင်းကို သွင်းဂိုး ၄ ဂိုးစလုံး ခွင့်ပြုခဲ့ရတာဖြစ်ပြီး ဂိုးပေါက် ကန်သွင်းမှုတောင် ပြုလုပ်နိုင်ခဲ့ခြင်း မရှိခဲ့တာဖြစ်ပါတယ်။

အင်တာမိုင်ယာမီအသင်းဟာ ဒုတိယပိုင်းရောက်မှသာ ဂိုးသွင်းနိုင်မယ့် အခွင့်အရေးတွေ ရခဲ့ပေမယ့် PSG အသင်း ကို အရေးနိမ့်ပြီး ကလပ်ကမ္ဘာ့ဖလား ပြိုင်ပွဲကနေ ထွက်ခွာခဲ့ရတာပါ။ 

အင်တာမိုင်ယာမီအသင်းဟာ ပြီးခဲ့တဲ့အုပ်စု နောက်ဆုံးပွဲစဉ်မှာ ပါလ်မီးရပ်စ်အသင်းကို ၂ ဂိုးပြတ်နဲ့ ဦးဆောင် ထားပေမယ့် ပွဲပြီးခါနီးမှာ ချေပဂိုးတွေ ပြန်ပေးခဲ့ရတာကြောင့် အုပ်စုတွင်း ဒုတိယနေရာသာရပြီး ၁၆ သင်း အဆင့်မှာ PSG အသင်းနဲ့ တွေ့ဆုံခဲ့ရတာဖြစ်ပါတယ်။

အင်တာမိုင်ယာမီအသင်းကို တွေ့ရစဉ် 

အင်တာမိုင်ယာမီအသင်း ခေါင်းဆောင် မက်ဆီကတော့ သူတို့ဟာ ကလပ်ကမ္ဘာ့ဖလား ပြိုင်ပွဲကနေ ထွက်ခွာခဲ့ ရပြီဖြစ်လို့ နောက်လာမယ့် အရာတွေကိုပဲ စဉ်းစားရမယ်လို့ ပြောခဲ့တာပါ။

အင်တာမိုင်ယာမီအသင်း နည်းပြမာရှေယာနိုက သူတို့ဟာ ကြီးမားတဲ့ သင်ယူစရာတွေရခဲ့ပြီး ဒီပြိုင်ပွဲကနေ ရရှိခဲ့တဲ့ အတွေ့အကြုံတွေဟာ မေဂျာလိဂ်ပြိုင်ပွဲမှာ အသင်းအတွက် အထောက်အကူ ဖြစ်လိမ့်မယ်လို့ ယုံကြည် နေပါတယ်။

အင်တာမိုင်ယာမီအသင်းဟာ လာမယ့် ဇူလိုင် ၅ ရက်မှာ မေဂျာလိဂ်ပွဲစဉ်အဖြစ် မွန်ထရီရယ်လ်အသင်းနဲ့ ယှဉ်ပြိုင် ရမှာပါ။ အင်တာမိုင်ယာမီအသင်းဟာ မေဂျာလိဂ်ပြိုင်ပွဲမှာ ၁၆ ပွဲကစားထားပြီး ရမှတ် ၂၉ မှတ်နဲ့ အရှေ့ပိုင်းဇုန် အမှတ်ပေးဇယားအဆင့် ၆ နေရာမှာ ရပ်တည်နေတာဖြစ်ပါတယ်။ 

 Source: ESPN

အဲဗာတန်နဲ့ စာချုပ်သစ်ချုပ်ဆိုဖို့ ဘရန့်ဝိတ်နီးစပ်

CNI Sport News

၂၀၂၅ ခုနှစ်၊ ဇွန်လ ၂၈

အင်္ဂလန်ကြယ်ပွင့် ဘရန့်ဝိတ်ဟာ အဲဗာတန်အသင်းနဲ့ စာချုပ်သစ်ချုပ်ဆိုဖို့ နီးစပ်နေတာကြောင့် မာဆေးဆိုဒ် ကလပ်မှာ ဆက်နေဖွယ်ရှိနေပါတယ်။

ပြီးခဲ့တဲ့ ၁၂ လအတွင်းမှာ ဘရန့်ဝိတ်ရဲ့ အနာဂတ်နဲ့ ပတ်သက်တဲ့ ထင်ကြေးသတင်းတွေဟာ ဆက်တိုက်ဆိုသလို ထွက်ပေါ်ခဲ့တာပါ။ 

ပြီးခဲ့တဲ့နွေရာသီက ယူနိုက်တက်အသင်းဟာ ဘရန့်ဝိတ်ကို ပေါင် ၃၅ သန်း၊ ပေါင် ၄၅ သန်း+add-ons တွေနဲ့ ကမ်းလှမ်းမှု ၂ ခုစလုံးကို အဲဗာတန်အသင်းက ပယ်ချခဲ့ပါတယ်။ 

အခုအချိန်မှာတော့ ဘရန့်ဝိတ်ဟာ အဲဗာတန်အသင်းနဲ့ စာချုပ်သစ်အတွက် သဘောတူညီမှုရရှိဖို့ နီးစပ်နေပြီလို့ The Athletic က ဖော်ပြထားပါတယ်။ 

ပုံစာ- ဘရန့်ဝိတ်ကို တွေ့ရစဉ် 

အသင်းကြီးအချို့ရဲ့ ပစ်မှတ်ဖြစ်နေတဲ့ အသက် ၂၃ နှစ်အရွယ်ရှိ ဘရန့်ဝိတ်ကို အသင်းမှာ ဆက်ထိန်းထားချင် တယ်လို့ အဲဗာတန်အသင်းနည်းပြ ဒေးဗစ်မိုယက်စ်က သတင်းထောက်တွေနဲ့ တွေ့ဆုံချိန်မှာ ပြောထားတာပါ။ 

ဒါအပြင် ပိုင်ရှင်အသစ်ဖြစ်တဲ့ Friedkin Group ကလည်း ဘရန့်ဝိတ်ကို ရောင်းချမှာ မဟုတ်ဘူးလို့ သူ့ကိုခေါ်ယူဖို့ ကြိုးပမ်းနေတဲ့ ကလပ်အသင်းတွေကို ပြောခဲ့ပါတယ်။ 

စာချုပ်သစ်အရ ဘရန့်ဝိတ်ဟာ အဲဗာတန်အသင်းမှာ လုပ်ခလစာ အကောင်းဆုံး ကစားသမားတွေထဲက တစ်ဦး ဖြစ်လာမယ်လို့ သိရပါတယ်။ 

ဘရန့်ဝိတ်နဲ့ အဲဗာတန်အသင်းရဲ့ လက်ရှိစာချုပ်ဟာ ၂၀၂၇ ခုနှစ် ရာသီကုန်အထိ သက်တမ်းရှိနေပါတယ်။

၂၀၂၀ ခုနှစ်၊ ဇန်နဝါရီက အဲဗာတန်အသင်းကို ရောက်ရှိလာခဲ့တဲ့ ဘရန့်ဝိတ်ဟာ အသင်းအတွက် ပွဲပေါင်း ၈၆ ပွဲ ကစားထားပြီး ၄ ဂိုးသွင်းယူကာ အင်္ဂလန်အသင်းကြီးအတွက် ၁ ပွဲ ပါဝင်ကစားထားတာပါ။ 

လာမယ့်ရာသီမှာ ကွင်းသစ်ကို ပြောင်းရွှေ့ပြီး ကစားမယ့် အဲဗာတန်အသင်းဟာ ရာသီသစ်မှာ ရလဒ်ကောင်းတွေ ရယူနိုင်ဖို့ မျှော်လင့်နေတာဖြစ်ပါတယ်။ 

Source: Goal

ဆက်စ်ကိုအတွက် တောင်းဆိုတဲ့ ဈေးနှုန်းကို လိုက်ပ်ဇစ်ပြောင်းလဲ 

CNI Sport News

၂၀၂၅ ခုနှစ်၊ ဇွန်လ ၂၈

လိုက်ပ်ဇစ်အသင်းဟာ အာဆင်နယ်အသင်းရဲ့ ပစ်မှတ် ဆက်စ်ကိုအတွက် သူတို့တောင်းဆိုထားတဲ့ ဈေးနှုန်းကို ထပ်မံပြောင်းလဲဖို့ ဆုံးဖြတ်ခဲ့ပါတယ်။ 

အာဆင်နယ်အသင်းဟာ လာမယ့်ရာသီ ပရီးမီးယားလိဂ်ဖလား စိန်ခေါ်ဖို့အတွက် တိုက်စစ်မှူးသစ် တစ်ဦးခေါ်ယူ နိုင်ဖို့ ကြိုးပမ်းနေပြီး လိုက်ပ်ဇစ်အသင်း တိုက်စစ်မှူး ဆက်စ်ကိုနဲ့ စပို့တင်းလစ္စဘွန်းအသင်း တိုက်စစ်မှူး ယိုကီရက်စ်တို့ နှစ်ဦးထဲက တစ်ဦးကို ပစ်မှတ်ထားနေတာပါ။ 

အာဆင်နယ်အသင်းဟာ ယိုကီရက်စ်အတွက် စပို့တင်းလစ္စဘွန်းအသင်းနဲ့ ဆွေးနွေးမှုတွေရှိခဲ့ပြီး ကနဦး ယူရိုသန်း ၆၀ နဲ့ ကမ်းလှမ်းခဲ့ပေမယ့် အဆင်မပြေခဲ့တာ ဖြစ်ပါတယ်။

အာဆင်နယ်အသင်းဟာ ဆက်စ်ကို အတွက်လည်း ကမ်းလှမ်းမှုတွေ ပြုလုပ်နေဆဲဖြစ်ပြီး လိုက်ပ်ဇစ်အသင်းက သူ့အတွက် ပြောင်းရွှေ့ကြေးယူရိုသန်း ၈၀ နဲ့ သန်း ၁၀၀ ကြား တောင်းဆိုထားတယ်လို့ သတင်းတွေ ထွက်ပေါ်ခဲ့ တာပါ။ 

ပုံစာ- ဆက်စ်ကိုကို တွေ့ရစဉ် 

အာဆင်နယ်အသင်းဟာ ဆက်စ်ကို,ကို ခေါ်ယူချင်ပေမယ့် လိုက်ပ်ဇစ်အသင်း တောင်းဆိုတဲ့ ပြောင်းရွှေ့ကြေးကို ပေးချဖွယ်မရှိပါဘူး။ 

အပြောင်းအရွှေ့ ငြိမ်သက်မှုဖြစ်တာ ရက်သတ္တပတ် ကြာမြင့်ခဲ့ပြီးနောက်မှာ လိုက်ပ်ဇစ်အသင်းဟာ ဆက်စ်ကို အတွက် ယူရိုသန်း ၇၀ ဟာ ပိုပြီးလက်တွေ့ကျတဲ့ ဈေးနှုန်းဖြစ်တယ်လို့ ယူဆခဲ့ပါတယ်။

ဆက်စ်ကိုရဲ့အေးဂျင့်က သူတို့ဟာ နွေရာသီ အပြောင်းအရွှေ့မှာ လိုက်ပ်ဇစ်အသင်းကနေ ထွက်ခွာဖို့ အတင်းအကြပ် ကြိုးပမ်းသွားမှာ မဟုတ်ဘူးလို့ ပြောထားတာပါ။ 

ဆက်စ်ကိုဟာ မကြာသေးမီက အာဆင်နယ်အသင်းရဲ့ Instagram ကို Follow ပြုလုပ်ခဲ့ပြီးနောက် အပြောင်းအရွှေ့ အရိပ်အမြွက်ကို ချပြခဲ့တယ်လို့ ဗြိတိန်မီဒီယာတွေက ဖော်ပြထားပါတယ်။

အသက် ၂၂ နှစ် အရွယ်ရှိ ဆက်စ်ကိုဟာ ၂၀၂၃ ခုနှစ်က ဆဲလ်ဘတ်အသင်းကနေ လိုက်ပ်ဇစ်အသင်းကို ရောက်ရှိ လာခဲ့တာဖြစ်ပြီး ပွဲပေါင်း ၈၇ ပွဲ ပါဝင်ကစားထားတာမှာ ၃၉ ဂိုး သွင်းယူထားတာဖြစ်ပါတယ်။ 

Source: Metro

CNI Sport News

၂၀၂၅ ခုနှစ်၊ ဇွန်လ ၂၈

Opta စူပါကွန်ပျူတာက ချန်ပီယံလိဂ်ပြိုင်ပွဲမှာ ချန်ပီယံဆုကို ရရှိထားတဲ့ PSG အသင်းဟာ ၂၀၂၅ ဖီဖာကလပ် ကမ္ဘာ့ဖလားပြိုင်ပွဲမှာ ချန်ပီယံဖြစ်မယ်လို့ ခန့်မှန်းခဲ့ပါတယ်။

ဖီဖာကလပ် ကမ္ဘာ့ဖလားပြိုင်ပွဲဟာ အုပ်စုအဆင့်တွေ ပြီးဆုံးသွားခဲ့ပြီဖြစ်ပြီး ၁၆ သင်းအဆင့် ပွဲစဉ်တွေကို စတင် ယှဉ်ပြိုင်တော့မှာပါ။

၁၆ သင်းအဆင့်ကို ဥရောပထိပ်သီး ကလပ်တွေဖြစ်တဲ့ ရီးရယ်လ်၊ PSG၊ ဘိုင်ယန်မြူးနစ်၊ မန်စီးတီး၊ ဒေါ့မွန်၊ ချယ်လ်ဆီး၊ အင်တာမီလန်၊ ဘင်ဖီကာနဲ့ ဂျူဗင်တပ်စ်အသင်းတို့ တက်ရောက်နိုင်ခဲ့ကြပါတယ်။ 

ဒါအပြင် မက်ဆီ ဦးဆောင်တဲ့ အင်တာမိုင်ယာမီ၊ ရာမို့စ်ရဲ့ မွန်တာရေးနဲ့ ဘရာဇီးလ်ကလပ်အသင်း ၄ သင်းစလုံး နောက်တဆင့် တက်ရောက်နိုင်ခဲ့တာပါ။ 

မန်စီးတီးအသင်းကို တွေ့ရစဉ်

၁၆ သင်းအဆင့် ပွဲစဉ်တွေအဖြစ် ပါလ်မီးရပ်စ်နဲ့ ဘိုတာဖိုဂို၊ ဘင်ဖီကာနဲ့ ချယ်လ်ဆီး၊ PSG နဲ့ အင်တာမိုင်ယာမီ၊ ဖလာမင်ဂိုနဲ့ ဘိုင်ယန်မြူးနစ်၊ အင်တာမီလန်နဲ့ ဖလူမီနန့်စ်၊ မန်စီးတီးနဲ့ အယ်လ်ဟီလယ်၊ ရီးရယ်လ်နဲ့ ဂျူဗင်တပ်စ်၊ ဒေါ့မွန်နဲ့ မွန်တာရေးအသင်းတို့ ယှဉ်ပြိုင်ကြမှာ ဖြစ်ပါတယ်။

Opta စူပါကွန်ပျူတာက ၁၆ သင်းအဆင့် ပွဲစဉ်တွေ မကစားမီ ဒီပြိုင်ပွဲမှာ ချန်ပီယံဖြစ်ဖို့ PSG အသင်းထိပ်ဆုံး နေရာ ရပ်တည်နေတယ်လို့ ဖော်ပြထားတာပါ။ 

PSG အသင်းက ချန်ပီယံဖြစ်ဖို့ ၂၀.၆ ရာခိုင်နှုန်းနဲ့ နံပါတ် ၁ ၊ မန်စီးတီးအသင်းက ၂၀.၄ ရာခိုင်နှုန်းနဲ့ နံပါတ် ၂ ၊ အင်တာမီလန်အသင်းက ၁၂.၄ ရာခိုင်နှုန်းနဲ့ နံပါတ် ၃၊ ဘိုင်ယန်မြူးနစ်အသင်းက ၁၁.၃ ရာခိုင်နှုန်းနဲ့ နံပါတ် ၄၊ ချယ်လ်ဆီးအသင်းက ၁၀.၄ ရာခိုင်နှုန်းနဲ့ နံပါတ် ၅၊ ရီးရယ်လ်အသင်းက ၉.၇ ရာခိုင်နှုန်းနဲ့ နံပါတ် ၆ နေရာမှာ ရပ်တည်နေပြီး သူတို့တွေရဲ့အနောက်မှာ ဒေါ့မွန်၊ ဘင်ဖီကာ၊ ဂျူဗင်တပ်စ်အသင်းတို့ ရပ်တည်နေကြပါတယ်။ 

ဖီဖာကလပ်ကမ္ဘာ့ဖလား ၁၆ သင်းအဆင့် ပွဲစဉ်တွေကို ဇွန်လ ၂၈ ရက်ကနေ ဇူလိုင် ၂ ရက်အထိ ကျင်းပသွားမှာ ဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ ဇွန်လ ၂၈

ယူနိုက်တက်အသင်းဟာ ကင်မရွန်းတိုက်စစ်မှူး အမ်ဘူမိုကို ခေါ်ယူနိုင်ဖို့အတွက် ပေါင် ၆၂.၅ သန်းနဲ့ ပြောင်းရွှေ့ကြေးတိုးပြီး ကမ်းလှမ်းမှု ပြုလုပ်ခဲ့တာကို ဘရန်ဖို့ဒ်အသင်းက ပယ်ချခဲ့ပါတယ်။ 

ယူနိုက်တက်အသင်းဟာ ပေါင် ၅၅ သန်း၊ add-ons ပေါင် ၇.၅ သန်းနဲ့ ကမ်းလှမ်းမှုအသစ် ပြုလုပ်ခဲ့တာပါ။ 

ယူနိုက်တက်အသင်းဟာ အမ်ဘူမိုအတွက် အခုလ အစောပိုင်းက ပေါင် ၄၅ သန်း၊ add-ons ပေါင် ၁၀ သန်းနဲ့ ကမ်းလှမ်းမှု ပြုလုပ်ခဲ့တာကို ဘရန်ဖို့ဒ်အသင်းက ပယ်ချခဲ့ပြီးနောက် ပြောင်းရွှေ့ကြေးတိုးပြီး ထပ်ကမ်းလှမ်း ခဲ့ပေမယ့် ပယ်ချခံခဲ့ရတာဖြစ်ပါတယ်။

ဘရန်ဖို့ဒ်အသင်းဟာ အမ်ဘူမိုအတွက် ပြောင်းရွှေ့ကြေး အနည်းဆုံး ပေါင် ၆၅ သန်းလိုချင်နေတာပါ။ 

အမ်ဘူမိုကို တွေ့ရစဉ်

ယူနိုက်တက်အသင်းဟာ အမ်ဘူမိုကို ခေါ်ယူနိုင်ဖို့အတွက် ဘရန်ဖို့ဒ်အသင်းနဲ့ ဆွေးနွေးမှုတွေ ထပ်ပြုလုပ်ဖို့ရှိ ပေမယ့် ပြောင်းရွှေ့ကြေးနဲ့ လုပ်ခလစာတွေကို အလွန်အကျွံ သုံးစွဲဖို့မရှိတာ ဖြစ်ပါတယ်။

ပြီးခဲ့တဲ့ရာသီက ပရီးမီးယားလိဂ်ပြိုင်ပွဲမှာ သွင်းဂိုး ၂၀ အထိ သွင်းယူနိုင်ခဲ့တဲ့ အမ်ဘူမိုရဲ့ စာချုပ်ဟာ တစ်နှစ်သာ ကျန်ရှိတော့ပေမယ့် ဘရန်ဖို့ဒ်အသင်းက သူ့ကို နောက်ထပ် တစ်နှစ်သက်တမ်းတိုးဖို့ ရွေးချယ်ခွင့်ရှိနေတာပါ။ 

အမ်ဘူမိုကို ခေါ်ယူဖို့ စပါးအသင်းကလည်း စိတ်ဝင်စားနေပေမယ့် သူကတော့ ယူနိုက်တက်အသင်းကို ပြောင်းရွှေ့ဖို့ ဆန္ဒရှိနေတာဖြစ်ပါတယ်။

ယူနိုက်တက်အသင်းဟာ ဒီနွေရာသီ အပြောင်းအရွှေ့မှာ ဝုလ်ဗ်စ်အသင်းက ကွန်ညာကို ပေါင် ၆၂.၅ သန်းနဲ့ ခေါ်ယူခဲ့ပြီးနောက် ဒုတိယမြောက် ကစားသမား ခေါ်ယူမှုအဖြစ် အမ်ဘူမိုရဲ့အပြောင်းအရွှေ့ကို မကြာမီ အပြီးသတ်နိုင်ဖို့ မျှော်လင့်နေတာပါ။

ယူနိုက်တက်အသင်းဟာ ဇူလိုင် ၇ ရက်မှာ ရာသီကြို လေ့ကျင့်မှုတွေ စတင်တော့မှာဖြစ်ပြီး အမ်ဘူမိုကို အသင်းရဲ့ လေ့ကျင့်ခန်း အစီအစဉ်တွေမှာ ပါဝင်စေချင်နေတာဖြစ်ပါတယ်။ 

Source: BBC