CNI Sport News

၂၀၂၆ ခုနှစ်၊ ဇန်နဝါရီ ၁၅

ချယ်လ်ဆီးအသင်းက အာဆင်နယ်အသင်းကို ၃ ဂိုး-၂ ဂိုးနဲ့ အရေးနိမ့်ခဲ့တဲ့ ကာရာဘောင်းဖလား ဆီမီးဖိုင်နယ် ပထမ အကျော့ပွဲစဉ်မှာ ဂိုးသမားဆန်းချက်ဇ်ရဲ့ အမှားအယွင်း ၂ ခုအတွက် သူ့ကိုအပြစ်တင်ဖို့ နည်းပြရိုစီနီယာက ပြောခဲ့ပါတယ်။ 

ရိုစီနီယာက “ပထမဂိုးက စိတ်ပျက်စရာ ဖြစ်ပေမယ့် ဆန်းချက်ဇ် တစ်ဦးတည်းကြောင့် မဟုတ်ပါဘူး။ ကျနော်ဟာ သူ့ကို သူအရင်က မလုပ်ဖူးတဲ့ အရာတွေလုပ်ဖို့ တောင်းဆိုထားပြီး ပွဲမစခင်မှာ ရှင်းရှင်းလင်းလင်း ပြောထားပါ တယ်။ ကျနော့် ကစားသမားတွေ အမှားလုပ်မိရင် ကျနော် တာဝန်ယူမှာဖြစ်ပြီး ဒါက ကျနော့်အပေါ် မူတည်ပါ တယ်။ ကျနော့်အလုပ်က သူတို့ကို ကူညီဖို့ဖြစ်ပြီး အပြစ်တင်ဖို့မဟုတ်ဘူး”လို့ ပြောခဲ့တာပါ။ 

ချယ်လ်ဆီးအသင်းဟာ ဒီပွဲမှာ ဂိုးသမား ဆန်းချက်ဇ်ရဲ့ အမှား ၂ ခုကနေ အာဆင်နယ်အသင်းကို ဦးဆောင်ဂိုး ၂ ဂိုး ပေးခဲ့ရပါတယ်။

ဒါပေမယ့် ဂါနာချိုက ချယ်လ်ဆီးအသင်းအတွက် ချေပဂိုး ပြန်သွင်းခဲ့ပေမယ့် ဇူဘီမန်ဒီက အာဆင်နယ်အသင်း အတွက် တတိယမြောက် သွင်းဂိုး သွင်းယူနိုင်ခဲ့ပါတယ်။

ချယ်လ်ဆီးအသင်းအတွက် နောက်ထပ် ချေပဂိုးကို ဂါနာချိုကပဲ သွင်းယူနိုင်ခဲ့တာပါ။ 

ဂိုးသမား ဆန်းချက်ဇ်ကို တွေ့ရစဉ် 

ချယ်လ်ဆီးအသင်းဟာ အာဆင်နယ်အသင်းဘက်ကို တတိယမြောက် ချေပဂိုး မသွင်းနိုင်တော့တာကြောင့် ရှုံးနိမ့်ခဲ့ရတာ ဖြစ်ပါတယ်။ 

ချယ်လ်ဆီးအသင်းဟာ အိမ်ကွင်းမှာ အရေးနိမ့်ခဲ့တာကြောင့် အာဆင်နယ်အသင်း အိမ်ကွင်းမှာ ကစားရမယ့် ဒုတိယအကျော့ပွဲမှာ နိုင်ပွဲရရှိဖို့ ရုန်းကန်ရတော့မှာပါ။ 

ချယ်လ်ဆီးအသင်း ပရိသတ်တွေကတော့ ဒီပွဲမှာ အမှားတွေ ပြုလုပ်ခဲ့တဲ့ ဂိုးသမား ဆန်းချက်ဇ်ကို ဝေဖန်ခဲ့ပေမယ့် နည်းပြရိုစီနီယာက သူ့ရဲ့ ဂိုးသမားကို ကာကွယ်ပေးခဲ့တာ ဖြစ်ပါတယ်။ 

အာဆင်နယ်အသင်းနဲ့ပွဲမှာ မပါဝင်နိုင်ခဲ့တဲ့ အသင်းခေါင်းဆောင် ရီးစ်ဂျိမ်းစ်နဲ့ ကိုးလ်ပါလ်မာတို့ဟာ လာမယ့် ဘရန်ဖို့ဒ်အသင်းနဲ့ ပရီးမီးယားလိဂ်ပွဲစဉ်မှာ ပါဝင်နိုင်ဖို့ မျှော်လင့်တယ်လို့လည်း နည်းပြရိုစီနီယာက ပြောခဲ့ပါ တယ်။ 

Source: CNA

CNI Sport News

၂၀၂၆ ခုနှစ်၊ ဇန်နဝါရီ ၁၅

ရီးရယ်လ်အသင်းဟာ နည်းပြအာဘီလိုအာ စတင်ကိုင်တွယ်တဲ့ ပထမဆုံးပွဲမှာ ဒုတိယတန်းကလပ် အယ်လ်ဘာ စီတီ အသင်းကို ၃ ဂိုး-၂ ဂိုးနဲ့ အရေးနိမ့်ပြီး ကိုပါဒယ်ရေးဖလားပြိုင်ပွဲ ၁၆ သင်းအဆင့်ကနေ ထွက်ခွာခဲ့ရပါတယ်။ 

ဒီပွဲရဲ့ မိနစ် ၉၀ ပြည့်ပြီး ထပ်ဆောင်းအချိန်ပိုမှာ ဂွန်ဇာလိုဂါစီယာက ရီးရယ်လ်အသင်းအတွက် ချေပဂိုး သွင်းယူ နိုင်ခဲ့ပေမယ့် နောက်ထပ် မိနစ်အနည်းငယ်အကြာမှာ ဘီတန်ကော်က အယ်လ်ဘာစီတီအသင်းအတွက် အဖိုးတန် အနိုင်ဂိုး သွင်းယူခဲ့တာပါ။ 

အဲ့ဒါကြောင့် စပိန်ဒုတိယတန်းပြိုင်ပွဲမှာ အဆင့် ၁၇ နေရာ ရပ်တည်နေတဲ့ အယ်လ်ဘာစီတီအသင်းဟာ ရီးရယ်လ် အသင်းကို ပထမဆုံးအကြိမ် အနိုင်ရပြီး ကွာတားဖိုင်နယ်တက်ခဲ့တာ ဖြစ်ပါတယ်။ 

ပြီးခဲ့တဲ့ရက်ပိုင်းက စပိန်စူပါဖလား ဗိုလ်လုပွဲမှာ ဘာစီလိုနာအသင်းကို အရေးနိမ့်ခဲ့တဲ့ ရီးရယ်လ်အသင်းဟာ ဒီရှုံးပွဲ ကြောင့် နောက်ထပ် ဆုဖလားတစ်ခုကို လက်လွှတ်ခဲ့ရပါတယ်။ 

ရီးရယ်လ်အသင်းကို တွေ့ရစဉ်

ဇာဘီအလွန်ဆိုရဲ့ နေရာမှာ ရီးရယ်လ်အသင်းကို ပထမဆုံးပွဲအဖြစ် တာဝန်ယူ ကိုင်တွယ်ခဲ့တဲ့ နည်းပြအာဘီလိုအာ က ဒီရှုံးပွဲအတွက် သူ့မှာတာဝန်ရှိတယ်လို့ ပြောခဲ့ပါတယ်။ 

အာဘီလိုအာက “ဒီကလပ်မှာ သရေရလဒ်က ဆိုးရွားတယ်ဆိုရင် ရှုံးနိမ့်မှုကို မြင်ယောင် ကြည့်နိုင်ပါတယ်။ အဆင့် နိမ့်အသင်းကို အရေးနိမ့်ခဲ့ရတာက နာကျင်စရာကောင်းပြီး ကျနော်တို့ တိုးတက်အောင် လုပ်ရမယ်ဆိုတာ သိသာ ပါတယ်။ ကျနော်က ဆုံးဖြတ်ချက်တွေ ချတဲ့အတွက် ဒီရလဒ်က ကျနော့်မှာ တာဝန်ရှိပါတယ်။ ရှုံးနိမ့်မှုတွေက အောင်မြင်မှု လမ်းကြောင်းရဲ့ အစိတ်အပိုင်းဖြစ်ပြီး ဒါက ကျနော်တို့ကို ပိုပြီးကောင်းလာစေမှာပါ”လို့ ပြောခဲ့တာ ပါ။ 

ရီးရယ်လ်အသင်းဟာ ဒီပွဲမှာ အဓိက ကစားသမားတွေဖြစ်တဲ့ ကော့တွိုက်စ်၊ ဘတ်ပီ၊ ဘယ်လင်ဂမ်၊ ချူအာမန်နီ၊ ရိုဒရီဂိုတို့ကို ချန်လှပ်ပြီး အသင်းရဲ့ အဓိက ကစားသမားတချို့နဲ့ အကယ်ဒမီထွက် ကစားသမားတွေကို တွဲဖက် အသုံးပြုခဲ့ပါတယ်။ 

ရီးရယ်လ်အသင်းနည်းပြ အာဘီလိုအာက ဒီလူစာရင်းက သူ့အတွက် မှန်ကန်တယ်လို့ ယုံကြည်ခဲ့ပြီး လာမယ့်ပွဲမှာ ကစားသမား အများအပြားဟာ အကောင်းဆုံး ရုပ်ပိုင်းဆိုင်ရာအဆင့်ကို ပြန်ရပြီး ပါဝင်လာကြမယ်လို့ ပြောခဲ့ပါ တယ်။ 

ရီးရယ်လ်အသင်းဟာ လာမယ့် လာလီဂါပွဲအဖြစ် လီဗန်တေးအသင်းကို အိမ်ကွင်းလက်ခံယှဉ်ပြိုင်ရမှာ ဖြစ်ပါ တယ်။  

Source: ESPN

CNI Sport News

၂၀၂၆ ခုနှစ်၊ ဇန်နဝါရီ ၁၄

ချယ်လ်ဆီးအသင်းနည်းပြသစ် ရိုစီနီယာဟာ အသင်းရဲ့ အပယ်ခံ ကစားသမားတွေအဖြစ် သတ်မှတ်ခံထားရတဲ့ စတာလင်၊ ဒီဆာဆီတို့နဲ့ တွေ့ဆုံပြီး စကားပြောသွားမယ်လို့ ပြောခဲ့ပါတယ်။ 

ရိုစီနီယာက “ကျနော် သူတို့နဲ့ စကားပြောသွားမှာပါ။ အခုက ခင်ဗျားတို့ သိတဲ့အတိုင်း ဇန်နဝါရီထဲကို ရောက်နေ တာလေ။ စတာလင်ဟာ အလွန်ကောင်းမွန်တဲ့ ကစားသမားဘဝကို ပိုင်ဆိုင်ခဲ့ပြီး ကျနော်သူ့ကို အလွန်လေးစား ပါတယ်။ ဒီဆာဆီကလည်း ကျနော် နှစ်သက်ခဲ့တဲ့ ကစားသမားတစ်ဦးပါ။ သူတို့နဲ့ စကားပြောမှာဖြစ်သလို ကလပ် အသင်းနဲ့လည်း စကားပြောမှာပါ။ လာမယ့်ရက် အနည်းငယ်အတွင်း ဒါကို ကျနော် လုပ်ဆောင်သွားမှာပါ”လို့ ပြောခဲ့တာပါ။ 

၂၀၂၃-၂၄ ရာသီမှာ ချယ်လ်ဆီးအသင်းကို ပေါင် ၄၇.၅ သန်း၊ ပေါင် ၃၈.၅ သန်းတို့နဲ့ ရောက်ရှိလာခဲ့တဲ့ စတာလင်နဲ့ ဒီဆာဆီတို့ဟာ ဒီရာသီအစကတည်းက အသင်းကြီးနဲ့ အဝေးမှာ သီးခြား လေ့ကျင့်မှုတွေ ပြုလုပ်နေရတာ ဖြစ်ပါ တယ်။

စတာလင်နဲ့ ဒီဆာဆီကို တွေ့ရစဉ်

ပြီးခဲ့တဲ့ နွေရာသီက အငှားနဲ့ ထွက်ခွာနိုင်မယ့် ကမ်းလှမ်းမှုတွေကို ပယ်ချခဲ့တဲ့ စတာလင်နဲ့ ဒီဆာဆီတို့ဟာ ချယ်လ်ဆီးအသင်းရဲ့ အပြောင်းအရွှေ့ စာရင်းထဲမှာ ရှိနေကြပါတယ်။ 

စတာလင်နဲ့ ဒီဆာဆီတို့ဟာ ဇန်နဝါရီအပြောင်းအရွှေ့မှာ ချယ်လ်ဆီးအသင်းကနေ ထွက်ခွာဖို့ ပြင်ပကလပ်အသင်း တွေရဲ့ ချိတ်ဆက်မှုတွေ ခံနေရပါတယ်။ 

ပြီးခဲ့တဲ့ရာသီမှာ အာဆင်နယ်အသင်းထံ အငှားကစားခဲ့တဲ့ စတာလင်ဟာ မိသားစုနဲ့အတူ လန်ဒန်မှာပဲ ဆက်ရှိချင် တာကြောင့် လန်ဒန်ကလပ်အသင်းတွေထံ ပြောင်းဖို့သာ စိတ်ဝင်စားနေပါတယ်။
ဒီဆာဆီကတော့ ချယ်လ်ဆီးအသင်းကနေ အပြီးသတ် ထွက်ခွာဖို့ ဆန္ဒရှိနေတာပါ။ 

ချယ်လ်ဆီးအသင်းဟာ အပြောင်းအရွှေ့တိုင်း ကစားသမားသစ် ခေါ်ယူဖို့ လှုပ်ရှားမှုတွေ ရှိပေမယ့် အခုဇန်နဝါရီ အပြောင်းအရွှေ့မှာ နည်းပြသစ် အပြောင်းအလဲနဲ့အတူ လှုပ်ရှားမှုတွေ မရှိသေးတာ ဖြစ်ပါတယ်။ 

Source: BBC

CNI Sport News

၂၀၂၆ ခုနှစ်၊ ဇန်နဝါရီ ၁၄

ဆော်ဒီမှာ စာချုပ်သက်တမ်းနောက်ဆုံး ၆ လထဲကို ရောက်ရှိလာတဲ့ ပြင်သစ်ကွင်းလယ်လူ ကန်တီကို တူရကီ ထိပ်သီးကလပ် ဖီနာဘာချီအသင်းက ချဉ်းကပ်မှုတွေ ပြုလုပ်ခဲ့ပါတယ်။ 

ကန်တီဟာ ဥရောပထံ ပြန်လာဖို့ တံခါးဖွင့်ထားတာကြောင့် အယ်လ်အစ်တီဟတ်အသင်းနဲ့ စာချုပ်သစ် ချုပ်ဆိုဖို့ ကြန့်ကြာနေတာဖြစ်ပြီး ဆော်ဒီကလပ်ကတော့ သူ့ကို နွေရာသီထက် ကျော်လွန်ပြီး အသင်းမှာ ဆက်ထိန်းသိမ်း ချင် နေပါတယ်။

ဖီနာဘာချီအသင်းဟာ ဆော်ဒီပရိုလိဂ်မှာ ကန်တီရဲ့ အနာဂတ် မရေမရာဖြစ်မှုကို အခွင့်ကောင်းယူကာ ဇန်နဝါရီ အပြောင်းအရွှေ့မှာ ခေါ်ယူနိုင်ဖို့ မျှော်လင့်နေတယ်လို့ ပြင်သစ်က ထွက်ပေါ်လာတဲ့ သတင်းတွေမှာ ဖော်ပြထား ပါတယ်။ 

L'Equipe က ဖီနာဘာချီအသင်းဟာ ကန်တီရဲ့ စာချုပ်ကုန်ဆုံးမယ့် နွေရာသီအထိ စောင့်ဆိုင်းမယ့်အစား ချက်ချင်း ခေါ်ယူချင်နေတယ်လို့ ဖော်ပြထားတာပါ။ 

ကန်တီဟာ လက်ရှိအချိန်မှာ ပြင်ပကလပ် အသင်းတွေနဲ့ အပြောင်းအရွှေ့အတွက် ဆွေးနွေးမှုတွေ ပြုလုပ်လို့ရပြီ ဖြစ်ပေမယ့် ဖီနာဘာချီအသင်းကတော့ ဒီရာသီရဲ့ ဒုတိယရာသီဝက်မှာ သူ့ကို အသုံးပြုချင်နေတာ ဖြစ်ပါတယ်။ 

ကန်တီကို တွေ့ရစဉ် 

ဖီနာဘာချီအသင်းဟာ သူတို့ရဲ့ ကွင်းလယ်ပိုင်းကို အားကောင်းစေဖို့ ဈေးကွက်ထဲမှာ ရှာဖွေမှုတွေ ပြုလုပ်နေချိန်မှာ ကန်တီက အဓိက ပစ်မှတ်ဖြစ်လာခဲ့ပါတယ်။ 

ဖီနာဘာချီအသင်း ဒါရိုက်တာတွေဟာ ကန်တီကို အသင်းထံ လာရောက်အောင် ဆွဲဆောင်ဖို့ ငွေကြေး အများ အပြား အသုံးပြုဖို့လည်း အဆင်သင့် ဖြစ်နေပါတယ်။ 

ကန်တီဟာ ၂၀၂၃ ခုနှစ်မှာ ဆော်ဒီကို ပြောင်းခဲ့ပေမယ့် သူ့ရဲ့ ခြေစွမ်းတွေဟာ ကျဆင်းသွားခြင်းမရှိဘဲ ပြင်သစ် လက်ရွေးစင်အသင်းရဲ့ လူစာရင်းထဲမှာလည်း ရွေးချယ်ခံခဲ့ရပါတယ်။ 

အယ်လ်အစ်တီဟတ်အသင်းကတော့ ကန်တီကို လွယ်လွယ်နဲ့ လက်လွှတ်မှာ မဟုတ်သလို စာချုပ် သက်တမ်းတိုး ဖို့လည်း ကြိုးပမ်းနေတဲ့အတွက် ဖီနာဘာချီအသင်းအနေနဲ့ ဒီအပြောင်းအရွှေ့မှာ သူ့ကိုခေါ်ယူဖို့ ခက်ခဲဖွယ်ရှိနေ တာ ဖြစ်ပါတယ်။ 

Source: Goal

CNI Sport News

၂၀၂၆ ခုနှစ်၊ ဇန်နဝါရီ ၁၄

မန်စီးတီးအသင်းက နယူးကာဆယ်အသင်းကို အနိုင်ရခဲ့တဲ့ပွဲမှာ ဆီမန်ညိုရဲ့ သွင်းဂိုးကို ခွင့်မပြုခဲ့ပြီးနောက် နည်းပြ ဂွာဒီယိုလာက ဒိုင်လူကြီးတွေရဲ့ အကြီးအကဲဟောင်း ဝပ်ဝက်ဘ်ဆီကနေ ရှင်းလင်းချက်ရဖို့ မျှော်လင့်တယ်လို့ ပြောခဲ့ပါတယ်။ 

မန်စီးတီးအသင်းဟာ ကာရာဘောင်းဖလား ဆီမီးဖိုင်နယ် ပထမအကျော့ပွဲမှာ လက်ရှိ ချန်ပီယံ နယူးကာဆယ် အသင်းကို ၂ ဂိုး-ဂိုးမရှိနဲ့ အနိုင်ရခဲ့တာဖြစ်ပြီး ချာကီနဲ့ ဆီမန်ညိုတို့က သွင်းဂိုးသွင်းယူခဲ့ကြတာပါ။ 

မန်စီးတီးအသင်းဟာ ဒီနိုင်ပွဲကြောင့် ဗိုလ်လုပွဲတက်နိုင်ဖို့ အခြေအနေ ကောင်းခဲ့ပေမယ့် ဆီမန်ညို သွင်းယူခဲ့တဲ့ နောက်ထပ် သွင်းဂိုးကို မပယ်ဖျက်မီ VAR ပြန်လည်သုံးသပ်မှု ၆ မိနစ်နီးပါးကြာခဲ့တဲ့အပေါ် နည်းပြဂွာဒီယိုလာက အလွန်စိတ်ပျက်နေခဲ့ပါတယ်။ 

ပြီးခဲ့တဲ့ နိုဝင်ဘာလက နယူးကာဆယ်အသင်းကို ၂ ဂိုး-၁ ဂိုးနဲ့ အရေးနိမ့်ခဲ့တဲ့ပွဲမှာ ဖိုဒန်ကို နယူးကာဆယ်အသင်း နောက်ခံလူ ရှားက ပြစ်ဒဏ်ကျူးလွန်ခဲ့ပေမယ့် ပယ်နယ်တီ မပေးခဲ့တဲ့ ဆုံးဖြတ်ချက်ကိုလည်း ဂွာဒီယိုလာက စိတ်ပျက်နေတာပါ။ 

မန်စီးတီးနဲ့နယူးကာဆယ်အသင်း အငြင်းပွားနေကြစဉ်

ဒါ့ပြင် ဂွာဒီယိုလာက ဆီမန်ညိုရဲ့ သွင်းဂိုးကို ခွင့်ပြုဖို့ လူ ၄ ဦးက ဆုံးဖြတ်ချက်မချနိုင်တာကို နားမလည်နိုင်အောင် ဖြစ်နေပြီး ဒီအရာတွေကို ဟောင်းဝပ်ဝက်ဘ်က ဖုန်းဆက်ပြီး ရှင်းပြလာလိမ့်မယ်လို့ ပြောခဲ့ပါတယ်။ 

မန်စီးတီးအသင်းက ခရစ္စတယ်ပဲလေ့စ်အသင်းကို အရေးနိမ့်ခဲ့တဲ့ FA ဖလား ဗိုလ်လုပွဲမှာ ပြိုင်ဘက်ဂိုးသမား ဟန်ဒါဆန်ဟာ ဂိုးဧရိယာ အပြင်ဘက်မှာ ဘောလုံးကို လက်နဲ့ရှင်းထုတ်ခဲ့တဲ့ ဖြစ်ရပ်တုန်းကလည်း သူဘာမှ ပြောခဲ့ခြင်းမရှိဘူးလို့ ဂွာဒီယိုလာက ပြောခဲ့တာပါ။ 

ပြီးခဲ့တဲ့ရက်ပိုင်းကမှ ဘုန်းမောက်အသင်းကနေ ရောက်ရှိလာခဲ့တဲ့ ဆီမန်ညိုဟာ မန်စီးတီးအသင်းအတွက် ၂ ပွဲ ပါဝင်ကစားအပြီးမှာ ၂ ဂိုးသွင်းယူကာ ၁ ဂိုး ဖန်တီးထားပါတယ်။ 

မန်စီးတီးအသင်းဟာ နယူးကာဆယ်အသင်းနဲ့ ကာရာဘောင်းဖလား ဆီမီးဖိုင်နယ် ဒုတိယအကျော့ပွဲကို လာမယ့် ဖေဖော်ဝါရီ ၄ ရက် အီးတီဟတ်ကွင်းမှာ ယှဉ်ပြိုင်သွားမှာဖြစ်ပါတယ်။ 

 Source:ESPN

CNI Sport News

၂၀၂၆ ခုနှစ်၊ ဇန်နဝါရီ ၁၄

ယူနိုက်တက်အသင်းဟာ ကွင်းလယ်လူဟောင်း မိုက်ကယ်ကာရစ်ကို ယာယီနည်းပြအဖြစ် ဒီရာသီကုန်အထိ ခန့်အပ်ကြောင်း အတည်ပြုခဲ့ပါတယ်။ 

ယူနိုက်တက်အသင်းမှာ မိုက်ကယ်ကာရစ်ရဲ့ နည်းပြ အဖွဲ့ဝင်တွေအဖြစ် စတိဗ်ဟော်လန်၊ ဝုဒ်ဂိတ်၊ အီဗန်စ်၊ ဘင်နီယန်နဲ့ မော်ဆန်တို့က တာဝန်ယူသွားမှာပါ။

ယူနိုက်တက်အသင်း အကြီးအကဲတွေဟာ ယာယီနည်းပြအဖြစ် ခန့်အပ်ဖို့ ဆိုးလ်ရှား၊ မိုက်ကယ်ကာရစ်တို့ ၂ ဦးနဲ့ ဆွေးနွေးမှုတွေ ပြုလုပ်ခဲ့ပြီးနောက် မိုက်ကယ်ကာရစ်ကို ခန့်အပ်ဖို့ ရွေးချယ်ခဲ့တာ ဖြစ်ပါတယ်။ 

ပေါ်တူဂီလူမျိုးနည်းပြ အာမိုရင်ကို ထုတ်ပယ်ပြီးနောက် ယူနိုက်တက်အသင်းကို ၂ ပွဲ တာဝန်ယူခဲ့တဲ့ ဖလက်ချာ ဟာ အသင်းရဲ့ ယူ-၁၈ အသင်းနည်းပြအဖြစ် ဆက်ရှိမှာ ဖြစ်သလို မိုက်ကယ်ကာရစ်ရဲ့ နည်းပြအဖွဲ့ထဲ ပူးပေါင်း လာနိုင်ပါတယ်။ 

မိုက်ကယ်ကာရစ်ကို တွေ့ရစဉ် 

ယူနိုက်တက်အသင်းဟာ ဖလက်ချာရဲ့ လက်ထက်မှာ ပရီးမီးယားလိဂ်ပွဲအဖြစ် ကစားခဲ့တဲ့ ဘန်လေအသင်းနဲ့ပွဲမှာ ၂ ဂိုးစီသရေကျခဲ့ပြီး FA ဖလားမှာတော့ ဘရိုက်တန်အသင်းကို ၂ ဂိုး-၁ ဂိုးနဲ့ အရေးနိမ့်ကာ ထွက်ခွာခဲ့ရပါတယ်။ 

မိုက်ကယ်ကာရစ်ကတော့ ယူနိုက်တက်အသင်းကို ဦးဆောင်ဖို့ တာဝန်ယူရမှာက ဂုဏ်ယူဖို့ကောင်းပြီး ဒီနေရာမှာ အောင်မြင်ဖို့ ဘာတွေ လိုအပ်လဲဆိုတာ သိသလို မျှော်လင့်ထားတဲ့ စံနှုန်းတွေ ရောက်ရှိအောင် ကူညီပေးဖို့ အာရုံစိုက်နေတယ်လို့ ပြောခဲ့ပါတယ်။ 

ဒါ့ပြင် အသင်းဟာ ဒီရာသီအတွက် တိုက်ပွဲဝင်ရမယ့် အရာတွေ အများကြီးရှိတာကြောင့် အားပေးတဲ့ ပရိသတ်တွေ ကို သူတို့နဲ့ ထိုက်တန်တဲ့ စွမ်းဆောင်ရည် ပေးသွားမယ်လို့ ဆက်ပြောခဲ့ပါတယ်။ 

မိုက်ကယ်ကာရစ်ဟာ ယူနိုက်တက်အသင်းနဲ့ ပရီးမီးယားလိဂ်ဖလား ၅ ကြိမ်၊ ချန်ပီယံလိဂ်ဖလား ၁ ကြိမ် အပါအဝင် ဆုဖလား အောင်မြင်မှု အများအပြား ရယူနိုင်ခဲ့သလို ကစားသမားဘဝကနေ အနားယူပြီးနောက်မှာ အသင်းရဲ့ နည်းပြအဖွဲ့ဝင်ထဲ ပါဝင်ခဲ့ပါတယ်။

မော်ရင်ဟိုနဲ့ ဆိုးလ်ရှားတို့ရဲ့ နည်းပြအဖွဲ့ထဲမှာ ပါဝင်ခဲ့တဲ့ မိုက်ကယ်ကာရစ်ဟာ ၂၀၂၁ ခုနှစ်မှာ ယူနိုက်တက် အသင်းကို ယာယီနည်းပြအဖြစ် ၃ ပွဲကိုင်တွယ်ခဲ့ပြီး ၂ ပွဲနိုင်၊ ၁ ပွဲ သရေရလဒ် ထွက်ပေါ်အောင် ကူညီပေးနိုင်ခဲ့ပါ တယ်။ 

မိုက်ကယ်ကာရစ်ဟာ အမြဲတမ်းနည်းပြ ရာထူးအဖြစ် မယ်ဒယ်ဘရော့အသင်းကို ကိုင်တွယ်ခဲ့ပြီး ပရီးမီးယားလိဂ် ထံ တန်းတက်အောင် မစွမ်းဆောင်ပေးနိုင်ခဲ့လို့ မနှစ်က နွေရာသီမှာ ထုတ်ပယ်ခံခဲ့ရတာ ဖြစ်ပါတယ်။ 

Source: Metro

CNI Sport News

၂၀၂၆ ခုနှစ်၊ ဇန်နဝါရီ ၁၃

စပါးအသင်းဟာ အက်သလက်တီကိုအသင်း ကွင်းလယ်လူ ဂယ်လာဂါကို ခေါ်ယူမှုပြိုင်ပွဲမှာ အက်စတွန်ဗီလာ အသင်းကို အသာရပြီး ပေါင် ၃၅ သန်းနဲ့ ခေါ်ယူနိုင်ဖို့ နီးစပ်နေပါတယ်။

အက်စတွန်ဗီလာအသင်းဟာ ဂယ်လာဂါကို ခေါ်ယူဖို့ အခြေအနေ ကောင်းခဲ့တယ်လို့ ထင်ရပေမယ့် စပါးအသင်း ဟာ အင်္ဂလန် ကွင်းလယ်လူအတွက် အက်သလက်တီကိုအသင်း တောင်းဆိုတဲ့ ပေါင် ၃၅ သန်းကို ပေးချေဖို့ ဆန္ဒရှိ ကြောင်း ဖော်ပြခဲ့တာပါ။ 

အဲ့ဒါကြောင့် စပါးအသင်းဟာ ဂယ်လာဂါကို ခေါ်ယူနိုင်ဖို့ နီးစပ်လာခဲ့တာ ဖြစ်ပါတယ်။ 

အက်စတွန်ဗီလာအသင်းဟာ ဂယ်လာဂါကို အပြီးသတ် ဝယ်ယူဖို့ ရွေးချယ်ခွင့်နဲ့အတူ ကနဦး အငှားစာချုပ်ချုပ်ဖို့ ဆန္ဒရှိနေတာပါ။

ဂယ်လာဂါဟာ စပါးအသင်းနဲ့ ပုဂ္ဂိုလ်ရေးဆိုင်ရာ သဘောတူညီမှုရရှိဖို့ ဆွေးနွေးမှုတွေ ပြုလုပ်ရဦးမှာ ဖြစ်ပေမယ့် အပြောင်းအရွှေ့ကို မကြာမီ အပြီးသတ်ဖို့ ရှိနေပါတယ်။ 

ဂယ်လာဂါကို တွေ့ရစဉ် 

လာမယ့် နွေရာသီမှာ ကျင်းပမယ့် ကမ္ဘာ့ဖလားပြိုင်ပွဲ မတိုင်မီ အင်္ဂလန်အသင်း လူစာရင်းထဲ ပြန်လည်ပါဝင်ဖို့ ကြိုးစားနေတဲ့ ဂယ်လာဂါအတွက် ပရီးမီးယားလိဂ်ထံ ပြန်လာတာက သူ့အတွက် အသင့်တော်ဆုံးဖြစ်ပါတယ်။ 

ဂယ်လာဂါဟာ အင်္ဂလန်အသင်းက ဆီနီဂေါအသင်းကို ၃ ဂိုး-၁ ဂိုးနဲ့ အရေးနိမ့်ခဲ့တဲ့ ခြေစမ်းပွဲ တစ်ပွဲတည်းသာ နည်းပြ တူချယ်လ် လက်ထက်မှာ အင်္ဂလန်အသင်းအတွက် ပါဝင်ကစားခွင့်ရထားတာပါ။ 

၂၀၂၄ ခုနှစ်နွေရာသီမှာ ချယ်လ်ဆီးအသင်းကနေ ပြောင်းရွှေ့ခဲ့တဲ့ ဂယ်လာဂါဟာ အက်သလက်တီကိုအသင်း အတွက် ၇၇ ပွဲ ကစားထားပြီး ၇ ဂိုး သွင်းယူထားပါတယ်။ 

စပါးအသင်းဟာ ဥရုဂွေးကွင်းလယ်လူ ဘန်တန်ကာ ဒဏ်ရာကြောင့် အနည်းဆုံး ၃ လကြာ အနားယူရမှာဖြစ်လို့ ကွင်းလယ်ပိုင်းကို အားဖြည့်တဲ့အနေနဲ့ ဂယ်လာဂါကို ခေါ်ယူဖို့ ကြိုးပမ်းခဲ့တာဖြစ်ပါတယ်။ 

နောက်ဆုံးကစားခဲ့တဲ့ ပရီးမီးယားလိဂ် ၆ ပွဲမှာ ၁ ပွဲသာ အနိုင်ရခဲ့တဲ့ စပါးအသင်းဟာ လာမယ့်လိဂ်ပွဲအဖြစ် ဝက်စ်ဟမ်းအသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: BBC

CNI Sport News

၂၀၂၆ ခုနှစ်၊ ဇန်နဝါရီ ၁၃

ဂျာမန်နောက်ခံလူဟောင်း မာတီဆက်ကာဟာ အာဆင်နယ်အသင်း အကယ်ဒမီ မန်နေဂျာအဖြစ် ၈ နှစ်ကြာ တာဝန် ထမ်းဆောင်ပြီးနောက် ရာသီကုန်ချိန်မှာ ထွက်ခွာမယ်လို့ ကြေညာခဲ့ပါတယ်။ 

မာတီဆက်ကာက သူဟာ အသစ်တစ်ခုခုကို စူးစမ်းမှုတွေပြုလုပ်ဖို့ အချိန်တန်ပြီလို့ ပြောခဲ့ပြီး အာဆင်နယ်အသင်း ကလည်း သူ့ရဲ့ ထွက်ခွာမှုကို ကလပ်ရဲ့ ကြေညာချက်ထဲမှာ အတည်ပြုခဲ့ပါတယ်။ 

အာဆင်နယ်အသင်းမှာ ၂၀၁၁ ကနေ ၂၀၁၈ ခုနှစ်အထိ ကစားပြီး ကစားသမား ဘဝကနေ အနားယူခဲ့တဲ့ မာတီဆက်ကာဟာ အနားယူပြီးနောက် ကလပ်အသင်းရဲ့ အကယ်ဒမီကို ကြီးကြပ်ခဲ့တာ ဖြစ်ပါတယ်။ 

မာတီဆက်ကာဟာ စကယ်လီ၊ ဝမ်နရီ၊ ဒေါင်းမန်းတို့ အပါအဝင် လူငယ် ကစားသမားတချို့ကို နည်းပြအာတီတာ ရဲ့ အာဆင်နယ်အသင်းကြီးထံ ရောက်ရှိအောင် ပို့ဆောင်ပေးနိုင်တာမှာ အဓိက အခန်းကဏ္ဍကနေ ပါဝင်ခဲ့ပါတယ်။ 

မာတီဆက်ကာကို တွေ့ရစဉ် 

မာတီဆက်ကာက အာဆင်နယ်အသင်းဟာ သူ့အတွက် အမြဲတမ်း အလွန်ထူးခြားတဲ့ အသင်းဖြစ်တာကြောင့် ဒါဟာ ခက်ခဲတဲ့ ဆုံးဖြတ်ချက်ဖြစ်ခဲ့တယ်လို့ ရာသီကုန်မှာ ထွက်ခွာမယ့်အပေါ် ပြောခဲ့ပါတယ်။ 

ကစားသမားဘဝကနေ အကယ်ဒမီ အကြီးအကဲအဖြစ် တိုက်ရိုက်ပြောင်းလဲချိန်မှာ ကလပ်ရဲ့ ယုံကြည်မှုအတွက် ကျေးဇူးတင်ကြောင်းနဲ့ အသစ်အဆန်းတွေကို လေ့လာပြီး ကိုယ့်ကိုကိုယ် ပိုတွန်းအားပေးရမယ့် အချိန်ရောက်ပြီလို့ လည်း မာတီဆက်ကာက ပြောခဲ့တာပါ။ 

အာဆင်နယ်အသင်း CEO ရစ်ချတ်ဂါလစ်က ရာသီကုန်ချိန်မှာ သူထွက်ခွာတာ မြင်တွေ့ရမှာ ဝမ်းနည်းမိပေမယ့် သူ့ကို အကယ်ဒမီ မန်နေဂျာအဖြစ် ခန့်အပ်နိုင်တဲ့အတွက် ကံကောင်းခဲ့ပြီး သူဟာ အသင်းရဲ့ ရပ်တည်ချက်ကို နားလည်တဲ့သူလို့ ပြောခဲ့ပါတယ်။ 

မာတီဆက်ကာဟာ အာဆင်နယ်အသင်း ကစားသမားဘဝမှာ FA ဖလား ၃ ကြိမ်၊ ကွန်မြူနတီဒိုင်း ၂ ကြိမ် ရယူနိုင် ခဲ့ပြီး ဂျာမနီလက်ရွေးစင်အသင်းနဲ့ ၂၀၁၄ ကမ္ဘာ့ဖလား ချန်ပီယံဆုရရှိခဲ့ပါတယ်။ 

Source: Dailymail

CNI Sport News

၂၀၂၆ ခုနှစ်၊ ဇန်နဝါရီ ၁၃

လက်ရှိချန်ပီယံ PSG အသင်းဟာ အိမ်နီးချင်း ပါရီ FC အသင်းကို အိမ်ကွင်းမှာ ၁ ဂိုး-ဂိုးမရှိနဲ့ အရေးနိမ့်ကာ ပြင်သစ် ဖလား ပြိုင်ပွဲကနေ ထွက်ခွာခဲ့ရပါတယ်။ 

ပြင်သစ်ဖလားကို ပြီးခဲ့တဲ့ရာသီမှာ ၁၆ ကြိမ်မြောက် ရယူနိုင်ခဲ့တဲ့ PSG အသင်းဟာ ဒီပွဲမှာ သူတို့ရဲ့ မြို့ခံပြိုင်ဘက် အသင်းကို အသာစီးနဲ့ ကစားနိုင်ခဲ့ပေမယ့် အရေးနိမ့်ခဲ့တာပါ။ 

ပါရီ FC အသင်းအတွက် တစ်လုံးတည်းသော အနိုင်ဂိုးကို PSG အသင်းမှာ ကစားသမားဘဝ စတင်ခဲ့တဲ့ ဂျွန်နသန် အိုင်ကိုနေးက သွင်းယူခဲ့တာဖြစ်ပါတယ်။ 

ဒီပွဲမှာ PSG အသင်းဟာ ဘောလုံးပိုင်ဆိုင်မှု ၇၀ ရာခိုင်နှုန်း၊ ဂိုးပေါက်ကန်သွင်းမှု ၂၅ ကြိမ်၊ ဂိုးပေါက်တည့်မှု ၇ ကြိမ် အထိ ရှိခဲ့ပေမယ့် ပါရီ FC အသင်းဂိုးသမား လက်စွမ်းပြသနိုင်ခဲ့တာပါ။

ပါရီ FC အသင်းကတော့ ဂိုးပေါက်ကန်သွင်းမှု ၄ ကြိမ်၊ ဂိုးပေါက်တည့်မှု ၂ ကြိမ်မှာ ၁ ဂိုးသွင်းယူနိုင်ခဲ့တာ ဖြစ်ပါတယ်။

ပီအက်စ်ဂျီအသင်း ယှဉ်ပြိုင်နေစဉ်

PSG အသင်းဟာ ၂၀၁၄ ခုနှစ်နောက်ပိုင်း ပထမဆုံးအကြိမ် ၃၂ သင်းအဆင့်မှာ အရေးနိမ့်ပြီး ပြင်သစ်ဖလားကနေ ထွက်ခွာခဲ့ရတာပါ။ 

ပါရီ FC အသင်းအတွက် အနိုင်ဂိုးသွင်းယူခဲ့တဲ့ အိုင်ကိုနေးက “ ကျနော်တို့ခံစစ်ဟာ အလွန်ကောင်းမွန်စွာ ကစား နိုင်ခဲ့ပြီး ကျနော်တို့ အလွန် ပျော်ရွှင်နေပါတယ်။ သွင်းဂိုးအတွက်လည်း ကျနော်ပျော်ရွှင်နေပြီး ဒါက ကျနော့်ရဲ့ နောက်ဆုံး သွင်းဂိုး မဟုတ်ဖို့လည်း မျှော်လင့်ပါတယ်”လို့ ပြောခဲ့ပါတယ်။ 

ဒီနှစ်သင်းဟာ ၁၉၉၀ ခုနှစ်နောက်ပိုင်း ပထမဆုံး ထိပ်တန်းလိဂ် ဒါဘီပွဲအဖြစ် အခုလ အစောပိုင်းမှာ တွေ့ဆုံခဲ့ပြီး ဒီပွဲမှာ PSG အသင်းက ၂ ဂိုး-၁ ဂိုးနဲ့ အနိုင်ရရှိခဲ့တာပါ။ 

ပါရီ FC အသင်းဟာ PSG အသင်းကို ပြင်သစ်လိဂ်မှာ အရေးနိမ့်ခဲ့တဲ့ ရှုံးကြွေးကို ပြင်သစ်ဖလားပြိုင်ပွဲမှာ ပြန်ပြီး ဆပ်နိုင်ခဲ့တာ ဖြစ်ပါတယ်။ 

Source: BBC