CNI Sport News

၂၀၂၄ ခုနှစ်၊ သြဂုတ် ၂၂

ပေါ်တူဂီနဲ့ အယ်လ်နာဆာ အသင်းခေါင်းဆောင် ရော်နယ်ဒိုဟာ သူ့ရဲ့ကိုယ်ပိုင် YouTube Channel ဖြစ်တဲ့ UR Cristiano ကို စတင်ပြီးနောက် စံချိန်သစ်တွေကို တင်နိုင်ခဲ့ပြီဖြစ်ပါတယ်။

ဆိုရှယ်မီဒီယာပေါ်မှာ ဖော်လိုဝါ သန်း ၉၀၀ ကျော်ရှိတဲ့ ရော်နယ်ဒိုဟာ သူ့ရဲ့ ကိုယ်ပိုင် YouTube Channel ကို စတင်ပြီးနောက် မိနစ် ၉၀ အကြာမှာ subscribers ၁ သန်းကျော်သွားခဲ့တာပါ။ 

ဒါဟာ YouTube သမိုင်းတစ်လျှောက်မှာ Channel အသစ်တစ်ခုအနေနဲ့ အမြန်ဆုံး subscribers ၁ သန်းပြည့်တဲ့ စံချိန်သစ်လည်း ဖြစ်ခဲ့ပါတယ်။

ရော်နယ်ဒိုရဲ့ YouTube Channel ဟာ စတင်ပြီးနောက် ၄ နာရီအကြာမှာ subscribers ၅ သန်းအထိ ရှိခဲ့တာပါ။ 

ပေါ်တူဂီအသင်းခေါင်းဆောင်ရဲ့ YouTube Channel ဟာ လက်ရှိအချိန်မှာဆိုရင် subscribers ၁၁ သန်းကျော် အထိ ရှိသွားခဲ့ပြီဖြစ်ပြီး နောက်ထပ် စံချိန်သစ်တွေကိုလည်း တင်ဖို့ရှိနေတာ ဖြစ်ပါတယ်။

ရော်နယ်ဒိုကို တွေ့ရစဉ်

ရော်နယ်ဒိုဟာ သူ့ရဲ့ YouTube Channel မှာ ဘောလုံးအကြောင်း သာမကဘဲ သူ့ရဲ့မိသားစု၊ ကျန်းမာရေး၊ အဟာရ၊ ပညာရေးနဲ့ စီးပွားရေး အကြောင်းတွေကိုလည်း မျှဝေပေးမယ်လို့ ပရိသတ်တွေကို ကတိပြုထားတာပါ။ 

ရော်နယ်ဒိုက “ဆိုရှယ်မီဒီယာမှာ ပရိသတ်တွေနဲ့ ဒီလိုခိုင်မာတဲ့ ဆက်ဆံရေးရှိတာကို ကျနော်အမြဲတမ်း နှစ်သက်ခဲ့ ပြီး ကျနော့်ရဲ့ YouTube Channel ဟာ ကျနော့်ကို ပိုကြီးမားတဲ့ ပလက်ဖောင်းတစ်ခု ပေးစွမ်းနိုင်မှာပါ။ ကျနော့် အကြောင်း၊ ကျနော့် မိသားစုအကြောင်းနဲ့ အခြားအရာတွေအပေါ် ကျနော့် အမြင်တွေကို သူတို့တွေပိုပြီး လေ့လာ ကြပါလိမ့်မယ်”လို့ ပြောခဲ့ပါတယ်။ 

ရော်နယ်ဒိုဟာ လက်ရှိအချိန်မှာ ဆော်ဒီပရိုလိဂ် ရာသီသစ်အတွက် အယ်လ်နာဆာအသင်းနဲ့အတူ ပြင်ဆင်မှု ပြုလုပ်နေပြီး ရာသီသစ်မှာ ဆုဖလား အောင်မြင်မှုတွေ ရယူနိုင်ဖို့ ပစ်မှတ်ထားနေတာပါ။ 

အယ်လ်နာဆာအသင်းဟာ ဆော်ဒီပရိုလိဂ် အဖွင့်ပွဲစဉ်အဖြစ် သြဂုတ် ၂၂ ရက်မှာ အယ်လ်ရေ့ဒ်အသင်းနဲ့ ယှဉ်ပြိုင်သွားမှာ ဖြစ်ပါတယ်။ 

Source: forbes

CNI Sport News

၂၀၂၄ ခုနှစ်၊ သြဂုတ် ၂၁

ချယ်လ်ဆီးအသင်းဟာ ဆာဗတ်တီအသင်းနဲ့ ယှဉ်ပြိုင်မယ့် ယူရိုပါကွန်းဖရန့်လိဂ် ပလေးအော့ဖ်ပွဲအတွက် လူစာရင်းမှာ စတာလင် အပါအဝင် ကစားသမား ၄ ဦးကို ချန်လှပ်ခဲ့ပါတယ်။ 

ချယ်လ်ဆီးအသင်းဟာ ကွန်းဖရန့်လိဂ် အုပ်စုယှဉ်ပြိုင်နိုင်ဖို့အတွက် ဆာဗတ်တီအသင်းနဲ့ ယှဉ်ပြိုင်ရမယ့် ပလေးအော့ဖ် ပွဲစဉ်နှစ်ကျော့စလုံးကို ရလဒ်ကောင်း ရယူနိုင်ဖို့ လိုအပ်နေတာပါ။ 

စတာလင်ဟာ ပြီးခဲ့တဲ့ မန်စီးတီးအသင်းနဲ့ ပရီးမီးယားလိဂ် အဖွင့်ပွဲစဉ်မှာလည်း ချယ်လ်ဆီးအသင်းရဲ့ လူစာရင်းမှာ ချန်လှပ်ခံခဲ့ရတာ ဖြစ်ပါတယ်။

အဲဒါကြောင့် ချယ်လ်ဆီးအသင်းအနေနဲ့ စတာလင်ရဲ့ အနာဂတ်နဲ့ ပတ်သက်ပြီး ရှင်းရှင်းလင်းလင်း လုပ်ဆောင်ပေး ဖို့ ကစားသမားရဲ့ ကိုယ်စားလှယ်အဖွဲ့က ကြေညာချက် ထုတ်ပြန်ပြီး ပြောခဲ့ပေမယ့် လူစာရင်းထပ်ပြီး ချန်လှပ် ခံရတာပါ။

နောက်ခံလူတွေဖြစ်တဲ့ ဘန်ချီဝဲလ်၊ ဖိုဖာနာနဲ့ တိုဆင်တို့လည်း ချယ်လ်ဆီးအသင်း လူစာရင်းမှာ မပါဝင်ခဲ့ပါဘူး။ 

 စတာလင်ကို တွေ့ရစဉ်

တိုဆင်ဟာ ဒီနွေရာသီမှာ ဖူလ်ဟမ်အသင်းကနေ အလွတ်ပြောင်းရွှေ့ကြေးနဲ့ ချယ်လ်ဆီးအသင်းကို ရောက်ရှိလာ ခဲ့ပြီး မန်စီးတီးအသင်းနဲ့ပွဲစဉ်မှာ အရန်လူစာရင်း ပါဝင်ခဲ့ပါတယ်။ 

ဖိုဖာနာကတော့ မန်စီးတီးအသင်းနဲ့ပွဲမှာ ချယ်လ်ဆီးအသင်းအတွက် ပွဲချိန်ပြည့် ပါဝင်ကစားခဲ့တာပါ။ 

ဘန်ချီဝဲလ်ဟာ စတာလင်လိုပဲ ပြီးခဲ့တဲ့ မန်စီးတီးအသင်းနဲ့ပွဲမှာ လူစာရင်းထဲ ပါဝင်ခွင့်မရခဲ့တာ ဖြစ်ပါတယ်။ 

ချယ်လ်ဆီးအသင်းနည်းပြ မာရက်စ်ကာက ဘန်ချီဝဲလ်ကို အသင်းသစ်ရှာဖွေဖို့ မကြာသေးခင်က မီဒီယာတွေ့ဆုံမှု မှာ တိုက်တွန်းထားတာပါ။ 

ချယ်လ်ဆီးအသင်းဟာ ဒီအပြောင်းအရွှေ့မှာ ကစားသမား ၁၁ ဦးအထိ ခေါ်ယူထားပြီး လူစာရင်းမှာ ကစားသမား ဦးရေ ၄၀ ကျော်အထိ ရှိနေတာဖြစ်ပါတယ်။ 

အဲဒါကြောင့် ချယ်လ်ဆီးအသင်းဟာ ကစားသမားအချို့ကို ရောင်းချဖို့ လုပ်ဆောင်နေပြီး လူကာကူ၊ ဘရိုဂျာတို့ဟာ အသင်းက ထွက်ခွာဖို့ရှိနေတာပါ။ 

ချယ်လ်ဆီးအသင်းဟာ ဆာဗတ်တီအသင်းနဲ့ ကွန်းဖရန့်လိဂ် ပလေးအော့ဖ် ပထမအကျော့ပွဲစဉ်ကို သြဂုတ် ၂၃ ရက် အိမ်ကွင်းမှာ ယှဉ်ပြိုင်သွားမှာဖြစ်ပါတယ်။ 

Source: Metro

CNI Sport News

၂၀၂၄ ခုနှစ်၊ သြဂုတ် ၂၁

စပိန်ကွင်းလယ်လူ ရိုဒရီဟာ အချိန်တိုင်းရဲ့ အကြီးကျယ်ဆုံး ကစားသမား(GOAT)ကို ရွေးချယ်ခဲ့တာမှာ မက်ဆီနဲ့ ရော်နယ်ဒိုကို ငြင်းပယ်ပြီး သူ့ရဲ့ မန်စီးတီးအသင်းဖော် ဒီဘရိုင်းကို ရွေးချယ်သွားခဲ့ပါတယ်။ 

ရိုဒရီဟာ ပြီးခဲ့တဲ့နှစ်တွေအတွင်းမှာ မန်စီးတီး၊ စပိန်လက်ရွေးစင် အသင်းတို့နဲ့ ဆုဖလားအောင်မြင်မှုတွေ အများကြီး ရရှိခဲ့တဲ့သူပါ။

ကစားသမားအများစုဟာ GOAT နဲ့ ပတ်သက်ပြီး မေးမြန်းခံရချိန်မှာ မက်ဆီနဲ့ ရော်နယ်ဒိုတို့ နှစ်ဦးထဲက တစ်ဦးကို ရွေးချယ်ဖြေလေ့ရှိကြပေမယ့် ရိုဒရီကတော့ သူတို့နှစ်ဦးစလုံးကို ငြင်းပယ်ခဲ့တာ ဖြစ်ပါတယ်။

ရိုဒရီဟာ GOAT နဲ့ ပတ်သက်ပြီး GOAL ရဲ့မေးမြန်းမှုကို မန်စီးတီးအသင်းကွင်းလယ်လူ ဒီဘရိုင်းလို့ ဖြေခဲ့တာပါ။ 

ရိုဒရီဟာ ဒီဘရိုင်းကို GOAT လို့ဖော်ပြခဲ့တဲ့ တစ်ဦးတည်းသော မန်စီးတီးအသင်း ကစားသမား မဟုတ်ပါဘူး။ 

ရိုဒရီ၊ ဒီဘရိုင်းနဲ့ ဖိုဒန်တို့ကိုတွေ့ရစဉ်

ဒီဘရိုင်းဟာ ဒဏ်ရာကြောင့် ကာလရှည်ကြာ အနားယူရပြီးနောက် ပြန်ကစားနိုင်ခဲ့တဲ့ နယူးကာဆယ်အသင်းနဲ့ ပွဲမှာ အံ့အားသင့်ဖွယ် စွမ်းဆောင်နိုင်ခဲ့တာကြောင့် ဂရီလစ်ရှ်က သူ့ကို GOAT လို့ခေါ်ခဲ့တာ ဖြစ်ပါတယ်။ 

ဒီဘရိုင်းဟာ မန်စီးတီးအသင်းကို ရောက်ရှိလာခဲ့တဲ့ ၂၀၁၅ ခုနှစ်ကတည်းက အသင်းအတွက် အကောင်းဆုံး စွမ်းဆောင်နိုင်ခဲ့ပြီး ပရီးမီးယားလိဂ်ဖလား ၆ ကြိမ်၊ ချန်ပီယံလိဂ်ဖလား ၁ ကြိမ် အပါအဝင် ဆုဖလား အများအပြား ရယူပေးနိုင်ခဲ့တာပါ။ 

ရိုဒရီကလည်း မန်စီးတီးအသင်းကို ရောက်ရှိလာချိန်ကတည်းက အသင်းရဲ့အဓိက ကစားသမားဖြစ်ခဲ့ပြီး ၂၀၂၃-၂၄ ရာသီ PFA တစ်နှစ်တာ အကောင်းဆုံး ကစားသမားဆုအတွက် ဆန်ခါတင်စာရင်းမှာ ပါဝင်ခဲ့ပါတယ်။ 

ဒါပေမယ့် ဒီဆုကို မန်စီးတီးအသင်းဖော် ဖိုဒန်က သူနဲ့ ဟာလန်းတို့ကို အသာရပြီး ရရှိသွားခဲ့တာပါ။ 

မန်စီးတီးအသင်း ကစားသမားတွေဖြစ်တဲ့ ရိုဒရီ၊ ဖိုဒန်၊ ဟာလန်းနဲ့ ဝေါလ်ကာတို့ဟာ PFA တစ်နှစ်တာ အကောင်းဆုံးအသင်းမှာ ရွေးချယ်ခံခဲ့ရပါတယ်။

မန်စီးတီးအသင်းဟာ ပရီးမီးယားလိဂ် ရာသီသစ် အဖွင့်ပွဲစဉ်မှာ ချယ်လ်ဆီးအသင်းကို အနိုင်ရခဲ့ပြီး ဒုတိယမြောက် ပွဲစဉ်အဖြစ် တန်းတက် အစ်စဝှစ်ချ်အသင်းနဲ့ ယှဉ်ပြိုင်ရမှာဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ သြဂုတ် ၂၁

ဘန်လေအသင်း ကွင်းလယ်လူ ဆန်ဒါဘာ့ဂ်အတွက် ပေါင် ၂၅ သန်း နဲ့ ဖူလ်ဟမ်အသင်းရဲ့ ကမ်းလှမ်းမှုကို ဘန်လေအသင်းက လက်ခံခဲ့ပါတယ်။

ဖူလ်ဟမ်အသင်းဟာ ကနဦး ပေါင်သန်း ၂၀ ပေးချေဖို့ သဘောတူညီမှုရရှိခဲ့ပြီး နောက်ထပ် အပိုဆုကြေး ပေါင် ၅ သန်း ထပ်မံပေးချေဖို့ သဘောတူညီခဲ့တာပါ။

အဲဒီနောက် ဘာ့ဂ်ဟာ အင်္ဂါနေ့နံနက်မှာ ‌ဆေးစစ်မှုခံယူဖို့ စီစဥ်ထားတာဖြစ်ပါတယ်။

နော်ဝေးလက်ရွေးစင် ဘာ့ဂ်ဟာ ဖူလ်ဟမ်အသင်းရဲ့ စတုတ္ထမြောက် ခေါ်ယူမှုလည်း ဖြစ်ပါတယ်။

ဖူလ်ဟမ်ဟာ ဇူလိုင်လမှာ ဘိုင်ယန်မြူးနစ်အသင်းကို ဂျာအိုပယ်လင်ဟာ ပြောင်းရွှေ့ခဲ့တဲ့နောက် ကွင်းလယ် ရွေးချယ်မှုတွေ တိုးမြှင့်ဖို့ ကြိုးပမ်းနေတာပါ။

ဆန်ဒါဘာ့ဂ်ကို တွေ့ရစဥ်

ဆန်ဒါဘာ့ဂ်ကို ယူနိုက်တက်အသင်းကလည်း ပစ်မှတ်ထားနေတာပါ။

ယူနိုက်တက်အသင်းဟာ ဘန်လေအသင်းနဲ့ စာချုပ်သက်တမ်း ၃ နှစ် ကျန်ရှိနေသေးတဲ့ ဘာ့ဂ်အတွက် ဆွေးနွေးမှု တွေ ပြုလုပ်နေခဲ့တာ ဖြစ်ပါတယ်။

ဘာ့ဂ်ဟာ ပြီးခဲ့တဲ့ရာသီက ဘန်လေအသင်းရဲ့ ကွင်းလယ်မှာ ခြေစွမ်းပြနိုင်ခဲ့ပေမယ့်လည်း သူရဲ့အသင်းဟာ ချန်ပီယံရှစ်ကို တန်းဆင်းခဲ့ရတာ ဖြစ်ပါတယ်။

ဘာ့ဂ်ဟာ ချန်ပီယံရှစ်ရာသီရဲ့ ပထမဆုံးနှစ်ပွဲမှာတော့ ဘန်လေအသင်းနဲ့အတူ မပါဝင်နိုင်ခဲ့တာဖြစ်ပြီး နည်းပြ စကော့တ်ပါကာကတော့ ဒဏ်ရာကြောင့်ဖြစ်တယ်လို့ ပြောကြားခဲ့ပါတယ်။

အသက် ၂၆ နှစ်အရွယ် ကစားသမားဟာ ပြီးခဲ့တဲ့ရာသီက ၃၇ ပွဲ ကစားခဲ့တာဖြစ်ပါတယ်။

Source: BBC Sport

CNI Sport News

၂၀၂၄ ခုနှစ်၊ သြဂုတ် ၂၁

ပြင်သစ်အသင်းခေါင်းဆောင် ဘတ်ပီဟာ အသင်းဟောင်း ပီအက်စ်ဂျီအသင်းကနေ ရရှိမယ့် အကြွေးယူရို ၅၅ သန်းကို တောင်းဆိုခဲ့ပြီး ပြင်သစ်လီဂူး-၁ တရားရေးကော်မတီနဲ့ UEFA ထံ ဆက်သွယ်ထားတယ်လို့ Le Monde သတင်းမှာ ဖော်ပြထားပါတယ်။ 

ဒီယူရို ၅၅ သန်းဟာ ဘတ်ပီ ပီအက်စ်ဂျီအသင်းကနေ ရရှိမယ့် နောက်ဆုံး ၃ လစာနဲ့ သူ့ရဲ့သစ္စာရှိမှု ဆုကြေးငွေရဲ့ အစိတ်အပိုင်း ဖြစ်တယ်လို့ သိရတာပါ။ 

ဘတ်ပီဟာ ပြီးခဲ့တဲ့နွေရာသီက ပီအက်စ်ဂျီအသင်းနဲ့ စာချုပ်ကုန်ဆုံးပြီးနောက် ရီးရယ်လ်အသင်းထံ အလွတ် ပြောင်းရွှေ့ကြေးနဲ့ ပြောင်းရွှေ့ခဲ့တာ ဖြစ်ပါတယ်။

ပီအက်စ်ဂျီအသင်းဟာ ဘတ်ပီကို အသင်းမှာ ဆက်ရှိဖို့ ကြိုးစားခဲ့ပေမယ့် ထွက်ခွာသွားတဲ့အပေါ် စိတ်ပျက်ပြီး သူ့ရဲ့လုပ်ခလစာတွေကို မပေးဘဲ ထားရှိထားတာပါ။ 

အခုအချိန်မှာ ဘတ်ပီဟာ ပီအက်စ်ဂျီအသင်းကနေ ရရှိမယ့် နောက်ဆုံး ၃ လစာအပြင် ၂၀၂၂ ခုနှစ်က စာချုပ် သက်တမ်းတိုးပြီးနောက် ရရှိမယ့် လက်မှတ်ထိုးကြေးကိုပါ ရရှိချင်နေတာ ဖြစ်ပါတယ်။

ဘတ်ပီကို တွေ့ရစဉ်

ဘတ်ပီနဲ့ သူ့ရဲ့ကိုယ်စားလှယ်အဖွဲ့ဟာ ပီအက်စ်ဂျီအသင်းထံ စာပို့ပြီး တောင်းဆိုခဲ့ပေမယ့် ပြင်သစ်ကလပ်ဆီကနေ အကြောင်းပြန်မှု မရရှိခဲ့တာ ဖြစ်ပါတယ်။ 

အဲဒါကြောင့် ဘတ်ပီတို့အဖွဲ့ဟာ ပြင်သစ်လီဂူး-၁ တရားရေးကော်မတီနဲ့ ယူအီးအက်ဖ်အေထံ ဆက်သွယ်မှုတွေ ပြုလုပ်လာခဲ့တာပါ။

ပီအက်စ်ဂျီအသင်းအနေနဲ့ ဘတ်ပီတောင်းဆိုမှုကို ပေးဖို့ပျက်ကွက်ခဲ့မယ်ဆိုရင် ပြင်းထန်တဲ့ အရေးယူမှုတွေကို ခံယူရဖွယ်ရှိနေတာပါ။ 

ပြင်သစ်ဘောလုံးလိဂ်အဖွဲ့ချုပ်ဟာ ပီအက်စ်ဂျီအသင်းကို ကစားသမားအသစ် ခေါ်ယူမှုပိတ်ပင်တဲ့ ပြစ်ဒဏ်ချမှတ် နိုင်သလို UEFA ကလည်း ပီအက်စ်ဂျီအသင်းကို ဥရောပပြိုင်ပွဲတွေကနေ ယှဉ်ပြိုင်ခွင့် ပိတ်ပင်နိုင်တာ ဖြစ်ပါတယ်။ 

ဘတ်ပီဟာ ပီအက်စ်ဂျီအသင်းမှာ ၇ ရာသီကြာ ကစားခဲ့ပြီး ဆုဖလား အများအပြား ရယူနိုင်ခဲ့သလို အသင်းရဲ့ ဂိုးသွင်း အများဆုံး ကစားသမားအဖြစ် ရပ်တည်နိုင်ခဲ့တာပါ။ 

အသက် ၂၅ နှစ်အရွယ်ရှိ ဘတ်ပီဟာ အသင်းသစ်ရီးရယ်လ်အသင်းအတွက် ၂ ပွဲကစားထားပြီး ၁ ဂိုးသွင်းယူကာ ဥရောပစူပါဖလား ရရှိထားတာ ဖြစ်ပါတယ်။ 

Source: besoccer

CNI Sport News

၂၀၂၄ ခုနှစ်၊ သြဂုတ် ၂၁

ပရော်ဖက်ရှင်နယ် ဘောလုံးသမားများအဖွဲ့အစည်း(PFA)က ချီးမြှင့်တဲ့ ၂၀၂၃-၂၄ ရာသီ တစ်နှစ်တာ အကောင်းဆုံး အမျိုးသား ကစားသမားဆုကို မန်စီးတီးအသင်းက ဖိုဒန်က ရရှိခဲ့ပြီး အကောင်းဆုံး လူငယ်ကစားသမားဆုကို ချယ်လ်ဆီးအသင်းက ကိုးလ်ပါလ်မာက ရရှိသွားခဲ့ပါတယ်။ 

ဒီဆု ၂ ခုစလုံးကို အင်္ဂလိပ် ကစားသမားတွေ ရယူနိုင်ခဲ့တာဟာ ၂၀၀၉-၁၀ ရာသီနောက်ပိုင်း ပထမဆုံးအကြိမ် ဖြစ်ခဲ့တာပါ။ 

ဖိုဒန်ဟာ ပြီးခဲ့တဲ့ရာသီက မန်စီးတီးအသင်းအတွက် ပရီးမီးယားလိဂ် ပွဲပေါင်း ၃၅ ပွဲ ပါဝင်ကစားခဲ့ပြီး ၁၉ ဂိုး သွင်းယူကာ အသင်းကို သမိုင်းဝင် ပရီးမီးယားလိဂ်ဖလား ၄ ကြိမ်ဆက်တိုက် ရရှိအောင် ကူညီပေးနိုင်ခဲ့တာ ဖြစ်ပါတယ်။ 

ဖိုဒန်ဟာ ၂၀၂၃-၂၄ ရာသီ ပရီးမီးယားလိဂ် တစ်နှစ်တာ အကောင်းဆုံး ကစားသမားဆုနဲ့ ဘောလုံးအားကစား ကလောင်ရှင်များအဖွဲ့အစည်း(FWA)ရဲ့ အကောင်းဆုံး ကစားသမားဆုတွေကိုလည်း ရယူထားပြီးဖြစ်တာပါ။ 

ဖိုဒန်က “ဒီဆုကို ရယူနိုင်ခဲ့တာက အလွန်ထူးခြားပြီး ကျနော် အလွန်ဂုဏ်ယူသလို ကျေးဇူးလည်း တင်ပါတယ်။ ပရော်ဖက်ရှင်နယ် ဘောလုံးသမားတွေရဲ့ အသိအမှတ်ပြုခံရတာက ကျနော်အတွက် အဓိပ္ပါယ်အများကြီး  ရှိပါ တယ်။ ကျနော်ကို မဲပေးခဲ့တဲ့သူတွေအားလုံးကို ကျေးဇူးတင်ပါတယ်။ ပြီးခဲ့တဲ့ရာသီက ကလပ်မှာရှိတဲ့ လူတိုင်း အတွက် အလွန်ထူးခြားခဲ့ပေမယ့် အခုအချိန်မှာ ကျနော်တို့ဟာ ဒီရာသီမှာ အောင်မြင်မှုတွေ ပိုပြီးရရှိအောင် ကြိုးစားဖို့ အာရုံစိုက်ထားတယ်”လို့ ပြောခဲ့ပါတယ်။ 

 ဖိုဒန်ကို တွေ့ရစဉ်

PFA တစ်နှစ်တာ အကောင်းဆုံး လူငယ်ကစားသမားဆုကို ရရှိခဲ့တဲ့ ကိုးလ်ပါလ်မာဟာ ပြီးခဲ့တဲ့ရာသီက ချယ်လ်ဆီး အသင်းအတွက် ပရီးမီးယားလိဂ် ၃၄ ပွဲမှာ ၂၂ ဂိုးအထိ သွင်းယူပြီး ခြေစွမ်းပြသနိုင်ခဲ့တာပါ။

အဲဒါကြောင့် ကိုးလ်ပါလ်မာဟာ ပရီးမီးယားလိဂ် တစ်နှစ်တာ အကောင်းဆုံး လူငယ်ကစားသမားဆုကိုလည်း ရရှိခဲ့ပါတယ်။

ချယ်လ်ဆီးအသင်းမှာ ပြသခဲ့တဲ့ ခြေစွမ်းကြောင့် ကိုးလ်ပါလ်မာဟာ ယူရို ၂၀၂၄ ပြိုင်ပွဲဝင် အင်္ဂလန်အသင်း လူစာရင်းမှာ ရွေးချယ်ခံခဲ့ရပြီး စပိန်အသင်းကို အရေးနိမ့်ခဲ့တဲ့ ဗိုလ်လုပွဲမှာ အင်္ဂလန်အသင်းအတွက် ဂိုးသွင်းယူ နိုင်ခဲ့တာပါ။ 

PFA တစ်နှစ်တာ အကောင်းဆုံးအသင်းမှာ မန်စီးတီးအသင်းက ကစားသမား ၄ ဦး၊ အာဆင်နယ်အသင်းက ကစားသမား ၅ ဦးအထိ ပါဝင်ခဲ့ပါတယ်။

PFA တစ်နှစ်တာ အကောင်းဆုံး အမျိုးသမီးကစားသမားဆုကို မန်စီးတီးအသင်းက ခါဒီဂျာရှောနဲ့ လူငယ် ကစားသမားဆုကို ပြီးခဲ့တဲ့ရာသီက စပါးအသင်းမှာ အငှားကစားခဲ့တဲ့ ယူနိုက်တက်အသင်း ကွင်းလယ်လူ ကလင်တန်တို့က ရရှိသွားခဲ့တာဖြစ်ပါတယ်။ 

Source: BBC

CNI Sport News

၂၀၂၄ ခုနှစ်၊ သြဂုတ် ၂၀

ဂျာမနီကွင်းလယ်လူဟောင်း ဂန်ဒိုဂန်ဟာ ဘာစီလိုနာအသင်းမှာ တစ်ရာသီကြာ ကစားပြီးနောက် အသင်းဟောင်း မန်စီးတီးအသင်းထံ ပြန်လာဖို့အတွက် ဆွေးနွေးမှုတွေ ပြုလုပ်နေတယ်လို့ The Athletic က ဖော်ပြထားပါတယ်။ 

ဂန်ဒိုဂန်ဟာ မန်စီးတီးအသင်းကို ပရီးမီးယားလိဂ်၊ ချန်ပီယံလိဂ်နဲ့ FA ဖလားရရှိအောင် စွမ်းဆောင်ပေးခဲ့ပြီးနောက် အသင်းနဲ့စာချုပ် ကုန်ဆုံးသွားခဲ့လို့ ၂၀၂၃ ခုနှစ် နွေရာသီမှာ ဘာစီလိုနာအသင်းထံ အလွတ်နဲ့ ပြောင်းရွှေ့ခဲ့တာပါ။ 

ဂန်ဒိုဂန်ဟာ နည်းပြဟောင်း ဇာဗီ လက်အောက်မှာ ဘာစီလိုနာအသင်းရဲ့အဓိက ကစားသမား ဖြစ်ခဲ့ပေမယ့် အခု အချိန်မှာတော့ အသင်းက ထွက်ခွာဖို့ရှိနေပါတယ်။

ဂန်ဒိုဂန်ဟာ သူ့ရဲ့အနာဂတ်အတွက် ဘာစီလိုနာအသင်းနဲ့ စကားပြောဆိုပြီး ဖြစ်တယ်လို့ နည်းပြ ဟန်ဆီဖလစ်က ဝန်ခံထားတာပါ။ 

နည်းပြ ဟန်ဆီဖလစ်ကတော့ သူနဲ့အတူ ဂျာမနီအသင်းမှာ အတူလက်တွဲခဲ့တဲ့ ဂန်ဒိုဂန်ကို ဘာစီလိုနာအသင်းမှာ ဆက်ရှိဖို့ မျှော်လင့်တယ်လို့ ပြောခဲ့ပါတယ်။

 ဂန်ဒိုဂန်ကို တွေ့ရစဉ်

မန်စီးတီးအသင်းဟာ ဘာစီလိုနာအသင်းက ထွက်ချင်နေတဲ့ သူတို့ရဲ့ အသင်းခေါင်းဆောင်ဟောင်းကို ပြန်ခေါ်ဖို့ ဆန္ဒရှိနေပြီး ဖာဘရီဇီယိုရိုမန်နိုကလည်း ဒီအပြောင်းအရွှေ့ကို ဖော်ပြထားပါတယ်။ 

မန်စီးတီးအသင်းဟာ ဒီနွေရာသီ အပြောင်းအရွှေ့မှာ ကွင်းလယ်ကစားသမား ခေါ်ယူထားခြင်း မရှိတဲ့အတွက် ဂန်ဒိုဂန်နဲ့ ပြန်လည်လက်တွဲဖို့ နည်းပြ ဂွာဒီယိုလာက လမ်းဖွင့်ထားတာပါ။ 

ဘာစီလိုနာအသင်းရဲ့ ဘဏ္ဍာရေး အခြေအနေက ဂန်ဒိုဂန်အသင်းက ထွက်ခွာမယ့် အဓိကအကြောင်းအရင်း တစ်ခုအဖြစ် ရှိနေပါတယ်။ 

ဘာစီလိုနာအသင်းဟာ ဒီနွေရာသီမှာ လိုက်ပ်ဇစ်အသင်းကနေ ခေါ်ယူထားတဲ့ အော်လ်မိုကို စာရင်းသွင်းနိုင်ခြင်း မရှိသေးလို့ ဂန်ဒိုဂန်ကို ရောင်းချခဲ့ရင် အော်လ်မိုကို စာရင်းသွင်းနိုင်မယ်လို့ သိရတာပါ။ 

ဂန်ဒိုဂန်ဟာ မန်စီးတီးအသင်းမှာ ၂၀၁၆ ကနေ ၂၀၂၃ ခုနှစ်အထိ ပွဲပေါင်း ၃၀၀ ကျော် ပါဝင်ကစားခဲ့ပြီး ပရီးမီးယား လိဂ်ဖလား ၅ ကြိမ်၊ ချန်ပီယံလိဂ် ၁ ကြိမ် အပါအဝင် ဆုဖလား အများအပြား ရယူနိုင်ခဲ့ပါတယ်။ 

အသက် ၃၃ နှစ်အရွယ်ရှိ ဂန်ဒိုဂန်ဟာ ဘာစီလိုနာအသင်းအတွက် ၅၁ ပွဲ ပါဝင်ကစားခဲ့ပြီး ၅ ဂိုးသွင်းယူကာ ရာသီသစ် စပိန်လာလီဂါ အဖွင့်ပွဲစဉ်မှာ အသင်းလူစာရင်းကနေ ချန်လှပ်ခံခဲ့ရတာ ဖြစ်ပါတယ်။ 

Source: Goal

CNI Sport News

၂၀၂၄ ခုနှစ်၊ သြဂုတ် ၂၀

အာဂျင်တီးနားအသင်းဟာ စက်တင်ဘာလထဲမှာ ယှဉ်ပြိုင်မယ့် ၂၀၂၆ ကမ္ဘာ့ဖလားခြေစစ်ပွဲ (တောင်အမေရိကဇုန်) ပွဲစဉ်တွေအတွက် လူစာရင်း ထုတ်ပြန်ခဲ့တာမှာ အသင်းခေါင်းဆောင် မက်ဆီဟာ ဒဏ်ရာကြောင့် မပါဝင်နိုင်ခဲ့ဘူး လို့ သိရပါတယ်။ 

မက်ဆီဟာ ပြီးခဲ့တဲ့ ကိုပါအမေရိကဖလားပြိုင်ပွဲ ဗိုလ်လုပွဲမှာ ရရှိခဲ့တဲ့ ခြေချင်းဝတ်ဒဏ်ရာကနေ အပြည့်အဝ သက်သာခြင်း မရှိသေးတာကြောင့် အာဂျင်တီးနားအသင်းရဲ့ ကစားသမား ၂၈ ဦး လူစာရင်းမှာ မပါဝင်နိုင်ခဲ့တာပါ။ 

မက်ဆီဟာ ကိုပါအမေရိကဖလားပြိုင်ပွဲ ပြီးကတည်းက အင်တာမိုင်ယာမီအသင်းအတွက် ပါဝင်ကစားနိုင်ခြင်း မရှိသေးဘဲ ပြန်လည်ထူထောင်ရေး လုပ်ငန်းစဉ်တွေကို လုပ်ဆောင်နေတာ ဖြစ်ပါတယ်။ 

အာဂျင်တီးနားအသင်း လူစာရင်းမှာ ရေးဗားပလိတ်ဂိုးသမား အာမာနီနဲ့ ရိုးမားအသင်း တိုက်စစ်မှူး ဒိုင်ဘားလား တို့ ချန်လှပ်ခံခဲ့ရတာပါ။ 

နည်းပြ စကာလိုနီဟာ အီဇီကွီရယ်လ်ဖာနန်ဒက်ဇ်နဲ့ ကာစတယ်လ်လာနိုစ်တို့ကို ပထမဆုံးအကြိမ် ရွေးချယ်ခဲ့သလို လူငယ်ကြယ်ပွင့်တွေဖြစ်တဲ့ ဂါနာချို၊ ကာဘိုနီ၊ ဘာကိုနဲ့ ဆိုးလ်တို့လည်း အာဂျင်တီးနားအသင်း လူစာရင်းမှာ ပါဝင်ခဲ့တာ ဖြစ်ပါတယ်။

 မက်ဆီကို တွေ့ရစဉ်

မက်ဆီ မပါဝင်နိုင်တဲ့ အာဂျင်တီးနားအသင်းကို မာတီနက်ဇ်၊ ရိုမဲရိုး၊ အော်တာမန်ဒီ၊ ဒီပေါလ်၊ မက်အယ်လစ္စတာ၊ လောတရိုမာတီနက်ဇ်တို့က ဦးဆောင်သွားဖို့ ရှိနေတာပါ။ 

အာဂျင်တီးနားအသင်းဟာ ကမ္ဘာ့ဖလား ခြေစစ်ပွဲတွေအဖြစ် စက်တင်ဘာ ၅ ရက်မှာ ချီလီအသင်းနဲ့ အိမ်ကွင်း၊ ၁၀ ရက်မှာ ကိုလံဘီယာအသင်းနဲ့ အဝေးကွင်းပွဲစဉ် ယှဉ်ပြိုင်ရမှာ ဖြစ်ပါတယ်။

၂၀၂၆ ကမ္ဘာ့ဖလား ခြေစစ်ပွဲ(တောင်အမေရိကဇုန်) ပွဲစဉ်တွေ ၆ ပွဲ ကစားအပြီးမှာ အာဂျင်တီးနားအသင်းဟာ ၅ ပွဲနိုင် ၁ ပွဲရှုံးနဲ့ ထိပ်ဆုံးနေရာမှာ ရပ်တည်နေတာပါ။

၂၀၂၆ ကမ္ဘာ့ဖလားပြိုင်ပွဲကို တောင်အမေရိကဇုန်က ထိပ်ဆုံး ၆ သင်း တိုက်ရိုက်ယှဉ်ပြိုင်ခွင့် ရရှိမှာဖြစ်ပြီး အဆင့် ၇ နေရာမှာ ရပ်တည်တဲ့အသင်းက ပလေးအော့ဖ်အဆင့် ယှဉ်ပြိုင်ရမှာဖြစ်ပါတယ်။ 

Source: CNA

CNI Sport News

၂၀၂၄ ခုနှစ်၊ သြဂုတ် ၂၀

ချယ်လ်ဆီးအသင်းဟာ ပေါ်တူဂီတိုက်စစ်မှူး ဂျာအိုဖီးလစ်ကို ခေါ်ယူဖို့ အသလက်တီကိုအသင်းနဲ့ ပြောင်းရွှေ့ကြေး သဘောတူညီမှု ရရှိခဲ့သလို ကွင်းလယ်လူ ဂယ်လာဂါဟာ အပြောင်းအရွှေ့ အစိတ်အပိုင်းအဖြစ် စပိန်ကလပ်ထံ ပြောင်းရွှေ့မှာ ဖြစ်ပါတယ်။ 

၂၀၂၃ ခုနှစ်၊ ဇန်နဝါရီလ အပြောင်းအရွှေ့က ချယ်လ်ဆီးအသင်းမှာ အငှားလာရောက် ကစားခဲ့ဖူးတဲ့ ဂျာအိုဖီးလစ် ဟာ လန်ဒန်ကလပ်နဲ့ ၆ နှစ် စာချုပ်ချုပ်ဆိုမှာပါ။

ဂျာအိုဖီးလစ်ရဲ့ ပြောင်းရွှေ့ကြေးကို အတိအကျ မသိရသေးပေမယ့် ယူရိုသန်း ၅၀ တန်ကြေးရှိနိုင်တယ်လို့ သတင်းတွေမှာ ဖော်ပြထားတာပါ။ 

ဂျာအိုဖီးလစ်ဟာ အပြောင်းအရွှေ့ ကိစ္စတွေကြောင့် ဗီလာရီးရယ်လ်အသင်းနဲ့ သရေကျခဲ့တဲ့ စပိန်လာလီဂါပွဲစဉ်မှာ အသင်းအတွက် မပါဝင်နိုင်ခဲ့ဘူးလို့ အသလက်တီကို အသင်းနည်းပြ ဆီမြွန်နီက အတည်ပြုခဲ့ပါတယ်။ 

ချယ်လ်ဆီးအသင်း အကယ်ဒမီထွက် ဂယ်လာဂါဟာ အသလက်တီကိုအသင်းထံ ပေါင် ၃၄ သန်းနဲ့ ၅ နှစ် စာချုပ် ချုပ်ဆိုကာ ပြောင်းရွှေ့မှာဖြစ်ပြီး ပုဂ္ဂိုလ်ရေး သဘောတူညီမှုရခဲ့သလို ဆေးစစ်မှုလည်း ပြီးမြောက်ခဲ့ပြီ ဖြစ်တာပါ။ 

ဂယ်လာဂါဟာ အသလက်တီကိုအသင်းနဲ့ အပြောင်းအရွှေ့ကိစ္စ နှောင့်နှေးနေလို့ ပြီးခဲ့တဲ့ ရက်ပိုင်းကမှ လန်ဒန်ကို ပြန်လာခဲ့ပေမယ့် အခု မက်ဒရစ်ကို ပြန်သွားပြီး အပြောင်းအရွှေ့ကို အပြီးသတ် လုပ်ဆောင်ရမှာ ဖြစ်ပါတယ်။ 

ရောင်းထုတ်မယ့် ချယ်လ်ဆီးအသင်း ကစားသမား ၃ ဦးကိုတွေ့ရစဉ်

ဂျာအိုဖီးလစ်ဟာ ဒီနွေရာသီမှာ ချယ်လ်ဆီးအသင်းရဲ့ ၁၁ ဦးမြောက် ကစားသမားခေါ်ယူမှု ဖြစ်လာမှာပါ။ 

ချယ်လ်ဆီးအသင်းဟာ အပြောင်းအရွှေ့ ဈေးကွက်မပိတ်ခင်မှာ ကစားသမား အများအပြားကို ရောင်းချဖို့ လုပ်ဆောင်နေပြီး ဒီအထဲမှာ လူကာကူ၊ စတာလင်၊ ဘန်ချီဝဲလ်တို့လို နာမည်ကြီးတွေလည်း ပါဝင်နေတာပါ။ 

လူကာကူဟာ နာပိုလီအသင်းထံ ပြောင်းရွှေ့ဖို့ နီးစပ်နေပြီး စတာလင်ကို ခေါ်ယူဖို့ ဂျူဗင်တပ်စ်အသင်းက စိတ်ဝင် စားနေတယ်လို့ သတင်းထွက်နေတာ ဖြစ်ပါတယ်။ 

ချယ်လ်ဆီးအသင်းဟာ ပရီးမီးယားလိဂ် အဖွင့်ပွဲစဉ်မှာ မန်စီးတီးအသင်းကို ၂ ဂိုး- ဂိုးမရှိနဲ့ အရေးနိမ့်ပြီးနောက် ဒုတိယမြောက်ပွဲစဉ်မှာ နိုင်ပွဲရယူနိုင်ဖို့ မျှော်လင့်နေတာပါ။ 

ချယ်လ်ဆီးအသင်းဟာ ဒီအပတ် ပရီးမီးယားလိဂ် ပွဲစဉ်အဖြစ် ဝုလ်ဗ်စ်အသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: ESPN