CNI Sport News

၂၀၂၅ ခုနှစ်၊ စက်တင်ဘာ ၁၈

ပေါ်တူဂီလူမျိုးနည်းပြ မော်ရင်ဟိုဟာ ဘင်ဖီကာအသင်းကို ကိုင်တွယ်ဖို့ စိတ်ဝင်စားကြောင်း ဝန်ခံခဲ့ပြီး အသင်းနဲ့ ဆွေးနွေးမှုတွေ ပြုလုပ်ဖို့ ပေါ်တူဂီနိုင်ငံကို ရောက်ရှိနေတာ ဖြစ်ပါတယ်။ 

အသက် ၆၂ နှစ်အရွယ်ရှိ မော်ရင်ဟိုဟာ ဖီနာဘာချီအသင်းကို ချန်ပီယံလိဂ် ဝင်ခွင့်ရရှိအောင် ကိုင်တွယ်ပေး နိုင်ခဲ့ခြင်း မရှိတာကြောင့် ထုတ်ပယ်ခံရပြီးနောက် ဘယ်အသင်းကိုမှ ကိုင်တွယ်ရခြင်းမရှိသေးတာပါ။ 

ဘင်ဖီကာအသင်းဟာ ပြီးခဲ့တဲ့ ချန်ပီယံလိဂ် အဖွင့်ပွဲစဉ်မှာ ကာရာဘတ်အသင်းကို အရေးနိမ့်ခဲ့ပြီးနောက် နည်းပြ ဘရူနိုလေ့ချ်ကို ရာထူးကနေ ထုတ်ပယ်ခဲ့တာ ဖြစ်ပါတယ်။ 

ဘင်ဖီကာအသင်းဟာ လစ်လပ်နေတဲ့ နည်းပြနေရာအတွက် မော်ရင်ဟိုကို နည်းပြသစ်အဖြစ် ခန့်အပ်ဖို့ သဘော တူညီမှု ရရှိထားတယ်လို့ ဖာဘရီဇီယိုရိုမာနိုက ဖော်ပြထားပါတယ်။ 

မော်ရင်ဟိုဟာ ဘင်ဖီကာအသင်းမှာ နည်းပြဘဝ စတင်ခဲ့ပေမယ့် အသင်းအကြီးအကဲတွေနဲ့ အဆင်မပြေခဲ့ တာကြောင့် ၁၀ ပွဲသာ ကိုင်တွယ်အပြီးမှာ ထွက်ခွာခဲ့တာပါ။

မော်ရင်ဟိုကို တွေ့ရစဉ်

မော်ရင်ဟိုဟာ ချယ်လ်ဆီး၊ ရီးရယ်လ်၊ အင်တာမီလန်နဲ့ မန်ယူနိုက်တက်အသင်းတို့ကို မကိုင်တွယ်မီမှာ ပေါ်တူဂီ ကလပ် ပေါ်တိုအသင်းကို ကိုင်တွယ်ခဲ့ပြီး ချန်ပီယံလိဂ်နဲ့ ယူရိုပါလိဂ်ဖလား အပါအဝင် ဆုဖလား အများအပြား ရယူပေးနိုင်ခဲ့ပါတယ်။ 

မော်ရင်ဟိုက “ဘင်ဖီကာအသင်းက ကျနော့်ကို နည်းပြရာထူး စိတ်ဝင်စားလားလို့မေးတော့ စိတ်ဝင်စားတယ်လို့ ပြောခဲ့ပါတယ်။ ကျနော် ပေါ်တူဂီကို ပြန်ရောက်တဲ့အချိန်မှာ ဘင်ဖီကာအသင်း တာဝန်ရှိသူတွေနဲ့ စကားပြောရ တာ ပျော်ရွှင်မယ်လို့ ပြောခဲ့ပါတယ်။ ဘင်ဖီကာအသင်းကို ကိုင်တွယ်ဖို့ ဖြစ်နိုင်ဖွယ် အခြေအနေနဲ့ ကြုံတွေ့လာ ရတဲ့ အချိန်မှာ စိတ်ဝင်စားတဲ့အတွက် နှစ်ကြိမ်တောင်မတွေးခဲ့ပါဘူး”လို့ ပြောခဲ့ပါတယ်။ 

မော်ရင်ဟိုဟာ ဘင်ဖီကာအသင်းကို နည်းပြသစ်အဖြစ် ကိုင်တွယ်ခဲ့ရင် ချန်ပီယံလိဂ်ပြိုင်ပွဲမှာ သူ့ရဲ့အသင်းဟောင်း တွေဖြစ်တဲ့ ချယ်လ်ဆီး၊ ရီးရယ်လ်အသင်းတို့နဲ့ ပြန်လည် တွေ့ဆုံရမှာဖြစ်သလို ပေါ်တိုအသင်းနဲ့လည်း လိဂ်ပြိုင်ပွဲ မှာ ပြန်လည်ရင်ဆိုင်ရမှာ ဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ စက်တင်ဘာ ၁၈

အင်္ဂလန်တိုက်စစ်မှူး ဟာရီကိန်းဟာ ဘိုင်ယန်မြူးနစ်အသင်းက ချယ်လ်ဆီးအသင်းကို ၃ ဂိုး-၁ ဂိုးနဲ့ အနိုင်ရခဲ့တဲ့ ချန်ပီယံလိဂ် League Phase အဖွင့်ပွဲစဉ်မှာ ၂ ဂိုးသွင်းယူခဲ့ပြီးနောက် ယူနိုက်တက်အသင်း ဂန္ထဝင် ဒေးဗစ်ဘက်ခမ်း ရဲ့ ချန်ပီယံလိဂ်စံချိန်ကို ချိုးဖျက်နိုင်ခဲ့ပါတယ်။ 

ဟာရီကိန်းဟာ ဒီပွဲမှာ ၂ ဂိုး သွင်းယူခဲ့တာကြောင့် ကစားသမားဘဝ ချန်ပီယံလိဂ် ပွဲပေါင်း ၅၈ ပွဲ ပါဝင် ကစား အပြီးမှာ ၄၂ ဂိုးသွင်းယူကာ ၁၁ ဂိုး ဖန်တီးနိုင်ခဲ့ပြီး ဂိုးပါဝင်ပတ်သက်မှု ၅၃ ဂိုးရှိလာခဲ့တာပါ။ 

ဒါဟာ ချန်ပီယံလိဂ်ပြိုင်ပွဲမှာ အင်္ဂလိပ် ကစားသမားတစ်ဦးအတွက် စံချိန်တင်ဖြစ်ပြီး အရင်က စံချိန်တင်ထားတဲ့ ဒေးဗစ်ဘက်ခမ်းရဲ့ ဂိုးပါဝင်ပတ်သက်မှု ၅၂ ဂိုးကို ဟာရီကိန်းက ၁ ဂိုးအသာနဲ့ ကျော်ဖြတ်ပြီး စံချိန်သစ် တင်နိုင်ခဲ့ တာ ဖြစ်ပါတယ်။ 

စပါးအသင်း ကစားသမားဟောင်း ဟာရီကိန်းဟာ ချန်ပီယံလိဂ်ပြိုင်ပွဲမှာ မတူညီတဲ့ ကလပ်အသင်း ၂ သင်းအတွက် သွင်းဂိုး၂၀ အထက် သွင်းယူထားတဲ့ ကစားသမား စာရင်းထဲမှာလည်း ပါဝင်နေတာပါ။ 

ဒေးဗစ်ဘက်ခမ်းကို တွေ့ရစဉ်

ဘိုင်ယန်မြူးနစ်အသင်းအတွက် ၁၀၂ ပွဲ ပါဝင်ကစားထားပြီး ၉၅ ဂိုးသွင်းယူထားတဲ့ ဟာရီကိန်းက သူဟာ အမြဲတမ်း လိုလိုကောင်းမွန်တဲ့ ခံစားချက်ကို ရရှိနေတယ်လို့ ပွဲအပြီး TNT Sports နဲ့ အင်တာဗျူးမှာ ပြောခဲ့ပါ တယ်။ 

ဟာရီကိန်းက “ကောင်းမွန်တဲ့ သွင်းဂိုး ၂ ဂိုးဖြစ်ခဲ့ပြီး ကျနော်ဟာ ရုပ်ပိုင်းရော စိတ်ပိုင်းဆိုင်ရာပါ အကောင်းဆုံးပုံစံ ဖြစ်နေပါတယ်။ အလွန်ကောင်းမွန်တဲ့အသင်းနဲ့ ကစားရခက်ခဲတဲ့ပွဲမှာ အံ့သြစရာကောင်းတဲ့ ရလဒ်ရရှိခဲ့ပါတယ်။ ပြီးခဲ့တဲ့ ရာသီကထက် ဒီရာသီမှာ သွင်းဂိုးတွေ ပိုပြီးသွင်းယူနိုင်ဖို့ မျှော်လင့်ပါတယ်။ တိုးတက်ဖို့နဲ့ ပိုပြီးကောင်း အောင် လုပ်ဖို့က အမြဲတမ်း ရည်မှန်းချက်တစ်ခုပါ”လို့ ပြောခဲ့ပါတယ်။ 

အသက် ၃၂ နှစ်အရွယ်ရှိ ဟာရီကိန်းဟာ ဒီရာသီမှာ ဘိုင်ယန်မြူးနစ်အသင်းအတွက် ၆ ပွဲ ကစားထားပြီး ၁၀ ဂိုး သွင်းယူကာ ဂိုးဖန်တီးမှု ၃ ကြိမ် ပြုလုပ်ထားတာပါ။

ဒီရာသီမှာ ကစားထားတဲ့ပွဲတိုင်း ရာနှုန်းပြည့် နိုင်ပွဲရရှိထားတဲ့ ဘိုင်ယန်မြူးနစ်အသင်းဟာ လာမယ့် ဘွန်ဒက်လီဂါ ပွဲစဉ်အဖြစ် ဟော်ဖန်ဟိမ်းအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: Metro

CNI Sport News

၂၀၂၅ ခုနှစ်၊ စက်တင်ဘာ ၁၇

လေဗာကူဆင်အသင်းကနေ ထုတ်ပယ်ခြင်း ခံထားရတဲ့ ဒတ်ချ်လူမျိုးနည်းပြ အဲရစ်တန်ဟတ်ဟာ အသင်းဟောင်း တွေထဲက တစ်သင်းဖြစ်တဲ့ တွမ်တီးအသင်းထံ ပြန်သွားဖို့ ငြင်းပယ်ခဲ့ပါတယ်။

အဲရစ်တန်ဟတ်ဟာ ပြီးခဲ့တဲ့နှစ် အောက်တိုဘာက ယူနိုက်တက်အသင်းကနေ ထုတ်ပယ်ခံရပြီးနောက် နွေရာသီမှာ နည်းပြလောကထဲကို ပြန်လည်ဝင်ရောက်ကာ လေဗာကူဆင်အသင်းကို ကိုင်တွယ်ခဲ့ပေမယ့် လိဂ်ပွဲစဉ် ၂ ပွဲကိုင် တွယ် အပြီးမှာ ထုတ်ပယ်ခြင်း ခံခဲ့ရတာပါ။ 

Telegraaf က အဲရစ်တန်ဟတ် ကစားသမားအဖြစ် ၃ ကြိမ် ကစားခဲ့တဲ့ တွမ်တီးအသင်းဟာ သူ့ကို နည်းပြသစ် အဖြစ် ခန့်အပ်ဖို့ စိတ်ဝင်စားနေတယ်လို့ ဖော်ပြထားပါတယ်။ 

တွမ်တီးအသင်းဟာ နည်းပြဖြစ်သူနဲ့ လမ်းခွဲပြီးနောက် နည်းပြသစ် ပြန်လည်ခန့်အပ်ရခြင်း မရှိသေးတာပါ။ 

ဒါပေမယ့် အဲရစ်တန်ဟတ်ကတော့ မကြာမီမှာ အသင်းတစ်သင်းရဲ့ ကမ်းလှမ်းမှု ရရှိလာနိုင်တာကြောင့် မွေးရပ်မြေထံ မပြန်ဖို့ ဆုံးဖြတ်ခဲ့တာဖြစ်ပါတယ်။

အဲရစ်တန်ဟတ်ဟာ လေဗာကူဆင်အသင်းကနေ ထုတ်ပယ်ခံရပြီးနောက် လျော်ကြေးအဖြစ် ယူရို ၆ သန်း ဝန်းကျင် ရရှိထားတာပါ။

နစ္စတယ်ရွိုင်းကို တွေ့ရစဉ်

တွမ်တီးအသင်းဟာ အဲရစ်တန်ဟတ်ကို နည်းပြသစ်အဖြစ် ခန့်အပ်ဖို့ အဆင်မပြေတာကြောင့် နစ္စတယ်ရွိုင်းဘက် ကို မြှားဦးလှည့်ဖို့ ရှိနေပါတယ်။

အဲရစ်တန်ဟတ် ထုတ်ပယ်ခံရချိန်မှာ ယူနိုက်တက်အသင်းကို ယာယီနည်းပြအဖြစ် ကိုင်တွယ်ခဲ့တဲ့ နစ္စတယ်ရွိုင်း ဟာ တွမ်တီးအသင်းရဲ့ နည်းပြသစ် ဖြစ်လာနိုင်တဲ့ စာရင်းထဲမှာ ပါဝင်နေတာပါ။

နစ္စတယ်ရွိုင်းဟာ ပြီးခဲ့တဲ့နွေရာသီက လက်စတာအသင်းကနေ ထုတ်ပယ်ခံရပြီးနောက် လက်ရှိအချိန်မှာ အသင်း လက်မဲ့ ဖြစ်နေတဲ့အတွက် တွမ်တီးအသင်းကို ကိုင်တွယ်ပြီး နည်းပြလောကထဲကို ပြန်လည်ဝင်ရောက်လာနိုင် ပါတယ်။ 

တွမ်တီးအသင်းဟာ ဒီရာသီ ဒတ်ချ် လိဂ်ပွဲစဉ် ၅ ပွဲကစားအပြီးမှာ ၁ ပွဲသာ အနိုင်ရကာ ရမှတ် ၄ မှတ်နဲ့ အမှတ်ပေးဇယားအဆင့် ၁၃ နေရာမှာ ရပ်တည်နေတာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ စက်တင်ဘာ ၁၇

ဘီလ်ဘာအိုအသင်းဟာ ချန်ပီယံလိဂ် League Phase အဖွင့်ပွဲစဉ်မှာ အာဆင်နယ်အသင်းကို ၂ ဂိုး-ဂိုးမရှိနဲ့ အရေးနိမ့်ခဲ့ပြီးနောက် တိုက်စစ်မှူး အင်ယာကီဝီလီယံစ်က အာဆင်နယ်အသင်းကို ချန်ပီယံလိဂ်ဖလားရနိုင်ဖို့ ရေပန်းစားတဲ့ အသင်းတွေထဲက တစ်သင်းအဖြစ် သတ်မှတ်သင့်တယ်လို့ ပြောခဲ့ပါတယ်။ 

အင်ယာကီဝီလီယံစ်က “ကျနော်တို့ဟာ ပွဲကောင်းတစ်ပွဲကို ကစားခဲ့ရတာကြောင့် ပွဲရလဒ်က ဘယ်လိုမျိုး ဖြစ်ခဲ့လဲ ဆိုတာ ထင်ဟပ်နေမှာ မဟုတ်ပါဘူး။ အဆုံးမှာတော့ အာဆင်နယ်အသင်းဟာ ဒီပြိုင်ပွဲမှာ ချန်ပီယံဖြစ်ဖို့ ရေပန်း အစားဆုံး အသင်းတွေထဲက တစ်သင်းပါပဲ။ ကျနော်တို့ တိုက်ပွဲဝင်ပြီး အရာအားလုံးကို ပေးခဲ့ပေမယ့် ဖြစ်မလာခဲ့ ပါဘူး။ ကျနော်တို့ဟာ ချန်ပီယံလိဂ်ကို ယှဉ်ပြိုင်ဖို့ လာခဲ့တာဖြစ်လို့ လက်ကျန်ပွဲတွေမှာ ရလဒ်ကောင်းတွေ ရရှိ အောင် လုပ်သွားမယ်”လို့ ပြောခဲ့တာပါ။ 

အာဆင်နယ်အသင်းဟာ ဒီပွဲစဉ်ရဲ့ဒုတိယပိုင်းမှာ လူစားလဲ ဝင်ရောက်လာခဲ့တဲ့ မာတင်နယ်လီနဲ့ ထရော့ဆာဒ်တို့ရဲ့ သွင်းဂိုးတွေကြောင့် ဘီလ်ဘာအိုအသင်းကို အနိုင်ရပြီး ချန်ပီယံလိဂ် အဖွင့်ပွဲစဉ်မှာ ရမှတ်အပြည့် ရယူနိုင်ခဲ့တာ ဖြစ်ပါတယ်။ 

အာဆင်နယ်အသင်းကို တွေ့ရစဉ် 

အာဆင်နယ်အသင်းဟာ ပြီးခဲ့တဲ့ရာသီက ချန်ပီယံလိဂ်ပြိုင်ပွဲမှာ ဆီမီးဖိုင်နယ်တက်နိုင်ခဲ့ပြီး ဒီရာသီမှာ ဆုဖလားရ ယူနိုင်ဖို့ ပစ်မှတ်ထားနေတာပါ။ 

ဒီအချိန်မှာ ဘီလ်ဘာအိုအသင်း တိုက်စစ်မှူး အင်ယာကီဝီလီယံစ်က အာဆင်နယ်အသင်းဟာ ချန်ပီယံလိဂ်ဖလား ရယူနိုင်ဖို့ ရေပန်းအစားဆုံး အသင်းတွေထဲက တစ်သင်းလို့ ပြောခဲ့တာဖြစ်ပါတယ်။ 

အာဆင်နယ်အသင်းနည်းပြ အာတီတာက လူစားလဲ ဝင်ရောက်လာပြီး သွင်းဂိုးတွေ သွင်းယူနိုင်ခဲ့တဲ့ မာတင်နယ် လီနဲ့ ထရော့ဆာဒ်တို့ကို ချီးကျူးခဲ့ပြီး ပွဲထွက် ကစားသမားတွေထက် အဆုံးသတ် ပိုင်းကောင်းမွန်တဲ့ သူတွေဟာ ပိုပြီး အရေးပါလာနိုင်တယ်လို့ ပြောခဲ့ပါတယ်။ 

ပရီးမီးယားလိဂ် ပြိုင်ပွဲမှာလည်း ရလဒ်ကောင်းတွေ ပိုင်ဆိုင်ထားတဲ့ အာဆင်နယ်အသင်းဟာ လာမယ့်လိဂ်ပွဲစဉ် အဖြစ် မန်စီးတီးအသင်းကို အိမ်ကွင်းလက်ခံ ယှဉ်ပြိုင်ရမှာဖြစ်ပါတယ်။ 

Source: Metro

CNI Sport News

၂၀၂၅ ခုနှစ်၊ စက်တင်ဘာ ၁၇

ပြင်သစ်အသင်းခေါင်းဆောင် ဘတ်ပီဟာ ရီးရယ်လ်အသင်းက မာဆေးလ်အသင်းကို ၂ ဂိုး-၁ ဂိုးနဲ့ အနိုင်ရခဲ့တဲ့ ချန်ပီယံလိဂ် League Phase အဖွင့်ပွဲစဉ်မှာ ပင်နယ်တီကနေ ၂ ဂိုးစလုံး သွင်းယူခဲ့ပြီးနောက် ရီးရယ်လ်အသင်း ကစားသမားဘဝ သွင်းဂိုး ၅၀ ပြည့်သွားခဲ့ပါတယ်။ 

မနှစ်ကနွေရာသီမှာ PSG အသင်းကနေ အလွတ်နဲ့ ရောက်ရှိလာခဲ့တဲ့ ဘတ်ပီဟာ ရီးရယ်လ်အသင်းအတွက် ပွဲပေါင်း ၆၄ ပွဲ ပါဝင်ကစားအပြီးမှာ သွင်းဂိုး ၅၀ ပြည့်ခဲ့တာပါ။

ရီးရယ်လ်အသင်းဟာ ဒီပွဲမှာ မာဆေးလ်အသင်းရဲ့ ဦးဆောင်ဂိုး သွင်းယူခြင်းကို ခံခဲ့ရပေမယ့် ဘတ်ပီက ချေပဂိုး သွင်းယူခဲ့ပြီး ဒုတိယပိုင်း ပွဲချိန် ၇၂ မိနစ်မှာ အသင်းခေါင်းဆောင် ကာဗာဟယ်လ် တိုက်ရိုက်အနီကတ်နဲ့ ထုတ်ပယ် ခံခဲ့ရလို့ အခက်တွေ့ခဲ့ပါတယ်။ 

ရီးရယ်လ်အသင်းဟာ တစ်ယောက်လျော့နဲ့ ကစားခဲ့ရပေမယ့် ပွဲချိန် ၈၁ မိနစ်မှာ ဘတ်ပီက အနိုင်ဂိုး သွင်းယူ ပေးနိုင်ခဲ့တာပါ။ 

ဘတ်ပီဟာ ဒီရာသီမှာ ရီးရယ်လ်အသင်းအတွက် ချန်ပီယံလိဂ်သွင်းဂိုး ၂ ဂိုး အပါအဝင် ပြိုင်ပွဲစုံ ၅ ပွဲကစား ထားအပြီးမှာ ၆ ဂိုး သွင်းယူထားပါတယ်။ 

ဘတ်ပီကို တွေ့ရစဉ် 

ဘတ်ပီက သူဟာ နည်းပြဇာဘီအလွန်ဆို လုပ်ခိုင်းတဲ့ အရာတွေကို လုပ်ပြီး အသင်းကို ဆုဖလားတွေ ရရှိအောင် ကူညီပေးချင်တယ်လို့ ပွဲအပြီး Movistar နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့ပါတယ်။ 

ဘတ်ပီက “ကျနော်တို့ဟာ ၁၀ ဦးတည်းနဲ့ ကစားခဲ့ရတဲ့အတွက် ခက်ခဲခဲ့ပေမယ့် ဘာနေဗျူးမှာ ကျနော်တို့ရဲ့ ချန်ပီယံလိဂ် တိုက်ပွဲဝင် စိတ်ဓါတ်ကို ပြသနိုင်ခဲ့ပါတယ်။ နိုင်ပွဲအတွက် ကျနော်တို့ ပျော်ရွှင်ပါတယ်။ ကျနော်က တော့ နည်းပြလုပ်ခိုင်းတဲ့ အရာတွေကို လုပ်သွားမှာပါ။ ကျနော်တို့ဟာ နည်းပြပြောတဲ့ ပုံစံအတိုင်းလုပ်ပြီး အသင်း ကို ဆုဖလားတွေရရှိအောင် ကူညီပေးနိုင်ပါလိမ့်မယ်”လို့ ပြောခဲ့ပါတယ်။ 

မာဆေးလ်အသင်းနည်းပြ ဒီဇာဘီဟာ ဒီပွဲမှာ ရီးရယ်လ်အသင်းဘက်ကို နောက်ကျ ပင်နယ်တီပေးခဲ့တဲ့ ကွင်းလယ်ဒိုင်လူကြီးရဲ့ ဆုံးဖြတ်ချက်ကို ဒေါသထွက်နေပြီး ဒါက ပင်နယ်တီ လုံးဝမဟုတ်ဘူးလို့ ပြောခဲ့တာပါ။ 

ဒီပွဲစဉ်မှာ ရီးရယ်လ်အသင်းရဲ့ ပွဲထွက်လူစာရင်းထဲ ပါဝင်ခဲ့တဲ့ ညာနောက်ခံလူ အာနိုးလ်ဟာ တံကောက်ကြော ဒဏ်ရာကြောင့် ပွဲချိန် ၅ မိနစ်မှာတင် လူစားလဲခံခဲ့ရပြီး အသင်းရဲ့ လာမယ့်ပွဲစဉ်အချို့ကို လွဲချော်သွားဖွယ် ရှိနေပါတယ်။ 

Source: ESPN

CNI Sport News

၂၀၂၅ ခုနှစ်၊ စက်တင်ဘာ ၁၆

အာဂျင်တီးနားနောက်ခံလူ ရိုမဲရိုးက နွေရာသီမှာ စပါးအသင်းကနေ ထွက်ခွာချင်တယ်ဆိုပြီး သူဘယ်တုန်းကမှ မပြောခဲ့ဖူးကြောင်း သတင်းထောက်တွေနဲ့ တွေ့ဆုံချိန်မှာ ဖွင့်ဟခဲ့ပါတယ်။ 

ရိုမဲရိုးက “ကလပ်ကနေ ထွက်ခွာချင်တယ်လို့ ကျနော် ဘယ်တုန်းကမှ မပြောခဲ့ဖူးပါဘူး။ ဒါက ကျနော့်အတွက် ဘာသက်ရောက်မှုမှ မရှိပါဘူး။ စပါးအသင်းမှာ အလွန်ပျော်ရွှင်ပြီး မိသားစုလိုပါပဲ။ ကျနော်နည်းပြကို နှစ်သက်ပြီး ကျနော်တို့ရဲ့ အလုပ်လုပ်ပုံတွေ၊ လေ့ကျင့်ပုံတွေကို ကျနော် သဘောကျပါတယ်။ အရာရာတိုင်းက အမြဲတမ်း တိုးတက်နိုင်ပေမယ့် ဒီနေရာရဲ့ အဆင့်တိုင်းမှာရှိတဲ့ လူတွေဟာ တိုးတက်ဖို့အတွက် မှန်ကန်တဲ့ ခြေလှမ်းတွေ လှမ်းနေကြပါတယ်။ ဒီမှာအလွန်ပျော်ပါတယ်”လို့ ပြောခဲ့တာပါ။ 

ရိုမဲရိုးဟာ ပြီးခဲ့တဲ့ နွေရာသီ အပြောင်းအရွှေ့မှာ အက်သလက်တီကိုအသင်းရဲ့ ချိတ်ဆက်မှုတွေ ခံခဲ့ရသလို နည်းပြဟောင်း ပိုစတီကိုဂလူး ထုတ်ပယ်ခံခဲ့ရတာကြောင့် စပါးအသင်းကနေ ထွက်ခွာဖွယ်ရှိတယ်လို့ သတင်းတွေ ထွက်ခဲ့ပါတယ်။ 

ရိုမဲရိုးကို တွေ့ရစဉ် 

ဒါပေမယ့် ရိုမဲရိုးဟာ စပါးအသင်းနဲ့ ကာလရှည် စာချုပ်ချုပ်ဆိုခဲ့ပြီး နည်းပြသောမတ်စ်ဖရန့်ခ်က သူ့ကို အသင်းခေါင်းဆောင်သစ်အဖြစ် ခန့်အပ်ခဲ့တာပါ။ 

အခုအချိန်မှာတော့ ရိုမဲရိုးဟာ စပါးအသင်းကနေ သူထွက်ခွာ ချင်နေတယ်ဆိုတဲ့ သတင်းတွေကို ပြန်ပြီး တုံ့ပြန်ခဲ့တာ ဖြစ်ပါတယ်။ 

ရိုမဲရိုးဟာ စပါးအသင်း နည်းပြသောမတ်စ်ဖရန့်ခ်ရဲ့ အဓိက ကစားသမားအဖြစ် သတ်မှတ်ခံထားရပြီး ဒီရာသီ အသင်း ကစားထားတဲ့ ပွဲတိုင်းမှာ ပွဲချိန်ပြည့် ပါဝင်ကစားထားတာပါ။

ရိုမဲရိုးဟာ PSG အသင်းနဲ့ ဥရောပစူပါဖလားပွဲစဉ်မှာ စပါးအသင်းအတွက် ဂိုးသွင်းယူနိုင်ခဲ့သလို ပရီးမီးယား လိဂ်ပြိုင်ပွဲမှာ ဂိုးဖန်တီးမှု ပြုလုပ်ထားပါတယ်။ 

စပါးအသင်းဟာ ဒီရာသီမှာ ချန်ပီယံလိဂ်ပြိုင်ပွဲ ယှဉ်ပြိုင်ခွင့် ရရှိထားသလို ပရီးမီးယားလိဂ် ပြိုင်ပွဲမှာလည်း ရလဒ်ကောင်းတွေ ရရှိထားတာပါ။

စပါးအသင်းဟာ ဒီရာသီ ပရီးမီးယားလိဂ် ၄ ပွဲ ကစားအပြီးမှာ ၃ ပွဲနိုင်၊ ၁ ပွဲရှုံး၊ ရမှတ် ၉ မှတ်နဲ့ အမှတ်ပေးဇယား အဆင့် ၃ နေရာမှာ ရပ်တည်နေတာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ စက်တင်ဘာ ၁၆

လက်ချီအသင်းကို အနိုင်ရခဲ့တဲ့ စီးရီးအေပွဲစဉ်မှာ လူစာရင်းထဲ ချန်လှပ်ခြင်းခံခဲ့ရတဲ့ လွတ်ခ်မန်းဟာ အတ္တလန်တာ အသင်းအတွက် ပြန်ပါဝင်နိုင်ဖို့ ခက်ခဲဖွယ်ရှိတယ်လို့ သတိပေးခံထားရပါတယ်။ 

နိုင်ဂျီးရီးယားကြယ်ပွင့်ဟာ ပြီးခဲ့တဲ့နွေရာသီ အပြောင်းအရွှေ့က အင်တာမီလန်အသင်းထံ ပြောင်းရွှေ့နိုင်ဖို့ အပြင်းအထန် ကြိုးပမ်းခဲ့တာကြောင့် အတ္တလန်တာအသင်းနဲ့ အဆင်မပြေမှုတွေ ရှိခဲ့တာပါ။ 

လွတ်ခ်မန်းဟာ ပြီးခဲ့တဲ့ရက်ပိုင်းက အတ္တလန်တာအသင်း အကြီးအကဲတွေနဲ့တွေ့ဆုံကာ ကလပ်အသင်းမှာ သူ့ရဲ့ အခြေအနေနဲ့ ပတ်သက်ပြီး ဆွေးနွေးမှုတွေ ရှိခဲ့တာဖြစ်ပါတယ်။

ဒါပေမယ့် လွတ်ခ်မန်းဟာ လက်ချီအသင်းကို ၄ ဂိုး-၁ ဂိုးနဲ့ အနိုင်ရခဲ့တဲ့ပွဲစဉ်မှာ အတ္တလန်တာအသင်း လူစာရင်း ထဲမှာ ပါဝင်ခဲ့ခြင်း မရှိတာပါ။

 လွတ်ခ်မန်းကို တွေ့ရစဉ် 

အတ္တလန်တာအသင်း နည်းပြဂျူရစ်က “လွတ်ခ်မန်းကို ခေါ်မှာမဟုတ်ပါဘူး။ ဒါက ဆိုးရွားပြီး ကောင်းမွန်မှုမရှိတဲ့ အခြေအနေပါ။ ကျနော်တို့ဟာ တိုက်ပွဲဝင်စိတ်ဓါတ်၊ နှိမ့်ချမှု၊ ကြိုးစားအားထုတ်မှုနဲ့ အသင်းအတွက် ပေးဆပ်ဖို့ လိုပါတယ်။ ကျနော်တို့ရဲ့ ကစားသမားတွေဟာ ဒီလိုဖြစ်ဖို့လိုပြီး ကျနော်ဟာ မတူညီတဲ့ လူသားဆန်မှုအဆင့်ကို လိုချင်ပါတယ်”လို့ ပြောခဲ့ပါတယ်။

လွတ်ခ်မန်းဟာ အင်တာမီလန်အသင်းထံ ပြောင်းရွှေ့ချင်တာကြောင့် အသင်းကနေ ထွက်ခွာဖို့ တောင်းဆိုခဲ့တာကို အတ္တလန်တာအသင်းက ငြင်းဆန်ခဲ့တာပါ။ 

အဲဒါကြောင့် လွတ်ခ်မန်းက အတ္တလန်တာအသင်းဟာ ပေးထားတဲ့ ကတိကို ချိုးဖောက်တယ်ဆိုပြီး စွပ်စွဲကာ လူသိရှင်ကြား ဝေဖန်မှုပြုလုပ်ခဲ့တာ ဖြစ်ပါတယ်။ 

အတ္တလန်တာအသင်းကတော့ သူတို့ဟာ လွတ်ခ်မန်းကို အီတလီ မဟုတ်တဲ့ ကလပ်အသင်းတွေနဲ့သာ သတ်မှတ် ထားတဲ့ ပြောင်းရွှေ့ကြေးနဲ့ ရောင်းချဖို့ သဘောတူခဲ့တာလို့ ပြန်တုံ့ပြန်ခဲ့ပါတယ်။

လွတ်ခ်မန်းဟာ တစ်ဦးတည်း လေ့ကျင့်မှုပြုလုပ်ပြီး အသင်းကို ဆန္ဒပြခဲ့ပေမယ့် အတ္တလန်တာအသင်းဟာ သူ့ကို ချန်ပီယံလိဂ် လူစာရင်းထဲ ထည့်သွင်းခဲ့သလို သူကလည်း နည်းပြ ဂျူရစ် လက်အောက်မှာ ပါဝင်ကစားနိုင်တယ်လို့ ပြောခဲ့တာပါ။ 

အတ္တလန်တာအသင်းဟာ ချန်ပီယံလိဂ် အုပ်စုအဖွင့်ပွဲစဉ်အဖြစ် PSG အသင်းနဲ့ ယှဉ်ပြိုင်ရမှာဖြစ်ပြီး ဒီပွဲမှာ လွတ်ခ်မန်း ပြန်ပါဝင်နိုင်မလားဆိုတာ စောင့်ကြည့်ရမှာဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ စက်တင်ဘာ ၁၆

ယူနိုက်တက်အသင်း ကစားသမားတွေဟာ နည်းပြအာမိုရင်ရဲ့ နည်းစနစ်ပိုင်း ပြင်ဆင်မှုတွေနဲ့ ပတ်သက်ပြီး ယုံကြည်မှုတွေ ပျောက်ဆုံးနေတယ်လို့ ဗြိတိန်မီဒီယာတွေက ဖော်ပြထားပါတယ်။ 

ပေါ်တူဂီလူမျိုးနည်းပြ အာမိုရင်ဟာ သူ့ရဲ့နည်းစနစ် အတွေးအခေါ်တွေကို ပြောင်းလဲသွားမှာ မဟုတ်ဘဲ ဒါကို ပြောင်းလဲချင်ရင် သူ့ကိုထုတ်ပယ်မှ ရမယ်လို့ မန်စီးတီးအသင်းကို ၃ ဂိုး-ဂိုးမရှိနဲ့ အရေးနိမ့်ခဲ့တဲ့ မန်ချက်စတာ ဒါဘီပွဲစဉ်အပြီးမှာ ပြောခဲ့တာပါ။ 

အာမိုရင်ဟာ ယူနိုက်တက်အသင်းကို ပရီးမီးယားလိဂ် ပြိုင်ပွဲမှာ ပွဲပေါင်း ၃၁ ပွဲ ကိုင်တွယ်ထားတာမှာ ၈ ပွဲသာ အနိုင်ရအောင် စွမ်းဆောင်ပေးနိုင်ပြီး မှတ်တမ်းဆိုးတွေ ပိုင်ဆိုင်နေတာဖြစ်ပါတယ်။ 

ယူနိုက်တက်အသင်း ဂန္ထဝင်တွေက အာမိုရင်ရဲ့ လက်ထက်မှာ အသင်းရဲ့ အခြေအနေဟာ တိုးတက်မှု မရှိလာဘဲ ပိုပြီးဆိုးရွားလာတယ်လို့ ထောက်ပြခဲ့ပြီး သူ့ရဲ့နည်းစနစ်ကို အပြောင်းအလဲ ပြုလုပ်ဖို့လည်း အကြံပေးခဲ့ကြတာပါ။ 

ဒါပေမယ့် အာမိုရင်ကတော့ သူ့ရဲ့နည်းစနစ်ကို အပြောင်းအလဲ ပြုလုပ်ဖို့ ငြင်းဆန်ထားတာ ဖြစ်ပါတယ်။ 

ယူနိုက်တက်အသင်းကို တွေ့ရစဉ်

ဒေးလီးမေးလ်က ယူနိုက်တက်အသင်း ကစားသမားတွေဟာ နည်းပြအာမိုရင်ရဲ့ နည်းစနစ်မှာ အဆင်ပြေမှု မရှိကြောင်းနဲ့ အသင်းခေါင်းဆောင် ဘရူနိုဖာနန်ဒက်စ် ကိုယ်တိုင်က သူကစားနေရတဲ့ အခန်းကဏ္ဍနဲ့ပတ်သက်ပြီး မပျော်ရွှင်ဘူး ဖြစ်နေတယ်လို့ ဖော်ပြထားတာပါ။

ယူနိုက်တက်အသင်းဟာ ဒီရာသီအစ ပရီးမီးယားလိဂ် ၄ ပွဲမှာ ရမှတ် ၄ မှတ်သာ ရယူနိုင်ပြီး နှစ်ပေါင်း ၃၃ နှစ် အတွင်း အဆိုးရွားဆုံး ရာသီစတင်မှုနဲ့ ကြုံတွေ့နေရတာ ဖြစ်ပါတယ်။

ယူနိုက်တက်အသင်းရဲ့ ရလဒ်ဆိုးတွေကြောင့် နည်းပြအာမိုရင်ဟာ ဖိအားတွေ ခံစားနေရပေမယ့် အသင်း အကြီးအကဲတွေက သူ့ကို ထောက်ခံမှုပေးထားပြီး ရာထူးကနေ ထုတ်ပယ်ဖို့ အစီအစဉ် မရှိသေးတာပါ။ 

ပရီးမီးယားလိဂ် အမှတ်ပေး ဇယားအဆင့် ၁၄ နေရာ ရပ်တည်နေတဲ့ ယူနိုက်တက်အသင်းဟာ လာမယ့် လိဂ်ပွဲစဉ် အဖြစ် ချယ်လ်ဆီးအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ စက်တင်ဘာ ၁၆

အာဆင်နယ်အသင်းနည်းပြ အာတီတာဟာ ပြီးခဲ့တဲ့ ချန်ပီယံလိဂ် ပြိုင်ပွဲတွေမှာ ဖြစ်ပျက်ခဲ့တဲ့ အရာတွေကို သင်ယူပြီး ဒီပြိုင်ပွဲမှာ အသင်းရဲ့ သမိုင်းကြောင်းကို ပြောင်းလဲဖို့ ဆန္ဒရှိတယ်လို့ ပြောခဲ့ပါတယ်။ 

အာတီတာက “ကျနော်တို့ဟာ ပြီးခဲ့တဲ့ အရာတွေကနေ သင်ယူပြီး ပိုကောင်းအောင် ကြိုးစားမှာပါ။ ဒီပြိုင်ပွဲမှာ ကျနော်တို့ အောင်မြင်မှု မရသေးပေမယ့် ဒါက အခွင့်အရေးဖြစ်ပြီး ဒါကို ကျနော်မြင်ပါတယ်။ ဒီလိုဖိအားတွေက ကျနော်တို့ကို နေ့တိုင်း ပိုပြီးကောင်းမွန်လာဖို့ တွန်းအားပေးနေတဲ့ အရာပါ။ ချန်ပီယံလိဂ်ဖလားကို အနိုင်ရတဲ့ အသင်းကြီးတွေဟာ ၇ ကြိမ်၊ ၈ ကြိမ်၊ ၉ ကြိမ်လောက် ကြိုးစားပြီးမှ ၂ ကြိမ်လောက် အနိုင်ရတာပါ။ ကျနော်တို့ဟာ အသင်းရဲ့သမိုင်းကြောင်းကို ပြောင်းလဲချင်ပါတယ်”လို့ ပြောခဲ့တာပါ။ 

အာဆင်နယ်အသင်းဟာ ပြီးခဲ့တဲ့ရာသီက ချန်ပီယံလိဂ် ဆီမီးဖိုင်နယ်ကို တက်နိုင်ခဲ့ပြီး ချန်ပီယံဖြစ်ခဲ့တဲ့ PSG အသင်းကို အရေးနိမ့်ကာ ချန်ပီယံလိဂ်ဖလားကို ပထမဆုံးအကြိမ် ရယူချင်တဲ့ သူတို့ရဲ့မျှော်လင့်ချက် အဆုံးသတ် ခဲ့ရပါတယ်။ 

အာဆင်နယ်အသင်း လေ့ကျင့်ခန်းဆင်းနေစဉ်

အာဆင်နယ်အသင်းဟာ ချန်ပီယံလိဂ်ပြိုင်ပွဲမှာ အမြင့်ဆုံး အောင်မြင်မှုအဖြစ် ၂၀၀၆ ခုနှစ်က ဗိုလ်လုပွဲ တက်နိုင် ခဲ့ပြီး ဘာစီလိုနာအသင်းကို အရေးနိမ့်ခဲ့တာပါ။ 

အာဆင်နယ်အသင်းရဲ့ ပရီးမီးယားလိဂ် ပြိုင်ဘက်တွေဖြစ်တဲ့ လီဗာပူးလ်၊ ယူနိုက်တက်၊ ချယ်လ်ဆီး၊ ဗီလာ၊ နော်တင်ဟမ်ဖောရက်စ်နဲ့ မန်စီးတီးအသင်းတို့ဟာ ချန်ပီယံလိဂ်ဖလား ရယူထားနိုင်ကြပါတယ်။

အဲဒါကြောင့် အာတီတာက ဒီရာသီမှာ ချန်ပီယံလိဂ်ဖလားကို သူတို့ရယူပြီး အသင်းရဲ့ သမိုင်းကြောင်းကို ပြောင်းလဲမှုပြုလုပ်ဖို့ ဆန္ဒရှိနေတာဖြစ်ပါတယ်။

ဘီလ်ဘာအိုအသင်းနဲ့ ချန်ပီယံလိဂ် အုပ်စုအဖွင့်ပွဲစဉ်မှာ အာဆင်နယ်အသင်းရဲ့ အဓိက ကစားသမားတွေဖြစ်တဲ့ အသင်းခေါင်းဆောင် အိုဒီဂတ်၊ ဆာကာ၊ ဟာဗက်ဇ်၊ ဘင်ဝှိုက်နဲ့ ဂျီးဆပ်စ်တို့ ဒဏ်ရာကြောင့် ပါဝင်နိုင်မှာ မဟုတ်ပါဘူး။ 

အဓိက ကစားသမားတွေ ဒဏ်ရာရနေပေမယ့် နည်းပြအာတီတာက အာဆင်နယ်အသင်းမှာရှိနေတဲ့ လူစာရင်းနဲ့ ဒီပွဲအတွက် ယုံကြည်မှု အပြည့်ရှိနေတာပါ။ 

ဘီလ်ဘာအိုနဲ့ အာဆင်နယ်အသင်းတို့ရဲ့ ချန်ပီယံလိဂ် အဖွင့်ပွဲစဉ်ကို စက်တင်ဘာ ၁၆ ရက် စပိန်နိုင်ငံမှာ ယှဉ်ပြိုင် သွားမှာဖြစ်ပါတယ်။ 

Source: CNA