CNI Sport News

၂၀၂၅ ခုနှစ်၊ ဒီဇင်ဘာ ၁၅

လာလီဂါပွဲစဉ်မှာ အလာဗက်စ်အသင်းကို ၂ ဂိုး-၁ ဂိုးနဲ့ အနိုင်ရရှိပြီး ဖိအားအချို့ကို လျော့ချနိုင်ခဲ့တဲ့ နည်းပြ အလွန်ဆိုက ရီးရယ်လ်အသင်းရဲ့ ညီညွတ်မှုကို ချီးကျူးမှုပြုလုပ်ခဲ့ပါတယ်။ 

အလွန်ဆိုက “ကျနော်တို့အားလုံး အတူတကွ ရှိနေကြသလို ကောင်းတဲ့အချိန်မှာရော မကောင်းတဲ့ အချိန်တွေမှာ ပါ အတူတကွ တိုက်ပွဲဝင်နေကြပါတယ်။ အသင်းက ကောင်းမွန်စွာ တိုက်ပွဲဝင်နိုင်ခဲ့ပါတယ်။ စည်းလုံးညီညွတ်မှုက အခြေခံကျပါတယ်။ ကျနော်တို့ဟာ ကိုယ့်အလုပ်ကို အာရုံစိုက်ပြီး လုပ်ဆောင်နေပါတယ်။ သွားရမယ့်လမ်းက အရှည်ကြီးရှိသေးပေမယ့် ဒီပွဲမှာလုပ်ခဲ့တဲ့ ကောင်းမွန်တဲ့အရာတွေကို ဆက်ထိန်းသိမ်းရမယ်”လို့ ပြောခဲ့ပါတယ်။ 

ဒီပွဲမှာ ရီးရယ်လ်အသင်းအတွက် ဘတ်ပီက ဦးဆောင်ဂိုး သွင်းယူနိုင်ခဲ့ပြီး ဗီဆန်တီက အလာဗက်စ်အသင်းအတွက် ချေပဂိုး ပြန်သွင်းနိုင်ခဲ့ပေမယ့် ရိုဒရီဂိုက ဗီနီစီးယက်စ်ရဲ့ ဖန်တီးပေးမှုကနေ အသင်းအတွက် အဖိုးတန် အနိုင်ဂိုး သွင်းယူပေးနိုင်ခဲ့တာပါ။

ရီးရယ်လ်အသင်းဟာ ဒီနိုင်ပွဲကြောင့် ရလဒ်တွေ ဆိုးနေတာကို အဆုံးသတ်နိုင်ခဲ့သလို ထုတ်ပယ်ခံရမယ့် ဖိအား တွေ ရင်ဆိုင်နေရတဲ့ နည်းပြ အလွန်ဆို အတွက်လည်း ဖိအားတွေ လျော့သွားခဲ့ပါတယ်။ 

ရီးရယ်လ်အသင်းကို တွေ့ရစဉ်

ရီးရယ်လ်အသင်းဟာ အလာဗက်စ်အသင်းကို အနိုင်ရခဲ့တဲ့အတွက် အဆင့် ၁ နေရာက ဘာစီလိုနာအသင်းနဲ့ ၄ မှတ်အကွာ အဆင့် ၂ နေရာမှာ ဆက်ပြီးရပ်တည်နေပါတယ်။

ရီးရယ်လ်အသင်းနည်းပြ အလွန်ဆိုက အသင်းဟာ တိုးတက်အောင် လုပ်ရမယ့် အရာတွေ အများကြီးရှိသေးပြီး ပွဲတွေကို ဆက်ပြီး အနိုင်ရဖို့အတွက်လည်း တသမတ်တည်း ဖြစ်နေဖို့ လိုအပ်တယ်လို့ ပြောခဲ့ပါတယ်။

ဒီပွဲမှာ ရီးရယ်လ်အသင်းအတွက် ဦးဆောင်ဂိုး သွင်းယူခဲ့တဲ့ ဘတ်ပီဟာ စပိန်ကလပ် ကစားသမားဘဝ သွင်းဂိုး ၇၀ ပြည့်ခဲ့ပါတယ်။ 

ရီးရယ်လ်အသင်းဟာ လာမယ့် ကြားရက်ထဲမှာ ကိုပါဒယ်ရေးဖလား ပွဲစဉ် ယှဉ်ပြိုင်ပြီးရင် ဆီဗီလာအသင်းနဲ့ လာလီဂါပွဲစဉ် ယှဉ်ပြိုင်ရမှာဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဒီဇင်ဘာ ၁၃

မာဆေးလ်အသင်းနည်းပြ ဒီဇာဘီက အသင်းအတွက် ခြေစွမ်းပြသနေတဲ့ တိုက်စစ်မှူး ဂရင်းဝုဒ်ဟာ Ballon d'Or ဆုကို ရရှိနိုင်တယ်လို့ ပြောခဲ့ပါတယ်။ 

ဒီဇာဘီက “ဂရင်းဝုဒ်မှာ ကြီးမားတဲ့ အလားအလာရှိပြီး ဥရောပမှာ ဒီလိုမျိုး အရည်အချင်းရှိတဲ့ ကစားသမားတွေကို ကျနော် အများအပြား မတွေ့ရပါဘူး။ သူဟာ Ballon d'Or ရနိုင်ဖို့ အလားအလာရှိပြီး ဒါကိုရနိုင်ဖို့ သူအစွမ်းကုန် ကြိုးစားမလား၊ မကြိုးစားဘူးလားဆိုတာတော့ သူဆုံးဖြတ်ရမယ့် အရာပါ။ သူ့ကို ပိုပြီးတည်ငြိမ်မှု ရှိစေချင်သလို အမြဲတမ်းပိုပြီးလိုချင်တယ်”လို့ ပြောခဲ့ပါတယ်။ 

ယူနိုက်တက် ကြယ်ပွင့်ဟောင်းဟာ ပြီးခဲ့တဲ့ ချန်ပီယံလိဂ်ပွဲစဉ်မှာ မာဆေးလ်အသင်းအတွက် ၂ ဂိုး သွင်းယူခဲ့ ပြီးနောက် ဒီရာသီမှာ သူ့ရဲ့ ပြိုင်ပွဲစုံသွင်းဂိုးက ၁၃ ဂိုးအထိ ရှိလာခဲ့တာပါ။

မုဒိမ်းမှု အပါအဝင် စွဲချက်အမျိုးမျိုးကြောင့် ၂၀၂၂ ခုနှစ်၊ ဇန်နဝါရီမှာ ဖမ်းဆီးခြင်းခံခဲ့ရတဲ့ ဂရင်းဝုဒ်ဟာ နောက်ပိုင်း မှာ စွဲချက်တွေကနေ လွတ်မြောက်ခဲ့တာ ဖြစ်ပါတယ်။ 

ဂရင်းဝုဒ်ကို တွေ့ရစဉ်

ဂရင်းဝုဒ်ဟာ သူ့ရဲ့ ကစားသမားဘဝကို ဂီတာဖေးအသင်းမှာ ပြန်လည် တည်ဆောက်နိုင်ခဲ့ပြီး ၂၀၂၄ ခုနှစ် နွေရာသီမှာ မာဆေးလ်အသင်းထံ အပြီးသတ် ပြောင်းရွှေ့ခဲ့တာပါ။ 

ဂရင်းဝုဒ်ဟာ မာဆေးလ်အသင်းအတွက် ပွဲဦးထွက်ခဲ့တဲ့ မနှစ်က ရာသီမှာလည်း ခြေစွမ်းပြသနိုင်ခဲ့ပြီး ပြိုင်ပွဲစုံ ၃၆ ပွဲမှာ ၂၂ ဂိုးသွင်းယူနိုင်ခဲ့ပါတယ်။

မာဆေးလ်အသင်းနည်းပြ ဒီဇာဘီက သူဟာ ဂရင်းဝုဒ်ဆီကနေ အခုပြသနေတဲ့ စွမ်းဆောင်ရည်ထက် ပိုလိုချင် နေပြီး သူစတင် ကိုင်တွယ်တဲ့ အချိန်တုန်းကထက် ပိုကောင်းတဲ့ ဂရင်းဝုဒ်ကို မြင်တွေ့ချင်တယ်လို့ ပြောခဲ့ပါတယ်။

မာဆေးလ်အသင်းဟာ ဒီရာသီပြင်သစ် လီဂူး-၁ ပြိုင်ပွဲမှာ အဆင့် ၃ နေရာ ရပ်တည်နေပြီး ချန်ပီယံလိဂ်ပြိုင်ပွဲမှာ အဆင့် ၁၆ နေရာ ရပ်တည်နေတာဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ ဒီဇင်ဘာ ၁၃

ဂျီရိုနာအသင်းနည်းပြ မီချဲလ်က အငှားနဲ့ခေါ်ယူထားတဲ့ ဂိုးသမား လီဗာကိုဗစ်ဟာ ကမ္ဘာ့ဖလားမှာ ခရိုအေးရှား အသင်းအတွက် ကစားခွင့်ရဖို့ နောက်ထပ် အသင်းသစ်ကို ရှာဖွေနေတာကြောင့် အသင်းအတွက် ကစားပေးဖို့ ငြင်းဆန်ခဲ့တယ်လို့ ပြောခဲ့ပါတယ်။ 

မီချဲလ်က “လီဗာကိုဗစ်ဟာ ကမ္ဘာ့ဖလား ကစားချင်နေပြီး ဂျီရိုနာအသင်းအတွက် မဟုတ်ပါဘူး။ ဒါကို သူကိုယ်တိုင် ကျနော့်ကို ပြောခဲ့တာဖြစ်ပြီး သူက ရိုးသားတဲ့သူပါ။ သူဟာ ဒီမှာမနေချင်ဘဲ တခြားအသင်းအတွက် ကစားချင် တယ် ဆိုတာလည်း ကျနော့်ကို ပြောခဲ့ပါတယ်။ ဘာလို့လဲဆိုရင် သူဟာ ဂျီရိုနာအသင်းမှာ ကစားရင် တခြား အသင်းအတွက် ကစားပေးနိုင်မှာမဟုတ်လို့ပါ”လို့ ပြောခဲ့ပါတယ်။ 

၂၀၁၈ ကမ္ဘာ့ဖလားပြိုင်ပွဲမှာ ဒုတိယရခဲ့တဲ့ ခရိုအေးရှားအသင်း လူစာရင်းထဲ ပါဝင်ခဲ့တဲ့ လီဗာကိုဗစ်ဟာ ပြီးခဲ့တဲ့ စက်တင်ဘာမှာ ဖီနာဘာချီအသင်းကနေ ဂျီရိုနာအသင်းထံ ရာသီကုန်အထိ အငှားနဲ့ ပြောင်းရွှေ့လာခဲ့တာ ဖြစ်ပါတယ်။ 

အသက် ၃၀ နှစ်အရွယ်ရှိ လီဗာကိုဗစ်ဟာ ဒီရာသီမှာ ဖီနာဘာချီအသင်းအတွက် ၂ ပွဲ ပါဝင်ကစားထားပေမယ့် ဂျီရိုနာအသင်းအတွက် ပါဝင်ကစားရခြင်း မရှိသေးပါဘူး။ 

လီဗာကိုဗစ်ကို တွေ့ရစဉ် 

ဖီဖာရဲ့ စည်းမျဉ်းတွေအရ ကစားသမားတစ်ဦးဟာ တစ်ရာသီအတွင်း ကလပ်အသင်း ၃ သင်းမှာ စာရင်းသွင်း မှတ်ပုံတင်နိုင်ပေမယ့် ၂ သင်းသာ ကစားနိုင်တာ ဖြစ်ပါတယ်။ 

အဲ့ဒါကြောင့် လီဗာကိုဗစ်ဟာ နောက်ထပ် အသင်းတစ်သင်းထံ ပြောင်းရွှေ့နိုင်ဖို့ ဂျီရိုနာအသင်းအတွက် ပါဝင် ကစားဖို့ ဆန္ဒမရှိတာပါ။ 

ဂျီရိုနာအသင်းနည်းပြ မီချဲလ်က ပြီးခဲ့တဲ့ ကိုပါဒယ်ရေးဖလားပွဲစဉ်မှာ လီဗာကိုဗစ်ဟာ အသင်းအတွက်ကစားပေးဖို့ ငြင်းဆန်ခဲ့လို့ ဂိုးသမားဂါဇာနီဂါဟာ ဖျားနေရင်းနဲ့ ကစားခဲ့ရတယ်လို့ ပြောခဲ့ပါတယ်။ 

ဂျီရိုနာအသင်းဟာ ဒီရာသီမှာ ရလဒ်တွေ ဆိုးရွားနေပေမယ့် နောက်ဆုံးကစားခဲ့တဲ့ လာလီဂါပွဲစဉ်မှာ ဆိုစီဒက် အသင်းကို အနိုင်ရရှိခဲ့ပါတယ်။ 

Source: CNA

CNI Sport News

၂၀၂၅ ခုနှစ်၊ ဒီဇင်ဘာ ၁၃ 

နွေရာသီ အပြောင်းအရွှေ့မှာ စပို့တင်းလစ္စဘွန်းအသင်းကနေ ခေါ်ယူထားတဲ့ တိုက်စစ်မှူး ယိုကီရက်စ်ဟာ အာဆင်နယ်အသင်းအတွက် ၁၈ ပွဲမှာ ၆ ဂိုးသာ သွင်းယူထားနိုင်ပေမယ့် နည်းပြအာတီတာက သူ့အတွက် သွင်းဂိုးတွေ မကြာမီ ရောက်ရှိလာမယ်လို့ ပြောခဲ့ပါတယ်။ 

အာတီတာက “ဒဏ်ရာမရခင်မှာ ယိုကီရက်စ်ဟာ အလွန်ကောင်းမွန်တဲ့ နေရာမှာ ရှိနေခဲ့တယ်လို့ ကျနော် ထင်ပါတယ်။ သူဟာ ရာသီကြိုလေ့ကျင့်မှုတွေ မရှိခဲ့ပါဘူး။ အခုသူဟာ ပြန်လည် စတင်နေပြီး အရှိန်အဟုန် အချို့လည်း ပြန်ရနေပါပြီ။ သွင်းဂိုးတွေ မကြာမီ လာတော့မှာဖြစ်ပြီး ကျနော်တို့ဟာ သူ့ကြောင့် အလွန် ကျေနပ် ရမှာပါ”လို့ ပြောခဲ့တာပါ။ 

ယိုကီရက်စ်ဟာ ပြီးခဲ့တဲ့ရာသီက စပို့တင်းလစ္စဘွန်းအသင်းအတွက် ၅၄ ဂိုး သွင်းယူနိုင်ခဲ့ပေမယ့် ပေါင် ၆၄ သန်းနဲ့ အာဆင်နယ်အသင်းထံ ပြောင်းရွှေ့လာအပြီးမှာ ဂိုးသွင်းစွမ်းရည်တွေ ကျဆင်းနေပြီး စက်တင်ဘာလကတည်းက ပရီးမီးယားလိဂ်ပြိုင်ပွဲမှာ ၁ ဂိုးသာသွင်းယူနိုင်ခဲ့ပါတယ်။ 

အာဆင်နယ်အသင်းဟာ ပြီးခဲ့တဲ့ ပရီးမီးယားလိဂ်ပွဲစဉ်မှာ အက်စတွန်ဗီလာအသင်းကို အရေးနိမ့်ခဲ့ပြီးနောက် အသင်းအတွက် ယိုကီရက်စ်ရဲ့ သွင်းဂိုးတွေလိုအပ်လာပြီ ဖြစ်ပါတယ်။ 

ယိုကီရက်စ်ကို တွေ့ရစဉ်

ဒဏ်ရာကြောင့် ကာလရှည်ကြာ အနားယူနေရတဲ့ တိုက်စစ်မှူး ဂျီးဆပ်စ် ကြံ့ခိုင်မှုပြည့်ဝပြီး အသင်းအတွက် ပြန်ပါဝင် ကစားနိုင်ခဲ့တာက နည်းပြအာတီတာအတွက် တိုက်စစ်ပိုင်းမှာ ရွေးချယ်စရာရှိလာခဲ့တာပါ။ 

အာဆင်နယ်အသင်းနည်းပြ အာတီတာက ဂျီးဆပ်စ်ရဲ့ အရည်အသွေးကို သူတို့သိပြီး သူဟာ အသင်းရဲ့ ပွဲထွက် လူစာရင်းထဲပါဝင်ဖို့ တွန်းအားပေးမယ့်သူလို့ ပြောခဲ့ပါတယ်။ 

အာတီတာက အက်စတွန်ဗီလာအသင်းနဲ့ပွဲက ရှုံးနိမ့်မှုကို ဝုလ်ဗ်စ်အသင်းနဲ့ပွဲစဉ်မှာ အနိုင်ရလဒ်ရယူပြီး တုန့်ပြန် ရမယ်ဆိုတာ ကစားသမားတွေ အားလုံး နားလည်ထားတယ်လို့လည်း ပြောခဲ့ပါတယ်။

အာဆင်နယ်အသင်းဟာ အဆင့် ၂ နေရာက မန်စီးတီးအသင်းကို ၂ မှတ်အသာနဲ့ ပရီးမီးယားလိဂ် အမှတ်ပေး ဇယား ထိပ်ဆုံးနေရာမှာ ရပ်တည်နေတာ ဖြစ်ပါတယ်။ 

Source:CNA

CNI Sport News

၂၀၂၅ ခုနှစ်၊ ဒီဇင်ဘာ ၁၃

လီဗာပူးလ်အသင်း တောင်ပံကစားသမား ဆာလက်ဟာ နည်းပြအာနီဆလော့နဲ့ အပေါင်းလက္ခဏာဆောင်တဲ့ ဆွေးနွေးမှုတွေ ပြုလုပ်ပြီးနောက် ဘရိုက်တန်အသင်းနဲ့ ပရီးမီးယားလိဂ် ပွဲစဉ်အတွက် အသင်းလူစာရင်းထဲမှာ ပါဝင်ခဲ့ပါတယ်။ 

လီဗာပူးလ်အသင်းမှာ ကစားသမားအချို့ ဒဏ်ရာကြောင့် အနားယူနေရချိန်မှာ နည်းပြအာနီဆလော့ဟာ ကလပ် အသင်းအတွက် အကောင်းဆုံး ဖြစ်မယ့်အရာ လုပ်ဆောင်လိုတာကြောင့် အခုလို ဆုံးဖြတ်ချက်ချခဲ့တာလို့ သတင်း မှာ ဖော်ပြထားပါတယ်။

ပြဿနာတွေကို ဖြေရှင်းနိုင်မှု မရှိသေးဘဲ ဆာလက် အာဖရိကဖလားပြိုင်ပွဲအတွက် ရှိနေချိန်မှာ သူ့ရဲ့ အေးဂျင့်နဲ့ လီဗာပူးလ်အသင်းတို့ဟာ ဆက်ပြီး ဆွေးနွေးမှုတွေ ပြုလုပ်သွားဖို့ ရှိနေပါတယ်။ 

ဆာလက်ဟာ အရန်ခုံပေါ်မှာ ၃ ပွဲဆက်တိုက် ထိုင်ခဲ့ရပြီးနောက် လိဒ်စ်အသင်းနဲ့ပွဲအပြီးမှာ လီဗာပူးလ်အသင်းနဲ့ နည်းပြအာနီဆလော့တို့ကို ဝေဖန်မှုပြုလုပ်ခဲ့တာပါ။

ဆာလက်ကို တွေ့ရစဉ် 

အဲ့ဒါကြောင့် ဆာလက်ဟာ အင်တာမီလန်အသင်းကို အနိုင်ရခဲ့တဲ့ ချန်ပီယံလိဂ်ပွဲစဉ်မှာ လီဗာပူးလ်အသင်းရဲ့ လူစာရင်းထဲ ချန်လှပ်ခြင်း ခံခဲ့ရပါတယ်။ 

ဘရိုက်တန်အသင်းနဲ့ပွဲမတိုင်မီ ပွဲကြို မီဒီယာတွေ့ဆုံမှုမှာ နည်းပြအာနီဆလော့က သူဟာ ဆာလက်ကို အသင်းမှာ ဆက်ပြီး မနေစေချင်တဲ့ အကြောင်းမရှိဘူးလို့ ပြောခဲ့ပါတယ်။ 

ပြီးခဲ့တဲ့ ဧပြီမှာ လီဗာပူးလ်အသင်းနဲ့ ၂ နှစ် စာချုပ်သစ် ချုပ်ခဲ့တဲ့ ဆာလက်ဟာ အသင်း နောက်ဆုံးကစားခဲ့တဲ့ ပရီးမီးယားလိဂ် ၃ ပွဲမှာ ၂ ပွဲကို လူစားဝင်အဖြစ်တောင် ပါဝင်ခွင့်မရခဲ့တာပါ။ 

ဆာလက်ဟာ ဒီဇင်ဘာ ၃ ရက်က ဆန်းဒါးလန်းအသင်းနဲ့ ၁ ဂိုးစီသရေကျခဲ့တဲ့ပွဲမှာ လူစားဝင်အဖြစ် နောက်ဆုံး ပါဝင်ကစားထားပြီး နိုဝင်ဘာ ၂၆ ရက်က PSV အသင်းကို အရေးနိမ့်ခဲ့တဲ့ ချန်ပီယံလိဂ်ပွဲစဉ်မှာ လီဗာပူးလ် အသင်း ရဲ့ ပွဲထွက်လူစာရင်းထဲ နောက်ဆုံး ပါဝင်ကစားထားပါတယ်။ 

ဘရိုက်တန်အသင်းနဲ့ပွဲအပြီးမှာ အာဖရိကဖလားပြိုင်ပွဲအတွက် ထွက်ခွာမယ့် ဆာလက်ဟာ အီဂျစ်အသင်းသာ ဒီပြိုင်ပွဲရဲ့ ဗိုလ်လုပွဲအထိရောက်ခဲ့ရင် လီဗာပူးလ်အသင်းရဲ့ ပြိုင်ပွဲစုံ ၈ ပွဲအထိ လွဲချော်နိုင်တာဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ ဒီဇင်ဘာ ၁၂

ဘိုကာဂျူနီယာအသင်းဟာ ရိုးမားအသင်းရဲ့ အာဂျင်တီးနားကြယ်ပွင့် ဒိုင်ဘားလားကို ခေါ်ယူဖို့ စိတ်ဝင်စားတဲ့ သူတို့ရဲ့ ရည်မှန်းချက်ကို လူသိရှင်ကြား အတည်ပြုခဲ့ပါတယ်။ 

ဘိုကာဂျူနီယာ ဒါရိုက်တာ ဒယ်လ်ဂါဒိုက “ဖြစ်နိုင်ဖွယ် ရှိသည်ဖြစ်စေ၊ မရှိသည်ဖြစ်စေ သူ့ကို ဒီခေါ်ဆောင်နိုင်ဖို့ လိုအပ်တဲ့ အားထုတ်မှုတွေကို ပြုလုပ်နိုင်မယ်လို့ မျှော်လင့်ပါတယ်။ ကျနော်သိတဲ့ တစ်ခုတည်းသော အရာက သူ့ရဲ့ စာချုပ်ဟာ ၂၀၂၆ ခုနှစ်၊ ဇွန်လမှာ ကုန်ဆုံးမယ်ဆိုတာပါပဲ။ ဒီအခြေအနေကို ကျနော်တို့ သုံးသပ်မှုတွေ ပြုလုပ်ပြီး ဘာတွေ ဖြစ်လာမလဲဆိုတာ မြင်တွေ့ရမယ်”လို့ မီဒီယာတွေနဲ့ တွေ့ဆုံချိန်မှာ ပြောခဲ့တာပါ။ 

တောင်အမေရိက ဘောလုံးလောကမှာ ဒိုင်ဘားလားကို ခေါ်ယူဖို့နဲ့ ပတ်သက်ပြီး ထင်ကြေးတွေ အများအပြား ထွက်ပေါ်နေတာကို ဘိုကာဂျူနီယာအသင်းက အတည်ပြုလာခဲ့ပါတယ်။

ဒိုင်ဘားလားနဲ့ ရိုးမားအသင်းတို့ ချုပ်ဆိုထားတဲ့ စာချုပ်ဟာ နောက်ဆုံး ၆ လထဲကို ရောက်ဖို့ နီးကပ်လာပြီ ဖြစ်တာ ကြောင့် သူဟာ လာမယ့် ဇန်နဝါရီမှာ စီးရီးအေပြင်ပ အသင်းတွေနဲ့ အပြောင်းအရွှေ့အတွက် ဆွေးနွေးမှုတွေ ပြုလုပ်လို့ ရပြီဖြစ်ပါတယ်။ 

ဒိုင်ဘားလားကို တွေ့ရစဉ်

ဒိုင်ဘားလားဟာ စီးရီးအေမှာ အဓိက ကစားသမားတစ်ဦးအဖြစ် ဆက်ပြီးရှိနေပေမယ့် ရိုးမားအသင်းနဲ့ စာချုပ် သက်တမ်းတိုးဖို့ မရှိတာကြောင့် ဥရောပမှာ သူ့ရဲ့ အချိန်တွေ ကုန်ဆုံးတော့မယ်လို့ သတင်းတွေမှာ ဖော်ပြထား တာပါ။ 

ဘိုကာဂျူနီယာဟာ ဥရောပမှာ နာမည်ကျော်ကြားခဲ့တဲ့ ထိပ်တန်း ကစားသမားတွေကို ပစ်မှတ်ထားလေ့ရှိပြီး ကာဗာနီအပါအဝင် ကစားသမားအချို့ကို ခေါ်ယူကာ ထိပ်တန်းကြယ်ပွင့်တွေကို ခေါ်ယူနိုင်ကြောင်း ပြသထား ပါတယ်။ 

ဒါပေမယ့် ဥရောပမှာရရှိနေတဲ့ လုပ်ခလစာနဲ့ အာဂျင်တီးနားမှာ အသုံးပြုနေတဲ့ ဘတ်ဂျက်တွေကြား ကြီးမားတဲ့ ကွာဟမှုရှိနေတာကြောင့် ဒိုင်ဘားလားအနေနဲ့ ဘိုကာဂျူနီယာအသင်းထံ ပြောင်းရွှေ့မယ်ဆိုရင် လုပ်ခလစာ အများအပြား လျှော့ယူဖို့ လိုအပ်တာဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဒီဇင်ဘာ ၁၂

အက်စတွန်ဗီလာအသင်းဟာ ယူရိုပါလိဂ်ပွဲစဉ်မှာ ဘေဆယ်လ်အသင်းကို ၂ ဂိုး-၁ ဂိုးနဲ့ အနိုင်ရခဲ့ပြီးနောက် ပြိုင်ပွဲစုံ ၈ ပွဲဆက်တိုက် အနိုင်ရကာ ၁၉၁၄ ခုနှစ်နောက်ပိုင်း ထိပ်တန်းလိဂ် အသင်းတစ်သင်းအနေနဲ့ သူတို့ရဲ့ အရှည်ကြာ ဆုံး နိုင်ပွဲစံချိန် ဖြစ်ခဲ့ပါတယ်။ 

အက်စတွန်ဗီလာအသင်းဟာ ရာသီအစပွဲတွေမှာ ရလဒ်တွေ မကောင်းဖြစ်ခဲ့ပေမယ့် နောက်ပိုင်းပွဲတွေမှာ ရလဒ် တွေ ကောင်းခဲ့ပြီး အခုဆိုရင် ၈ ပွဲဆက်တိုက် အနိုင်ရတဲ့ စံချိန်ကောင်းကိုပါ ရရှိခဲ့တာပါ။ 

အက်စတွန်ဗီလာအသင်းဟာ ဒီနိုင်ပွဲကြောင့် ယူရိုပါလိဂ်ပြိုင်ပွဲမှာ ၆ ပွဲ ကစားထားပြီး ရမှတ် ၁၅ မှတ်နဲ့ ၁၆ သင်း အဆင့် တိုက်ရိုက်တက်နိုင်ဖို့ နီးစပ်သွားခဲ့ပါတယ်။ 

ဘေဆယ်လ်နဲ့ပွဲမှာ အက်စတွန်ဗီလာအသင်းအတွက် အနိုင်ဂိုးကို လူစားဝင်ရောက်လာတဲ့ တိုင်လီမန်စ်က သွင်းယူခဲ့တာပါ။

အဲ့ဒါကြောင့် အက်စတွန်ဗီလာအသင်းဟာ ၃ ပွဲဆက်တိုက်အဖြစ် လူစားဝင် ကစားသမားတွေက အသင်းအတွက် အရေးပါတဲ့ အဆုံးအဖြတ် ဂိုးသွင်းယူပေးခဲ့တာ ဖြစ်ပါတယ်။

အက်စတွန်ဗီလာအသင်းကို တွေ့ရစဉ် 

အက်စတွန်ဗီလာအသင်းနည်းပြ အူနှိုင်းအမ်မရီက ဒီပွဲမှာ သူတို့ရုန်းကန်ခဲ့ရပြီး သရေကျလုနီးပါး ဖြစ်ခဲ့ပေမယ့် နိုင်ပွဲရရှိအောင် စွမ်းဆောင်နိုင်ခဲ့တဲ့အပေါ် ပျော်ရွှင်တယ်လို့ ပြောခဲ့ပါတယ်။

အူနှိုင်းအမ်မရီဟာ ဒီပွဲမှာ ပြီးခဲ့တဲ့ အာဆင်နယ်အသင်းနဲ့ ပရီးမီးယားလိဂ်ပွဲစဉ်က ပွဲထွက်လူစာရင်းကို ၈ ဦးအထိ ပြောင်းလဲပြီး အသုံးပြုခဲ့တာပါ။ 

အက်စတွန်ဗီလာအသင်းဟာ နောက်ဆုံးကစားခဲ့တဲ့ ပြိုင်ပွဲစုံ ၁၆ ပွဲမှာ ၁၄ ပွဲအထိ အနိုင်ရခဲ့ပြီး ဥရောပထိပ်တန်း ၅ လိဂ်မှာ စွမ်းဆောင်ရည် အကောင်းဆုံးအသင်းတွေထဲက တစ်သင်းအဖြစ် ရပ်တည်နေပါတယ်။ 

အက်စတွန်ဗီလာအသင်းဟာ ပရီးမီးယားလိဂ်ပြိုင်ပွဲမှာ အဆင့် ၁ နေရာက အာဆင်နယ်အသင်းနဲ့ ၃ မှတ်အကွာ အဆင့် ၃ နေရာမှာ ရပ်တည်နေပါတယ်။

အက်စတွန်ဗီလာအသင်းဟာ လာမယ့် ပရီးမီးယားလိဂ်ပွဲစဉ်အဖြစ် ဝက်စ်ဟမ်းအသင်းအိမ်ကွင်း သွားရောက် ယှဉ်ပြိုင်ရမှာ ဖြစ်ပါတယ်။

Source: BBC

CNI Sport News

၂၀၂၅ ခုနှစ်၊ ဒီဇင်ဘာ ၁၂

ခရီမိုနီဆီအသင်း တိုက်စစ်မှူး ဗာဒီဟာ နိုဝင်ဘာလအတွက် စီးရီးအေတစ်လတာ အကောင်းဆုံး ကစားသမား ဆုရခဲ့ပြီး သူဟာ ဒီဆုကို ရရှိတဲ့ ပထမဆုံး အင်္ဂလန်ကစားသမားအဖြစ် မှတ်တမ်းရေးထိုးနိုင်ခဲ့ပါတယ်။ 

အသက် ၃၈ နှစ်အရွယ်ရှိ ဗာဒီဟာ ပြီးခဲ့တဲ့လက စီးရီးအေ ၃ ပွဲ ပါဝင်ကစားခဲ့ပြီး ဂျူဗင်တပ်စ်အသင်းနဲ့ပွဲစဉ်မှာ ခရီမိုနီဆီအသင်းအတွက် ၁ ဂိုး သွင်းယူခဲ့ပါတယ်။

ပရိသတ်တွေရဲ့ မဲပေးမှုတွေနဲ့ စာရင်း အချက်အလက်တွေကို ပေါင်းစပ်ထားတဲ့ စီးရီးအေ တစ်လတာ အကောင်း ဆုံးဆုမှာ ဗာဒီဟာ အေစီမီလန်အသင်း ဂိုးသမား မိုက်ဂ်နန်၊ အင်တာမီလန်အသင်း တိုက်စစ်မှူး လောတရို မာတီနက်ဇ်၊ နာပိုလီအသင်း တောင်ပံကစားသမား နီရက်စ်၊ ဂျီနိုအာအသင်းက အိုစတီဂါဒ့်နဲ့ အူဒီးနီးစ်အသင်းက ဇာနီအိုလိုတို့ကို အသာရပြီး ရရှိခဲ့တာပါ။ 

စီးရီးအေ အမှုဆောင်ချုပ် ဒီဆီယာဗိုက “ဗာဒီဟာ တကယ့်ကို တခြားခေတ်က ကစားသမားတစ်ဦးပါ။ ခရီမိုနီဆီ အသင်းထံ သူရောက်ရှိလာခဲ့တာကို စီးရီးအေ ပရိသတ်တွေက စိတ်အားထက်သန်စွာ ကြိုဆိုခဲ့ကြပြီး ဗာဒီဟာ ထိပ်တန်းအဆင့် စွမ်းဆောင်ရည်တွေ၊ မွေးရာပါ ခေါင်းဆောင်မှု၊ အရေးပါတဲ့ သွင်းဂိုးတွေနဲ့ ပြန်ပေးဆပ်နေပါ တယ်။ ဒါက သူ့ကို အမြဲတမ်း ထင်ရှားစေတဲ့ ပြိုင်ဆိုင်လိုမှုစိတ်နဲ့ ဂိုးသွင်းစွမ်းရည်တွေရဲ့ ရလဒ်”လို့ ပြောခဲ့ပါ တယ်။ 

 ဗာဒီကို တွေ့ရစဉ်

၁၃ နှစ်ကြာ ကစားခဲ့တဲ့ လက်စတာအသင်းနဲ့ စာချုပ်ကုန်ဆုံးခဲ့ပြီးနောက် နွေရာသီမှာ ခရီမိုနီဆီအသင်းထံ ပြောင်းရွှေ့လာခဲ့တဲ့ ဗာဒီဟာ အသင်းအတွက် ၁၀ ပွဲ ပါဝင်ကစားထားပြီး ၄ ဂိုး သွင်းယူထားပါတယ်။ 

စီးရီးအေပြိုင်ပွဲရဲ့ တစ်လတာ အကောင်းဆုံး ကစားသမားဆုကို ၂၀၁၉ ခုနှစ်မှာ စတင်ချီးမြှင့်ခဲ့တာဖြစ်ပြီး ဗာဒီမတိုင်မီက ဘယ်အင်္ဂလန်ကစားသမားကမှ ဒီဆုကို ရယူနိုင်ခဲ့ခြင်းမရှိတာ ဖြစ်ပါတယ်။

ခရီမိုနီဆီအသင်းဟာ စီးရီးအေနောက်ဆုံး ၂ ပွဲဆက်တိုက် နိုင်ပွဲရရှိထားပြီး အမှတ်ပေးဇယားအဆင့် ၉ နေရာမှာ ရပ်တည်နေကာ ဥရောပဝင်ခွင့် နေရာက အသင်းနဲ့ ၄ မှတ်ကွာဟနေတာပါ။ 

ခရီမိုနီဆီအသင်းဟာ လာမယ့် စီးရီးအေပွဲစဉ်အဖြစ် တိုရီနိုအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ ဒီဇင်ဘာ ၁၁

လီဗာပူးလ်အသင်းမှာ အနာဂတ် မရေမရာဖြစ်နေတဲ့ တောင်ပံကစားသမား ဆာလက်ကို ခေါ်ယူဖို့ ဆော်ဒီပရိုလိဂ် ကလပ်တွေ ပစ်မှတ်ထားနေတယ်လို့ လိဂ်အကြီးအကဲ အိုမာမူဂါဘယ်လ်က ပြောခဲ့ပါတယ်။ 

ဆော်ဒီမှာ ပြုလုပ်တဲ့ ကမ္ဘာ့ဘောလုံး ထိပ်သီး အစည်းအဝေးမှာ အိုမာမူဂါဘယ်လ်က “ဆာလက်ကို ဆော်ဒီလိဂ်က ကြိုဆိုပါတယ်။ ဒါပေမယ့် ကစားသမားတွေနဲ့ ဆွေးနွေးညှိနှိုင်းမှုတွေ ပြုလုပ်ဖို့ တာဝန်ရှိတာက ကလပ်အသင်း တွေပါ။ သေချာတာကတော့ ဆာလက်ဟာ သူတို့တွေထဲက တစ်သင်းသင်းရဲ့ ပစ်မှတ်ပါပဲ”လို့ ပြောခဲ့ပါတယ်။ 

ဆာလက်ဟာ ပရီးမီးယားလိဂ် ၃ ပွဲဆက်တိုက် အရန်ခုံပေါ်မှာ ထိုင်ခဲ့ရပြီးနောက် လီဗာပူးလ်အသင်းနဲ့ နည်းပြ အာနီဆလော့ တို့ကို ဝေဖန်မှုတွေ ပြုလုပ်ခဲ့တာပါ။ 

အဲ့ဒါကြောင့် ဆာလက်ဟာ ဆောင်းရာသီ အပြောင်းအရွှေ့မှာ လီဗာပူးလ်အသင်းကနေ ထွက်ခွာဖွယ်ရှိတယ်ဆိုတဲ့ ထင်ကြေးတွေ ဖြစ်ပေါ်စေခဲ့ပါတယ်။ 

ဆာလက်ကို တွေ့ရစဉ်

ဝေဖန်မှုတွေ ပြုလုပ်ခဲ့တဲ့ ဆာလက်ဟာ အင်တာမီလန်အသင်းကို အနိုင်ရခဲ့တဲ့ ချန်ပီယံလိဂ်ပွဲစဉ်မှာ လီဗာပူးလ် အသင်း လူစာရင်းမှာ ချန်လှပ်ခြင်း ခံခဲ့ရပါတယ်။ 

လာမယ့် ဘရိုက်တန်အသင်းနဲ့ ပရီးမီးယားလိဂ် ပွဲစဉ်မှာလည်း ဆာလက်ဟာ လီဗာပူးလ်အသင်းအတွက် ပါဝင် ကစားနိုင်မလားဆိုတာ သေချာမှု မရှိသေးတာပါ။ 

ဆာလက်ဟာ ဒီပွဲပြီးရင် အာဖရိကဖလားပြိုင်ပွဲ ယှဉ်ပြိုင်ဖို့ အီဂျစ်အသင်းနဲ့ သွားရောက် ပူးပေါင်းတော့မှာ ဖြစ်ပါတယ်။ 

ဆော်ဒီပရိုလိဂ် ကလပ်အသင်းတွေဟာ ဆာလက်ကို ခေါ်ယူနိုင်ဖို့ အရင်ကတည်းက ကြိုးပမ်းခဲ့တာမှာ အောင်မြင်မှု မရခဲ့ပေမယ့် လီဗာပူးလ်အသင်းနဲ့ အဆင်မပြေဖြစ်နေတဲ့ အခုအချိန်မှာတော့ သူ့ကို ခေါ်ယူဖို့ မျှော်လင့်ချက် အားကောင်းလာခဲ့တာပါ။ 

The Telegraph က အယ်လ်ဟီလယ်နဲ့ အယ်လ်အစ်တီဟတ်အသင်းတွေဟာ လာမယ့် အပြောင်းအရွှေ့မှာ ဆာလက်ကို ခေါ်ယူနိုင်ဖို့ ပစ်မှတ်ထားနေပြီး မကြာမီမှာ ကြိုးပမ်းသွားဖွယ်ရှိနေတယ်လို့ ဖော်ပြထားပါတယ်။ 

Source: Goal