- By CNI
- Category: အားကစား
- Hits: 438
CNI Sport News
၂၀၂၄ ခုနှစ်၊ ဒီဇင်ဘာ ၁၂
အင်္ဂလန်နောက်ခံလူ ဂျိုးဂိုးမက်ဇ်က သူဟာ ပြီးခဲ့တဲ့နွေရာသီမှာ လီဗာပူးလ်အသင်းကနေ ထွက်ခွာပြီး နယူးကာဆယ်အသင်းထံ ပြောင်းရွှေ့ဖို့ နီးစပ်ခဲ့တယ်လို့ ဝန်ခံခဲ့ပါတယ်။
ဂျိုးဂိုးမက်ဇ်က “ကျနော် လီဗာပူးလ်ကနေ ထွက်ခွာဖို့ နီးစပ်ခဲ့တယ်ဆိုတာ ဟုတ်ပါတယ်။ ဒါပေမယ့် ကျနော်ဟာ ကလပ်အပေါ်မှာ အမြဲတမ်း အာရုံစိုက်ခဲ့ပါတယ်။ ဒီမှာရှိနေရတာဟာ ဘယ်လောက်ကောင်းမွန်လဲဆိုတာကို သိပြီး လာမယ့် နွေရာသီဆိုရင် ဒီမှာရှိတာ ၁၀ နှစ်ရှိသွားပါပြီ။ အပြောင်းအရွှေ့ မဖြစ်ခဲ့ပြီးနောက်မှာ ကျနော်ဟာ အသင်းနဲ့အတူ လျင်မြန်စွာ လိုက်လျောညီထွေဖြစ်အောင် လုပ်ခဲ့ရပါတယ်”လို့ ပြောခဲ့တာပါ။
ပြီးခဲ့တဲ့ နွေရာသီ အပြောင်းအရွှေ့က ဂျိုးဂိုးမက်ဇ်ဟာ နယူးကာဆယ်အသင်းထံ ပြောင်းရွှေ့ပြီး နယူးကာဆယ် အသင်းက ဂေါ်ဒွန်ဟာ လီဗာပူးလ်အသင်းထံ ပြန်လည်ပြောင်းရွှေ့လာမယ့် အပြောင်းအရွှေ့ ဖြစ်ပေါ်ဖို့ ရှိခဲ့ပါတယ်။
ဒါပေမယ့် ဒီအပြောင်းအရွှေ့ဟာ ပျက်ပြယ်သွားခဲ့ပြီးနောက် ဂျိုးဂိုးမက်ဇ်ဟာ လီဗာပူးလ်အသင်းမှာ ဆက်ပြီး ရှိနေခဲ့တာပါ။
ဂျိုးဂိုးမက်ဇ်ကို တွေ့ရစဉ်
ဂျိုးဂိုးမက်ဇ်ဟာ ဗန်ဒိုက်၊ ကိုနာတေး၊ ကွမ်ဆက်တို့ရဲ့ အနောက်မှာသာ ရာသီအသစ်ကို စတင်ခဲ့ရတာဖြစ်ပါတယ်။
ဒါပေမယ့် လီဗာပူးလ်အသင်းရဲ့ အဓိက နောက်ခံလူတွေရဲ့ ဒဏ်ရာကြောင့် ဂျိုးဂိုးမက်ဇ်ဟာ အသင်းအတွက် ပါဝင်ခွင့်ရခဲ့ပြီး အခုဆိုရင် ပြိုင်ပွဲစုံ ၁၁ ပွဲအထိ ပါဝင်ကစားထားတာပါ။
အသက် ၂၇ နှစ်အရွယ်ရှိ ကစားသမားဟာ ပြီးခဲ့တဲ့ လီဗာပူးလ်အသင်းရဲ့ ပွဲစဉ် ၃ ပွဲစလုံး ပွဲထွက်လူစာရင်း ပါဝင်ခဲ့ပြီး လာမယ့် ပွဲတွေမှာလည်း ဗန်ဒိုက်နဲ့အတူ တွဲဖက်ပြီး ပွဲထွက်ခွင့်ရဖို့ မျှော်လင့်နေတာ ဖြစ်ပါတယ်။
ဂျိုးဂိုးမက်ဇ်နဲ့ လီဗာပူးလ်အသင်းတို့ရဲ့ စာချုပ်ဟာ ၂၀၂၇ ခုနှစ် ရာသီအကုန်ထိ သက်တမ်းရှိနေတာပါ။
ပရီးမီးယားလိဂ်နဲ့ ချန်ပီယံလိဂ် ပြိုင်ပွဲမှာ အဆင့် ၁ နေရာ ရပ်တည်နေတဲ့ လီဗာပူးလ်အသင်းဟာ ဒီတစ်ပတ် လိဂ်ပွဲစဉ်အဖြစ် ဖူလ်ဟမ်အသင်းနဲ့ ယှဉ်ပြိုင်ရမှာဖြစ်ပါတယ်။
Source: Goal
- By CNI
- Category: အားကစား
- Hits: 621
CNI Sport News
၂၀၂၄ ခုနှစ်၊ ဒီဇင်ဘာ ၁၂
နာပိုလီအသင်းနည်းပြ ကွန်တီဟာ ယူနိုက်တက်အသင်း တိုက်စစ်မှူး ဇက်ခ်ဇီကို အသင်းအတွက် ခေါ်ယူချင် နေတယ်လို့ အီတလီမီဒီယာတွေက ဖော်ပြထားပါတယ်။
ဇက်ခ်ဇီဟာ ပြီးခဲ့တဲ့ နွေရာသီကမှ ဘိုလော့ဂ်နာ အသင်းကနေ ယူနိုက်တက်အသင်းထံ ပေါင် ၃၆.၅ သန်းနဲ့ ပြောင်းရွှေ့ လာခဲ့ပေမယ့် သူ့ရဲ့ ယူနိုက်တက်အသင်း အနာဂတ်နဲ့ ပတ်သက်ပြီး ထင်ကြေးတွေ အများအပြား ထွက်ပေါ်နေတာပါ။
ဂျူဗင်တပ်စ်အသင်းဟာ ဇက်ခ်ဇီကို ခေါ်ယူဖို့ ချိတ်ဆက်မှု ပြုလုပ်နေသလို နောက်ထပ် အီတလီကလပ်ဖြစ်တဲ့ နာပိုလီအသင်းကလည်း သူ့ကို ခေါ်ယူဖို့စဉ်းစားမှုတွေ ပြုလုပ်နေတာ ဖြစ်ပါတယ်။
အီတလီသတင်း Il Mattino က ကွန်တီဟာ ယူနိုက်တက်အသင်းကနေ ဇက်ခ်ဇီကို ခေါ်ယူနိုင်မယ့် ဒီပြိုင်ဆိုင်မှု ထဲမှာ ပါဝင်ဖို့ နာပိုလီအသင်းကို မီးစိမ်းပြခဲ့တယ်လို့ ဖော်ပြထားတာပါ။
တော်မီနေးကို တွေ့ရစဉ်
ဇက်ခ်ဇီ ကိုယ်တိုင်ကလည်း လာမယ့် ဇန်နဝါရီ အပြောင်းအရွှေ့မှာ စီးရီးအေထံ ပြန်လာဖို့ စိတ်ဝင်စားနိုင်တယ်လို့ ဒီသတင်းထဲမှာ ထပ်မံဖော်ပြထားတာ ဖြစ်ပါတယ်။
ကွန်တီဟာ ဇက်ခ်ဇီရဲ့ ပရိသတ်တစ်ဦးဖြစ်ပြီး ယူနိုက်တက်အသင်းထံ သူမပြောင်းရွှေ့ခင် ပြီးခဲ့တဲ့ နွေရာသီက နာပိုလီအသင်းအတွက် ခေါ်ယူချင်ခဲ့တာပါ။
နာပိုလီအသင်းဟာ ပြီးခဲ့တဲ့ နွေရာသီ အပြောင်းအရွှေ့က ယူနိုက်တက်အသင်းကနေ တော်မီနေးကို ခေါ်ယူပြီး နောက် နောက်ထပ် ယူနိုက်တက် ကစားသမားတစ်ဦးကို ပစ်မှတ်ထားနေတာ ဖြစ်ပါတယ်။
တော်မီနေးဟာ နာပိုလီအသင်းမှာ ပရိသတ်အကြိုက် ကစားသမားတစ်ဦးအဖြစ် ခြေစွမ်းပြသနေပြီး နာပိုလီ အသင်းအတွက် ၁၄ ပွဲ ကစားထားတာမှာ ၄ ဂိုးသွင်းပြီး ၂ ဂိုးဖန်တီးထားတာပါ။
နာပိုလီအသင်းဟာ ဒီရာသီ စီးရီးအေပြိုင်ပွဲမှာ ရလဒ်ကောင်းတွေ ရရှိနေပြီး အမှတ်ပေးဇယား အဆင့် ၂ နေရာမှာ ရပ်တည်နေပါတယ်။
နာပိုလီအသင်းဟာ ဒီတစ်ပတ် စီးရီးအေပွဲစဉ်အဖြစ် အူဒီးနီးစ်အသင်းနဲ့ အဝေးကွင်းပွဲစဉ် ယှဉ်ပြိုင်ရမှာ ဖြစ်ပါ တယ်။
Source: Metro
- By CNI
- Category: အားကစား
- Hits: 787
CNI Sport News
၂၀၂၄ ခုနှစ်၊ ဒီဇင်ဘာ ၁၂
ကမ္ဘာ့ဘောလုံးအဖွဲ့ချုပ်(ဖီဖာ)က ၂၀၃၄ ကမ္ဘာ့ဖလားပြိုင်ပွဲကို ဆော်ဒီနိုင်ငံက အိမ်ရှင်အဖြစ် ကျင်းပမယ်လို့ ဗုဒ္ဓဟူးနေ့က ပြုလုပ်ခဲ့တဲ့ ကွန်ဂရက်မှာ အတည်ပြုခဲ့ပါတယ်။
၂၀၃၀ ကမ္ဘာ့ဖလားပြိုင်ပွဲကိုတော့ မော်ရိုကို၊ ပေါ်တူဂီနဲ့ စပိန်နိုင်ငံတို့က ပူးတွဲအိမ်ရှင်အဖြစ် ကျင်းပမှာဖြစ်ပြီး တောင်အမေရိကနိုင်ငံတွေဖြစ်တဲ့ အာဂျင်တီးနား၊ ဥရုဂွေးနဲ့ ပါရာဂွေးနိုင်ငံတို့မှာ တစ်ပွဲစီကျင်းပသွားမှာပါ။
ဒီဆုံးဖြတ်ချက်ကို ဖီဖာဥက္ကဋ္ဌ အင်ဖန်တီနိုက ကွန်ဂရက်အပြီးမှာ ကြေညာခဲ့တာ ဖြစ်ပါတယ်။
ကမ္ဘာ့ဖလားပြိုင်ပွဲကို ၁၉၃၀ က စတင်ခဲ့တာကြောင့် ၂၀၃၀ မှာ ဒီပြိုင်ပွဲရဲ့ သက်တမ်းဟာ နှစ် ၁၀၀ ပြည့်ခဲ့ပြီ ဖြစ်တာပါ။
အဲဒါကြောင့် နှစ် ၁၀၀ ပြည့် အထိမ်းအမှတ်အဖြစ် ကမ္ဘာ့ဖလားပြိုင်ပွဲကြီး စတင်ခဲ့တဲ့ တောင်အမေရိကနိုင်ငံမှာ ၃ ပွဲ ကျင်းပသွားမှာ ဖြစ်ပါတယ်။
ဆော်ဒီနိုင်ငံဟာ ၂၀၃၄ ကမ္ဘာ့ဖလားပြိုင်ပွဲကို အိမ်ရှင်အဖြစ် လျှောက်ထားတဲ့ တစ်နိုင်ငံတည်းသော နိုင်ငံဖြစ်လို့ အိမ်ရှင်ပြုလုပ်ခွင့် ရရှိသွားခဲ့တာပါ။
ဆော်ဒီကို ရည်ညွန်းထားစဉ်
ဆော်ဒီအိုလံပစ်နဲ့ မသန်စွမ်း အားကစားကော်မတီ အကြီးအကဲကတော့ ဒါက ဆော်ဒီနိုင်ငံရဲ့ သမိုင်းဝင် အခိုက်အတန့်ဖြစ်ပြီး ဒီနိုင်ငံမှာရှိတဲ့ လူသားအားလုံးအတွက် အိပ်မက်တစ်ခု ဖြစ်လာပြီလို့ ပြောခဲ့ပါတယ်။
အယ်လ်နာဆာ အသင်းခေါင်းဆောင် ရော်နယ်ဒိုက အခြေခံ အဆောက်အဦတွေ၊ အားကစားကွင်းတွေ၊ ပရိသတ် တွေအတွက် အခြေအနေနဲ့ အရာအားလုံးကြောင့် ၂၀၃၄ ဟာ အကောင်းဆုံး ကမ္ဘာ့ဖလားပြိုင်ပွဲ ဖြစ်လာမယ်လို့ ယုံကြည်ကြောင်း ပြောထားတာပါ။
ဖီဖာက ဆော်ဒီနိုင်ငံကို ၂၀၃၄ ကမ္ဘာ့ဖလားပြိုင်ပွဲ အိမ်ရှင်အဖြစ် ကြေညာပြီးနောက်မှာ လူ့အခွင့်အရေး အဖွဲ့အစည်းတွေ အပါအဝင် အဖွဲ့အစည်းပေါင်း ၂၁ ဖွဲ့က ဒါကို ရှုတ်ချတဲ့ ပူးတွဲကြေညာချက် ထုတ်ပြန်ခဲ့ပါတယ်။
ဆော်ဒီနိုင်ငံဟာ ကမ္ဘာ့ဖလားပြိုင်ပွဲကို ပထမဆုံးအကြိမ် ကျင်းပခွင့်ရမှာဖြစ်လို့ ပြိုင်ပွဲအတွက် အသုံးပြုမယ့် အားကစားကွင်း ၈ ကွင်းကို တည်ဆောက်သွားဖို့ရှိနေတာပါ။
၂၀၃၀ နဲ့ ၂၀၃၄ ကမ္ဘာ့ဖလားပြိုင်ပွဲတွေကို အိမ်ရှင်အဖြစ် ကျင်းပမယ့်နိုင်ငံတွေဟာ ပြိုင်ပွဲကို အလိုအလျောက် ဝင်ရောက် ယှဉ်ပြိုင်ခွင့်ရရှိမှာ ဖြစ်ပါတယ်။
Source: ESPN
- By CNI
- Category: အားကစား
- Hits: 455
CNI Sport News
၂၀၂၄ ခုနှစ်၊ ဒီဇင်ဘာ ၁၂
မန်စီးတီးအသင်းဟာ ချန်ပီယံလိဂ်ပွဲစဉ်မှာ ဂျူဗင်တပ်စ်အသင်းကို ၂ ဂိုး-ဂိုးမရှိနဲ့ အရေးနိမ့်ပြီးနောက် နည်းပြ ဂွာဒီယိုလာက အသင်းအနေနဲ့ ဒီပြိုင်ပွဲမှာ ဆက်ရှိနေဖို့ တိုက်ပွဲဝင်ရမယ်လို့ ပြောခဲ့ပါတယ်။
ဂွာဒီယိုလာက “နောက်တဆင့် တက်နိုင်ဖို့က ကျနော်တို့ရဲ့ ပစ်မှတ်ပါ။ ကျနော်တို့အတွက် ၁ မှတ်၊ ၃ မှတ်ရဖို့ လိုအပ်ပါတယ်။ ကျနော်တို့ ဒါကိုလုပ်နိုင်ဖို့အတွက် ကြိုးစားဖို့ ပဲရစ်ကိုသွားမှာပါ။ ပြီးရင် အိမ်ကွင်းမှာ နောက်ဆုံးပွဲ ကစားပါမယ်။ ကျနော်တို့ဟာ ရလဒ်ကောင်းတွေ ပြန်ရယူနိုင်ခဲ့ရင် ဒီကာလကိုမေ့မှာ မဟုတ်ပါဘူး။ ကျနော်တို့လုပ် ခဲ့တာတွေနဲ့ အနာဂတ်မှာ ကျနော်တို့လုပ်ရမယ့် အရာတွေအပေါ် ပိုပြီးတန်ဖိုးထားလာမှာပါ”လို့ ပြောခဲ့တာပါ။
မန်စီးတီးအသင်းဟာ ဂျူဗင်တပ်စ်အသင်းကို အရေးနိမ့်ခဲ့တာကြောင့် လက်ကျန်ပွဲစဉ် ၂ ပွဲပဲ ကစားဖို့ ကျန်ရှိတော့ တဲ့ အချိန်မှာ အမှတ်ပေးဇယားအဆင့် ၂၂ နေရာကို ရောက်ရှိသွားခဲ့တာ ဖြစ်ပါတယ်။
မန်စီးတီးအသင်းဟာ ချန်ပီယံလိဂ်ပွဲစဉ် ၆ ပွဲ ကစားအပြီးမှာ ရမှတ် ၈ မှတ်သာ ရရှိထားတာကြောင့် လက်ကျန် ၂ ပွဲစလုံး ရလဒ်ကောင်းရယူနိုင်ရင်တောင် နောက်တဆင့်ကို တိုက်ရိုက် တက်ရောက်နိုင်ဖွယ်မရှိဘဲ ပလေးအော့ဖ် အဆင့် ယှဉ်ပြိုင်ရဖို့ရှိနေတာပါ။
မန်စီးတီးအသင်းကို တွေ့ရစဉ်
မန်စီးတီးအသင်းဟာ ချန်ပီယံလိဂ်နောက်ဆုံး ၂ ပွဲအဖြစ် ပီအက်စ်ဂျီ၊ ကလပ်ဘရုဂေးအသင်းတို့နဲ့ ယှဉ်ပြိုင်ရမှာ ဖြစ်ပါတယ်။
မန်စီးတီးအသင်းဟာ ဂျူဗင်တပ်စ် အသင်းနဲ့ပွဲစဉ် အပါအဝင် နောက်ဆုံးကစားခဲ့တဲ့ ပြိုင်ပွဲစုံ ၁၀ ပွဲမှာ ၁ ပွဲသာ အနိုင်ရခဲ့ပြီး ၇ ပွဲအထိ အရေးနိမ့်ကာ အဆိုးရွားဆုံး အခြေအနေကို ရောက်ရှိနေတာပါ။
မန်စီးတီးအသင်း ကွင်းလယ်လူ ဂွန်ဒိုဂန်က အသင်းရဲ့ ရုန်းကန်ရမှုတွေမှာ ယုံကြည်မှုက ကြီးမားတဲ့ အစိတ်အပိုင်း ဖြစ်ပြီး စိတ်ပိုင်းဆိုင်ရာ ပြဿနာလည်း ဖြစ်နိုင်တယ်လို့ ပွဲအပြီးမှာ ပြောခဲ့ပါတယ်။
ရလဒ်ဆိုးတွေကြောင့် ပရီးမီးယားလိဂ် ပြိုင်ပွဲမှာ အဆင့် ၄ နေရာအထိ ရောက်ရှိနေတဲ့ လက်ရှိ ချန်ပီယံ မန်စီးတီး အသင်းဟာ ဒီဇင်ဘာ ၁၅ ရက်မှာ လိဂ်ပွဲစဉ်အဖြစ် ယူနိုက်တက်အသင်းနဲ့ မန်ချက်စတာဒါဘီပွဲစဉ် ယှဉ်ပြိုင်ရမှာ ဖြစ်ပါတယ်။
Source: Dailymail
- By CNI
- Category: အားကစား
- Hits: 839
CNI Sport News
၂၀၂၄ ခုနှစ်၊ ဒီဇင်ဘာ ၁၁
ဖီနာဘာချီအသင်းနည်းပြ မော်ရင်ဟိုက ဥရောပထိပ်သီးကလပ် အများအပြားရဲ့ ပစ်မှတ်ဖြစ်နေတဲ့ စပိန်ကြယ်ပွင့် နီကိုဝီလီယံစ်ကို ရီးရယ်လ်အသင်းထံ ပြောင်းရွှေ့ဖို့ တိုက်တွန်းမှု ပြုလုပ်ခဲ့ပါတယ်။
မော်ရင်ဟိုက “နီကိုက အံ့သြဖွယ်ကောင်းတဲ့ ကစားသမားပါ။ ပြီးခဲ့တဲ့ ယူရိုပြိုင်ပွဲမှာ လူတိုင်းက ယာမဲလ် အကြောင်းကို ပြောနေကြပါတယ်။ ကျနော်ကတော့ နီကို-ကို ပိုပြီးကြိုက်ပါတယ်။ သူဟာ အလွန်ကောင်းတဲ့ ဘောလုံးသမားတစ်ဦးပါ။ တူရကီကလပ်က သူ့ကိုခေါ်ယူနိုင်မယ်လို့ မထင်ပါဘူး။ ကျနော်ကတော့ သူ ရီးရယ်လ် အသင်းမှာ အဆုံးသတ်ဖို့ မျှော်လင့်တယ်”လို့ ပြောခဲ့တာပါ။
နီကိုဝီလီယံစ်ဟာ စပိန်အသင်း ချန်ပီယံဖြစ်ခဲ့တဲ့ ယူရို ၂၀၂၄ ပြိုင်ပွဲမှာ ခြေစွမ်း ပြသနိုင်ခဲ့တာကြောင့် ပြီးခဲ့တဲ့ နွေရာသီ အပြောင်းအရွှေ့မှာ ဥရောပထိပ်သီး ကလပ်တွေက သူ့ကိုခေါ်ယူဖို့ ကြိုးစားခဲ့တာ ဖြစ်ပါတယ်။
ယူရို ၂၀၂၄ ဗိုလ်လုပွဲမှာ အင်္ဂလန်အသင်းဘက်ကို ဂိုးသွင်းခဲ့တဲ့ နီကိုဝီလီယံစ်ကို ပရီးမီးယားလိဂ် ကလပ်တွေဖြစ်တဲ့ အာဆင်နယ်နဲ့ ချယ်လ်ဆီးအသင်းတို့က ချိတ်ဆက်မှုတွေ ပြုလုပ်ခဲ့ပြီး ဘာစီလိုနာအသင်းရဲ့ ပစ်မှတ်လည်း ဖြစ်ခဲ့တာပါ။
နီကိုဝီလီယံစ်ကို တွေ့ရစဉ်
ဒါပေမယ့် နီကိုဝီလီယံစ်ဟာ ဘီလ်ဘာအိုအသင်းမှာပဲ ဆက်နေဖို့ ဆုံးဖြတ်ခဲ့တာဖြစ်ပါတယ်။
မော်ရင်ဟိုကတော့ နီကိုဝီလီယံစ်ကို ခေါ်ယူမယ့် ပြိုင်ဆိုင်မှုထဲမှာ သူ့ရဲ့အသင်းဟောင်း ရီးရယ်လ်အသင်း အနိုင် ရယူနိုင်ဖို့ မျှော်လင့်နေတာပါ။
နီကိုဝီလီယံစ်နဲ့ ဘီလ်ဘာအိုအသင်းတို့ရဲ့ စာချုပ်ထဲမှာ စာချုပ်ဖျက်သိမ်းကြေး ယူရို ၅၈ သန်းသာရှိတဲ့အတွက် လာမယ့်နွေရာသီ အပြောင်းအရွှေ့မှာ အသင်းကြီး အများအပြားက သူ့ကိုခေါ်ယူဖို့ ထပ်ပြီးကြိုးစားဖို့ရှိနေတာ ဖြစ်ပါတယ်။
အသက် ၂၂ နှစ်အရွယ်ရှိ နီကိုဝီလီယံစ်နဲ့ ဘီလ်ဘာအိုအသင်းတို့ရဲ့ စာချုပ်ဟာ ၂၀၂၇ နွေရာသီအထိ သက်တမ်း ရှိနေတာပါ။
ဘီလ်ဘာအို အကယ်ဒမီထွက် နီကိုဝီလီယံစ်ဟာ လက်ရှိအချိန်ထိ သူ့ရဲ့ကလပ်အသင်းအတွက် ပွဲပေါင်း ၁၄၂ ပွဲ ပါဝင်ကစားထားပြီး ၂၂ ဂိုး သွင်းယူကာ ကိုပါဒယ်ရေးဖလား ၁ ကြိမ် ရယူထားနိုင်တာဖြစ်ပါတယ်။
Source: Metro
- By CNI
- Category: အားကစား
- Hits: 1239
CNI Sport News
၂၀၂၄ ခုနှစ်၊ ဒီဇင်ဘာ ၁၁
လီဗာပူးလ်အသင်းဟာ ဂျီရိုနာအသင်းကို ၁ ဂိုး-ဂိုးမရှိနဲ့ အနိုင်ရပြီး ချန်ပီယံလိဂ်ပြိုင်ပွဲမှာ ရာနှုန်းပြည့် နိုင်ပွဲရရှိ နေပေမယ့် နည်းပြအာနီဆလော့က ဒီပွဲစဉ်က အသင်းရဲ့စွမ်းဆောင်ရည်ကို မကျေနပ်ဘူးလို့ ပြောခဲ့ပါတယ်။
အာနီဆလော့က “ကစားပြီးတဲ့ ၆ ပွဲစလုံး အကြောင်းမေးရင် ရလဒ်တွေအားလုံးနဲ့ ၅ ပွဲက စွမ်းဆောင်ရည်ကို ကျနော် အလွန်ကျေနပ်မိပါတယ်။ ဒီပွဲက စွမ်းဆောင်ရည်ကတော့ ကျေနပ်ဖို့ဝေးကွာပါတယ်။ ဂျီရိုနာအသင်းဟာ ဒိပွဲမှာ ၃ မှတ်ထက် ပိုပြီးထိုက်တန်တဲ့အတွက် သူတို့အတွက်တော့ စိတ်မကောင်းဖြစ်မိပါတယ်။ ကျနော်တို့မှာ မယုံနိုင်စရာကောင်းတဲ့ ဂိုးသမားရှိခဲ့ပါတယ်”လို့ ပြောခဲ့တာပါ။
လီဗာပူးလ်အသင်းဟာ ဒီပွဲမှာ ဆာလက်ရဲ့ ဒုတိယပိုင်း ပင်နယ်တီ သွင်းဂိုးနဲ့ ဂျီရိုနာအသင်းကို အနိုင်ရရှိခဲ့တာ ဖြစ်ပါတယ်။
လီဗာပူးလ်အသင်းဟာ ဒီနိုင်ပွဲကြောင့် ချန်ပီယံလိဂ်ပွဲစဉ် ၆ ပွဲ ကစားအပြီးမှာ ၆ ပွဲစလုံး အနိုင်ရရှိကာ ၁၆ သင်း အဆင့်ကို တက်နိုင်ခဲ့တာပါ။
လီဗာပူးလ်အသင်း ယှဉ်ပြိုင်နေစဉ်
လီဗာပူးလ်အသင်းဟာ ရလဒ်ကောင်းတွေ ရရှိထားပေမယ့် နည်းပြ အာနီဆလော့က အသင်းအနေနဲ့ ချန်ပီယံလိဂ် ပြိုင်ပွဲမှာ အဆုံးထိသွားချင်တဲ့ ရည်မှန်းချက်ရှိရင် စွမ်းဆောင်ရည် ပိုကောင်းအောင် လုပ်ရမယ်လို့ ပြောခဲ့ပါတယ်။
ဒဏ်ရာကြောင့် ကာလရှည်ကြာ အနားယူနေခဲ့ရတဲ့ ဂိုးသမား အယ်လီဆန်ဟာ ဂျီရိုနာအသင်းနဲ့ပွဲစဉ်မှာ လီဗာပူးလ် အသင်းရဲ့ ပွဲထွက် လူစာရင်းထဲ ပထမဆုံးအကြိမ် ပြန်ပါဝင်လာခဲ့ပြီး လက်စွမ်းပြကာကွယ်မှုတွေ ပြုလုပ်နိုင်ခဲ့ တာပါ။
လီဗာပူးလ်အသင်းနည်းပြ အာနီဆလော့က အယ်လီဆန်ဟာ ကမ္ဘာ့အကောင်းဆုံး ဂိုးသမားတွေထဲက တစ်ဦး ဖြစ်တယ်ဆိုတာကို ဒီပွဲမှာ ပြသခဲ့ပြီး သူ့ရဲ့စွမ်းဆောင်ရည်ကို ဆက်ထိန်းကာ ကြံ့ခိုင်မှုပြည့်ဝနေဖို့ မျှော်လင့်တယ် လို့ ပြောခဲ့ပါတယ်။
လီဗာပူးလ်အသင်းဟာ ချန်ပီယံလိဂ်ပြိုင်ပွဲမှာ ထိပ်ဆုံးနေရာ ရပ်တည်နေသလို ပရီးမီးယားလိဂ် ပြိုင်ပွဲမှာလည်း တစ်ပွဲလျော့နဲ့ အမှတ်ပေးဇယား အဆင့် ၂ နေရာက ချယ်လ်ဆီးအသင်းကို ၄ မှတ် အသာရရှိကာ ထိပ်ဆုံးနေရာမှာ ရပ်တည်နေတာပါ။
လီဗာပူးလ်အသင်းဟာ ဒီအပတ် ပရီးမီးယားလိဂ် ပွဲစဉ်အဖြစ် ဖူလ်ဟမ်အသင်းနဲ့ ယှဉ်ပြိုင်ရမှာဖြစ်ပါတယ်။
Source: ESPN
- By CNI
- Category: အားကစား
- Hits: 365
CNI Sport News
၂၀၂၄ ခုနှစ်၊ ဒီဇင်ဘာ ၁၁
ရီးရယ်လ်အသင်းက အတ္တလန်တာအသင်းကို ၃ ဂိုး-၂ ဂိုးနဲ့ အနိုင်ရရှိခဲ့တဲ့ ချန်ပီယံလိဂ်ပွဲစဉ်မှာ ဒဏ်ရာရရှိသွားခဲ့တဲ့ တိုက်စစ်မှူး ဘတ်ပီရဲ့ဒဏ်ရာ မပြင်းထန်ဖို့ မျှော်လင့်တယ်လို့ နည်းပြ အန်ဆယ်လော့တီက ပြောခဲ့ပါတယ်။
အန်ဆယ်လော့တီက “ဘတ်ပီဟာ သူ့ရဲ့ပေါင်မှာ မသက်မသာ ဖြစ်နေတယ်လို့ ခံစားခဲ့ရတာကြောင့် ကျနော်တို့ စောင့်ကြည့်ရမှာပါ။ ပြင်းထန်တဲ့ပုံ မပေါ်ပေမယ့် အခြေအနေ အတိအကျကို ဆေးစစ်မှုပြုလုပ်ပြီးရင် ကျနော်တို့ သိရမှာပါ။ သူဟာ မပြေးနိုင်တော့တဲ့အတွက် စိတ်ပျက်ခဲ့ပြီး ဒါကြောင့်လည်း ကျနော်တို့သူ့ကို လူစားလဲခဲ့ရတာ”လို့ ပြောခဲ့တာပါ။
အသက် ၂၅ နှစ်အရွယ်ရှိ ဘတ်ပီဟာ ဒီပွဲမှာ ရီးရယ်လ်အသင်းအတွက် ပွဲချိန် ၁၀ မိနစ်မှာ အဖွင့်ဂိုး သွင်းယူနိုင်ခဲ့ပါ တယ်။
ဒီဂိုးဟာ ဘတ်ပီအတွက် ချန်ပီယံလိဂ်ပြိုင်ပွဲမှာ သွင်းဂိုး ၅၀ ပြည့်ခဲ့တဲ့ ဂိုးလည်းဖြစ်ခဲ့တာပါ။
ဒါပေမယ့် ဘတ်ပီဟာ ပွဲချိန် ၃၅ မိနစ်မှာ ဒဏ်ရာရရှိသွားခဲ့ပြီး ဆက်မကစားနိုင်တော့တဲ့အတွက် ရိုဒရီဂိုနဲ့ လူစားလဲခံခဲ့ရတာ ဖြစ်ပါတယ်။
ဒီရာသီမှာ ဒဏ်ရာတွေနဲ့ ရုန်းကန်နေရတဲ့ ရီးရယ်လ်အသင်းအတွက် ဘတ်ပီရဲ့ဒဏ်ရာဟာ နောက်ထပ် ထိုးနှက်ချက် ဖြစ်ခဲ့တာပါ။
ဘတ်ပီကို တွေ့ရစဉ်
ရီးရယ်လ်အသင်းဟာ အတ္တလန်တာအသင်းကို အနိုင်ရရှိခဲ့တာကြောင့် ဒီရာသီ ချန်ပီယံလိဂ်ပြိုင်ပွဲမှာ ရလဒ်ဆိုး နေတာကို အဆုံးသတ်နိုင်ခဲ့ပါတယ်။
ရီးရယ်လ်အသင်းဟာ ချန်ပီယံလိဂ်ပွဲစဉ် ၆ ပွဲ ကစားအပြီးမှာ ရမှတ် ၉ မှတ်နဲ့ အမှတ်ပေးဇယား အဆင့် ၁၈ နေရာ မှာ ရပ်တည်နေတာပါ။
ရီးရယ်လ်အသင်းနည်းပြ အန်ဆယ်လော့တီက ဒီနိုင်ပွဲဟာ သူတို့အတွက် အလွန်အရေးပါခဲ့ပြီး ထိပ်ဆုံး ၈ သင်းထဲ ဝင်ရောက် နိုင်ဖို့အတွက် လက်ကျန်ပွဲစဉ် ၂ ပွဲစလုံးကို အနိုင်ရလဒ် ရယူသွားမယ်လို့ ပြောခဲ့ပါတယ်။
ရီးရယ်လ်အသင်းဟာ ချန်ပီယံလိဂ် နောက်ဆုံးပွဲစဉ်တွေအဖြစ် ဆဲလ်ဘတ်၊ ဘရက်စ်အသင်းတို့နဲ့ ယှဉ်ပြိုင်ရမှာ ဖြစ်လို့ ထိပ်ဆုံး ၈ သင်းထဲ ဝင်ရောက်ပြီး နောက်တဆင့်တက်နိုင်ဖို့ မျှော်လင့်ချက်ရှိနေတာပါ။
လာလီဂါပြိုင်ပွဲမှာ အဆင့် ၂ နေရာ ရပ်တည်နေတဲ့ ရီးရယ်လ်အသင်းဟာ ဒီတစ်ပတ်လိဂ်ပွဲစဉ်အဖြစ် ဗယ်လက်ကာနိုအသင်းနဲ့ အဝေးကွင်းပွဲစဉ် ယှဉ်ပြိုင်ရမှာဖြစ်ပါတယ်။
Source: CNA
- By CNI
- Category: အားကစား
- Hits: 780
CNI Sport News
၂၀၂၄ ခုနှစ်၊ ဒီဇင်ဘာ ၁၀
စပါးအသင်းရဲ့ အဓိကနောက်ခံလူ ရိုမဲရိုးဟာ ချယ်လ်ဆီးအသင်းကို အရေးနိမ့်ခဲ့တဲ့ ပရီးမီးယားလိဂ် ပွဲစဉ်မှာ ရရှိခဲ့တဲ့ ဒဏ်ရာကြောင့် ၆ ပတ်ကြာ အနားယူရဖွယ် ရှိနေပါတယ်။
အာဂျင်တီးနားနောက်ခံလူ ရိုမဲရိုးဟာ ဒဏ်ရာကြောင့် စပါးအသင်းရဲ့ ပြိုင်ပွဲစုံ ၅ ပွဲကို လွဲချော်ခဲ့ပြီးနောက် ချယ်လ်ဆီးအသင်းနဲ့ပွဲစဉ်မှ အသင်းရဲ့ ပွဲထွက်လူစာရင်းထဲ ပြန်ပါဝင်လာခဲ့တာပါ။
ဒါပေမယ့် ရိုမဲရိုးဟာ ပွဲချိန် ၁၅ မိနစ်သာ ပါဝင်ကစားခဲ့ပြီးနောက် ဒဏ်ရာ ထပ်မံရရှိခဲ့တာ ဖြစ်ပါတယ်။
အဲဒါကြောင့် စပါးအသင်းဟာ သူ့ရဲ့နေရာမှာ ဒရာဂူဆန်ကို လူစားလဲ ဝင်ရောက်စေခဲ့တာပါ။ ရိုမဲရိုးဟာ သူ့ရဲ့ ခြေချောင်း ဒဏ်ရာကို ပိုပြီးဆိုးရွားစေခဲ့တယ်ဆိုပြီး ကနဦး သံသယရှိခဲ့တာဖြစ်ပါတယ်။
ဒါပေမယ့် ဂျာနယ်လစ် ဂတ်စတန်အီဒဲလ်က ရိုမဲရိုးဟာ ကြွက်သားဒဏ်ရာရရှိခဲ့ပြီး နောက်ထပ် ၆ ပတ်ကြာအထိ အနားယူရမယ်လို့ ဖော်ပြခဲ့တာပါ။
စပါးအသင်းနည်းပြ ပိုစတီကိုဂလူးကို တွေ့ရစဉ်
အဲဒါကြောင့် ချယ်လ်ဆီးအသင်းနဲ့ပွဲစဉ်ဟာ ရိုမဲရိုးအတွက် ၂၀၂၄ ခုနှစ်မှာ နောက်ဆုံး ပါဝင်ကစားခဲ့တဲ့ ပွဲစဉ် ဖြစ်ခဲ့ပါတယ်။
ရလဒ်တွေဆိုးနေတဲ့ စပါးအသင်းအတွက်တော့ ရိုမဲရိုးရဲ့ ဒဏ်ရာသတင်းဟာ ကြီးမားတဲ့ ထိုးနှက်ချက်ဖြစ်ခဲ့တာပါ။
စပါးအသင်းဟာ နောက်ဆုံးကစားခဲ့တဲ့ ပရီးမီးယားလိဂ် ၃ ပွဲ ဆက်တိုက် နိုင်ပွဲပျောက်ဆုံးပြီး အမှတ်ပေးဇယား အဆင့် ၁၁ နေရာအထိ ကျဆင်းသွားခဲ့ပါတယ်။
နည်းပြ ပိုစတီကိုဂလူး အတွက်လည်း စပါးအသင်း အနာဂတ် မရေမရာဖြစ်သွားခဲ့ပြီး လာမယ့်ပွဲတွေမှာ ရလဒ် ကောင်း မရယူနိုင်ရင် ထုတ်ပယ်ခံရနိုင်တယ်လို့ ဗြိတိန်မီဒီယာ အများအပြားက ဖော်ပြထားတာပါ။
ပိုစတီကိုဂလူးဟာ ပြီးခဲ့တဲ့ ရက်ပိုင်းကလည်း အသင်းရဲ့ ရလဒ်ဆိုးတွေကြောင့် စပါးအသင်း ပရိသတ်တွေနဲ့ ထိပ်တိုက် တွေ့ဆုံမှုတွေရှိခဲ့ပါတယ်။
စပါးအသင်းဟာ လာမယ့် ပွဲစဉ်တွေအဖြစ် ရိန်းဂျားစ်အသင်းနဲ့ ယူရိုပါလိဂ်၊ ဆောက်သမ်တန်အသင်းနဲ့ ပရီးမီးယားလိဂ်ပွဲစဉ် ယှဉ်ပြိုင်ရမှာဖြစ်ပြီး ရလဒ်ကောင်း ရယူနိုင်ဖို့ လိုအပ်နေတာဖြစ်ပါတယ်။
Source: Goal
- By CNI
- Category: အားကစား
- Hits: 1111
CNI Sport News
၂၀၂၄ ခုနှစ်၊ ဒီဇင်ဘာ ၁၀
မာဆေးလ်အသင်း ကွင်းလယ်လူ ရာဘီယော့က အသင်းလက်မဲ့ဖြစ်နေတဲ့ ပေါ့ဘာနဲ့ အတူတွဲ ကစားရတာကို နှစ်သက်ပြီး ပြင်သစ်ကလပ်မှာ သူ့ကိုကြိုဆိုမယ်လို့ ပြောခဲ့ပါတယ်။
ရာဘီယော့က “ကျနော် ပေါလ်နဲ့ ကစားရတာကို နှစ်သက်ပါတယ်။ ကျနော်တို့ ဂျူဗင်တပ်စ်မှာ အချိန်အတော်ကြာ အတူတူ ဖြတ်သန်းခဲ့ပေမယ့် ကွင်းထဲမှာ မျှဝေခံစားခွင့် မရခဲ့ပါဘူး။ သူ့ကို မာဆေးလ်အသင်းမှာ ကြိုဆိုပါတယ်”လို့ ပြောခဲ့တာပါ။
တားမြစ်ဆေးသုံးစွဲမှုကြောင့် ချမှတ်ခံထားရတဲ့ ပွဲပယ်ပြစ်ဒဏ်ကို လျှော့ချပေးလိုက်တဲ့အတွက် ပေါ့ဘာဟာ ၂၀၂၅ ခုနှစ်၊ မတ်လမှာ ပရော်ဖက်ရှင်နယ် ဘောလုံးပြိုင်ပွဲတွေထံ ပြန်လာခွင့်ရတော့မှာ ဖြစ်ပါတယ်။
ဒါပေမယ့် ပေါ့ဘာဟာ ပြီးခဲ့တဲ့လက ဂျူဗင်တပ်စ်အသင်းနဲ့ စာချုပ် ဖျက်သိမ်းခဲ့ပြီးနောက် အသင်းသစ် ရှာဖွေမှုတွေကို ပြုလုပ်နေတာပါ။
ပေါ့ဘာဟာ ဥရောပပြင်ပ ကလပ်အသင်းတွေရဲ့ ချိတ်ဆက်မှုတွေကို ခံနေရပြီး မေဂျာလိဂ်နဲ့ ဆော်ဒီပရိုလိဂ် အသင်းတွေက သူ့ကိုခေါ်ယူနိုင်ဖို့ ဦးဆောင်နေတာ ဖြစ်ပါတယ်။
ပေါ့ဘာနဲ့ ရာဘီယော့ကို တွေ့ရစဉ်
ဒီအချိန်မှာ ရာဘီယော့က သူ့ရဲ့အသင်းဖော်ဟောင်း ပေါ့ဘာကို မာဆေးလ်အသင်းထံ လာရောက်ကစားဖို့ ပြောခဲ့တာပါ။
ပေါ့ဘာဟာ ကမ္ဘာ့အဆင့်ရှိတဲ့ ကစားသမားဖြစ်ပေမယ့် ပွဲပယ်ပြစ်ဒဏ်ကြောင့် ဘောလုံးလောကနဲ့ ကာလရှည် ဝေးကွာနေတာ ဖြစ်ပါတယ်။
ဒါပေမယ့် ရာဘီယော့က ပေါ့ဘာအနေနဲ့ မာဆေးလ်အသင်းထံ လာရောက်ခဲ့ရင် သူ့အတွက် မှန်ကန်တဲ့ ဆုံးဖြတ်ချက် ဖြစ်နိုင်တယ်လို့ အကြံပြုထားတာပါ။
အသက် ၂၉ နှစ်အရွယ်ရှိ ရာဘီယော့ဟာ ဂျူဗင်တပ်စ်အသင်းနဲ့ စာချုပ်ကုန်ဆုံးပြီးနောက် ပြီးခဲ့တဲ့နွေရာသီက မာဆေးလ်အသင်းထံ ပြောင်းရွှေ့လာခဲ့တာဖြစ်ပါတယ်။
ရာဘီယော့ဟာ မာဆေးလ်အသင်းအတွက် ၉ ပွဲ ပါဝင်ကစားထားပြီး စိန့်အန်တီယန်အသင်းကို အနိုင်ရခဲ့တဲ့ပွဲမှာ ၁ ဂိုးသွင်းယူခဲ့တာပါ။
မာဆေးလ်အသင်းဟာ ဒီရာသီ ပြင်သစ် လီဂူး-၁ ပွဲစဉ် ၁၄ ပွဲ ကစားအပြီးမှာ ရမှတ် ၂၉ မှတ်နဲ့ အမှတ်ပေးဇယား အဆင့် ၂ နေရာမှာ ရပ်တည်နေတာ ဖြစ်ပါတယ်။
Source: besoccer
- By CNI
- Category: အားကစား
- Hits: 964
CNI Sport News
၂၀၂၄ ခုနှစ်၊ ဒီဇင်ဘာ ၁၀
ဝက်စ်ဟမ်းအသင်းက ဝုလ်ဗ်စ်အသင်းကို ၂ ဂိုး-၁ ဂိုးနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်မှာ ဝက်စ်ဟမ်းအသင်း အတွက် ဂိုးတွေသွင်းခဲ့ကြတဲ့ ဆိုချက်ခ်နဲ့ ဘိုဝင်တို့ဟာ အသင်းဖော် အန်တိုနီယိုအတွက် ရည်ညွှန်းတဲ့ အောင်ပွဲခံမှု တွေ ပြုလုပ်ခဲ့ကြပါတယ်။
အန်တိုနီယိုဟာ ပြီးခဲ့တဲ့ စနေနေ့က ထိတ်လန့်ဖွယ်ကောင်းတဲ့ ယာဉ်မတော်တဆမှုမှာ ပါဝင်ခဲ့ပြီးနောက် ခွဲစိတ်မှု ခံယူထားရတာပါ။
ဝက်စ်ဟမ်းအသင်း ကစားသမားတွေဟာ ဝုလ်ဗ်စ်အသင်းနဲ့ ပွဲမစတင်ခင် သွေးပူလေ့ကျင့်ခန်း ပြုလုပ်တဲ့အချိန်မှာ အန်တိုနီယိုရဲ့ နာမည်နဲ့ နံပါတ်ပါ အင်္ကျီတွေကို ဝတ်ဆင်ခဲ့ကြပါတယ်။
ဒီပွဲစဉ်မှာ ဝက်စ်ဟမ်းအသင်းအတွက် ပွဲချိန် ၅၄ မိနစ်မှာ အဖွင့်ဂိုးသွင်းခဲ့တဲ့ ဆိုချက်ခ်ဟာ အသင်းဖော် အန်တိုနီယို ဝတ်ဆင်တဲ့ ကျောနံပါတ် ၉ ကို ရည်ညွှန်းပြီး လက်ချောင်း ၉ ချောင်းထောင် အောင်ပွဲခံခဲ့တာပါ။
ဝက်စ်ဟမ်းအသင်းအတွက် ပွဲချိန် ၇၂ မိနစ်မှာ အနိုင်ဂိုးသွင်းခဲ့တဲ့ အသင်းခေါင်းဆောင် ဘိုဝင်ကလည်း အန်တိုနီယို ရဲ့ အင်္ကျီကို ကိုင်မြှောက်ပြီး အောင်ပွဲခံခဲ့တာ ဖြစ်ပါတယ်။
ဝက်စ်ဟမ်းအသင်း ဂိုးသွင်းနေစဉ်
ဝက်စ်ဟမ်းအသင်း ကွင်းလယ်လူ ဆိုချက်ခ်ဟာ ပွဲအပြီး အင်တာဗျူးမှာ သူသွင်းယူခဲ့တဲ့ သွင်းဂိုးက အန်တိုနီယို အတွက်လို့ ပြောခဲ့ပြီး အန်တိုနီယိုဟာ ကြီးမားတဲ့ ကစားသမားဖြစ်ကာ သူ့ရဲ့နှလုံးသားထဲမှာရှိတယ်လို့ ပြောခဲ့ တာပါ။
အန်တိုနီယိုဟာ ခွဲစိတ်မှုကြောင့် ဒီရာသီအကုန်ထိ ဝက်စ်ဟမ်းအသင်းအတွက် ပါဝင်နိုင်တော့မှာ မဟုတ်သလို ပြန်လည်ကောင်းမွန်နိုင်ဖို့အတွက် အနည်းဆုံး တစ်နှစ်ကြာအထိ အချိန်ယူရဖွယ်ရှိနေပါတယ်။
ဒီရာသီ ပရီးမီးယားလိဂ်ပြိုင်ပွဲမှာ ရလဒ်တွေဆိုးနေတဲ့ ဝက်စ်ဟမ်းအသင်းဟာ ဒီပွဲအနိုင်ရရှိခဲ့တာကြောင့် ပရီးမီးယားလိဂ် ပွဲစဉ် ၁၅ ပွဲ ကစားအပြီးမှာ ရမှတ် ၁၈ မှတ်နဲ့ အမှတ်ပေးဇယား အဆင့် ၁၄ နေရာမှာ ရပ်တည်နေ တာပါ။
ဝုလ်ဗ်စ်အသင်းကတော့ ရမှတ် ၉ မှတ်နဲ့ အဆင့် ၁၉ နေရာမှာ ရပ်တည်နေပါတယ်။ ဝက်စ်ဟမ်းအသင်းဟာ ဒီတစ်ပတ် ပရီးမီးယားလိဂ်ပွဲစဉ်အဖြစ် ဘုန်းမောက်အသင်းနဲ့ ယှဉ်ပြိုင်ရမှာဖြစ်ပါတယ်။
Source: Goal
Page 37 of 348
Connect with us
