- By CNI
- Category: အားကစား
- Hits: 364
CNI Sport News
၂၀၂၅ ခုနှစ်၊ မတ်လ ၂၆
ကမ္ဘာ့ဖလားပြိုင်ပွဲရဲ့ လက်ရှိချန်ပီယံ အာဂျင်တီးနားအသင်းဟာ ချန်ပီယံဆုကို ကာကွယ်ဖို့အတွက် ၂၀၂၆ ကမ္ဘာ့ဖလားပြိုင်ပွဲ ခြေစစ်ပွဲအောင်မြင်တဲ့ ပထမဆုံး တောင်အမေရိကအသင်း ဖြစ်လာခဲ့ပါတယ်။
အာဂျင်တီးနားအသင်းဟာ ဘရာဇီးလ်အသင်းကို ၄ ဂိုး-၁ ဂိုးနဲ့ ဂိုးပြတ် အနိုင်ရရှိခဲ့တဲ့ ခြေစစ်ပွဲမတိုင်ခင်မှာ ၂၀၂၆ ကမ္ဘာ့ဖလားပြိုင်ပွဲအတွက် ခြေစစ်ပွဲ အောင်မြင်ခဲ့တာပါ။
အာဂျင်တီးနားအသင်းဟာ ခြေစစ်ပွဲ အောင်မြင်ခဲ့ပေမယ့် အဓိကပြိုင်ဘက်ဖြစ်တဲ့ ဘရာဇီးလ်အသင်းကို ဂိုးပြတ် ခြေပြတ် အနိုင်ယူခဲ့တာ ဖြစ်ပါတယ်။
ဒီပွဲမှာ အာဂျင်တီးနားအသင်းအတွက် ဂိုးတွေကို အယ်လ်ဗာရက်ဇ်၊ အန်ဇို၊ မက်အယ်လစ္စတာနဲ့ ဆီမြွန်နီတို့က သွင်းယူခဲ့တာဖြစ်ပြီး ဘရာဇီးလ်အသင်းအတွက် ချေပဂိုးကို ကွန်ညာက သွင်းယူခဲ့တာပါ။
၂၀၂၆ ကမ္ဘာ့ဖလားပြိုင်ပွဲကို တောင်အမေရိကဇုန် ခြေစစ်ပွဲက ထိပ်ဆုံး ၆ သင်း တိုက်ရိုက် ဝင်ခွင့်ရမှာဖြစ်ပြီး အဆင့် ၇ နေရာမှာ ရပ်တည်နေတဲ့အသင်းက ပလေးအော့ဖ် ယှဉ်ပြိုင်ခွင့် ရရှိမှာဖြစ်ပါတယ်။
အာဂျင်တီးနားအသင်းကို တွေ့ရစဉ်
ဘရာဇီးလ်အသင်းဟာ အာဂျင်တီးနားအသင်းကို အရေးနိမ့်ခဲ့ပေမယ့် အဆင့် ၄ နေရာ ရပ်တည်နေပြီး အဆင့် ၇ နေရာက ဗင်နီဇွဲလားအသင်းကို ၆ မှတ် အသာရရှိနေတာကြောင့် ခြေစစ်ပွဲတိုက်ရိုက် အောင်မြင်ဖို့ အခြေအနေ ကောင်းနေတာပါ။
တောင်အမေရိကဘောလုံးအဖွဲ့ချုပ်ဥက္ကဋ္ဌ ဒိုမင်ဂွက်ဇ်က “၂၀၂၆ ကမ္ဘာ့ဖလား ခြေစစ်ပွဲ အောင်မြင်ခဲ့တဲ့အတွက် ဂုဏ်ယူပါတယ် အာဂျင်တီးနား။ ချန်ပီယံဆုကို ကာကွယ်ပြီး တောင်အမေရိကတိုက်အတွက် ဂုဏ်ယူအောင် ပြုလုပ်ပါ”လို့ သူ့ရဲ့ဆိုရှယ်မီဒီယာမှာ ရေးသားခဲ့ပါတယ်။
၂၀၂၆ ကမ္ဘာ့ဖလားခြေစစ်ပွဲ(တောင်အမေရိကဇုန်)ပွဲစဉ် ၁၄ ပွဲစီ ယှဉ်ပြိုင်အပြီးမှာ အာဂျင်တီးနားအသင်းက ရမှတ် ၃၁ မှတ်နဲ့ အဆင့် ၁၊ အီကွေဒေါအသင်းက ၂၃ မှတ်နဲ့ အဆင့် ၂ ၊ ဥရုဂွေး၊ဘရာဇီးလ်နဲ့ ပါရာဂွေးအသင်းတို့က ရမှတ် ၂၁ မှတ်စီနဲ့ အဆင့် ၃၊ ၄၊ ၅ နေရာမှာ ရပ်တည်နေပြီး ကိုလံဘီယာအသင်းက ရမှတ် ၂၀ နဲ့ အဆင့် ၆ နေရာမှာ ရပ်တည် နေတာပါ။
ဗင်နီဇွဲလား၊ ဘိုလီဗီးယား၊ ပီရူးနဲ့ ချီလီအသင်းတို့က အဆင့် ၇၊ ၈၊ ၉နဲ့ ၁၀ နေရာတွေမှာ ရပ်တည်နေတာ ဖြစ်ပါတယ်။
Source: ESPN
- By CNI
- Category: အားကစား
- Hits: 337
CNI Sport News
၂၀၂၅ ခုနှစ်၊ မတ်လ ၂၅
ဘရာဇီးလ်ကြယ်ပွင့် အန်းဒရစ်ဟာ ၂၀၂၆ ကမ္ဘာ့ဖလားပြိုင်ပွဲဝင်မယ့် နိုင်ငံအသင်း လူစာရင်းမှာ ပါဝင်ချင် တာကြောင့် ရီးရယ်လ်အသင်းကနေ ထွက်ခွာဖွယ်ရှိနေပါတယ်။
ရီးရယ်လ်အသင်းဟာ ဘတ်ပီကိုသာ ပွဲထွက်လူစာရင်းမှာ အသုံးပြုတာကြောင့် အသက် ၁၈ နှစ်အရွယ်ရှိ အန်းဒရစ်ဟာ ဒီရာသီ လာလီဂါပြိုင်ပွဲမှာ တစ်ပွဲမှ ပွဲထွက်လူစာရင်း ပါဝင်ခွင့် မရရှိသေးတာပါ။
အန်းဒရစ်ဟာ ပွဲကစားချိန် နည်းပါးမှုကြောင့် ဒီလထဲယှဉ်ပြိုင်နေတဲ့ ၂၀၂၆ ကမ္ဘာ့ဖလား ခြေစစ်ပွဲတွေအတွက် ဘရာဇီးလ်အသင်း လူစာရင်းမှာ ချန်လှပ်ခြင်းခံခဲ့ရပါတယ်။
ဒါပေမယ့် နေမာရဲ့ ဒဏ်ရာကြောင့် အန်းဒရစ်ဟာ ဘရာဇီးလ်အသင်း လူစာရင်းမှာ ပါဝင်ခွင့်ရခဲ့တာပါ။
အန်းဒရစ်ဟာ ပါလ်မီးရက်စ်အသင်းကနေ ရောက်ရှိလာပြီးကတည်းက ရီးရယ်လ်အသင်းအတွက် ၂၈ ပွဲ ကစားထားပြီး ၆ ဂိုး သွင်းယူထားပေမယ့် လူစားဝင် ကစားသမားအဖြစ်နဲ့သာ ပါဝင်နေရတာ ဖြစ်ပါတယ်။
အန်းဒရစ်ကို တွေ့ရစဉ်
အဲဒါကြောင့် အန်းဒရစ်ဟာ ဘရာဇီးလ်ဂန္ထဝင် ရိုမာရီယိုနဲ့ ပြုလုပ်ခဲ့တဲ့ အင်တာဗျူးမှာ ရီးရယ်လ်အသင်းကနေ ထွက်ခွာဖွယ်ရှိတဲ့အကြောင်း အရိပ်အမြွက်ပြောခဲ့တာပါ။
အန်းဒရစ်က “အမှန်အတိုင်း ပြောရရင် ကမ္ဘာ့ဖလားပြိုင်ပွဲမှာ ပါဝင်ခွင့် မရမှာကို ကြောက်ရွံ့မိပါတယ်။ ကမ္ဘာ့ဖလားပြိုင်ပွဲမှာ ပါဝင်ကစားခွင့်ရဖို့က ကျနော့်ရဲ့ အိပ်မက်ပါ။ ဒီပြိုင်ပွဲမှာ ပါဝင်ကစားပြီး ဘရာဇီးလ်အသင်း ကို ၆ ကြိမ်မြောက် ဆုဖလားရရှိအောင် ကူညီပေးချင်ပါတယ်။ ကမ္ဘာ့အကြီးမားဆုံးကလပ်မှာ အကြီးမားဆုံး ကစားသမားတွေနဲ့ ရှိနေရတာက ခက်ခဲပါတယ်။ ခင်ဗျားဟာ ဒီအသင်းမှာ အမြဲတမ်းကစားဖို့ အခွင့်အရေး မရနိုင်ဘူး”လို့ ပြောခဲ့ပါတယ်။
ရီးရယ်လ်အသင်းနည်းပြ အန်ဆယ်လော့တီက အသင်းရဲ့ ပွဲထွက်လူစာရင်းမှာ ပါဝင်ခွင့်ရဖို့အတွက် အန်းဒရစ် အပါအဝင် လူငယ်ကစားသမားအချို့ကို စိတ်ရှည်ဖို့ပြောထားတာပါ။
၂၀၂၃ ခုနှစ်၊ နိုဝင်ဘာမှာ ဘရာဇီးလ်အသင်းကြီးအတွက် ပွဲထွက်ခွင့်ရခဲ့တဲ့ အန်းဒရစ်ဟာ ၁၃ ပွဲ ကစားထားပြီး ၃ ဂိုး သွင်းယူထားတာဖြစ်ပါတယ်။
Source: Dailymail
- By CNI
- Category: အားကစား
- Hits: 253
CNI Sport News
၂၀၂၅ ခုနှစ်၊ မတ်လ ၂၅
ဒဏ်ရာကြောင့် ဒီရာသီမှာ ယူနိုက်တက်အသင်းအတွက် ပြန်ကစားနိုင်ဖွယ် မရှိဘူးလို့ သတင်းတွေ ထွက်ခဲ့တဲ့ တောင်ပံကစားသမား အာမတ်ဟာ ဒဏ်ရာကနေ ပြန်လာဖို့နီးစပ်နေပြီလို့ အရိပ်အမြွက် ချပြခဲ့ပါတယ်။
ဒီရာသီမှာ ယူနိုက်တက်အသင်းအတွက် ခြေစွမ်းပြသနေတဲ့ ကစားသမား အနည်းငယ်ထဲက တစ်ဦးဖြစ်တဲ့ အာမတ်ဟာ ခြေချင်းဝတ်ဒဏ်ရာကြောင့် အချိန်ကာလ တစ်ခုကြာအထိ အနားယူရမယ်လို့ ပြောထားတာပါ။
ယူနိုက်တက်အသင်းနည်းပြ အာမိုရင်က အာမတ်ဟာ ရာသီကုန်အထိ အနားယူရနိုင်တယ်လို့ မီဒီယာသမားတွေရဲ့ မေးမြန်းမှုကို ဖြေထားပေမယ့် ကစားသမားက ဒီရာသီမှာ ပြန်လည်ပါဝင်နိုင်မယ့် အရိပ်အမြွက်ကို ချပြခဲ့တာ ဖြစ်ပါတယ်။
အာမတ်ကို တွေ့ရစဉ်
အာမတ်ဟာ သူ့ရဲ့ Snapchat ပို့စ်မှာ အသေးစိတ် အချက်အလက် အများအပြားကို မဖော်ပြထားပေမယ့် သူအနားယူနေရတဲ့ အချိန်တွေ ကုန်ဆုံးတော့မယ့် အရိပ်အမြွက်ကို ချပြခဲ့တာပါ။
အာမတ်ဟာ ဒီရာသီမှာ ယူနိုက်တက်အသင်းအတွက် ပြိုင်ပွဲစုံ ၃၆ ပွဲကစားထားပြီး ၉ ဂိုးသွင်းယူကာ ဂိုးဖန်တီးမှု ၇ ကြိမ် ပြုလုပ်ထားတာ ဖြစ်ပါတယ်။
ရာသီမကုန်ခင်မှာ အာမတ်ဟာ အသင်းအတွက် ပြန်ပါဝင်ကစားနိုင်ရင် နည်းပြအာမိုရင် အနေနဲ့ လူစာရင်းအတွက် ရွေးချယ်စရာတွေ ပိုပြီးများလာမှာပါ။
ယူနိုက်တက်အသင်းဟာ နိုင်ငံတကာပွဲစဉ်တွေ မတိုင်ခင် နောက်ဆုံး ကစားခဲ့တဲ့ပွဲတွေမှာ ရလဒ်ကောင်းတွေ ရယူနိုင်ခဲ့ပေမယ့် အခုလာမယ့်ပွဲတွေမှာ ခက်ခဲတဲ့ပွဲစဉ်တွေ ယှဉ်ပြိုင်ရဖို့ရှိနေပါတယ်။
ယူနိုက်တက်အသင်းဟာ လာမယ့် ပရီးမီးယားလိဂ် ပွဲတွေအဖြစ် နော်တင်ဟမ်ဖောရက်စ်၊ မန်စီးတီး၊ ယူရိုပါလိဂ် ကွာတားဖိုင်နယ်အဖြစ် လိုင်ယွန်အသင်းနဲ့ ယှဉ်ပြိုင်ရမှာဖြစ်ပါတယ်။
Source: Metro
- By CNI
- Category: အားကစား
- Hits: 293
CNI Sport News
၂၀၂၅ ခုနှစ်၊ မတ်လ ၂၅
ချယ်လ်ဆီးအသင်းဟာ ဆန်ချိုကို ယူနိုက်တက်အသင်းထံ ပြန်ပို့ဖွယ်ရှိနေတယ်လို့ သတင်းတွေ ထွက်နေပေမယ့် အပြီးသတ်ခေါ်ယူဖို့ ဆုံးဖြတ်ထားတယ်လို့ Sky Sports က ဖော်ပြထားပါတယ်။
ဆန်ချိုဟာ ပြီးခဲ့တဲ့နွေရာသီက ယူနိုက်တက်အသင်းကနေ ချယ်လ်ဆီးအသင်းထံ ရာသီအကုန်ထိ အငှားစာချုပ်နဲ့ ပြောင်းရွှေ့ခဲ့တာပါ။
ဆန်ချိုရဲ့ အငှားစာချုပ်ထဲမှာ ချယ်လ်ဆီးအသင်းဟာ ဒီရာသီ ပရီးမီးယားလိဂ်ပြိုင်ပွဲမှာ အနိမ့်ဆုံးအဆင့် ၁၄ နေရာ နဲ့ ရာသီအဆုံးသတ်ခဲ့ရင် ပေါင်သန်း ၂၀ ကနေ ၂၅ သန်းကြားပေးပြီး အပြီးသတ် ခေါ်ယူရမယ့် အချက် ပါဝင်နေပါ တယ်။
ဒါပေမယ့် ချယ်လ်ဆီးအသင်းဟာ ဆန်ချိုကို အပြီးသတ် မခေါ်ယူဘဲ ယူနိုက်တက်အသင်းထံ ပြန်ပို့ဖွယ် ရှိနေ တယ်လို့ သတင်းတွေ ထွက်ပေါ်ခဲ့တာပါ။
ချယ်လ်ဆီးအသင်းအနေနဲ့ ဆန်ချိုကို အပြီးသတ် မခေါ်ယူခဲ့ရင် ယူနိုက်တက်အသင်းကို ပေါင် ၅ သန်း ပေးချေရ မယ်လို့ ဗြိတိန်မီဒီယာတွေက ဖော်ပြခဲ့ပါတယ်။
ဆန်ချိုဟာ ဒီရာသီအစပိုင်းမှာ ချယ်လ်ဆီးအသင်းအတွက် ခြေစွမ်းပြသနိုင်ခဲ့ပေမယ့် နောက်ပိုင်းပွဲစဉ်တွေမှာ ခြေစွမ်းပြသနိုင်ဖို့ ရုန်းကန်နေရတာပါ။
ဆန်ချိုကို တွေ့ရစဉ်
ချယ်လ်ဆီးအသင်းဟာ နွေရာသီမှာ တောင်ပံကစားသမားတွေကို ခေါ်ယူဖို့ ပြင်ဆင်နေတာကြောင့် ဆန်ချိုရဲ့ အနာဂတ်ဟာ သံသယဖြစ်စရာတွေ ရှိလာခဲ့တာ ဖြစ်ပါတယ်။
ဒါပေမယ့် ချယ်လ်ဆီးအသင်းဟာ ဆန်ချိုကို အငှားစာချုပ် ကုန်ဆုံးမယ့် နွေရာသီမှာ အပြီးသတ် ခေါ်ယူဖို့ ဆုံးဖြတ်ထားတာပါ။
ချယ်လ်ဆီးအသင်း ပရိသတ်အဖြစ် ကြီးပြင်းလာတဲ့ ဆန်ချိုဟာ လန်ဒန်ကလပ်မှာပဲ ဆက်ရှိဖို့ စိတ်အားထက်သန် နေတာ ဖြစ်ပါတယ်။
၂၀၂၁ ခုနှစ်က ဒေါ့မွန်အသင်းကနေ ပေါင်သန်း ၇၀ ကျော်နဲ့ ရောက်ရှိလာခဲ့တဲ့ ဆန်ချိုဟာ ယူနိုက်တက်အသင်းမှာ ကစားခဲ့တဲ့ ၃ ရာသီအတွင်း ခြေစွမ်းပြသနိုင်ဖို့ ရုန်းကန်ခဲ့ရသလို နည်းပြဟောင်း အဲရစ်တန်ဟတ်နဲ့လည်း အဆင်မပြေမှုတွေရှိခဲ့တာပါ။
အဲဒါကြောင့် ဆန်ချိုဟာ ပြီးခဲ့တဲ့ရာသီရဲ့ ဒုတိယရာသီဝက်မှာ အသင်းဟောင်း ဒေါ့မွန်အသင်းထံ အငှားသွား ကစားခဲ့ရပါတယ်။
ယူနိုက်တက်အသင်းကတော့ ဒီရာသီမှာ ချယ်လ်ဆီးအသင်းအတွက် ၂၈ ပွဲ ကစားထားအပြီးမှာ ၂ ဂိုးသွင်းယူကာ ဂိုးဖန်တီးမှု ၆ ကြိမ် ပြုလုပ်ထားတဲ့ ဆန်ချိုကို အပြီးသတ်ရောင်းချဖို့ ဆုံးဖြတ်ထားတာ ဖြစ်ပါတယ်။
Source: Metro
- By CNI
- Category: အားကစား
- Hits: 276
CNI Sport News
၂၀၂၅ ခုနှစ်၊ မတ်လ ၂၅
အင်္ဂလန်အသင်းဟာ လတ်ဗီးယားအသင်းနဲ့ ၂၀၂၆ ကမ္ဘာ့ဖလားခြေစစ်ပွဲမှာ ၃ ဂိုး-ဂိုးမရှိနဲ့ အနိုင်ရရှိခဲ့ပေမယ့် ဒုတိယပိုင်းအစမှာ အနည်းငယ် ရုန်းကန်ခဲ့ရတယ်လို့ နည်းပြတူချယ်လ်က ဝန်ခံခဲ့ပါတယ်။
တူချယ်လ်က “လွယ်ကူတဲ့ပွဲတော့ မဟုတ်ပါဘူး။ ကောင်းတဲ့အရာတွေ အများကြီးတွေ့ခဲ့ရသလို အခွင့်အရေး ကောင်းတွေလည်း ဖန်တီးနိုင်ခဲ့ပါတယ်။ သွင်းဂိုးရရှိဖို့အတွက် ဖရီးကစ် ကန်ချက် လိုအပ်ခဲ့ပါတယ်။ စိတ်နေ စိတ်ထား၊ စွမ်းအင်၊ ဆန္ဒတွေနဲ့အတူ ကျနော်ပျော်ရွှင်ပါတယ်။ ဒုတိယပိုင်းမှာ ကျနော်တို့ရဲ့ စတင်မှုက နှေးကွေးခဲ့ ပြီး လှုပ်ရှားမှုတွေလည်း အနည်းငယ်ပဲ ပြုလုပ်ခဲ့တာက အဓိပ္ပါယ်မရှိပါဘူး။ ဒုတိယဂိုး ရယူနိုင်ခဲ့တာက ကောင်းမွန် ခဲ့ပါတယ်။ ကျနော်တို့ဟာ ဂိုးမသွင်းနိုင်ခင် အချိန်အထိ အနည်းငယ်ရုန်းကန်ခဲ့ရပါတယ်”ပြောခဲ့တာပါ။
လတ်ဗီးယားအသင်းနဲ့ပွဲစဉ်မှာ အင်္ဂလန်အသင်းအတွက် ဂိုးတွေကို ရီစီဂျိမ်းစ်၊ ဟာရီကိန်းနဲ့ အီဇီတို့က သွင်းယူခဲ့ ကြတာ ဖြစ်ပါတယ်။
အင်္ဂလန်အသင်းဟာ နည်းပြသစ် တူချယ်လ် လက်ထက် ကစားခဲ့တဲ့ ၂ ပွဲစလုံး ပေးဂိုးမပေးရဘဲ ရာနှုန်းပြည့်နိုင်ပွဲ ရယူထားနိုင်တာပါ။
အင်္ဂလန်အသင်းကို တွေ့ရစဉ်
အင်္ဂလန်အသင်းဟာ ဒီပွဲမှာ ဘောလုံးပိုင်ဆိုင်မှု ၇၄ ရာခိုင်နှုန်း၊ ဂိုးပေါက်ကန်သွင်းမှု ၂၇ ကြိမ်နဲ့ ဂိုးပေါက်တည့်မှု ၈ ကြိမ် ရှိခဲ့ပေမယ့် ဒုတိယပိုင်းအစမှာ ကစားခဲ့တဲ့ပုံစံကို နည်းပြတူချယ်လ်က အဓိပ္ပါယ်မရှိဘူးလို့ ပြောခဲ့ပါတယ်။
လတ်ဗီးယားအသင်းနဲ့ပွဲစဉ်မှာ ဖရီးကစ် ကန်ချက်ကနေ လှပတဲ့ ဂိုးသွင်းယူခဲ့တဲ့ ရီစီဂျိမ်းစ်ဟာ ၂၀၂၂ ခုနှစ်၊ စက်တင်ဘာလ နောက်ပိုင်း ပထမဆုံးအကြိမ်အဖြစ် အင်္ဂလန်အသင်းရဲ့ ပွဲထွက်လူစာရင်းထဲ ပါဝင်ခဲ့တာပါ။
ရီစီဂျိမ်းစ်နဲ့ ချယ်လ်ဆီးအသင်းမှာ အတူလက်တွဲခဲ့ဖူးတဲ့ နည်းပြတူချယ်လ်က သူ့ရဲ့အရည်အသွေးကို သိပြီး သူဟာ ဒဏ်ရာကြောင့် ပွဲအများအပြား မကစားထားပေမယ့် ကောင်းမွန်တဲ့ပုံစံရှိတယ်လို့ ပြောခဲ့ပါတယ်။
ဒါအပြင် နည်းပြတူချယ်လ်က ကွင်းလယ်လူ ဘယ်လင်ဂမ်ကို လူစားလဲခဲ့တာက အနီကတ်ထိမှာကို ရှောင်ချင်တဲ့ အတွက် ဖြစ်တယ်လို့ ပြောခဲ့တာပါ။
အင်္ဂလန်အသင်းဟာ နောက်ထပ် ၂၀၂၆ ကမ္ဘာ့ဖလား ခြေစစ်ပွဲအဖြစ် အန်ဒိုရာအသင်းနဲ့ ဇွန်လ ၇ ရက်မှာ ယှဉ်ပြိုင် သွားမှာဖြစ်ပါတယ်။
Source: Goal
- By CNI
- Category: အားကစား
- Hits: 279
CNI Sport News
၂၀၂၅ ခုနှစ်၊ မတ်လ ၂၄
ယူနိုက်တက်အသင်းဟာ ဒီရာသီမှာ လက်စွမ်းပိုင်း တည်ငြိမ်မှုမရှိတဲ့ ဂိုးသမား အိုနာနာကို လာမယ့်နွေရာသီ အပြောင်းအရွှေ့မှာ ရောင်းချဖို့ စီစဉ်နေတယ်လို့ ဗြိတိန်မီဒီယာတွေက ဖော်ပြထားပါတယ်။
ယူနိုက်တက်အသင်းဟာ နွေရာသီမှာ ကစားသမား အများအပြားကို ရောင်းချဖို့ စီစဉ်နေပြီး ဒီအထဲမှာ ကင်မရွန်း ဂိုးသမား အိုနာနာလည်း ပါဝင်လာခဲ့တာပါ။
၂၀၂၃ ခုနှစ် နွေရာသီက အင်တာမီလန်အသင်းကနေ ရောက်ရှိလာခဲ့တဲ့ အိုနာနာဟာ အသင်းဖော်တွေနဲ့ ချိတ်ဆက် ကစားတာမှာ ကောင်းမွန်တဲ့ ဂိုးသမားတွေထဲက တစ်ဦးအဖြစ် သတ်မှတ်ခြင်း ခံထားရတာ ဖြစ်ပါတယ်။
ဒါပေမယ့် အိုနာနာဟာ ယူနိုက်တက်အသင်းမှာ လက်စွမ်းပိုင်း မတည်ငြိမ်မှုတွေနဲ့အတူ ဝေဖန်မှု အများအပြား ခံခဲ့ရတာပါ။
အိုနာနာကို တွေ့ရစဉ်
အိုနာနာကို ခေါ်ယူဖို့ ဆော်ဒီပရိုလိဂ် ကလပ်အသင်းတွေက စိတ်ဝင်စားနေပြီး နည်းပြအာမိုရင်က သူ့အတွက် ကမ်းလှမ်းမှုတွေ ရောက်ရှိလာခဲ့ရင် ထွက်ခွာခွင့်ပေးဖို့ အဆင်သင့် ဖြစ်နေတယ်လို့ သိရပါတယ်။
ယူနိုက်တက်အသင်းဟာ အိုနာနာ ထွက်ခွာခဲ့ရင် သူ့ရဲ့နေရာမှာ အစားထိုးဖို့အတွက် အန့်ဝါတ့်အသင်းက လန်မန်းစ်နဲ့ လိုင်လီအသင်းက ချီဗာလီရာကို ပစ်မှတ်ထားနေတာပါ။
ယူနိုက်တက်အသင်းဟာ အိုနာနာကို ရောင်းချဖို့ စီစဉ်နေပေမယ့် သူကတော့ အသင်းမှာပဲ ဆက်ရှိချင်နေတယ်လို့ သိရပါတယ်။
အိုနာနာနဲ့ ယူနိုက်တက်အသင်းတို့ ချုပ်ဆိုထားတဲ့ စာချုပ်ဟာ ၂၀၂၈ ခုနှစ်၊ ဇွန်လအထိ သက်တမ်းရှိနေတာပါ။
ယူနိုတက်အသင်းဟာ အငှားချထားတဲ့ ရက်ရှ်ဖို့ဒ်၊ အန်တိုနီနဲ့ မာလာစီယာတို့ကို နွေရာသီမှာ ရောင်းချသွားဖို့ ရှိနေသလို စာချုပ်ကုန်ဆုံးမယ့် အဲရစ်ဆန်နဲ့ လင်ဒီလော့ဖ်တို့ကို ထွက်ခွာခွင့်ပေးသွားမှာ ဖြစ်ပါတယ်။
ယူနိုက်တက်အသင်းဟာ ဒီရာသီမှာ ရလဒ်ကောင်းတွေ ရရှိဖို့ ရုန်းကန်နေရပြီး ပရီးမီးယားလိဂ် အမှတ်ပေး ဇယားအဆင့် ၁၃ နေရာမှာ ရပ်တည်နေတာပါ။
မန်ချက်စတာကလပ်ဟာ နိုင်ငံတကာ ပွဲစဉ်တွေအပြီးမှာ ပရီးမီးယားလိဂ် ပွဲစဉ်အဖြစ် နော်တင်ဟမ်ဖောရက်စ် အသင်းနဲ့ ယှဉ်ပြိုင်ရမှာဖြစ်ပါတယ်။
Source: Metro
- By CNI
- Category: အားကစား
- Hits: 236
CNI Sport News
၂၀၂၅ ခုနှစ်၊ မတ်လ ၂၄
အမေရိကန်အသင်းဟာ ကွန်ကာကပ်ဖ် နေးရှင်းလိဂ်ပြိုင်ပွဲမှာ ၂ ပွဲဆက်တိုက် ရှုံးပွဲကြုံတွေ့ခဲ့ရပေမယ့် အသင်း အနေနဲ့ ၂၀၂၆ ကမ္ဘာ့ဖလားပြိုင်ပွဲ မတိုင်ခင်မှာ ဒီပြဿနာတွေကို ဖြေရှင်းဖို့ အချိန်အလုံအလောက်ရှိတယ်လို့ နည်းပြပိုချက်တီနိုက ပြောခဲ့ပါတယ်။
ပိုချက်တီနိုက “နေးရှင်းလိဂ် ရလဒ်တွေအတွက် ကျနော်တို့အားလုံးမှာ တာဝန်ရှိပါတယ်။ ကျနော်တို့မှာ အချိန် ရှိတယ်လို့ ထင်တဲ့အတွက် အခုရှုံးနိမ့်တာက ပိုကောင်းပါတယ်။ ဘာလို့လဲဆိုရင် တစ်နှစ်အတွင်း ဒီလို အခြေအနေ မျိုးမှာ ရှိနေမယ်ဆိုရင် သေချာပါတယ်။ ကျနော် ခင်ဗျားတို့ကို ပြောမှာပါ။ ဟောက်စတန် ငါတို့မှာ ပြဿနာတွေ ရှိနေတယ်ဆိုပြီး”လို့ ပြောခဲ့တာပါ။
အမေရိကန်အသင်းဟာ ကွန်ကာကပ်ဖ် နေးရှင်းလိဂ်ပြိုင်ပွဲကို စတင်ကျင်းပခဲ့တဲ့ ၃ ကြိမ်စလုံးမှာ ချန်ပီယံဆု ရယူနိုင်ခဲ့တာ ဖြစ်ပါတယ်။
အမေရိကန်အသင်းဟာ အခုတစ်ကြိမ်ပြိုင်ပွဲမှာ ချန်ပီယံဆုကို ၄ ကြိမ် ဆက်တိုက် ရယူနိုင်ဖို့ ရည်မှန်းခဲ့ပေမယ့် ဆီမီးဖိုင်နယ်မှာ ပနားမားအသင်းကို ၁ ဂိုး-ဂိုးမရှိ၊ တတိယနေရာလုပွဲမှာ ကနေဒါအသင်းကို ၂ ဂိုး-၁ ဂိုးနဲ့ အရေး နိမ့်ခဲ့တာပါ။
ပိုချက်တီနိုကို တွေ့ရစဉ်
အဲဒါကြောင့် အမေရိကန်အသင်းဟာ ၂၀၂၄-၂၅ ကွန်ကာကပ်ဖ် နေးရှင်းလိဂ်ပြိုင်ပွဲမှာ စတုတ္ထနေရာသာ ရရှိခဲ့တာ ဖြစ်ပါတယ်။
အမေရိကန်အသင်းနည်းပြ ပိုချက်တီနိုက ဒီရလဒ်အတွက် ပရိသတ်တွေ အပါအဝင် အားလုံးစိတ်ပျက် နေကြပေမယ့် ရလဒ်ကောင်းတွေ ရရှိအောင် လုပ်ဆောင်ဖို့ အချိန်ရှိတယ်လို့ ယုံကြည်နေတာပါ။
အမေရိကန်ဟာ ၂၀၂၆ ကမ္ဘာ့ဖလားပြိုင်ပွဲကို ပူးတွဲအိမ်ရှင်အဖြစ် ကျင်းပမှာဖြစ်လို့ ဒီပြိုင်ပွဲမှာ နိုင်ငံအသင်း အောင်မြင်မှု ရယူနိုင်ဖို့ မျှော်လင့်နေတာ ဖြစ်ပါတယ်။
အမေရိကန်အသင်းဟာ ကမ္ဘာ့ဖလားပြိုင်ပွဲ မတိုင်ခင်မှာ ကွန်ကာကပ်ဖ် ရွှေဖလားပြိုင်ပွဲ ယှဉ်ပြိုင်ဖို့ရှိနေပြီး ဒီပြိုင်ပွဲမှာ အောင်မြင်မှုရယူနိုင်ဖို့ ပစ်မှတ်ထားနေတာပါ။
အမေရိကန်အသင်းဟာ ကွန်ကာကပ်ဖ် ရွှေဖလားပြိုင်ပွဲ မတိုင်ခင် ခြေစမ်းပွဲတွေအဖြစ် ဇွန်လထဲမှာ တူရကီ၊ ဆွစ်ဇာလန်အသင်းတို့နဲ့ ယှဉ်ပြိုင်မှာဖြစ်ပါတယ်။
Source: ESPN
- By CNI
- Category: အားကစား
- Hits: 289
CNI Sport News
၂၀၂၅ ခုနှစ်၊ မတ်လ ၂၄
ဂျူဗင်တပ်စ်အသင်းဟာ ရလဒ်ဆိုးတွေကြောင့် အသင်းကို ကိုင်တွယ်တာ ၉ လကြာသာရှိသေးတဲ့ နည်းပြ သီယာဂိုမော့တာကို ရာထူးကနေ ထုတ်ပယ်ပြီး အီဂေါတူဒေါကို နည်းပြသစ်အဖြစ် ခန့်အပ်ခဲ့ပါတယ်။
ဂျူဗင်တပ်စ်အသင်းဟာ နောက်ဆုံးကစားခဲ့တဲ့ စီးရီးအေပွဲစဉ်တွေမှာ ဖီအိုရင်တီးနားအသင်းကို ၃ ဂိုး-ဂိုး မရှိ၊ အတ္တလန်တာအသင်းကို ၄ ဂိုး-ဂိုးမရှိတွေနဲ့ ဂိုးပြတ်အရေးနိမ့်ခဲ့တာပါ။
ဂျူဗင်တပ်စ်အသင်းဟာ ဒီရလဒ်ဆိုးတွေကြောင့် စီးရီးအေ အမှတ်ပေးဇယားအဆင့် ၄ နေရာက ဘိုလော့ဂ်နာ အသင်းနဲ့ ၁ မှတ်အကွာ အဆင့် ၅ နေရာကို ရောက်ရှိသွားခဲ့ပါတယ်။
ဂျူဗင်တပ်စ်အသင်းဟာ ဒီရာသီ ချန်ပီယံလိဂ်နဲ့ ကိုပါအီတာလီယာဖလား ပြိုင်ပွဲတွေကနေလည်း ထွက်ခွာ ထားရတာပါ။
အဲဒါကြောင့် ဂျူဗင်တပ်စ်အသင်းဟာ ပြီးခဲ့တဲ့နွေရာသီကမှ နည်းပြသစ်အဖြစ် ခန့်အပ်ခဲ့တဲ့ သီယာဂိုမော့တာကို ရာထူးကနေ ထုတ်ပယ်ပြီး သူတို့ရဲ့ကစားသမားဟောင်းဖြစ်တဲ့ အီဂေါတူဒေါကို နည်းပြသစ်အဖြစ် ခန့်အပ်ခဲ့ ပါတယ်။
ဂျူဗင်တပ်စ်အသင်းကို တွေ့ရစဉ်
အီဂေါတူဒေါဟာ ဂျူဗင်တပ်စ်အသင်းမှာ ၁၉၉၈ ကနေ ၂၀၀၇ ခုနှစ်အထိ ကစားခဲ့ပြီး စီးရီးအေ ချန်ပီယံဆု ၂ ကြိမ် ရယူနိုင်ခဲ့တာပါ။
ခရိုအေးရှား ကစားသမားဟောင်းဟာ ဂျူဗင်တပ်စ်အသင်းကို နည်းပြပီယာလို ကိုင်တွယ်ချိန်က လက်ထောက် နည်းပြ အဖြစ်လည်း ဆောင်ရွက်ခဲ့ပါတယ်။
အီဂေါတူဒေါဟာ သူ့ရဲ့နည်းပြဘဝမှာ ဂါလာတာစာရေး၊ အူဒီနီးစ်၊ မာဆေးလ်နဲ့ လာဇီယိုအသင်းတွေကို ကိုင်တွယ် ခဲ့ပါတယ်။
အီဂေါတူဒေါဟာ ဂျူဗင်တပ်စ်အသင်းကို လာမယ့်ရာသီ ချန်ပီယံလိဂ် ဝင်ခွင့်ရရှိအောင် ကိုင်တွယ်ပေးရတော့မှာပါ။
ဂျူဗင်တပ်စ်အသင်းဟာ လာမယ့် စီးရီးအေပွဲစဉ်အဖြစ် ဂျီနိုအာအသင်းနဲ့ ယှဉ်ပြိုင်ရမှာဖြစ်ပြီး ရှုံးပွဲဆက်နေမှုကို ရပ်တန့်နိုင်ဖို့ မျှော်လင့်နေတာ ဖြစ်ပါတယ်။
Source: ESPN
- By CNI
- Category: အားကစား
- Hits: 273
CNI Sport News
၂၀၂၅ ခုနှစ်၊ မတ်လ ၂၄
ပေါ်တူဂီအသင်းခေါင်းဆောင် ရော်နယ်ဒိုဟာ အမျိုးသားနိုင်ငံတကာ ဘောလုံးလောကမှာ နိုင်ပွဲအများဆုံး ကစားသမားအဖြစ် ဂင်းနစ် ကမ္ဘာ့စံချိန်တင် မှတ်တမ်းကို ရရှိခဲ့ပါတယ်။
ရော်နယ်ဒိုဟာ ပေါ်တူဂီအသင်းက ဒိန်းမတ်အသင်းကို ၅ ဂိုး-၂ ဂိုးနဲ့ အချိန်ပိုမှာ အနိုင်ရရှိခဲ့တဲ့ ကွာတားဖိုင်နယ် ဒုတိယအကျော့ပွဲစဉ် မတိုင်ခင်မှာ ဒီဂုဏ်ပြု မှတ်တမ်းကို လက်ခံရရှိခဲ့တာပါ။
ဘောလွန်းဒီအောဆုကို ၅ ကြိမ် ရရှိထားတဲ့ ရော်နယ်ဒိုဟာ ရီးရယ်လ်အသင်းဖော်ဟောင်း ရာမို့စ်ရဲ့ စံချိန်ကို ကျော်ဖြတ်ပြီး နိုင်ငံတကာဘောလုံးပွဲတွေမှာ နိုင်ပွဲ ၁၃၂ ပွဲနဲ့ နိုင်ပွဲ အများဆုံး ကစားသမားအဖြစ် စံချိန်သစ် တင်နိုင်ခဲ့တာ ဖြစ်ပါတယ်။
အသက် ၄၀ နှစ်အရွယ်ရှိ ရော်နယ်ဒိုဟာ အမျိုးသားနိုင်ငံတကာ ဘောလုံးလောကမှာ ဂိုးသွင်းအများဆုံး ကစားသမားအဖြစ်လည်း ဂင်းနစ် ကမ္ဘာ့စံချိန်တင်ထားတာပါ။
ရော်နယ်ဒိုဟာ ဒိန်းမတ်အသင်းနဲ့ပွဲစဉ်ရဲ့ ပွဲချိန် ၆ မိနစ်မှာရရှိတဲ့ ပင်နယ်တီကို ဂိုးဝင်အောင် မကန်သွင်းနိုင်ခဲ့ ပေမယ့် ဒုတိယပိုင်းပွဲချိန် ၇၂ မိနစ်မှာ ပေါ်တူဂီအသင်းအတွက် ဂိုးသွင်းယူနိုင်ခဲ့ပါတယ်။
ရော်နယ်ဒိုကို တွေ့ရစဉ်
ရော်နယ်ဒိုဟာ ဒီသွင်းဂိုးကြောင့် ၂၂ နှစ်ဆက်တိုက် နိုင်ငံတကာသွင်ဂိုးကို ရယူနိုင်ခဲ့တာပါ။
ရော်နယ်ဒိုဟာ လက်ရှိအချိန်မှာ ပေါ်တူဂီအသင်းအတွက် ၂၁၉ ပွဲ ပါဝင်ကစားထားပြီး ၁၃၆ ဂိုး သွင်းယူထားတာ ဖြစ်ပါတယ်။
ပေါ်တူဂီအသင်းဟာ ဒိန်းမတ်အသင်းကို ပထမအကျော့ပွဲစဉ်မှာ ၁ ဂိုး-ဂိုးမရှိနဲ့ အရေးနိမ့်ခဲ့ပေမယ့် ဒုတိယအကျော့ မှာ ၃ ဂိုး-၂ ဂိုးနဲ့အနိုင်ရရှိခဲ့တာပါ။
အဲဒါကြောင့် နှစ်ကျော့ပေါင်းရလဒ် ၃ ဂိုးစီ သရေကျနေခဲ့လို့ အချိန်ပို ဆက်ကစားခဲ့တာမှာ ပေါ်တူဂီအသင်းက အနိုင်ဂိုး ၂ ဂိုးရရှိပြီး ဆီမီးဖိုင်နယ်ကို တက်နိုင်ခဲ့ပါတယ်။
ပေါ်တူဂီအသင်းဟာ ဆီမီးဖိုင်နယ်မှာ ဂျာမနီအသင်းနဲ့ ယှဉ်ပြိုင်ရမှာဖြစ်ပြီး နောက်ထပ် ဆီမီးဖိုင်နယ်ပွဲစဉ်အဖြစ် ပြင်သစ်နဲ့ စပိန်အသင်းတို့ ယှဉ်ပြိုင်ရမှာဖြစ်ကာ ဒီပွဲတွေကို ဇွန်လထဲ ကျင်းပသွားမှာဖြစ်ပါတယ်။
Source: Goal
- By CNI
- Category: အားကစား
- Hits: 275
CNI Sport News
၂၀၂၅ ခုနှစ်၊ မတ်လ ၂၂
ဘရာဇီးလ်ကြယ်ပွင့် ရာဖင်ညာက သူဟာ ဘာစီလိုနာအသင်းကနေ ထွက်ခွာလုနီးပါး ဖြစ်ခဲ့ပေမယ့် နည်းပြ ဟန်ဆီဖလစ်ကြောင့် သူ့ရဲ့စိတ်ပြောင်းလဲ သွားခဲ့တယ်လို့ ပြောခဲ့ပါတယ်။
ရာဖင်ညာက “ကိုပါအမေရိကဖလား အပြီးမှာ ဘာစီလိုနာကနေ ထွက်ခွာဖို့ ကျနော် စဉ်းစားခဲ့ပါတယ်။ နည်းပြ ဟန်ဆီဖလစ်က ကျနော့်ကို မခေါ်ဆိုခင်ချိန်အထိ စိတ်ပိုင်းဆိုင်ရာ အဆင်မပြေခဲ့ပါဘူး။ နေ့တိုင်း အပြောင်းအရွှေ့ သတင်းတွေ ထွက်နေခဲ့ပါတယ်။ ကျနော့်ကို ထွက်ခွာဖို့ တောင်းဆိုနေတဲ့ သူတွေလဲ တွေ့ခဲ့ရလို့ ထွက်ခွာဖို့ကို အလေးအနက် စဉ်းစားခဲ့ပါတယ်။ နည်းပြဟန်ဆီဖလစ်နဲ့ စကားပြောပြီးချိန်မှာ ဆက်နေဖို့ ဆုံးဖြတ်ခဲ့ပြီး ဒါက အချိုးအကွေ့ဖြစ်ခဲ့တာပါ”လို့ ပြောခဲ့တာပါ။
ရာဖင်ညာရဲ့ ဘာစီလိုနာအသင်း ကစားသမားဘဝ အစပိုင်းဟာ ရုန်းကန်ခဲ့ရပြီး မျှော်လင့်ထားသလို ဖြစ်မလာခဲ့ ပါဘူး။
ဘာစီလိုနာအသင်းဟာ ဘီလ်ဘာအိုအသင်း တောင်ပံကစားသမား နီကိုဝီလီယံစ်ကို ခေါ်ယူဖို့ ကြိုးပမ်းနေခဲ့ပြီး ဒီအပြောင်းအရွှေ့ ဖြစ်ဖို့အတွက် ရာဖင်ညာကို ရောင်းချမယ်လို့ သတင်းတွေ ထွက်ပေါ်ခဲ့တာပါ။
ရာဖင်ညာကို တွေ့ရစဉ်
အပြောင်းအရွှေ့ ထင်ကြေးတွေနဲ့ ဝေဖန်မှုတွေက ရာဖင်ညာရဲ့ ဘာစီလိုနာအသင်း ကစားသမားဘဝ အနာဂတ်ကို မေးခွန်းထုတ်စရာ ဖြစ်ခဲ့ရပါတယ်။
အဲဒါကြောင့် ရာဖင်ညာဟာ အရေးကြီးတဲ့ ဆုံးဖြတ်ချက်ကို မချမှတ်ခင်မှာ နည်းပြဟန်ဆီဖလစ်နဲ့ စကားပြောဆိုမှု တွေ ပြုလုပ်ခဲ့တာပါ။
ရာဖင်ညာဟာ နည်းပြနဲ့ တွေ့ဆုံပြီးနောက်မှာ သူ့ရဲ့တန်ဖိုးကို သက်သေပြတဲ့ အနေနဲ့ ဆက်နေပြီး စိန်ခေါ်မှုပြု လုပ်ဖို့ ဆုံးဖြတ်ခဲ့တာဖြစ်ပါတယ်။
အခုအချိန်မှာတော့ ရာဖင်ညာဟာ အကောင်းဆုံး စွမ်းဆောင်ရည်တွေ ပြသနေပြီး ဘာစီလိုနာအသင်းအတွက် ဒီရာသီ ကစားထားတဲ့ ၄၂ ပွဲမှာ ၂၇ ဂိုးသွင်းပြီး ဂိုးဖန်တီးမှုအကြိမ် ၂၀ အထိပြုလုပ်ထားခဲ့တာပါ။
ရာဖင်ညာဟာ လက်ရှိပြသနေတဲ့ စွမ်းဆောင်ရည်တွေကြောင့် ၂၀၂၅ ခုနှစ်အတွက် ဘောလွန်းဒီအောဆု ရယူနိုင်မယ့် စာရင်းထဲမှာ ထိပ်ဆုံးနေရာ ရပ်တည်နေတာ ဖြစ်ပါတယ်။
Source: Goal
Page 32 of 375
Connect with us
