CNI Sport News

၂၀၂၄ ခုနှစ်၊ ဩဂုတ် ၁၆

ဒေါ့မွန်အသင်းကွင်းလယ်တိုက်စစ်ကစားသမားဟောင်း မာကိုရူးစ်ဟာ မေဂျာလိဂ်ကလပ် LA ဂလက်ဇီအသင်းနဲ့ စာချုပ်ချုပ်ဆိုခဲ့ပြီးနောက် အသင်းကို မေဂျာလိဂ်ဖလားရယူပေးနိုင်ဖို့ ရည်မှန်းထားတယ်လို့ ပြောခဲ့ပါတယ်။ 

မာကိုရူးစ်က “ကျနော်ဟာ ဘောလုံးကစားချင်ပြီး ကလပ်အသင်းသစ်မှာ အတွေ့အကြုံအသစ်တွေနဲ့ ပျော်ပျော် ရွှင်ရွှင်ဖြစ်ချင်ခဲ့တာပါ။ 

မေဂျာလိဂ်ဖလားကို LA ဂလက်ဇီအသင်းမရယူနိုင်ခဲ့တာက ၁၀ နှစ်ကြာရှိပြီဖြစ်ပါတယ်။ ဒီနှစ်မှာတော့ ကျနော်တို့ချန်ပီယံဆုပြန်ပြီးရယူနိုင်ဖို့ အခွင့်အရေးကောင်းတွေရှိတယ်လို့ထင်ပါတယ်။ 

အဲဒါ ကြောင့်လည်း ကျနော်ဒီကိုရောက်ရှိနေတာပါ”လို့ စာချုပ်ချုပ်အပြီးမှာ ပြောခဲ့တာပါ။

အသက် ၃၅ နှစ်အရွယ်ရှိ မာကိုရူးစ်ဟာ ပြီးခဲ့တဲ့ရာသီအကုန်မှာ ၁၂ နှစ်ကြာကစားခဲ့တဲ့ ဒေါ့မွန်အသင်းကနေ ထွက်ခွာခဲ့တာဖြစ်ပါတယ်။ 

မာကိုရူးစ်ဟာ ကလပ်အသင်းအချို့နဲ့ သတင်းတွေထွက်ခဲ့ပေမယ့် နောက်ဆုံးမှာ LA ဂလက်ဇီအသင်းနဲ့ ၂ နှစ်ခွဲစာချုပ်ချုပ်ဆိုခဲ့တာပါ။ 

မာကိုရူးစ်ဟာ LA ဂလက်ဇီအသင်းရဲ့ နာမည်ကြီး ကစားသမား ဟောင်းတွေဖြစ်တဲ့ ဒေးဗစ်ဘက်ခမ်း၊စတီဗင်ဂျရတ်နဲ့ အီဘရာဟီမိုဗစ်တို့ရဲ့ ခြေရာအတိုင်းလိုက်နင်းနိုင်ဖို့ မျှော်လင့် နေတာဖြစ်ပါတယ်။ 

LA ဂလက်ဇီအသင်းဟာ မေဂျာလိဂ်ပြိုင်ပွဲသမိုင်းမှာ အအောင်မြင်ဆုံးအသင်းဖြစ်ပေမယ့် ရော်ဘီကိန်းတို့ပါဝင်တဲ့ အသင်းက ၂၀၁၄ ခုနှစ် ပြိုင်ပွဲမှာ ချန်ပီယံဆုရယူပေးခဲ့ပြီးနောက်ပိုင်း ဆုဖလားနဲ့ ဝေးကွာခဲ့တာပါ။ 

LA ဂလက်ဇီ အသင်းရဲ့ မြို့ခံပြိုင်ဘက်ဖြစ်တဲ့ LAFC အသင်းဟာ နောက်ပိုင်းနှစ်တွေမှာ အောင်မြင်မှုတွေရယူနိုင်ခဲ့ပြီး ဒီရာသီ LAFC အသင်းမှာ ဟူဂိုလိုရစ်နဲ့ ဂီရောဒ့်တို့ ပါဝင်ကစားနေတာ ဖြစ်ပါတယ်။ 

လိဂ်ဖလားပြိုင်ပွဲယှဉ်ပြိုင်နေလို့ ရပ်ထားတဲ့ မေဂျာလိဂ်ပြိုင်ပွဲကို ဒီလအကုန်ပိုင်းမှာ ပြန်လည်စတင်မှာဖြစ်ပြီး LA ဂလက်ဇီအသင်းဟာ အနောက်ပိုင်းဇုန်အမှတ်ပေးဇယားရဲ့ ထိပ်ဆုံးနေရာမှာ ရပ်တည်နေတာပါ။ 

LA ဂလက်ဇီ အသင်းဟာ LAFC အသင်းကို ၂ မှတ်အသာနဲ့ အမှတ်ပေးဇယားကို ဦးဆောင်ထားပေမယ့် LAFC အသင်းက ပွဲကျန် ၂ ပွဲကစားဖို့ကျန်ရှိနေတာဖြစ်ပါတယ်။

ဒါပေမယ့် မာကိုရူးစ်က ဒီရာသီမှာ LA ဂလက်ဇီအသင်းနဲ့ မေဂျာလိဂ် ဖလား ရယူနိုင်ဖို့ ပစ်မှတ်ထားနေတာပါ။

LA ဂလက်ဇီအသင်းဟာ သြဂုတ် ၂၄ ရက်မှာ မေဂျာလိဂ်ပွဲစဉ်အဖြစ် အက်လန်တာအသင်းနဲ့ ယှဉ်ပြိုင်ရမှာဖြစ်ပြီး ဒီပွဲမှာ မာကိုရူးစ်ဟာ LA ဂလက်ဇီအသင်းကစားသမားဘ၀ ပွဲဦးထွက်အဖြစ် ပါဝင်လာဖွယ်ရှိနေတာ ဖြစ်ပါတယ်။

Source:BBC

CNI Sport News

၂၀၂၄ ခုနှစ်၊ သြဂုတ် ၁၆

အေဂျက်စ်အသင်းက ပါနာသီနိုင်ကို့စ်အသင်းကို အနိုင်ရခဲ့တဲ့ ယူရိုပါလိဂ် တတိယအဆင့် ခြေစစ်ပွဲစဉ်ရဲ့ ပင်နယ်တီ အဆုံးအဖြတ်မှာ နှစ်သင်းပေါင်း ပင်နယ်တီ ၃၄ လုံး ကန်သွင်းပြီး UEFA ပြိုင်ပွဲသမိုင်းမှာ စံချိန်သစ်တင် နိုင်ခဲ့ပါ တယ်။ 

အေဂျက်စ်နဲ့ ပါနာသီနိုင်ကို့စ် အသင်းတို့ဟာ ပင်နယ်တီ အဆုံးအဖြတ်မှာ ၁၇ လုံးစီ ကန်သွင်းခဲ့ကြတာဖြစ်ပြီး ၂၅ မိနစ်ကြာခဲ့တဲ့ ဒီပင်နယ်တီမှာ အေဂျက်စ်အသင်းက ၁၃ ဂိုး-၁၂ ဂိုးနဲ့ အနိုင်ရပြီး နောက်တစ်ဆင့်ကို တက်နိုင်ခဲ့ တာပါ။ 

ယူရိုပါလိဂ် တတိယအဆင့် ခြေစစ်ပွဲစဉ်ရဲ့ ပထမအကျော့မှာ အေဂျက်စ်အသင်းက ၁ ဂိုး- ဂိုးမရှိနဲ့ အနိုင်ရခဲ့ပေမယ့် ဒုတိယအကျော့မှာ ပါနာသီနိုင်ကို့စ်အသင်းက ၁ ဂိုး-ဂိုးမရှိနဲ့ ပြန်လည် အနိုင်ရခဲ့လို့ နှစ်ကျော့ပေါင်းရလဒ် ၁ ဂိုးစီ သရေကျခဲ့တာ ဖြစ်ပါတယ်။

အဲဒါကြောင့် အချိန်ပို ဆက်ကစားခဲ့ရပြီး ဘယ်အသင်းမှ ဂိုးသွင်းယူနိုင်ခြင်းမရှိလို့ ပင်နယ်တီ အဆုံးအဖြတ် ခံယူခဲ့ ရတာပါ။

အေဂျက်စ်အသင်းကို တွေ့ရစဉ်

အေဂျက်စ်နဲ့ ပါနာသီနိုင်ကို့စ် အသင်းတို့ ပွဲစဉ်မတိုင်ခင် UEFA ပြိုင်ပွဲသမိုင်းမှာ အရှည်ကြာဆုံး ပင်နယ်တီ ကန်သွင်းခဲ့တဲ့ပွဲကတော့ ၂၀၀၇ က ဥရောပ ယူ-၂၁ ချန်ပီယံရှစ် ပြိုင်ပွဲဖြစ်ပြီး နယ်သာလန်အသင်းက အင်္ဂလန် အသင်းကို အနိုင်ရခဲ့တဲ့ ဒီပွဲမှာ နှစ်သင်းပေါင်း ပင်နယ်တီ ၃၂ လုံး ကန်သွင်းခဲ့ကြတာ ဖြစ်ပါတယ်။ 

အခုအချိန်မှာတော့ အေဂျက်စ်နဲ့ ပါနာသီနိုင်ကို့စ်တို့ပွဲစဉ်က UEFA ပြိုင်ပွဲသမိုင်းမှာ ပင်နယ်တီကန်သွင်းမှု စံချိန်သစ် ဖြစ်လာခဲ့တာပါ။ 

ပင်နယ်တီ အဆုံးအဖြတ်မှာ အေဂျက်စ်အသင်းရဲ့ အသက် ၄၀ နှစ်အရွယ်ရှိ ဂိုးသမား ပတ်စဗာဟာ ပင်နယ်တီ ၅ လုံး ကာကွယ်ပြီး သူကိုယ်တိုင်လည်း ၁ ဂိုးသွင်းယူခဲ့တာ ဖြစ်ပါတယ်။ 

အေဂျက်စ်အသင်းနည်းပြ ဖာရီအိုလီက ပင်နယ်တီ ကန်သွင်းမှု ကြာချိန်ဟာ မယုံနိုင်စရာဖြစ်ခဲ့ပေမယ့် နောက်ထပ် အရေးကြီးတဲ့ အဆင့်ကို အသင်းရောက်ရှိခဲ့ပြီလို့ ပွဲအပြီးမှာ ပြောခဲ့တာပါ။

အေဂျက်စ်အသင်းဟာ ဒီပွဲအနိုင်ရခဲ့တာကြောင့် ယူရိုပါလိဂ် ပလေးအော့ဖ်အဆင့်မှာ ပိုလန်ကလပ် ဘီရယ်လ်စတော့အသင်းနဲ့ ယှဉ်ပြိုင်ရမှာဖြစ်ပါတယ်။

Source: ESPN

CNI Sport News

 ၂၀၂၄ ခုနှစ်၊ သြဂုတ် ၁၆

ယူနိုက်တက်အသင်းနည်းပြ အဲရစ်တန်ဟတ်က အသင်းဟာ ရာသီသစ်အတွက် အဆင်သင့် မဖြစ်သေးဘူးလို့ ဖူလ်ဟမ်အသင်းနဲ့ကစားမယ့် ပရီးမီးယားလိဂ် အဖွင့်ပွဲစဉ်မတိုင်ခင် ပြောလိုက်ပါတယ်။

အဲရစ်တန်ဟတ်က “ကစားသမားတွေအတွက် အချိန်ပိုပြီးလိုလားဆိုရင် ဒါဟာအမှန်ပါပဲ။ အမေရိကန်ခရီးစဉ်က လူစာရင်း၊ ယူရို၊ ကိုပါအမေရိကပြိုင်ပွဲက ပြန်ရောက်လာတဲ့ ကစားသမားတွေ၊ ကစားသမားအသစ်တွေနဲ့ ကျနော် တို့ဟာ အသင်းဖွဲ့ရမှာပါ။ အသင်းက အဆင်သင့် မဖြစ်သေးပေမယ့် လိဂ်ပြိုင်ပွဲက စတင်ပါပြီ။ အခြားနည်းပြတွေ မှာလည်း ဒီလိုပြဿနာတွေရှိမှာပါ။ ကျနော်တို့ဟာ ဒီအခြေအနေတွေကို ရင်ဆိုင်ကိုင်တွယ်သွားရမှာပါ”လို့ ပြောခဲ့ တာပါ။ 

ယူနိုက်တက်အသင်းရဲ့ အဓိက ကစားသမားအများစုဟာ ပြီးခဲ့တဲ့ ယူရိုပြိုင်ပွဲနဲ့ ကိုပါအမေရိကဖလား ပြိုင်ပွဲ ယှဉ်ပြိုင်ထားလို့ အသင်းနဲ့ ပူးပေါင်းတာ ရက်အနည်းငယ်ပဲရှိသေးတာ ဖြစ်ပါတယ်။ 

အဲဒါကြောင့် ကစားသမားတွေအားလုံး စုပေါင်းပြီး လေ့ကျင့်မှုပြုလုပ်ခဲ့ရတဲ့ အချိန်နည်းပါးတဲ့အတွက် နည်းပြ အဲရစ်တန်ဟတ်က စိုးရိမ်မှုတွေ ရှိနေတာပါ။ 

အဲရစ်တန်ဟတ်ကို တွေ့ရစဉ်

ပြီးခဲ့တဲ့ရက်ပိုင်းက ဘိုင်ယန်မြူးနစ်အသင်းကနေ ခေါ်ယူထားတဲ့ ဒီလစ်နဲ့ မက်ဇ်ရာအူရီတို့ဟာ ဖူလ်ဟမ်အသင်းနဲ့ ပွဲမှာ ပါဝင်မယ်လို့ ဒတ်ချ်လူမျိုးနည်းပြက အတည်ပြုထားပါတယ်။

အဲရစ်တန်ဟတ်က “ကစားသမားသစ်တွေ လူစာရင်းထဲ ပါဝင်မှာဖြစ်ပြီး မက်ဂွဲယားလည်း ပါဝင်လာမှာပါ။ ကျနော် တို့မှာ ကောင်းမွန်တဲ့ အစုအဖွဲ့ရှိပြီး အတောင့်တင်းဆုံး လူစာရင်းကို ရွေးချယ်အသုံးပြုသွားမှာပါ။ ကျနော်တို့ရဲ့ ပစ်မှတ်၊ ကျနော်တို့ရဲ့ ဦးတည်ချက်ကို သိပါတယ်။ ကျနော်တို့ရဲ့ မျှော်မှန်းချက်ဟာ အမြဲတမ်းမြင့်မားပြီး ဆုဖလား တွေ ရယူချင်ပါတယ်”လို့ ပြောခဲ့တာပါ။ 

မန်ယူနိုက်တက်အသင်းရဲ့ ဘယ်နောက်ခံလူတွေဖြစ်တဲ့ လုပ်ခ်ရှောနဲ့ မာလာစီယာတို့ဟာ ဖူလ်ဟမ်အသင်းနဲ့ ပွဲစဉ်ကို လွဲချော်မှာဖြစ်လို့ နည်းပြ အဲရစ်တန်ဟတ်ဟာ နောက်ခံလူသစ် မက်ဇ်ရာအူရီကို ဘယ်နောက်ခံလူအဖြစ် အသုံးပြုလာဖွယ် ရှိပါတယ်။ 

ယူနိုက်တက်နဲ့ ဖူလ်ဟမ်အသင်းတို့ရဲ့ ပရီးမီးယားလိဂ် အဖွင့်ပွဲစဉ်ကို သြဂုတ် ၁၇ ရက် မနက်ပိုင်းမှာ ယှဉ်ပြိုင်မှာ ဖြစ်ပါတယ်။ 

Source: Metro

CNI Sport News

၂၀၂၄ ခုနှစ်၊ သြဂုတ် ၁၅

စပါးအသင်းနဲ့ ချယ်လ်ဆီးအသင်း နည်းပြဟောင်း ပိုချက်တီနိုဟာ အမေရိကန်အသင်းကို ကိုင်တွယ်ဖို့ သဘောတူညီမှု ရရှိခဲ့တယ်လို့ The Athletic က ဖော်ပြထားပါတယ်။ 

အမေရိကန်အသင်းဟာ ပြီးခဲ့တဲ့ ကိုပါအမေရိကဖလားပြိုင်ပွဲမှာ ရလဒ်တွေ ဆိုးရွားခဲ့ပြီး အုပ်စုကနေ ထွက်ခွာခဲ့ရ တာကြောင့် အမေရိကန်ဘောလုံးအဖွဲ့ချုပ်ဟာ နည်းပြဖြစ်သူ ဘာဟယ်လ်တာကို ရာထူးက ထုတ်ပယ်ခဲ့တာပါ။ 

အမေရိကန်ဘောလုံးအဖွဲ့ချုပ်ဟာ လက်ရွေးစင် အမျိုးသားအသင်းကို ကိုင်တွယ်ဖို့ နာမည်ကြီး နည်းပြတွေကို ရှာဖွေနေတာ ဖြစ်ပါတယ်။

မက္ကဆီကို၊ ကနေဒါတို့နဲ့ ပူးတွဲအိမ်ရှင်အဖြစ် ကျင်းပမယ့် ၂၀၂၆ ကမ္ဘာ့ဖလားပြိုင်ပွဲမှာ အမေရိကန်အသင်း အောင်မြင်မှုတွေ ရယူနိုင်ဖို့အတွက် အမေရိကန်ဘောလုံးအဖွဲ့ချုပ်ဟာ နာမည်ကြီးနည်းပြအချို့နဲ့ ချိတ်ဆက်မှုတွေ ပြုလုပ်ခဲ့တာပါ။ 

အမေရိကန်အသင်း နည်းပြရာထူးအတွက် နည်းပြလောင်း စာရင်းထဲမှာ ကလော့ပ်၊ ဒယ်လာဖွန်တေး၊ ဗီအဲရာ၊ မာတာရာဇိုနဲ့ ပိုချက်တီနိုတို့ ပါဝင်ခဲ့တာ ဖြစ်ပါတယ်။ 

အမေရိကန်အသင်းကိုတွေ့ရစဉ်

နောက်ဆုံး ထွက်ပေါ်လာတဲ့ သတင်းမှာ ပိုချက်တီနိုဟာ အမေရိကန်နည်းပြ ရာထူးအတွက် စာချုပ်ထဲမှာ လက်မှတ် ထိုးခဲ့တယ်လို့ ဖော်ပြထားတာပါ။ 

ပိုချက်တီနိုဟာ နိုင်ငံအသင်းတစ်သင်းကို ပထမဆုံးကိုင်တွယ်မှာ ဖြစ်ပေမယ့် နည်းပြလောကမှာ အတွေ့အကြုံ အများအပြားရှိတဲ့သူ ဖြစ်ပါတယ်။ 

ပိုချက်တီနိုဟာ အက်စ်ပန်ညိုအသင်းမှာ နည်းပြဘဝ စတင်ခဲ့ပြီး ဆောက်သမ်တန်၊ စပါးအသင်း၊ ပီအက်စ်ဂျီနဲ့ ချယ်လ်ဆီးအသင်းတို့ကို ကိုင်တွယ်ခဲ့တာပါ။

ပိုချက်တီနိုဟာ နည်းပြဘဝမှာ ပီအက်စ်ဂျီအသင်းနဲ့သာ ဆုဖလား အောင်မြင်မှု ရယူနိုင်ခဲ့တာ ဖြစ်ပါတယ်။ 

အခုအချိန်မှာတော့ ပိုချက်တီနိုဟာ အမေရိကန်အသင်းကို ၂၀၂၆ ကမ္ဘာ့ဖလားပြိုင်ပွဲမှာ အောင်မြင်မှု ရရှိအောင် လုပ်ဆောင်ပေးရတော့မှာပါ။ 

အမေရိကန်အသင်းဟာ လာမယ့် စက်တင်ဘာမှာ ကနေဒါ၊ နယူးဇီလန်အသင်းတို့နဲ့ ခြေစမ်းပွဲ ယှဉ်ပြိုင်မှာဖြစ်ပြီး ဒီပွဲတွေဟာ ပိုချက်တီနိုအတွက် အမေရိကန်အသင်းနည်းပြဘဝ ပထမဆုံးပွဲတွေ ဖြစ်လာမယ်လို့ သိရပါတယ်။

Source: Goal

CNI Sport News

၂၀၂၄ ခုနှစ်၊ သြဂုတ် ၁၅

ဘရာဇီးလ်ဂန္ထဝင် ရော်နယ်လ်ဒင်ဟိုရဲ့ သားဖြစ်သူ ဂျာအိုမန်ဒက်စ်ဟာ ဘာစီလိုနာအသင်းက ထွက်ခွာပြီး ချန်ပီယံရှစ်ကလပ် ဘန်လေအသင်းထံ ပြောင်းရွှေ့ခဲ့ပါတယ်။ 

ဘရာဇီးလ် Globo သတင်းမှာ ဂျာအိုမန်ဒက်စ်ဟာ အခုအပတ် အစောပိုင်းက အင်္ဂလန်ကို သွားရောက်ခဲ့ပြီး အေးဂျင့်တွေရဲ့ အကူအညီပေးမှုတွေနဲ့ အပြောင်းအရွှေ့ကို အမြန်ဆုံး အပြီးသတ်နိုင်ခဲ့တယ်လို့ ဖော်ပြထားတာပါ။ 

အပြောင်းအရွှေ့ ကိစ္စရပ်တွေအပြီးမှာ ဂျာအိုမန်ဒက်စ်ဟာ ဘန်လေအင်္ကျီကို ကိုင်ဆောင်ထားတဲ့ ပုံထွက်ပေါ်လာခဲ့ တာ ဖြစ်ပါတယ်။

ဂျာအိုမန်ဒက်စ်ဟာ ပြီးခဲ့တဲ့နှစ်က ဖခင်ဖြစ်သူ အောင်မြင်ခဲ့တဲ့ ဘာစီလိုနာအသင်းဆီမှာ ခြေစွမ်းပိုင်း စမ်းသပ်ခံယူ ခဲ့တာပါ။ 

ဂျာအိုမန်ဒက်စ်ဟာ စမ်းသပ်မှု အောင်မြင်ခဲ့တာကြောင့် ဘာစီလိုနာ ယူ-၁၉ အသင်းနဲ့ စာချုပ်ချုပ်ဆိုခဲ့ပေမယ့် စပိန်ကလပ်မှာ အချိန်ကာလ တိုတောင်းခဲ့တာ ဖြစ်ပါတယ်။ 

ဂျာအိုမန်ဒက်စ်ကို တွေ့ရစဉ်

အသက် ၁၉ နှစ် အရွယ်ရှိ ဂျာအိုမန်ဒက်စ်ဟာ ခရူဇီယိုလူငယ်အသင်းမှာ ၄ ရာသီကြာ ဖြတ်သန်းခဲ့ပြီး အလားအလာရှိတဲ့ လူငယ်တစ်ဦးအဖြစ် သတ်မှတ်ခံခဲ့ရသူပါ။ 

ဂျာအိုမန်ဒက်စ်ရဲ့ ဘာစီလိုနာအသင်း စာချုပ်ဟာ ပြီးခဲ့တဲ့ဇွန်က ကုန်ဆုံးသွားခဲ့ပေမယ့် သူဟာ အသင်းကြီးအတွက် ပါဝင်ကစားခွင့် မရခဲ့ပါဘူး။ 

ဂျာအိုမန်ဒက်စ်နဲ့ ဘာစီလိုနာအသင်းတို့ဟာ စာချုပ်သက်တမ်းတိုးဖို့ သဘောတူညီမှု မရခဲ့တဲ့အတွက်လည်း ကစားသမားဟာ ထွက်ခွာပြီး ဘန်လေအသင်းထံ ပြောင်းရွှေ့ခဲ့တာပါ။

ဂျာအိုမန်ဒက်စ်ဟာ ဘန်လေအသင်းနဲ့ ၂ နှစ် စာချုပ်ချုပ်ဆိုခဲ့တယ်လို့ သိရပါတယ်။ ပြီးခဲ့တဲ့ရာသီက ပရီးမီးယား လိဂ်ကနေ တန်းဆင်းခဲ့ရတဲ့ ဘန်လေအသင်းဟာ ချန်ပီယံရှစ်ပြိုင်ပွဲ အဖွင့်ပွဲစဉ်မှာ လူတန်အသင်းကို ၄ ဂိုး-၁ ဂိုးနဲ့ ဂိုးပြတ်အနိုင်ရရှိခဲ့တာပါ။ 

ဘန်လေအသင်းဟာ ဒီတစ်ပတ် ချန်ပီယံရှစ်ပွဲအဖြစ် ကာဒစ်ဖ်အသင်းနဲ့ ယှဉ်ပြိုင်ရမှာဖြစ်ပြီး ဂျာအိုမန်ဒက်စ် အနေနဲ့ ဘန်လေအသင်းအတွက် ပွဲဦးထွက်ခွင့်ရနိုင်ဖို့ စောင့်ဆိုင်းရဖွယ်ရှိနေတာ ဖြစ်ပါတယ်။ 

Source: Goal

CNI Sport News

၂၀၂၄ ခုနှစ်၊ သြဂုတ် ၁၅

ယူနိုက်တက်အသင်းခေါင်းဆောင် ဘရူနိုဖာနန်ဒက်စ်ဟာ အသင်းမှာ ၂၀၂၇ ခုနှစ်၊ ဇွန်လအထိ ရှိမယ့် စာချုပ်သစ် ချုပ်ဆိုလိုက်ပြီး စာချုပ်ကုန်ဆုံးချိန်မှာ နောက်ထပ် တစ်နှစ်သက်တမ်း တိုးခွင့်ရှိနေတာ ဖြစ်ပါတယ်။

၂၀၂၀ ခုနှစ်၊ ဇန်နဝါရီလက စပို့တင်းလစ္စဘွန်းအသင်းကနေ ပေါင် ၄၇ သန်းနဲ့ ယူနိုက်တက်အသင်းထံ ပြောင်းရွှေ့ လာခဲ့တဲ့ ဘရူနိုဖာနန်ဒက်စ်ရဲ့ အရင်စာချုပ်ဟာ ၂၀၂၆ ခုနှစ်မှာ ကုန်ဆုံးမှာပါ။ 

အသက် ၂၉ နှစ်အရွယ်ရှိ ဘရူနိုဖာနန်ဒက်စ်ဟာ ယူနိုက်တက်အသင်းအတွက် ၂၃၄ ပွဲ ပါဝင်ကစားထားပြီး ၇၉ ဂိုး သွင်းယူကာ ၆၇ ဂိုး ဖန်တီးထားတာ ဖြစ်ပါတယ်။

ဘရူနိုဖာနန်ဒက်စ်ဟာ ပြီးခဲ့တဲ့ရာသီ မစတင်ခင်မှာ မက်ဂွဲယားဆီကနေ ယူနိုက်တက်အသင်း ခေါင်းဆောင် ရာထူးကို ရရှိခဲ့သူပါ။ 

ဘရူနိုဖာနန်ဒက်စ်က “ယူနိုက်တက်အတွက် ကျနော့်ရဲ့ စိတ်အားထက်သန်မှုကို လူတိုင်းသိပါတယ်။ ယူနိုက်တက် အသင်းရဲ့ အနာဂတ်ဟာ အပေါင်းလက္ခဏာ ဆောင်တာကို မြင်တွေ့ခဲ့ရပြီး အသင်းကို ဦးဆောင်ရမှာကို ကျနော် ကျေနပ်ပါတယ်။ ဒီအင်္ကျီ ဝတ်ဆင်ရခြင်းရဲ့ တာဝန်နဲ့ အရေးပါမှုကို ကျနော် နားလည်ပါတယ်။ ကလပ်ရဲ့ အနာဂတ်အပေါ် ယုံကြည်ခဲ့တဲ့အတွက်လည်း ဒီမှာဆက်နေဖို့ ကျနော်ရွေးချယ်ခဲ့တာပါ”လို့ ပြောခဲ့ပါတယ်။ 

ဘရူနိုဖာနန်ဒက်စ်နဲ့ အဲရစ်တန်ဟတ်ကို တွေ့ရစဉ်

ဘရူနိုဖာနန်ဒက်စ်က သူဟာ ဒီနွေရာသီမှာ ယူနိုက်တက်အသင်းကနေ ထွက်ခွာဖို့အတွက် ကမ်းလှမ်းမှုတွေကို ရရှိခဲ့တယ်လို့လည်း ပြောခဲ့တာပါ။ 

ပေါ်တူဂီကွင်းလယ်လူဟာ ပြီးခဲ့တဲ့နှစ်တွေမှာ ယူနိုက်တက်အသင်း ခေါင်းဆောင်ဟောင်းတွေဖြစ်တဲ့ ဂယ်ရီနဗီးလ် နဲ့ ရွိုင်ကိန်းတို့ရဲ့ ဝေဖန်မှုတွေကို မကြာခဏ ခံခဲ့ရပေမယ့် နည်းပြအဲရစ်တန်ဟတ်က သူ့ရဲ့ ကစားသမားအပေါ်မှာ ယုံကြည်မှု အပြည့်ရှိခဲ့တာ ဖြစ်ပါတယ်။ 

ဘရူနိုဖာနန်ဒက်စ်ဟာ စာချုပ်သစ်ကြောင့် ယူနိုက်တက်အသင်းမှာ လုပ်ခလစာ အများဆုံးရရှိတဲ့ ကစားသမားတွေ ထဲက တစ်ဦးဖြစ်လာမှာပါ။ 

ဘရူနိုဖာနန်ဒက်စ်ဟာ ယူနိုက်တက်အသင်းနဲ့အတူ FA ဖလား၊ ကာရာဘောင်းဖလားတို့ကို ရယူထားတာ ဖြစ်ပါ တယ်။

Source: BBC

CNI Sport News

၂၀၂၄ ခုနှစ်၊ သြဂုတ် ၁၅

ရီးရယ်လ်အသင်းဟာ အတ္တလန်တာအသင်းနဲ့ ကစားခဲ့တဲ့ ဥရောပစူပါဖလားပွဲစဉ်မှာ ၂ ဂိုး- ဂိုးမရှိနဲ့ အနိုင်ရပြီး ဆုဖလားကို စံချိန်တင် ၆ ကြိမ်မြောက် ရရှိသွားခဲ့ပါတယ်။ 

ဒီပွဲမှာ ရီးရယ်လ်အသင်းအတွက် ဂိုးတွေကို ဗယ်လ်ဗာဒီနဲ့ ကစားသမားသစ် ဘတ်ပီတို့က သွင်းယူခဲ့တာပါ။ 

ရီးရယ်လ်အသင်းဟာ ဒီပွဲအနိုင်ရခဲ့တာကြောင့် ဥရောပစူပါဖလား ပြိုင်ပွဲသမိုင်းမှာ အောင်မြင်မှု အများဆုံး ရယူနိုင်တဲ့ အသင်းအဖြစ် စံချိန်သစ် တင်နိုင်ခဲ့တာ ဖြစ်ပါတယ်။ 

ဒီပွဲမှာ ရီးရယ်လ်အသင်း ကစားသမားဘဝ ပွဲဦးထွက်အဖြစ် ပါဝင်ခွင့်ရခဲ့တဲ့ ဘတ်ပီဟာ ပွဲဦးထွက်မှာတင် အသင်းအတွက် ဂိုးသွင်းနိုင်ခဲ့ပြီး ဆုဖလားကိုပါ ကိုင်မြှောက်နိုင်ခဲ့တာပါ။

ဘတ်ပီက “အလွန်ကောင်းမွန်တဲ့ညပါ။ ဒီအင်္ကျီ၊ ဒီတံဆိပ်နဲ့ ပရိသတ်တွေအတွက် ကစားပေးဖို့ ဒီလို အခိုက်အတန့် မျိုးကို ကျနော် စောင့်ဆိုင်းနေတာ ကြာပါပြီ။ ဒါက ကျနော့်အတွက် ကောင်းမွန်တဲ့ အခိုက်အတန့်ပါပဲ။ ဆုဖလား ရယူနိုင်ဖို့က အလွန်အရေးကြီးပြီး ရီးရယ်လ်က အမြဲတမ်း အနိုင်ရမယ်ဆိုတာကို ကျနော်တို့ သိပါတယ်။ ပထမဆုံး ပွဲမှာ အဆုံးအဖြတ် ဂိုးသွင်းယူနိုင်ခဲ့လို့ ကျနော်ပျော်ရွှင်ပါတယ်”လို့ ပြောခဲ့တာပါ။ 

 ဘတ်ပီကို တွေ့ရစဉ်

ရီးရယ်လ်အသင်းနည်းပြ အန်ဆယ်လော့တီဟာ အတ္တလန်တာအသင်းနဲ့ ဥရောပစူပါဖလားပွဲစဉ်မှာ ဘတ်ပီ၊ ဗီနီစီးယက်စ်၊ ရိုဒရီဂိုနဲ့ ဘယ်လင်ဂမ်တို့ကို တိုက်စစ်ပိုင်းမှာ တွဲဖက်အသုံးပြုသွားခဲ့တာ ဖြစ်ပါတယ်။ 

ဒီပွဲမှာ ဘတ်ပီရဲ့သွင်းဂိုးကို ဖန်တီးပေးခဲ့တဲ့ ဘယ်လင်ဂမ်ဟာ အကောင်းဆုံး ကစားသမားဆုကို ရရှိသွားခဲ့ပါတယ်။ 

ဘယ်လင်ဂမ်ဟာ ပွဲအပြီး မီဒီယာသမားတွေနဲ့ တွေ့ဆုံချိန်မှာ ဘတ်ပီဟာ အံ့သြဖွယ်ကောင်းတဲ့ ကစားသမား ဖြစ်တယ်လို့ မှတ်ချက်ပေးခဲ့တာပါ။ 

ရီးရယ်လ်အသင်းနည်းပြ အန်ဆယ်လော့တီက အတ္တလန်တာအသင်းရဲ့ ကစားပုံကြောင့် ပထမပိုင်းမှာ သူတို့ အတွက် အခက်အခဲ ဖြစ်ခဲ့ပေမယ့် ဒုတိယပိုင်းမှာ ရှေ့တန်းက နေရာလွတ်တွေ ရှာဖွေနိုင်ခဲ့တာကြောင့် နိုင်ပွဲ ရယူနိုင်ခဲ့တယ်လို့ ပြောခဲ့ပါတယ်။ 

ရီးရယ်လ်အသင်းဟာ သြဂုတ် ၁၉ ရက်မှာ စပိန်လာလီဂါ ရာသီသစ်ပွဲစဉ်အဖြစ် မာယော့ကာအသင်းအိမ်ကွင်းမှာ သွားရောက်ယှဉ်ပြိုင်ရမှာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ သြဂုတ် ၁၄ 

အင်္ဂလန်ကွင်းလယ်လူ ဂယ်လာဂါဟာ အသလက်တီကိုအသင်းနဲ့ အပြောင်းအရွှေ့ မပြီးဖြတ်နိုင်သေးတာကြောင့် အင်္ဂလန်ကိုပြန်လာကာ ချယ်လ်ဆီးအသင်းနဲ့ လေ့ကျင့်မှုတွေ ပြန်လည်ပြုလုပ်ခဲ့တယ်လို့ ဖာဘရီဇီယိုရိုမန်နိုက ဖော်ပြထားပါတယ်။ 

ချယ်လ်ဆီးနဲ့ အသလက်တီကို အသင်းတို့ဟာ ဂယ်လာဂါရဲ့ အပြောင်းအရွှေ့အတွက် ပေါင် ၃၃.၇ သန်းနဲ့ သဘောတူညီမှု ရရှိထားတာကြောင့် ကစားသမားဟာ အပြောင်းအရွှေ့ အပြီးသတ်ဖို့ စပိန်နိုင်ငံကို သွားရောက် ခဲ့တာပါ။ 

ဂယ်လာဂါဟာ အသလက်တီကိုအသင်းနဲ့ ဆေးစစ်မှုတွေ ပြုလုပ်ခဲ့ပြီး မက်ဒရစ်မှာ ၅ ရက်ကြာအထိ ရှိခဲ့ပေမယ့် အပြောင်းအရွှေ့ မဖြစ်မြောက်သေးတာကြောင့် ချယ်လ်ဆီးအသင်းက သူ့ကို အင်္ဂလန်ပြန်လာဖို့ စီစဉ်ခဲ့တာ ဖြစ်ပါတယ်။ 

အသလက်တီကိုအသင်းဟာ ဒီအပြောင်းအရွှေ့မှာ မန်စီးတီးအသင်းတိုက်စစ်မှူး အယ်လ်ဗာရက်ဇ်ကို ပေါင် ၈၁ သန်းနဲ့ ခေါ်ယူပြီးနောက် ဂယ်လာဂါရဲ့ အပြောင်းအရွှေ့ အပြီးသတ်နိုင်ဖို့ဆိုရင် ကစားသမားတစ်ဦး ရောင်းချဖို့ လိုအပ်နေတာပါ။ 

ချယ်လ်ဆီးအသင်းဟာ အသလက်တီကိုအသင်း တိုက်စစ်မှူး အိုမိုရိုဒီယန်ကို ခေါ်ယူမယ့် အပြောင်းအရွှေ့ ပျက်ပြယ်ခဲ့တာကြောင့်လည်း ဂယ်လာဂါရဲ့ အပြောင်းအရွှေ့အပေါ် သက်ရောက်မှုတွေရှိလာခဲ့တာ ဖြစ်ပါတယ်။ 

ဂယ်လာဂါကို တွေ့ရစဉ်

ချယ်လ်ဆီးအသင်းဟာ အငှားနဲ့ လာရောက် ကစားခဲ့ဖူးတဲ့ ဂျာအိုဖီးလစ်ရဲ့ အပြောင်းအရွှေ့အတွက်လည်း အသလက်တီကိုအသင်းနဲ့ ဆွေးနွေးမှုတွေ ရှိခဲ့ပါတယ်။ 

ချယ်လ်ဆီးအသင်းဟာ ဒီအပြောင်းအရွှေ့မှာ ကစားသမား အများအပြားကို ခေါ်ယူထားတာကြောင့် အသင်းမှာ ရှိတဲ့ ကစားသမားအချို့ကို မဖြစ်မနေ ရောင်းချဖို့လည်း လိုအပ်နေပါတယ်။

ချယ်လ်ဆီးအသင်းဟာ မကြာသေးခင်က ဝုလ်ဗ်စ်အသင်း တောင်ပံကစားသမား ပက်ဒရိုနက်တိုကို ခေါ်ယူပြီးနောက် လူစာရင်းထဲမှာ ကစားသမား ၄၃ ဦးအထိ ရှိလာခဲ့တာပါ။ 

ရာသီကြိုခြေစမ်းပွဲတွေမှာ ရလဒ်တွေ မကောင်းခဲ့တဲ့ ချယ်လ်ဆီးအသင်းဟာ ပရီးမီးယားလိဂ် အဖွင့်ပွဲစဉ်အဖြစ် မန်စီးတီးအသင်းနဲ့ ယှဉ်ပြိုင်ရမှာဖြစ်ပါတယ်။

Source: Dailymail

CNI Sport News

၂၀၂၄ ခုနှစ်၊ သြဂုတ် ၁၄

ယူနိုက်တက်အသင်းဟာ ပီအက်စ်ဂျီအသင်းမှာ ကစားချင်နေတဲ့ တောင်ပံကစားသမား ဆန်ချိုအတွက် ပြောင်းရွှေ့ကြေး ယူရိုသန်း ၆၀ သတ်မှတ်ခဲ့ပါတယ်။ 

ပီအက်စ်ဂျီအသင်းဟာ ဆန်ချိုကို ခေါ်ယူဖို့ အလားအလာရှိတဲ့ အပြောင်းအရွှေ့အတွက် ဆွေးနွေးညှိနှိုင်းမှုတွေ စတင်ပြုလုပ်နေပြီး ကစားသမား ကိုယ်တိုင်ကလည်း ပြင်သစ်ကလပ်ထံ ပြောင်းရွှေ့ချင်နေတာပါ။ 

ဒါပေမယ့် ယူနိုက်တက်အသင်းဘက်က ဆန်ချိုအတွက် ပြောင်းရွှေ့ကြေး ယူရိုသန်း ၆၀ သတ်မှတ်ထား တာကြောင့် အပြောင်းအရွှေ့ဖြစ်ဖို့ လွယ်ကူနိုင်မှာ မဟုတ်ပါဘူး။ 

အဲဒါကြောင့် ပီအက်စ်ဂျီနဲ့ ယူနိုက်တက်အသင်းတို့ဟာ ဒီအပတ်ထဲမှာ ဆန်ချိုရဲ့ အပြောင်းအရွှေ့နဲ့ ပတ်သက်ပြီး သဘောတူညီမှုရရှိဖို့ မမျှော်လင့်ဘူးလို့ သိရပါတယ်။ 

ပီအက်စ်ဂျီနဲ့ ယူနိုက်တက်အသင်းတို့ရဲ့ ဆွေးနွေးမှုတွေမှာ ဥရုဂွေးကွင်းလယ်လူ အူဂါတေးနဲ့ ပတ်သက်တဲ့ ဆွေးနွေးမှုတွေလည်း ပါဝင်ခဲ့တာပါ။

ယူနိုက်တက်အသင်းဟာ ရာသီသစ်မတိုင်ခင် ကွင်းလယ်ပိုင်းကို အားဖြည့်ဖို့ အူဂါတေးကို အဓိကပစ်မှတ်အဖြစ် သတ်မှတ်ထားတာ ဖြစ်ပါတယ်။ 

ဆန်ချိုကို တွေ့ရစဉ်

အူဂါတေးကလည်း အပြောင်းအရွှေ့အတွက် ယူနိုက်တက်အသင်းနဲ့ ပုဂ္ဂိုလ်ရေး သဘောတူညီမှု ရရှိထားပေမယ့် ကလပ်အသင်းနှစ်သင်းကြား ပြောင်းရွှေ့ကြေး အဆင်မပြေသေးလို့ အပြောင်းအရွှေ့ မဖြစ်မြောက်သေးတာပါ။ 

ယူနိုက်တက်အသင်းဟာ ဒီအပြောင်းအရွှေ့မှာ ယိုရို၊ ဇာ့ခ်ဇီ၊ ဒီလစ်နဲ့ မက်ဇ်ရာအူရီတို့ကို ခေါ်ယူထားတာကြောင့် အသင်းမှာရှိတဲ့ ကစားသမားအချို့ကို ရောင်းချဖို့လိုအပ်နေတာ ဖြစ်ပါတယ်။ 

ယူနိုက်တက်အသင်းဟာ အူဂါတေးကို ခေါ်ယူချင်နေသေးတာကြောင့် ဆန်ချိုကို ရောင်းချတာက ဒီကစားသမား ကို ခေါ်ယူနိုင်ဖို့ ငွေကြေး လိုအပ်ချက်တွေကို ပေးနိုင်စွမ်းရှိနေတာပါ။

ဆန်ချိုဟာ ပြီးခဲ့တဲ့ရာသီကြို ခြေစမ်းပွဲတွေမှာ ယူနိုက်တက်အသင်းအတွက် ပါဝင်ခဲ့သလို မန်စီးတီးအသင်းကို အရေးနိမ့်ခဲ့တဲ့ ကွန်မြူနတီဒိုင်း ပွဲစဉ်မှာလည်း လူစားဝင်အဖြစ် ပါဝင်ခဲ့ပါတယ်။ 

အူဂါတေးကတော့ ပီအက်စ်ဂျီအသင်းရဲ့ လေ့ကျင့်ခန်း အစီအစဉ်တွေမှာ ချန်လှပ်ခံထားရပြီး အသင်းရဲ့ ရောင်းချ မယ့် ကစားသမားစာရင်းထဲမှာ ပါဝင်နေတာဖြစ်ပါတယ်။ 

Source: Goal