CNI Sport News

၂၀၂၅ ခုနှစ်၊ မတ်လ ၁၂

ဂျူဗင်တပ်စ်အသင်း ကွင်းလယ်လူဟောင်း ပေါ့ဘာဟာ ဘောလုံးကစားခွင့် ၁၈ လကြာ ပိတ်ပင်တဲ့ ပြစ်ဒဏ် တရားဝင် ပြီးဆုံးသွားပြီ ဖြစ်ပေမယ့် နောက်ထပ်ကစားမယ့် ကလပ်အသင်းသစ်ကို ရွေးချယ်ဖို့အတွက် အချိန်ယူဖို့ ဆုံးဖြတ်ထားပါတယ်။ 

ဥရောပလိဂ်ပြိုင်ပွဲတွေဟာ ရာသီပြီးဆုံးဖို့ လအနည်းငယ်ပဲ ကျန်ရှိတော့တာကြောင့် ပေါ့ဘာအတွက် ရွေးချယ်မှု ဟာ အကန့်အသတ်နဲ့သာ ရှိနေတောပါ။

ပေါ့ဘာဟာ လက်ရှိအချိန်မှာ သူ့အတွက် ရွေးချယ်စရာအဖြစ် အပြောင်းအရွှေ့ ဈေးကွက်တွေ မပိတ်သေးတဲ့ မေဂျာလိဂ်နဲ့ ဂျပန်လိဂ်တွေမှာ သွားကစားဖို့သာ ရွေးချယ်ခွင့်ရှိနေတာ ဖြစ်ပါတယ်။ 

ပေါ့ဘာဟာ ဥရောပထိပ်တန်းလိဂ်ထံ ပြန်လာဖို့ကို ဦးစားပေး လုပ်ဆောင်နေပေမယ့် အင်တာမိုင်ယာမီအသင်းနဲ့ စကားပြောဆိုမှုတွေရှိထားတာပါ။ 

ဆော်ဒီပရိုလိဂ်နဲ့ ဘရာဇီးလ် စီးရီးအေကလပ် အသင်းတွေရဲ့ ကမ်းလှမ်းမှုတွေကို ငြင်းပယ်ထားတဲ့ ပေါ့ဘာဟာ စီးရီးအေ၊ လီဂူး-၁ နဲ့ စပိန်ကလပ်တွေရဲ့ စိတ်ဝင်စားမှုတွေကိုလည်း ရရှိထားတာဖြစ်ပါတယ်။ 

ပေါ့ဘာကို တွေ့ရစဉ်

ပေါ့ဘာဟာ ၂၀၂၆ ကမ္ဘာ့ဖလားပြိုင်ပွဲမှာ ပြင်သစ်အသင်း လူစာရင်းထဲ ပါဝင်ချင်နေတာကြောင့် ချန်ပီယံလိဂ် ဒါမှမဟုတ် ယူရိုပါလိဂ်ကစားရတဲ့ ဥရောပထိပ်တန်း ကလပ်အသင်း တစ်သင်းမှာ ကစားဖို့ဆန္ဒရှိတောပါ။ 

ပြင်သစ်ကွင်းလယ်လူဟာ တားမြစ်ဆေး သုံးစွဲကြောင်း တွေ့ရှိခဲ့ရလို့ ကနဦး ၄ နှစ်ပွဲကစားခွင့် ပိတ်ပင်တဲ့ ပြစ်ဒဏ် ချမှတ်ခြင်းခံခဲ့ရတာ ဖြစ်ပါတယ်။ 

ဒါပေမယ့် ပေါ့ဘာဟာ ဒီဆုံးဖြတ်ချက်ကို အားကစားခုံရုံးထံ အယူခံဝင်ခဲ့တာမှာ ၁၈ လပွဲပယ်အဖြစ် လျှော့ချခံ ခဲ့ရတာပါ။ 

ပေါ့ဘာရဲ့ ဒီပွဲပယ် ပြစ်ဒဏ်ဟာ မတ်လ ၁၁ ရက်မှာ ပြီးဆုံးသွားခဲ့ပြီဖြစ်လို့ သူဟာ တရားဝင် လေ့ကျင့်မှုတွေ ပြုလုပ်လို့ ရပြီဖြစ်သလို ပွဲတွေလည်း ယှဉ်ပြိုင်လို့ရပြီ ဖြစ်ပါတယ်။ 

ပေါ့ဘာဟာ ၂၀၂၃ ခုနှစ်၊ စက်တင်ဘာက နောက်ဆုံးပွဲ ပါဝင်ကစားထားတဲ့အတွက် ပွဲတွေနဲ့ ၁ နှစ်ကျော်ကြာ ဝေးကွာနေတာပါ။ 

ပေါ့ဘာဟာ ပွဲပယ်ခံထားရတဲ့ အချိန်အတွင်း သူ့ရဲ့ကြံ့ခိုင်မှုပိုင်း အကောင်းဆုံးပုံစံကို ရဖို့အတွက် မိုင်ယာမီမှာ ကိုယ်ပိုင်နည်းပြတစ်ဦးနဲ့ လေ့ကျင့်မှုတွေ ပြုလုပ်နေပြီး အနာဂတ်ကို ရာသီကုန်ချိန်မှသာ ဆုံးဖြတ်ဖို့ရှိနေတာ ဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ မတ်လ ၁၂

ချယ်လ်ဆီးအသင်းဟာ အပြီးသတ် ဝယ်ယူခွင့်ပါဝင်တဲ့ အငှားစာချုပ်နဲ့ လာရောက်ကစားနေတဲ့ ဆန်ချိုကို အပြီးသတ် မဝယ်ယူဘဲ နွေရာသီမှာ သူ့ရဲ့မိခင်ကလပ်ဖြစ်တဲ့ ယူနိုက်တက်အသင်းထံ ပြန်ပို့ဖွယ်ရှိနေပါတယ်။

ပြီးခဲ့တဲ့နွေရာသီက ယူနိုက်တက်အသင်းကနေ ရာသီအကုန်ထိ အငှားနဲ့ ပြောင်းရွှေ့ခဲ့တဲ့ ဆန်ချိုရဲ့ အငှားစာချုပ် ထဲမှာ ချယ်လ်ဆီးအသင်းဟာ အမှတ်ပေးဇယား အဆင့် ၁၄ ဒါမှမဟုတ် ဒီထက်ပိုမြင့်တဲ့ အဆင့်နဲ့ ရာသီ အဆုံးသတ်ခဲ့ရင် အပြီးသတ် ဝယ်ယူရမယ့်အချက် ပါဝင်နေတာပါ။

ချယ်လ်ဆီးအသင်းဟာ သူတို့ရဲ့ အဆင့် ရပ်တည်မှုအပေါ် မူတည်ပြီး ဆန်ချိုအတွက် ပြောင်းရွှေ့ကြေးက ပေါင် ၂၂ သန်းကနေ ၂၅ သန်းကြားအထိ ယူနိုက်တက်အသင်းကို ပေးရမှာဖြစ်ပါတယ်။ 

ချယ်လ်ဆီးအသင်းဟာ လက်ရှိအချိန်မှာ ပရီးမီးယားလိဂ် အမှတ်ပေးဇယား အဆင့် ၄ နေရာ ရပ်တည်နေတာ ကြောင့် ဆန်ချိုကို အပြီးသတ်ခေါ်ယူနိုင်မယ့် အချက်နဲ့ ကိုက်ညီနေတာပါ။ 

 ဆန်ချိုကို တွေ့ရစဉ်

ဒါပေမယ့်  ချယ်လ်ဆီးအသင်းက အပြီးသတ် ခေါ်ယူဖို့ မဆုံးဖြတ်ခဲ့ရင် ဆန်ချိုဟာ ယူနိုက်တက်အသင်းထံ ပြန်လာ ရဖွယ်ရှိနေဆဲလို့ ဒေးလီးမေးလ်က ဖော်ပြထားပါတယ်။

ချယ်လ်ဆီးအသင်းအနေနဲ့ ဆန်ချိုကို အပြီးသတ် ခေါ်ယူမယ့် ယူနိုက်တက်အသင်းနဲ့ သဘောတူညီမှုကို ချိုးဖောက်ခဲ့ရင် ကြီးမားတဲ့ ငွေကြေးပမာဏကို ပေးချေရဖွယ်ရှိနေတာပါ။

ချယ်လ်ဆီးအသင်းဟာ လာမယ့် နွေရာသီအတွက် တောင်ပံကစားသမား အများအပြားကို ရှာဖွေမှုတွေ ပြုလုပ်နေတာ ဖြစ်ပါတယ်။ 

ဆန်ချို ဘက်ကလည်း ချယ်လ်ဆီးအသင်းထံ အပြီးသတ် ပြောင်းရွှေ့ဖို့အတွက် လုပ်ခလစာအပြင် အခြားအချက် တွေကိုလည်း သဘောတူညီမှု မရရှိသေးတာပါ။ 

ယူနိုက်တက်အသင်းဟာ ဆန်ချိုကို ချယ်လ်ဆီးအသင်းထံ အငှားချထားပေမယ့် သူ့ရဲ့လုပ်ခလစာ တစ်ပတ်ပေါင် ၂၅၀,၀၀၀ ထဲက တစ်စိတ်တစ်ပိုင်းကို ပေးချေနေရတာဖြစ်ပါတယ်။

ချယ်လ်ဆီးအသင်းဟာ ဆန်ချိုကို အသင်းမှာ ဆက်ထိန်းမလား ဒါမှမဟုတ် ယူနိုက်တက်အသင်းထံ ပြန်ပို့မလား ဆိုတာကို မကြာခင်မှာ ဆုံးဖြတ်ချက် ချရဖို့ရှိနေပါတယ်။ 

ဆန်ချိုဟာ ချယ်လ်ဆီးအသင်းမှာ ကစားရတာ အလွန်ပျော်ရွှင်တယ်လို့ မကြာသေးခင်က ပြုလုပ်ခဲ့တဲ့ အင်တာဗျူး မှာ ပြောထားတာပါ။ 

ဆန်ချိုဟာ ဒီရာသီမှာ ချယ်လ်ဆီးအသင်းအတွက် ၂၆ ပွဲ ကစားထားပြီး ၂ ဂိုးသွင်းယူကာ ဂိုးဖန်တီးမှု ၆ ကြိမ် ပြုလုပ်ထားတာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ မတ်လ ၁၂

အင်္ဂလန်အသင်းခေါင်းဆောင် ဟာရီကိန်းဟာ ဘိုင်ယန်မြူးနစ်အသင်းက လေဗာကူဆင်အသင်းကို ၂ ဂိုး-ဂိုးမရှိနဲ့ အနိုင်ရခဲ့တဲ့ ချန်ပီယံလိဂ် ၁၆ သင်းအဆင့် ဒုတိယအကျော့ပွဲစဉ်မှာ ဂိုးသွင်းယူနိုင်ခဲ့ပြီးနောက် ဒီပြိုင်ပွဲမှာ စံချိန်သစ် တင်နိုင်ခဲ့ပါတယ်။ 

အသက် ၃၁ နှစ်အရွယ်ရှိ ဟာရီကိန်းဟာ ဒီပွဲမှာ သွင်းယူခဲ့တဲ့ဂိုးကြောင့် ဒီရာသီ ချန်ပီယံလိဂ်ပြိုင်ပွဲမှာ သွင်းဂိုး ၁၀ ဂိုးအထိ ရှိလာခဲ့တာပါ။ 

အဲဒါကြောင့် ဟာရီကိန်းဟာ ချန်ပီယံလိဂ်ပြိုင်ပွဲ သမိုင်းမှာ တစ်ရာသီအတွင်း ၁၀ ဂိုး သွင်းယူနိုင်တဲ့ ပထမဆုံး အင်္ဂလိပ် ကစားသမားအဖြစ် စံချိန်သစ် တင်နိုင်ခဲ့တာဖြစ်ပါတယ်။

ဟာရီကိန်းဟာ ဒီပွဲမှာ သွင်းဂိုးအပြင် ဂိုးဖန်တီးမှုလည်း ပြုလုပ်နိုင်ခဲ့တဲ့အတွက် ပွဲရဲ့အကောင်းဆုံး ကစားသမားဆု ကိုလည်း ရရှိခဲ့တာပါ။ 

ဟာရီကိန်းဟာ ဒီရာသီမှာ ဘိုင်ယန်မြူးနစ်အသင်းအတွက် ပြိုင်ပွဲစုံ ၃၆ ပွဲ ကစားထားပြီး ၃၂ ဂိုးသွင်းယူထားတာ ဖြစ်ပါတယ်။

ဘိုင်ယန်မြူးနစ်အသင်းနည်းပြ ကွန်ပနီက ဟာရီကိန်းဟာ သူ့ရဲ့အသက်အရွယ်အရ ပိုကောင်းလာပြီး သူ့ကို ယုံကြည်မှုရှိတယ်လို့ ပြောခဲ့တာပါ။ 

ဘိုင်ယန်မြူးနစ်အသင်းကို တွေ့ရစဉ်

ဟာရီကိန်းက လေဗာကူဆင်အသင်းကို နှစ်ကျော့စလုံး အနိုင်ရခဲ့တာဟာ သူတို့သွားနေတဲ့ လမ်းကြောင်းကို ပြသခဲ့ပြီး ပြင်ပမှာ ထွက်ပေါ်နေတဲ့ ဆူညံသံတွေကို နားမထောင်ဖို့ ကြိုးစားခဲ့တယ်လို့ ပြောခဲ့ပါတယ်။ 

ဘိုင်ယန်မြူးနစ်အသင်းဟာ လေဗာကူဆင်အသင်းကို ပထမအကျော့တုန်းကလည်း ၃ ဂိုး-ဂိုးမရှိနဲ့ အနိုင်ရခဲ့တဲ့ အတွက် နှစ်ကျော့ပေါင်း ရလဒ် ၅ ဂိုး-ဂိုးမရှိနဲ့ အနိုင်ရပြီး ချန်ပီယံလိဂ် ကွာတားဖိုင်နယ်ကို တက်နိုင်ခဲ့တာပါ။ 

ဘိုင်ယန်မြူးနစ်အသင်းဟာ ဘွန်ဒက်လီဂါပြိုင်ပွဲမှာ အမှတ်ပေးဇယားကို ဦးဆောင်ထားပြီး ချန်ပီယံလိဂ်ပြိုင်ပွဲမှာ ကွာတားဖိုင်နယ်ကို တက်နိုင်ခဲ့တာကြောင့် ဒီရာသီမှာ ဆုဖလား ၂ လုံးရယူနိုင်ဖို့ မျှော်လင့်ချက်တွေ ရှိနေပါတယ်။ 

ဘိုင်ယန်မြူးနစ်အသင်းဟာ ချန်ပီယံလိဂ် ကွာတားဖိုင်နယ်မှာ အင်တာမီလန်အသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ မတ်လ ၁၂

လီဗာပူးလ်အသင်းဟာ PSG အသင်းကို ပင်နယ်တီအဆုံးအဖြတ်နဲ့ အရေးနိမ့်ပြီး ချန်ပီယံလိဂ် ပြိုင်ပွဲကနေ ထွက်ခွာခဲ့ရပေမယ့် နည်းပြအာနီဆလော့က PSG အသင်းကို ဒီပြိုင်ပွဲမှာ ဗိုလ်စွဲဖို့ ရေပန်းစားတဲ့ အသင်းအဖြစ် သတ်မှတ်ခဲ့ခြင်းမရှိတာ ဖြစ်ပါတယ်။ 

အာနီဆလော့က “PSG က ဗိုလ်စွဲဖို့ ရေပန်းစားတဲ့အသင်း မဟုတ်ပါဘူး။ ရေပန်းစားတဲ့ အသင်းတွေကို ကျနော် မပြောချင်ပါဘူး။ PSG က အလွန်ကောင်းမွန်တဲ့ အသင်းဖြစ်ပေမယ့် ပြိုင်ပွဲမှာ အသင်းကောင်းတွေ အများကြီး ရှိနေပါသေးတယ်။ ပုံမှန်ဆိုရင် ဆီမီးဖိုင်နယ်နဲ့ ဗိုလ်လုပွဲမှာ ဒီအသင်းတွေနဲ့ တွေ့ရမှာဖြစ်ပေမယ့် ကံမကောင်းစွာနဲ့ ကျနော်တို့ဟာ ကမ္ဘာပေါ်မှာ အချမ်းသာဆုံး အသင်းတွေထဲက တစ်သင်းဖြစ်တဲ့ PSG အသင်းနဲ့ တွေ့ဆုံခဲ့ရပါတယ်”လို့ ပြောခဲ့တာပါ။

ချန်ပီယံလိဂ် ၁၆ သင်းအဆင့် ဒုတိယအကျော့ပွဲစဉ်အဖြစ် အန်ဖီးလ်ကွင်းမှာ ကစားခဲ့တဲ့ပွဲမှာ ပီအက်စ်ဂျီအသင်းက လီဗာပူးလ်အသင်းကို ၁ ဂိုး-ဂိုးမရှိနဲ့ အနိုင်ရရှိခဲ့တာ ဖြစ်ပါတယ်။

ပီအက်စ်ဂျီနဲ့ လီဗာပူးလ်အသင်း ယှဉ်ပြိုင်နေစဉ် 

ပထမအကျော့ပွဲစဉ်မှာ လီဗာပူးလ်အသင်းက ၁ ဂိုး-ဂိုးမရှိနဲ့ အနိုင်ရခဲ့တဲ့အတွက် နှစ်ကျော့ပေါင်း ရလဒ် ၁ ဂိုးစီ သရေကျနေလို့ အချိန်ပိုဆက်ပြီး ယှဉ်ပြိုင်ခဲ့ရတာပါ။ 

အချိန်ပိုမှာလည်း ဂိုးမသွင်းနိုင်ခဲ့တဲ့အတွက် ပင်နယ်တီ အဆုံးအဖြတ် ခံယူခဲ့ရပြီး ပီအက်စ်ဂျီအသင်းက ၄ ဂိုး-၁ ဂိုးနဲ့ အနိုင်ရရှိခဲ့တာ ဖြစ်ပါတယ်။

အဲဒါကြောင့် ဒီရာသီ ချန်ပီယံလိဂ်ပြိုင်ပွဲမှာ ဗိုလ်စွဲဖို့ ရေပန်းစားနေတဲ့ လီဗာပူးလ်အသင်းဟာ ပြိုင်ပွဲကနေ စောစီး စွာ ထွက်ခွာခဲ့ရပြီး PSG အသင်းက ကွာတားဖိုင်နယ်ကို တက်နိုင်ခဲ့တာပါ။ 

လီဗာပူးလ်အသင်းနည်းပြ အာနီဆလော့ကတော့ PSG အသင်းကို ချန်ပီယံလိဂ်ဖလားရဖို့ ရေပန်းစားတဲ့ အသင်းတွေထဲမှာ အဆင့်သတ်မှတ်ခဲ့ခြင်းမရှိတာ ဖြစ်ပါတယ်။ 

ဒါအပြင် ဒတ်ချ်လူမျိုးနည်းပြ အာနီဆလော့က ဒီပွဲဟာ သူပါဝင်ခဲ့ဖူးသမျှ ဘောလုံးပွဲတွေထဲမှာ အကောင်းဆုံးပွဲ ဖြစ်တယ်လို့လည်း ပြောခဲ့တာပါ။ 

PSG အသင်းနည်းပြ လူးဝစ်အင်းနရစ်က ၂ သင်းစလုံးဟာ ကွာတားဖိုင်နယ်ကို တက်ရောက်ဖို့ ထိုက်တန်တယ်လို့ ပွဲအပြီးမှာ ပြောခဲ့ပါတယ်။

လီဗာပူးလ်အသင်းဟာ ချန်ပီယံလိဂ်ပြိုင်ပွဲကနေ ထွက်ခွာခဲ့ရပေမယ့် ဒီရာသီမှာ ရယူနိုင်စရာ ဆုဖလားအဖြစ် ပရီးမီးယားလိဂ်နဲ့ ကာရာဘောင်းဖလား ရယူနိုင်ဖို့ ရှိနေတာပါ။ 

လီဗာပူးလ်အသင်းဟာ မတ်လ ၁၆ ရက်မှာ ကာရာဘောင်းလိဂ် ဖလားဗိုလ်လုပွဲအဖြစ် နယူးကာဆယ်အသင်းနဲ့ ယှဉ်ပြိုင်ရမှာဖြစ်ပါတယ်။ 

Source: Metro

CNI Sport News

၂၀၂၅ ခုနှစ်၊ မတ်လ ၁၁

လာမယ့်နွေရာသီမှာ တိုက်စစ်မှူးခေါ်ယူပြီး တိုက်စစ် အခက်အခဲတွေကို ဖြေရှင်းဖို့ ကြိုးစားနေတဲ့ အာဆင်နယ် အသင်းဟာ ဖရန့်ဖတ်အသင်း တိုက်စစ်မှူး ဟူဂို အီကီတီကီကို ခေါ်ယူဖို့ စိတ်ဝင်စားနေပါတယ်။ 

Sky Sports သတင်းထောက် ဆာချာက ဟူဂို အီကီတီကီကို ခေါ်ယူဖို့ အာဆင်နယ်အသင်းရဲ့ စိတ်ဝင်စားမှုကို ဖော်ပြခဲ့ပေမယ့် နယူးကာဆယ်အသင်းကလည်း သူ့ကိုခေါ်ယူဖို့ မေးမြန်းစုံစမ်းမှုတွေ ပြုလုပ်ထားတာပါ။ 

အသက် ၂၂ နှစ်အရွယ်ရှိ ဟူဂို အီကီတီကီဟာ လာမယ့်နွေရာသီမှာ ဖရန့်ဖတ်အသင်းကနေ ထွက်ခွာချင်နေတာ ဖြစ်ပြီး ဂျာမန်ကလပ်ဟာ သူ့အတွက် ယူရိုသန်း ၈၀ တန်ကြေး သတ်မှတ်ထားတာ ဖြစ်ပါတယ်။ 

ပြင်သစ်တိုက်စစ်မှူး ဟူဂို အီကီတီကီဟာ ဒီရာသီမှာ ဖရန့်ဖတ်အသင်းအတွက် ၃၅ ပွဲ ကစားထားပြီး ၁၈ ဂိုးသွင်း ယူထားတာပါ။ 

အာဆင်နယ်အသင်းဟာ ဒီရာသီမှာ ပရီးမီးယားလိဂ်ဖလားကို ထပ်ပြီး လက်လွှတ်ရဖို့ နီးစပ်နေတာကြောင့် လာမယ့်ရာသီအတွက် အဆုံးသတ်ကောင်းတဲ့ တိုက်စစ်မှူးတစ်ဦးကို ခေါ်ယူဖို့ ကြိုတင်ပြင်ဆင်နေတာ ဖြစ်ပါတယ်။

ဟူဂို အီကီတီကီကိုကို တွေ့ရစဉ်

ဒီရာသီမှာ အာဆင်နယ်အသင်းရဲ့ တိုက်စစ်မှူးတွေဖြစ်တဲ့ ဂျီးဆပ်စ်နဲ့ ဟာဗက်ဇ်တို့ဟာ ရာသီအကုန်ထိ အနားယူ ရမယ့် ဒဏ်ရာရရှိထားပြီး အဓိက တောင်ပံကစားသမား ဆာကာကိုလည်း ကာလရှည်ကြာ အနားပေးထား ရပါတယ်။ 

အဲဒါကြောင့် အရပ် ၆ ပေ ၃ လက်မရှိတဲ့ ဟူဂို အီကီတီကိုခေါ်ယူပြီး သူတို့ရဲ့ တိုက်စစ် အခက်အခဲတွေကို ဖြေရှင်းဖို့ အာဆင်နယ်အသင်းက စိတ်ဝင်စားနေတာပါ။ 

ဒါပေမယ့် ဖရန့်ဖတ်အသင်း သတ်မှတ်ထားတဲ့ ပြောင်းရွှေ့ကြေးကို အာဆင်နယ်အသင်းဘက်က ပေးဖို့တော့ မသေချာပါဘူး။ 

အာဆင်နယ်အသင်းဟာ စပို့တင်းလစ္စဘွန်းအသင်း တိုက်စစ်မှူး ယိုကီရက်စ်၊ လိုက်ပ်ဇစ်အသင်း တိုက်စစ်မှူး ဆက်စ်ကို,ကိုလည်း ခေါ်ယူမယ့် တိုက်စစ်မှူး စာရင်းထဲမှာ ထည့်သွင်းထားပါတယ်။ 

အာဆင်နယ်အသင်းဟာ ဒီရာသီမှာ ရယူနိုင်စရာဆုဖလား မျှော်လင့်ချက်ဖြစ်တဲ့ ချန်ပီယံလိဂ်ဖလားကို ရယူနိုင်ဖို့ အာရုံစိုက်နေပြီး PSV အသင်းနဲ့ ၁၆ သင်းအဆင့် ဒုတိယအကျော့ ပွဲစဉ်ယှဉ်ပြိုင်ရမှာပါ။ 

အာဆင်နယ်အသင်းဟာ ပထမအကျော့ပွဲစဉ်က PSV အသင်းကို ၇ ဂိုး-၁ ဂိုးနဲ့ ဂိုးပြတ် အနိုင်ရရှိခဲ့တာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ မတ်လ ၁၂

နယူးကာဆယ်အသင်းက ဝက်စ်ဟမ်းအသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ ပရီးမီးယားလိဂ် ပွဲအပြီးမှာ အသင်း ခေါင်းဆောင် ဘရူနိုဂွီမာရေ့စ်က ကာရာဘောင်းလိဂ်ဖလား ဗိုလ်လုပွဲမတိုင်ခင် လီဗာပူးလ်အသင်းကို သတိပေးမှု ပြုလုပ်ခဲ့ပါတယ်။ 

ဘရူနိုဂွီမာရေ့စ်က “ကျနော်တို့ လီဗာပူးလ်အသင်းကို အနိုင်ယူနိုင်မယ်လို့ ထင်ပါတယ်။ ဒါက ဗိုလ်လုပွဲဖြစ်ပြီး ဘာမဆို ဖြစ်သွားနိုင်ပါတယ်။ ကျနော်တို့ဟာ ပရိသတ်တွေအတွက် ကြီးမားတဲ့ ပြောင်းလဲမှုကို ပြုလုပ်နိုင်ပါတယ်။ ကျနော်တို့ဟာ ကလပ်သမိုင်းကြောင်းကို ဖန်တီးချင်တဲ့အတွက် ဒါက ကျနော်တို့အတွက် ကမ္ဘာ့ဖလားဗိုလ်လုပွဲ လိုပါပဲ။ ကျနော်တို့ဟာ ဆုဖလားတွေ ရယူနိုင်မယ်လို့ ယုံကြည်ပြီး ဝက်စ်ဟမ်းအသင်းနဲ့ ပွဲက နိုင်ပွဲဟာ ဗိုလ်လုပွဲ မတိုင်ခင် ယုံကြည်မှုတွေပြန်ရဖို့ ကောင်းမွန်တဲ့ နိုင်ပွဲဖြစ်ခဲ့တယ်”လို့ Sky Sports ကိုပြောခဲ့တာပါ။

ဘရူနိုဂွီမာရေ့စ်ဟာ ဝက်စ်ဟမ်းအသင်းကို အနိုင်ရခဲ့တဲ့ပွဲမှာ နယူးကာဆယ်အသင်းအတွက် တစ်လုံးတည်းသော အနိုင်ဂိုးကို သွင်းယူခဲ့တာ ဖြစ်ပါတယ်။

နယူးကာဆယ်အသင်းအသင်း ယှဉ်ပြိုင်နေစဉ်

နယူးကာဆယ်အသင်းဟာ ဒီနိုင်ပွဲကြောင့် ပရီးမီးယားလိဂ် အမှတ်ပေးဇယားအဆင့် ၆ နေရာကို တက်နိုင်ခဲ့ပြီး အဆင့် ၄ နေရာက ချယ်လ်ဆီးအသင်းနဲ့ ၂ မှတ်သာ ကွာဟတော့တာပါ။

နယူးကာဆယ်အသင်းဟာ အခုလာမယ့်ပွဲအဖြစ် လီဗာပူးလ်အသင်းနဲ့ ကာရာဘောင်းလိဂ်ဖလား ဗိုလ်လုပွဲ ယှဉ်ပြိုင်ရမှာ ဖြစ်ပါတယ်။ 

နယူးကာဆယ်အသင်းဟာ ၁၉၅၅ ခုနှစ်က FA ဖလားပြိုင်ပွဲမှာ ချန်ပီယံဆု ရယူပြီးနောက်ပိုင်း အဓိကဆုဖလား တွေနဲ့ ဝေးကွာနေခဲ့တာပါ။ 

နယူးကာဆယ်အသင်းဟာ ၂၀၂၂-၂၃ ရာသီက ကာရာဘောင်းလိဂ် ဖလားပြိုင်ပွဲမှာ ဗိုလ်လုပွဲ တက်နိုင်ခဲ့ပေမယ့် ယူနိုက်တက်အသင်းကို အရေးနိမ့်ခဲ့တာကြောင့် ဆုဖလားရယူနိုင်မယ့် မျှော်လင့်ချက်ကို အဆုံးသတ်ခဲ့ရပါတယ်။ 

အဲဒါကြောင့် ဘရူနိုဂွီမာရေ့စ်က အခုတစ်ကြိမ် ယှဉ်ပြိုင်ရမယ့် ကာရာဘောင်းလိဂ် ဖလားဗိုလ်လုပွဲမှာ လီဗာပူးလ် အသင်းကို အနိုင်ယူပြီး နယူးကာဆယ်အသင်းအတွက် ချန်ပီယံဆုရယူပေးနိုင်မယ်လို့ ယုံကြည်နေတာပါ။ 

နယူးကာဆယ်အသင်းနည်းပြ အက်ဒီဟိုဝီက ကာရာဘောင်းလိဂ် ဖလားဗိုလ်လုပွဲအတွက် ပွဲထွက်ဂိုးသမား နေရာကို အခုအချိန်မှာ မဆုံးဖြတ်ရသေးကြောင်းနဲ့ ဒီပွဲအတွက် အားလုံး အဆင်သင့်ဖြစ်နေဖို့ လိုတယ်လို့ ပြောခဲ့ပါတယ်။ 

Source: Metro

CNI Sport News

၂၀၂၅ ခုနှစ်၊ မတ်လ ၁၁

ဆော်ဒီကလပ် အယ်လ်နာဆာအသင်းဟာ အာရှချန်ပီယံလိဂ် ၁၆ သင်းအဆင့် ဒုတိယအကျော့ပွဲစဉ်မှာ အီရန် ကလပ် အက်စတီဂေါလ်အသင်းကို ၃ ဂိုး-ဂိုးမရှိနဲ့ အနိုင်ရပြီး ကွာတားဖိုင်နယ်ကို တက်နိုင်ခဲ့ပါတယ်။ 

ဒီပွဲစဉ်ရဲ့ ပထမအကျော့တုန်းက ဂိုးမရှိ သရေကျခဲ့တဲ့အတွက် နှစ်ကျော့ပေါင်း ရလဒ် ၃ ဂိုး-ဂိုးမရှိနဲ့ အယ်လ်နာဆာ အသင်း အနိုင်ရရှိပြီး အာရှချန်ပီယံလိဂ် ကွာတားဖိုင်နယ်ကို တက်နိုင်ခဲ့တာပါ။

အယ်လ်နာဆာအသင်းအတွက် ဂိုးတွေကို ဒူရမ်က ၂ ဂိုးနဲ့ အသင်းခေါင်းဆောင် ရော်နယ်ဒိုက ၁ ဂိုးသွင်းယူခဲ့တာ ဖြစ်ပါတယ်။ 

အာရှချန်ပီယံလိဂ်ပြိုင်ပွဲဟာ ဒီရာသီမှာ အယ်လ်နာဆာအသင်း ရယူနိုင်တဲ့ တစ်လုံးတည်းသော ဆုဖလား မျှော်လင့်ချက် ဖြစ်တာကြောင့် အယ်လ်နာဆာအသင်းဟာ ဒီပြိုင်ပွဲအပေါ် ပိုပြီးအာရုံစိုက်နေခဲ့တာပါ။ 

ရော်နယ်ဒိုကို တွေ့ရစဉ်

အယ်လ်နာဆာအသင်း တောင်ပံကစားသမား မာနေးက “ကျနော်တို့ ကောင်းမွန်စွာ ကစားနိုင်ခဲ့တယ်လို့ ကျနော် ထင်ပါတယ်။ ကျနော်တို့ဟာ အခွင့်အရေးတွေ အများကြီး ဖန်တီးနိုင်ခဲ့ပြီး ၃ ဂိုး သွင်းနိုင်ခဲ့ပါတယ်။ ဒါက ကျနော် တို့နဲ့ ထိုက်တန်တဲ့ရလဒ်ပါ။ ကျနော်တို့ ပေးဂိုးမပေးရတဲ့ နိုင်ပွဲရယူနိုင်ခဲ့ပြီး ဒီထက်ပိုမမျှော်လင့်ထားပါဘူး”လို့ ပြောခဲ့တာပါ။ 

ဒီပွဲမှာ အယ်လ်နာဆာအသင်းအတွက် ၁ ဂိုးသွင်းယူခဲ့တဲ့ ရော်နယ်ဒိုဟာ ဒီရာသီ အာရှချန်ပီယံလိဂ်ပြိုင်ပွဲမှာ ၇ ဂိုး သွင်းယူထားပြီး ဂိုးသွင်း အများဆုံး ထိပ်ဆုံးစာရင်းထဲမှာ ရပ်တည်နေတာ ဖြစ်ပါတယ်။ 

ရော်နယ်ဒိုဟာ ပွဲအပြီး သူ့ရဲ့ဆိုရှယ်မီဒီယာပေါ်မှာ “ကွာတားဖိုင်နယ်ဆီ၊ ကျနော်တို့လာပြီ”လို့ ရေးသားထား တာပါ။ 

အသက် ၄၀ နှစ်အရွယ်ရှိ ရော်နယ်ဒိုဟာ ဒီရာသီမှာ အယ်လ်နာဆာအသင်းအတွက် ၃၂ ပွဲ ပါဝင်ကစားထားပြီး ၂၇ ဂိုး သွင်းယူထားပါတယ်။ 

ဒီရာသီ ဆော်ဒီပရိုလိဂ်ပြိုင်ပွဲမှာ အမှတ်ပေးဇယားအဆင့် ၄ နေရာမှာ ရပ်တည်နေတဲ့ အယ်လ်နာဆာအသင်းဟာ လာမယ့် လိဂ်ပွဲစဉ်အဖြစ် အယ်လ်ခိုလွတ်အသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ မတ်လ ၁၁

ယူနိုက်တက်အသင်း ပူးတွဲပိုင်ရှင် ဆာဂျင်ရက်ကလစ်ဖ်က အသင်းရဲ့ ကစားသမားအချို့ဟာ လုံလောက်အောင် ကောင်းမွန်မှု မရှိသလို အချို့ကို ပိုပြီးပေးခဲ့ရတယ်လို့ BBC နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့ပါတယ်။

ဆာဂျင်ရက်ကလစ်ဖ်က “ကျနော်တို့ အန်တိုနီ၊ ကတ်စီမီရို၊ အိုနာနာ၊ ဟော့ဂျ်လန်းနဲ့ ဆန်ချိုတို့ကို ဝယ်ယူခဲ့ပါ တယ်။ ဒီဝယ်ယူမှုတွေကို ကြိုက်သည်ဖြစ်စေ၊ မကြိုက်သည်ဖြစ်စေ အတိတ်မှာဖြစ်ခဲ့တဲ့ အရာတွေပါ။ ဆန်ချို ဆိုရင် ချယ်လ်ဆီးမှာ ကစားနေပေမယ့် ကျနော်တို့ဟာ သူ့ရဲ့လုပ်ခတစ်ဝက်ကို ပေးချေနေရပါတယ်။ နွေရာသီမှာ သူ့ကိုဝယ်ဖို့ ကျနော်တို့ဟာ ပေါင် ၁၇ သန်း ပေးချေနေရပါတယ်။ ကစားသမားအချို့ဟာ လုံလောက်အောင် ကောင်းမွန်မှု မရှိသလို အချို့ဆိုရင် ပိုပြီးပေးခဲ့ရပါတယ်။ ကျနော်တို့ဟာ အသင်းကို ပုံသွင်းနိုင်ဖို့အတွက် အချိန် ယူရပါလိမ့်မယ်”လို့ ပြောခဲ့တာပါ။ 

ယူနိုက်တက်အသင်းဟာ ဆန်ချိုအတွက် ပြောင်းရွှေ့ကြေး ပေါင် ၇၃ သန်း၊ အန်တိုနီအတွက် ပေါင် ၈၁ သန်း၊ ကတ်စီမီရိုအတွက် ပေါင်သန်း ၇၀၊ ဟော့ဂျ်လန်းအတွက် ပေါင် ၇၂ သန်း၊ အိုနာနာအတွက် ပေါင် ၄၇ သန်းသုံးစွဲပြီး ခေါ်ယူခဲ့ရတာ ဖြစ်ပါတယ်။ 

ယူနိုက်တက်အသင်းကို တွေ့ရစဉ်

မန်ချက်စတာကလပ်ဟာ ဆန်ချိုကို ရာသီအကုန်မှာ အပြီးသတ် ဝယ်ယူခွင့် ပါဝင်တဲ့ အငှားစာချုပ်နဲ့ ချယ်လ်ဆီး အသင်းထံ အငှားချခဲ့ပြီး အန်တိုနီကို ဘက်တစ်အသင်းထံ အငှားချခဲ့တာပါ။ 

ဆာဂျင်ရက်ကလစ်ဖ် မရောက်လာခင်မှာ ဝယ်ယူခဲ့တဲ့ ဒီကစားသမားတွေ အားလုံးဟာ ယူနိုက်တက်အသင်းမှာ ခြေစွမ်းပြသနိုင်ဖို့ ရုန်းကန်ခဲ့ရတာဖြစ်ပါတယ်။ 

ဆာဂျင်ရက်ကလစ်ဖ်က ယူနိုက်တက်အသင်းမှာ ဘရူနိုဖာနန်ဒက်စ်လို ကောင်းမွန်တဲ့ ကစားသမားအချို့ ရှိတယ်လို့လည်း ပြောခဲ့တာပါ။

ဒါအပြင် ဆာဂျင်ရက်ကလစ်ဖ်က ပေါ်တူဂီလူမျိုးနည်းပြ အာမိုရင်ဟာ အသင်းမှာ အချိန်အကြာကြီး ရှိမယ်လို့ ထင်ကြောင်းလည်း ပြောခဲ့ပါတယ်။ 

ယူနိုက်တက်အသင်းရဲ့ အမာခံ ပရိသတ်ဖြစ်တဲ့ ဆာဂျင်ရက်ကလစ်ဖ်ဟာ ကလပ်ရဲ့ရှယ်ယာ ၂၈.၉၄ ရာခိုင်နှုန်း အတွက် ပေါင် ၁.၃ ဘီလီယံ သုံးစွဲခဲ့ပြီးနောက် သူ့ရဲ့ INEOS ဟာ ကလပ်ရဲ့ ဘောလုံးလည်ပတ်မှုတွေကို ထိန်းချုပ်ခဲ့တာပါ။

ဆာဂျင်ရက်ကလစ်ဖ်ဟာ အသင်းရဲ့ ဘဏ္ဍာရေး အခြေအနေကြောင့် ဝန်ထမ်း အများအပြား လျှော့ချတာတွေ အပါအဝင် အသုံးစရိတ်တွေကို ကန့်သတ်နေတာကြောင့် ဝေဖန်မှုတွေလည်း ခံနေရပါတယ်။

ထောင်နဲ့ချီတဲ့ ယူနိုက်တက်အသင်း ပရိသတ်တွေဟာ ပြီးခဲ့တဲ့ အာဆင်နယ်အသင်းနဲ့ ပွဲမတိုင်ခင်က အသင်း ပိုင်ရှင်တွေကို ဆန့်ကျင်တဲ့ ဆန္ဒပြမှုတွေကို ပြုလုပ်ခဲ့ကြတာဖြစ်ပါတယ်။ 

Source:CNA

CNI Sport News

၂၀၂၅ ခုနှစ်၊ မတ်လ ၁၀

အတ္တလန်တာအသင်းဟာ ဂျူဗင်တပ်စ်အသင်းကို ၄ ဂိုး-ဂိုးမရှိနဲ့ အနိုင်ရခဲ့ပြီးနောက် အမှတ်ပေးဇယား ထိပ်ဆုံး နေရာက အင်တာမီလန်အသင်းနဲ့ ၃ မှတ်သာ ကွာဟတော့တာကြောင့် နည်းပြ ဂတ်စ်ပါရီနီက အသင်းအနေနဲ့ စီးရီးအေဖလား ရယူနိုင်မယ့် ယုံကြည်မှုရှိရမယ်လို့ ပြောခဲ့ပါတယ်။ 

ဂတ်စ်ပါရီနီက “ကျနော်တို့ဟာ သူတို့ရဲ့ အိပ်မက်တွေကို ဘယ်တော့မှ မရပ်တန့်စေရပါဘူး။ မဖြစ်နိုင်ဘူးလို့ ပြော နိုင်ပေမယ့် လုံလောက်တဲ့ ယုံကြည်မှုရှိရင် အရာအားလုံးက ဖြစ်နိုင်ပါတယ်။ အင်တာနဲ့ နာပိုလီအသင်းတို့ဟာ အလွန်ကောင်းတဲ့ အသင်းတွေဆိုတာ ကျနော်တို့ သိပါတယ်။ အင်တာမီလန်နဲ့ပွဲမှာ ကျနော်တို့ရလဒ်တွေ ဆိုးခဲ့ပေ မယ့် ဒါကလည်း အချက်ပြမှု ဖြစ်နိုင်ပါတယ်။ ကျနော်တို့ဟာ ရာသီရဲ့ဒီအဆင့်မှာ ထိပ်ဆုံးနေရာနားကို ဘယ်တုန်း ကမှ မရောက်ဖူးတဲ့အတွက် ဘာတွေ ဖြစ်မလာဆိုတာကို ဘယ်တော့မှမသိဘူး”လို့ ပြောခဲ့တာပါ။ 

အတ္တလန်တာအသင်းကို တွေ့ရစဉ်

အတ္တလန်တာအသင်းဟာ ဂျူဗင်တပ်အသင်းရဲ့ စီးရီးအေ ၅ ပွဲဆက် နိုင်ပွဲရရှိတာကို ရပ်တန့်ခဲ့ပြီးနောက် အဆင့် ၁ နေရာက အင်တာမီလန်အသင်းနဲ့ ၃ မှတ်၊ အဆင့် ၂ နေရာက နာပိုလီအသင်းနဲ့ ၂ မှတ်အကွာ အဆင့် ၃ နေရာမှာ ရပ်တည်နေတာ ဖြစ်ပါတယ်။

အတ္တလန်တာအသင်းဟာ လာမယ့် စီးရီးအေပွဲစဉ်အဖြစ် အင်တာမီလန်အသင်းနဲ့ ယှဉ်ပြိုင်ရမှာဖြစ်ပြီး အနိုင်ရခဲ့ရင် စီးရီးအေ ထိပ်ဆုံးနေရာကို တက်နိုင်မယ့် အခွင့်အရေးကောင်းတွေ ရရှိမှာပါ။ 

အတ္တလန်တာအသင်းနည်းပြ ဂတ်စ်ပါရီနီဟာ ဂျူဗင်တပ်စ်အသင်းနဲ့ပွဲမှာ ခြေစွမ်းပြသနိုင်ခဲ့တဲ့ လွတ်ခ်မန်းကို ချီးကျူးခဲ့ပါတယ်။

ဂတ်စ်ပါရီနီဟာ ပြီးခဲ့တဲ့ ချန်ပီယံလိဂ်ပွဲစဉ်မှာ ပင်နယ်တီ လွဲချော်ခဲ့တဲ့ လွတ်ခ်မန်းကို အဆိုးရွားပင်နယ်တီ ကန်သွင်းတဲ့ သူတွေထဲက တစ်ဦးလို့ ဝေဖန်ခဲ့တာပါ။ 

လွတ်ခ်မန်းဟာ ဒီရာသီမှာ အတ္တလန်တာအသင်းအတွက် ၃၁ ပွဲ ကစားထားပြီး ၁၈ ဂိုး သွင်းယူထားပါတယ်။ 

ပြီးခဲ့တဲ့ရာသီက ယူရိုပါလိဂ်ဖလား ရယူနိုင်ခဲ့တဲ့ အတ္တလန်တာအသင်းဟာ ဒီရာသီမှာ ရယူနိုင်စရာ ဆုဖလားအဖြစ် စီးရီးအေဖလားသာ ရှိတော့တာကြောင့် ဒီဆုဖလားကို ရယူနိုင်ဖို့ မျှော်လင့်နေတာ ဖြစ်ပါတယ်။ 

Source: CNA