- By CNI
- Category: အားကစား
- Hits: 286
CNI Sport News
၂၀၂၅ ခုနှစ်၊ စက်တင်ဘာ ၂၉
အာဆင်နယ်အသင်းက နယူးကာဆယ်အသင်းကို နောက်ကျ အနိုင်ဂိုးကြောင့် ၂ ဂိုး-၁ ဂိုးနဲ့ အနိုင်ရခဲ့ပြီးနောက် နည်းပြ အာတီတာက သူတို့ဟာ နောက်တစ်ဆင့်ကို တက်နိုင်တယ်ဆိုတာ သက်သေပြသခဲ့တယ်လို့ ပြောခဲ့ပါ တယ်။
အာတီတာက “နောက်တစ်ဆင့်တက်ဖို့နဲ့ အတိတ်မှာ ဖြစ်ခဲ့တဲ့ အရာတွေကို ဘယ်လို သင်ယူရမလဲဆိုတာ ကျနော် တို့ ဆွေးနွေးခဲ့ပါတယ်။ အသင်းဟာ ဒီပွဲမှာ ထူးခြားတဲ့ အရာတွေကို လုပ်ပြနိုင်ခဲ့ပါတယ်။ ကျနော်တို့ဟာ အလွန် ခက်ခဲတဲ့ကွင်းမှာ နည်းမျိုးစုံနဲ့ကစားပြီး သတ်မှတ်ထားတဲ့ ပုံစံအတိုင်း အနိုင်ရယူနိုင်ခဲ့တာကို ပြသခဲ့ပါတယ်။ ဘောလုံးဆိုတာ စိတ်ခံစားမှုနဲ့ ဖြတ်သန်းရတဲ့ အရာဖြစ်ပြီး ပွဲအပြီးမှာ ကျနော်တို့ဟာ လှပတဲ့အရာတစ်ခု ရခဲ့ပါ တယ်”လို့ သတင်းထောက်တွေကို ပြောခဲ့တာပါ။
ဒီပွဲမှာ အာဆင်နယ်အသင်းဟာ ဝေါ်လ်တီမာဒီရဲ့ သွင်းဂိုးနဲ့ နယူးကာဆယ်အသင်းရဲ့ ဦးဆောင်ခြင်းကို ခံခဲ့ရပေမယ့် လူစားဝင်လာတဲ့ မယ်ရီနိုက ပွဲချိန် ၈၄ မိနစ်မှာ အာဆင်နယ်အသင်းအတွက် ချေပဂိုး သွင်းယူပေးခဲ့ပါတယ်။
အာဆင်နယ်အသင်းအတွက် အနိုင်ဂိုးကို ပွဲချိန်မိနစ် ၉၀ ပြည့်ပြီး ထပ်ဆောင်းအချိန်ပို ၆ မိနစ်မှာ ဂါဘရီရယ်လ်က သွင်းယူခဲ့တာပါ။
အာဆင်နယ်နဲ့နယူးကာဆယ် ယှဉ်ပြိုင်နေစဉ်
အာဆင်နယ်အသင်းဟာ ဒီပွဲစဉ်ရဲ့ အစောပိုင်းမှာ ပင်နယ်တီရနိုင်မယ့် အခွင့်အရေးကို ကွင်းလယ်ဒိုင်လူကြီးက ငြင်းပယ်ခဲ့တာကြောင့် နစ်နာခဲ့ရပေမယ့် နောက်ကျ အနိုင်ဂိုးကြောင့် နိုင်ပွဲရရှိခဲ့တာဖြစ်ပါတယ်။
အာဆင်နယ်အသင်းဟာ ဒီနိုင်ပွဲကြောင့် ထိပ်ဆုံးနေရာမှာ ရပ်တည်နေတဲ့ လီဗာပူးလ်အသင်းနဲ့ ၂ မှတ်အကွာ အဆင့် ၂ နေရာမှာ ရပ်တည်နေတာပါ။
အာဆင်နယ်အသင်း နည်းပြ အာတီတာက ယိုကီရက်စ်ရဲ့ ဖျက်ထုတ်ခံရမှုမှာ သူတို့သေချာပေါက် ပင်နယ်တီ ရရှိသင့်တယ်လို့ ပြောခဲ့သလို တောင်ပံကစားသမား ဆာကာကလည်း ဆုံးဖြတ်ချက်တွေက အသင်းကို အမြဲတမ်း ဆန့်ကျင်နေပေမယ့် နောက်ဆုံးမှာထိုက်တန်တဲ့အရာကို ရခဲ့တယ်လို့ ပြောခဲ့ပါတယ်။
နယူးကာဆယ်အသင်းဟာ ထပ်ဆောင်း အချိန်ပိုမှာ ပေးခဲ့ရတဲ့သွင်းဂိုးကြောင့် ဒီရာသီ ဒုတိယမြောက် ရှုံးပွဲ ကြုံတွေ့ခဲ့ပြီးနောက် နည်းပြ အက်ဒီဟောင်းက သူတို့အကောင်းဆုံး မလုပ်နိုင်ခဲ့ဘူးလို့ ပြောခဲ့ပါတယ်။
လာမယ့် ကြားရက်ထဲမှာ ချန်ပီယံလိဂ် ပွဲစဉ်တွေအဖြစ် အာဆင်နယ်အသင်းက အိုလံပီယာကို့စ်၊ နယူးကာဆယ် အသင်းက အူနယွန်း SG အသင်းတို့နဲ့ ယှဉ်ပြိုင်ရမှာဖြစ်ပါတယ်။
Source: ESPN
- By CNI
- Category: အားကစား
- Hits: 467
CNI Sport News
၂၀၂၅ ခုနှစ်၊ စက်တင်ဘာ ၂၆
အင်တာမိုင်ယာမီအသင်း ကွင်းလယ်လူ ဘတ်စ်ကွက်က သူဟာ ၂၀၂၅ မေဂျာလိဂ်ပြိုင်ပွဲ ရာသီကုန်မှာ ကစား သမား ဘဝကနေ အနားယူမယ်လို့ ကြေညာခဲ့ပါတယ်။
ဘတ်စ်ကွက်က “ပရော်ဖက်ရှင်နယ် ဘောလုံးသမား တစ်ဦးအနေနဲ့ ကျနော့်ရဲ့ ကစားသမားဘဝကို နှုတ်ဆက်ရ မယ့် အချိန်ရောက်ပြီလို့ ခံစားရပါတယ်။ ကျနော် အမြဲအိပ်မက်မက်ခဲ့တဲ့ ဒီမယုံကြည်နိုင်စရာကောင်းတဲ့ ဇာတ် လမ်းကို ခံစားခဲ့ရတာ နှစ်ပေါင်း ၂၀ နီးပါးရှိပါပြီ။ ဘောလုံးက အကောင်းဆုံးခရီးသွားဖော်တွေနဲ့အတူ အံ့သြစရာ ကောင်းတဲ့ နေရာတွေမှာ ထူးခြားတဲ့ အတွေ့အကြုံတွေကို လက်ဆောင်ပေးခဲ့ပါတယ်။ ဘာစီလိုနာ၊ စပိန် လက်ရွေးစင်နဲ့ အင်တာမိုင်ယာမီအသင်းတို့ကို အလွန်ကျေးဇူးတင်ပါတယ်”လို့ Instagram မှာ ပြောခဲ့တာပါ။
အသက် ၃၇ နှစ်အရွယ်ရှိ ဘတ်စ်ကွက်စ်ဟာ ဘာစီလိုနာအသင်းအတွက် ပွဲပေါင်း ၇၀၀ ကျော် ပါဝင်ကစားခဲ့ပြီး လာလီဂါဖလား ၉ ကြိမ်၊ ချန်ပီယံလိဂ်ဖလား ၃ ကြိမ် အပါအဝင် ဆုဖလား အများအပြား ရယူနိုင်ခဲ့ပါတယ်။
ဘတ်စ်ကွက်စ်ဟာ စပိန်လက်ရွေးစင်အသင်းနဲ့အတူ ကမ္ဘာ့ဖလား၊ ယူရိုချန်ပီယံ ဖလားတို့ကိုလည်း ရယူနိုင်ခဲ့တာ ပါ။
ဘတ်စ်ကွတ်စ်ကို တွေ့ရစဉ်
၂၀၂၃ ခုနှစ်မှာ မက်ဆီ၊ အယ်လ်ဘာတို့နဲ့အတူ အင်တာမိုင်ယာမီအသင်းကို ရောက်ရှိလာခဲ့တဲ့ ဘတ်စ်ကွက်စ်ဟာ မေဂျာလိဂ်ကလပ်နဲ့ လိဂ်ဖလား၊ Supporters' Shield တို့ကိုလည်း ရရှိခဲ့ပါတယ်။
ဘတ်စ်ကွက်စ်က သူ့ရဲ့အသင်းဖော်တွေ အပါအဝင် လှပပြီးမမေ့နိုင်တဲ့ အခိုက်အတန့်တွေကို မျှဝေပေးခဲ့ကြတဲ့ သူတွေ အားလုံးကို ကျေးဇူးတင်ကြောင်းလည်း ပြောခဲ့ပါတယ်။
ဘတ်စ်ကွက်စ်နဲ့ အင်တာမိုင်ယာမီအသင်းတို့ရဲ့ စာချုပ်ဟာ ဒီရာသီကုန်ရင် ကုန်ဆုံးမှာပါ။
အင်တာမိုင်ယာမီအသင်းဟာ မေဂျာလိဂ် ပလေးအော့ဖ် ဝင်ခွင့်နေရာ ရရှိထားတာကြောင့် ဘတ်စ်ကွက်စ်ဟာ ဆုဖလားတစ်ခု ထပ်မံရယူပြီး ကစားသမားဘဝကို အဆုံးသတ်နိုင်မယ့် အခွင့်အရေး ပိုင်ဆိုင်ထားတာ ဖြစ်ပါတယ်။
Source: ESPN
- By CNI
- Category: အားကစား
- Hits: 298
CNI Sport News
၂၀၂၅ ခုနှစ်၊ စက်တင်ဘာ ၂၆
ဘိုင်ယန်မြူးနစ်အသင်းဟာ နည်းပြကွန်ပနီရဲ့အစီအစဉ်မှာ ပါဝင်ခြင်းမရှိတဲ့ ပေါ်တူဂီကွင်းလယ်လူ ပယ်လ်ဟင်ညာကို စပါးအသင်း အပြီးသတ်ခေါ်ယူနိုင်ဖို့ မျှော်လင့်နေပါတယ်။
ပယ်လ်ဟင်ညာဟာ ကြီးမားတဲ့မျှော်လင့်ချက်နဲ့ ဖူလ်ဟမ်အသင်းကနေ ဘိုင်ယန်မြူးနစ်အသင်းထံ ရောက်ရှိလာခဲ့ပေမယ့် နည်းပြကွန်ပနီလက်အောက်မှာ ပွဲကစားခွင့်ရနိုင်ဖို့ရုန်းကန်ခဲ့ရတာပါ။
အဲ့ဒါကြောင့် ပယ်လ်ဟင်ညာဟာ ပြီးခဲ့တဲ့နွေရာသီအပြောင်းအရွှေ့မှာ စပါးအသင်းထံ ရာသီကုန်အထိ အငှားစာချုပ်နဲ့ ပြောင်းရွှေ့လာခဲ့တာဖြစ်ပါတယ်။
ပြီးခဲ့တဲ့ရာသီက ဘိုင်ယန်မြူးနစ်အသင်းအတွက် ၂၅ ပွဲသာပါဝင်ကစားခဲ့ရတဲ့ ပယ်လ်ဟင်ညာဟာ ဒီရာသီမှာ စပါးအသင်းအတွက် ၈ ပွဲပါဝင်ကစားထားပြီး ၂ ဂိုးသွင်းယူထားပါတယ်။
ပယ်လ်ဟင်ညာရဲ့အငှားစာချုပ်ထဲမှာ ပေါင် ၂၇ သန်းနဲ့ အပြီးသတ်ဝယ်ယူဖို့ ရွေးချယ်ခွင့်ပါဝင်တာကြောင့် စပါးအသင်းဟာ သူ့ကို အပြီးသတ်ခေါ်ယူဖို့ ဆန္ဒရှိနေတာပါ။
ပေါ်တူဂီကွင်းလယ်လူ ပယ်လ်ဟင်ညာကို တွေ့ရစဉ်
စပါးအသင်းဟာ အစောပိုင်းက ပယ်လ်ဟင်ညာကို အပြီးသတ်ခေါ်ယူဖို့နဲ့ ပတ်သက်ပြီး ရာသီကုန်မှသာ ဆုံးဖြတ်ဖို့ စီစဉ်ခဲ့ပါတယ်။
ဒါပေမယ့် TBR Football က စပါးအသင်းဟာ ပယ်လ်ဟင်ညာကို အပြီးသတ်ဝယ်ယူဖို့အတွက် ဇန်နဝါရီမှာ ပြုလုပ်လာနိုင်ပြီး ဆောင်းရာသီအပြောင်းအရွှေ့မှာ ဘိုင်ယန်မြူးနစ်အသင်းနဲ့ ဆွေးနွေးဖို့ပြင်ဆင်နေတယ်လို့ ဖော်ပြထားပါတယ်။
ပယ်လ်ဟင်ညာဟာ ဘိုင်ယန်မြူးနစ်အသင်းမှာ အပယ်ခံကစားသမားဖြစ်ခဲ့ပေမယ့် စပါးအသင်းမှာ အဓိက ကစားသမားဖြစ်လာတဲ့အထိ သူ့ရဲ့တန်ဖိုးကို သက်သေပြသနိုင်ခဲ့တာပါ။
ဘိုင်ယန်မြူးနစ်အသင်းဟာ ပယ်လ်ဟင်ညာကို စပါးအသင်းထံ အပြီးသတ်ရောင်းချချင်နေတာကြောင့် မကြာမီမှာ အပြောင်းအရွှေ့အပြီးသတ်နိုင်ဖို့ ၂ သင်းစလုံးဆန္ဒရှိနေပါတယ်။
စပါးအသင်းဟာ ဒီရာသီပရီးမီးယားလိဂ်ပြိုင်ပွဲမှာ အမှတ်ပေးဇယားအဆင့် ၃ နေရာရပ်တည်နေပြီး လာမယ့်ပွဲစဉ်အဖြစ် ဝုလ်ဗ်စ်အသင်းကို အိမ်ကွင်းလက်ခံယှဉ်ပြိုင်ရမှာဖြစ်ပါတယ်။
- By CNI
- Category: အားကစား
- Hits: 285
CNI Sport News
၂၀၂၅ ခုနှစ်၊ စက်တင်ဘာ ၂၆
အာဆင်နယ်လူငယ် ကစားသမားဟောင်း ဘီလီဗီဂါဟာ ပွဲချိန်အတွင်းမှာ ဖြစ်ခဲ့တဲ့ အဖြစ်အပျက်ကြောင့် ဦးနှောက်ဒဏ်ရာ ပြင်းထန်စွာခံစားရပြီး သေဆုံးသွားခဲ့တယ်လို့ ချီချက်စတာစီးတီးအသင်းက အတည်ပြုခဲ့ပါတယ်။
အသက် ၂၁ နှစ် အရွယ်ရှိ ဗီဂါဟာ အင်္ဂလိဂ်ဘောလုံးရဲ့သတ္တမတန်းပွဲစဉ်တစ်ပွဲဖြစ်တဲ့ စနေနေ့က ဝင်းဂိတ် အသင်းနဲ့ ပွဲစဉ်မှာ ဘောလုံးကို ကွင်းအပြင်မထွက်အောင် ထိန်းဖို့ကြိုးစားရင်း ကွန်ကရစ်နံရံနဲ့ တိုက်မိခဲ့တယ်လို့ သတင်းတွေမှာ ဖော်ပြထားပါတယ်။
ဗီဂါဟာ သတိလစ်မေ့မျောသွားခဲ့တာကြောင့် ဆေးရုံပို့ဆောင်ခဲ့ရပြီး ပြန်ကောင်းလာဖို့အတွက် အင်္ဂါနေ့မှာ ခွဲစိတ်မှုခံယူခဲ့ပေမယ့် ကြာသပတေးနေ့မနက်မှာ သေဆုံးသွားခဲ့တာဖြစ်ပါတယ်။
ချီချက်စတာစီးတီးအသင်းက ဘီလီဗီဂါသေဆုံးသွားကြောင်းအတည်ပြုရတဲ့အတွက် အလွန်ဝမ်းနည်းမိကြောင်းနဲ့ သူဟာ အသင်းရဲ့နှလုံးသားထဲမှာ ထာဝရရှိနေမှာဖြစ်တယ်လို့ ထုတ်ပြန်ချက်ထဲမှာ ဖော်ပြထားတာပါ။
ချီချက်စတာအသင်းဟာ ဘီလီဗီဂါသေဆုံးမှုကြောင့် စနေနေ့မှာကစားမယ့် လူးဝစ်အသင်းနဲ့ပွဲစဉ်ကို ရွှေ့ဆိုင်းခဲ့ပါတယ်။
အာဆင်နယ်ကစားသမားဟောင်း ဗီဂါကိုတွေ့ရစဉ်
ဗီဂါဟာ အာဆင်နယ်အသင်းအကယ်ဒမီကို ၂၀၁၇ ခုနှစ်မှာ ရောက်ရှိခဲ့ပြီး ၂၀၂၂ ခုနှစ်မှာ ပရော်ဖက်ရှင်နယ် စာချုပ်ချုပ်ဆိုခဲ့ကာ စွယ်စုံရတဲ့ တိုက်စစ်မှူးအဖြစ်ဖော်ပြခြင်းခံခဲ့ရတာပါ။
အာဆင်နယ်အသင်းကလည်း ဗီဂါကွယ်လွန်သွားပြီဆိုတဲ့ တုန်လှုပ်ခြောက်ချားဖွယ်သတင်းကြောင့် အသင်းမှာရှိတဲ့ လူတိုင်းကြေကွဲနေပြီး ငြိမ်းချမ်းစွာအနားယူပါ ဗီဂါဆိုပြီး ရေးသားထားတဲ့ ကြေညာချက်ထုတ်ပြန်ခဲ့ပါတယ်။
ဗီဂါဟာ အာဆင်နယ်အသင်းကြီးအတွက် တစ်ပွဲမှ ပါဝင်ကစားရခြင်းမရှိခဲ့ဘဲ ၂၀၂၄ ခုနှစ်နွေရာသီမှာ အသင်းကနေ ထွက်ခွာခဲ့တာပါ။
ဗီဂါဟာ ဒါဘီယူ-၂၁ အသင်းအပြင် ဟက်စတင်းအသင်းတွေမှာလည်း အငှားသွားရောက်ကစားခဲ့ပါတယ်။
ဒီအသင်းတွေကလည်း ကစားသမားဟောင်းဗီဂါသေဆုံးမှုအပေါ် ဝမ်းနည်းကြောင်းသူတို့ရဲ့ဆိုရှယ်မီဒီယာတွေမှာ ကြေညာချက်ထုတ်ပြန်ခဲ့ကြတာဖြစ်ပါတယ်။
- By CNI
- Category: အားကစား
- Hits: 287
CNI Spot News
၂၀၂၅ ခုနှစ်၊ စက်တင်ဘာ ၂၆
အက်စတွန်ဗီလာအသင်းက ဘိုလော့ဂ်နာအသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ ယူရိုပါလိဂ်ပွဲစဉ်မှာ ပင်နယ်တီ လွဲချော်ခဲ့ပြီးနောက် သွင်းဂိုးသွင်းယူနိုင်ဖို့ ရုန်းကန်နေရတဲ့ တိုက်စစ်မှူးဝက်ကင်စ်ရဲ့သွင်းဂိုးတွေ ရောက်ရှိ လာမယ်လို့ နည်းပြအူနှိုင်းအမ်မရီက ယုံကြည်မှုရှိနေပါတယ်။
အူနှိုင်းအမ်မရီက “သူဂိုးမသွင်းနိုင်ခဲ့ပေမယ့် သူဒီပွဲမှာလုပ်ခဲ့တဲ့အလုပ်ကြောင့် သွင်းဂိုးတွေရောက်ရှိလာမှာပါ။ သူ့ရဲ့အလုပ်ကို ကောင်းမွန်စွာလုပ်နိုင်ခဲ့တဲ့အတွက် ကျနော်ပျော်ရွှင်ပြီး ဒါကအရေးကြီးပါတယ်။ သူဟာ ဒီပွဲမှာ အခွင့်အရေးတွေရခဲ့ပြီး ပင်နယ်တီလွဲချော်ခဲ့ပေမယ့် ပါဝင်ကစားတဲ့ မိနစ် ၃၀ အတွင်းမှာ ကောင်းမွန်တဲ့အလုပ်ကို လုပ်ခဲ့ပါတယ်။ ဂိုးသွင်းနိုင်ခဲ့ရင်တော့ သူဟာ ပိုကောင်းတဲ့ခံစားချက်ကို ခံစားရမှာပါ။ ဒီပွဲမှာ ဂိုးမသွင်းနိုင်လို့ သူ့အတွက် မလုံလောက်ခဲ့ပေမယ့် ကောင်းမွန်စွာကစားနိုင်ခဲ့ပြီး ဒါက ပထမခြေလှမ်း”လို့ ပြောခဲ့ပါတယ်။
ဒီပွဲစဉ်ရဲ့ဒုတိယပိုင်းမှာ လူစားလဲဝင်ရောက်လာခဲ့တဲ့ ဝက်ကင်စ်ဟာ ၁၀ မိနစ်အကြာမှာ အက်စတွန်ဗီလာ အသင်းရရှိခဲ့တဲ့ ပင်နယ်တီကို ကန်သွင်းခဲ့တာပါ။
ဒါပေမယ့်သူ့ရဲ့ကန်သွင်းမှုကို ဘိုလော့ဂ်နာအသင်းဂိုးသမား ကာကွယ်သွားနိုင်ခဲ့တာဖြစ်ပါတယ်။
အသက် ၂၉ နှစ်အရွယ်ရှိ ဝက်ကင်စ်ဟာ အက်စတွန်ဗီလာနဲ့အင်္ဂလန်အသင်းအတွက် နောက်ဆုံးကစားခဲ့တဲ့ ၁၀ ပွဲဆက်တိုက် ဂိုးပေါက်ပျောက်ဆုံးနေခဲ့တာပါ။
နည်းပြအူနှိုင်းအမ်မရီကို တွေ့ရစဉ်
ဝက်ကင်စ်ဟာ ပြီးခဲ့တဲ့ရာသီက ဆဲလ်တစ်အသင်းနဲ့ချန်ပီယံလိဂ်ပွဲစဉ်မှာ လွဲချော်မှုအပါအဝင် အက်စတွန်ဗီလာ အသင်းအတွက် နောက်ဆုံးကန်သွင်းခဲ့တဲ့ ပင်နယ်တီ ၅ ကြိမ်မှာ ၃ ကြိမ်လွဲချော်ခဲ့တာ ဖြစ်ပါတယ်။
အက်စတွန်ဗီလာအသင်းခေါင်းဆောင် မက်ဂင်းက ဝက်ကင်စ်ဟာ ထိပ်တန်းတိုက်စစ်မှူးဖြစ်ပြီး ဂိုးမသွင်းနိုင်ရင်တောင် အသင်းအတွက် ကြိုးစားအားထုတ်နေတဲ့သူဖြစ်တယ်လို့ ပြောခဲ့ပါတယ်။
အက်စတွန်ဗီလာအသင်းဟာ ဘိုလော့ဂ်နာအသင်းကို အနိုင်ရခဲ့တာကြောင့် ဒီရာသီမှာ နိုင်ပွဲမရရှိသေးတာကို အဆုံးသတ်နိုင်ခဲ့ပြီး ပထမဆုံးနိုင်ပွဲရယူနိုင်ခဲ့တာပါ။
ပရီးမီးယားလိဂ်အမှတ်ပေးဇယားအဆင့် ၁၈ နေရာရပ်တည်နေတဲ့ အက်စတွန်ဗီလာအသင်းဟာ လာမယ့်လိဂ်ပွဲစဉ်အဖြစ် ဖူလ်ဟမ်အသင်းနဲ့ ယှဉ်ပြိုင်ရမှာဖြစ်ပါတယ်။
- By CNI
- Category: အားကစား
- Hits: 299
CNI Sport News
၂၀၂၅ ခုနှစ်၊ စက်တင်ဘာ ၂၅
အင်တာမိုင်ယာမီအသင်းဟာ နယူးယော့ခ်စီးတီးအသင်းကို ၄ ဂိုး-ဂိုးမရှိနဲ့ ဂိုးပြတ်အနိုင်ရရှိကာ မေဂျာလိဂ်ပလေးအောဖ့် တစ်နေရာရရှိခဲ့ပြီးနောက် သူတို့ရဲ့ပထမဆုံးရည်မှန်းချက်ပန်းတိုင်အောင်မြင်ခဲ့ပြီလို့ နည်းပြမာရှေယာနိုက ပြောခဲ့ပါတယ်။
မာရှေယာနိုက “ကျနော်တို့ရဲ့ပထမဆုံးရည်မှန်းချက်ပန်းတိုင်အောင်မြင်ခဲ့ပြီး ဒါက ကျနော်တို့အတွက် အလွန်အရေးကြီးပါတယ်။ ကျနော်တို့ဟာ ရှေ့ကိုဆက်ပြီးတွန်းအားပေးရမှာဖြစ်သလို အကောင်းဆုံး ပလေးအောဖ့်နေရာကိုလည်း ရယူချင်ပါတယ်။ ကျနော်တို့ဟာ Supporters’ Shield အတွက်လည်း တိုက်ပွဲဝင်ချင်ပေမယ့် လာမယ့်တိုရွန်တိုနဲ့ပွဲကို အာရုံစိုက်ဖို့လိုပါတယ်” လို့ ပြောခဲ့တာပါ။
အင်တာမိုင်ယာမီအသင်းဟာ ဒီပွဲစဉ်မှာ မက်ဆီက ၂ ဂိုး၊ ရိုဒရီဂွက်ဇ်နဲ့ ဆွာရက်ဇ်တို့ရဲ့ သွင်းဂိုးတွေကြောင့် ဂိုးပြတ်နိုင်ပွဲ ရရှိခဲ့တာဖြစ်ပါတယ်။
အင်တာမိုင်ယာမီအသင်းဟာ ဒီနိုင်ပွဲကြောင့် မေဂျာလိဂ်အရှေ့ပိုင်းဇုန်အမှတ်ပေးဇယားရဲ့ အဆင့် ၃ နေရာကို ရောက်ရှိလာခဲ့ပြီး လက်ကျန်ပွဲကစားဖို့ ၂ ပွဲကျန်ရှိနေချိန်မှာ ထိပ်ဆုံးနေရာကအသင်းနဲ့ ၅ မှတ်သာ ကွာဟတော့တာပါ။
မက်ဆီနှင့် အင်တာမိုင်ယာမီကစားသမားများကိုတွေ့ရစဉ်
အင်တာမိုင်ယာမီအသင်းဟာ ပလေးအော့ဖ်ဝင်ခွင့်ရခဲ့ပြီးနောက် Supporters’ Shield ရယူနိုင်ဖို့လည်း အခွင့်အရေးတွေရှိနေတာဖြစ်ပါတယ်။
ဒီပွဲမှာ အင်တာမိုင်ယာမီအသင်း ပင်နယ်တီကန်သွင်းခွင့်ရရှိခဲ့ချိန်မှာ အသင်းခေါင်းဆောင်မက်ဆီဟာ သူမကန်သွင်းဘဲ အသင်းဖော်တိုက်စစ်မှူးဆွာရက်ဇ်ကို ကန်သွင်းစေပြီး ဂိုးရရှိစေခဲ့တာပါ။
အင်တာမိုင်ယာမီအသင်းနည်းပြမာရှေယာနိုက မက်ဆီကို ချီးကျူးခဲ့ပြီး ဆွာရက်ဇ်ဂိုးသွင်းနိုင်ဖို့လိုအပ်ချိန်မှာ အခုလိုပြုလုပ်ခဲ့တာက အသင်းအတွက် အလွန်ကောင်းမွန်တဲ့အရာလို့ ပြောခဲ့ပါတယ်။
ပြီးခဲ့တဲ့ဒီစီယူနိုက်တက်အသင်းနဲ့ပွဲစဉ်မှာလည်း ၂ ဂိုးသွင်းခဲ့တဲ့ မက်ဆီဟာ ဒီရာသီမှာ အင်တာမိုင်ယာမီအသင်းအတွက် ပြိုင်ပွဲစုံ ၃၈ ပွဲကစားထားပြီး ၃၂ ဂိုးသွင်းယူထားတာဖြစ်ပါတယ်။
- By CNI
- Category: အားကစား
- Hits: 287
CNI Sport News
၂၀၂၅ ခုနှစ်၊ စက်တင်ဘာ ၂၅
လီဗာပူးလ်အသင်းဟာ နည်းပြအာနီဆလော့ လက်ထက်မှာ အကောင်းဆုံးပုံစံတွေ ပြသနေတဲ့ ဒတ်ချ်ကွင်းလယ်လူ ဂရာဗန်ဘာ့ချ်ကို အသင်းမှာ ကာလရှည်ကြာရှိမယ့် စာချုပ်သစ်ကမ်းလှမ်းဖို့ ပြင်ဆင်နေပါတယ်။
GiveMeSport က လီဗာပူးလ်အသင်းဟာ လာမယ့်ဆောင်းရာသီမှာ ဂရာဗန်ဘာ့ချ်နဲ့ စာချုပ်သစ်အတွက် ဆွေးနွေးမှုတွေစတင်ဖို့ စီစဉ်ထားတယ်လို့ ဖော်ပြထားပါတယ်။
လီဗာပူးလ်အသင်းဟာ အသင်းခေါင်းဆောင်ဗန်ဒိုက်၊ တောင်ပံကစားသမားတွေဖြစ်တဲ့ ဆာလက်နဲ့ ဂတ်ပိုတို့ကို စာချုပ်သစ်ချုပ်ခဲ့ပြီးနောက် ဂရာဗန်ဘာ့ချ်ကို စာချုပ်သစ်ချုပ်နိုင်ဖို့ လုပ်ဆောင်လာခဲ့တာပါ။
၂၀၂၃ နွေရာသီအပြောင်းအရွှေ့မှာ ဘိုင်ယန်မြူးနစ်အသင်းကနေ ၅ နှစ်စာချုပ်နဲ့ လီဗာပူးလ်အသင်းထံ ပြောင်းရွှေ့ခဲ့တဲ့ ဂရာဗန်ဘာချ့်ဟာ နည်းပြအာနီဆလော့လက်ထက် မနှစ်ကရာသီပရီးမီးယားလိဂ်ဖလား ရယူနိုင်ခဲ့တာမှာ အဓိကအခန်းကဏ္ဍကနေ ပါဝင်ခဲ့ပါတယ်။
ဂရာဗန်ဘာ့ချ်ဟာ ဒီရာသီပရီးမီးယားလိဂ်ပြိုင်ပွဲမှာ လီဗာပူးလ်အသင်းရာနှုန်းပြည့်နိုင်ပွဲရရှိအောင် ကူညီပေးထားနိုင်ပြီး သွင်းဂိုး ၂ ဂိုးသွင်းယူထားတာပါ။
ဂရာဗန်ဘာချ့်ကို တွေ့ရစဉ်
လီဗာပူးလ်အသင်းမှာ တစ်ပတ်လုပ်ခပေါင် ၁၀၀,၀၀၀ ကျော်ရရှိနေတဲ့ ဂရာဗန်ဘာ့ချ်ဟာ စာချုပ်သစ်ချုပ်ခဲ့ရင် ဒီပမာဏထက် ပိုမိုများပြားတဲ့ လစာရရှိမှာဖြစ်ပါတယ်။
ပြီးခဲ့တဲ့ရာသီက ပရီးမီးယားလိဂ်ပြိုင်ပွဲရဲ့အကောင်းဆုံးလူငယ်ကစားသမားဆုကို ရရှိခဲ့တဲ့ ဂရာဗန်ဘာ့ချ်ဟာ လီဗာပူးလ်အသင်းရဲ့စာချုပ်သစ်ကမ်းလှမ်းမှုကို စဉ်းစားဖွယ်ရှိနေတာပါ။
အသက် ၂၃ နှစ်အရွယ်ရှိ ဂရာဗန်ဘာ့ချ်ဟာ လီဗာပူးလ်အသင်းအတွက် ၉၂ ပွဲကစားထားပြီး ၆ ဂိုးသွင်းယူကာ ပရီးမီးယားလိဂ်နဲ့ ကာရာဘောင်းဖလားတစ်ကြိမ်စီ ရရှိထားပါတယ်။
လီဗာပူးလ်အသင်းဟာ လာမယ့်ပရီးမီးယားလိဂ်ပွဲစဉ်အဖြစ် ခရစ္စတယ်ပဲလေ့စ်အသင်းနဲ့ ယှဉ်ပြိုင်ရမှာဖြစ်ပြီး ဒီပွဲပြီးရင် ဂါလာတာစာရေးအသင်းနဲ့ ချန်ပီယံလိဂ်ပွဲစဉ်ယှဉ်ပြိုင်ရမှာဖြစ်ပါတယ်။
- By CNI
- Category: အားကစား
- Hits: 374
CNI Sport News
၂၀၂၅ ခုနှစ်၊ စက်တင်ဘာ ၂၅
အက်သလက်တီကိုအသင်းက ဗယ်လက်ကာနိုအသင်းကို ၃ ဂိုး-၂ ဂိုးနဲ့အနိုင်ရခဲ့တဲ့ လာလီဂါပွဲစဉ်မှာ ဟက်ထရစ်သွင်းခဲ့တဲ့ တိုက်စစ်မှူးအယ်လ်ဗာရက်ဇ်ကို အသင်းရဲ့အကောင်းဆုံးကစားသမားအဖြစ် နည်းပြဆီမြွန်နီက ချီးကျူးမှုပြုလုပ်ခဲ့ပါတယ်။
ဆီမြွန်နီက “အယ်လ်ဗာရက်ဇ်က အလွန်ကောင်းပြီး သူဟာ ကျနော်တို့ရဲ့အကောင်းဆုံးကစားသမားပါ။ ကျနော်တို့ သူ့ကို ပိုပြီးကောင်းအောင်ကူညီပေးရမှာဖြစ်ပြီး သူ့ကို ဒီမှာနှစ်ပေါင်းများစွာပိုင်ဆိုင်ထားဖို့လိုအပ်ပါတယ်။ သူဟာ ကျနော်တို့ကို ခြားနားမှုဖြစ်အောင် ပြုလုပ်ပေးနိုင်တဲ့ ကစားသမားပါ” လို့ ESPN ကို ပြောခဲ့တာပါ။
ဒီပွဲမှာ အက်သလက်တီကိုအသင်းဟာ ဦးဆောင်ဂိုးသွင်းယူနိုင်ခဲ့ပေမယ့် ဗယ်လက်ကာနိုအသင်းကို ချေပဂိုးနဲ့ ဦးဆောင်ဂိုးပြန်ပေးခဲ့ရတာကြောင့် အနောက်ကနေလိုက်ကစားခဲ့ရပြီး မိနစ် ၈၀ ကျော်မှာ ချေပဂိုးနဲ့ အနိုင်ဂိုးတွေသွင်းယူနိုင်ခဲ့တာဖြစ်ပါတယ်။
အက်သလက်တီကိုအသင်းဟာ ဒီနိုင်ပွဲကြောင့် ဒီရာသီလာလီဂါပွဲစဉ် ၆ ပွဲကစားအပြီးမှာ ဒုတိယမြောက်နိုင်ပွဲရရှိခဲ့တာပါ။
တိုက်စစ်မှူးအယ်လ်ဗာရက်ဇ်ကို တွေ့ရစဉ်
အယ်လ်ဗာရက်ဇ်ဟာ ဗယ်လက်ကာနိုအသင်းနဲ့ပွဲစဉ်မတိုင်မီ ဒီရာသီလာလီဂါပြိုင်ပွဲမှာ ၁ ဂိုးသာသွင်းယူထားနိုင်ပြီး မာယော့ကာအသင်းနဲ့ ၁ ဂိုးစီသရေကျခဲ့တဲ့ပွဲစဉ်မှာ လူစားလဲခံရချိန် စိတ်ပျက်နေခဲ့တာဖြစ်ပါတယ်။
၂၀၂၄ ခုနှစ်နွေရာသီက မန်စီးတီးအသင်းကနေ ပြောင်းရွှေ့လာခဲ့တဲ့ အယ်လ်ဗာရက်ဇ်က သူဟာအရာအားလုံးအဆင်ပြေပြီး ဆိုရှယ်မီဒီယာတွေပေါ်က အရာတွေကို အာရုံစိုက်နေမှာမဟုတ်ဘူးလို့ ပြောခဲ့ပါတယ်။
အက်သလက်တီကိုအသင်းဟာ လာမယ့်လာလီဂါပွဲစဉ်အဖြစ် ရီးရယ်လ်အသင်းနဲ့ မက်ဒရစ်ဒါဘီပွဲစဉ်ယှဉ်ပြိုင်ရမှာပါ။
ရီးရယ်လ်အသင်းဟာ ဒီရာသီလာလီဂါပွဲစဉ် ၆ ပွဲစလုံးရာနှုန်းပြည့်နိုင်ပွဲရရှိထားတာဖြစ်ပြီး အက်သလက်တီကိုအသင်းကို ၉ မှတ်အသာရရှိထားပါတယ်။
အက်သလက်တီကိုအသင်းနည်းပြဆီမြွန်နီက ရီးရယ်လ်အသင်းဟာ ပြီးခဲ့တဲ့ရာသီကထက် ပိုကောင်းလာခဲ့ပေမယ့် ဒီပွဲအတွက် အကောင်းဆုံးပြင်ဆင်သွားမယ်လို့ ပြောခဲ့ပါတယ်။
- By CNI
- Category: အားကစား
- Hits: 292
CNI Sport News
၂၀၂၅ ခုနှစ်၊ စက်တင်ဘာ ၂၅
အာဆင်နယ်အသင်းက ပေါ့ဗေးလ်အသင်းကို ၂ ဂိုး-ဂိုးမရှိနဲ့ အနိုင်ရခဲ့တဲ့ ကာရာဘောင်းလိဂ်ဖလား တတိယအဆင့် ပွဲစဉ်မှာ အာဆင်နယ်အသင်းကစားသမားဘ၀ ပထမဆုံးသွင်းဂိုးကိုသွင်းယူနိုင်ခဲ့တဲ့ အီဇီက ထူးခြားတဲ့ အခိုက်အတန့်လို့ ပြောခဲ့ပါတယ်။
အီဇီက “အာဆင်နယ်အတွက် ပထမဆုံးသွင်းဂိုးရယူနိုင်ခဲ့တာဟာ ထူးခြားတဲ့အခိုက်အတန့်ဖြစ်ပြီး နိုင်ပွဲလည်း ရယူနိုင်ခဲ့ပါတယ်။ နောက်တစ်ဆင့်တက်ဖို့က ပိုအရေးကြီးပြီး ဒါက အဓိကအရာပါ။ ဂိုးဧရိယာထဲမှာ နေရာလွတ် တစ်ခုကို ရှာတွေ့ခဲ့တာကြောင့် အကောင်းဆုံး အဆုံးသတ်ခဲ့ပြီး ကံကောင်းခဲ့ပါတယ်။ နောက်ထပ်သွင်းဂိုးတွေ ထပ်ပြီးသွင်းယူနိုင်ဖို့ကြိုးစားသွားမယ်” လို့ ပြောခဲ့ပါတယ်။
ပြီးခဲ့တဲ့နွေရာသီအပြောင်းအရွှေ့က ခရစ္စတယ်ပဲလေ့စ်အသင်းကနေ ပေါင်သန်း ၆၀ နဲ့ ပြောင်းရွှေ့လာခဲ့တဲ့ အီဇီဟာ အာဆင်နယ်အသင်းအတွက် ၅ ပွဲပါဝင်ကစားအပြီးမှာ ပထမဆုံးသွင်းဂိုးကို သွင်းယူနိုင်ခဲ့တာပါ။
ကစားသမားအီဇီကို တွေ့ရစဉ်
အာဆင်နယ်အသင်းနည်းပြအာတီတာက အီဇီဟာ အသင်းရဲ့တိုက်စစ်ကစားပုံကို ပိုပြီးကောင်းအောင် လုပ်ပေးဖို့အတွက် အသင်းကို ပေးစရာတွေအများကြီးရှိသေးတယ်လို့ ပြောခဲ့ပါတယ်။
အီဇီဟာ အာဆင်နယ်အသင်းအတွက် ပါဝင်ကစားထားတဲ့ ၅ ပွဲမှာ တိုက်စစ်ရဲ့မတူညီတဲ့နေရာတွေမှာ ကစားထားရတာဖြစ်ပါတယ်။
အာဆင်နယ်အသင်းနည်းပြအာတီဟာ ပေါ့ဗေးလ်အသင်းနဲ့ပွဲစဉ်မှာ ဂိုးသမားကယ်ပါကို ပွဲဦးထွက်အဖြစ် အသုံးပြုခဲ့ပြီး နော်ဂတ်ကိုလည်း ပွဲထွက်လူစာရင်းထဲထည့်သွင်းခဲ့ကာ ဆာကာကို တစ်နာရီကြာပါဝင် ကစားစေခဲ့တာပါ။
အာဆင်နယ်အသင်းနည်းပြအာတီတာက ဒီပွဲမှာ ဘယ်သူ့မှထိခိုက်ဒဏ်ရာမရရှိခဲ့တာက ကောင်းမွန်တဲ့ အချက်လို့ ပြောခဲ့ပါတယ်။
အာဆင်နယ်အသင်းဟာ ကာရာဘောင်းဖလားစတုတ္ထအဆင့်မှာ ဘရိုက်တန်အသင်းနဲ့ တွေ့ဆုံရမှာပါ။
လန်ဒန်ကလပ်ဟာ လာမယ့်ပရီးမီးယားလိဂ်ပွဲစဉ်အဖြစ် နယူးကာဆယ်အသင်းအိမ်ကွင်း သွားရောက်ယှဉ်ပြိုင်ရမှာ ဖြစ်ပါတယ်။
- By CNI
- Category: အားကစား
- Hits: 276
CNI Sport News
၂၀၂၅ ခုနှစ်၊ စက်တင်ဘာ ၂၄
စပိန်ကွင်းလယ်လူ ဂါဗီဟာ ဒူးခွဲစိတ်ကုသမှုခံယူခဲ့ပြီးနောက် ၅ လကြာအထိ အနားယူရဖွယ်ရှိတယ်လို့ ဘာစီလိုနာအသင်းက အတည်ပြုခဲ့ပါတယ်။
အသက် ၂၁ နှစ်အရွယ်ရှိ ဂါဗီဟာ ၂၀၂၃ ခုနှစ်ကုန်ပိုင်းက အရွတ်ဆုတ်ပြဲဒဏ်ရာကြောင့် တစ်နှစ်နီးပါးကြာ အနားယူခဲ့ရဖူးတာပါ။
အခုအချိန်မှာလည်း ဂါဗီရဲ့ညာဘက်ဒူးဒဏ်ရာဟာ ထင်ထားတာထက် ပိုပြီးဆိုးရွားနေတာကြောင့် ထပ်ပြီးအနားယူရဦးမှာဖြစ်ပါတယ်။
ဂါဗီဟာ လွန်ခဲ့တဲ့တစ်နှစ်ကျော်ကမှ ဘာစီလိုနာအသင်းအတွက် ပြန်ကစားနိုင်ခဲ့ပေမယ့် ဒဏ်ရာကြောင့် သြဂုတ်ကတည်းက အနားယူနေခဲ့ရတာပါ။
ဂါဗီဟာ စပိန်လက်ရွေးစင်အသင်းနဲ့ ၂၀၂၆ ကမ္ဘာ့ဖလားပြိုင်ပွဲမှာ ပါဝင်ခွင့်ရဖို့ မျှော်လင့်နေတာကြောင့် သူ့ရဲ့ကြံ့ခိုင်မှုအကောင်းဆုံးဖြစ်အောင် ကြိုးပမ်းရတော့မှာဖြစ်ပါတယ်။
စပိန်ကွင်းလယ်လူ ဂါဗီကို တွေ့ရစဉ်
ဘာစီလိုနာအသင်းနည်းပြဟန်ဆီဖလစ်နဲ့ အသင်းဖော်တွေက သူတို့ရဲ့ဆိုရှယ်မီဒီယာကနေ ဂါဗီအမြန်ဆုံးပြန်ကောင်းမွန်လာဖို့ စာရေးသားပြီး အားပေးမှုတွေပြုလုပ်ခဲ့ကြပါတယ်။
ဂါဗီဟာ ၂၀၂၁ ခုနှစ်မှာ ဘာစီလိုနာအသင်းကြီးအတွက် စတင်ပွဲထွက်ခွင့်ရခဲ့ပြီး ပြိုင်ပွဲစုံ ၁၁၅ ပွဲပါဝင်ကစားထားကာ ၁၀ ဂိုးသွင်းယူထားပါတယ်။
ဘာစီလိုနာအသင်းနဲ့အတူ လာလီဂါဖလား ၂ ကြိမ်၊ကိုပါဒယ်ရေးနဲ့ စပိန်စူပါဖလားတို့ကို ရယူထားနိုင်ခဲ့တဲ့ ဂါဗီဟာ ဒီရာသီမှာ အသင်းအတွက် ၂ ပွဲပါဝင်ကစားထားပြီး ဒီနှစ်ထဲမှာ စပိန်လက်ရွေးစင်အသင်းအတွက် ၁ ပွဲပါဝင်ကစားထားတာပါ။
ဂါဗီဟာ ဒဏ်ရာကြောင့် စပိန်အသင်းချန်ပီယံဖြစ်ခဲ့တဲ့ ယူရို ၂၀၂၄ ပြိုင်ပွဲမှာ မပါဝင်နိုင်ခဲ့ပေမယ့် နိုင်ငံအသင်းအတွက် ၂၈ ပွဲကစားထားပြီး ၅ ဂိုးသွင်းယူကာ ၂၀၂၃ နေးရှင်းလိဂ်ဖလားရရှိထားတာဖြစ်ပါတယ်။
Page 28 of 432
Connect with us
