CNI Sport News

၂၀၂၅ ခုနှစ်၊ စက်တင်ဘာ ၁၂

လက်စတာအသင်းကနေ ထုတ်ပယ်ခံထားရတဲ့ နစ္စတယ်ရွိုင်းဟာ FC တွမ်တီးအသင်းရဲ့ နည်းပြရာထူးရယူကာ နည်းပြလောကထဲကို ပြန်လည် ဝင်ရောက်ဖွယ် ရှိနေပါတယ်။ 

ယူနိုက်တက်အသင်း တိုက်စစ်မှူးဟောင်း နစ္စတယ်ရွိုင်းဟာ လက်စတာအသင်းကို ၂၇ ပွဲ ကိုင်တွယ်ခဲ့တာမှာ ၅ ပွဲသာ အနိုင်ရပြီး ၁၉ ပွဲ ရှုံးပွဲကြုံတွေ့ကာ အသင်းဟာ ချန်ပီယံရှစ်ပြိုင်ပွဲထံ တန်းဆင်းခဲ့ရတာပါ။ 

ဒတ်ချ်ကလပ် FC တွမ်တီးအသင်းဟာ ပြီးခဲ့တဲ့အပတ်က နည်းပြဂျိုဆက်အိုစတင်နဲ့ လမ်းခွဲခဲ့ပြီးနောက် နည်းပြသစ် ရှာဖွေမှု ပြုလုပ်နေတာ ဖြစ်ပါတယ်။ 

လက်ရှိအချိန်မှာ FC တွမ်တီးအသင်းရဲ့ နည်းပြရာထူးအတွက် နည်းပြ အများအပြား ချိတ်ဆက်မှုတွေ ခံနေရတာ ပါ။ 

နစ္စတယ်ရွိုင်းကို တွေ့ရစဉ်

အဲရစ်တန်ဟတ်၊ ဗန်ဘွန်မဲလ်၊ ရီနီဟော့ခ်တို့ဟာ FC တွမ်တီးအသင်း နည်းပြသစ် ဖြစ်လာနိုင်တဲ့ စာရင်းထဲမှာ ပါဝင်နေပါတယ်။

ဒတ်ချ်လိဂ်မှာ မှတ်တမ်းကောင်းတွေ ရရှိထားတဲ့ နစ္စတယ်ရွိုင်းကလည်း သူတို့ထဲက တစ်ဦးအနေနဲ့ ရှိနေတာပါ။

ESPN ရဲ့ သုံးသပ်သူ တစ်ဦးဖြစ်တဲ့ အာမာဒီက နစ္စတယ်ရွိုင်းဟာ FC တွမ်တီးအသင်းရဲ့ နည်းပြရာထူးအတွက် အပြင်းထန်ဆုံး စဉ်းစားသင့်တယ်သူလို့ အကြံပြုထားပါတယ်။

နစ္စတယ်ရွိုင်းဟာ ဒတ်ချ်ကလပ် PSV အသင်းကို ကိုင်တွယ်ခဲ့တုန်းက ပွဲပေါင်း ၅၁ ပွဲမှာ အနိုင် ၆၄.၇၁ ရာခိုင်နှုန်း အထိရှိခဲ့ပြီး ဒတ်ချ်ဖလား ရယူပေးနိုင်ခဲ့တာပါ။ 

နစ္စတယ်ရွိုင်းဟာ လက်စတာအသင်းကို မကိုင်တွယ်မီ ယူနိုက်တက်အသင်းမှာ လက်ထောက်နည်းပြအဖြစ် ဆောင်ရွက်ရင်းနဲ့ နည်းပြအဲရစ်တန်ဟတ် ထုတ်ပယ်ခံရချိန်မှာ အသင်းကို ယာယီနည်းပြအဖြစ် ၄ ပွဲကိုင်တွယ်ခဲ့ပြီး ၃ ပွဲနိုင်၊ ၁ ပွဲသရေ ရလဒ် ထွက်ပေါ်ခဲ့ပါတယ်။ 

FC တွမ်တီးအသင်းဟာ ဒီရာသီ ဒတ်ချ်လိဂ်ပွဲစဉ် ၄ ပွဲ ကစားအပြီးမှာ နိုင်ပွဲ ၁ ပွဲသာရရှိကာ ရှုံးပွဲ ၃ ပွဲအထိ ကြုံတွေ့ ထားပြီး အမှတ်ပေးဇယားအဆင့် ၁၄ နေရာမှာ ရပ်တည်နေတာဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ စက်တင်ဘာ ၁၂

အာဆင်နယ်အသင်းဟာ ရီးရယ်လ်အသင်းက ခေါ်ယူဖို့ စိတ်ဝင်စားနေတဲ့ ပြင်သစ်နောက်ခံလူ ဆာလီဘာနဲ့ စာချုပ်သစ်အတွက် ဆွေးနွေးမှုတွေ စတင်ပြီး ပြုလုပ်နေပြီ ဖြစ်ပါတယ်။ 

အာဆင်နယ်အသင်းဟာ စာချုပ်သက်တမ်း ၂ နှစ်သာ ကျန်ရှိတော့တဲ့ ဆာလီဘာကို စာချုပ်သစ်ချုပ်ပြီး အသင်းမှာ ဆက်ထားဖို့ စိတ်အားထက်သန်နေတာပါ။ 

ပြင်သစ်သတင်းစာ Foot Mercato က ရီးရယ်လ်အသင်းဟာ ဆာလီဘာကို ခေါ်ယူချင်နေတာကြောင့် သူ့ရဲ့ အခြေအနေကို အနီးကပ် စောင့်ကြည့်နေတယ်လို့ ဖော်ပြထားပါတယ်။ 

အာဆင်နယ်အသင်းနဲ့ ဆာလီဘာတို့ဟာ စာချုပ်သစ်အတွက် သဘောတူညီမှု မရရှိသေးပေမယ့် လန်ဒန်ကလပ် ဟာ စာချုပ်သစ် အမြန်ဆုံး ချုပ်ဆိုနိုင်ဖို့ မျှော်လင့်နေတာပါ။ 

အာဆင်နယ်အသင်းဟာ ဒီနွေရာသီမှာ မိုစကွဲယား၊ ဟင်ကာပီတို့လို နောက်တန်းတွေ အပါအဝင် အဓိက ကစားသမား အများအပြားကို ခေါ်ယူအားဖြည့်ထားတာ ဖြစ်ပါတယ်။

ဆာလီဘာကို တွေ့ရစဉ် 

၂၀၁၉ ခုနှစ်က အာဆင်နယ်အသင်းကို ရောက်ရှိလာခဲ့တဲ့ ဆာလီဘာဟာ ၂၀၂၂-၂၃ ရာသီမှသာ စတင်ပါဝင်ခွင့် ရခဲ့ပြီး ပရီးမီးယားလိဂ်ရဲ့ အကောင်းဆုံး နောက်ခံလူတွေထဲက တစ်ဦးအဖြစ် သတ်မှတ်ခံခဲ့ရတာပါ။ 

ဆာလီဘာဟာ အာဆင်နယ်အသင်းအတွက် ၁၃၇ ပွဲ ပါဝင်ကစားထားပြီး ၇ ဂိုးသွင်းယူကာ အသင်းမှာ ပျော်ရွှင် နေတယ်လို့ ပြောထားပါတယ်။ 

အသက် ၂၄ နှစ်အရွယ်ရှိ ဆာလီဘာဟာ ပြီးခဲ့တဲ့ လီဗာပူးလ်အသင်းနဲ့ ပွဲစဉ်မှာ ရရှိခဲ့တဲ့ ဒဏ်ရာကြောင့် နော်တင်ဟမ်ဖောရက်စ်အသင်းနဲ့ ပရီးမီးယားလိဂ်ပွဲစဉ် အပါအဝင် အသင်းရဲ့ပွဲစဉ်အချို့ကို လွဲချော်ဖွယ်ရှိနေ တာပါ။ 

အာဆင်နယ်အသင်းဟာ ဒီရာသီ ပရီးမီးယားလိဂ်ပွဲစဉ် ၃ ပွဲကစားအပြီးမှာ ၂ ပွဲနိုင်၊ ၁ ပွဲ အရေးနိမ့်ထားပါတယ်။ အာဆင်နယ်အသင်းဟာ နော်တင်ဟမ်ဖောရက်စ်အသင်းနဲ့ ပရီးမီးယားလိဂ် ပွဲစဉ်ပြီးရင် ဘီလ်ဘာအိုအသင်းနဲ့ ချန်ပီယံလိဂ် အဝေးကွင်းပွဲစဉ် ယှဉ်ပြိုင်ရမှာဖြစ်ပါတယ်။ 

Source: Goal

CNI Soprt News

၂၀၂၅ ခုနှစ်၊ စက်တင်ဘာ ၁၂

ကင်မရွန်းဂိုးသမား အိုနာနာဟာ တူရကီကလပ် ထရက်ဇွန်စပေါ် အသင်းထံ ဒီရာသီကုန်အထိ အငှားစာချုပ်နဲ့ ပြောင်းရွှေ့သွားခဲ့ပြီလို့ ယူနိုက်တက်အသင်းက အတည်ပြု ကြေညာခဲ့ပါတယ်။ 

အိုနာနာဟာ ယူနိုက်တက်အသင်းမှာ ကစားခဲ့တဲ့ ၂ ရာသီအတွင်း ပုံမှန်လက်စွမ်း ပြသနိုင်ခြင်း မရှိသလို ဒီရာသီ အစ ပွဲစဉ်တွေမှာလည်း တူရကီဂိုးသမား ဘာယင်ဒါက သူ့ရဲ့နံပါတ်တစ် ဂိုးသမားနေရာကို ရယူနိုင်ခဲ့တာပါ။ 

အိုနာနာဟာ အစောပိုင်းက ယူနိုက်တက်အသင်းမှာ ဆက်နေပြီး ပွဲထွက်ခွင့် နေရာအတွက် တိုက်ပွဲဝင်မယ်လို့ ပြောထားပါတယ်။

ဒါပေမယ့် ယူနိုက်တက်အသင်းဟာ နွေရာသီ အပြောင်းအရွှေ့ နောက်ဆုံးနေ့မှာ အန့်ဝါတ်အသင်းဂိုးသမား လမ်းမန်းစ်ကို ခေါ်ယူအားဖြည့်ခဲ့တာပါ။ 

အဲဒါကြောင့် အိုနာနာဟာ ယူနိုက်တက်အသင်းကနေ ထွက်ခွာဖို့ ဆုံးဖြတ်ခဲ့ပြီး တူရကီကလပ် ထရက်ဇွန်စပေါ် အသင်းထံ အငှားနဲ့ ပြောင်းရွှေ့ခဲ့တာ ဖြစ်ပါတယ်။ 

 အိုနာနာကို တွေ့ရစဉ် 

ယူနိုက်တက်အသင်းဟာ အိုနာနာရဲ့ အငှား အပြောင်းအရွှေ့အတွက် ငှားရမ်းခရမှာ မဟုတ်ပေမယ့် သူ့ရဲ့လုပ်ခ လစာ အပြည့်အဝကို ထရက်ဇွန်စပေါ်က ပေးချေသွားမှာပါ။ 

ဒီအပြောင်းအရွှေ့မှာ အပြီးသတ်ဝယ်ယူဖို့ သဘောတူညီမှု မပါဝင်တဲ့အတွက် အိုနာနာဟာ နွေရာသီမှာ ယူနိုက်တက်အသင်းထံ ပြန်လာရမှာဖြစ်ပါတယ်။ 

ယူနိုက်တက်အသင်းက အိုနာနာရဲ့ အပြောင်းအရွှေ့ဟာ တူရကီ အပြောင်းအရွှေ့ ဈေးကွက် မပိတ်မီမှာ ပြီးမြောက် ခဲ့ပြီး သူကံကောင်းပါစေလို့ ဆုတောင်းကြောင်း သူတို့ရဲ့ကြေညာချက်ထဲမှာ ဖော်ပြထားတာပါ။ 

၂၀၂၃ နွေရာသီ အပြောင်းအရွှေ့မှာ အင်တာမီလန်အသင်းကနေ ပေါင် ၄၃.၈ သန်းနဲ့ ရောက်ရှိလာခဲ့တဲ့ အိုနာနာ ဟာ ယူနိုက်တက်အသင်းအတွက် ပွဲပေါင်း ၁၀၂ ပွဲ ပါဝင်ကစားခဲ့ပြီး FA ဖလားရယူနိုင်ခဲ့ပါတယ်။ 

ထရက်ဇွန်စပေါ်အသင်းဟာ ဒီရာသီ တူရကီလိဂ်ပွဲစဉ်မှာ ၄ ပွဲ ကစားထားပြီး ရမှတ် ၁၀ မှတ်နဲ့ အမှတ်ပေးဇယား အဆင့် ၂ နေရာ ရပ်တည်နေကာ ဒီတစ်ပတ်လိဂ်ပွဲစဉ်အဖြစ် ဖီနာဘာချီအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ စက်တင်ဘာ ၁၂

နွေရာသီ အပြောင်းအရွှေ့ နောက်ဆုံးနေ့မှာ PSG အသင်းကနေ ပြောင်းရွှေ့လာခဲ့တဲ့ အီတလီဂိုးသမား ဒွန်နာရမ်မာ က မန်စီးတီးအသင်းနဲ့ ချန်ပီယံလိဂ်ဖလား ရယူနိုင်ဖို့က သူ့ရဲ့အိပ်မက်ဖြစ်တယ်လို့ ပြောခဲ့ပါတယ်။ 

ဒွန်နာရမ်မာက “ဒါက ကျနော့် ရည်မှန်းချက်တွေထဲက တစ်ခုဖြစ်ပြီး ဒါကို ကျနော်ဖုံးကွယ်ထားမှာမဟုတ်ပါဘူး။ မန်စီးတီးနဲ့ ချန်ပီယံလိဂ်ဖလားကို ကိုင်မြှောက်နိုင်ဖို့က ကျနော့်အတွက် အိပ်မက်တစ်ခုပါပဲ။ ချန်ပီယံလိဂ်က ဘောလုံးသမားတစ်ဦးအတွက် အကောင်းဆုံးဆုဖလားလို့ ကျနော်ထင်ပါတယ်။ PSG အသင်းနဲ့ရယူနိုင်ခဲ့တုန်းက ဒါဟာ ဖော်ပြလို့မရတဲ့ခံစားချက်ပါပဲ”လို့ ပြောခဲ့တာပါ။

ဒွန်နာရမ်မာဟာ ပြီးခဲ့တဲ့ရာသီက PSG အသင်းကို အသင်းသမိုင်းတစ်လျှောက် ပထမဆုံးအကြိမ် ချန်ပီယံလိဂ် ဖလား ရရှိနိုင်အောင် လက်စွမ်းပြသနိုင်ခဲ့တာ ဖြစ်ပါတယ်။

ဒါပေမယ့် PSG အသင်းဟာ နွေရာသီ အပြောင်းအရွှေ့မှာ လိုင်လီအသင်း ဂိုးသမား ချီဗာလီရာကို ခေါ်ယူခဲ့ပြီး ဒွန်နာရမ်မာကို ရောင်းချခဲ့တာပါ။ 

 ဒွန်နာရမ်မာကို တွေ့ရစဉ်

အဲဒါကြောင့် ဒွန်နာရမ်မာဟာ မန်စီးတီးအသင်းထံ ပေါင် ၂၆ သန်းနဲ့ ပြောင်းရွှေ့လာပြီး ၅ နှစ်စာချုပ်ချုပ် ဆိုခဲ့ပါတယ်။ 

မန်စီးတီးအသင်းနဲ့အတူ လေ့ကျင့်မှုတွေ ပြုလုပ်နေပြီဖြစ်တဲ့ ဒွန်နာရမ်မာဟာ ချန်ပီယံလိဂ်ဖလားကို ရယူနိုင်တဲ့ ခံစားချက်ကို နှစ်သက်နေပြီး မန်ချက်စတာကလပ်မှာ ထပ်ပြီးလုပ်နိုင်ဖို့ မျှော်လင့်နေတာပါ။

မန်စီးတီးအသင်းဟာ ချန်ပီယံလိဂ်ဖလားကို ၂၀၂၂-၂၃ ရာသီမှာ ပထမဆုံးအကြိမ် ရယူနိုင်ခဲ့ပြီး အဆိုပါရာသီမှာ ပရီးမီးယားလိဂ်နဲ့ FA ဖလားကိုပါ ရယူကာ သမိုင်းဝင် အောင်မြင်မှု ရေးထိုးနိုင်ခဲ့ပါတယ်။

ဒွန်နာရမ်မာဟာ တနင်္ဂနွေနေ့မှာ ကစားမယ့် ယူနိုက်တက်အသင်းနဲ့ မန်ချက်စတာဒါဘီပွဲစဉ်မှာ မန်စီးတီးအသင်း အတွက် ပွဲထွက်ပါဝင်ဖွယ်ရှိနေတာပါ။

မန်စီးတီးအသင်းဟာ ဒီရာသီ ပရီးမီးယားလိဂ်ပွဲစဉ် ၃ ပွဲ ကစားအပြီးမှာ ၁ ပွဲနိုင်၊၂ ပွဲရှုံးနဲ့ ရလဒ်တွေ ဆိုးရွားနေတာ ဖြစ်ပါတယ်။ 

Source:Goal

CNI Sport News

၂၀၂၅ ခုနှစ်၊ စက်တင်ဘာ ၁၁

ယူနိုက်တက်အသင်းဟာ နော်တင်ဟမ်ဖောရက်စ်အသင်းမှာ ခြေစွမ်းပြသနေတဲ့ အင်္ဂလန်ကွင်းလယ်လူ အန်ဒါဆန်ကို ခေါ်ယူဖို့ စိတ်ဝင်စားနေတယ်လို့ ဗြိတိန်မီဒီယာတွေက ဖော်ပြထားပါတယ်။ 

ယူနိုက်တက်အသင်းဟာ ပြီးခဲ့တဲ့ နွေရာသီ အပြောင်းအရွှေ့မှာ တိုက်စစ်ပိုင်းနဲ့ ဂိုးသမားနေရာကို အားဖြည့်နိုင်ခဲ့ ပေမယ့် လိုအပ်နေတဲ့ ကွင်းလယ်နေရာကို ခေါ်ယူနိုင်ခဲ့ခြင်း မရှိတာပါ။ 

ယူနိုက်တက်အသင်းဟာ ဘရိုက်တန်အသင်း ကွင်းလယ်လူ ဘာလီဘာကို ခေါ်ယူဖို့ ချိတ်ဆက်ခဲ့ပေမယ့် ဘရိုက်တန်အသင်းဘက်က သူ့ကိုရောင်းချမှာ မဟုတ်ဘူးလို့ အကြောင်းပြန်ခဲ့တာ ဖြစ်ပါတယ်။ 

ယူနိုက်တက်အသင်းဟာ လာမယ့် ဇန်နဝါရီမှာ ဘာလီဘာကို ခေါ်ယူဖို့ ထပ်ကြိုးစားလာနိုင်သလို အခြားပစ်မှတ် တွေကိုလည်း ရှာဖွေနေတာပါ။ 

 အန်ဒါဆန်ကို တွေ့ရစဉ် 

TEAMtalk က ယူနိုက်တက်အသင်းဟာ ကွင်းလယ်နေရာအတွက် အားဖြည့်ဖို့ နော်တင်ဟမ်ဖောရက်စ်အသင်း ကွင်းလယ်လူ အန်ဒါဆန်ကို သူတို့ရဲ့ ပစ်မှတ်စာရင်းထဲမှာ ထည့်သွင်းထားတယ်လို့ ဖော်ပြထားပါတယ်။ 

ယူနိုက်တက်အသင်းဟာ အန်ဒါဆန်ကို ခေါ်ယူဖို့ ခက်ခဲနိုင်ပေမယ့် စိတ်ဝင်စားမှု ပိုပြီးများလာတယ်လို့ သိရပါ တယ်။ 

နော်တင်ဟမ်ဖောရက်စ်အသင်းဟာ ၂၀၂၉ နွေရာသီအထိ စာချုပ်ရှိနေတဲ့ အဓိကကွင်းလယ်လူ အန်ဒါဆန်ကို ရာသီဝက်ကာလမှာ လက်လွှတ်ဖို့ ဆန္ဒမရှိတာပါ။ 

နော်တင်ဟမ်ဖောရက်စ်အသင်းဟာ ပြီးခဲ့တဲ့ရက်ပိုင်းက နည်းပြနူနိုဆန်တိုကို ထုတ်ပယ်ပြီး စပါးအသင်း နည်းပြဟောင်း ပိုစတီကိုဂလူးကို နည်းပြသစ် ခန့်အပ်ထားတဲ့ အပြောင်းအလဲကြောင့် ယူနိုက်တက်အသင်းဟာ အန်ဒါဆန်ရဲ့အခြေအနေကို စောင့်ကြည့်နေတာဖြစ်ပါတယ်။ 

အန်ဒါဆန်ဟာ နည်းပြသစ် ပိုစတီကိုဂလူးရဲ့ အစီအစဉ်မှာ အဓိက အစိတ်အပိုင်း အနေနဲ့ မပါဝင်ရဘူးဆိုရင် ယူနိုက်တက်အသင်းဟာ သူ့ကိုကမ်းလှမ်းမှုပြုလုပ်ဖို့ အဆင်သင့် ဖြစ်နေတာပါ။ 

အန်ဒါဆန်ဟာ နယူးကာဆယ်အသင်းကနေ ပြောင်းရွှေ့လာပြီးကတည်းက နော်တင်ဟမ်ဖောရက်စ်အသင်းမှာ အဓိက ကစားသမားအဖြစ် ရှိနေပါတယ်။ 

သူဟာ ပြီးခဲ့တဲ့ ဥရောပ ယူ-၂၁ ပြိုင်ပွဲမှာ ချန်ပီယံဖြစ်ခဲ့တဲ့ အင်္ဂလန် ယူ-၂၁ အသင်းမှာ အဓိက ကစားသမား ဖြစ်ခဲ့သလို အင်္ဂလန်အသင်းကြီး နည်းပြတူချယ်လ်ဟာ ပြီးခဲ့တဲ့ ၂၀၂၆ ကမ္ဘာ့ဖလားခြေစစ်ပွဲ ၂ ပွဲစလုံး သူ့ကို ပွဲထွက်လူစာရင်းမှာ အသုံးပြုခဲ့တာပါ။

အန်ဒါဆန်ရဲ့ လက်ရှိ ပုံစံကောင်းတွေကြောင့် ယူနိုက်တက်အသင်းဟာ သူ့ကို ဆောင်းရာသီ အပြောင်းအရွှေ့မှာ ခေါ်ယူဖို့ခက်ခဲနိုင်တယ်လို့ သတင်းမှာ ဖော်ပြထားပါတယ်။ 

Source: Sportsmole

CNI Sport News

၂၀၂၅ ခုနှစ်၊ စက်တင်ဘာ ၁၁

ပြင်သစ်အသင်းခေါင်းဆောင် ဘတ်ပီဟာ ရီးရယ်လ်အသင်း ကစားသမားဘဝ ပထမဆုံးရာသီမှာ ဂိုးအများအပြား သွင်းယူနိုင်ခဲ့ပေမယ့် Ballon d'Or ဆုအတွက် ဒမ်ဘီလီနဲ့ ဟာကီမီတို့ နှစ်ဦးထဲက တစ်ဦးကို ရရှိစေဖို့ ဆန္ဒရှိတယ် လို့ ပြောခဲ့ပါတယ်။ 

ဘတ်ပီက “ဒီနှစ်အတွက်ဆုကို ကျနော် မရနိုင်ပါဘူး။ ဒမ်ဘီလီနဲ့ ဟာကီမီတို့လို သူငယ်ချင်းနှစ်ဦးကို ကျနော် ပံ့ပိုးပေးသွားမှာပါ။ နှစ်ဦးထဲက တစ်ဦးကို ကျနော် မရွေးချယ်ချင်ပါဘူး။ သူတို့နှစ်ဦးရဲ့ စွမ်းဆောင်ရည်တွေကို အသိအမှတ်ပြုပြီး သူတို့နှစ်ဦးထဲက ဘယ်သူပဲရရ ကျနော် အလွန်ပျော်ရွှင်မှာပါ”လို့ L'Equipe ကို ပြောခဲ့တာပါ။ 

ဘတ်ပီဟာ သူ့ရဲ့ PSG အသင်းဖော်ဟောင်းတွေဖြစ်တဲ့ ဒမ်ဘီလီနဲ့ ဟာကီမီတို့ထဲက တစ်ဦးဟာ အခုနှစ်အတွက် Ballon d'Or ဆုကို ရရှိမယ်လို့ ယုံကြည်နေတာ ဖြစ်ပါတယ်။ 

PSG အသင်းဟာ ပြီးခဲ့တဲ့ရာသီက အသင်းသမိုင်းတစ်လျှောက် ပထမဆုံး ချန်ပီယံလိဂ် ဖလားအပြင် ဆုဖလား ၃ ခု ကို ရယူနိုင်ခဲ့တာပါ။ 

ဒါအပြင် PSG အသင်းဟာ ဖီဖာကလပ် ကမ္ဘာ့ဖလားပြိုင်ပွဲမှာ ဗိုလ်လုပွဲ တက်နိုင်ခဲ့ပြီး ချယ်လ်ဆီးအသင်းကို အရေးနိမ့်ခဲ့တာ ဖြစ်ပါတယ်။ 

ဘတ်ပီကို တွေ့ရစဉ်

ဘတ်ပီဟာ ပြီးခဲ့တဲ့ရာသီက ဥရော ပဂိုးသွင်း အများဆုံးဆုဖြစ်တဲ့ ဥရောပရွှေဖိနပ်ကို ရရှိခဲ့ပေမယ့် ရီးရယ်လ် အသင်းနဲ့အတူ လာလီဂါ၊ ကိုပါဒယ်ရေးနဲ့ ချန်ပီယံလိဂ်ဖလား ပြိုင်ပွဲတွေမှာ အောင်မြင်မှု မရရှိခဲ့တာပါ။ 

အဲဒါကြောင့် ဘတ်ပီဟာ အခုနှစ်အတွက် Ballon d'Or ဆုကို သူမရရှိနိုင်ဘူးလို့ ဝန်ခံခဲ့တာဖြစ်ပါတယ်။ 

ဘတ်ပီဟာ ဒီရာသီမှာ ရီးရယ်လ်အသင်းနဲ့ ဆုဖလား အောင်မြင်မှုတွေ ရယူပြီး သူလည်း အကောင်းဆုံးပုံစံ ပြသနိုင်မယ်ဆိုရင် လာမယ့်နှစ်မှာချီးမြှင့်မယ့် Ballon d'Or ဆုကို ပစ်မှတ်ထားလို့ရနိုင်တာပါ။ 

အခုနှစ်အတွက် Ballon d'Or ဆုပေးပွဲကို စက်တင်ဘာ ၂၂ ရက် ပြင်သစ်နိုင်ငံမှာ ကျင်းပသွားမှာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ စက်တင်ဘာ ၁၁

ပြီးခဲ့တဲ့ရာသီအကုန်မှာ ယူနိုက်တက်အသင်းကနေ ထွက်ခွာခဲ့တဲ့ ဒိန်းမတ်ကွင်းလယ်လူ အဲရစ်ဆန်ဟာ ဘွန်ဒက်လီဂါကလပ် ဝုလ်ဖ်ဘဘ်အသင်းထံ အလွတ်နဲ့ပြောင်းရွှေ့ခဲ့ပါတယ်။ 

အသက် ၃၃ နှစ်အရွယ်ရှိ အဲရစ်ဆန်ဟာ ဝုလ်ဖ်ဘတ်အသင်းမှာ ၂၀၂၇ နွေရာသီအထိရှိမယ့် ၂ နှစ် စာချုပ်ချုပ် ဆိုခဲ့တာပါ။ 

အဲရစ်ဆန်ဟာ ယူနိုက်တက်အသင်းမှာ ကစားခဲ့တဲ့ ၃ ရာသီအတွင်းမှာ ပွဲပေါင်း ၁၀၇ ပွဲ ပါဝင်ကစားခဲ့ပြီး ၈ ဂိုးသွင်း ယူကာ အသင်းကို ကာရာဘောင်းလိဂ်ဖလားနဲ့ FA ဖလားရရှိအောင် ကူညီပေးနိုင်ခဲ့ပါတယ်။ 

အဲရစ်ဆန်ဟာ ရက်စ်ဟမ်းအသင်းနဲ့ ပရီးမီးယားလိဂ် ကလပ်အသင်းအချို့ အပါအဝင် ချိတ်ဆက်မှုတွေ ရခဲ့ပေမယ့် ဝုလ်ဖ်ဘတ်အသင်းထံ ပြောင်းရွှေ့ခဲ့တာပါ။

 အဲရစ်ဆန်က “ဝုလ်ဖ်ဘတ်ဟာ ဘွန်ဒက်လီဂါမှာ ကျနော့်ရဲ့ ပထမဆုံးကလပ် ဖြစ်ပါတယ်။ ဒီစွန့်စားခန်းအသစ်ကို ကျနော် အလွန်စိတ်လှုပ်ရှားနေပါတယ်။ အတူလက်တွဲပြီး ကျနော်တို့ အောင်မြင်မှု ရယူနိုင်မယ်လို့ ကျနော် ယုံကြည်ပါတယ်။ ဝုလ်ဖ်ဘတ်အသင်းမှာ ဒိန်းမတ်ကစားသမားတွေ ရှိနေတာကလည်း ဒီအသင်းကို လာရောက်ဖို့ ကျနော့်ကို အလွန်ဆွဲဆောင်မှု ဖြစ်စေခဲ့ပါတယ်”လို့ ပြောခဲ့ပါတယ်။ 

အဲရစ်ဆန်ကို တွေ့ရစဉ်

အေဂျက်စ်၊ စပါး၊ အင်တာမီလန်နဲ့ ဘရန်ဖို့ဒ်အသင်းတွေမှာ ကစားခဲ့တဲ့ အဲရစ်ဆန်ဟာ ပြီးခဲ့တဲ့ရက်ပိုင်းက ဆွီဒင် ကလပ် မယ်လ်မိုအသင်းမှာ လေ့ကျင့်မှုတွေ ပြုလုပ်ခဲ့တာပါ။ 

အဲရစ်ဆန်ဟာ ဒိန်းမတ်အသင်းနဲ့အတူ ၂၀၂၆ ကမ္ဘာ့ဖလားပြိုင်ပွဲမှာ ပါဝင်ကစားချင်တာကြောင့် ဝုလ်ဖ်ဘတ် အသင်းမှာ အကောင်းဆုံးပုံစံတွေ ပြသနိုင်ဖို့ မျှော်လင့်နေပါတယ်။ 

ဝုလ်ဖ်ဘတ်အသင်းဟာ ဒီရာသီဘွန် ဒက်လီဂါပွဲစဉ် ၂ ပွဲ ကစားထားပြီး ၁ ပွဲနိုင်၊ ၁ ပွဲသရေ ရလဒ်ထွက်ပေါ် ထားတာပါ။

ဝုလ်ဖ်ဘတ်အသင်းဟာ အခုလာမယ့် ဘွန်ဒက်လီဂါ ပွဲစဉ်အဖြစ် ကိုလုံးအသင်းနဲ့ ယှဉ်ပြိုင်ရမှာဖြစ်ပြီး ဒီပွဲမှာ အဲရစ်ဆန် ပွဲဦးထွက်အဖြစ် ပါဝင်လာနိုင်ဖွယ်ရှိနေတာ ဖြစ်ပါတယ်။

Source: BBC

CNI Sport News

၂၀၂၅ ခုနှစ်၊ စက်တင်ဘာ ၁၁

လက်စတာအသင်း တိုက်စစ်မှူးဟောင်း ဗာဒီဟာ စီးရီးအေကလပ် ခရီမိုနီဆီအသင်း ကစားသမားသစ်အဖြစ် မိတ်ဆက်တဲ့ အခမ်းအနားမှာ သူ့ရဲ့အသက်အရွယ်နဲ့ ပတ်သက်ပြီး သံသယရှိတဲ့ သူတွေကို မှားယွင်းကြောင်း သက်သေပြသဖို့ စိတ်အားထက်သန်နေတယ်လို့ ပြောခဲ့ပါတယ်။ 

ဗာဒီက “ခင်ဗျားဟာ သံသယရှိတဲ့ သူတွေထဲက တစ်ဦးဖြစ်မှာပါ။ ဒါက မှားယွင်းတယ်ဆိုတာကို ကျနော် သက်သေပြရမယ့် သူတွေထဲမှာ ခင်ဗျားလည်း တစ်ဦးအနေနဲ့ ပါဝင်ပါတယ်။ နားထောင်ပါ၊ ကျနော့်အတွက်တော့ အသက်အရွယ်ဟာ ကိန်းဂဏန်းတစ်ခုပါပဲ။ ကျနော့်ရဲ့ ခြေထောက်တွေဟာ သူတို့အရင်ကအတိုင်း လုပ်နေသလို ဖြစ်ပြီး လန်းဆန်းနေဆဲ ဖြစ်တာကြောင့် ကျနော်ဆက်သွားမှာပါ။ အခုအချိန်ထိ နှေးကွေးတဲ့ လက္ခဏာမရှိပါဘူး”လို့ သူ့ရဲ့အသက်အရွယ်ပေါ် စိုးရိမ်နေတဲ့ သတင်းထောက်တစ်ဦးရဲ့ မေးမြန်းမှုကို ဖြေခဲ့တာပါ။ 

ပြီးခဲ့တဲ့ရာသီအကုန်မှာ လက်စတာအသင်းနဲ့ စာချုပ်ကုန်ဆုံးခဲ့တဲ့ ဝါရင့်တိုက်စစ်မှူး ဗာဒီဟာ အသင်းအများအပြား နဲ့ သတင်းထွက်ခဲ့ပေမယ့် ကစားသမားဘဝ ပထမဆုံးအကြိမ် အင်္ဂလန်ပြင်ပ ကလပ်ဖြစ်တဲ့ ခရီမိုနီဆီအသင်းထံ ပြောင်းရွှေ့ခဲ့တာ ဖြစ်ပါတယ်။ 

အသက် ၃၈ နှစ်အရွယ်ရှိ ဗာဒီဟာ ခရီမိုနီဆီအသင်းနည်းပြ နီကိုလာနဲ့ အချိန်အကြာကြီး Zoom ပြောဆိုပြီး နောက်မှာ စီးရီးအေကလပ်ထံ ပြောင်းရွှေ့ဖို့ ဆုံးဖြတ်ခဲ့တာပါ။

 ဗာဒီကို တွေ့ရစဉ် 

ဗာဒီဟာ ခရီမိုနီဆီအသင်းနဲ့ ၁ နှစ် စာချုပ်ချုပ်ခဲ့ပြီး နောက်ထပ် တစ်နှစ်သက်တမ်းတိုးခွင့် ပါဝင်ကာ အသင်းမှာ ကျောနံပါတ် ၁၀ ဝတ်ဆင်သွားမှာ ဖြစ်ပါတယ်။

ဗာဒီဟာ လက်စတာအသင်းမှာ ၂၀၁၂ ကနေ ၂၀၂၅ ခုနှစ်အထိ ကစားခဲ့ပြီး ပွဲပေါင်း ၅၀၀ ပါဝင် ကစားခဲ့တာမှာ သွင်းဂိုး ၂၀၀ သွင်းယူနိုင်ခဲ့တာပါ။ 

အင်္ဂလန်တိုက်စစ်မှူးဟောင်း လက်စတာအသင်းနဲ့အတူ ပရီးမီးယားလိဂ်၊ FA ဖလားနဲ့ ချန်ပီယံရှစ်ဖလားတွေကို ရယူနိုင်ခဲ့ပါတယ်။ 

ဗာဒီက သူဟာ ခရီမိုနီဆီအသင်းကို ဒီရာသီ စီးရီးအေပြိုင်ပွဲမှာ ဆက်ပြီး ရှိနေနိုင်အောင် သူ့မှာရှိတဲ့အရာတွေ အားလုံးကို ပေးသွားမှာ ဖြစ်တယ်လို့လည်း ပြောခဲ့တာပါ။ 

ခရီမိုနီဆီအသင်းဟာ ဒီရာသီစီးရီးအေပွဲစဉ် ၂ ပွဲကစားပြီးချိန်မှာ ၂ ပွဲစလုံး နိုင်ပွဲရရှိထားပြီး လာမယ့်ပွဲစဉ်အဖြစ် ဗီရိုနာအသင်းနဲ့ ယှဉ်ပြိုင်ရမှာ ဖြစ်ပါတယ်။

ဗာဒီဟာ ဒီပွဲစဉ်မှာ ခရီမိုနီဆီအသင်း ကစားသမားဘဝ ပွဲဦးထွက်အဖြစ် ပါဝင်လာနိုင်ဖွယ် ရှိနေပါတယ်။ 

Source: ESPN

CNI Sport News

၂၀၂၅ ခုနှစ်၊ စက်တင်ဘာ ၁၀

ပြင်သစ်အသင်းက အိုက်စလန်အသင်းကို ၂ ဂိုး-၁ ဂိုးနဲ့ အနိုင်ရခဲ့တဲ့ ၂၀၂၆ ကမ္ဘာ့ဖလား ခြေစစ်ပွဲမှာ ကွင်းလယ်လူ ရာဘီယော့ကို လှောင်ပြောင်ခဲ့တဲ့ အသင်းပရိသတ်တွေရဲ့ လုပ်ရပ်ဟာ လက်ခံနိုင်စရာ မရှိဘူးလို့ ပြင်သစ်အသင်း နည်းပြ ဒက်ချမ့်စ်က ဝေဖန်ခဲ့ပါတယ်။ 

ဒက်ချမ့်စ်က “ဒါက လက်ခံနိုင်စရာ မရှိပါဘူး။ သူဟာ ပြင်သစ်လက်ရွေးစင် ကစားသမားဖြစ်ပြီး ဒီဂျာစီကို သူ ဝတ်ဆင်ထားပါတယ်။ သူ့ကလပ်မှာ သူဖြစ်ခဲ့တာတွေက ကျနော့် အလုပ် မဟုတ်ပါဘူး။ ဒီလိုမျိုး လှောင်ပြောင် နေတာဟာ မဖြစ်သင့်သလို လက်ခံနိုင်စရာမရှိဘူး”လို့ ပြောခဲ့တာပါ။ 

ပြင်သစ်ကွင်းလယ်လူ ရာဘီယော့ဟာ မာဆေးလ်အသင်းဖော်ဟောင်း ရိုဝီနဲ့ အဝတ်လဲခန်းအတွင်းမှာ ခိုက်ရန် ဖြစ်ပွားခဲ့ပြီးနောက် အသင်းရဲ့ လူစာရင်းကနေ ထုတ်ပယ်ခံခဲ့ရကာ ခက်ခဲတဲ့ ရက်သတ္တပတ်ကို ကြုံတွေ့ခဲ့ရတာ ဖြစ်ပါတယ်။

အသင်းသစ်ရှာဖွေဖို့ မာဆေးလ်အသင်းရဲ့ ပြောကြားခြင်းကို ခံခဲ့ရတဲ့ ရာဘီယော့ဟာ ဂျူဗင်တပ်စ်အသင်း နည်းပြဟောင်း အယ်လီဂရီ ကိုင်တွယ်နေတဲ့ အေစီမီလန်အသင်းထံ ပြောင်းရွှေ့ပြီး စီးရီးအေပြိုင်ပွဲထံ ပြန်လာခဲ့တာပါ။ 

ရာဘီယော့ကို တွေ့ရစဉ်

ပြင်သစ်အသင်းနည်းပြ ဒက်ချပ့်စ်ဟာ အိုက်စလန်အသင်းနဲ့ပွဲစဉ်မှာ ကွင်းလယ်လူ ချူအာမန်နီ ထုတ်ပယ်ခံရပြီး တစ်ဦးလျောနဲ့ ကစားနေရချိန်မှာ ရာဘီယော့ကို လူစားလဲ ဝင်ရောက်စေခဲ့တာ ဖြစ်ပါတယ်။

PSG အသင်း အိမ်ကွင်းမှာ ကစားခဲ့တဲ့ ဒီပွဲမှာ PSG အသင်း ကစားသမားဟောင်းဖြစ်ခဲ့တဲ့ ရာဘီယော့ဟာ လူစားလဲ ဝင်ရောက်ချိန် နေရာစုံကနေ ကျယ်လောင်တဲ့ လှောင်ပြောင်မှုတွေ ခံခဲ့ရပြီး ဘောလုံးထိချိန်တိုင်းမှာလည်း အဆတ်မပြတ် လှောင်ပြောင်မှုတွေ ခံခဲ့ရတာပါ။ 

ပြင်သစ်အသင်းနည်းပြ ဒက်ချမ့်စ်ဟာလည်း ဒမ်ဘီလီနဲ့ ဒူအီတို့ရဲ့ ဒဏ်ရာတွေကြောင့် ဒေါသထွက်နေတဲ့ PSG အသင်းပရိသတ်တွေရဲ့ လှောင်ပြောင်မှုတွေ ခံခဲ့ရတာဖြစ်ပါတယ်။

ဒက်ချမ့်စ်ကတော့ ရာဘီယော့အပေါ်မှာ ပရိသတ်တွေရဲ့ ပြုမူဆက်ဆံပုံကို လက်မခံနိုင်ဘူးလို့ ပြောခဲ့တာပါ။ 

ရာဘီယော့ဟာ ဒီတစ်ပတ်ကစားမယ့် ဘိုလော့ဂ်နာအသင်းနဲ့ စီးရီးအေပွဲစဉ်မှာ အေစီမီလန်အသင်းအတွက် ပွဲဦးထွက်အဖြစ် ပါဝင်နိုင်တာဖြစ်ပါတယ်။ 

Source: Dailymail