CNI Sport News

၂၀၂၅ ခုနှစ်၊ ဖေဖော်ဝါရီ ၁၅

ယူနိုက်တက်အသင်းနည်းပြ အာမိုရင်က အသင်းအနေနဲ့ နွေရာသီမှာ ကစားသမားသစ်တွေ ဝယ်ယူချင်ရင် အသင်းမှာရှိနေတဲ့ ကစားသမားတွေကို ရောင်းချဖို့လိုတယ်လို့ ပြောခဲ့ပါတယ်။ 

အာမိုရင်က “ရိုးရိုးလေးပါ၊ တစ်ခုခုလုပ်ချင်ရင် ကစားသမားတွေ ရောင်းချဖို့လိုပါတယ်။ ကျနော်တို့ဟာ အခု အချိန်မှာ ကစားသမား ခေါ်ယူမှု မလုပ်နိုင်သလို အပြောင်းအရွှေ့ကလည်း ပိတ်သွားပါပြီ။ ကျနော်တို့ဟာ လာမယ့်ပွဲတွေကို အာရုံစိုက်ဖို့လိုအပ်ပြီး နွေရာသီကျရင်တော့ ဘာတွေဖြစ်လာမလဲဆိုတာ မြင်တွေ့ရမှာပါ”လို့ ပြောခဲ့တာပါ။ 

ယူနိုက်တက်အသင်းဟာ ပရီးမီးယားလိဂ်ရဲ့ ဘဏ္ဍာရေး စည်းမျဉ်းချိုးဖောက်မှုကို ရှောင်ချင်တာကြောင့် ပြီးခဲ့တဲ့ ဇန်နဝါရီက ကြယ်ပွင့်ကစားသမား ဂါနာချိုကို ရောင်းချဖို့ လုပ်ဆောင်ခဲ့ပါတယ်။ 

ဂါနာချိုကို ခေါ်ယူဖို့ ချယ်လ်ဆီးနဲ့ နာပိုလီအသင်းတို့က စိတ်ဝင်စားပြီး ဆွေးနွေးမှုတွေ ရှိခဲ့ပေမယ့် အပြောင်းအရွှေ့ မဖြစ်ခဲ့တာကြောင့် ကစားသမားဟာ ယူနိုက်တက်အသင်းမှာ ဆက်ပြီးရှိနေခဲ့တာပါ။ 

ယူနိုက်တက်အသင်းဟာ ပြီးခဲ့တဲ့ ဇန်နဝါရီအပြောင်းအရွှေ့က အသင်းမှာ လုပ်ခလစာ အများကြီးရရှိနေတဲ့ ရက်ရှ်ဖို့ဒ်နဲ့ အန်တိုနီတို့ကိုလည်း အငှားချခဲ့ပါတယ်။ 

အာမိုရင်ကို တွေ့ရစဉ်

ဂါနာချိုကိုခေါ်ယူဖို့ စိတ်ဝင်စားခဲ့တဲ့ ချယ်လ်ဆီးအသင်းဟာ ယူနိုက်တက် အကယ်ဒမီထွက် ကိုဘီမိုင်နူးကို ခေါ်ယူဖို့ နွေရာသီမှာ ကြိုးပမ်းလာဖွယ်ရှိနေတာပါ။ 

ယူနိုက်တက်အသင်းဟာ ကိုဘီမိုင်နူးကိုလည်း သူတို့သတ်မှတ်ထားတဲ့ ပြောင်းရွှေ့ကြေးရရင် ရောင်းချသွားဖွယ် ရှိနေပါတယ်။ 

မန်ချက်စတာကလပ်ဟာ ပြီးခဲ့တဲ့ ဇန်နဝါရီက လက်ချီအသင်း နောက်ခံလူ ဒေါဂူနဲ့ အာဆင်နယ်အသင်းကြယ်ပွင့် ဟီဗန်တို့ကိုသာ ခေါ်ယူနိုင်ခဲ့တာပါ။ 

ယူနိုက်တက်အသင်းဟာ လာမယ့် နွေရာသီမှာ စာချုပ်ကုန်ဆုံးမယ့် လင်ဒီလော့ဖ်နဲ့ အဲရစ်ဆန်တို့ကို ထွက်ခွာခွင့် ပေးမှာဖြစ်ပြီး ဆန်ချိုကို ချယ်လ်ဆီးအသင်းထံ အပြီးသတ်ရောင်းချကာ ရက်ရှ်ဖို့ဒ်နဲ့ ကတ်စီမီရိုတို့ကိုလည်း ရောင်းချဖို့ စီစဉ်ထားပါတယ်။

ယူနိုက်တက်အသင်းနည်းပြ အာမိုရင်ဟာ ဂါနာချိုနဲ့ ကိုဘီမိုင်နူးတို့ကို အသင်းမှာ ဆက်ထိန်းသိမ်းချင်ပေမယ့် သူတို့ထဲက တစ်ဦးကို နွေရာသီမှာ ဆုံးရှုံးရဖွယ်ရှိနေတာပါ။

ယူနိုက်တက်အသင်းဟာ ဖေဖော်ဝါရီ ၁၆ ရက်မှာ ပရီးမီးယားလိဂ် ပွဲစဉ်အဖြစ် စပါးအသင်းအိမ်ကွင်း သွားရောက် ယှဉ်ပြိုင်ရမှာ ဖြစ်ပါတယ်။ 

Source: Metro

CNI Sport News

၂၀၂၅ ခုနှစ်၊ ဖေဖော်ဝါရီ ၁၅

ပီအက်စ်ဂျီအသင်းဟာ လီဗာပူးလ်အသင်း နောက်ခံလူ ကိုနာတေးကို နွေရာသီ အပြောင်းအရွှေ့မှာ ခေါ်ယူနိုင်ဖို့ မျှော်လင့်နေပါတယ်။ 

ပီအက်စ်ဂျီအသင်းဟာ လာမယ့် နွေရာသီအတွက် စီစဉ်မှုတွေ ပြုလုပ်နေပြီး လီဗာပူးလ်အသင်း နောက်ခံလူ ကိုနာတေးဟာ သူတို့ရဲ့ပစ်မှတ်တွေထဲက တစ်ဦးဖြစ်လာခဲ့တာပါ။

ပီအက်စ်ဂျီအသင်းနည်းပြ လူးဝစ်အင်းနရစ်ဟာ ဗဟိုခံစစ်ကို ပိုပြီးအားကောင်းစေဖို့အတွက် ကိုနာတေးကို ခေါ်ယူအားဖြည့်ချင်နေတာ ဖြစ်ပါတယ်။ 

ကိုနာတေးဟာ လူငယ်ကစားသမားဘဝက ပဲရစ်အကယ်ဒမီမှာ ၅ နှစ်ကြာရှိခဲ့တာကြောင့် သူမွေးဖွားရာမြို့ကို ပြန်လာဖို့ ဆွဲဆောင်ခံနေရတာပါ။ 

ကိုနာတေးကလည်း ပီအက်စ်ဂျီအသင်းထံ အပြောင်းအရွှေ့ကို စိတ်ဝင်စားပေမယ့် လက်ရှိအချိန်မှာ လီဗာပူးလ် အသင်းနဲ့အတူ ဒီရာသီ ပရီးမီးယားလိဂ်၊ ချန်ပီယံလိဂ်နဲ့ ကာရာဘောင်းဖလား ပြိုင်ပွဲတွေမှာ အောင်မြင်မှုရယူနိုင်ဖို့ အာရုံစိုက်နေတာ ဖြစ်ပါတယ်။ 

ကိုနာတေးကို တွေ့ရစဉ်

ပြင်သစ်လက်ရွေးစင်အတွက် ၂၁ ပွဲ ပါဝင်ကစားထားတဲ့ ကိုနာတေးနဲ့ လီဗာပူးလ်အသင်းတို့ရဲ့ စာချုပ်ဟာ ၁ နှစ်သာ ကျန်ရှိတော့ပြီး သူဟာ လီဗာပူးလ်အသင်းရဲ့ စာချုပ်သက်တမ်းတိုးဖို့ ကမ်းလှမ်းမှုကို ပယ်ချထားတာပါ။ 

လီဗာပူးလ်အသင်းဟာ ဒီရာသီအကုန်မှာ ဗန်ဒိုက်ကို အလွတ်နဲ့ ဆုံးရှုံးရဖွယ် ရှိနေတာကြောင့် ကိုနာတေးကို စာချုပ်သက်တမ်းတိုးပြီး ဆက်ထိန်းသိမ်းနိုင်ဖို့ ကြိုးပမ်းဖွယ်ရှိနေပါတယ်။ 

ကိုနာတေးဟာ ဒဏ်ရာတွေနဲ့ ရုန်းကန်ခဲ့ရပေမယ့် နည်းပြအာနီဆလော့ လက်ထက်မှာ လီဗာပူးလ်အသင်းရဲ့ အဓိက ကစားသမားအဖြစ် ပါဝင်ခွင့်ရရှိနေတာပါ။

၂၀၂၁ ခုနှစ်က လိုက်ပ်ဇစ်အသင်းကနေ ရောက်ရှိလာခဲ့တဲ့ ကိုနာတေးဟာ လီဗာပူးလ်အသင်းအတွက် ၁၁၆ ပွဲ ပါဝင်ကစားထားပြီး ၅ ဂိုး သွင်းယူထားပါတယ်။ 

လီဗာပူးလ်အသင်းဟာ ဖေဖော်ဝါရီ ၁၆ ရက်မှာ ပရီးမီးယားလိဂ် ပွဲစဉ်အဖြစ် ဝုလ်ဗ်စ်အသင်းကို အိမ်ကွင်း ယှဉ်ပြိုင်ရမှာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဖေဖော်ဝါရီ ၁၅

ရီးရယ်လ်အသင်းနည်းပြ အန်ဆယ်လော့တီက ဆော်ဒီပရိုလိဂ်ထံ ပြောင်းရွှေ့ဖို့ ချိတ်ဆက်မှုတွေခံနေရတဲ့ ဗီနီစီးယက်စ်ရဲ့ အနာဂတ်ထင်ကြေးတွေနဲ့ ပတ်သက်တဲ့ မေးခွန်းတွေကို ဖြေရတာ ငြီးငွေ့နေပြီလို့ ပြောခဲ့ပါတယ်။ 

အန်ဆယ်လော့တီက “မေးခွန်းတွေက အများကြီးပါ၊ ဒီအကြောင်းအရာတွေအတွက် ငြီးငွေ့နေလားဆိုရင် ဟုတ်ပါ တယ်။ စိုးရိမ်မှုရှိလားဆိုရင် မရှိပါဘူး။ သူပျော်နေတာကို ကျနော်တို့ မြင်တွေ့ရပါတယ်။ ကျနော်တို့ဟာ ဒီအကြောင်းအရာကို ဒီနေရာမှာ မပြောချင်သလို သူကလည်း မပြောချင်ပါဘူး။ သူဟာ နောက်ဆုံးကစားခဲ့တဲ့ပွဲမှာ အလွန်ကောင်းမွန်စွာ လုပ်နိုင်ခဲ့ပါတယ်”လို့ သတင်းထောက်တွေရဲ့ မေးမြန်းမှုကို ဖြေခဲ့တာပါ။

ဆော်ဒီပရိုလိဂ်ဟာ ဗီနီစီးယက်စ်ကို လာမယ့်နွေရာသီမှာ ခေါ်ယူနိုင်ဖို့ အပြင်းထန် ကြိုးစားနေပေမယ့် ကစားသမားဟာ ရီးရယ်လ်အသင်းနဲ့ စာချုပ်သစ်ထဲမှာ လက်မှတ်ရေးထိုးဖို့ နီးစပ်နေပြီလို့ သတင်းတွေ ထွက်ပေါ်နေပါတယ်။

ဗီနီစီးယက်စ်ကို တွေ့ရစဉ်

ဗီနီစီးယက်စ်ဟာ ရီးရယ်လ်အသင်းက မန်စီးတီးအသင်းကို ၃ ဂိုး-၂ ဂိုးနဲ့ အနိုင်ရခဲ့တဲ့ ချန်ပီယံလိဂ် ပလေးအော့ဖ် ပထမအကျော့ပွဲစဉ်မှာ အကောင်းဆုံး ကစားသမားဆုရတဲ့အထိ ခြေစွမ်းပြသနိုင်ခဲ့တာပါ။ 

ဗီနီစီးယက်စ်က သူဟာ ရီးရယ်လ်အသင်းမှာ ကာလရှည်ကြာ ဆက်ရှိချင်နေပြီး သူ့ရဲ့အနာဂတ်နဲ့ပတ်သက်တဲ့ တိကျတဲ့အဖြေကို သိရမယ်လို့ ပြောထားပါတယ်။

ဗီနီစီးယက်စ်နဲ့ ရီးရယ်လ်အသင်းတို့ရဲ့ စာချုပ်ဟာ ၂၀၂၇ ခုနှစ်၊ ဇွန်လအထိ သက်တမ်းရှိနေသေးတာပါ။

၂၀၁၈ ခုနှစ်က ဖလာမင်ဂိုအသင်းကနေ ရောက်ရှိလာခဲ့တဲ့ ဗီနီစီးယက်စ်ဟာ ရီးရယ်လ်အသင်းအတွက် ၂၉၅ ပွဲ ပါဝင်ကစားထားပြီး ၁၀၁ ဂိုး သွင်းယူထားပါတယ်။

ရီးရယ်လ်အသင်းဟာ ဖေဖော်ဝါရီ ၁၅ ရက်မှာ လာလီဂါပွဲစဉ်အဖြစ် အိုဆာဆူနာအသင်း အိမ်ကွင်း သွားရောက် ယှဉ်ပြိုင်ရမှာ ဖြစ်ပါတယ်။ 

Source: CNA

CNI Sport News

၂၀၂၅ ခုနှစ်၊ ဖေဖော်ဝါရီ ၁၅

ချယ်လ်ဆီးအသင်းဟာ ဘရိုက်တန်အသင်းကို ၃ ဂိုး-ဂိုးမရှိနဲ့ ဂိုးပြတ် အရေးနိမ့်ပြီးနောက် နည်းပြမာရက်စ်ကာက ဒီပွဲဟာ သူ့ရဲ့လက်ထက်မှာ ချယ်လ်ဆီးအသင်းရဲ့ အဆိုးရွားဆုံး စွမ်းဆောင်ရည်လို့ ပြောခဲ့ပါတယ်။

မာရက်စ်ကာက “အရာအားလုံးကို စိတ်ပျက်မိပါတယ်။ ဒီပွဲကိုအားပေးဖို့ ရောက်လာခဲ့တဲ့ ပရိသတ်တွေအတွက် ကျနော် စိတ်မကောင်း ဖြစ်ရပါတယ်။ ကျနော်တို့ဟာ လက်ရှိအချိန်မှာ လွယ်လွယ်ကူကူနဲ့ သွင်းဂိုးတွေ ခွင့်ပြုနေရ သလို ဂိုးရဖို့ ရုန်းကန်နေရတယ်လို့ ခံစားရပါတယ်။ ကျနော်တို့ဟာ ပိုပြီးကောင်းအောင် လုပ်ဖို့အတွက် အတူ လက်တွဲ လုပ်ဆောင်ဖို့ လိုအပ်နေပါပြီ။ ကျနော်ဟာ အမြဲတမ်း ဖိအားတွေခံစားရပေမယ့် ဒီပွဲက ကျနော် ဒီကို ရောက်ပြီးကတည်းက အဆိုးရွားဆုံး စွမ်းဆောင်ရည်ပါ။ ကျနော်တို့ဟာ ဥရောပဝင်ခွင့်နေရာနဲ့ အဆုံးသတ်နိုင်ဖို့ ပြိုင်ဆိုင်မှုရှိနေဆဲပါ”လို့ Sky Sports ကို ပြောခဲ့တာပါ။

ချယ်လ်ဆီးအသင်းဟာ ဒီပွဲမှာ ဘရိုက်တန်အသင်းကို ဘောလုံးပိုင်ဆိုင်မှု အသာစီးနဲ့သာ ကစားနိုင်ခဲ့ပြီး ဂိုးပေါက်တည့်မှု တစ်ကြိမ်မှ မရှိခဲ့တာဖြစ်ပါတယ်။

ဘရိုက်တန်အသင်းကတော့ ဂိုးပေါက်တည့်တဲ့ ၅ ကြိမ်မှာ သွင်းဂိုး ၃ ဂိုး သွင်းယူနိုင်ခဲ့တာပါ။ 

ချယ်လ်ဆီးအသင်းဟာ ပြီးခဲ့တဲ့ FA ဖလား စတုတ္ထအဆင့် ပွဲစဉ်မှာလည်း ဘရိုက်တန်အသင်းကို အရေးနိမ့်ပြီး ပြိုင်ပွဲကနေ ထွက်ခွာခဲ့ရတာကြောင့် ဘရိုက်တန်အသင်းကို တစ်ပတ်အတွင်း ၂ ပွဲဆက်တိုက် အရေးနိမ့်ခဲ့တာ ဖြစ်ပါတယ်။ 

ချယ်လ်ဆီးနဲ့ဘရိုက်တန်ကို တွေ့ရစဉ်

ချယ်လ်ဆီးအသင်းဟာ ဘရိုက်တန်အသင်းကို အရေးနိမ့်ခဲ့တာကြောင့် နောက်ဆုံးကစားခဲ့တဲ့ ပရီးမီးယားလိဂ် ၉ ပွဲမှာ ၂ ပွဲသာ အနိုင်ရတဲ့အထိ ရလဒ် တွေဆိုးရွားနေတာပါ။

ဒါပေမယ့် ချယ်လ်ဆီးအသင်းဟာ ပရီးမီးယားလိဂ် အမှတ်ပေးဇယားအဆင့် ၄ နေရာမှာ ဆက်လက် ရပ်တည်နေ ပြီး မန်စီးတီးနဲ့ နယူးကာဆယ်အသင်းတို့ပွဲစဉ်မှာ တစ်သင်းသင်း အနိုင်ရခဲ့ရင် အဆင့် ၄ နေရာကနေ ဖယ်ပေးရ တော့မှာ ဖြစ်ပါတယ်။ 

ဘရိုက်တန်အသင်းကတော့ အမှတ်ပေးဇယား အဆင့် ၈ နေရာမှာ ရပ်တည်နေတာပါ။ 

ချယ်လ်ဆီးအသင်းဟာ လာမယ့်အပတ်မှာ ပရီးမီးယားလိဂ် ပွဲစဉ်အဖြစ် အက်စတွန်ဗီလာအသင်း အိမ်ကွင်း သွားရောက် ယှဉ်ပြိုင်ရမှာဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဖေဖော်ဝါရီ ၁၄

ယူနိုက်တက်အသင်းတိုက်စစ်မှူးဟောင်း ရော့စီက သူ့ရဲ့နှုတ်ဆက်ပွဲမှာ ဆာအဲလက်စ်ဖာဂူဆန်ဟာ နည်းပြအဖြစ် ဆောင်ရွက်မယ်လို့ ပြောခဲ့ပါတယ်။ 

ရော့စီက “ကျနော့်ရဲ့ပထမဆုံး ပရော်ဖက်ရှင်နယ်နည်းပြကြီး ဆာအဲလက်စ်ဖာဂူဆန် လာမှာကိုပြောရတာ အလွန် ဂုဏ်ယူမိပါတယ်။ သူက ကျနော့်ရဲ့ပထမဆုံးနည်းပြပါ။ ကျနော်ဟာ သူ့အတွက် ၃ နှစ်အတွင်းမှာ ပွဲအနည်းငယ်ပဲ ကစားခဲ့ရပေမယ့် သူ့ကို ကျနော်ခေါ်ယူခဲ့တဲ့အချိန်မှာ သူ့ဘက်က လာမယ်လို့ ချက်ချင်းပြန်ပြောခဲ့ပါတယ်။ ယူနိုက်တက်အသင်းမှာ သူ့ရဲ့ဆက်ဆံမှုတွေအတွက် ကျနော်အလွန်လေးစားပြီး သူ့ကိုမြင်တွေ့ရမှာ အလွန် ပျော်ရွှင်တယ်”လို့ နှုတ်ဆက်ပွဲကို ကြေညာချိန်မှာ ပြောခဲ့တာပါ။ 

အသက် ၃၈ နှစ်အရွယ်ရှိပြီဖြစ်တဲ့ ရော့စီဟာ ၂၀၂၃ ခုနှစ်မှာ ပရော်ဖက်ရှင်နယ်ကစားသမားဘဝကနေ အနားယူခဲ့တာဖြစ်ပါတယ်။

မတ်လ ၂၂ ရက် ဖီအိုရင်တီးနားအသင်းအိမ်ကွင်းမှာ ကစားမယ့်နှုတ်ဆက်ပွဲအတွက် ရော့စီဟာ ဂန္ထဝင်ကစားသမားတွေဖြစ်တဲ့ ဘာတစ္စတူတာ၊လူကာတိုနီ၊ကာဆာနို၊ဖရေးနဲ့ ဗယ်လာရိုတို့ကိုလည်း ဖိတ်ကြားထားတာပါ။ 

၂၀၁၉ ခုနှစ်က ယူနိုက်တက် 99 ဂန္ထဝင်အသင်းနဲ့ ဘိုင်ယန်မြူးနစ်အသင်းတို့ အိုးထရက်ဖိုဒ့် မှာကစားခဲ့တဲ့ ပွဲစဉ်ကို ကိုင်တွယ်ခဲ့ပြီးနောက် ဒီပွဲဟာ ဖာဂူဆန်အတွက် နည်းပြခုံတန်းကို ပြန်လည်ဝင်ရောက်မယ့် ပထမဆုံးပွဲဖြစ်ပါတယ်။ 

ယူနိုက်တက်အသင်းမှာ ကစားသမားဘဝစတင်ခဲ့တဲ့ ရော့စီဟာ ပွဲပေါင်း ၁၄ ပွဲကစားခဲ့ပြီး ၄ ဂိုးသွင်းယူနိုင်ခဲ့ကာ နယူးကာဆယ်၊ပါးမားအသင်းတွေထံ အငှားနဲ့ ပြောင်းရွှေ့ခဲ့တာပါ။ 

ရော့စီဟာ ယူနိုက်တက်အသင်းကနေ ထွက်ခွာ ပြီးနောက် ဗီလာရီးရယ်လ်၊ဖီအိုရင်တီးနား၊လီဗန်တေး၊ဆယ်လ်တာဗီဂို၊ဂျီနိုအာ၊ရီးရယ်လ်ဆော့လိတ်နဲ့ စပယ်လ် အသင်းတို့မှာ ပြောင်းရွှေ့ကစားခဲ့ပါတယ်။ 

ရောစီဟာ အမေရိကန်မှာ မွေးဖွားခဲ့ပေမယ့် အီတလီလက်ရွေးစင်အသင်းကို ကိုယ်စားပြုခဲ့ပြီး နိုင်ငံအသင်းအတွက် ပွဲပေါင်း ၃၀ ပါဝင်ကစားကာ ၇ ဂိုးသွင်းယူနိုင်ခဲ့တာဖြစ်ပါတယ်။ 

Source:Metro

CNI Sport News

၂၀၂၅ ခုနှစ်၊ ဖေဖော်ဝါရီ ၁၄

ပြင်သစ်အသင်းနည်းပြ ဒက်ချမ့်က မတ်လထဲကစားမယ့် နိုင်ငံတကာပွဲတွေအတွက် နိုင်ငံအသင်းလူစာရင်းမှာ ရီးရယ်လ်အသင်းကြယ်ပွင့် ဘတ်ပီ ပြန်ပါဝင်မယ်လို့ အတည်ပြုခဲ့ပါတယ်။ 

ဘတ်ပီဟာ ပြီးခဲ့တဲ့ ပြင်သစ်အသင်းရဲ့ အောက်တိုဘာနဲ့ နိုင်ငံတကာပွဲစဉ်တွေမှာ မပါဝင်ခဲ့ပေမယ့် အခုအချိန်မှာ နိုင်ငံအသင်း လူစာရင်းထဲ ပြန်ပါဝင်နိုင်ဖို့ အဆင်သင့် ဖြစ်နေပြီဖြစ်တာပါ။

ဘတ်ပီဟာ ပြင်သစ်အသင်း နိုင်ငံတကာပွဲတွေ ယှဉ်ပြိုင်ချိန် ဆွီဒင်မှာ ပါတီပွဲ ကျင်းပနေမှုတွေကြောင့် ဝေဖန်မှု တွေလည်း အများအပြား ခံခဲ့ရပါတယ်။

ပြင်သစ်ဂျာနယ်လစ် မိုလီနာက ဘတ်ပီဟာ နိုင်ငံတကာပွဲတွေ မပါဝင်နိုင်ချိန် ရရှိခဲ့တဲ့ တုန့်ပြန်မှုတွေကြောင့် လက်ရွေးစင်အသင်းကနေ အနားယူဖို့ စဉ်းစားခဲ့တယ်လို့ ဖော်ပြခဲ့တာပါ။ 

ဒါပေမယ့် ဘတ်ပီဟာ ဒီသတင်းတွေကို ငြင်းဆန်ခဲ့ပြီး ပြင်သစ်အသင်းထက် ပိုပြီးအရေးကြီးတာ ဘာမှမရှိဘူးလို့ ပြောခဲ့ပါတယ်။

ဘတ်ပီကို တွေ့ရစဉ်

ဒါအပြင် ဘတ်ပီက သူဟာ နိုဝင်ဘာနိုင်ငံတကာပွဲတွေ ကစားချိန်မှာ ပြင်သစ်အသင်းအတွက် ပါဝင်ကစားပေးဖို့ ဆန္ဒရှိခဲ့ပေမယ့် နည်းပြက သူ့ကိုလူစာရင်းထဲမခေါ်ယူခဲ့ဘူးလို့ ပြောခဲ့တာပါ။ 

အခုအချိန်မှာတော့ နည်းပြဒက်ချမ့်က သူ့ကို ပြင်သစ်အသင်း လူစာရင်းထဲ ပြန်လည်ခေါ်ယူမယ်လို့ L'Equipe ရဲ့မေးမြန်းမှုကို အတည်ပြုခဲ့ပါတယ်။ 

ပြင်သစ်အသင်းအတွက် ၈၆ ပွဲ ကစားထားပြီး ၄၈ ဂိုးသွင်းယူထားတဲ့ ဘတ်ပီဟာ ရီးရယ်လ်အသင်းမှာ ခြေစွမ်းပြသ နေပြီး သူ့ရဲ့အကောင်းဆုံး ပုံစံတွေကို ပြန်လည် ရရှိနေပြီဖြစ်ပါတယ်။ 

ဘတ်ပီဟာ ပြီးခဲ့တဲ့ မန်စီးတီးအသင်းနဲ့ ချန်ပီယံလိဂ် ပလေးအော့ဖ် ပထမအကျော့ပွဲစဉ်မှာ ဂိုးသွင်းယူနိုင်ခဲ့တာ အပါအဝင် ရီးရယ်လ်အသင်းအတွက် ကစားထားတဲ့ ၃၆ ပွဲမှာ ၂၄ ဂိုး သွင်းယူထားတာပါ။ 

ပြင်သစ်အသင်းဟာ မတ်လထဲမှာ နေးရှင်းလိဂ် ကွာတားဖိုင်နယ်ပွဲစဉ်အဖြစ် ခရိုအေးရှားအသင်းနဲ့ အိမ်ကွင်း၊ အဝေးကွင်းယှဉ်ပြိုင်ရမှာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဖေဖော်ဝါရီ ၁၄

ယူနိုက်တက်အသင်းကနေ အငှားနဲ့လာရောက်ကစားနေတဲ့ တောင်ပံကစားသမား အန်တိုနီဟာ ဘက်တစ်အသင်း အတွက် ဥရောပပွဲဦးထွက်ခဲ့တဲ့ ဂျန့်အသင်းနဲ့ ကွန်းဖရန့်လိဂ်ပွဲစဉ်မှာ ဂိုးသွင်းနိုင်ခဲ့ပါတယ်။

ဘက်တစ်အသင်းက ဂျန့်အသင်းကို ၃ ဂိုး-ဂိုးမရှိနဲ့ အနိုင်ရခဲ့တဲ့ ကွန်းဖရန့်လိဂ်ပလေးအော့ဖ် ပထမအကျော့ပွဲစဉ်မှာ အန်တိုနီဟာ အသင်းအတွက် ပွဲချိန် ၄၇ မိနစ်မှာ လှပတဲ့သွင်းဂိုး သွင်းယူနိုင်ခဲ့တာပါ။ 

ဘက်တစ်အသင်းအတွက် နောက်ထပ် သွင်းဂိုးတွေကို ဘာကမ်ဘူနဲ့ အယ်လ်တီမီရာတို့က သွင်းယူခဲ့တာ ဖြစ်ပါတယ်။ 

အန်တိုနီဟာ ပြီးခဲ့တဲ့ ဆယ်လ်တာဗီဂိုအသင်းနဲ့ လာလီဂါ ပွဲစဉ်မှာလည်း ဂိုးသွင်းနိုင်ခဲ့တာကြောင့် ဘက်တစ် အသင်းအတွက် ၂ ပွဲဆက်တိုက် ဂိုးသွင်းယူနိုင်ခဲ့တာပါ။

အန်တိုနီကို တွေ့ရစဉ် 

အန်တိုနီဟာ ယူနိုက်တက်အသင်းကနေ ရောက်ရှိလာပြီးကတည်းက ဘက်တစ်အသင်းအတွက် ၃ ပွဲ ကစားထား ပြီး ၂ ဂိုးသွင်းယူကာ ခြေစွမ်းပြသနေတာ ဖြစ်ပါတယ်။ 

ဘက်တစ်အသင်းဟာ အန်တိုနီကို အငှားစာချုပ် ကုန်ဆုံးမယ့် ရာသီအကုန်မှာ အပြီးသတ် ဝယ်ယူနိုင်ဖို့ မျှော်လင့်နေတာပါ။ 

ဒါပေမယ့် အန်တိုနီရဲ့ အငှားစာချုပ်ထဲမှာ အပြီးသတ် ဝယ်ယူခွင့် မပါဝင်တာကြောင့် ကစားသမားဟာ ရာသီကုန်ချိန်မှာ ယူနိုက်တက်အသင်းထံ ပြန်သွားရမှာဖြစ်ပါတယ်။ 

အန်တိုနီကတော့ သူဟာ ဘက်တစ်အသင်းမှာ အလွန်ပျော်ရွှင်နေပြီး ဂျန့်အသင်းနဲ့နိုင်ပွဲက သူတို့ကို ဘယ်တော့မှ မရပ်တန့်ဘဲ အားပေးနေတဲ့ ပရိသတ်တွေအတွက်လို့ ပြောခဲ့တာပါ။ 

ဘက်တစ်အသင်းဟာ ဂျန့်အသင်းကို အဝေးကွင်းမှာ အနိုင်ရခဲ့တာကြောင့် ၁၆ သင်းအဆင့်ကို တက်ရောက်နိုင်ဖို့ အခြေအနေ ကောင်းသွားခဲ့ပြီဖြစ်ပါတယ်။ 

ဘက်တစ်အသင်းဟာ လာမယ့် လာလီဂါပွဲစဉ်အဖြစ် ဆိုစီဒက်အသင်းကို အိမ်ကွင်းယှဉ်ပြိုင်ရမှာဖြစ်ပြီး လိဂ်မှာ ၂ ပွဲ ဆက်တိုက် နိုင်ပွဲပျောက်ဆုံးတာကို အဆုံးသတ်နိုင်ဖို့ မျှော်လင့်နေတာဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ ဖေဖော်ဝါရီ ၁၄

ပေါ်တူဂီအသင်းခေါင်းဆောင် ရော်နယ်ဒိုဟာ ၂၀၂၄ ခုနှစ်ရဲ့ ဝင်ငွေအများဆုံးရရှိတဲ့ အားကစားသမား ၁၀၀ စာရင်းမှာ ၂ နှစ်ဆက်တိုက် ထိပ်ဆုံးနေရာ ရပ်တည်ခဲ့ပါတယ်။ 

ရော်နယ်ဒိုဟာ ၂၀၂၄ ခုနှစ်ထဲမှာ ဝင်ငွေပေါင် ၂၀၈ သန်းနဲ့ ထိပ်ဆုံးနေရာ ရပ်တည်ခဲ့တယ်လို့ Sportico က ဖော်ပြထားတာပါ။

ရော်နယ်ဒိုရဲ့ ဝင်ငွေအများစုဟာ အယ်လ်နာဆာအသင်းကနေ ရရှိခဲ့တာဖြစ်ပြီး သူဟာ ဆော်ဒီပရိုလိဂ်ကလပ်မှာ တစ်နှစ်ကို ပေါင် ၁၇၅ သန်း ရရှိနေတာဖြစ်ပါတယ်။ 

Golden State Warriors အသင်းမှာ ကစားနေတဲ့ NBA ကြယ်ပွင့် ကာရီက ပေါင် ၁၂၃ သန်းနဲ့ ရော်နယ်ဒိုရဲ့ အနောက် ဒုတိယနေရာမှာ ရပ်တည်နေတာပါ။ 

ယူကရိန်းလက်ဝှေ့သမား အူဆက်ခ်ကို အရေးနိမ့်ပြီးနောက် လက်ဝှေ့ ကစားသမားဘဝကနေ အနားယူကြောင်း ကြေညာထားတဲ့ တိုင်ဆန်ဗျူရီက ပေါင် ၁၁၇ သန်းနဲ့ တတိယနေရာမှာ ရပ်တည်နေပါတယ်။ 

အင်တာမိုင်ယာမီအသင်း ခေါင်းဆောင် မက်ဆီက ပေါင် ၁၀၈ သန်းနဲ့ စတုတ္ထ၊ NBA နာမည်ကြီး လီဘရွန်ဂျိမ်းစ်က ပေါင် ၁၀၆ သန်းနဲ့ ပဉ္စမနေရာမှာ ရပ်တည်ခဲ့တာပါ။ 

၂၀၂၄ ခုနှစ်အတွင်း ဆော်ဒီမှာ လုပ်ခလစာ အများအပြား ရရှိခဲ့တဲ့ နေမာ၊ ဘန်ဇီမာနဲ့ ရီးရယ်လ်အသင်းကြယ်ပွင့် ဘတ်ပီတို့ဟာ ထိပ်ဆုံး ၁၀ ဦးထဲ ပါဝင်ခဲ့တာဖြစ်ပါတယ်။

ရော်နယ်ဒိုကို တွေ့ရစဉ်

Sportico ဟာ ထိပ်တန်း အားကစားနယ်ပယ်ထဲက ဝင်ငွေအများဆုံးရရှိတဲ့ အားကစားသမား ၁၀၀ ဦး စာရင်းပြုစုပြီး ထုတ်ပြန်ခဲ့တာပါ။

ဖော်မြူလာဝမ်းက နာမည်ကြီးတွေဖြစ်တဲ့ ဟာမီလ်တန်နဲ့ ဗာစတန်ပန်တို့လည်း ဝင်ငွေအများဆုံးရရှိတဲ့ ထိပ်ဆုံး ၁၀၀ ဦး စာရင်းထဲ ပါဝင်ခဲ့ပါတယ်။ 

ထိပ်ဆုံး ၁၀၀ ဦးစာရင်းထဲမှာ NBA က ၃၆ ဦးအထိ ပါဝင်တာကြောင့် ဘတ်စကတ်ဘော အားကစားသမားတွေ ဟာ အခြားအားကစားနည်းက အားကစားသမားတွေထက် ဒီစာရင်းမှာ ပိုပြီးပါဝင်ခဲ့တာပါ။

၂၀၂၄ ခုနှစ်ရဲ့ ဝင်ငွေ အကောင်းဆုံး အားကစားသမားထိပ်ဆုံး ၁၀၀ ဦးစာရင်းထဲမှာ အမျိုးသမီး အားကစားသမား တွေ မပါဝင်ခဲ့ပါဘူး။ 

အမေရိကန်အိုးပန်း ချန်ပီယံဟောင်း ကိုကိုကပ်ဖ်က ပေါင် ၂၄.၃ သန်းနဲ့ အမျိုးသမီး အားကစားသမားတွေထဲမှာ ဝင်ငွေ အကောင်းဆုံး အားကစားသမားအဖြစ် ရပ်တည်နေတာ ဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ ဖေဖော်ဝါရီ ၁၃

ဆော်ဒီနိုင်ငံမှာကျင်းပမယ့် ၂၀၃၄ ကမ္ဘာ့ဖလားပြိုင်ပွဲကို လာရောက်အားပေးမယ့် ပရိသတ်တွေကို အရက် သောက်သုံးခွင့်ပိတ်ပင်ထားတယ်လို့ ဗြိတိန်နိုင်ငံဆိုင်ရာ ဆော်ဒီသံအမတ်က ပြောခဲ့ပါတယ်။ 

သံအမတ်ဖြစ်တဲ့ မင်းသားခါလစ်က “အခုအချိန်မှာ အရက်ကိုခွင့်မပြုထားပါဘူး။ အရက်မပါဝင်ဘဲ ပျော်စရာတွေ အများကြီးရှိပါတယ်။ ဒါက ၁၀၀ ရာခိုင်နှုန်းမလိုအပ်ပါဘူး။ အရက်ကင်းစင်ရမှာဖြစ်ပြီး ဒါက ကျနော်တို့ရဲ့ ရာသီဥတုလို ခြောက်သွေ့နိုင်ငံပါ။ လူတိုင်းမှာ ယဉ်ကျေးမှုကိုယ်စီရှိကြပြီး ကျနော်တို့ရဲ့နယ်နိမိတ်အတွင်းမှာ လူတိုင်းနဲ့လိုက်လျောညီထွေဖြစ်အောင်နေရတာကို ပျော်ပါတယ်။ ဒါပေမယ့် ကျနော်တို့ဟာ တခြားသူတွေ အတွက် ကျနော်တို့ရဲ့ယဉ်ကျေးမှုကို မပြောင်းလဲချင်ပါဘူး”လို့ LBC ကိုပြောခဲ့တာပါ။ 

၂၀၃၄ ကမ္ဘာ့ဖလားပြိုင်ပွဲကို အိမ်ရှင်အဖြစ်ပြုလုပ်ဖို့လျှောက်ထားတဲ့ တစ်နိုင်ငံတည်းသောနိုင်ငံဖြစ်တဲ့ ဆော်ဒီနိုင်ငံကို ကမ္ဘာ့ဘောလုံးအဖွဲ့ချုပ်(ဖီဖာ)က အိမ်ရှင်အဖြစ်အတည်ပြုထားတာဖြစ်ပါတယ်။

၂၀၂၂ ကမ္ဘာ့ဖလားပြိုင်ပွဲကို ကာတာနိုင်ငံက အိမ်ရှင်အဖြစ်ကျင်းပခဲ့တုန်းကလည်း အရက်သောက်သုံးခြင်းကို ခွင့်မပြုခဲ့ပေမယ့် ပြိုင်ပွဲနီးမှ ဆုံးဖြတ်ချက်ပြန်ပြောင်းသွားခဲ့တာပါ။ 

ကာတာနိုင်ငံဟာ ပရိသတ်တွေကို ဟိုတယ်တွေနဲ့ သတ်မှတ်ထားတဲ့နေရာတွေမှာ အရက်ဝယ်ယူပြီးသောက်သုံးဖို့ခွင့်ပြုခဲ့ရတာဖြစ်ပါတယ်။ 

ဒါပေမယ့် ဆော်ဒီသံအမတ်ဖြစ်တဲ့ မင်းသားခါလစ်ကတော့ ကမ္ဘာ့ဖလားပြိုင်ပွဲကို လာရောက်ကြမယ့် သူတွေအနေနဲ့ ဆော်ဒီနိုင်ငံရဲ့ယဉ်ကျေးမှုကို လေးစားသင့်ပြီး ဟိုတယ်အပါအဝင် ပြိုင်ပွဲကျင်းပတဲ့ ဘယ်နေရာမှာမှ အရက်ရောင်းချသွားမှာမဟုတ်ဘူးလို့ ပြောခဲ့တာပါ။ 

ဒါ့အပြင် ပရိသတ်တွေအနေနဲ့ ၂၀၃၄ ကမ္ဘာ့ဖလားပြိုင်ပွဲကို အရက်မပါဝင်ဘဲ ပျော်ရွှင်စွာဖြတ်သန်းရမယ်လို့ ပြောခဲ့ပါတယ်။ 

လူ့အခွင့်အရေးအဖွဲ့အစည်းတွေကတော့ ဆော်ဒီနိုင်ငံမှာ ကမ္ဘာ့ဖလားပြိုင်ပွဲကျင်းပမယ့်အပေါ် စိုးရိမ်မှုတွေ အများကြီးရှိနေကြတာပါ။ 

ဆော်ဒီနိုင်ငံဟာ လိင်တူဆက်ဆံတာတွေကို ခွင့်ပြုထားခြင်းမရှိလို့ လိင်တူချစ်သူ တွေအနေနဲ့ ဒီပြိုင်ပွဲကို ဘေးကင်းစွာလာရောက်ကြည့်ရှုနိုင်မလားဆိုတဲ့ မေးခွန်းတွေလည်း ရှိနေပါတယ်။ 

မင်းသားခါလစ်ကတော့ ဒါက ဆော်ဒီပွဲမဟုတ်ဘဲ ကမ္ဘာလုံးဆိုင်ရာနဲ့ သက်ဆိုင်တဲ့ပွဲဖြစ်တဲ့အတွက် အားလုံးကို ကြိုဆိုသွားမယ်လို့ ပြောခဲ့ပါတယ်။ 

Source:ESPN