- By CNI
- Category: အားကစား
- Hits: 185
CNI Street Food
၂၀၂၅ ခုနှစ်၊ ဧပြီ ၇
ဆောက်သမ်တန်အသင်းဟာ စပါးအသင်းကို ၃ ဂိုး-၁ ဂိုးနဲ့အရေးနိမ့်ပြီးနောက် ပရီးမီးယားလိဂ်ပြိုင်ပွဲသမိုင်းမှာ အစောဆုံးတန်းဆင်းတဲ့အသင်းအဖြစ် မှတ်တမ်းဝင်သွားခဲ့ပါတယ်။
ဆောက်သမ်တန်အသင်းဟာ ဒီရာသီ ပရီးမီးယားလိဂ်ပွဲစဉ်ကစားဖို့ ၇ ပွဲကျန်ရှိနေသေးတဲ့အချိန်မှာ အဆင့် ၁၇ နေရာက ဝုလ်ဗ်စ်အသင်းနဲ့ ၂၂ မှတ်ကွာဟနေခဲ့တာပါ။
အဲဒါကြောင့် ဆောက်သမ်တန်အသင်းဟာ ပရီးမီးယားလိဂ် ပွဲကစားဖို့ ၇ ပွဲကျန်ရှိနေချိန်မှာ တန်းဆင်းတဲ့ ပထမဆုံးအသင်းအဖြစ် စံချိန်ဆိုးတင်နိုင်ခဲ့တာဖြစ်ပါတယ်။
ပရီးမီးယားလိဂ်ပြိုင်ပွဲသမိုင်းမှာ အစောဆုံးတန်းဆင်းတဲ့အသင်းအဖြစ် အစ်စဝှစ်ချ်နဲ့ ဒါဘီအသင်းတို့ဟာ အရင်က စံချိန်တင်ခဲ့ကြတာပါ။
သူတို့တွေဟာ လက်ကျန်ပွဲကစားဖို့ ၆ ပွဲကျန်ရှိချိန်မှာ တန်းဆင်းခဲ့ကြတာဖြစ်ပါတယ်။
အခုအချိန်မှာ ဆောက်သမ်တန်အသင်းက ဒီအသင်းတွေရဲ့စံချိန်ကိုချိုးဖျက်ပြီး ပရီးမီးယားလိဂ်ပြိုင်ပွဲသမိုင်းမှာ အစောဆုံးတန်းဆင်းတဲ့အသင်းအဖြစ် စံချိန်သစ်တင်နိုင်ခဲ့တာပါ။
ဆောက်သမ်တန်အသင်းဟာ ဒီရာသီ ပရီးမီး ယားလိဂ်ပွဲစဉ် ၃၁ ပွဲကစားအပြီးမှာ ၂ ပွဲနိုင်၊ ၄ ပွဲသရေနဲ့ ၂၅ ပွဲရှုံးနိမ့်ထားပြီး ရမှတ် ၁၀ မှတ်သာ ရရှိသေးတာ ဖြစ်ပါတယ်။
ဆောက်သမ်တန်အသင်းအနေနဲ့ ပရီးမီးယားလိဂ်ပြိုင်ပွဲသမိုင်းမှာ အဆိုးရွားဆုံး တန်းဆင်းတဲ့ အသင်း မဖြစ်ဖို့ လက်ကျန်ပွဲတွေမှာ ရမှတ်ရယူနိုင်ဖို့ လိုအပ်နေတာပါ။
ပရီးမီးယားလိဂ်ပြိုင်ပွဲသမိုင်းတစ်လျှောက်တန်းဆင်းခဲ့တဲ့ အသင်းတွေထဲမှာ ၂၀၀၇-၀၈ ရာသီက တန်းဆင်းခဲ့တဲ့ ဒါဘီအသင်းက အဆိုးရွားဆုံးအသင်းအဖြစ် စံချိန်တင်ထားပြီး ရမှတ် ၁၀ မှတ်နဲ့ တန်းဆင်းခဲ့တာဖြစ်ပါတယ်။
အဲဒါကြောင့် ဆောက်သမ်တန်အသင်းအနေနဲ့ ဒါဘီအသင်းဆီကနေ ဒီမှတ်တမ်းဆိုးကို မရယူနိုင်ဖို့ လက်ကျန်ပွဲ တွေမှာ အနိမ့်ဆုံးရမှတ် ၁ မှတ်ထပ်ပိုပြီး ရယူနိုင်ဖို့ လိုအပ်နေတာပါ။
ဆောက်သမ်တန်အသင်းဂိုးသမား ရမ်စဒေးလ်က ဘယ်သူကမှ ဒီစံချိန်ဆိုးကို မလိုချင်တဲ့အတွက် လက်ကျန်ပွဲတွေမှာ ရမှတ်တွေရယူနိုင်သလောက် ရယူသွားမယ်လို့ ပြောခဲ့ပါတယ်။
ဒီရာသီပရီးမီးယားလိဂ်ပြိုင်ပွဲကနေ ဆောက်သမ်တန်အသင်းနဲ့အတူ လက်စတာ၊အစ်စဝှစ်ချ်အသင်းတို့လည်း ချန်ပီယံရှစ်ပြိုင်ပွဲထံ တန်းပြန်ဆင်းရဖို့နီးစပ်နေတာဖြစ်ပါတယ်။
Source:ESPN
- By CNI
- Category: အားကစား
- Hits: 181
CNI Sport News
၂၀၂၅ ခုနှစ်၊ ဧပြီ ၇
ယူနိုက်တက်အသင်း နည်းပြ အာမိုရင်နဲ့ မန်စီးတီးအသင်း နည်းပြ ဂွာဒီယိုလာတို့က သူတို့ရဲ့အသင်းတွေဟာ လာမယ့်ရာသီမှာ ပိုပြီးကောင်းလာမယ်လို့ မန်ချက်စတာဒါဘီပွဲစဉ်မှာ ဂိုးမရှိ သရေကျခဲ့ပြီးနောက် ပြောခဲ့ပါတယ်။
အာမိုရင်က “အခုအချိန်က နေ့တိုင်း ခက်ခဲနေပေမယ့် လာမယ့်ရာသီမှာ အလွန်ကွာခြား သွားလိမ့်မယ်လို့ စိတ်ကူး ကြည့်နိုင်ပါတယ်။ အပြောင်းအလဲတွေကြောင့် ဒီမှာရှိတဲ့လူတိုင်းဟာ ဒုက္ခတွေကို ခံစားခဲ့ရပြီး လာမယ့်နှစ်မှာ ကျနော်တို့ တစ်ခုခုကို ပြသရမှာပါ။ ကျနော်တို့ဟာ တိုးတက်ရမယ့် အခန်းကဏ္ဍတွေ အများကြီးရှိနေပြီး ကစား သမားတိုင်းလည်း တိုးတက်နိုင်ပါတယ်။ သူတို့ဟာ အရည်အသွေးတွေရှိပြီး အခွင့်အရေးတွေ ပိုပြီးရဖို့ ဂိုးဧရိယာထဲ မှာ အချိန်ပိုပြီးယူရမယ်”လို့ ပြောခဲ့တာပါ။
ယူနိုက်တက်နဲ့ မန်စီးတီးအသင်းတို့ဟာ ဒီရာသီမှာ ရလဒ်တွေ ဆိုးရွားနေပြီး ဂိုးမရှိ သရေကျခဲ့တဲ့ မန်ချက်စတာ ဒါဘီပွဲစဉ်မှာလည်း အကောင်းဆုံးပုံစံတွေ ပြသနိုင်ခဲ့ခြင်းမရှိတာ ဖြစ်ပါတယ်။
အဲဒါကြောင့် ဒီနှစ်သင်းရဲ့ စွမ်းဆောင်ရည်အပေါ် ဝေဖန်မှုတွေလည်း ရှိနေကြတာပါ။
မန်စီးတီးနဲ့ယူနိုက်တက်ယှဉ်ပြိုင်နေစဉ်
မန်စီးတီးအသင်းဟာ ဒီပွဲရလဒ်ကြောင့် ပရီးမီးယားလိဂ် အမှတ်ပေးဇယားအဆင့် ၅ နေရာမှာ ရပ်တည်နေပြီး ယူနိုက်တက်အသင်းက အဆင့် ၁၃ နေရာမှာ ရပ်တည်နေတာဖြစ်ပါတယ်။
ယူနိုက်တက်အသင်းနည်းပြ အာမိုရင်ဟာ စပို့တင်းလစ္စဘွန်းအသင်းကို ကိုင်တွယ်ခဲ့ချိန် အပါအဝင် ဒီရာသီမှာ ဂွာဒီယိုလာနဲ့ ထိပ်တိုက်တွေ့ဆုံမှု ၃ ကြိမ် အထိရှိခဲ့ပြီး ၂ ကြိမ်အထိ အနိုင်ရယူနိုင်ခဲ့တာပါ။
ယူနိုက်တက်အသင်း နည်းပြအာမိုရင်က လာမယ့်ရာသီ မန်ချက်စတာဒါဘီပွဲစဉ်ဟာ ဒီပွဲစဉ်နဲ့ အလွန်ခြားနား လိမ့်မယ်လို့လည်း ပြောခဲ့ပါတယ်။
မန်စီးတီးအသင်း နည်းပြ ဂွာဒီယိုလာက သူ့ရဲ့အသင်းကို ပြန်လည် တည်ဆောက်နေပြီး လာမယ့်ရာသီမှာ မတူညီတဲ့အသင်းကို မြင်တွေ့ရမယ်လို့ ပြောခဲ့တာပါ။
ဂွာဒီယိုလာက “ကျနော်တို့ဟာ အချိန်ယူရမှာဖြစ်ပြီး အခုအချိန်မှာ လာမယ့်ရာသီအတွက် ကျနော်စိုးရိမ်ပူပန်မှု မရှိပါဘူး။ အိုးထရက်ဖို့ဒ်က အမြဲတမ်းခက်ခဲပါတယ်။ ကျနော်တို့ တိုက်ပွဲဝင်ခဲ့ကြပြီး ကစားသမားတွေကလည်း အရာအားလုံးပေးခဲ့ကြပါတယ်။ ကျနော်တို့ဒီပွဲမှာ အမှတ်ရယူခဲ့ပြီး ရှေ့ဆက်သွားရမှာပါ”လို့ ပြောခဲ့ပါတယ်။
ယူနိုက်တက်အသင်းဟာ လာမယ့် ကြားရက်ထဲမှာ လိုင်ယွန်အသင်းနဲ့ ယူရိုပါလိဂ်ကွာတားဖိုင်နယ် ပထမအကျော့ ပွဲစဉ် ယှဉ်ပြိုင်ရမှာဖြစ်ပါတယ်။
Source: Dailymail
- By CNI
- Category: အားကစား
- Hits: 203
CNI Sport News
၂၀၂၅ ခုနှစ်၊ ဧပြီ ၅
ဂျာမနီအသင်းနဲ့ ကမ္ဘာ့ဖလား ချန်ပီယံဆု ရယူနိုင်ခဲ့တဲ့ ဝါရင့်နောက်ခံလူ ဟမ်းမဲလ်ဟာ ဒီရာသီအကုန်မှာ ဘောလုံးလောက,ကနေ အနားယူမယ်လို့ အတည်ပြုခဲ့ပါတယ်။
ရိုးမားအသင်းမှာ ကစားနေတဲ့ ဟမ်းမဲလ်က ဒီရာသီဟာ သူ့ရဲ့နောက်ဆုံး ရာသီဖြစ်ပြီး သူ့ရဲ့ထင်ရှားကျော်ကြားခဲ့တဲ့ ကစားသမားဘဝကို ကန့်လန့်ကာချ အဆုံးသတ်တော့မယ်လို့ သူ့ရဲ့ဆိုရှယ်မီဒီယာမှာ ဖော်ပြခဲ့တာပါ။
ဘိုင်ယန်မြူးနစ်အသင်း အကယ်ဒမီကနေ ထွက်ပေါ်လာတဲ့ ဟမ်းမဲလ်ဟာ ၂၀၀၈ ခုနှစ်မှာ ဒေါ့မွန်အသင်းထံ ပြောင်းရွှေ့ခဲ့တာ ဖြစ်ပါတယ်။
အသက် ၃၆ နှစ်အရွယ်ရှိ ဟမ်းမဲလ်ဟာ ဒေါ့မွန်အသင်းမှာ ၂၀၁၆ ခုနှစ်အထိ ကစားပြီးနောက် ဘိုင်ယန်မြူးနစ် အသင်းထံ ပြန်လည်ပြောင်းရွှေ့ကာ ၂၀၁၉ ခုနှစ်အထိ ကစားခဲ့တာပါ။
ဟမ်းမဲလ်ဟာ ဘိုင်ယန်မြူးနစ်အသင်းကနေ ထွက်ခွာပြီးနောက် ဒေါ့မွန်အသင်းထံ ပြန်ပြောင်းရွှေ့ကာ ပြီးခဲ့တဲ့ ရာသီကုန်အထိ ကစားခဲ့တာ ဖြစ်ပါတယ်။
ဟမ်းမဲလ်ကို တွေ့ရစဉ်
ဂျာမနီအသင်းနဲ့ ၂၀၁၄ ကမ္ဘာ့ဖလား ချန်ပီယံဆု ရယူနိုင်ခဲ့တဲ့ ဟမ်းမဲလ်ဟာ ရိုးမားအသင်းအတွက် ပြိုင်ပွဲစုံ ၁၈ ပွဲ ပါဝင်ကစားထားပြီး ၁ ဂိုး သွင်းယူကာ ရာသီကုန်ချိန်မှာ ကစားသမားဘဝကနေ အနားယူတော့မှာပါ။
ဟမ်းမဲလ်က “ကျနော်ဟာ အခုအချိန်မှာ စိတ်ခံစားမှုတွေနဲ့ ရုန်းကန်နေရပါတယ်။ အခုက ဘယ်ဘောလုံးသမားမှ ရှောင်လွှဲလို့မရတဲ့ အခိုက်အတန့်ကို ရောက်ရှိလာပါပြီ။ ဘောလုံးက ကျနော့်ကိုပေးခဲ့တဲ့ အရာတွေအများကြီးနဲ့ ၁၈ နှစ်ကျော်ကြာ ကစားပြီးနောက် နွေရာသီမှာ ကျနော့်ရဲ့ ကစားသမားဘဝကို အဆုံးသတ်တော့မှာပါ”လို့ ရေးသားခဲ့ပါတယ်။
ဟမ်းမဲလ်ဟာ ကစားသမားဘဝမှာ ဒေါ့မွန်အသင်းနဲ့ ဘွန်ဒက်လီဂါဖလား၊ ပိုကယ်ဖလား၊ ဂျာမန်စူပါဖလားတို့ကို ၂ ကြိမ်စီ ရယူနိုင်ခဲ့ပြီး ဘိုင်ယန်မြူးနစ်အသင်းနဲ့ ဘွန်ဒက်လီဂါဖလား ၃ ကြိမ်၊ ပိုကယ်ဖလား ၁ ကြိမ်၊ ဂျာမန်စူပါ ဖလား ၃ ကြိမ် ရယူနိုင်ခဲ့တာဖြစ်ပါတယ်။
Source: Goal
- By CNI
- Category: အားကစား
- Hits: 177
CNI Sport News
၂၀၂၅ ခုနှစ်၊ ဧပြီ ၅
ရီးရယ်လ်အသင်းရဲ့အဓိက ကစားသမား ၄ ဦးစလုံးဟာ UEFA ရဲ့ ပွဲပယ်ပြစ်ဒဏ်ကနေ လွတ်မြောက်ခဲ့တာကြောင့် အာဆင်နယ်အသင်းနဲ့ ချန်ပီယံလိဂ် ကွာတားဖိုင်နယ်ပွဲစဉ်မှာ ပါဝင်ကစားခွင့် ရရှိသွားခဲ့ပါတယ်။
ပြီးခဲ့တဲ့လက အသလက်တီကိုအသင်းနဲ့ ချန်ပီယံလိဂ် ၁၆ သင်းအဆင့် ဒုတိယအကျော့ ပွဲစဉ်အပြီးမှာ ပြုလုပ်ခဲ့တဲ့ ဗီနီစီးယက်စ်၊ ဘတ်ပီ၊ ရူဒီဂါနဲ့ ဆီဘယ်လော့စ်တို့ရဲ့ အပြုအမူတွေအပေါ် UEFA က စုံစမ်းစစ်ဆေးမှုတွေ ပြုလုပ်ခဲ့တာပါ။
သူတို့တွေဟာ အိမ်ရှင်အသင်း ပရိသတ်တွေကို မဖွယ်မရာ အမူအရာတွေ ပြုလုပ်ခဲ့တယ်လို့ စွပ်စွဲခြင်းခံခဲ့ရတာ ဖြစ်ပါတယ်။
UEFA ဟာ ဒီဖြစ်ရပ်တွေနဲ့ ပတ်သက်ပြီး စုံစမ်းစစ်ဆေးမှုတွေ ပြုလုပ်ပြီးနောက် ရီးရယ်လ်အသင်း ကစားသမား ၃ ဦးကို ဒဏ်ကြေးငွေတွေ ချမှတ်ခဲ့တာပါ။
ရီးရယ်လ်အသင်း ကစားသမားတွေကိုတွေ့ရစဉ်
တိုက်စစ်မှူးဘတ်ပီနဲ့ နောက်ခံလူ ရူဒီဂါတို့ကို ဆိုင်းငံ့ ၁ ပွဲပယ်နဲ့ ဒဏ်ကြေးငွေ ပေါင် ၂၅,၀၀၀၊ ပေါင် ၃၅,၀၀၀ ချမှတ်ခဲ့တာ ဖြစ်ပါတယ်။
စပိန်ကွင်းလယ်လူ ဆီဘယ်လော့စ်ကို ပေါင် ၁၇,၀၀၀ ဒဏ်ကြေး ချမှတ်ခဲ့ပြီး တောင်ပံကစားသမား ဗီနီစီးယက်စ် ကိုတော့ စည်းကမ်းပိုင်းဆိုင်ရာ အရေးယူမှုတွေ ပြုလုပ်ခဲ့ခြင်းမရှိတာပါ။
အဲဒါကြောင့် သူတို့တွေဟာ အာဆင်နယ်အသင်းနဲ့ ချန်ပီယံလိဂ် ကွာတားဖိုင်နယ်ပွဲစဉ်ကို ပါဝင်ကစားခွင့် ရရှိခဲ့ပါတယ်။
အာဆင်နယ်နဲ့ ရီးရယ်လ်အသင်းတို့ရဲ့ ချန်ပီယံလိဂ် ကွာတားဖိုင်နယ် ပထမအကျော့ကို ဧပြီ ၉ ရက် အမ်းမရိတ်စ်ကွင်း၊ ဒုတိယအကျော့ကို ဧပြီ ၁၇ ရက် ဘာနေဗျူးမှာ ယှဉ်ပြိုင်သွားမှာဖြစ်ပါတယ်။
Source: BBC
- By CNI
- Category: အားကစား
- Hits: 174
CNI Sport News
၂၀၂၅ ခုနှစ်၊ ဧပြီ ၅
ပေါ်တူဂီအသင်းခေါင်းဆောင် ရော်နယ်ဒိုဟာ အယ်လ်နာဆာအသင်းက အယ်လ်ဟီလယ်အသင်းကို ၃ ဂိုး-၁ ဂိုးနဲ့ အနိုင်ရခဲ့တဲ့ ဆော်ဒီပရိုလိဂ်ပွဲစဉ်မှာ အသင်းအတွက် ၂ ဂိုး သွင်းယူပေးခဲ့ပါတယ်။
အယ်လ်ဟီလယ်အသင်းနဲ့ တွေ့ဆုံတိုင်း ရလဒ်မကောင်းဖြစ်ခဲ့တဲ့ အယ်လ်နာဆာအသင်းဟာ ဒီနိုင်ပွဲကြောင့် အယ်လ်ဟီလယ်အသင်းကို ၃ နှစ်အကြာမှ ပထမဆုံးနိုင်ပွဲ ရယူနိုင်ခဲ့တာပါ။
အယ်လ်နာဆာအသင်းဟာ အနိုင် ၃ မှတ် ရယူနိုင်ခဲ့တဲ့အတွက် ဆော်ဒီပရိုလိဂ် အမှတ်ပေးဇယား အဆင့် ၃ နေရာမှာ ရပ်တည်နေပြီး အဆင့် ၂ နေရာက အယ်လ်ဟီလယ်အသင်းနဲ့ ၃ မှတ်၊ အဆင့် ၁ နေရာက အယ်လ်အစ်တီဟတ်အသင်းထက် ၁ ပွဲ ပိုကစားထားပြီး ရမှတ် ၇ မှတ် ကွာဟနေတာ ဖြစ်ပါတယ်။
ရော်နယ်ဒိုကို တွေ့ရစဉ်
ရော်နယ်ဒိုဟာ ဒီပွဲမှာသွင်းယူခဲ့တဲ့ သွင်းဂိုး ၂ ဂိုးကြောင့် ဒီရာသီ ဆော်ဒီပရိုလိဂ်ပြိုင်ပွဲမှာ ၂၁ ဂိုး သွင်းယူထားပြီး သူ့ရဲ့ဆော်ဒီပရိုလိဂ် ကစားသမားဘဝ သွင်းဂိုး ၇၀ ပြည့်ခဲ့တာပါ။
ဒါအပြင် အသက် ၄၀ နှစ်အရွယ်ရှိ ရော်နယ်ဒိုအတွက် ပရော်ဖက်ရှင်နယ် သွင်းဂိုး ၉၃၁ ဂိုးအထိ ရှိလာခဲ့ပြီလည်း ဖြစ်ပါတယ်။
ရော်နယ်ဒိုက “ဒီနိုင်ပွဲအတွက် အသင်းရဲ့ အားထုတ်မှုက အရေးပါခဲ့သလို ကျနော့်ရဲ့ သွင်းဂိုးကလည်း အရေးကြီး ပါတယ်။ ဒါပေမယ့် အသင်းနိုင်ပွဲရရှိဖို့က ပိုပြီးအရေးကြီးပါတယ်။ ကျနော်ဟာ ဆော်ဒီပရိုလိဂ်နဲ့ ချန်ပီယံလိဂ်မှာ အသင်းကို ကူညီဖို့ကြိုးစားနေပြီး တစ်ဦးချင်း မှတ်တမ်းတွေကို အာရုံမစိုက်ပါဘူး”လို့ ပွဲအပြီး SSC နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။
အယ်လ်နာဆာအသင်းဟာ လာမယ့် ဆော်ဒီပရိုလိဂ် ပွဲစဉ်အဖြစ် အယ်လ်ရီယက်ဒ်အသင်းနဲ့ ဧပြီ ၁၂ ရက်မှာ ယှဉ်ပြိုင်သွားမှာဖြစ်ပါတယ်။
Source: ESPN
- By CNI
- Category: အားကစား
- Hits: 197
CNI Sport News
၂၀၂၅ ခုနှစ်၊ ဧပြီ ၅
ဘယ်လ်ဂျီယံကွင်းလယ်လူ ဒီဘရိုင်းဟာ စာချုပ်ကုန်ဆုံးမယ့် ဒီရာသီအကုန်မှာ မန်စီးတီးအသင်းကနေ ထွက်ခွာမယ်လို့ ကြေညာခဲ့ပါတယ်။
၂၀၁၅ ခုနှစ်က ဝုလ်ဖ်ဘတ်အသင်းကနေ ရောက်ရှိလာခဲ့တဲ့ ဒီဘရိုင်းဟာ မန်စီးတီးအသင်းမှာ ၁၀ နှစ်ကြာ ကစားပြီးနောက် ထွက်ခွာတော့မှာပါ။
ဒီဘရိုင်းဟာ မန်စီးတီးအသင်းနဲ့အတူ ပရီးမီးယားလိဂ်ဖလား ၆ ကြိမ်၊ ချန်ပီယံလိဂ်ဖလား ၁ ကြိမ် အပါအဝင် ဆုဖလားပေါင်း ၁၆ ခု ရယူထားတာဖြစ်ပါတယ်။
ဒီဘရိုင်းဟာ ပရီးမီးယားလိဂ် တစ်ရာသီ အကောင်းဆုံး ကစားသမားဆုကို ၂ ကြိမ် ရယူနိုင်ခဲ့တာပါ။
ပရီးမီးယားလိဂ်ရဲ့ အကောင်းဆုံး ကစားသမားတွေထဲက တစ်ဦးအဖြစ် သတ်မှတ်ခြင်းခံထားရတဲ့ ဒီဘရိုင်းဟာ မန်စီးတီးအသင်းထံ မပြောင်းရွှေ့ခင် နည်းပြမော်ရင်ဟို လက်ထက် ချယ်လ်ဆီးအသင်းမှာ ကစားခဲ့သေးတာ ဖြစ်ပါတယ်။
ဒီဘရိုင်းနဲ့ ဂွာဒီယိုလာကို တွေ့ရစဉ်
အသက် ၃၃ နှစ်အရွယ်ရှိ ဒီဘရိုင်းဟာ မန်စီးတီးအသင်းအတွက် ပြိုင်ပွဲစုံ ၄၁၃ ပွဲ ကစားထားပြီး ၁၀၆ ဂိုး သွင်းယူ ကာ ဂိုးဖန်တီးမှု ၁၇၄ ကြိမ်ပြုလုပ်ထားတာပါ။
ဒီဘရိုင်းဟာ ဒဏ်ရာတွေကြောင့် ဒီရာသီမှာ မန်စီးတီးအသင်းအတွက် ပွဲအနည်းငယ်သာ ပါဝင်ကစားနိုင်ခဲ့ပါတယ်။
ဒီဘရိုင်းဟာ မန်စီးတီးအသင်းနဲ့ ရာသီကုန်ရင် စာချုပ်ကုန်ဆုံးမှာဖြစ်လို့ နွေရာသီမှာကျင်းပမယ့် ဖီဖာကလပ် ကမ္ဘာ့ဖလားပြိုင်ပွဲမှာ ပါဝင်ဖွယ်ရှိ/မရှိ မသေချာသေးပါဘူး။
ဒီဘရိုင်းကို ခေါ်ယူဖို့ မေဂျာလိဂ်နဲ့ ဆော်ဒီပရိုလိဂ် ကလပ်အသင်းတွေက ချိတ်ဆက်မှုတွေ ပြုလုပ်နေကြတာပါ။
မန်စီးတီးအသင်းနည်းပြ ဂွာဒီယိုလာက ဒီဘရိုင်းကို ပရီးမီးယားလိဂ်ရဲ့ သမိုင်းတစ်လျှောက် အကောင်းဆုံး ကစားသမားတွေထဲက တစ်ဦးအဖြစ် ချီးကျူးခဲ့ပြီး သူထွက်ခွာမယ့်နေ့က ကလပ်အသင်းအတွက် ဝမ်းနည်းဖို့ ကောင်းတဲ့နေ့ ဖြစ်မယ်လို့ ပြောခဲ့ပါတယ်။
Source: ESPN
- By CNI
- Category: အားကစား
- Hits: 199
CNI Sport News
၂၀၂၅ ခုနှစ်၊ ဧပြီ ၄
ပြင်သစ်ကွင်းလယ်လူ ကန်တီဟာ နွေရာသီမှာ ဥရောပထံ ပြန်လာမယ့် အလားအလာနဲ့ပတ်သက်ပြီး ယူနိုက်တက် အသင်း နည်းပြဟောင်း ဆိုးလ်ရှားနဲ့ ဆွေးနွေးမှုတွေ ပြုလုပ်ခဲ့ပါတယ်။
ချယ်လ်ဆီးနဲ့ လက်စတာအသင်း ကြယ်ပွင့်ဟောင်း ကန်တီဟာ ၂၀၂၃ ခုနှစ် နွေရာသီက ပရီးမီးယားလိဂ်ကနေ ထွက်ခွာပြီး ဆော်ဒီပရိုလိဂ်ကလပ် အယ်လ်အစ်တီဟတ်အသင်းထံ ပြောင်းရွှေ့ခဲ့တာပါ။
ပြင်သစ်အသင်းနဲ့ ၂၀၁၈ ကမ္ဘာ့ဖလား ချန်ပီယံဆု ရယူနိုင်ခဲ့တဲ့ ကန်တီဟာ ဆော်ဒီမှာ နှစ်ရာသီကြာ ကစားပြီး နောက် ဒီရာသီအကုန်မှာ ဥရောပထံ ပြန်လာချင်နေတာ ဖြစ်ပါတယ်။
ပြီးခဲ့တဲ့ ဇန်နဝါရီက တူရကီကလပ် ဘက်ဆစ်တပ်အသင်းကို ကိုင်တွယ်ခဲ့တဲ့ ဆိုးလ်ရှားဟာ ကန်တီကို လာမယ့် နွေရာသီအသင်းရဲ့ အဓိကပစ်မှတ်အဖြစ် သတ်မှတ်ထားတာကြောင့် ကစားသမားနဲ့ ဆွေးနွေးမှုတွေ ပြုလုပ်ခဲ့ တယ်လို့ တူရကီသတင်းတွေမှာ ဖော်ပြထားတာပါ။
ကန်တီကို တွေ့ရစဉ်
ကန်တီဟာ ဆိုးလ်ရှား ယူနိုက်တက်အသင်းကို ကိုင်တွယ်ခဲ့ချိန်က ပရီးမီးယားလိဂ်ရဲ့ အကောင်းဆုံး ကွင်းလယ် လူတွေထဲက တစ်ဦးအဖြစ် သတ်မှတ်ခံခဲ့ရပါတယ်။
ကန်တီဟာ ဒီကာလတွေအတွင်းမှာ ပရီးမီးယားလိဂ်၊ ယူရိုပါလိဂ်နဲ့ ချန်ပီယံလိဂ်ဖလားတွေကို ရယူနိုင်ခဲ့တာပါ။
ကန်တီဟာ ဆိုးလ်ရှား ကိုင်တွယ်နေတဲ့ ဘက်ဆစ်တပ်အသင်းထံ ပြောင်းရွှေ့ဖို့ စိတ်ဝင်စားနေပြီး ဥရောပထံ ပြန်လာနိုင်ဖို့အတွက် သူ့ရဲ့လုပ်ခလစာကို လျှော့ယူသွားဖို့တောင် ဆန္ဒရှိနေတာ ဖြစ်ပါတယ်။
ပြီးခဲ့တဲ့ဇန်နဝါရီ အပြောင်းအရွှေ့က ဝက်စ်ဟမ်းအသင်းဟာ ကန်တီကို ခေါ်ယူဖို့ စိတ်ဝင်စားခဲ့ပြီး အယ်လ်အစ်တီဟတ်အသင်းနဲ့ သူ့ရဲ့စာချုပ်ထဲမှာပါဝင်တဲ့ စာချုပ်ဖျက်သိမ်းကြေးကိုပေးဖို့ အဆင်သင့်ဖြစ်ခဲ့တာပါ။
ကန်တီဟာ အယ်လ်အစ်တီဟတ်အသင်းအတွက် ပြိုင်ပွဲစုံ ၇၁ ပွဲ ကစားထားပြီး ၇ ဂိုးသွင်းယူထားကာ ဒီရာသီ ဆော်ဒီပရိုလိဂ်နဲ့ ဘုရင့်ဖလား ရယူနိုင်ဖို့ အခွင့်အရေးကောင်းတွေ ရှိနေတာဖြစ်ပါတယ်။
Source: Dailymail
- By CNI
- Category: အားကစား
- Hits: 237
CNI Sport News
၂၀၂၅ ခုနှစ်၊ ဧပြီ ၄
အက်စတွန်ဗီလာအသင်း နည်းပြ အူနှိုင်းအမ်မရီဟာ ပီအက်စ်ဂျီအသင်းကနေ အငှားနဲ့ခေါ်ယူထားတဲ့ အဆန်စီယို ကို အပြီးသတ်ခေါ်ယူဖို့ အသင်းကို တိုက်တွန်းမှု ပြုလုပ်ခဲ့ပါတယ်။
အဆန်စီယိုဟာ ပီအက်စ်ဂျီအသင်းမှာ ပွဲကစားခွင့် ဆုံးရှုံးခဲ့တာကြောင့် ပြီးခဲ့တဲ့ဇန်နဝါရီက အက်စတွန်ဗီလာ အသင်းထံ ရာသီကုန်အထိ အငှားစာချုပ်နဲ့ ပြောင်းရွှေ့ခဲ့တာပါ။
ချန်ပီယံလိဂ်ဖလားကို ရီးရယ်လ်အသင်းနဲ့ ၃ ကြိမ် ရယူနိုင်ခဲ့တဲ့ အဆန်စီယိုဟာ အက်စတွန်ဗီလာအသင်းမှာ အကောင်းဆုံး စွမ်းဆောင်ရည်တွေ ပြသနေတာဖြစ်ပါတယ်။
အဆန်စီယိုဟာ အက်စတွန်ဗီလာအသင်းအတွက် ၁၀ ပွဲသာ ပါဝင်ကစားရသေးပေမယ့် ၈ ဂိုးအထိ သွင်းယူထား တာပါ။
အဆန်စီယိုနဲ့ အက်စတွန်ဗီလာအသင်းတို့ရဲ့ အငှားစာချုပ်ထဲမှာ အပြီးသတ် ဝယ်ယူဖို့အတွက် ရွေးချယ်ခွင့် မပါဝင်ပါဘူး။
ဒါပေမယ့် နည်းပြ အူနှိုင်းအမ်မရီဟာ အဆန်စီယိုကို အပြီးသတ်ဝယ်ယူဖို့အတွက် အက်စတွန်ဗီလာအသင်း အားကစား ဒါရိုက်တာမွန်ချီကို ပြောထားတယ်လို့ Estadio Deportivo သတင်းမှာ ဖော်ပြထားပါတယ်။
အဆန်စီယိုကို တွေ့ရစဉ်
အသက် ၂၉ နှစ်အရွယ်ရှိ အဆန်စီယိုနဲ့ ပီအက်စ်ဂျီအသင်းတို့ရဲ့ စာချုပ်ထဲမှာ စာချုပ်ဖျက်သိမ်းကြေးပေါင် ၁၃ သန်း ပါဝင်နေတာပါ။
အဲဒါကြောင့် အက်စတွန်ဗီလာအသင်းဟာ အဆန်စီယိုကို စာချုပ်ဖျက်သိမ်းကြေးပေးပြီး ပီအက်စ်ဂျီအသင်းကနေ ခေါ်ယူနိုင်ဖို့ လုပ်ဆောင်သွားဖွယ်ရှိနေတာ ဖြစ်ပါတယ်။
အက်စတွန်ဗီလာအသင်းဟာ လာမယ့် ချန်ပီယံလိဂ် ကွာတားဖိုင်နယ်ပွဲစဉ်မှာ ပီအက်စ်ဂျီအသင်းနဲ့ ယှဉ်ပြိုင်ရမှာ ဖြစ်လို့ အဆန်စီယိုဟာ ပီအက်စ်ဂျီအသင်းကို သူ့ရဲ့အကောင်းဆုံး စွမ်းဆောင်ရည်တွေ ပြသနိုင်ဖို့ အခွင့်အရေး ရှိနေတာပါ။
ပြိုင်ပွဲစုံ ၇ ပွဲဆက်တိုက် နိုင်ပွဲရရှိထားတဲ့ အက်စတွန်ဗီလာအသင်းဟာ လာမယ့် ပရီးမီးယားလိဂ် ပွဲစဉ်အဖြစ် နော်တင်ဟမ်ဖောရက်စ်အသင်းနဲ့ ယှဉ်ပြိုင်ရမှာဖြစ်ပါတယ်။
Source: Goal
- By CNI
- Category: အားကစား
- Hits: 134
CNI Sport News
၂၀၂၅ ခုနှစ်၊ ဧပြီ ၄
အာဆင်နယ်အသင်း အဓိကနောက်ခံလူ ဂါဘရီရယ်လ်ဟာ တံကောက်ကြောဒဏ်ရာကို ခွဲစိတ်ကုသမှုခံယူရမှာ ဖြစ်လို့ ဒီရာသီရဲ့ လက်ကျန်ပွဲတွေကို လွဲချော်သွားပြီ ဖြစ်ပါတယ်။
ဂါဘရီရယ်လ်ဟာ အာဆင်နယ်အသင်းက ဖူလ်ဟမ်အသင်းကို ၂ ဂိုး-၁ ဂိုးနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်ရဲ့ ပထမပိုင်းမှာ ဒဏ်ရာကြောင့် လူစားလဲမှု ပြုလုပ်ခံခဲ့ရတာပါ။
ဘရာဇီးလ်နောက်ခံလူဟာ ဒီရာသီ အာဆင်နယ်အသင်းရဲ့ ပရီးမီးယားလိဂ်ပွဲစဉ် ၃၀ မှာ ၂၈ ပွဲ ပါဝင်ကစားထားပြီး ဆာလီဘာနဲ့အတူ တွဲဖက်ကာ အသင်းရဲ့ခံစစ်ကို အကောင်းဆုံးဖြစ်အောင် စွမ်းဆောင်နိုင်ခဲ့တာ ဖြစ်ပါတယ်။
ဒဏ်ရာကို ခွဲစိတ်မှုခံယူရမယ့် ဂါဘရီရယ်လ်ဟာ လာမယ့် ရာသီအစမှသာ ပြန်လည် ပါဝင်နိုင်ဖွယ်ရှိတယ်လို့ အာဆင်နယ်အသင်းရဲ့ ထုတ်ပြန်ချက်ထဲမှာ ဖော်ပြထားတာပါ။
အာဆင်နယ်အသင်း အတွက်တော့ ရာသီရဲ့ အရေးကြီးတဲ့ပွဲတွေမှာ ဂါဘရီရယ်လ်ကို လက်လွှတ်ရမှာက ကြီးမားတဲ့ ထိုးနှက်ချက်ဖြစ်လာဖို့ ရှိနေပါတယ်။
ဂါဘရီရယ်လ်ကို တွေ့ရစဉ်
ဂါဘရီရယ်လ်ဟာ အာဆင်နယ်အသင်းအတွက် ပရီးမီးယားလိဂ် ပြိုင်ပွဲမှာ ပွဲဦးထွက်ပြီးကတည်းက သူ ပါဝင် ကစားခဲ့တဲ့ ၁၅၉ ပွဲမှာ အသင်းရဲ့နိုင်ပွဲက ၆၃.၅ ရာခိုင်နှုန်းရှိခဲ့ပြီး သူလွဲချော်ခဲ့တဲ့ ၂၂ ပွဲမှာ အသင်းရဲ့နိုင်ပွဲက ၄၀.၉ ရာခိုင်နှုန်းရှိတယ်လို့ အချက်အလက်တွေအရ သိရတာပါ။
အာဆင်နယ်အသင်းဟာ ဒဏ်ရာကြောင့် ၃ လကျော်ကြာ အနားယူခဲ့ရတဲ့ ဆာကာ အသင်းအတွက် ပြန်ပါဝင် ကစားနိုင်ချိန်မှာ ဂါဘရီရယ်လ်ကို အနားပေးရတော့မှာ ဖြစ်ပါတယ်။
လန်ဒန်ကလပ်ဟာ အီတလီနောက်ခံလူ ကာလာဖီအိုရီကိုလည်း ဒဏ်ရာကြောင့် အနားပေးထားရတဲ့အတွက် လာမယ့်ပွဲတွေမှာ ခံစစ်အခက်အခဲနဲ့ ရင်ဆိုင်ရဖွယ်ရှိနေတာပါ။
အာဆင်နယ်အသင်းဟာ ဒီရာသီ ပရီးမီးယားလိဂ်ပွဲစဉ် ၈ ပွဲသာကစားဖို့ ကျန်ရှိတော့ချိန်မှာ အဆင့် ၁ နေရာက လီဗာပူးလ်အသင်းနဲ့ ၁၂ မှတ်အကွာအဆင့် ၂ နေရာမှာ ရပ်တည်နေပါတယ်။
အာဆင်နယ်အသင်းဟာ လာမယ့်ဧပြီ ၉ ရက်နဲ့ ၁၇ ရက်တွေမှာ လက်ရှိ ချန်ပီယံ ရီးရယ်လ်အသင်းနဲ့ ချန်ပီယံလိဂ် ကွာတားဖိုင်နယ်ပွဲစဉ် ယှဉ်ပြိုင်ရမှာဖြစ်ပါတယ်။
- By CNI
- Category: အားကစား
- Hits: 194
CNI Sport News
၂၀၂၅ ခုနှစ်၊ ဧပြီ ၄
ကမ္ဘာ့ဘောလုံးအဖွဲ့ချုပ်(ဖီဖာ)ဥက္ကဋ္ဌ အင်ဖန်တီနိုက ရုရှားကို ကမ္ဘာ့ဘောလုံးလောကထဲ မကြာမီ ပြန်လည် ဝင်ရောက်လာနိုင်ဖို့ မျှော်လင့်တယ်လို့ ဘယ်လ်ဂရိတ်မှာ ပြုလုပ်တဲ့ ၄၉ ကြိမ်မြောက် UEFA ကွန်ဂရက်မှာ ပြောခဲ့ပါတယ်။
အင်ဖန်တီနိုက “ယူကရိန်းမှာ ငြိမ်းချမ်းရေးအတွက် ဆွေးနွေးမှုတွေ ဆက်လုပ်နေတာကြောင့် ကျနော်တို့ဟာ မကြာမီ နောက်ထပ် စာမျက်နှာကို ရွှေ့နိုင်ပြီး ဘောလုံးအခင်းအကျင်းထဲ ရုရှားကို ပြန်လည်ခေါ်ဆောင်နိုင်ဖို့ ကျနော် မျှော်လင့်ပါတယ်။ ဘာလို့လဲဆိုရင် ဒါဟာ အားလုံးပြေလည်သွားပြီလို့ ဆိုလိုချင်တာပါ။ ဒါကို ကျနော်တို့ ဝမ်းသာရမှာဖြစ်ပြီး ဆုလည်းတောင်းရမှာပါ။ ဘာလို့လဲဆိုရင် ဒါက ဘောလုံးအကြောင်း ဖြစ်နေလို့ပါ ”လို့ ပြောခဲ့ တာပါ။
ရုရှားနိုင်ငံက ယူကရိန်းနိုင်ငံကို စတင် ကျူးကျော်ခဲ့တဲ့ ၂၀၂၂ ခုနှစ်၊ ဖေဖော်ဝါရီကတည်းက ရုရှားကလပ်တွေနဲ့ နိုင်ငံအသင်းတွေကို ဖီဖာနဲ့ UEFA တို့က ပြိုင်ပွဲယှဉ်ပြိုင်ခွင့် ပိတ်ပင်ခဲ့တာ ဖြစ်ပါတယ်။
အဲဒါကြောင့် ရုရှားအမျိုးသား ဘောလုံးအသင်းဟာ ၂၀၂၂ ကမ္ဘာ့ဖလားပြိုင်ပွဲနဲ့ ယူရို ၂၀၂၄ ပြိုင်ပွဲတွေကို လွဲချော်ခဲ့တာပါ။
အခုအချိန်မှာ အမေရိကန်နိုင်ငံက ရုရှားနဲ့ယူကရိန်းကြား ငြိမ်းချမ်းရေးအကျိုးဆောင်ဖို့ ကြိုးပမ်းနေတာကြောင့် အင်ဖန်တီနိုက ရုရှားကို ကမ္ဘာ့ဘောလုံးလောကထဲ အမြန်ဆုံးပြန်လာနိုင်ဖို့ မျှော်လင့်နေတာဖြစ်ပါတယ်။
ရုရှားအသင်းကို တွေ့ရစဉ်
ဥရောပဘောလုံးအဖွဲ့ချုပ်(UEFA)ဥက္ကဋ္ဌ ဆီဖာရင်ကလည်း အင်ဖန်တီနိုရဲ့ မှတ်ချက်ကို ပဲ့တင်ထပ်ခဲ့ပြီး စစ်ပွဲတွေ ရပ်တန့်သွားတဲ့အချိန်မှာ ရုရှားကို လက်ခံသွားမယ်လို့ ကွန်ဂရက်အပိတ် သတင်းစာရှင်းလင်းပွဲမှာ ပြောခဲ့တာပါ။
ဆီဖာရင်ဟာ ၂၀၂၃ ခုနှစ်က ရုရှား ယူ-၁၇ အသင်းတွေကို ပြိုင်ပွဲယှဉ်ပြိုင်ခွင့်ပေးဖို့ ကြိုးပမ်းမှုကို ထောက်ခံခဲ့တဲ့ သူလည်း ဖြစ်ပါတယ်။
UEFA အကြီးအကဲ ဆီဖာရင်ဟာ ၂၀၃၀ ကမ္ဘာ့ဖလားပြိုင်ပွဲကို အသင်းအရေအတွက် ၆၄ သင်းအထိ တိုးပြီး ကျင်းပဖို့ စဉ်းစားနေတဲ့ ဖီဖာရဲ့ အဆိုပြုချက်ကို ပြင်းပြင်းထန်ထန် ကန့်ကွက်ကြောင်းလည်း ပြောထားတာပါ။
အမေရိကန်၊ မက္ကဆီကိုနဲ့ ကနေဒါနိုင်ငံတို့က ပူးတွဲအိမ်ရှင်အဖြစ် ကျင်းပမယ့် ၂၀၂၆ ကမ္ဘာ့ဖလားပြိုင်ပွဲကို ၄၈ သင်းနဲ့ အသင်းအရေအတွက် တိုးပြီး ကျင်းပသွားမှာ ဖြစ်ပါတယ်။
Source: CNA
Page 13 of 360
Latest News
Connect with us
