CNI Sport News

၂၀၂၆ ခုနှစ်၊ ဖေဖော်ဝါရီ ၂၄

ဒတ်ချ်လူမျိုးနည်းပြ အက်ဒ်ဗိုကတ်ဟာ ကူရာဆာအိုအသင်းကို ကမ္ဘာ့ဖလားပြိုင်ပွဲ ယှဉ်ပြိုင်ခွင့်ရရှိတဲ့ အသေးငယ်ဆုံး နိုင်ငံဖြစ်အောင် ကူညီပေးနိုင်ခဲ့ပြီးနောက် ၃ လအကြာမှာ သူ့ရဲ့နည်းပြရာထူးကနေ နုတ်ထွက်ခဲ့ပါတယ်။ 

အသက် ၇၈ နှစ်အရွယ်ရှိ နည်းပြဟာ ကျန်းမာရေး အခြေအနေ ဆိုးရွားနေတဲ့ သမီးဖြစ်သူကို ပြုစုပေးဖို့အတွက် အခုလို ဆုံးဖြတ်ချက်ချခဲ့တာလို့ ဒတ်ချ်သတင်းစာ AD က ဖော်ပြထားတာပါ။

နယ်သာလန်အသင်းကို ၃ ကြိမ် တာဝန်ယူခဲ့တာ အပါအဝင် ရိန်းဂျားစ်၊ ဆန်းဒါးလန်းနဲ့ ဖီနာဘာချီအသင်းတို့ကို ကိုင်တွယ်ခဲ့တဲ့ အက်ဒ်ဗိုကတ်ဟာ သူ့ရဲ့ဆုံးဖြတ်ချက်နဲ့ ပတ်သက်ပြီး ကြေညာချက် ထုတ်ပြန်ခဲ့ပါတယ်။

အက်ဒ်ဗိုကတ်က “ဘောလုံးထက် မိသားစုက ပိုပြီး အရေးကြီးတယ်ဆိုတာ ကျနော် အမြဲတမ်း ပြောဖူးပါတယ်။ ဒါကြောင့် ဒါဟာ သဘာဝကျတဲ့ ဆုံးဖြတ်ချက်ပါ။ ဒါပေမယ့် ကျနော်ဟာ ကူရာဆာအိုနိုင်ငံ၊ ပရိသတ်တွေနဲ့ လုပ်ဖော်ကိုင်ဖက်တွေကို အလွန် လွမ်းဆွတ်နေမှာပါ။ ကမ္ဘာ့ အသေးငယ်ဆုံးနိုင်ငံကို ကမ္ဘာ့ဖလား ခြေစစ်ပွဲ အောင်မြင်အောင် လုပ်ပေးနိုင်ခဲ့တာက ကျနော့်အတွက် ဂုဏ်ယူစရာပါပဲ”လို့ ပြောခဲ့ပါတယ်။ 

အက်ဒ်ဗိုကတ်ကို တွေ့ရစဉ် 

ကူရာဆာအိုအသင်းဟာ အက်ဒ်ဗိုကတ်ရဲ့ နေရာမှာ နောက်ထပ် အတွေ့အကြုံရင့် ဒတ်ချ်လူမျိုးနည်းပြ တစ်ဦး ဖြစ်တဲ့ ဖရက်ဒ်ရက်ဒ်တန်ကို အစားထိုး ခန့်အပ်ခဲ့ပါတယ်။ 

ဖရက်ဒ်ရက်တန်က အက်ဒ်ဗိုကတ်ရဲ့ အလုပ်ကို ဆက်လုပ်ရမှာက ဂုဏ်ယူစရာဖြစ်ပြီး သူ့ရဲ့ လမ်းကြောင်းအတိုင်း ဆက်သွားကာ အောင်မြင်အောင် လုပ်ဆောင်ပေးနိုင်ဖို့ မျှော်လင့်ကြောင်း ပြောခဲ့ပါတယ်။ 

ကူရာဆာအိုအသင်းဟာ ၂၀၂၆ ကမ္ဘာ့ဖလားပြိုင်ပွဲရဲ့ အုပ်စု E မှာ ဂျာမနီ၊ အီကွေဒေါ၊ အိုင်ဗရီကို့စ်တို့နဲ့ တစ်အုပ် စုတည်း ကျရောက်နေတာပါ။

ကူရာဆာအိုအသင်းဟာ ကမ္ဘာ့ဖလားပြိုင်ပွဲ မတိုင်မီ ခြေစမ်းပွဲတွေအဖြစ် တရုတ်၊ သြစတြေးလျ၊ စကော့တလန် အသင်းတို့နဲ့ ယှဉ်ပြိုင်သွားမှာ ဖြစ်ပါတယ်။ 

Source: Dailymail

CNI Sport News

၂၀၂၆ ခုနှစ်၊ ဖေဖော်ဝါရီ ၂၄

လီဗာပူးလ်အသင်း တိုက်စစ်မှူးဟောင်း ဟက်စကီးက အမေရိကန်ကြယ်ပွင့် ပူလီဆစ်ဟာ ဆာလက်ရဲ့ နေရာမှာ အသုံးဝင်တဲ့ အစားထိုးမှု ဖြစ်လာနိုင်တယ်လို့ ပြောခဲ့ပါတယ်။ 

ဟက်စကီးက “ကျနော် ပူလီဆစ်ကို အလွန်သဘောကျပါတယ်။ သူဟာ ချယ်လ်ဆီးမှာရှိခဲ့ချိန်က ကျနော်လိုချင် သလောက် သွင်းဂိုးတွေ မသွင်းနိုင်ခဲ့ပေမယ့် ခံစစ် ကစားသမားတွေကို ပြဿနာတွေ ပေးခဲ့တယ်လို့ ထင်ပါတယ်။ ဆာလက်ဟာ အီတလီကိုသွားဖို့ ချယ်လ်ဆီးကနေ ထွက်ခွာခဲ့ပြီး လီဗာပူးလ်အတွက် သူဘာတွေ လုပ်ခဲ့လဲဆိုတာ ကြည့်လိုက်ပါ။ ပူလီဆစ်ကိုလည်း ဒီလိုမျိုးပုံစံနဲ့ ပရီးမီးယားလိဂ်ထံ ပြန်လာတာကို မြင်ရရင် အလွန်ကောင်းမယ် ထင်ကြောင်း” OLBG ကို ပြောခဲ့ပါတယ်။ 

ဆာလက်ဟာ ၂၀၂၇ ခုနှစ် နွေရာသီအထိ လီဗာပူးလ်အသင်းနဲ့ စာချုပ်ရှိနေပေမယ့် ဒီရာသီမှာ စွမ်းဆောင်ရည်ပိုင်း ကျဆင်းနေတာပါ။ 

အသက် ၃၃ နှစ်အရွယ်ရှိ ကစားသမားဟာ ပြီးခဲ့တဲ့နှစ် နိုဝင်ဘာလ ၁ ရက် နောက်ပိုင်း ကစားခဲ့တဲ့ ပရီးမီးယားလိဂ် ပွဲတွေမှာ သွင်းဂိုး သွင်းယူထားနိုင်ခြင်း မရှိသေးပါဘူး။ 

ဆာလက်ကို ခေါ်ယူဖို့ ဆော်ဒီပရိုလိဂ်နဲ့ မေဂျာလိဂ်က စိတ်ဝင်စားနေတာကြောင့် လီဗာပူးလ်အသင်းဟာ နွေရာသီ မှာ ရောင်းချပြီး ပြောင်းရွှေ့ကြေး ရှာဖွေနိုင်ပါတယ်။

ပူလီဆစ်ကို တွေ့ရစဉ်

လီဗာပူးလ်အသင်းဟာ ဆာလက် ထွက်ခွာခဲ့ရင် ညာတောင်ပံနေရာမှာ ကစားသမားအစားထိုးဖို့ ပြင်ဆင်နေတာ ကြောင့် ကစားသမား တချို့နဲ့ သတင်းတွေ ထွက်နေတာပါ။

အေစီမီလန်အသင်းနဲ့ စာချုပ်သစ်ချုပ်ဖို့ နှောင့်နှေးနေတဲ့ ပူလီဆစ်လည်း ဒီကစားသမား စာရင်းထဲမှာ ပါဝင်နေပြီး ဟက်စကီးကတော့ ပူလီဆစ်ဟာ အသင်းရဲ့ လူစာရင်းထဲ အလွန်ကောင်းမွန်တဲ့ ကစားသမား ဖြည့်တင်းမှုလို့ ခံစားနေရပါတယ်။ 

ဒါ့ပြင် ဟက်စကီးက ဝက်စ်ဟမ်းအသင်း ခေါင်းဆောင် ဘိုဝင်နဲ့ PSG အသင်း တောင်ပံကစားသမား ကာဗီချာတို့ ကိုလည်း ဆာလက်ရဲ့ နေရာမှာ အစားထိုးမယ့် စာရင်းထဲ ထည့်သွင်းခဲ့ပါတယ်။

လီဗာပူးလ်အသင်းဟာ အသင်းပရိသတ် တစ်ဦးအဖြစ်နဲ့ ကြီးပြင်းလာတဲ့ နယူးကာဆယ်အသင်း ကြယ်ပွင့် ဂေါ်ဒွန်ကို ခေါ်ယူဖို့ စိတ်ဝင်စားနေတာ ဖြစ်ပါတယ်။ 

Source: Goal

CNI Sport News

၂၀၂၆ ခုနှစ်၊ ဖေဖော်ဝါရီ ၂၄

နာမည်ကြီး လက်ဝှေ့သမားတွေဖြစ်တဲ့ ပတ်ကွီအိုနဲ့ မေဝယ်သာတို့ဟာ စက်တင်ဘာလထဲမှာ ပရော်ဖက်ရှင်နယ် မကျေပွဲအဖြစ် ထိုးသတ်ဖို့ သဘောတူညီမှု ရရှိခဲ့ကြပါတယ်။ 

အသက် ၄၇ နှစ်အရွယ်ရှိ ပတ်ကွီအိုနဲ့ ၄၈ နှစ်အရွယ်ရှိ မေဝယ်သာတို့ဟာ စက်တင်ဘာလ ၁၉ ရက်၊ Las Vegas ရှိ Sphere မှာ ထိုးသတ်မှာဖြစ်ပြီး ဒီပွဲကို Netflix ကနေ တိုက်ရိုက်ထုတ်လွှင့် ပြသသွားမှာပါ။ 

ကမ္ဘာ့ချန်ပီယံဟောင်း မေဝယ်သာဟာ အနားယူတာကနေ ပြန်လာပြီး ပွဲတွေထိုးသတ်တော့မယ်လို့ ပြီးခဲ့တဲ့ အပတ်မှာ ကြေညာခဲ့တာ ဖြစ်ပါတယ်။

ပတ်ကွီအိုနဲ့ပွဲဟာ မေဝယ်သာအတွက် MMA ဖိုက်တာ မက်ဂရီဂေါကို အနိုင်ရခဲ့တဲ့ ၂၀၁၇ ခုနှစ်နောက်ပိုင်း ပထမဆုံး ပရော်ဖက်ရှင်နယ် ထိုးသတ်ပွဲဖြစ်လာမှာပါ။ 

ဖိလစ်ပိုင်လက်ဝှေ့သမား ပတ်ကွီအိုဟာ နိုင်ငံရေးလောကထဲကို အာရုံစိုက်ဖို့ ၂၀၂၁ ခုနှစ်မှာ အနားယူခဲ့ပေမယ့် ပြီးခဲ့တဲ့ ဇူလိုင်လမှာ WBC ဝယ်လ်တာဝိတ်ချန်ပီယံ ဘာရီယိုစ်နဲ့ထိုးသတ်ဖို့ ကြိုးဝိုင်းထဲ ပြန်လည် ဝင်ရောက်ခဲ့ ပါတယ်။

ဒီပွဲဟာ သရေရလဒ် ထွက်ပေါ်ခဲ့တာပါ။ မေဝယ်သာနဲ့ ပတ်ကွီအိုတို့ဟာ ၂၀၁၅ ခုနှစ်မှာ ပထမဆုံးအကြိမ် တွေ့ဆုံခဲ့ပြီး ရာစုနှစ်ရဲ့ ထိုးသတ်ပွဲလို့ ဖော်ပြခံခဲ့ရကာ လက်ဝှေ့သမိုင်းမှာ ကြေးအကြီးမားဆုံးပွဲအဖြစ် အခု အချိန်ထိ ရှိနေပါတယ်။ 

ပတ်ကွီအိုနဲ့ မေဝယ်သာကို တွေ့ရစဉ် 

၁၂ ချီ ထိုးသတ်ခဲ့တဲ့ဒီပွဲမှာ မေဝယ်သာက ပတ်ကွီအိုကို အနိုင်ရခဲ့တာ ဖြစ်ပါတယ်။ 

အခုပြန်လည် ထိုးသတ်မယ့် မကျေပွဲမှာ ဘယ်နှစ်ချီပါဝင်ပြီး ဘယ်ဝိတ်တန်းမှာ ယှဉ်ပြိုင်ရမလဲဆိုတာ မသိရသေး ပါဘူး။ 

ပတ်ကွီအိုက ပရိသတ်တွေဟာ ဒီပွဲကို အချိန်အတော်ကြာ စောင့်မျှော်နေကြပြီး မကျေပွဲက သူတို့နဲ့ ထိုက်တန် တယ်လို့ ပြောခဲ့ပါတယ်။ 

ဒါ့ပြင် ပတ်ကွီအိုက မေဝယ်သာအနေနဲ့ ပရောဖက်ရှင်နယ်ပွဲမှာ တစ်ကြိမ်ရှုံးနိမ့်ပြီး ဘယ်သူက သူ့ကို အနိုင်ယူ ခဲ့လဲဆိုတာ အမြဲတမ်း သတိရစေချင်တယ်လို့ ပြောခဲ့ပါတယ်။ 

ပရော်ဖက်ရှင်နယ် ထိုးသတ်ခဲ့တဲ့ ပွဲပေါင်း ၅၀ စလုံး အနိုင်ရခဲ့တဲ့ မေဝယ်သာက သူဟာ ပတ်ကွီအိုကို တစ်ကြိမ်ထိုး သတ်ပြီး အနိုင်ယူထားခဲ့သလို ဒီတစ်ကြိမ်လည်း ရလဒ်က အတူတူပဲ ဖြစ်မယ်လို့ ပြောခဲ့ပါတယ်။ 

Source: BBC

CNI Sport News

၂၀၂၆ ခုနှစ်၊ ဖေဖော်ဝါရီ ၂၄

ယူနိုက်တက်အသင်းက အဲဗာတန်အသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ ပရီးမီးယားလိဂ်ပွဲမှာ လက်စွမ်းပြ ကာကွယ်မှုတွေ ပြုလုပ်ခဲ့တဲ့ ယူနိုက်တက်အသင်း ဂိုးသမား လမ်းမန်းစ်ကို အဲဗာတန်အသင်းနည်းပြ ဒေးဗစ်မိုယက်စ်က အကောင်းဆုံး ကစားသမားလို့ ချီးကျူးခဲ့ပါတယ်။ 

ဒေးဗစ်မိုယက်စ်က “ဂိုးသမားက အလွန်ထူးချွန်ပါတယ်။ မိုက်ကယ်ကိန်းရဲ့ ကန်ချက်ကို ကာကွယ်ပုံနဲ့ ထောင့်ကန် ဘောတွေကို သူကိုင်တွယ်ပုံက အလွန်ကောင်းမွန်ပါတယ်။ ကျနော်တို့ဟာ တစ်ခုခု ရခဲ့မယ်လို့ ထင်ခဲ့ပေမယ့် မရခဲ့ ပါဘူး။ ကျနော့်အတွက်တော့ သူကကွင်းထဲမှာ အကောင်းဆုံးကစားသမားလို့” ပြောခဲ့တာပါ။ 

အဲဗာတန်အသင်းဟာ ဒီပွဲစဉ်မှာ ထောင့်ကန်ဘောတွေ ကန်ခွင့်ရတိုင်း ကစားသမား အများအပြားကို လမ်းမန်းစ်ရဲ့ အနားမှာ ထားပြီး ဖိအားပေးဖို့ ကြိုးပမ်းခဲ့တာ ဖြစ်ပါတယ်။

ဒါပေမယ့် လမ်းမန်းစ်ဟာ ဒီအခြေအနေတွေကို အကောင်းဆုံး ကိုင်တွယ်ကာ ယူနိုက်တက်အသင်း ပေးဂိုးမပေးရ အောင် လုပ်ဆောင်နိုင်ခဲ့တာပါ။

ယူနိုက်တက်အသင်းဟာ ၂၀၂၅ ခုနှစ်၊ မတ်လနောက်ပိုင်း ပထမဆုံးအကြိမ် ပရီးမီးယားလိဂ်ပြိုင်ပွဲမှာ အဝေးကွင်း ပေးဂိုးမပေးခဲ့ရတာ ဖြစ်ပါတယ်။

ယူနိုက်တက်အသင်းနည်းပြ မိုက်ကယ်ကာရစ်ကလည်း လမ်းမန်းစ် လုပ်ဆောင်နိုင်ပုံတွေကို ပွဲအပြီးမှာ ချီးကျူးခဲ့ ပါတယ်။ 

 ယူနိုက်တက်နဲ့ အဲဗာတန် ယှဉ်ပြိုင်နေစဉ်

ဒီပွဲမှာ ယူနိုက်တက်အသင်းအတွက် အနိုင်ဂိုးကို လူစားလဲ ဝင်ရောက်လာတဲ့ တိုက်စစ်မှူး ဆက်စ်ကိုက သွင်းယူခဲ့ ပြီး အသင်းကို အဖိုးတန် ၃ မှတ် ရယူပေးနိုင်ခဲ့တာပါ။ 

ဆက်စ်ကိုဟာ နည်းပြ မိုက်ကယ်ကာရစ် လက်ထက်မှာ ယူနိုက်တက်အသင်း အသင်းရဲ့ ပွဲထွက်လူစာရင်းထဲ ပါဝင်ခွင့် မရသေးပေမယ့် နောက်ဆုံးကစားခဲ့တဲ့ ၇ ပွဲမှာ ၆ ဂိုးအထိ သွင်းယူထားပါတယ်။ 

ယူနိုက်တက်အသင်းနည်းပြ မိုက်ကယ်ကာရစ်က ဆက်စ်ကိုနဲ့သူဟာ ကောင်းမွန်တဲ့ ဆက်ဆံရေးရှိပြီး ဘာပြဿနာမှ မရှိသလို သူ့ရဲ့ လက်ရှိပုံစံတွေကို မြင်တွေ့ရတာ ကောင်းမွန်တယ်လို့ ပြောခဲ့ပါတယ်။ 

ယူနိုက်တက်အသင်းဟာ မိုက်ကယ်ကာရစ် လက်ထက်ကစားခဲ့တဲ့ ပရီးမီးယားလိဂ် ၆ ပွဲမှာ ၅ ပွဲအနိုင်ရပြီး ၁ ပွဲ သရေကျကာ အမှတ်ပေးဇယား အဆင့် ၄ နေရာကို ပြန်တက်နိုင်ခဲ့ပါတယ်။ 

ယူနိုက်တက်အသင်းဟာ လာမယ့် ပရီးမီးယားလိဂ် ပွဲအဖြစ် ခရစ္စတယ်ပဲလေ့စ်အသင်းကို အိမ်ကွင်း လက်ခံ ယှဉ်ပြိုင်ရမှာ ဖြစ်ပါတယ်။ 

Source: ESPN

CNI Sport News

၂၀၂၆ ခုနှစ်၊ ဖေဖော်ဝါရီ ၂၃

ပေါ်တူဂီအသင်းခေါင်းဆောင် ရော်နယ်လ်ဒိုဟာ ဆော်ဒီမှာ အနာဂတ် မရေမရာမှုတွေ ဖြစ်ခဲ့ပေမယ့် အယ်လ်နာဆာအသင်းမှာ ပျော်ရွှင်နေတယ်လို့ အတည်ပြုခဲ့ပါတယ်။ 

ရော်နယ်လ်ဒိုက “ကျနော် အလွန်ပျော်ရွှင်နေပါတယ်။ ကျနော် အကြိမ်ပေါင်းများစွာ ပြောခဲ့သလိုပါပဲ ကျနော်ဟာ ဆော်ဒီနဲ့ သက်ဆိုင်တဲ့သူပါ။ ဒီနိုင်ငံက ကျနော့်ကို ကောင်းမွန်စွာ ကြိုဆိုသလို ကျနော့် မိသားစုကိုရော ကျနော့် သူငယ်ချင်းတွေကိုပါ။ ကျနော် ဒီမှာပျော်ရွှင်ပြီး ဆက်ရှိချင်ပါတယ်။ အရေးကြီးဆုံးအရာက လိဂ်ချန်ပီယံဆုအတွက် ဆက်တွန်းအားပေးဖို့ဖြစ်ပြီး ကျနော်တို့ ထိပ်ဆုံးမှာရှိနေတယ်”လို့ ဆော်ဒီရုပ်သံ Thmanyah ကိုပြောခဲ့တာပါ။ 

အသက် ၄၁ နှစ်အရွယ်ရှိ ကစားသမားဟာ ဆော်ဒီ အများပြည်သူရင်းနှီးမြှုပ်နှံမှုရန်ပုံငွေအဖွဲ့(PIF)က အသင်း အပေါ် စီမံခန့်ခွဲနေတဲ့ ပုံစံကို မနှစ်သက်တာကြောင့် ပြီးခဲ့တဲ့အသင်းရဲ့ ၃ ပွဲကို ပါဝင်ကစားခဲ့ခြင်း မရှိတာ ဖြစ်ပါ တယ်။

နောက်ပိုင်းမှာ ရော်နယ်လ်ဒိုဟာ အယ်လ်နာဆာအသင်းအတွက် ပြန်ကစားပေးခဲ့ပြီး အယ်လ်ဟာဇန်အသင်းကို ၄ ဂိုး-ဂိုးမရှိနဲ့ အနိုင်ရခဲ့တဲ့ ဆော်ဒီပရိုလိဂ်ပွဲမှာ အသင်းအတွက် ၂ ဂိုးသွင်းယူပေးခဲ့တာပါ။ 

 ရော်နယ်လ်ဒိုကို တွေ့ရစဉ် 

ဒီနိုင်ပွဲကြောင့် အယ်လ်နာဆာအသင်းဟာ ဆော်ဒီပရိုလိဂ် အမှတ်ပေးဇယား ထိပ်ဆုံးနေရာကို တက်နိုင်ခဲ့သလို ရော်နယ်လ်ဒိုကလည်း အသက် ၃၀ ပြည့်ပြီးနောက်ပိုင်းမှာ သွင်းယူတဲ့သွင်းဂိုးဟာ ၅၀၁ ဂိုး အထိရှိလာခဲ့ပါတယ်။ 

၂၀၂၂ ခုနှစ်၊ ဒီဇင်ဘာလမှာ အယ်လ်နာဆာအသင်းထံ ပြောင်းရွှေ့လာခဲ့တဲ့ ရော်နယ်လ်ဒိုဟာ အသင်းမှာ တစ်နှစ် လုပ်ခ ပေါင် ၁၇၇ သန်း ရရှိနေပြီး ဘောလုံးသမိုင်းမှာ လုပ်ခလစာ အများဆုံးရရှိတဲ့ ကစားသမားအဖြစ် စံချိန်တင် ထားပါတယ်။ 

ရော်နယ်လ်ဒိုဟာ အယ်လ်နာဆာအသင်းကို ရောက်ရှိလာပြီးကတည်းက အာရပ် ကလပ်ဖလားသာ ရရှိထားပြီး အဓိက ဆုဖလားတွေနဲ့ ဝေးကွာနေတာပါ။ 

အဲ့ဒါကြောင့် ရော်နယ်လ်ဒိုဟာ ဒီရာသီမှာအသင်းနဲ့အတူ ဆော်ဒီပရိုလိဂ်၊ အာရှချန်ပီယံလိဂ် Two ပြိုင်ပွဲမှာ ဆုဖလား ရယူနိုင်ဖို့ ပစ်မှတ်ထားနေပါတယ်။ 

Source: BBC

CNI Sport News

၂၀၂၅ ခုနှစ်၊ ဖေဖော်ဝါရီ ၂၃

ရီးရယ်လ်အသင်း နည်းပြဟောင်း ဇီဒန်းဟာ ၂၀၂၆ ကမ္ဘာ့ဖလားပြိုင်ပွဲ အပြီးမှာ ပြင်သစ်အသင်းကို ကိုင်တွယ်ဖို့ သဘောတူညီမှု ရခဲ့တာကြောင့် နည်းပြထိုင်ခုံမှာ ပြန်လည် ဝင်ရောက်နိုင်ဖို့ ပြင်ဆင်နေပါတယ်။ 

ဇီဒန်းဟာ ရီးရယ်လ်အသင်းကို ဒုတိယအကြိမ် ကိုင်တွယ်ပြီး ထွက်ခွာခဲ့တဲ့ ၂၀၂၁ ခုနှစ်နောက်ပိုင်း နည်းပြ လောကနဲ့ ဝေးကွာနေတာပါ။ 

အသက် ၅၃ နှစ်အရွယ်ရှိ နည်းပြဟာ ပြင်သစ် လက်ရွေးစင်အသင်းကို ကိုင်တွယ်ချင်တဲ့ သူ့ရဲ့ဆန္ဒတွေကို ဖော်ပြခဲ့ ပေမယ့် သူ့ရဲ့ အသင်းဖော်ဟောင်း ဒက်ချမ့်စ်က နိုင်ငံအသင်းကို တာဝန်ယူနေတာကြောင့် ဒီအစီအစဉ်ကို အကောင်အထည် ဖော်နိုင်ခဲ့ခြင်းမရှိတာ ဖြစ်ပါတယ်။ 

၂၀၁၂ ခုနှစ်ကတည်းက ပြင်သစ်အသင်း နည်းပြရာထူးကို ရယူထားတဲ့ ဒက်ချမ့်စ်ဟာ ၆ နှစ်အကြာမှာတော့ ကမ္ဘာ့ဖလား ချန်ပီယံဆုကို ကစားသမားတစ်ဦး အနေနဲ့ရော နည်းပြအနေနဲ့ပါ ရယူနိုင်တဲ့ ၃ ဦးမြောက်သူ ဖြစ်လာ ခဲ့တာပါ။

ဒက်ချမ့်စ်ဟာ ပြင်သစ်အသင်းကို ၂၀၂၁ ခုနှစ်မှာ နေးရှင်းလိဂ်ဖလား ရယူပေးနိုင်ခဲ့ပြီး ၂၀၂၂ ကာတာ ကမ္ဘာ့ဖလား ပြိုင်ပွဲမှာ ဗိုလ်လုပွဲ ရောက်ရှိအောင် ပို့ဆောင်ပေးနိုင်ခဲ့ပါတယ်။ 

 ဇီဒန်းကို တွေ့ရစဉ်

ဒက်ချမ့်စ်က ၂၀၂၆ ကမ္ဘာ့ဖလားပြိုင်ပွဲ အပြီးမှာ ပြင်သစ်အသင်း နည်းပြရာထူးကနေ ထွက်ခွာမယ်လို့ ၂၀၂၅ ခုနှစ်၊ ဇန်နဝါရီမှာ ကြေညာခဲ့ပါတယ်။ 

ဖာဘရီဇီယိုရိုမာနိုက ဇီဒန်းဟာ ယူရို ၂၀၂၈ ခြေစစ်ပွဲတွေ မတိုင်မီ ပြင်သစ်အသင်းကို ကိုင်တွယ်ဖို့ နှုတ်နဲ့ သဘောတူညီမှု ရရှိထားပေမယ့် တရားဝင် စာချုပ်ချုပ်ထားတာတော့ မရှိဘူးလို့ ဖော်ပြထားပါတယ်။ 

ဇီဒန်းဟာ နည်းပြဘဝမှာ ရီးရယ်လ်အသင်း တစ်သင်းတည်းကိုသာ ကိုင်တွယ်ထားပြီး လာလီဂါဖလား ၂ ကြိမ်၊ ချန်ပီယံလိဂ်ဖလား ၃ ကြိမ်နဲ့ ဆုဖလား အောင်မြင်မှု အများအပြား ရယူနိုင်ခဲ့တာပါ။

ရီးရယ်လ်အသင်းကနေ ထွက်ခွာပြီးနောက်မှာ ဇီဒန်းဟာ ယူနိုက်တက်နဲ့ ချယ်လ်ဆီး အပါအဝင် အသင်းတချို့ရဲ့ ကြိုးပမ်းမှုခံခဲ့ရပေမယ့် ငြင်းဆန်ကာ ပြင်သစ်အသင်း နည်းပြရာထူးကို စောင့်ဆိုင်းနေခဲ့တာ ဖြစ်ပါတယ်။ 

Source: Dailymail

CNI Sport News

၂၀၂၆ ခုနှစ်၊ ဖေဖော်ဝါရီ ၂၃

နော်တင်ဟမ်ဖောရက်စ်အသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ ပရီးမီးယားလိဂ်ပွဲမှာ လီဗာပူးလ်အသင်းရဲ့ စွမ်းဆောင်ရည်ဟာ ဆိုးရွားခဲ့ပေမယ့် နည်းပြ အာနီဆလော့က အသင်းဟာ သူတို့ထိုက်တန်တာထက် ပိုရခဲ့တယ် လို့ ပြောခဲ့ပါတယ်။ 

အာနီဆလော့က “ပထမပိုင်းမှာ အလွန် ညံ့ဖျင်းခဲ့ပြီး ဒါဟာ အခုအချိန်ထိ ကျနော်တို့ ကစားခဲ့တဲ့အထဲမှာ အဆိုး ရွားဆုံးပါပဲ။ ဒါပေမယ့် ဒုတိယပိုင်းမှာ ပိုကောင်းလာခဲ့ပြီး ပွဲကိုလည်း ထိန်းချုပ်မှု ပြုလုပ်နိုင်ခဲ့ပါတယ်။ ဒီပွဲမှာတော့ ကျနော်တို့ဟာ ထိုက်တန်တာထက် ပိုရခဲ့တယ်လို့ ထင်ပါတယ်။ ကျနော်တို့ အနိုင်ရတာထက် သရေက ပိုမျှတတဲ့ ရလဒ် ဖြစ်လိမ့်မယ်လို့ ထင်ကြောင်း”ပြောခဲ့ပါတယ်။ 

လီဗာပူးလ်အသင်းဟာ ဒီပွဲမှာ ကွင်းလယ်လူ မက်အလစ္စတာရဲ့ နောက်ဆုံးမိနစ် သွင်းဂိုးကြောင့် အဖိုးတန် ၃ မှတ် ရရှိခဲ့တာပါ။

မက်အလစ္စတာဟာ မိနစ် ၉၀ မှာ ၁ ဂိုး သွင်းယူခဲ့ပေမယ့် VAR ရဲ့ ပယ်ဖျက်ခြင်း ခံခဲ့ရတာကြောင့် နစ်နာခဲ့ရပေမယ့် ထပ်ဆောင်းအချိန်ပိုမှာ နောက်ထပ် သွင်းဂိုး သွင်းယူနိုင်ခဲ့တာ ဖြစ်ပါတယ်။ 

လီဗာပူးလ်အသင်းကို တွေ့ရစဉ်

လီဗာပူးလ်အသင်းနည်းပြ အာနီဆလော့က VAR ရှိနေတာကြောင့် တစ်ခုခု ဖြစ်နိုင်တယ်လို့ တွေးမိရင် အောင်ပွဲခံဖို့ ခက်ခဲတယ်လို့ ပြောခဲ့ပါတယ်။ 

ပြီးခဲ့တဲ့ ဖီနာဘာချီအသင်းနဲ့ ယူရိုပါလိဂ်ပွဲမှာ နော်တင်ဟမ်ဖောရက်စ်အသင်းကို ပထမဆုံးပွဲအဖြစ် ကိုင်တွယ်ပြီး နိုင်ပွဲရယူပေးနိုင်ခဲ့တဲ့ နည်းပြပါရဲရားဟာ လီဗာပူးလ်အသင်းနဲ့ ပရီးမီးယားလိဂ်ပွဲမှာ ရလဒ်ကောင်းရယူနိုင်ဖို့ မျှော်လင့်ခဲ့တာပါ။

ဒါပေမယ့် ရှုံးပွဲကြုံတွေ့ခဲ့တာကြောင့် အလွန်စိတ်ပျက်နေပြီး ဘောလုံးကို ဒေါသထွက်နေပေမယ့် လာမယ့်ပွဲ အတွက် အကောင်းဆုံး လုပ်နိုင်ဖို့ ပြင်ဆင်သွားရမယ်လို့ ပါရဲရားက မှတ်ချက်ပေးခဲ့ပါတယ်။ 

နိုင်ပွဲရခဲ့တဲ့ လီဗာပူးလ်အသင်းဟာ ပရီးမီးယားလိဂ် အမှတ်ပေးဇယားအဆင့် ၆ နေရာမှာ ရပ်တည်နေပြီး နော်တင်ဟမ်ဖောရက်စ်အသင်းကတော့ တန်းဆင်းဇုန်နဲ့ ၂ မှတ်အကွာ အဆင့် ၁၇ နေရာမှာ ရပ်တည်နေတာ ဖြစ်ပါတယ်။ 

Source: ESPN

CNI Sport News

၂၀၂၆ ခုနှစ်၊ ဖေဖော်ဝါရီ ၂၃

အာဆင်နယ်အသင်းဟာ မြောက်လန်ဒန် ဒါဘီပွဲစဉ်မှာ စပါးအသင်းကို ၄ ဂိုး-၁ ဂိုးနဲ့ ဂိုးပြတ် အနိုင်ရခဲ့ပြီးနောက် နည်းပြအာတီတာက အသင်းအနေနဲ့ ဒီပွဲကပုံစံကို ထပ်ခါထပ်ခါ ပြသရမယ်လို့ ပြောခဲ့ပါတယ်။ 

အာတီတာက “ကျနော်တို့ဟာ ဝုလ်ဗ်စ်အသင်းနဲ့ပွဲမှာ ဖြစ်ခဲ့တဲ့ အဖြစ်အပျက်တွေပြီးနောက် ခက်ခဲခဲ့ပြီး ဒီပွဲကို ဘယ်လို သရေကျခဲ့လဲဆိုတာကို ရှင်းပြလို့ မရပါဘူး။ ဒီခံစားရတဲ့ပုံစံက အလုပ်တစ်ခုထက်ကြီးပြီး ဒါဟာ ကျနော် တို့ရဲ့ စိတ်အားထက်သန်မှု၊ ရည်ရွယ်ချက်နဲ့ ရည်မှန်းချက်တွေပါ။ စပါးအသင်းနဲ့ပွဲမှာ ကျနော်တို့ဟာ ဘယ်လိုလဲ ဆိုတာ ပြသခဲ့ပေမယ့် ဒါကို ထပ်ခါထပ်ခါ ပြသရမှာပါ။ ရိုလာကိုစတာ စီးဖို့ဆိုတာ မဖြစ်နိုင်တဲ့အတွက် ကျနော်တို့ ဆက်သွားရမယ်”လို့ ပြောခဲ့တာပါ။ 

အာဆင်နယ်အသင်းဟာ ကြားရက်မှာ ကစားခဲ့တဲ့ ပရီးမီးယားလိဂ်ပွဲမှာ အဆင့် ၂၀ နေရာက ဝုလ်ဗ်စ်အသင်းကို ၂ ဂိုးစီ သရေကျခဲ့တာကြောင့် ဝေဖန်မှုတွေ ကြီးကြီးမားမား ခံခဲ့ရပါတယ်။

ဒါပေမယ့် အာဆင်နယ်အသင်းဟာ စပါးအသင်းနဲ့ပွဲမှာတော့ အကောင်းဆုံး စွမ်းဆောင်ရည်တွေ ပြသသွားနိုင်ခဲ့ပြီး ဂိုးပြတ် အနိုင်ရခဲ့တာပါ။ 

ဒီပွဲမှာ အာဆင်နယ်အသင်းအတွက် ဂိုးတွေကို ယိုကီရက်စ်နဲ့ အီဇီတို့က ၂ ဂိုးစီ သွင်းယူခဲ့တာ ဖြစ်ပါတယ်။ 

အာဆင်နယ်အသင်းဟာ ဒီနိုင်ပွဲကြောင့် အဆင့် ၂ နေရာက မန်စီးတီးအသင်းထက် ၁ ပွဲ ပိုကစားထားပြီး ရမှတ် ၅ မှတ်အသာနဲ့ ပရီးမီးယားလိဂ် အမှတ်ပေးဇယား ထိပ်ဆုံးနေရာမှာ ရပ်တည်နေတာပါ။

စပါးနဲ့အာဆင်နယ် ယှဉ်ပြိုင်နေကြစဉ်

စပါးအသင်းဟာ ဒီရှုံးပွဲကြောင့် ပရီးမီးယားလိဂ်မှာ ၉ ပွဲဆက် နိုင်ပွဲပျောက်ဆုံးနေပြီး တန်းဆင်းဇုန်အဆင့် ၁၈ နေရာက ဝက်စ်ဟမ်းအသင်းနဲ့ ၄ မှတ်အကွာ အဆင့် ၁၆ နေရာမှာ ရပ်တည်နေပါတယ်။ 

စပါးအသင်းနည်းပြ တူဒေါက အသင်းနှစ်သင်းကြားမှာ အလွန်ကြီးမားတဲ့ ကွာဟချက်ရှိနေပြီး ကိုယ့်ကိုယ်ကို မှန်ထဲကြည့်ကာ အကျင့်တွေကို ပြောင်းလဲအောင် လုပ်ရမယ်လို့ ပြောခဲ့ပါတယ်။ 

ဒါ့ပြင် တူဒေါက အသင်းရဲ့ စိတ်အားထက်သန်မှုတွေကို မြင်တွေ့ခဲ့ရတဲ့အတွက် ဒီပုံစံအတိုင်း ဆက်ကြိုးစားကာ နိုင်ပွဲတွေ ရှာဖွေရမယ်လို့ ပြောခဲ့တာပါ။ 

စပါးအသင်းဟာ လာမယ့် ပရီးမီးယားလိဂ်ပွဲအဖြစ် ဖူလ်ဟမ်အသင်းနဲ့ ယှဉ်ပြိုင်ရမှာဖြစ်ပြီး အာဆင်နယ်အသင်း ကတော့ ချယ်လ်ဆီးအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: Dailymail

CNI Sport News

၂၀၂၆ ခုနှစ်၊ ဖေဖော်ဝါရီ ၂၁

စကော့တလန် ကွင်းလယ်လူ တိုမီနေးဟာ ပရီးမီးယားလိဂ်ထံ ပြန်လာဖွယ်ရှိတယ်လို့ ထင်ကြေး သတင်းတွေ ထွက်နေပေမယ့် နာပိုလီအသင်းအတွက် အပြည့်အဝ အာရုံစိုက်ထားတယ်လို့ ပြောခဲ့ပါတယ်။ 

တိုမီနေးက “ကျနော့်ရဲ့ အေးဂျင့်က ကျနော့် အနာဂတ်နဲ့ပတ်သက်ပြီး ဘယ်သူ့ကိုမှ ဆက်သွယ်ခြင်း မရှိပါဘူး။ သူဟာ ကျနော်ရယ်၊ ကလပ်အသင်းနဲ့ပဲ စကားပြောပါတယ်။ ကျနော် ဒီမှာ အလွန်ပျော်ရွှင်နေသလို ကျနော်ဟာ နာပိုလီ ကစားသမား ဖြစ်တယ်ဆိုတာပဲ ကျနော် တွေးနေတာပါ။ အနာဂတ်က အလွန်အရေးကြီးပြီး နာပိုလီမှာ ကျနော် အချိန်အကြာကြီး ရှိနေနိုင်ဆိုတာ မြင်ယောင်မိတယ်”လို့ Il Corriere dello Sport ကိုပြောခဲ့တာပါ။ 

၂၀၂၄ ခုနှစ် နွေရာသီမှာ ယူနိုက်တက်အသင်းကနေ ထွက်ခွာခဲ့တဲ့ တိုမီနေးဟာ မနှစ်ကရာသီက နာပိုလီအသင်း စီးရီးအေ ချန်ပီယံဆု ရယူနိုင်ခဲ့တာမှာ အဓိက အခန်းကဏ္ဍကနေ ပါဝင်ခဲ့တာဖြစ်ပါတယ်။

တိုမီနေးကိုတွေ့ရစဉ်

နာပိုလီအသင်းမှာ ပြသနေတဲ့ ခြေစွမ်းတွေကြောင့် အသင်းဟောင်း ယူနိုက်တက်အသင်း အပါအဝင် ပရီးမီးယား လိဂ် ကလပ်အများအပြားက သူ့ကို လာမယ့်နွေရာသီမှာ ခေါ်ယူဖို့ စိတ်ဝင်စားနေကြတာပါ။ 

ဒါပေမယ့် အသက် ၂၉ နှစ်အရွယ်ရှိ တိုမီနေးက သူဟာ နာပိုလီအသင်းအတွက်ပဲ အာရုံစိုက်နေပြီး နေပယ်လ်စ်မှာ နေထိုင်ရတာကို နှစ်သက်သလို သူ့မိသားစုဟာ ဒီမှာကောင်းမွန်စွာ အခြေချ နေထိုင်နေကြတယ်လို့ ပြောခဲ့ပါ တယ်။ 

နာပိုလီအသင်း ဒါရိုက်တာ ဂျီယန်မာရီယိုလီက တိုမီနေး အင်္ဂလန်ထံ ပြန်သွားမှာကို စိုးရိမ်မိကြောင်း ဝန်ခံခဲ့ ပေမယ့် သူဟာ ထိပ်တန်းအသင်း တစ်သင်းထံ ပြောင်းရွှေ့ဖို့ ထိုက်တန်တယ်လို့ ပြောခဲ့ပါတယ်။ 

နာပိုလီအသင်းဟာ ဒီရာသီမှာ ရလဒ်တွေ မကောင်းဖြစ်နေပေမယ့် တိုမီနေးကတော့ ခြေစွမ်းကောင်းတွေ ပြသနေဆဲဖြစ်ပြီး ဒီရာသီအသင်းအတွက် ပြိုင်ပွဲစုံ ၃၄ ပွဲ ကစားထားတာမှာ ၁၀ ဂိုး သွင်းယူထားပါတယ်။ 

Source: Goal