CNI Sport News
၂၀၂၆ ခုနှစ်၊ မေလ ၂၀
အင်တာမီလန်အသင်းခေါင်းဆောင် လော်တာရိုမာတီနက်ဇ်က အသင်းမှာ ကစားသမားဘဝအနားယူဖို့ ဆန္ဒ ရှိကြောင်း ဖွင့်ဟပြီး သူ့ရဲ့ရေရှည်အနာဂတ်ကို ပြောခဲ့ပါတယ်။
လော်တာရိုမာတီနက်ဇ်က “ကျနော် ဒီကလပ်မှာပဲ အနားယူချင်ပါတယ်။ တခြားနေရာတစ်ခုခုမှာ ကိုယ့်ကို ကိုယ်မြင်ယောင်ကြည့်ဖို့က ခက်ပါတယ်။ ဘောလုံးမှာ ဘယ်တော့မှမသိနိုင်ပေမယ့် သူတို့ကသာ ကျနော်ကို မထွက်ခွာခိုင်းရင် ဒီမှာဆက်ရှိမှာပါ။ အနားယူပြီးရင်တော့ ဘောလုံးမှာဆက်မနေချင်တော့ပါဘူး၊ဒါက ကျနော် နှစ်သက်တဲ့ ပတ်ဝန်းကျင်မျိုး မဟုတ်ဘူး” လို့ La Gazzetta dello Sport နဲ့ အင်တာဗျူးမှာ ပြောခဲ့တာပါ။
အာဂျင်တီးနားတိုက်စစ်မှူးဟာ ဘာစီလိုနာအသင်းရဲ့ချိတ်ဆက်မှုတွေခံနေရပေမယ့် အင်တာမီလန်အသင်းမှာ အနားယူချင်နေတာ ဖြစ်ပါတယ်။
၂၀၁၈ ခုနှစ်မှာ ရေးဆင်းအသင်းကနေ ရောက်ရှိလာခဲ့တဲ့ လော်တာရိုမာတီနက်ဇ် ဟာ အင်တာမီလန်အသင်းမှာ အလွန်အရေးပါတဲ့သူအဖြစ်ရှိနေခဲ့ပြီး ပွဲပေါင်း ၃၇၅ ပွဲကစားထားတာမှာ ၁၇၅ ဂိုး သွင်းယူထားတာပါ။
အာဂျင်တီးနားအသင်းနဲ့ ၂၀၂၂ ကမ္ဘာ့ဖလားချန်ပီယံဆုရရှိခဲ့တဲ့ လော်တာရိုမာတီနက်ဇ်ဟာ သူ့ကိုခေါ်ယူဖို့ စုံစမ်း မေးမြန်းမှုတွေရှိနေပေမယ့် သူကတော့ အင်တာမီလန်အသင်းနဲ့ နက်ရှိုင်းတဲ့ဆက်ဆံရေးကို အတည်ပြုခဲ့ပါတယ်။
လော်တာရိုမာတီနက်ဇ်ဟာ ဒီရာသီမှာ အင်တာမီလန်အသင်းနဲ့ စီးရီးအေ၊ ကိုပါအီတာလီယာဖလားတို့ကို ရယူ နိုင်ခဲ့ပြီး စီးရီးအေ ၂၉ ပွဲမှာ ၁၇ ဂိုးသွင်းကာ ဂိုးဖန်တီးမှု ၆ ကြိမ်ပြုလုပ်ထားတာပါ။
အင်တာမီလန်အသင်းနဲ့ ၂၀၂၉ ခုနှစ်၊ ဇွန်လအထိ စာချုပ်သက်တမ်းရှိနေတဲ့ လော်တာရိုမာတီနက်ဇ်ဟာ ဒီရာသီ ကုန်ဆုံးပြီးရင် ကမ္ဘာ့ဖလားပြိုင်ပွဲအတွက် ပြင်ဆင်မှုတွေပြုလုပ်ဖို့ အာဂျင်တီးနားအသင်းနဲ့ သွားရောက်ပူးပေါင်းမှာ ဖြစ်ပါတယ်။
Source:Goal
