CNI Sport News

၂၀၂၅ ခုနှစ်၊ ဒီဇင်ဘာ ၂၂

ဘိုင်ယန်မြူးနစ်အသင်းတိုက်စစ်မှူးဟာရီကိန်းက ဘွန်ဒက်လီဂါမှာ သွင်းဂိုးပါဝင်ပတ်သက်မှု ၁၀၀ အမြန်ဆုံးပြည့်တဲ့ ကစားသမားဖြစ်လာပြီးနောက် ဒီစံချိန်သစ်အတွက် အလွန်ဂုဏ်ယူတယ်လို့ ပြောခဲ့ပါတယ်။ 

ဟာရီကိန်းက “နှစ်တစ်နှစ်ကို အကောင်းဆုံးအဆုံးသတ်နိုင်ခဲ့ပါပြီ။ ကောင်းမွန်တဲ့စွမ်းဆောင်ရည်နဲ့ အကောင်းဆုံးဦးဆောင်နိုင်ခဲ့ပြီး ဘွန်ဒက်လီဂါမှာ သွင်းဂိုးပါဝင်ပတ်သက်မှု ၁၀၀ ပြည့်ခဲ့တဲ့အတွက် အလွန်ဂုဏ်ယူပါတယ်။ ဆောင်းရာသီအားလပ်ရက်မှာ အကောင်းဆုံးဖြစ်အောင်လုပ်ပြီး ၂၀၂၆ ခုနှစ်ကို ပြန်လည်စတင်မယ်”လို့ သူ့ရဲ့ ဆိုရှယ်မီဒီယာမှာ ရေးသားခဲ့ပါတယ်။ 

ဘိုင်ယန်မြူးနစ်အသင်းက ဟိုင်ဒန်ဟိမ်းအသင်းကို ၄ ဂိုး-ဂိုးမရှိနဲ့ အနိုင်ရခဲ့တဲ့ပွဲမှာ ၁ ဂိုးသွင်းခဲ့တဲ့ ဟာရီကိန်းဟာ ဒီရာသီပြိုင်ပွဲစုံသွင်းဂိုး ၃၀ သွင်းယူထားပြီး ဒီအထဲမှာ ဘွန်ဒက်လီဂါသွင်းဂိုးက ၁၉ ဂိုးပါဝင်ပါတယ်။ 

ဒီသွင်းဂိုးကြောင့် ဟာရီကိန်းဟာ ဘွန်ဒက်လီဂါပြိုင်ပွဲမှာ သွင်းဂိုးပါဝင်ပတ်သက်မှု ၁၀၀ အမြန်ဆုံးပြည့်တဲ့ ကစားသမားအဖြစ် စံချိန်သစ်တင်နိုင်ခဲ့ပါတယ်။ 

ဟာရီကိန်းကို တွေ့ရစဉ်

ဟာရီကိန်းဟာ ဘွန်ဒက်လီဂါမှာ ပွဲပေါင်း ၇၈ ပွဲသာကစားရသေးပေမယ့် ၈၁ ဂိုးသွင်းပြီး ၁၉ ဂိုးဖန်တီးထားတာပါ။ 

အဲ့ဒါကြောင့် ဟာရီကိန်းဟာ နယ်သာလန်ဂန္ထဝင်အာဂျန်ရော်ဘင်တင်ရှိထားတဲ့ ဂိုးပါဝင်ပတ်သက်မှု ၁၀၀ ပြည့်မြောက်ဖို့ လိဂ် ၁၁၉ ပွဲကစားခဲ့ရတဲ့ စံချိန်ကို ကျော်ဖြတ်နိုင်ခဲ့ပါတယ်။ 

စပါးအသင်းကနေ ရောက်ရှိလာခဲ့တဲ့ ၂၀၂၃ ခုနှစ်နွေရာသီကတည်းက ဘွန်ဒက်လီဂါမှာ စံချိန်သစ်အများအပြားရရှိထားတဲ့ ဟာရီကိန်းဟာ ဘိုင်ယန်မြူးနစ်အသင်းအတွက် ၁၂၁ ပွဲကစားထားပြီး ၁၁၅ ဂိုးသွင်းယူထားပါတယ်။

ဘိုင်ယန်မြူးနစ်အသင်းဟာ ဒီရာသီဘွန်ဒက်လီဂါပြိုင်ပွဲ ၁၅ ပွဲကစားအပြီးမှာ ရမှတ် ၄၁ မှတ်နဲ့ အဆင့် ၁ နေရာရပ်တည်နေပြီး အဆင့် ၂ နေရာက ဒေါ့မွန်အသင်းကို ၉ မှတ်ဖြတ်ထားတာပါ။ 

ဘိုင်ယန်မြူးနစ်အသင်းဟာ လာမယ့်ဇန်နဝါရီ ၁၁ ရက်မှသာ ဘွန်ဒက်လီဂါပွဲစဉ်ပြန်ပြီးယှဉ်ပြိုင်ကစားရမှာ ဖြစ်ပါတယ်။ 

CNI Sport News

၂၀၂၅ ခုနှစ်၊ ဒီဇင်ဘာ ၂၀

၂၀၂၃ ခုနှစ်က အာဖရိကဖလားပြိုင်ပွဲမှာ အိုင်ဗရီကို့စ်အသင်း ချန်ပီယံဖြစ်အောင် သွင်းဂိုးတွေနဲ့ ကူညီပေးနိုင်ခဲ့တဲ့ တိုက်စစ်မှူး ဟော်လာဟာ ဒဏ်ရာကြောင့် အခုနှစ်ပြိုင်ပွဲကို လွဲချော်ခဲ့ပါတယ်။

ဟော်လာဟာ ပြီးခဲ့တဲ့အပတ်က နယ်သာလန်လိဂ် ပွဲစဉ်မှာ အူထရက်ချ်အသင်းအတွက် ပါဝင်ကစားရင်း ကြွက်သားဒဏ်ရာ ရရှိခဲ့တာပါ။

အဲ့ဒါကြောင့် သူဟာ စပိန်နိုင်ငံ၊ မာဘယ်လာမှာ ပြုလုပ်နေတဲ့ အိုင်ဗရီကို့စ်အသင်းရဲ့ လေ့ကျင့်ရေးစခန်းမှာ ကုသမှုခံယူခဲ့ရပါတယ်။ 

ဒါပေမယ့် ဟော်လာရဲ့ ဒဏ်ရာက သက်သာမှု မရှိတဲ့အတွက် အာဖရိကဖလားပြိုင်ပွဲကို လွဲချော်မယ်လို့ အိုင်ဗရီကို့စ် ဘောလုံးအဖွဲ့ချုပ်က ပြောခဲ့ပါတယ်။ 

အိုင်ဗရီကို့စ်အသင်းဟာ ဟော်လာရဲ့ နေရာမှာ အသက် ၂၄ နှစ်အရွယ်ရှိ အက်စတွန်ဗီလာအသင်း တိုက်စစ်မှူး အီဗန်ဂူဆန်ကို ခေါ်ယူခဲ့ပါတယ်။ 

ဟော်လာကို တွေ့ရစဉ်

ဟော်လာဟာ ကင်ဆာရောဂါကနေ ပြန်လည်ကောင်းမွန်ကာ သူ့ရဲ့ ကစားသမားဘဝကို ပြန်စတင်နိုင်ခဲ့ပြီးနောက် လွန်ခဲ့တဲ့ ၂ နှစ်က အိုင်ဗရီကို့စ်အသင်းရဲ့ အောင်မြင်မှုမှာ အဓိကအခန်းကဏ္ဍကနေ ပါဝင်ခဲ့တာပါ။ 

ဟော်လာဟာ ၂၀၂၃ အာဖရိကဖလားပြိုင်ပွဲရဲ့ ဆီမီးဖိုင်နယ်နဲ့ ဗိုလ်လုပွဲမှာ အသင်းအတွက် အဖိုးတန်အနိုင်ဂိုး သွင်းယူပေးနိုင်ခဲ့တာဖြစ်ပါတယ်။

ချန်ပီယံဆုကို ကာကွယ်ရမယ့် အိုင်ဗရီကို့စ်အသင်းဟာ ၂၀၂၅ အာဖရိကဖလားပြိုင်ပွဲရဲ့ အုပ်စု F မှာ ကင်မရွန်း၊ ဂါဘွန်၊ မိုဇမ်ဘစ်အသင်းတို့နဲ့ တစ်အုပ်စုတည်း ကျရောက်နေပြီး အဖွင့်ပွဲစဉ်အဖြစ် ဒီဇင်ဘာ ၂၄ ရက်မှာ မိုဇမ်ဘစ်အသင်းနဲ့ ယှဉ်ပြိုင်ရမှာဖြစ်ပါတယ်။ 

Source: CNA

CNI Sport News

၂၀၂၅ ခုနှစ်၊ ဒီဇင်ဘာ ၂၀

အေစီမီလန်အသင်းဟာ လာမယ့်ဆောင်းရာသီ အပြောင်းအရွှေ့မှာ ဘရာဇီးလ်နောက်ခံလူ သီယာဂိုဆေးလ်ဗားကို အသင်းထံ ပြန်လည်ခေါ်ယူဖို့ ပစ်မှတ်ထားနေတယ်လို့ ESPN ဘရာဇီးလ်က ဖော်ပြထားပါတယ်။ 

အသက် ၄၁ နှစ်အရွယ်ရှိ သီယာဂိုဆေးလ်ဗားဟာ ၆ လကျန်ရှိနေတဲ့ ဖလူမီနက်စ်အသင်းနဲ့ စာချုပ်ကို ဖျက်သိမ်း ပြီးနောက် လက်ရှိအချိန်မှာ အသင်းလက်မဲ့ ဖြစ်နေပါတယ်။

ဝါရင့်နောက်ခံလူ တစ်ဦးဖြစ်တဲ့ သီယာဂိုဆေးလ်ဗားဟာ ကစားသမားဘဝကနေ အနားယူဖို့ အစီအစဉ် မရှိသေး သလို ၂၀၂၆ ကမ္ဘာ့ဖလားပြိုင်ပွဲမှာ ဘရာဇီးလ်အသင်း လူစာရင်းထဲ ပါဝင်နိုင်ဖို့ မျှော်လင့်ချက်ကို စွန့်လွှတ်ဦးမှာ မဟုတ်ဘူးလို့ ပြောထားပါတယ်။ 

သီယာဂိုဆေးလ်ဗားဟာ ၂၀၂၂ ခုနှစ်ကတည်းက ဘရာဇီးလ်အသင်းအတွက် ပါဝင်ကစားရခြင်း မရှိတော့တာပါ။ 

ဘရာဇီးလ်အသင်း ခေါင်းဆောင်ဟောင်းဟာ သူ့ရဲ့ အနာဂတ်နဲ့ ပတ်သက်တဲ့ ဆုံးဖြတ်ချက်ကို မကြာမီမှာ ချမှတ် သွားဖို့ ရှိနေပါတယ်။

သီယာဂိုဆေးလ်ဗားကို တွေ့ရစဉ်

သီယာဂိုဆေးလ်ဗားဟာ သူ့ရဲ့ မိသားစုနဲ့ နီးကပ်စွာ နေချင်တာကြောင့် ဥရောပထံ ပြန်ချင်နေပြီး သူ့ရဲ့ မိသားစုဟာ လန်ဒန်မှာ ရှိနေတဲ့အတွက် အင်္ဂလန်ထံ ပြန်လာဖို့က သူ့ရဲ့ ဦးစားပေးရွေးချယ်မှု ဖြစ်နိုင်ပါတယ်။ 

သီယာဂိုဆေးလ်ဗားရဲ့ သားနှစ်ဦးဟာ ချယ်လ်ဆီး လူငယ်အသင်းတွေမှာ ကစားနေပြီး အကြီးဆုံးသားဖြစ်သူ အသက် ၁၇ နှစ်အရွယ်ရှိ အီဆာဂိုဟာ မကြာသေးမီကမှ ချယ်လ်ဆီးအသင်းနဲ့ သူ့ရဲ့ ပထမဆုံး ပရော်ဖက်ရှင်နယ် စာချုပ်ကို ချုပ်ဆိုခဲ့တာပါ။

သီယာဂိုဆေးလ်ဗားဟာ သူအလွန်နှစ်သက်ခဲ့တဲ့ အေစီမီလန်အသင်းထံ ပြန်လာဖို့လည်း အလေးအနက်ထား စဉ်းစားနေပါတယ်။ 

သီယာဂိုဆေးလ်ဗားဟာ ၂၀၁၂ ခုနှစ်က PSG အသင်းထံ မပြောင်းရွှေ့မီ အေစီမီလန်အသင်းမှာ ၃ ရာသီကြာ ကစားခဲ့ပြီး စီးရီးအေဖလားနဲ့ အီတလီစူပါဖလား ၁ ကြိမ်စီ ရရှိခဲ့တာဖြစ်ပါတယ်။

Source: ESPN

CNI Sport News

၂၀၂၅ ခုနှစ်၊ ဒီဇင်ဘာ ၂၀

ပေါ်တူဂီလူမျိုးနည်းပြ အာမိုရင်က ယူနိုက်တက်အသင်းဟာ ဂန္ထဝင်နည်းပြကြီး ဆာအဲလက်စ်ဖာဂူဆန် ခန့်မှန်း ထားတာထက် ပိုစောပြီး ပရီးမီးယားလိဂ် ချန်ပီယံဆုကို တိုက်ပွဲဝင်နိုင်မယ်လို့ အခိုင်အမာပြောခဲ့ပါတယ်။ 

အာမိုရင်က “သူ(ဖာဂူဆန်)က ကျနော့်ထက် ဘောလုံးကို ပိုပြီးနားလည်ပါတယ်၊ အထူးသဖြင့် အင်္ဂလိပ်ဘောလုံး လောကကိုပါ။ ကျနော်တို့ဟာ လိဂ်ဖလား ရယူနိုင်ဖို့ ဒီလောက်အချိန်ကြာမှာ မဟုတ်ဘူးလို့ ကျနော်ထင်ပါတယ်။ ဘယ်မန်နေဂျာက ဒီနေရာမှာ ရှိနေမလဲဆိုတာ ကျနော် မသိပေမယ့် လာမယ့်နှစ် အနည်းငယ်အတွင်းမှာ ကျနော် တို့ဟာ ချန်ပီယံဆုကို တိုက်ပွဲဝင်နိုင်မယ်ဆိုတာ ကျနော်ယုံကြည်ပါတယ်”လို့ ပြောခဲ့တာပါ။ 

ယူနိုက်တက်အသင်းဟာ ဂန္ထဝင်နည်းပြကြီး ဖာဂူဆန် နောက်ဆုံး ကိုင်တွယ်ခဲ့တဲ့ ၂၀၁၂-၁၃ ရာသီမှာ ပရီးမီးယား လိဂ်ဖလားကို ရယူပြီးနောက်ပိုင်း အမှတ်ပေးဖလားနဲ့ ဝေးကွာနေတာဖြစ်ပါတယ်။ 

ယူနိုက်တက်အသင်းဟာ နောက်ပိုင်းနှစ်တွေမှာ ရလဒ်တွေ ကျဆင်းနေပြီး မနှစ်က ရာသီမှာဆိုရင် အဆင့် ၁၅ နေရာနဲ့ ရာသီအဆုံးသတ်ခဲ့ရတာပါ။ 

အာမိုရင်နဲ့ ဖာဂူဆန်ကို တွေ့ရစဉ်

မန်ချက်စတာကလပ်ဟာ ဒီရာသီမှာတော့ ရလဒ် အနည်းငယ် ပြန်ကောင်းနေပြီး နောက်ဆုံးကစားခဲ့တဲ့ ၁၀ ပွဲမှာ ၁ ပွဲသာ အရေးနိမ့်ခဲ့ပါတယ်။ 

ဖာဂူဆန်ဟာ မကြာသေးမီက Press Box PR နဲ့ တွေ့ဆုံချိန်မှာ ယူနိုက်တက်အသင်းဟာ ပရီးမီးယားလိဂ်ဖလားကို ပြန်လည်ရယူနိုင်ဖို့ နောက်ထပ် ၁၀ နှစ်၊ ၁၁ နှစ်လောက်ကြာနိုင်တယ်လို့ မှတ်ချက်ပေးခဲ့ပါတယ်။ 

ယူနိုက်တက်အသင်းရဲ့ လက်ရှိနည်းပြဖြစ်သူ အာမိုရင်ကတော့ ဖာဂူဆန်ရဲ့ ပြောဆိုမှုကို သဘောမတူဘဲ အသင်းဟာ လာမယ့်နှစ် အနည်းငယ်အတွင်းမှာ ချန်ပီယံဆုကို ယှဉ်ပြိုင်နိုင်မယ်ဆိုတာ ယုံကြည်မှုရှိတယ်လို့ ပြောခဲ့ပါတယ်။  

ယူနိုက်တက်အသင်းဟာ တနင်္ဂနွေနေ့မှာ ပရီးမီးယားလိဂ်ပွဲစဉ်အဖြစ် နိုင်ပွဲဆက်နေတဲ့ အက်စတွန်ဗီလာအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: Metro

CNI Sport News

၂၀၂၅ ခုနှစ်၊ ဒီဇင်ဘာ ၂၀

ချယ်လ်ဆီးအသင်းနည်းပြ မာရက်စ်ကာက သူဟာ မန်စီးတီးအသင်းမှာ နည်းပြဂွာဒီယိုလာရဲ့ နေရာ အစားထိုး ဝင်ရောက်နိုင်တယ်ဆိုတဲ့ သတင်းတွေကို ငြင်းဆန်ခဲ့ပြီး ဒါတွေက ၁၀၀ ရာခိုင်နှုန်း ထင်ကြေးတွေ ဖြစ်တယ်လို့ ပြောခဲ့ပါတယ်။ 

မာရက်စ်ကာက “ဒီသတင်းတွေဟာ ကျနော့်ကို သက်ရောက်မှု မရှိသလို ၁၀၀ ရာခိုင်နှုန်း ထင်ကြေးတွေပါ။ ဒီလို အရာတွေအတွက် အချိန်မရှိသလို ကျနော့်ရဲ့ စာချုပ်က ၂၀၂၉ အထိရှိနေပါတယ်။ ကျနော့်ရဲ့ အာရုံစူးစိုက်မှုက ဒီကလပ်အတွက်ဖြစ်ပြီး ဒီမှာရှိနေရတာကို အလွန်ဂုဏ်ယူပါတယ်။ ထွက်ပေါ်နေတဲ့ သတင်းတွေက ကျနော့်ရဲ့ အလုပ်မဟုတ်သလို ဂရုလည်းစိုက်သွားမှာ မဟုတ်ပါဘူး” လို့ ပြောခဲ့ပါတယ်။

မန်စီးတီးအသင်းဟာ ဒီရာသီကုန်မှာ နည်းပြဂွာဒီယိုလာ အသင်းကနေ ထွက်ခွာခဲ့ရင် မာရက်စ်ကာကို နည်းပြသစ် အဖြစ် ခန့်အပ်ဖို့ ပစ်မှတ်ထားနေတယ်လို့ ပြီးခဲ့တဲ့ရက်ပိုင်းက ထွက်ပေါ်ခဲ့တဲ့ သတင်းတွေမှာ ဖော်ပြထားပါတယ်။

မာရက်စ်ကာဟာ ၂၀၂၃ ခုနှစ်က လက်စတာအသင်းကို ကိုင်တွယ်ဖို့ မထွက်ခွာမီ မန်စီးတီးအသင်းမှာ ယူ-၂၃ အသင်းနည်းပြအဖြစ် ဆောင်ရွက်ခဲ့သလို အသင်းကြီးမှာလည်း နည်းပြဂွာဒီယိုလာရဲ့ လက်အောက်မှာ လက်ထောက်နည်းပြအဖြစ် တာဝန်ယူခဲ့ပါတယ်။ 

မာရက်စ်ကာကို တွေ့ရစဉ်  

မာရက်စ်ကာဟာ ပြီးခဲ့တဲ့ရက်ပိုင်းက ချယ်လ်ဆီးအသင်း နည်းပြဘဝမှာ အဆိုးရွားဆုံး ၄၈ နာရီ ခံစားခဲ့ရကြောင်း ပြောကြားခဲ့ပြီးနောက် ရက်ပိုင်းအကြာမှာ မန်စီးတီးအသင်းနဲ့ သတင်းတွေ ထွက်ပေါ်လာခဲ့တာပါ။ 

မာရက်စ်ကာကတော့ ဒီသတင်းတွေကို ငြင်းဆန်ခဲ့ပြီး သူနဲ့ ချယ်လ်ဆီးအသင်းတို့ရဲ့ စာချုပ်ဟာ ၂၀၂၉ ခုနှစ်အထိ ရှိတယ်လို့ ပြောခဲ့ပါတယ်။ 

မန်စီးတီးအသင်းနဲ့ ၂၀၂၇ ခုနှစ်အထိ စာချုပ်ရှိနေတဲ့ ဂွာဒီယိုလာကလည်း အသင်းနဲ့သူ့အကြားမှာ ဘာဆွေးနွေးမှုမှ မရှိထားဘူးလို့ ပြောခဲ့တာပါ။

ဒါ့ပြင် ဂွာဒီယိုလာက မန်စီးတီးအသင်းဟာ သူထွက်ခွာမှုနဲ့ သူ့ရဲ့နေရာမှာ ဆက်ခံမယ့်သူအတွက် စီစဉ်ဖို့ ပြင်ဆင် ရမယ်လို့ ပြောခဲ့ပါတယ်။ 

Source: ESPN

CNI Sport News

၂၀၂၅ ခုနှစ်၊ ဒီဇင်ဘာ ၁၈

အမေရိကန်သမ္မတ ဒေါ်နယ်ထရမ့်ဟာ နှစ်နိုင်ငံအပေါ် ခရီးသွားလာခွင့် ပိတ်ပင်မှုအသစ်အတွက် ကြေညာချက်ကို လက်မှတ်ရေးထိုးခဲ့တာကြောင့် ဆီနီဂေါနဲ့ အိုင်ဗရီကို့စ်အသင်း ပရိသတ်တွေဟာ ၂၀၂၆ ကမ္ဘာ့ဖလားပြိုင်ပွဲအတွင်း အမေရိကန်နိုင်ငံထံ ဝင်ရောက်ခွင့် ပိတ်ပင်ခံရနိုင်ပါတယ်။ 

အာဖရိက ၂ နိုင်ငံဟာ ၂၀၂၆ ကမ္ဘာ့ဖလားပြိုင်ပွဲရဲ့ အုပ်စု I နဲ့ အုပ်စု E မှာ ကျရောက်နေပေမယ့် ဒီနိုင်ငံက ပရိသတ် တွေဟာ အမေရိကန်မြေပေါ်မှာ ကျင်းပမယ့် ပွဲစဉ်တွေကို ကြည့်ရှုခွင့် ဆုံးရှုံးနိုင်တာပါ။

ပြီးခဲ့တဲ့ အင်္ဂါနေ့မှာ ထရမ့်အစိုးရဟာ ဆီနီဂေါနဲ့ အိုင်ဗရီကို့စ် နိုင်ငံသားတွေအပေါ် ခရီးသွားလာမှု တစ်စိတ်တစ်ပိုင်း ပိတ်ပင်မှုကို ထုတ်ပြန်ခဲ့ပြီး နိုင်ငံအတွင်းထံ ဝင်ရောက်မှုကို ရပ်ဆိုင်းခဲ့ပါတယ်။ 

ဒါဟာ ၂၀၂၆ ကမ္ဘာ့ဖလားပြိုင်ပွဲ ယှဉ်ပြိုင်ခွင့်ရရှိထားတဲ့ အီရန်နဲ့ဟေတီနိုင်ငံက လာမယ့်သူတွေအပေါ် ချမှတ်ထား တဲ့ ခရီးသွားလာမှု ကန့်သတ်ချက်တွေရဲ့ နောက်ဆက်တွဲ ဖြစ်ပါတယ်။ 

ဒီတားမြစ်ချက်တွေကြောင့် အဆိုပါ နိုင်ငံတွေက ရွှေ့ပြောင်း နေထိုင်သူတွေ ဒါမှမဟုတ် ရွှေ့ပြောင်းနေထိုင်တဲ့ သူတွေ မဟုတ်တဲ့ သူတွေလည်း အမေရိကန်နိုင်ငံထံ ဝင်ရောက်ခွင့်ရမှာ မဟုတ်ပါဘူး။ 

ကမ္ဘာ့ဖလားနဲ့ အမေရိကန်သမ္မတ ဒေါ်နယ်ထရမ့်ကို တွေ့ရစဉ် 

ဒီပိတ်ပင်မှုဟာ ခရီးသွားတွေ အပေါ်မှာ သက်ရောက်မှုရှိမှာ ဖြစ်ပေမယ့် ဘောလုံးသမားတွေ၊ သူတို့ကို အားပေးတဲ့ သူတွေနဲ့ မိသားစုတွေကတော့ ကင်းလွတ်ခွင့်ရရှိမှာပါ။

ဆီနီဂေါအသင်းဟာ ၂၀၂၆ ကမ္ဘာ့ဖလားပြိုင်ပွဲမှာ ၂၀၁၈ ချန်ပီယံပြင်သစ်၊ ဟာလန်းရဲ့ နော်ဝေအသင်း၊ playoff ပွဲစဉ်မှာ အနိုင်ရတဲ့ အသင်းတို့နဲ့အုပ်စု I မှာ ကျရောက်နေပါတယ်။

ဆီနီဂေါအသင်းရဲ့ ပွဲစဉ် ၂ ပွဲကို အမေရိကန်ရှိ MetLife အားကစားကွင်းမှာ ကျင်းပသွားမှာဖြစ်ပြီး နောက်တစ်ပွဲကို ကနေဒါနိုင်ငံမှာ ကျင်းပမှာဖြစ်လို့ ပရိသတ်တွေ တက်ရောက်ကြည့်ရှုနိုင်မှာပါ။

အိုင်ဗရီကို့စ်အသင်းဟာ အုပ်စု E မှာ ဂျာမနီ၊ ကူရာဆော၊ အီကွေဒေါ အသင်းတို့နဲ့ တစ်အုပ်စုတည်း ကျရောက်နေ ပြီး ဂျာမနီအသင်းနဲ့ ပွဲစဉ်ကို ကနေဒါနိုင်ငံမှာ ကစားမှာဖြစ်ပြီး ကျန်တဲ့ ၂ ပွဲကို အမေရိကန်မှာ ယှဉ်ပြိုင်ရမှာ ဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ ဒီဇင်ဘာ ၁၈

ဘရာဇီးလ် စူပါစတားနေမာဟာ ၂၀၂၆ ကမ္ဘာ့ဖလားပြိုင်ပွဲအထိ အသင်းမှာ ဆက်ရှိမယ့် စာချုပ် သက်တမ်းတိုးဖို့ ဆန်းတို့စ်အသင်းနဲ့ နားလည်မှု ရရှိခဲ့တယ်လို့ သတင်းတွေ ထွက်ပေါ်လာခဲ့ပါတယ်။ 

ပြီးခဲ့တဲ့ဇန်နဝါရီမှာ ငယ်ဘဝကလပ် ဆန်းတို့စ်အသင်းထံ ပြန်ရောက်ရှိလာခဲ့တဲ့ နေမာဟာ ဒီလကုန်ရင် အသင်းနဲ့ စာချုပ်သက်တမ်း ကုန်ဆုံးမှာဖြစ်လို့ အပြောင်းအရွှေ့အတွက် ချိတ်ဆက်မှုတွေ ရှိနေတာပါ။ 

ဘာစီလိုနာအသင်း ဖော်ဟောင်း မက်ဆီရဲ့ အင်တာမိုင်ယာမီအသင်း အပါအဝင် အသင်း အများအပြားဟာ နေမာ ကို အပြောင်းအရွှေ့အတွက် ချိတ်ဆက်နေကြပေမယ့် နေမာနဲ့ ဆန်းတို့စ်အသင်းတို့ဟာ စာချုပ်သက်တမ်းတိုးဖို့ ဆွေးနွေးမှုတွေ ပြုလုပ်နေကြတာ ဖြစ်ပါတယ်။ 

ဆန်းတို့စ်အသင်းမှာ ဆက်ကစားဖို့က နေမာရဲ့ အမြဲတမ်း ဦးစားပေးဖြစ်ပြီး အခုအချိန်မှာ ၂၀၂၆ ကမ္ဘာ့ဖလားပြိုင်ပွဲ အထိ အသင်းမှာ ဆက်ရှိဖို့ အဆင်သင့်ဖြစ်နေပြီလို့ ESPN သတင်းမှာ ဖော်ပြထားပါတယ်။

ဆန်းတို့စ်အသင်းကို ဘရာဇီးလ် စီးရီးအေမှာ ဆက်ပြီးရှိနေအောင် ကူညီပေးနိုင်ခဲ့တဲ့ နေမာဟာ သူ့ရဲ့ လက်ရှိ စာချုပ်ကို ၆ လ သက်တမ်းတိုးဖို့ မျှော်လင့်ထားတာ ဖြစ်ပါတယ်။

နေမာကို တွေ့ရစဉ်

နေမာဟာ ပြီးခဲ့တဲ့ရာသီမှာ ဆန်းတို့စ်အသင်းအတွက် ပွဲပေါင်း ၃၀ ပါဝင်ကစားခဲ့ပြီး ၁၂ ဂိုးသွင်းယူကာ ၆ ဂိုး ဖန်တီး ခဲ့တာပါ။ 

လက်ရှိအချိန်မှာ အနားယူမှု ပြုလုပ်နေတဲ့ နေမာဟာ ဒူးခွဲစိတ်မှု ခံယူဖို့ရှိနေပြီး တစ်လကြာ အနားယူရနိုင်တာ ဖြစ်ပါတယ်။ 

နေမာဟာ ၂ နှစ်ကျော်ကြာ ဝေးကွာနေတဲ့ ဘရာဇီးလ် လက်ရွေးစင် အသင်းအတွက် ပြန်ပါဝင်ကစားပြီး ၂၀၂၆ ကမ္ဘာ့ဖလားပြိုင်ပွဲမှာ ပါဝင်နိုင်ဖို့ ပစ်မှတ်ထားနေပါတယ်။ 

၂၀၂၆ ကမ္ဘာ့ဖလားပြိုင်ပွဲဟာ သူ့ရဲ့ နောက်ဆုံး ကမ္ဘာ့ဖလားပြိုင်ပွဲဖြစ်ဖို့ ရှိနေတဲ့အတွက် နေမာဟာ ဘရာဇီးလ် အသင်းကို အောင်မြင်မှု ရယူပေးပြီး လက်ရွေးစင် ကစားသမားဘဝကို အဆုံးသတ်ချင်နေပါတယ်။ 

ဘရာဇီးလ်အသင်းနည်းပြ အန်ဆယ်လော့တီက နေမာဟာ ကောင်းမွန်စွာ ကစားပြီး အခြားသူထက် ပိုကောင်း တယ်ဆိုရင် ၂၀၂၆ ကမ္ဘာ့ဖလားပြိုင်ပွဲမှာ အသင်းလူစာရင်းထဲ ပါဝင်မယ်လို့ ပြောထားတာဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဒီဇင်ဘာ ၁၈

PSG အသင်းက ဖလာမင်ဂိုအသင်းကို အနိုင်ရပြီး Intercontinental ဖလားရရှိခဲ့တဲ့ ဗိုလ်လုပွဲမှာ ဂိုးသမား ဆာဗိုနော့ဗ်ဟာ ပယ်နယ်တီ အဆုံးအဖြတ်မှာ ဖလာမင်ဂိုအသင်းရဲ့ ပယ်နယ်တီ ၄ လုံး ဆက်တိုက် ကာကွယ်ပြီး PSG အသင်းကို ချန်ပီယံဖြစ်စေခဲ့ပါတယ်။ 

ပွဲချိန်အတွင်းမှာ ၁ ဂိုးစီ သရေကျခဲ့တာကြောင့် အချိန်ပို ဆက်ကစားခဲ့ရပြီး အချိန်ပိုမှာလည်း ဂိုးမသွင်းနိုင်ခဲ့တဲ့ အတွက် ပယ်နယ်တီ အဆုံးအဖြတ် ခံယူခဲ့ရပါတယ်။ 

ပယ်နယ်တီမှာ ဂိုးသမားဆာဗိုနော့ဗ်ရဲ့ လက်စွမ်းပြ ကာကွယ်မှုတွေကြောင့် PSG အသင်းဟာ ဖလာမင်ဂိုအသင်း ကို ၂ ဂိုး-၁ ဂိုးနဲ့ အနိုင်ရပြီး Intercontinental ဖလားကို ပထမဆုံးအကြိမ် ရရှိခဲ့ပါတယ်။ 

Intercontinental ဖလားကို ရယူနိုင်ခဲ့တဲ့ PSG အသင်းဟာ ၂၀၂၅ ခုနှစ်ထဲမှာ ဆုဖလား ၆ ခုအထိ ပိုင်ဆိုင် နိုင်ခဲ့တာပါ။ 

Intercontinental ဖလား ပီအက်စ်ဂျီရရှိသွားစဉ်

ဖလာမင်ဂိုအသင်းဟာ မကြာသေးမီ ရက်သတ္တပတ်တွေအတွင်း ကိုပါလီဘာတေးဒိုးစ်နဲ့ ဘရာဇီးလ် ချန်ပီယံရှစ် ဖလားတွေကို ရယူနိုင်ခဲ့ပေမယ့် Intercontinental ဖလားကို လက်လွှတ်ခဲ့ရပါတယ်။

ဒီပြိုင်ပွဲရဲ့ အကောင်းဆုံး ကစားသမားဆုကို PSG အသင်း ကွင်းလယ်လူ ဗီတင်ညာက ရရှိခဲ့တာပါ။ 

ဗီတင်ညာက ဖလာမင်ဂိုအသင်းဟာ အလွန်ကောင်းမွန်တဲ့ အသင်းဖြစ်ပြီး သူတို့ကို အခက်တွေ့စေခဲ့တယ်လို့ ပြောခဲ့ပါတယ်။ 

ဒါ့ပြင် ဗီတင်ညာက သူတို့ဟာ ပွဲကိုစောစီးစွာ အနိုင်ရချင်ခဲ့ပေမယ့် ပယ်နယ်တီ အဆုံးအဖြတ်နဲ့ပဲ အနိုင်ရခဲ့တယ် လို့ ပြောခဲ့ပါတယ်။ 

ဖလာမင်ဂိုအသင်း ကွင်းလယ်လူ ဂျော်ဂျင်ဟိုက သူတို့အတွက် အံ့သြစရာကောင်းတဲ့ နှစ်တစ်နှစ်ဖြစ်ခဲ့ပြီး ဒီလိုမျိုး အဆုံးသတ်ရတာကို မလိုချင်တဲ့အတွက် အကောင်းဆုံး လုပ်နိုင်ခဲ့တာကလွဲပြီး အခြားပြောစရာစကားလုံး မရှိဘူး လို့ ပြောခဲ့တာပါ။

PSG အသင်းဟာ ၂၀၂၅ ခုနှစ်ထဲမှာ လီဂူး-၁၊ ပြင်သစ်ဖလား၊ ပြင်သစ်စူပါဖလား၊ ချန်ပီယံလိဂ်၊ ဥရောပစူပါဖလားနဲ့ Intercontinental ဖလားတို့ကို ရယူနိုင်ခဲ့ပြီး ဖီဖာကလပ် ကမ္ဘာ့ဖလားပြိုင်ပွဲမှာလည်း ဗိုလ်လုပွဲအထိ တက်နိုင်ခဲ့ ပါတယ်။ 

Source: CNA

CNI Sport News

၂၀၂၅ ခုနှစ်၊ ဒီဇင်ဘာ ၁၈

တာလာဗီရာအသင်းကို ၃ ဂိုး-၂ ဂိုးနဲ့ အနိုင်ရခဲ့တဲ့ ကိုပါဒယ်ရေးဖလားပွဲစဉ်မှာ ၂ ဂိုးသွင်းခဲ့တဲ့ ဘတ်ပီဟာ ပြက္ခဒိန် နှစ်အတွင်း ရီးရယ်လ်အသင်းအတွက် ဂိုးအများဆုံး သွင်းယူထားတဲ့ ပေါ်တူဂီအသင်းခေါင်းဆောင် ရော်နယ်လ်ဒိုရဲ့ စံချိန်ကိုလိုက်မီဖို့ ၁ ဂိုးသာ လိုအပ်တော့ပါတယ်။ 

ဒီပွဲမှာ ၂ ဂိုးသွင်းခဲ့တဲ့ ဘတ်ပီဟာ ၂၀၂၅ ခုနှစ်ထဲမှာ ရီးရယ်လ်အသင်းအတွက် ၅၈ ဂိုးအထိ သွင်းယူထားပါ။ 

ရော်နယ်လ်ဒိုဟာ ၂၀၁၃ ခုနှစ်မှာ ရီးရယ်လ်အသင်းအတွက် ၅၉ ဂိုးသွင်းယူခဲ့ပြီး ဒါက ကလပ်အသင်းရဲ့ စံချိန်ဖြစ် ခဲ့ပါတယ်။ 

အခုအချိန်မှာ ဘတ်ပီဟာ ရော်နယ်လ်ဒိုရဲ့ စံချိန်ကို လိုက်မီဖို့ ၁ ဂိုးသာ လိုတော့သလို ကျော်ဖြတ်ပြီး စံချိန်သစ် တင်နိုင်ဖို့လည်း အခွင့်အရေး ရှိလာခဲ့ပါတယ်။ 

ရီးရယ်လ်အသင်းနည်းပြ အလွန်ဆိုက “ဘတ်ပီဟာ သူ့ရဲ့ သွင်းဂိုးတွေနဲ့ အဆုံးအဖြတ် ပေးနိုင်ခဲ့ပါတယ်။ သူ့မှာ ဂိုးသွင်းနိုင်စွမ်း အမြဲတမ်းရှိပြီး သူသွင်းယူခဲ့တဲ့ တတိယဂိုးက အလွန် အရေးပါခဲ့ပါတယ်။ အဲ့ဒါကြောင့် ကျနော်တို့ သူ့ကို ကွင်းထဲမှာ ဆက်ပြီးထားခဲ့တာပါ”လို့ ဘတ်ပီကို ပွဲချိန်ပြည့် အသုံးပြုခဲ့တဲ့အပေါ် ပြောခဲ့ပါတယ်။ 

ဘတ်ပီကို တွေ့ရစဉ် 

ရီးရယ်လ်အသင်းနည်းပြ အလွန်ဆိုဟာ ဒီပွဲမှာ ပြီးခဲ့တဲ့ အလာဗတ်အသင်းနဲ့ လာလီဂါပွဲစဉ်က ပွဲထွက်လူစာရင်းကို ၁၀ ဦးအထိ ပြောင်းလဲပြီး အသုံးပြုခဲ့ကာ ဘယ်လင်ဂမ်၊ ချူအာမန်နီနဲ့ ရိုဒရီဂိုတို့ကို လူစားဝင်အဖြစ်သာ ပါဝင် ကစားစေခဲ့ပါတယ်။ 

ရီးရယ်လ်အသင်းဟာ ဒီပွဲရဲ့ ပွဲပြီးကာနီးမှာ တတိယတန်းကလပ် တာလာဗီရာအသင်းကို ချေပဂိုးတွေ ပြန်ပေးခဲ့ ရပေမယ့် အနိုင်ရလဒ်ကို ထိန်းနိုင်ခဲ့တာကြောင့် ကိုပါဒယ်ရေးဖလား ၁၆ သင်းအဆင့်ကို တက်နိုင်ခဲ့ပါတယ်။ 

ရီးရယ်လ်အသင်းဟာ ဒီနိုင်ပွဲကြောင့် ပြိုင်ပွဲစုံ ၂ ပွဲဆက် နိုင်ပွဲပြန်ရခဲ့ပေမယ့် နည်းပြအလွန်ဆိုက အသင်းဟာ တည်ငြိမ်မှုရှိဖို့ လိုအပ်ပြီး ပွဲချိန်တစ်လျှောက်လုံး တည်ငြိမ်တဲ့ စွမ်းဆောင်ရည်နဲ့ ပွဲကိုအဆုံးသတ်ကာ ပိုရင့်ကျက် လာရမယ်လို့ ပြောခဲ့ပါတယ်။

ရီးရယ်လ်အသင်းဟာ ၂၀၂၅ ခုနှစ်ထဲမှာ နောက်ဆုံးပွဲအဖြစ် ဒီဇင်ဘာ ၂၀ ရက်မှာ ဆီဗီလာအသင်းနဲ့ လာလီဂါပွဲစဉ် ယှဉ်ပြိုင်ရမှာ ဖြစ်ပါတယ်။ 

Source: ESPN