CNI Sport News

၂၀၂၅ ခုနှစ်၊ မေလ ၁၅

ရီးရယ်လ်အသင်းက မာယော့ကာအသင်းကို ၂ ဂိုး-၁ ဂိုးနဲ့ အနိုင်ရခဲ့တဲ့ လာလီဂါပွဲစဉ်မှာ ၁ ဂိုးသွင်းယူခဲ့တဲ့ တိုက်စစ်မှူးဘတ်ပီဟာ အသင်းအတွက် ပွဲဦးထွက်ရာသီမှာ ပြိုင်ပွဲစုံသွင်းဂိုး ၄၀ ပြည့်သွားခဲ့ပါတယ်။

အဲဒါကြောင့် ဘတ်ပီဟာ ပွဲဦးထွက်ရာသီမှာ သွင်းဂိုး ၄၀ သွင်းယူနိုင်တဲ့ ပထမဆုံး ရီးရယ်လ်အသင်း ကစားသမား အဖြစ်လည်း စံချိန်တင်နိုင်ခဲ့တာပါ။

ဒါအပြင် ဘတ်ပီဟာ ကလပ်အသင်းဂန္ထဝင် ဒီစတီဖာနို တင်ရှိထားတဲ့ လွန်ခဲ့တဲ့ ၇၁ နှစ်က စံချိန်တစ်ခုကိုလည်း ကျော်ဖြတ်နိုင်ခဲ့ပါတယ်။ 

ဒီစတီဖာနိုဟာ ရီးရယ်လ်အသင်းအတွက် ပွဲဦးထွက်ရာသီမှာ လာလီဂါသွင်းဂိုး ၂၇ ဂိုး သွင်းယူခဲ့တာကို ဘတ်ပီက ၁ ဂိုးအသာ သွင်းဂိုး ၂၈ ဂိုးနဲ့ ကျော်ဖြတ်နိုင်ခဲ့တာပါ။ 

ဘတ်ပီဟာ ပွဲဦးထွက်ရာသီမှာ ရီးရယ်လ်အသင်းအတွက် လာလီဂါသွင်းဂိုး အများဆုံး သွင်းယူနိုင်တဲ့သူအဖြစ် စံချိန်သစ် တင်နိုင်ခဲ့တာဖြစ်ပါတယ်။

ပြင်သစ်အသင်း ခေါင်းဆောင်ဟာ ဘာစီလိုနာအသင်းကို အရေးနိမ့်ခဲ့တဲ့ လာလီဂါပွဲစဉ်မှာ အသင်းအတွက် ဟက်ထရစ် ဂိုးသွင်းယူပြီးနောက် ဇာမိုရာနိုရဲ့ ၃၂ နှစ်ကြာစံချိန်ကို ချိုးဖျက်ပြီး ပွဲဦးထွက်ရာသီမှာ ရီးရယ်လ် အသင်းရဲ့ ဂိုးသွင်းအများဆုံး ကစားသမားဖြစ်လာခဲ့တာပါ။

ဘတ်ပီကို တွေ့ရစဉ် 

ရီးရယ်လ်အသင်းဟာ မာယော့ကာအသင်းကို ရာမွန်ရဲ့ နောက်ကျသွင်းဂိုးနဲ့ အနိုင်ရရှိခဲ့တာကြောင့် ဘာစီလိုနာ အသင်းကို လာလီဂါချန်ပီယံအဖြစ် အောင်ပွဲခံခွင့် စောင့်ဆိုင်းစေခဲ့ပါတယ်။

ဒါပေမယ့် ဘာစီလိုနာအသင်းဟာ အက်စ်ပန်ညိုအသင်းနဲ့ပွဲစဉ်မှာ အနိုင်ရခဲ့ရင် ဒီရာသီလာလီဂါ ချန်ပီယံအဖြစ် အောင်ပွဲခံလို့ရပြီ ဖြစ်ပါတယ်။

ရီးရယ်လ်အသင်းဟာ မာယော့ကာအသင်းနဲ့ ပွဲစဉ်မတိုင်မီမှာ ကစားသမား ၁၂ ဦးအထိ ဒဏ်ရာရရှိနေပေမယ့် အနိုင်ရလဒ်ရရှိအောင် ကစားနိုင်ခဲ့တာပါ။

ရီးရယ်လ်အသင်းနည်းပြ အန်ဆယ်လော့တီက လာလီဂါချန်ပီယံဆုအတွက် ပြိုင်ဆိုင်မှုဟာ ဘာမဆို ဖြစ်သွား နိုင်သေးတဲ့ အတွက် သူတို့ဆက်ပြီး တိုက်ပွဲဝင်နေမှာ ဖြစ်တယ်လို့ ပွဲအပြီးမှာ ပြောခဲ့ပါတယ်။ 

ရီးရယ်လ်အသင်းဟာ လာမယ့် လာလီဂါပွဲစဉ်အဖြစ် မေလ ၁၈ ရက်မှာ ဆီဗီလာအသင်း အိမ်ကွင်း သွားရောက် ယှဉ်ပြိုင်ရမှာ ဖြစ်ပါတယ်။ 

Source: talksport

CNI Sport News

၂၀၂၅ ခုနှစ်၊ မေလ ၁၄

နွေရာသီမှာ ဆော်ဒီပရိုလိဂ်ကလပ် အယ်လ်အာလီအသင်းကနေ ထွက်ခွာမယ့် လီဗာပူးလ်အသင်း ကစားသမား ဟောင်း ဖာမီနိုဟာ မွေးရပ်မြေဖြစ်တဲ့ ဘရာဇီးလ်ထံ ပြန်ဖို့ဆန္ဒရှိနေတာ ဖြစ်ပါတယ်။ 

ဖာမီနိုဟာ အယ်လ်အာလီအသင်းကို အာရှချန်ပီယံလိဂ်ပြိုင်ပွဲမှာ ချန်ပီယံဆုရရှိအောင် ကူညီပေးနိုင်ခဲ့ပေမယ့် ဆော်ဒီပရိုလိဂ် ဒုတိယရာသီဝက်မှာ သူ့ကိုအသင်းလူစာရင်းထဲ ထည့်မသွင်းခဲ့တာကြောင့် အနာဂတ်နဲ့ပတ်သက်တဲ့ သတင်းတွေ အများအပြား ထွက်ပေါ်ခဲ့တာပါ။ 

ဖာမီနိုနဲ့ အယ်လ်အာလီအသင်းတို့ရဲ့ စာချုပ်ဟာ တစ်နှစ်သာ ကျန်ရှိတော့တာဖြစ်ပါတယ်။ 

အယ်လ်အာလီအသင်း အကြီးအကဲက အသင်းမှာ ၂ နှစ်ကြာရှိခဲ့တဲ့ ဖာမီနိုကို နွေရာသီမှာ ထွက်ခွာခွင့်ပြုဖို့ သဘောတူညီမှု ရရှိထားတယ်လို့ ဆော်ဒီမီဒီယာကို ပြောထားတာပါ။

ဖာမီနိုဟာ ဆော်ဒီပရိုလိဂ်မှာ မျှော်မှန်းထားတဲ့အတိုင်း အောင်မြင်မှု မရခဲ့ပေမယ့် အာရှချန်ပီယံလိဂ် အောင်မြင်မှု မှာ အရေးပါခဲ့တာ ဖြစ်ပါတယ်။ 

ဖာမီနိုဟာ အာရှချန်ပီယံလိဂ် ဗိုလ်လုပွဲမှာ ဂိုးဖန်တီးမှု ၂ ကြိမ် ပြုလုပ်နိုင်ခဲ့တာ အပါအဝင် ဒီပြိုင်ပွဲမှာ အာရှချန်ပီယံအသင်းအတွက် ၆ ဂိုးသွင်းပြီး ဂိုးဖန်တီးမှု ၇ ကြိမ်ပြုလုပ်ခဲ့တာပါ။

ဖာမီနိုကို တွေ့ရစဉ်

ဖာမီနိုဟာ အယ်လ်အာလီအသင်းအတွက် ကစားခဲ့တဲ့ နှစ်ရာသီမှာ ပြိုင်ပွဲစုံ ၆၅ ပွဲ ပါဝင်ကစားခဲ့ပြီး ၂၁ ဂိုး သွင်းယူ နိုင်ခဲ့ပါတယ်။

ဖာမီနိုဟာ လက်ရှိအချိန်မှာ အသင်းသစ်ကို ရှာဖွေနေပြီး ဘရာဇီးလ်ထံ ပြန်သွားဖို့ ဆန္ဒပြင်းပြနေတဲ့ သူ့ကို ဖလာမင်ဂိုအသင်းက ခေါ်ယူဖို့ ပစ်မှတ်ထားနေတာပါ။

အသက် ၃၃ နှစ်အရွယ်ရှိ ဖာမီနိုဟာ ဘရာဇီးလ်ကလပ် ဖီဂူရန်ဆီအသင်းမှာ ကစားသမားဘဝ စတင်ခဲ့ပြီး ဂျာမန် ကလပ် ဟော်ဖန်ဟိမ်းအသင်းထံ ပြောင်းရွှေ့ခဲ့ပါတယ်။ 

ဘရာဇီးလ် ကစားသမားဟာ ဟော်ဖန်ဟိမ်းအသင်းမှာ ၂၀၁၁ ကနေ ၂၀၁၅ ခုနှစ်အထိ ကစားခဲ့ပြီးနောက် လီဗာပူးလ်အသင်းထံ ပြောင်းရွှေ့ခဲ့တာပါ။

ဖာမီနိုဟာ လီဗာပူးလ်အသင်းမှာ ၈ ရာသီကြာ ကစားခဲ့ပြီး ပရီးမီးယားလိဂ်၊ ချန်ပီယံလိဂ် အပါအဝင် ဆုဖလား ၇ ခု ရယူနိုင်ခဲ့တာဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ မေလ ၁၄

မာဆေးလ်အသင်းဟာ ပွဲဦးထွက်ရာသီမှာ ခြေစွမ်းပြသနေတဲ့ တိုက်စစ်မှူး ဂရင်းဝုဒ်အတွက် နွေရာသီမှာ ကမ်းလှမ်းမှုတွေကို နားထောင်သွားဖို့ ဆန္ဒရှိနေတယ်လို့ ပြင်သစ်သတင်းတွေမှာ ဖော်ပြထားပါတယ်။

အသက် ၂၃ နှစ်အရွယ်ရှိ ဂရင်းဝုဒ်ဟာ ဒီရာသီမှာ မာဆေးလ်အသင်းအတွက် ပြိုင်ပွဲစုံသွင်းဂိုး ၂၀ သွင်းယူထား တာပါ။ 

ဂရင်းဝုဒ်ဟာ လီဂူး-၁ ပြိုင်ပွဲမှာ ၁၉ ဂိုး သွင်းယူထားပြီး သူ့ထက်ဂိုး ပိုသွင်းယူထားတဲ့သူအဖြစ် PSG အသင်း တောင်ပံကစားသမား ဒမ်ဘီလီက ၂၁ ဂိုးနဲ့ ဂိုးသွင်း အများဆုံး ကစားသမားအဖြစ် ရပ်တည်နေတာ ဖြစ်ပါတယ်။ 

မာဆေးလ်အသင်းဟာ ဂရင်းဝုဒ်ရဲ့ သွင်းဂိုးတွေနဲ့အတူ လာမယ့်ရာသီ ချန်ပီယံလိဂ်ပြိုင်ပွဲ ယှဉ်ပြိုင်ရဖို့ သေချာ သွားခဲ့တာပါ။ 

ဂရင်းဝုဒ်ဟာ မာဆေးလ်အသင်းအတွက် သွင်းဂိုးတွေ သွင်းယူထားပေမယ့် သူ့ရဲ့လုပ်အားနှုန်းနဲ့ပတ်သက်ပြီး နည်းပြရဲ့ဝေဖန်မှုအပြင် ပရိသတ်တွေရဲ့ လှောင်ပြောင်မှုကိုလည်း ခံခဲ့ရတာဖြစ်ပါတယ်။ 

RMC Sport က မာဆေးလ်အသင်းဟာ ဂရင်းဝုဒ်ကို ရောင်းချချင်နေပြီး သူ့အတွက် ကမ်းလှမ်းမယ့် ကမ်းလှမ်း မှုတွေကို စဉ်းစားသွားမယ်လို့ ဖော်ပြထားတာပါ။

ပြီးခဲ့တဲ့အပတ်က ဂရင်းဝုဒ်ကို ခေါ်ယူဖို့ ပရီးမီးယားလိဂ်အသင်း ၂ သင်းက စိတ်ဝင်စားနေတယ်လို့ The Telegraph က ဖော်ပြခဲ့တာဖြစ်ပါတယ်။ 

ဂရင်းဝုဒ်ကို တွေ့ရစဉ်

ဂရင်းဝုဒ်ကလည်း သူ့ရဲ့မပြီးပြတ်ခဲ့တဲ့ ပရီးမီးယားလိဂ် ကစားသမားဘဝကို တစ်ချိန်ချိန်မှာ ပြန်သွားဖို့ အစီအစဉ်ရှိ နေတာပါ။

ဂရင်းဝုဒ်ဟာ မုဒိမ်းမှု အပါအဝင် စွဲချက်အများအပြားကြောင့် အသက် ၆ နှစ် အရွယ်ကတည်းက ရှိခဲ့တဲ့ ယူနိုက်တက်အသင်းကနေ ထွက်ခွာပြီး နွေရာသီမှာ မာဆေးလ်အသင်းထံ အပြီးသတ်ပြောင်းရွှေ့လာခဲ့တာ ဖြစ်ပါတယ်။

ဂရင်းဝုဒ်ဟာ ယူနိုက်တက်အသင်းကြီးအတွက် ၁၂၉ ပွဲ ကစားခဲ့ပြီး ၃၅ ဂိုး သွင်းယူနိုင်ခဲ့ကာ မာဆေးလ်အသင်းထံ အပြီးသတ် မပြောင်းရွှေ့မီ ဂီတာဖေးအသင်းမှာ ရာသီကုန်အထိ အငှားကစားခဲ့တာပါ။ 

ယူနိုက်တက်အသင်းဟာ ဂရင်းဝုဒ်ကို မာဆေးလ်အသင်းကနေ ပြန်လည်ခေါ်ယူခွင့်ရှိပေမယ့် ကန့်ကွက်မှုတွေ ကြောင့် ပြန်လည်ခေါ်ယူဖွယ် မရှိဘူးလို့ သိရပါတယ်။ 

မာဆေးလ်အသင်းဟာ ဒီရာသီ လီဂူး-၁ ပွဲစဉ် နောက်ဆုံးပွဲစဉ်အဖြစ် ရန်းနက်စ်အသင်းနဲ့ ယှဉ်ပြိုင်ရမှာဖြစ်ပြီး အမှတ်ပေးဇယားအဆင့် ၂ နေရာနဲ့ ရာသီအဆုံးသတ်နိုင်အောင် အနိုင်ရယူဖို့ လိုအပ်နေတာဖြစ်ပါတယ်။

Source: Dailymail

CNI Sport News

၂၀၂၅ ခုနှစ်၊ မေလ ၁၄

ဆန်းဒါးလန်းအသင်းဟာ ချန်ပီယံရှစ်ပလေး‌အော့ဖ် ဆီမီးဖိုင်နယ်ပွဲစဉ်မှာ ကိုဗင်ထရီအသင်းကို နှစ်ကျော့ပေါင်း ရလဒ် ၃ ဂိုး-၂ ဂိုးနဲ့ အနိုင်ယူပြီး ပရီးမီးယားလိဂ်ကို တန်းတက်ဖို့အတွက် ယှဉ်ပြိုင်ရမယ့် ပလေးအော့ဖ် ဗိုလ်လုပွဲကို တက်သွားခဲ့ပြီဖြစ်ပါတယ်။ 

ဆန်းဒါးလန်းအသင်းဟာ ဆီမီးဖိုင်နယ် ဒုတိယအကျော့ပွဲစဉ်မှာ ကိုဗင်ထရီအသင်းကို ၁ ဂိုး-ဂိုးမရှိနဲ့ အရေးနိမ့် ခဲ့တာပါ။ 

ဒါပေမယ့် ဆန်းဒါးလန်းအသင်းဟာ ပထမအကျော့ပွဲစဉ်က ကိုဗင်ထရီအသင်းကို ၂ ဂိုး-၁ ဂိုးနဲ့ အနိုင်ရခဲ့တာကြောင့် နှစ်ကျော့ပေါင်းရလဒ် ၂ ဂိုးစီ သရေကျနေခဲ့လို့ အချိန်ပိုဆက်ပြီး ယှဉ်ပြိုင်ခဲ့ရတာ ဖြစ်ပါတယ်။ 

အချိန်ပို နောက်ဆုံးမိနစ်မှာ ဘောလက်က ဆန်းဒါးလန်းအသင်းအတွက် အဖိုးတန် အနိုင်ဂိုး သွင်းယူပြီး အသင်းကို ပလေးအော့ဖ် ဗိုလ်လုပွဲတက်စေခဲ့တာပါ။

ဆန်းဒါးလန်းအသင်းအတွက် အနိုင်ဂိုး သွင်းယူခဲ့တဲ့ ဘောလက်က ဘာတွေဖြစ်ခဲ့လဲဆိုတာကို သူမမှတ်မိတော့ဘဲ မယုံနိုင်စရာကောင်းတဲ့ ခံစားချက်ဖြစ်ပြီး ပရိသတ်တွေရဲ့ အားပေးမှုတွေကလည်း မယုံနိုင်လောက်အောင်ပါပဲလို့ ပွဲအပြီးမှာ ပြောခဲ့ပါတယ်။ 

လမ်းပတ်ကိုတွေ့ရစဉ်

ကိုဗင်ထရီအသင်းကို ချန်ပီယံရှစ်ပလေးအော့ဖ် ဆီမီးဖိုင်နယ်အထိ ရောက်ရှိအောင် ကိုင်တွယ်ပေးနိုင်ခဲ့တဲ့ လမ်းပတ်က သူတို့ဟာ ပိုကောင်းတဲ့ အသင်းဖြစ်ခဲ့ပေမယ့် ဗိုလ်လုပွဲတက်နိုင်ခဲ့တဲ့ ဆန်းဒါးလန်းအသင်းကို ဂုဏ်ပြုပေးခဲ့တာပါ။

ချယ်လ်ဆီးနဲ့ အဲဗာတန်အသင်း နည်းပြဟောင်း လမ်းပတ်ဟာ ကိုဗင်ထရီအသင်းကို စတင်ကိုင်တွယ်ချိန်က အသင်းဟာ အမှတ်ပေးဇယားအဆင့် ၁၇ နေရာမှာ ရပ်တည်နေပေမယ့် သူကိုင်တွယ်ပြီးနောက်မှာ အဆင့် ၅ နေရာနဲ့ ရာသီအဆုံးသတ်ကာ ပလေးအော့ဖ် ယှဉ်ပြိုင်ခွင့်ရခဲ့တာ ဖြစ်ပါတယ်။ 

ဆန်းဒါးလန်းအသင်းကတော့ ၂၀၁၇ ခုနှစ်နောက်ပိုင်း ပထမဆုံးအကြိမ် ပရီးမီးယားလိဂ်ကို တန်းပြန်တက်နိုင်ဖို့ မျှော်လင့်နေတာပါ။ 

ဆန်းဒါးလန်းအသင်းဟာ ချန်ပီယံရှစ် ပလေးအော့ဖ် ဗိုလ်လုပွဲအဖြစ် ရှက်ဖီးယူနိုက်တက်အသင်းနဲ့ မေလ ၂၄ ရက် ဝင်ဘာလေကွင်းမှာ ယှဉ်ပြိုင်သွားမှာဖြစ်ပါတယ်။ 

Source: BBC

CNI Sport News

၂၀၂၅ ခုနှစ်၊ မေလ ၁၄

ယူနိုက်တက်အသင်းနည်းပြ အာမိုရင်ဟာ စပါးအသင်းနဲ့ ယှဉ်ပြိုင်မယ့် ယူရိုပါလိဂ်ဗိုလ်လုပွဲကို ကြည့်ရှုနိုင်ဖို့ အတွက် သူ့ရဲ့နောက်ကွယ်မှာရှိတဲ့ ဝန်ထမ်း ၃၀ ဦးနဲ့ သူတို့ရဲ့မိသားစုတွေအတွက် လက်မှတ်ခကို ပေးချေ ခဲ့ပါတယ်။ 

ယူနိုက်တက်အသင်းဟာ ဝတ်စုံစီစဉ်သူ အပါအဝင် နည်းပြတွေ၊ ပံ့ပိုးမှုတွေ ပြုလုပ်မယ့် ဝန်ထမ်းတွေရဲ့ မိသားစု တွေနဲ့ သူငယ်ချင်းတွေအတွက် အခမဲ့ လက်မှတ်ပေးသွားဖို့ မရှိတာပါ။

ယူရိုပါလိဂ်ဗိုလ်လုပွဲ ယှဉ်ပြိုင်မယ့် ယူနိုက်တက်နဲ့ စပါးအသင်းတို့ဟာ လက်မှတ်ခွဲတမ်း ၁၅,၀၀၀ ရရှိထားတာ ဖြစ်ပါတယ်။ 

စပါးအသင်းဟာ သူတို့ရဲ့ အချိန်ပြည့် ဝန်ထမ်းတွေအတွက် အခမဲ့လက်မှတ် တစ်စောင်စီ ပေးသွားမှာ ဖြစ်ပေမယ့် ယူနိုက်တက်အသင်းကတော့ ဝန်ထမ်းတွေအတွက် အရေအတွက် အနည်းငယ်သာ ဖယ်ထားခဲ့တာပါ။

ESPN က ယူနိုက်တက်နည်းပြတွေ၊ အားကစားကုထုံး ပညာရှင်တွေနဲ့ ပံ့ပိုးကူညီမှုတွေ ပြုလုပ်မယ့်အဖွဲ့တွေကို အသင်းက ကိုယ်ပိုင် လက်မှတ်ဝယ်ယူဖို့ ပြောထားတယ်လို့ ဖော်ပြထားပါတယ်။ 

ယူနိုက်တက်နဲ့စပါးအသင်း ယှဉ်ပြိုင်နေစဉ်

အဲဒါကြောင့် နည်းပြအာမိုရင်က သူတို့တွေရဲ့ လက်မှတ်ခတွေကို ပေးချေခဲ့တာပါ။ 

ယူနိုက်တက်အသင်းဟာ သူတို့ခွဲတမ်းရရှိထားတဲ့ လက်မှတ်တွေကို ပရိသတ်တွေကို ရောင်းချနိုင်ဖို့ကိုသာ ဦးစားပေး လုပ်ဆောင်နေတာ ဖြစ်ပါတယ်။

ယူနိုက်တက်အသင်းဟာ ကစားသမား တစ်ဦးစီကိုလည်း လက်မှတ် ၂ စောင်စီသာ ပေးထားပြီး သူတို့ရဲ့ မိသားစု တွေနဲ့ မိတ်ဆွေတွေကို လက်မှတ်ဝယ်ယူချင်ရင် ရောင်းချမယ်လို့ ပြောထားတာပါ။

ယူနိုက်တက်အသင်းနည်းပြ အာမိုရင်ဟာ သူ့ရဲ့နောက်ကွယ်က ဝန်ထမ်းတွေရဲ့ မိသားစု ဒါမှမဟုတ် သူငယ်ချင်း တွေ လိုက်ပါနိုင်မယ့် လက်မှတ် ၂ စောင်ခကို ပေးသွားမှာဖြစ်ပြီး သူလက်မှတ်ခစိုက်ပေးခဲ့တဲ့ သူတွေထဲမှာ လစာ နည်းပါးတဲ့ ဝန်ထမ်းတွေလည်း ပါဝင်နေတာ ဖြစ်ပါတယ်။ 

ယူနိုက်တက်အသင်းဟာ ပူးတွဲပိုင်ရှင် ဆာဂျင်ရက်ကလစ်ဖ် အသင်းကို ရောက်ရှိလာပြီးကတည်းက ဝန်ထမ်း အများအပြား လျှော့ချတာ အပါအဝင် ကုန်ကျစရိတ်တွေကို သက်သာအောင် ပြုလုပ်နေတာပါ။

ယူနိုက်တက်အသင်းဟာ ယူရိုပါလိဂ် ဗိုလ်လုပွဲမှာ အနိုင်ရခဲ့ရင် အဖိုးဖွင့် ဘတ်စ်ကားနဲ့ လှည့်ပတ်အောင်ပွဲခံမှာ မဟုတ်ဘဲ ကာရင်တန် လေ့ကျင့်ရေးကွင်းမှာသာ အကင်စုံကျွေးပြီး အောင်ပွဲခံဖို့ စီစဉ်ထားတာဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ မေလ ၁၃

ပိုလန်ဂိုးသမား ဆက်ဇနီက ဘာစီလိုနာအသင်းဟာ သူ့ကို ၂ နှစ် စာချုပ်သက်တမ်းတိုးဖို့ ကမ်းလှမ်းထားပေမယ့် မိသားစုနဲ့တိုင်ပင်ပြီးမှ ဆုံးဖြတ်ချက်ချမယ်လို့ ပြောခဲ့ပါတယ်။

ဆက်ဇနီက “ဘာစီလိုနာအသင်းရဲ့ ၂ နှစ် စာချုပ်သက်တမ်းတိုးဖို့ ကမ်းလှမ်းမှုကို ကျနော်ရရှိထားပါတယ်။ ဒါပေမယ့် ကျနော်ဟာ မိသားစုနဲ့ တိုင်ပင်ဆွေးနွေးပြီးမှ ဆုံးဖြတ်ချက်ချမှာပါ။ ဒါက ကျနော်တို့အတွက် အကောင်းဆုံးပါပဲ”လို့ ပြောခဲ့တာပါ။ 

ဆက်ဇနီဟာ ပြီးခဲ့တဲ့နွေရာသီက ဂျူဗင်တပ်စ်အသင်းကနေ ထွက်ခွာပြီးနောက် ဘောလုံးကစားသမားဘဝကနေ အနားယူခဲ့တာ ဖြစ်ပါတယ်။ 

ဒါပေမယ့် ဘာစီလိုနာအသင်းဟာ ဂိုးသမားစတီဂန်ရဲ့ ဒဏ်ရာကြောင့် ဂိုးသမား အခက်အခဲဖြစ်မှုကို ဖြေရှင်းဖို့ အနားယူခဲ့တဲ့ ဆက်ဇနီကို ဆက်သွယ်မှုပြုလုပ်ခဲ့တာပါ။ 

အဲဒါကြောင့် ဆက်ဇနီဟာ အနားယူတဲ့ ဆုံးဖြတ်ချက်ကို ပြန်ပြောင်းပြီး ဘာစီလိုနာအသင်းထံ ရာသီကုန်အထိ စာချုပ်ချုပ်ကာ ပြောင်းရွှေ့လာခဲ့တာဖြစ်ပါတယ်။ 

ဆက်ဇနီကို တွေ့ရစဉ်

ဆက်ဇနီဟာ ဘာစီလိုနာအသင်းအတွက် ၂၉ ပွဲ ပါဝင်ကစားထားပြီး ၁၃ ပွဲ ပေးဂိုးမပေးရအောင် လက်စွမ်းပြသကာ စပိန်စူပါဖလားနဲ့ ကိုပါဒယ်ရေးဖလားကို ရရှိထားတာပါ။ 

ဘာစီလိုနာအသင်းဟာ အဓိကဂိုးသမား စတီဂန် ဒဏ်ရာကနေ သက်သာပြီး ပွဲတွေ ပြန်ကစားနေပြီဖြစ်ပေမယ့် ဆက်ဇနီကို အသင်းမှာ ဆက်ထိန်းထားချင်တဲ့အတွက် စာချုပ်သက်တမ်းတိုးဖို့ ကမ်းလှမ်းမှုပြုလုပ်ခဲ့တာ ဖြစ်ပါတယ်။ 

ဆက်ဇနီကတော့ မိသားစုနဲ့တိုင်ပင်ပြီးမှ ဆုံးဖြတ်ချက် ချမယ်လို့ ပြောခဲ့တာပါ။ 

ဘာစီလိုနာအသင်းဟာ ကြားရက်ထဲမှာ ကစားမယ့် အက်စ်ပန်ညို အသင်းနဲ့ပွဲစဉ်မှာ အနိုင်ရရင် လာလီဂါ ချန်ပီယံ အဖြစ် အောင်ပွဲခံလို့ရပြီဖြစ်ပါတယ်။ 

Source: besoccer

CNI Sport News

၂၀၂၅ ခုနှစ်၊ မေလ ၁၃

ဘရာဇီးလ် လက်ရွေးစင်အသင်း နည်းပြသစ် ဖြစ်လာခဲ့တဲ့ အန်ဆယ်လော့တီဟာ ယူနိုက်တက်အသင်း ကွင်းလယ်လူ ကတ်စီမီရိုကို နိုင်ငံအသင်း လူစာရင်းထဲ ပြန်လည်ခေါ်ယူဖွယ် ရှိနေပါတယ်။ 

အသက် ၃၃ နှစ်အရွယ်ရှိ ကတ်စီမီရိုဟာ ၂၀၂၃ ခုနှစ်၊ မတ်လက ဘရာဇီးလ်အသင်း ခေါင်းဆောင်အဖြစ် ခန့်အပ် ခြင်းခံခဲ့ရပေမယ့် ယူနိုက်တက်အသင်းမှာ ဆိုးရွားတဲ့ပုံစံတွေကြောင့် ၂၀၂၄ ကိုပါအမေရိက ဖလားပြိုင်ပွဲမှာ လူစာရင်းကနေ ချန်လှပ်ခံခဲ့ရတာပါ။ 

ကတ်စီမီရိုဟာ ဘရာဇီးလ်အသင်းအတွက် ၂၀၂၃ ခုနှစ်၊ အောက်တိုဘာက နောက်ဆုံးပွဲစဉ်အဖြစ် ပါဝင်ကစားခဲ့ပြီး ဒီပွဲမှာ ဘရာဇီးလ်အသင်းဟာ ဥရုဂွေးအသင်းကို ၂ ဂိုး-ဂိုးမရှိနဲ့ အရေးနိမ့်ခဲ့တာဖြစ်ပါတယ်။ 

ကတ်စီမီရိုဟာ ပြီးခဲ့တဲ့ ရက်သတ္တပတ်တွေမှာ ယူနိုက်တက်အသင်းအတွက် ခြေစွမ်းပြသနိုင်ခဲ့ပြီး အသင်းကို ယူရိုပါလိဂ် ဗိုလ်လုပွဲ ရောက်ရှိအောင် ပို့ဆောင်ပေးထားတာပါ။

ကတ်စီမီရိုနဲ့ အန်ဆယ်လော့တီတို့ဟာ ရီးရယ်လ်အသင်းမှာ အတူလက်တွဲ အလုပ်လုပ်ခဲ့ချိန်က အလွန် ကောင်းမွန်တဲ့ ဆက်ဆံရေးကို ပိုင်ဆိုင်ထားတာ ဖြစ်ပါတယ်။ 

ကတ်စီမီရိုကို တွေ့ရစဉ်

အဲဒါကြောင့် အန်ဆယ်လော့တီဟာ ကတ်စီမီရိုကို ဘရာဇီးလ်အသင်း လူစာရင်းထဲ ပြန်လည်ခေါ်ယူပြီး သူ့ရဲ့ ဦးဆောင်မှုနဲ့ အတွေ့အကြုံတွေကို အဝတ်လဲခန်းထဲ ယူဆောင်လာချင်နေတာပါ။ 

ဘရာဇီးလ်အသင်းအတွက် ၂၀၁၁ ခုနှစ်မှာ ပွဲဦးထွက်ခဲ့တဲ့ ကတ်စီမီရိုဟာ ၇၅ ပွဲပါဝင်ကစားထားပြီး ၇ ဂိုးသွင်း ယူကာ ၂၀၁၉ ကိုပါအမေရိကဖလား ချန်ပီယံဆု ရယူနိုင်ခဲ့ပါတယ်။ 

ဘရာဇီးလ်အသင်းဟာ လာမယ့် ဇွန်လမှာ ၂၀၂၆ ကမ္ဘာ့ဖလားခြေစစ်ပွဲ (တောင်အမေရိကဇုန်)ပွဲတွေအဖြစ် အီကွေဒေါ၊ ပါရာဂွေးအသင်းတို့နဲ့ ယှဉ်ပြိုင်ရမှာပါ။ 

ဘရာဇီးလ်အသင်းအနေနဲ့ ဒီ ၂ ပွဲစလုံး အနိုင်ရခဲ့ရင် ၂၀၂၆ ကမ္ဘာ့ဖလားပြိုင်ပွဲကို တိုက်ရိုက် ခြေစစ်ပွဲအောင်မြင်ဖို့ နီးစပ်သွားမှာ ဖြစ်ပါတယ်။ 

ကတ်စီမီရိုဟာ လက်ရှိအချိန်မှာ ယူနိုက်တက်အသင်းနဲ့ ယူရိုပါလိဂ်ဗိုလ်လုပွဲ အပါအဝင် ဒီရာသီ ပရီးမီးယားလိဂ် လက်ကျန်ပွဲတွေအတွက် ပြင်ဆင်မှုတွေ ပြုလုပ်နေတာပါ။ 

ယူနိုက်တက်အသင်းဟာ လာမယ့် ပရီးမီးယားလိဂ် ပွဲစဉ်အဖြစ် ချယ်လ်ဆီးအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: metro

CNI Sport News

 ၂၀၂၅ ခုနှစ်၊ မေလ ၁၃

တောင်ကိုရီးယားအသင်းခေါင်းဆောင် ဆွန်ဟောင်မင်က စပါးအသင်းမှာ သူဆက်ရှိနေတဲ့ ကြီးမားတဲ့အကြောင်း ရင်းက အခြားသူတွေ မအောင်မြင်နိုင်ခဲ့တဲ့အရာကို လုပ်ချင်တာကြောင့်လို့ ဖွင့်ဟခဲ့ပါတယ်။

ဆွန်ဟောင်မင်က “ကျနော်တို့ဟာ ဒီအကြောင်းကို နှစ်အတော်ကြာအောင်ပြောနေခဲ့ပါတယ်။ စပါးအသင်းမှာ ဆက်ရှိနေတဲ့ ကြီးမားတဲ့အကြာင်းရင်းက အခြားသူတွေ မအောင်မြင်နိုင်ခဲ့တဲ့ အရာကိုလုပ်ချင်တာကြောင့်ပါ။ ပဟေဠိကို ပြီးမြောက်ဖို့ အပိုင်းအားလုံးလိုအပ်ပြီး ကျနော်တို့ဟာ အခြားအပိုင်းတွေအားလုံးကို စုစည်းပြီးပါပြီ။ အရေးကြီးဆုံးဖြစ်တဲ့ နောက်ဆုံးအပိုင်းက ပျောက်ဆုံးနေပြီး ဒါကိုရှာဖွေဖို့ လွန်ခဲ့တဲ့ ၁၀ နှစ်ကတည်းက ကြိုးစား နေတာပါ။ အခုအချိန်မှာ ဒါကိုအပြီးသတ်နိုင်ဖို့ မျှော်လင့်ပါတယ်။ ကျနော်အလွန်အနိုင်ရချင်ပြီး ကောင်းမွန်စွာ ပြင်ဆင်ရင် အောင်မြင်နိုင်မယ်လို့ ယုံကြည်ကြောင်း”The Guardian ကို ပြောခဲ့တာပါ။ 

ဒဏ်ရာကြောင့် တစ်လကျော်ကြာအနားယူခဲ့ရတဲ့ ဆွန်ဟောင်မင်ဟာ ပြီးခဲ့တဲ့ ပဲလေ့စ်အသင်းနဲ့ပွဲစဉ်မှာ စပါး အသင်းအတွက် လူစားဝင်အဖြစ် ပါဝင်ကစားနိုင်ခဲ့တာဖြစ်ပါတယ်။ 

စပါးအသင်းမှာ ၂၀၁၅ ခုနှစ်ကတည်းက ရှိနေခဲ့တဲ့ ဆွန်ဟောင်မင်ဟာ အသင်းနဲ့အတူ ကြီးကြီးမားမားအောင်မြင်မှုအဖြစ် ချန်ပီယံလိဂ်ဗိုလ်လုပွဲနဲ့ ကာရာဘောင်းလိဂ်ဖလားဗိုလ်လုပွဲကိုသာ တက်ရောက်နိုင်ခဲ့ပြီး ဆုဖလားတော့ ရယူနိုင်ခြင်းမရှိသေးပါဘူး။ 

အဲဒါကြောင့် ဆွန်ဟောင်မင်က ဒီရာသီမှာ စပါးအသင်းနဲ့ ဆုဖလားရယူပြီး ဆုဖလားမရယူနိုင်သေးတာကို အဆုံးသတ်ချင်နေပါတယ်။

စပါးအသင်းဟာ ၂၀၀၈ ခုနှစ်က လိဂ်ဖလားရယူပြီးနောက် နှစ်ပေါင်း ၁၇ နှစ်ကြာဆုဖလားနဲ့ ဝေးကွာနေတာပါ။ 

အဲဒါကြောင့် ဆွန်ဟောင်မင်က စပါးအသင်းကို ဆုဖလားရယူပေးနိုင်ဖို့ စိတ်ဆန္ဒပြင်းပြနေတာဖြစ်ပါတယ်။ 

စပါး အသင်းဟာ ဒီရာသီပရီးမီးယားလိဂ်ပြိုင်ပွဲမှာ ရလဒ်အလွန်ဆိုးရွားနေပေမယ့် ယူရိုပါလိဂ်ဗိုလ်လုပွဲမှာ အနိုင်ရပြီး ချန်ပီယံဆုရယူနိုင်ခဲ့ရင် လာမယ့်ရာသီ ချန်ပီယံလိဂ်ပြိုင်ပွဲ ယှဉ်ပြိုင်ခွင့်ရရှိမှာပါ။ 

စပါးအသင်းဟာ ယူနိုက်တက်အသင်းနဲ့ ယူရိုပါလိဂ်ဗိုလ်လုပွဲမတိုင်မီ လာမယ့်ပရီးမီးယားလိဂ်ပွဲစဉ်အဖြစ် အက်စတွန်ဗီလာအသင်းနဲ့ ယှဉ်ပြိုင်ရမှာဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ မေလ ၁၃ 

ဘရာဇီးလ်ဘောလုံးအဖွဲ့ချုပ်(CBF)ဟာ ရီးရယ်လ်အသင်းနည်းပြ အန်ဆယ်လော့တီကို ဘရာဇီးလ် လက်ရွေးစင် အသင်း နည်းပြသစ်အဖြစ် ခန့်အပ်ကြောင်း ကြေညာခဲ့ပါတယ်။ 

ရာသီကုန်မှာ ရီးရယ်လ်အသင်းက ထွက်ခွာမယ့် အန်ဆယ်လော့တီဟာ ဘရာဇီးလ်လက်ရွေးစင်အသင်းကို လာလီဂါဘောလုံးရာသီအပြီး မေလ ၂၆ ရက်မှာ တရားဝင် စတင်ကိုင်တွယ်သွားမှာပါ။ 

အန်ဆယ်လော့တီဟာ ဘရာဇီးလ်လက်ရွေးစင်အသင်းရဲ့ ပထမဆုံး နိုင်ငံခြားသားနည်းပြ အဖြစ်လည်း မှတ်တမ်း ဝင်သွားခဲ့ပါတယ်။ 

ရီးရယ်လ်အသင်းကို နှစ်ကြိမ်ကိုင်တွယ်ခဲ့တာမှာ ဆုဖလားပေါင်း ၁၅ ခု ရယူပေးနိုင်ခဲ့တဲ့ အန်ဆယ်လော့တီဟာ ပြီးခဲ့တဲ့ လာလီဂါပွဲစဉ်မှာ ဘာစီလိုနာအသင်းကို အရေးနိမ့်ပြီးနောက် ရီးရယ်လ်အသင်းကနေ ထွက်ခွာဖို့ ဖြစ်လာ ခဲ့တာပါ။  

ဘရာဇီးလ်ဘောလုံးအဖွဲ့ချုပ်(CBF)က နည်းပြသစ် အန်ဆယ်လော့တီကို နွေးထွေးစွာကြိုဆိုပြီး သူ့ရဲ့ဦးဆောင်မှု အောက်မှာ အောင်မြင်မှု ခေတ်သစ်ကို မျှော်လင့်ကြောင်း ထုတ်ပြန်ချက်ထဲမှာ ဖော်ပြထားပါတယ်။ 

ဘရာဇီးလ်အသင်းကို တွေ့ရစဉ်

ဒါအပြင် CBF က စာချုပ် ကျန်ရှိနေတဲ့ အန်ဆယ်လော့တီကို ထွက်ခွာဖို့ အဆင်ပြေအောင် ပြုလုပ်ပေးခဲ့တဲ့ ရီးရယ်လ်အသင်း အကြီးအကဲ ပီရက်ဇ်ကို ကျေးဇူးတင်ကြောင်းလည်း ပြောထားတာပါ။ 

အန်ဆယ်လော့တီနဲ့ ရီးရယ်လ်အသင်းရဲ့ စာချုပ်ဟာ ၂၀၂၆ ခုနှစ်၊ ဇွန်လအထိ သက်တမ်းရှိနေတာ ဖြစ်ပါတယ်။

အန်ဆယ်လော့တီဟာ ပြီးခဲ့တဲ့မတ်က ထုတ်ပယ်ခံခဲ့ရတဲ့ နည်းပြဟောင်း ဒိုရီဗယ်လ်ဂျူနီယာရဲ့နေရာမှာ အစားထိုး ဝင်ရောက်ပြီး ဘရာဇီးလ်အသင်းနည်းပြသစ်အဖြစ် တာဝန်ယူသွားမှာပါ။

ဘရာဇီးလ်အသင်းဟာ ၂၀၂၆ ကမ္ဘာ့ဖလားခြေစစ်ပွဲ(တောင်အမေရိကဇုန်)မှာ အမှတ်ပေးဇယားအဆင့် ၄ နေရာ ရပ်တည်နေပြီး ခြေစစ်ပွဲ တိုက်ရိုက်အောင်မြင်ဖို့ အခွင့်အရေးရှိနေတာ ဖြစ်ပါတယ်။ 

အန်ဆယ်လော့တီဟာ ဘရာဇီးလ်အသင်း နည်းပြသစ်အဖြစ် ဇွန်လထဲမှာကစားမယ့် ပါရာဂွေးနဲ့ အီကွေဒေါအသင်း တို့ ပွဲတွေကို သူ့ရဲ့ပထမဆုံးပွဲတွေအဖြစ် စတင်ကိုင်တွယ်မှာပါ။

အန်ဆယ်လော့တီဟာ သူ့ရဲ့နှစ်ပေါင်း ၃၀ ကြာ နည်းပြဘဝမှာ ရီးရယ်လ်အသင်း အပါအဝင် ဂျူဗင်တပ်စ်၊ အေစီမီလန်၊ PSG၊ ဘိုင်ယန်မြူးနစ်နဲ့ ဥရောပထိပ်တန်းအသင်းအချို့ကို ကိုင်တွယ်ကာ အောင်မြင်မှု အများအပြား ရယူနိုင်ခဲ့တာ ဖြစ်ပါတယ်။ 

Source: BBC