CNI International News
ဘန်ကောက်၊ ဖေဖော်ဝါရီ ၂၅
ထိုင်းအစိုးရသည် မြန်မာနိုင်ငံနယ်စပ်ဒေသရှိ ကျားဖြန့်လုပ်ငန်းများကို တိုက်ဖျက်နေသည့် လုပ်ဆောင်မှုများ ကြောင့် နှစ်နိုင်ငံအကြား ကုန်းလမ်းမှတဆင့် နယ်စပ်ဖြတ်ကျော် ကုန်သွယ်မှုများသည် နေရာအများစုတွင် လုံးဝနီးပါး ရပ်ဆိုင်းသွားသည့် အခြေအနေကို ဖြစ်ပေါ်စေခဲ့သည်ဟု Nikkei Asia မှ ဖော်ပြခဲ့သည်။
တရုတ်နိုင်ငံ၏ ဖိအားပေးမှုကြောင့် ထိုင်းသည် ဖေဖော်ဝါရီ ၅ ရက်မှစပြီး မြန်မာနိုင်ငံ နယ်စပ်ဒေသအချို့ကို ရောင်းချနေသည့် လျှပ်စစ်ဓာတ်အား၊ လောင်စာဆီနှင့် အင်တာနက်များကို ဖြတ်တောက်ခဲ့သည်။
ထို့ကြောင့် ထိုနယ်စပ်ဒေသများတွင် နေထိုင်သူများသည် လျှပ်စစ်ဓာတ်အားများ မရတော့ဘဲ ဒီဇယ်မီးစက်များကို အသုံးပြုခဲ့ရသည်။
ထိုင်းနယ်စပ်ရှိ ဓာတ်ဆီဆိုင် ပိုင်ရှင်တစ်ဦးဖြစ်ကမူ မြန်မာနိုင်ငံရှိ ဝယ်သူများထံမှ လောင်စာဆီ ဝယ်ယူမှုများ လျော့ကျသွားကြောင်း ပြောကြားခဲ့သည်။
မြန်မာဘက်ခြမ်းက ကျားဖြန့်စင်တာမှ နိုင်ငံခြားသားများကိုတွေ့ရစဉ်
“အရင်က မြန်မာနယ်စပ်မှာ နေတဲ့သူတွေက လောင်စာဆီတွေကို အရမ်းဝယ်ကြပါတယ်။ ဒါပေမယ့် ထိုင်းအစိုးရ က ကျားဖြန့်တွေကို နှိမ်နင်းဖို့ လောင်စာဆီ ရောင်းချမှုတွေကို ပိတ်လိုက်တဲ့အခါမှာ ကျနော်တို့ရဲ့ စျေးကွက်လည်း ကျဆင်းသွားပါတယ်” ဟု ဓာတ်ဆီဆိုင် ပိုင်ရှင်တစ်ဦးဖြစ်သည့် ပရာဆတ် ဂျူအန်ကစ်ထရွန်ရော့ဂျ် (Prasert Juangkitroongroj) ပြောသည်။
ကျားဖြန့်ဂိုဏ်းများသည် ထိုင်းနိုင်ငံမှ အခြေခံကုန်စည်များကို ရယူရန်အတွက် နယ်စပ်ဒေသကို ထိန်းချုပ်ထား သဖြင့် နှစ်နိုင်ငံ ကုန်သွယ်မှုကိုလည်း ထိခိုက်စေခဲ့သည်ဟု ထိုင်းလွှတ်တော် အမတ်တစ်ဦးဖြစ်သူ ရန်စီမန်ရိုမီ (Rangsiman Rome) က ပြောကြားခဲ့သည်။
ကျားဖြန့်ဂိုဏ်းများနှင့် နယ်စပ်ဒေသများတွင် နေထိုင်သည့် ဒေသခံများ၌ မီးစက်များ မောင်းရန်အတွက် လောင်စာဆီမှာ မလုံလောက်တော့သဖြင့် ထောက်ပံ့ရေး ကွင်းဆက်များကိုလည်း ကြီးမားစွာ သက်ရောက် စေခဲ့သည်ဟု ၎င်းက ဆိုသည်။
ထိုကဲ့သို့ ကုန်စည်စီးဆင်းမှုများ လျော့ကျလာသဖြင့် နယ်စပ်ဖြတ်ကျော် ကုန်သွယ်မှုများ ပြုလုပ်နေသည့် ရောင်းသူများနှင့် ဝယ်သူများအပေါ် မှီခိုနေရသော စီးပွားရေးလုပ်ငန်းများသည် အနည်းငယ်တန့်သွားခဲ့သည်။
ထို့ကြောင့် မြန်မာနိုင်ငံအတွင်းရှိ ကျားဖြန့်များကို နှိမ်နင်းနေသည့် ထိုင်းအစိုးရ၏ စီမံချက်များသည် ဒေသခံများ၏ စီးပွားရေးလုပ်ငန်းများနှင့် နယ်စပ်ဖြတ်ကျော် ကုန်သွယ်မှုကို မရည်ရွယ်ဘဲ ထိခိုက်စေခဲ့သည်ဟုလည်း ကျွမ်းကျင် သူများက ပြောကြားခဲ့သည်။
Source: Nikkei Asia
