CNI International News

နယူးဒေလီ၊ ဇွန် ၂၁ 

ယခုနှစ် မေလအတွင်း အိန္ဒိယ၏ ကုန်စည်ပို့ကုန်ကဏ္ဍသည် ပြီးခဲ့သည့်နှစ် မေလနှင့် နှိုင်းယှဉ်ပါက ၉ ဒသမ ၁ ရာခိုင်နှုန်း မြင့်တက်ခဲ့ပြီး အမေရိကန်ဒေါ်လာ ၃၈ ဒသမ ၁ ဘီလျံအထိ ရှိခဲ့သည်ဟု The Print သတင်း ဝက်ဘ်ဆိုက်မှ ဖော်ပြခဲ့သည်။

ထို့ပြင် ဧပြီလအတွင်းက ကုန်စည်ပို့ကုန်ကဏ္ဍ ဖွံ့ဖြိုးတိုးတက်မှုနှင့် နှိုင်းယှဉ်ပါက ၁ ဒသမ ၁ ရာခိုင်နှုန်း မြင့်တက် ခဲ့သည်ဟုလည်း စျေးကွက်ကုမ္ပဏီတစ်ခုဖြစ်သည့် CRISIL ၏ ထုတ်ပြန်ချက်တွင် ဖော်ပြခဲ့သည်။

ရေနံနှင့် ရေနံမဟုတ်သည့် ပို့ကုန်ကဏ္ဍများ၏ မောင်းနှင်အားကြောင့် ထိုကဲ့သို့ ဖွံ့ဖြိုးတိုးတက်မှုများ ရရှိခဲ့ခြင်း ဖြစ်သည်။ 

အိန္ဒိယထုတ်ကုန်ကိုတွေ့ရစဉ်

အိန္ဒိယ၏ ပို့ကုန်ကဏ္ဍ စွမ်းဆောင်ရည်သည် ကမ္ဘာ့ကုန်သွယ်ရေးအဖွဲ့ (WTO) ၏ နောက်ဆုံး ထုတ်ပြန်ခဲ့သည့် ကမ္ဘာလုံးဆိုင်ရာ ကုန်သွယ်ရေး အလားအလာနှင့် ကိုက်ညီမှုရှိပြီး ယခုနှစ်အတွင်း ကမ္ဘာလုံးဆိုင်ရာကုန်စည် ကုန်သွယ်မှုပမာဏသည် ပြန်လည်နာလန်ထူလာလိမ့်မည်ဟု WTO က ခန့်မှန်းထားသည်။

အိန္ဒိယ၏ ပို့ကုန်များသည် အမေရိကန်၊ ဥရောပနှင့် ယူအေအီး အပါအဝင် အခြားနိုင်ငံများသို့ ပိုမိုရောက်ရှိခဲ့သည်။ 

မည်သို့ပင်ဆိုစေ ကမ္ဘာလုံးဆိုင်ရာ ကုန်စည်စျေးနှုန်းများ မြင့်တက်နေမှုသည် အမေရိကန်ဒေါ်လာ အသုံးပြုရသည့် ပို့ကုန်စျေးနှုန်းများကိုလည်း အနည်းငယ် မြင့်တက်စေကြောင်း WTO က ထုတ်ပြန်ခဲ့သည်။

ပို့ကုန်ကဏ္ဍကဲ့သို့ အိန္ဒိယ၏ သွင်းကုန်ကဏ္ဍသည်လည်း မေလအတွင်း ၇ ဒသမ ၇ ရာခိုင်နှုန်း မြင့်တက်ခဲ့ပြီး ဒေါ်လာ ၆၁ ဒသမ ၂ ရာခိုင်နှုန်းရှိခဲ့ကာ ပြီးခဲ့သည့် ၇ လအတွင်း အမြင့်ဆုံး သွင်းကုန်တန်ဖိုးအဖြစ် မှတ်တမ်း ဝင်ခဲ့သည်။

မေလအတွင်းက ရေနံများ တင်သွင်းဝယ်ယူမှု တန်ဖိုးသည် ဧပြီလနှင့်နှိုင်းယှဉ်ပါက ပိုမိုမြင့်တက်ခဲ့သည်။ 

အိန္ဒိယ ပို့ကုန်ကိုတွေ့ရစဉ်

ဧပြီလအတွင်းက ရေနံစိမ်း တစ်စည်လျှင် ၉၀ ဒသမ ၁ ဒေါ်လာရှိပြီး မေလတွင် ၈၂ ဒေါ်လာ ရှိခဲ့သဖြင့် အိန္ဒိယသည် ရေနံပမာဏ အများအပြားကို ဝယ်ယူတင်သွင်းခဲ့ခြင်း ဖြစ်သည်။

အိန္ဒိယ၏ ကုန်သွယ်ရေး လိုငွေပြမှုသည် ဧပြီလက ဒေါ်လာ ၁၉ ဒသမ ၁ ဘီလျံရှိခဲ့ရာမှ မေလတွင် ဒေါ်လာ ၂၃ ဒသမ ၈ ဘီလျံအထိ ကျယ်ပြန့်ခဲ့ကာ ကုန်သွယ်ရေးလိုငွေပြမှု စုစုပေါင်းသည် ၂၂ ဒသမ ၅ ဘီလျံ ရှိခဲ့သည်ဟု CRISIL က ထုတ်ပြန်ခဲ့သည်။

ထို့ပြင် အိန္ဒိယ၏ ဝန်ဆောင်မှုလုပ်ငန်း သွင်းကုန်ကဏ္ဍသည် ဧပြီလအတွင်းက ၁၉ ဒသမ ၁ ရာခိုင်နှုန်း မြင့်တက်ခဲ့ ကာ ဒေါ်လာ ၁၆ ဒသမ ၆ ဘီလျံရှိခဲ့သည်။ 

မည်သို့ပင်ဆိုစေ ပြီးခဲ့သည့် ၃ လအတွင်း ဝန်ဆောင်မှုလုပ်ငန်း သွင်းကုန်ကဏ္ဍသည် ဒေါ်လာ ၃၀ ဘီလျံခန့် ရှိခဲ့သဖြင့် ဝန်ဆောင်မှုလုပ်ငန်း ကုန်သွယ်ရေး ပိုငွေပြမှုသည် ခိုင်မာနေဆဲဖြစ်သည်။

အိန္ဒိယ၏ ကုန်သွယ်ရေး အရှိန်အဟုန်သည် ယခုဘဏ္ဍာနှစ်အတွင်း ကောင်းမွန်စွာ တိုးတက်ခဲ့ပြီး ကုန်စည် ပို့ကုန်များသည် ပထမ ၂ လအတွင်း ဖွံ့ဖြိုးတိုးတက်မှုရှိခဲ့သည်ဟု CRISIL က ဖော်ပြခဲ့သည်။

Source: The Print

CNI International News

ခတ္တမန္ဒူ၊ ဇွန်လ ၂၀ 

တောင်အာရှဒေသမှ သေးငယ်သည့် ကျွန်းနိုင်ငံဖြစ်သည့် မော်လ်ဒိုက်သည် တရုတ်၏ ချေးငွေများနှင့်ပတ်သက်ပြီး အခြားနိုင်ငံများနှင့် သံတမန်ရေးရာ အဖုအထစ်များကို ရင်ဆိုင်ဖြေရှင်း နေရသကဲ့သို့ လက်ရှိတွင် နီပေါနိုင်ငံသည် လည်း မော်လ်ဒိုက်ကဲ့သို့ အခြေအနေမျိုးကို ရင်ဆိုင်နေရသည်ဟု Truth My သတင်းဝက်ဘ်ဆိုက်က ဖော်ပြခဲ့ သည်။

မော်လ်ဒိုက်သမ္မတ နာရှစ် (Nasheed) သည် တရုတ်သံအမတ်နှင့် သဘောထားချင်း မတိုက်ဆိုင်မှုများ ရှိနေသည့် တိုင် တရုတ်နှင့် အခင်အမင် မပျက်သည့် ဆက်ဆံရေးကို ထိန်းသိမ်းထားနိုင်သော်လည်း မော်လ်ဒိုက်အား ထုတ်ချေးပေးသည့် တရုတ်၏ ချေးငွေများနှင့်ပတ်သက်ပြီး အဓိပ္ပာယ်ဖွင့်ဆိုမှုများတွင် အငြငးပွားမှုများ ရှိနေခဲ့ သည်။

နီပေါနိုင်ငံတွင်လည်း မကြာသေးမီက တရုတ်သံအမတ်နှင့် နီပေါ ဂျာနယ်လစ် တစ်ဦးအကြား အွန်လိုင်းပေါ်တွင် ငြင်းခုန်ဆွေးနွေးမှုများ ဖြစ်ပွားခဲ့ပြီးနောက် တရုတ်သည် နီပေါနိုင်ငံအပေါ် ရန်မူသည့် မဟာဗျူဟာများ ချမှတ်ခဲ့ သည်။

နီပေါဂျာနယ်လစ်ဖြစ်သည့် ဂါဂျန်ဒရာ ဘူဟတ်ဟိုကီ (Gajendra Budhathoki) က တရုတ်အစိုးရသည် နီပေါအား ဖွံ့ဖြိုးတိုးတက်ရေး ချေးငွေဟူသည့် အမည်ဖြင့် အတိုးနှုန်းများ အဆမတန် ကောက်ယူနေကြောင်း လူမှုမီဒီယာပေါ် တွင် စွပ်စွဲခဲ့ခြင်း ဖြစ်သည်။

နီပေါနိုင်ငံဆိုင်ရာ တရုတ်သံအမတ် ချန်ဆောင်း (Chen Song) ကမူ ထိုစွပ်စွဲချက်ကို လက်မခံနိုင်ကြောင်းနှင့် လူသိရှင်ကြား ပြန်လည်တောင်းပန်ရန် ဘူဟတ်ဟိုကီကို တောင်းဆိုခဲ့သည်။

ဘူဟတ်ဟိုကီကမူ နီပေါသည် တရုတ်နိုင်ငံမှ ချေးငွေများကို တရားဝင် သတ်မှတ်နှုန်းထားထက် ပိုမိုများပြားသည့် အတိုးနှုန်းများနှင့် ရယူခဲ့ရခြင်းဖြစ်သည်ဟု ပြောကြားခဲ့သည်။ 

တရုတ်သမ္မတ ရှီကျင့်ဖျင်နဲ့ မော်လ်ဒိုက်သမ္မတကို တွေ့ရစဉ်

တရုတ်သံအမတ် ချန်ကမူ ထိုပြောကြားချက်များသည် မှားယွင်းကြောင်း တုန့်ပြန်ခဲ့သည်။

နီပေါနိုင်ငံရှိ ဂျာနယ်လစ်အချို့နှင့် သံတမန်အချို့ကမူ တရုတ်သံတမန်၏ မှတ်ချက်စကားများကို ဝေဖန်ခဲ့ပြီး တရုတ်သံတမန်၏ ပြောကြားချက်များသည် သံတမန်ရေးရာ စံသတ်မှတ်နှုန်းများထက် ကျော်လွန်နေကြောင်း ယူဆခဲ့ကြသည်။

တရုတ်၏ အိမ်နီးချင်းဖြစ်သည့် နိုင်ငံငယ်ဖြစ်သော နီပေါသည် ပြည်တွင်းတွင် အခြားစိန်ခေါ်မှုများနှင့် ရင်ဆိုင်နေ ရသည့်တိုင် ၎င်း၏ အခြေခံ အဆောက်အအုံများ ဖွံ့ဖြိုးတိုးတက်ရေးအတွက် တရုတ်ထံမှ ချေးငွေအများအပြားကို ရယူခဲ့သည်။

ထိုချေးငွေ ပမာဏအများအပြားကြောင့် နီပေါသည် သီရိလင်္ကာနှင့် ပါကစ္စတန်ကဲ့သို့ အခြားနိုင်ငံများ တွေ့ကြံခဲ့ရသည့် ကြွေးမြီအကျပ်အတည်းကို ကြုံတွေ့လာရနိုင်ခြေရှိကြောင်း စိုးရိမ်မှုများ ထွက်ပေါ်ခဲ့သည်။

Source: Truth My

CNI International News

နယူးဒေလီ၊ ဇွန်လ ၁၈

အိန္ဒိယ-အရှေ့အလယ်ပိုင်း-ဥရောပ စီးပွားရေးစင်္ကြံ (IMEC)ကဲ့သို့ အထူးအခြေခံ အဆောက်အအုံ စီမံကိန်းများကို ထောက်ပံ့ပေးမည်ဟု စက်မှုထိပ်သီးခုနစ်နိုင်ငံ (G-7) အဖွဲ့ဝင်နိုင်ငံများက အီတလီနိုင်ငံတွင် ပြုလုပ်သည့် ၃ ရက်ကြာ အစည်းအဝေးအပြီး ထုတ်ပြန်သည့် ပူးတွဲကြေညာချက်၌ ကတိပြုခဲ့ကြသည်ဟု Devdiscourse သတင်းဝက်ဘ်ဆိုက်မှ ဖော်ပြခဲ့သည်။

G-7 အဖွဲ့သည် ပိုမိုကောင်းမွန်သည့် အခြေခံ အဆောက်အအုံများနှင့် ရင်းနှီးမြှုပ်နှံမှုများအတွက် စီးပွားရေးစင်္ကြံ များကို ခိုင်မာအားကောင်းစေရန် ရည်ရွယ်ထားသည်။

ထိုရည်ရွယ်ချက်များထဲတွင် လိုဘီတို (Lobito) ၊ လူဇွန် (Luzon) ၊ အလယ်ပိုင်းနှင့် အိန္ဒိယ-အရှေ့အလယ်ပိုင်း-ဥရောပ စီးပွားရေးစင်္ကြံများအတွက် ဘဏ္ဍာရေး အားထုတ်ကြိုးပမ်းမှုများနှင့် ပူးပေါင်းဆောင်ရွက်မှုများ အပါအဝင် အဓိက စီမံကိန်းများလည်း ပါဝင်သည်။

G-7 ခေါင်းဆောင်များကိုတွေ့ရစဉ်

ထို့ပြင် ဥရောပသမဂ္ဂ ကမ္ဘာလုံးဆိုင်ရာ မုဂ်ဝ (EU Global Gateway) ၊ မဟာအစိမ်းရောင် တံတိုင်း (Great Green Wall) နှင့် အာဖရိကတိုက်အတွက် အီတလီ၏ Mattei Plan ကဲ့သို့ တည်ရှိဆဲ အစီအစဉ်များကို အခြေခံပြီး လုပ်ဆောင်သွားရန် G-7 က စီစဉ်လျက်ရှိသည်။

မိမိတို့အနေဖြင့် အသစ်စတင်သည့် ပရောဂျက်များဖြစ်သည့် G-7 PGII အစီအစဉ်များကို ပိုမိုခိုင်မာအောင် လုပ် ဆောင်ရန်၊ အရည်အသွေးရှိသည့် အခြေခံ အဆောက်အအုံနှင့် ရင်းနှီးမြှုပ်နှံမှုများအတွက် ပြောင်းလဲ တိုးတက်မှု ရှိမည့် စီးပွားရေးစင်္ကြံများကို ဖော်ဆောင်မည့် အစီအစဉ်များကို အကောင်အထည်ဖော် သွားမည်ဖြစ်ကြောင်း အိမ်ဖြူတော်က ကြေညာချက် ထုတ်ပြန်ခဲ့သည်။

G-7 ခေါင်းဆောင်များသည် နိုင်ငံတကာဥပဒေ၏ အုပ်ချုပ်မှုအောက်တွင် လွတ်လပ်ပွင့်လင်းမှုရှိသည့် အင်ဒို-ပစိဖိတ် ဒေသဖြစ်စေရန် ၎င်းတို့၏ ပြင်းပြသော ရည်မှန်းချက်များကိုလည်း ထပ်လောင်း အတည်ပြုခဲ့သည်။

အိန္ဒိယ-အရှေ့အလယ်ပိုင်း-ဥရောပ စီးပွားရေးစင်္ကြံ (IMEC)လမ်းကြောင်းကို တွေ့ရစဉ်

မိမိတို့သည် တရားဥပဒေအပေါ် အခြေခံသည့် လွတ်လပ်ပွင့်လင်းသော အင်ဒို-ပစိဖိတ်ဒေသတွင် ဘက်စုံပါဝင်ရေး၊  ချမ်းသာကြွယ်ဝစေရေးနှင့် လုံခြုံရေး၊ အချုပ်အခြာအာဏာပိုင်မှု၊ နယ်မြေတည်တံ့ခိုင်မြဲရေး၊ အငြင်းပွားမှုများကို ငြိမ်းချမ်းစွာ အဖြေရှာရေး၊ အခြေခံ လွတ်လပ်ခွင့်များနှင့် လူ့အခွင့်အရေးများအတွက် မိမိတို့၏ ကတိကဝတ်များ ကို ထပ်လောင်း အတည်ပြုကြောင်း အိမ်ဖြူတော်က ထုတ်ပြန်ခဲ့သည်။

G-7 သည် တရုတ်ကို ထိခိုက်နစ်နာစေရန် ကြိုးပမ်းခြင်း သို့မဟုတ် တရုတ်၏ စီးပွားရေး ဖွံ့ဖြိုးတိုးတက်မှုအား ထိခိုက်စေရန် ကြိုးပမ်းခြင်း မရှိကြောင်း၊ သို့သော် မျှတမှုရှိသည့် လုပ်ထုံးလုပ်နည်းများဖြင့် စီးပွားရေး လုပ်ငန်း များကို ကာကွယ်ရန် ဆက်လက် လုပ်ဆောင်သွားမည်ဖြစ်ကြောင်း ညီလာခံ၏ ကြေညာချက်တွင် ဖော်ပြခဲ့သည်။

အီတလီနိုင်ငံ၊ အပူလီယာ (Apulia) ဒေသတွင် ဇွန်လ ၁၃ ရက်မှ ၁၅ ရက်အထိ ပြုလုပ်ခဲ့သည့် G-7 ညီလာခံကို အဖွဲ့ဝင်နိုင်ငံများဖြစ်သည့် အမေရိကန်၊ ဗြိတိန်၊ ကနေဒါ၊ ဂျာမနီ၊ အီတလီ၊ ဂျပန်နှင့် ပြင်သစ်တို့ အပါအဝင် ဥရောပသမဂ္ဂနှင့် အခြားနိုင်ငံများမှ ဖိတ်ကြားထားသည့် ခေါင်းဆောင်များ တက်ရောက်ခဲ့သည်။

Source: Devdiscourse

CNI International News

တိုကျို၊ ဇွန်လ ၁၅

ဂျပန်နိုင်ငံတွင် လုပ်သားအင်အား ရှားပါးမှုပြဿနာ ဖြေရှင်းရန်အတွက် ပြည်ပလုပ်သားများကို နိုင်ငံအတွင်း၌ ကြာရှည်စွာနေထိုင်စေရန် ဥပဒေများကို ဂျပန်လွှတ်တော်က ဇွန်လ ၁၄ ရက်တွင် ပြဋ္ဌာန်းခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

ယခင်က ပြည်ပလုပ်သား အလုပ်သင် အစီအစဉ်ကို ပြောင်းလဲသည့် ထိုလုပ်ဆောင်ချက်အရ အစိုးရသည် အခွန် ဆောင်ရန် ပျက်ကွက်သော ပြည်ပလုပ်သားများ သို့မဟုတ် အာမခံကြေး ပေးသွင်းရန် ပျက်ကွက်သည့် ပြည်ပ လုပ်သားများအတွက် အမြဲတမ်းနေထိုင်ခွင့်အား ပြန်လည်ရုပ်သိမ်းနိုင်မည်ဖြစ်သည်။

ဂျပန်၏ ပြည်ပလုပ်သားများ လက်ခံမှုဆိုင်ရာ မူဝါဒတွင် သိသာသည့် အပြောင်းအလဲ တစ်ခုဖြစ်သည့် ယခုပြဋ္ဌာန်း သော ဥပဒေများသည် လာမည့် ၃ နှစ်အတွင်း အကျုံးဝင် သက်ရောက်မည်ဖြစ်သည်။

စနစ်သစ်အရ ပြည်ပမှ ပါရမီရှိသည့် ကျွမ်းကျင်လုပ်သားများကို ပိုမိုရရှိစေရန်နှင့် အတွေ့အကြုံမရှိသော လုပ်သား များကို သုံးနှစ်အတွင်း လိုအပ်သည့် လုပ်ငန်းအတွေ့အကြုံများ ရရှိစေရန် အထောက်အကူ ဖြစ်စေလိမ့်မည် ဖြစ် သည်။

ယခုပြဋ္ဌာန်းသည့် ဥပဒေများသည် ဖွံ့ဖြိုးဆဲနိုင်ငံများမှ လုပ်သားများ၏ နည်းပညာဆိုင်ရာ စွမ်းရည်များ ဖွံ့ဖြိုး တိုးတက်စေရန် ရည်ရွယ်ထားသော ၁၉၉၃ ခုနှစ်ကတည်းက ထုတ်ပြန်ထားသည့် နည်းပညာဆိုင်ရာအလုပ်သင် လေ့ကျင့်ရေး အစီအစဉ်နေရာတွင် အစားထိုး လုပ်ဆောင်မည်ဖြစ်သည်။

ဂျပန်နိုင်ငံက လုပ်ငန်းခွင်တစ်ခုကိုတွေ့ရစဉ်

ထိုစနစ်အဟောင်းသည် ဂျပန်အတွက် ပြည်ပမှ လုပ်သားများကို ဈေးပေါပေါဖြင့် ခေါ်ယူနိုင်သည်ဟု ဝေဖန်မှုများ နှင့် ကာလကြာရှည် ရင်ဆိုင်ခဲ့ရသည်။

ယခုစနစ်သစ်အရ လုပ်ငန်းတစ်ခုထဲတွင် တစ်နှစ်ကျော်ကြာ လုပ်ကိုင်ပြီး ဂျပန်ဘာသာစကားနှင့် ပရော်ဖက်ရှင် နယ် စွမ်းရည်များသည် သတ်မှတ်ချက်နှင့်ပြည့်မီသည့် လုပ်သားများသည် အလားတူ နောက်ထပ် လုပ်ငန်းခွင်၌ ပြောင်းလဲလုပ်ကိုင်ခွင့်ရမည် ဖြစ်သည်။

ဂျပန်နိုင်ငံတွင် နေထိုင်သည့် ပြည်ပနိုင်ငံသား အရေအတွက်သည် ၂၀၂၃ ခုနှစ်တွင် ၃ ဒသမ ၄ သန်းအထိ စံချိန်တင်မြင့်တက်ခဲ့ပြီး ဂျပန်နိုင်ငံသာများ၏ လူဦးရေသည် ပြီးခဲ့သည့်နှစ် အောက်တိုဘာ ၁ ရက်တွင် ၅၉၅,၀၀၀ ကျဆင်းခဲ့ကာ နိုင်ငံ့လူဦးရေ စုစုပေါင်းသည် ၁၂၄,၃၅၂,၀၀၀ သာ ရှိခဲ့သည်။ 

ယခုထုတ်ပြန်သည့် ဥပဒေကို ပြီးခဲ့သည့်လက အောက်လွှတ်တော်တွင် အတည်ပြုခဲ့ပြီးနောက် ဇွန်လ ၁၄ ရက်၌ အာဏာရ LDP ပါတီ၏ ထောက်ခံမှုနှင့်အတူ အထက်လွှတ်တော်က ထပ်မံအတည်ပြု ထုတ်ပြန်ခဲ့ခြင်းဖြစ်သည်။

Source: ဘန်ကောက်ပို့စ်

CNI International News

အစ္စလာမ်မာဘက်၊ ဇွန်လ ၁၅

ပါကစ္စတန်နိုင်ငံတွင် ငွေကြေးဖောင်းပွမှု အကျပ်အတည်းသည် ပါကစ္စတန်ပြည်သူများ၏ နေ့စဉ် စားဝတ်နေရေး အခြေအနေအတွက် ကြီးမားသည့် စိန်ခေါ်မှုတစ်ခု ဖြစ်လာခဲ့သည်ဟု Khaama သတင်းဝက်ဘ်ဆိုက်မှ ဖော်ပြခဲ့ သည်။

၂၀၂၃-၂၄ ခုနှစ် ပါကစ္စတန်၏ စီးပွားရေး အနေအထားကို လေ့လာမှုများအရ ငွေကြေးဖောင်းပွမှု မြင့်တက်နေခြင်း သည် နိုင်ငံ့လူဦးရေအပေါ် သက်ရောက်မှုရှိနေသည့် အခြေအနေအား တွေ့ရှိခဲ့ရပြီး စီးပွားရေးဆိုင်ရာ စီမံခန့်ခွဲမှု များကို ချက်ချင်းလုပ်ဆောင်ရန် လိုအပ်ကြောင်း ဖော်ပြခဲ့သည်။

မကြာသေးမီက အချက်အလက်များတွင် ၂၀၂၃ ခုနှစ်မှ ၂၀၂၄ ခုနှစ်အထိ ငွေကြေးဖောင်းပွမှုနှုန်းသည် သိသာစွာ မြင့်တက်လာခဲ့ပြီး ငွေကြေးဖောင်းပွသည် ဝင်ငွေဖွံ့ဖြိုးတိုးတက်မှုအား ကျော်လွန်လျက်ရှိကာ လက်လုပ်လက်စား ပါကစ္စတန်ပြည်သူများ၏ ဝယ်ယူနိုင်စွမ်းကို လျော့ကျစေခဲ့သည်ဟု တွေ့ရသည်။

မရှိမဖြစ်လိုအပ်သည့် ကုန်ပစ္စည်းများနှင့် ဝန်ဆောင်မှုများအတွက် ပေးရသည့် ကုန်ကျစရိတ်များသည် မြင့်တက်ခဲ့ သဖြင့် မိသားစု အများအပြားအပေါ် ငွေကြေးဖိအားများ ကျရောက်စေခဲ့သည်။

ပါကစ္စတန်ပြည်သူများကို တွေ့ရစဉ်

ပျမ်းမျှ ပါကစ္စတန်ပြည်သူများအတွက် ငွေကြေးဖောင်းပွမှုသည် နေ့စဉ်နှင့်အမျှ ရှင်သန်နေထိုင်ရသည့် ဘဝအပေါ် သက်ရောက်မှုများ ရှိခဲ့သည်။ 

အစားအစာ၊ လောင်စာနှင့် မရှိမဖြစ် အခြေခံကုန်စည်များ၏ ဈေးနှုန်းများ မြင့်တက်မှုကြောင့် အိမ်ထောင်စုများ သည် နေ့စဉ်အသုံးစရိတ်ကို စီမံခန့်ခွဲရန် ပိုမိုခက်ခဲလာခဲ့သည်။

၂၀၂၃ ခုနှစ်က ပါကစ္စတန်တွင် ဓာတ်ဆီဆေးနှုန်းများည် တစ်လီတာကို ပါကစ္စတန်ရူပီး ၁၅၃ ရူပီးသာ ရှိခဲ့သော် လည်း ၂၀၂၄ ခုနှစ်တွင် ၁၆၅ ရူပီးအထိ မြင့်တက်လာခဲ့သဖြင့် လူပုဂ္ဂိုလ်တစ်ဦးချင်းစီနှင့် စီးပွားရေး လုပ်ငန်းများ အတွက် သယ်ယူပို့ဆောင်ရေး စရိတ်များကို မြင့်တက်စေခဲ့သည်။

ပါကစ္စတန်ပြည်သူ အများစုအတွက် အဓိကစားသောက်ကုန်ဖြစ်သည့် ပေါင်မုန့်ဈေးနှုန်းများသည်လည်း မြင့်တက်ခဲ့သည်။

ပါကစ္စတန်ပြည်သူများ စားဝတ်နေရေး ကျပ်တည်းနေစဉ်

၂၀၂၃ ခုနှစ်က ပေါင်မုန့်တစ်တောင့်ကို ၅၀ ရူပီးမှ ၇၀ ရူပီးရှိခဲ့သော်လည်း ၂၀၂၄ ခုနှစ်တွင် ၈၀ ရူပီးမှ ၁၀၀ ရူပီးအထိ မြင့်တက်ခဲ့သည်။

အာဏာပိုင်များက ကုန်ဈေးနှုန်းများကို ထိန်းညှိပေးမှုများ ရှိခဲ့သည့်တိုင် အနိမ့်ဆုံးလုပ်ခလစာသည် ၂၀၁၃ ခုနှစ်က တစ်လကို ရူပီး ၁၇,၅၀၀ မှ ရူပီး ၂၁,၀၀၀ သာရှိခဲ့သဖြင့် စားဝတ်နေရေးအတွက် လောက်ငှခြင်းမရှိခဲ့ပေ။

ထို့ပြင် နောက်ထပ်အဓိက စားသောက်ကုန်ဖြစ်သည့် ဆန်ဈေးနှုန်းများသည်လည်း ၂၀၂၃ ခုနှစ်က တစ်ကီလိုလျှင် ရူပီး ၁၀၀ မှ ရူပီး ၁၂၀ ရှိခဲ့သော်လည်း၂၀၂၄ ခုနှစ်တွင် ရူပီး ၁၃၀ မှ ၁၅၀ အထိ မြင့်တက်ခဲ့သည်။

Source: Khaama

CNI International News 

ဘန်ကောက် ဇွန်လ ၁၄

ထိုင်းနိုင်ငံတွင် “khao niao mamuang” ဟု လူသိများသည့် သရက်သီး အုန်းနို့ဆမ်း ထမင်းသည် ကမ္ဘာတစ်ဝန်းရှိ အစားအစာနှင့် အဖျော်ယမကာများကို အဆင့်သတ်မှတ်သည့် TasteAtlas အွန်လိုင်း ပလက်ဖောင်းတွင် သရက်သီး ပါဝင်သည့် ဟင်းပွဲ ၂၆ ပွဲအနက် ဒုတိယအကောင်းဆုံး ဟင်းပွဲအဖြစ် သတ်မှတ်ခံခဲ့ရသည်ဟု Thai PBS World မှ ဖော်ပြခဲ့သည်။

ဆန်ပူတင်း အမျိုးအစားထဲတွင် ထည့်သွင်း သတ်မှတ်ခံရသည့် ထိုဟင်းပွဲသည် ထိုင်းနိုင်ငံ၏ ရိုးရာအချိုပွဲတစ်ခု ဖြစ်ပြီး ထိုဟင်းပွဲတွင် ထမင်း၊ အုံးနို့နှင့် သရက်သီးမှည့်တို့ဖြင့် ပြုလုပ်ထားသည်။

စားသုံးပုံမှာ ပူပူနွေးနွေး ချက်ပြုတ်ထားသည့် ထမင်းပေါ်ကို အုန်းနို့အရည်လောင်းချပြီး သရက်သီးမှည့်ကို အစိတ်လိုက်လှီးကာ အပေါ်မှတင်ပြီး သုံးဆောင်ရခြင်းဖြစ်သည်။

ထိုဟင်းပွဲကို ထိုင်းနိုင်ငံ၏ စားသောက်ဆိုင်တိုင်းတွင် တွေ့ရပြီး အလွန်နာမည်ကြီးသည့် အချိုပွဲ အမျိုးအစား ဖြစ်သည်။

ထိပ်ဆုံးနေရာတွင် ရှိနေသည့် သရက်သီး ပါဝင်သော ဟင်းပွဲများထဲတွင် အိန္ဒိယနိုင်ငံ မဟာရက်ရှ်ထရာပြည်နယ် (Maharashtra)မှ “aamras”အမည်ရှိ ဟင်းပွဲဖြစ်ပြီး တတိယနေရာတွင် ဖိလစ်ပိုင်နိုင်ငံ၏ သရက်သီးရေခဲမုန့် ဖြစ်သည်။

ထိုင်းနိုင်ငံရဲ့  “khao niao mamuang” သရက်သီးအချိုပွဲကိုတွေ့ရစဉ်

ထို့နောက်တွင် အင်ဒိုနီးရှားနိုင်ငံ ဂျာဗားပြည်နယ်မှ သရက်သီး ပါဝင်သည့် အသီးအရွက်သုတ်၊ အိန္ဒိယနိုင်ငံမှ သရက်သီးချတ်တနီတို့က အစဉ်လိုက် ရပ်တည်နေသည်။

ထိုစာရင်းတွင် ပါဝင်သည့် အခြား ထိုင်းဟင်းလျာများ စာရင်းတွင် သရက်သီးစိမ်းကို ငံပြာရည်ဖြင့် တွဲဖက် စားသုံးရသည့် သရေစာ၊ သရက်သီးစိမ်းသုတ်များလည်း ပါဝင်ခဲ့သည်။

ဧပြီလ အတွင်းကမှ TasteAtlas  ဝက်ဘ်ဆိုဒ်သည် ထိုင်းနိုင်ငံတောင်ပိုင်း၏ ရိုးရာ အစားအစာဖြစ်သည့် kaeng tai pla ဟင်းပွဲကို ကမ္ဘာ့အဆိုးရွားဆုံး ဟင်းပွဲအဖြစ် သတ်မှတ်ခဲ့သည်။

ထိုဟင်းပွဲသည် အရည်ခပ်ပျစ်ပျစ်နှင့် ချက်ပြုတ်သည့် ငါးဟင်းလျာဖြစ်ပြီး အချဉ်ဖောက်ထားသည့် ငါးကလီစာ များကို ငရုတ်သီးမှုန့်၊ ပဒဲကော၊ ငါးပိ၊ နနွင်း၊ ကြက်သွန်ဥနီ အသေးနှင့် စပါးလင်တို့ဖြင့် ချက်ပြုတ်ထားသည့် ဟင်းပွဲဖြစ်သည်။

Source: Thai PBS World 

CNI International News

ဂျီနီဗာ၊ ဇွန်လ ၁၄

မြန်မာနိုင်ငံတွင် ဆင်းရဲမွဲတေမှု အခြေအနေသည် လွန်ခဲ့သည့် ၆ နှစ်ကထက် ပိုမိုပျံ့နှံ့လာခဲ့ပြီး ဆင်းရဲမွဲတေမှု ပိုမိုမြင့်တက်လာကြောင်း ကမ္ဘာ့ဘဏ်က ဇွန်လ ၁၂ ရက်နေ့တွင် ထုတ်ပြန်သည်ဟု ဘန်ကောက်ပို့စ်မှ ဖော်ပြခဲ့ သည်။

ပဋိပက္ခများ ဖြစ်ပွားနေသည့် မြန်မာနိုင်ငံတွင် လက်ရှိ ဘဏ္ဍာရေးနှစ်အတွင်း ဖွံ့ဖြိုးတိုးတက်မှုနှုန်းသည် ၁ ရာခိုင်နှုန်းခန့်သာ ရှိနိုင်ကြောင်း ကမ္ဘာ့ဘဏ်က ထုတ်ပြန်ထားသည်။

အကြမ်းဖက်မှုများ မြင့်တက်နေမှု၊ လုပ်သားအင်အား ပြတ်လပ်မှု၊ ငွေတန်ဖိုးကျဆင်းမှုတို့ကြောင့် စီးပွားရေး လုပ်ငန်း လုပ်ကိုင်ရန် ခက်ခဲလာသည်ဟု ကမ္ဘာ့ဘဏ်၏ ထုတ်ပြန်ချက်တွင် ဖော်ပြထားသည်။

ပြီးခဲ့သည့်နှစ် ဒီဇင်ဘာလက ကမ္ဘာ့ဘဏ်၏ ခန့်မှန်းချက်တွင် လက်ရှိ ဘဏ္ဍာရေးနှစ်အတွင်း မြန်မာနိုင်ငံ၏ စီးပွားရေးဖွံ့ဖြိုးတိုးတက်မှုကို ၂ ရာခိုင်နှုန်းခန့် ရှိနိုင်သည်ဟု ခန့်မှန်းခဲ့သော်လည်း ယခုနှစ် မတ်လက အဆုံးသတ်ခဲ့ သည့် ဂျီဒီပီဖွံ့ဖြိုးတိုးတက်မှုကို ၁ ရာခိုင်နှုန်းအဖြစ် ခန့်မှန်းခဲ့သည်။

လက်နက်ကိုင်တစ်ဦးကို တွေ့ရစဉ်

“ငွေကြေးဖောင်းပွမှု၊ လုပ်သားအင်အား ရှားပါးမှု၊ နိုင်ငံခြားငွေကြေး ပြတ်လပ်မှုနဲ့ လျှပ်စစ်ဓာတ်အား ပြတ်လပ်မှု တွေကြောင့် ၂၀၂၄-၂၅ အတွက် ဖွံ့ဖြိုးတိုးတက်မှု ခန့်မှန်းချက်ကို လျှော့ချခဲ့ရတာ ဖြစ်ပါတယ်။ အဲဒီ အခြေအနေ တွေအားလုံးဟာ အရင်က ခန့်မှန်းထားခဲ့တဲ့ စီးပွားရေးလှုပ်ရှားမှုတွေအပေါ် ကြီးကြီးမားမား သက်ရောက်နိုင်ခြေ ရှိပါတယ်”ဟု ကမ္ဘာ့ဘဏ်၏ ထုတ်ပြန်ချက်တွင် ဖော်ပြထားသည်။

ထိုထုတ်ပြန်ချက်နှင့် ပတ်သက်ပြီး ရိုက်တာသတင်းဌာန၏ မှတ်ချက်ပေးရန် တောင်းဆိုမှုကို မြန်မာ့တပ်မတော်က တုန့်ပြန်ခဲ့ခြင်းမရှိပေ။

မြန်မာနိုင်ငံတွင် တိုင်းရင်းသားလက်နက်ကိုင်အဖွဲ့များ ၊ အခြားလက်နက်ကိုင် အဖွဲ့သစ်များနှင့် တပ်မတော်ကြား တိုက်ပွဲများ ဖြစ်ပွားနေသဖြင့် လူပေါင်း ၃ သန်းကျော် အိမ်ပစ်ရာပစ် ထွက်ပြေးတိမ်းရှောင်ခဲ့ရပြီး ဆင်းရဲမွဲတေမှု နှုန်းသည် ၃၁.၁ ရာခိုင်နှုန်းအထိ ရှိလာခဲ့သည်ဟု ကမ္ဘာ့ဘဏ်က ပြောကြားခဲ့သည်။

“ဆင်းရဲမွဲတေမှုရဲ့ ဆိုးရွားမှုနဲ့ ဆင်းရဲတွင်း နက်ရှိုင်းမှုတို့ဟာ ၂၀၂၃-၂၄ ခုနှစ်တွေမှာ ပိုမိုဆိုးရွားလာပါတယ်။ အဓိပ္ပာယ်ကတော့ မြန်မာနိုင်ငံရဲ့ ဆင်းရဲမွဲတေမှု အခြေအနေဟာ လွန်ခဲ့တဲ့ ၆ နှစ်ကထက်ပိုပြီး ခိုင်ခိုင်မာမာ အမြစ်တွယ်လာခဲ့ပါတယ်”ဟု ကမ္ဘာ့ဘဏ်က ထုတ်ပြန်ခဲ့သည်။

သတင်းစာ ရောင်းချသူ ၂ ဦးကိုတွေ့ရစဉ်

ထို့ပြင် မြန်မာနိုင်ငံတွင် ၂၀၂၄ ခုနှစ်၊ ဖေဖော်ဝါရီလက ထုတ်ပြန်ခဲ့သည့် စစ်မှုထမ်းဥပဒေကြောင့် ပြည်ပသို့ ထွက်ခွာသူ အရေအတွက် ပိုမိုများပြားလာခြင်းသည် ပြည်တွင်း စက်မှုလုပ်ငန်းများအတွက် လုပ်သားအင်အား ပြတ်လပ်မှုကို ဖြစ်စေခဲ့သည်ဟု ထုတ်ပြန်ချက်တွင် ဖော်ပြထားသည်။

ထို့ပြင် တပ်မတော်သည် ပြည်တွင်းလက်နက်ကိုင် ပဋိပက္ခများကြောင့် တရုတ်နှင့် ထိုင်းနယ်စပ်ရှိ အဓိကနယ်မြေ အချို့ကို လက်လွှတ်ဆုံးရှုံးခဲ့ရသဖြင့် ထိုဒေသများတွင် ကုန်သွယ်ရေးများ သိသာစွာ လျော့ကျခဲ့သည်။

“သဘာဝဓာတ်ငွေ့ ပို့ဆောင်မှုတွေကလွဲပြီး တစ်ခြားပို့ကုန်တွေကို နယ်စပ်က တင်ပို့မှုတွေဟာ ၄၄ ရာခိုင်နှုန်း လျော့ကျခဲ့ပါတယ်။ နယ်စပ်ကတစ်ဆင့် သွင်းတဲ့သွင်းကုန်တွေကလည်း ထက်ဝက်လောက် လျော့ကျခဲ့ပြီး သွင်းကုန် စုစုပေါင်းရဲ့ ၇၁ ရာခိုင်နှုန်းလောက် လျော့ကျခဲ့ပါတယ်”ဟု ကမ္ဘာ့ဘဏ်က ထုတ်ပြန်ခဲ့သည်။

၂၀၂၄ ခုနှစ်၊ မတ်လမတိုင်မီ ခြောက်လအတွင်း ကုန်စည်ပို့ကုန်များ ၁၃ ရာခိုင်နှုန်းလျော့ကျခဲ့ပြီး သွင်းကုန်များ သည် ၂၀ ရာခိုင်နှုန်း လျော့ကျခဲ့သည်ဟု ပြီးခဲ့သည့်နှစ် ကာလတူနှင့် နှိုင်းယှဉ်ကာ ကမ္ဘာ့ဘဏ်က ထုတ်ပြန်ခဲ့သည်။

Source: ရိုက်တာ

CNI International News

ဘေကျင်း၊ ဇွန်လ ၁၄

အမေရိကန်သည် တရုတ်နိုင်ငံအတွင်းရှိ ဝီဂါ (Uygur) မွတ်ဆလင်များနှင့် ဆက်နွှယ်မှုရှိသည့် တရုတ်ကုမ္ပဏီများ ထံမှ တင်ပို့ရောင်းချသော သွင်းကုန်များကို ပိတ်ပင်သည့်စာရင်းကို ဇွန်လ ၁၁ ရက်တွင် အွန်လိုင်းမှ ထုတ်ပြန်ခဲ့ သည်ဟု South China Morning Post မှ ဖော်ပြခဲ့သည်။

နောက်ဆုံး ပစ်မှတ်ထားသည့် ပိတ်ပင်မှုစာရင်းတွင် ဖိနပ်များထုတ်လုပ်သည့် Dongguan Oasis Shoes ကုမ္ပဏီ၊ အလူမီနီယံထုတ်လုပ်သည့် Xinjiang Shenhuo Coal and Electricity ကုမ္ပဏီ၊ Rizhao Meijia Group ကုမ္ပဏီဟု လူသိများသည့် အစားအစာများ ပြုပြင်ထုတ်လုပ်သော Shandong Meijia Group ကုမ္ပဏီတို့ ပါဝင်ကြောင်း အမေရိကန် အမိမြေလုံခြုံရေးဝန်ကြီးဌာန(DHS)က ထုတ်ပြန်ခဲ့သည်။

ထိုပိတ်ပင်မှုများမှတစ်ဆင့် DHS သည် ရှင်ကျန်း (Xinjiang) ဒေသ၏ အဓိကစီးပွားရေး လုပ်ငန်းများဖြစ်သည့် ပင်လယ်စာများ၊ အလူမီနီယံများနှင့် ဖိနပ်များ တင်သွင်းမှုကို အာရုံစိုက် စောင့်ကြည့်သွားမည်ဖြစ်သည်။

ထို့ပြင် အမေရိကန် စျေးကွက်များတွင် အဓမ္မလုပ်သား စေခိုင်းမှုများနှင့် ဆက်နွှယ်သည့် ထုတ်ကုန်များ မရှိစေရန် လည်း လုပ်ဆောင်သွားမည်ဟု သီးခြား ထုတ်ပြန်ချက် တစ်စောင်တွင် ဖော်ပြခဲ့သည်။

 ဝီဂါလူမျိုးတွေကို စောင့်ကြည့်နေတဲ့ တရုတ်လုံခြုံရေးတစ်ဦးကိုတွေ့ရစဉ်

တရုတ်၏အနောက်ပိုင်း ရှင်ကျန်းဒေသတွင် လူနည်းစုများအား ဖိနှိပ်မှုများရှိနေသည်ဟု အမေရိကန်က ပြောကြား ထားသော ဖြစ်စဉ်များနှင့်ဆက်နွှယ်သည့် ကုမ္ပဏီအချို့ကို ဝီဂါအဓမ္မလုပ်သားစေခိုင်းမှု ကာကွယ်ရေးအက်ဥပဒေ စာရင်း၌ ထည့်သွင်းပိတ်ပင်ခဲ့ခြင်းဖြစ်သည်။

တရုတ်အာဏာပိုင်များသည် ရှင်ကျန်းဒေသရှိ ဝီဂါမွတ်ဆလင်များနှင့် အခြားလူနည်းစု မွတ်ဆလင်များအတွက် ချွေးတပ်စခန်းများ တည်ဆောက်ခဲ့ကြောင်း အမေရိကန်အရာရှိများက ပြောကြားခဲ့သော်လည်း တရုတ်ကမူ အဓမ္မ လုပ်သားစေခိုင်းမှုများမရှိကြောင်း ငြင်းဆိုခဲ့သည်။

အမေရိကန်၏ လုပ်ဆောင်ချက်နှင့်ပတ်သက်ပြီး တရုတ်သံရုံး ပြောရေးဆိုခွင့်ရှိသူ လျူပန်းယုက မှတ်ချက်ပေးခဲ့ရာ တွင် ရှင်ကျန်းဒေသ၌ အဓမ္မလုပ်သား စေခိုင်းမှုများရှိသည့် စွဲချက်များသည် ဟုတ်မှန်ခြင်းမရှိကြောင်း၊ ထိုစွပ်စွဲ ချက်များသည် တရုတ်ကို ဆန့်ကျင်သည့် အင်အားစုများ၏ ဝါဒဖြန့်မှုများသာဖြစ်ကြောင်း ပြောကြားခဲ့သည်။

ဝီဂါအဓမ္မလုပ်သားစေခိုင်းမှု ကာကွယ်ရေးအက်ဥပဒေနှင့်ပတ်သက်ပြီး လျူက မှတ်ချက်ပေးရာတွင် ထိုဥပဒေသည် ရှင်ကျန်းဒေသ၌ နေထိုင်သူများ၏ လူ့အခွင့်ရေးကို ဆိုးရွားစွာ ထိပါးစေရုံသာမကဘဲ ကမ္ဘာလုံးဆိုင်ရာစက်မှု လုပ်ငန်းနှင့် ထောက်ပံ့ရေးကွင်းဆက်ကို အနှောင့်အယှက် ဖြစ်စေနိုင်ပြီး နိုင်ငံတကာ ကုန်သွယ်ရေးစည်းကမ်းများ ကို ချိုးဖောက်ခြင်းဖြစ်ကြောင်း ပြောကြားခဲ့သည်။

Source: SCMP

CNI International News

ဘေကျင်း၊ ဇွန်လ ၁၂

ဥရောပသမဂ္ဂက တရုတ်နိုင်ငံလုပ် လျှပ်စစ်ကားများအပေါ် အခွန်များကောက်ခံရန် ပြင်ဆင်နေသဖြင့် Volvo Car AB ကုမ္ပဏီသည် လျှပ်စစ်ကား ထုတ်လုပ်မှုများကို တရုတ်နိုင်ငံမှ ဘယ်လ်ဂျီယံနိုင်ငံသို့ စတင်ပြောင်းရွှေ့နေပြီ ဖြစ်ကြောင်း Bloomberg မှ ဖော်ပြခဲ့သည်။

Volvo ၏ EX30 နှင့် EX90 လျှပ်စစ်ကား မော်ဒယ်များထုတ်လုပ်မှုကို ဘယ်လ်ဂျီယံတွင် ပြောင်းလဲထုတ်လုပ် နေမှုနှင့်အတူ အခြား ကားမော်ဒယ်များကိုလည်း ဗြိတိန်၌ ပြောင်းလဲထုတ်လုပ်ဖွယ်ရှိသည်ဟု အမည်မဖော် လိုသည့် သတင်းရင်းမြစ်များက ဖော်ပြခဲ့သည်။

တရုတ်၏ Zhejiang Geely Holding Group ကုမ္ပဏီက ပိုင်ဆိုင်သည့် Volvo ကုမ္ပဏီသည် အနောက်နိုင်ငံများ တွင် အခွန်အများဆုံး ကောက်ခံရနိုင်ခြေရှိသော ကားကုမ္ပဏီတစ်ခုအဖြစ် ရှုမြင်ခံထားရသည်ဟု Times မဂ္ဂဇင်းက ဖော်ပြခဲ့သည်။

တရုတ်အစိုးရ၏ မျှတမှုမရှိသည့် ထောက်ပံ့မှုများဖြင့် ဥရောပဈေးကွက်များတွင် တရုတ်လုပ် ကားများနှင့် အခြားကုန်စည်များ စုပြုံဝင်ရောက်လာမည့် အရေးနှင့်ပတ်သက်ပြီး ဥရောပသမဂ္ဂနှင့် တရုတ်အကြား ကုန်သွယ်ရေးဆိုင်ရာ သဘောထားကွဲလွဲမှုများ ဖြစ်ပွားနေသည်။

ဥရောပသမဂ္ဂသည် ဇူလိုင် ၄ ရက်မှစတင်ပြီး တရုတ်လျှပ်စစ်ကားများအပေါ် စည်းကြပ်ကောက်ခံသည့် အခွန်နှုန်းအား လက်ရှိ ၁၀ ရာခိုင်နှုန်းထက် ပိုမိုကောက်ခံသွားမည့် အကြောင်းကို ယခုသီတင်းပတ်အတွင်း တရုတ်နိုင်ငံမှ လျှပ်စစ်ကားထုတ်လုပ်သည့် ကုမ္ပဏီများသို့ အကြောင်းကြားဖွယ်ရှိနေသည်။

 Volvo ကား စက်ရုံကို တွေ့ရစဉ်

Volvo ကားကုမ္ပဏီကမူ Times မဂ္ဂဇင်း၏ ဖော်ပြချက်ကို ငြင်းဆိုခဲ့ပြီး နောက်ထပ် ဖြစ်လာနိုင်ခြေရှိသည့် အစီအစဉ်များနှင့်ပတ်သက်၍ ထင်ကြေးပေးရန် အချိန်စော လွန်းနေသေးကြောင်း ပြောကြားခဲ့သည်။

ဘယ်လ်ဂျီယံတွင် EX30 မော်ဒယ်များကို ထုတ်လုပ်မည့် ဆုံးဖြတ်ချက်သည် မိမိတို့ ထုတ်လုပ်ထားသည့် ကားများကို ဘယ်လ်ဂျီယံတွင် အမြန်ဆုံးရောင်းချလိုသော ရည်ရွယ်ချက်အား ပြသရာရောက်ကြောင်း Volvo ကားကုမ္ပဏီ၏ ပြောရေးဆိုခွင့်ရှိသူက ပြောကြားခဲ့သည်။

ဥရောပသမဂ္ဂသည် တရုတ်ကုမ္ပဏီများကို ဖိနှိပ်ရန် လုပ်ဆောင်နေပြီး တရုတ်၏ အကျိုးစီးပွားအား ကာကွယ်ရန် အရေးယူ လုပ်ဆောင်သွားမည်ဟု တရုတ်အစိုးရက ပြီးခဲ့သည့် သီတင်းပတ်က ပြောကြားခဲ့သည်။

ဥရောပသမဂ္ဂအနေဖြင့် ပြည်တွင်းဈေးကွက်ကို ပြည်ပ၏ ယှဉ်ပြိုင်မှုမှ ကာကွယ်ထားသည့် ဝါဒအား စွန့်လွှတ်ရန် နှင့် ပူးပေါင်းဆောင်ရွက်ရေး လမ်းကြောင်းပေါ်သို့ ပြန်လာရန် တရုတ်ကုန်သွယ်ရေးဝန်ကြီး ဝမ်ဝင်တောင် (Wang Wentao) က ဇွန်လ ၁၀ ရက်တွင် ပြောကြားခဲ့သည်။

Source: Bloomberg