CNI International News

ဘန်ကောက် ၊ စက်တင်ဘာ ၂၀

မြန်မာနိုင်ငံအတွင်းမှ ဖြတ်သန်းဖောက် လုပ်ထားသည့် အဓိကအဝေးပြေးလမ်းမတစ်ခုကို ပြန်လည်ပြင်ဆင်ရန် မြန်မာနှင့် ပူးပေါင်းဆောင်ရွက်လိုကြောင်း ထိုင်းနိုင်ငံခြားရေးဝန်ကြီး မာရစ် ဆမ်ဂျီယမ်ပွန်ဆာ (Maris Sangiampongsa) က စက်တင်ဘာ ၁၉ ရက်တွင် ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

ထို့အပြင် မြန်မာနိုင်ငံအတွင်းရှိ တိုက်ပွဲဖြစ်ပွားနေသည့် အဖွဲ့များအားလုံးနှင့်လည်း ပူးပေါင်းဆောင်ရွက်ရန် ထိုင်းအစိုးရက ဆန္ဒရှိနေကြောင်း ၎င်းက ပြောသည်။

မြန်မာနှင့်ထိုင်း နယ်စပ်ဒေသများတွင် လုံခြုံမှုရှိစေရန်နှင့် ကုန်သွယ်ရေးလမ်းကြောင်းများ ပိတ်ဆို့မှု မရှိစေရန် ထိုင်းက ကြိုးပမ်းနေချိန်၌ မာရစ်၏ ပြောကြားချက် ထွက်ပေါ်လာခဲ့ခြင်းဖြစ်သည်။

ထိုင်းနိုင်ငံခြားရေးဝန်ကြီး မာရစ် ဆမ်ဂျီယမ်ပွန်ဆာကို တွေ့ရစဉ်

မကြာသေးမီက ဖြစ်ပွားခဲ့သည့် တိုက်ပွဲများကြောင့် ထိခိုက်ပျက်စီးခဲ့ရသည့် အမှတ်(၁) အာရှအဝေးပြေးလမ်းမ (AH-1)၏ အချို့နေရာ အစိတ်အပိုင်းများကို ပြန်လည်ပြင်ဆင် တည်ဆောက်ရန် အာဆီယံနှင့်အိန္ဒိယ၏ ထောက်ခံ မှုကို ရရှိထားကြောင်း မစ္စတာမာရစ်က သတင်းထောက်များကို ပြောကြားခဲ့သည်။

"မြန်မာနိုင်ငံရဲ့ ပြဿနာတွေကို စစ်ရေးနဲ့ မဖြေရှင်းနိုင်ပါဘူး။ ဒါပေမယ့် ထိရောက်တဲ့ ဆွေးနွေးညှိနှိုင်းမှုနဲ့ ဖြေရှင်း နိုင်ပါတယ်" ဟု မာရစ်က ပြောကြားခဲ့သည်။

မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီလက တပ်မတော်က အာဏာကို ရယူခဲ့ချိန်ကစပြီး တိုင်းရင်းသား လက်နက်ကိုင်အဖွဲ့များ အပြင် အတိုက်အခံ အင်အားစုများနှင့် မြန်မာ့တပ်မတော်အကြား တိုက်ပွဲများ ပြင်းထန်စွာ ဖြစ်ပွားလျက်ရှိသည်။

အဆိုပါ တိုက်ပွဲများအနက် ထိုင်း-မြန်မာ အာရှကုန်သွယ်ရေးလမ်းတွင် ကရင်လက်နက်ကိုင် KNU နှင့် မြန်မာ့တပ် မတော်ကြား တိုက်ပွဲများကြောင့် နှစ်နိုင်ငံနယ်စပ်ကုန်သွယ်ရေးများ ရပ်တန့်နေရပြီး ဒေါ်လာသန်းနှင့်ချီ ဆုံးရှုံးနစ် နာလျက်ရှိနေသည်။

Source: ဘန်ကောက်ပို့စ်

CNI International News

တိုကျို၊ စက်တင်ဘာ ၁၇

ဂျပန်နိုင်ငံတွင် အသက် ၆၅ နှစ်နှင့်အထက် သက်ကြီးပိုင်း လူဦးရေသည် ၃၆ ဒသမ ၂၅ သန်းအထိ စံချိန်တင် မြင့်တက်လာခဲ့သဖြင့် ထိုပမာဏသည် ဂျပန်လူဦးရေ၏ ၃ ပုံ ၁ ပုံနီးပါးရှိလာကြောင်း အယ်လ်ဂျာဇီးယားမှ ဖော်ပြခဲ့သည်။

ဂျပန်ပြည်ထဲရေးနှင့် ဆက်သွယ်ရေးဝန်ကြီးဌာန၏ စက်တင်ဘာ ၁၅ ရက် ထုတ်ပြန်ချက်တွင် ဂျပန်၏ သက်ကြီး ပိုင်း လူဦးရေသည် နိုင်ငံ့လူဦးရေ စုစုပေါင်း၏ ၂၉ ဒသမ ၃ ရာခိုင်နှုန်းရှိလာကြောင်း ခန့်မှန်းဖော်ပြထားသည်။

ထိုပမာဏအရ အခြားနိုင်ငံများ သို့မဟုတ် ဒေသများတွင်ရှိသည့် သက်ကြီးပိုင်း လူဦးရေနှင့် အချိုးကျနှိုင်းယှဉ်ပါက ၁၀၀,၀၀၀ ကျော် ပိုမိုများပြားနေသည်။

ဂျပန်တွင် အသက် ၆၅ နှစ်နှင့်အထက် အမျိုးသမီးဦးရေ ၂၀ ဒသမ ၅၃ သန်းရှိပြီး အမျိုးသားဦးရေ ၁၅ ဒသမ ၇၂ သန်းရှိသည်ဟု ဝန်ကြီးဌာနက ပြောကြားခဲ့သည်။

ပြီးခဲ့သည့်နှစ်အတွင်း ဂျပန်တွင် အလုပ်လုပ်ကိုင်နေကြသည့် သက်ကြီးပိုင်း လူဦးရေ ၉ ဒသမ ၁၄ သန်းအထိ စံချိန် တင်ရှိခဲ့ပြီး ထိုပမာဏအရ ဂျပန်၏ လုပ်သား ၇ ဦးလျှင် ၁ ဦးမှာ သက်ကြီးပိုင်း လုပ်သားဖြစ်နေသည်။

ဂျပန်သက်ကြီးရွယ်အို တစ်ဦးကိုတွေ့ရစဉ်

ဂျပန်နိုင်ငံသည် အလုပ်လုပ်ကိုင်နိုင်စွမ်းရှိသည့် လူငယ်နှင့် လူလတ်ပိုင်း အရေအတွက် ကျဆင်းနေပြီး သက်ကြီး ပိုင်း လူပုဂ္ဂိုလ်များအတွက် ကျန်းမာရေးစောင့်ရှောက်မှုနှင့် လူမှုဖူလုံရေး ကုန်ကျစရိတ်များ မြင့်တက်မှုနှင့် ရင်ဆိုင် နေရသည်။

အောက်တိုဘာ ၁ ရက်က ဂျပန်၏ လူဦးရေသည် တစ်နှစ်အတွင်း ၅၉၅,၀၀၀ ကျဆင်းသွားခဲ့ပြီး ၁၃ နှစ်ဆက်တိုက် လူဦးရေ ကျဆင်းမှုဖြစ်ခဲ့သည်။

တိုကျိုမြို့တော် အခြေစိုက် အမျိုးသားလူဦးရေအင်စတီကျုနှင့် လူမှုလုံခြုံရေး သုတေသနဌာနကမူ ၂၀၄၀ ပြည့်နှစ် တွင် ဂျပန်တွင် သက်ကြီးပိုင်းလူဦးရေ အရေအတွက်သည် နိုင်ငံ့လူဦးရေ စုစုပေါင်း၏ ၃၄ ဒသမ ၈ ရာခိုင်နှုန်းအထိ ရှိလာလိမ့်မည်ဟု ခန့်မှန်းထုတ်ပြန်ခဲ့သည်။

ပြီးခဲ့သည့်နှစ်က တိုကျိုမြို့တော်ရှိ ကျွမ်းကျင်ပညာရှင်များအဖွဲ့ဖြစ်သော Recruit Works အင်စတီကျုက ထုတ်ပြန်သည့် လေ့လာချက်တွင်လည်း ဂျပန်သည် လူဦးရေ လျော့ကျလာမှုကြောင့် ၂၀၄၀ ပြည့်နှစ်တွင် လုပ်သား အင်အား ပြတ်လပ်မှုသည် ၁၁ သန်းကျော် ရှိလာလိမ့်မည်ဟုလည်း ဖော်ပြခဲ့သည်။

Source: အယ်လ်ဂျာဇီးယား

CNI International News

ပေကျင်း၊ စက်တင်ဘာ ၁၄

တရုတ်နိုင်ငံတွင် လုပ်သားအင်အား လျော့နည်းလာမှုကို ဖြေရှင်းရန် ကြိုးပမ်းနေချိန်၌ အလုပ်မှ အငြိမ်းစားယူရ မည့် ဥပဒေပြဋ္ဌာန်းချက်ကို ပြင်ဆင်ပြီး အငြိမ်းစားယူရမည့် အသက်အရွယ်အား တိုးမြှင့်ရန် အမျိုးသား ပြည်သူ့လွှတ်တော်က စက်တင်ဘာ ၁၃ ရက်တွင် ဆုံးဖြတ်ခဲ့သည်ဟု Nikkei Asia မှ ဖော်ပြခဲ့သည်။

အငြိမ်းစားယူသည့် အသက်အရွယ်ကို လာမည့် ၁၅ နှစ်အတွင်း တဖြည်းဖြည်းချင်း တိုးမြှင့်သွားမည်ဖြစ်သည်။

ထို့နောက် white-collar job ဖြစ်သည့် ရုံးခန်းထဲတွင် လုပ်ရသော အလုပ်အကိုင်များကို လုပ်ကိုင်သည့် အမျိုးသား များအတွက် အငြိမ်းစားယူသော အသက်အရွယ်အား ၆၀ မှ ၆၃ နှစ်အထိ တိုးမြှင့်မည်ဖြစ်ကာ အမျိုးသမီးများ အငြိမ်းစားယူသည့် အသက်အရွယ်ကို ၅၅ နှစ်မှ ၅၈ နှစ်အထိ တိုးမြှင့်သွားမည်ဖြစ်သည်။

 blue-collar job ခေါ် အခြေခံ အလုပ်အကိုင် အမျိုးအစားများကို လုပ်ကိုင်သည့် အမျိုးသမီးများအတွက် အငြိမ်းစားယူရမည့် အသက်အရွယ်ကို ၅၀ နှစ်မှ ၅၅ နှစ်အထိ တိုးမြှင့်သွားမည်ဖြစ်သည်။

လက်ရှိ တရုတ်၏ အငြိမ်းစားယူသည့် အသက်အရွယ် သတ်မှတ်ချက်သည် ကမ္ဘာပေါ်တွင် အနိမ့်ဆုံးနိုင်ငံများထဲ တွင် ပါဝင်နေပြီး ယခုအပြောင်းအလဲသည် ၁၉၅၀ ပြည့်နှစ်နောက်ပိုင်း ပထမဆုံးအကြိမ် ပြောင်းလဲမှုဖြစ်သည်။

တရုတ်အမျိုးသားများကို တွေ့ရစဉ်

စက်တင်ဘာ ၁၃ ရက်က ထုတ်ပြန်သည့် အစီအစဉ်အရ အငြိမ်းစားယူသည့် အသက်အရွယ် အပြောင်းအလဲကို ၂၀၂၅ ခုနှစ်၊ ဇန်နဝါရီလ ၁ ရက်မှ စတင် အကျုံးဝင် သက်ရောက်မည်ဖြစ်သည်။

လာမည့် ၁၅ နှစ်အတွင်း လအနည်းငယ် ကြာမြင့်ချိန်တိုင်းတွင် အငြိမ်းစားယူသည့် အသက်အရွယ်များကို တဖြည်းဖြည်းစီ တိုးမြှင့်သွားမည်ဖြစ်ကြောင်း နိုင်ငံပိုင်မီဒီယာက ဖော်ပြခဲ့သည်။

ပြဋ္ဌာန်းထားသည့် ဥပဒေအရ သတ်မှတ်ထားသော အသက်အရွယ်မတိုင်မီ အလုပ်မှ အငြိမ်းစားယူခွင့်ကို ခွင့်ပြု မည်မဟုတ်ဘဲ သတ်မှတ်ထားသည့် အသက်မပြည့်မီ အလုပ်မှ ယာယီအငြိမ်းစားယူသော ကာလကို ၃ နှစ်ကြာ သတ်မှတ်ပေးထားသည်ဟု ဆင်ဟွာသတင်းအေဂျင်စီက ဖော်ပြခဲ့သည်။

၂၀၃၀ ပြည့်နှစ်မှစပြီး ဝန်ထမ်းများသည် ပင်စင်စုငွေများကို ရယူနိုင်ရန်အတွက် လူမှုလုံခြုံရေးစနစ်တွင် စုငွေများ ပိုမို အပ်နှံရလိမ့်မည်ဖြစ်ကာ ၂၀၃၉ ခုနှစ်တွင်မူ ဝန်ထမ်းများသည် ပင်စင်စုငွေ အနှစ် ၂၀ စာ ရှိရမည်ဖြစ်သည်။

တရုတ်အမျိုးသမီးများကို တွေ့ရစဉ်

တရုတ်၏ နိုင်ငံတော် ပင်စင်စုငွေ ရန်ပုံငွေသည် ၂၀၃၅ ခုနှစ်တွင် ကုန်ခန်းသွားလိမ့်မည်ဖြစ်ကြောင်း တရုတ်လူမှု  သိပ္ပံအကယ်ဒမီက ၂၀၁၉ ခုနှစ်တွင် ပြောကြားခဲ့သည်။

ထိုခန့်မှန်းချက်သည် တရုတ်၏ စီးပွားရေးကို ပြင်းထန်စွာ ထိခိုက်စေခဲ့သည့် COVID-19 ကပ်ရောဂါ မတိုင်မီ  အချိန်က ခန့်မှန်းချက်ဖြစ်သည်။

ယခု ကြေညာချက် ထွက်ပေါ်လာပြီးနောက် တရုတ်၏ လူမှုမီဒီယာများတွင် ဝေဖန်မှုများ ထွက်ပေါ်လာခဲ့ပြီး လာမည့် ၁၀ နှစ်တွင်လည်း ပြည်သူများကို အသက် ၈၀ အရွယ်အထိ အလုပ်လုပ်ခိုင်းမည့် အပြောင်းအလဲမျိုး ရှိလာနိုင်ကြောင်း Weibo လူမှုမီဒီယာ အသုံးပြုသူတစ်ဦးက ရေးသားခဲ့သည်။

Source: Nikkei Asia

CNI International News

ပေကျင်း၊ စက်တင်ဘာ ၁၁

တရုတ်အစိုးရက အာဖရိကနိုင်ငံပေါင်း ၃၀ ကျော်ကို အတိုးမဲ့ချေးငွေများ ထုတ်ပေးမည်ဖြစ်ကြောင်း ကြေညာခဲ့ သော်လည်း ထိုအစီအစဉ်သည် အာဖရိကနိုင်ငံများ၏ အလုံးစုံ ကြွေးမြီ ဝန်ထုပ်ဝန်ပိုးကို လျှော့ချရန် အနည်းငယ် သာ ထိရောက်မှုရှိသည်ဟု လေ့လာသူများက ပြောကြားခဲ့ကြောင်း SCMP မှ ဖော်ပြခဲ့သည်။

ပြီးခဲ့သည့် သီတင်းပတ်က ဘေကျင်း (Beijing) မြို့တော်တွင် ပြုလုပ်ခဲ့သည့် တရုတ်-အာဖရိက ဖွံ့ဖြိုးတိုးတက်ရေး ဖိုရမ် (FOCAC) ညီလာခံ၌ ယခုနှစ်ကုန်ပိုင်းမှစပြီး အာဖရိကနိုင်ငံ ၃၃ နိုင်ငံကို အစိုးရအချင်းချင်း အတိုးမဲ့ချေးငွေ များ ထုတ်ပေးသွားမည်ဖြစ်ကြောင်း တရုတ်က ပြောကြားခဲ့သည်။

အတိုးမဲ့ချေးငွေ ထုတ်ပေးမည့် အစီအစဉ်သည် FOCAC ညီလာခံတွင် အမြဲလိုလို အဓိကဆွေးနွေးခဲ့သည့် အကြောင်းအရာတစ်ခုဖြစ်ခဲ့သည်။

၂၀၂၂ ခုနှစ်ကလည်း တရုတ်သည် အာဖရိကနိုင်ငံ ၁၇ နိုင်ငံ၏ ချေးငွေ ၂၃ ခုကို အကြွေးများ လျှော်ပစ်မည် ဖြစ်ကြောင်း ကြေညာခဲ့ပြီး ထိုအစီအစဉ်သည် ၂၀၂၁ ခုနှစ်က စတင်လုပ်ဆောင်ခဲ့သည့် အစီအစဉ်၏ တစ်စိတ် တစ်ပိုင်း ဖြစ်သည်။

တရုတ်နဲ့အာဖရိကနိုင်ငံများ ညီလာခံကိုတွေ့ရစဉ်

ထိုချေးငွေများကို တရုတ်၏ ပြည်ပအကူအညီပေးရေး အေဂျင်စီဖြစ်သည့် တရုတ် နိုင်ငံတကာ ဖွံ့ဖြိုးတိုးတက်ရေး ပူးပေါင်းဆောင်ရွက်ရေး အေဂျင်စီက ကိုင်တွယ်လုပ်ဆောင်ခဲ့ခြင်းဖြစ်သည်။

သို့သော် ထိုသို့ အတိုးမဲ့ချေးငွေ ထုတ်ပေးမည့် အစီအစဉ်သည် အာဖရိကနိုင်ငံများကို ထုတ်ချေးထားသည့် တရုတ်၏ ချေးငွေ စုစုပေါင်းနှင့် နှိုင်းယှဉ်ပါက ၅ ရာခိုင်နှုန်းသာ ရှိကြောင်း လေ့လာသုံးသပ်သူများက ပြောကြား ခဲ့သည်။

တရုတ်၏ အခြားချေးငွေ အများစုတွင်  China Exim ဘဏ်နှင့် China Development ဘဏ်တို့ အပါအဝင် တရုတ် အစိုးရ၏ မူဝါဒများကို မြှင့်တင်နေသည့် နိုင်ငံပိုင်ဘဏ်များထံမှဖြစ်ပြီး ချေးငွေစီမံကိန်း အများစုမှာလည်း တရုတ် ၏ ကမ္ဘာလံးဆိုင်ရာ ကုန်သွယ်ရေးနှင့် အခြေခံအဆောက်အအုံ ကွန်ရက်ဖြစ်သည့် Belt and Road Initiative အစီအစဉ်၏ အောက်တွင်ရှိနေသည့် စီမံကိန်းများဖြစ်သည်။

 ရှီကျင့်ဖျင်နဲ့ အာဖရိကနိုင်ငံများမှ ခေါင်းဆောင်များကိုတွေ့ရစဉ်

ထိုသို့ အတိုးမဲ့ချေးငွေများ ထုတ်ချေးခြင်းနှင့် အကြွေးအချို့ကို လျှော်ပစ်ခြင်းတို့သည် တရုတ်၏ ကြွေးမြီ ထောင်ချောက် သံတမန် ပရိယာယ်နှင့်ပတ်သက်သည့် စွပ်စွဲချက်များကို လျော့ပါးစေရန် ဖြစ်နိုင်သည်ဟု ကျွမ်းကျင်သူများက ယူဆခဲ့သည်။

တရုတ်အစိုးရကမူ အာဖရိကတိုက်၏ ကြွေးမြီပြသနာကို ဖြေရှင်းရာတွင် ကမ္ဘာ့ဘဏ်ကဲ့သို့ ငွေကြေးအဖွဲ့အစည်း များကလည်း မျှဝေထမ်းဆောင်ရန် လိုအပ်ကြောင်း ပြောကြားခဲ့သည်။

Source: SCMP

CNI International News

ပေကျင်း၊ စက်တင်ဘာ ၆

တရုတ်သမ္မတ ရှီကျင့်ဖျင် (Xi Jinping) က အာဖရိကအတွက် ဒေါ်လာ ၅၁ ဘီလျံနီးပါး ငွေကြေးထောက်ပံ့မှု လုပ်သွားမည်ဟု ကမ်းလှမ်းခဲ့ကြောင်း ရိုက်တာမှ ဖော်ပြခဲ့သည်။

အဆိုပါ ထောက်ပံ့မှုနှင့်အတူ ကမ္ဘာ့ဒုတိယမြောက် အလျင်မြင်ဆုံး တိုးတက်မှုရှိနေသည့် တိုက်ကြီးတစ်တိုက် ဖြစ်သော  အာဖရိကတိုက်အတွက် တရုတ်၏ ထောက်ပံ့မှုများကို အရှိန်တင်သွားမည်ဟု စက်တင်ဘာ ၅ ရက်က ကတိပြုခဲ့သည်။

ထို့ပြင် တရုတ်သည် အာဖရိကတွင် အခြေခံ အဆောက်အအုံ စီမံကိန်းများကို ပိုမိုထောက်ပံ့ ပေးသွားမည်ဖြစ်ပြီး အလုပ်အကိုင်ပေါင်း ၁ သန်းခန့်ကို ဖန်တီးပေးမည်ဟုလည်း ရှီက ကတိပြုခဲ့သည်။

ကမ္ဘာ့အကြီးဆုံး ငွေထုတ်ချေးသည့် နိုင်ငံဖြစ်သည့် တရုတ်သည် အခြေခံ အဆောက်အအုံများအတွက် ငွေကြေး ထောက်ပံ့မှုပေးနေသော အစီအစဉ်ကို လျှော့ချခဲ့ပြီး တရုတ်ကုမ္ပဏီများ ရင်းနှီးမြှုပ်နှံထားသည့် ခေတ်မီ အစိမ်း ရောင် နည်းပညာများ (သဘာဝပတ်ဝန်းကျင်ကို မထိခိုက်စေမည့် နည်းပညာများ)ကို ဖွံ့ဖြိုးဆဲနိုင်ငံများအား ရောင်းချရေးကိုသာ အာရုံစိုက် လုပ်ဆောင်လာခဲ့သည်။

ရှီကျင့်ဖျင်ကို တွေ့ရစဉ်

ရှီက သယံဇာတပေါကြွယ်ဝသည့် အာဖရိကတိုက်တွင် အခြေခံ အဆောက်အအုံ စီမံကိန်း ၃၀ ခန့်ကို ဆက်လက် လုပ်ဆောင်သွားမည်ဖြစ်ပြီး ယွမ် ၃၆၀ ဘီလျံ(အမေရိကန်ဒေါ်လာ ၅၀ ဒသမ ၇၀ ဘီလျံ)ကို ငွေကြေးထောက်ပံ့ ပေးမည်ဟု ကမ်းလှမ်းခဲ့သည်။

"တရုတ်ဟာ စက်မှုကဏ္ဍ၊ စိုက်ပျိုးမွေးမြူရေးကဏ္ဍ၊ အခြေခံ အဆောက်အအုံ၊ ကုန်သွယ်ရေးနဲ့ ရင်းနှီးမြှုပ်နှံမှု ကဏ္ဍတွေမှာ အာဖရိကနဲ့အတူ ပူးပေါင်းဆောင်ရွက်မှုတွေ မြှင့်တင်ဖို့ အသင့်ပါပဲ" ဟု ရှီက ဘေကျင်းမြို့တော်တွင် ပြုလုပ်သည့် တရုတ်-အာဖရိကညီလာခံသို့ တက်ရောက်လာသော ကိုယ်စားလှယ်များကို ပြောကြားခဲ့သည်။

ထို့ပြင် တရုတ်နှင့် အာဖရိကအကြား ကုန်းကြောင်း-ရေကြောင်း ဆက်သွယ်ရေးလမ်းကြောင်းများနှင့် ဖွံ့ဖြိုး တိုးတက်ရေး ကွန်ရက်တစ်ခုရှိနေပြီး တရုတ်ကန်ထရိုက်တာများ အနေဖြင့် အာဖရိကတွင် COVID-19 ကပ်ရောဂါ ကာလက ရပ်နားထားခဲ့သည့် လုပ်ငန်းအစီအစဉ်များကို ပြန်လည်လုပ်ဆောင်ရန် ရှီက တိုက်တွန်းခဲ့သည်။

ပြီးခဲ့သည့်နှစ်ကလည်း တရုတ်သည် အာဖရိကအတွက် ဒေါ်လာ ၄ ဒသမ ၆၁ ဘီလျံ တန်ကြေးရှိသည့် ချေးငွေကို ထုတ်ချေးပေးရန် အတည်ပြုခဲ့သည်။

 ရှီကျင့်ဖျင်နဲ့ အာဖရိက ခေါင်းဆောင်များကို တွေ့ရစဉ်

အာဖရိကအတွက် ယွမ် ၂၁၀ ဘီလျံကို အတိုးနှုန်းများဖြင့် ထုတ်ချေးသွားမည်ဖြစ်ပြီး ယွမ် ၇၀ ဘီလျံကိုမူ တရုတ် ကုမ္ပဏီများတွင် ရင်းနှီးမြှုပ်နှံသွားမည်ဖြစ်ကာ စစ်ရေးအကူအညီနှင့် အခြား စီမံကိန်းများတွင်လည်း ငွေကြေးများ ထောက်ပံ့ပေးသွားမည်ဖြစ်ကြောင်း ရှီက ပြောကြားခဲ့သည်။

တရုတ်တွင် လက်ရှိ ကျင်းပနေသည့် တရုတ်-အာဖရိက ပူးပေါင်းဆောင်ရွက်ရေးဖိုရမ်သည် တရုတ်နှင့် အာဖရိက နိုင်ငံများအကြား ၃ နှစ် စီမံကိန်းအဖြစ် ရေးဆွဲထားခြင်းဖြစ်သည်။

ထိုစီမံကိန်းတွင် ထိုင်ဝမ်နှင့် ဆက်ဆံရေး ထူထောင်ထားသည့် အက်စ်ဝါတီနီ (Eswatini) နိုင်ငံမှလွဲပြီး ကျန်  အာဖရိကနိုင်ငံများအားလုံး ပါဝင်သည်။

Source: ရိုက်တာ

CNI International News

ဘေကျင်း၊ ဩဂုတ် ၂၉

တရုတ်နိုင်ငံတွင် စားသောက်ဆိုင်လုပ်ငန်းများသည် အမြတ်ငွေ လျော့ကျမှု ပြဿနာများနှင့် ရင်ဆိုင်နေရပြီး ကြွေးမြီကင်းရှင်းစွာဖြင့် လုပ်ငန်းများ လည်ပတ်နိုင်ရန် ရုန်းကန်နေရသည်ဟု South China Morning Post မှ ဖော်ပြခဲ့သည်။

အသက် ၃၂ နှစ်အရွယ် လျောင်ဟွေ (Liao Hui) အမည်ရှိ စားသောက်ဆိုင် လုပ်ငန်းရှင် အမျိုးသမီးသည် အမြတ် ငွေများ ဆက်တိုက် ကျဆင်းလာခဲ့သဖြင့် ယခုနှစ် အစောပိုင်းကစပြီး ရှန်ကျန်း (Shenzhen) မြို့တွင် ဖွင့်လှစ်ထား သည့် စီချွမ် (Sichuan) အစားအစာများ ရောင်းချသော စားသောက်ဆိုင် ၅ ဆိုင်ထဲမှ ၄ ဆိုင်ကို ပိတ်ရသည့် အခြေအနေသို့ ရောက်ရှိခဲ့သည်။

"နောက်ဆုံးကျန်တဲ့ တစ်ဆိုင်မှာလည်း အစားအစာ စျေးနှုန်းတွေကို လျှော့ချထားရပါတယ်။ စားသောက်ဆိုင် လုပ်ငန်းတစ်ခုလုံးဟာ အခုဆိုရင် လျှော့စျေးတွေ အပြိုင်အဆိုင်ပေးနေပြီး လုပ်ငန်း ဆက်လက် လည်ပတ်ဖို့ တော်တော်ကို ရုန်းကန်နေရပါတယ်" ဟု ၎င်းက ပြောကြားခဲ့သည်။

တရုတ်က စားသောက်ဆိုင်ကို တွေ့ရစဉ်

တရုတ်၏ အခြားမြို့ကြီးများရှိ စားသောက်ဆိုင် ပိုင်ရှင်များသည်လည်း အကြွေးကင်းကင်းဖြင့် လုပ်ငန်းလည်ပတ် ရန် ကြီးမားသည့် စိန်ခေါ်မှုများနှင့် ရင်ဆိုင်နေရပြီး အားနည်းနေသည့် စီးပွားရေး အလားအလာများကို မြင်တွေ့ နေရချိန်တွင် စျေးကွက်ပြိုင်ဆိုင်မှု ပိုမိုပြင်းထန်လာသည်နှင့်အမျှ အမြတ်ငွေများ လျော့ကျခြင်း သို့မဟုတ် ငွေကြေးဆုံးရှုံးမှုများခြင်း အစရှိသည့် အခြေအနေများကို ကြုံတွေ့နေရသည်။

ဘေကျင်းတွင် နှစ်စဉ် ဝင်ငွေ စုစုပေါင်း ယွမ် ၂ သန်းကျော်ရှိနေသည့် အစားအစာရောင်းချသော ကုမ္ပဏီများ၏ အမြတ်ငွေများသည် ယခုနှစ်ပထမ ၆ လပတ် ကာလအတွင်း ပြီးခဲ့သည့်နှစ်နှင့် နှိုင်းယှဉ်ပါက ၈၈ ဒသမ ၈ ရာခိုင်နှုန်းအထိ ကျဆင်းသွားခဲ့ခြင်းဖြစ်သည်။

ထို့ပြင် တရုတ်၏ စီးပွားရေး နှေးကွေးမှုကြောင့် တရုတ်စားသုံးသူများသည် စားသောက်ဆိုင်များတွင် လာရောက် စားသုံးမှုကို လျှော့ချခဲ့သဖြင့် တစ်ချိန်က ခိုင်မာအားကောင်းခဲ့သည့် စားသောက်ဆိုင် လုပ်ငန်းအတွက် ကြီးမား သော ထိုးနှက်ချက်ဖြစ်ခဲ့ကာ ပြည်တွင်းစီးပွားရေးအပေါ် ကြီးမားစွာ သက်ရောက်ခဲ့သည်။

တရုတ်က စားသောက်ဆိုင်ကို တွေ့ရစဉ်

ထို့ကြောင့် ဟော့ပေါ့ဆိုင်များမှ ကော်ဖီဆိုင်များအထိ စားသောက်ဆိုင် ပိုင်ရှင်များသည် အစားအစာ စျေးနှုန်းများ ကို အပြိုင်အဆိုင်လျှော့ချပြီး စားသုံးသူများအား ဆွဲဆောင်နေသဖြင့် စျေးကွက်ယှဉ်ပြိုင်မှု ပိုမိုပြင်းထန်လာခဲ့သည်။

ဇွန်လက Song Hotpot Factory ဟော့ပေါ့ဆိုင်သည် စွပ်ပြုတ်ဟင်းရည်များအတွက် အနိမ့်ဆုံးစျေးနှုန်းကို ၈ ယွမ်၊ အသားဟင်းလျာများ၏ အနိမ့်ဆုံးစျေးနှုန်းကို ၉ ဒသမ ၉ ယွမ်နှင့် ဟင်းသီးဟင်းရွက်များ၏ အနိမ့်ဆုံးစျေးနှုန်းကို ၆ ယွမ်အထိ လျှော့ချပေးခဲ့သည်။

"အစားအစာ စျေးနှုန်းတွေက တစ်ဝက်လောက် လျှော့ချလိုက်တော့ စားသုံးသူတွေဘက်က အဆင်ပြေသွားတာ ပေါ့။ ကျမ ဒီဟော့ပေါ့ဆိုင်မှာ ၂၀၂၂ ခုနှစ်ကတည်းက စားလာတာပါ။ အရင်က တစ်ယောက်စာဆိုရင် ပျမ်းမျှ ယွမ် ၁၅၀ ကုန်ကျပါတယ်။ အခုနှစ်မှာတော့ လျှော့စျေးတွေကြောင့် တစ်ယောက်စာကို ယွမ် ၁၀၀ တောင်မကုန်တော့ ပါဘူး" ဟု အသက် ၂၂ နှစ်အရွယ် ကျောင်းသူတစ်ဦးဖြစ်သည့် ဆမ်မီ ချန်း (Sammy Chen) က ပြောကြားခဲ့သည်။

Source: SCMP

CNI International News

ဘေကျင်း၊ ဩဂုတ် ၂၂

တရုတ်နိုင်ငံတွင် သန်းနှင့်ချီသည့် ဘွဲ့ရပညာတတ် လူငယ်များအကြား အလုပ်လက်မဲ့နှုန်း မြင့်တက်နေကြောင်း ရိုက်တာမှ ဖော်ပြခဲ့သည်။

ထို့နောက် တရုတ် ဘွဲ့ရပညာတတ် လူငယ်များသည် အလုပ်အကိုင်ရရန် လစာငွေနည်းသည့် အလုပ်များကိုသာ ဝင်လုပ်နေပြီး အချို့လူငယ်များဆိုလျှင် မိဘများ၏ ပင်စင်ငွေများကိုပင် မှီခိုနေရခြင်းကြောင့် အလုပ်သမား လူတန်းစား အသစ်တစ်ခုကို ပေါ်ပေါက်စေခဲ့သည်။

တရုတ်နိုင်ငံတွင် ၂၀၂၁ ခုနှစ်ကစပြီး စီးပွားရေး မတည်ငြိမ်မှုကြောင့် အပြီးသတ် မဆောက်လုပ်နိုင်သေးသည့် လူနေအိမ် ဆောက်လုပ်ရေးလုပ်ငန်းခွင်များ သန်းနှင့်ချီရှိခဲ့ပြီး လက်စမသတ်နိုင်သေးသော ထိုလူနေတိုက်ခန်း များကို "အမြီးပိုင်း ပုတ်နေသည့် အဆောက်အအုံများ (rotten-tail buildings)” ဟု ခေါ်ဆိုခဲ့သည်။

လက်ရှိတွင် အလုပ်လက်မဲ့လူငယ်များ မြင့်တက်နေသဖြင့် ထိုစကားလုံးကို အငှားယူသုံးသည့် အနေဖြင့် အမြီးပိုင်း ပုတ်နေသည့် ကလေးများ (rotten-tail kids)ဟူသော စကားလုံးဖြင့် အလုပ်သမား လူတန်းစားအသစ်တစ်ခု ပေါ်ထွက်လာခဲ့သည်။

တရုတ်လူငယ်များ အလုပ်အကိုင်ရှာဖွေနေကြစဉ်

တရုတ်၏ ဘဏ္ဍာရေး၊ နည်းပညာနှင့် ပညာရေး ကဏ္ဍများအပေါ် စည်းမျဉ်းစည်းကမ်း တင်းကြပ်မှုများနှင့် COVID-19 ကပ်ရောဂါကြောင့် ထိခိုက်ခဲ့ရသည့် အလုပ်သမားစျေးကွက်တွင် ယခုနှစ်အတွင်း တရုတ်ဘွဲ့ရလူငယ် အများအပြားသည် အလုပ်အကိုင်ရရှိရန် ရုန်းကန်နေရသည်။

၂၀၂၃ ခုနှစ်၊ ဧပြီလအတွင်း အသက် ၁၆ နှစ်မှ ၂၄ နှစ်အရွယ်ရှိ တရုတ်လူငယ် သန်း ၁၀၀ အတွက် အလုပ်အကိုင် ရရှိနိုင်မှု နှုန်းထားမှာ ၂၀ ရာခိုင်နှုန်းသာရှိခဲ့သည်။ 

ထို့နောက် ၂၀၂၃ ခုနှစ်၊ ဇွန်လတွင် ၂၁ ဒသမ ၃ ရာခိုင်နှုန်း ရှိခဲ့သည်ဟု တရားဝင် ထုတ်ပြန်သည့် စာရင်းများတွင် ဖော်ပြထားသည်။

အရေအတွက်နှင့် ဖော်ပြရပါက တရုတ်လူငယ် သန်း ၁၀၀ အတွက် အလုပ်အကိုင် သန်း ၂၀ သာရှိနေသည့် သဘောဖြစ်သည်။

၂၀၂၄ ခုနှစ်တွင်လည်း အလုပ်လက်မဲ့နှုန်း မြင့်တက်လာခဲ့ပြီး တရုတ်လူငယ်သန်း ၁၀၀ အတွက် အလုပ်အကိုင် ရရှိနိုင်သည့် နှုန်းထားမှာ ၁၇ ဒသမ ၁ ရာခိုင်နှုန်းသာ ရှိခဲ့သည်။

တရုတ်လူငယ်များ အလုပ်အကိုင်ရှာဖွေနေကြစဉ်

တရုတ်၏ အိမ်ခြံမြေစျေးကွက် အကျပ်အတည်းကြောင့် အာဏာပိုင်များက စီးပွားရေးကို ချိန်ညှိလုပ်ဆောင်နေချိန် တွင် ယခုနှစ်နွေရာသီအတွင်း တရုတ်တွင် ဘွဲ့ယူခဲ့သည့် လူငယ်ပေါင်း ၁၁ ဒသမ ၇၉ သန်းရှိခဲ့သည်။

တရုတ်သမ္မတ ရှီကျင့်ဖျင် (Xi Jinping) သည် လူငယ်များအတွက် အလုပ်အကိုင် ရရှိစေရေးသည် ဦးစားပေးကိစ္စ ဖြစ်ကြောင်း မကြာခဏ ပြောကြားခဲ့သည်။

ထို့နောက် အစိုးရအဖွဲ့သည် အလုပ်အကိုင် ပြပွဲများကဲ့သို့ လူငယ်များအတွက် အလုပ်များရရှိစေရန် နည်းမျိုးစုံ ကြိုးပမ်းခဲ့သော်လည်း အလုပ်လက်မဲ့နှုန်း မြင့်တက်နေခြင်းဖြစ်သည်။

"တရုတ်ဘွဲ့ရလူငယ် အများစုဟာ သာမန်လူတွေထက် အလုပ်အကိုင် အခွင့်အလန်းတွေ ပိုမိုကောင်းမွန်တဲ့ အလားအလာကို မျှော်လင့်ခဲ့ကြပါတယ်။ အခုတော့ ဘွဲ့ရရင်တောင် အလုပ်ရဖို့ မသေချာတော့တဲ့ အခြေအနေနဲ့ ကြုံတွေ့နေရပါတယ်" ဟု မီချီဂန်တက္ကသိုလ်မှ လူမှုဗေဒ လက်ထောက်ပါမောက္ခတစ်ဦးဖြစ်သူ ယွမ်ကျိုး (Yun Zhou) က ပြောကြားခဲ့သည်။

Source: ရိုက်တာ

CNI International News

ကွာလာလမ်ပူ၊ ဩဂုတ် ၂၁

မလေးရှားနှင့် စင်္ကာပူနိုင်ငံတို့၏ တင်းကြပ်သည့် ဗဟိုဘဏ်မူဝါဒများကြောင့် မလေးရှားနှင့်စင်္ကာပူ ငွေကြေးများ သည် လွန်ခဲ့သည့် ၁၈ လအတွင်း အမေရိကန်ဒေါ်လာနှင့် နှိုင်းယှဉ်ပါက တန်ဖိုးများ မြင့်တက်ခဲ့ကြောင်း Nikkei Asia မှ ဖော်ပြခဲ့သည်။

အာရှနိုင်ငံများ၏ ငွေကြေးများအကြား မလေးရှား၏ ရင်းဂစ်ငွေကြေးနှင့် စင်္ကာပူဒေါ်လာတို့သည် အမေရိကန် ဒေါ်လာနှင့် နှိုင်းယှဉ်ပါက စွမ်းဆောင်ရည်အမြင့်ဆုံး အာရှငွေကြေးများဖြစ်လာသည်။

အမေရိကန်ဗဟိုဘဏ်ကမူ အတိုးနှုန်းများ လျှော့ချဖြတ်တောက်ရန် စဉ်းစားနေချိန်တွင် မလေးရှားငွေ ရင်းဂစ်နှင့် စင်္ကာပူဒေါ်လာ တန်ဖိုးများ ခိုင်မာနေခြင်းဖြစ်သည်။

ထို့ပြင် အမေရိကန်တွင် ပြုလုပ်မည့် Jackson Hole ဆွေးနွေးပွဲမတိုင်မီ မလေးရှားနှင့် စင်္ကာပူ ဗဟိုဘဏ်များက ငွေကြေးမူဝါဒများကို တင်းကြပ်ထားခဲ့ခြင်းလည်း ဖြစ်သည်။

စီးပွားရေးလေ့လာသုံးသပ်သူများနှင့် ရင်းနှီးမြှုပ်နှံသူများသည် အမေရိကန်နိုင်ငံ၊ ဝိုင်အိုမင် (Wyoming) ပြည်နယ် Jackson Hole အပန်းဖြေစခန်းမြို့တွင် ဩဂုတ် ၂၂ ရက်မှ ၂၄ ရက်အထိ ပြုလုပ်မည့် Jackson Hole စီးပွားရေး ဆွေးနွေးပွဲ၌ အမေရိကန်ဗဟိုဘဏ်ဥက္ကဋ္ဌ ဂျရုမ်း ပေါ်ဝဲလ် (Jerome Powell) ၏ မိန့်ခွန်းပြောကြားမှုကို လေ့လာ သုံးသပ်သွားကြမည်ဖြစ်သည်။

စင်္ကာပူဒေါ်လာကို တွေ့ရစဉ်

ဩဂုတ် ၂၀ ရက်က အမေရိကန်တစ်ဒေါ်လာလျှင် မလေးရှားရင်းဂစ် ၄ ဒသမ ၃၇ ရင်းဂစ်ရှိခဲ့ပြီး ရင်းဂစ်ငွေကြေး၏ တန်ဖိုးသည် ဆက်လက်ခိုင်မာမှုရှိနေသည်။

မလေးရှားနိုင်ငံ၏ Bank Muamalat Malaysia Bhd ဘဏ်၏ စီးပွားရေးပညာရှင် ဒေါက်တာ မိုဟာမက် အက်ဖ်ဇာနီဇမ် အဗ္ဗဒူ ရာရှစ် (Mohd Afzanizam Abdul Rashid) ကလည်း အမေရိကန် တစ်ဒေါ်လာလျှင် ၄ ဒသမ ၃၇ ရင်းဂစ်မဖြစ်ခင် ၁ ဒသမ ၃၆၃၅ ရင်းဂစ်အထိ တန်ဖိုးမြင့်တက်ခဲ့ကြောင်း ပြောကြားခဲ့သည်။

လက်ရှိ ငွေလဲလှယ်မှု နှုန်းထားသည် ၂၀၂၃ ခုနှစ်၊ ဖေဖော်ဝါရီလနောက်ပိုင်း အမြင့်ဆုံး အဆင့်အထိ ရောက်ရှိခဲ့ခြင်း ဖြစ်ကြောင်း ရာရှစ်က ပြောကြားခဲ့သည်။

စင်္ကာပူဒေါ်လာသည်လည်း မလေးရှား ရင်းဂစ်(မလေးရှားငွေ)ပြီးလျှင် ဒုတိယ စွမ်းဆောင်ရည် အကောင်းဆုံး အာရှငွေကြေးဖြစ်ခဲ့ပြီး အမေရိကန်ဒေါ်လာနှင့် နှိုင်းယှဉ်ပါက ၀ ဒသမ ၂ ရာခိုင်နှုန်း မြင့်တက်ခဲ့သည်။

ဩဂုတ် ၂၀ ရက်က အမေရိကန် တစ်ဒေါ်လာလျှင် စင်္ကာပူဒေါ်လာ ၁ ဒသမ ၃၁ ဒေါ်လာရှိခဲ့ပြီး ထိုနှုန်းထားသည် ၂၀၂၃ ခုနှစ်၊ ဖေဖော်ဝါရီ ၂ ရက်နောက်ပိုင်း အမြင့်ဆုံးနှုန်းထားဖြစ်ခဲ့သည်။

Source: Nikkei Asia

CNI International News

ဘန်ကောက်၊ ဩဂုတ် ၂၀

ထိုင်းနိုင်ငံတွင် ဖွဲ့စည်းပုံအခြေခံဥပဒေဆိုင်ရာခုံရုံးက သီတင်းတစ်ပတ်အတွင်း အတိုက်အခံ Move Forward Party (MFP) ကို ဖျက်သိမ်းပြီး ဝန်ကြီးချုပ် ဆရီသာ သာဗီဆင် (Srettha Thavisin)အား ရာထူးမှထုတ်ပယ်သည့် အံ့အားသင့်ဖွယ် စီရင်ချက်နှစ်ခုကို ချမှတ်ခဲ့သည်။

အဆိုပါ အခြေအနေများက ထိုင်း၏ နိုင်ငံရေးအခင်းအကျင်းကို လှုပ်ခတ်သွားစေရုံသာမက တရားဥပဒေစိုးမိုးရေး၊ ဒီမိုကရေစီစနစ်နှင့် စီးပွားရေးအပေါ် သက်ရောက်မှုများ ဖြစ်ပေါ်ခဲ့ပြီး အချေအတင် ငြင်းခုံဆွေးနွေးမှုများလည်း ဖြစ်လာစေခဲ့သည်ဟု Thai PBS World မှ ဖော်ပြခဲ့သည်။

ထိုင်း၏ အဓိက ကုန်သွယ်ဖက် နိုင်ငံများဖြစ်သည့် အမေရိကန်နှင့် ဥရောပသမဂ္ဂတို့ကမူ ဩဂုတ် ၇ ရက်က MFP ကို ဖျက်သိမ်းပြီး ဩဂုတ် ၁၄ ရက်တွင် ဆရီသာအား ရာထူးမှဖယ်ရှားခဲ့သည့် ဖွဲ့စည်းပုံအခြေခံဥပဒေဆိုင်ရာခုံရုံး၏ စီရင်ချက်များနှင့်ပတ်သက်ပြီး စိုးရိမ်မှုများကို ဖော်ပြခဲ့သည်။

ထိုင်း၀န်ကြီးချုပ်သစ် ပေတုန်တန်ကို တွေ့ရစဉ်

ဒီမိုကရေစီနိုင်ငံများရှိ ပြည်ပမီဒီယာများကလည်း ခုံရုံး၏ စီရင်ချက်များကို သုံးသပ်နေပြီး အထူးသဖြင့် နိုင်ငံရေး ပါတီတစ်ခုအား တားမြစ်ပိတ်ပင်ခြင်းသည် ထိုင်း၏ တိုးတက်ပြောင်းလဲရေး အင်အားစုများကို အရှိန်လျော့ကျ စေရန် လုပ်ဆောင်မှု တစ်ခုဖြစ်သည်ဟု ရှုမြင်ခဲ့ကြသည်။

ထိုင်းစီးပွားရေး ပညာရှင်များနှင့် စီးပွားရေး လုပ်ငန်းရှင်များက ဝန်ကြီးချုပ်ဆရီသာ ဖယ်ရှားခံရပြီးနောက် အစိုးရသစ် ဖွဲ့စည်းနိုင်ခြင်း မရှိသေးသည့်အချိန်တွင် အာဏာလေဟာနယ် (power vacuum) ဖြစ်နေသဖြင့် ထိုအခြေအနေသည် စီးပွားရေးကဏ္ဍနှင့် ရင်းနှီးမြှုပ်နှံသူများ၏ ယုံကြည်မှုများအပေါ် သက်ရောက်စေမည်ကို စိုးရိမ်နေကြသည်။

အထူးသဖြင့် ထိုင်း၏ စီးပွားရေး ဖွံ့ဖြိုးတိုးတက်မှု နှေးကွေးနေခြင်း၊ သက်ကြီးပိုင်း လူဦးရေ များပြားလာခြင်းနှင့် ပထဝီနိုင်ငံရေး တင်းမာမှုများ မြင့်တက်နေချိန်တွင် စီးပွားရေးအပေါ် သက်ရောက်မည့် အလားအလာကို စိုးရိမ် နေကြခြင်း ဖြစ်သည်။

ထို့ကြောင့် စီးပွားရေးပညာရှင်များနှင့် လုပ်ငန်းရှင်များက အစိုးရအဖွဲ့သစ် အမြန်ဆုံးဖွံ့စည်းရန် တိုက်တွန်း ခဲ့ကြသည်။

ထိုင်းဈေးသယ်တစ်ဦးကိုတွေ့ရစဉ်

ထိုစိုးရိမ်မှုများကို လျှင်မြန်စွာ တုန့်ပြန်ဖြေရှင်းသည့် အနေဖြင့် အာဏာရညွန့်ပေါင်းအဖွဲ့မှ လွှတ်တော်အမတ် အများစု အပါအဝင် အောက်လွှတ်တော် အမတ်များသည် ဩဂုတ် ၁၆ ရက်တွင် ဝန်ကြီးချုပ်ဟောင်း သက်ဆင် ရှင်နာဝပ် (Thaksin Shinawatra) ၏ သမီးဖြစ်သည့် ဖြူးထိုင်းပါတီခေါင်းဆောင် ပေတုန်တန် ရှင်နာဝပ် (Paetongtarn Shinawatra) ကို ဝန်ကြီးချုပ်အဖြစ် ရွေးကောက်တင်မြှောက်ခဲ့သည်။

ထိုင်းနိုင်ငံ၏ အစုရှယ်ယာကုမ္ပဏီဖြစ်သည့် InnovestX Securities ကုမ္ပဏီကမူ ယခုနှစ်အတွင်း ထိုင်းနိုင်ငံ၏ စီးပွားရေး ဖွံ့ဖြိုးတိုးတက်မှု ခန့်မှန်းချက်ကို ၂ ဒသမ ၅ ရာခိုင်နှုန်းမှ ၂ ဒသမ ၃ ရာခိုင်နှုန်းအထိ လျှော့ချခဲ့သလို လာမည့်နှစ်အတွက် စီးပွားရေး ဖွံ့ဖြိုးတိုးတက်မှု ခန့်မှန်းချက်အား ၃ ရာခိုင်နှုန်းမှ ၂ ဒသမ ၇ ရာခိုင်နှုန်းအထိ လျှော့ချခဲ့သည်ဟု ကုမ္ပဏီ၏ စီးပွားရေးသုတေသနအကြီးအကဲ ပီယဆက် မာနာဆန် (Piyasak Manason) က ပြောကြားခဲ့သည်။

နိုင်ငံရေး အခြေအနေ အပြောင်းအလဲများကြောင်း ၂၀၂၅ ခုနှစ် ဘဏ္ဍာနှစ်အတွက် အစိုးရအသုံးစရိတ်သည် သီတင်းနှစ်ပတ်ကြာ နှောင့်နှေးကြန့်ကြာ သွားနိုင်သည့်အတွက် စီးပွားရေး ဖွံ့ဖြိုးတိုးတက်မှု ခန့်မှန်းချက်ကို လျှော့ချခဲ့ခြင်းဖြစ်ကြောင်း ၎င်းက ရှင်းလင်းပြောဆိုခဲ့သည်။

Source: Thai PBS World